#طوبى "جنة طوبى"
#جمان_فريد
#الجزء_الخامس_والثمانين "انتقام/الزهرة السوداء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سنلعب كما يلعبون وبحجم الألم سيكون الإنتقام🥀🍃
___________________________________________
ومازلنا في ليلة احلى يوم يمر ع عيلة الواعر من شهور عدت..
واجواء الفرح مسيطرة وبقوة...
كانت في سهريه بسيطه حضروا فيها جزء من الجيران والباقي كانوا في سهريه عيلة الصيد..
الناس اللي حاضرة من الجيران كانت حديث الساعه عندهم فيقة سدرة المنتهى..
بس تركيزهم الاكبر ع طوبى..شافوا فرحتها بأختها كيف غطت ع الهم اللي عايشه فيه..
ومع هذا ماقدروش يشدوا لساناتهم عن الكلام في وضعها..
:قالتها هكي بصحة وجه؟
:وعلت صوتها وهي تقول فيها..
:وااك ياكبدي مقواها مستغربه في مغليه كيف تبان راضيه وعاجبها الوضع.
:ماعندها مادير ولدها يبيها..
🍃وهالحديث كانت تسمع فيهم وهي مقعمزة قريبه عليهم وحست بغيظ شديد..
☘داخل في الكوجينه..
كانوا طوبى وغرفه ومعاهم كنة سالمين اللي بدت تنطلق معاهم وعاجبها جوهم ..
الثلاثه يجهزوا في سفر الضيافه..
كنة سالمين؛حوش عيت عمي ليهم هنا من بعد الحرب اللي صارت في بنغازي وتوا خلاص مستقرين..
غرفه:باهي باتي الليله عندنا ماتروحيش عليهم..
ابتسمت وقالت؛هذي اللي بتصير..
ابتسموا غرفه وطوبى..
شويه وخش عليهم آلاء وهو فرحانه وملهوفه ماأنتبهتش ع وجود كنة سالمين قالت..
/اسمعوا.
التفتوا وشافولها..
غرفه؛شني؟
الاء بفرحه؛تعرفوا من كان سبب فيقة خالتي؟
الزوز قعدوا يشوفولها بإنتباه اكثر..
وهي قالت طول..
"خالي مختار"
كنة سالمين لما سمعت اسمه ضيقت عيونها بعدين رختهم..
طوبى عقدت حواجبها وقالت..
/كيف!؟
الاء وهي بنفس الحماس..
/خالي يوسف قال كان عندها قبل لتفيق بشويه بعد ماطلع من عندها فاقت..
غرفه شافت لطوبى..وطوبى شافت لكنة سالمين تصنعت الضحكه وقالت..
/ماقاليش بيمشي غادي لما كلمته اخر مرة..لكن تعرفي مااستغربتش علاقتهم ببعض فريده من نوعها..
غرفه فهمت اختها ع الطاير وقالت..
/ايه صح...اصلا هو اللي متكفل بعلاجها...
كنة سالمين؛خوها وسندها مال كيف..ربي يخليكم لبعضكم..
هما بإبتسامه مجامله ردوا عليها..
"تسلمي"
الاء ؛خل نمشي نعاود عليه مرة تانيه ان شاء الله يرد.
طوبى؛خليه توا اكيد مشغول..وخودي الروزاطه وصبي في الطواسي هدوكا..واشرت عليهم بعيونها...
الاء قعدت تشوف لخالتها بإبتسامه فيها شي من الريبه بعدين مشت دارت اللي قالتلها عليه..
وولوا غرفه وطوبى اللي كانوا يديروا فيه..
الزوز سرقوا لبعض نظرات توتر تبين اللي يفكروا فيه توا شي واحد..
🍃وقعد شاغلهم لعند ماطلعوا للخيمه بش يفرقوا..
بس ماطولوش وهما يفكروا لأن اجواء الفرح نستهم...
☘☘☘☘
وفي حوش الصيد..
كانت المنظومه شغاله..ونجاة ترقص..
والحاضرات معجبات بيها..
كانت لابسه فستان اخضر لماع طوله للركبه وكمه طويل وطالقه شعرها..ومكياجها ماكانش مبالغ فيه بس حلو..
وخديجه تتفرج وعاجبها الوضع..
سميرة بضيق:نفكر في غدوة وشن بيصير فيه..
نجاح بضيق؛والله ع قلبي زي الجبل..
وفجأه..
تخش عليهم وحده طلتها مميزة وجميله جدا..
صدمت عواطف اللي كانت اول من شافتها..
بعدين رتها خديجه اللي اندهشت..لكن عاد فرصه وحصلتها في سلفتها الكبيرة طول ناضتلها بس تسلم عليها..ووين شافتها نجاه ابتسمت بمفاجأة ووقفت رقيص ولحقت خديجه..
نجمه اللي كانت مصدومه وحامقه نظرها مشي لكنتها الكبيره..
شافت لو وجهها كيف انخطف والدمعه انحبست في عينها..
ومغليه حتى هي تشوفلها بنظرات شماته وحاجبها مرفوع..
ابتسام.
بعد ماسلمت ع خديجه ونجاة مشت طول لنجمه..
وانظار الحاضرات بين المتسائله والمستغربه عليها..
لين وصلت في نجمه وطبست عليها باست راسها..
زال التساؤل والاستغراب وحلت محله ملامح الصدمه والاندهاش..
مني فالشارع مايعرفش قصة حب ابتسام وعبد الفتاح وسبب انفصالهم..!؟
كله واضح وضوح الشمس توا..
وخرت ابتسام وقالت:شن حالك عمتي..
نجمة من فوق نفسها:الحمد لله..
ابتسمت ابتسام بعدين مشت لنجاح اللي ناضتلها تسلم عليها وعقلها مع سميرة اللي مقعمزه جنبها..
وعيون خديجه ونجاة تتفرج بشماته..
ابتسام:شن دايرة مع النونو..
نجاح بإبتسامه غصب:الحمد لله..
ابتسام؛تحلي عويناتك ع خير يارب..
نجاح؛تسلمي..
غيرت ابتسام نظرها لسميره..نظراتها كانت كلها غيره خفتها بإبتسامه مزيفه وجتها مدت يدها..
/كيف حالك..
سميرة صافحتها وهي تحاول تتماسك بكل قوتها وقالت..
/الحمد لله..كيف حالك انتي؟
ابتسام؛الحمد لله..
خديجه:تعالي بسومه قعمزي حداي..
ابتسام هزت راسها وهي مبتسمه ومشت مع خديجه..
شافت عواطف وقفت سلمت عليها..بعدين كملت طريقها مع خديجه وقعمزوا جنب بعض ونجاة معاهم..
كانوا هي وسميره متحاصرات بنظرات الناس..
بس موقف سميره كان صعب ع الآخر..كانت حتبكي ماقدرتش تتماسك اكثر..ناضت وبكل هدوء وطلعت من الخيمه والعيون تلاحق فيها..
والحشريه طارت تجري لنجمه قعمزت جنبها وقالت..
/شن ندير بنت كعبار هني وعلاش جاتك كبت ع راسك!؟
تنهدت نجمة بضيق وقالت..
/كنتي..تريحتي..
