[كان الله في عون اهلنا في غ.زة دعائكم معاهم هدا أضعف الإيمان ]
#طوبى "جنة طوبى"
#جمان_فريد
#الجزء_المئة_وواحد"حسابات قديمه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ». 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إنّ لكل إنسان ذكريات لا يريد أن يصرح بها للجميع ، وإنما لأصدقائه فقط.. ولديه أيضا أشياء أخرى يخشى أن يخبر بها حتى نفسه
دستويفسكي🍃
______________________________________
"ردك قوي هلبه"
طوبى وهي ترقد في جنه..
/انتي قلتيها ردك يعني اللي يدق الباب يسمع الجواب..
اميمه:اللي داره فيك قبل ماخوفكش منه؟
بقوة ردت تقول..
/هو اللي مفروض يخاف مش اني..اللي مريت بيه يااميمه خلاني معاش نخاف من الناس اللي زيه خلتني نعرف ان اللي مايخافش ربي مفروض هو اللي يخاف مايخافوش منه..
سكتت اميمه وهي تفكر في كلامها..
حطت طوبى جنه في سريرها وغطتها بعدين التفتت لأميمه..رفعت حاجبها وقالت..
/وانتي عاد الضحكه من الوذن للوذن وهو يتغزل فيك..
اميمه بضحكه:الصراحه الصراحه..الصراحه الصراحة..كلامه يدوخ واسلوبه حلو..
طوبى غمضت عيونها وحطت يدها مكان المرارة وقالت..
/يامرارتي هييه..
واميمه تضحك عليها...
🍃ومن دار البنات لدار المعيشه..
فرشت مطيره لفاتن جنب مكانها هي وصفيه..
مطيره؛هكي كويس بنتي قولي ماتتحشميش..
فاتن بإبتسامه؛والله كويس هلبه..وتمددت ع الفراش..
غرفه وهي ترقد في بنتها...
/عاد فاتن بنت الهاي كلاس ماتعرفش النوم الفراشات هادم..
فاتن بضحكه؛صدقيني الجو اللي عايشاته معاكم خلاني ننسى اني مني اصلا
ابتسموا وهو يسمعولها..
فاتن بإبتسامه؛صح اني عشت في بيئه مرفهه وزي مايقولوا بنت طبقه مخمليه لكن ماكنتش سعيده بكل..ماحسيتش بشعور حلو في حياتي زي اللي عشته معاكم هاليومين من اول مرة جيتكم فيها كان تتفكروا ماتمنيتش نطلع من عندكم..لقيت عندكم الجو اللي فقدته عمري كله..جو العيله..نزلوا دموعها وقعدت تمسح فيهم..
وخلتهم كلهم يدمعوا معاها حتى غرفه...جتها مطيره قعمزت جنبها وقالت:تعالي عندي تعالي..
التفتت عليها وهي تضحك بعدين خشت في حضنها..
ضمتها مطيره وطبطت عليها وهي تقول..
/عاد انتي كنتنا توا مرت ولدنا نبوا ولا مانبوش..ماتزعليش مني بنتي لكن انتي حرام في فسخة راجلك..
ضحكت غرفه..لكن صفيه ماعجبهاش الكلام مارضتش فيه..
اما فاتن قالت:عنده حاجات حلوة جايبها منكم..
مطيره؛تحبيه شن بتقولي غير هكي..
ضحكت فاتن..
ع خشة اميمه واريج عليهم وهي تقول..
/تسلم عليكم ماما..
كلهم بأصوات متقطعه..
"سلمها"
مطيره:شن حالها وحال خوتك..
🍃وقعمزوا اميمه واريج وكملوا هدرزتهم اللي كانت مستمتعه بيها فاتن للغايه..
ومن قدام الدار اللي هما فيه فاتت طوبى وهي متوجهه للصاله دور في سدرة..
وين وصلت الصاله مالقتهاش قلبها انقبض..شافت باب الحوش مفتوح..طلعت طول...
قابلها ضي طالع من الدار الدروج..استغربت ومشت خشتلها..
لقت سدرة مقعمزة ع الدروج حاطه ايديها ع وجهها وتبكي..
قعمزت جنبها بهدوء وقالت..
/خيرك سديرتي!؟
نزلت ايديها وهي تقول ببكي..
/طلعت..عيشه مخليتلي رساله..
بدت ع وجه طوبى ملامح الحزن..
بنظرات الم وخوف شافتلها سدره وقالت..
