#طوبى "جنة طوبى"
#جمان_فريد
#الجزء_السادس_والتسعين"إنت عيدي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
قال ابن مسعود رضي الله عنه :
" ما كُرِب نبي من الأنبياء إلا استغاث بالتسبيح فأكثروا من التسبيح في الرخاء والشدة ".
الجواب الكافي للإمام ابن القيم رحمه الله ( 1 / 7 )
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الغَيرةُ : غلَيَانٌ لا يزالُ في قلب المُحبِّ حتى يُنضِجَ محبَّته وتنضَحَ منه مودَّته، فإن رأيت قليلَ غَيرةٍ فقلبُه نيِّءٌ فاسِدٌ..🍃
_________________________________________
بغضب..وتوتر...
يفرك بإبهامه رووس باقي اصابع يده اليسار..
عيونه بنظراتهم اللي تقدح شرار الغيره ع غريمه الجديد اللي واقف بعيد عنهم ع حسين ويحكي هو وياه..
بينجن ويعرف شن هو الموضوع اللي يحكوا فيه..
موضوع سدرة!؟...ولا موضوع اختها الصغيره حبيبة العين والقلب!
وصاحبه اللي كان يلاعب في ولد زوجته يسرقله في النظر..ومرة مرة يشوف لعدي..
🍃وبعيد عنهم ع طاولة النساوين..
كانت اخت عدي تتفحص بطوبى بنظرها وتراقب في تصرفاتها واسلوبها..
واكثر شي كانت مركزة عليه علاقتها ببنتها..
ع جية سدرة بنت المهدي لطوبى قالتلها..
/ابله طوبى بابا يبي يشوف جنة..
طوبى:وينه؟
سدرة اشرتلها عليه وهي تقول..
/هويناه..
طوبى شافتله وابتسمت هو ردلها الابتسامه..
ناضت وهي تقول..
/شويه وجايه..
وخدت الكروسه ومشت بيها وسدرة معاها وكلهم يلحقوا فينا بنظراتهم..وايمان مركزة معاها هلبه..
🍃وصلت طوبى بجنة في المهدي وهي تقول.
/السلام عليكم..
هو رد بإبتسامه:وعليكم السلام..كل سنة وانتي طيبه..
طوبى؛كل عام وانت بخير..كيف حالك؟
المهدي:الحمدلله..انتي شن حالك وشن دايرة؟
طوبى:الحمد لله
غير نظره لجنه لقاها تشوفله ابتسم وقرص خدها بظهر اصابعه السبابه والوسطى قرصة خفيفه وهو يقول..
/بنرفعها لعمامها يشوفوها.
طوبى:مش مشكله..مانوصيكش عليها..
المهدي:كوني هانيه بنتي هادي.
ابتسمت طوبى وقالت..
/تعالي سدرة نعطيك المرضعه متاعها..
سدرة بإبتسامه؛حاضر..
وولت طوبى للطاوله خدت مرضعة جنه عطتها لبنت عمها.
مشت سدرة لبوها تجري..وطوبى ولت قعمزت..
ايمان هني تكلمت بسؤال..
/سلفك هدا؟
كلهم شافوا لطوبى..
طوبى بإبتسامه:عم بنتي..
وبسؤال تاني قالت..
/علاقتك بيهم كويسه؟
طوبى:هما كويسين..
ايمان:امم..بوها ينشد عليها؟
مطيره بدت تنزعج وبان ع وجهها..
وزينب بدت تتوتر من اسئله اختها..
طوبى:طبيعي بنته..
ايمان:في امل انكم تولوا؟
هاديه بضحكه؛حسيت روحي نتفرج ع لقاء في التلفزيون المذيعه تسأل عن البسباس ومن زرعه..
ايمان ابتسمت وقالت..
/مش قصدي نخش في خصوصياتها اني نعرفها من زينب وحبيتها من كلامها عنها وخاطري نعرف مرتاحه في حياتها توا ولالا؟
طوبى؛الحمد لله مرتاحه..
ايمان؛دوم وربي يعوضك خير..
طوبى:بارك الله فيك..
ايمان بضحكه:علاش ماقلتيش آمين شكلك ماتبيش تتزوجي مرة تانيه!..
زينب في نفسها..
"وااك ياإيمان"
مطيره:وخيتي المراة مالهاش هلبه راميه العده مش متصربعه ع شي مازال الوقت..
