■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر/سينفونية ضوء القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃{ إذا أراد أن يُهلك أعداءه ، ويمحقهم ؛ قيّض لهم الأسباب التي يستوجبون بها هلاكهم ومحقهم ، ومِن أعظمها : مبالغتهم في أذى أوليائه !.}
ابن القيم رحمه الله...🍃
_______________________________________
ترتب في الكوجينه وامها معاها..كانوا يحكوا عن شي استغربوه من ضيوفهم اليوم..
شاديه:ماحسيتي انها بتلمح ع موضوع خطبه!؟ يعني وكأنها بدها سلافه لعبد القيوم..
ردت لبانه الباب وقالت..
/ايه حسيت بس مافهمت يعني عبد القيوم متل ماقلتلك بيحبا لطوبى ليش ليخطب سلافه!؟
شاديه:طيب ليش عماته بيعطونا تلميحات ويسألوا عن سلافه اذا ماكان هو حاكي معهن؟
لبانه بتفكير:مابعرف..بيقولوا بكرا يذوب الثلج ويبان المرج..
شاديه بضيق..
/مابدي ينكسر خاطر اختك الله يعطيها اللي بتتمناه يارب..
لبانه تنهدت وقالت..
/يارب..
🍃وفي دار البنات..
كانت سلافه لاهيه بهاتفها..
خاشه ع الفيس بوك تنزل عن عزومة اليوم..
نزلت في قصتها الآكلات اللي دارتهم وطريقة تنسيقها لسفر الضيافه..
اما المنشور فكان صورة ل(تاركيت) اكلة الحلو التارقيه المميزه..
كتبت اسمها فوقها وجنبه بالعربي "حلو تارقي بيجنن"
واول المتفاعلين كانت ميار اللي علقت بملصق قلب احمر..
🍃🍃🍃
في نفس الوقت..
كانت طوبى مقعمزة ع السرير بالعرض..ثانيه ركابها لفوقها تشوف لتليفونها اللي كانت شاداته بين ايديها..
حاطه ع التقويم في هاتفها لشهر اغسطس..
عيونها ع يوم ميلاد جنة..نظراتها للتاريخ كانت نظرات بغض وفي عقلها تخطر خواطر عمره مافكر فيها..ولاقلبها يطاوعه يفكر فيها...
اليوم بالذات طوبى حاسه اتجاه بنتها بكره مش متحمله شوفتها قعدت حابسه روحها في دارها بش ماتشوفهاش.
دق الباب..
تأففت بضجر وقالت..
/خش..
انفتح الباب وخشت غرفه وهي تقول..
/تعالي تعشي..
طوبى بشي من الانزعاج..
/بالله جيبلي بروحي ماخاطريش نطلع من الدار..
هزت راسها بدون ماتتكلم سكرت الباب ومشت للكوجينه..
خشتلها لقت فيها اريج تصب في مية لجنة..
شافتلها اريج وقالت..
/ماتبيش تطلع ولا؟
هزت غرفه راسها بإيجاب..
اريج:من بعد جية عيلة التارقي زادت تنكدت لاحظتي حركات عمته الكبيرة ولا!؟
غرفه بشي من العصبيه..
/سكري ع سيرتهم مانبيش نلبز في الدوة..
وخدت السفرة بعد ماجهزت عشي طوبى وحطتلها الدوا وطلعت من الكوجينه..
غيرت اريج نظرها عن غرفه بعد ماطلعت لجنه قالتلها..
/كملتي خلاص!؟
مدت جنة الطاسه وهي تهز في راسها بإيجاب..
خدت اريج الطاسه حطتها ع الطاوله ورفعت جنه في حضنها وطلعت بيها من الكوجينه..
🍃🍃🍃🍃
هديكا الليله رفضت طوبى ترقد في دار المعيشه واصرت ع غرفه تبات مع صغارها..وغرفه رضخت لرغبتها مرغمه لما حست ان طوبى عصبيه زياده وماتبيش من يناقشها في شي..
وباتت طوبى بروحها في الدار..الغريب ان النوم ماباش يجيها..كانت تبي ترقد ومش قادره..توترت هلبه عصبت هلبه..من الغضب غزت سنونها بقوة لين وجعوها..
حطت ايديها الزوز ع راسها وقعدت تفرك فيه بقوة وهي مغمضة عيونها بشده..
فتحت عيونها وبعدت ايديها..خدت تليفونها من جنبها وفتحت الفيس بوك وبدت تتصفح..
كانت تبي تشغل نفسها عن الشعور اللي كانت تحس بيه..
جي قدامها منشور عبير صاحبتها..كانت مصورة ولدها بدون ماتبين ملامح وجهه..
شادين يده الصغيره هي وراجلها وكاتبه فوقها كلام يعبر عن الحب والسعاده وفي النهايه كاتبه
"كل ايامي معاكم عيد"..