رقيه بصدمه؛واخدها عبد الفتاح ع مرته؟
نجمه بنرفزة:لااشرف..عبد الفتاح مالا مني!؟
رقيه :ياروحي عليها والله ماتستاهل..شن بنقول بس هدا اللي ياخد وحده ويبي.غيرها...
نجمه؛رقيه اسكتي تربحي..
رقيه:هاه سكتت..وسكرت فمها..
🍃وداخل في واحد من الحمامات كانت سميره حابسه روحها في الحمام وتبكي بالعبرة وقلبها يتقطع تقطيع...
صح خداها برضاها..بس مهما كان مش حتكون ساهله عليها بالذات قدام الناس..هي ماكانتش تبي سلفاتها يعرفوا بس ماتنحطش في هالموقف البشع..وتوا الدنيا كلها عرفت واللي هاربه منه جاها جاها..
🍃🍃🍃🍃🍃
وفي خيمة عرس صفاء..
خشت صفيه وهي تبكي وتزغرد.
وقفوا الدربوكه وهما يشوفولها..
صفيه ببكي:طيب فيا اللي بنتي ناضت..
جتها مطيره والزوز ضموا بعض وهما يبكوا..
صفيه وهي تبكي بالعبره..
/نسوني صغاري وماخبروني كان توا..والله ماني مسامحتهم عليها..
فعلا يوسف وحسين واميمه فرحتهم نستهم يخبروا امهم ومش عارفين كيف نسوا بالذات اميمه..
وقعدت صفيه تتعنق في بنات سلفها تبكي لين وصلت في طوبى شدت عليها بقوة وبكت بكي مش طبيعي خلت طوبى تنهار من البكي معاها..
وقداش تأثروا الحاضرات باللي يشوفوا فيه..
وبعد مافكوها عن طوبى بالقوة جابولهم ميه وشربوهم وغسلوا وجوهم..
ولما صفيه هدت شويه قدام الناس هزبت اميمه..
اللي كانت تتلقى في الهزايب وهي مبتسمه بإحراج شديد..
🍃🍃🍃🍃🍃
الساعه 1:00ليلا..
في مربوعة حوش الصيد..
نجمه بعصبيه؛والله ماني مسامحاتك عليها هالحركه الزفته..
الصيد بإنزعاج؛وعلاش شن الغلط اللي داره حتى هي مرته ومن حقها تحضر..
نجاح بضيق:اقلها يقول يابوي..حط سميره في موقف خي عليه بكت لين عييت مسكينه.
عبد الفتاح قلبه انوجع عليها بس قال بمكابره..
/علاش تبكي! هي مش فارق معاها بكل..
نجمه شافتله بحده من فوق لتحت وقالت..
/هيا يانجاح..
خدت نجاح امها من يدها ومشت طلعت بيها وهي مضايقه ع الاخر..
الصيد:فوت هبال النساوين ولدي فوت..
تنهد عبد الفتاح بضيق وهز راسه بإيجاب مسايره لبوه وعقله وقلبه مع سميره..
🍃وفي شقة خوه محي الدين..
خديجه قعمزت ع السرير وهي تقول..
/قال عبد الفتاح خلاها تجي..يبي يفرضها ع امك فرض..
محي الدين خش السرير وقال..
/زي مافرض خوك الجالي نجاه عليكم فرض..
خديجه:لا يابابا بوي هو اللي فرض نجاة ع الجالي..
محي الدين؛وعلاش بيفرضها ماهو من عملته معاها!؟واهو شوفيه توا تقول عريس جديد ونسي بنت الواعر ومايجي منها..
خديجه؛خلينا من الجالي مش هو موضوعنا..
محي الدين ؛ولاخوي يهمك موضوعه..ارقدي سلم خديجه ارقدي وريحي راسك شويه..
وعطاها بالظهر ورقد..
هي قعد تشوفله بإزدراء..بعدين عطاته بالظهر ورقدت وعقلها يفكر في اللي بديره غدوة بش تكسر بيه خشم عيلة الواعر وبالذات طوبى..
🍃🍃🍃🍃🍃
وفي حوش الواعر اغلب اهله راقدين..
ماعدا تلاته..
اولهم غرفه اللي كانت واقفه برا تحت شجرة الياسمين مع راجلها..
عبد الرؤوف؛مهبوله من يومك فيوزاتك كلها مضروبه..
ضرباته ع كتفه..
هو ضحك نص ضحكه بعدين قال..
/ايه حقه غدوة لازم نشوفك بالصدرة.
غرفه بضحكه؛كيف باهي!..
قطف ياسمينه وقربلها وزين بيها شعرها وقال..
نروح بيك من المزين للحوش نشوفك بعدين نرفعك للصاله..
وخر شويه وقال..شن رايك..
غرفه وهي تشوفله بنظرات كلها حب..
/باهي..
هو رفع حاجبه بإبتسامه وعيونه يشوفوا لعيونها قال..
/نحبك يادبه..
غرفه:واني نموت فيك..
غير نظره عنها وتنهد بعدين شافلها بطرف عينه..
وهي قعدت تضحك بخجل..
🍃وداخل آلاء راقده ع سريرها وهي تشوف في التعليقات ع المنشور اللي نزلاته عن خالتها..
فجأة جتها رساله ع الماسنجر..
فتحتها وكانت..
"ګأّنِتّ تّحٌدِثّنِيِّ عٌ أّلَخَيِّأّنِةّ وِ لَمَ أّعٌلَمَ بِأنِ لَدِيِّهِأّ شٍهِأّدِةّ مَأّجَِّستّيِّر فِّيِّهِأّ "
عقدت حواجبها بخوف لما قرتها..وطول اللي جي في بالها وليد ولد عمها..خشت للحساب بش تشوفه لقاته جديد بإسم مستعار..
طول دارتله حظر وقالت بصوت هامس..
/منين طلعلي هالهم..!؟
وحداها طوبى في سريرها عاطيه بالظهر وهي تتفرج في تليفونها ع الفيديو سدرها ودموعها ينزلوا وفي يدها المسبحه تردد في الصلاة الابراهيميه..
🍃🍃🍃🍃🍃
والجارح ساهر ليله...
هالمرة مش من الهم ولاالحزن..بل من الفرح اللي غامره اللي معبي قلبه وفاض بيه..
قاعد يقرا في رساله من ماضي حبهم اللي مايعرفش يكون قديم...وقاعد يتجدد مع السنين ويقوى..
كمل قراية الرساله اللي قراها وابتسامته ع وجهه..ابتسامه حب حلوة..ونظرة عيون مليانه دموع...
شويه وبدي يغني..
مشيتي وين ماوصلك خبرنا..
مشيتي وين ماوصلك خبرنا..
حتى مع الغيات يازينه صبرنا..
مشيتي وين...
☘وصوته اخترق سكون الليل ووصل لمسامع ولده الكبير اللي كان يقرا في الرساله اللي خلتهوله انه ودموعه ينزلوا..
مسحهم بعدين نزل الرساله وابتسم وهو يهز في راسه موافقة ويقول بنبرة ألم..
"حاضر..حاضر"
🍃🍃🍃🍃🍃🍃🍃
تاني يوم..
الخميس..
8نوفمبر...سنة 2018...
الساعه 10:00صباحا..
في مربوعة حوش علي الواعر اللي كانت مزحومة بالرجاله..
قبل نص ساعه كانوا واصلين التوارق..
واول ماجو حطولهم الفطور..
