طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦ 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 التظاهر بكل هذه الصلابه كاد ينسيني من انا🍃
_________________________________________
الساعه 4:00قبل العصر..
وصلت سيارة عبد الرؤوف لحوشه..جايب معاه عمته وبنتها..
وغرفه في الحوش ع اعصابها..مش عارفه كيف بتتحملهم وتفوت هالأيام ع خير..
سمعت باب الحوش انفتح غمضت عيونها محاولة منها لتهدئة نفسها بعدين فتحتهم وهي تسمع بنت عمة راجلها"لميس" تكلم فيه..
"الله لايربحهم ولايسامحهم"..
وبانوا عليها..
العمه شافت لغرفه بكبر..
اما لميس اللي كانت لابسه عبايه عاديه ومغطيه شعرها بالوشاح ووجهها شاحب بدون ذرة مكياج وين شافت غرفه رفعت حاجبها وبانت في عيونها نظره لئيمه.
"غرفه"
شافت لراجلها لقاته يفنص فيها..
غيرت نظرها عنه ومشت رحبت بيهم..
ترحيبها كان كويس..لكن هما ماكانوش طايقينها وهالشي باين في وجوههم ورؤوف متجاهله..
العمة قالت؛نبي نتكا حاسه روحي فاشله وعيانا..
غرفه؛تعالي معاي للدار عمتي..تعالي لميس..
ومشت وهما مشوا وراها..وعبد الرؤوف اللي لحقهم ارتاح بعض الشي من معاملة غرفه ليهم...
🍂دخلتهم لدار المعيشه..
العمه حولت جلابيتها ومدتها لغرفه..
ولميس حولت العبايه ومدتها لغرفه ..
وهي خدتهم وعيونها ع الفستان اللي كانت لابساته لميس لونه برتقالي خافت وضيق بعض الشيء..والوشاح فكاته وخلاته يبان محطوط حط ع شعرها..
"غرفه"..
شافت غرفه لراجلها..
عبد الرؤوف:عمتي تكلم فيك..
شافتلها وقالت؛نعم؟
:شني طرشتي ولاديري في روحك ماتسمعيش..قتلك حطيلنا غدانا..
هزت غرفه راسها وقالت..
/حاضر..
وين جت بتمشي سمعت لميس تقول..
"جيبيلي معاه عصير مانشربش في المشروب"..
غرفه ؛باهي..
ومشت طلعت بسرعه بدون ماتشوف لعبدالرؤوف..
اللي تجاهل تماما كل اللي صار...
عمته:تعالى وليد خوي تعالى..قعمز حداي ياغالي..
ابتسم ومشي قعمز حداها..ولميس قعمزت جنب امها من الجهة التانيه وبدوا يهدرزوا..
☘وغرفه في الكوجينه تجهز في سفره الغدي وهي في قمة الغضب..
🍃🍃🍃
بعد ماجهزت غداهم رفعت السفره للدار..
وين خشت عليهم..
شافت عبد الرؤوف منسجم في الهدرزة مع بنت عمته ويضحك..
تمالكت نفسها بقوة..
عمته:اهو جي غدانا..ان شاء الله مطيبه باهي بس.
ناض عبد الرؤوف بش بياخد عنها السفره..تجاهلاته وفاتت بيها بروحها لين حطتها قدامهم..
فهم انها معصبه..وكملها تجاهل..
لميس:ليا وقت ندير في رجيم ماناكلش في الماكله هادي..
عبد الرؤوف بضحكه..
/غير شن فيك انتي بس!
امها قالت؛قوللها سلم ولدي خايفه مصارينها يتلصقوا ع بعض..
لميس؛لايام مايصيرلي شي..هكي احسن راهو خير مايولي وزني ثقيل ونعاني القدام..ياقلب يااحتكاك ياضغط فقرات..
عبد الرؤوف:كلامها مزبوط..اسألي مجرب عنيت من القصص هادي قبل..وتوا الحمد لله صحتي عال العال..
لميس:لاانت الله يبارك عليك مرتك هي اللي زايده شويتين..
هو شاف لغرفه..
غرفه عدت في نفسها للعشره بعدين قالت..
/تغدوا قبل ليبرد عمتي..وانتي لميس كان تبي حاجه تانيه نديريلك..
ابتسم عبد الرؤوف..
لميس:لامانبيش نتعبك نمشي اموري توا وخلاص..
فجأه..سمعوا اصوات الاولاد..
عبدالرؤوف:شكلهم فاقوا..جيبيهم جيبي..
غرفه؛هي شويه بس..
ومشت طلعت من حداهم..
🍃خشت للدار ع صغارها وهي تقول..
/ياربي شد فيا مانبيش نطلع اني العافنه ياربي..
ساوت ولادها ورتبتهم..بعدين خدتهم وطلعت بيهم لدار المعيشه..
وين خشت بيهم..ناض راجلها وخداهم عنها..ومشي بيهم لعمته وبنته..
لميس بضحكه؛الله يبارك الله يبارك كبروا الغزله..
عمته؛ماشاء الله ماشاء الله..
وقربهم لعمته..هي شدت اواب..ولميس قربت وخدت مهاب وهي تقول..
/غزله منقرشين..نسختك اوكا..انت انت..
عبد الرؤوف بضحكه..
/يقولوا يجيبوا لأمهم اكثر.
عمته؛في لون العيون..اما زينهم ليك انت زين طرابلسي..
وغرفه وهي تسمع قاعده تبذل في جهد رهيب بش تسيطر ع غضبها وتضبط أعصابها...
🍃🍃🍃🍃🍃
بعد آذان العصر..
سقدت سميره صغار نجاه مع عمهم نضال..بعدين مشت ع رجليها هالمرة لحوش طوبى..
🍃اول ماخشت..تلقتها اريج..وسلموا ع بعض بحرارة سلام رافقاته الدموع..وخشوا مع بعض للحوش..
