#طوبى "جنة طوبى"
#جمان_فريد
#الجزء_123"ياربيع أيامي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#ذكر_الله
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه..
ابن القيم رحمه الله..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لقد خانَ عهدي رفاقٌ كثيرٌ
وأنتَ الرفيقُ الذي لا يَخونُ🍃
_________________________________________
بدون لايفكر ولايتردد قدم ناحيتهم وهو يمشي بعصبيه وعيونه ع عدنان كيف يكلم في غرفه وهو مبتسم لما وصل فيهم سمعها وهي ترد عليه..
"موضوع شني!؟"
وقبل ليجاوبها عدنان شاف حسين قدامه وهو يقول بأسلوب فيه حدة واستغراب تهكمي..
/ان شاء الله خير شيخ عدنان!؟
غرفه وهي مصدومه ع مفجوعه قالت في نفسها..
"حي عليا تو بيديرلي العار!"
رد عدنان ع حسين وهو يقول بإبتسامه هاديه استفزاته..
/اوووحسين افندي..كيف الحال!؟.
حسين بعصبيه..
/خليك من حالي وقولي شن عندك مع بنت عمي اللي موقفها هكي!!
عدنان بنفس الابتسامه..
/عندي معاها موضوع مهم..
حسين:الموضوع هدا ماتجيش فيه الدوة معاي!.
عدنان:لا والله الموضوع يخصها هي بالدرجة الأولى!؟
غرفه اللي كانت مستغربه جدا حست بشي من الخوف وقالت..
/في حاجة صايرة للمعرض!؟
حسين التفت عليها نص التفاته وقال..
/بري اركبي سيارتك تحركي..
برغم غضبها من اسلوبه مابتش تعاند ولاتناقشه جنبت نفسها المشاكل ومشت طول بإتجاه سيارتها وهي معصبه وقلقه في نفس الوقت وعيون عدنان تلحق فيها شافه حسين وقال..
/تسمي فيه صح اللي درته هذا!؟
شافله وقال؛نيتي صافيه وقصدي شريف وفتحت الموضوع مع خالها ورده مااقنعنيش..
رفع حسين حاجبه وقال..
/ترا شن هو رده اللي ماقنعكش!؟
عدنان وهو يمرر في نظره ع الطريق ويشوف سيارة غرفه فايته..ابتسم وقال..
/قالي ولد عمها عاطي فيها كلمة..شاف لحسين وقال..والحق حسيته يصرف فيا وخلاص لأن لو حق هكي راهو من اول مافتحت معاه الموضوع قالي ع الحاجه هادي..
حسين عقد حواجبه وحاول يتمالك اعصابه وقال..
/لامايصرفش فيك..وبنت عمي اني اولى بيها..
ابتسم عدنان وقال..
/وهي شن رايها!
قاله :شن دخلك انت!!؟ اشر عليه بسبابته وقال بوعيد..اسمعني جاي راهو اني مانعرفش نوسع بالي هلبه ماتخلنيش ندير تصرف نندم عليه..نزل يده وهو يقول..مرة تانيه كان شفتك هني ماتلوم الا نفسك..
لبس عدنان نظاراته بعدين طبطب ع كتف حسين وهو مبتسم بإستفزار ومشي طول..حسين وقتها كان خاطر ع باله يشده ويطيح فيه ضرب لكن قعد متمالك نفسه لعند ماشافه ركب سيارته وتحرك..
تنفس بغضب وتوجه لسيارته وصل فيها ركبها وتحرك طول بإتجاه حوش طوبى..
🍁وطوبى في هالوقت مع امها كاريمان في الكوجينه يتساعدوا ع تجهيز الغدي ويتبادلوا في الاحاديث..
🍃"امه وباته متلهفين لشوفتك وخوته وخواته حتى هما مشوقين واجد"
طوبى حطت صونيه كانت تمسح فيها وقالت..
/انتي مرة قلتيلي ان علاقتك بيهم مش حلوة قصدي مايديروش موقف يضايقك ولايقولوا كلمة تزعلك!؟
حطت غطا الطنجرة بعد ماعراته والتفتت عليها وهي تقول بإبتسامه..
/في وجود الصابر مايقدر يرفع عينه فيا..
طوبى بإبتسامه وهي رافعه حاجبها
/واني..اللي بيحاول يوصل فيك يتحمل مايجيه مني..
ضحكت كاريمان وعيونها تعبوا دموع بعدين قالت..
/قصدك انتي واعرة يابيبو..
طوبى برفعة حاجب قالت..
/في الحق وواجد..
ضحكت كاريمان وقدمتلها ضمتها بقوة وهي تقول..
/ياعمري..
وطوبى حطت ايديها عليها وهي مبتسمه من قلبها..
🍃🍃🍃🍃
"لالامانبوهاش تتكدر سادها هم وغم"
مطيرة بضيق:احسن..
فردوس بعتب:غير ياريتك عطيتنا علم ياعمتي بس..
مطيره بإحراج وضيق..
/ماقدرتش عارفة موقفكم كويس خفت نقوللكم تخلوني نولي في كلامي وحال عمك اللي جاني بيه يقطع القلب يابنتي والله يبكي بكي..حطت ايديها ع عيونها وقعدت تبكي..
