#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
. 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الماضي لا يموت .. إنه يُبعث في الحاضر .. بألف صورة و صورة ..!
..مصطفى محمود..🍃
__________________________________________
انفتح باب فيلا حسين الخارجي...
خشت سيارته هو وتبعتها سيارة عبد القيوم والباب تسكر بعدهم تلقائيا..
نزلوا من السيارات هما وضيوفهم ومازال يرحبوا بيهم..
لما سكرت سالمين باب السيارة ومشت مع طوبى وكاريمان..
دق باب الحوش..
حسين وعبد القيوم وطوبى شافوله بإستغراب..
العيله كلها في الحوش من جايهم توا!؟
قدم حسين للباب وفتح الصغير...
ويشوف قدامه شخص غير متوقعه جيته في الوقت هذا
ولاهالشخص اللي كان ناوي يطب عليهم ويفاجئهم مفاجأة غير سارة كعادته توقع انه حيلقى قدامه مفاجأة قاتله..
خش مختار وهو رافع ولده في الشنطه متاعه وخشت وراه مرته.
وكان وهو يخش يلقي في السلام بأسلوبه الخاص.
بس وين شاف الناس اللي قدامه دب فيه خليط من المشاعر السلبيه..
خوف..صدمه..ألم..خجل..
هالمشاعر خلاته يجمد في مكانه وخلت ملامح الابتسامه ع وجهه تختفي زي ماكاد يختفي لون وجهه..
واللي قدامه..كانوا يشوفوله بنظرات مختلفه..
الكره والحقد والاستنكار وعدم التقبل..
هذا كله كانوا يشوفوله طوبى وحسين بشي من الاستغراب
اما عبد القيوم فكان يشوف للمشهد بنظرات ضيق ممزوجه بالخوف..
فاتن الوحيده اللي ماكانتش عارفه حد من الموجودين واستغربت جدا في حالة راجلها اللي اصبح زي الثمثال حتى عيونه بانولها من تحت النظارات مايرمشوش..
سكر حسين الباب وقال..
/خشوا خشوا صقع ع العيل..
استاقظ مختار ونزل عيونه لولده..بعدين قرب لمرته وقال..
/خوديه..
خداته فاتن وهي تشوف لراجلها بنظرات قلق وعدم فهم..
خدي مختار نفس بطريقة غير ملحوظه بعض الشي..
رجع شافلهم مرة تانيه..عقد حواجبه وقدملهم..
سالمين وملامح الكره كانت باديه ع وجهها..
/هيا هيا نخشوا صقع..
طوبى وهي مازال مستغربه..
/هيا تفضلوا..تفضلوا..شافت لفاتن واشرتلها وهي تقول..
/هيا فاتن..
شافتلها فاتن بعدين هزت راسها بإيجاب ومشتلهم..
🍃في نفس اللحظه كان مختار يسلم ع جبريل والصابر اللي صافحوه بالغصب..جبريل بالذات كان يتمنى يخنقه ويطلع روحه..
حسين لاحظ انهم مش متقلبينه وفكر يكون السبب اللي داره مختار زمان بس اللي يشوف فيهم منهم حسه مبالغ فيه اذا كان هما تقبلوا مختار علاش هادم مش طايقين حتى يشوفوا في وجهه!؟
وعبد القيوم قريب عليهم كان بنظره مع مرته وهي ماشيه باللي معاها..
واللي معاها كانت في وحده منهم تشوف لمختار بنظرات كارهه وعيونها معبيات دموع..كاريمان..
🍃🍃🍃🍃
لما خشوا النساوين للحوش لقوا الكل في استقبالهم..
مطيره؛مرحب مرحب..
ضحكت سالمين وقالت..
/رحب بيك..
وتطلقها زغرودة خلت هاديه وفردوس يزغردوا معاها واميمه تشوفلهم وهي مبتسمه بفرح..
وقفت سالمين زغاريد وبدت تقول في الشتاوات وهما يصفقوا ويغنوا وراها...
..محلا هاليوم وميعاده..عرسك يابنت الوداده...
..يامبروك ع بنيتنا..اللي دارت فرح ولمتنا...
☘واستمرت سالمين في غني الشتاوات وكاريمان قالت معاها واشتعلت الأجواء وشاشت العيله زي مانقولوا لدرجة سالمين خلت صفيه والعروس يرقصوا وقعدت ترقص معاهم..
وفي نهايه الشوط ضمت صفيه سالمين بحرارة وقعدت تدعيلها وتشكر فيها..
