#طوبى "جنة طوبى"
#جمان_فريد
#الجزء_107"كانون الأول/شتي يادني"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا..
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سنلتقي ذات يوم..ذات شتاء...ذات غيم...ذات مطر🍃
________________________________________
فاتوا اربعة ايام ع وفاة عبد الفتاح..
عبد الفتاح اللي لقوه مقتول في سيارته برصاصه اخترقت راسه ونهت حياته..مات يوم الأحد وماقدروش يطلعوا الجثه متاعه الا يوم الإربعاء..
فاجعه ومأساة..كادت تودي بحياة امه..الصدمه الاولى كانت حتنهي حياتها غير ان عمرها مازال فيه بقيه..
صغاره حزنوا عليه بقوة..ولاده من سميرة اللي كانوا في سن مراهقه بكوا عليه بكاء اطفال..
وصغاره من ابتسام كانوا متأثرين هلبه..
بوه وخوته وخواته برغم الألم كانوا صابرين...
لكن مش زي صبر سميرة اللي تحبه حب كبير..تبكي عليه لكن في نفس الوقت كانت تصلي وتدعيله وتقول للمعزين..
"ادعوله بالرحمة والمغفره كان راجل باهي ماريت منه الا كل خير"
وتقعد تعدد في محاسنه وتخلي اللي يسمعها يدعيله وهالشي اثر في طوبى هلبه وخلاها تعرف مدى حب سميرة لعبد الفتاح..لكن في نفس الوقت لاحظت ابتسام من لما توفى وهي تعيط وتنوح وكل شويه يغمى عليها واكثر عبارة تردد فيها وهي تعيط..
"ااه ياني المقهورة..المعتورة"
لمافكرت في وضعها وفي ماتعرف عنها فهمت ان ابتسام انسانه اكبر همها في الحياة نفسها وبس..
🍃🍃🍃
اللي اثار الجدل في العزي هو عدم وجود خديجه فيها وحضور مغليه في يوم واحد فقط..
وفيسع ماطلعت قصة طلاق خديجه اللي شغلت الناس عن موت عبد الفتاح...
🍃🍃🍃🍃🍃
21ديسمبر...سنة2019..
هاليوم كان مغيم..غيومه قاتمه تنبأ بجية مطر قويه...
طوبى في هاليوم جتها رغبه تمشي للمدرسة وتقضي وقت مع الصغار..وطبعا ماحسمتش امرها الا لما عرفت بشكل غير مباشر ان عبد القيوم عنده خدمه برا طرابلس..
☘رافقتها في المشية سدرة خدوا مع بعض العاب ودفاتر رسم والوان وتوجهوا للمدرسه...
☘☘☘☘☘
"اني جيت "
بينت طوبى راسها من الباب وهي تقول بإبتسامه مرحة هالجمله..
وبدت تضحك وهي تشوف في الصغار جاينها يجروا يرحبوا بيها والبنات يحضنوا..
سدرة وقفت تتأمل في حالها معاهم وهي مبتسمه وعيونها يلمعوا بالدموع..بعدين خلتها معاهم ومشت مع وحده من المتطوعات دير جوله ع المدرسه وتشوف اوضاع الناس...
🍃🍃🍃🍃
تمت جولتها في الساحه عند مباراة كرة قدم يلعبوا فيها ابناء العائلات النازحه من عمر العشر سنوات لعمر15سنه..
اللي فاجئها لما شافتهم وجود ولاد المهدي وولد نسرين معاهم..
محمد حامد ويزن يلعبوا..ومحمد المهدي كان واخد دور المدرب للفريقين مع بعض..
قعدوا عيونها مع ولاد عائشه..تعبوا بالدموع وهي تتأمل فيهم بالذات محمد..كان يشبه لأمه هلبه...
وهي تتأمل فيهم وبوهم يتأمل فيها هي..
ماانتبهتش لوجوده ولاحست عليه وهو من لما جت للمدرسه ومؤشرات قلبه دلاته عليها..
ابتسم تلقائيا لما شافها تصفق لواحد من الولاد بعد سجل هدف..
هني انتبهوا لوجودها محمد ويزن..
يزن شاف لخوه..وخوه غير نظرها عنه ليه..الزوز وكأنهم يقولوا لبعض في كلام بعيونهم في نهايته هز محمد راسه بإيجاب وغير نظره لبوه..
