[كان الله في عون اهلنا في غ.زة دعائكم معاهم هدا أضعف الإيمان ]
#طوبى "جنة طوبى"
#جمان_فريد
#الجزء_المئة_وواحد"حسابات قديمه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ». 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لقد اخترتك بعناية، شعرتُ بأن رقة قلبك مثل خيط يضمدني عندما كان كل شيء في العالم يخدشني🍃
_____________________________________
تجري وهي تضحك بمرح..ايديها وفمها عليهم اثار الاكل اللي تغداته..
وكل من في الحوش يسمع في امها اللي تجري وراها وهي تقول..
/ياجرانه جرانات...
وصلت فيها وشدتها وهي تقول..
/حصلتي..
وجنة تضحك..
مشت بيها طوبى للحمام وهي تغني..
/هالصيصان...وجنة تكمل بلغتها الحلوة..
"شو..لوين"
طوبى:عم بيدوروا حولى امن مبسوطين..
وخشت بيها للحمام غسلت ايديها ووجهها وهي تقول..
/وتوا ولت بنتي تلمع..ودارت صوت اللمعه اللي نسمعوا فيها في افلام الكرتون..وجنه تقلد فيها...
🍃في مكان تاني في الحوش..
كانت مروة ضم مع اريج في الصاله اللي تغدوا فيها وهما يحكوا عن..
مروة بضيق:هي متوقعه انه لحق صاحبه قالتلي قبل ديما معاه مايتفارقوش..
اريج ودموعها في عيونها..
/علاش هكي بس علاش!؟..علاش مافكرش في اخته مسكينه..
ومروة تسمع فيها وهي تفكر في حال مناسك..
🍃مناسك الهم غيرها خلاها باهته ومطفيه والحياة في عيونها اسود لونها،وهي خايفه عليها..خايفه لو يصير في خوها شي تصيرلها حاجه ولادير في نفسها حاجه🍃
..ومن الصاله للكوجينه...
كانت اميمه توتي في عالة الشاهي بعد ماكملت غسل الماعين بس عقلها مش معاها..اسامه مسيطر ع تفكيرها وهي مش فاهمه علاش ولت مشغوله بيه لهالدرجه..مش فاهمه شن تحس حاليا وشن تبي..
هل تشوف في اسامه فرصة العوض الحقيقي!؟
جوها الفترة اللي فاتت خطاب بين المطلق والارمل وحتى الاعزب وكلهم رفضتهم لأنها نافره من موضوع الزواج بحد ذاته..
لكن مجرد ماشافت اسامه تغيرت مشاعرها السلبيه اتجاه فكرة الزواج..
هي توا تبي تعرف السبب وع قد مادورت عليه مالقتاش..
🌼خشت عليها طوبى شافتها كيف ترتب في حاجات العاله وهي سرحانه شبه فهمت في شني ابتسمت..
غيرت نظرها للباب الخارجي وهي ماشيتله وصلت فيه وطلعت..
شافت يسارها...لقت سدرة مقعمزة تحت شجرة الياسمين وتبان سرحانه...مشت خدت كرسي قربتلها بيه حطاته وقعمزت..
سدرة بإبتسامه؛رتيله..
طوبى ودموعها في عيونها..
/الرتيله مش مصدقه انها قاعده تشوف فيك كان نلقى نقعد مقعمزه نتفرج عليك ونملي عيوني منك..
نزلوا دموع سدرة وهي تقول بضحكه..
/تي خلاص عاد يابنت فترشتي قلبي..
خدت طوبى يد سدرة وشدتها وهي تقول بضحكه..
/باهي خلاص..بنقولك حاجه تانيه..
سدرة:قولي حاجات..
بإبتسامه وهي تمسح ع يدها قالت..
/زي مانعرفواسديرتي انك مازال قاعده تحت العلاج..
سدرة:ايه وفي مركز علاج طبيعي حنبدا نمشيله من غدوة صاحبه يعرف مختار..
حاولت ع قد ماتقدر تحافظ ع ابتسامتها وهي تقول..
/تمام..بس انتي جنب العلاج الطبيعي محتاجه تكملي العلاج النفسي..
سدرة بإبتسامه..
/هادي مهمتكم..
طوبى:اكيد بس بروحنا مانديروا شي..شوفي سموحتي انتي لازم تراجعي عند دكتورة نفسيه..
عقدت سدرة حواجبها..
طوبى باست يدها بعدين قالت..
/فقدان الذاكرة بكل انواعه يبي هكي مش كل شي تقدري تتفكريه هني لازم يكون في حاجه تساعدك..
سدرة بضيق..
/الادويه النفسيه تعبتني هلبه ياطوبى..
شدت يدها التانيه وقعدت تحضن في ايدين اختها بحنان وهي تقول..
/من غير ادويه ياسدرة هدرزة عاديه وخلاص..
سدرة ضيقت عيونها وهي تقول..
/شكلك مدورة ورا الموضوع !؟
طوبى بحب:اللي يخصك يعنيني انت اهم حد في حياتي ياسدرة من بعد جنوني طبعا..
ضحكت سدرة من بين دموعها وهي تقول..
/جرنونه..
ضحكت طوبى بعدين قالت..
/هاه شن قلتي!؟
تنهدت وقالت:تمام تو نقول لمختار..
طوبى:قريب تاخدي اذن مختار قبل تخشي الحمام..
شافتلها بإستغراب وعدم تقبل وهي تقول..
/شن اللي تقولي فيه هدا!؟
شدت ع ايدين اختها وهي تقول..
/اني نعرف دكتورة نفسيه ممتازة حكيتلها عن حالتك وقالت امتى ماتبوا تعالوا..خل ندريلك الحاجه هادي ع الاقل نبي نحس اني ساعدتك..مش كل شي مختار مختار..هالمختار اللي خداك منا بكل..
سدرة بضحكه:غرتي يارتيله..