وبعدين سلموا سالمين وكاريمان ومعاهم فاتن ع الجميع ودخلوهم للصاله اللي فيها الجلسة العربيه..
🍃لكن الوضع عند الرجاله كان مكهرب..
جبريل حاول يتجاهل وجود مختار بالهدرزة مع عبد المطلب وحسين وعبد القيوم..
الصابر كان مستمع وقليل مايشارك في الكلام وهذا طبع فيه لكن احيانا كان يسرق في النظر لمختار اللي لاحظ عليه توتره برغم محاولات اخفائه ليه..
ماطولش مختار في قعدته اتصل بالأقجم وطلب منه يجيه بسرعه وبعد ماجاه الاقجم سلم من بعيد وطلع طول وبطلعته ارتخت اعصاب بعضهم وارتاحوا...
🍃🍃🍃🍃🍃
بعد الغدي..
دارت مطيره شاهي العاله والهدرزة شغاله والاجواء الشتويه الحلوة طاغيه بجمالها ع اللمة..
في عز الهدرزة قالت سالمين..
/بالله كان عندكم قناة*** حطولي عليها عندي مسلسل هندي نتبع فيه..
ضحكوا..
طوبى بتعجب:قصدك المسلسل هداكا قاعد ماتمش !؟
ضحكوا وسالمين قالت..
/يقعدن بتلاته والاربعه سنين..
اميمه وهي تضحك..
/تو نشوفهالك..
ناضت للشاشه فتحتها..
وسالمين فاتت الهدرزة وقعدت مركزة ع اميمه تراجي فيها امتى تحط ع المسلسل..
وشغلت اميمه جهاز الاستقبال ودورت ع القناه لعند مالقتها وبعد حطتها لقوا المسلسل كيف بادي..
سالمين بإنتباه...
/علي الصوت علي..
كاريمان:تو بتطلع خارج التغطيه..
سالمين:خليك في حالك ياإنتي
قعدوا يضحكوا عليهم..
واميمه بعد ماعلت الصوت شويه قعمزت...
وبعد لحظات ولوا كلهم يتفرجوا بإنتباه مع سالمين ومرة مرة يعلقوا بسخريه لعند ماتمت الحلقه..
اريج بإستنكار؛شن هالبشر هادم معقوله يحكموا ع الارمله تموت بعد موت راجلها وهي حية!! شن هدا!؟
سالمين:في اللي يحرقوا فيها وهي حية معاه..
حوقلوا واسترجعوا الموجودات واريج قالت..
/الحمد لله اللي جيت ليبيه
هاديه تهكما..
/ع اساس حني خير منهم..
كلهم ركزوا معاها..
هاديه؛ماهو حتى حني نبوا الارمله تقعد عايشه ع ذكرى راجلها لين تموت وكان خدت بعده يقولوا مسرع نساته! وحيه ياحيه كان خداته عزري يطلعوا بلي الدنيا كله فيها؛ ولاالمطلقه..المطلقه اللي ينحط عليها هي الحق حتى لو كانوا عارفين ان العيب في طليقها يقعدوا يدوروله في المبررات ويقولوا هي مش فالحة ماعرفتش تسقمه وتجيبه للطريق وحتى هي يطلعوا فيها البلي الاسود كان خداها عزري تطلع سحارة وملعبه وشيطانة رجيم
نزلت طوبى عيونها وهي مضايقه لأبعد حد..
وهاديه مكمله تقول..مالا لو عندهم صغار سوا ارمله ولامطلقه وخداها بصغارها يقولوا كيف عزري ياخد وحده بصغارها!؟..تي تفكيرنا حني مايفرقش عنهم في شي نظرة هلبه ناس للمراة هني مش خير من نظرتهم ياأريج صح حني مسلمين لكن مقدمين عاداتنا وعرفنا ع الشرع قريب في كل شي بالذات مع المراة هذا علاش بنقولك احمدي ربك اللي دارك مسلمة بس بش تعرفي ان ربي حطنا فهالمجتمع ابتلاء وربي كان حب عبد ابتلاه..
🍃هاديه صاحبة تجربه زواج فاشلة ومرت بهلبه مواقف صعبه في زواجها وبعد طلاقها تكلمت بحرقه واللي عاشاته قاعد يمر قدام عيونها🍃
كلامها كان وقعه قوي ع طوبى اللي قاعده تعاني للآن وكان صعب حتى ع غرفه برغم انها مش حاطه في بالها فكرة الزواج نهائي بس بشكل او بأخر وجعها الكلام واكيد اريج مش بمعزل عنهم..
