#طوبى "جنة طوبى"
#جمان_فريد
#الجزء_السادس_والتسعين"إنت عيدي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
قال ابن مسعود رضي الله عنه :
" ما كُرِب نبي من الأنبياء إلا استغاث بالتسبيح فأكثروا من التسبيح في الرخاء والشدة ".
الجواب الكافي للإمام ابن القيم رحمه الله ( 1 / 7 )
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "أراكَ شمسًا وأفلاكي تطوفُ بها
طافت بحُبِكَ يا دُنيايَ أقماري
واللهِ لستُ أرى إلّاكَ مُنفردًا
كالبدرِ مُكتملاً أشغلت أنظاري"
________________________________________
انتهت صلاة الفجر..
والمصلين بين اللي روح وبين اللي قعد للإعتكاف لوقت شروق الشمس ومنهم بلال النيجيري..ونضال..
بعد ماطلع المهدي مع ربيع وعبد الرؤوف..وطلعوا مترافقين عبد القيوم و الحاج علي كالعاده..
كانوا محمد المهدي هو وخوه وولد عمتهم مع عمر طالعين مع بعض وهما يهدرزوا..
ويوقفهم صوت اشرف وهو ينادي..
"محمد مهدي"
التفتوا شافوله..ومحمد كان مستغرب فيه..
اشرله يجيه..
محمد شاف لعمه وقال...
/اسبقوني تو نلحق..
عمر وهو يشوف لأشرف..
/شن في!؟
محمد؛تو نمشيله ونعرف منه.
عمر هز راسه وقال:هيا..
يزن شاف لأشرف بقلق..بعدين مشي مجبر ورا عمه..
ومحمد توجه لأشرف..
وصل فيه وقال:السلام عليكم..
اشرف:وعليكم السلام..تعالى معاي نمشوا غادي نبيك في موضوع..واشرله بنظره ع المكان..
محمد وافق ع مضض وهو يقول..
/باهي..
مشي اشرف ومحمد وراه لين وصلوا في للمكان المقصود..
محمد:تفضل..
تنهد اشرف وقال..
/اسمع يامحمد..اول شي حني جيران وبينا نسب وبوك وعمامك ليهم معزة وقدر كبير..تاني شي اني نشوف فيك قاعد صغير مانبيش نشد معاك هلبه باهي.. شاف لعيونه بنظرات حده وتحذير..بنت خوي فوتها..تمام!؟..مانبيش نقولك اكثر من هكي..وصدقني يامحمد لوشفت ولاسمعت بعد هكي شي ماعجبنيش حيكون ليا معاك تصرف تاني..
..ومحمد يسمع وهو مصموت..لسانه انعقد ماقدرش يرد عليه بكلمه... ماتوقعش توصل بعمته وبنتها لهني هكي عقله قاله..
وهي فعلا مالهاش تفسير تاني..
كانت ملامح وجهه اشبه بملامح البلاهه وهو يشوف لأشرف..
ويختفي اشرف من قدام عيونه وهو قاعد ع حاله..
جامد من صدمته..
مااستاقظش الا لما سمع صوت منبه سياره..
التفت..وشاف اشرف بعيد هلبه...بلع ريقه..حط ايديه في جيوب سوريته العربيه..ومشي..
قعد يمشي ويمشي..ويسمع في كلام اشرف اللي قاعد يتردد ع مسامعه..
بدي يحس بشعور القهر يتسلل لقلبه لما سأل نفسه..
علاش مارديتش!؟..علاش مادافعتش عن نفسي!؟
وقعد يسأل في نفسه بقهر..لعند مالقي روحه قدام باب حوش جده اللي كان مردود...
التفت وشاف لشباك شقة فايزة..
جي بين عيونه موقف مروة لما جاته بتوضحله قصة الفضيحه اللي صارت معاها..وهو وقتها رفض حتى يشوفلها..
رد نظره للباب وهو مضايق ومقهور..دفه وخش..بعدين سكره وراه..
🍃🍃🍃
وداخل.
خوه كان مقعمز في الدروج اللي يرفعوا لشقتهم..يراجي فيه..
سمع صوت الباب..شاف للجهة اللي بيجي منها..
شويه وبان عليه محمد..ناض ونزل من الدروج وقدمله..
وقف عليه وقال..
/في شن كان يبيك!؟
محمد بضيق شديد..
/اليوم هدا عمري ماننساه.
شد يزن ذراعه بقوة وقال..
/ع خاطر الفرخه راما ولا!؟
محمد؛ماتجرحش صيامك في جرتها..حاوط خوه من كتافه وقال..تونحكيلك بعدين توا نبي نرقد بس..
سكت يزن وهو معصب ومغلول..وبدي يحس اتجاه راما بنت عمته بكره شديد مايقلش عن كرهه لأمها...
🍀🍀🍀🍀🍀
●●بعد مرور يومين●●
..الخميس..
30مايو...سنة2019..
اليوم الخامس والعشرين من شهر رمضان المبارك..
الساعه 10:30 صباحا.
في مطار زيوريخ السويسري..
كانوا مختار وفاتن يودعوا في سدرة وصفيه بعد ماسمعوا نداء الرحلة..
🍃مختار:إن شاء الله تروحي من غادي وانتي في احسن حال..
سدره؛ياريتك مشيت معانا..
ابتسم وقال:للأسف..طبس عليها وطبع قبله ع راسها وقال..بنستاحشك..
هزت راسها وهي مبتسمه وطبطبت ع يده..
☘وبعيد عنهم شويه..
صفيه؛ردي بالك تزلقي قدامها ولاقدام المصريه في الدوة..
فاتن بضحكه:طمني بالك مايطلع مني شي..
صفيه بإمتنان:ربي يحفظك يابنتي طيبه ومحترمه وتستاهلي كل خير..
