[كان الله في عون اهلنا في غ.زة دعائكم معاهم هدا أضعف الإيمان ]
#طوبى "جنة طوبى"
#جمان_فريد
#الجزء_المئة_وواحد"حسابات قديمه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ». 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " ما كلّ شيء يمكن أن يُحكى بالكلام، هناك أمورٌ يُحسن بالمرء أن لا يجيء على ذكرها أبدًا.....دستويفسكي🍃
_____________________________________
"تفضلوا"
هادي اخت زينب وهي دخل في صديقتها وسدرة لحجرة المكتب متاع خوها..بعد ماخشوا قالت بإبتسامه..
/خودوا راحتكم
هزت سدرة راسها ردا عليها وصديقتها قالت..
/مشكورة حبيبتي
طلعت وسكرت الباب...
وجهت الدكتورة نظرها لسدره وقالت..
/قعمزي ياسدرة المنتهى ارتاحي..
قعمزت سدرة ع الكنبه وحطت القيلا جنبها وهي تشوف للطبيبه كيف قعمزت مقابلتها..
الطبيبه:اسمك حلو وليه وزنه لايق عليك هلبه..
ابتسمت وقالت؛شكرا..
بإبتسامه قالت:حكتلي اختك عليك خلتني متشوقه نشوف هالمراة العظيمه اللي قدمت تضحيات غاليه وكانت هي العمود الحقيقي لحوش العيله..اختك هكي قالت..
تعبت عيون سدرة بالدموع وفاضوا..مسحتهم ونزلت عيونها لإيديها اللي قعدت تفرك فيهم ببعض..
بأستفهام قالت:علاش تبكي ياسدرة فرحك كلامي ولاضايقك؟
حمحمت سدرة وقالت..
/الزوز...
الطبيبه:علاش فرحك وضايقك في نفس الوقت؟
🍃ومن جلسة العلاج النفسي لجلسة هدرزة تعارف بين ام عدي وطوبى..
ام عدي:الله يبارك عليك اللي ديري فيه كله مخليك فايته عمرك بنات هالوقت عطيهم السوق والدهوير واللبس والمكياج لكن انتي الله يبارك شاغله نفسك بحاجات كبيره وقايمه عيلتك..
طوبى بإبتسامه؛الظروف تحكم اني قبل ماكنتش هكي بس ظروف الوقت غيرتني..
اخت زينب قالت؛مش كل اللي مر بظروفك يولي زيك انتي هكي من الاساس مراة تتحمل المسؤوليه وتحمل هم..
ابتسمت طوبى بخجل خلاها مش عارفه ترد ع مديحهم ليها..
زينب بإبتسامه:ياريتك جبتي جنونه معاك..
طوبى:لاسلامتها حركية هلبه ماتهنيش روحها..
زينب واختها قالوا مع بعض..
"ربي يحفظها...سلمها ياربي"
اما ام عدي كانت زي كل ام تحب دقق غ تفاصيل المراة اللي تبيها تكون زوجه لولدها..عاجبتها طوبى هلبه لكن وجود جنه مخليها حاسه ان الموضوع مش حيتم تعلق طوبى ببنتها هو اللي خلاها تفكر هكي..
🍃وصاحب الشأن اللي كان عنده مشوار بيمشيله لغاه وقعد في جنان الحوش شاغل نفسه بالتليفون وهو يراجي امتى يطلعوا بش يشوف ام العيون الحايرة..
🍃🍃🍃🍃
وفي شارع القهوة..
كان عبد القيوم مقعمز في مقهى نضال مع صديقه المقرب..
ربيع:شاغل نفسك بيهم هلبه خليهم يحلوا مشاكلهم برواحهم..
عبد القيوم:شن شاغل نفسي بيهم هذي!؟ قتلك الموقف صار قدامي حقيته يضايق فيها تبيني نقعد نتفرج ولانعدي عنها ونخليها وكأني ماشفت شي! كان صار نفس الموقف مع وحده مانعرفهاش مستحيل نخليها يابال هذي اللي نعرفها ونعرف هلها..!
ربيع؛ok معاك..بس يعني انت مش خايف ان تصرفاتك هادي تنفهم غلط..يعني سلافه تفهم غلط وتتأمل فهمت عليا!؟
ضحك عبد القيوم نص ضحكه وقال..
/ياراجل..مش عارف امتى تحول من راسك هالفكرة البنت عاديه جدا تصرفاتها عاديه ولامرة شفت منها تصرف برا الطريق..من لما عرفتها ولامرة خشت عليا ماسنجر وفتحت مواضيع كله كلام في الضروري وكلمه وقص..كم له رقمي عندها ولامرة حكت معايا كان للضرورة القصوى..كان في نيتها شي تاني شن يمنعها تتقرب مني وتاخد راحتها معاي!؟
نزل ربيع نظره لفنجان القهوة وهو يفكر في كلام صاحبه..
عبد القيوم؛المهم في النهايه طلع الشاب قصده شريف ويبي يخطبها لكن هي رافضه..
قام عيونه وقال:ليش؟
عبد القيوم وهو يحرك في فنجانه قال..
/لأنه ليبي..
رفع ربيع حواجبه تعجبا وقال..
/اها معناها تبي تتزوج سوري..
عقد عبد القيوم حواجبه وهو يقول..ماحسيتش هكي..اخت الشاب كانت صديقة سلافه ليها مدة علاقتهن مقطوعه ع حسب مالاحظت يعني..اللي فهمته ان هله مايبوش..
ربيع هز راسه وقال...
/وهو شكله يبي يجبرهم..تفكر صح البنت..
قعد عبد القيوم محتفظ بصمته وهو يشوف لفنجانه بنظرات ضيق..
لاحظه ربيع وقال..
/خيرك!؟
قام عيونه وهو يتنهد بعدين قال..
/الموضوع هذى بدا مسببلي هاجس..خايف لو..رجع نزل عيونه للفنجان...
مرر ربيع نظره عليه شافه يشد ع قبضة يده اليسار بقوة..
ربيع:علاش توا بس فكرت هكي!؟
عبد القيوم بضيق؛علاقة اللي اسمه عدي بيهم ولت اقوى من قبل وحسيته عاجبهم واجد يعني لو فتح معاهم الموضوع يرحبوا بيه واكيد حيفضلوه عليا..