طوبى وهي عاقده حواجبها بغيره مصطنعه..
/ايه وهلبه..حسيتك وليتي بعيده علينا وقريبه عليه هو..
🍃كانت تحاول تلعب ع الاوتار الحساسه عند اختها اول شي قوة شخصيتها واستقلاليتها اللي تخليها ترفض تكون تبع لغير كبارها"جدها وبوها" وتاني شي حبها لعيلتها 🍃
قرصت سدرة خدها وقالت..
/طلعي من دماغك هالافكار الهبله مافي حد يقدر ياخد مكان حد عندي انتي بالذات..خلاص ياستي امتى تبي نمشولها الدكتورة هادي..
طوبى:امتى تبي انتي وتحسي روحك مستعده..
سدرة:في اي وقت مستعده..
طوبى بإبتسامه:صقرة..
ضحكت سدرة بس فيسع تلاشت ضحكتها لما سمعت طوبى تقول..
"ماتخبريش مختار"
سدرة بإستغراب:علاش!؟
طوبى:اكيد تو بيكلف نفسه ويدفع حق الجلسات واني مانبي حد غيري يتكفل بيهم بعدين مش كل شي لازم يعرفه نبي نولوا زي ايام زمان تكون في بينا اسرار مافي حد يعرفها..
مااقنعش سدرة كلامها لكن سايرتها وهي تقول بإبتسامه..
/باهي يقعد سر مايطلع لحد..
ابتسمت طوبى بحب وهي تشوفلها..
سدرة:نحس فيك مش متقبله مختار..
عقدت حواجبها وقالت..
/مش هكي بس يعني مازال مانعرفاش كويس..
سدرة:انتي قبل كنتي تتمني مرواحه..
طوبى:عادي يعني مش لدرجة التمني..
غيرت سدرة نظرها عنها وهي تمرر فيه ع الجنان بعدين قالت..
/مش عارفه علاش حاسه في شي تاني مدرقينه عليا
طوبى اللي كانت دير في روحها عاديه..
/مافيش غير اللي عرفتيه صدقيني..
شافتلها وقالت..
/حاول يجيكم ؟
طوبى غيرت نظرها عنها وشافت لمكان الكرسي اللي توفى عليه بوها وهي تقول..
/حاول بس بوي ماقبلاش مع الاسف..
نزلوا دموع سدرة وهي تقول..
/كله مني..
غيرت نظرها ليها وهي تشد ع ايديها بقوة وتقول..
/معاش تحملي نفسك ذنب حد..كل حد يتحمل نتيجة افعاله اني شايفه ان مافي حد انظلم قدك انتي..
شافت سدرة لطوبى بنظرة حزن غريبه خلتها تحس بشي غريب لما شافتها..
خافت طوبى لو تسألها سدرة مرة تانيه عن قصتها مع الجالي لذلك فكرت تغير السيرة لما قالت..
/ايه حقه امتى نمشوا نشوفوا خطيبه يوسف..
مسحت سدرة دموعها وهي تقول..
/حددنا معاهم موعد الخميس الجاي..
طوبى بإبتسامه فضول..
/زيدي احكيلي عنها....
سدرة تنهدت وبدت تحكي عن جهينه وطوبى تسمع وهي فعلا متشوقه تشوفها..
🍃وفي دار المعيشه..
كانت فايزة تشوف في صورتها في تليفون اميمه..
/حلوة وناعمه وطالعه ع يوسف هلبه..
صفيه بإبتسامه؛والله فرحانه من قلبي اللي وحده زيها بتولي كنتي..هي وعيلتها ناس اكابريه محترمين متواضعين ماعندهمش في النفخه الكذابه..
مطيره:غير امتى يجي نهار الخميس بش نشوفها ع الطبيعه ونشوف كان كلامكم حق ولامبالغه ماهو مش من الصورة ومن كلامكم عنها بنصدق انها كويسه لهالدرجة..
اميمه شافت لعمتها كيف تتكلم فهمت انها ترمي في الكلام غيرت نظرها للهاديه اللي كانت تلاعب في الصغار وكأنها مش منتبهه لحديثهم..
بينما صفيه اللي فهمت ع مطيره قالت..
/ان شاء الله تطلع خير من كلامنا عليها..
مطيره وهي تخدم في الشاهي..
/ان شاء الله..
فايزة كانت تبي تغير الموضوع قالت..
/ايه حقه هديكا خديجه رمت..
مطيره:ان شاء الله معاد تولي..
اميمه لما سمعت الخبر جت بين عيونها ذكرى مؤلمه خلت صدرها يضيق وعيونها يغرقوا بالدموع..
صفيه بتشفي:ياداير يالاقي ومنها للأحرف ان شاء الله..
غرفه بغل وحقد:ايه والله...
🍃وخديجه اللي ماخلت حد في الدنيا يدعيلها بالخير غير امها روحت من العياده لشقتها لقتها اهل زوجها يراجو فيها..
عزوزتها وحماتها وسلفاتها كلهم ماعدا صفاء اللي مابوش يجبروها راجلها وعزوزتها ع زيارتها..
ماكانش عند خديجه من اهلها غير امها وهالشي خلا اهل راجلها يستغربوا غياب نسرين..
🍃قعدوا عندها لقبيل المغرب بعدين نزلوا لوطا وماقعدش معاها منهم غير سلفتها ابتسام..
ابتسام؛ديما نقولك ماتعطي لحد فرصة يتشمت فيك لكن انتي سكرتي راسك ع اللي فيه..
مغليه بحمق:اللي يتشمت تولي عليه شماتته ان شاء الله
خديجه بلامبالاة:اخر همي ولا يعنولي في حاجه..
تنهدت ابتسام وقالت:انتي وراحتك..خدت شنطة ولدها وناضت وهي تقول..ان شاء الله ربي يعوضك خير..
خديجه؛صحيتي ابتسام..
ابتسام؛ماعنديش فيه جميل..بالسلامه..