فردوس ودموعها في عيونها قالت بكره..
/حسبنا الله ونعم الوكيل في هداكا الله لايربحه..
نزلت مطيره ايديها ورشفت بعدين قالت..
/ايه والله..شطان الرجيم هذا..
سمعوا باب الحوش الخارجي انفتح فردوس قالت..
/غرفه هادي..هدا وقت مرواحها..
لحظات وسمعوا الولاد خاشين يجروا وامهم تهزب فيهم وهي تقول..
"لاخشوا داخل"
خشوا يجروا وهما يبكوا..
فردوس بصوت عالي..
/خيرك معاهم!؟
فاتت غرفه من قدام الصاله وهي معصبه من غير ماترد..
فردوس بإستغراب:خيرها!؟
ومطيره تشوف لفردوس بقلق وعدم فهم..
"غرفه"
انصدموا الزوز لما سمعوا صوت حسين ينادي فيها بغضب..
ناضوا الزوز وطلعوا من الصاله شافوا لباب الحوش القدامي لقوه واقف وباين عليه الغضب ومازال ينادي..
/غرفه قسما بالله كان ماطلعتي نخشلك..
مطيره بصدمه..
/خيرك انت هبلت!؟
ع طلعة غرفه من الدار وهي تقول بعصبيه..
/حسين اسمع ياحسين بتصرفاتك هادي بتخليني ندير حاجات مانبيهاش..
فردوس:تي خير بلاكم انتي وياه!؟
خش حسين وهو يقول..
/شن هو الغلط اللي درته قوليلي..تبيني نشوفه جايك الجامعه وموقفك قدام الناس ونسكت!!
مطيره؛من هو هدا!؟
غرفه بعصبيه وتهكم:لاتتعارك انت وياه وديرلي العار!
حسين:عار شني شن تقولي!؟ غمض عيونه وفتحهم محاوله منه لتهدئة نفسه وقال..فضي معاه ام الشراكه واني نخش معاك شريك..
غرفه:شن لعب صغار هو!!؟
حسين؛لااللي داره هو تصرفات ناس عاقله ومحترمه!!
مطيره:تي من هو هدا يعطيه دي!
حسين:امين..
غرفه بنفاذ صبر وانزعاج..
/ماتكترش معاي دوة للجامعه معاش تجيني ويكون احسن لومعاش تجي هني..
ولفت ومشت خشت لدار وخبطت الباب بقوة..
اختها وعمتها بعد ماكان يشوفولها شافوله لقوه مركز بنظره ع الدار بعدين هز راسه ولف ومشي طلع من الحوش..
مطيره:حسين..ياحسين..
وفردوس مشت دقت ع الدار وهي تقول..
/غرفه..
والزوز مع بعض ردوا في وقت واحد..
"خليني في حالي يافردوس..فوتيني ياعمتي"
التفتت مطيره وشافت لفردوس اللي كانت تشوفلها وتبادلوا الزوز نظرات التعجب وعدم الفهم...
🍃🍃🍃🍃🍃
ومن عواصف الغرب للهدوء والاجواء العائليه الدافيه في بلاد الشرق..
قعمزوا الصابر وكاريمان وطوبى وعبد القيوم ع طاوله وحده وهما يتغدوا..
كانت هدرزتهم حلوة بس اكثر من يدوي فيها طوبى والصابر كاريمان اغلب الوقت وهي تشوف في حالة راجلها اللي كانت مفرحتها هلبه..وعبد القيوم يشوف لحالة حبيبة قلبه اللي ليه وقت ماشافش عيونها يضحكوا هكي..كان فرحان لفرحتها لدرجة لاتوصف ومن كل قلبه متمني من الله معاش يشوف عيونها الحلوة الا وهما يضحكوا والفرحة ماليتهم..
🍃بس في عيون الهم والحزن ماليهم حتى والوجه يضحك..
زي عيون نضال اللي خش هدرز ع امه وتغدا معاها بعد ماروح من الجامعه صح كان كل شويه ينكت ويمازح فيها بس هي ماكانتش تشوف لغير عيونه اللي نظرتهم واجعتها ومخليتها كارهه نفسها لأنها السبب..
بعد ماتغدا مع امه مشي طول قعمز في المربوعه ماكانش فيها حد غيره..
التلفزيون مفتوح قدامه ع قناه جايبه الاخبار الرياضيه ماكانش معاها بكل سرحان بفكره في اللي القلب هواها وجرح فراقها قاعد يتجدد كل لحظه..
شويه وخشت عليه اخته نسرين وهي تقول..
/شوف شوف من جبتلك!؟
التفت شاف جنه خاشه وهي شاده في يدها..
نضال بفرحه...
/بطشتي..وفتحلها حضنه بيد وحده هي جاته تجري وتضحك لعند ماوصلت فيه وطاحت في حضنه وهو ضمها بقوة ويقول..استاحشتك ياشفشه استاحشتك..
هي بعدت عنه شويه ووقفت ع حيلها بعدين قربت من خده وطبعت قبله عليه وهو غمض عيونه بشده وقال..