اخر من خش عبد الرؤوف راجل غرفه لكن مش بروحه معاه سنافره الزوز اواب ومهاب..
عبد الرؤوف:جوكم الصقورة..
توجهتلهم الانظار المعجبه والمحبه..
علي:يامرحب بالتريس المحصحص..
عبد الرؤوف ضحك وقعمز حد صحابه..
عبد القيوم:لاقوة الا بالله الله يبارك عليهم ويحرسهم..
عبد الرؤوف:نشوفهم عندك..
حسين؛جيناتنا غالبه يابونسيب..
عبد الرؤوف:في اللون بس الملامح ملامحي تركب ولاتنزل..
ضحكوا..
حسين بضحكه؛باهي ترا جيبهم جيب..وقدمله..
مدهم عبد الرؤوف لحسين خداهم ورفعهم وهو يتفحص في ملامحهم ويشوف لبوهم بعدين قال..
/بوهم في النهايه لازم يجيبوا منك شويه..
ضحكوا عليه ورؤوف قال..تلحلح حتى انت وديرلنا عرس وجيب من يشبهك..
مدله حسين الولاد وقال..
/مازال مازال..
ربيع:امتى لما تخش الاربعين!؟
حسين؛لماربك يبعت النصيب.
عبد القيوم؛عندك حق..خلوها بالنصيب..
قعد يغني عبد الرؤوف..
/خليها خليها..خليها بالنصيب ..
وتجيه نظرة حاده حارقه من الحاج علي.خلاته يبلع باقي كلام الاغنيه.
وهما اللي كانوا مركزين عليه قعدوا يضحكوا بكتمان...
🍃🍃🍃🍃🍃🍃
"اليوم الكسوة وبكر الحفله؟"
طوبى:لا اليوم الكسوة وغدوة سهريه كبيرة والحفله السبت ان اشاء الله..
صفيه:باهي الحمد لله اللي دايرة حساب..عندك وقت نوريك لبسي وانتي عطيني رايك..
طوبى بإبتسامه؛عندي..هي تعالي..
وخدتها من يدها ومشوا مع بعض للدار متاع البنات..
خشوا وطوبى سكرت الباب..
صفيه حطت الشنطه ع السرير وقالت..
/سمحه الدار ديكورها حلو..
طوبى؛ماكانتش هكي بنات اختي غيروا فيها..
التفتت بعد ماطلعت فستان لونه فضي تفصيله حلو وقالت..
/نلبسه اليوم؟
طوبى بإعجاب:يجنن يجنن ايه يمشي مع اليوم..
صفيه بضحكه:انتي اللي تجنني..
بعدين لفت دست اللي طلعاته وطلعت غيره كان مغلف بكيسه شفافه..كان فستان سهرة مستور لونه بنفسجي وشكله حلو حتى هو وقالت..
/للحفله..
طوبى:ذوقك يجنن..
صفيه بضحكه؛تسلمي ياقلبي..وجايبه واحد مغربي نلبسه بكرا..
طوبى؛كويس..
صفيه؛مشكلتي في المكياج لو عندك وقت نبيك ديريه ليا..
طوبى بضحكه:من عيوني..
صفيه بضحكه؛مغلاهن عليا عيون التشاينه..
قعدت تضحك طوبى..
صفيه بإبتسامه؛وانتي شن بلتبسي؟
خفت ابتسامتها وقالت..
/الحق مش واخده لبس مناسبات لبس يعتبر عادي شويه..تنهدت وقالت..ماكانتش عندي رغبة نخش افراح ولولا معزة فايزة وبناتها ماحضرت.
صفيه؛حتى بعد ربي ردلكم اختك؟
طوبى سكتت وع وجهها باديه ملامح الضيق..
صفيه فهمت عليها وفي داخلها كانت مقهورة عليها لكن غيرت الموضوع وقالت..
/ترا قوليلي شن نظام الكسوة اليوم بالزبط.
تنهدت طوبى وبدت تحكيلها...
🍃وفي نفس الحوش..
تحديدا جنان الكوجينه
صفيه مرت عبد المطلب..
/في النهايه يقعد خوها مهما يصير بيناتهم..
مطيره تنهدت بحيره وقالت؛والله ماني عارفه شن نقول..
صفيه؛قولي الحمد لله وان شاء الله ربي يشفيها وتروحلنا ع خير..
سالمين ومطيره أمنوا ع دعائها..
بس اللي يركز في ملامح سالمين يلاحظ الغضب...سيرة مختار تكره تسمعها وهي من الناس اللي لما سمعت ان السبب في فيقة سدرة قلبها انقبض بخوف..
🍃🍃🍃🍃
ومختار في هالوقت مقعمز في مطعم الفندق اللي يطل ع مناظر طبيعيه خلابه...كان يتفرج عليها ويبان سرحان بتفكيره..
ومن بعيد شويه كان رضا واقف حاط تليفونه ع وذنه وهو يشوفله..
شويه غير عيونه عنه وقال..
/صباح الخير امينه.
"صباح الخير يارضا ازيك النهاردة"
رضا:الحمد لله..انتم شن حالكم اليوم..
"الحمد لله"
رضا؛فاقت؟
"لا لسا نايمه كمان اليوم مش رايحه الشغل"
عقد حواجبه بقلق وقال..
/بالك مريضه ياامينه وانتي مش مركزة عليها!
"لاوالله زي الفل بس هي مش عايزة تخرج من البيت"
هو تنهد وقعد ساكت..
"مش باين امتى حترجعوا؟"
رضا:مازال مافي شي واضح..ع العموم بعدين نكلمك مانوصيكش امينه..
"ياحسرة عليا الا مالقيت حد ياخد بالو مني ويوصي عليا"
هو بضحكه خفيفه قال..
/نوصيك عليك وعليها..
"ع قولتكم كان العزي بالطلبه"
هو قعد يضحك..
"يللا مع السلامه دلوقتي"
هو قال بإبتسامه؛سلام..
وسكر..بعدين شاف لمختار لقاه يتكلم بالتليفون..
قعد واقف يشوفله لين نهي المكالمه بعدي مشاله..
وقف عليه وقال..
/شن جو توا..
تنهد وقال:بنمشي الاجتماع كلمهم واكد عليهم..
رضا:حاضر..
مختار؛قبلها رضا..شوف احسن سيارة من اللي قاعدات في ليبيا وخليهم يسلموها لصابرين..
هو انصدم بس حاول يخفي صدمته ويدير روحه عادي..
مختار:هي قالت مادخلش رضا في الموضوع ماتقوللهاش..
ورضا والعه في قلبه النار وكل شي فيه كان يغلي غلي..
رفع مختار عيونه فيه وقال..
/رضا..
استاقظ وشافله وقال..
/حاضر..خل نمشي نكلم جماعة النمسا..
ولف ومشي عادي..بس من داخله كان بركان يفور..
قعد يمشي لين طلع من الفندق..
ولما وصل برا..قام تليفونه وحط ع رقمها واتصل بيها..
طول فصل...
رفع حواجبه بعدين عاود اتصل بيها وفصل طول مرة تانيه..
تأكد انها دارت رقمه في الحظر..
من العصبيه والغضب قعد ياكل في شفه السفلي لين قريب دماه..
بعدين خدي نفس وقام تليفونه واتصل بالناس اللي عندهم مع مختار شغل...