🍃🍃🍃
هاديه بضيق..
/من يومنا مدينه مسالمه مالناش في المشاكل علاش يخشوا فيها توا بس..
مطيره بإستياء..
/مالا احني شن نقولوا..لتوا مش مستوعبه كيف ******* يطلع منها هدا كله..
طوبى بضيق:المشكله وين..المشكله في بعدين بعد تم الحرب ويقعدوا الحقد والثارات...
سميره؛الله لايسامح هديكا الساعه..ماهو كنا عايشين ومرتاحين مالنا ومال الثورات والبلي الاسود..
فردوس بحزن؛مقدر ومكتوب ياسميره..الله غالب..
حواء:الواحد مافيش قدامه كان يدعي ربي يجلي الغمه ويصلح الحال وخلاص.
طوبى:ومافيش خير من هكي..
كلهم بأصوات متقطعه قالوا..
/اللهم امين..
سميرة لحواء:وين صغويرتك؟
حواء:فهالوقت يلعبوا مع اريج ربي يحفظها كيف تساير فيهم وتغير في جوهم..
سميره بإبتسامه..
/روجه مافيش منها..
ابتسمت فردوس..
حواء:ربي يردلها وخيك سالم غانم يارب..
سميره وفردوس من وسط قلوبهم..
/يارب..
🍃🍃🍃🍃🍃
"هجت لحوش الشيطانات"
خديجه؛ريتها مشيه بلا رجعه..
مغليه؛ايه والله..هاتي تيمو هاتي..
مدتلها ولدها وهي تقول..
/ولد المهدي يجي هني!؟
مغليه وهي تاخد في تيم..
/لالا من لما روح ماخشش هني..
ويسمعوا صوت هاتف مغليه يرن..
ناضت خديجه للطاوله..خداته وولت قعمزت..
شافت للشاشه وقالت..
/رقم دولي..
مغليه مدت يدها وهي تحرك فيها وتقول..
/زعمه عمر!؟
مدتلها التليفون وقالت..
/اكيد هو..
خدت مغليه التليفون وفتحت الخط وردت..
/ايوه..
"امي"
فيسهع دمعوا عيونها بعد ماسمعت صوته وقالت..
/جالي!..
ابتسمت خديجه بلهفه..
"ايه يام الجالي..كيف حالك يام؟"
مغليه ودموعها ينزلوا..
/حال الحرب والبلي ياولدي..
"كيف يام قالولي ماواصل فيكم شي"
مغليه؛ايه ماواصل فينا شي..لكن الوضع تعب نفسيتنا حتى حني..
"ربي يفرج..كيف حالكم كلكم.."
مغليه؛الحمد لله كلنا كويسين..
"صغار الطاهر شن دايرين؟"
مغليه:ماناقصهم شي في خيار خيرهم..المهم انت يابوي شن حالك؟..
"كويس يام كويس ماتخمميش فيا..قوليلي يام..ماتسمعوا فشي عن مرتي وبنتي!؟"
شافت مغليه لخديجه وقالت..
/من مرتك!؟
"قصدي..بنتي وامها..بحكم العاده قلت مرتي"
مغليه:امها مايهمك امرها في شي كن البنت ع الخبر يقولوا باهيه..
"يام..طوبى طلعت من العده؟"
غمضت مغليه عيونها بنفاد صبر وقالت كذبا..
/ايه خلاص هداكا هو..معاش ليك بيها علاقه..وفتحت عيونها..
هو سكت شويه بعدين قال..
"كان صار وجتكم قصدي بنتي خودولها صور وابعتولي.."
مغليه؛حاضر ولدي حاضر..لكن قولي..انت وين ؟
"في المستشفى وين بنكون غير عطوني وقت نكلمكم فيه وتوا تم..سلام"..
ونهي المكالمه..
نزلت تليفونها وهي تقول..
/قاعد ينشد عليها ويقول مرتي! قالي عدتها تمت ولالا!.؟
خديجه بسخريه..
/ولدك يبيله علاج من هادي طوبى مش مرضه هداكا..
تأففت مغليه وهي تفكر بقلق..
🍃🍃🍃🍃🍃
سميره؛توا الرجاله ماتستغربيش فيهم كان نسوا صغارهم..لكن المراة اللي تبدا ام..كيف يهون عليها تلوح كبدها وراها ع خاطر راجل..نجاه هادي من لما قاللها هداكا تعالي طارتله تجري وماقالت ننشد ع صغاري من لما سافرت..
طوبى؛سافرتله!؟
كلهم شافولها..
سميره؛ايه..عمر خوه قال معاش نقدر نسيب عملي اكثر من هكي ناض هو قال ابعتولي نجاه..
ابتسمت طوبى تهكما..
مطيره؛لاهديكا مرفوع من عليها القلم..
هاديه بإزدراء:غير شن عاجبها في هالزومه!.
سميره؛يقولوا السوريين كل قمحه مسوسه والها كيال اعور.. رفعت حواجبها وقالت..الا ع سيرة السوريين..طلعت حق الدوة اللي قالتها عمة التارقي..
مطيره:ع البنيه السوريه!؟
سميره؛ايه..المهدي امس يحكي لبوه عليهم ع اساس يسكنهم في وحده من الشقق متاع عمارة محمد ومحمد قال باهي..وين كلمه اليوم قال لامش مطلعهم من شقتي لين يروح بوهم...
مطيره؛لاواضحه القصه من لما حكوا عليها هداكا اليوم..
فردوس بضحكه..
/ماحكاش المهدي عن زينهم!..
ضحكوا..
سميره بضحكه؛هو اكيد مش حيحكي..لكن طول ماهو يحكي لبوه يقول السوريات السوريات قريب نضت سكرتله فمه بيدي شفت عيون بوه يلمعوا ياكبدي..
ضحكوا كلهم من وسط قلوبهم..