ربيع؛يفضلوه عليك انت اللي دايرينك ولدهم!..
عبد القيوم:صح ليا مكانه عندهم لكن مرات يكون ليها حدود ياربيع..
ربيع؛باهي فرضنا صار هكي فعلا..بتسلم فيها!..
بفزة قلب قال:مستحيل لو شن يصير مستعد ندير ع خاطرها اللي مايندار قتلك قبل..بس في نفس الوقت نبي كل شي يمشي طبيعي نبيها تفرح مش تزيد تتكدر نبي نعوضها مانبيش نزيدها وجع ع مواجعها..
ربيع:هدا علاش تبي تتقرب من مختار..
تنهد بضيق وقال:لأنه ولى قريب ع سدرة وسدرة تأثر فيها وفي العيله كلها حاس انها الوحيده اللي تقدر تخلي كل شي يتم كيف مانتمنى..
ربيع:انت تبي تنسى من يكون مختار!
حرك راسه بالنفي وقال:نهائي..عارف ان في عنده هدف يبي يوصله عن طريقي شن هو بالزبط مش عارف لكن حتى انا عندي هدف وحنوصله عن طريقه يحب ولايكره..
ربيع بقلق:رد بالك ياعبدو مختار خطير...
هز راسه وقال:انا اللي نعرفه..ونعرف انها تستاهل نجازف ع خاطرها..
ابتسم وقال:تو انت ضامن ان فيها شي جيهتك!؟
عبد القيوم بضحكه:كيف ما نشوف فيك..
ضحك ربيع بعدين تنهد بقلق وهو يقول..
/ان شاء الله خير ياصاحبي ان شاء الله خير..
عبد القيوم بإبتسامه..
/ماتخافش خير بإذن الله واللي ربك يبيه يصير...
🍃وياريت ياعبد القيوم طريقك سالكه لطوبى زي ماكانت طريق سالكه لعمتها..
علي الواعر مقعمز مع بنته في المربوعه بش يفتح الموضوع ومطيره كانت عارفه..من اول ماقعمزت معاه عيونها في الارض وهو بدي يحكي ع الموضوع بهدوء ولطف عكس طبعه المعروف..
علي الواعر:يابنتي فكري القدام غدوة كل حد يلهى بعمره وانتي تقعدي بروحك..الراجل كويس هلبه يابنتي وعيلته ناس باهيه وسمعتهم زي البرلنت واخدين منهم وعرفنا اخلاق بنتهم كويس وخوها زيها وخير منها إن شاء الله..
سكت ومازال مطيره محتفظه بصمتها خجلا من بوها..
علي الواعر:هاه تكلمي شن قولك؟
مطيره؛عطيني يومين نفكر ونرد عليك..
هني فهم علي الواعر ان بنته راضيه..هز راسه وقال..خلاص خودي راحتك وفكري ع مهلك وتفكري كلامي نبي بالي يرتاح عليك يابنتي..
حست بوجع في قلبها..رفعت عيونها فيه وقالت..
/ربي يطول في عمرك..وناضت بسرعه طلعت من حداها بعد ماحست برغبه شديده في البكاء..
اما هو تنهد وقال بضيق..
"يارب"..
🍃🍃🍃🍃🍃
ويعدوا ساعة ونص وسدرة في الجلسه نفسه وطوبى تحاول تجامل زينب واهلها وعقلها مع اختها..
شويه وخشوا عليهم..شافت طوبى لسدرة..بان عليها شحوب وجهها واثار البكاء في عيونها ناضتلها وهي تقول..
/شن جو سديرتي..
سدرة بصوت مرتعش:تمام..هيا نروحوا..
هزت طوبى راسها وهي تقول..
/حاضر..
☘سقدوهم اهل عدي..وهما طالعين شافوا عدي واقف ع سيارته يظاهر انه يصلح فيها..
فهموا عليه امه وخواته..لكن طوبى ولاانتبهت لوجوده بكل حواسها كانت مع اختها..
طلعت هي وياها وركبوا السياره وطول تحركوا...
زينب بحزن؛قداش وجعتني ابله سدره الله يرحم ايام كانت مديرتي..شخصيه قويه وهيبه..
اختها قالت؛الوضع اللي هي فيه مؤقت مع العلاج تولي زي ماكانت..
امهم قالت؛قداش خشت خاطري وخيتها قداش عجبتني..
ابتسمت زينب..
ع جية عدي اللي قال..
/هاه شن الاجواء..
زينب بحزم؛ايه حقه عدي ردي بالك تجيب سيرة لخالها..
عقد حواجبه وقال:علاش!؟
زينب:طوبى تبي هكي واني مابيتش نسألها عن هز راسه وقال:تمام..
اخت زينب:خل نمشي نخش للمراة قعدت بروحها..
ومشت بسرعه خشت واختها زينب لحقتها وخلوا امهم مع خوهم اللي كان سرحان بتفكيره..
قالتله؛قول يارب..
ابتسم وقال؛يارب..ومشي بطريقه لسيارته وامه لحقت بناتها..
☘☘☘☘☘
في الطريق..
كانت سدرة ملتزمه الصمت عيونها ع الطريق بس..
وطوبى تفكر في حالتها وتبي تعرف شن صار معاها لكن ماتقدرش تسألها...
قطعت سدرة صمتها لما قالت..
/مانبيش نروح طول..مافيش جردينه ولا مكان قنين نقعمزوا فيه..
طوبى بإبتسامه؛في لكن قبلها خل ناخدوا نقيرشات نكسدوا بيهم..
ابتسمت سدره ابتسامه فرحت قلب طوبى..
🌼خدت طوبى عصائر وكريب ورفعتها للجردينه اللي مشولها ايام العيد..
🍃وهما مقعمزات يشربوا وياكلوا..كانوا يسمعوا بين فترة وفترة صوت اشتباكات بعيد هلبه..
سدرة بضيق:زعمه هدا وين يطيح!؟
طوبى تنهدت وقالت؛الله اعلم..