🍃في هالوقت..
خشت صابرين للكوجينه وقالت..
/صباح الخير..
امينه؛ياصباح الفل والياسمين الناموسيه كحلي النهاردة..
قعمزت صابرين ع الكرسي وقالت..
/سهرت نقرا في ابحاث لطلبة ماجستير ناشرينها ع النت..
امينه؛حلو ربي يوقفك.
صابرين بإبتسامه:آمين..
جهزت امينه القهوة والحلو وجت بيهم لصابرين..
صابرين؛تسلميلي..
امينه؛بالهنا..ومشت طول شغلت الراديو ع برنامج صباحي..
وصبت لروحها فنجان قهوة وقعمزت مع صابرين..
قعدوا يسمعوا في البرنامج ويعلقوا عليه..
لعند ماقطع عليهم تليفون امينه اللي رن..
طلعاته من جيب الماليه لما شافت المتصل ابتسمت وفتحت الخط..
/ايوه..
"فاقت"
شافت امينه لصابرين وقالت..
/اه..
"قدامك؟"
هي قالت؛ايوه..
"عطيهالي"
امينه بقلق من صوت رضا اللي كان باين فيه الغضب مدت التليفون لصابرين..
صابرين عقدت حواجبها وقالت...
/مني؟
امينه؛كلميه يابنتي باين انو متعصب قوي..
صابرين؛سكري عليه..
امينه بضيق:صابرين..
خدت صابرين التليفون وفصلت عليه وحطاته ع الطاوله..
امينه تنهدت وقالت..
/طيب عندك حق تزعلي وتاخدي منو موقف بس لازم تعرفي..
قاطعاتها وقالت ودموعها في عيونها..
/مانبي نعرف شي ياأمينه وبعدين هكي احسن..اساسا اني قررت نغير من اسلوب تعاملي مع الرجاله كلهم مش غير هو بس..الراجل بشكل عام معروفه نظرته للي زيي اني واللي يحاول يتجاهل الشي هدا يلقى روحه متفكره غصب عنه..نزلوا دموعها وهي تقول..نستاهل اني وصلت روحي لهني اني اللي حطيت روحي في هالمكان ولازم نتحمل النتيجه..مسحت دموعها وقالت..والله لو عندي وين نقعد راني من بعد اللي صارلي ماقعدتش هني دقيقه زياده....
نزلت عيونها وقعدت تبكي..
وامينه تشوفلها بألم..
صابرين هدت بكي وقالت..
/نبي نعيش لنفسي نبي ننجح في خدمتي وقرايتي نبي ندير لروحي طريق نقدر نمشي فيها واني مرتاحه ونكمل حياتي..
غير هكي معاش نبي خلاص..
امينه هزت راسها موافقه ليها ع كل كلمه تقول..
حطت يدها ع يد صابرين..وصابرين شافتلها وابتسمت بإمتنان من بين دموعها..
وتليفون امينه رجع يرن مرة تانيه..
صابرين رشفت وقالت:ارجوك..
امينه خدت تليفونها وراجت لين انفصلت المكالمه وحطاته ع الصامت وهي تقول..
/واهو سايلانت..وحطاته وسط المزهريه المعبيه ورد مجفف..
ضحكت صابرين من بين دموعها..بس قلبها كان موجوع...
🍃🍃🍃🍃🍃
الساعه 12:30قبل الظهر..
خشت فايزة وهي معصبه وتقول..
/عملة سودا وخلاص..
غرفه اللي كانت تغير لواحد من ولادها..
/خيرك اللطف!
فايزة:المراة اللي حاجزه عندها الحار توا اتصلت قالت صارتلها حالة وفاة ومادارت شي..
غرفه؛وهدا وين تقول!
فايزة وايديها في نصها..
/الغلطه غلطتي اني اني مفروض زدت اكدت عليها..
رفعت ايديها ومسحت بيهم وجهها بعدين تأففت ..
ع جية طوبى وهي تقول..
/غرفه امتى بتمشي للمزين.
غرفه بضيق:الثلاته ونص..
ركزت عليها طوبى بعدين شافت لفايزه وقالت..
/خيركم!
غرفه:المراة اللي حاجزه عندها الحار مادارتش الطلبيه قالت عندها حالة وفاة..
فايزة بضيق:حسني تشائمت بكل..
قربتلها طوبى شدت يدها وقالت.
/ماتقوليش الكلام هدا بنتك تسمعك..تعوذي من الشيطان..في بنيه نعرفها عندهم معمل حار تو نكلمها ونشوفها..
فايزة:سلم وخيتي فيسع..
طوبى؛باهي تعالي..
ومشت وفايزة وراها..
وغرفه كملت تغير لصغارها وقالت..
/خل نرقدكم ونمشي نلود ع حاجاتي...
🍃🍃🍃🍃🍃
الساعه 3:15بعد الظهر..
حط الجالي صندوق الحرير في السيارة..
سكر عليه ومشي ركب..
شويه وجت نجاه وهي لابسه عبايه ووشاح وقفازات سود وركبت جنبه.
الجالي:مانسيتي شي؟
نجاة؛لا..وصيت اختك نسرين ع الصغار..
الجالي:ايه..حقه تعالي هني بكري جوري قالتلي جتنا هدايا ماهدايا
نجاة حاولت تخفي ارتباكها وقالت..
/في حاجات حجزتلهم فيهم وصلوني بكري وكانوا محطوطات في بوكسات هدايا هز راسه بصمت بعدين شغل السيارة وطلع بيها من القراج...
🍃🍃🍃🍃🍃
"كان سألكم بوكم قولوا من خالتي نجاة"
نورا بحزن:حاضر..لكن امي اني استاحشتها ونبي نشوفها..
مروة بدموعها؛الله غالب ياماما مانقدر ندير شي..الله يسامحها حتى هي الله يسامحها..
🍃🍃🍃🍃🍃
"سمورة افردي وجهك تربحي ماتشمتي حد فيك"
سميرة بضيق وحزن..
/حاسه روحي مخنوقه بنموت يانجاح..انتي الناس كيف قعدوا يشبحولي..شفتي شبحات خديجه.!! اني بس نبي نعرف شت درتها شن في بيني وبينها علاش الكره هدا كله..
نجاح؛ماتحب كان روحها خديجه حتى لمادير الباهيه ضيعها بافعالها الزفته اللي تجي من قلب اسود بس انتي ماتعطيهاش فرصه فيك ياسموره وهي نوضي معاي.المزينه تراجي فيك..
تنهدت.سميره بضيق وناضت ومشت مع حماتها..
🍃🍃🍃🍃🍃🍃
ومر باقي النهار واهل العرس يتجهزوا لهاليوم المهم..
والنساوين كلهم كبار صغار كانوا مهتمين بشكل طلتهم..
ومن جهة تانيه..
كانوا عيت الصيد مدايرين عشي للرجاله في الصاله وبحضور فرقة مالوف هديه من واحد خوته..
وهكي الرجاله حتى هما عندهم هاليوم مهم ولازم يوتوا رواحهم ليه..
واختار التارقي يلبس عربي..كاط طويل هو اللي شراه واختاره بعنايه بش يطلع عليه...عكس عمه وراجل صفيه اللي قعدوا متمسكين بالزي التارقي...