ايمان:اني بصراحه نتمناها ماطولش لأن حرام وحده زيها تقعد من غير زواج..
اميمه حست ان ايمان تبي تلمح لطوبى..
طوبى:الزواج مش كل شي في الدنيا..بس كان ربي كاتبلي نصيب حيجيني بروحه وفي وقته المناسب واني حاليا مانفكرش في الموضوع هدا..
ايمان بضحكه:معليشي فكري صدقيني المواضيع اللي تجيك توا اكثر من اللي جاتك وانتي بنت..
طوبى مررت نظرها عليهم وضحكت ضحكه عدم فهم..
مطيره:علاش مافهمتش؟!
ايمان:الرجاله توا يدوروا ع المراة اللي عندها تجربه لأنها اكيد تعلمت هلبه من تجربتها الاولى وحتكون حريصه اكثر بش تنجح تجربتها التانيه..
زينب:اختي خريجه علم النفس تخصصها علم اجتماع هكي ديما نمط هدرزتها..
ايمان بضحكه؛مش عارفه كان عيب ولاميزة بس كلنا خريجين علم النفس هدا حالنا.. ع العموم اني حبيت طوبى ومتأكده ان ربي حيعوضها باللي يستاهلها قريبا إن شاء الله..فنصت في طوبى بضحكه وهي تقول..قولي آمين..
مطيره بضحكه مجامله..
/كلنا بنقولوا آمين..
هاديه بضحكه؛آمين..
ضحكوا مجامله ماعدا طوبى اللي اكتفت بإبتسامه..
ولأن الحديث اللي دار ازعجها التزمت الصمت وغيرت نظرها عنهم دور في المهدي..
لقاته واقف ع عمر اللي كان رافع جنه في حضنه وجنبه نضال يلاعبوا فيها..ابتسمت ابتسامه خفيفه..بعدين غيرت نظرها عنهم..وكأنه غصب عنها رفع عيونها للأسمر..
لقاته يشوفلها لكن هالمرة كان عاقد حواجبه..
هو انتبه انها تشوفله رخي حواجبه...ونظرة عيونه تغيرت..
هي لاحظت وحست بقلبها بدي يدق بقوة هربت بنظرها عنه لطرمس الشاهي متاعه اللي كان ع الطاوله ووجهها بدي يحمر..وفي داخلها تأنب في نفسها..
"معاش تشبحيله معاش تشبحيله..بيفهمك غلط ياغبيه..استغفر الله..استغفر الله العظيم"
وهو لما غيرت نظرها عنه قال في نفسه بضيق..
"كأنها ماتبيش تعطيك فرصه..كأنها مش طايقه تشوفك اصلا"..
غير نظره لعدي اللي قاعد شاد حسين..عقد حواجبه بغضب وخوف في نفس الوقت وقلبه العاشق مقبوض..
وقف جنبه ربيع وهو رافع يحيى في حضنه قال..
/ارخي روحك وخليك عادي..
عبد القيوم بتوتر وغضب مكتوم..
/كأنهم طولوا؟!
ربيع شاف جهة حسين وعدي وقال..
/مرات يحكوا في موضوع تاني..
عبد القيوم تنهد بضيق وقال..
/نحس ف روحي مخنوق...جي بيمشي وقفه ربيع لما شد ذراعه وقال..بتروح!؟
عبد القيوم :بنتمشى..جبد ذراعه ومشي..وربيع يلحق فيه بنظرات الأسف..
🍃بعيد عنهم وين ماكانوا مقعمزين رؤوف وغرفه..
غرفه:يهبل..
رؤوف:تبي غيره؟
غرفه:لاخلاص ساد..
رجع ياكل رؤوف بعدين غير نظره جهة الساحه لمح عدي واقف ع حسين..زاد ركز تأكد من اللي شافه وقال..
/هدا شن جابه!؟
غرفه؛مني!؟
قعد يدور ع عبد القيوم وهو يقول..
/هدا عدي خو الابله صاحبة طوبى..
غرفه:اكيد طوبى قالتلهم يجوا..هو معاش كلمك عليها مرة تانيه.
رؤوف عقد حواجبه وقال:تؤ..
غرفه:بكري دوينا عليه قالولي الموضوع مناسب لطوبى لكن مش توا وحتى اني رايي من رايهم...
