#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 سـنگون آنـآ وآنــــت گـــ♡ــآلقـلـب آلوآحـــد آنــــت تـنـبض وآنـــآ آعـيـــش بگ 🍃
________________________________________
خشت للكوجينه وبدت دور ع شيش مية كبار متاع سبعة لتر..
وهي دور..عينها جت ع حافظه حلو متوسطة الحجم..قدمت وخدتها من فوق الدولاب..
فتحتها لقت فيها معمول ناقص منه طرفين..
غيرت عيونها عنه وهي تفكر منين جابه؟
ردت نظرها للمعمول بعدين خدت منه طرف وذاقاته..
وهي تذوق عرفت الطعمة كويس..
عرفت صنع ايدين مني وهو امتى خداه وماقاللهاش عليه..
علاش بيقوللها؟! مش ملزم..
وبعدين هادي حاجه بينه وبين البنت اللي يبيها تكون زوجته المستقبليه بعدين هي بأي حق تدخل فيها!؟
برغم اعترافها بهالحقيقه من وجهة نظرها ماقدرتش تخمد نار غيرتها ولا تهدي ألم حسرتها..
حطت باقي طرف المعمول في فمها وقعدت تاكل فيه بغيظ ودموعها ينزلوا وهي تمسح فيهم..
ردت الحافظه لمكانها بعد ماغطتها وولت دور ع شيش الميه وهي متشتته ومرتبكه ومنعت دموع عينها من النزول..
لقت الشيش محطوطات في زاويه معينه من الكوجينه..
خدت الأولى رفعت للدار..بعدين ولت خدت التانيه ورفعتها حتى هي للدار..وولت للمرة الثالثه خدت المهراس ورفعاته للدار..
واخر شي خشت للحمام توضت وضوء الصلاة ورجعت للدار خشتلها وسكرت عليها...
🍁هو فهالوقت كان في الارض بعيد عن الحوش شويه..
ووين مامزروع التفاح والخوخ كان يقطف بعنايه ويحط في سلة سعف كبيرة..
لما كمل..وقف جنب السله وطلع هاتفه من جيب بنطلونه وكتب رقم معين واتصل بصاحبه..
☘صاحب هالرقم كان في غرفة تحميض صور يخدم ع مجموعه صور تخص احتفاليه وطنيه..
لما سمع رنين هاتفه خلا اللي في يده وطلع من الغرفه..
وصل في هاتفه اللي كان محطوط ع طاوله جنب كاترو صورة لمراة جميلة جدا..
شاف الرقم لقاه غريب..فتح الخط ورد..
/ايوه..
"السلام عليكم"
ضحك بدهشه وقال..
/اووو تارقي تي وينك ياراجل وينك قريب اعلناك مفقود ياراجل..
ضحك عبد القيوم وقال..
"كيف حالك وشن امورك"
سامي بإبتسامه قال..
/الحمد لله..شن اخبارك انت وين مغطس..
"سامي فاضي اليوم؟"
هو قال:ايه فاضي ماعندي شي مهم..
"تقدر تجيني لمزرعتي في الخمس"
ضيق عيونه وقال..
/في حاجه صايرة؟
"انت تعال وتو تعرف"
سامي:باهي نجيك بإذن الله بعد العصر نكون غادي..
"نرجى فيك لكن هاه رد بالك تقول لحد"
سامي حس ان في شي كبير صاير مع عبد القيوم واختفائه طول المدة اللي فاتت اكبر دليل هز راسه وهو يقوله..
/تمام تمام مش حنعطي علم لحد..بس انت عطيني راس عنوان..
"باهي خود راس عنوان..تزوجت"
ضحك سامي بصدمه..
"لما تجي تو تفهم سلام"
ونهي المكالمه وسامي نزل الهاتف ومازال يضحك في نفس الضحكه..سكت شويه وقعد يفكر بعدين قال..
/تو قالوا بنت الواعر سافرت مع خالها تعالج..في الوقت اللي اختفي فيه عبد القيوم..رفع حواجبه بدهشه وهو يقول..معقوله!؟..ضحك ع نفسه بسخريه وقال..وسعت منك ياسامي..تنهد وقال..ياريتني ماقتله عطيني راس عنوان..
التفت بيرد الهاتف لمكانه جو عيونه ع صورة زوجته اللي فقدها من سته سنوات..زي اليوم كان عقد قرانهم هاليوم مستحيل ينساه..زي استحالة نسيان صاحبة الصورة بالنسبه ليه..ابتسم بحزن وقال..
/الله يرحمك ويغفرلك..حط الهاتف ومشي رجع لحجرة التحميض بقلبه اللي كان يذرف في دموعه دم ع حب عمره اللي راح من بين ايديه..
🍁🍁🍁
وعبد القيوم بعد مانهي المكالمه خدي السله وتوجه للحوش وهو ماشي شاف وردة وين جو عيونه عليها خطرت عليه طوبى..مشي قطفها وحطها في السله وكمل طريقه للحوش..
اول ماوصل فيه جاته رساله ع الهاتف..
قامه وفتحها وقعد يقرا فيها بعد قراها قعد يضحك وهو يقول..
/بنلقاها منك ولامن سدرة..ااه ياني وخلاص..
حط الهاتف في جيبه وطلع المفتاح وفتح الباب ومازالت الضحكه ع وجهه..
ع طلعة طوبى من الدار شافاته خاش وهو يضحك عقلها طول قاللها انه كان يكلم في سلافه..
هو لماشافها سكر الباب وقال..
/قولي شن خاطرك تتغدي..
ظاهرت انها عاديه وقدمتله وهي تقول..
/شن رايك نديره اني اليوم؟
هو بإبتسامه قال..
/اللي تبيه ديريه..
بحماس قالت..
/خاطري في مكرونه مسقيه تاكل فيها؟
بنفس الابتسامه قال..
/اللي ديريه ناكله..
مدلها السله وقال..
/وديريلنا كوكتيل بهذين..
خدت السله شافت اللي فيها وهو لما جي بيركز ع ردة فعلها لما تشوف الوردة انتبه ع يدها اليسار اللي كانت ترجف..
طلعت الوردة وقالت بإبتسامه..
/ميرسي..