عقد حواجبه بإستغراب لما شاف وحده جاته وقفت عليه بعدين تباعد هو وياها عنهم شويه لكن قعدوا تحت العيون..
وهدا وين سدرة انتبهت لوجوده..
مطت شفايفها للأسفل بأسف وهي تقول في نفسها..
"والله ماني عارفه علاش قلبي المهزب مازال يحبك غير كان نعرف شن فيك زايد بش شاد فيك هكي بس!"
ولفت ومشت وهي معصبه وخشت للمبنى ومحمد معاها بعيونه..
🍃"هدا ملفها ياخوي"
خدي المهدي الملف وقال..
/بإذن الله الاسبوع الجاي نطلعوها لتونس..
بإمتنان قالت:الله يرحم والديك وبارك الله فيك..
ولفت ومشت وهي فرحانه اللي حصلت فرصة كبيرة لعلاج امها..
بعد مامشت قدم المهدي لمكان المباراة دور سدرة بعيونه مالقهاش حس بضيق واستياء...
🍃🍃🍃🍃
وصلت سدرة لمكان طوبى..
لقتها وسط البنات وهما محاوطات بيها كل وحده فيهم شاده"قطعة صلصال" يشوفوا في طوبى كيف تشكل فيها وهما يقلدوا فيها..
طوبى:شوفوا كيف درتها من هني ركزوا..هاه ريتوا ساهله مش صعبه..شافتلهم وقالت..رجعوها زي ماكانت وابدوا شكلوا من اول وجديد..
قعمزت سدرة ع الكرسي وهي تتفرج عليهم بإبنسجام..
فجأه
"مرحبا ياحلوين"
طوبى اللي كانت في قمة الحيويه والشغف والبهجه..خفتت مرة وحده وحست بشي تجمع في صدرها وكتم ع نفسها..
وعيون سدرة عليها كانت عاطيتها بالظهر صح بس تقدر تتخيل شكل ملامح وجهها توا..
اما البنات الصغار فرحوا بجية سلافه وناضوا رحبوا بيها حتى هي..
سلافه كان عندها علم بجية طوبى عرفت من شروق وبالنسبه ليها هادي فرصه ولازم تستغلها..
سلمت ع بنات الصغار بعدين مررت نظرها بين سدرة وطوبى وهي تقول..
/كيفكن..
سدرة بإبتسامه:الحمد لله شن حالك انتي وحال امك..
سلافه؛مناح الحمد لله..شافت لطوبى وقالت..كيفك طوبى؟
اغتصبت طوبى ابتسامه من وجهها وقالت..
/الحمد لله..
شافت للبنات وقالت..
/شو عم تعملوا عم تشتغلوا بالصلصال حلو كتير..
حطت الكيسه اللي في يدها وقعمزت وسطهم حتى هي..
خدت قطعة صلصال وقالت..
/بصراحه كتير انبسطت بشوفتكن من اللي سمعتوا عنكن حابه اتعرف عليكن..
سدرة بإبتسامه؛شن سمعتي!؟
سلافه بإبتسامه؛كتير..سمعت عنك انتي وعن مطحن القهوة اللي كنتي عم ديريه وعن هي المدرسه اللي كانت من احسن المدارس الخاصه..مراة قويه وناجحه مثلك بتخلي اي مراة تفتخر فيا..
سدرة وهي مبتسمه..
/شكرا..
شافت سلافه لقطعة الصلصال اللي كانت تشكل فيها بعدين غيرت نظرها لطوبى وقالت..
/وكمان سمعت عن طوبى وعن الشغلات اللي مرت فيها بحياتها..احترمتها كتير واعجبت فيها..برغم صغر سنك تجاوزتي اشياء..اكبر منك مابيقدروا يتجاوزها عنجد بهنيكي..
سدرة شافت لطوبى بضيق..
وطوبى ردت ع سلافه وهي تقول بإبتسامه..
/الله يعطي اصعب المعارك لأقوى جنوده..
ابتسمت سدرة.
وسلافه وسعت ابتسامتها وهي تقول..
/مزبوط معك حق..عبد القيوم حكالي قديش كنتي انسانه صابرة وقاومتي بكل قوة حتى قدرتي توقفي ع رجليكي..
تلاشت ابتسامه سدره وعقدت حواجبها..
اما طوبى لحظتها حست بشي يمزق فيها من داخل..