/خايفه نقراها..خايفه هلبه..حاسه روحه مش قادره..
قالت الجمله الأخيره بنبرة مخنوقه..
طوبى وهي تشوفلها وتسمع فيها حست بوجع وحسره..
تشوف في اختها مثلها الأعلى اللي كانت يوم من الايام شامخه زي الجبال وصامده زي صمودها في وجه كل العواصف،ولت زي الطفله الصغيره الضايعه..كلها خوف وضعف...
زادت تأكدت ان سدرة بأمس الحاجه للعلاج النفسي وجنب هدا كله هي محتاجه للإحتواء والدعم..
خدتها فحضنها وقالت..
/مش لازم تقريها توا..اقريها لما تحسي روحك تقدري تقريها..
مسحت ع ظهرها وقالت..هي نوضي نخشوا نرقدوا..
رشفت سدرة وقالت بصوت مبحوح..
/باهي..
ناضت طوبى ونوضتها معاها.. لما جو طالعين من دار الدروج التفتت سدرة وشافت للدروج..
طوبى ركزت عليها..
سدرة:طحت هني؟
طوبى بضيق؛ايه..
بألم قالت؛بوي شافني!؟
طوبى ودموعها في عيونها حركت راسها بالنفي..
تنهدت سدرة بألم ولفت ومشت بتخش للحوش..
خدت طوبى نفس وسكرت الباب..مشت طفت الضي بعدين خشت للحوش وسكرات بابه بالمفتاح...
🍃مرت الساعات الاولى من الليل وسدرة بعد ماقعدت فايقه في مكانها تفكر بصمت خداها النوم ورقدت..وبهكي يكونوا اهل الحوش كلهم رقدوا ماعداها..
طوبى..كانت مختليه بالله..تحكيله وتشكيله تحت ضي القمر كان خاش من هداكا الروشن اللي شهد ع خلواته برب العالمين...
"مانبيش نبان قدام العباد خايفه..نبيك انت بس تشوف خوفي لاني عارفه انك انت بس اللي تقدر تقلبه لأمان..اني قويه وبمعيتك..اني قاعده واقفه ع رجليا بعد كل اللي مريت بيه لاني شاده يدك..بعونك اللي ديما كنت بيه معاي في اوقات شده حنتخطى المرحله الصعبة هادي وحنحافظ ع عيلتي وامانة بوي..ياربي ماتخليش الياس يعرفلي طريق..يارب"
طلعت اللي في قلبها..وانكسرت ع بابه وزي ماجاته بضعفها وخوفها خلاها تطلع من خلوتها وهي حاسه بدفق كبير في قلبها من الامان والقوة..
ناضت من مصلاها ومشت طلعت من الصاله لدار البنات..
خشتلها لقت اريج وجنونه غارقات في النوم...
حولت ملايتها وعلقتها..بعدين خشت سريرها..
خدت تليفونها من تحت المخده وخشت ع الفيس بوك..
اول منشور قدامها كان اقتباس من كتاب الوابل الصيب لإبن القيم يقول...
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه حتى كأن المخاوف يجدها أمان له
والغافل خائف مع أمنِه، حتى كأن ما هو فيه من الأمنِ كله مخاوف، ومن له أدنى حِس قد جَربَ هذا وهذا. واللّه المستعان»
تسارعت دقات قلبها وابتسمت ودموعها عبوا عيونها..
اللي حس بهالشعور مرة في حياته يعرف طوبى بشن حست لما قرت المنشور...
مابتش تشوف بعده شي..طلعت من الفيس وحطت التليفون جنبها..
وحطت راسها ع المخده وبدت بهمس تردد في تاج الذكر..لين غلب عيونها النوم..ورقدت..
🍃بس في اللي طار النوم من عيونهم وحل مكانه القلق والخوف..
هادوا نجمه وبنتها عواطف وكناينها التلاته..
🍃صفاء بقلق؛قال اشرف طاح في العشي بإيديه الزوز..
خبطت نجمه بيدها ع فخدها وقالت..
/ياحليلي هيه هالراجل المعاندي المهمل..
سميره وهي تحاول تخفي قلقها..
/ان شاء الله بسيطه عمتي..
ابتسام:وين بسيطه وهو قريب رجع مصارينه..
رمقتها صفاء بنظرة حاده..
ونجمة قالت بخوف..
/ياربي لطفك يارب..