فاتن بإبتسامه؛تسلمي خالتي ربي يحفظك..
🍃سلموا ع بعض بحرارة..بعدين فاتن مشت سلمت ع سدره..
وين طبست عليها بتسلم بالخد شدتها سدره وقالت في وذنها..
/خليه يردك..
تفاجئت فاتن..بعدت عن سدره وهي تشوفلها بإبتسامه وملامح المفاجأه قاعده ع وجهها.
وسدرة تشوفلها وهي تهز براسها تأكيدا منها ع كلامها..
ويقرب يوسف منهم بعد ماكان مع مختار اللي وصاه عليهم ..
يوسف:امي واختي هادم مايوصيني عليهم حد..
سدره شافت لمختار اللي ابتسم وهو يقول..
/عارفك حريص عليهم..وصيت ليطمئن قلبي بس..
صفيه بإبتسامه ارتباك
/تسلم ولدي بارك الله فيك..
رد مختار بإبتسامه واسعه.. يوسف:هيا..
سدره حييت خوها وفاتن باليد..وبنظره عابره شافت اياد واقف بعيد يشوفلهم..رفع يده وحياها..وهي ردتها مجاملة..
وتحركت بعدها بكرسيها مع امها وخوها..
وعيون اللي ودعوهم معاهم..لين تباعدوا واختفوا عن انظارهم..
فاتن:ربي يشفيها ويعافيها..
فجأه سمعوا نداء رحله تانيه..
شافت فاتن لمختار وقالت..
/دورك توا..
ضحك وقال:الفيلا في أمانتك..
ضحكت وقالت:توصل بالسلامه..
مختار بإبتسامه..
/ Tschüss
هي ابتسمت وردت عليه..
Good Bye..
مشي وهو ويضحك..
وهي تبع فيه بعيونها وتفكر في كلام سدرة...
تنهدت..ورفعت يدها وشافت الساعه بعدين مشت بتطلع من المطار...
☘في هالوقت كانوا صابرين وأمينه مروحات للفيلا بطلب من مختار وحيقعدوا فيها طول فترة سفر سدرة مع فاتن بش يبدوا استعدادتهم لعرس رضا اللي مازال عليه شهر ونص..
🍃🍃🍃🍃🍃
وفي ارض الزهر والحنه..او الحرب..
تحديدا في دار المعيشه لحوش الصيد..
نجمه:الله غالب ماعنده مايدير لايقدر يأجر لوحده فيهم ويخلي التانيه ولايقدر يحطهم الزوز في مكان واحد..
عواطف؛مايقدرش ع الإيجار من أصله يام..
نجاح بضيق:في هلبه ناس ماتخافش ربي استغلت الوضع وزادت في الايجار اقل شقه توا تلقي ايجارها 800..
عواطف؛قولي استديو مش شقه الشقق إيجارهم ألف فما فوق..
نجمه بحسرة؛داره بيده وجاب الهم لروحه..
نجاح:الله غالب يام توا صار اللي صار..
تنهدت نجمه وقالت:الدار اللي بيقعدوا فيها ماناقصها شي؟
عواطف؛كل شي يحتاجوه فيها..
نجاح؛اهم شي يام نبعدوا عن المشاكل تحمليها ع خاطر ولدك..شوفيه كيف راح من الهم اللي راكبه ماتخليشي يزيد يسحن روحه ويركبه الضغط ولاالسكر لاقدر الله..
نجمه هزت راسه موافقه لكلام بنتها وهي مضايقه ع الآخر..
☘ومن جهة تانيه كانت سميرة مع صفاء الزوز يعولوا ع الفطور ويهدرزوا..
سميره همها كله راحة راجلها لاتبي تضغط عليه ولاتزيده على مابيه..تبي تكونله ديما السكن اللي يهربله ويرتاح من هم الدنيا فيه...
🍃وهو اللي كان في الطريق جايب ابتسام من حوش اهلها..
..عبد الفتاح بشي من الحده..
/شفتي شي ما عجبكش خشي لدارك وسكريها عليك لاتجيني تشكيلي ولاتقولي معاش نقدر نتحمل..اني هدا اللي عندي عجبك كان بيها ماعجبكش نردك من وين جبتك..
ابتسام بحمق؛ممكن نفهم علاش تكلم فيا بالاسلوب هدا وقالب عليا هالقلبه!؟
عبد الفتاح بإنزعاج..
/لاقالب عليك لاوحده ماتبديليش من توا بوجع الراس...
سكتت وهي معصبه..
وولدها وبنتها مقعمزين من الخلف يسمعوا فيهم بشي من االتوتر..
🍃🍃
ديما الصغار ضحايا العلاقات الزوجيه اللي يكون اساسها غير سليم..
زي صغار نجاة اللي من لما سافرت ماسألتش عليهم نهائي وع قد ماشافوا من اهتمام سميره ودلالها..قعد مأثر فيهم بعد امهم عنهم ونسيانها ليهم..
وسميره ملاحظه هالشي ويزيد قلبها يوجعها على حالهم..
☘سميره:سلم وليداتي فوتوا اول يوم وتاني يوم طلعوهم دهوروا بيهم كان في ملاهي مفتوحات ارفعوهم ..
نضال:إن شاء الله..
عمر:في مكان نعرفه فيه كل شي هو زي المنتزه وفي العاب وكبير مش بعيد علينا..
سميرة؛كويس..
نضال؛انتي اول وتاني يوم مش حاضرتيهم هني ولا؟
سميره:من ليلة العيد بنمشي لحوش بوي..
هز نضال راسه بصمت..
ع خشة محمد شنيبه وهو يقول..
/السلام عليكم.
ردوا عليهم السلام..
قعمز وقال بضحكه..
/امالا وين مغليه اللي واخدين راحتكم هكي!؟
ضحكوا..
سميره بضحكه؛عازمتها نسرين اليوم..