/ياقلبي..
نسرين بضحكه؛نخليها معاك بنمشي نتغدا ونجي..
نضال ضم جنه وقال..
/بري بري..
طلعت وهي مبتسمه..
ونضال شاف لجنه وقال..
/شن جو؟
جنه:تمومه..
قعد يضحك بعدين باس جبينها لما تباعد عنها ركز ع تسريحة شعرها كله نافورات ضحك وقال..
/تي شن هدا يابطشه خيره شعرك هكي!؟
هي حطت يدها ع شعرها وقالت..
/روجه..
تلاشت ضحكته وقلبه بدي يقصف ويرعد فهم ان اريج مدايرتلها تسريحه شعرها..جت بين عيونه اليوم نظراتها،قلبه اللي ثار بنبضاته لما جي طاريها حس بوجع وزادوا رجفته ووجعه لما تفكر وقفة زميله عليها..بدون مايحس بنفسه قرب انفه من شعر جنه كان يبي يشم ريحتها ويبوس شعر جنه اللي مسوه ايديها لكن في اخر لحظه عقله وقظ قلبه وخلاه يوخر عنها وهو مغمض عيونه ويقول..
/اعوذ بالله من الشيطان الرجيم..استغفر الله العظيم..استغفر الله واتوب اليه
خدي نفس وزفر بعدين فتح عيونه وشاف لجنه لقاها تشوفله بنظرات تساؤل كلها براءة وحواجبها مرفوعات..
ضحك وقال..
/خيرك تشبحيلي هكي ياقشطوطه!؟
قالتله؛لا..ني مارشميللو..
هو قال؛لاقشطوطه..
جنه بعناد؛مارشميللو..
هو رد عليها وكان يمدد في الحروف..
/قشطوطه..
ع خشة عمر لما شافها قال بصوت عالي..
/اووو زرقاء اليمامه..
نضال بضحكه:شن هي!!؟
جنه بفرحة:عمر!!
طبس عمر وفتح ايديه وهو يقول..
/تعالي عسولتي تعالي..
ناضتله تجري وهو خداها رفعها فوق ومشي قعمز بيها وقال لخوه..
/شن جو؟
نضال بإبتسامه؛مليح الحمد لله..شن زرقاء اليمامه هادي كان قصدك ع لون عيونها غلط ياغالي مش هكي معناها راهو..
عمر شاف لجنه وقال..
/قوليله اسكت..
جنه شافت لنضال حطت صبعها ع فمها وقالت..
/اصصص..
قعدوا يضحكوا..
بعدين نضال قال بزعل مصطنع..
/تي باهي ياجنه باهي..
عمر قعد يأشرله بيده وهي يحرك فيها من الخلف والامام ويقول..
/تي برا برا..برا برا..
قلداته جنه..
نضال:خلاص مالا دوري من يجيبلك شكلاطه..
عمر:اني نجيبلها الكراميلا هادي..
هي شافت لعمر وقالت...
/لا..ني مارشيمللو كشتوته..
ضحك نضال من قلبه وعمر قال بضحكه..
/جديده قشطوطه هادي!
"في صوت نحبه نسمع فيه توا"
جنه بفرح:شدو.."جدو"
ويخش محمد شنيبه وهو يقول..
/السلام عليكم..
ردوا عليه ولاده وجنه مشتله تجري..
ضمها ورفعها وهو يقول..
/جنيوه..
قالتله:ني مارشميللو كشتوته كلاميلا..
ضحكوا نضال عمر بصوت عالي من جدهم..
وهي قعدت تشوفلهم بإبتسامة خجل وحطت صبعها في فمها وجدها يشوفلها وهو يقول بضحكه..
/الله يبارك الله يبارك..
☘ومن المربوعه لدار مغليه اللي كانت معاها ضرتها تمشطلها في شعرها بعد مادوشتلها ولبستها فستان حوش قنين..
سميره؛خل نجففه شويه..
ولعت المجفف وجففت بيه شعرها بعدين ضماته بطريقه حلوة..
بعد ماكملت حطت المشط وجت لذهبها اللي كان ع الزيانه خدت عقد ومشت لبستهولها..
مغليه تنهدت وقالت بشي من الصعوبه..
/سميرة..
وخرت سميره وجت قدامها وهي تقول..
/نعم!؟
مغليه بضيق:شاغلني..نضال..
سميرة:في شني شاغلك!؟
ردت عليها بحزن:الايام..الاخيره..متكدر..زي اللي..واجعه خاطره..
سكتت سميره وهي تشوفلها..
مغليه؛تعرفي..خيره؟
تنهدت سميرة وغيرت نظرها للزيانه..
تعبوا عيونه مغليه دموع وهي تقول..
/عارفاته..قاعد..يبي التاجوريه..
شافتله سميره وقالت..
/وانتي شن تبي؟
مغليه بألم..
/راحته..سميره..انتي تعزيها..وتعزيه كلميها..
سميره التزمت الصمت وهي تحاول تخفي ضيقها..