ع خشة عواطف وهي تقول بضيق..
/ماخلونيش نمشي معاهم..
سميرة:مش مشكله هما تو يتصرفوا.غير تعالوا قعمزوا بس..قعمزي ياعمتي وهدي روحك صدقيني حاجه بسيطه..
وخدتها معاها وقعمزتها ع الصالون وابتسام تشوفلها بإمتعاض..
🍃في نفس الوقت..
فاقت هاديه..نزلت من السرير وطلعت من الدار متوجهه للحمام..
وهي ماشيه لمحت دار شيبانيها مفتوحه ع وسعها..
استغربت مش بعادته يرقد ويخلي داره مفتوحه..!
قدمت كم خطوة بحذر..شافت وسط الدار لقتها فاضيه حست بشي من القلق..
مشت دور عليه لين وصلت وسط الحوش..
وجهت نظرها لباب الحوش لقاته مفتوح..قدمت كم خطوه لين وقفت قدامه..
وتشوف علي الواعر مقعمز ع كرسي وهو شاد عكوزه..
شافاته يمسح دموعه...وخرت ومشت بتولي للحمام وهي تفكر في حالته بعدين قالت في نفسها بحزن..
"شكله تفكر سلفي الله يرحمه" تنهدت بالم..ومشت خشت للحمام...
🍃🍃🍃🍃🍃
وفي صباح تاني يوم..
سقدت فايزة بناتها للمدرسه ومشت لحوش طوبى..
فتحتلها مطيره الباب ورفعتها لجنان الكوجينه..
لقتهم مفرشين ومقعمزين يشربوا في القهوة..
☘فايزة؛بعد مافركسوه ومزرطوه لقبل الفجر بش عرفوا ان عنده الزايده لقوها قريب تنفجر..
بدت ع وجوههم ملامح الاستياء..
صفيه؛طب عيني في البلاد هادي..
حمحت اميمه وقالت؛نحن هنا..
ضحكوا..
صفيه بضحكه؛ربي يسخرلك وتطلعي منها..
سدرة حطت فنجان القهوة وقالت..
/شن رايك اميمه تطلعي مع يوسف بعد يتزوج..
وجهوا انظارهم لأميمه وهما يراجوا في ردها اللي كان..
اميمه؛لاصعب العيشه غادي غاليه..
سدرة:تطلعي ع حساب ولد عمك وين المشكله..
تبادلوا مطيره وغرفه نظرات الاستياء..
صفيه؛هلبه عليه ياسدرة..
سدرة:لاهلبه لاشي هو قبل ملمحلي بحاجه زي هادي تبي نكلمه اميمه؟
ابتسمت اميمه وقالت..
/صحيتي سديرة..اني في بالي خطة ماشيه عليها حكايه السفر مازال وقتها..
هزت سدرة راسها وهي تقول..
/ع راحتك..
وفاتن ملتزمه الصمت وهي تمرر في نظرها على كل وحده فيهم..لاحظت ملامح العصبيه بادية ع وجوه غرفه ومطيره..تمنت وقتها لو طوبى كانت موجوده بش شافت ردت فعلها..
🍃طوبى في هالوقت كانت مقعمزه بالصغار في دار المعيشه تفطر فيهم واريج تعاون فيها وهما يهدرزوا..
طوبى:توكلي على الله..
اريج:حتى اني خلاص معاش نبي نقعد في الحوش نفسيتي تعبت..
طوبى وهي تمرر في نظرها ع توأم غرفه قالت..
/خلاص اوبا هوبا ناضوا الزوز وطلعوا من الدار..
طوبى بضحكه:لحقي عليهم..
ناضت اريج في جرتهم وهي تنادي..
/تي تعالوا ياشفشوفين..
طوبى شافت لجنه وقالت..
/هالساعه اللي معاش تبي تطلقيها..
ناضت بيها وهي تقول..
/خل نمشوا نغسلوا ايدينا وفمنا..
وطلعت بيها للحمام...وبعد مناوشات ومعافرات بش قدرت تاخد منها ساعه مختار شويه وتغسللها ايديها وفمها..
ومجرد ماكملت عطتها الساعه طلعت تجري لفم الحوش وامها في جرتها..
سبقتها وطلعت من الحوش وهي وراها تقول..
/يافكرونه ياخنفوسه تو نوريك..
"جرينه"..
ضحكت لما شافتها واقفه ورا الحاج علي وشاده في سوريته..