يعني هو حاس اتجاهها بالشفقه لدرجة انه يحكي اللي مرت بيه معاها..وجعتها روحها هلبه لكن كعادتها مستحيل تبين وردت بكل هدوء عكس اللي قاعد يصير في داخلها..
/ايه هو شهد ع هلبه حاجات بارك الله فيه وقفاته معانا مش حننسوها..
سلافه شافت للشكل اللي داراته ابتسمت وقالت..
/مافي منه..
تنهدت وشافت لطوبى بإبتسامه وحطت الشكل اللي داراته ع الطاوله..
وحده من البنات قالت بإعجاب..
/حي قلب..محلاه..
ضحكت سلافه..
ناضت سدرة وقالت لطوبى..
/تطلعي معاي برا نتفرجوا ع المباراة..
طوبى شافتلها وقالت..
/مبارة شنو؟
سدرة:دايرينها الولاد هني معاهم محمد ويزن..
ابتسمت طوبى وقالت..
/باهي..ناضت وهي تقول لسلافه..نستأذنوك..
هي بإبتسامه؛خدوا راحتكن..
مشت طوبى طلعت مع اختها وسلافه معاها بعيونها وهي تفكر..
لاحظت ان الكلام اللي قالاته ماأثرش فيها وهي هكي فهمت ان طوبى ماتكنش مشاعر من أي نوع لعبد القيوم..
🍃وطوبى وهي ماشيه مع اختها كان عندها رغبه شديده في البكاء لكنها تقاوم فيها بكل قوة..
وجنبها سدره كانت مستاءة من عبد القيوم لأنه طلع اللي صار معاهم برا...
☘وصلوا في الساحه لقوا المهدي واقف ع زوز بنات..
طوبى بمشاغبه..
/ياكبدي هالمهدي زي المغناطيس..
سدرة بإمتعاض:صدقتي يعطي فيهم اشارة يجوه يجروا..وتقوليلي يحبك ومش عارفه شنو مافيش راجل يعرف الحب ولايعرف يحب كلهم كذابين ملعبين وكلهم يحاسبوا رواحهم محور الكون..
طوبى كانت شادة ضحكتها وهي تسمع فيها كيف تتكلم بحمقه..
🍃وهو وقتها كان يسمع لزوز بنات بوهم محتاج عمليه قسطرة ومش قادرين يديروها في االخاص وطلبوا مساعدته والمهدي ماتعودش يرد حد طلب مساعدته..
🍃🍃
بعد ماقعد بروحه انشغل بسدرة وظاهريا داير روحها مش مهتم لوجودها..
اما هي من حمقتها وغيرتها مابتش تشوفله حتى بالغلط..
شويه وجت وحده من الفرق التطوعيه خدت طوبى معاها وقعدت سدرة واقفه بروحها..
شاف المهدي لولاده لقاهم متجهزين بش يروحوا..
محمد بصوت عالي شويه..
/مروحين مع الجماعه بوي..
هز المهدي راسه بالموافقه وتبعهم بعيونه لين طلعوا من المدرسة..
رد نظره لسدرة لقاها قاعده في مكانها لكن تبان سرحانه..
خدي نفس..ومشالها...
لما وصل فيها وقف ع بعد مسافه مناسبه وقال..
/شن حالك..
شافتله بحده وحاجبها مرفوع وهي ترد..
/شن دخلك!؟
ابتسم إبتسامه خفيفه..
هي بحده:شن يضحك فيك!!؟
هوقال:ماضحكتش..
سدرة:مالا شن تسمي في هادي اللي ع وجهك..وقلدت ابتسامته..
هو رد بضحكه يقول..
/ابتسامه..يسموا فيها ابتسامه..
عقدت حواجبها وقالت..
/قلبك مولي حجر لدرجة تتصرف بلامبالاة هكي وكأنه ماصاير شي..
تبدلت ملامح وجهه للجديه وقال..
/معاش تقوليها الدوة هادي معاش تتكلمي وكأنك انتي بس اللي عانيتي وتعذبتي في حياتك..هز راسه وقالت..ايه اني غلطت وهلبه مش شويه لكن مش لازم نتحمل نتيجة هالغلط عمري كله وتركبوا ع كتافي ذنوب غيره!..
غيرت عيونها عنه وهي شاده دموعها بقوة..
