#طوبى "جنة طوبى"
#جمان_فريد
#الجزء_104"الاوراق المتساقطة/ورقة وداع"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 في زمن الحرب....
لايمكن ان نكتب النهايه....
ولكن سيكتب التاريخ دوما ان ماكينه الحرب لاتطحن سوى الابرياء....🍃
_____________________________________
خبر موت مالك انتشر في موقع التواصل الاجتماعي "فيس بوك"
ع صفحات اصدقائه ومعارفه اللي نعوه بأجمل الكلمات واكثرها ألما..
وع الصفحات اللي تغطي في اخبار الحرب وتنزل في معلومات تامه عن ضحاياها في جبهات القتال..
انتشار الخبر خلاه يوصل لأسماء..
اسماء اللي من بعد المكالمه اللي صارت بيناتهم تغيرت هلبه حاجات فيها وفي حياتها..
ماولتش ملتزمه دينيا..لكن عقلت واصبحت متزنه بعض الشيء وبعيده عن الحياة السيئة اللي كانت عايشتها قبل..
اسماء لما وصلها الخبر انصدمت بقوة..تألمت لدرجة لاتوصف بكت بكاء شديد افقدها الوعي..انهارت بمعنى الكلمه..
🍃زي ماانهاروا خوات مالك اللي قاعدين ينوحوا ع خوهم في حوش عمهم الكبير..
الناس حواليهم ماقدروش ع قد ماحاولوا فيهم يهدوهم زي مانقولوا كانوا طايرات من النار اللي ركبتهم..
وخوته الولاد وجعهم خوهم هلبه وبالاخص مازن..
🍃لكن وقع الخبر ع مروة كان غير..هي اكيد انوجعت ع صاحبتها بس في نفس الوقت حست بشعور مزعج جدا ضايقها لدرجة لاتوصف وماعرفتش تفسره..هل ممكن يكون شعور بالذنب!؟لو هكي فهو غير مبرر لكن القلب لما يكون طيب ونظيف ديما يحمل في نفسه مسؤوليه اي وجع يتسبب فيه لاي شخص حتى لو كان هالشخص مسببله اذى كبير في حياته..ولا..!
ولا مرات حست بالشفقه عليه..ووجعتها نهايته!!؟
بين هذا وذاك قعدت تذبذب مشاعر مروة...
🍃وامها فايزة اللي وجعها مالك وبكت عليه من قلبها طلبت من اشرف يوصلهم لمكان العزي..
اشرف لما عرف كانت مشاعره متناقضه بين عدم التقبل والحزن...ولأنه مايقدرش يرد عمته فايزة رفعهم للعزي هي ومروة فقط...
🍃🍃🍃🍃🍃
هالخبر جدد شويه من احزان اريج..وخلا قلب اميمه ينشغل ويخاف ع حسين اللي رجع بش يكمل مهمته اول ماصبح الصبح..
☘طوبى وهي دير في المرضعه لبنتها..
/استودعيه الله وماتخافي من شيء بإذن الله نخلصوا من هالحرب ونفرحوا بيه زي مافرحنا بيوسف..
اميمه بشي من القلق...
/يارب..
طوبى شافت للباب وبدت تنادي..
/جنة...جنونه..جنه...
سمعوا خطوات رجلين دب ع الارض وبعدين بانت صاحبتهم لما خشت عليهم..
وين شافت المرضعه جتها ملهوفه وخدتها من امها..
اميمه بضحكه:سلمها ياربي..
طوبى وهي تشوفلها..
/نخمم هلبه في اللي ناوي عليه بوها..
اميمه؛شن متوقعه؟
طوبى:مش قادرة نتوقع شي..لتوا ليه اربعه ايام مروح مادار شي حتى سميره قالت ماسمعتاش تكلم في موضوع بنته ولاسأل عليها ولابوه عارف ع شن ناوي..عقدت حواجبها تساؤلا وقالت..زعمه قعد يراجي لين يتم العرس!!؟
اميمه؛حتى اني هكي فكرت..
تنهدت طوبى وقالت..
/امس قلت لخالي مستحيل مازال نبعتها غادي وهديكا موجوده يبي يشوف بنته ماعنديش مانع لكن في حوشهم لا..
اميمه؛احسن مادرتي وهو مايقدرش يعترض..
طلعت جنه بالمرضعه من الكوجينه شافتها امها وقالت..
/تعالي نطلعوا..
اميمه؛نشرب ميه ونجيك..
طوبى بضحكه؛وبتحكيلي شن صار امس..
اميمه بضحكه؛باهي..
مشت طوبى طلعت..وقعدت اميمه بش تشرب ميه وعقلها يفكر بفرح في قصتها الجديده اللي حتكون اجمل مما تخيل..
🍃🍃🍃🍃
وصلوا فايزة ومروة لحوش عم مناسك..
اصوات البكي والنواح قطعت قلوبهم..
شافت فايزة جيداء وهي تبكي بتعب مشتلها وحضنتها وهي تبكي وجيداء تبكي معاها..