حست بشعور الضيق اللي فداخلها زاد تخطت المنشور
جي قدامها منشور لزينب كانت منزله كلام يحكي عن السكينه والراحه وفي الاخر تدعي الله يديم عليها هالنعمه،
ويزيد شعور الضيق داخل طوبى..
فاتت المنشور..ويطلع بعده منشور في صفحة عامه مكتوب فيه..
( لو أنني أعرف كلمة أعمق من كلمة انطفأت لقلتها، أنا لم أشعر من قبل بانطفاء روحي مثلما أشعر الآن)...
النظرة السوداديه للحياة عمرها ماكانت تعرفها ايمانها وقناعتها الدائمين ان الازمات مهما اشتدت حتفرج وان العبد المطمئن بمعية الله في كل شدة يدور ع المنحه لأن رب الخير لايأتي الا بالخير..
لكن توا مش قادرة تحس بشي من هدا..توا قاعده تشوف لنفسها انها انسانه تعيسه حظها سيء حياتها سودا وعمرها ماحترتاح في حياتها...
رمت الهاتف جنبها..ورقدت ع يمينها..وضمت ركابها ليها وبدت تبكي بشدة بدون مايطلع منها صوت...
وماحستش بنفسها وهي رايحه في النوم ودموعها مازال تنزل...
🍃وتعدي الساعات...
ويحين وقت صلاة الفجر..وكالعاده تلقائيا تفيق من النوم..تسمع في الآذان والضيقه مازالت مرافقتها حست معاها بكسل وخمول لكن مع هذا قلبها ساعدها تقاوم وتنوض تطلع من الدار للوضوء وبعدين الصلاة..
🍃واهو مر ثالت يوم العيد ومختار ماجاش زي ماقال عزيمة احد اكابر القوم مازال اهم..واي شي يخدم مصالحه هو الاولويه الأولى عنده...
وفاتن اللي حملها كان مستحوذ ع اهتمامها كله قررت تشد الحوش ومعاش تبي تطلع منه الا للضرورة خوف من عدوى الكورونا معروفه خطيره ع الحوامل اللي واصلين للثلاثه شهور الأخيرة من الحمل..لهذا معاش بدت تهتم بمواصلة اهل راجلها من عدمه...
🍃ومافي شي اهم من راحة سدرة عند المهدي..
طلبت منه يقعدوا اسبوع تاني في الخمس وهو وافق فورا اما باقي عيلته من الصبح روحوا لطرابلس..
🍃🍃🍃🍃
الساعه 4:00قبل العصر...
في الكوجينه..
غرفه دير في مرضعة لبنتها واريج معاها طيب في شاهي أخضر...
تخش عليهم طوبى لكن خشتها فجعتهم...
كانت مذعورة وهي شاده في يدها تليفونها وتقوللهم..
/شوفوا الحقير هداكا شن بعتلي شوفوا..
جتها غرفه بسرعه خدت منها التليفون..
لما شافتها بانت عليها صورة مكتوب عليها..
(مشتاق نرجعوا زي ماكنا..ياريت نرجعوا زي ماكنا وبنتنا تتربى معانا ونديرولها خوت وخوات..نعشقك)
اريج وقفت حدا غرفه وشافت صورة واخدها الجالي ليه ولجنه وطوبى لما احتفلوا ببلوغ جنة سته شهور...
طوبى وهي ترجف ودموعها ينزلوا..
/الحقير هدا الحقير مش مخليني في حالي مش مخليني في حالي لين يقتلني..
غرفه بملامح غضب وخوف قربت لاختها وضمتها وهي تقول..
/مريض هدا ماتعدليش عليه مايقدرش ع غير هكي مايقدرش..
اريج:لازم يندارله حد المريض هدا..
غرفه: تو نكلم خالي المحجوب..
طوبى:لا استني استني..
بعدت عن غرفه وخدت منها التليفون..
وهي ترجف طلعت من الماسنجر وخشت ع سجل الأسماء..
حطت ع رقم المهدي واتصلت بيه...
🍃والمهدي في هالوقت مع سدرة مقعمزين ع كراسي تحت مظله قدام الشط..
لما جاه الاتصال رفع تليفونه وشاف رقم المتصل لون وجهه تغير..
سدرة بإنزعاج:بالله سكره ديره صامت ريح روحك من الخدمه ووجع الراس..
هو شافلها شويه بعدين صمت الهاتف وقال بإبتسامه..
/حاضر..
🍃غالبا توقع وقتها ان طوبى تبي تكلم سدرة وهو مايبيش يزعج سدرة نهائي..
وطوبى عاودت عليه مرتين وغرفه واريج يشوفولها بقلق..
في اخر محاوله اللي كانت الثالثه نزلت التليفون وقالت ودموعها مابطلوش نزول..
/غرفه..كلمي خالي..
هزت غرفه راسها ومشت بعصبيه طلعت من الكوجينه..
اريج:ماتخافيش صدقيني مايقدر يديرلك شي..