لكن اميمه اللي ربي عوضها براجل كويس وعيلة طيبه وراقيه ماحست بشي غير عدم الاتفاق مع كلام هاديه وردت عليها تقول..
/مش الكل هكي ياهاديه..
ابتسمت هاديه وقالت..
/عارفه حبيبتي ونتمنى من ربي لو يكثر من امثال راجلك وماليه..مررت نظرهم عليهم وهي تقول..سامحوني لكن خطرت عليا حاجات نوضت وجع كامداته وماقدرت ننساه..
طوبى قعدت تشوفلها وعيونها مليانات دموع وسدرة مركزة عليها لكن غيرت نظرها لكاريمان لما سمعتها تقول..
/كلنا ياما رينا ومر علينا شي مازال قاعد معانا لتوا..نا بعد قالولي الدكاترة معاش عندك امل في الانجاب الدنيا سكرت في وجهي..فكرت في راجلي وفي هله وردة فعلهم..راجلي قالي هذى قسمي وراضي بيه والحمد لله مع هك حاولت فيه يعدي يزوج قتله حقك وانا ماعنديش مشكله نهائي قالي لاياكاريمان الحاجه اللي توجعك مانديرها وعارفك كانك مكاني مستحيل تخلي عني وانتي مش خير مني ياكاريمان..
تأثروا بكلامها وطوبى حست اتجاه الصابر بإعجاب واحترام كبير..
كملت كاريمان تقول..
/فرحني كلامه لكن قلبي تمه مش مطمن وفي كل وقت نتخيل فيه يجيني يقولي بنزوج بالذات مع ضغط هله والناس اللي حواليه وهو مع الوقت اكدلي انه راجل بمعنى الكلمه عادى معاداة عشاني وخداني وطلعنا من البلاد وعيشني احلا عيشه لعند توا ماتغيرت عليا حاجه معاه..
هاديه:الله يبارك عليه ولد أصل هذا..
سالمين؛الصابر راجل اصيل طالع لباته واسياده ماريتش كيفهم في طيابتهم وكبر قلوبهم..
ابتسمت كاريمان..
مطيرة:ربي يخليكم لبعض ويصرف عنكم كل شر..
كاريمان بإبتسامه قالت..
/آمين..غيرت نظرها لطوبى لقتها تشوفلها بإبتسامه وكاريمان ردتهالها من قلبها..وعيون سدرة عليهم..
☘☘☘☘☘
واقفه قدام المرايه تحط في لمساتها الاخيرة ع طلتها.
خش عليها راجلها ومشي قعمز ع الكرسي وعيونه عليها
هي شافاته من المرايه وقالت..
/من لما روحت واني حاساتك تبي تقولي حاجه لكن متردد..
تنهد المحجوب وقال..
/فعلا..
التفتت وقعدت واقفه ع الزيانه وهي تقول..
/إن شاء الله خير..
المحجوب قال..
/اليوم جاني واحد وطلب مني غرفه..
حست نبيله بالضيق وعيونها غرقوا بالدموع..
المحجوب:كان ملح جدا وباين عليه انه راغبها بقوة..
نبيله:يعرفها شخصيا!؟
هز راسه وقال..
/شريك صغارها في المعرض عدنان الاشتر..
رفعت نبيله حواجبها وهي متفاجئه..
المحجوب:اني شبه عارف رد غرفه بس لازم نقوللها ونسمعه منها..
نبيله:شن وضعه ارمل مطلق اعزب؟
المحجوب:شبه ارمل زوجته توفت يوم عقد القران في اسبوع العرس..قالي ان بعدها قعد قريب ثمانيه سنوات مسكر موضوع الزواج لعند ماعرف غرفه..
نبيله قعدت ساكته وهي تفكر وشعور الضيق قاعد معاها..
كمل المحجوب يقول..
/قال نبيها بصغارها نبي نكسب اجر فيهم ونرعى صغار صاحبي..
بلعت نبيله ريقها وقالت..
/صح صعبه عليا وهلبه مش شويه..بس من حق غرفه تشوف حياتها لولقت راجل كويس..انت افتح معاها الموضوع وشوفها..
المحجوب:نبي ندوي معاها في وجودك..
شافتله شويه بعدين قالت..
/باهي..
المحجوب:بنأجله لبعد يتم العرس وان شاء الله خير..
نبيله:ان شاء الله..هيا اني واتيه..
ناض ومشي طلع وهو يقول..
/هيا..
خدت نبيله شنطتها وبالطوها وهي طالعه من الدار نزلت منها دمعه مسحتها طول وسكرت باب الدار...
☘☘☘☘
مع قرب المغرب..