ماعدا طوبى اللي كانت تبتسم مسايرة...
🍃🍃🍃🍃🍃🍃
المسايرة..
الاسلوب اللي غرفه ماتحبش تتعامل بيه بس ظروف الحياة اجبرتها عليه..
سايرتهم..عمة راجلها وبنتها اللي كانت تتقصد تلذعها بالكلام..
وزاد ضغط عليها تجاهل عبد الرؤوف المتواصل لكلامهم اللاذع..
بعد مادرات الواجب معاهم..خلتهم لين رقدوا ومشت لدارها..
كان راجلها فيها يرقد في ولاده من باب المساعده ليها وامتصاص لغضبها..
لما خشت عليه ماقالتش ولاكلمه..خدت حوايجها من الدولاب وتوجهت للحمام..
تنهد بضيق وشاف لولاده جنبه لقاهم راقدين...غير نظره عنهم واتكا ع مسند السرير وهو يراجي في خشتها..
واول ماخشت عليه قال..
/والله اليوم عجبتيني وخلتيني نزيد نحترمك..
غرفه خدت مهاب ومشت بيه لسريره بدون ماترد..
ابتسم بربكه وقال..
/زدتي كبرتي في عيني..
ولت خدت اواب ومازالت محتفظه بصمتها..
عبد الرؤوف؛ ديما هكي نبيك..كبيرة عقل وتعرفي كيف تسايري الظروف..
جت للسرير خشتله وقالت..
/إن شاء الله..تصبح ع خير..
وعطاته بالظهر ورقدت..
هو تنهد..بعدين قرب منها طبس باس ع راسها..ووخر عنها ورقد في مكانه..
وهي كملت ليلها تسحن وتحرق في دمها لين خداه النوم ورقدت...
🍃🍃🍃🍃
تاني يوم..
🍂🍂🍂الجمعه...🍂🍂🍂
من الساعه العشرة الصبح جاب المحجوب نبيله لحوش خوها بش تشوف عمتها..وفي الحقيقه اكبر دافع لجيتها انها تشوف وضع غرفه مع عمتها وبنت عمتها..
مااستغربتش نبيله في معامله عمتها..ولااهتمت لتصرفات لميس..بس اللي فاجئتها تجاهل غرفه وتغاظيها...
قبل كانت تخاف من عبد الرؤوف..علاقتهم كانت متوترة بس هالمرة الوضع مختلف مافي شي يجبر غرفه اللي تعرفهاع المجامله غير شي واحد..حبها لراجلها...
🍃🍃🍃🍃
وطلع عبد الحفيظ بعيلته...والطلعه ماكانتش ساهله..
الخوف اللي عاشوه وهما فالطريق اضعاف اللي عاشوه وهما وسط الاشتباكات...
مرغم..رفع اهله لحوش خالته ام مراد اللي علاقتهم بيها تصدعت ومعاش ولت زي زمان..
وبعد ماحطهم غادي رفع مرته لحوش اهلها...
🍃🍃🍃🍃
نجمه وهي حاضنه بنتها ودموعها ينزلوا..
/الحمد لله اللي نجاكم وجابكم لينا..
نجاح بحزن واستياء..
/الله المستعان يام..شردونا وخلونا نشوفوا ايام سود..
نجمه بعدتها وهي تشوف لوجهها..
/وجهك اصفر ورحتي بتموتي..
عواطف:نوضي نوضي دوشي وارقدي في الدار والصغار خليهم علينا..
نجاح هزت راسها وناضت ومشت بتطلع من دار المعيشه..
وعيون امها واختها معاها..
ركزوا ع ملايتها كيف كانت معكرشه ومعبيه غبره..
هذا غير ملامح وجهها التاعبه..
نجمه بضيق:حسبنا الله ونعم الوكيل...
عواطف:باهي اللي فرج وكريم طلعوا اليوم بش تاخد راحتها..
نجمه؛اني وجعتني طلعتهم قداش منهم بين ايجار والمصاريف متاع كل يوم..
عواطف بضيق:الله غالب يام وضع ماشي ع الكل..
نجمه تنهدت بضيق وقالت..
/ان شاء الله ربي يهدي عبد الفتاح ويطلع حتى هو..
عواطف:إن شاء الله..
نجمه:بري سقدي بالغدي..
عواطف:حاضر..ومشت طلعت من حداها وخلتها تفكر في هموم ولادها...
🍃🍃🍃🍃🍃
وفي ام تانيه..محبه وطيبه وقلبها كبير..لكن ليها نظره للحياة مختلفه وخارجه عن المألوف..
"فهيمه" ام عبد المعين صديق مالك..
اللي كانت مقعمزه تحكي مع بنتها في موضوع عندها اهم من وضع البلاد والحرب اللي صايره..
ويفوت ولدها معين من قدامهم كان ناوي يطلع من الحوش.
شافاته نادت..
"مونا"..
ولى بخطواته للخلف وخش عليهم وهو يقول..
/يام راني مستعجل..
اشرتله ع مكان يقعمز فيه..
بخضوع مشي قعمز وين ماقالتله ع ركابه وهو يقول..
/شن عندك يام خشي في الموضوع طول..
اخته ابتسمت..
فهيمه؛نبي نخطبلك..
بملل وانزعاج قال..
/اييييه علينا..
ضحكت اخته..
فهيمه بعصبيه؛ياولد انت خيرك عاصي هكي دون خوتك..عمرك ماريحتني ديما مشيطلي ريقي..
معين:مشنوق وباله في حلوى...يام انتي في شني والبلاد في شني!..وقت خطوبه واعراس هو!! الهم ان عندك زوز ولاد في الجبهه!
فهيمه؛إنا لله وإنا إليه راجعون عارف شن معناه الكلام هدا..معناه كلنا اخرتنا موت ومرجوعنا لمولانا..اني دفنت بوك وخوك ورا بعض..ندبت خبشت وعيطت وقطعت الدنيا!ردهم ربي بعد هدا كله!؟ لا..خلاص كان هو راد ياخد غيرهم نقوله هما ليك ياربي انت عطيتهم وامتى ماتبي تاخدهم..
