#طوبى "جنة طوبى"
#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃وَكَم يُسرٍ أَتى مِن بَعدِ عُسرٍ .. فكم للهِ من لُطفٍ خفي."
- علي بن أبي طالب🍃
_________________________________________
الساعه 9:30صباحا..
في حوش لطفي الواعر..
خشت سميرة للكوجينه وهي تغني..
/مالقيتش حل مع ناسك مالقيتش حل مع ناسك..
غرفه قعدت ترقص بإيديها وتغني معاها..
/مالقيتش حل غير جمل ونمشوا للصحرا مقبل مع ناسك..
مطيره بإستعجال؛سقدي انتي وياها الرجال يراجو في الفطور..
سميرة بضحكه:هيا هي...
🍃وبرا من الكوجينه..
كانوا فردوس وفايزة ومعاهم مروة واريج يضموا في الحوسه من فوق لفوق..وبعد الفطور حيبدوا كلهم حمله ع الحوش..
🍃في الصاله..
كانت سالمين مقعمزة تقرا في القرآن...
كملت قرايه وسكرت المصحف..ووجهت نظرها لطوبى..
اللي كانت راقده بملاية الصلاة وجنبها بنتها فايقه...
ركزت سالمين بنظرها ع طوبى لاحظت من ملامح وجهها وكأنها تحلم..
☄وفعلا طوبى كانت تشوف في حلم..
وكأنها في مكان قديم يشبه الخرابه..وهي مقعمزه فيه تقرا في سورة العصر...كملتها وقرت بعدها سورة الأعلى..
بعد ماكملت قراية سورة الاعلي..نورت المكان حواليها...كله تعبا نور مش واضح من وين مصدره..
☄فتحت عيونها..شافت قدامها ايدين جنة مرفوعات وكانت تناغي..
ابتسمت بملامح ناعسه..
سالمين بإبتسامه؛صباح الخير..
طوبى ناضت بنص جسمها شافتلها قالت بإبتسامه..
/صباح الفل..وشافت لبنتها وهي تقول..وعسل زي هالعسل اللي بنفطر عليه توا..وطبست ع خد بنتها وطبعت عليه قبله..بعدين شمت ريحتها وقالت..ااه..احلى من المسك..
بعدين شافت لسالمين لقتها تشوفلها بإبتسامه وعيونها مدمعات..
قعمزت ع حيلها وقالت..
/ديما كان نلقى تقعدي وماتروحيش..
شدت سالمين دموعها بقوة وقالت..
/وانا كان نلقى ناخدك معايا..
ضحكت طوبى وقالت:مانبيش مصر نبي بنغازي..تصدقي استاحشتها هلبه اخر مرة مشيت غادي في 2012..
سالمين؛لاخلاص حتى نحنا بنردوا لبنغازي بس لحوشنا الاول..
طوبى؛حوشكم الاول؟
سالمين تنهدت وقالت:عندنا حوش قديم ليه سنين مسكر درناله صيانه السنتين اللي فاتن تغير فيه كل شي..كان ربي سخر الحال تجونا وتموا عندنا اقل شي اسبوع..
طوبى بإبتسامه؛يارب..
سالمين بإبتسامه؛عمك جبريل دارلي فيه الفل والياسمين كيف ماكان زمان..وردة الله يرحمها حببتني فيهن وين مانسكن لازم نزرعهن..
طوبى بإبتسامه؛الله يرحمها..
ع خشة فردوس قالت..
/نضتي طويبه..
ابتسمت طوبى..
فردوس بإبتسامه:هي نوضوا كم تفطروا..
سالمين ناضت وقالت؛هيا هي..
ومشت طلعت مع فردوس..
وطوبى خدت جنة وحطتها في قعمازها..بعدين ناضت ورفعاته..
وهي طالعه من الصاله خشت اميمه..
اميمه؛صباحو..
طوبى بإبتسامه؛صباحو فل..
جت اميمه لطوبى وقعدت تشوف لجنه وقالت..
/صباحو عسل..
بعدين تعنقت ذراع طوبى وقالت:خطيت في الخدمه..
طوبى بضحكه؛احسن..
ومشوا مع بعض لدار المعيشه وهما يهدرزوا..
وجنة تسمع فيهم...
🍃🍃🍃🍃🍃
وفي حوش الجيران المقابلين..
كان الصبح ممزوج بنكهة النكد ..
ومغليه عاصبه راسها وهي مقعمزه في دار المعيشه وتحكي لراجلها في اللي صار امس..
محمد شنيبه ماهمه شي من الكلام اللي سمعه الا الجزء اللي حكت فيه عن طوبى كيف منعتهم يشوفوا جنة..وزاد كبر الموقف اللي خداه منها..
مغليه بغضب:وبنتك الكلبه نسرين جايه معاها تضرب معاها بعصاتين..
محمد شنيبه بحده:الحق مش فيها الحق في ولدك اللي عطاها فرصه دير مادارت..
مغليه:هدا خليه بروحه من صبح ربي خدي شنطته وسافر..
محمد شنيبه:عنده غير الهروب هو؟!
مغليه بقهر:ااه ااه بنموت..وحطت يدها ع راسها وقالت..راسي بيتفجر الله لايسامحك ولايربحك ياطوبى..
محمد شافلها بحده وقال..
/كان من البدايه نعرف بلبز ولدك راهو ماصار شي من هدا كله..
مغليه قعدت ساكته ودموعها ينزلوا..
شويه خش عليهم عمر وقال..
/توا كلمني محي قال رفع خديجه للعياده..
مغليه بفجعه:حي عليا!!
عقد محمد شنيبه حواجبه بغضب وهو يفكر في اللي صار كله..
🍃وفي الشقه اللي قاعده فيها نجاة..
كانت حابسه روحها في دار النوم وعايشه حالة كآبه ومخليه صغارها بروحهم..
جوري تحاول دير الفطور وخوها يساعد فيها..
ومعاذ الصغير يلعب بألعابه جنبهم في الكوجينه..
تعودوا ع انهم يديروا حاجتهم بأنفسهم صغار هلبه بس ظروف الحياة كبرتهم غصب عنهم..
🍃🍃🍃🍃🍃
ونسرين دارت فطورها ومشت بتطلع للجنان بش تنادي على ربيع وولدها محمد..
وين طلعت وقعدت دور فيهم..سمعت صوت ربيع يغني بطريقه غريبه..
تبعت صوته لين وصلت في المكان اللي كان فيه..
لقاته واقف هو ومحمد يغني ويرقص في راب..
وهي تتفرج عليهم وتضحك..
☘محمد بإعجاب:ادائك مليح..
ربيع:عندي فيه راهو نحب نسمع..كان تبيني نكتبلك وانت تغني ماعنديش مشكله..لكن القدام كان الحكايه ولى فيها فلوس مانعطي شي بلاش..
محمد بضحكه؛تي غير قول ياالله ياراجل.
ضحك ربيع وهو ينكش في شعره..
نسرين:الفطور يابشاوات..
شافولها الزوز..
بعدين ربيع قدملها وهو يرقص راب ويغني..
/جينا جينا..اهو جينا يانسرينا رينا رينا..
ونسرين ومحمد يضحكوا عليه..
وصل فيها حاوطها من كتافها وباس راسها وهي تفنص..
ربيع؛تي عادي مادوريش محمد راجل متحضر..
محمد بضحكه؛نقعد ليبي يامان..
ضحكوا نسرين وربيع..وكملوا طريقهم لباب الحوش وهما يتناقروا...
🍃🍃🍃🍃🍃
"راك تقولي تهورت"
محمد المهدي:مش عارف..لكن كان تبي نصيحتي فوتها..
مؤيد:خلي نصيحتك لروحك..
محمد:منك جد مؤيد عارف خوها شن يكون!؟ كان يندري بيك تشوف مصيرك..
مؤيد بضيق:بالله ماتنكد عليا تربح..
محمد:خاف عليها هي يامؤيد..
مؤيد بإستياء:خلاص خلاص سودتها في وجهي اعوذ بالله منك..
ومحمد يشوفله بطرف عينه من فوق لتحت بعدين حرك راسه يمين ويسار..
🍃ومن مدرسة البنين اللي دارت في فصولها احاديث عن حب المراهقه....لعمارة مختار الواعر اللي نولد فيها حب قاعد يكبر بسرعه..وكأنه صاحبه قاعد يعوض السنين اللي راحت من عمره ماعرفش فيهم هالعاطفه..
☘رضا..
طلع من شقته وهو لابس بيجامه من ماركته معروفه لو التيشرت متاعه ابيض ع صدره اسم الماركه بالاسود وسروال اسود...
اول مرة يقعد هكي برا شقته..
فتح باب شقة مختار وخش..ونادى..
"امينه"
هي طلعت من الكوجينه وجاته والابتسامه ع وجهها..
/رضا حمدلله ع السلامه..
فاتها ومشي خش الكوجينه..
هي ضحكت وقالت:يعني انت دلوقتي زعلان ولاايه!
هو حط ايديه في جيوبه والتفت نص التفاته وقال بحاجب مرفوع..
/وانتي شن رايك..
فاتت من وراه ومشت خشت لمطبخ البار وهي تقول.