سدرة؛مش عارفه امتى بتم ولوين بتوصل سبعه شهور لتوا وكل ماله الوضع يزيد يتأزم..
طوبى:نقولوا ربي ينهيها عن قريب هو القادر على كل شيء..
سدرة هزت راسها وقالت..
/آمين..
سكتوا شويه وهما يشربوا في العصير بعدين سدرة قالت..
/خو ابله زينب حاط عليك العين..
تنهدت طوبى والتزمت الصمت..
سدرة شافتلها بنظرات طويله بعدين قالت..
/مرة تانيه نسألك طوبى..انتي حبيتي الجالي؟!
ابتسمت وقالت..
/والله العظيم ياسدرة لا صدقيني..
سدرة بضيق؛نشوف في عيونك حزن ماكانش فيهم قبل عيونك كانوا صافيات ويضحكوا لكن توا حسيت روحي نشوف في لونهم تغير من الحزن..
مر قدام طوبى كل شي مؤلم عاشاته..نزلوا دموعها وقالت..
/ايه صح واجعتني روحي وهادي ساده..قصدي ياسدرة مراة راجلها يفضل عليها وحده تانيه شويه!؟
سدرة بحزن:عارفه مش ساهل اني اللي نعرف..بس نحس بيك مريتي بشي اكبر من هكي شي كبرك سنين وسنين..مافيش شبه بكل بين طوبى اللي نعرفها وبين اللي قدامي..
مسحت طوبى دموعها وهي تقول..
/اللي صارلك دار فيا هلبه..تعرفي قيمتك عندي..تعرفي قداش نحبك وين غبتي عني حسيت روحي كنت طفله ووليت عزوز كبيره فقدت الحياة معناها عندي..بس قاومت ع خاطر بوي الله يرحمه..بنبرة باكيه كملت تقول..وبعد موته انهديت هد..هد ياسدرة حسيت معاد قعدلي حد..حطت يدها ع فمها وقعدت تبكي..
وسدرة اللي تسمع فيها قعدت تبكي بصمت..
هدت طوبى شويه وهي تقول..
/لكن الحمد لله..ربي ماخلانيش..وعيلتي كانت ديما معاي وسخرلي حتى الناس البرانيه..قواني وشد آزري خلا عندي امل انك حتولي والحمد لله هاك وليتي وهاك مقعمزة حداي..شدت يدها وقالت..والله ماحسيت روحي عايشه الا لما روحتي..
سدرة شدت ع يدها بقوة وهي تشوفلها بإبتسامه حب ودموعها ينزلوا..
طوبى بإبتسامه من بين دموعها..
/المهم توا شدي حيلك وخليك سدرة اللي نعرفها كملي علاجك وعيشي حياتك توا عيشي لسدرة وبس ومعاش تفكري في حد ساد العشرين سنه اللي راحو من عمرك..ساد..
سدرة بضحكه:شكلك تبي تزوجيني..
طوبى بضحكه؛ايه للي يستاهلك..
تنهدت وطلقت يد اختها وولت تشرب في العصير..
وطوبى ولت تشرب حتى هي وعيونها عليها...
🍃وروحوا قبل المغرب بدقايق...
وين خشت السيارة للشارع شافت سدرة للورشه لقت بلال طالع ومعاه وحده لابسه ملايه وخمار ورافعه عيل في حضنها..
بإبتسامه قالت؛صار يوسا تزوج ودار صغار..
طوبى بإبتسامه؛بلال مش يوسا وقريب يحفظ القرآن الله يبارك..
سدرة:الله يبارك..انتي وين واصله في حفظ القرآن؟..
طوبى؛بديت نحفظ في سورة الشعراء..
سدرة:اللهم بارك ع بنتي الشيخه..
ضحكت طوبى..وهالضحكه جت في عيون عبد القيوم اللي كان واقف ع جدها قدام الحوش...فيسع غير نظره عن السياره وقلبه فر فران..
علي شاف للسيارة كيف تخش من الباب ابتسم وقال..
/هيا..
عبد القيوم وهو يحاول يخفي ارتباكه..
/هيا...
ع طلعة المهدي ونضال اللي من مطحنه واللي من القهوة..
شاف علي الواعر لنضال وهيئته اللي بدت تتغير..
ولى ملتحي..لبسه مرة افرنجي ومرة عربي لكن حسب الضوابط الشرعيه..حتى طباعه تغيرت ولى راكز وزرين...
علي:التزم صغير عيت شنيبه!؟
عبد القيوم:بدي يتعلم في العلم الشرعي ويحفظ في القرآن..
علي؛كان ماهو ماشي في طريق الدو.اعش..
عبد القيوم بضحكه؛لالا مش هكي..
علي؛ياودي عيلة شنيبه ماتجي منهم تضحك..
التارقي قعد يضحك من غير صوت..
فات من جنبهم المهدي وهو يقول .
"السلام عليكم"..
ردوا عليه السلام وهما بعيونهم بعدين الحاج علي قال..
/كواسم..
عبد القيوم بضحكه؛رانا ماشيين نصلوا..
علي الواعر:هالعيله طلعك من المله بكل استغفر الله العظيم..
وعبد القيوم مش قادر يمنع نفسه عن الضحك..
🍃🍃🍃🍃🍃
بعد المغرب..
روح الصيد من المصحة وكان الحوش مزحوم بعايلات ولاده حتى نجاح راجلها جابها من العجيلات...
داروله سرير في المربوعه ورقدوه عليه وقعدوا معاه ولاده ونسيبه...وشويه وبدوا يخشوا الجيران ع راسهم نساباتهم حوش شنيبه..ولحقوا بعدين علي الواعر وولده عبد المطلب..
🍃🍃🍃
مطيره؛نمشولهم غدوة وخلاص..
طوبى:نمشوا اني وياك وسدرة
اميمه؛واني معاكم..
سدرة:وغرفه منو بيها؟
صفيه:واني شن قاعده ندير!؟
سدرة بإستغراب:كيف قصدك مش ماشيه!؟
صفيه:نمشي اليوم اللي بعده..
طوبى:خليها ع راحتها المهم غدوة انتي تمشي معانا سديرتي..
سدرة هزت راسها وقالت..