كانوا نبيلة وفايزة وبناتها في فيلا حسين..
داروا هديكا الليله سهرية عائليه حلوة بالمرة غنوا ورقصوا وهيجوا وخلوا اميمه تعيش فرحتها بكل معنى الكلمة..
صح هدا تاني عرس ليها وممكن الكثير من الناس يستهجنوا الشي هذا بس هي واهلها نظرة الناس خلوها اخر همهم وهالشي تعلموه بعد كل اللي مروا بيه..
وعدت هديكا اللي كانت من اجمل الليالي اللي عاشوها في حياتهم..وباتت فيها فايزة مع صغارها لكن نبيله روحت..
🍃🍃🍃
مع الساعه الثالثه بعد منتصف الليل..
ناضت كاريمان من نومها للحمام وهي طالعه من الدار اللي كانت بايته فيها مع بنت خالتها ومعاهم مطيره وصفيه..
سمعت صوت حد يقرا في القرآن بصوت منخفض بعض الشيء سكون الليل خلاها تسمعه..
تبعت الصوت لين وصلت في المصدر متاعه..حجرة الصالون..
وقفت في الباب..لقت طوبى مقعمزة بالمصليه وهي عاطيه بالظهر وشاده المصحف وتقرا منه..
ابتسمت ودموعها في عيونها قعدت تتأمل فيها وهي تتفكر اول مرة رضعتها فيها هديكا الليله مش رايحة من بالها نهائي..
🔺️🔺️🔺️قبل اكثر من عشرين عاما🔺️🔺️🔺️
في وسط حوش سالمين وجبريل..
كانت مقعمزه مع بنت خالتها وهي تشوف لطوبى في يدها تبكي وسالمين تبكي معاها..
كاريمان وقتها كان عمر ولدها "رائف قريب شهر اما طوبى ماسكرتش اسبوعين..
سالمين وهي تبكي..
/هاه ياعمري هاه..هاه يابنتي قطعتي قلبي..حسبنا الله ونعم الوكيل..
كاريمان ودموعها ينزلوا..
/لهالدرجة وردة تعبانه؟!
سالمين وهي تبكي..
/مش قادره تحكي ياكاريمان..
كاريمان بدموع..
/ ماتنلام نفسيتها تعبت واجد من اللي صار كله جا فوق بعضه..
سالمين انهارت بالبكي..
ناضتلها كاريمان خدت منها طوبى وهي تقول..
/قولي لاإله إلا الله ياخيتي قولي لاإله إلا الله..
سالمين بحرقه..
/البنيه قاهرتني ياكاريمان..
كاريمان؛هدي ياقلبي ياقلبي..تو نحاول نرضعها..
وحاولت فيها ورضعت منها طوبى لعند ماشبعت ورقدت..
سالمين:الله يريح قلبك ياخيتي..
ابتسمت كاريمان وهي تشوف لطوبى كيف راقده جنب رائف..
رشفت سالمين وقالت..
/لعند امتى بتموا هنا!؟
كاريمان شافتلها وقالت..
/شهرين..قبل ناويه نقعد عندك لكن تو نقول للصابر يخلينا في حوش هله..
سالمين شدت يدها وقالت..
/لالا خليك عندي ياروما ياخيتي..
شافتلها كاريمان شويه بعدين هزت راسها بالموافقه..
🔺️🔺️🔺️الوقت الحاضر🔺️🔺️🔺️
استاقظت كاريمان لما شافت طوبى واقفه ع المصليه وتشوفلها وهي تقول..
/خالتي كاريمان خشي..
كاريمان بضحكه:خل نعدي للحمام شويه ونجيك.
ضحكت طوبى..
مشت كاريمان بسرعه للحمام وطوبى طلعت بعدها للدار اللي راقدين فيها الصغار..
طلت عليهم كلهم بعدين جت لبنتها غطتها وباستها من خدها بلطف ومشت طلعت من الدار ورجعت للصالون ع جية كاريمان..
قالت بإبتسامه وهي تقعمز..
/الجو عندكم مش صقع واجد..
طوبى:ايام ايام..في ايام الصقع فيها يخش العظم والضي مايقعدش هلبه..
كاريمان:ربك يفرج..
طوبى:إن شاء الله..
كاريمان:قوليلي شن جوكم انتي وعبادي..
ابتسمت وقالت..
/كويس الحمد لله..
كاريمان؛هو شن داير معاك؟
طوبى بإبتسامة حب..
/مافيش منه ياخالتي..
كاريمان:راجل كويس عبادي ربي يخليكم لبعضكم ويهنيكم..