ومشت بتطلع ومغليه وراها تسقد فيها..شويه وولت لبنتها قعمزت جنبها وهي تقول..
/مش ساهله بكل ابتسام هادي..
خديجه؛اني مامحافظه ع علاقتي بيها الا بش ناخد اخبارهم..تنهدت وقالت..راما وين تيم حداها؟
مغليه:ايه رقداته حداها..
خديجة بإنزعاج؛حتى هي موليه دراه كبد خزنت في الدار وخلتهم يعولوا ياما بيقولوا توا من قبل مش سالكه من لساناتهم..
مغليه:لا كلا راما لازم تقنطيلها باديه تبور ردي بالك..
خديجة؛غير نشد صحتي بس..
🍃في هالأثناء..
نزلت ابتسام بولدها وتوجهت لباب الكوجينه الخارجي شافت راجلها واقف ع سلفها محي الدين يهدرزوا..
وصلت فيهم وقالت..
/السلام عليكم..
ردوا عليها الزوز..
/وعليكم السلام..بعدين محي الدين قال..
/قاعده عندها امها؟
ابتسام؛شدتها تبات..
محي الدين بإنزعاج:إياااح..
عبد الفتاح بضحكه..
/وليت معاش طايقهم بكل..
محي الدين؛خليها في سرك..
ابتسام؛معليشي بيناتكم صغار مش باهي اللي ديروا فيه قدامهم..بعدين خديجه صح لسانها طويل شويه لكن مراة كويسه..
محي الدين ابتسم بتهكم وقال..
/انتي اللي طيبه يامرت خوي..
ضحكت وقالت..
/ربي يهدي سركم..غيرت نظرها لراجلها وقالت
/تبي حاجه عبدو؟
عبد الفتاح:لامانبي شي خشي بسرعه صقع ع الولد
هي قالت:حاضر..ومشت بإتجاه الباب..
بعد ماخشت محي الدين قال..
/من يومك محظوظ بدل الوحده زوز خير من بعض غير شي يريحك يديروه..
عبد الفتاح بضحكه..
/ديرها حتى انت..
محي الدين بفجعه مصطنعه..
/لا اعوذ بالله حظي ونعرفه حتجيني احرف من الاولى..
وعبد الفتاح يسمع فيه ويضحك..
🍃لكن المهدي بعد ماروح من صلاة المغرب قعد في شقته اللي كانت فاضيه ومظلمه..
محمد ولده في القهوة..ويزن في حوش جده يقري في محمد ولد نسرين..وسدرة معاهم لكن حدا سميرة يكتبوا في واجباتهم هي وجوري..
🍃وسط الظلام والوحدة والجو البارد..
كان غارق في سيل افكاره اللي مش قادر يطلع منه..
في قلبه التعبان ألم كبير وحزن اكبر...الحزن اللي حس انه حيكمل حياته وهو عايش فيه ومتعايش معاه..
فجأه تبدد هالظلام شويه لما انفتح الضي المخفي...
اللي فتحه قربله وقعمز جنبه وقاله..
/زعيم خيرك قاعد بروحك هني!؟
ابتسم وشافله وهو يقول
/امتى خشيت ماحسيتش بيك..
محمد:واضح..كنت سارح..بوي شن في من امس واني حاسك مش مزبوط..احكيلي فضفض..حني صحاب ولا؟
مسح المهدي بيده ع شعر ولده وقال..
/نفكر في مستقبلك..
خد محمد يد بوه وشدها وهو يقول..
/معاش صغير نعرف نتصرف وبإذن الله اموري كلها حتمشي تمام..بس قصة السفر نبيكم تنسوها مستحيل نخليكم..
المهدي:يعني بضيع مستقبلك ع خاطرنا!؟
محمد:ماليش مستقبل بعيد عليكم..وبعدين يابوي اني ولدك الكبير مفروض نقعد معاك ونعاونك مش نخليك..
المهدي بضحكه..
/الله يبارك..الله يبارك..غمز بعينه وقال..شن رايك نزوجك..
ضحك محمد بإحراج وقال..
/خل نفوت العشرين وبعدين يصير خير..
ضربه ع ذراعه وقال..
/مش مستعجل!
محمد نزل عيونه حرجا من بوه وهو يضحك..
نكشله شعره بعدين قال..
/ننزلوا لوطا؟
رفع عيونه فيه وقال..
/اللي يريحك..
ناض المهدي وهو ناض معاه..
المهدي:من في لوطا؟
محمد؛عمي عمر بس..
هز المهدي راسه وسبق ولده ومحمد لحقه وهو داس في قلبه قلق كبير عليه..
🍃وفي جنان الحوش القدامي..
كانوا عمر وسميره مقعمزين حوالين الطاوله يحكوا عن موضوع يخص عمر..
عمر بضيق:ياخالتي ملخبط شويه مش قادر ناخد قرار..
سميرة:انت كان تتخطا اللي فات تقدر تعيش حياتك طبيعي..
هز راسه وقال:مزبوط..
سميره؛اهم شي ماتفكرش دير حاجه رسميه لين تكون واثق منها وعارف شن تبي ماتزيدهاش عليك ياولدي..
عمر وهو يهز في راسه موافقة لكلامها..
/ان شاء الله..
ع جية المهدي ومحمد شاركوهم الجلسه وهدرزوا شويه بعدين ناضوا عمر ومحمد خشوا داخل بش يتفرجوا ع مباراة كرة قدم..
وقعد المهدي مع سميره..
ربعت سميره ايديها وقالت..
/قولي اللي عندك..
تنهد بضيق وقال..
/خالتي نبي منك خدمه مايقدر عليها حد غيرك..
سميرة بإبتسامه؛شن هي؟
بشي من الألم قال..
/نبيك توصلي امانه..
تبدلت ملامح وجهها للإستغراب وهي تقول..
/امانه؟!
المهدي هز راسه ايجابا وقال..