/اكيد مانقدرش نعطل عليهم عمرهم ماعطلوا علينا..
ابتسمت طوبى..
خشت عليهم اريج وهي تقول..
/من غدوة بنبدا خدمه في المدرسة..
طوبى:ع خير إن شاء الله...
سدرة؛قريبه ولا بعيده؟
اريج؛في نفس المنطقه..
هزت سدرة راسها بصمت...
غرفه حطت بنتها بعد مارضعتها وقالت..
/نخمم في يوم اللمه..
طوبى:ماعندك علاش تخممي الامور كلها تمام زدت اليوم اتصلت واكدت ع كل شي ونهار الخميس بإذن الله بنمر عليهم كلهم الصاله وشركة التنسيق والمعمل..
غرفه بحب؛نجيهالي ياربي نجيهالي..
ضحكت طوبى وهما يشوفولها بإبتسامه بعدين سدرة قالت..
/الجرنونه وين؟
"ماما"..
طوبى بصوت عالي..
/هني ماماتي تعالي تعالي..
كلهم وجهوا نظرهم للباب لين خشت عليهم وهي تحك في عيونها..
سدرة بضحكة..
/يانجي شدوقها يارب..
ومشت جنونه دبه دبه لين وصلت في امها وطاحت عليها..
وطوبى ضمتها بقوة وبدت تبوس فيها وتلاعب...
وعيون سدرة مافارقتهمش...
🍃🍃🍃🍃🍃
"ناس طيبه وحلوين هلبه ياامينه"
امينه بإبتسامه:تعرفي اني ماكنتش متوقعه انهم يقبلوكي بسرعه كده..
فاتن بإبتسامه؛ايام عمي لطفي كان حي مشتيلهم وتعرفت عليهم استلطفتهم هلبه وعمي لطفي بالذات حبيته عاملني بلطف وذوق وكلمني بإحترام مااستغربتش قوة شخصية بناته تربوا ع الاحترام والتقدير والحب والحن عاملهم ع انهم ملكات ودارلهم قيمه..سبحان الله باينه فيهم الربايه ع العز زي مانقولوا..
امينه؛البنت لما ابوها يعملها قيمه هي في نفسها كده تبقى ملكه..
فاتن بإبتسامه:مزبوط..
تنهدت امينه وقالت..
/عايزة ايه ع العشا؟
فاتن:اي شي من ايديك الحلوات..
ابتسمت امينه وهي تقول..
/ياحبيبتي..وناضت بفنجان القهوة متاعها..
وقعدت فاتن معاها بعيونها لين طلعت بعدين سرحت بتفكيرها...
🍃🍃🍃🍃🍃
الساعه 11:00ليلا..
اميمه؛انتي امتى بتمشي غدوة؟
طوبى؛بإذن الله بنطلع من هني العشرة نرفع اريج لمدرستها ونمشي غادي..
اميمه؛مع 11 نكونوا غادي..
طوبى؛تمام...
تنهدت اميمه وقالت..
/هي تصبحي ع خير..
طوبى:وانتي من اهله..
مشت اميمه للباب الفاصل وطوبى معاها بعيونها لين خشت لحوش جدها...
بعدين هي خشت لحوشها وسكرت الباب بالمفتاح..
🍂🍃🍂🍃
وكعادته الليل كان فيه ناس راقده وماتندري ع شي..فيه ناس مجافيها النوم وين يخطر عليها كل شي..
سدرة وطوبى كل وحده فيهم كانت في دار اللي حواليهم راقدات وهما بس اللي عيونهم ساهره افكار تاخدهم وافكار تجيبهم..
تفكير طوبى كان محصور في جلسة العلاج متاع اختها تبي تعرف من الدكتور شن صار فيها وشن استنتجت منها..
حاولت ترقد بش بعدي الليل بسرعه ويطلع تاني يوم كانت ناويه وهي في المدرسه تكلم الدكتورة هاتفيا غادي ع راحتها وتفهم منها..
🍀وجي اليوم اللي بعده..
كان الاربعاء..رفعت طوبى اريج للمدرسه اللي تخدم فيها بعدين توجهت طول لمدرسة اختها
بعد ماوصلت غادي اطمنت ع الوضع وعطت علم للمسؤولين اللي معاها ع جية الاطباء اليوم للمستوصف وطلبت منهم ينسقوا دخول الحالات ع الاطباء بش ماتصيرش فوضى وربكه..
بعد مادارت هدا كله..مشت لمكان في الساحه بعيد شويه عن الزحمه واتصلت بالطبيبه..
🍃فهالوقت خش التارقي للمدرسه..ومشي طول باتجاه واحد من المباني اللي كان قبل معمل حاسب..
سلم ع الناس اللي يعرفوه في طريقه..وناشب الصغار اللي قابلهم..بعدين كمل طريقه للمبنى لين وصل فيه وخشله..
🍃بعيد عليهم بمسافه كانت طوبى واقفه تسمع في كلام الطبيبه اللي تشرح عن حالة سدرة..
"هي توا تبي تهرب للماضي ورافضه الحاضر..الماضي اللي نقصده هني مش الزمن اللي كان قبل الفترة اللي ناسيتها لا..الماضي اللي نحكي عنه ابعد من هكي..ايام امك الله يرحمها..ولاحظت حاجة جدا مهمه..اختك عايشه عقده الاحساس بالذنب محمله نفسها ذنوب اللي حواليها الناس اللي تحبها تحديدا..امها بوها صديقتها المتوفيه وخوها الكبير..هدا بالذات لما جت تحكي عنه انفعلت بقوة وبكت بكاء شديد.."
طوبى بضيق:اني كنت متوقعه الشي هدا حسيته من طريقة كلامها عن الماضي وردة فعلها بعد بموت عيشه الله يرحمها..بس عندي سؤال..يقدر اي حد يستغل حالتها هادي ويكبر عقدة الذنب اللي قلتي عليها؟
"ايه..مش شرط اشخاص..حتى المواقف والاماكن"
طوبى؛الاماكن!؟
"ايه مكان معبي بذكريات ترد فيها للماضي تحديدا للجزء المحزن منه حتى مرات تكون في ذكريات حلوة بس تخلي صاحبها يتحسر عليها بعد يتفكرها وتسببله ألم"
طوبى:دكتورة الشي هدا مرات يخلي رجوع الجزئيه المفقودة من ذاكرتها بعيد شويه ولا؟
"للأسف ايه.."