ضحك عليها كيف قالتها بطريفه لطيفه للغايه خلت قلبه يفرفش عليها..بس مع هذا قعد يفكر في رجفة يدها..
طوبى؛تو ندير بيهم حتى سلاطه فواكه مع المانجا اللي قاعده والموز..
هو قال:كنت تغتسلي بمية الرقيه؟
هي قالت:لامش توا وقتها كنت نقرا ع الميه شراب واغتسال الاولى تمت..
هو بملامح المفاجأة قال..
/كويس..
تنهدت وقالت؛افضل الرقيه رقيه الانسان لنفسه..طبعا قريت ايات الرقيه الشرعيه كلها مع ادعية الرقيه ودقيت سبعه وراق سدرة وحطتيهم في شيشة مية الغسل..
هو قال؛كويس كويس..باهي قوليلي لما دهنتي بزيت الزيتون البارح شن حسيتي؟
تنهدت بضيق وقالت..
/فشلت وحسيت براسي ينمل قعدت نقاوم لعند ماجاني النوم ورقدت..
عبد القيوم بضيق مخفي..
/ليش ماقلتي ؟
قالتله:اهو قتلك..
عبد القيوم:قصدي امس؟
طوبى:قتلك قعدت نقاوم نبي نعتمد ع نفسي نبي نتعود نعالج روحي بروحي وبعدين من قبل قتلك انت معاي بش تساعدني يعني كان حارت وبارت نجيك طول..
تنهد وقال..
/معاك..لكن نا نبي نشكوا ونحكوا لبعضنا في هالمكان مالينا كان بعض..
ابتسمت وقالت..
/ياسيدي باهي..ومشت للكوجينه..
لحقها قلبه المتيم وهو وراه وقف ورا رخامة البار وهو يتأمل فيها..
كانت لابسه بيجامه صيفيه لونها وردي شبيهه جدا في شكلها وتفصليتها للبيجامه التركواز وشعرها كله مرفوع فوق..
يتأمل فيها وهي تحط في الفواكه في صحن كبير خاص بيهم وحطاته ع الدولاب..
بعدين خدت الورده عبتلها طاسة مية للربع وحطتها فيها وحطت الطاسه في وسط الطاوله..
واخيرا رفعت السله علقتها في مكانها..
وهو يتأمل فيها كيف تتحرك قدامه مازال مش مصدق انها ولت مرته..ليها اسبوع معاه عايشه معاه..يتصبح ويتمسى فيها ياكل ويشرب معاها..يتسامروا ويتناقروا احيانا ويضحكوا مع بعض..
هذا بس يكفيه معاش يبي شي زياده..يبيها تكون جنبه ومعاه وماعنداش طمع غير في شفائها...
وسط هالصمت اللي دام لبضع دقائق قال..
/تعرفي نحس في راسي مصدع شويه..
التفتت وشافتله بقلق..
/وقفت تحت الشمس هلبه شكلك!
هو قال:لالا من امس في الليل بادي..
هي بعتب:ربي يهديك هدا وين تحكي!؟
رفع حاجبه وقال..
/مابيتش نتعبك تميت نقاوم بروحي وخلاص..
ضحكت وقالت..
/تتسهوك!
ضحك وقال..
/لا والله جد مصدع شويه..
هي قالت:ماخديت شي!؟
عبد القيوم؛قلت كان زاد ناخد بنادول..
طوبى بعدم تقبل..
/لابنادول لابنادولات مش باهي للمعده..تو نديرلك وصفه سحريه..
بإبتسامه قال:اسحريني اسحري السحر اللي يجي منك انتي حلال مبارك..
ضحكت بخجل وقلبها يدق بقوة مشت جهة واحد من الدواليب فتحاته وطلعت منه كيسه وهي تقول..
/يومها لما قتلي فتشيها فرحت هلبه وين لقيتك جايبها..وجهتله الكيسه وقالت..مليسا..
سكرت الدولاب ومشت للكاتل وهي تقول..
/فوايدها هلبه بالذات للصداع وتهدئة الاعصاب..
شغلت الكاتل والتفتت لعبد القيوم وقالت..
/الحاجه الوحيده اللي حصلت فيها فايده من مختار .
تبدلت ملامح وجه عبد القيوم من الابتسامه للكره وشي من الضيق بان فعيونه..هي لاحظت وقالت..
/قالوا علاقتك بيه حلوة..
هو قال:لاعاديه..ومش قويه..
قالتله:لكن حكاية التبرع بالكرفانات سلمهالك انت..
ابتسم ابتسامه خفيفه ورجع رسم نفس الملامح لما قال..
/هو وكلني بالموضوع هذى وفي النهاية عمل خير..
طوبى:مدام وكلك بحاجة زي هادي معناها تعتبر قريب عليه نوعا ما..
ابتسم قال..
/باهي كان قريب عليه كيف ماقلتي ليش طلبتك من خالك مش منه هو؟
هزت راسها بعدين قالت..
/ ننصحك لوجه الله ابعد عنه ع قد ماتقدر..
سمعت صوت جهاز الكاتل وقف مشت خدت مق وكاشيك ورجعتله وبدت دير في شراب المليسا وهو مازال يتأمل فيها لكن بنظرات حب خالطهم الحزن..
غطت المق وقالت..نراجوها شويه وتوا نبدا في الغدي..
برجاء وخوف مصطنعين قالت..
/ادعيلي...
ابتسم من قلبه وقال..
/ربي معاك..
ابتسمت من قلبها حتى هي وبدت في التجهيزات..
☘وبدت طيب وهو يهدرز عليها وهي تهدرز عليه اليوم كانت حيويه بزياده وجوها يبان حلو..او هي هكي تبي،تبي تغير نفسيتها وماتخلي شي يأثر عليها بش تتقوا للعلاج..
وهو قاعد يغرق في تفاصيلها اللي ادمنهم ومعاش يقدر يعيش من غيرهم...
🍃🍃🍃🍃
في الجنان..
واقفه تحط في طوبو"خرطوم" الميه في حوض العطر وهي دندن..
/العب ع التستوي ارقص ع التستوي وسمورة تستوي..
سكتت لما سمعت باب الحوش دق..شافتله وقالت..مني زعمه؟
حطت الطوبو ومشت وقفت ورا الباب وقالت..