بنتها؛بعد عمر طويل يام..
فهيمه؛اللي هو.. المهم زوجتهم وجابوا مايخليني نشم عليهم في الصنه كان صار شي لاقدر الله..وانت ياسبع البرمبه لاخاش جبهه ولاتفكر تخشها..خش جبهة الزواج وخليني نفرح في هاليومين اللي قعدولي في الدنيا..
بنتها؛يطول في عمرك يام..
فهيمه؛اللي هو..المهم اني شفتلك خليقة بنت في عزي بو صاحبك مالك طيح الطير من عشه..
هو بتعجب:تو اني رافعك تعزي ولارافعك تخطبيلي..!وبعدين اللي نعرفه الام دور لولدها ع عروسه في العراس..ولت حتى فالعزوات توا!..حك رقبته من الخلف .
اخته بضحكه؛في كل مناسبه وفي كل مكان يكون فيه تجمعات نساوين..حتى في المستشفى وحده لابيها لاعليها جايه تعاين تلقاهم يخطبوا فيها..
فهيمه؛ياسر فتفته انت وياها..واسمعني هني..البنيه خشت خاطري..دمها خفيف..ونويشطه ولا زينها..عيونها..
قاطعها وهو يقول..
/هييه..هييه يام وين بيها وين.!
ضحكت وقالت؛عندك حق غلط نوصفهالك توا تشوفها بعيونك خير...
معين بضجر؛لانشوفها لاتشوفني يام فوتي الموضوع..
فهيمه بحزم:ولد اسمع سايرتك لين بسلت راهو..خوتك تزوجوا في عمرك واللي مشي عليك يمشي عليهم..
معين ضحك تهكما وقال..
/تعبي في روحك يام..
فهيمه؛تي غير شوفها قبل وبعدين احكم..البنيه تكون صاحبة اخت مالك..
هو بعدم استيعاب..
/من مالك!؟
فهيمه؛تي قداش عندك صاحب اسمه مالك بوه مات المدة اللي فاتت!!؟..
ضيق معين عيونه وهو يحاول يستوعب..
فهيمه؛صاحبة اخته الصغيره..الله يبارك ياعليك بنيه عجبتني حتى كيف كانت تعاني في صاحبتها وتساير فيها..
قاطعها وقال فزعا وعصبيه..
/انسيه..الموضوع هدا معاش تفكري فيه بكل..قسما بالله تجيبي سيرته مرة تانيه ناخد وجهي...
وناض ومشي طلع بسرعه وهو معصب ومتوتر وياكل في شفه السفلي بقوة..
بعد ماطلع اخته قالت..
/معين مش زي باقي خوتي يام ديما خلوقه في راس خشمه وحاجه مايبيهاش مستحيل يديرها..
فهيمه:الله يرحم بوك ويسامحه هو اللي فسده..لكن هالمرة والله ماني مسايرته..اني غير نوصل في ام البنيه تو نحطه في الامر الواقع..
بنتها بفجعه:شكلك تبي سقف الحوش يولي لوطا ووطاه فوق!!
فهيمه برفعة حاجب
/اسكتي انتي اني نعرف شن ندير...
🍃🍃🍃🍃🍃
"غير شوفها شوف كيف ولت توقف مع الحاجه"
هادي سميره توري في راجلها مقطع فيديو لحفيدته..وهو يتفرج بإبتسامه..
سميره؛ولا هدارزيها اضحك وبس..
قال؛الله يبارك ويصون..خاطري تجيني هني..
شافتله شويه بعدين قالت..
/تو نشوف كيف تصير..وخدت منه التليفون..
تنهد وقال:تلاقيتي انتي وخديجه امس!؟
سميره؛ولا حسبتها ذبانه تزن..
هو بضحكه؛ردي بالك بنتي مهما كان..
سميره؛ياودي ماني عارف كيف واحد زيك خدي وحده زي مغليه وقعد معاها اربعين عام...وعنده صغار زي خديجه والجالي!
هو بضحكه:خلاص ياسر..
سميره:والله جديات حميدا كيف صبرت ع مغليه..كيف قعدت اربعين تاكل في ماكله لابنه لاصنه..
قعد يضحك..
سميره رفعت حواجبها ونزلتهم وهي تقول..
/مفروض يلبسوك وسام..
محمد بضحكه؛باهي قوليلي ماصار شي تاني واني عند خوي!؟
سميره:لا ماصار شي عادي..تنهدت وقعدت ساكته..
محمد؛ماكلمكش خوك؟
سميره حركت راسها بالنفي..وبدون سابق انذار انهارت بالبكي..
وراجلها قعد يساوي وهو نادم اللي جابلها سيرته..
🍃في هالوقت..
اريج نزلت ع الفيس صورة لراجلها وهو لابس البدلة الرسميه ليلة عرسهم..
وكتبت فوقها..
"الغربة هي ان تسافر بعينيك بين الوجوه الحاضرة ،فلا يبصر قلبك سوى ذلك الوجه الغائب..
احفظه لي يارب💙"
والتفاعل كان كبير ع المنشور..من بين التعليقات كان في تعليق لآلاء كتبت فيه..
(ربي يخليكم لبعض وتكملوا العمر مع بعض روجتي)
ردت عليها..
(اللهم آمين للوشتي)
وباقي التعليقات..
كانت لطوبى..وصاحبتها المقربه..خالتها غرفه..فايزة وبناتها..
وكلها كانت ادعيه ليها هي واسكندر..
🍃اسكندر اللي كان واخد استراحة محارب فتح فيها الفيس بش يشوف اخبار الطرف الاخر..