/روح اقعد خليني اعملك فنجان قهوة اكيد وحشتك قهوتي..
هو قعد يشوفلها بصمت..
هي شافتله شويه بعدين قالت..
/ايه اللي انت لابسه ده!؟ نص كم في جو زي دا !؟
رضا:فوتي الجو اللي ديري فيه وكلميها وقوليلها تنزل..
امينه:لا..
رفع حواجبه..
امينه تنهدت وقال:روح اقعد يارضا..
حول ايديه من جيوبه ومشي قعمز وقال..
/قعمزنا..
امينه؛اعملك قهوة الاول..
قاطعها بنزفزه وقال:مانبيش سم تعالي قعمزي..
تنهدت بعدين مشت قعمزت مقابلاته ع الطاوله..
امينه:شوف يابني..انا والله شايفاك زي ابني..
قاطعها وقال بنفاد صبر..
/المفيد ياامينه..
امينه:المفيد يابني سيب البنت في حالها..هي بسببك قررت تغير حاجات كتير اولهم طريقه حياتها وتعاملها مع الناس...
رضا بضحكه تهكم؛يجي علينا اني بس قرارها هدا..هو تكلمه عادي!!
امينه؛هو دلوقتي وكأنه مسؤول عنها تعاملها معاه في الحدود دي وبس..
رضا وهو يهز في رجله بعصبيه..
/قوليلها تنزل نبي ندوي معاها شويه.
امينه؛اسفه...وحتى لو كلمتها مش حترضى هي مش عايزة يكون في بينك وبينها اي تعامل من اي نوع وياريت تلوم نفسك ع الحاجه دي..
رضا بإنفعال:شن جديد عليها !؟لساني وتعرفه وقلتلها قبل اني هكي الله غالب مانقدرش نغير طبعي..
امينه بألم:مش مجبرة تتحمل كلام جارح جرحوا جامد ومؤذي قوي...وهي مش عايزة تأذي نفسها اكثر من كدا..ارجوك يارضا خليها في حالها سيبها تعيش حياتها زي ماهي عايزة...
قعد يشوفلها وباين في عيونه الغضبنات مسحة الحزن..
ناض ومشي طول طلع من حداها..
هي تنهدت بضيق وقالت..
/كدا احسن بكثير...
🍀وهي فوق كانت تجهز في نفسها بش بتمشي للجامعة الخاصه اللي حطلها مختار فيها اوراقها وتملها كل امورها فيها بسلاسه في خلال كم يوم...
وقفت ع المرايا خدت طاقيه شكلها حلو لبستها وكملت بيها اطلالتها بعدين خدت شنطتها ومفتاح السياره وطلعت..
ومن كثر الحماس نست رضا اللي اكيد حتشوفه لوطا وحتما حيعترض طريقها...
تأففت بضيق وطلعت تليفونها من الشنطه واتصلت بأمينه...
☘☘☘☘☘
طلعت امينه برا العمارة وقعدت دور بعيونها..بعدين التفتت واشرتلها تطلع..
هي بسرعه طلعت ومشت تجري لسيارتها..
وصلت فيها فتحت الباب وهي ترعش من الخوف..
ركبت طول وسكرت الباب..وشغلتها وتحركت ع طول طلعت من العمارة..
تنفست امينه براحه..ولفت بتخش هو جي طالع..
وكان هالمرة لابس ومتأنق كعادته ومدرق عيونه بالنظارات..
رضا:بنقولك استاذ مختار مروح الثلات وفاتن معاه..
امينه؛مش عارفه ليه حاسه انهم حيرجعوا لبعض قربوا من بعض قوي المدة الاخيره..
هو سمع كلامها بعدين فاتها ومشي من غير مايرد عليها..
امينه بضحكه:قماص بس زي القمر..تنهدت بحسره وقالت..ااه لو كانت الظروف غير الظروف..بعدين لفت وخشت داخل..
وهو طول طلع بسيارته برا العمارة...
🍃🍃🍃🍃🍃
الساعه 11:30صباحا..
كلهم كانوا متعاوينين ع ضم حوسة العرس..
اللي شدوا الكوجينه..
واللي شدوا غسل البساطات..
واللي قعدوا يسيقوا في الحوش من داخل..
واللي فكوا غلافات المنادير والمخاد وقعدوا يغسلوا فيهم..
☘في الكوجينه..
اميمه وطوبى وغرفه وفردوس..
كل وحده شاده حاجه...
طوبى اللي كانت تنظف في الثلاجه بصمت..تكلمت وقالت..
/امس هديكا لحقتني للحمام..
كلهم شافولها ..
غرفه:مني منهم؟
طوبى بحده؛الوضيعه هديكا نجاه..
فردوس؛شن قالتلك كلبه..
طوبى:نسيب فتفته تقول فيه وتعاود لكن عطيتها اللي فيه النصيب..
اميمه:شن قالتلك وشن رديتي عليها؟
وقفت ع حيلها والتفتت عليهم وقعدت تحكيلهم وهمامنتبهين انتباه تام..
غرفه بضحكه:صحه ليك..
اميمه بكره؛مسحتي ع قلبي قداش ليا نراجي من يحطها في حجمها النكرة هادي..
فردوس بضحكه:تعرفي امس فاجئتيني فيك وتوا بزياده.
طوبى:هما هكي خلوني يافردوس هما اللي خلوني تعلمت كيف نتعامل مع اللي زيهم... تعلمت نواجه...نواجه...نحط عيني في عين عدوي ونعامله بمعاملته هو بش يحسها ويحسها هلبه..
غرفه؛وهدا الصح ياطوبى..مش كل الناس تستحق المعامله بطيب الاصل في اللي يتمادوا ويطغوا كان مااندارلهمش حد..
طوبى هزت راسها وهي تشوف في الفراغ..
فردوس:صدقتوا...
ورجعت طوبى للثلاجه تكمل باقي تنظيفها..
وهما وراها تبادلوا نظرات الاسف بعدين كل وحده فيهم رجعت لشغلها...
🍃🍃🍃🍃🍃
الساعه 4:00قبل العصر..
في حوش الصيد..
تحديدافي الصاله..
نجاح :دارت العمليه والوليد حطوه طول في الحضانه وهي حالها باهي..
نجمه؛الحمد لله المهم العيل مافيه شي..
كناينها شدوا ضحكاتهم..
نجاح؛راهو من سحن امس..
سميره؛زي ماسحنوها سحنتهم ماحد خير من حد..
نجمه؛صدقتي..
"امي"
نجمه بضحكه:شروفه..
ويزغردوا نساوين خوته ونجاح مشت طلعتلهم وهي تضحك..
وين قابلوها بدت تغني..
/يامبروك عليه وليته..تغسل وتحدد سوريته..
صفاء قعدت تضحك..
وهو مبتسم..جاته نجاح سلمت عليه بالخد وباركتله..
وبعدين سلمت ع صفاء..
اشرف؛بنخش لأمي نسلم عليها بعد ربع ساعه لازم نمشوا للمطار..
نجاح؛تعالى ماهناك حد براني حني ونساوين خوتك بس..
اشرف خدي يد صفاء وقال:تعالي..
وهي خجلانه لأبعد حد..
خشوا الزوز ونجاح وراهم وهي مبتسمه..
☘وصلوا في الصاله ع خشة عواطف من بابها التاني جو عيونها ع ايديهم..بعدين شافت لنساوين خوتها وهما يزغردوا..وامها وهي تغني ع ولدها وعروسته..
ردت نظرها ليهم شافت لصفاء اللي كان وجهها منور وزي مايقولوا باينه فيها العرسه..هدا غير حلاوتها وصغر سنها اللي مميزها بين الحاضرات..
تبعتهم بعيونها وهي تشوفلهم كيف سلموا ع امها..
بعدين قعمزت صفاء واشرف مشي طلع بدون مايلاحظ وجودها.
هي شافت لصفاء وقدمتلها وهي تقول..
/شن بايته معاك البارح!؟
ضحكت صفاء بإحراج ووقفت ومشتلها وهي تقول .
/سامحيني والله ماشفتك..
وسلمت عليها بالخد وهي تسأل عن حالها..
وسميره مركزه مع عواطف وحست بشي مايطمنش..
🍃🍃🍃🍃🍃
فهالوقت..
ركبوا سميرة ومطيره ومعاهم سالمين فوق السطوح بش ينشروا البساطات اللي رقوهم عبد الرؤوف وحسين..
سميره:ياعليك منظر يهبل
مطيره:فرقه هباله اللي مقابل هالشكالات..
ضحكت سالمين..
وقعدوا يحطوا في الكراسي ع البساطات..
وسميره تسرق في النظر لحوش شنيبه..
واذ به يطلع محمد شنيبه وهو طارح باللبسه المفضله عند سميره..
سميره:طلع طلع...ياكبادي هييه
مطيره بضحكه:يعطيك دعوة من جدك يامصيبه عاجبك هالمنظر..
سميره:وشن ناقصه ياكبدي جذاب اكثر من ولده المهدي..
سالمين:لاياكبدي كلا المهدي ماتجن شور شخصيته وسماحته مافيش كيفن بكل..
مطيره:وياريته بفايده عطيه محماط زي مامحمط قليب سديره..