/بتمشي يوم الاحد للعزومه..
سميره؛بإذن الله..
المهدي؛خلاص يوم الاحد نعطيهالك توصليها لصاحبتها..
سميرة:سدرة؟!..
🍃سماع اسمها يدير فيه الهوايل لليوم..لهاللحظه مش قادر يفكر يتخطى ولاينسى..المصيبه ان هالحب كل مايفقد منه الامل يزيد يكبر في داخله..🍃
عقد حواجبه وقال:ايه..ناض وكمل يقول..تمام؟
سميرة اللي لاحظت نظرة الحزن في عيونه قالت..
/تمام..
ومشي خش داخل بسرعه..
سميرة بأسف:ياناري عليكم وع حظكم..ماهو كان امكم مراة باهيه راهو مش هدا حالكم..وناضت حتى هي خشت للحوش...
🍃🍃🍃🍃🍃
تاني يوم...
السبت..
9نوفمبر...سنة 2019...
مع الساعه عشرة صباحا كانوا سدرة وطوبى مجهزات لنفسهم بش يطلعوا..
طوبى عندها مشاوير بتقضيهم يخصوا العزومه بعدين بتمشي للمدرسه..اما سدرة كانت مع يوسف تراجي في الاقجم وفاتن اللي بيرفعوهم لمركز العلاج الطبيعي..
🍃كانت سدرة مقعمزه جنب يوسف في الجنان وهي تتفرج ع طوبى كيف تكلم في عمتها ع الحاجات اللي تبيهم منها بعدين طوبى وصتها تمشي للمحل..
مشت مطيره خشت وطوبى ركبت السيارة..شافت لسدرة ابتسمت وبعتتلها قبله..وسدرة ردتها..
ويوسف حداها لاهي بالماسنجر يهدرز ع خطيبته..
انفتح الباب السحاب وطلعت طوبى بالسيارة وعيون سدرة معاها..
🍃وقفت بالسيارة لما شافت سيارة مختار جايه..
في السيارة..
فاتن؛هادي طوبى..
الاقجم بإبتسامه؛اخت المعلم الصغيره؟
فاتن بإبتسامه:ايه..
نزل الاقجم المرش وقال بإبتسامه عريضه...
/صباح الخير بنت سيدي..
وترد عليه طوبى بنظرة حاده فيها شي من الازدراء من فوق لتحت وتحركت طول من السيارة وفاتت من حداهم وهي تحرق في العجل..
الاقجم بصدمه..
/يالطيف!
فاتن بضحكه:ماتشوفش فيها شن لابسه!؟
الاقجم بإحراج:الحق ماركزتش ان شاء الله ماتشكيش للمعلم..
فاتن بضحكة:ماديرهاش..
ع طلعت يوسف وسدره..
الاقجم بإبتسامه:اهي جت الزعيمه..
ضحكت فاتن..
انفتح الباب السحاب..ركب يوسف سدرة جنب فاتن بعدين هو ركب جنب الاقجم اللي تحرك بيهم طول..
الاقجم؛هاه شن جو ليبيا؟
سدرة بإبتسامه؛مافيش خير منه بحروبها ببلاها...
ابتسموا يوسف وفاتن..
والاقجم:صدقتي يابنت سيدي..وشغل منظومه السيارة ع اغنيه ليبيه وطنيه..
🍃🍃🍃🍃🍃
وقضت طوبى مشاويرها اللي تخص عزومه غدوة بعدين توجهت للمدرسه ماكانتش ناويه طول نص ساعه بس تشوف فيهم الوضع وتروح..
🌼خشت للمدرسه لقت الساحة فاضيه..توجهت لداخل المبنى وين خشتله قابلوها ناس من النازحين نساوين ورجاله..
سلموا عليها النساوين بالكلام وهي ترد عليهم وابتسامتها ع وجهها..
الوضع كان كويس والفريق التطوعي المسؤول ع النازحين كانوا دايرين واجبهم..
وقفت لما قابلتها وحده من الابلات اللي كانت تخدم في المدرسه وهي من سكان المنطقه حبت تشارك معاها في عمل الخير اسمها"شروق"..
شروق بإبتسامه؛صباح الخير..
طوبى بإبتسامه؛صباح النور..شن جو الامور تمام..
هي بإبتسامه؛فوق التمام تعالي معاي شوفي..
مشت وطوبى لحقتها وهي مستغربه قالت..
/شن في!؟
الابله بنبرة حماس..
/تو تشوفي بروحك..
وقعدوا يمشوا لين وصلوا في الدروج ركبوا مع بعض..
هني قلب طوبى دقاته تسارعت..ووجهها الجميل ع سبله غير يحس بيه يحمر خجلا وكأنها شافاته قدامها..
قعدت تتسائل في نفسها..
"زعمه دار كل شي بروحه!؟"..
وصلوا فوق..
وقعدوا يمشوا وطوبى كانت تبي توصل بسرعه..
تمشي وماتشوف في شي غير في باب الحجرة متاع المدرسات سابقا..
واخيرا وصلوا فيها..وقفوا قدامها..
وتشوف طوبى ماابهر قلبها قبل عيونها..
الحجرة ولت حلوة بالمرة..بالزينه اللي فيها بالديكور البسيط بالالعاب بالبالونات اللي بمختلف الالوان الزاهيه والحلوة.
والاحلى من هدا كله فرحة الصغار وضحكاتهم وهما عايشين وسط جو كانوا محتاجينه هلبه..
والاحلى من الاحلى..
هو..هو اللي كان مقعمز وسط مجموعه شاد محمود لوحات صغار يكتب عليهم...
كان كعادته انيق وجذاب للغايه..بس هالمرة كان لابس قميص ابيض خلاها تشوفه بشكل احلى مليون مرة...
🌼عبد القيوم:وانتي ياسمحه شن اسمك؟
:هبة الله..
بإبتسامه قاللها:سمح كيف لون عيونك..