طوبى؛كيف يعني توا لازم تقعد في مكان تاني!؟.
"لامش بالضرورة اللي لازم يصير انكم تحكوا معاها عن الفترة اللي هي غابت فيها وعن الفتره اللي ماتفكرتهاش.. ذاكرتها هكي حتتحفز وتحاول ترجع المشاهد المفقوده.."
طوبى:تمام..باهي نرجعوا لعقدة الذنب اللي قلتي عنها..شن لازم نديروا بش تطلع من هالحاله..
"بداية خلوها ديما تحس انها مصدر فرحة وبهجة ليكم لازم تحس ان وجودها غير حالكم للأحسن حسسوها ان فترة غيابها تفرق عن وجودها بيناتكم فكروها مرة مرة باللي داراته معاكم هالشي مهم جدا جدا ياطوبى.."
🍃ومجرد مانهت طوبى المكالمه مع الطبيبه النفسيه بدت تفكر كيف طبق نصايحها...كانت تمشي بإتجاه الواجهة الاماميه للساحه بش تخش للمبني..
وعقلها مازال يفكر..في لحظه وقفت عن التفكير ووقفت في مكانها لما شافت بنت غاية في الجمال والجاذبيه شكلها مميز وهيئتها غير مألوفه..
كانت تمشي وهي مبتسمه وعيونها مدرقتهم النظارات..
وقفت وقامت تليفونها دارت اتصال وكانت تبان انها دور ع حد لين لقاته..بدت ع وجهها ابتسامه حلوة وهي تنزل في تليفونها بعدين كملت مشي..
التفتت طوبى بتشوف وين ماشيه..
اللي شافاته خلاها تحس وكأن في نار ركبت فيها من رجليها ووصلت لقلبها وولعت فيه...
بدت تتنفس بسرعه لكن بشكل غير ملحوظ..وقلبها يدق بقوة..
تبع فيها بعيونها اللي بدت تعبي فيهم الدموع لين شافتها واقفه عليه..
مش محتاجه تسأل نفسها بش تعرف من هي..
واضحه..من الهيئة والشكل..البنت السوريه..
لما شافت ابتسامته اللي بانت ع وجهه لما شافها ووقفتها عليه وكلامهم مع بعض بأريحيه..حست برغبه شديدة في البكاء..وبكل قوة حبست هالرغبه..
☘بنت عمها اللي ليها دقايق خاشه للمدرسه لما جت بتتصل بيها تراجعت لما شافتها..مشتلها طول.. لكن وهي ماشيه لاحظت انها مش ع بعضها وركزت عليها كيف مركزه بنظرها ع مكان واحد..شافت وين ماتشوف..تفاجئت..وقفت وراها وهي تشوف للتارقي واقف ع بنت غايه في الجمال لفتت انتباه كل العيون مش غير عيونهم..بس اللي لفت انتباهها اكثر هو تعامل عبد القيوم معاها..تعرفه كويس مالاش في الجنس الناعم..ولايتعامل معاهم الا بحدود معينه..
بنت عمها معاش تحملت حست بنار قلبها انتشرت في صدرها حرقتها...خنقتها...
وين لفت بتمشي انفزعت لما شافت اميمه..
اميمه رسمت ع وجهها ابتسامة ربكه وقالت..
/طوبى..
طوبى بتصنع القوة ولامبالاة..
/هيا تعالي..ومشت من قدامها..واميمه بعد شافت للتارقي والبنت اللي معاه لحقتها...
🍃سلافه:هي موجوده هلأ؟!
عبد القيوم وهو يدور بعيونه..
/مش عارف..الله اعلم تجي اليوم ولالا..كان ماعندك شي ارجيها شويه..
سلافه بإبتسامه؛لا ماعندي شي..
هو رفع عيونه لأعلى المبنى بعدين قال..
/تجي معاي نوريك مكان سمح مرات يخطر ع بالك ديري فيه حاجه..
هي بإبتسامه وقلبها يرقص من الفرح..
/تمام..
مشي قدامها وقال..
/تعالي...
قلبها سبقها ليه وهي لحقتهم الزوز..كانت تحاول ع قد ماتقدر تكون عاديه وتكبح جماح مشاعرها اللي لحد الآن خاضعين لسيطرتها..
🍂وهما خاشين للمبنى شافتهم طوبى وهي واقفه جنب المستوصف والحريق اللي في قلبها كل ماله يزيد يكبر وينتشر...
واميمه اللي كانت واقفه ع زميله ليها كانت مركزة عليها...
🍃🍃🍃🍃🍃
في الكوجينه..
مطيره بتبدا دير الغدي..وسدرة مقعمزة حداها تشرب في عصير طبيعي وعيونها عليه..
شويه وحطت الطاسه ع الطاوله وقالت..
/عمتي..
التفتت مطيره وقالت..
/نعم؟
عقدت حواجبها وقالت..
/علاش ماتبيش تحكيلي ع موضوعك؟
مطيره بإبتسامه..
/وانتي تبيني نحكيلك عليه؟
سدرة:طوبى قالتلي أجلتي الموضوع لين نروح بش تاخدي رايي فيه..
مطيره؛ونبيك تحضري معاي كل شي من البداية لكن بعدين حسيتك مش متقبله ومش عاجبك مابيتش نحكيلك عليه..
تنهدت سدرة وقالت..
/باهي تعالي احكيلي..نبي نعرف كل شي بالتفصيل من البدايه..نبي نعرف من هو اللي خدي عقل مطيرة وخلاها ترجع عن توبتها..
مطيره بضحكه:يامعفنه..وقدمت قعمزت قريبه عليها وبكل حماس بدت تحكيلها عن شكري..
🌸وبنفس الحماس كانت سلافه تقول في رايها لعبد القيوم ع المكان اللي كان اشبه بالروضه لأطفال النازحين...
طلعوا من المبنى وعبد القيوم يسمع فيها وهو يدور بعيونه ع طوبى لين جو عليها واقفه ع وحده من النازحات تتكلم معاها..