/مني؟
"اني ياخالتي"
استغربت لما سمعت نبرة صوت نسرين باين فيها البكي..
فتحت الباب خشت نسرين وهي رافعه شنطة في يدها
سميرة بصدمه:نسرين!؟
خش بعدها يزن وهو رافع زوز شناطي تانيات وحده كبيرة والتانيه متوسطه وكان باين ع وجه يزن الغضب..
سميرة وهي تشوف لنسرين بنفس ملامح الصدمه قالت.
/دارها!؟
نسرين حطت الشنطه وجت لسميرة ارتمت في حضنها وانهدت بالبكي..
ضمتها سميرة وعيونها تعبوا دموع..
سكر يزن الباب وهو يشوف لعمته بنظرات حزن خالطت نظرات الغضب في عيونه..
سميرة وهي طبطب ع نسرين قالت.
/تعالي خشي بنيتي تعالي..
ومشت خشت بيها داخل اما يزن توجه لشقتهم..
******
يزن بغضب:سألني بوك قاعد قتله لا مشي طول..
سدرة بنفس الغضب..
/النذل..نمشي نلبس عبايتي ووشاحي وننزل نشوفها..
هز يزن راسه بعدين لف ومشي طلع من الشقه..
حركت سدرة راسها يمين ويسار اسفا وتوجهت لدارها..
🍃🍃🍃🍃
"يهبل يهبل"
خديجه بإبتسامه غرور وهي رافعه حاجبها..
/مازال تو تبان اكثر مع الايام..
مفيده وهي تشوف لشعرها في المرايه..
/يوم السبت تبان احلى من هكي؟
خديجه؛اكيد..المهم راك تنسي معاش تغسلي شعرك الا بالشامبو المغربي الخاص بالصبغه وتحطي من البلسم متاعه..
مفيده هزت راسها وقالت..
/باهي..
ع خشة كامله لما شافت شعر بنتها ابتسمت وهي تقول..
/اشيه اشيه..
خديجه بغرور وهي مبتسمه..
/هاه شن رايك؟
كامله وهي تشوف لشعر بنتها بإعجاب قالت..
/لا والله طلع عليها..
ابتسمت مفيده..
غيرت كامله نظرها لخديجه وهي تقول..
/هيا نوضي ديري الغدي معاش في وقت..
خديجه وهي تشوف لعمتها بطرف عينها..
/توقعت تكافئيني بعطله اليوم!.
عقدت كامله حواجبها وهي تقول..
/وعلاش ياحنه!؟؟ نوضي نوضي تحركي هيا..غيرت نظرها لبنتها وقالت..وانتي لمي شعرك وبري عاوينها نبي جنب الرز مبطن..
مفيده بتذمر:فهالنو يما!؟
قالتلها:تبيني نوكل راجلك شرموله!
مفيده بلامبالاه..
/تي عادي مايعدلش..
عكرشت وجهها وقالت..
/نوضي تحركي انتي وياها سقدوا..
ناضت خديجه وهي متنرفزة ومشت طلعت للكوجينه ومفيده لمت شعرها ولحقتها وكامله معاها بعيونها وهي تقول همسا..
/بدت تتأثر بيها ياكبدي..
🍃🍃🍃🍃
"افتكيني منه يابنتي"
نسرين وهي تبكي بقهرة..
/باهي شن درتله شن درتله في شن غلطت في شن قصرت! شن دخلي اني بخوتي وبلاهم شن دخلي علاش يحاسب فيا على شي اني مادرتاش!؟
سدرة:هدا يتسبل يانسرين شكله عينك ع غيرك..
نسرين ببكي..
/الله لايربحها اخته الحقيره هي جابتها في طريقه الكلبه..
سميرة بتساؤل..
/من هي هادي!؟
بألم قالت..
/صاحبتها ياخالتي صاحبتها..
سدرة:امالا والله الا هدا واحد اقل من الكلب ومايستاهل اللي دايرتيه في روحك ع خاطره..
نسرين قعدت تخبط ع وجهها ورجليها وهي تقول..
/حظي اني الاغبر..بختي اني الأسود..
ناضتلها سميرة شدت ايديها وهي تقول..
/صلي ع النبي يابنتي..وضمتها وهي تهدي فيها ونسرين منهارة وتشهق بعبرتها بكت سدرة معاها..
وخلت يحيى ولدها يزعل لزعلها بدون مايعرف السبب وجوري اللي بدت توعى وتفهم دمعوا عيونها حزن ع حال عمتها اللي ياما شافت امها عايشاته...
🍃🍃🍃🍃
"تو خطر عليها قالت بتجي هي وامها واختها"
فردوس:قلتليها طوبى مسافرة..
غرفه بمكر:لا..قلتلها مش قاعدين في الحوش اليوم..
فردوس:احسن..
غرفه:توا تفكرت طوبى اللي من لما مرضت معاش دورتها حتى بالتليفون..
فردوس بحيرة وضيق..
/والله ماتعرفي تلومي ولاتعذري خافت ع خوها وعندها حق..
غرفه بإستهزاء..
/اللي يسمع يقول في بيناتهم حاجه ولاطوبى ميته ع خوها اللي عييت وهي ترفض فيه.!
فردوس بإزدراء .
/حتى خوها مبرد دمه رفضاته ومازال يتلصق غرفه وهي ترقص في حواجبها..
/من الحب ياحنه من الحب حتى هي طوبى.
ضحكت فردوس..
ع خشة الاء للكوجينه جت لخالتها تعنقت ذراعها وقالت..
/ارفعيني معاكم للمعرض بعدين..
فردوس:قعمزي وهني روحك..
غرفه بإبتسامه:عادي خليها تمشي..
الاء:اني في حكم راجل وهو قالي وين ماخاطرك تطلعي اطلعي..
فردوس وهي تشوفلها بتهديد:تبيني نريشك ونقرصك عارفه..
غرفه بضحكه تعجب؛نهاري يافردوس بنتك ولت مراة متزوجه وام معاش تعامليها هكي..
آلاء:هدا مادايرتلي قدام عمتي تحرج فيا وخلاص عمتي دلع فيا اكثر منها..