🍃🍃🍃🍃🍃🍃
مع الساعه 6مساءا كانوا اهل العروس كلهم في الصاله..
مش ناقص منهم الا غرفه اللي مشي عبد الرؤوف بيجيبها من المزين..
وطوبى اللي مشت تجيب الطلبيه متاع الحار...
🍃🍃🍃🍃
بعد ساعه بدوا المعازيم يجوا من الجيران واصحاب فايزة والبنات اللي يخدموا معاها في المزين...وشبه تعبت الصاله.
وقعدوا اماكن اهل العريس بس فاضيه..
قرب الساعه 7ونص..كانوا واصلين اهل العريس بكسوتهم..
وطلعوا فايزة ومطيره وفردوس وسالمين وسميره مع البنات يستقبلوا فيهم بالشتاوات...
وهما بدوا يخشوا بالسوابيت..
الامور كانت ماشيه تمام لعند ماخشت وحده صداره متغطيه بكاب..
مطيره لما شافت مغليه قلبها انتخص ..
وفردوس عيونها ع الصداره وبس..
امافايزة لما شافت نسرين تبتسم وتصفق بالغصب تأكدت من اللي في بالها..وبدت تحس بالغضب..
خشوا كلهم مع عرب الكسوة بسوابيتهم..
وغرفه مقعمزه ع كراسي الصدارات بروحها كانت لابسه البدله الصغيره..
قعدت تتفرج عليهم وهما يغنوا ع الكسوة...
وفجأه تبان عليها نجاة وهي لابسه البدله الكبيره جتها صدمه..
مش ليها بس لكل الموجودات..
راما كانت ماشيه معاها جهة كراسي الصدارات..
وصلت فيهم خلت كرسي بينها وبين غرفه وقمعزت.
راما مدت المروحه لنجاه وقالت..
/خودي مرت خالي..
خدتها نجاة وقالت وهي مبتسمه:
سلم بنت حماتي..عقبالك ياعسولي..
راما بإبتسامه؛تسلمي وان شاء الله تفرحي بجوري..
ومشت ولت للجماعه الوافقين ع الكسوة..
غرفه كانت حاسه روحها بتموت..شافت لأريج والاء اللي وخروا وقعمزوا ع طاولتهم وكانوا يشوفولها والزوز كانوا في قمة الضيق والخنقه...
ونجاة تمروح وتتفرج وهي مبتسمه..
تم الشوط ودخلوا السوابيت داخل..
وخديجه وامها ونسرين مشوا قعمزوا مع اهل الكسوة ع طاولاتهم..
وللأسف ماكانش في صدارات غير غرفه ونجاة..
ونجاة كانت محط الانظار طالعه طلعه مش عاديه بالذات مع قصتها اللي صابغتها بالعسلي ومكياجها اللي كان بديع..
هدا غير حنتها..لما صدرت في عرس الساحلي كانت حلوة بس توا احلى بمراحل..
وخديجه تتفرج ع نظرات الناس ليها وهي مستمتعه ع الاخر..ونسرين تسرقلها في نظرات حاده..عارفة كل اللي قاعده يصير من تخطيطها..
🍃داخل..
فايزة بغضب:تو هدا شن يقولوله!
فردوس وهي معصبه:ماقالتلكش نسرين..
فايزة؛لو قالت نخليهم اني يافردوس!
سالمين:خلاص تعوذن من الشيطان ماتنكدن ع ارواحكن وتنكدن ع العروس اللي صار صار..
فردوس ودموعها في عيونها..
/وطوبى ياخالتي..
سالمين؛طوبى اكيد حاطه في بالها انها حتشوفهم كان مش اليوم بكرا..
قعدوا ساكتات وهما يغلوا من الغضب ومضايقات ع الاخر..
خشت عليهم مطيره وقالت..
/هي اطلعوا خلاص اللي صار صار..خليكم عاديات هيا..
تحسبت فردوس وطلعت..
وطلعوا بعدها سالمين وفايزة اللي كانت مش هاينه عليها طوبى تنحط في هالموقف..
🍃نفسه اللي انحطت فيه سميره اللي حضرت معاها ضرتها..بس سميره وقتها كانت تفكر في طوبى وحست ان وضعها اصعب..والموقف اللي حتنحط فيه توا اقوى بهلبه..
🍃🍃🍃
وطوبى قاعده عالقه في زحمة الطريق..
طوبى بتوتر..
/لاحول ولاقوة الا بالله..لاحول ولاقوة الا بالله العلي العظيم..يارب نوصل ع الوقت ياربي..لاحول ولاقوة الا بالله العلي العظيم..
🍃🍃🍃🍃
والتارقي في طريق تانيه كان مروح من خدمته اللي عطل فيها اليوم والزحمه زادت عطلاته..
نزل ايديه ع الدومان بشي من القوة بعدين قال.
/استغفر الله العظيم..
وقعد يمرر في نظره ع الزحمه...
🍃🍃🍃🍃
فرقوا الضيافه ع اهل الكسوة وبعد مرور بضع دقايق جي وقت طلعت العروس بش دير مراسم هاليوم المميز..
في دار اللي قاعده فيها غموها بالردي البدله الكبيره وسكره بالخللات الذهبيه الكبيره...
وجي الوقت اللي بيطلعوها فيه..
🍃جت وحده من الجارات اللي لبست صفاء ردي الحولي لنجاة وغرفه وقالت..
/ترا نوضوا..
ناضت نجاه وغرفه قعدت مقعمزة..
الجارة:غرفه سمعتيني؟
غرفه:علاش تبيني نوض.؟
الجارة؛قالتلي عمتك انتي اللي بتشدي المرايه نادوا عليها..
ناضت غرفه بالغصب..شافت لنجاة لقتها تمرر في نظرها ع الصاله وهي تمروح بالمروحه..
تنهدت بعدين بلعت ريقها ومشت مع الجارة..
هني ناضت وحده من خوات نجمه ومشت معاهم بش توقف اي مشكله ممكن تصير..
ووين وصلوا في المكان اللي بتطلع منه العروس..
كلهم انصدموا لما شافوا نجاة جايه مع غرفه..
اخت نجمه:هي حبيبه انتي وياها ساعه تانيه ويقولوا هيا..
فايزة هزت راسها وهي مضايقه ع الاخر..والجاره مشت شدت صفاء من جهة ومن الجهة التانيه كانت شادتها مطيره ودموعها في عيونها..
وصفيه مرت عمهم تشوف لنجاه كيف مشت قامت المرايه مع غرفه ..
وبدوا يتحركوا وتاله قدامهم بمترد الحنه والشماعي..
🍃ع طاولة التوارق..
صفيه؛هديك اللي لابسه البدله الكبيره شكلها هي اللي خداها راجل طوبى عليها..
سليمه؛سمحه واجد صح لكن تبان كبيره..
صفيه بحزن؛طوبى مش باينه بكل ان شاء الله خير..
سليمه سكتت وهي تشوف لنجاة بضيق..
فجأه وقفت عليهم وحده.وقالت..
/السلام عليكم..
شافولها لقوها حنان اخت محمود..
🍃وع طاوله اريج والاء اللي كانت معاهم جنة في كروستها راقده وجنبها كنة سالمين تتفرج بصمت..
اريج؛ماربحتها كان اميمه اللي قاعده في المصحه شوفت وجوه المرضى ارحم..