سميره؛تمحمط حتى هو مسكين..
مطيره:لجعله ولى..جابه لروحه..
سميره قعدت تسرق في النظر لمحمد شنيبه اللي شافها..
قعمز قدام مطحن ولده وقعد يسرقلها في النظر حتى هو..
سالمين:هي خلاص خل ننزل نصلي العصر ونعدي لشقة التارقي..
مطيره:بالله قنعيهم يجوا يتعشوا..
سالمين:ان شاء الله..
ومشوا بينزلوا..
وسميره قبل لتلحقهم حدفت ابتسامه لمحمد شنيبه ومشت بعد ماخلت حالته حاله...
🍃🍃🍃🍃🍃
ويفوتوا خمسه دقايق يجوا صفاء واشرف اللي استقبلوهم بالزغاريد وشوط شتاوات سمعه الشارع كله..
سلمت صفاء عليهم كلهم وطلعت للسيارة قبل لتشوف دموع امها وخواتها..
اما امها شدت اشرف ع جنب وقعدت توصي فيه..
فايزة ودموعها في عيونها..
/بنتي يتيمه صح وانت عارف ظروفنا كويس ردبالك يجيك يوم تستوطي حيط بنتي و..
قاطعها وقال:ردي بالك انتي ياعمتي تفكري فيا التفكير هدا..اني مانبيش نرد علي كلامك هدا بكلام خلي الوقت وافعالي هما اللي يردوا عليك..
فايزة هزت راسها وقالت؛ان شاء الله خير..
هو باس راسها وقال:انتي عطيتي بنتك لراجل طمني بالك ع الاخر..السلام عليكم..
فايزة ودموعها في عيونها:وعليكم السلام..
طلع اشرف وسكر الباب..وفايزة رفعت نظرها للسمي وقالت..
/في وديعتك ياربي انت سند بنتي اللي لاقبله ولابعده...
🍃🍃🍃🍃🍃🍃
"الله ياربي! شي لايصدق!"
سليمه:يوم اللي حكالنا ع اللي صاير فيها وهي ماتعلم مسكينه ماجانا نوم..عدينا اليوم اللي بعده تغدينا عندهم ومش عارفه كيف تمينا ماسكين رواحنا..
سالمين ودموعها ينزلوا:قلبي متقطع عليها هالبنت..ياريتها طاحت في عبدو ياريته هو اللي سبق...وقعدت تبكي..
ودموع صفيه نزلوا بروحهم.. سليمه بحزن:الله غالب هذى نصيبها..
سالمين ببكي:الله يربحك ياسليمه الله ينولك ماتتمني وكان ربي خلصها من الحقير هذكي تخلي عبدو يزوجها..
صفيه:عبدو مايمشي بشور حد يدير اللي هو يبيها..
سالمين؛لايابنتي ماتخش لحياة اخرى مرفوضه فيها لازم الهل يكونوا راضيين بش تعيش مرتاحه..
سليمه:انا والله مايهمني مطلقه ولاارمله كانهو يبيها اللي يهمني مايجيه من وراها مشاكل..
مسحت سالمين دموعها وقالت..
/غير تخلص منه معاش يولي عندها مشاكل..
سليمه هزت راسها وقالت..
/ان شاء الله خير وربي يفرج عليها مسكينه عاجلا غير آجلا..
سالمين من قلبها...
/آمين ياربي..آمين...
🍃🍃🍃🍃🍃
"ورجعنا مستعمينا من جديد ونستقبلوا مكالماتكم ونقولوا آلو"
امينه؛ياختي عليه وع طعامته دمه خفيف حتى وهو بيتكلم عادي..
صابرين وهي مقعمزة ورا الطاوله تشرب في القهوة قالت بضحكه..
/سوري امونه دراه كبد ويكسر في الرقبه..
امينه؛ياختي تلهي انتي ايه عرفك..
وصابرين ضحكت بعدين رشفت من القهوة..
"حاضر ياولولا نسمعوا طلب ولولا وراجعين"
وطلب المستمعه كان اغنيه لفنان رضا المفضل..
"ياهوا"
صابرين اول ماسمعتها قلبها بدي يدق بقوة وعيونها تعبوا دموع..
وامينه اللي كانت تخلط في الدجاج مع التتبيله تسمع وتسرقلها في النظر..
ومشاعر صابرين اللي تحركوا بقوة خلوا دموعها تنزل وهي طول مسحتهم .
ع خشته هو..شافها ويسمع في الاغنيه..اتكى بكتفه ع الباب وربع ايديه وقعد يتفرج عليها بصمت تام...
مسحت صابرين دموعها مرة تانيه وشافت لأمينه..
وامينه تشوفلها بعدين قال..
/في عينيكي كلام..
هي حمحمت وشاف لفنجانها وقالت..
/طلع من غير فطور صح؟
امينه؛صح وتلاقيه ماتغداش كمان اعرفه كويس القموصه ده لما يتقمص يقاطع الاكل..
صابرين برفعة حاجب:رغم انه مايستاهلش لكن حاولي فيه ياكل ومايشدهاش قهوة..
امينه بضحكه:بشرط..طلي عليه من البالكونه عشان نفسوا تتفتح..طله صغننه ماتعملش حاجه والله..
صابرين بضحكه:امينه بطلي تقلبي الجد بصارة..
امينه:اعملك ايه انتي اللي بالك مشغول بيه ياكل وماياكلش..
صابرين ووجهها احمر:من باب العشره اللي ماتهونش عليا..
امينه قعدت تشوفلها بطرف عينها..
وهي هربت بنظرها للشباك ودموعها في عيونها..
تنهدت امينه ورجعت تخلط في الدجاج جو عيونها ع الباب قالت بفجعه..
/يالهوى!
شافت صابرين للباب طول انفجعت حتى هي..
وغيرت نظرها للفنجان وقعدت مركزة فيه ووجهها احمر بزياده وقلبها بيطلع من مكانه..
هو قال:وتيلي غدي وجيبيه للشقه..
ومشي طول..
صابرين طول ناضت وطلعت تجري من الكوجينه قاصده دارها وخلت امينه تضحك عليها...
🍃🍃🍃🍃🍃
"يوسف خليها تسمع قرآن"
يوسف قعد يشوف لسدره وقال..
/ان شاء الله...شن رايك نخليك تكلميها..
جاه صوتها الملهوف وهي تقول..
"عادي مايأثرش عليها"
يوسف:لازم تتأثر ياطوبى
"باهي باهي"
فتح المايك وقرب من سدره وقعمز ع الكرسي..
يوسف؛طوبى..
طول غيرت عيونها ليوسف وبانت فيهم لهفه غير عاديه..
"سدرة"..
لمعة الدموع بانت في عيونها..
"سدرة حبيبتي سديرتي..اني طوبى طويبه"
غرقوا عيون سدرة بالدموع ويوسف يراقب فيها وهو متأثر..
"استاحشتك ياعيوني استاحشت هزايبك وتكشخيك والتسهويك متاعك..كان نوصل فيك نبوسك الف بوسه من خدودك وعيونك اللي يهبلوا..ونلعبلك بشعرك اللي مافيش انعم من ملمسه"
غمضت سدرة عيونها وقعدت تتفكر في هديكا الايام..
لما كانت طوبى طفله تلعب بشعرها..
فتحت عيونها ودموعها طول نزلوا..
"يوسف"
يوسف اللي كان متأثر هلبه ناض بالتليفون وطلع من حداها وخلا عيونها معلقات فيه..
وهو برا قعد يهدي في طوبى اللي كانت منهارة بالبكي وفي الاخر هي اللي نهت المكالمه..
هو بعد ماهدي شويه..مشي فتح الحجره وخش لقاها تشوف للروشن بنظرات حزن..
جاها وقعد يمسح بحنان ع راسها..وهي مابتش تحرك عيونها ناحيته..
ولى قعمز وهو يشوفلها..بعدين طلع تليفونه وخش ع تطبيق القرآن وبدي يقرا..
هي لما سمعت القرآن..جاها صوت تاني انثوي مع صوته يقرا في نفس الايات..هي تفكرت الصوت لمني بس مش عارفه امتى سمعتها تقرا فيه..
🍃🍃🍃🍃🍃
"يوم الخميس مسافرين اني وحسين"
مطيره ودموعها في عيونها..
/ماشيين لسدرة؟
صفيه هزت راسها وهي مبتسمه..
مطيره:وقداش بتقعدي غادي؟
صفيه:شهر..
مطيره وهي تمسح في دموعها اللي نزلوا..
/كويس هلبه شهر انتي بالذات قعادك معاها في صالحها انتي امها التانيه..
صفيه هزت راسها ودموعها في عيونها اللي كانوا يشوفوا في سلفتها اللي كانت زي اختها..وردة...
🍃من جهة تانيه خشت فردوس ع خواتها في دار المعيشه وقالت..
/قولوا من كان يكلم فيا..
طوبى قعدت تشوفلها بعيونها المدمعه..
وغرفه قالت:منو؟
فردوس بتهكم؛خالتكم المصون نجوى قالت توا بس سمعوا بسدرة وبيجوا غدوة..
غرفه بتهكم؛فيهم الخير..
فردوس ودموعها في عيونها..