طوبى:صباح الخيرات جدي..
علي بإبتسامه:صباح الخيرات والليرات والجرانات..
طوبى بضحكه:ولت مشاغبه هلبه ياجدي..
علي:ع خاطر جاباته من برا!..بري انشدي سدرة كيف كنتي..
ضحكت طوبى بإحراج..
هو شاف لجنه اللي كانت تلعب ع عكوزه وقال..
/ربي يحفظها..
طوبى بإبتسامه:آمين..ايه حقه جدي سمعت بالحاج الصيد!؟
علي؛انتم من قاللكم؟!
طوبى:بنته نزلت منشور في الفيس قالت دار عملية زايده..
ضحك بتهكم وقال..
/عليك حاله..
طوبى بضحكه:باهي اللي جاته ع زايده حولها وافتك..
علي:كلهم ولوا رابش..
طوبى بإبتسامة مشاغبه..
/الا انت ياكابونا الله يبارك عليك غير كان طاوعني وتخليني نخطبلك..
بنظرة امتعاض شافلها وهويقول..
/تخدمي ع خبطه ع راسك براس العكوز..
قعدت تضحك طوبى..
شويه تكلمت جنة وقالت..
"هاكا"..
شافولها الزوز لقوها تمدله في الساعه..
علي:شن هدا؟!
طوبى:ساعة..
علي: رجاليه هادي..شاف لطوبى بعقدة حواجب وقال..لهداكا المغضوب..
هزت طوبى راسها بضيق..
علي بإزدراء؛خزي..والله لولاك لزيته..
طوبى بضيق؛ريت حالة سدرة امس شفت كيف تعاملت مع خالي وعبد الرؤوف وقبلها دارت نفس شي مع مرت خالي..اشبح شن حاكيلها عليهم..
علي هز راسه وقال..
/واضح واضح..كيف ماقلتي الوضع يخوف واختك نحس فيها مش زي قبل ديما سارحه ودوتها شويه لتوا حاسها ماروحتش..
تعبوا عيون طوبى بالدموع وهي تقول..
/صح ياجدي..راهو مازال تبي علاج وضعها الصحي مش كويس هلبه ووضعها النفسي ملخبط هلبه فقدان ذاكرة ع فترة غياب فاتت العام مش بالساهل تولي زي ماكانت بعد هدا كله..مازال تبي وقت مازال..وتبي منا حني نساعدوها ياجدي ومانعطوشي فرصه يستغل وضعها..نخلوها بروحها تشوف وتعرف كل شي مانبي حد يضغط عليها..
علي:الضغط ع اعصابنا حني يابنتي..
طوبى؛معليشي تحملوا..تعرف شن دار فيا وتعرفني مش طايقه نسمع اسمه لكن ع خاطر سدره خليته يخش الحوش وياكل ويشرب فيه...
نزل علي عيونه لجنه..نظراته كانت كلها حزن..
طوبى وهي تشوفلهم قالت..
/ابتلاء وربي يعينا عليه ويرفعه..
رد نظره ليها وقال:آمين..هي اني ماشي..
وتوجه للباب الفاصل وهي بعيونها معاها لين درق عنهم..تنهدت بحزن وغيرت نظرها لجنه وهي تقول..
/هيا ماما تعالي معاي...
وخدتها من يدها ومشت هي وياها للجنان جهة الكوجينه..
🍃🍃🍃🍃🍃
"قتلك يزن عليا يبي يشوفني"
هادي راما تكلم في صاحبتها اللي مشاركتها في المقعد..
:امتى اخر مرة تلاقيتوا؟
راما؛تتفكري طلعتي للسوق هديكا مع ماما بش نشروا لبس للمة مرت عمي!..
:ان شاء الله من هداكا الوقت معاش تلاقيتوا!..لاعنده الحق..
راما بضيق:تعرفي اني نحبه صح لكن هو بدي يخوف فيا يطلب في حاجات خي..
بضحكه قالت:زي شني!؟
راما بضيق شديد:في هديكا الطلعه..باسني..
صاحبتها بذهول:ووااوو...يابختك يابختك احكيلي كيف دارها نحب اللقطات الرومانسية هادي..
راما بصدمه؛شن تقولي انتي والله يومها كرهت روحي قريب متت..
:وعلاش ياهبله حاجه عاديه راهو..واكيد دارها بعفويه..
سكتت راما وهي مضايقه..