اما مروة بعد ماعزت اخت مناسك التانيه خدتها وخشت بيها ع مناسك اللي كانت راقده في دارها تبكي مابتش تطلع منها..
اول ماشافت مروة لما خشت عليها ناضت وهي تقول ببكي في جمله وحده مش قادرة تقول غيرها
"مالك يامروة"
مشتلها مروة بسرعه ضمتها بقوة وقعدوا يبكوا هما الزوز..
مناسك بصوت منخفض مخنوق قالت في وذنها..
"سامحتيه!"
مروة ببكي وبنفس نبرة الصوت..
"ومن قلبي يامناسك من قلبي"زادت ضمتها مناسك ومن وسط بكاها ابتسمت وهي تقول همسا..
"الحمد لله..الحمد لله"
🍃ومن حال فايزة ومروة مع اهل الميت..لحال اشرف معاهم اللي ماقدرش ينسى معروف مالك وبسببه قرر يحضر الجنازة اللي حتكون بعد صلاة الظهر...
🍃🍃🍃🍃🍃
"عندهم حق يحزنوا عليه ساد الموقف اللي داره معاهم"
طوبى:ايه والله موقف كبير هلبه لاخر عمرهم ماينسوه..الله يرحمه ويغفرله..
سدرة:اللهم آمين..شافت لأميمه وقالت..امتى يروحوا خوالك؟.
اميمه؛طلعوا بكري شويه..
مطيره:مستعجلين!..
سدرة؛فيهم الخير ع اقل في المناسبات يحضروا مش زي غيرهم لافي خير ولاشر ريناهم..
مطيرة واميمه شافوا لبعض وأريج ركزت بالنظر ع سدرة..اما هاديه قعدت تشرب في القهوة بدون ماتشوف لحد فيهم..
لكن بعدين كلهم وجهوا نظرهم لطوبى لما سمعوها قالت..
/سدرة علاش نحس فيك من لما روحتي زي اللي مش طايقه خالي ومرته !؟
تنهدت سدرة بعدين رفعت حاجبها وقالت..
/خوالك وخالاتك بصفه عامه مانبيلهم شبح وجه..عمرهم ماكانوا باهيين معانا لاوامي حيه ولابعد موتها..مالقيناهم في شي..حرمونا حتى نشموا ريحة امنا عليهم..مانبيش سيرتهم ولانبي نعرفهم..
مطيره؛سديره! راهو خالك محجوب هو اللي جري ع اجرائتك بش طلعك برا ودفع تكاليف علاجك غادي في الاول بكل..
طوبى:مش في هادي بس وقف معانا..ياما دار خالي يا سدرة وقفاته عمري ماننساها ياريت بوي حي ويخبر..
دمعوا عيونها وهي تقول بشي من الحده..
/وشن فكره بينا توا!!؟ علاش خطرنا عليه في هالسنتين! مش كان واخد وجهه شن رده!!؟
اميمه وهاديه حسوا ان وجودهم معاهم غلط..عطوا لبعض نظرة فهموها..
ناضت هاديه وهي تقول..
/نوضي اميمه نعاونوا امك في حوسة الحوش..
اميمه؛باهي..حطت فنجانها وناضت ومشوا طلعوا مع بعض وهما يقولوا..
"سلام..بالسلامه توا"..
خدت طوبى نفس وقالت..
/سدرة..راهو انتي اللي كنتي تقنعي فينا بش نستقبلوه كويس لما كلمك وقال بيجينا..
مطيره:كنتي تبيه يجي يحضر فضانيتك..
طوبى:لهفتك لشوفته قاعده بين عيوني الوحيده..
سدرة ودموعها بعيونها قالت بتهكم.
/شكلي كنت درويشه هلبه وقتها...
رفعت مطيره حواجبها تعجبا ومررت نظرها ع طوبى واريج...
عقدت طوبى حواجبها وقالت..
/سدرة من الاخير انتي تعرفي شي حني مانعرفوشي!؟
☘واثقه ومتأكده ان مختار لاعب بعقلها وهدا ولى استنتاج الجميع لكن اختارت تسألها بطريقه خاليه من التلميح عليه لأنها تعرف قداش ولت حساسه اتجاه اي شي يذم مختار او يوجعه ولو تكلمت عنه بالتلميح او بشكل مباشر ينقلب الوضع عليهم ويجي لصالحه هو☘
وسدرة بعد سؤال طوبى جي في بالها حديث مطول دار بينها وبين مختار انقال فيه كلام وجع قلبها واثار غضبها في نفس الوقت..
🔺️🔺️🔺️قبل شهرين🔺️🔺️🔺️
في احد المدن الريفيه الجميله في اسكتلندا..
كانوا مقعمزين مع بعض..يسترجعوا في ذكريات الماضي اللي جبده مختار..وسيرة تجيب سيرة لعند ماوصل بيهم الحديث لخوالهم...
سدرة بألم؛هما هكي حتى في بعضهم مش غير مع امي بس..
مختار؛فعلا..
سدرة:لكن خالي المحجوب حاساته فيه الهون ع الأقل تفكرنا
بعد هالسنين وقعد يواصل فينا..
ابتسم تهكما وقال..