/لولا خاطر امي راني سمعتها وسخ وذانها.
طوبى:داروا هما خاطر لأمي!..
غرفه وفردوس قعدوا يشوفولها بصمت..
طوبى هزت راسها..
/مش مسكرة في وجوههم الباب يجوا مرحبتين بيهم...
وخواتها اللي كانوا مركزين ع ملامحها وهي تتكلم حسوا انها ناويه ع شي...
🍃🍃🍃🍃
"حسبي الله فيهم هما السبب الله لايسامحهم"
محي الدين:خلاص يامراة المهم توا حالكم باهي..
مغليه:هو هدا بنتي فكري في صحتك بس وخليهم هما ليهم ربي ياخد منهم الحق..
خديجه وهي ترشف:ايه والله..لكن اسمع بنديرله اسبوع كبير نبيه عرس مش اسبوع..
محي الدين؛من غير ماتقولي هدا اللي دايره في بالي..
مغليه؛ربي يفتح عليك وليدي ويبارك في رزقك..
محي الدين؛بارك الله فيك..هي مالا نخليكم نروح للحوش نرتاح ونولي غدوة الصبح ان شاء الله..
مغليه؛برا تريح ولدي تصبح ع خير..
هو قال؛قدامك كل خير..
ومشي طلع من حداهم..
بعد ماطلع خديجه قالت لأمها..
/عاودتي للجالي فعايل مرته وماليها..
مغليه؛واني وين ريته ياحنه من فجر ربي سافر..
خديجه؛تو نوصله اني خليه يعرف الكلبه اللي مازال شاد فيها ع حقيقتها..وين تليفوني يام..
مغليه:خليهم عنك معاش تحرقي اعصابك سادك جرحك ينفتح..
هي قالت بحده؛مافيا شي جيبيلي تليفوني يام خير مانعيط..
عطتها مغليه التليفون وهي تقول..
/مات حمار في راسك..
خديجه التليفون وخشت ع الماسنجر..لقاته مسكر..لوحت التليفون لوطا بقوة لين توجعت..
مغليه بصدمه؛تي غير علاش هكي بس.! رفعت راسها فوق وقالت..نبيهالك كبيره ياطوبى يابنت الواعر..
🍃🍃🍃🍃🍃
تاني يوم..
الاثنين...
12نوفمبر...سنة 2018..
الصبح..سقدوا سالمين وراجلها وكنتها اللي قعدت في حوش اقاربهم تسقدت مع غادي..
وفي كل مرة تروح فيها سالمين كانت طوبى تحس بالوحشه وهربت من هالاحساس بمشيتها للكليه..
كذلك اريج وآلاء مشوا الجامعه ويستأنفوا القرايه بعد عطله عطوها لرواحهم دامت لأيام..
☘وفايزة حتى هي رجعت للخدمه في المركز بش تشغل نفسها عن شوقها لبنتها والتفكير المستمر فيها..
ومروة وتاله رجعوا لقرايتهم..
☘في مدرسة مروة...
وقت الاستراحه..
مناسك بضحكه:خطه زي النمل لكن كلامه يهبل..
مروة بضحكه؛ايه صح وراهو مش متاع قرايه ينجح بالدف..
مناسك وهي تضحك:حسيته..
مروة؛باهي شن بديري توا؟
مناسك:شي بنشحطه شويه بعدين نكلمه..
مروة بقلق:فوتي مناسك نصيحه..
مناسك:وعلاش!؟ اني نبي نكلمه خاطري نحب وننحب ونعيش الحب زي البنات..
مروة:حبي ياستي لكن من بعيد ماتخشيش في وجيج..
مناسك:اني نعرف نتصرف مروة..
مروة:خافي من خوك ع الاقل..خوك مسكر عليك تسكير كان يزبطك مش حيدير فيك خير..
مناسك؛يمشي يقلب وجهه..هو يصاحب ويتعرف ويطلع معاهم بالسيارات واني يسكر عليا..
مروة بصدمه:يطلعوا معاه في السيارات!
مناسك استاقظت لروحها شن قالت انصدمت وقعدت ساكته..
ومروة حتى هي التزمت الصمت وكانت مصدومه..تعرفه متاع بنات وعنده ع العلاقات بس مش لهالدرجه..
حست اتجاهه بنفور مفاجئ..
مناسك:كان هكي لكن توا لا..ليه فترة متغير هلبه معاش زي قبل..تصدقي بدي محافظ ع الصلاة..
وفي لحظه النفور انقلب لإعجاب مع فرحه....
مروة بإبتسامه؛ربي يزيده من الهدايه..
مناسك؛يارب...هو والله كويس وطيب لولا هالعفسات اللي عنده..
مروة:مافي حد فينا مايعفسش وماعنداش عيوب وانتي رد بالك تعايريه..ساعديه بش يزيد يغير من نفسه وفوتي موضوع مهند احسلك..
مناسك ماكانتش عندها رغبه تكثر جدال سايرت صاحبتها مسايرة وقالت..
/باهي...
🍃🍃🍃🍃🍃
بعد العصر...
جو خوات ورده لحوش لطفي الواعر..
استقبلوهم غرفه وفردوس بس..اريج والاء في دارهم يقروا..
ومطيره مشت لحوش بوها..
اما طوبى فكانت ترقد في بنتها في دار المعيشه..بعد مارقدتها..
ناضت..خدت نفس وطلعاته..بعدين مشت طلعت من الدار متوجهه للصاله..
وصلت فيها وخشت وهي تقول..
/السلام عليكم..
ردوا خالاتها؛وعليكم السلام..
هي جتهم مدت يدها بس مابتش طبس عليهم وتسلم سلام كويس..
غرفه وفردوس تبادلوا نظرات مغزاها ان اللي فكرنا فيه صح
قعمزت طوبى في صدر الصاله وخالاتها يشوفولها بريبه..
تنهدت وقالت:شن حالكم؟
:الحمد لله..شن حالك انتي وشن صار فيك؟
طوبى بتعجب ساخر:كيف قصدك انتم تندروا !؟
رفعت غرفه حاجبها وهي تشوفلهم..
خالاتها قعدوا ساكتات ماعرفوش بشن يردوا..
طوبى عقدت حواجبها وقالت..
/باهي امتى سمعتوا بفيقة سدرة؟
وحده منهم قالت؛اولامس جاني المحجوب وخبرني..
طوبى:يعني كان مش هو خبركم ممكن ماتسمعوش بكل!
وحده فيهم قالت:ملاحظه روحك كيف تكلمي فينا بنتي؟
طوبى:وانتم مش ملاحظين ارواحكم!؟ مش مركزين ولاناسيين انكم خالاتي خوات امي..ويقولوا الخاله ام..والرسول قال بمنزله الام..وحني فقدناها الام ومالقيناكم مكانها..ع قد مايصير فينا ديما اخر من يسمع وزي البرانيه تجوا عشرة ودقايق وتروحوا ومن بعدها معاش نندروا عليكم..انتم مستخسرين تسألوا حتى بالتليفون!..ضحكت بإستغراب وقالت..انتم خليتوني نشك ان امي كانت شقيقتكم تصدقوا!
هما كانوا يسمعوا ويشوفولها زوز منهم باين من ملامح وجوهم ماأثرش فيهم الكلام وماكانش عاجبهم وحده بس اللي كانت مضايقه..
طوبى؛تكلموا خيركم ساكتات وحده فيكم ترد عليا تعطيني مبرر ان شاء الله حتى كذب المهم يخليني نعذركم..
:مانبوش نحكوا في حاجات قديمه حني جينا نديروا واجبنا.. فردوس تعجبا:واجبكم!
غرفه:هو هدا واجبكم!؟؟..ياودي مانبولكم واجب..
:تلزي انتي!؟
طوبى:اللي مالقيناشي في وقت شدتنا مايلزمناش في الوسع..
؛نوضوا نوضوا اني الغالطه اللي سمعت كلامكم وجيت..
ناضوا التلاته ووحده فيهم قالت..
/كلكم طينه وحده زيكم زيه خوكم..
فردوس بحده:ماتخلوش القدر يطيح اكثر من هكي..
طلعوا التلاته ورا بعض من الصاله واخرهم كانت تشوف لطوبى بضيق وهي طالعه..
لحقتهم فردوس وشافتهم طالعات ووحده فيهم تتكلم بالتليفون..
🍃في الصاله..
غرفه؛درتي اللي نبي نديره من زمان لكن خفت تنطوا فيا..
طوبى:هو كان مفروض يصير من زمان حني اللي قاعدين دايرين قدر لناس ماتستاهلاش ومن اليوم وبرا غادي مش حنعطوا القدر الا لأهله..
غرفه عاجبها اللي دير فيه طوبى هلبه وحست انها بعد اللي صار يوم الحفله تغيرت بزياده وولت عندها قوة وشده اكثر من قبل..
خشت عليهم فردوس وقالت..
/سنين واني نراجي في هاليوم من ايام امي الله يرحمها..
طوبى:شن قصدها نجوى باللي قالاته!؟
تنهدت فردوس وقعمزت بعدين قالت..
/هما قبل علاقتنا بيهم كانت كويسه لعند ماصارت مصيبة مختار..بعدها بدوا يجبدوا في رواحهم شويه شويه..في مرة تلاقينا في الجبل وغادي صار تلقيح بين وحده من خالاتي وامي وتعاركوا وعايرتها بيه..