ابتسم من قلبه ورفع نظاراتها ولبسهم ووقف مع سلافه في مكان معين..
سلافه:رح جيب دفاتر رسم وعلب تلوين الاطفال بيحبوا هالشغلات كثير
هو بإبتسامه قال..
/صح..في نفس الوقت درنا حمله تبرعات بش نوفرولهم ملابس شتويه لو تبي تشاركي فيها وتعرفي حد يبي يشارك خليه يتواصل معاي مدابينا نكونوا سادين حاجتهم قبل ليخش الشتا..
سلافه بإبتسامه:اكيد حشارك ورح شوف اذا كان فيني جيب متبرعين..
🍂والعيون الحايرة بنظراتها الغيورة معاهم مش قادرة تركز في شي وهما قدام عيونها...
ارتفعت سرعة دقات قلبها من التوتر لما شافتهم جايين ناحيتها..
حطت ايديها في جيوب العبايه بش ماتبانش رجفتهم..
لما خلاص وصلوا فيها..بلعت ريقها وتصنعت القوة والثبات..
"السلام عليكم"
ردت عليهم السلام وعيونها ع سلافه..
عبد القيوم بإبتسامه..
/معاك صاحبة المكان شخصيا..
سلافه مدت يدها وهي تقول بإبتسامه..
/مرحبا..
انجبرت طلع يدها المغطيه صافحتها وهي تقول..
/اهلا..
طلقت سلافه يدها وهي تقول..
/اول شي الله يعطيك العافيه ويجزيكي الخير..تاني شي انا بعرف عائله سوريه نازحه كانوا ساكنين فترة بالأجار بس بسبب الوضع الراهن رب الاسرة خسر شغله ومعاد فيهن يدفعوا الاجار وصاحب البيت رح يطالعون منه خلال اسبوع..حكيت لعبد القيوم وهو دلني عليكن وقال انه لسا في مكان لعيلة وحده..
شافت طوبى لعبد القيوم وقال..
/الحجره اللي جنب معامل الحاسوب..
هو اللي كانت نظاراته تخفي نظراته الهيمانه فيها قال..
/ايه..
رجعت نظرها لسلافه وقالت..
/خلاص المكان ليهم..
سلافه بإبتسامه؛شكرا كثير..
طوبى:الشكر لله..كان ماتبي تقولي شي تاني او تسألي عن شي نستأذن..
سلافه بإبتسامه امتنان..
/لاخلاص مافي عندي شي قولوا..خدي راحتك..
هزت طوبى راسها ومشت للمستوصف بدون ماتشوف لعبد القيوم حتى بطرف عينها..
سلافه؛مبينه صغيره كتير..
عبد القيوم هز راسه وقال..
/عمرها22سنه..
سلافه:واضح..فيني شوف المكان ؟
عبد القيوم:اكيد..تعالي..ومشي وسلافه معاه وخلوا عيون طوبى الغارقه بالدموع تلحق فيهم...
🍃وقعدت طوبى عايشه حالة الاحتراق..لاعاد فكرت في شي ولاركزت ع شي...عيونها دور فيهم ولما بانوا عليها مرة تانيه قعدوا عليهم...
🍂وبنت عمها اللي كانت تقوم بواجبها ع اكمل وجه في المستوصف...طلعت منه مع وحده من الحالات اللي كانت تكشف عليها...
"مشكوره جدا دكتورة بارك الله فيك في ميزان حسناتك"
هي بإبتسامة قالت؛واجبي..
بعدين التفتت بتمشي جت عينها علي طوبى لقتها تشوفله ونظراتها كانت واضحه نظرات شني..
رجعت نظرها لعبد القيوم وسلافه..هالمرة ركزت ع تعامل عبد القيوم معاها...
كان يجامل فيها مجامله واضحه من طريقة وقفته وكلامه..
ابتسمت ومشت لطوبى..وصلت فيها وقالت..
/عيونك..
هي بفجعه وخدودها انحمروا فجأه قالت..
/خيرهم!
قالتلها؛بيطلعوا عليه..
هي ابتسمت بسخريه مصطنعة وقالت..
/سلم دكتورتنا بري الهي بشغلك بري ماضيعيش الوقت..
ضحكت وقالت..
/ماشيه غير ردي بالك تخليه يشوفها..
هي ببلاهه قالت..
/شن هي!؟
قالتلها بضحكه..
/النار اللي طالعه من عيونك..
ومشت وخلتها..
وهي بإحراج ونرفزة قالت..
/بارده..
بعدين حركت عيونها يمينها لقاته واقف بروحه..
يكتب بالبيرو ع يده استغربت..
هو كمل ونزل يده وشاف جيهتها..
طول غيرت عيونها..
وهو قعد يشوفلها لحظات بنظرات ضيق..
تشجع ومشي ناحيتها وهي شافاته جاي ناحيتها لحظتها حست انه لما بيوصل فيها حتعطيه صفعه ع وجهه طلع حرقتها كلها فيها...
لكن لما وصل فيها هربت بعيونها عنه وبكل قوة كانت تحاول تبان عاديه..
عبد القيوم:طلبت شوية حاجات للعيله اللي حكتلك عنها..
طوبى بشي من الحده..
/هي من طرفك انت تقدر تتصرف منك ليك مش لازم ترجعلي في كل شي..نستأذن..
ومشت وخلاته وهي شاده دموعها بقوة..وهو يلحق فيها بعيونه لين خشت للمبنى..فهم علاش كلماته بحده لكن ماقدرش يفرح لأنه ضايقها...
جاه اتصال..طلع تليفونه من جيبه وشاف المتصل..كان زميله في الخدمه عرف انهم طالبينه..تنهد بضيق ورغم عنه طلع من المكان اللي مخلي روحه فيه...
🍃🍃🍃🍃🍃
الساعه 5:00عصرا...
في جنان حوش طوبى..
كانوا مطيره وسدرة واقفات يهدرزوا وهما يراجوا في طوبى..
حداهم بمسافه بسيطه اريج واميمه..
🍂اريج:من لما روحت حسيتها مش ع بعضها وشبه ماتكلمتش بكل..