جي قدامه منشور أريج..ابتسم من وسط قلبه وعيونه لمعوا بالدموع...خدي تركينه بعيده عن كل شي..واتصل بيها..
🍂هي في الجنان كانت مقعمزه تحت الياسمينه تشم في ريحتها ودموعها تنزل..
فزت لما جاها اتصاله..شافت للشاشه ابتسمت بفرح..
فتحت الخط وردت طول..
/اسكندرون..
"ياقلبه وروحه وعيونه"
ضحكت وقالت..
/شن جو يابطلي..
قعد يضحك..
اريج؛بطلي انت ولامش بطلي!؟
"اللي تبيه اني نكونه"
ضحكت بعدين قالت...
/قداش ارتحت لما سمعت صوتك واطمن قلبي..بالله اسكندون بالله..حاول تخليني نشوفك ارجوك..
"نحاول ياعمري نحاول..والله ع خاطرك انتي نحاول..بنيتي ماعنديش وقت..نبي منك تردي بالك ع روحك وتدعيلي تمام..واعرفي ديما اني نحبك وماحبيتش غيرك في حياتي"
هي بضحكه ودموعها ينزلوا..
/عارفه والله عارفه..وانت رد بالك ع روحك وروحلي مازال في هلبه حاجات حلوة تراجي فينا نعيشوها مع بعض..
"إن شاء الله ياقلبي إن شاء الله..في امان الله"
ونهي المكالمه طول..
هي نزلت التليفون وبدت تبكي بألم..وشعورها بالخوف كان مازاد اكثر من قبل...
🍃🍃🍃🍃🍃
"ايوه سوفا"
سلافه:-اهلين قلبي ميورة كيفك؟
"الحمد لله..انتم شن جوكم"
سلافه:الحمدلله وين كنا ووين صرنا..
"الحمد لله..بوك شن صار فيه!؟"
سلافه؛قال بلكي بدو يجي الاسبوع الجاي مع رفيقه..
"الله يوصله ليكم سالم"
سلافه؛يارب..شو صار بمعتز!؟
"وصل لطرابلس ياحنه بعد ماتحدى المستحيلات وراهو قال بيدور ع عبد القيوم..عطيني عنوانه كان تعرفيه"
سلافه بربكه..
/مابعرفه...
"باهي ابعتيلي رقمه نبعتهوله"
سلافه؛طيب..هو لو شافوا بشو بدوا يحكي معه؟
"هو يبي يطمن عليكم بس"
سلافه هزت راسها وقالت..
/ok...رح ابعتلك ياه..عن جد اخوك هاد مجنون..كيف اخواتك مامنعوه؟
"مشي من وراهم ياحنه كاذب عليهم قال بنروح للجبل.."
ضحكت سلافه وقالت..
/طيب سكري لحتى ابعتلك رقمه..باي..
"بايات"..
وسكرت ومشت طلعت من الدار للكوجينه بش تشرب..
شافت امها ضم وتكنس..
سلافه بضحكه..
/لك شو عم بتعملي بس!
شاديه؛مابدي يتوسخ بيته ولو شي..
وقعدت تقيم في فرشات فم اليبيان..لوين وصلت في دار مسكره مفتاحها عليها..
فضولها حوالين الدار هادي قاعد يزيد وع قد ماتقدر تحاول ماتسلملاش ودير تصرف غير لائق تخون بيه الامانه...
🍃🍃🍃🍃🍃
الساعه 7:00مساءا..
في جنان حوش عبد الرؤوف..
نبيله؛حاول ماتجيش للحوش الا في الليل راعي وضع مرتك النفسي..
عبد الرؤوف؛اني خايف كان نخليهم برواحهم تصير مشاكل..
نبيله؛المشاكل اللي حتصير في وجودك اكبر...
تنهد بضيق..
نبيله طبطت ع ذراعه وقالت..
/بالسلامه توا..
ومشت طلعت لراجلها بعد ماخلت خوها في حيره من امره...
🍀🍀🍀🍀🍀
وتمر الايام..
يوم ورا يوم..والحرب مازالت في عزها وحالها حال الكر والفر..وكله جاي ع حساب هالشعب الغلبان..
كل شيء سيء يعيشوه الناس في الحروب..
وابرزها وضع النزوح اللي زاد ضيق خناق الحياة المعيشيه والاجتماعيه...
🍂🍂🍂🍂ليلة الاربعاء🍂🍂🍂🍂🍂
17ابريل...سنة 2019..
بعد منتصف الليل...
راقدات في دار المعيشه..
عواطف ونجاح وصفاء ونجمه..
نجاح كانت واعيه لاهيه بولدها..
وعواطف وصفاء ع الفيس..
صفاء ناضت قعمزت وهي مفجوعه تقول..
/قصفوا بوسليم وحي الانتصار بالجراد..
عواطف بخوف..
/ايه..قالوا واحد من الصواربخ جي ع حوش في حي الانتصار..
نجاح بقلق..
/راك تقولي ماتوا اللي فيه!؟
صفاء وهي مفجوعه؛مالا شنو يانجاح صاروخ جراد هدا..
عواطف وهي تقرا في التعليقات ودموعها في عيونها..
/ايه قالوا فيهم موتى
نجاح بصدمه؛إنا لله وإنا إليه راجعون! 🍃مطيره بألم؛ياروحي عليهم! لابيهم لاعليهم خش عليهم الموت..
فردوس قعدت تبكي..
طوبى بحزن وخوف:ع هكي مافيش مكان حيسلم في طرابلس..!
اميمه وهي تقرا في التعليقات بفزع..
/شكله هكي...
🍃🍃🍃🍃
لبانه بخوف:ياالله دخيلك..هالقصف صار بمناطق بعيده عن الاشتباكات!
شاديه بقلق بالغ:الله يتلطف فينا..
سلافه بألم ودموعها ينزلوا...