شاف للوحه وبدي يكتب في اسمها والصغار منسجمين معاه..
ابله شروق شافت طوبى لقتها مبتسمه ابتسامه حلوة بالمرة ووجهها محمر اللون..
عقدت حواجبها بإستغراب وهي مبتسمه بعدين قال..
"استاذ عبد القيوم"
رفع عيونه وجو في عيونها..قلبه فر فران..
لكن هي نزلت عيونها وكانت خجلانه ع الآخر..
ابتسم وقال:اهلا ابله طوبى..
☘اسمها لما ينطقه ياخد فيها لعالم تاني..اسمها يطلع منه بطريقه حلوة بالمرة..مع نبرة صوته خشنة الرخيمه اللي كلها رجوله...
وياه ع قلبها اللي عمره ماتحرك لغيره شن قاعد يصير فيه☘
رجعت لعالمنا ع ارض الواقع لما جتها بنيه تجري وهي تقول..
/شوفي بيبو كيف كتب اسم..
ابتسمت وهي تشوف لإسم البنوته المكتوب بخطه..
البنيه قالت؛حلو ولا؟
طوبى بإبتسامه؛ايه حلو..
هو حاول ع قد مايقدر يكتم تنهيدته... قامت عيونها ومررتهم ع المكان وهي تقول..
/انشغلت الفترة اللي فاتت وماقدرت ندير شي..ثبتت نظرها ع البالونات وقالت..اسفه..
عبد القيوم بإبتسامه؛عارف سببك معذورة..
ابله شروق:شوفي ابله الحيط هداكا فاضي خلاه ليك انتي بش ترسمي عليه..
غيرت نظرها ليه بعد ماكانت تشوف للحيط..
لقاته يشوفلها بإبتسامه..
بسرعه ردت نظرها للحيط وقالت..
/تمام..في ميزان حسناتك ان شاء الله..
هو قال بإبتسامه:اجمعين..
وحده من البنات:ارسمي عليه توا ترا..
وحده تانيه قالت..
/حني نقولولك حاجات وانتي ترسميهم زي ماكنتي ديري قبل ع الكراسه..
هي حست بالخجل والاحراج كيف بترسم وهو موجود!..
وهو مش قادر يغير عيونه عنها غصب عنه مش قادر..
ابله شروق خشت وجابتلها ادوات بسيطه بش ترسم بيهم وقالت..
/هيا خودي بخاطرهم..
طوبى بالغصب قبلت خشت داخل وهي ماشيه للحيط..
البنات الصغار تبعوها وقعدوا الولاد جنب عبد القيوم وهما يتفرجوا..
وقفت ع الحيط وخدت نفس..شافت للأدوات اللي عند الابله خدت قلم خطاط..وقالت..
/شن تبوني نرسم؟
تداخلت اصواتهم وهما يقولوا في طلباتهم..
"وردة..فراشه..قطوسه..فيوكه"
ضحك عبد القيوم..
وهي قالت بضحكه..
/باهي باهي وحده وحده...خل نبدوا بالفراشه..
هو قلبه زادت تسارعت دقاته وين جت بين عيونه هديته لجنة..
وقعد هايم معاها وهي ترسم ع الحيط..
وعيون الصغار معاها ونظراتهم كلها شغف..
لما بدت ترسم نست هي وين وقعدت هايمه في عالم الرسم اللي كانت يعزل فيها عن كل اللي حواليها...
وهو معزول عن العالم بهيامه فيها..
🌼لاكانت تلبس في لبس ملفت ولاحاطه عطر ولازينه..
جلابيه واسعه خريفيه انيقه لونها بني وشاربه كبيره لونها كريمي..ساترة بيهم جمالها..
حتى ايديها مغطيات بقفازات لونهم اسود..
التفاصيل هادي تزيد في التارقي حب ع حبه ليها تزيد تغرق فيه فيها اكثر واكثر..من لما عرفها شاف فيها الحشمه والستر صح عيونها هما اللي سلبوا عقله..لكن اللي خدي قلبه هو شخصيتها واخلاقها العاليه وصفاء روحها🌼
استاقظ لما سمع البنات قالوا بصوت واحد..
"محلاها!"
ركز ع الرسمه ابتسم من قلبه..غير نظره ليها لما سمعها قالت..
/وتوا الورده..
هي نست وجوده لأن شغفها بالرسم سيطر ع كل حواسها..
قعدت تتصرف ع طبيعتها وهو رايح فيها...
🌼ومن طلب لطلب وسط لهفة الاطفال وشغفهم ولت طفله زيهم كيف تكلم فيهم وكيف تضحك معاهم..
رجعاته 12سنه للخلف لهديكا الطفله اللطيفه اللي كلها حيويه وبراءة..
يااه لو يقدر يفكرها بهداكا اليوم..لو يقدر يخليها تتفكره هو وتعرف انها حبه اللي صال وجال شرق البلاد وغربها بش يلقاه ويكمل باقي العمر عايش فيه...
عقد حواجبه بضيق لما سمعها قالت..
"هادي اخر وحده بنروح خلاص"
رسمت اخر رسمه وبعد كملتها قالت..
/وهادي النجمه يانجمه..مدت للأبله القلم وقالت..مرة تانيه نفضي روحي ونقعد معاكم هلبه باهي!؟
هما باصوات متقطعه قالوا..
"باهي" وفي اللي هزت راسها بس..
ابتسمتلهم وغيرت نظرها ليه..لقاته لاهي بلوحه يكتب عليها.سريعا شافت للأبله وقالت..
/بنروح خلاص..
ومشوا مع بعض وطوبى تقول..
/السلام عليكم..وطلعت مع ابله شروق...
طوبى بإبتسامه:والله حسيت روحي رجعتلي وين روحت هادي امي واختي حليت عيوني فيها وبعد كنت نحساب روحي بنفقدها ربي ردها ليا..الحمد لله ماخابش فيه رجاء .