فردوس برفعة حاجب..
/اهو خليتك مع عمتك اشبعي بدلعها..
بدت ع وجه الاء ملامح الضيق وهي تقول..
/معناها قررتي تقعدي..
ابتسمت بحزن وقالت..
/بعد ماعرفت باللي صار لخالتك معاش نقدر نولي..
غرفه؛طوبى توا مسافرة يافردوس..
فردوس:سيورها تروح وبعدين جنة تبي من يرد باله عليها اريج بتولي للخدمه وانتي عندك صغار ياالله تعانيهم..
الاء:كان هدا يريحك خلاص..
ابتسمت فردوس وقالت..
/خاطري ندير سفنز..
غرفه بإبتسامه:ديري ديري استاحشت السفنز متاعك..
"الاء تعالي لولدك"
الاء بتذمر؛واااك من هالحصله..
وطلعت بسرعه من الكوجينه..
غرفه بضحكه:مش طالعه عليها الامومه..
فردوس؛بكل..اريج عكسها بالها واسع وتحب الصغويرة..
غرفه بإبتسامه:زيها زي طوبى..
فردوس بإبتسامه تخفي بيها حزنها قالت..
/صح..
تبدلت ملامح وجه غرفه للقلق وهي تقول..
/ربي يحفظها ويردها سالمه لبنيتها..
فردوس من قلبها قالت..
/آمين..
🍃🍃🍃🍃🍃
"شن صاير فيها توا"
سدرة بضيق:قاعده تبكي يافايزة قلبي متقطع عليها..
"لتوا مش مصدقه ان ربيع يطلع هكي لما خداها قلت ربي عوضها بيه طلع مصيبه تانيه اكبر من حامد"
سدرة:صدقتي..تعشمت فيه هلبه مسكينه..
"بينه وبين ربه ان شاء الله يلقاه"
سدرة:ايه والله..تقدري تجي بعدين؟
"اني العشيه بنطلع ناخد سيارة لما نروح نخطم عليها"
سدرة:بتمشي مع غرفه؟
"ايه"
سدرة هزت راسها وقالت..
/باهي باهي نتلاقوا بعدين..بالسلامه..
"بالسلامه..
نهت سدرة المكالمه وهي واقفه في اخر الممر تسمع في بكاء نسرين اللي كان بحرقه..
جت بتمشيلها لكن وقفت في مكانها لما حركت نظرها اتجاه دار عزوزتها...قعدت تشوفلها لحظات..بعدين قدمتلها لين وقفت قدام الباب وفتحتها..
شافت مغليه وهي مقعمزة ع السرير حاطه ايديها ع بعض ومنزله راسها وتبكي..
رفعت حواجبها ونزلتهم..تنهدت..غيرت نظرها عنها للكامدينو.. شافت مالقي معبي ميه وجنبه طاسه..
مشتلهم..صبت ميه في الطاسه وقعمزت مقابله مغليه وقالت..
/خودي اشربي..
رفعت مغليه عيونها للطاسه بعدين قامتهم في سدرة..
سدرة وملامح التجهم باديه ع وجهها قالت..
/خودي..
عقدت مغليه حواجبها وشافتلها بنظرة كره..مدت يدها ودفت يد سدرة..
ابتسمت سدرة تهكما وناضت حطت طاسه الميه في مكانها ومشت طلعت من الدار وتوجهت لدار المعيشه..
وقفت قدامها واشرت لسميرة..
سميرة شافت لنسرين اللي كانت مقعمزه وحاطه راسها بين ايديها وتبكي..
بعدين ناضت ومشت لسدرة،لما وصلت فيها قالتلها سدرة..
/بري شوفي مغليه..
مشت سميرة طلعت وسدرة قعدت واقفه في مكانها تشوف ليحيى كيف شاد في يده تليفون امه يلعب بيه ومعاذ جنبه يتفرج عليه غيرت نظرها عنهم جو عيونها ع جوري اللي كانت مقعمزة جنب عمتها تشوفلها بحزن..تنهدت وقالت..
/لاحول ولاقوة الا بالله العلي العظيم..
🍃وفي دار مغليه..
خدت سميرة طاسة ميه عطتها لمغليه..
مغليه خدتها وقالت بصعوبه..
"نسرين"
سميرة بضيق..
/الله غالب هدا نصيبها يامغليه والخيرة فاللي اختاره ربك..
نزلت عيونها للطاسه وقربتها من فمها وقعدت تشرب بالشويه عليها وسميرة تشوفلها بنظرات اسف..
🍃🍃🍃🍃
بعد صلاة الظهر..
طاب غدي طوبى...دارت سلطه ع السريع بعدين سقت..
ماكانش منظر وحال المكرونه يشبه هلبه تطييبها ايام زمان بس قاعد احسن من تطييبها الفترة الاخيرة..
عبد القيوم بعد ماكمل صلاة خشلها الكوجينه شافها مجهزة كل شي حتى العصير داراته..
قعمز ع راس الطاوله وقال بإبتسامه..
/يعطيك الصحه..
هي خدت الصونيه متاعه حطتها قدامه وقالت..
/سلمك..ولت جابت كاشيك وفوطه مطويه حطتها جنب الصونيه وحطت فوقها الكاشيك بعدين قالت..اه ايه السلاطه والعصير..مشت جابت صونيته متاع السلاطه وطاسة العصير حطتهم قدامه بعدين خدت نفس وقالت..
/هو راهو مش زي تطييبي ايام زمان بس حسيته متحسن عن تطييبي اول مابدي فيا المرض ولا السحر..المهم كول..وبملامح استدراج عطف مصطنعه قالت..حاول تخليه يعجبك .
بضحكه قال:يعجبني مادام انتي درتيه يعجبني..
ضحكت ومشت تجهز في غداها وهي تقول..
/في حد قبلي قالك انك جنتل مان..
خدي الكاشيك وقال..
/واجد بكل..
التفتت وهي تشوفله بتضييقه عيون وقالت..
/ستات ولارجاله؟
قعد يضحك بعدين قال بالمصري..
/الاتنين مع بعض..
رفعت حاجبها وخدت الصونيه متاعها وهي ماشيه لمكانها تقول..
/واكيد عجباتك من الستات اكثر..