/الله اعلم شلون كانت حالتن وقتا..عم يحكوا!؟عم يضحكوا!؟نايمين بأمان الله!؟ لك الله يلعن الحروب وساعتها...
🍃🍃🍃
مروة بخوف..
/معاش نقدر نرقد خلاص..
فايزة ضمتها لحضنها وهي تقول..
/الله كاتبه ربي بيصير يابنتي..
وجنبهم تاله راقده ماتندري ع شي..
🍃زي ماخديجه وصغارها ومغليه غارقين في النوم ..
لكن نضال كان غارق في عالم تاني بعيد عن الدنيا بحلوها القليل ومرها الكثير..
عايش مع حروف ابن القيم اللي كانت تحسس فيه انه بدي يولي انسان تاني معاها...انسان قاعد يتجدد..قاعد يكره نسخته القديمه كل يوم اكثر من اليوم اللي قبله...
🍃"مُخالَفة الهَوى تُقيمُ العَبدَ فِي مَقامِ مَن لَو أَقسَم عَلى الله لأبَرّه، فَيقضِي لَه مِن الحَوائجِ أضعافَ أضعافِ مَا فاتَه من هَواه".
- رَوضة المُحبِّين ونُزهة المُشتاقِين.🍃
🍃🍃🍃🍃🍃
ويكملوا ناس تانيه هالليله الطويله..وهما في حالة خوف شديد..
سواء اللي قاعدين وسط مناطق الاشتباكات..او غيرهم اللي بدي يراجي في صاروخ يجيه يهني حياته في لحظه...
🍃🍃🍃🍃🍃
تاني يوم...
الساعه 10:30صباحا..
كانت غرفه في الكوجينه دير للميس في فطورها الخاص ب "الدايت" وهي قريب تنفجر من الغضب.
فجاه..سمعت صوت ولدها مهاب يعيط..
طلعت تجري من الكوجينه للدار..
وين خشت لقت طاسة الشاهي متاع عمة راجلها مبزعه..
ومهاب حاط يده اليسار ع يده اليمين وهو يعيط..
غرفه جاته تجري رفعاته وهي تقول..
/خيره!
لميس:هدي..ماصارله شي امي قرصاته..
غرفه بصدمه؛قرصتيه!
العمه بغطرسه وكبر..
/عيل شيطان ومش مهني روحه..اهو بزع الشاهي ع البساط عاني يافالحه..
غرفه بحده؛مهما دار ماتقرصيشي..اني مانمدش في يدي عليهم مانبي حد يمد يده ع صغاري..
العمه؛لاياحنه هادم صغارنا لينا حني ايوه نخافوا عليهم اكثر منك..
غرفه:شن هي!!؟
لميس:اسمعي ماتعليش صوتك ع امي الزمي حدودك خيرلك..
غرفه كانت حتنفجر فيها واللي في قلبها كله طلعه..لكن تراجعت في اخر لحظه..ومشت طلعت بولدها للدار وحطاته في الحباس وقعمزت حداهم ع الارض وقعدت تبكي..
وهما يشوفولها بحزن..
شويه وهدت..وناضت لتليفونها اللي كان ع الزيانه خداته واتصلت برقم الشخص الوحيد اللي خطر ع بالها في هاللحظه..
🍃🍃🍃
"هالصيصان...شو حلوين..عم بيدوروا حولا امن مبسوطين"
هادي طوبى تغني لبنتها وهي تلبس فيها حوايجها..
رن تليفونها..حطت في السرير وقالت..
/شويه بس ماما..ومشت للكامدينو خدت تليفونها من فوقه..
شافت المتصل فتحت الخط وردت..
/السلام عليكم غرفه..
"وعليكم السلام"
طوبى بقلق..
/خيره صوتك باكيه!؟
مجرد ماسألتها هالسؤال انهارت بالبكي وبدت تحكيلها في اللي تحملاته طول الايام اللي قعدوا فيهم عمة رؤوف وبنتها..
"تعبت مش قادره نتحمل "
طوبى وهي تشوف لبنتها..
/هادم بلعاني يستفزوا فيك يبوك تغلطي بأي شكل بش يديرولك مشكله مع راجلك..ردي بالك تعطيهم الفرصه ياغرفه..
"تعبت من المسايره ياطوبى تعبت"
طوبى:غرفه انتي تحبي راجلك وماتبي شي يخرب بينك وبينه ولا..معليشي تحملي حتى هو ياما تحمل ياغرفه ياما..
سكتت غرفه..
طوبى:سيورهم يطلعوا..نبيله قالتلي رؤوف يدورلهم ع شقه باهيه هما وبنتها المتزوجه قريب يلقى ويطلعوا وتفتكي من شرهم..اهم شي مايطلعوكش انتي العافنه ياغرفه...
🍃واقتنعت غرفه بكلام طوبى اللي ريحها شويه..
وكملت باقي النهار وهي تحاول تتحشاهم ع قد ماتقدر..
بعد المغرب..
روح رؤوف للحوش وهو مضايق ومعصب من وضع الحرب واللي صاير في طرابلس..
خش ع عمته وبنتها لقاهم يبكوا..
خاف وقعمز حداهم وهو يقول..
/خيركم تبكوا شن في!؟
عمته وهي تمسح في دموعها بطرف شاربتها..
/نبكي ع حالنا ياولدي اللي قعدنا متشردين عند هدا وهداكا مافي حد متحملنا..
عبد الرؤوف:غير شن تقولي ياعمتي بس! من اللي مش متحملكم!؟
لميس وهي رافعه حاجبها وتنزل في دموعها..
/انت كفيت ووفيت وعمرك ماقصرت معانا لكن مرتك وسامحني فيها ماتبيناش..
عبد الرؤوف؛كيف!؟
لميس بنبرة باكيه
/بكري ماخلت ماقالت لأمي كشخت عليها وعلت صوتها يالاش نتت في العيل اللي بزع الشاهي..وين قلتلها احترمي امي مراة كبير زي امك هزبتني وطلعت وخلتني..