:ماتعقديهاش خلاص..خليك فري..ااخ ياريتني مكانك..
راما؛جديات الحاجه هادي عاديه!؟
:عاديه يابنتي توا عادي..حني العام الجاي نخشوا الثانوي وهوقالك تخشي الثانوي نخطبك معناها صادق معاك من شني خايفه..
تنهدت راما بضيق وهي تفكر في كلام صاحبتها..
🍃وفي مدرسة صفاء الثانويه للبنات اللي بدت تقرا فيها مروة ومعاها صاحبتها مناسك..
كانت عندهم حصة فاضيه خلوهم فيها ينظفوا الساحه..
مناسك:طلعتني للسوق امس غيرنا جو شويه..
مروة:وخوك ماجاش؟
مناسك بضيق:معاش نبي نسمع سريتهم ماعدا مالك..ااه كان نعرف شن شايف ولاشن صار معاه خلاه يمشي للحرب..ونزلوا دموعها..
مروة بحزن؛علاش مصرة انه يحارب..
مناسك وهي تمسح في دموعها..
/والله يحارب يامروة ومع صاحبه ويجي يوم ونأكدلك كلامي..من غير سو ياربي من غير سو..وبدت تبكي..
مروة تمسح ع ظهرها وقبلها موجوع ع حالها...
🍃🍃🍃🍃🍃
مقعمزين في الصاله كلهم..
الام وضرتها والاولاد...
مغليه:اللي يسمع يقول مروحه من حج..
توجهت انظار عمر ونضال للمهدي لقوه داير روحه لاهي بتليفونه..
سميره؛تو لاقدر كان وحده من بناتك صارلها هكي ماديريش عرس ع سلامتها!؟
مغليه برفعة حاجب:تفاولي ع بناويتي انتي!؟
المهدي رفع عيونه وشافلهم..
سميرة بإمتعاض:قلنا لاقدر الله..
مغليه:غير دقيقه انتي شن حشرك اصلا اني ندوي مع ولادي انتي شن حرك شعيرك!؟
سميره:ردوا عليها ياولادها..
نضال:دوة نساوين هادي مالناش فيها..
شافتله امه بنظرات حاده عمر شافهم شد ضحكته..
سميره بضحكه؛يسلم فمك وليدي..
ابتسم نضال..
مغليه:من وين لوين وليدك!!؟
سميره:من الشرع ياضريرتي صغار راجلي صغاري..
ضحك المهدي..
مغليه:عجباتك انت ضحكت..لاقلت نسأل ع اختي لانشوفها..
المهدي؛خيرها شن صارلها!! حاجه عاديه وع قولة نضال دوة نساوين ماليش فيها..
مغليه بغيظ:ااه ياقهرتي ماني عارفه شن دايرة تحت ربي بش بلاني بهالذرية العاصيه.
عمربضحكه:صلي ع النبي يام ..احني عاصيين حني مانتمنوا كان رضاك ونخدموا عليه..
سميره؛ربي يحفظهم ويبارك فيهم..اللي يطلع واللي يجيب في الهدايا واللي يعاين واللي يتفقد عطاك ربي رجاله مافيش منهم..
ابتسموا وهما يشوفولها..
مغليه:من غير قولك اني مانجيب كان الرجاله..
ضحكوا الولاد وسميره تضحك وهي تحرك في راسها يمين ويسار...
🍃ومن حوش شنيبه للجيران المقابلين..
بعد الفطور داروا حملة نظافه ع الحوش..كملوها داروا قهوة وقعمزوا شربوها في دار المعيشه..
مطيره؛هويديه وفايزة بيديروا الغدي..
طوبى:عطيهم الصحه..
غرفه ؛رقدت مئاب سديرة؟
سدرة:ايه اهي في شنطتها حداي..
طوبى؛غرفه:لازم تعودي روحك معاش تخلي حد يساعدك كلهم اسبوعين بتقعديهم هني وبعدين تروحي من بيعانيهم معاك..
سدرة:كان تقعد لين تشد صحتها..
طوبى:لا سدرة كان طولت يصعب عليها بعدين لازم تتعود تعانيهم بروحها بعدين لامتى الراجل بيقعد بين هني وغادي!؟
سدرة بعقدة حواجب..
/وين المشكله!؟ يتحمل..
غرفه حست ان سدرة قالت كلامها بأسلوب تهكمي..