شروق بإبتسامه؛ربي يحفظهالك ومايحرمكم من بعض..
شويه وجاهم وليد يجري وهو يقول..
/ابله طوبى ياابله..
وقفوا الزوز..
وهو وقف قدامها ومدلها لوحه صغيره وقال..
/خودي..
خدتها طوبى وقلبها طاير وسط ضلوعها..
شافت المكتوب عليها ابتسمت ابتسامه خفيفه..
شروق وهي مبتسمه..
/اسم بنتك..
طوبى؛ايه..شافت للولد وقالت..قوله شكرا..
ومشت بسرعه والابله معاها...
والولد مشي يجري للحجره خشلها ووقف قدامه وهو داهش قال..
/قالتلي..قوله..شكرا..
ضحك وقال:تمام..هيا تعال شوف كيف نكتب اسم جدتك..
ومشي الولد قعمز جنبه..
وهو يكتب في الاسم وع وجهه ابتسامه حب وعيونه مليانات شوق لشوفتها مرة تانيه..وشوق للوصل الحلال اللي يراجي امتى يصير بفارغ الصبر..
🍃وراجيت والمرجى كمل🍃
🍃🍃🍃🍃🍃🍃
الساعه 3:00بعد الظهر..
مقعمزين ع طاولتهم ويتغدوا..هي تحكي وهو يسمع فيها..
فاتن بضحكه؛قاللها صباح الخير بنت سيدي عطاته شبحة ناريه من فوق لتحت ومشت بالسيارة وهي تحرق فالعجل..
ابتسم مختار وهو ياكل..
فاتن بإبتسامه..
/اختك هادي مميزة هلبه في نظري اميز وحده في خواتك ع قد ماتبان لطيفه وطيوبه وهاديه وين تقلب ع الوجه تاني تولي انسانه تانيه حتى ملامحها تتغير تولي قويه وجبارة ومرات تخوف..سبحان الله الشبه بينك وبينها رهيب..
وقف ماكله وقام عيونه فيها..
فاتن:تشبهك هلبه انت وجهك حلو ولطيف ومرات تبان هادي وحنون بس وين تغير الموجه تولي وحش..
ابتسم وقال:باهي ياجميلة الوحش تغدي وخليني نعرف نتغدا..
ضحكت وكملت غداها وهي تسرقله في النظر...
وهو رجع ياكل وعقله اجباري قعد يفكر في كلامها وحس روحه وقتها متوتر ومش عارف السبب!
🍃🍃🍃🍃🍃
في مصحة القدس..
كانوا هناء واميمه جايات من الكافتيريا وهما يحكوا عن امور ليها علاقه بشغلهم..
اميمه قاعده تستفيد من خبرة هناء..وهناء كانت طبيبه راقيه بأخلاقها وعقليتها مابخلتش ع اميمه بأي معلومه تعرفها..حتى انها عطتها الدعم والتشجيع..
🍃قليل في وقتنا هدا مايكون في اطباء زي هناء..مجتمع الاطباء جدا سيء..حروب ومكائد..وفي هلبه اطباء شباب اختاروا يطلعوا برا البلاد بش قدروا يحققوا احلامهم واللي ماكانتش عنده قدرة قعد يقاوم ع قد مايقدر..وفي منهم استسلم وطموحه مات🍃...
..وصلوا لأخر الممر ولما جو بيخشوا للممر تاني وقفوا في مكانهم وين شافوا الدكتور خالد واقف مع اطباء وطبيبات يسلموا عليه ومنهم اياد...
☘خالد كان موجود في مستشفى ميداني يقوم بواجبه كطبيب..وغالبا الاطباء يفقدوا في ارواحهم وهما يديروا في واجبهم وقت الحروب..خالد تعرض لإصابه كاد يفقد حياته بسببها لكن مازال اجله ماجاش..طلعوه اهله برا البلاد وتم انقاذه بفضل الله..ولأن خالد عنده حميه وغيريه ماقدرش يغيب عن بلاده لما تماثل للشفاء لهذا روح بش يكمل باقي مهمته وواجبه في هالظروف الصعبه...
وقع اللي صارله ع هناء كان قوي هلبه انهارت وصار فيها الويل ومارجعتش عاشت حياتها مرة تانيه زي قبل الا بعد ماتأكدت انها نجي من الموت..☘
اميمه ابتسمت بفرح ومشتله طول وهناء قعدت في مكانها تشوفله من بعيد وهي مبتسمه من قلبها ودموعها في عيونها..
🌼اميمه بإبتسامه وعيونها مليانات دموع..
/حمد لله ع السلامه دكتور..
خالد بإبتسامه:الجراحه الكبيره اميمه الواعر..
ضحكت من بين دموعها وهي تقول..
/كيف حالك توا؟
هز راسه وقال؛الحمد لله..الحمد لله مازال في العمر بقيه..
اميمه:الحمد لله..
طبيبه تانيه قالت..
/كان نعرف شن رجعك يادكتور بس..
خالد:رجعتني الخدمه يادكتورة..
طبيب تاني قال..
/مازال مش متعافي تماما دكتور ماتجازفش وتولي للجبهه..
خالد هز راسه وقال..
/فعلا مجازفه مانقدرش نديرها لان مرات نكون عبء عليهم هما يبوا اطباء بصحة كويسه..
اميمه:لكن تقدر تحارب في جبهة تانيه..
وجهوا انظارهم ليها بإبتسامه ماعدا خالد اللي استغرب وهو يقول..
/جبهة شني!؟
ابتسمت وقالت..
/بنت عمي عندها مبنى كانت دايراته مدرسه خاصه سكرتها قبل الحرب لظروف معينه وتوا فتحتها للنازحين..فادرت مبادرة اني ومجموعه من الزملاء بش نساعدوهم في مجالنا فكرنا نفتحوا مستوصف صغير غادي وفي نفس الوقت استعنت بأطباء اصحاب الخبرة لعلاج الحالات الصعبه وطبعا كله تطوع دكتور..حتفرحنا هلبه لو وليت معانا..