عمته ودموعها ينزلوا..
/كان ترفعنا لوحده من هالمدارس خيرلنا ياولدي..
هو بغضب قال..
/معاش نبيك تقوليها الدوة هادي ياعمتي الحوش هدا حوش اني وياها نطلعوا وانتم القاعدين..
لميس:سامحنا يااوكا والله مانبوا نكدروك لكن معاش قدرنا ياما رينا منها الايام اللي فاتوا وبلعنا وغصينا..لعند هني وخلاص..
هو ناض ومشي طلع من حداهم..
لميس بمكر:ان شاء الله يطلقها..
امها:بش تعرف مرة تانيه تعلي صوتها عليا..
🍃وهو خش للدار..مالقهاش ولقي ولاده يلعبوا في الحباس بروحهم..مشي قرب من الحمام سمع صوت الميه..دق عليها وقال بنبرة غضب...
/ديري عشي..
ومشي طلع من الدار وهو معصب ع الآخر..
شويه وطلعت غرفه من الحمام وهي خايفه..فهمت ان عمته وبنتها استفردوا بيه وشحنوه عليها...
صلت المغرب..ومشت طول للكوجينه من سكات..
حطت العشي ع النار وطيبت القهوة..
بعد ماطابت دارتها في سفره ومعاها بكلاوة وطلعت بيها للدار...
لقتهم يتفرجوا ع الاخبار ويهدرزوا..
غرفه؛القهوة..
هو شافلها بحده..
هي تجاهلت نظرته وحطت السفره بين البنت وامها وجت بتطلع..
العمه ولميس شافوا لرؤوف بنظرة معناها..
"هاه شفت!"
هو بحده قال..
/غرفه..
التفتت شافتله..
عبد الرؤوف:فرقي عليهم واقعدي مقعمزه..
《غرفه انتي تحبي راجلك وماتبي شي يخرب بينك وبينه ولا..معليشي تحملي حتى هو ياما تحمل ياغرفه ياما..》
غيرت نظرها ليهم ومشت قامت السفره وفرقت عليهم..
عمته رفعت يدها..يعني ماتبيش..وين جت للميس..
خدت القهوة بس..
شافتله وقالت:نجيبلك..
هو قال:لا..حطي السفره وقعمزي..
حطت السفره وقعمزت..
هي ركزت بنظرها ع التلفزيون هربا من نظراته..
وهما كانوا يراجوه فيه يهزبها قدامهم..
تنهد وغير نظره للتلفزبون وعلا الصوت..
لميس شافت لغرفه من فوق لتحت بغيره..
وامها كانت تشوف للتلفزيون وهي تفكر في شي يخلي عبد الرؤوف يهين غرفه قدامهم..
لميس:الله لايربحهم ولايسامحهم حتى المدنيين ماسلموش..
عبد الرؤوف:شي يحرق الدم..
لميس:سلامتك من حرق الدم...الله غالب هدا ماقدر ربي..
غرفه ربعت ايديها وهي تحاول تضبط اعصابها..
سكتوا وهما يسمعوا في الاخبار..وفي سياقها انذكرت المدينه اللي تنتمليها غرفه..
عمة عبد الرؤوف بسخريه..
/ياعليك مهزله جماعة النكت يبوا يديروا لرواحهم مقام بالسيف..
عبد الرؤوف شاف لغرفه..
ولميس ضحكت..
عقدت غرفه حواجبها بعدين فكت ايديها وقالت بغضب..
/وصلت حدها خلاص..
وناضت ومشت طول طلعت من الدار..
وهو ناض لحقها..
لميس بضحكه؛بردتي ع قلبي..
هزت امها راسها وهي تقول بمكر..
/راجي واسمعي..
🍃🍃🍃
خشت الدار وهو خش وراها وسكر الباب..
عبد الرؤوف بغضب..
/شن الاسلوب الزفت متاعك هدا!؟
غرفه بتعجب..
/ماسمعتهاش شن قالت!! هادي عابت فيا عابت في اهلي وناسي!!؟تحمد ربها اللي هدا ماقلت..
عبد الرؤوف بعصبيه:بش بعدين نجبد لسانك..افهمي ياهوو..هدا عمتي اخت بوي..هدا ماقعد من عيلتي بتتحمليها وتسايريها شن ماقالت ولادارت..
غرفه:تحملت في نفس وصغاري وسكتت..لكن توصل بيها الاهانه لهني مش حنسكت..
عبد الرؤوف..
/لابتسكتي وتتحملي غصب عنك..زي مااني تحملت اللي داره فيا خوك الفاسد.. حبسني وشوه سمعتي ..فوتتله هدا كله ع خاطر مني قولي..
غرفه بعصبيه..
/ماقتلكش فوتله واسكت عنه..
عبد الرؤوف بإنفعال..
/ايه صح..لأني مانديرهاش..حافظت ع سمعتك وسمعة ماليك اللي وسخها هو قبل..اللي درته اني معاكم خوك ولد امك وبوك مادارشي واللي تحمتله في جرة خوك مافيش راجل يتحمله..انتي ماشفتيش لهدا كله ماقدرتيش تسايري مراة كبيره قالت كلام بعفويه مش قاصده بيه شي!!..
غرفه كانت في قمة الانفعال والغضب..لعند ماسمعت كلامه الاخير..حست بروحها وكأنها انطفت مرة وحده...
عايرها بخوها..وتمنن عليها باللي داره معاهم..برغم انها ماكانتش عارفه هو شن كان يقصد..
بس هي توا مصدومه فيه..وموجوعه منه هلبه..
سكتت معاش قالت ولا كلمه..
فاتت من جنبه وطلعت...
وهو قعد واقف في مكانه يراجع في نفسه واللي قاله..
استاء من روحه ع الاخر..كره نفسه واحتقرها في نفس الوقت..