وقعمزت ع كرسها وحطت الصونيه..
ابتسم وقال؛لاوالله بجد ماسمعتها كان من صحابي القراب وكلهم رجاله بس..
ابتسمت وخدت الكاشيك شافتله قالت..
/خيرك ماتاكلش؟
هو قال بإبتسامه..
/نبدوا مع بعضنا..
ضحكت وقالت..
/باهي..وبدت تاكل وهو بدي ياكل معاها..
ركزت ع ملامحه وهو ياكل تبان عاديه وياكل بشهيه حاولت تستطعم في ماكلتها بنه تخليها تاكل زيه بس للأسف الطعمه ماكانتش لذيذه بل مقبوله نوعاما..
فهمت ان عبد القيوم يجامل فيها او يحاول يرفع معنوياتها وجعها لأنه مضطر ياكل شي شبه مافيشي طعمه بش مايكسرش بخاطرها ويشجعها..
☘وعبد القيوم هداكا الوقت كان عايش حالة حب مش مخلياته مركز هلبه ع طعم المكرونه الحقيقي كل اللي يهمه ان الغدي دايراته مرته حبيبته بإيديها..دايراته ع خاطره هو بالدرجة الاولى..الشعور هدا مخليه يحس ان عمره ماذاق ماكله اطعم من صونيه المكرونه المالغه اللي بين ايديه..
☘☘☘
ماخلاش عبد القيوم في الصونيه حبة مكرونه حتى السلطة كملها وشرب العصير كله..
اما طوبى كلت نص الصونيه متاعها بس وخلت شويه من اللحمه..
هو شافها وقال..
/كمليها..
طوبى بضيق..
/ماحبيتهاش مافيهاش بنه..
هو قال بضحكه..
/شن تقولي !؟ نا كان نلقى ناكل اللي عندك..
طوبى:معاش تجامل ع حساب بطنك..
ضحك وقال..
/لا والله نهائي نا كان ماعجبني شي نخليه ومكرونتك عجبتني سمحه وخفيفه..
طوبى ابتسمت بإمتنان وقالت..
/ناكلها حتى بعدين..
بإبتسامه قال..
/اللي يريحك لكن كان فتيها بعدين راحت عليك..
ضحكت وناضت وقربت منه وخدت الصونيه متاعه وهي تقول..
/صحتين..
بإبتسامه ونظرة حلوة قال..
/على قلبك..
هي شافت لعيونه لحظات حست بشعور حلو وقلبها تسارعت دقاته..وكالعاده هربت بعيونها عنه ومشت طول لحوض الماعين..
هو ضحك ضحكه خفيفه بعدين ناض وهو يقول..
/بعدين بيجيني واحد..
طوبى وهي تغسل في الماعين..
/مني؟
عبد القيوم وقف جنبها وحط الطاسه في الحوض وهو يقول..
/سامي..
شافتله بصدمه وقالت..
/سامي المصور؟
هز راسه بإيجاب صمتا..
طوبى بإستسلام..
/عبد القيوم!..
ضحك وقال..
/والله الراجل هذى كتوم وبير اسرار مستحيل تطلع منه حاجه..
هي قالت..
/انت تبي طلعها زايد ناقص..
عبد القيوم؛لأن الوضع هذى مش عاجبني وكأن دايرين غلط.. اولها عن اخرها الدنيا كلها حتعرف..
طوبى بضيق..
/قتلك قبل الخوف عليك انت افهم..
هو قال بإزدراء..
/والله مايقدر يدير حاجه بالذات بعد اللي صار فيه انكسرت شوكته معاش عند عين يرد هنا نهائي..وسلمنا جدلا انه روح ورب العزة مايقدر يقرب منك ولا مني توا الكل فاطنله مجرد مايرد يمسكوه..
غير طوبى عيونها عنه للحوش وتنهدت بضيق..
هو لاحظ انها تكدرت بعد ماكان جوها حلو وفرفوش بعض الشي..ندم اشد الندم ع اللي داره وكره نفسه اللي خلاها تتكدر بدل مايريح نفسيتها ويفرحها..
مسح بإيديه ع حواجبه بعدين قال..
/اسف سامحيني..وحاضر اللي تبيه اللي يريحك نديره..حاضر..
قامت عيونها فيه وقالت..
/متأكد ان سامي يحفظ سر؟
وهو يشوف لعيونها قال..
/كيف مانشوف فيك..
رسمت ع وجهها ابتسامه وقالت..
/باهي قوله..رفعت حواجبها وكملت تقول بتنبيه..لكن هاه هو بس لاربيع لاغيره..
ضحك وقال:حاضر..رفع حواجبه بعدين عقدهم وقال..هو في حد قبله عطيته علم!
فنصت فيه طوبى..
حك رقبته من الخلف وقال..
/خالي..
رخت حواجبها وتنفست بإرتياح وهي تقول..
/توقعت من قبل لتقول واضح اصلا..
ضحك بعدين قال..
/ماتفوتك حاجه..
رفعت حاجبها وقالت..
/هاه رد بالك..
بضحكه قال..
/نعاونك؟
طوبى:ع شني ع زوز طواسي وصونيه!..لكن كان تبي دير حاجه ديرلنا شاهيكم..
عبد القيوم برفعة حاجب قال..
/شاهيكم!!؟ ع اساس انك طالعه منها!!راك خديتي تارقي ياابله معناها وليتي لينا..بإبتسامه حلوة كمل يقول..يعني تقولي شاهينا..
وهي تشوف لنظرات عيونه وتسمع في كلامه بنبرته الحلوة وطريقته المميزة كانت ع وشك تقوله نحبك الكلمه كانت ع راس اللسان لكن..طلعت في مكانها تنهيده وقظتها للحاله اللي هي فيها وترجع تهرب بعيونها عنه وهي تقول بضحكه خجل..
/باهي..بلعت ريقها بعدين شافتله بعقدة حواجب وقال..كان هكي معناها مفروض تعلمني تارقي..
هو قال:وحده وحده عليك وتو نعلمك كل شي خاطرك فيه..
بإبتسامه قالت:باهي ابدا بالشاهي..
هو قال:من عيوني..
ضحكت بخجل..