عقدت طوبى حواجبها ودموعها عبوا عيونها..
فردوس ودموعها في عيونها..
/مافي حد جي مع امي وقتها كلهم عليها..كلهم تقول ماصدقوا حصلوا فيها فرصه..نذكر وقتها كل مابنجي نرد عليهم سدرة تسكت فيا روحت واني متبلغمه..وامي دموعها ماجفوا...تقاطعنا شهور وبعدين ولينا في العيد امي هي اللي ولت هي اللي طلبت السماح..كانت تقول عندهم حق ولدي قصرلي رقبتي هو اللي طيح قيمتي قدام الناس كلها مش غير خواتي..
غرفه ودموعها ينزلوا؛اول مرة نسمع بيها الدوة هادي!؟
فردوس؛معاش بينا نجيبوا سيرة المشكله هادي بكل ع خاطر امي....
طوبى كانت تسمع في فردوس..سرحت بتفكيرها وهي تتخيل في حال امها وبوها هديكا الايام..
شن اللي مروا بيه؟
شن اللي حسوه!؟..كيف عاشوه وتخطوه؟!..
هني تفكرت اليوم اللي ضربتها فيه سدرة لما عاندتها ومابتش تعطيها سورة مختار..
توا بس فهمت علاش سدرة اللي عمرها مارفعت عليها يد ضربتها يومها...
اللي تسببلهم فيه مختار وقتها كان كبير لاينتسى ولايعدي..
ممكن لو عيلة تانيه غير عيله لطفي الواعر اخر همهم سمعتهم وشرفهم كان اللي داره مختار ينتسى ويسامحوه عليه بسرعه..
لكن عيلة الواعر كلها..العيله المتسميه المعروفه بحسن السيرة والصيت الباهي لايمكن يقبلوا يتلطخ اسمهم وتسوء سيرتهم حتى لو كان اللي ورا هدا حد منهم..من دمهم ويحمل اسمهم...
🍃🍃🍃🍃
ليلتها طوبى مارقدتش وهي تفكر..
ماكانش همها اللي شاغلها..اللي كان شاغل هم عيلتها..هم اختها سدرة...
الافكار رفعتها لنفق اسود خلا الخوف يسيطر عليها..
ع طول ناضت وخدت المصحف ومشت طلعت بيه من الدار للصاله..وقعمزت قريبه ع الشباك اللي كان يخش منه ضي القمر..وفتحت المصحف وين ماواصله في الختمه سورة الفرقان..وبدت تقرا...
﴿ وَتَوَكَّلْ عَلَى الْحَيِّ الَّذِي لَا يَمُوتُ وَسَبِّحْ بِحَمْدِهِ ۚ وَكَفَىٰ بِهِ بِذُنُوبِ عِبَادِهِ خَبِيرًا﴾
حست بشعور حلو هلبه بدي يقوى هالشعور من بداية محنتها لليوم مرة عن مرة...
شعور الصله القويه بالله..طوبى بدت تحس بقرب الله ليها بقوة...وكأن يخفف عنها ويقوي فيها كل مايثقل حملها..كل مايكبر خوفها..كل ماتحس انها بروحها...يوصللها رساله يخليها تشعر بقربه ومعيته وسنده ليها وانها مفروض ماتخاف من شي لأنه هو معاها..
نزلوا دموعها وهي مبتسمه..وكملت قرايه وكل مالها تحس بالقوة تزيد في قلبها اكثر واكثر..
☘وهالقلب قاعد يتهيأ تدريجيا لتغيير كبير حيصير معاه القدام☘
🍃🍃🍃🍃🍃🍃
تاني يوم..
كان الثلاثاء...
من الصبح بكري كانوا اهل التارقي واتيين للمرواح..
والسيارة اللي اجروها كان صاحبها يراجي فيهم قدام حوش المهدي..
سليمه:عينك من روحك ياولدي ماتخلينيش مشغوله عليك..
عبد القيوم بإبتسامه:إن شاء الله..
صفيه:راك تنسانا تعالى طل علينا..
راجلها بضحكه:طرابلس نساته فينا من زمان..
عبد الله عمه:ماني عارف ليش حاس ان فيها سر وين كنت في بنغازي كل شهر تجينا وتوا كملت عام في طرابلس اللي حقيناك فيها مرتين بس..
هو حاول يخفي ارتباكه لما قال..
/قصة مسافه ياعمي واللي رابطني هنا العمل..
ع طلعة سيارة طوبى من حوشها..
درست السيارة قريبه ع المطحن ونزلت منها وهي شاده كيسه كبيره وشكلها حلو..سكرت الباب ومشت ناحيتهم..
سليمه وهي تشوفلها من ورا الخمار..
/طوبى جايه هنا..
عبد القيوم طول شافلها..لقاها تمشي وهي شاده اطراف شاربتها بش ماطيرهاش الريح اللي تهب..وعيونها ع خطوات رجليها..
هو غير نظره عنها وقال:عمي..معمر..وتباعد وهما لحقوه..
هي وصلت في صفيه وسليمه وقالت..
/صباح الخير..
هما ردوا عليها..
"صباح الورد..صباح الخيرات"
طوبى:مابيتوش تجونا جيتكم بروحي نعطيكم حصتكم..
سليمة:حصة شني!؟
طوبى:سقدنا خالتي سالمين بحاجات من العرس وانتم حصتكم راجيناكم تجونا بس نعطوهالكم ..مدت الكيسه لسليمه وقالت..ذوقوا العويله..
صفيه:تهبلي ياذوق ربي يحفظك ..
طوبى بإبتسامه؛ويحفظكم يارب..تسلم عليكم فايزة هلبه..
سليمه؛سلمها وسلم من جاب سلامها...
طوبى بإبتسامه وهي تمشي للخلف:هي مالا مانعطلش عليكم..
"ار الساغت"..
هو لما سمعها قلبه فر..طول شافلها..
لقاها تضحك وهي تحي في عمته وبنتها بيدها..بعدين لفت ومشت قصت الطريق لسيارتها..
صفيه بضحكه؛لقطتها مني..وين نتصل بأم معمر ننشد عنها هي تكون معاي..
سليمه:بحتي في عبدو شوفيه كيف عيونه عليها..
صفيه بضيق:لاحول ولاقوة إلا بالله..
عبد الله كلمهم بصوت عالي شويه..
/هيا هيا..
هما وجهوا نظرهم ليه بعدين سليمه قالت..
/تعالي..
ومشوا مع بعض للسيارة ركبوا من الخلف وركب جنبهم معمر وسكر الباب..
وعبد الله ركب جنب السواق..
عبد الله:هيا توكلنا ع الله..عبدو...ورفع يده وحياه..
عبد القيوم وهو يشوفلهم بأبتسامه قال..
"ارالساغت" مع السلامه..
وعمته وصفيه بنتها بنظرات الحزن اللي خافيهم الخمار كانوا يشوفوله..
والسيارة تحركت وباعدتهم عنه...لكن قلوبهم قعدت معاه..
وهو مجرد مادرقوا من قدام عيونه..مشي للاند كروزر فتح الباب وركبها..
سكر الباب..بعدين خدي نفس وشغلها..وتحرك...
مجرد ماطلع من الشارع شاف للمنظومه متاع السياره..
خدي (CD) من اللي عنده وحطه فيها وشغلها..
ويسمع مغني من ابناء عرقه وهو يغني ع حبيبته اللي سماها
"تاتريت" نجمه...
كان وكأنه يحكي عنه..عن قصته مع نجمته اللي ابعد مايكون عنه..النجمه اللي مكانها السمي ومن سابع المستحيلات يوصل فيها...اللي حال بينها الف حائل وحائل..واعظمهم الخوف من الله...
مااصعب الامتحان اللي قاعد يمر بيه امتحان صعب هلبه وكان لازم ولابد ينجح فيه..وفي امتحانات الهيه رب العالمين يساعد فيها العبد المحبوب عنده بش ينجح...
🍃وفي اللي يخش مرحلة التأديب..
هالمرحلة تخلصه من كل شيء سيء سكن قلبه تنظفه وتخليه صافي وحلو...
زي مالك توا اللي قعد يشوف في الدنيا بعيون مروة..
☘مالك؛كان تحصلي بيعة باعيه ليهم تلاته..
معين:شكلك تبي تغير؟!
مالك؛ايه نبي ناخد وحده جديده نظيفه ومش حيكون عندي غيرها..
معين بإبتسامة استغراب قال..
/انت مولي مش طبيعي بكل..
ضحك مالك وقال..
/خش خش..
وخش للمقهى وصاحبه خش وراه...
☘وفي من التأديب يجيه بش يعلمه حاجات غمض عيونه عنها وماباش يشوفها ولايعرفه..
زي عواطف اللي كل ماتتصل براجلها مايردش عليها وتنصدم بيه اليوم حاطها في الحظر..كانت حتنجن..
اتصلت بأمه وبعماته ومافي حد منهم رد عليها..وهني عرفت ان اللي كانت خايفه منه طول ايام عرس خوها حيصير..
عواطف ببكي وخوف..