والاء ساكته ومركزه بنظرها ع خالتها غرفه اللي واضح عليها الغضب وهي ماكانتش اهدا حال منها..
🍃فهالاثناء تحديدا...
خشت طوبى من باب تاني بالصناديق الحار والعاملات يساعدوا فيها..
طوبى:الطريق الزحمه ليبيا كلها في الشارع..
:صح هالوقتي تزحم..
طوبى:جو اهل الكسوة؟
؛ايه من نص ساعه..
حست طوبى بشي من الضيق..
ومشت..
وين وصلت في الباب اللي يدخل للقاعه..
حست بخوف وتردد..
اختارت تشوف من بعيد الوضع وتهيأ نفسها ليه بعدين تمشي تحول عبايتها وشاربتها وتخش..
ووين القت نظرتها ع الوضع من بعيد شافت اللي صدمها بقوة..
هي كانت متوقعه نجاة تجي..بس مش هكي!!
لابسه بدلة كبيره ومدندشه بالفجرة متاعها..ايه هادي فجرتها مش حتغبى عنها...!
جي بين عيون طوبى يوم المحضر..وتفكرت شن دارت نجاه يومها..كيف وقفت جنبها وورتها هدايا الجالي بدون ماتعرف وقتها انهم كانوا منه..
..كانت غافله..
جي لمسامعها كلام نجاه لما قالتلها انهم في هداكا اليوم كانوا مع بعض في جناحها وهي في جهة تانيه ترقص وفرحانه...
...كانت غافله...
خطر عليها تاريخ اليوم...زي هاليوم كان المحضر..
نفسه يوم الصبحه..صبحتها اللي قاسمتها فيها نجاه وهي راقده ماتندري ع شي..
...كانت غافله..
قبل سنه..كانت هي مرت الجالي..اللي اختارها بش يرضي اهله ويعيش علاقة حب مع غيرها براحته بغض النظر عن كونها حلال او حرام..بس مادام في الخفاء والغش تعتبر خيانه...
واليوم زيها زي الهجاله اللي مسيبها راجلها..واللي يحبها وخدعها معاها ولت مرته علنا وقدام الناس وتحضر في المناسبات ع انها عروسته اللي فرحان بيها...
اللي تحس بيه طوبى توا للعدو ماتتمناه..
بدون ماتشعر لقت روحها طالعه بسرعه من الصاله..
هاربه..هاربه من مواجهه حتما حتكون فيها هي الخسارة..
والانسحاب ارحم من الهزيمه بألف مرة..
وصلت في سيارتها وركبتها..وقعدت تتنفس بسرعه ودموعها ينزلوا زي السيل..شغلت السيارة وتحركت طول...
🍃🍃وطول الطريق وهي تسمع في كلام نجاة عن علاقتها بالجالي..وتسمع في كلام رقيه اللي نقلاته عن لسان الجيران..
ويجي بين عيونها المشهد اللي شافتهم فيه وهما طالعين مع بعض بعد زواجهم...
وبعده يجي بين عيونها اليوم اللي اكتشفت فيه كل شي في عقر دارها..
اليوم اللي قطعت فيه الشك باليقين وعرفت فيه انها خدت اكبر مقلب ممكن تاخده المراة في حياتها...
طوبى فهاللحظات حست ان قوتها كلها انهارت..
حست انها كبتت هلبه واللي كبتاته كله انفجر توا..
حطت يدها ع رقبتها حست بخنقه رهيبه وقعدت تبكي بعبرتها..
وقفت السيارة ع تركينه في وسط الظلام وقعدت تبكي وتبكي...الالم سيطر عليها..الحزن تمكن منها...
قهرة المراة ع روحها مابعدها قهرة...وكسرة نفس المراة مافيش اقسى منها...
غمضت عيونها ومن وسط قلبها بألم قالت..
"آه"
طالعه من العمق..اللي يسمعها تقسمله قلبه...
فتحت عيونها وشافت للمنظومه متاع السيارة ..
بعدين شغلتها وصدح صوت احمد العجمي في السيارة بالقرآن...
سمعت بضع آيات نوعا ما هدتها..
استاقظت لنفسها وين واقفه وللوقت..الدنيا ليل..
وطول شغلت سيارتها وتحركت...
🍃🍃🍃🍃🍃🍃
خشوا لكوجينه الصاله ووحده فيهم تقول..
فايزة بقلق:نكلم فيها وماتردش..
فردوس بخوف:ياربي سترك..
:مدام وصلوا الطلبيات اللي قلتي عليهم وستفناهم في الصواني نبدوا تفريق!؟
فايزة بإستغراب:من جابهم؟
:مانعرفش بس اعتقد تقربلك لانها حطتهم وجت بتخش..
شافوا فردوس وفايزة لبعض بخوف..
بعدين فردوس قالت:تو نشوفها اني انتي سقدي الناس..
ومشت بسرعه طلعت..
وفايزة تقول بضيق شديد..
/حسبي الله ونعم الوكيل..
🍃🍃🍃🍃🍃
واقف ع المرايه يلبس في الساعه اخر شي يديره بش تكتمل طلته..
لابس العربي الطرابلسي الكاط الملف الطويل لونه رمادي والخياطه المزخرفه اللي عليه لونها اسود..
كان طالع فيه جذاب للغايه..
خدي عطره وحط منه..بعدين مشي للباب..
لبس كندرته وفتح الباب وطلع سكره وراه..
رن تليفونه..طلع من الجيب..وفتح الخط ورد..
عبد القيوم:توا طالع توا..مسافه الطريق....وعليكم السلام..
وسكر ونزل من الدروج..
🍃وصل تحت وطلع من الحوش..
ع جية سدرة اللي لما درست قدام حوش لطفي وعجلها داروا صوت قوي..
هو لما سمع الصوت شاف للسيارة..
لقي الباب ينفتح بشي من البطئ..وهي نزلت منها وكانت تبان مجهده وتعبانه..
قامت عيونها وجو عليه..قعدت تشوفله بنظرات كلها ضعف الم ومش عارفه علاش وقتها قعدت تشوفله هو هكي..
اما هو كان مصدوم ع خايف..وقلبه صايره فيه حاله..
شغله الوضع اللي يشوف فيها بيه خيرها!؟ شن صارلها!؟..
غيرت نظرها عنه ومشت بإتجاه باب الحوش..
وصلت فيه..فتحت بأيديها اللي يرجفوا شنطة اليد متاعها طلعت المفتاح وفتحت الباب وخشت وسكراته وراها..
وهو مازال بنظراته القلقه والخايفه معاها..
قعد يفكر العيله كلهم في الصاله توا..واضح مازال بكري ع مرواحهم..
اساسا الشارع في هالليله شبه فاضي..!
معناها هي توا بروحها في الحوش!..
قاعده بروحها وهي فحالة تخوف!
قعد يفكر شن بيدير..لازم يدير شي لازم يتصرف..
ماجاش في باله الا شي واحد انه يخبر حد من عيلتها بس من لازم يخبر!!!
وطول جاته الاجابه هو واحد مافيش غيره..
🍃🍃🍃🍃🍃
في هالوقت في الصاله...
الاجواء متوترة ومشحونه..وهالليله مشت بالنكد بكل معنى الكلمه..
بس مش علي نساوين عيلة شنيبه..