المهدي؛شوفي سدرة..اني مش طامع منك بشي ولاطالب منك غير شي واحد انك تلقيلي عذر زي مالقيتي لخوك..
شافتله بحده وقالت .
/رد بالك..مانسمحلكش تلمح التلميحات هادي..
المهدي بضيق..
/والله مانقصد حاجه من اللي فهمتيها..اللي قصدته ان كل انسان لازم ياخد فرصته من السماح..اني والله حاولت ع قد مانقدر نصلح اخطائي..وقفت مع عايشة الله يرحمها ودرت واجبي معاها..الله يرحمها في اخر ايامها كانت مثال للمراة المنصفه الكريمه في كل شي حتى في اخلاقها وعطتني فوق حقي وقالت انها مسامحتني ومن قلبها..اما طوبى يشهد الله اني ماكنتش عارف بحاجه حتى حالة خوي اللي كنت نعرفه هداكا الوقت ان تعالج وشفي من مرضه..طوبى بروحها تشوفي في علاقتها معاي شن شكلها لو كنت ظلمتها ياسدرة مازال ترضى تشبح في وجهي!!؟..
تسمع فيه وماتبيش تشوفله..خايفه لوجت عينها في عينه تنهار..
تنهد وقال:ع العموم زي ماقتلك اني مش طامع منك بشي كل اللي نبيه تسمعي مبرراتي غير هكي معاش يهمني في شي..
شافتله بنظره رغم حدتها بان فيهم الم ومعاه سؤال
"معاش نهمك في شي!؟"
هو كأنه فهم نظرتها لكن خاف يتهور ويقول شي يخليها ترد عليه رد جارح..غير عيونها وقال..
/السلام عليكم..
ومشي متوجه لسيارته...
🍃ع جية طوبى اللي شافاته وهو ماشي بعدين شافت للدموع في عيون اختها عرفت انها جرحاته للمرة المليون..
..لكن ياطوبى جروح المهدي وسدرة لبعض اهون من جروحك انتي..الجروح المعلمه في قلبك وروحك ونفسك..
جروح خلت هلبه حاجات حلوة في داخلك تموت..
وللآن اكبر مسبب ليها درس بسيارته قدام المدرسه..
دار طلة ع هيئته في المرايه مشا بيده ع شعره شويه..
بعدين شاف للدرج..فتحه وطلع منه عطره المميز غسل بيه روحه غسل..رجع دسه..وخدي كيسة هدايا كبيره ونزل من السيارة..
سكرها..وتوجه للبوابه المدرسة وخش..
🍃ع طلعة سلافه من الباب الدخلاني للمبنى..دورت ع طوبى لين شافتها..ركزت عليها كيف مثبته نظرها ع مكان معين..شافت وين ماتشبح..لقت واحد انيق جدا لابس بالطو اشهب ع بدله كاجوال..لحيته خفيفه ومدرق عيونه بالنظارات..
🍃سدرة بعصبيه؛شن جابه هني هدا!؟..
غيرت نظرها طول لطوبى لما حست بقوة شدتها لذراعها كانت موجعه..لكن سدرة مااهتمش لهالوجع التافه وهي تشوف في حجم الوجع والخوف اللي بانوا ع اختها وهي تشوف للجالي..
🍃مر قدام عيون طوبى كل شي بشع عاشاته معاه..
الاستغفال..الافتراء..الخداع..الضرب المبرح..الاغتصاب..
وقفت ذاكرتها عند مشهد هديكا الذكرى البشعه بكل معنى الكلمه..
بالصوت والصورة..تسمع في الكلام اللي قاله ليلتها..وتحس بكل ضربه كانت تجيها بعد كل كلمه يقولها..
ومشاهد تانيه لايمكن وصفها قاعده تشوف فيها توا..
طلقت ذراع سدره ولفت ومشت بسرعه هاربه..وخشت لمبنى المدرسه وسلافه معاها بعيونها..بعدين شافت سدرة خاشه وراها وهي تنادي فيها..
وطوبى ماتسمع في صوت غير صوت الجالي وصوت عياطها..
حطت ايديها ع وذانها وبدت تبكي..جت للحيط وقفت عليه وهي عاطياته بالوجه غمضت عيونها بشده ومازال تشوف وتسمع مازال..
بس هالمرة تفكرت اللحظه اللي كان ناوي يقتلهم فيها هي وبنته..نزلت وقعمزت ع رووس صوابعها وهي تبكي بالعبره..