/ياربي كيف ندير ياربي!!...قعدت تخبط ع وجهها وتقول..علاش هكي ياربي علاش دير فيا هكي علاش علاش..!
وحطت ايديها ع وجهها وقعدت تبكي بكتمان في دارها اللي حابسه روحها فيها من لما روحت اختها نجاح لحوشها..
☘بس مافيش اقوى من عقوبة ان الشي الحلو يجيك في الوقت الغلط..او بعد فوات الاوان..
ولا..الوقت مالاش دخل بشي..حني اختارنا نضيعوا الطريق ولما جينا بنرجعوا للطريق الصح كان الاوان فات....
🍃🍃🍃🍃🍃
قدام الجامعه الخاصه اللي تقرا فيها صابرين.
كان رضا مدرس بسيارة هونداي كونا موديل 2018 لونها اسود في الطريق المقابله..
عارف مواعيد محاضراتها ويراجي فيها امتى تطلع...
☘وهي داخل كانت ماشيه مع زميله ليها تعرفت عليها عن طريق قروب يخص الجامعه وتلاقوا فيها وولوا مقربات لبعض شويه..
:نمشوا نتغدوا في مكان قنيون اني عازمتك..
صابرين بإبتسامه؛لاخليها عليا اني المرة هادي..
:مش حنقول لا..
ضحكت صابرين وطلعوا الزوز من الجامعه..
☘ورضا بعيونه معاهم وهي ماشيات لسيارتهم...
ركبت كل وحده سيارتها وطلعوا ورا بعض وهو لحقهم بمسافه..
🍃🍃
وبعد ماقطعوا مسافه لابأس بيها وصلوا لمطعم مشهور..
درسوا سياراتهم قدامه ونزلوا وخشوا داخل..
وهو قاعد برا في السيارة يستنى..
🍃داخل..
قعمزوا صابرين وصاحبتها ع طاوله..
حولت صابرين الطاقيه اللي كانت لابستها وقعدت تساوي في شعرها..حطتها ع الطاوله واتكت بإيديها عليها وقعدت تهدرز هي والبنت..
:جايته قبل هلبه ماكلتهم تجنن..
صابرين وهي تمرر في نظرها عليه:الحق هادي اول مرة..
ولما جت بترد نظرها للبنت جو عيونها في عيون واحد يبان شخصيه ووسيم..ابتسملها..لكن هي تجاهلاته وكملت هدرزة مع البنت..
🍃ومرت ساعه تغدوا فيها وهما يتبادلوا في الاحاديث وكان الجو حلو وهادي..
بس عيون المعجب مانزلتش عن صابرين نهائي وهي كانت حاسه بس متجاهله تجاهل تام..
صابرين:هي تنوضي.
:ايه خلاص هداكا هو..
لبست صابرين الطاقيه متاعها وخدت شنطتها وطلعت مع صاحبتها...
والشاب طول ناض ولحقهم....
☘ورضا برا مازال يراجي ماتحركش من مكانه نهائي..
شافهم طالعات قال..
رضا بإمتعاض:طيب فينا..
فجأه تبدلت ملامح وجهه للغضب لما شاف واحد جي وراهم بعدين سبق صابرين واعترض طريقها..
غمض عيونه بعصبيه بعدين فتحهم..وفتح باب السياره ودفه بيده..ونزل وسكر الباب..
ومشي بخطوات راكزة اتجاههم..
صابرين بعصبيه:حول لوسمحت ماتخلنيش نغلط فيك..
:انتي فاهمه غلط اني نيتي صافيه تماما..
صابرين قلبت عيونها بملل بعدين قالت..
/ارجوك حول..
فجأه شافت ظهر رضا جاي قدامها..
رضا بهدوء والغضب باين في عيونه..
/تفضل ولي وين ماكنت..
:وانت شن علاقتك؟
رضا:قريبتي..
:جديات!
رضا تنهد بنفاد صبر..
:تمام تمام..اسف..ومشي من حداهم..
التفت رضا لصابرين وهو موجه نظره لسيارته..
/في الجديد من الجامعه للحوش ومن الحوش للجامعه..
شافلها وقال..تمام!..
صابرين بحده؛لا..
ودفاته ومشت ركبت السيارة وشغلتها وتحركت طول..
وصاحبتها اللي كانت تراقب في اللي صار حتى هي ركبت سيارتها ومشت..
رضا بعد ماكان يتبع في سيارة صابرين بنظره لين اختفت..
مشي بعصبيه تجاه سيارته ركبها وتحرك بسرعه وهو يحرق في العجل...
🍃🍃🍃🍃🍃
حطت شنطه متوسطه الحجم في السيارة وسكرت الباب..
وصغارها معاها بنظراتهم الحزينه..
ركبت السياره وهي تقول بصوت مبحوح..
نجاة:بتقعدوا عند حنينه فترة..الباص بيجيكم غادي يرفعكم للمدرسه..
جوري:ومعاذ بيقعد معاك؟
نجاة:ايه..وشغلت سيارتها..
حمزة:من بيرفعني للعلاج الطبيعي؟
نجاة:عمك نضال قلت لجدك يخبره..
سكت حمزة وهو مضايق..
وهي طول تحركت بسيارتها وطلعت بيها من القراج ووجهتها كانت حوش اهل ام طاهر..
☘ناويه تقعد بروحها في الشقه وتلهي نفسها بالخدمه ع تصاميم مطلوبه منها ومايقعدش معاها الامعاذ اللي اعتبرت مسؤوليته اخف من مسؤولية خوته اللي يبوا من يهتم بقرايتهم فوق امور رعايتهم التانيه...هدا حال نجاة لما يهجرها الجالي☘
🍃🍃🍃🍃🍃
"يابدع الورد ياجمال الورد"
هادي امينه دندن وهي تعجن في نوع معجنات حلو بديره مع قهوة العشيه..
امينه؛يابدع الور...
"تعالي هني نكلم فيك..
خليني في حالي خليني"
امينه عقدت حواجبها وقالت:ايه ده!؟
سمعت باب الشقه انفتح بقوة..
مشت بسرعه طلعت..
لقت صابرين تمشي بعصبيه ورضا وراها شدها من ذراعها..
هي التفتت وعيطت وجبدت ذراعها وقالت بعياط..
/معاش تمسني!
رضا قلدها بعدين قال بغضب..
/سريب الجامعات من الاول مش عاجبني ومانبيشي..
صابرين:شن دخل الجامعه يامتخلف انت!
رضا:نندري شن يصير داخل..
امينه بحده:رضا!
هو بعصبيه؛مش قصدي الزفت! اني قصدي مانعرفش قداش واحد يجري في جرتها ويضايق فيها!..
صابرين بإنفعال؛فهمتيه ياامينه قلتيلي كلمتيه ولا..قالتلك معاش ليك علاقه بيا..
هو قال:واني معاش ليا بيك علاقه نهائي الا في كون انك عايشه في مكان اني مسؤول عنك فيه فغياب صاحبه..
صابرين قعدت تشوفله بحده وهي تتنفس بسرعه من العصبيه..
وهو يشوفلها بغضب..
وامينه تمرر في نظرها بيناتهم بعدين قالت..
/هو معاه حق في الحته دي ياصابرين..
صابرين؛يعني بيقعد لاحقني من تركينه لتركينه هكي!
رضا:وانتي شن واجعك! كلمتك!جيت جنبك!؟ لولا اني شفت التافه اللي بكري وهو يضايق فيك ماخليتكش تشوفي وجهي..
مررت نظرها عليه من فوق لتحت ولفت بتمشي..
رضا:لو تكرر اللي صار اليوم بترجعي تركبي معاي..اني نرفعك ونجيبك..
التفتت وقالت؛غير احلم..
ولفت وجهها عنه وسرعت خطواتها لين وصلت في الدروج وركبت..
امينه:هو احنا اللي نقولوا نعيدوا!؟
نزل نظرها لايديها اللي لاصقه في العجينه وقال
/بري شوفي شغلك...
ومشي وخلاها..
هي تأففت بملل بعدين ضحكت ضحكه خفيفه وولت للكوجينه..
🍃🍃🍃🍃🍃
الساعه 5:30عصرا..
مشي الخال مع مرته لحوش بنت اخته...
كان محمل بعتب كبير عليها لتصرف دارته ماتوقعش يطلع منها هي بالذات..
☘طوبى بحرقه:خالي حني لقينا البرانيه ومالقيناهم..اقرب مثال خالتي سالمين اللي دارت خاطر كبير لأمي وقعدت تمشي علينا وتجي وتسأل علينا وع خاطر عيونا حني راعو ولدعمنا في غربته..لما جبنا اني وغرفه جتنا من مصر من بلاد تانيه وقعدت معانا وعانت ودارت السوابيع تقول امنا واكثر..مش مفروض خالاتي يديروا مادرات! وينهم قولي وين!؟ وين كانوا وحني في عز حزنا ع فراق بونا جو تلات ايام زي الضيوف ومن بعدها معاش شفنالهم وجه..في اللي صار مع سدرة مرة وحده مرة بس جو وبعدها قعدوا شهور لادوروها ولاسألوا عنها..ولما فاقت جو اخر الناس لا وفوقها بكل برود ونبرة شماته..شن صار فيك!!