مشت طوبى قعمزت ع الكرسي ورا الطاوله بدون ماتتكلم..
سرحت بتفكيرها وهي تهز في رجلها اليمين بتوتر..
واريج بعد ماكانت تشوفلها بضيق مشت تشوف الشاهي وفي داخلها تدعي ع الجالي..
🍃🍃🍃🍃
والجالي في هالوقت كان مقعمز في سيارته قدام مكتب المحاميه امتنان..
يتفرج ع صور ليه ولطوبى حافظهم في بطاقة ذاكرة..
وفي عز انسجامه مع اوهامه..
سمع صوت دق ع روشن "شباك" السيارة..
شافله بعدين ضغط ع الزر ونزل المرش..
بان عليه واحد لابس نظارات شمسيه سودا شكله مألوف..
عدي:معليشي نبيك شويه..
عقد الجالي حواجبه وقال..
/انت مني!؟
قاله:المحامي عدي اكيد مار عليك اسمي..
عرفه الجالي..رفع حاجبه وغير نظره القدام بعدين فتح الباب ونزله...
🍃والمحجوب بعد ماجاه اتصال غرفه اللي خبراته فيه بكل شي طول طلع من مكان عمله متوجه لحوش طوبى..
🍃🍃🍃🍃
طلع من داره متوجه لدار المعيشه اللي قاعدات فيها عماته وبنت عمته..
قبل ليوصل في الباب قال بصوت عالي..
/عمتي سليمه..
"خش حبيبي خش"..
قدم للباب وخش وهو يقول..
/شن جو..
كلهم ردوا عليه والابتسامه ع وجوههم..
"تمام..مليح"
قعمز في جهة بروحه وخلاهم كلهم مقابلينه..
قال وهو يشوف لولد صفيه..
/رقد الزعيم..
صفيه:كسد ياروحي..
عبد القيوم:تو نطلعوا في الليل..
عمته بريكه قالت..
/في امان في الليل هنا!؟
عبد القيوم:اها الوضع يعتبر كويس نوعا ما البسوا الكمامات وشيلوا معاكم المعقم وخلاص..
سليمه بإبتسامه:ان شاء الله..عبدو..
عبد القيوم ضيق عيونه وهو يشوفلها يراجي تكمل باقي كلامها واختها وبنتها يشوفولها..
سليمه كملت تقول..
/في موضوع نبي نحكي فيه معاك..
ابتسم وقال..
/حتى نا جيت بندوي معاكم في موضوع..
صفيه ضيقت عيونها وهي تشوفله..
سليمه شافت لأختها اللي كانت تشوف لعبد القيوم بعدين ردت نظرها ليه وقال..
/افتح موضوعك انت قبل..
عبد القيوم ضم ايديه لبعض..
/نبي نخطب..
رخت صفيه عيونها وشافت لأمها وخالتها..
سليمه حست بشي من الخوف بان ع ملامح وجهها لهذا قررت تسبقه وهي تقول..
/نفس الموضوع اللي نبيك فيه وناويه..
قاطعها وهو يقول..
/لحظه عمتي خل انا بس اللي ندوي لأن الموضوع يخصني..
عقدت بريكه حواجبها وقالت..
/من هي اللي تبي تخطبها!؟
عبد القيوم؛وحده يعرفنها عمتي سليمه وصفيه كويس ويعرفوا اني نبيها من زمان..
انفعلت سليمه وهي تقاطع فيه بالكلام..
/لالالا بالله عليك ولدي المراة هذي طلعها من راسك..
بريكه:مش من جدك ياعبادي معقوله مالقيتش غير هذي!! شن ناقصك بش تاخد وحده مطلقه وعندها بنت ومشاكلها ومشاكل هلها مايكملنش!؟
سليمه بإنفعال وعصبيه..
/حط عقلك في راسك ياولدي راهو هذى زواج مش لعب والواحد يزوج بش يستقر مش يقعد في المشاكل والبلا!
بريكه؛نحنا خليناك تعيش حياتك ع راحتك لان عارفينك تربيت صح و عاقل وتعرف تصرف وتحمي روحك لكن الباين طلعنا غلطانين..اسمع الموضوع هذى لو سكرت راسك عليه مش حتلقى حد يمشيلك فيه لاعمام لاخوال مافي حد يرضالك بيه ياولدي..
صفيه كانت تسمع فيهم وتشوف لعبد القيوم بضيق..
وهو كان يسمع فيهم بهدوء وملامح وجهه كانت جاده..
بعد كملت عمته بريكه كلامها قال..
/كملتن!؟
قعدوا يشوفوله الزوز بنظرات عصبيه وعدم رضا..
هو هز راسه بعدين قال..
/وانا والله غيرها ماني واخد ولو تميتوا مصرين ع موقفكم منها حناخدها ومش معدل ع حد ولامستني حاجه من حد..سامحوني..انتم جبرتوني نسمعكم هالكلام..