/نقولك حاجه..الخوال بشكل عام مافيهمش خير..بالذات خوالك وخالاتك ماتراجيش منهم الخير..
ضيقت عيونها وهي تقول..
/شن تبي تقول؟!
شاف لعيونها بعد رسم ع وجهه ابتسامه اسف وقال..
/خالك هذا ماتفكرناش بعد هالوقت لله في لله..عنده حاجه يبي يوصلها..
سدرة بإستغراب..
/شن هي!؟
مختار:ورث امي الله يرحمها..حصتها من الارض الكبيره اللي في*******..طبعا خالاتك لتوا ولا وحده فيهم فكرت تبيع حصتها ولادير بيها شي..وانتم وبوي مادورتوش ورا حصة امي..شكله فهم انها مش هامتكم قال خل نلف عليهم وناخدها منهم رجل قانون وليه الاعيبه..تعرفي ياسدره الارض هادي ع موقعها اللي هي فيه قداش تجيب! بلاوي متلتله..
سدرة قعدت تفكر في كلامه وشبه اقتنعت بيه..
وهو لاحظ هالشي وكمل يقول..
/سبحانه ربك وقفله فيها لما صار معاك الحادث لكن مع هذا كمل في المسرحيه متاعه وزعميته جري ع موضوع سفرك وطلعك وساعد في الصرف ع علاجك...كان يبي يكسب بوي وخواتك بش يوصل لهدفه..نسألك سؤال..علاش ماخلاهمش يفكروا يبيعوا حصة امي بش يصرفوا ع علاجك!؟
سدرة ودموعها في عيونها..
/بوي مش حيرضي نعرفه كويس باع مافوقه ودونه بش نتعالج..
مختار؛بوي وقتها همه سلامتك مش حيفكر في الحاجات هادي..
سدرة:امي صفيه قالت لما باعت طوبى ذهبها ع خاطري عاركها ومارضهاش ع روحه..
مختار بإبتسامه أسف..
/ديما هكي انتي..نيتك صافيه هلبه وقلبك طيب زياده عن اللزوم..نقولك..تعرفي مرته تكون اخت راجل غرفه..تعرفي راجل غرفه هدا مليشاوي كبير وداير بلي يابلي..تعرفي ان هو اللي دور وراي وجابني بعد ماجيتك للحوش..اني استغربت وقتها هلبه..الراجل فجاه هكي دور وراي وجابني وجمعني بغرفه وفردوس ويقولي نبي نلم الشمل ومش عارف شنو.. اني مشيت معاه بحسن النيه وقلت لعل وعسى..ضحك بسخريه وقال..تعرفي شن طلع يبي مني!؟ يبيني نخش في مواضيع فيها لعب ولف دوران لما رفضت لزني من حوشه..ونقم عليا وحرض عليا بوي وخواتي هدا كله كان ملعوب بينه وبين خالك بش يحولوني من طريقه لأن عارف لو بوي قبلني مرة تانيه مش حنخليه يوصل للي يبيه..تعبوا عيونه بدموع التماسيح وتصنع النبرة المخنوقه وهو يقول..مانبيش نحكيلك مانبيش نحكيلك شن حسيت وين قالتلي غرفه معاش دورني..ادمرت ياسدرة اللي تأملت فيه كله دمر..حط يده اللي ترجف تصنعا ع عيونه وقعد يبكي..
وسدرة تشوفله بألم وشفقه..
حول يده ومسح دموعه الكاذبه بقفا يده اليسار بعدين حمحم وقال..
/لكن ربك في الوجود..طيح راجل اختك في شر اعماله..حبسوه بتهمة اختلاس من الدوله مبلغ بالملايين..
فتحت سدرة عيونها ع وسعهم بصدمه..
هو كمل يقول بإبتسامه تهكميه..
/ع قد ماداروا ماقدروش يطلعوه منها..سكت وهو يتصنع في ملامح البكاء بعدين قال والعبرة خانقاته كذبا..بوي اللي مايباش..يشبح..يشبح في وجهي جاني لعندي ع خاطره بش نطلعه..جاني ع خاطره مش ع خاطري..بش نطلعه قالي اني لتوا ماغضبتش عليك قال ياطلعه يانغضب عليك..
وحط ايديه ع وجهه وانهار بالبكي..
بكائه هالمرة كان حقيقي لأنه تفكر تفاصيل هداكا اليوم..
حطت سدره يدها ع فمها وهي تبكي بالصوت..
حول مختار ايديه وخداها في حضنه وهو يقول..
/اني اسف مش قصدي..لكن..اني نبيك تعرفي خالك هدا ع حقيقته حرض عليا العيله كلها مع نسيبه يبي يبعدني عن طريقه لأني اني الوحيد اللي زبطت شن بيدير..ومشيت واجهته بيه ووقفته عند حده لكن هوثعلب مكار وهكي هما المحاميين عرف كيف يخلي العيله كلها تجي معاه ومع نسيبه الكلب ضدي اني..اااه ياسدرة اااه شن بنحكيلك ولاشن نقولك..فوق كل اللي ريته منهم ع خاطر عيون بوي طلعته..لكن لكن مالحقش يعرف بطلعته..توفى في نفس اليوم..وانهار بالبكي وهي انهارت معاه...