المحجوب تنهد بضيق ونزل نظره لإيديه اللي مشبكهم في بعض..
طوبى:ماتزعلش مني ماكنتش خيرهم..وماخطرناش ع بالك الا بعد ماروحت تستقر هني وممكن لولا نبيله ماارتبطتش بينا هكي..
رفع عيونه فيها وقال..
/هكي بتظلميني يابنتي..
طوبى؛سامحني بس هادي كلمة الحق .
المحجوب:يعني اني ندور فيكم ونسأل عليكم بسبب نبيله..
طوبى غيرت عيونها عنه وقعدت تشوف في الفراغ بنظرات ضيق..
هو هز راسه وقال:مش حنزعل ونعطيك عذر لأن نص كلامك حق..يعني ظنك اني لولا زواجي من نبيله مادورتكمش ظن سوء ووجعني منك هلبه..لكن لأنك تعزي عليا هلبه دون خواتك بنفوته..
طوبى بشي من الاحراج:اسفه..
ابتسم وقال؛قتلك مازعلتش..
تنهدت وقالت:باهي خالي اني نبيك انت وعبد الرؤوف وجدي في موضوع مهم هلبه ومايتأجلش..
هو بقلق:بخصوص؟
طوبى:بخصوص سدرة..
المحجوب:حتى اني الفترة اللي فاتت نفكر في وضعها هلبه..
طوبى:اني تو نكلم جدي وانت كلم عبد الرؤوف..
المحجوب هز راسه وخدي تليفونه اللي كان جنبه وقعد يدور في رقم عبد الرؤوف..وطوبى ناضت من حداه وخشت داخل بش تكلم جدها...
🍃🍃🍃🍃🍃
"نحس في عيونها هلبه كلام وكأنها تسأل فيا".
جهينه:ايه هي الفترة هادي تحس في روحها زي التايهه مش عارفه ولافاهمه شي...واول سؤال خطر في بالها..شن صار معاها وعلاش قاعده هني!
يوسف؛قصدك ماتتفكرش شن صار معاها؟
جهينه؛حاليا بس مع الوقت اكيد حتتفكر..واكيد في بالها اسئله عن عيلتها اصحابها شغلها..شن صار فيهم وينهم وهكي!
يوسف:باهي لأمتى بتقعد هكي!؟
جهينه؛ع حسب استجابتها للعلاج النفسي..ع فكرة حنبدوا نطلعوها لحديقه المركز ع الكرسي المتحرك..
يوسف:كويس هلبه خل تطلع من الجو الكئيب اللي هني..
جهينه؛اهم شي انت ماتكونش كئيب خلي جوك ديما مليح وين تكون معاها..غازلها بصر عليها هدرزلها ع اللي يصير معاك في يومك..خلي رغبتها في الكلام تزيد في البدايه حتقول كلمات بسيطه ومع الوقت يتحسن النطق والتخاطب عندها غير خليك صبور بس..
يوسف:ان شاء الله..باهي علاش لما نقرا عليها قرآن نحس فيها زي اللي تتعب وتقعد تبكي..
جهينه:والله يايوسف من لما قتلي ع القصه هادي واني نحاول نلقى تفسيرمالقيتش تفسير منطقي غير انها ممكن لما تسمع فيه تتفكر في صوت حد تاني يقرا فيه..
يوسف بحزن؛ممكن صوت عمي الله يرحمه كان يحب يقراه في حوشه بصوت عالي..تنهد بألم وقالت..تعرفي نفكر في اليوم اللي تعرف فيه انه توفى خايف يجي هاليوم خايف نشوف ردة فعلها..
جهينه؛اختك مراة قويه..حتزعل واكيد مش حتنسى لكن حتتجاوز بش تكمل حياتها..
يوسف هز راسه موافقة لكلامها اللي قاعد يفكر فيه..
🍃🍃🍃🍃🍃🍃
"بديت نجي لليبيا هلبه السنتين الاخيرات بسببك"
مختار؛ومن قالك تعالي..
فاتن وهي تمرر في نظرها حواليها..
/حني في المطار ماتخلنيش نضربك قدام هالامه..
قعد يضحك..
وكملوا طريقهم لين طلعوا من المطار وسط الحراسه والتشديد الامني لين ركبوا سيارة تستنى فيهم برا..
فاتن؛غريبه مش رضا اللي يستقبل فينا كالعاده..
مختار:مشغول عنده مايدير..
فاتن؛شكلك مش مروح للعمارة..
مختار؛امم معزوم عند صديق برا طرابلس يعني بنحطك وبنمشي غادي طول..
فاتن؛باهي توصل بالسلامه..
مختار:Danke
فاتن؛والطلب متاعي شن صار فيه؟
مختار:خليه الخميس..
فاتن؛وعلاش مش غدوة؟
مختار:غدوة عند شغل ضروري..
هزت راسها وغيرت نظرها للروشن...
🍃وفي العمارة..
كان رضا مقعمز في مكانه المعتاد يخدم ع اللاب توب..
جاته رساله ع الهاتف..قامه وفتحها..
"وصلت"
كتب وبعت..
(حمد لله ع سلامتكم..ماشي ل*****)
شويه ورد عليه..
(ايه..غدوة الصبح نبيك تمشي ل ***** تم الموضوع عني)
رد عليه..
(حاضر)
ومعاش بعت مختار بعدها شي..وهو حط تليفونه ع الطاوله..
بعدين وخر عن اللاب توب وقعد يمرن في كتافه..
شويه وناض خدي تليفونه ومشي خش داخل..
🍃وصل في الكوجينه سمع صوت المذيع اللي تحبه امينه..
بدت ع وجهه ملامح الامتعاض..
خش للكوجينه شاف صابرين مقعمزة ورا اللاب توب في يدها بريوشه كبيرة تاكل فيها..
قعمز ع الكرسي متاع رخامة البار وقال..
/شن مايجيش علينا حتى حني!؟
امينه بضحكه؛ثواني..
صابرين كانت تاكل وتشوفله بحده..
وهو عاطيها بالظهر ولهي بتليفونه..
"وهادي رساله فنونة عبدو تقول...الحب من اول نظره مش موجود بس في حاجه اسمها اعجاب من اول نظره ومع تكرار النظرات يطور الاعجاب لحب..ممكن يافنونه ممكن يكون كلامك مزبوط"
امينه جابت البريوش لرضا وقالت..
/كلامها صح ومش صح..يعني في اللي كده وفي اللي كده..
رضا:مواضيع البرنامج هدا اتفه من بعضها والمذيع زايده بلي ع بلاه..
امينه؛يااخي تلهي منك للشعشبونه دي..
رضا وقف مضغ وقال..
/شن حشرها هادي!
فنصت فيه صابرين..
امينه؛رأيها زي رأيك الاتنين اخيب من بعض..
هو رجع ياكل عادي..
وصابرين تفنص في امينه وتتحلف فيها..وامينه دايره روحها ماتشوف في شي..
"وهادي رساله من ولد البلاد يقول..الحب زي المصيبه تنزل عليك فجأه لاع بال ولاع خاطر وتقعد عمرك كله تعاني فيها وتلقى روحك تدعي ياربي ابليني فيها اكثر واكثر"
صابرين بضحكه؛عليك تعبير معاق لكن حلو..
هو كلي البريوشه في فم واحد وكانت باديه ع وجهه ابتسامه خفيفه..
"مليح التعريف ياولد البلاد وحاضر طلبك مجاب ياغالي"
وحط اغنيه لفنان رضا المفضل...
لما بتسهر وبتتأمل..
راضي بليلك مهما طول..
اسمحلي عن هالحاله اسأل..
قولك هيدا حب؟
ولما بتسمع دقة قلبك
وبتتحير وبتتلبك..وبتضيع شرقك من غربك..
يعني انغرم القلب..
☘امينه قعدت تشوف لرضا وهي مبتسمه ومضيقه عيونها بشك..
وهو داير روحه لاهي بتليفونه..
اما صابرين قعدت سرحانه مع الكلمات..
عمرها ماعاشت اللي عاشاته توا مع حد قبل رضا..
قبل كانت في مشاعر تتحرك برا القلب وممكن حواليه تأثر فيه لكن ماقدرتش تخش في عمقه وتعبيه لين تمس شغافه..
اعجاب..او هوس..اوحب مادي للفلوس والرفاهيه النفوذ..
بس اللي تحس بيه توا مخليها موليه انسانه تانيه هي نفسها متفاجئة فيها...
قطع عليها سرحانها الاتصال اللي جاها..
خدت تليفونها مع الطاوله شافت المتصل كان رقم غريب..
رضا ماباش يلتفت بس قلبه ولى جمرة تلهلب فكر ان اللي يتصل بيها توا مختار..
هي فتحت الخط وقالت..
/الو..
"خويله"
هي بفرحه:جوري ياقلبي..
امينه ابتسمت بعطف..
وهو التفت نص التفاته وقعد يشوفلها..
"خويله استاحشتك هلبه"
صابرين دموعها نزلوا وهي تمسح فيهم وتقول..
/واني اكثر ياعمري..
"شكرا هلبه ع الهدايا"
صابرين؛ياعمري نعطيكم روحي وشويه عليكم..