وناض ومشي طلع من حداهم وخلاهم في حالة صدمه وقهر..
صفيه وهي مبتسمه بتهكم قالت..
/انا شن قلتلكن!؟
سليمه مسحت دمعه نزلت من عينها واشرت ع بنتها وهي تقول..
/كلمي خالك عبد الله يجي توا..
تنهدت صفيه وقامت تليفونها بش تنفد امر امها..
بريكه وهي تمسح ع فخدها بقهر قالت..
/العيل مش صافي انظر شن دايرتله..
وسليمه ملتزمه الصمت والدموع ينزلوا من عيونها..
🍃🍃🍃🍃
في يده التليفون يشوف للصورة ويقرا في الكلام..
والبنات قبالته..
زوز مقعمزات ووحده واقفه حاطه ايديها الزوز ع فمها وتشوفله بخوف وقلق..
عقد المحجوب حواجبه ورفع عيونه في طوبى وقال..
/كلمتي المهدي!؟
نزلت طوبى ايديها وقالت بضيق..
/ايه لكن ماردش..
رفعت غرفه حاجبها والعصبيه باينه في وجهها..
اما اريج بدت ع وجهها ملامح الأسف..
ناض المحجوب وقال..
/ مادوريش بنتي وماتخافيش منه هو قاعد يحاول في محاولات يائسه ماتعدليش عليه..
شاف للهاتف صور الرساله صورة الشاشه وبعت الصور عن طريق البلوثوت لهاتفه..
مد الهاتف لطوبى خداته وهي تشوف لخالها بقلق شديد..
المحجوب:ماشي لحوش اهله بش نحط بوه في الصورة لعل وعسى يدير لولده حل..
طوبى في عز همها وخوفها وقلقها قالت لخالها..
/حاول ماضرش روحك بالله عليك..
نظرات المحجوب الغاضبه تبدلت لنظرات الم بدون مايرد بالكلام هز راسه بإيجاب ومشي طلع من المربوعه..
غرفه ناضت لحقاته..
وطوبى وهي تبع فيها بعيونها قالت بنبرة ألم ويأس..
/ياريت ربي ياخدني ونرتاح..
اريج ودموعها في عيونها..
/بعيد السو..
ابتسمت تهكما وقالت..
/عمره ماكان السو بعيد عني..
ومشت طلعت من المربوعه واريج تشوفلها بقهر وحزن ودموعها ينزلوا..
ع خشة غرفه..
قدمت لأريج وهي تقول بغضب وتهكم..
/المهدي باشا مايردش!؟
نزلت اريج عيونها وهي تمسح في دموعها..
غرفه:والله مايجي راجل كان بيتبع مرته في مواقفها..حطت ايديها في نصها وقالت..اكيد زادت نقمت بعد ماكلمنهاش في العيد..
اريج قامت عيونها وقالت..
/طوبى اتصلت..
عقدت غرفه حواجبها بترقب..تترقب باقي تكملة كلام اريج واريج كملت تقول..
"لقتها حاطتها في الحظر"
غرفه بصدمه..
/حظر!!؟
نزلت اريج عيونها والتزمت الصمت..
ضحكت غرفه بصدمه وسخريه بعدين مشت خدت تليفونها من فوق كنبة في صالون المربوعه..
كانت تستعمل فيه وهي ترجف من الغضب ومازالت ملامح ضحكة السخريه باديه ع وجهها..
حطت ع رقم سدرة واتصلت بيها..
🍃سدرة وقتها كانت تتمشى مع المهدي ع الشط..
المهدي:الواحد مادابيه يوسع تجارته ويطلع بيها برا البلاد لكن خطوة زي هادي تبي من ياخدها بالشويه بالشويه عليه..
سدرة:معاك التسرع والمجازفه يخسروك كل شي..
كيف جي بيتكلم المهدي يجي لسدرة اتصال..
هو هني بدي يحس بالقلق لو المتصل حد من اهلها معناها صاير شي..
رفعت سدرة تليفونها لما شافت المتصل بدت ع وجهها ملامح الحده..فصلت عليها ونزلاته وشافت القدام..
المهدي:مني!؟
سدرة:مش مهم..
تأكد ان المتصل وحده من خواتها..
سمع نغمة الرساله..شاف للهاتف..
وقفت سدرة وهو وقف معاها..
قامت الهاتف وع وجهها نفس ملامح الحده..
فتحت الرساله وبدت تقرا فيها..
(خسارة..
معروفك معاها ثمر فيها لكن معروفها معاك ماثمرش فيك)
ممكن سدرة لأول مرة في حياتها يتوجهلها كلام يوجعها بشدة زي كلام غرفه في رساله هادي..
غرقوا عيونها بالدموع وطاحوا..
المهدي عقد حواجبه بقلق وقال...
/شن في!؟
رشفت سدرة وقالت..
/روح بيا..