محمد هز راسه بعدين قال..
/اليوم الجو حمو..
نضال:والضي الله اعلم امتى يديرها فينا..
سميرة؛في الليل توكتنا..
عمر بإنزعاج؛ووواك غير شن روح بيا بس..
محمد؛دماغك منقوب..
نضال:قتلك ماتجيش لكن انت ماتسمعش في الكلام شن بنديرولك..
محمد؛قولها لروحك..
نضال؛توا اني شن قلت ياحاج شكيت!؟ بكيت!؟ ولاغير تبي دير تحديد الكل وخلاص!
حدفه بوه بالوساده اللي جنبه تلقاها وهو يضحك..
وسميره وعمر يضحكوا عليهم..
🍃🍃🍃🍃
"طفي ع الشربه يااريج"
اريج اللي كانت في الكوجينه تقرض في السلاطه..
/طفيت عليها..
وكملت شغلها وهي تسمع في درس ديني يذاع في قناة ليبيه عن طريق الراديو..
☘ومنها لأمها في دار معيشه..
فردوس بحسره:مفروض توا توتي للعيد تصبغ وتحني..خنقتها العبره وسكتت..
مطيره بضيق:الله غالب هدا ماكاتب ربك خلاص سلم بنتي شدي روحك قدامها ماصدقما عدت منها..
مسحت فردوس دموعها وهي تقول..
/مش قادره ياعمتي قلبي معبي..مقهورة عليها ومقهورة من خوها..
مطيره؛خيره خوها اهو قعد ماسافرش!
فردوس بأسف وحزن
/باهي شن تغير قاعد ع حاله معاي..
مطيره؛ادعيله ربي يهديه يابنتي مازال قاعد صغير ويتغير..
فردوس تنهدت بألم وقالت...
/يارب..
ويسمعوا باب الحوش الخارجي انفتح..
مطيره؛صوته يخوف تقول دبابه خاطمه من قدام الحوش..
🍃ويتسكر الباب وهو يدير في نفس الصوت..
بعد ماخشت سيارة طوبى..
كانوا طالعات هي واميمه للسوق..نزلوا من السيارة وهما شادات كياس..
ع طلعة اريج مشتلهم طول بش تساعدهم..
☘طوبى بضيق:الجو اليوم في طاعة الله..
اريج:المهم خديتوا كل شي تبوه..
اميمه بشي من التعب:ايه ..بالله اريج خودي خل نمشي للحوش ندوش..
طوبى:مش ع طول خشي ارتاحي شويه..
اميمه هزت راسها بالموافقه..
خدت منها اريج الأكياس وخشوا داخل مع بعض...
🍃🍃🍃🍃
وتعدي ساعه ويآذن المغرب..ويفطروا ناس شارع القهوة وكل حوش فيهم كان بحال يفرق ع التاني..
☘في اللي كانوا ملتمين ع السفره يفطروا في أجواء حلوة.كلها ألفة وتفاهم زي حوش محمد شنيبه اللي ليهم سنين غايبه عنهم الأجواء هادي..
☘وفي اللي كان موجود وسط لمه حلوة بالإجبار وهو مش متحمل حد فيها..زي ابتسام وهي تفطر مع عزوزتها وحمواتها وسلفتها الصغيره..وضرتها..
☘وفي من كان مجبور يجامل ويضغط ع نفسه بش يعدي هالليله ع خير..زي نسرين اللي تفطر هي وراجلها بين امها وامه اللي كان باين عليها انها مش متحمله دوشة ولد نسرين ع الفطور..
مغليه كانت مكتفيه بالمراقبه صمتا..
اما ربيع كان متجاهل تماما وماغير يزيد يدلع في يحيى ومخليه ع راحته..
☘لكن حوش طوبى الواعر كان زيه زي باقي حياش اهل الشارع يفطروا بهدوء وجوهم كان عادي..
🍃🍃🍃🍃
بعد صلاة التراويح..
رقدت اريج بعد ماغسلت الماعين..وامها حداها متكيه تتفرج ع الأخبار..
ومطيره في الكوجينه الخارجيه مع بنات المحل يجهزوا في حلويات العيد للزباين..
☘وفي دار البنات..
طوبى وهي تلبس في جنه توكه صغيره ع شعرها كانت تقول..
/توا بنطلعوا حني وخالتو اميمه سموحتي..بنمشوا نعطوا حوايج العيد لخالتك حوا بش تفرح بيهم صغارها وبعدين نمشوا لحوش خالتو غرفه نعطوها هدية اواب ومهاب..
رفعتها في حضنها وقالت..
/مش رافعاتك في الكروسه اليوم..
ومشت للسرير متاعها خدت منه الاكياس..
وطلعت بعدين من الدار...
خطمت من قدام دار المعيشه وهي تقول..
/اني طلعت يافردوس..
"سلمي ع غرفه"
طوبى:يوصل..
وصلت في الباب لبست كندرتها الحاطيه "الارضيه"..
وطلعت...
طوبى:وينك يااميمه..
خشت اميمه من الباب الفاصل وهي رافعه كياس وتقول..
/هاني جيت..ابتسمت وين جو عيونها ع جنه وقالت..نمولتي النموله بتمشي معانا..
طوبى بلغة طفوليه..
/مالا شنو تمشوا انتم بس يانسرافات!
ضحكت اميمه وطبست عليها باستها من خدها..
طوبى بإبتسامه؛هيا..
ومشوا الزوز للباب...
🍃في هالوقت..
طلع عبد القيوم من حوش المهدي وهو متأنق بسوريه عربيه لونها ازرق غامق..كمها طويل والياقه متاعها مسكرة ع الرقبه اعلاها فيه خط اسود..وع الكتاف في زيه تلاته خطوط..وع الجيب مكان القلب في خط خامس من فوق..