اميمه تنهدت وقالت..
/ اليوم جت للمدرسه البنيه السوريه اللي ياما حكوا عليها وقالوا في بينها وبين التارقي شي..
اريج بفضول:بالله! قصدك هو كان غادي وهي جاياته!؟
هزت اميمه راسها بإيجاب بعدين قالت..
/قعدت فوق الساعه وهو وياها مع بعض..
اريج بضيق؛معناها حق!
اميمه بحيرة:مش عارفه مافي شي واضح..
عقدت اريج حواجب وقالت..
/شن شكلها باهي!؟
اميمه بضيق:الصراحه جميله هلبه..
حست اريج بقلبها وجعها ع طوبى...
"هيا ياطوبى وينك"..
شافوا للباب لقوها طالعه تلبس في كندرتها بإستعجال..
بعدين مشت لسدرة ومطيره وهي تقول لاريج..
/جنه تلعب مع الولاد روجه خليك خداهم حبيبتي وسامحيني..
اريج:شن تقولي بنتي حتى اني هادي..
يدوب ابتسمت طوبى ومشت ورا اميمه ومطيره وسدرة سابقينهم..قعدت واقفه تشوفلهم لين طلعوا وسكروا الباب..
تنهدت بضيق وولت خشت داخل..
🍃برا..
في قهوة نضال..
ع طاوله وحده كانوا مقعمزين ربيع وعبد القيوم ومعاهم سامي والمهدي يهدرزوا بحماس..
فجأه..ضحكوا كلهم مع بعض وصوت ضحكهم انسمع في الشارع كله..
سدرة وع وجهها باديه ملامح الامتعاض قالت في نفسها..
"بليد"
اما طوبى رجعت حست بالرغبه في البكاء واميمه مركزه عليها..
قصوا الطريق ووصلوا في حوش الصيد..
والشباب من كثر انسجامهم في الهدرزة مالاحظوا شي..
🍃في حوش الصيد..
كانوا الصالون معبي..جيران الشارع كلهم جو..
وطبعا نساوين عيت شنيبه ع راسهم..
مغليه..وسميره..وخديجه طبعا كنتهم اكيد لازم تكون موجوده..
ودم سميرة يفور ويغلي منها وهي تشوف فيها كيف مقعمزة وحاطه رجل ع رجل ورافعه انفها ومش حاسبه حد ولاكأنها دارت حاجه..
"السلام عليكم"
توجهت الأنظار لنساوين عيلة الواعر وهما خاشات وفي مقدمتهم سدرة..
خديجه ومغليه لما شافوها تفاجئوا..
بانت عليهم اصغر واجمل من الفترة اللي كانت عليها قبل الحادث..
قعدوا بعيونهم معاها وهما يشوفوا فيها ماشيه لنجمه..ناضتلها نجاح وقدمتلها..سلمت عليها بحرارة..
وطوبى ومطيره يشوفولهم بإبتسامه..
اما اميمه غيرت عيونها لخديجه رفعت حاجبها وهي تشوفلها بكره..بعدين ردت نظرها وين ماكان لقت نجاح تحضن في طوبى..
نجاح ودموعها في عيونها..
/طيب فيك يابيبو..
طوبى بإبتسامه وعيونها مدمعه..
/طيب وقتك..ليك وحشه..
تباعدت عنها وهي تقول..
/ليك اكثر...
🍃وكملوا سلامهم ع الجارات ..
لما وصلت سدرة في مغليه وبنتها تخطتهم وكملت طريقها وسلمت ع الباقي..
ومطيره واميمه وطوبى وراها..
مغليه بهمس:سحيقه..
وخديجه مازال تبع فيهم بنظراتها الحاقده وعيون سميرة عليها...
بعد السلام مشوا قعمزوا ع كنبة فاضيه مطيره وسدرة وطوبى..
اما اميمه جابولها كرسي قعمزت عليه حداهم..
خديجه شافتلها وتجي العين فالعين..
بانت في عيون اميمه نظرة شماته وهي تشوفلها من فوق لتحت بعدين غيرت عيونها عنها..
رفعت خديجه حاجبها وعيونها تعبوا دموع لما فهمت المغزي من نظرة اميمه..
غيرت عيونها لسدرة..
لقتها شاده قيلتها وهي تشوفلها بنظرات حاده..
مررت خديجه نظرها عليها من فوق لتحت..بعدين غيرتهم لطوبى..
لقتها تشوفلها بتضييقة عيون وعلى وجهها ابتسامه اربكت خديجه ووترتها..طول غيرت نظرها عنها لما حست ان في مقصد من نظرتها الغريبه..
ضحكت طوبى نص ضحكه بدون صوت..
ع جيه الكناين بالضيافه منهم صفاء وابتسام..
ضيقت سدرة عيونها وهي تشوفلها..
قربت من مطيره وقالت..
/هادي ابتسام كعبار ولا!؟
مطيره بضحكه؛ماقلنالكش عبد الفتاح طلع واخدها ع مرته..
سدرة بصدمه؛غبر فيه..غبر فيهم التريس كلهم مع بعضهم ماعداجدي بس..
درقت مطيره وجهها بيدهاوهي تضحك..
ومغليه تشوفلهم وعقلها قاللها انهم يضحكوا عليها...
🍃وزعوا الضيافه..
وسلموا ع نساوين عيلة الواعر...
شويه وخشت فايزة سلمت ع الحاضرات وطبعا فاتت مغليه وخديجه..
ناضت طوبى وخدت كرسي تاني حطاته حدا اميمه وقعمزت بش تخلي فايزة تقعمز حدا صاحبتها..
وشويه وناضت مطيره ومشت قعمزت جنب سميرة وقرنوا الرووس..
وخلوا مغليه وخديجه تحت الضغط من كل جهة...
وعيون الجارات تراقب في الجميع...
🍃والهدرزة في هالمجمع كانت شغاله عن مواضيع مختلفه اغلبها الحرب..
نجمه بضيق:مانقول كان استودعناك ياربي ارزاقهم وبس..
سدرة المنتهى:كله يتعوض ياخالتي نجمه في المال ولافي الارواح والصحه..
نجمه:صدقتي يابنتي..