سدرة حداها كانت مرعوبه عليها تبكي وتكلم فيها وطوبى ماتسمع في شي .
التموا عليها الابلات وبنات الفرق التطوعيه يكلموا فيها..
ماتسمع في شي غير صوته بس..
وسلافه واقفه بعيده عليهم شويه وهي تشوف لحالتها بأسف..
غيرت نظرها لوحده من الابلات وهي ترد ع سؤال وحده تانيه..
"طليقها جي توا شفته"
حطت سلافه يدها ع فمها و ردت نظرها لطوبى..
وتشوفها وهي تفقد في الوعي وطيح عليهم واختها تعيط وهي تنادي بإسمها..
"طوبى"
🍃"شن جابك انت شن جاي دير هني!؟"
الجالي بضيق؛والله ماجيت لشر جيت نطلب منها السماحه وبنعطيها حاجه تخصها قعدت عندي..
المهدي وهو يحاول يتمالك اعصابه..
/ماتبي منك شي لاتطلب سماح ولاغيره جالي المراة توا غريبه عنك وتشوف فيها كيف ملتزمه يعني توا بدال الحد بينك وبينها عشرين حد..معاش تجيها ولاتفوت من ركنها ياجالي ماتخلنيش نتصرف تصرف مايعجب حد.
كتم الجالي غضبه وهز راسه وهو يقول بمسكنه..
/حاضر حاضر..مد لخوه الكيسه وقال..عطيهالها..
خداه منه وقال:شن فيها!؟
الجالي:تشوفها وتعرفها بروحها..
ولف ومشي وهو معصب ع الآخر..
غيرالمهدي نظره عنه وشاف لمبنى المدرسه وهو يفكر في حالة طوبى بقلق..
شاف سدرة طالعه بسرعه توجعت للسيارة..
ركبتها وشغلتها وتحركت بيها وهي تقرب فيها للباب..
☘بدت تمشي كويس وتسوق سيارات الاتومتك☘
وطلعوا الابلات طوبى ركبوها السيارة وبعد سكروا الباب تحركت سدرة وطلعت من المدرسه وعيون المهدي وسلافه تلحق فيهم...
🍃🍃🍃🍃
"الباين اللي مرقت فيه صعب كثير وعملا مشاكل نفسيه"
لبانه بحزن:قلبي وجعني عليها..
سلافه؛هي بتوجع القلب صح بس كمان فكرت انه مستحيل يصير شي بينها وبين عبدالقيوم..اول شي لأنها مابتحبوا ولافي بقلبها الو اي شعور..وتاني شي مابعتقد وحده مثلا فيا تخلي اي رجال يعيش معها سعيد الماضي تبعا رح يضل ملاحقها..
لبانه:هاد عندنا انا وانتي بس هو لأنه بيحبا لو شافا بالنار رح يزت حاله وراها..
سلافه بتهكم.:لاولوو..بالغتي كتير ايه صحيح مبين انه في شي من ناحيته اتجاها بس مو لهالدرجة هي صرلها سنة مطلقه ليش لهلأ ماخطبا،ماتزوجوا!؟ ليش!؟
لبانه؛اكيد بسبب ظروفا..
سلافه؛لو بيحبا الحب اللي انتي عم تحكي عنه ماكان تركها تعيش ثانيه وحده بعيده عنه..قلك شي حبيبي لبون هو صح عبد القيوم رجال فريد من نوعه بس بيضلوا مثله مثل اي رجال بالدنيا بدوا يعيش براحه واستقرار ويعمل عيلة ببيئة سليمه مع مراة فيها تحققله الاستقرار والراحه والسكن وهالشغلات كلا مابتقدر طوبى تحقق منهن شي..مشان هيك مارح يرتبط فيها..
لبانه بضيق:اذا كان هيك فعلا خافي ع حالك بكرا لو ارتبطوا وصار معك شي رح يتركك لأنه الاستقرار تبعك بح..
سلافه:غبيه مافهمتي علي مثل العاده..لقوم اعمل نسكافيه روق فيا احسنلي...ومشت طلعت من حداها..
لبانه بحزن..
"كتير تغيرتي ياإختي"
(((نعتذر ع الجزء قصير هدا اللي قدرت نكتبه اليوم)))
#كانون_الأول
#طوبى
....يتبع....