هو بدت ع وجهه ملامح حلوة ونظره كلها مشاعر ركزت فيها امينه..
"خويله حني عند حنينه لطيفه"
هي بخوف قالت..
/علاش حبيبتي؟
"ماما عندها شغل مش فاضيه"
تنهدت صابرين وقالت..
/اممم..
"خويله غدوة بنطلعوا للجردينه مع حنينه تعالي"
هي بلهفه؛وين اما جردينه؟
"في*******"
صابرين:العشيه ولا؟
"ايه خويله بتجي"
صابرين وهي مبتسمه وسط دموعها:ايه سموحتي ايه بنجي..
"باهي باي توا"..
وسكرت..
نزلت صابرين تليفونها وهي تبكي بصمت..
جتها امينه ووقفت حداها حطت يدها ع راسها وقعدت تمسح علي شعرها..
ضمتها صابرين وقعدت تبكي..
ورضا ناض ومشي طلع من حداهم...
🍃🍃🍃🍃🍃
يوم الاربعاء..
14نوفمبر..سنة 2018..
الساعه 6:15مساءا..
كانت واقفه في جنان الحوش تشوف بفرح لزهر الاقحوان اللي بدي يطلع..
تردد في التسبيح بعد ماقرت الأذكار وعيونها يتأملوا في احب الزهور ع قلبها..
خفت ابتسامتها لما سمعت صوت سياره درست قدام بوابة الحوش..
غيرت نظره ليه..وقعدت تشوف للفتحه متاع البوابه من تحت..
سمعت صوت باب انفتح وتسكر..
بدت تمشي خطوة ورا التانيه بإتجاه البوابه وهو تسمع في صوت خطوات الزائر المفاجئ..
وصلت في الباب قبل ليدق وتفتح الباب دون ماتسأل من وراه..
لأنها كانت عارفه من حيكون وراه..
ع وجهه شافت بشاشه وابتسامة واسعه تبان حلوة ومريحه..نزلت نظرها لشنطه لونها بني كان شادها وقعدت مركزة فيها..
مختار:بنقعدوا هكي هلبه..
رجعت نظرها ليه وابتسمت وقالت..
/اسفه..تفضل..وخرت عن الباب وهو خش..
سكرت الباب وقالت..تفضل..
هو بدون سابق انذار ضمها ليه بقوة..
خلاها جامده في مكانها لدرجة حست ان قلبها وقف..
مختار؛فرحت بفيقة سدرة ع خاطرك انتي..
تباعد وحط يده ع خدها وقال..
/ماكنتش نفكر في غيرك بعد ماعرفت انها فاقت..
طوبى حطت يدها ع يده ونزلتها وهي تقول بإبتسامه..
/الحمد لله..طلقت يده وقالت..خش صقع..
مختار هز راسه ومشي بإتجاه المربوعه وهو يقول..
/ريح الخريف تهبل..حتى ريحتها..
طوبى تسمع فيه وقلبها يدق بسرعه وهي مستغربه فيه..
شافت للشنطه..بدت ع وجهها ابتسامه اسف خفيفه..
وصل في باب المربوعه..حول كندرته بعدين خش وهو يقول..
/حتى اليوم مافي حد؟
طوبى:ايه..اني وجنة بس قاعدين..تبي تشوفها؟
قعمز وقال:لا مافيش داعي طلعيها في جو زي هدا..قعمزي..
طوبى؛ماتبيش قهوة؟
مختار:لا حبيبتي مانبي شي..قعمزي..
قعمزت طوبى وقعدت تشوف للشنطه..
مختار:اول شي شن حاالك وحال الجميع؟
طوبى:الحمد لله رب العالمين في خيار الخير..
مختار؛كويس..تنهد وقال..شوفي طوبى انتي طلبتي مني خدمه واني حاولت نديرها بس مع الاسف الموضوع كان اكبر مني الراجل هدا في وراه كابوات زي مانقولوا وحطكم في راسه..
طوبى:يعني!؟
مختار تنهد وقال:نصيحه مني انسوا خدمه القهوة هادي وفكروا في غيرها في مشاريع مازال انجح..
طوبى:زي شني؟
مختار بضحكه؛هلبه هلبه..بس كلها تبي راس مال قوي...واني بصراحه حبيت نعوضك ونخدمك بحاجه تانيه..
"نخش معاكم شريك برأس مال كبير"
مختار؛ونبدوا بدايه قويه واني نضمنلك نجاح المشروع ولازم تعرفي اني مانراجي منه في شي..اللي نبيه انكم تخدموا وتنجحوا وبس..
شافت للشنطه وقالت..
/الشنطة هادي فيها راس المال ولاالوراق متاع عقد الشراكه!
هو بضحكه قال:لا الفلوس جبتهم كاش بش تشوفيهم بعيونك وتتأكدي ان اقتراحي مش مجرد كلام..
طوبى ضيقت عيونها بإبتسامه وقالت..
/ع العموم مشكور وبارك الله فيك..مسأله المطحن انحلت قداش ليها..فكينا الشراكه وقررنا نديروا مشروع جديد مايكونش فيه معانا حد براني..حد من بر الحوش هدا..
هو ضيق عيونه وقال..
/فكيتوا الشراكه!؟ باهي واللي شفته توا لماجيت هني شني؟
تنهدت وقالت..
/كنت عارفه من البدايه انك مش حتقدر تخدمني في موضوع المطحن لأن زي ماقلت الراجل مدعوم من ناس ليها ثقلها انت ماتقدرش دير معاهم حل...لأنك ماحاولتش قبل هكي تواجه نفسك وتوقفها عند حدها..
بدت شيئا فشيئا ع وجهه ملامح الصدمه..قعد يشوفلها بنظرات عدم استيعاب وهو ساكت..
طوبى؛لما جيتك كنت عارفه انك انت اللي وراها حاولت نعطيك فرصه وحتى حني ناخدوا فرصتنا..وللأسف انت ضيعت فرصتك..
ناضت من مكانها ومشت لطاوله كانت تنفتح من فوق..
رفعت الغطا متاعها وطلعت ورقه بعدين نزلاته ومشت بيه لخوها..
حطت الورقه ع الطاوله قدامه وقالت..
/وهذا اللي يثبت كلامي..ورقة فسح العقد..وشريكنا قبل اللي انت درت هدا كله بش توصل فيه معاش في شي يربطنا بيه كان الجيره..لكن انت..وبرغم كل شي تقعد خوي وقتلك قبل الحوش هدا حيقعد بابه مفتوحلك..
قعد يشوفلها وهو يسمع فيها..
نظرات عيونها كانت غريبه..نظرات خاليه من اي شعور..
عكس نظرات سدرة ليه لما تلاقى هو وياها لاول مرة في 2016..كان في غضب في عيونها بس مسحة الحنين خالطتها..
هو هني..
تشكلت قدام عيونه رقعة الشطرنج بطرفيها..
الابيض والاسود..
هو كان القطعه الاعظم في الجزء المظلم متاعه..كان متقدم ع كل القطع ويستنى في اللحظه المناسبه اللي يوصل فيها لملك الطرف المقابل..وينهيه..
وع حين غرة..
يتحرك ملك الطرف الابيض اللي كان مخفي وسط القطع التانيه ويوصل في ملك الطرف المقابل...
《وكش ملك..》
تماسك بكل قوة وناض وقف ابتسم ابتسامه واسعه بعدين قال..
/صحة ليك..بس في حاجه لازم تعرفيها كويس حبيبتي..تسرعتي في حكمك وظنك فيا كان في غير محله ونتحداك تثبتيه..
طوبى:والله نتمنى من قلبي نكون ظالماتك..
مختار:لاانتي ظالمتيني وهلبه..ولانك اختي الصغيره حنقولك تموني ونعديها...
قعدت تشوفله بصمت وملامح وجهها كانت عاديه..
تنهد وقال؛ع العموم اني كان قصدي خير..والله غالب اللي ماعنده حظ لايتعب ولايشقى..بس عموما ماتخافيش مصاريف علاج سدره حنقعد متكفل بيهم لين يولي حالها احسن من قبل..وحنقعد نحاول معاكم لين تغيروا نظرتكم ليا وتشوفوني زي مااني خوكم اللي همه كله مصلحتكم..
طوبى:شن قلت لسدرة؟
تنهد وقال:حكيتلها عنك..
عيونها تعبوا دموع..
رفع شنطته وقال؛من قلبي نتمنالكم التوفيق..
طوبى:مشكور..
مختار:هي بنطلع توا وراي شغل مهم.
مشي طلع وهي وراه..
وصل في الباب وقال..
/سلام..وفتح الباب وطلع..
طوبى؛وعليك السلام..
شافلها بإبتسامه وسكر الباب..
وطول اختفت ابتسامته وحلت محلها ملامح غضب مخيفه..
ومشي بيركب سيارته جو عيونه ع عبد القيوم اللي كان طالع من حوش المهدي..
شافه عبد القيوم عقد حواجبه وكمل طريقه لسيارته
ومختار غير نظره عنه بعدين ركب سيارته وشغلها وتحرك طول وهو يحرق في العجل ونظر التارقي لاحقه....
#الانتقام
#طوبى
.....يتبع...