ومكمل طلته بالساعه وخاتمه المميز..
كان ماشي لحوش زميله في العمل وصاحبه عيسي اللي مداير سهريه في حوشه لجماعة الخدمه..
قبل مايتوجه لسيارته ناداه واحد من الجيران كان واقف قدام قهوة نضال..مشاله..
🌼ع طلعة اميمه وطوبى وراها..
اميمه وين شافاته ابتسمت ابتسامة خفيفه..
وطوبى سكرت الباب بدون ماتلاحظه ومشت بإتجاه حوش سدره..واميمه لحقتها..
☘هو وقف ع الراجل وسلم عليه وقعد يسمع منه عن مشكله صايره لحاجه ليها علاقه بالضي في حوشه..
قطع عليه تركيزه مع الراجل صوت بنت حواء وهي تقول ببهجه
"جنه"..
طول شاف جهة حوش سدره..
شافهم كيف خشوا للحوش ..غير نظره للراجل بسرعه ودار روحه قاعده مركز معاه وهو يسمع في صوت نبضات قلبه..
🍃🍃🍃
فاتوا عشرة دقايق والراجل قاعد شاده ويحكيله ويطلع من موضوع ويخش في موضوع وهو يساير فيه وخلاص..
ع جية الولد صاحب الكورة ومعاه زوز من صحابه متوجهين لمحل المواد الغذائيه كانوا يشوفوله وهما خايفين..
وصلوا للمحل وخشوله وخدوا مايبوا بعدين طلعوا منه..
ع طلعه اميمه وهي رافعه جنه وطوبى وراها بكيسه وحده من حوش سدره وحواء تسقد فيهم..
حواء بإبتسامه؛بارك الله فيكم إن شاء الله مانفقدكم..
طوبى واميمه..
"سلمك..كل سنه وانتي طيبه"
حواء بإبتسامه؛كل عام وانتم بخير..تصبحوا ع خير..
ردوا عليها..
/قدامك كل خير..
والتفتوا جهة حوش عبد الرؤوف..
ويجوا عيون طوبى في عيون عبد القيوم..
حست للحظه وكأن صكها الضي "صعقه كهربائيه"..
ارتبكت وتوترت وصارت فيها حاله..
وهو يسرقلها في النظر مايبيش الراجل اللي قدامه ينتبه..
بس اللي كانوا منتبهين غير اميمه
الولد صاحب الكورة واللي معاه..
ابتسم بشقاوة وقال..
/اسمعوا شن بنقول..علا صوت وقال..عمي عبد القيوم..
شافوله هو والراجل..
الولد:تلعب كورة!؟
🌼اميمه وهي ماشيه تقص الطريق لما سمعاته قلبت وجهها للجهة التانيه ودرقاته بجنه وهي تضحك بكتمان..
طوبى وهي بتتبخر من الخجل..
/الولد هدا قليل ادب..
شافت لاميمه لقت عيونها مدمعات من الضحك..
طوبى بإحراج وتوتر..
/تضحكي يابارده! وغيرت نظرها بسرعه القدام وهي مرتبكه لين قصوا الكياس..
☘اما عبد القيوم بعد ماسأله الولد هالسؤال..قعد يشوفله بنظرة امتعاض تخوف..
خلت ابتسامة الولد تختفي ورجليه يسرعوا في المشي وصحابه معاه وهما يضحكوا بكتمان..
الراجل؛الولد هدا زوفري اكيد دايرلك موقف بالكورة متاعه اني يومك وتاليك حاذفهالي في الجنان..
عبد القيوم وهو عاقد حواجبه؛يعاودها افلقها..
🍃وصلوا طوبى واميمه في حوش غرفه..
واميمه لين جنابها وجعوها من الضحك اللي تكتم فيه..
طوبى وهي شاده ضحكتها وجهها محمر من الخجل..
/باهي خلاص مبردك..ودق الباب..
ينفتح طول..
عبد الرؤوف بإبتسامه..
/اهلا..
بلعت اميمه ضحكتها ونزلت عيونها وقالت مع طوبى..
/السلام عليكم..
هو تباعد عن الباب ورد بإبتسامه..
/وعليكم السلام..خشوا خشوا..
خشوا ورا بعض وهو لما شاف جنه قال بضحكه..
/غريبة الحلقوم معاكم!
ضحكت طوبى واميمه ابتسمت..
عبد الرؤوف وهو بيطلع...
/ربي يبارك ويصون..خشوا لغرفه تراجي فيكم..
وطلع وسكر الباب..
وهما الزوز مشوا خشوا للحوش اللي كان باب الدخلاني مفتوح...
🍃🍃🍃🍃
"يللا لبانه"
طلعت لبانه وهي تلبس في شنطتها..
/ليكني جيت..
سلافه:ماما نحنا طلعنا..
"ديروا بالكن ع حالكن ولاتتأخروا الله معكن"
فتحت سلافه باب الشقه وطلعت مع اختها...
🍃قدام العمارة..
كان سيارة معز مدرسه..
عيونه ع مدخل العمارة..واخته تشوفله..
ارتسمت ع وجهه ابتسامه حلوة لما بانت عليه لبانه..
تمشي وخصلات شعرها تطاير ع وجهها الصافي..وقلبه يذوب زي الثلج وين تطلع عليه الشمس..
هي تجاهلاته تعمدا واختها لاحظتها..
لبانه:انا رح ورا ميار..ومشت طول لفت ع السيارة من الخلف وركبت ورا ميار وهي تقول..
/مرحبا..
ميار:ياأهلين..
ركبت سلافه وقالت..
/مسا الخير..
ميار:مسا الخيرات..
معز:شن جو..
سلافه:منيح..
معز:غيرك شكلها مسحبه عندهم..
لبانه في نفسها..