المهدي:باهي لكن قوليلي خيرك شن فيها الرساله!؟
مدتله التليفون..
هو خداه وشاف الرساله رجع نظره ليها وهو يشوفلها بألم..
قربلها وضمها لقلبه ومشي بيها لمكان السيارة وهي مازال تذرف في الدموع وقلبها موجوع ع الآخر..
🍃🍃🍃🍃
"هدا اللي خفت منه تو شن تبيني نقولك شن بنطلع من فمي
الله المستعان وخلاص"
الكلام هدا قالاته زينب لخوها عدي بعد ماجاها للحوش وهو متعرض للضرب وراجلها يداوي فيه
عدي رد عليها يقول..
/ردي بالك تقولي لأمي اني قلتلها طالع برا طرابلس خدمه..
راجل اخته قال..
/حتى انت دير في حاجات غلط شن رفعك ليه واحد زي هدا ماعنداش عقل يتفاهموا بيه معاه عدي بغضب..
/واحد مريض وعديم رباية مش عارف كيف عطوهاله..
زينب بحزم:اسمع عدي اخر مرة ندوي حولها من راسك انساها خلاص..
راجلها قال..
/ناسي اللي مريت بيه في تجربتك السابقه تبي تعاود نفس السيناريو!
عدي:في فرق كبير..
زينب:لامافيش فرق هديكا جابتلك مشاكل وهادي بيجيك من وراها مشاكل والله بنموت من الندم اللي دليتك عليها..
راجلها قال..
/خلاص اطلعي توا..
زينب شافت لخوها بعصبيه وضيق بعدين مشت طلعت من حداهم..
قعمز راجل اخته وهو يدس في ادوات الاسعافات في الشنطه وقال..
/عندها الحق..انت مشيت تدوي معاه شوف شن دار فيك مالا كان سمع بيك واخدها شن يدير!؟ الراجل هدا غير سوي نفسيا ياعدي يعني يدير كل شي وانت رجل قانون وادرى مني بالنماذج هادي من الناس..
عدي بضيق..
/هي ماتستاهلش يصير فيها هكي..والله ياشيخ وين نقعمز بيني وبين نفسي ونفكر فيها نقول علاش ماطلعتش في حياتي من قبل والله وحده زيها نحطها في عيوني ونحميها حتى من نفسي..
رد عليه يقول..
/كله مقدر ومكتوب ونصيب..ونصيبك مش فيها لو كان نصيبك فيها راهي طلعت في حياتك من قبل ع قولتك..
قاله بنبرة فيها وجع..
/باهي علاش طلعت توا!؟
قاله:الله اعلم مش كل شي لازم نعرفوا الحكمه من وراه المهم توا تحكم عقلك وتفوت الموضوع هدا فكر في أمك ياعدي..
تنهد بضيق وقال..
/سامحني بنثقلها عليكم من اول يوم..
ابتسم وقال..
/شن تقول ياراجل هدا حوش اختك تجي امتى ماتبي وتقعد قداش ماتبي..
عدي؛بارك الله فيك..
🍃اخته اليوم ولت لحوشها بعد مادارله راجلها صيانه🍃
🍃🍃🍃🍃
"عطيه كسرة اللي دار فيك هكي"
الجالي بعصبيه؛خلاص اسكتي راسي مصدع بروحه مش ناقصك..
قعدت نجاة داويله في جروح وجهه ودموعها ينزلوا..
وهو قاعد يتفكر في الحديث اللي صار بينه وبين عدي وقلبه محروق بنار الغيره..
🍃عدي حاول يكلمه بالعقل ويقنعه يسيب طليقته في حالها لكنه مجرد مانطق اسم طوبى انهال عليه الجالي باللكمات وهو دافع عن نفسه وفي النهايه فكوهم الناس عن بعض وهدا كله صار ع عيون المحاميه امتنان🍃
وهي حاليا اتصلت بالجالي وهو اول مارن هاتفه بعد نجاة و خداه من ع الطاوله وهي معاه بعيونها..
هو لما شاف الاتصال جاي من امتنان ناض ومشي طلع من الشقه كلها..
ونجاة قعمزت وهي تشوف للجهة اللي مشي منها ودموعها في عيونها...
🍃برا الشقه..
الجالي بعصبيه..
/هدا التافه اللي حكيتلك عليه قبل قتلك خطبها..
"امم..شن كان يبي منك؟"
بنفس العصبيه قال..
/الكلب بيعلمني الرجوله ع اساس قال الراجل مايديرش اللي دير فيه لأم بنتك..
"ممكن تكون بعتتاته"
الجالي:قتلك قبل مافي شي بينه وبينها..
"هي هكي فهمت اختك بش ماديرلهاش مشاكل"
سكت الجالي وهو يغلي ويفور من الغضب والغيرة..
"زيد دور ورا الموضوع متأكده حتوصل في شي ينفعك"
هز راسه وقال..
/وهدا اللي بيصير..