طوبى:آمين..
ضيقت كاريمان عيونها وقالت متسائلة..
/كيف علاقته مع جنة؟
طوبى بضحكه..
/تحبه وواخده عليه من قبل مايتزوجني.
كاريمان:معناها قاعده معاكم هي توا؟
تعكرت ضحكة طوبى بعدين قالت..
/لاقاعده مع خواتي..
كاريمان بإستغراب..
/ليش؟
بلعت طوبى ريقها اللي حساته نزل في جوفها زي السم وقالت..
/ماهو زي ماتعرفي الحضانه توا مش ليا الاولى تقعد مع خواتي..
..مابتش طوبى تخبر كاريمان عن حقيقة وضعها وكاريمان لما لاحظتها تجاوب فيها وهي مرتبكه ندمت اللي سألتها سؤال زي هذا..
كاريمان:ايه صح عندك حق مفروض فكرت في الحاجه هذي واضحة يعني عليك سؤال غبي..
ابتسمت طوبى غصبا وقالت..
/حاشاك خالتي..ولايهمك سؤالك عادي ومافيه شي..
قعدت تشوفلها كاريمان وهي مبتسمة بحزن بعدين قالت..
/كل ماتجي ع بالي ولانشوفك نذكر اول مرة شفتك فيها..كنتي بيبي صغيرة واجد كيف جابتك امك..
طوبى تسمع وهي مبتسمه والدموع في عيونها..
كاريمان حطت ايديها في بعضهم وضمتهم لبعض بقوة وقالت..
/بعد زوجت عمك الصابر سافرنا ل***** وتمينا فيها لعند ماجبت ولدي رائف،قبل يكمل شهر ردينا لليبيا زياره ساعتها ماكانش عندنا حوش في بنغازي ولأن علاقتي بسالمين قويه وهو صاحب جبريل تفاهمنا نقعدوا عندهم لعند ماتكمل الاجازة..ضحكت وقالت..علاقتي بأمه وخواته ماكانتش حلوة واجد..تنهدت وقالت..المهم وين روحنا عندهم تفاجئنا بأمك وباتك قاعدين معاهم،ماكانش عندنا علم لأن ليا فترة قبل الردة اتصالاتي بسالمين مقطوعه اخر مرة حكيت معاها بعد سمعت بوفاة خالتي بعدها معاش حصلتها...
واللي زاد صدمني بعدها موت وحده تعز علينا انا وسالمين واجد ماتت مريضة مسكينه وسالمين تأثرت واجد بموتها الله يرحمها وكانت نفسيتها زي الزفت تلاقن عليها تعب امك بعد الولادة وموت المراة هذي..
قاطعتها طوبى وهي تقول بإستغراب..
/امي تعبت بعد ماجابتني!؟
هزت كاريمان راسها بإبجاب نزلوا دموعها وهي تقول..
/حتى الرضاعه ماقدرتش ترضعك وفي اول ليا معاهم خديتك رضعتك..
بدت ع وجه ملامح الصدمه..
كاريمان ودموعها ينزلوا كملت تقول..
/وتميت عندها شهرين رضعتك فيهن مع ولدي لعند ماوليتي اخته وبعدين ردينا سافرنا من جديد ووالله عز عليا نخليك حسيتك تميتي بنتي حتى نا ويعلم الله قداش خشيتي قلبي ياطوبى..
طوبى بعدم استيعاب..
/غير راجي شويه بالله عليك..كيف اني مانعرفش بحاجة زي هادي!!؟ مافيش مرة حد قالي ان امي تعبت بعد جابتني واني رضعت من غيرها!
هدت كاريمان ومسحت دموعها وهي تقول..
/سالمين قالتلي ان سدرة ماتبيكش تعرفي بحاجه كيف هذي قالت من غير شي واجعها انها كبرت من غير امها مابتش تخبرك بيش ماتزيدي تنقهري..
طوبى بصدمه وعدم اقتناع..
/مافهمتش..هي صار معاها نفس الشي امي لما جابتها تعبت وماقدرتش ترضعها ورضعتها خالتي صفيه حاجه خارج ارادة امي مش بيدها علاش بنتوجع منها يعني!!
كاريمان:سدرة تحبك واجد وكانت تخاف عليك من كل شي وتراعي فيك رعاية نادر ماتلقي ام ترعاها لولدها ماتبيكش تحسي بالنقص بأي شكل..
طوبى وهي غارقه في حالة الصدمة قالت..
/مش مبرر..كان لازم نعرف..لازم تقولي..