نجاة بعد ماجابوا العشي قعمزت جنب خديجه وقرنوا الرووس..
نجاة؛استغربت كيف ماجتش كروسة بنتها هني!
خديجه؛في شي صار..ولافي حد كلمها وقاللها ماتجيش..
نجاة؛وارد..يللا مش مهم كان ماشافتش بعينها تسمع ومازال يوم السبت حنختمها عليهم..
خديجه:ويمشي عرسهم بالنكد..التفتت وشافت لفايزة اللي كانت مقعمزة في الطاوله عيلة الواعر وقالت في نفسها..
"اني نجيك وتستكرديني! تحملي مايجيك"
غيرت نظرها عنهم ويجوا عيونها في عيون سميره صديقة مطيرة..
لقتها تشوفلها بإبتسامه فيها مسحة مكر وحاجبها مرفوع استغربت نظرتها ورجعت تشوف لصونيتها وهي تاكل..
ونسرين قدامهم تمرر في نظراتها اللي كلها استياء بيناتهم..
🍃ع طاولة نساوين عيت الواعر..
كلهم كانوا متنكدين ويخمموا في طوبى..
فجأه..رن تليفون نبيله..
شافت المتصل فتحت الخط وردت طول..
"/ايوه..
"ماتخلي حد يعرف اني نكلم فيك انسحبي من حداهم واطلعي توا"
حافظت بقوة ع هدوئها وناضت بعبايتها وشطنتها ومشت وهي تقول..
/ايه يااحلام نفس الملفات..
كلهم ركزوا عليها..واستغربوا فيها لما رفعت العبايه..
🍃وهي لأنها عارفه ان في من حيلحقها.
بسرعة لبست عبايتها وحطت وشاحها وطلعت تجري من الصاله..لاقت سيارة راجلها طول ركبت..
نبيله بقلق:شن في!؟
المحجوب وهو يتحرك بالسيارة..
/طوبى جت هني!؟
نبيله بخوف:حطت طلبيات تخص العشي وطلعت..
المحجوب :قبل ناويه تقعد ولاتروح طول؟
نبيله؛مفروض تقعد..
المحجوب:مرت هداكا التانيه حاضرة؟
نبيله:ايه..شن في محجوب طوبى خيرها!..
🍃وعبد القيوم يراجي فيهم ع النار وهو واقف حدا سيارته اتصلوا بيه ربيع ورؤوف وحتى سامي كذا مرة ماردش..
وبعد دقايق حستهم ساعات انتظار وصلت سيارة المحجوب..
نزلت نبيله ومشت بسرعه للباب وقعدت دق عليه..
والمحجوب جاه عبد القيوم..
عبد القيوم بقلق بالغ؛وضعها مش طبيعي كانت تبكي وتبان تعبانه مريضه مافهمتش..
التفتت نبيله وقالت..عندك مفتاح يامحجوب..
االمحجوب بقلق؛لا ماعنديش..
نبيله:كيف يصير!!؟
المحجوب:مافيش غير نكلم وحده من خواتها..
نبيله؛اصبر..خزي عبد القيوم تقدر تنقز وتخش داخل تفتح الباب..
هو بدون لاتفكير ولاتردد قال..
/ايه..ومشي طول للباب..نبيله تباعدت ومشت لراجل..
وعبد القيوم حول الكاط الطويل وحطه فوق سيارة سدرة.
زرفع السوريه الطويله وبدي يربكت ع الباب اللي كانت فيه زخرفه ع هيئة اغصان شجر ساعدوه يركب..
ونبيله والمحجوب يشوفوله لين نقز من الجهة التانيه..
طول قدموا هما الزوز..وهو فتح الباب..وخر وخلا نبيله تخش ووراها المحجوب وهو طلع وسكر الباب..
خدي الكاط من فوق السيارة وولى لسيارته وقعد يراجي وهو ميت خوف عليها..
🍃🍃🍃
خشوا نبيله والمحجوب للحوش..
وقعدوا ينادوا "طوبى.."
انفجعت نبيله لما شافتها مرميه ع الارض في الممر..
مشتلها تجري والمحجوب لحقها..
قعدوا يفيقوا فيها مابتش تفيق..
نبيله:شدها شويه بس..
خداها المحجوب في حضنه وهو يشوفله بحزن ويحوقل..
اما تبيله خشت لدار البنات جابت عطر من ع الزيانه وجتها بيه تجري..
قعمزت جنبها وبخت ع يدها وقربتها لأنفها..
حركت طوبى عيونها..وشويه وفتحتهم وفاقت..
الزوز بقلق قالوا..
"طوبى"
وهي طول نزلوا الدموع من عيونها...
🍃🍃🍃🍃🍃
والتارقي يراجي والخوف والقلق مسيطرين عليه.
سمع الباب انفتح..طلعت نبيله وهي محاوطتها وشاده في يدها شنطة صغيره ..
والمحجوب سكر الحوش ومشي وراهم..
شاف لعبدالقيوم رفع يده وقاله..
/بارك الله فيك..
وعبد القيوم اكتفي بهز راسه ردا عليه وقلبه قاعد يتقطع ع طوبى..
ركب المحجوب السيارة وشغلها وتحرك طول..
اما عبد القيوم بعد ماخدي نفس ولى خش للحوش وهو قلق ومضايق ومعصب في نفس الوقت..
🍃في الطريق..
طوبى بتعب وفجعه؛جنة بنتي..كيف نسيتها حي عليا!
نبيله؛محجوب عادي نولوا للصاله ناخدها..
نزلوا دموع طوبى وقالت..
/بالله خالي مانقدرش من غيرها..
المحجوب وهو موجوع وحابس دموعه بقوة..
/حاضر ياخالي حاضر...
🍃🍃🍃🍃🍃
ونبيله في الطريق كلمت فردوس وحكتلها اللي صار بإختصار وخلتها بهدوء وبدون لفت نظر طلعلها جنه..
ومجرد ماخشت بيها السياره عطتها لأمها اللي قعدت ضم فيها..
واللي يشوف طوبى وقتها يقول ان جنة هي اللي تحضن في امها...
طول الطريق الصمت كان سيد الموقف لعند ماوصلوا لفيلا المحجوب...
🍃🍃🍃🍃🍃
وحفلة الكسوة اللي مشت بالنكد تمت..
وروحوا وكلهم قلوبهم دم ع عيلة شنيبه وكنتهم الشيطانه..
وعقولهم مشغوله ع طوبى...
🍃🍃🍃🍃
اميمه بضيق:اكيد شافتها..
اريج:ايه...عمتي مطيره قالت الفجرة اللي لابستها هديكا الكلبه فجرة طوبى .
اميمه بإزدراء؛مااستغربتش..لكن راهو كله تخطيط محراك الشر خديجه..
الاء:قالتها امي..انتي كان تشوفي فرختها راما كيف ولت شفتي كيف تشبحلنا!
اريج؛الحق مصدومه فيها هدا غير اللبس اللي لابساته سدرة وتاله اللي اصغر منها تحشموا يلبسوه..
اميمه بحسرة؛خسارة ايام كانت قريبه ع عائشه الله يرحمها كانت مؤدبه وزي النسمه..
الاء:يقولك اقلب الجرة ع فمها تجي البنت لأمها..
ع خشة صفاء اللي كانت قاعدة بقمجه وسروال كانت تبكي..