بإبتسامه قال؛معاكم من توا..
ضحكت اميمه بفرح وواحد من زملائها كان يشوفلها بإعجاب شديد وحسرة وهو يقول في نفسه..
"الله لاتربجه جدك الاحرف"
في نفس اللحظه غير خالد نظره عنها جي ع هناء اللي كانت واقفه تشوفله من بعيد..رفع يده حياها هي ردتهاله وغيرت نظرها عنه وهو تنهد بضيق..
من جهة تانيه جي اسامه اللي كان كيف بادي دوامه في المصحه..
شاف اميمه واقفه ع خالد ومجموعه الاطباء اللي معاهم ابتسم من قلبه بعدين كمل طريقه بدوم ماتشوفه...
🍃🍃🍃🍃🍃
طلعت بالبخارة من الكوجينه بش تبخر الحوش شافت اريج طالعه من الصاله قالتلها..
طوبى:بالله روجه شوفي جنونه كان ناضت..
اريج؛باهي..ومشت للدار..فتحت الباب وخشت..
بدت ع وجهها ملامح الصدمه وهي تقول..
/شن دايرة ياجرانه!
كانت جنه واخده شنطة امها فاتحتها ومطلعه منها كل شي وحاطه ع رجليها لوحه وتخبط عليها وهي تغني في كلام مش مفهوم..
اريج وهي تقلد فيها..
/اه ياليل يالالا..
قلدتها جنه ضحكت اريج من قلبها قدمت وقفت عليها شافت اللوحه كويس بدت ع وجهها ملامح المفاجأه طبست خدتها وخلت جنه تعيط ع طول حسها..
خشت طوبى بالبخاره وهي تقول..
/خيرها!..شهقت لما شافتها شن دايرة وقالت..كيف نزلتيها من ع السرير يامشاغبه..
سكتت مرة وحده لما شافت اريج شاده اللوحه وتشوفلها بإبتسامه خبيثه وهي مضيقه عيونها..
ارتبكت وتوترت وقدمت خدتها منها وقالت..
/اسمعي ماتفهميش غلط...
اريج بضحكه؛وشن هو الغلط اللي فهمته!؟
طوبى بإنزعاج:خلاص عاد اريج اسكتي..مشت حطتها ع الزيانه وحطت البخارة جنبها..
بعدين جت لجنه رفعتها وهي تغنيلها بس تسكتها
اريج ابتسمت بحب ع حالتها اللي قاعدة تعيش فيها بداية الحب ديما نكرانه..
خلتها مع بنتها بس قبل لتطلع قالت..
/حلوة هلبه ع فكره..وطلعت وسكرت الباب..
وجهت طوبى نظرها للوحه تفكرت شكله وهو يكتب غلبتها الابتسامه وقلبها ينبض بقوة..
شافت لجنه لما ع خبطت ع خدها وهي تقول..
"ماما"..اشرت ع اللوحه وهي تقول.."ابيها" نبيها...
ضحكت امها ومشت بيها للزيانه خدت اللوحه وقعمزت ع السرير وجنه في حجرها عطتها اللوحه وجنه ولت دربك عليها وتغني وامها تضحك وتبوس فيها ع راسها..
🍃وغرفه في دار المعيشه تعاني من حالة الغيره اللي جت لولادها من اختهم خلوها ترقدهم حداها واختهم خدتها سدرة تعاني فيها..
غرفه بإستياء..
/ياكبدي هييه كيف بندير معاهم هادم..
سدرة بضحكه:طالعين لأمهم في النغره..
ضحكوا مطيره واريج..
وغرفه قعدت تضحك بإنزعاج وهي تمرر في نظرها ع ولادها اللي راقدين وهما شادين فيها...
🍃🍃🍃🍃
ويمر باقي اليوم وهما يتكلموا عن العزومه واللي بيديروا فيها وسدرة اغلب الوقت مكتفيه بالإنصات تمرر في نظرها عليهم بحب وفي داخلها فرح كبير بالمكانه اللي عندها في قلوبهم بس عيونها وين كانوا يجوا ع حد منهم كانت تحس بوجع كبير...
🍃عدت عليها الليله وهي سهرانه وتفكر..كل اللي مرت بيه في حياتها ماعدا الجزء اللي ناسياته قاعد يمر قدام عيونها وسادتها بللتها الدموع اللي ماوقفتش الا لما غلبها النوم...
🍀🍀🍀🍀🍀
ويطل اليوم اللي بعده..
وحوش الواعر حايس حوسة فرح..
وعروس هالفرح مقعمزة تتفرج عليهم كانت متمنيه لو تقدر دير شي وتعاون..
رجع تركيزها من جديد ع طوبى..كانت قايمه ع كل شي وبكل شي ماتوجهش فيهم اكثر ماتشارك فيهم في اتخاذ القرار..وهما كل شويه يسألوها عن حاجه..بدت تحدث نفسها وهي تقول..
"كنت ديما نخاف تكبري..كنت نبيك ديما تقعدي صغيره بش ماتعيشي شي من هموم وأوجاع الكبار..ياقداش كنت نخاف وين نشوفك قدام عيوني تكبري بسرعه حاولت نوقفك حاولت نخليك طفله لكن هالشي مستحيل..وهاك توا نشوف فيك كبرتي عشرين عام فوق عمرك بديت نحس فيك وليتي اكبر مني..ااه ياطوبى ااه..ياريت لو.."
سكتت حديثها مع نفسها..مسحت دموعها اللي نزلوا بدون مايحسوا بيها..خدت نفس ورجعت شغلت نفسها معاهم...
☘☘☘☘☘
بعد اذان المغرب..
توافدت الناس من الجيران والاحباب ع حوش الواعر..
داروا للرجاله خيمه كبيره قدام حوش طوبى..