🔺️🔺️🔺️الوقت الحاضر🔺️🔺️🔺️
دموع سدرة نزلوا وهي تقول..
/اللي نعرفه ان خالك هدا طامع في ورث امي..ارض امي اللي في ****** هديكا حقها يساوي ملايين وهو يبي ياخدها بالإحتيال واللي قاعد يدير فيه هدا كله جسر بش يوصله للي يبيه..
مطيره شافت لطوبى بأسف..واريج تراجي في ردها..
واللي سمعاته طوبى من اختها توا خلاها تتفكر مواقف خالها معاهم..وجعها قلبها عليه هلبه ماتحملتش فيه..
بعيون مليانات دموع وبنبرة ألم قالت..
/اللي داره معانا خالي المحجوب ياسدرة لو تعرفيه يخليك تضحكي ع روحك اللي صدقتي القطاف هدا كله..سدرة اني بش شريت الحوش هدا من بوي خديت حقه من خالي المحجوب..المطحن لما طاحت بيه وتسكر هو اللي وقف معانا بش نرجعوا نفتحوه..خالي بعد تزوج وين سافر شهر عسل هو ومرته مشالك وين ماكنتي بش يطمن عليك..ع خاطرنا ع خاطرنا خسر منصبه وكان حيخسر سمعته..سدرة..واني في اسوأ واصعب حالاتي خالي سندني سندني بكل معنى الكلمه ع خاطرنا كلنا انتي واني وغرفه وفردوس دار شي مايندار بش يحمينا ياسدرة...
تحكي بحرقه قلب من حبها لخالها اثرت في مطيره واريج هلبه..لكن تأثيرها ع سدرة كان اقوى..لدرجة ان ذاكرة سدرة تحفزت بقوة وجابتلها مشهد يشبه هالمشهد صار في نفس المكان...
عركتها هي وغرفه ع خاطر مختار..
في الاول كانت تتفكر في اللي صار بعدم وضوح الاصوات متداخله في عقلها...بس شويه شويه تفكرت الموقف كامل واكثر جمله ترددت في عقلها...
"قال اللي انتي قعدتي درقي فيه السنين هادي كلها..طلعتي انتي اللي حارمتينا منه مش هو"
شدت ع ايديها بقوة لما حست بصداع رهيب غمضت عيونها بشده..
تسمع في اصواتهم وهما ينادوا فيها بإسمها..فتحت عيونها شويه..شافت وجه طوبى الباكي المذعور..بعدين معاش شافت ولاسمعت شي...
🍃🍃🍃
هو الانسان لما يملك كل شي يطغى..يابالك لو كان غير سوي نفسيا محمل بأحقاد الماضي اللي مش قادر يطلع منه..
ينسى ان اخرتها موت ومابعد الموت ينفتح حساب مايتسكرش ليوم القيامه ويبدا بعدها الجزاء اما جنه ونار..
وممكن ماينساش..زي ماإبليس مانساش الحاجه هادي لكن الغرور والكبر خلوه يتجرأ يتحدى الله سبحانه وتعالى بش ينتصر لنفسه المهزومه..وهدا كان حال مختار وهلبه ناس من امثاله...
وبرغم طغيان الإنسان وجرأته ع الله بالعصيان الا ان برحمته يبعتلهم في الفرص فرصه ورا التانيه...
ويابخت اللي يكسب فرصته زي مالك..صح خسر كل شي حلو في حياته لكن في المقابل كسب اعظم شي رجوعه الله بالتوبه..وطلع من الدنيا وهو مخفف حمول ظهره من الاوزار راجي رحمة الله وعفوه...
دفنوه خوته ودموعهم ماقدرتش تمنعه نزوله العادات والتقاليد اللي تحرم بكاء الراجل حتى في مثل هالمواقف..
وصديقه المقرب..عشيره..اللي دمعته غاليه بكي عليه بالصوت...
🍃وفي حوش عمه..
كانت فهيمه تشوف في حال خوات مالك وقلبها موجوع عليهم..لكن وين يجوا عيونها ع نساوين خوته تبدلت ملامح وجهها للغضب وتتمنى لو قدرت تحصل فيهم فرصه تخليها تربيهم من أول وجديد..
غيرت نظرها عنهم لما شافت مروة طالعه من دار مناسك وماشيه بإتجاه امها طبست عليها وكلمتها بعدين ناضت هي وياها ومشوا خشوا للدار وسكروها عليهم..
🍃فايزة؛نسوكه حبيبتي شن تحسي.
مناسك وهي تتوجع ودموعها تنزل..
/مغص ياخالتي..قوي هلبه..
فايزة بقلق:عليك العذر حبيبتي!؟
بوجع قالت:لا..
مروة بقلق:حاستهم اعصاب معده..
فايزة:تو نطلع نكلمهم بالك نديرولها حاجه تخفف الوجع..
وطلعت من الدار..