"ماأغلظك"
سلافه بضحكه؛ لامافي شي بيستاهل كلها شقفة سحابة صيف..
لبانه قبلت وجهها للروشن وهي رافعه حاجبها..
ميار بإبتسامه؛ياودي هيا سقدنا الساعه 12..
تنهد..بعدين شغل السيارة وتحرك..
وبدي يشغل في الاغاني وكلهم لفنان لبانه المفضل فضل شاكر..
وهي تسمع فيهم ودموعها في عيونها...
🍃بعد ماقطعوا مسافه لابأس بيها وصلوا لمول..
درس السيارة في المكان المخصص..ونزلوا كلهم مع بعض..
☘معز بصوت هامس..
/ربي يصبرني ع اللي جاي..
وقصده باللي جاي..النظرات اللي حتلحق لبانه واختها من الشباب..شبابنا مش متعودين يشوفوا هالنوع من الجمال الا في التلفزيون..ولو شافوه ع الطبيعه حينسوا انهم شافوا نساوين في حياتهم كلها..
🍃سلافه؛مابعتقد انه رح نقدر نشتري شي الدنيا صارت غاليه كتير..
ميار:مرات نلقوا حويجه نقدروا عليها..
لبانه؛بالاساس نحنا جايين نغير جو مو ببالنا نشتري شي..
سكتت ميار وهي محرجه من صحباتها اللي اصرت عليهم يجوا معاها..
هي عارفه ظروفهم قداش تعبت بعد الحرب والايجار ماخلا عليهم شي..لكن الحاح معز اللي يبي يحصل فرصه يحكي فيها مع لبانه هو اللي خلاها دير هكي..
☘ويخشوا للمول ورجل معز ع رجليهم..
ماقدرش يمنع نظرات الشباب عنهم بس وجوده معاهم منع التحرش بيهم..
وصلوا لمحل..خشوله البنات وهو قعد واقف برا..
🍃البضاعه اللي كانت في المحل مافيها شي جديد..ظروف الحرب اثرت هلبه ع التجار..
واساسا الناس ماعندهاش باش تاخده..وفي اللي ماعنداش رغبه ياخد في ظل هالظروف الصعبه..
🌼لبانه وهي تدهور وتتفرج بروحها..وقفت في مكانها لما شافت معز خاش واقف ع واحد يكلم فيه وفي بنات عيونهم عليه..
انغاضت وغارت ومشت طول لأختها واخته ووقفت حداهم بش يجي مقابلها وتراقبه..
هو كان يهدرز عادي مع صاحبه ويمرر في نظره ع المكان جو عيونه عليها..غيرت طول نظرها عنه وكأنها ماكانتش تشوفله..
☘ميار:مافي شي حلو هيا..
سلافه:يللا..
لبانه:بدكن تطلعوا؟
سلافه:ايه يللا..
لبانه وهي تحاول تخفي توترها..
/انا لسا بدي ضل في شغلات عجبوني واسعارن معقوله..
ميار حست انها فرصه وجت لخوها..
/خلاص خلينا حني نمشوا للمحل اللي جنبه وهي تجينا غادي بعدين..
سلافه اللي كانت فاهمه كل شي لكن تتغابي..
/طيب لاتتأخري..
ومشت طلعت مع ميار من المحل..
..وقعدت لبانه بروحها تظاهر انها تتفرج ع البضاعه وهي تسرق في النظر لمعز..
وبين لحظه شافت فيها للبسه ولحظه غيرت نظرها ليه فيها اختفي..
لبانه بقلق:وين راح؟
"ويامحلا الشامي ع المغربي"..
التفتت شافتله بنظرات حاده..
معز بإبتسامه:نبي ندوي معاك..
لبانه؛مافي شي نحكي فيه..
معز:لافي يالبانه في..اطلعي قدامي
غيرت نظرها عنه وهي تفكر..شويه وقالت بهدوء..
/طيب..
ومشت بتطلع وهو ابتسم ومشي معاها..
🍃طلعوا من المحل وقعدوا يمشوا مع بعض لين وصلوا في كافتيريا..خشوا قعمزوا فيها..
معز:في شن خاطرك..
لبانه بجديه؛ولاشي نحنا جايين نحكي..
تنهد وقال:تمام..نبي نفهم شن اللي قلبك عليا هالقلبه..هدا كله لأني صارحتك بمشاعري! في شن غلطت لما قتلك نحبك ونبيك بالحلال!؟..حد غيري في حياتك مافيش واني متأكد من الحاجه هادي..عيلتي وعيلتك صحاب ومنسجمين مع بعض وامي تحبكم هلبه..وحتى انتي واثق ومتأكد مليون في الميه انك تحبيني بتقولي غير هكي كذابه..عطيني توا سبب واحد يقنعني ولا يفهمني ردة فعلك هادي..
لبانه بمكابرة وثبات مصطنع
/مو مناسبين لبعض..
معز؛كيف ترا!؟
لبانه؛بيئتي بتختلف عن بيئتك ومستواك المادي بيتخلف كمان..
معز بإستغراب؛شن مستواك المادي جديده هادي!؟
لبانه ودموعها في عيونها..
/لامو جديده..وهي الحقيقة معز..صدقني مارح تزبط ابدا..
معز بشك:مش عارف علاش حاس في حاجه تانيه درقي فيها..
لبانه سكتت شويه بعدين قالت..
/انا بدي اتزوج سوري..
رفع حاجبه وقال:وحتى هادي جديده!!
لبانه:لا هي كمان مو جديده..كل حدا لازم يكون مع اللي بيناسبوا ويشبهوا بكل شي..
معز:اني وياك نتشابهوا في كل شي..
لبانه بحده؛بولا شي مابنتشابه بشي..وكملت تقول برجاء..بترجاك معز اذا مابدك تخسرني شيل من بالك فكرة الحب والزواج وخلينا نرجع رفقات مثل الأول..