"واللي تعرفه بلغني بيه طول.."
الجالي:تمام..تمام..
🍃في هلبه امثال امتنان المسأله عندهم تتعدا كونها قضية رابحه واتعابها..اللي زيها وكأن في حقد كبير في قلبها ع بنات جنسها لأسباب منها المجهول ومنها المعلوم..قد ترجع للبيئة اللي تربت فيها..او لأنها قعدت من غير زواج..وممكن اسباب اخرى دارتلها عقدة نفسيه من النساء اللي هي منهم🍃
🍃🍃🍃🍃🍃
وتعدي الساعات..
وطوبى مش قادرة تهدا عايشه في حالة قلق شديد وكل شويه تتكلم مع غرفه واريج في نفس الموضوع وتحكي في السيناريوات السودا اللي تخيل في الجالي يديرهم..
غرفه واريج عجزوا ع انهم يقولولها كلام يريحها قعدوا يسمعوا وهما موجوعين ع حالها..
وطول الوقت وجنه تشوفلها وحالة امها انعكست عليها البنت هبت وصابها حزن خلاها مش قادرة تلعب مع الصغار ..
راقد ع رجل اريج وتشوف للتلفزيون وبس..
🍃🍃
والمحجوب دار اللي قال عليه ومشي لحوش شنيبه واجتمع بمحمد ووراه الرساله اللي بعتها ولده..
انتابه غضب شديد ع ولده وعطي وعد لمحجوب انه يديرله حد ومايخليشي يقرب من طوبى ولا بنته..
🍃🍃🍃
"والله العظيم والله نمشي ندير فيه محضر ونقول ولدي مهبول والله نديرها"
عمر بضيق..
/توا غدوة نمشيله ونتفاهم معاه..
محمد بغضب؛وصله كلامي بالحرف قوله زي ماطلعتك من الحوش وحرمته عليه نحرم عليك عيشتك..
هز عمر راسه وهو يقول..
/حاضر..حاضر..
🍃🍃🍃
"اني متأكده انه شري الدكاترة اللي في المصحه مستحيل يكون تعالج تو هو زاد مرض ع مرضه"
غرفه تنهدت بضيق وقالت..
/يعطيه مرض ياخده..
حطت طوبى يدها ع بطنها وهي تقول..
/يارب..
غرفه وهي ترقد في بنتها
/خيرك شاده بطنك..
طوبى بشي من الوجع..
/توجع فيا من حرق الاعصاب..
غرفه حطت بنتها وقالت...
/الله يحرقه..ناضت وهي تقول..تو نرديلك بابونج..
مئاب بدت تبكي وصوت بكاها زاد ضايق طوبى وخلاها تقول..
/لالا خليك تو نوض نديره..
ناضت ومشت بسرعه طلعت وغرفه بنظراتها الحزينه معاها..
ع جية اريج وفي حضنها جنه جايه بيها من الحمام..
نزلتها وقالت..
/وينها؟!
غرفه:بدير لروحها بابونج بطنها توجع فيها..
سكتت اريج وهي حاسه بقلبها مغموم..
قعمزت وهي تشوف للتلفزيون وتفكر في حال طوبى وسهت عن جنة اللي طلعت من الدار بش تلعب مع ولاد خالتها بلعبة التركيب اللي حطوها في الصاله..
لكن وهي طالعه شافت دار امها وبنت خالتها مفتوحه..
ليها فترة خاطرها تخش الدار وتاخد لعبة الفراشه وبدون تردد مشت بسرعه للدار...
🍁الساعه الآن اقتربت من التاسعه ليلا...
خش مختار لحجرة المكتب متاعه بعد ماخلا فاتن راقده بعمق في دار النوم...
مشي للكرسي الجلد تمدد عليه..عيونه جو ع باب المكتب اللي يفتح ع الحديقه متاع الفيلا..شاف من ورا زجاج "PVC" القمر وهو واصل لمرحلة الاكتمال..
ابتسم..وخدي ريموت المنظومه من ع مسند الكرسي وشغلها وقعد يمرر في المقطوعات لين وصل لمقطوعة بيتهوفن الشهيرة..
"ضوء القمر"...
رد الريموت في مكانه وحط ايديه ع صدره وغمض عيونه وهو يسمع...
🍃وتحت ضي القمر المكتمل رقدت سدره في حضن راجلها بعد مابكت بكاء شديد ارهقها وهو قاعد يطبطب عليها ويشوفلها بألم...
🍃الألم..
اللي قاعده تحس بيه طوبى مش بس في بطنها..بل في جميع انحاء جسدها..في لحظه وحده..
حست بشي يتحرك في كل ذرة في جسدها..وكأن اعصابها اشتعلت بالنار..وهالشعور قعد يسري في جسدها كله..
مدت يدها اللي كانت ترجف لطاسة البابونج بش تاخدها اول مالمستها طاحت ع الرخامه وتبزع اللي فيها كله..