ومروة مشت قعمزت حدا مناسك حطت يدها بطنها وبدت تقرا عليها..ومناسك تسمع فيها وهي تتوجع فوق وجع معدتها وجع قلبها المقسوم من الحزن...
🍃🍃🍃🍃🍃
"اني يعطيني بكشه اني"
هادي طوبى تتكلم ببكي وهي تضرب في فمها..
وقفتها اريج وهي تقول بهدوء..
/استغفري ربي طوبى..انتي ماغلطتي في شي هي كان لازم تعرف هلبه حاجات مش غير هادي بش معاش تخليه يستغلها..
طوبى ببكي:هاك شفتي شن صار فيها ياخوفي تنتكس حالتها..غمضت عيونها بشده وهي تقول..ناخد ونوصي فيكم ونقول ردوا بالكم ونوض اني اللي نلبزها مرة وحده..فتحت عيونها وهي تقول بألم..مصيبه ع راسها اني اختي هادي اني مصيبتها الكبيره..
ضمتها اريج وهي تقول بهدوء..
/اشش خلاص..هدي وارجعي لعقلك قولي لاإله إلا انت سبحانك اني كنت من الظالمين..
هدت بعض الشيء وبدت تردد في تسبيحة يونس..
🍃ومن دار المعيشه اللي هما فيها للدار التانيه..
كانت سدرة متمدده ع السرير واميمه تقيسلها في الضغط.
سدرة بصوت مبحوح..
/وين طوبى..نبي طوبى..
مطيره بقلق؛حاضر حاضر..هاه يااميمه شني!؟
اميمه:ضغطها نازل لكن مش هلبه..
سدرة:ياودي جيبوا طوبى نبيها حداي..
مطيره؛باهي باهي..ومشت طلعت من حداهم..
شافت سدرة لأميمه وقالت..
/علاش درقوا عليا علاش ماتبوش تقولولي شن صار معاها..
اميمه قعدت تشوفلها بربكه وتوتر منعوها عن الرد..
ع خشة طوبى وهي تبكي ووراها مطيره..
قعمزت طوبى حدا سدرة وقالت بنبرة مرتجفه..
/شن تحسي سدرة!؟
فتحت سدرة ايديها وقالت..
/تعالي..
ارتمت طوبى في حضنها وهي ضمتها بقوة وقالت..
/مافيا شي حبيبتي مافيا شي ضغطي نزل شويه بس..
طوبى بنبرة باكيه..
/سامحيني..
سدرة:ع شني حبيبتي..ع شني بس..خلاص اسكتي توا ومعاش تبكي اللي صار بكري انسيه..كلكم انسوه كأنه ماصار باهي..
طوبى؛حاضر..
مطيره:باهي..واميمه هزت راسها بالموافقه...
🍃🍃🍃🍃🍃🍃
ومن حوش الواعر لحوش جيرانهم المقابلين..
بعد الغدي سقدت مغليه خواتها ونساوين خوتها وبعد ماطلعوا مشت خشت دارها وسكرتها عليها..
طلعت سميره من الكوجينه اللي كان ضم فيها وهي حاطه يدها فوق فمهاو تزغرد بصوت صوت..بعدين خمست بإيديها ع الباب وقالت..
/مالا فكه..
وين جت بتلف بش تولي للكوجينه يطلع في وجهها الجالي من فجعتها نطت في مكانها وكانت حدوخ غير شدت في الحيط بيدها وبدت تقول..
/بسم الله الكريم..سلام قول من رب رحيم..
هو شد ضحكته وحاول يكون عادي لما قال..
/فاضيه!؟
قامت عيونها وشافتله بريبه..
هو قال؛بتمشي بعدين لحوش الواعر!؟
عقدت حواجبها وقالت بريبه..
/ايه..علاش!؟
تنهد وقالت..
/بنعطيك رساله شفهيه نبيك توصليها للاخت طوبى..
شبحتله من فوق لتحت بنفس نظرة الريبه وقالت..
/رساله شني هادي!؟
🍃🍃🍃🍃🍃
الساعه 5:00عصرا..
في صالة حوش طوبى..
كانت طوبى تشوف لسميره برفعة حواجب تعجبا وهي تقول..
/اخت طوبى!؟
سميرة بضحكه:قالها سبعه ولاتمانيه مرات لين ركبني القداد..
مطيره:شن يبي يثبت!؟
اريج بتهكم:حسن النوايا..
سميرة بضحكه:يبي يقول انه طوي صفحتها و توا ولت اخته في الاسلام..
طوبى:نقولوا يارب..المهم بالنسبه لطلبه قوليله طوبى مش حتبعت جنة لحوش اهلك وهديكا فيه..يبي يشوفها يختار مكان محايد يناسبنا الزوز...
سميره:توقعتك معاش تبعتيها قلتها لمحمد مادام روحت المنجوهه هديكا معاش تبعتها معاي..
طوبى؛شن قال؟
سميره؛سكت ماعقلش..