وهو مشي من جنبها بش يبدا في تجهيز الشاهي وقلبه ياما صاير فيه..
طوبى:ايه حقه كان جي بعدين اكيد مش حيروح في نفس اليوم؟
عبد القيوم:اكيد..حجزتله في فندق قريب من هنا..
طوبى:باهي بتشده ع العشي؟
رد عليها:طبعا..بندير شوايات ونطيبوا مكرونه ع الحطب..
طوبى بإبتسامه:كويس..باهي اكيد بضيفه قهوة او شاهي يبوا معاهم حاجه حلوة..
هو قال:فكرتيني..شاف يمينه لعلبة المعمول وقال..المعمول هذى من سلافه جاباته ع اساس هدية نسيته في الشنطه واليوم الصبح بنطلع منها حاجه ذكرته...
طوبى:امم شفته لقيتك واكل منه طرفين..
شافلها بإبتسامه وهي عاطيه بالظهر قال..
/كليت واحد والثاني عطيته للعامل الافريقي..خذيتي منه؟
طوبى بغيرة:لاوبصراحه كليت منه قبل وماعجبنيش هلبه فيه شي مش زابط..
عبد القيوم بإبتسامه..
/المعمول اللي طلعوا فيه مع القهوة انتي دايرتيه..
طوبى وهي تغسل في الحوض قالت..
/ايه..
عبد القيوم:الله يبارك حاجه صح..
طوبى:اكيد حاجه صح متعلماته من فنانات فيه عمرك ماذقت ولاحذوق زيه..
حط االشاهي ع النار وهو يقول بضحكه..
/كأني اكتشفت فيك صفة الغرور!
طوبى وهي تنشف في الرخامه قالت..
/لااعوذ بالله..لكن واثقه من اللي نقول فيه مش من فراغ..
مشي اتكي ع الدولاب بظهره وشد حوافه بإيديه وهو يقول..
/حتى لو كنتي مغرورة حقك..
التفتت وخدت فوطه جافه من العلاقه وبدت تمسح في ايديها وهي تقول..
/لاحاشى واعوذ بالله مايليقش بينا ولاهو لينا..
شافت الصونيه متاعها قاعده عريانه حطت الفوطه ومشت للدولاب اللي واقف جنبه عبد القيوم فتحاته خدت منه القصدير ومشت لفت بيه الصونيه..
وهو هايم فيها كان يلقى مايخليش عيونه يرمشوا...
حطت الصونيه في الثلاجه ومشت قعمزت ورا كرسي البار من برا وهي تقول..
/امتى يطيب شاهينا..
ضحك وقدملها وقعمز ع الكرسى من داخل مقابلها وهو يقول.
/في وقته المناسب..
ابتسمت بإستغراب مخالطه خجل ونزلت عيونها لإيديها اللي كانت حاطتهم ع الرخامه وهو يتأمل وبس..
حمحمت وقال..
/ايه حقه..علمني كلمات تارقيه نستعملهم في الحياة اليوميه زي مثلا..صباح الخير..
بإبتسامه قال..
/ صباح الخير..تيفاوت نالخير
طوبى:تيفاوت نالخير..امم..باهي وكلمة شكرا..
عبد القيوم:تنميرت..
طوبى:تنميرت..حلو..اني تعلمت كلمة وحده من صفيه ارالساغت..
هو بإبتسامه قال:سمعتك مرة قلتيها..
طوبى بإستغراب:امتى؟
هو قال:تذكري بعد فرح اشرف وبنت فايزة لما جو هلي مروحين للكفرة مسكتيهم قبل يركبوا السيارة وعطيتهم هدايا وين ودعيتهم قلتيها..
طوبى:اها ايه تفكرت..عقدت حواجبها وقالت..لكن مانتفكرش اني شفتك وقتها..
هو قال:هو انتي اصلا عمرك ركزتي؟!
رفعت حواجبها تعجبا وقالت..
/ع شني!؟
ضحك وقال؛انسي..امم قوليلي شن تبي نعلمك اخرى؟
حاولت تتجاهل الجمله اللي قالها لكن قعدت في عقلها وكملت هدرزة معاه عن اللغه التارقيه وعلمها بعض الكلمات البسيطه..
☘واستمرت حكاويهم لعند ماطاب الشاهي وشربوه مع بعض ويأذن عليهم العصر...
بعد الصلاة جاه اتصال من سامي بلغه فيه انه كيف طلع من طرابلس طلع برا بش يجهز المكان اللي بيستقبله فيه ولزوم الشوا والمكرونه،وطوبى قاعده في الحوش مقعمزة في الدار ع صلايتها تذكر في الله سبحانه وتعالى..
🍃🍃🍃🍃
ومع السته تماما طلعت سيارة غرفه وهي رافعه معاها فايزة وآلاء من الحوش متوجهه لمعرض السيارات في نفس الوقت اللي طلع فيه المهدي من الحوش وهو في قمة الغضب ركب سيارته..شغلها وتحرك وهو يحرق في العجل...
🍃في حوش اهله..
محمد شنيبه بصدمه..
/باهي ليش نبي سبب مقنع؟
سميرة بضيق..
/قالت يبي وحده تانيه..
قعد محمد يشوف لسميرة ومش مستوعب اللي يسمع فيه..
سميرة بضيق وقلق..
/افتكت منه ياحاج..
غمض عيونه وتنهد بحرقه بعدين فتحهم وقال..
/اني تعبت والله تعبت ومعاش قادر نتحمل خلاص..
سميرة بخوف وقلق..
/صل ع النبي يامحمد..
حط محمد شنيبه يده ع راسه غمض عيونه بشده وهو يقول..
/لاإله الا الله..
سميرة بفزع..
/محمد..محمد..صرخت بأعلى حسها..ووك عليا زودولي..محمد.
ومحمد شنيبه قعمز بهده ع الكنبه لحظات واغمى عليه..
🍃🍃🍃
ويوصل المهدي لمطعم ربيع..
نزل من السيارة ومشي خش للمطعم..
بان عليه ربيع واقف ع واحد من الموظفين اللي عنده يكلم فيه بعد كمل كلامه مشي الموظف وربيع قعد يمرر في نظره ع المكان لين جو عيونه ع المهدي..