والنساوين توزعوا بين الصاله والمربوعه الدخلانيه اللي كانت كبيره..
فهاليوم..
حضروا عيلة الفاندي رجاله ونساوين..
كان سلام النساوين ع سدرة حار وبالدموع لعند هاليوم قاعده في عيونهم كنتهم..
وحضروا..
عبير صاحبة طوبى..وابلة زينب ومعاها امها واختها..
زينب سلمت بحرارة ع سدرة وسدرة بادلتها نفس سلام سامعه شن دارت مع اختها ماخلاها ممتنه ليها هلبه..
والجيران ماغاب منهم حد ماعدا مغليه وبناويتها..
الرجاله حضرو كلهم حتى المهدي وولاده..
اياد حتى هو كان موجود وكان حاسب روحه من العيله عاد وخطيب صاحبة هاللمه..
هاللمه اللي حضروها اهل هاديه وع راسهم شكري وهو ناوي يفتح موضوع مطيره مع الحاج علي..
واخر الحضور حاليا كان مختار..
ايه مختار حضر وهو ضاغط ع اعصاب عبد الرؤوف..المحجوب..ولاد عمه..والجد علي اللي كان مش طايق يشوف لوجهه..
لكن العجيب انه تسيد اللمه..والناس كانوا يتوددوله نسوا ماضيه الاسود كله وماصدقوا شي من اللي سمعوه عنه بعدين..
كان حق! شن يدير هني!؟ لا مش هكي وبس اخته سدرة ومعروف موقف سدرة منه للشارع كله هو اللي تكفل بعلاجها وهي اللي رجعت دخلاته لحوش بوه مرة تانيه...
اي كان..حني ولاد اليوم والماضي نخلوه للماضي..
هادي كانت مبررات الناس اللي تقربت من مختار في هالليله قدام انفسهم
وزي ماقال ديستوفيسكي في رواية رسائل تحت الأرض رواية مختار المفضله..
" الناس يتسامحون معك تسامحاً مدهشاً بشرط أن تملك مالاً.!!"
المال يدير كل شي..
🍃بس عاد مختار في الليله هادي كلها كان مركز ع شخص واحد..
🍃"لا انت اليوم مش طبيعي بكل"
تنهد عبد القيوم من قلبه وقال بصوت منخفض..
/خاطر عليا نطلبها في هالمجمع ونحطهم في الامر الواقع..
ربيع:كان تبيها تقعد حلم مستحيل ديرها..
تنهد بضيق وغير نظره للحاج علي اللي كان يهدرز مع واحد من كبار الشارع..ومن الحاج علي شاف لحسين لقاه لاهي بالهدرزة مع عبد الرؤوف..غير نظره عنه وتجي عينه في عين مختار اللي ابتسمله..
هو يدوب ردها ولف وجهه لجهة تانيه..
ضيق مختار عيونه وهو يشوفله بإبتسامه..
🍃داخل..
في الكوجينه الخارجيه المسكره..
كانوا ورا بابها واقفات مطيره وطوبى وسميره..
مطيره:والله لاعرفتها ياسميره..
سميره:تعرفوا لتوا قاعده خايفه..
طوبى:ماتخافيش خليها هي اللي تخاف وخليك ديما محافظه ع البقرة واذكارك وخلي عمي محمد يحافظ عليهم حتى هو ..
سميرة:والله يابنتي مامخليه حاجه وهو ديما نذكر فيه..
مطيره:خلاص معاش تخممي معاش تقدر دير شي صدقيني..
تنهدت وقالت..
/الله يكفيني شرها ويجعل تدميرها في تدبيرها..
أمنوا ورا دعائها بعدين قالت مطيره..
/هي خلاص اطلعوا تو يفقدونا..
فتحت طوبى الباب خلتهم يطلعوا قبلها وهي طلعت وراهم وتوجهوا مع بعض لباب الكوجينه الداخلي وخشوا منه...
🍃🍃🍃🍃🍃
في الصاله..
خشت طوبى وقعمزت جنب اختها وعيون ام زينب عليها قالت..
/الله يبارك عليك زين وعليك سالف يضرب لوين..
اخت زينب؛زادت حلوت وتعبت..
زينب بإبتسامه:الله يبارك عليها..
ام زينب:خوك من قبل متخوخم بيها وكان يشوفها هكي شن يصير فيه..
ضحكوا بناتها..
كملت تقول بأسف..
/حكايه بنتها هادي واقفه في النص..
زينب بضيق:صح..
اختها قالت..
/لكن خوك يبي يدير المستحيل بش ياخدها
🍃وفي مكان تاني في الصاله..
إقبال:الله يبارك عليها..اسمعوا مفروض مانروحوش اليوم لين نكلموا سدرة عليها..
سعاد:المشكله في الغبارة طليقها..
تبره؛خوك ايمن قال نرقده في قبره كان جي جيهتها..
سعاد بضحكه:كان نعرف وين شايفها..
اقبال:في المدرسه ياختشه القوة اللي تحمي في المدرسه هو اللي باعتها..
سكتوا التلاته وهما يشوفوا لطوبى كيف تهدرز ع صاحبتها عبير وتضحك وجنه مقعمزه في حجرها...
🍃🍃🍃🍃🍃
عند الرجاله..
كان عبد القيوم يشوف لعدي اللي جي مؤخرا..
مقعمز بين المحجوب عبد الرؤوف يهدرزوا وحسين مشاركهم..
قلبه كان محروق بنار الغيره والعيون الزرقا تراقب فيه...
شويه ناض مكانه وقعد يمشي لين وصل فيه..
قعمز جنه وقال..
"لاباس ميغ"
شافله شويه بعدين رد عليه عبد القيوم بإيتسامه..
" اخمادغ مسينغ"
(دعائكم مع اهلنا في غ.زة 💔)
#حسابات_قديمه
#طوبى
....يتبع.....