مطيره بكره؛شن دايرة معاها!!؟
سميرة؛اليوم الصبح شكلها بعتت الجالي يرفعلها الصغار قعد يقنع فيهم لين مشوا معاه الشقه..شويه ونسمع عياطات معاذ قريب قلب الدنيا قطعلي قلبي..ماطولش نزل بيه الجالي وقعدوا جوري وحمزة تغدوا معاها وطول نزلوا بعد الغدي..
مطيره:ننصحك نصيحة سلم وخيتي ردي بالك منها وبيعي المشاكل معاها راهو هادي مازال احقر من خديجة..
طوبى:رايي من راي عمتي انتي حاولي تليني الصغار معاها في النهايه امهم وتو يحنولها...
تنهدت وقالت..إن شاء الله..إن شاء الله..
🍃وفي الحوش اللي مجاورهم حوش الجد..
كانت صفيه مقعمزه مع الحاج علي تكلم فيه عن موضوع اميمه..
علي وهو شاد عكوزه من فوق..
/قتي يخدم معاها!!؟
صفيه بشي من التوتر..
/ايه في المصحة نفسها..
علي:ترا خشي ضبحيلي "ناديلي" عليها..
ناضت صفيه وهي تقول..
/حاضر..
قعد يستنى وهو يهز في رجله اليسار وقفها لما طلعوا اميمه وصفيه..
اميمه بخجل؛نعم جدي!؟
علي الواعر:هدا الدكتور اللي حكتلي عليه امك تعرفيه وتعرفي اخلاقه!؟
اميمه بإحراج وتوتر..
/مش عارفه يقولوا محترم وكويس..
اشر عليها بسبابته وهو يقول..
/انتي انتي شن شفتي عليه في الخدمه!؟
بلعت ريقها وقالت..
/مش عارفه يبان كويس..
عقد حواجبه وقال..
/شن سماه!؟
اميمه ووجهها احمر من الخجل..
/اسامه عبد الرزاق الاحمر..
هز راسه بصمت بعدين قال..
/باهي خشوا..
خشت اميمه بسرعه وامها لحقتها..🍃🍃🍃🍃🍃
"خلينا نرزنوا شويه حبيبي مش معقوله كل يوم غادي"
فاتن بضيق؛باهي يعني اليوم بس وبعدين نديروا مشيه كل نهاية اسبوع..
مختار:قتلك لا يافاتن وتوا وتي روحك طيارتنا تطلع الساعه 10 في الليل..
هي بصدمه؛وين؟
هو قال؛عندي شغل مهم في**** ولازم تكوني معاي بندير زيارة لحوش**** ***..
تنهدت بضيق وقعدت ساكت..
نكشلها شعرها بعدين قرص خدها..
وهي تشوف القدام بملامح تجهم خلاته يضحك عليها..
🍃🍃🍃🍃🍃
قبل المغرب كان اشرف مروح بفايزة ومروة وصفاء اللي رفعها بعد العصر بش تعزي..
محمد المهدي وهو واقف في القهوة..شاف سيارة اشرف لما درست قدام حوش سدرة ونزلوا منها فايزة ومروة..
غير نظره طول لما اشرف شاف جهة القهوة بعدين رجع التفت لما سمع بوابه حوش الصيد انفتحت وشاف سيارة اشرف خشت..
رد نظره لشقة فايزة وهو يفكر في حالة مروة اللي شافها في وجهها لما نزلت من السيارة وقعد يتسائل في نفسه..
ياترى هدا كله من الحزن عليه ولا على اخته!؟
🍃وفي حوش جده..
في الكوجينه..
كانوا مغليه وعمر ونضال مقعمزين ع الطاوله يهدرزوا..
وسميره حداهم باديه طيب في العشي..
ع خشة الجالي..
قعمز جنب امه وهو يشوف لسميرة يراجي يعرف رد طوبى بفارغ الصبر..
غير نظره عنها لما سمع امه قالت..
/رجيوه بنت خالك بلعيد!؟
نضال:خالي بلعيد اللي مايعرفش يمينه من يساره يام..
شدوا الاولاد ضحكتهم وسميره تضحك ع الهزاز..
مغليه؛طيح سعد الفلفل ياريتك تجي في ربعه
نضال:ولافي عشره..ياريتك شفتيه يومها ع البحر الشورط الجيشي عرفتوه ياولاد قاعد عنده لتوا..
ضحكوا غصب عنهم..
مغليه؛لاقيه في قرارك يامنسرف..اسمع ياولد ماتلفش ودور وتريح الموضوع رجيوه كبرت ماشاء الله عليها كان تشوفها تقولي تمي في الموضوع طول..
التفتت سميره وهي تقول ..
/غير راجي ان شاء الله هديكا اللي شعرها ليمي!؟
نضال بصدمه؛ليمي!؟ هادي اخرتها يام شعرها ليمي معقوله!؟
مغليه؛غير دقيقه..انتي تبيني نفصل عليك فصله عمرها ماصارت! الدوة بيني وبين ولدي سكري فمك واسكتي..
رفع الجالي حواجبه وهو يشوف لسميره اللي قالت بضحكه..
/حتى هو ولدي ياضريرتي كم مرة بنفهمهالك الشرع عطاهملي ع البارد المستريح..