المهدي وهو يشوفله بحده اشرله يطلع بيده يلحقه ومشي طلع..
تنهد ربيع بضيق بعدين لحقه...
*********
المهدي:عطيني تفسير مقنع للي درته..
ربيع:شن بنفسر..زوز متزوجين معاش تفاهموا مع بعض قرروا ينفصلوا وتمت..
المهدي؛حالة اختي تقول انت اللي قررت بروحك...
ربيع:اني هي مافيش فرق..لو هي جتني وقالت اني معاش نبي نكمل معاك نطلقها طول الزواج بش يستمر لازم يكونوا الطرفين متفاهمين ومتقبلين بعض..
المهدي بعدم تقبل واقتناع..
/اللي قلته كله قطاف فارغ ماخشش راسي..انت هني في ليبيا مش في السويد نظام انك تتزوج امتى ماتبي وطلق امتى ماتبي وع مزاجك هدا مايمشيش عندنا..
ابتسم ربيع تهكما وغير نظره للطريق..
المهدي:مش تصرفات راجل هادي بكل..
شافله بنظرة حاده بعدين بدلها بنظرة هزوة وقال..
/خليتها لخوتك الرجوله..
شافله المهدي بغضب كان حيضربه خلاص لكن تراجع في اخر لحظه..
ربيع؛مانطولوهاش وهي قصيرة الايام الجايه حتوصل لأختك ورقتها وحقها كامل وبهكي نكون درت اللي عليا معاها وزياده..
رفع المهدي حاجبه وابتسم تهكما وهو يقول..
/تعرف..عمري ماأيدت مختار ف أي حاجه دارها كان توا قليل اصل زيك يستاهل اكثر من هكي..
ربيع بحده رد يقول..
/قليل الاصل حيراعي العشرة وحق الجيره ومش حيكثر معاك دوة وانت عارف كويس ان عندي مانرد بيه عليك..
رمقه المهدي بنظرات حقد وغضب بعدين مشي لسيارته
وربيع ابتسم بسخريه ولف ورجع خش للمطعم...
🍃🍃🍃🍃
ويوصل سامي لمزرعة التارقي اللي استقبله ورفعه جهة المظله الكبيره..
وفي الجهة التانيه جنب الحوش..
كانت طوبى مقعمزة في الركن اللي يشبه جنان حوشها..
تسمع في درس للشيخ عبد الرزاق البدر عن الابتلاء واسبابه وكيفية التعامل معاه..
واستشهد في الشرح متاعه بقصة سيدنا يوسف اللي نزلت ع الرسول صلى الله عليه وسلم وهو مبتلى ابتلاء شديد كانت تسلية ليه في عز مصيبته تخليه يستبشر ان عاقبة صبره ع مصابه كل خير في الدنيا والآخره..وقرأ الآيات 155 و156 من سورة البقرة اللي كان اخرها وبشر الصابرين وقال ماحددش شنو هو الشي اللي بيبشرهم بيه وقال ان هدا يدل ع ان عطاء الله للصابر المحتسب لاحصر له..
🍁وفي عز انسجام طوبى مع كلام الشيخ جاها اتصال..
كانت سدرة متصله فتحت الخط وردت عليها..
/السلام عليكم سديرتي..
🍃وفي الجهة التانيه جنب الحوش كان سامي يوصل لعبد القيوم في اخر الأخبار اللي كانت ردة فعله عليها..
عيد القيوم بإبتسامه أسف..
/تصدق ماانصدمتش نعرف ربيع كيف يفكر كويس..
سامي:لكن راهو واضح في عنده موال تاني..
عبد القيوم:كل شي وارد..
ابتسم سامي وقال..
/خلينا منه توا الخبر اللي حذفتهولي الصبح هو القنبله..
ضحك عبد القيوم..
سامي بضحكه ونفاذ صبر؛احكي ياراجل...
*********
طوبى بأسف:الله المستعان..
"رفعوه محمد ونضال ومعاهم سميرة للمصحه وخلو نسرين تندب وتبكي لعند ماخديتها وهديتها وخليتها ترقد..
طوبى:مش عارفه كيف زي اللي انصدمت اللي فاهماته ان ربيع يحبها ومايرضى فيها شي..
"كله وهم وكلها دوة يابنتي..المراة تندب وتقول قالي بنعوضك يانسرين بنسيك الهم اللي عشتيه كله يانسرين واني نحبك ومن هالدوة الفاضيه..والدوة في الوسع ساهله ياطويبه اهو هدا ريتيه بعد عامين بس فاتها وشاف لغيرها وحده صغيره وع كلام فايزة جميلة...اييه هادوا الرجاله يابنتي عمرك ماتحطي فيهم الثقه ولاتتعشمي فيهم اسهل ماعليهم الكلام المعسول والحركات الملعبه.."
🍃طوبى وهي تفكر في كلامها اللي كان موجع لابعد حد خطرت عليها تصرفات عبد القيوم معاها كيف يتصرف معاها بود مبالغ فيه وهو يبي غيرها!؟
ع طول عقلها فكرها بالجالي كانت عنده نفس المهارة بالزبط كما يبدو لها طبعا..🍃
"حتى اني لتوا ماعنديش هديكا الثقه في عمك المهدي بعد اللي داره فيا مهيئة نفسي نحصل منه ضربه في اي وقت"
طوبى:لاماتقوليش هكي عمي مهدي تعلم من غلطته هلبه ياسدرة واني متأكده يموت ولايفرط فيك..
"وشن اللي يخليك متأكده هكي!!؟مافي حد مضمون في الدنيا هادي يابنتي اني المهدي ماخديته الا بعد اصرارك وكلام صغاره ورسالة عيشة الله يرحمها نكذب عليك لو نقولك مانحباش نحبه لكن مش حاطه فيه ثقه ولاعندي فيه هداكا الامان وكل مراة في الدنيا مفروض تكون هكي ماتتعشمش في الراجل مهما شافت منه"
طوبى بضيق:عندك حق ياسدرة عندك حق..
"باهي قوليلي شن حالك انتي شن دايرة اليوم"
ابتسمت وقالت..
/ولأول مرة نطيب بعد شهرين درت مكرونه مسقيه جتني باهيه شويه تنوكل يعني..الحق اني ماحبيتهاش لكن عبد القيوم ماخلا فيها حاجه..