هو بتساؤل..
/وطوبى!؟
غرفه:مادويناش قدامها.
عبد الرؤوف:يعني معقوله صاحبتها مافتحتش معاها الموضوع بكل!؟
غرفه:لو فتحت معاها الموضوع راهو بان..واضح ماتندري ع شي..
عبد الرؤوف:هوينا واقف ع حسين شكله بيفتحه معاه..
غرفه بتساؤل:زعمه!؟
عبد الرؤوف:مالا علاش واقف معاه ع تركينه!؟
سكتت غرفه وولت تاكل مرة تانيه..
ورجع عبد الرؤوف يدور ع عبد القيوم لين لقاه يتمشي بروحه..بدت ع وجهه ملامح الأسف..
☘وعبد القيوم وهو يمشي كان غارق في افكاره وذكريات ايام يتمنى لو يقدر يمسحها من عقله ويدعي الله من كل قلبه انها ماتتكررش..
لو تحمل قبل انها كانت للجالي قبل فكان عنده شويه امل انها حتفارقه..بس توا لو صار وولت لغيره مرة تانيه..!
قلبه ماتحملش الفكره اصلا..حس انه حيموت لمجرد انه فكر فيها..
بدون مايحس زادت سرعته في المشي..
🍃وعيون طوبى عليه..في بالها انه يتريض بالمشي لأن مشيته سريعه..
توسعوا عيونها وهي تشوف فيه كيف ضرب وحده كانت تتمشى حتى هي..الضربه كانت قويه طيحت شيشة المية متاعها وتليفونها..
تأسف وهو يحط في يده ع صدره..بعدين نزل خدي تليفونها وشيشة الميه مدهولها..وهي خدتهم..
قعد واقف يكلم فيها..والبنت مبتسمه بإحراج وهي تحرك في راسها بالنفي او الرفض..
هو رجع تأسف منها لما حط يده ع صدره ولف ومشي كمل طريقه..اما البنت لحقاته بعيونها بعدين كملت طريقها وهي مبتسمه ..
رفعت طوبى حاجبها وخدودها احمروا..رمشت عيونها بسرعه وغيرتهم ليه وقعدت تراقب فيه..
وهو مازال يتمشى لين تلاقا مع ولد شنيبه وجنة عندهم وقف عليهم..
ارتخوا ملامح وجهها وهي تراقب فيهم...وارتسمت عليه ابتسامه خفيفه لما شافاته خدي جنه..توقعت ان هي اللي تبيه..
اول ماخداها جنه مدت يدها لنظاراته هو حولهم وعطاهوله..
خدتهم وقعدت تسكتشف فيهم..
🌼هي فاللحظه هادي ناسيه وين مقعمزة ومع مني..
واللي حواليها في منهم ركز عليها وين تشوف وفهموا انها تراقب في بنتها..
ايمان:نبي نطلق رجليا تنوضي تتمشي معاي طوبى!؟
زينب تنفست بضيق بدون ماحد يلاحظ حتى الخمار مدرق تعابير وجهها..
وهما شافوا لطوبى اللي ناضت وقفت وهي تقول..
/باهي..
ايمان بإبتسامه:تعالي..
ومشت طوبى لإيمان وقبل توصل فيها ايمان شافت لخوها لقاته ماشي هو وحسين لمكان الجمهور متاع المباراة.
وصلت فيها طوبى ومشوا مع بعض..
وعيون اللي ع الطاوله معاهم..
🍃إيمان:قالتلي اختي انك ديري في دونات مافيش زيهم..
طوبى بإبتسامه:عندي طريقه خاصه..
ايمان؛سر يعني..
طوبى:ايه..
ضحكت بعدين قالت..
/معليشي نسألك سؤال خاص..
طوبى هزت راسها بإيجاب وهي ساكته..
ايمان؛انتي كنتي تحبي طليقك؟
طوبى:لا زواجنا كان تقليدي..
ايمان:يعني ماتحسيش في روحك مرات تحنيله!؟
☘سألت السؤال هدا لأنه ماتعرفش كل شي عن مشاكل طوبى مع الجالي زينب ماحكتش حتى لخوها تفاصيل اللي صار في نظرها تقعد امور تخص طوبى هي تحكيهم بروحها☘
طوبى:نهائي..