مغليه:اهي..خالتها..خداها خوه ودارت منه الصغار..خالتها وخوه اللي كنا..نقولوا معاش يصير منهم..وهو ولدي سيبها غصب عنه..نهار خداها خوك جاني يبكي..ويقولي نبيها ياامي خليتها بالسيف عليا..نزلت مغليه عيونها وقعدت تبكي..
نزلوا دموع سميرة خطر عليها خوها وفي نفس الوقت انوجعت ع حال نضال..رشفت ومسحت دموعها بعدين حطت يدها ع كتف مغليه وقالت..حندير اللي نقدر عليه بش نلم شملهم هدوما الزوز اني توا وليت عايشه بش ندير الحاجه هادي..
ضحكت مغليه من بين دموعها ع الجمله اللي قالتها وسميره ضحكت حتى هي بعدين قالت..هي خليني نكلمك باقي الاوتفيت متاعك كنتك نفيسه جت وشويه ويخشوا خواتك..
ابتسمت مغليه وهي تشوفلها..
وسميره التفتت ع الزيانه وقال..نمكيج عيونك بس ولاتبي وجهك كله..
مغليه:وجهي..
سميرة؛حاضر..
☘ولبستها باقي ذهبها وحطتلها زينه وعطر بعدين خدتها بالكرسي المتحرك وطلعت بيها للصاله وين خشولها لقوا فيها خوات مغليه ناضوا لاختهم وسلموا عليها بحرارة ونفس السلام كان لسميره بنت الاصل صاحبة القلب الكبير اللي يحاسبوها نقمة ع اختهم لكن طلعت رحمه نزلها ربي عليهم لهالأيام الصعبه..
🍃والله يرحم بعض الناس القاسيه لعيون ناس تانيه يحبهم لعلها كرامة لعيون صغار طاهر اللي كان انسان طيب وقلبه صافي واكيد دار خير رده في صغاره..وكرامه لعيون صغار عائشه اللي عانوا هلبه بعد موتها كانتلهم زي نسمه البارده في عز الصيف في هديكا الفترة الصعبه..وكرامة لعيون نضال اللي كان صاحب اصفى نيه من صغار مغليه ولازم ياخد ع قيس نيته عاجلا او اجلا..وايضا لعلها كرامة لعيون طوبى لعل الله مايبيش يتسجل في صحيفتها اي عمل فيه أذى لغيرها لعله يبيها تقعد صحيفة نظيفه طاهره مافيهاش الا عمل الخير بس..وهو أعلم🍃
🍁🍁🍁🍁🍁
"اهو الجناح متاعكم"
عبد القيوم وهو يضحك بإحراج قال..
/والله احرجتونا واجد..
كاريمان؛فوت الرسميات عبادي انت توا في حكم راجل بنتي عدي سلم ولدي عدي تريح..
ابتسم وقال..
/بارك الله فيك..
ومشي طول..ضحكت كاريمان وحركت راسها يمين ويسار بعدين مشت طلعت وسكرت الباب الفاصل بينهم ..
🌼وعبد القيوم وصل في دار النوم فتحها بهدوء وخش..
ابتسم بهويام لما شاف منظر حلو خلا قلبه يذوب وسط ضلوعه..
شاف طوبى راقده ع السرير بالعرض وهي لابسه بيجامه شتويه نازكه لونها ياجوري وطارحه شعرها وجنبها دفتر مذكراتها..
قدملها بقلبه قبل رجليه..وصل فيها وطبس ع شعرها رفع من بيده شويه شم ريحته بعدين قعد يوزع عليه في القبل لعند ماقعمز وقرب من جبينها وطبع عليه قبله..
تباعد وقعد يتأمل في ملامحها وهي غارقه في النوم..تنهد من وسط قلبه بعدين قال بصوت هامس وضحكه..
/استولت ع السرير كله المريشه..
ناض وقف وشاف مذكرتها خداها وحطها ع الكومدينا بعدين مشي للشنطه بيطلع منها حوايج..
🍃بعد مابدل حوايجه مشي للكنبه الموجوده في الدار انطرح عليها كيف مايجي وقعد موجه نظره يتأمل في عشقه لعند ماغلبه النوم وراح فيه...
🍃🍃🍃🍃🍃
وخرت شعرها للخلف وهي تتكلم بحماس..
نفسيه:حجزت في كل شي ماقعدش كان الهديه محتارة مش عارفه شن ناخدله..
نسرين بإبتسامه:عمر يعشق الساعات خوديله ساعه قنينه..
نفيسة ابتسمت وقالت..
/تمام ناخدله ساعه وبدلة عربيه..
نسرين:حلو حلو..
ع خشة سدرة للصاله وولدها في حضنها اطلقت السلام بعدين مشت سلمت خالات راجلها كانوا رسميات معاها جدا لأنهم اختهم مش متقبلتها وسدرة مش مهتمه ليهم نهائي ..
بعد سلمت عليهم..جت لعزوزتها كبت ع راسها بعدين حطتلها شنطة ولدها ع رجليها..
مغليه ماضحكش وجهها الا للولد بركت عليها بعدين مدت يدها ومسحت ع خده رفعت يدها ليها وباستها..
وخرت سدرة بولدها وهي مبتسمه والتفتت لحماتها وسلفتها مشتلهم سلمت عليهم وقعمزت حداهم..
