#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الطفل الذي لم تحتضنه القبيلة سيعود و يحرقها ليشعر بدفئها..🍃
__________________________________________
واقفه ع الحوض تغسل في طاسة بش تشرب فيها ميه..
سكرت الشيشمه" الحنفية" وقعدت واقفه ع الحوض..سرحانه وتفكر بضيق في اللي صار معاها في حفلة الاسبوع..
خشت عليها ربيبتها وهي تقول..
/نفيسة طلعت حامل..
استاقظت والتفتتلها تقول بإبتسامه..
/الله يبارك..
نسرين بإبتسامه تعاطف..
/كان تشوفي فرحة عمر تعرفي من الفرحة لوح الحشم ع تركينه وخبرني قبل نفيسه..وضحكت..
يدوب ضحكت سميرة وهي تقول..
/ربي يفرحهم بشوفة عيلهم صحيح..
نسرين:يارب..ضيقت عيونها وقالت..خيرك سميرة نحس في جوك مش تمام..
سميرة:لاعادي جدا مافيا شي..
ع جية نضال اللي قبل مايخش قال بصوت عالي شويه..
"روحتوا"
يبي ينبههم قبل ليخش..
نسرين بضحكه:روحنا..
خش عليهم وقال..
/ماجبتولنا شي معاكم..
نسرين قالت بإستغراب..
/كيف ماكنتش غادي!؟
نضال:حضرت شويه بعدين طلعت كان عندي موضوع لازم نتمه اليوم..ايه يعني ماجبتوا شي!
سميرة وهي تشوفله بعيون فيهم لمعة الدموع قالت..
/لاجبنا معانا ولدي جبنا تو نسخنلك..
هو قال:لالا ارتاحي قوليلي وينه واني ندبر اموري..
سميره حطت الطاسه وقالت..
/ريج جمالك ريح..ومشت للتلاجه بطلع الموالح اللي بعتتهم معاهم طوبى..
نضال:اكيد طوبى سقدتكم بيهم..
سميرة بضحكه:عادتها..
ابتسم بصمت..
نسرين قعمزت وهي تقول..
/سمعت حاجه عنها مش عارفه نصدقها ولانكذبها لكن من لما سمعتها واني مصدومه..
عقد نضال حواجبه بإستغراب..
وسميرة بعد ماطلعت الحاجات سكرت الثلاجه وقالت..
/شن سمعتي!؟
نسرين:قالوا تزوجت..
رخي نضال حواجبه..
سميرة وهي تفكر..
/حتى اني وصلتني دوة ولاحظت حاجات تأكدها لكن منهم هما ماسمعت شي..
نسرين:هو اليوم بان عليها ان الدوة حق لكن زعما حق اللي خداها التارقي!؟
سميرة مطت شفايفها للأسفل بعدم معرفه..
نسرين:هو احني مادخلناش بيها حياتها وهي حرة فيها لكن..ضيقت عيونها وقالت..ماهضمتش حكايه ان اللي ياخدها التارقي..
سميرة:علاش!؟
نسرين:هو صح راجل ماشاء الله عليه لكن مش لدرجة يعطوه بنتهم..
نضال:برضو علاش!؟
نسرين ضمت شفايفها وحركتهم ع جنب بعدين رختهم وقالت..
/مش مناسب ليها قصدي يعني كان جت بتاخد حد بعد خوي لازم يكون خير منه..
سميرة ابتسمت بتهكم وحركت راسها يمين ويسار..
اما نضال قال..
/وهو خير منه بألف مرة ويخي ماينحطش معاه في مقارنه راجل محترم واخلاقه عاليه وعمري ماريت منه العيب لكن خوك اللي هو خوي شني!! ماحلك نسيتي عاره يانسرين..
نزلت نسرين عيونها وهي مضايقه..
كمل نضال يقول..
/وكان قصدك لأن تارقي خيرهم التوارق من شن يشكوا ليببين زينا زيهم ومافيش فرق بينا وبينهم كان في العرق والعرب مش خير من غيرهم بكل ربك قال إن اكرمكم عند الله اتقاكم..هذا المقياس اللي مفروض تقارنوا بيه البشر ببعضها مش الأصل والفصل والدوة الجاهليه هادي..
سميرة وهي تسمع فيه كانت تشوفله بإبتسامة حزن وفي عقلها الموقف اللي صار معاها الليله في حوش علي الواعر..