ضحكوا نضال وعمر..والجالي استغرب ردة فعلهم..
مغليه غمضت عيونها وقالت..
/نضال نوض قدامي...
ع خشة المهدي قال..
/السلام ع الجميع..خالتي سميره فتلكي العشي جايب جماعه..
سميره؛حاضر ولدي قداش واحد..
المهدي:اربعه..واحد فيهم طلب المكرونه الصالصه متاعك اللي درتيها المرة اللي فاتت قال ماكليتش زيها..
سميره؛وين بياكل زيها وين سرها عندي اني بس..
مغليه التفتت للمهدي وقالت..
/صاحبك هدا ماعنداش حوش يتعشى فيه.!
سميره:عنده لكن مايحصلش فيه ماكلة سميره..
صفر عمر..ونضال قال..ايوه ياصقع ..
المهدي غمز لخوته وقال..
/لكن حطي في بالك ديما انتي الترتيب التاني ومغليه تقعد الاول..
عمر ونضال صفقوا وهما يقولوا..
/اوووو..
ابتسمت مغليه بكبر..
والجالي قال؛ماتبيش كلام مغليه مايجي معاها ولاقبلها ولابعدها حد..وقرب منها باس راسها..
مغليه:سلم وليداتي سلم وليداتي..
نضال:امي كم اهواها ياوخيتي محلاها..اهم حاجه تفكينا منا الشعر الليمي بس..
ضحكوا كلهم والمهدي قال..
/ماتبي شي خالتي!؟
سميرة بإبتسامه..
/سلامتك بس..
مشي المهدي طلع..وهي رجعت لهت بالعشي واكتفت بالإستماع لهدرزتهم...
شويه وطلعوا عمر ونضال..بعدين لحقتهم مغليه وهي تقول..
/تعال هدرز عليا في الصاله..
الجالي:نشرب ميه ونجيك..
هزت راسها وطلعت...
التفتت سميره لقتها مهناش شافت للجالي وقالت.
/قالتلك ومرتك هني مش باعتتها..
الجالي:نجاة شاده شقتها وبعدين اني نخليها تقرب بنتي ولاتجي جيهتها!!؟
سميرة:والله هدا كلامها وقالت اختار مكان محايد يناسبك ويناسبها بش تشوف بنتك..
سكت وهو مضايق ومعصب في نفس الوقت..
وسميرة تشوفله بريبه..
شويه وناض وهو يقول..
/يصير خير..ومشي طلع من حداها..
زفرت سميره بعدين قالت..
/يستر الله وخلاص..
🍀🍀🍀🍀🍀
ويعدي من هداكا اليوم اسبوع.
🍃والجالي يفكر ويرتب ويخطط ويراجي اللي طلبه من راما وهي جاباته وخدت هديتها..وتوا حيبدا التنفيد..
🍃من جهة تانيه قاعد مختار مع فاتن في وحده من الدول العربيه يجري في جرة مصالحه ومشاريعه وفاتن كانت تساير فيه فوق من نفسها...
🍃لكن سدرة رجعت لحالة الانعزال بعد اللي صار اخر مرة حتى الطبيبة النفسيه رفضت تشوفها وحالتها كانت معيشه طوبى في حالة قلق...
🍃والحاله اللي عايش فيها التارقي بسببها زادت تأزمت يدوب يخدم خدمته ويروح للشقه معاش يطلع منها ماعنده رغبه في شي..هدا الحب لما يوصل لأقصى درجاته...
🍃والحب عايشينه العرسان جهينه ويوسف في سويسرا اللي سافرولها بعد تلاته ايام من زواجهم بشكل عام حيستقروا غادي وليبيا مش حيجوها غير زيارات..
🍃اما اخته فكانت تتهرب من اسامه لما تشوفه في المصحه وهو كان عارف علاش دير هكي..خجل وثقل في نفس الوقت وهو ع قبله زي العسل.
لكن ماكانش عارف ان اللي يبي ياخد العسل لازم يتحمل قرصات النحل..او لذعات لسان الحاجاللي حتكون ليه معاه مواجهه قريبه ينحط فيها تحت الاختبار...
🍃وياحال مناسك اللي قاعده تعيش اختبارات قويه ع صغر سنها..من الحزن ع خوها مرضت مرض دخلها لمصحة لما سمعت بيها مروة مااستنتش خلت امها ترفعها طول..
☘خشوا عليها الحجره ..
شافوها راقده والكانيولا جنبها..انوجع قلب مروة علي حالها وزاد خوفها عليها..
******
مناسك ببكي..
/الحقيرات الواطيات من توا يحكوا ع نصيبه في الورث وكيف بيتقسم تخيلي يامروة تخيلي قاعد ماسكرش اسبوع وهما يدووا في حاجه زي هادي..
مروة بغضب..
/الكلبات الجيعانات.
فايزة بإزدراء:خطروا عليا نساوين خوالك نفس الفورمه..
مناسك ببكي:الله لايربحهم ياربي.
دق باب الحجرة وانفتح خشوا عمتها ومعاها فهيمه طلقوا السلام وفهيمه قالت..