طوبى بهدوء:هو يتحمل وماعنداش مشكله ديما همه راحة غرفه..لكن اني وضع زي هدا مانرضاشي الحق..زي ماكان بوي الله يرحمه مايرضاش بيه..
تعبوا عيون سدرة بالدموع واكتفت بالصمت..
غرفه:كلام طوبى صح حتى اني واجعني خاطره يشوف بنته..
سدرة:شكله راجل كويس راجلك.
طوبى بإبتسامه؛فوق ماتتصوري ياسدرة وقف معانا وقفات لين نموتوا ماننسوها..الناس يقولوا درنا نسيب حتي نقولوا درنا ولد وحظنا في النسابه جي باهي غير الكبه جت فيا اني طيرت بيها العين..وضحكت..
قالت كلامها الاخير ولمعة الدمعه بانت في عينها..
وين شافتها سدرة حست بقلبها وكأنه قاعد ينعصر عصر..
غيرت نظرها لاميمه لما سمعتها قالت وهي تضحك..
/راك تنسي حتى اني معاك..
ضحكوا الزوز..
مطيره بإبتسامه تخفي بيها الالم..
/ربي يعوضكم خير..
سدرة:كلا اميمه لتوا مش مستوعبة كيف رضت بهالخرتيت ظفرك هلبه فيه..
اميمه بإبتسامه:نصيبات..والحمد لله ع كل حال..
اريج:كل حد خدي نصيبه من الوجع في الدنيا..
نظرات الحزن حاوطتها بعد ماسمعوها شن قالت..
سدرة:حظك زي حظ خالتك يااريج..ان شاء الله باقي عمرك يكون خير من باقي عمري..
طوبى:ان شاء الله ايامك الحلوة قريب تجي انا عند ظني عبدي بي..
ابتسمت سدرة بحب وهي تشوفلها..
لكن الباقي كانت نظراتهم ليها نظرات حسره..
🍃كلهم ممكن يجيهم العوض اللي ينسيهم المر اللي عاشوه ويكملوا معاهم حياتهم..
لكن هي وضعها معقد هلبه وحساس..غالبا حيخليها تكمل عمرها وهي تربي في بنتها بس..
صغيره مازال عمرها ماتعداش 22سنه انحكم عليها تكمل حياتها وهي تضحي وتعيش لغيرها وتنسى نفسها...🍃
فجأه جاها اتصال فيديو ماسنجر..
شافت المتصل ابتسمت من قلبها وقالت..
/خالتي سالمين..
سدرة بلهفه:هاتيها هاتي..
ناضت طوبى مشتلها عطتها التليفون..
فتحت سدرة الخط بانت عليها سالمين..
سمعوا صوت زغردوة سالمين اللي غصت بالعبرة وانهارت بالبكي وسدرة انهارت معاها...
بكاهم كان بألم وحرقه..خلا اللي حواليهم يبكوا معاهم بصمت..
هدت سالمين شويه وقالت بنبرة باكيه..
"حمدلله ع سلامتك يامينه..طيب في اللي روحتيلهم يابنتي"
سدرة بنبرة باكيه:الله يسلمك ياخالتي ويطيب وقتك شن حالك وحال عمي جبريل والعيله؟
"عمك جبريل منين سمع ذب.ح وصدق ياسديرة"
طوبى من بين دموعها قالت بإمتنان..
/ربي يطول في عمره..
"بيبا ياقلبي اهي روحتلك مينتك ياحبيبتي"..
ابتسمت سدرة بحب ممزوح بالحزن وهي تشوف لطوبى اللي كانت تقول..
"الحمد لله..الحمد لله"
🍃واستمرت المكالمه مع سالمين نصف ساعه ماجتش فيها سيرة الحرب والسياسه اللي ديما تفرق وتشتت وكانت اكثر نص مؤثرة وجميلة عاشوه فهاليوم..
وفي نفس الوقت..
اتصلوا سليمه وبنتها صفيه التوارق..
هنوا طوبى ع رجوع اختها..ومنها كلموا مطيره حتى هي..
🍃طوبى؛جونا مرتين وحضروا عرس صفاء..
سدرة:لهالدرجة قويه علاقتكم بالتارقي!؟
بدي يرتبك قلب طوبى واميمه واريج معاها ع الخط..
مطيره:راجل اصيل ولد ناس وفزاع وبوك الله يرحمه كان يحبه هلبه..ومعزته في قلب جدك كبيره اكثر شي ع خاطر مكانته عند بوك..