معز بإبتسامه ساخره ونظرات عدم استيعاب..
/ترا كيف تجي هادي قوليلي!
ناضت وهي تقول.
/هدا اخر كلام عندي وماعندي غيره..
ومشت بسرعه طلعت من الكافتيريا وهي هاربه بدموعها منه..
وخلاته قاعد في مكانه يفكر في الشي اللي خلا لبانه ترفضه برغم حبها ليه الباين عليها..ماصدقش ولا كلمه من قالاته وحس ان في سبب تاني ورا موقفها هدا..
🍃🍃🍃🍃
في راس الشارع..
كان محمد محي الدين مقعمز يهدرز مع ولاد من الشارع..
ع جية يزن اللي كان يدور فيه..لما لقاه ناداه.
"محمد"
التفتله طول..
اشرله يزن يجيه..
هو تأفف ومشاله..
وصل فيه وقال..
/شن جو..
يزن؛تمام..شن جوك انت..
محمد؛كويس..
يزن؛خيرك رافع خشمك علينا حتى السلام لا..
محمد؛مش فاضي..
يزن بإبتسامه ساخره..
/هالشركات اللي وراك..
محمد بإنزعاج؛شن تبي من الاخير!
يزن:الامتحانات قريب نبي نبدوا نقروا مع بعض.
ضحك ساخرا بعدين قال..
/اخر همي ياولد خالي اني غير نطلع من الاعدادي بنبدا طول ندير شغل لروحي القرايه خليتهالك انت..
يزن؛انت ديما هكي كل شي في حياتك مخليه لغيرك..ايه حقه قولي اختك لمن مخليها!
محمد وصل لأقصى مراحل الغضب..شد ولد خاله من رقبة تيشرته وقعد يشوفله بنظرات غضب ويقول..
/شن تقول ياكلب!
حط يزن يده ع يد محمد وشدها بقوة ونزلها وهو يقول..
/طلع رجولتك هادي ع اختك..
محمد من تحت سنونه..
/تكلم زين احسنلك!
يزن:راقب اختك وخليك وراها وضعها مش مزبوط صحباتها مش مزبوطات وحتى لبسها مش لبس وحده طالعه من حوش فيه رجاله..
..محمد وهو يسمع فيه كان يبي يشده يضربه لين يطلع روحه لكن خوفه من المهدي منعه..قعد يتبع فيه بعيونه وهو ماشي من قدامه لين ادرق عنهم..رجع يفكر في كلامه..
وهو يفكر تفكر كلام صفاء عن اخته يوم اللي ضربه عمه اشرف..بدت ع وجهه ملامح الغضب وهو يقول في نفسه..
"فرخة راما"
🍃🍃🍃🍃
"لامادخليش بيك زي كل عام بناخدوا ومن احسن شي عندك باش ماديرش طروحك هادوا عليا"..
حط من عطره ومشي طلع من دار النوم وهو يقول..
/ياودي باهي باهي...
خديجه وهي وراه؛نبيهم غدوة الفلوس..
محي الدين بملل:باهي..
هي رفعت حاجبها ومشت للكوجينه..
وهو وصل في باب الشقه..
🍃في هالوقت..
كانت ابتسام جايه لخديجه بعزومه من خديجه بش تسهر عندها..
وصلت في الدروج..شافت للباب..لقت محي الدين طالع وهو يقول بصوت منخفض..
/العيشه معاك تقصر العمر..
سكر الباب وشاف للدروج لقي ابتسام تشوفله بإبتسامه استغراب..
هو ضحك بربكه وقال..
/مشاكل عاديه مافي شي..
ضحكت وركبت وهو جاي نازل قال..
/ردي بالك تعاوديلها..
هي حركت راسها يمين ويسار وفي نفسها تقول..
"دايراته يحلف براسها وهو مش طايق العيشه معاها"
وصلت في باب الشقه..ضغطت ع زر الجرس وقعدت تستنى..
فتحت خديجه الباب وقالت..
/ياهلا ببسومه..
ردت عليها وهي مبتسمه.
/دوجه..
وسلموا ع بعض بالخد بعدين خشوا للشقه...
🍃🍃🍃🍃🍃
"ايوه تسمعي فيا"
نسرين؛ايوه جالي نسمع فيك..
"تمام شن حالكم؟"
نسرين؛الحمد لله شن حالك انت..
"ماشي الحال الحمد لله"
نسرين:امورك كلها تمام!؟
"ايه كله تمام..شن حال امي وبوي والعيله كلها"
نسرين:الحمد لله كلنا كويسين..
"باهي الحمد لله..شن حال بنتي؟"
نسرين بحزن:الحمد لله في خيار خيرها..
"الحمد لله...اسمعي نسرين فلوسي عند المهدي خودي مبلغ باهي وخودي لبنتي كل شي للعيد..نبيك تاخديلها تلاته بدالي مش وحده ولبس تاني عادي خوديلها كندره لكل لبسه وتوكات واكسسوارات..خوديلها العاب خوديلها كل شي بنتي هادي نبيها تكون خير منهم كلهم"
نسرين ومتمالكه نفسها بقوة عن البكي..
/حاضر..
"وكان جتكم وشفتوها صوريهالي"
نسرين؛حاضر..
"خودي لأمها حاجه"
فنصت نسرين وهي تقول .
/لمني؟
"لأمي خيرك!"
نسرين شكت في قدراتها السمعيه وكذبت وذانها وصدقاته وهي تقول..
/باهي..
☘وهي مسكره ع روحها دار النوم وتكلم في خوها..
كانت عزوزتها في الصاله تكلم في بنتها هاتفيا..
/باسطه سيطرتها ع كل شي هي وصغارها وماليها..