خدت منها نسرين علي وهي تقول..
/الله يبارك علي طبوش عمته..
سدرة بإبتسامه:شن حالك نفيسه وشن حال ماليك؟
نفيسة بإبتسامه:الحمد لله..شن حالك انتي وشن حال اهلك..
سدرة:الحمد لله في خيار الخير..شن دايرة مع الحمل؟ نفيسه:اهو بدي الوحم..
سدرة:ربي يكون في عونك..
ضحكت نفيسة ضحكه خفيفه..
وتخش عليهم سميرة ووراها سدرة وجوري شادات سفر الضيافه وبدوا يوزعوا ع الموجودات اما سميرة مشت لسدرة سلمت عليها وقعمزت جنبها..
بعد توزيع الضيافه اللي هادي انشغلت بالهدرزة نفيسه قرنت الراس مع نسرين وكلامهم مازال عن الحفله اللي بيديروها..
اما سدرة وسميرة اللي كانت مغليه تشوفلهم كلامهم كان عن..
سدرة:هو حتى اني نبي ندوي في الموضوع هدا معاك لكن بعدين..
سميرة بأستغراب:صارت حاجه جديده؟
سدرة وهي توزع في نظرها ع الحاضرات وقالت..
/بعدين نهدرزوا..
🍃🍃🍃🍃
"طالعه بنروح مش عارفه منين طلع في وجهي جاني قال السلام عليكم قتله وعليكم السلام..قالي سامحيني اللي جيتك هني لكن نبيك في موضوع مهم قتله موضوع شني!؟ وينط حسين قدامي زي الجن وبدي فيه "
اريج بضحكه:وهداكا علاش جاي شن يبي!؟
فردوس وهي تصب في القهوة..
/ايه حقه شن يبي فيك!؟
غرفه بنرفزة:عطاني فرصه نعرف الافندي هداكا!! والله لولا خوفي من العار اللي بيديره ماعدلت عليه لما قالي بري اركبي السيارة..
مطيره وهي شاده فنجان قهوة قالت..
/تعرفي شكله حسين عارف علاش جايك هدا علاش تعفرت هالتعفريته..
غرفه بإنزعاج:ديما وهو متعفرت ولد خوك هدا..
ضحكوا..
غرفه بتجهم:اني بنكلم خالي يشوفه عدنان هدا اني من قبل يستفز فيا يابال يدير الحركه هادي..
فردوس:ايه حركته غلط يجيبلك في الدوة..
اريج وهي تضحك قالت..
/من الاخير من الاخير عدنان هدا كلم خالي المحجوب عليك يبي يخطبك..
بدت ع وجه غرفه ملامح الصدمه..
وفردوس ومطيره اندهشوا..
غرفه بصدمه:من قالك!؟
اريج:في عرس اميمه خالي كلم خالتي سدرة وخالتي سدرة حكت لطوبى وطوبى حكتلي واتفقنا نخلوه سر..
مطيره تهكما؛وفي بير غريق..
ضحكت اريج..
غرفه بإنزعاج:ياعليك نهارات وخلاص ناقصه دراه كبد..
مطيره بمشاغبه؛وشن شكله عدنان هدا!؟
شافتلها غرفه بطرف عينها..
اريج بضحكه:آلاء قالت طرف مقربع..
مطيره بغرور:مش احلى من وليد خوي..
قلبت غرفه عيونها وهي تتأفف بضجر وهما يضحكوا عليها..
🍃تضحك الوجوه لكن القلوب قاعده مغصوصة..تعودوا ع الاوجاع والشده وكأنهم تكيفوا معاها ويحاولوا يقاوموا اثرهم عليهم ع قد مايقدروا🍃
🍃🍃🍃🍃🍃
الساعه 8:00مساءا..
في دار المعيشه في حوش شنيبه..
كانت سدرة ترقد في ولدها وهي تهدرز ع سميرة المقعمزة معاها..
🍃"هدرزنا اني وطوبى ع الموضوع هدا قالتلي اريج مازال راغبة نضال وتبيه وقالت مش حنرضى بغيره وراهو جوها ناس وردتهم وتعاركت هي وامها حتى العراك"
سميرة بضيق:المشكله كلها في امها ياسديرة فردوس ماتبيش..
سدرة:فردوس خليها علينا اني وطوبى المهم نضال مازال يبيها متمسك بيها!؟
سميرة:تي شن تقولي ياسدرة الراجل بيموت عليها..
سدرة:لكن ماتكلمش في الموضوع ياسميرة..
سكتت سميرة وهي تفكر..
سدرة:جسي نبضه عن موضوع الزواج بصفة عامة لقتيه مايبيش ردي بالك طلعي حاجه من اللي قلتلهالك عن اريج..
سميرة:من غير ماتقولي مستحيل نطيح من قيمتها قدامه..تنهدت وقالت..خلاص تو نشوفه ويارب يارب يصير منهم ونفرحوا بيهم..
سدرة وهي تشوف لولدها اللي لقاته قالت..
/آمين..