🍃غرفه:واخيرا رقدت..
حطت بنتها جنبها بهدوء..الهدوء اللي مااستمرش لما سمعت صوت شي انخبط ع حيط بقوة وانكسر..
شافوا لبعض هي واريج بفجعه..
ناضت اريج بسرعه وغرفه ناضت وراها وين جو بيطلعوا..
شافوا طوبى فايته قدامهم وهي تمشي بعصبيه وتقول بتذمر..
/عيشة سودا عيشه مسخة الله يلعنها الله يلعنها..
وهما يشوفولها بصدمه مش طوبى بكل هادي..مش طوبى.
🍃وتخش الدار وتشوف فيها جنه شادة مذكرتها وفي يدها بيرو "قلم حبر" وتخربش بيه ع صفحات المذكرة..
جن جنونها بكل معنى الكلمه..قدمت للبنت جبدتها بقوة من ذراعها لين قريب خلعاته وصفعتها ع وجهها بقوة وهي تقول بعياط..
/شن درتي يامصيبه..يامصيبه..
خشت اريج تجري شافت جنه مذعورة تبي تهرب من امها..
قدمتلها اريج جبدتها منها وطلعت بيها وهي تقول بإنفعال وصدمه..
/معقوله هكي معقوله..معقوله ديري في بنتك هكي!! شن ذنبها هي شن ذنبها ياظالمه..
غرفه كانت في حالة صدمه تشوف في طوبى ومش قادره تصدق عيونها..
وطوبى في لحظتها فعلا ماكانتش طوبى..
لحقت اريج وهي تجري زي المجنونه..
قعدت تدفع فيها من ظهرها وهي تقول..
/مش بنتي مش بنتي..معاش نبيها معاش نبيها كله منها هي اللي معيشتني في هم لتوا..بلي نزل ع راسي..معاش نبيها..
اريج بدت تستاقظ للوضع..طوبى في هديكا الحاله ماكانتش طبيعيه نهائي..تدفع فيها بكل لين وصلت في الباب فتحاته وطلعتها وهي تقول بعياط..
/عطوها لبوها عطوهاله معاش نبيها..
غرفه حتى هي وعييت للي قاعد يصير مشت تجري سكرت الباب..
ولما جت بتشد طوبى..طوبى قعدت تضرب فيها وهي تقول..
/خليني خليني..معاش نبيها معاش نبيها.
وبدت تخبط ع وجهها تقول..
/عطوها لبوها الحقير الكلب ..وبدت تنقز وتخبط في وجهها وتقول بصوت عالي...
"عييت"
🍃برا..اريج كانت في حالة صدمه وكأنها في وسط كابوس تسمع في عياط طوبى ودموعها ينهمروا ع خدودها..
وجنه اللي كانت ترجف من الذعر شاده فيها بقوة لكن ماتبكيش خايفه وبس..خوف شديد للغايه..
ماكانش في حد من القراب عليهم موجود هديكا الليله..
عبد المطلب وهاديه قاعدين عند اهل هاديه..
فايزة وبناتها معزومين ع العشي عند عيلة الصيد..
🍁"عييت ياناس معاش قادرة نتحمل عييت"
غرفه بدت تبكي وهي تشوف لحالتها تحاول تشدها لكن طوبى كانت تعافر فيها وتفك في روحها منها هي وقتها ماكانتش متحمله حد يقرب عليها..
سمعت غرفه صوت بكاء صغارها لقتهم واقفين في الممر يبكوا..
مشتلهم تجري خدتهم كلهم ودخلتهم لدار المعيشه عطت لواحد فيهم هاتفها بش يلهوا بيه مع بعض..
"سادني سادني خلاص ياسرني"
سمعت صوت تخبيط ع الحيط طلعت تجري وسكرت الباب لقت طوبى تخبط في راسها ع الحيط..
عيطت وبسرعه مشتلها ضمتها من الخلف بقوة وطوبى تقول بعياط..
"خليني..خليني"
غرفه بكل قوتها شادتها وهي تبكي بالعبره..
طوبى لحظتها حست انها حتنفجر بمالمعنى الحرفي..
رفعت عيونها فوق ولاإراديا وكأن قلبها هو اللي تكلم وخلاها تصرخ بأعلى صوتها..
"ياالله"
طلعت بألم شديد..بوجع فضيع..بإستنجاد..بضعف...
صرخه اولها كان عالي واخرها اختفي منه الصوت..
قعدت تسمع في مكانه صوت دقات قلبها وكأنها يدق في وذانها كانت بطيئة وقويه..وماهي الا ثواني..
وخارت قواها وطاحت بين ايدين غرفه فاقدة الوعي...
🍁🍁🍁
انفتح باب المكتب الخارجي..
طلع منه يدور في النفس..حاط يده ع قلبه اللي حسه بيوقف..
شافوه الحراسات انفجعوا وواحد منهم نادى..