"واضحه يام شوفي قداش ليك قاعده في حوش عبد المنعم ماقال نجيبهم يباتوا عندي نهارين"
امها قالت:ايه مخلينا مضيقين ع خوه مسكين ومخلي مفرخ مرته يرتعوا في حوش سياح نياح..لكن باهي..
"ع شني ناويه يام؟!"
رفعت حاجبها وقالت..
/معاش مروحه بنقعمزلهم هني..
"الله يما! ونبدوا نمشوا ونجوا ع حوشنا الاول وشارعنا القديم"
ضحكت امها وهي تقول..
/ايه ياحنه..ايه...
🍃🍃🍃🍃🍃
"وصل في الراجل وتفاهم هو وياه قاله بيبدوا العلاج بعد العيد.."
غرفه بقلق:اكيد لما وصلت غادي تعبت.
نزلوا دموع طوبى وهي تقول.
/لما مشوا للصلاة تعبت لكن قاومت ووين بدت الصلاة وسمعت القرآن بصوت الإمام اغمى عليها..
حطت غرفه يدها ع فمها وقعدت تبكي.
واميمه حداهم تسمع ودموعها ينزلوا..
طوبى تماسكت..مسحت دموعها وقالت.
/معليشي فترة وتعدي المهم تتعالج وتشفى..
اميمه:صح..
ع جية واحد من ولاد غرفه لأمه وهو يمشي مع الصالون وصل فيها قعد يطبطب ع ركبتها ويقول..
"غفه"..
ضحكوا غصب عنهم..
وهي رفعاته وحطاته ع حجرها وضماته بقوة..
طوبى بإبتسامه:شوفوا شن جابتلكم خالتو..
وناضت بالكيسه طلعت من اللبس..
شافاته غرفه وقالت..
/يهبلوا محلاهم!..لكن علاش مكلفه ع روحك..
طوبى:بلاخترفه زايده هادوا ولادي حتى اني مافي شي يغلا عليهم..
وردتهم للكيس متاعهم ومدتهم لأمهم..
خدت غرفه الكيسه وهي تقول..
/ان شاء الله مانفقدك بيبو..شافت لجنه وقالت..سامحيني بنتي العيد هدا ماخديتلك شي..
طوبى:ايااح اللبس اللي خديتهولها قبل معبي دولابها في منه يجي عليها توا..
غرفه ابتسمت مجامله ومن داخلها كانت مضايقه هلبه..
وطوبى حاسه بيها وفاهمه عليها معاش تبي تاخد شي من فلوس عبد الرؤوف لحد من عيلتها..
🍃🍃🍃🍃
وع قرب السحور...
روح محمد محي الدين لحوشهم..
خش وهو ناوي اخته..لقاها مقعمزة ع التلفزيون تتفرج..
مشاله وسكره..
راما:خير بلاك!..
قدملها وقال..
/هاتي تليفونك..
هي قالت بصدمه..
/شني!؟
هو بحده قال.
/جيبي التليفون بالحسني خيرلك..
ناضت وهي تقول..
/برا عليا غادي..
شدها من ذراعها وهو يقول..
/هاتي البلي خير ماندفنك في مكانك..
نادت بخوف؛ياماما..!
محمد:نادي حتى جدك التليفون تجيبيه توا يعني تجيبيه..
ع جية خديجه وهي تقول بفجعه..
/خلي اختك ياولد!
محمد؛جيبي تليفونها.
خديجه؛علاش!؟
محمد:نبي نشوفه..
راما:شن تشوف فيه هدا حاجه خاصه في صوري وصور صاحباتي..
شدها من شعرها وهو يقول..
/ان شاء الله تصوري في تليفونك!..
راما بوجع؛اه شعري..
خديجه بقلق:محمد!
محمد بعصبيه:اسكتي يام..وانتي تمسحي صورك من التليفون ومعاش تصوري فيه ياكلبه..واسمعي كويس وربي ياراما نشوف عليك شي..نقتلك..نقتلك..
خديجه:شن سامع عن اختك!؟
محمد؛فوتيني من الدوة هادي..غدوة بتطلعوا للسوق ولا رجلي ع رجلكم ونلقاك طالعه بلبس معفن نكسرك فاهمه ياحيوانه..ودفها ومشي لداره..
هي شدت راسها وقالت بوجع..
/كسرة..اكيد اشرف مكلمه..
خديجه هزت راسها وقالت بوعيد..
/بنت فايزة محرضاته لكن باهي يصبروا عليا شويه بس...
🍀🍀🍀🍀🍀
ويعدوا من هداكا اليوم تلاته ايام...
اول جلسه علاج لسدره تعبت فيه هلبه لدرجة خلت صفيه تمرض معاها..ومش بس صفيه..
المهدي في هداكا اليوم طاح في المطحن مغمى عليه بعد ماحس بنخصة قويه في قلبه..
رفعوه خوته لمصحة القدس واندارله فحص شامل وكل اللي طلع معاهم ..ارهاق واجهاد لااكثر..
المهدي بعد ماروح قعد مانفسه يفكر في اللي صار معاه المدة الاخيره..وعقله ماجابلاش الا شي واحد..
باهي من بيسأل بش يتأكد! من بعد طلاق طوبى معاش كلم يوسف نهائي ولاعاد يقدر يكلمه..
نسريم حالها من حاله..وحتى علاقتها بفايزة مقطوعه..
من مازال قاعد يربط بينهم وبين عيلة الواعر ويقدر يعرف اخبارهم منه!؟
الاجابه مش محتاجه تفكير طويل..
بس كان صعب عليه ومحرج ليه يكلم مرت بوه في موضوع زي هدا...
🍃🍃🍃🍃
يوم الإثنين..
3يونيو...سنة 2019..
اليوم التاسع والعشرين من شهر رمضان...
ليلة هاليوم..الناس كانت مترقبه لحظه اعلان رؤية هلال شوال من عدمه..