🍃وولد خوها كان فايق في القعماز شاد لعبه قطنيه صغيره ع هيئة شخصية"الجوكر" ويلعب بيها..
وبوه جنبه شاد روايه لكاتبه مفضل ومن ورا النظارات عين في الكتاب وعين في ولده..
لحظات وخشت فاتن اللي كانت طالعه من الحوش شافتهم وقالت بضحكه..
/السلام عليكم..
مختار وهو يمرر في نظره عليها من فوق لتحت قال..
/وعليكم السلام..
...لبس فاتن وهيئتها بدت تتغير تدريجيا موديل لبسها كله ولى واسع ومحتشم وبالنسبه لمختار هادي مش علامة خير..
قدمت لولدها وقعمزت ع رووس اصابعها وهي تقول..
/بيبي استاحشتك هلبه..شافت للعبه اللي في يده وقالت..مختار شن اللي في يده هدا!؟
مختار وهو يميل في راسه بش يشوف لولده قال..
/لعبه شفتها عجبتني خديتهاله..
ابتسمت بإمتعاض بعدين وقفت ع حيلها ومشت للسرير لوحت عليه شنطته وتوجهت للدولاب وهي تقول..
/بنخش ندوش ونطلع نصلي العشاء ونرقد..
قعد يشوفلها بدون مايعلق..
خدت حوايجها وشافتله وهي تقول..
/نعبا عليك ترقد علاوي!؟
رفع حواجبه وقال..
/وهو يعرف يرقد غير معاي!؟
ضحكت وكملت طريقها للحمام وهو معاها بعيونه لين اختفت عنهم..سمع تسكيرة الباب ناض بسرعه ومشي للسرير وصل فيه حط عليه الكتاب بعدين خدي شنطتها وفتحها ولما فتشها لقي فيها اللي توقعه..
كتيبات دينيه..حصن المسلم..وكتيب عن الحجاب..
بدت ع وجهه ملامح تجهم ممزوجه بعدم الرضا..ردهم لمكانهم وسكر الشنطة وحطها ع السرير بعدين ولى قعمز في مكانه وعيونه ع ولده..
🍃🍃🍃🍃
واقفه ع المراية تحط في اخر لمساتها ع طلتها لما كملت مشت خدت شاربتها حطتها ع راسها ولفت حوالين رقبتها وطلعت من الجناح..
كانت محرجه بعض الشي بس كل ماتمشي فيه تحس براحة عجيبه..
سمعت صوت هدرزة جاي من الكوجينه ضحكت..
وصلت فيها وشافت سالمين مع كاريمان مشغولات بحاجات يديروا فيهم وهما يهدرزا..
لما خشوا سكتوا شويه بعدين كاريمان بدت تغني..
🌼ونست عيني الساهرة..الساهرة المشتاقه
المشتاقه..ونست عيني الساهره المشتاقه..
شاركتها سالمين..
ياطيف من صعب علي فراقه..فراقه..
ياطيف من صعب علي فراقه..
طوبى بضحكه:تهبلوا..
سالمين التفتت وقالت ببهجه..
/بيبا..
وطوبى مشتلها طول وضمتها..
كاريمان:رقدتي رقدة سمحه..
طوبى تباعدت عن سالمين وقالت..
/والله ماحسيت بروحي..
سالمين قالت:ماتصليش..
طوبى هزت راسها بإيجاب..
كاريمان:باهي تعالي شمري هذين نطلعوهن برا..
طوبى مشت بتاخد الحوافظ حولت كاريمان عنها الشاربه وقالت..
/مافي حد غريب بنتي راجلك وعمك الصابر..
سالمين:عمك جبريل حطني وعدا شور مشرق بيبات ليلتين..
طوبى بفرح:الله احلى حاجه..
ضحكت سالمين وقالت .
/نجك ليا..
☘وخدوا الحوافظ وطلعوا برا للجنان..
كانوا فيه عبد القيوم والصابر..
الصابر لاهي بالشوايه وعبد القيوم بعيد عنه شويه يقطع في اللحم..
🌼سمع حس طوبى تهدرز قلبه فزلها قام عيونه وشافها..
لقاها لابسه ماليه شتويه نازكه فيها حبات تشبه اللولو من الصدر والكتاف طويله للركبه وتحتها سروال جينز ارزق غامق لابسه التعليقة وفي يدها اليمين خاتم الزمرد وحاطه ع وجهها لمسات بسيطه ابرز مافيهم مكياج العيون
وهو قعد هايم فيها وخلاص وكله كوم ولما لفت وعطاته بالظهر كوم تاني شعرها ع طوله كانت ظافراته"سبوله"من فوق لعند نص ظهرها والباقي خلاته مطلوق..
الحكايه تخلبطت عنده من قوة المشاعر اللي يحس بيها رفع الشيتا ونزل بيها بحماس غير منضبط ع الضلوع متاع لحم الخروف وينوش يده..
طول طلق الشيتا وشدها لقاها انفتحت وبدت تنزف..
الصابر اللي كان مركز معاه وين شاف اللي صارله انفجع وقال..
/عبد القيوم..
شافولهم النساوين وطوبى لما التفتت وشافت يد عبد القيوم مفتوحه وتنزف انفجعت بقوة وقلبها ماتحملش طول فقدت الوعي..