🔺️🔺️🔺️في وقت سابق🔺️🔺️🔺️
رافعه في يدها سفرة طواسي عصير فاضيه متوجهه بيها للكوجينه..
لما وصلت فيها وخشت لقت اريج واقفه تجهز في سبات علب الحلويات..
حطت السفره وقالت بإبتسامه..
/روجه شن جو؟
ابتسمت وقالت..
/تمام شن جوك انتي؟
سميرة:مليح..تنهدت وقالت..شن جو القرايه؟
هزت راسها وقالت:ماشيه قعدلي سمستر واحد مع المشروع ونكملها ونفتك..
سميرة:امم وبعدين ع شن ناويه..
بان ع وجه اريج الارتباك وهي تجاوب..
/بنكمل خدمتي في المدرسه..
قربت منها سميرة وقالت..
/باهي مازال مش مفكرة في الزواج؟.
ردت اريج نظرها لعلب الحلو وقعدت ساكته..
سميرة بضحكه:ماقلتيش سكري الموضوع معناها ناويه..
اكتسي وجه اريج باللون الأحمر..
ابتسمت سميرة وقالت..
/نضال مازال يحبك وبيموت عليك..
رفعت عيونها اللي غرقوا بالدموع فيها..
سميرة:وكان يعرف انك مازال تبيه يخطبك الليله قبل غدوة..
وفي هاللحظه تخش فردوس شافت لبنتها وقالت..
/كملتي اريج؟
اريج بآرتباك؛ايه خلاص..
فردوس:خلاص بري طلعيهم خالتك هاديه تراجي فيك بالشاهي..
خدت اريج السبات وطلعت بسرعة والدمعه في عينها لحقتها امها وتأكدت انها تباعدت بعدين ولت خشت لسميرة وقالت بشي من الحده..
/بالله ياسميرة معاش تفتحي موضوع نضال مع اريج بكل..
سميرة بضيق:تي غير علاش بس يافردوس..علاش مانلموش شملهم زي ماصار مع المهدي وسدرة شفتي اختك كيف عايشه توا شفتي فرحتها اليوم والله تخيلت اريج في مكانها..
فردوس بشي من العصبيه..
/مش زي اريج زي سدرة..سدرة اختي شخصيتها قويه تعرف دبر امورها والمهدي مش زي نضال بكل..نضال ياسميرة كانك ماتعرفيش ياما وجع بنتي وقهرها وعايرها حتى المعايرة ياسميرة قاللها كلام منين سمعته كرهته في الدم وكرهت روحي اللي رضيت نعطيه بنتي يوم من الايام..وغير هذا كله الاعاقه اللي عنده مش قالقه من بنتي بش نعطيها للي يجي حتى لو كانت ارمله..
سميرة ودموعها في عيونها قالت..
/والله يافردوس ماحتلقي راجل يحب بنتك ويهنيك عليها زيه..اهو ركزي اني اللي نقول في الكلام هذا اني اللي كان خوي الله يرحمه راجلها..والله يافردوس والله لو عطيتهاله مرة تانيه ماحتندمي وع ضمانتي اني يافردوس..
فردوس بحده؛لو يقعد اخر راجل في الدنيا معاد يكسب بنتي وبالله عليك معاش تفتحي معاها الموضوع هذا مرة تانيه مانبيش نزعلك ياسميرة..
ولما جت بتطلع لقت هاديه واقفه في الباب وهي تشوفلها بضيق..
مشت فردوس طلعت من حداها وهي معصبه وهاديه بعد ماكانت تشوفلها شافت لسميرة بعدين ابتسمت بلطف وقالت..
/اعذريها بنتها واجعتها وخايفه عليها..
سميرة بضيق:لكن البنت تبي ياهاديه بان في عيونها.
هاديه:خليها للنصيب واللي يبيه ربي حيصير ياسميرة..
هزت سميرة راسها وقالت..
/إن شاء الله خير..
🔺️🔺️🔺️في الوقت الحاضر🔺️🔺️🔺️
رفعت نسرين عيونها وقعدت تمرر فيهم ع المكان وهي تقول..
/ربي يهنيها وخلاص..
سميرة:آمين..وكان شاغلاتك جنة تشوفي فيها قاعده مع خالاتها ويوم بعد يوم هني..