اغلب الدول العربيه شافوه..وحني من الدول اللي في بادئ الأمر تعذرت علينا رؤية الهلال وخلاص حنكملوا رمضان تلاتين يوم...
🍃الساعه12:00بعد منتصف الليل..
في صالة حوش محمد شنيبه..
خش نضال شاف سميره مقعمزه بروحها سرحانه..
حمحم استاقظت..شافتله وابتسمت..
هو قدملها وقعمز مقابلها وقال..
/كنت عند السلطانه توا عطيتها العيديه متاعها..
سميره بضحكه:عطيتها ولاخديت منها؟
ضحك وقال:لا والله عطيتها..
مد كيسه لسميره وقال..
/هادي ليك انتي..
سميره ضحكت بمفاجأه وقالت..
/ليا اني!؟
نضال:ايه مش حتى انتي امي زيك زيها..
ضحكت سميره..
نضال ابتسم وقال..
/ان شاء الله تعجبك..
سميره؛بارك الله فيك ولدي..ماقدرتش تشد دموعها نزلوا ونزلت راسها معاهم.
نضال؛صلي ع النبي وقولي لاإله إلا الله..ان شاء الله حاله خير من حالنا هو بين ايدين رحيم وكريم..
سميره بنبره باكيه:الله يرحمه ويغفرله ويسامحه وخيي كان يدير في الحركه هادي في كل عيد..توا قبل تخش عليا كنت نتفكر فيه..
نضال بحزن؛الله يرحمه ويغفرله..
سميره برجاء:يارب..يارب..
دق باب الصاله دقتين وخش المهدي..
شافها تبكي وجعه حالها..
قعمز ع كرسي قريب عليها وقال..
/ادعيله خالتي مايبي منك الا الدعاء..
سميره مسحت دموعها وقالت..
/ربي يغفرله ويرحمه ويجعل مكانه الجنه وخيي..رشفت وقالت..انت شن حالك اليوم..
المهدي:الحمد لله..عطاها كيسه وقال..حاجه مش من قدرك..
سميره:غير علاش بس..
المهدي:محمد شنيبه دار زوز نساوين حصلنا فيهم معاه..
نضال:المصاريف كثرت
المهدي:العيله كبرت.
وسميره تسمع فيهم وتضحك من وسط دموعها "نضال"..
خدت سميرة الكياس الزوز وحدفتهم ورا الكنبه اللي مقعمزة عليها وهي تقول...انتشروا..
نضال ناض بسرعه وتباعد وقعمز في تركينه بروحه..
اما المهدي قعد مكانه امه ماتقدرش عليه..
خشت مغليه الصاله رفعت حاجبها وقالت..
/نضال برا جيبلي العصير متاعي اليوم تم ونسيت نقول لبوك..
ناض وهو يقول..حاضر..
ومشي طلع من حداهم..
مغليه:مهدي..
شافلها..
مغليه؛تعالى حداي يما في الدار نبي نهدرز عليك..
المهدي:حاضر شويه ولاحقك.
شافت لسميره بنظرة امتعاض ومشت طلعت من الصاله..
المهدي شاف لسميره وقال بشي من الاحراج..
/امس كنتي في حوش الواعر؟
سميره؛ايه..
المهدي:امم..شن اخبارهم؟
سميره من ملامح وجهه فهمت هو لشن يبي يوصل ردت عليه تقول..
/مساكين يخمموا في حال سدرة.
رفع عيونه وقال بلهفه خوف..
/خيرها!؟
سميره بحسره؛مش طلعت مسحورة ياناري..
المهدي بصدمه:كيف!؟
سميره؛ايه ياروحي مسكينه وتوا قاعده في السعوديه تتعالج...
بدت ع وجهه المهدي ملامح الوجع..
سميره بخوف:مهدي خيرك!..
هو قعد يدلك في مكان قلبه ويقول..
/مافي شي..باهي هي توا شن حالها.
سميره؛تعبها العلاج شويه لكن بإذن الله حتشفى منه وتولي خير من قبل..
المهدي بألم؛من دار فيها هكي مني!
سميرة"ياريت نقدر نقول"..
/مني كان يكون الله ينتقم منه اشد انتقام..
ناض المهدي ومشي طلع من الصاله لكن مامشاش لأمه..طلع من الحوش كله..
سميره بندم؛عطيني بكشه نحساب روحي بنريحه..
وتخش عليها مغليه وهي تقول..
/شن قلتيله بش طلع من الحوش..
سميره بملل..
/قتله تمشي لأمك نحك ع شواربك الفلفل..
مغليه هزت راسها وقالت...
/تسهوكي وخودي راحتك لكن لازم تقعدي متفكري ان هادم ولادي اني والحوش حوشي اني..يصير مايصير بعدين تطلعي وايديك ورا راسك ماك كاسبة حاجه..
سميره تنهدت وشافت للشاشه..
مغليه اغتاضت لأنها تجاهلتها مشت طول للشاشه طفته وطلعت من الصاله..
سميره بضحكه:يعطيك عقل يامغليه وخلاص..
🍃🍃🍃🍃
"اني ينتكا هني يقرب وقت السحور تعالي نوضيني مش تنسي"
اميمه بضحكه؛حاضر..
وغطت اميمه جدها اللي راقد في الجنان بالشرشاف وخشت للحوش...
🍃وفي حوش بنت عمها..
كانوا عمتها وفردوس راقدات بعمق..
وطوبى في الصاله مقعمزه ع الصلايه تقرا في القرآن وجنه راقده في حجرها..
واريج في الدار...مقعمزه ع الصلايه وتدعي لراجلها وهي تبكي...
🍀وحال اغلب حياش الشارع من حالهم...مش بس الشارع ليبيا كلها..
لعند ماجت الساعه 3 صباحا...
#انت_عيدي
#طوبى
...يتبع....