"يااقجم"
ويجي الاقجم يجري وهو يقول..
/خيركم!؟.
اشروله ع مختار لما شافه انفجع ومشاله يجري وهو يقول بصوت عالي..
/كلموا اسعاف المصحة اللي هني..بسرعه...
🍁🍁🍁
خداه النوم وهو مقعمز بدون مايحس ع روحه..
فاق مفجوع لما سمع صوت شهقتها..
بفجعه قال:سدرة!
حطت يدها ع صدرها وهي تتنفس بسرعه كانت تشوف للفراغ بنظرات فزع..
دموعها بدوا ينزلوا وهو يسأل فيها..
/كنتي تحلمي..
حطت ايديها ع وجهها ومسحاته بعدين هزت راسها بإيجاب وهو ناض من حداها بسرعه بش يجيبلها مية...
🍃🍃🍃
"كله واتي.."
سكرت باب الدار اللي كانت فيها وقالت وهي تتكلم هاتفيا..
/الساعه قداش....تمام خلاص..ضحكت وقال..باهي تصبح ع خير...ضحكت وقالت..باهي بااهي..باي..
نهت المكالمه وهي مبتسمه بغرور..بعدين مشت بإتجاة البالكونه..
وقفت في بابها وشافت القمر..تبدلت ابتسامتها لملامح باردة ونظرات عيونها كانت كالعاده مليانه حقد..
🍃وتمر الساعات..
ويروح الجالي ويلقاها راقده..خدي دوش وبعدين انطرح ع السرير وراح في النوم..
ويعدوا ساعه ورا ساعه لعند ماآذن الفجر...
ناضت نجاه بفزع..شافت جنبها لقت الجالي راقد..
غيرت نظرها عنه ونزلت من ع السرير وبهدوء وحذر طلعت من دار النوم وسكرت الباب وتوجهت للحمام..
دوشت ع السريع..وطلعت طول بإتجاه الدار المسكره..
فتحت الباب وهي حريصه ع الهدوء وخشت وسكراته وراها..
لحظات وطلعت منها وهي لابسه عباية ووشاح..
قامت زوز شناطي من شنط السفر وحده صغيرة ووحده متوسطه الحجم..
ومشت بهدوء لباب الشقه حطتهم وفتحتها بعدين طلعتهم برا..
🍃وقدام العمارة درست سيارة سودا مظلمه..
نزلوا منها زوز خشوا للعماره..ركبوا للدور التاني خدوا الشناطي ونزلوا بسرعه...
طلعوا من العمارة وحطوهم في السيارة وتحركوا طول..
ونجاه داخل شاده تليفونها تشوفله وهي تستنى..
فجأه جاها اتصال..
طول طلعت من الشقه وسكرت الباب ونزلت تجري..
اول ماطلعت من العمارة لبست نظارات وتوجهت لسيارة سودا عاليه..
وصلت فيها انفتح الباب السحاب تلقائيا ركبت وتسكر وراها..
وتحركت السيارة طول..
🍃🍃🍃🍃
الساعه 11:00صباحا..
فاق الجالي ع صوت تخبيط..
ناض قعمز وهو يتسمع يبي يتأكد من اللي سمعه..
كان صوت تخبيط ع باب..
التفتت مالقاش نجاة قال بتذمر..
/طالعه وناسيه المفتاح..
ناض ومشي فتح الباب وتوجه لباب الشقه..
وصل فيه وفتحه..
لقي قدامه راجل ووراه زوز عمال..
هو بإستغراب..
/تفضل!..
الراجل قاله..
/انت شن دير هني!؟
الجالي:نعم!!؟
الراجل قاله..
/ع حسب علمي الشقه فاضيه!!..
الجالي بإمتعاض قال..
/شكلك غالط ياخوي..
قاله:كيف غالط!؟ مش الشقه هادي كانت لوحده اسمها نجاة المعلول!؟
ضيق عيونه وقال..
/ايه!
قاله:خلاص معناها مش غالط نجاة من قبل اسبوع باعتلي الشقه..
فتح عيونه ع وسعهم بصدمه وهو يقول..
/شن تقطف انت!؟
الراجل قاله..
/انت من تكون بالزبط!!؟
🍃وفي هاللحظه يسمعوا صوت جري ع الدروج..
شافوا للدروج من الاسفل لقوا تلاته ملتمين راكبين..
بدت ملامح الخوف ع وجوههم..
بلا كلام..ولاسلام جو للجالي شدوه ونزلوه وهو يقول بفجعه..
"شن في شن تبوا...انتم مني..مني..حولوا"
وقعدوا يجروا فيه جر لين طلعوه برا العمارة وهو يصيح ويصرخ والجيران يتفرجوا عليه من الشبابيك والبالكونات شافوهم كيف ركبوه سيارة مظلمه وتحركوا بيها وهما يحرقوا في العجل...
#طوبى
#منازل_القمر
...يتبع...