🍃🍃🍃🍃🍃
"لهالدرجة عاجبك!؟"
الهام وهي تمسح ع شعر بنتها اللي كانت راقده ع رجلها قالت..
/هلبه..خفة دمه وهضماته وحنيته جذبوني ليه هلبه هدا غير وسامته واناقته..
اختها قالتلها:قولي الحق انتي ورا طلاقه من مرته!؟
ردت بصدمه وهي تقول..
/شن هي!؟ معقوله هذا تفكيرك في اختك!؟
قالتلها بضيق..
/مش قصدي..نقصد انه حط عينه عليك هذا علاش طلق مرته..
الهام:لاوالله من قبل صايرة بينهم مشاكل وسهى قالت انه كان ناوي يطلقها..
سكتت شويه بعدين قالت..
/استخيري لومي..
الهام:استخرت واستشرت وغدوة بنعطي ردي خلاص..
ضحكت وقالت..
/ماتوقعتش ترجعي تحبي بعد زهير..
تنهدت بإبتسامة الم وقالت..
/الله يرحمه..هو مش حب حب اني معجبه بربيع ومرتاحتله وان شاء الله بعد الزواج يجي الحب..وبعدين مش معنى اني حبيت تاني بعد موت راجلي معناها قلة وفاء الوفاء اني نقعد ندعيله في كل وقت ونتفكره بالخير ونربيله صغاره احسن تربيه وهادي الحياة مستمره ماتوقف ع حد حبيبتي..
=كلامك منطقي ومقنع..وياستي ربي يقدملك اللي فيه خير..
الهام بإبتسامه:آمين..
🍃🍃🍃🍃🍃
"تي غير ليش البكا بس خبشه يابنتي خبشه"
طوبى وهي تبكي قالت بعصبيه..
/خبشة عينك..توا تمشي مع عمي صابر تخيطها تحرك ماتحرقليش دمي..
عبدالقيوم وهو شاد يده اللي كانت ملفوفه قال بضحكه..
/حاضر ياودي حاضر..ومشي للخلف وهو يقول..وريني الضحكه..
يدوب ضحكت وهي معصبه من الخوف وبروده..
/برا..
ضحك ولف ومشي وهي معاه بعيونها ويدها ع قلبها.
ع جية كاريمان بطاسه عصير طبيعي ومعاها سالمين مدتها لطوبى وهي تقول..
/ماطلعنا نحبوه هالعبادي ياسلومه..
سالمين:حتى هو عبادي ياروما..
وطوبى تسمع وهي تشرب في العصير وع وجهها ملامح ابتسامة خجوله...
🍁وروح عبد القيوم بعد ماخيط مكان الجرح ولولا ان طوبى متحشمه منهم ماكانتش خلاته يدير حاجه مع الصابر..
سهروا هديكا الليله لبعد نص الليل وبعدين عبد القيوم خدي طوبى ومشوا لجناحهم..
☘"وين كانوا عيونك بس"
خدي شعرها المظفور وقال..
/ذهاب الشيرة منك طلعت عليا ولما شفتك معاش شفت شي معاك..
هي بإبتسامة خجل قالت..
/ايه حطها في راسها..
ضحك ولف ظفيره ع يده الصحيحه وقال..
/مريشة..
طوبى بضحكه:حلوة كيف تقول فيها لكت انتم تقولوا مشتشته ولا!؟
بضحكة قال:ايه بتبدي تحكي لهجه مخلطه حتى انتي..
طوبى ابتسمت وقالت..
/علمني تارقي بالله عليك نبي نتعلم جمل مش بس كلمات عاديه..
قرص انفها وقال..
/حاضر والله حاضر غير نصبي ناخد دوش..
طوبى:لالا الجرح متاع يدك نسيته!.. بدل حوايجك وخلاص..
تنهد بإبتسامه وقال..
/امرك..
ناضت وهي تقول بإبتسامه..
/خل نطلعلك شن تلبس واهو زي ماقتلك بعد تبدل بتعطيني حصة اللغه متاعكم..
قاللها بإبتسامه:متاعك حتى انتي..
التفتت وشافتله بإبتسامه حب بعدين ردت نظرها للشنطه وابتسامتها تبدلت لإبتسامة حزن..
تبي تتعلم تارقي بش مايتكررش معاها الموقف اللي صار مع عماته لما جوها زيارة وتبي تعرف شن الكلام حينقال عنها حتى لو ماردتش اضعف الايمان ماتبانش زي الاطرش في الزفه قدام نفسها..
🍃"باهي ليش تاخد من غير رضاهم!!؟"
سالمين بضيق ودموعها في عيونها..
/ظروف جبرنها ياكاريمان..
كاريمان بألم /حسك قهرتيني وشغلتيني عليها..
سالمين بحزن..
/نبي نحطك في الصورة ياكاريمان حتعدي تحضري الفرح ومرات تشوف الوجوه منقلبه..
سكتت كاريمان وهي مضايقه لأبعد حد..