بس هو تخلطت عليه من كل جهه..والضغط اللي كان فيه ولد انفجار دمر كل شي..
لحقها بخطواته بطيئه بعض الشي..
لين وصل ف الكوجينه اللي سمع فيها صوت حركه..
وقف قدامها لقاها لاهيه بالعشي..
وخر..ومشي طلع من الحوش...
🍃🍃🍃🍃
دارتلهم عشاهم..وهما ردوه عليها..
غطاته وداساته ومشت حشت لدارها..
لهت بولادها لعند مارقدوا...بعدين توضت وصلت العشاء..وخشت للسرير..وبدت تذرف في الدموع لين رقدت بصعوبه...
🍃اما هو روح رقد في المربوعه الخارجيه...
🍂🍂🍂🍂🍂
تاني يوم الصبح..
بعد مافاقت..وصلت..غيرت لولادها وفطرتهم ودوشتلهم..
بعدين حطت في الحباس يلعبوا..
ومشت طلعت للكوجينه..
شافت لميس وهي بكامل اناقتها ووجهه كله زينه..ماشيه للباب وهي تقول .
/طالعه للعمل يام..
"مع مني ماشيه!؟"
لميس:مع اوكا يام..بالسلامه..
وكملت طريقها..
غرفه مشت طول للمربوعه الدخلانيه خشتلها..
ووقفت ورا روشنها..
شافته مقعمز في السياره..ولميس مشت ركبت جنبه واشبح شن قالتله خلاته يضحك هو وياه..
وخرت عن الروشن ودموعها ينزلوا...
ومشت طلعت من المربوعه وهي معصبه..
🍃🍃🍃🍃🍃🍃
الساعه 2:00ظهرا..
روح ببنت عمته..
نزلت..وهو نزل وراها..وكان متردد يخش للحوش بس بعدين حسم امره وخش...
🍃وين خش للحوش ماشمش ريحه التطييب"طبخ"..
استغرب..مشي لدار المعيشه
خش ع عمته وبنتها..
عبد الرؤوف:شن حالك عمتي!؟
تنهدت بحسرة وقالت..
/حال اللي يمص في ريقه..لافطور ولاغدي..
لميس:ووينها غرفه!؟
؛ماندري ع دعوتها شفتها مطلعه كروسة الصغويره وماشيه بيها..
هو غمض عيونه بأسف بعدين فتحهم ومشي طول بيطلع من الحوش..
🍃🍃🍃🍃
توجه لحوش طوبى..وقف قدامه..وضرب الجرس..
انفتح الباب الصغير تلقائيا..
استغرب بعدين خش وسكر الباب..
شويه وشاف طوبى طالعه وهي لابسه البشت والشاربه ع فستانها الفضفاض..
وصلت فيه وقال..
/اهلا عبد الرؤوف..
عبد الرؤوف؛غرفه داخل؟
هزت طوبى راسها بإيجاب..
عبد الرؤوف حط ايديه في نصه وقال..
/شفتي بعينك اختك شن دير!؟
طوبى بهدوء:معاك تصرفها هدا غلط..ومعاك ان هي تغلط هلبه ومرات ماتتصرفش بحكمه..لكن في موضوع عيلة عمتك غرفه دارت شي ماحد توقعه منها تحملت شي قبل لايمكم تتحمله..واختك نبيله بروحها قالت هالكلام..قالت وسامحني فيها عمتك صعب التعامل معاها..ومانبيش نحكي عن غيرها احتراما ليك..ع العموم في النهايه عمتك وانت اولى بيها تقعد في حوشك براحتها هي وبنتها افضلهم..وغرفه تقعد في حوش ماليها..المراة وضعها الصحي والنفسي مايسمحولهاش تتحمل الضغط هدا كله..وامتى ماتبي تجي تشوفها وتشوف صغارك دف الباب وخش..
قعد يشوف لطوبى بنظرات ضيق واسف..
طوبى:عارف قدرك عندي..مانبيش اللي صار يوصل لجدي حيكبر الموضوع بعدين هلبه..ونكونوا في شي ونصبحوا في شي تاني..ولو اني عاتبه عليك هلبه بس مقدره انه مجرد كلام طلع في لحظه غضب ومعذور..
نزل ايديه وعقد حواجبه وقال بشي من
/بارك الله فيك..وسامحينا بالله..
طوبى؛ولايهمك..
بضيق شديد فتح الباب وطلع وسكره وراه..
طوبى حركت راسها يمين ويسار اسفا ومشت خشت للحوش..
🍃وصلت في الصاله وين مامقعمزات اريج وفردوس وغرفه ومطيره اللي كانت معصبه ع الاخر..
طوبى:زي ماقتلك..كان اتصل ردي عليه باحترام وتفاهمي معاه بالعقل وماتزيدوش طيحوا القدر بيناتكم..وراهو عنده الحق في كلامه اللي تحمله هو من عمايل هداكا مايتحمله حد..
اريج؛صح..وراهو كلنا في لحظه الغضب مانخلوا مانقولوا..
مطيره؛لكن مش لدرجة المعايره والمنان!! صدمتي فيه صدمه الحق..
طوبى:لاصدمه لاسو..الراجل مضغوط نفسيا قاعد يشد في روحه ومايبيش يخش هالحرب ع خاطرها هي والصغار..قاعد يتنازل عن مبادئه ع خاطرهم..تعذره وتتحمله وشن ماقال تبررله..حسنات عبد الرؤوف عندنا ماتمسحهمش لحظه غضب ياعمتي..
فردوس:عندها الحق..بالله وخيتي ماديري تصرف تندم عليه طول عمرك وتقعدي متحسره بعدين..
ناضت غرفه وطلعت من حداهم ودموعها ينزلوا.
وطوبى معاها بنظراتها الحزينه وهي تقول..
/الله يسامحكم الزوز...
#خريف
#طوبى
...يتبع....