/مسحتلك بيهم الوطى الكلبات هادم..
مناسك بنبرة باكيه..
/قهروني ياخالتي..
عمتها:والله معاد خاشين حوش سحيقه ومسحق..
مروة بتردد ورجاء قالت لعمة مروة..
/خالتي نطلب منك طلب؟.
فايزة وفهيمه ومناسك ركزوا معاها..
:قولي حبيبتي..
مروة؛معليشي تخلي مناسك تجي تقعد عندنا للسبت.
تفاجئت فايزة..
ومناسك فرحت هلبه بطلب صاحبتها..
عمتها قالت:ماظنيش خوتها يرضوا..
فهيمه:كان هي تبي يرضوا غصب عنهم..
:شن ياوخيتي يافايزة شن قولك؟
فايزة؛كان خوتها راضيين ماعنديش مشكله..
فهيمه؛اني نتفاهم معاهم..
ومشت طلعت من الحجرة...
شدت مروة يد مناسك وهي تشوفلها بإبتسامه ومناسك ردت الابتسامه.
وعمتها وفايزة يشوفولهم بنظرات حب..
**********
مازن؛من صاحبتها هادي!؟
عقد معين حواجبه وهو يمرر في نظره ع المكان..
فهيمه؛بنت احمد محجوب تعرفها كويس..
مازن؛ايه زبطتها..لكن ثقيله ياخالتي شن تمشي تبات في حوش صاحبتها!!؟
فهيمه:البنيه محترمه وعيلتها محترمه وحوشهم مافيشي ولده..خلي اختك تقعد وين ماترتاح اقلها يومين حرام عليكم شوفوا حالها كيف ولى مرات لاقدر تصير فيها حاجه كان زدتوا ضغطتوا عليها..
سكت مازن وهو يفكر..
معين؛العيله كويسه وشارعهم محترم ماتخاف من شي..
شافله شويه بعدين قال..
/تمام واني نجيها نروح بيها السبت العشيه..
فهيمه؛حاضر حاضر..سلم ولدي..
ومشت من حداهم...
تنهد مازن من قلبه وقال..
/الله يرحمك ويسامحك يامالك..
نزل معين عيونه بنظرات حزينه وهو عاقد حواجبه...
☘وتمر ربع ساعه..
وتطلع مناسك وهي مروة متعنقات ذراعات بعض ووراهم فايزة وفهيمه وعمة مناسك يهدرزوا..
معين شاف جيهتهم..عيونه جو ع مروة..شافها كيف عقدت حواجبها لما مازن وقف ع اخته بش يكلمها كان باين عليها معصبة..
غير نظره عنها وهو يصارع في مشاعره بقوة...
شويه وركبوا مناسك ومروة في سيارة فايزة..
وعمة مناسك ركبت مع مازن..وفهيمه مشت ركبت مع ولدها..
تحركت سيارة فايزة لحقهم معين طول...
فهيمه؛صح طاح سعدها مع خوتها لكن طاحت في صاحبة قدعه صاحبة حقانيه اخت دنيا..البنت هادي فكرتني بروحي في صغري..
معين بإبتسامه وهو عاقد حواجبه..
/لهالدرجة عجباتك يام!
فهيمه؛واكثر البنيه عمرها16عام لكن فايته سنها في كل شي مش زي الخملج اللي من جيلها..
سكت معين وقلبه يدق بقوة بس كان يحاول يتجاهله ع قد مايقدر...
🍃🍃🍃🍃🍃
"وين وين؟!"
سميرة؛في الشقه اللي قاعده فيها نسرين..
مطيره:ع حسب مانعرف شقة عبد القيوم لا؟
سميره؛ايه..
طوبى وهي تحاول تخفي ارتباكها..
/كويس..قوله يجيب معاه المهدي واني بنرفع معاي سدرة..
سميرة:سدرة!؟
"ايه ياخالتي اني بنمشي معاها"
خشت سدرة اللي بدت تمشي من غير القيلا لكن مشيتها مازال مش متعدله تماما...
قعمزت جنب طوبى وكملت تقول..لكن ماتقوليش..
سميرة هزت راسها وهي تقول..
/حاضر..
طوبى شافت لسدرة..حالتها غريبه مش قادرة تفسرها ولاسدرة عطتها مجال تحكي معاها في أي شيء..
🍃🍃🍃
وليل الليل وطوبى بعد مارقدت بنتها خشت عليها سدرة وقالت..
/غدوة نبي نمشي للمدرسه..
طوبى وهي متفاجئة:غدوة؟!
سدرة:ايه..ومشت وسكرت الباب وخلت طوبى غارقه في دوامة افكارها...
🍃🍃🍃🍃
وعدت هالليله وطل صبح يوم الخميس..
كانت طوبى في السيارة تراجي في سدره..
🍃وسدرة في الدار..
فتحت دولابها وطلعت من تحت حوايجها ظرف رسالة عائشه تنهدت بحزن وعيونها تعبوا دموع..
حطتها بسرعه في الشنطه وسكرت الدولاب ومشت طلعت من الدار...
#اوراق_متساقطة
#طوبى
....يتبع...