اميمه؛صفو خيرك؟!
صفاء ببكي:ماكنتش نبي يصير هكي فطوبى في عرسي اني نشوف فيها في مكان خالتي سدرة نبيها تحضره كله ماتغيب عن شي اهو الليله بنحني حتى الحنه مش حتحضرها.
اريج بدموع؛الله لايربحهم..
اميمه ناضت ضمت صفاء وقعدت تهدي فيها وهي تقول..
/فيها خيره حبيبتي فيها خيره وبإذن الله غدوة وبعده حتحضر..وبعدين تعالي هني انتي الحنه بديريها لطوبى ولاشروفه؟
ضحكت من بين دموعها والبنات ابتسموا..
اميمه بضحكه؛هي تعالي حبيبتي اني بنحنيك معاهم اضربي هي..
قعدت تضحك صفاء بعدين خدتها اميمه وطلعت بيها..
شويه اريج دعت من قلبها..
/تلقوه وتتلقوه ياخديجه ونجاة..
آلاء من وسط قلبها :آمين...
🍃🍃🍃🍃🍃
مقعمزة ع السرير تحكي..
وهي مقعمزة ع كرسي مقابلها وتسمعلها..
طوبى ودموعها تنزل..
/مش ساهل بكل والله ماهو ساهل..مش شرط نكون نحبه بش يقهرني لداره فيا لهالحد..اني واجعتني روحي واجعتني هلبه..واللي تعز عليه نفسه لما تنهان يموت الف موته في اللحظه..وجعتني نفسي كيف كنت بسيطه كيف كنت نفكر كيف تخيلت وحلمت وتمنيت ونفيق ع صدمه جتني زي الكف..ومن بعدها قعد وجهي يتلقى فيهم واحد ورا التاني لليله...مسحت دموعها وقالت..تعرفي شن اللي يقهر اكثر..لما طلعت عليا دوة الناس طول صدقتها وطلعت اني ماننفعش واني اللي من تحت لتحت واني المنافقه..ولما طلع الحق..
الناس نفسهم عطوه الف مبرر وعذر..يخي في من بارك علاقتهم وقالت يحبها وهدا الحب وحارب ع خاطرها بش خداها..وفي من قال معذور ماهي نجاة حلوة وقايمه روحها وتعرف كيف تخلي الراجل يحبها ومايستغناش عنها اما اني غشيمه وقليلة خبره ومانعرفش نتصرف..الظلم..الظلم اللي عايشينه حني النساوين في مجتمع زي مجتمعنا هو اللي مخلي هلبه يتنازلوا حتى ع كرامتهم المهم يخلصوا من لسانات الناس..يعني اني مطلوب مني ننسى ونفوت ونتنازل بش نولي فالحه ونعرف كيف نتصرف!...تنهدت بحرقه وقالت..لابسه فجرتي الحاجه الوحيده اللي تراجعت عن بيعتها وخليتها قلت خل تقعد حاجه ع الاقل...وخنقتها العبره وسكتت..بعدين قالت..عمري ماحسيت روحي اني انسانه بلاقيمة الا بعد ماتزوجت الجالي
نبيله:انتي قيمتك كبيرة هلبه ولو مش هكي كان طلقك ليه وقت..طوبى اللي داره الجالي واللي دير فيه هديكا نجاة هو اهانه ليها هي مش اكثر..حتفيق ع عمرها لما يعطيها الجالي كف يخليها تعرف الفرق بينك وبينها..طوبى اني عارفه ان عندك هلبه اسباب تمنعك ترفعي قضية طلاق حاليا..بس لما يجي وقت تاخدي فيه هالقرار ردي بالك تعطي قضيتك لغيري..
ابتسمت بألم من وسط ضلوعها..ونبيله ناضت قعمزت جنبها وضمتها لحضنها وقعدت تمسح ع شعرها بحنان..
وطوبى غمضت عيونها في حضنها..
🍃🍃🍃🍃🍃
"بارك الله فيك خالتي زايرة...لاخلاص اعتبري امور بنتك تمت خلاص......تسلمي يارب..تصبحي ع خير"
هادي خديجه وهي تنهي في مكالمه مع الجارة اللي تفاهمت معاه تنوض نجاه بش تشارك في مراسم الكسوة...
حطت تليفونها ع الكامدينو وقالت..
/تلقي ياطوبى كان بتتلقي تحسابيني بنخليك تفوتي اللي درتيه..مازال ياما جايك هادي البدايه بس..وانتي اللي بديتي ياطوبى...
🍃🍃🍃🍃🍃
"قريب هبلوا عليا بالذات الصبغه حلوة طالعه عليا ولا"
وطلقت شعرها..
الجالي لما شافه خطر عليه شعر طوبى الطويل اللي ديما يجي ع عيونه وهو راقد..بالذات لما بتجي تمسح مسند السرير من فوق وينزلوا اطراف شعرها ع عيونه ويتحركوا مع حركتها ويفيقوه..
الجالي الفترة الاخيره بدي يشوف في نجاة طوبى..
واي شي يعيشه مع نجاة في مخيلته يعيش فيه مع طوبى..
ونجاة حاسه بشي مش طبيعي بس كالعاده تتجاهل وتقعد معيشه روحها في الاوهام بش ترضي نفسها...
🍃🍃🍃🍃🍃
تاني يوم..
الجمعه ..
9نوفمبر...سنة 2018...
من الصبح طلعت غرفه مع عبد الرؤوف متوجهين لحوش المحجوب..
كانت غرفه تبي تطمن ع اختها وفي نفس الوقت في راسه شي وتبيه يصير بأي شكل...
🍃من جهة تانيه..
كانوا ربيع وعبد القيوم برواحهم في شقته همه وراجل بنت عمته في حوش علي الواعر..
عبد القيوم بضيق؛ماعندي مانحكي ظرف وصار منعني نجي..
ربيع:تمام..ماتحكيش ياعبد القيوم بس لازم تعرف ان اللي انت فيه واللي تحس بيه محتاج تحكيه لحد يفهم عليك ومرات يساعدك الكبت اكبر غلط..
عبد القيوم؛ياصاحبي في حاجات ماتنحكى لحد..حط يده ع صدره وقال..تم هنا وماتطلعش خير ماتطلع وتكون العواقب وخيمه..خليها في القلب تجرح ولاتطلع برا وتفضح...
هز ربيع راسه وهو مبتسم بعدين قال..
/هي نوض نلحقوا ع الفطور..
عبد القيوم بضحكه؛تخدم ع لزة معتبره من الحاج علي
ربيع بضحكه؛لاالايام هادي فرحان تقوله عطيني عيونك يعطيك وفوقهم بوسه..
عبد القيوم بإبتسامه..
/خطرت عليا حالة المهدي..المهدي يولي واحد تاني وين يبان عليه الحب..
ربيع:مالا لو كنت شاهد ع قصتهم في بدايتها شن تقول..تي من لما كنا في الابتدائي ياراجل وهو وراها وين ماتمشي..
عبد القيوم سرح بتفكيره وقال:السر كله فالحوش هذكي..
ربيع رفع حواجبه..
هو استاقظ لروحه وقال..
/تي هيا ياراجل وانت دوتك واجده..
ومشي للباب بيطلع وهو مشي وراه وكان يضحك..
#انتقام
#طوبى
...يتبع...