🍁"هي تعالي خشي ياسمحتي خشي"
خشت طوبى السرير وهي تضحك واستقرت بجوار قلب زوجها حبيبها وهو غطاها بالبطانيه معاه وبدي يعلم فيها بعد الجمل التارقيه وهي مرة مرة تسأل فيه وهو يجاوب بكل حب لعند ماقالت..
"مطلقه.."
سكت شويه بعدين عطاها ترجمة الكلمه..
طوبى وهي شاده دموعها بقوة قالت..
/النطق شويه صعب لما نبدا نسمع منك وندويها معاك تو نتعلمها بسرعه..
زاد ضمها وقال..
/حكيتلك عن اول مرة شفتك فيها بعد جيت لطرابلس!؟
رفعت عيونها فيه وهي تقول بفضول..
/لالا احكي احكي..
ضحك وقال..
/عمري ماننسى هاليوم يوم بعمري كله شفتك في الكليه وساعتها كنتي ديري في شي ذكرني بأول مرة نشوفك فيها في حياتي..كنتي توكلي في قطوسه..
ابتسمت وهي تقول..
/باهي وبعدين لما شفتني شن درت؟
قال؛والله قريب اضبطت كل من كان قاعد في المكان..
قرصاته من بطنه وهي تقول..
/كلهم!!؟.
ضحك وقال..
/ياودي تعبير مزاجي..المهم نذكر وقتها قلت فيك ابيات بيني وبين نفسي تبي تسمعيهن..
طوبى بإبتسامه..
/من غير سؤال..
تنهد وبدي يقول..
🌼 يامختلف عالناس زينك بدعه..
ماريت كيفك ياعسل حقاني..
جميل الوصايف ياشبيه الودعه..
كي الورد زينك ياقمر ربااني..
وتفاصيل زولك كي فرس مرتدعه..
عقلي خديته ياربيع أوطاني..
وديما عليك القلب داير صدعه..
أمرار الحياه عشقك اللي نساني..
وزينك بلا مكياج ماهو خدعه..
ومن غير حتى كحل ريتك راني..
خلخلت قلبي من منابت جدعه..
وكل يوم زايد في غلاك إدماني..
قبلك الخاطر فيه كانت فدعه..
رادعتها وصوبك اللي زهاني..
وعشقك احتل قلبي ويصعب ردعه..
وعشقك علي كل الإيناث غناني..
..قاللها..
/هاه ركزي..عشقك عن كل الايناث اغناني..
ضحكت..
تنهد بعدين ابتسم بألم وقالت..
/تصدقي يومها فرقت بكلاوة ع شارع القهوة كله خليته كيف يوم العيد وعزمت حتى ع العشا..
بعدت عنه شويه ورفعت عيونها فيه..
نزل عيونه وهو يشوفلها بنظره بان عليها فيها الألم..
ضماته مرة بقوة وغمضت عيونها ودموعها نزلوا..
وهو باس راسها ولف ايديها عليه وكأنه خايف تريح منه..
الزوز في هديكا الليله ماتباعدوش عن بعض للحظه..
طلبت منه يقرالها القرآن وبدي يقرا لين خلاها ترقد في حضنه اما هو القلق خلاه يسهر لساعات لعند ماغلبه النوم ورقد..
☄وهي في عز نومها رجع جاها حلم من عالم المنام..
شافت انها في حوش كبير اشبح بالقلعه فيه دروج هلبه مليان بالدروج"السلالم"
قعدت تركب فيهم وتبي توصل لمكان معين وكل ماتركب يزيد عدد الدرجات..
وهي راكبه شافت جنبها لقت الجالي نازل من دروج تانيه شافها وجي بيلحقها هربت منه وقعدت تجري وتجري لعند ماشافت مستراح طلعت منه افعى مخيفه لفت بتنزل هاربه لقت الجالي راكبلها دب فيها الرعب وين التفتت للأفعى شافت نجاة واقفه في المستراح وتشوفلها بنظرات تخوف وجت بتنزللها هي طول هربت منها وقعدت تجري في الدروج وهي تلتفت معاش شافت نجاة لكن شافت في مكانها الأفعى تلحق فيها..استمرت في الهروب لعند ماوصلت لوطا لقت باب مفتوح مشتله تجري بتهرب منه وين وصلت فيه شافت مختار وراها جبده وسكرها عليها..
☄فاقت وهي تنتفض من الخوف وفيقت عبد القيوم اللي قاللها بفزع..
/هاه حبيبي!
غمضت عيونها بشده وقالت..
/شي حبيبي مافي شي..رخت عيونها وقالت..ارقد ياروحي..
مسح ع شعرها بعدين حط يده ع راسها وبدي يقرا عليها..
وهي زادت خشت في حضنه وقلبها قبل مسامعها كانوا يسمعوا في كل آية يقرا فيها وهكي لعند ماهدي روعها ورجعت رقدت اما هو قعد ساهر من خوفه عليها ويأذن عليه الفجر حط راسها بهدوء ع المخده..طبع قبله عليه ولما جي بيتباعد قعد يتأمل في ملامحها الحلوة ومن قلبه قال..
"ياربي ماتحرمني منها"
#ياربيع_ايامي
#طوبى
....يتبع....