سدرة بإبتسامه ودموعها في عيونها..
/اللي يحبه بوي حني نحبوه.
بدت ع وجه طوبى ملامح ابتسامه خفيفه واميمه اريج ابتسموا معاها..
🍃وتعدي لحظات ويخشوا هاديه وفايزة وبناتها بالغدي..
قعمزوا تغدوا في جو جميل واريحي..
هالمرة سدرة كانت عاديه مع هاديه..لكن صفية صعب جدا تقبلها ولاتتحمل وجودها...
🍃لكن فاتن كانت تبي وجودها يطول معاهم..ولأن تحقيق هالامنيه صعب كانت نتمنى الدقايق معاهم تمر ساعات..
لكنها تقعد امنيه..بعد العصر مباشرة كان يراجي فيها الاقجم..سلمت عليهم بحرارة وهي تعزم فيهم ع حوشها وطلعت وياقداش تمنت ماتطلع وتخليهم...
🍃🍃🍃🍃🍃
ويعدي باقي هاليوم ويجي اللي بعده...
بعد عصر يوم الثلاثاء طلعوا طوبى وسدرة من الحوش لوجهة معينه يعرفوها الجميع وفي نفس الوقت مايعرفش سبب المشي حد غيرهم..
🍃بعد ماقطعت طوبى مسافه لاباس بيها..
درست قدم حوش ارضي من دور واحد..
سدرة:حوشهم هدا!؟
طوبى:لاالحوش لقريبهم خلاهم يقعدوا فيه بعد ماتمرمدوا في الايجارات..
سدرة:الفجي وخلاص..
تنهد طوبى وقالت..
/هي انزلي سديرتي..
فتحت سدرة الباب ونزلت بروحها قصدا طوبى دارت هكي تبيها تعتمد ع نفسها في كل شي زي ماكانت قبل..
نزلت بعدها وهي تكلم في زينب بالتليفون..
/قدام الباب...
"شويه بس"..
نهت طوبى المكالمه وقالت..
/اقربي سديرة..
قربت منها وقدموا مع بعض للباب...
وينفتح الباب ويطلع عدي اللي مجرد ماشاف طوبى فرح من قلبه وفي نفس الوقت ارتبك..
نزل عيونه وهو مبتسم..فتحلهم الباب ع وسعه ووخر عن الباب وهو يقول..
/تفضلوا..
سدرة ركزت ع حالته شدت ابتسامتها لكن صاحبة الشأن اللي كانت تعرف حال عدي معاها ضايقها اللي صار وماتمنتش تشوفه..
☘خدم عدي مع المحجوب في شركة المحاماة متاعه..وبدي يتردد ع شارع القهوة بعد مابني علاقات كويسه مع اهم ناس في الشارع بالنسبه ليه..عيلة الواعر وعيلة شنيبه..وبدي يشوف في طوبى وقت خدمتها في المحل وزاد اعجابه بيها..ولما سمع بيها فتحت المدرسه للنازحين كان اول المتطوعين..وشاف فهالشي فرصه ليه بش يخلي طوبى تعرفه اكثر..
وهو اللي زاد عرفها..وزادت خشت قلبه وخلاته مصر عليها
وطوبى لاحظت ان فيه شي غريب من نظرات العيون اللي ع اساس تفهم فيهم وبدت تتهرب منه..وطبعا هدا كله تحت نظر التارقي اللي تمنى مرارا وتكرارا لويقدر يقتله ويرتاح منه🍃
☘استقبلتهم زينب ودخلتهم للحوش...وكان في استقبالهم داخل ام زينب واختها اللي رحبوا بيهم ترحيب حار ورفعوهم للصاله..
اول ماخشوا شاف مراة اربيعنيه هيئتها مرتبه وكلها وقار..
سلموا عليها بعدين عرفتهم عليها اخت زينب على انها صديقة مقربه ليها وفي نفس الوقت تكون طبيبة نفسيه...
🍃🍃🍃🍃
"طلعوا الزوز بعد العصر وتوجهوا لحوش صديقة اختكم الصغيره اسمها زينب فتح الله"
مختار بدون اهتمام؛عرفتها عرفتها..المهم قوللهم يستنوا غادي لين يطلعوا..
:حاضر استاذ...
اشرله بيده يطلع...وخدي مق معبي مليسا وبدي يشرب منها وهو يفكر بهدوء..ورواق....
#حسابات_قديمة
#طوبى
.....يتبع......