"كان هكي اكيد قنينه لكن انتي شورك من كثر ماخايفه تطلع ماتنفعش ماقدرتيش تستطعميها "
طوبى بحيرة:مش عارفه اني حسيت عبد القيوم يجامل فيا..
"الرجاله مايجاملوش ع حساب بطونهم بنتي."
طوبى بضحكه:حتى هو قالي كان ماعجبه شي يخليه..مطت شفايفها للأسفل وقالت..مش عارفه ماحسيتهاش بنة ماكلتي الاولى..
"تو شويه شويه يتحول هالخوف وتستطعميها وتعجبك زي قبل"
طوبى بإبتسامه:ان شاء الله..نفكر اليومين الجايات ندير معمول..
"كويس كل مرة خشي ع حاجه لعند ماترجعي تتعودي وتولي حاجتك خير من قبل بإذن الله"
طوبى:يارب..
🍃🍃🍃
"والله فرحتلك قسما بالله"
عبد القيوم بضحكه:ياسيدي تسلم بارك الله فيك..
سامي بإبتسامه:واعتبرني لاريت ولاسمعت..
ضحك وقال:بارك الله فيك مرة تانيه..
سامي بضحكه:مبارك وربي يهنيك..
رد عليه يقول؛الله يبارك فيك..
ضحكوا بعدين سامي قال بإبتسامه وفي عيونه لمعة الدمعه...
/ربي يشفيها ويعافيها وتعيشوا مع بعض احلى ايام عمركم..
لاحظ عبد القيوم الدموع في عيونه وهو يقول..
/اللهم آمين..تسلم ياغالي تسلم...
🍃🍃🍃🍃🍃
"وااو خويله وااو المعرض بكل شي فيه فضيع وفخم الله يبارك"
فايزة وهي تتفرج ع السيارات قالت..
/والله حق السيارات تشوفي وحده تنسي التانيه وشكلهم غاليات هلبه ياروفي..
غرفه بإبتسامه؛ع قد فلوسك تلقي وماتنسيش اني صاحبة مكان يعني ليك انتي نبيع بسعر خاص..
☘هما يتكلموا والشاب المسؤول ع المكان يشوفلهم..غير عيونه لباب المعرض لما شاف عدنان خاش منه..
عدنان وهو خاش حول نظاراته ومرر نظره ع المكان..وين جو عيونه ع غرفه عقد حواجبه ورسم ابتسامه جانبيه ع وجهه ومشي ناحيتها والشاب معاه بعيونه..
☘فايزة؛عجبتني الرصاصيه هديكا
الاء؛ايه حلوة وموديلها مليح
"ومش حتلقي فيها عيب واحد"
التفتوا الثلاثه لمصدر الصوت..
الاء وفايزة بلموا في اللي شافوه بينما غرفه قالت..
/جيت في وقتك استاذ عدنان..
بإبتسامه قال:واضح..كيف الحال..
غرفه بجديه؛الحمد لله..عندي اختي جايه تبي تاخد سيارة واني قلتلها بنراعيك شويه..
هو بإبتسامه؛تاخدها بالسعر اللي تبيه..
فايزة بإبتسامه؛اللي عندي مش اكثر من16الف..
هو قال:وهي ب18 الفرق مش كبير مبروك عليك..
فايزة بإبتسامه:الله يبارك فيك ومشكور..
عدنان:انتي من طرف صاحبة المكان ادللي..
رفعت آلاء حاجبها وشافت لخالتها بإبتسامه..
غرفه؛زيدي شوفيها من داخل مرات ماتعجبكش..
عدنان ابتسم وهو يشوف لغرفه بعدين التفت للشاب اشرله بيده يجي..
جاه الشاب وهو يقول..
/تفضل استاذ..
عدنان وهو يأشر ع فايزة..
/برا مع الابله لل******
هو قال:حاضر..شاف لفايزة وقال..تفضلي..
هزت فايزة راسها ومشت معاه..
بعد ماتباعدت غرفه قالت..
/سعرها 20 فما فوق..
ضحك وقال:مش مشكله..
غرفه؛اني قلتلها بنراعيك بش مانحرجهاش يعني باقي حقها عليا اني..
ابتسمت الاء بإعجاب وهي تشوف لخالتها..
هو قال؛بالنص بيني وبينك انتي الفين واني الفين..
رفعت حاجبها وهي تشوفله..
هو بإبتسامه قال..
/هادي الشركه..
غيرت نظرها عنه وقالت لآلاء..
/تعالي نمشوا لفايزة..بدون ماتشوفله قالت..نستأذن..ومشت وآلاء لحقتها وعيون عدنان معاها...
☘وشرت فايزة السيارة لكن اتفقت معاهم تجي تستلمها يوم السبت وطلعوا من المعرض وعقل عدنان مشي مع شريكته..
☘☘☘☘
في الطريق..
الاء:والله ياخويله ماعرفتك وانتي تدوي معاه قداش عجبتيني..
ضحكت غرفه..
فايزة بضحكه:لكن هو ياكبدي ماشاء الله عليه طرف مقربع..
الاء:ايه ماتقولش ليبي مش عارفه وين كان مدسوس.
غرفه بضحكه:راك مراة متزوجه تحشمي!
الاء:ايه حقه نسيت اللهم اني متزوجه..
ضحكوا الزوز وغرفه قالت..
/قردة..
🍃🍃🍃🍃
"والله ماني عارفه الدكتور قال جلطه خفيفه"
سدرة بأسف:لاحول ولاقوة الا بالله..
"الراجل قريب راح في جرة هالضنوة الزفته حاشا الباهي فيهم"
سدرة بضيق:الواحد شن بيقول توا قدر الله وماشاء فعل وخلاص..
"بالله ياسدرة عيونك ع الصغويرة تربحي"
سدرة:ماتخافيش عليهم معاي سدرة وجوري رادين بالهم منهم..
"باهي باهي..بالسلامه توا"
سدرة؛بالسلامه..
نهت المكالمه وهي تقول بضيق..
/ياربي فرج من عندك يارب..
#رحلة_حب_وحرب
#طوبى
....يتبع...