وحده من الجارات قالت..
/باهي لعند امتى هالحال عيينا حتى لو كنا قاعدين في حياشنا وبعاد عن الضرب لكن العيشه ولت صعبه علينا غلاء في كل شي..
مطيره:حاشا القله التجار فيهم عرق من اليهود
سميره شنيبه؛تجار الأزمات هادم مصاصين دم..
عواطف:عطيهم مايمص دمهم زادوا الناس هم ع همها..
رقيه؛هالبلاد معاش بت ترتاح بكل وحني من بلي لبلي..
سدرة شدت قيلتها من النص وقعدت تبرم فيها في مكانها وهي تقول..
/مش حترتاح مادام الناس قاعده تاكل في بعضها هكي..الخنبه..القتل اللي من قبل الحرب كاثر..والظلم بين العباد وغش الناس لبعضها هدا كله نزل علينا سخط ربي وربك يمهل ولايهمل من اعمالنا سلط علينا...
☘مغليه وخديجه حسوا فوسط كلامها في كلام ترمي فيه اغلب الحاضرات فهموه..
طوبى وهي تسمع فيها تأكدت ان اختها مش مصدقة القصه اللي حكتهالها ومازال في بالها ان في شي تاني صار شي كبير...☘
وحده من الجارات قالت..
/ايه والله صدقتي يابنتي..
هني ابتسام شاركت وغيرت الموضوع لما قالت..
/الله يبارك عليك ياسدرة عيني ماضرك زي ماانتي ..
ابتسموا احبابها وهما يشوفولها..
سدرة بإبتسامه؛تسلمي..حتى انتي ماشاء الله ماتغيرتيش عليا قاعدة اماني الحكيم..
ضحكت ابتسام وقالت..
/تسلمي يارب..
وخديجه تشوفلها بإمتعاض..
اما صفاء وفايزة تبادلوا النظرات بعدين شافوا لسميره ضرة ابتسام كانت عاديه جدا ومش مهتمه لشي..
نجاح:طويبه سمعت بيك فتحتي المدرسه للنازحين..
ابتسمت سدرة وهي تشوف لطوبى اللي قالت..
/ايه..
نجاح:شن اوضاعهم غادي؟
طوبى:الحمد لله اوضاعهم كويسه لحد ما..
اميمه؛جت قناة****** دارت تقرير عليها شوفيه ع صفحة قناتهم..
عواطف:الله يبارك الناس يشكروا في وضعهم غادي..
طوبى:الحمد لله..الواحد يتمنى لو كان عنده مكان اوسع من هكي راهو ماخلا حد يبات في الشارع ولايعاني من الاجارات اللي تهد الحيل لكن الله غالب هدا اللي طالعه باليد
نجمه؛في ميزان حسناتكم يابنتي..وان شاء الله رب العالمين يرفع الغمه ويولي كل شي زي ماكان..
كلهم بأصوات متقطعه قالوا..
/آمين..
سكتوا شويه بعدين قالت رقيه اللي ديما تحب تنخص ع المشاكل..
/وين بنتك ياخديجه لاامس ولااليوم بانت؟
اربكها السؤال وزادت نظرات عزوزتها وترتها..
ردت عنها امها وهي تقول..
/البنت تقرا مش فاضيه وراهو تعاني في وخيها امها مازال ماتقدرش ترد بالها منه..
رفعت سميره ضرتها حواجبها وهي تشوف لخديجه اللي قالت..
/ايه زي ماقالت امي..
شافت سدرة لطوبى..
طوبى ردتلها النظره وهي ترفع في حواجبها وتنزل فيهم..
وفايزة وصفاء عيونهم ع خديجه ونظراتهم ليها كانت نظرات امتعاض...
🍃وراما فوق.. هايمه مع صاحبها اللي تكلم فيه فيديو..
كلام صاحبتها شجعها ع كسر ماقعد من حدود وخلاها دير حاجات قبل مش قابلتها وتوا بدت تتألف معاها وهو عاد بكلامه المعسول قاعد يضيع ماقعد في راسها من عقل..
~~~~~~~~
خديجه بغضب:قشرتي وجهي شمتي فيا اللي يسوا واللي مايسواش ياكلبه..قتلك انزلي اني ولا..شدتها من ذراعها بقوة وهي تقول..علاش مانزلتيش..
راما بخوف وعصبيه..
/قتلك عندي قرايه قرايه وفرخك هداكا اني نعاني فيه..
ضربتها ع راسها وقالت..
/ضمي فمك ياقليله الادب ياكلبه..تعرفي لو عادوتي صنعتك هادي غدوة ماضاله الا محرشه فيك بوك يتفاهم معاك..
دفتها بقوة لين طاحت السرير ومشت طلعت من حداها وهي في قمة الغضب..
راما بكره:ان شاء الله تموتوا كلكم...
🍃🍃🍃🍃🍃
الساعه 11:30ليلا..
طلعت اريج من الحمام وهي شاده فرشة الاسنان متاعها وتوجهت للدار...وصلت فيها وخشت..
شافت طوبى مقعمزه ع سريرها وبين ايديها اللوحه الصغيره المكتوب عليها اسم جنه..
نظراتها كانت كلها حزن...سكرت اريج الباب وحطت الفرشه في مكانها المخصص بعدين قعمزت ع سرير خالتها وهي تقول..
/بيبو..
قامت عيونها اللي كانوا غارقات بدموع وع وجهها ابتسامه حزن وهي تقول..
/حكتلك اميمه..
هزت اريج راسها وهي تشوفلها بضيق..
نزلت طوبى عيونها وهي تقول..
/قالتلك قداش حلوه..ومش محجبه..وهو كان منسجم معاها هدرزة وابتسامات...
اريج:اني مستغربه فيه الحق نحسابه محافظ..
طوبى ودموعها في عيونها..
/ايه هو محافظ لكن عادي مش ملتزم هلبه علاقته مع بنت عمته مافيهاش حدود صح مافيهاش غلط لكن مهما كان شرعا ماتجيش...اللي لاحظته انه واخد راحته مع هادي واضح زي ماقالوا عمته وخالتي سالمين وقبلهم حسين في بيناتهم شي..بإبتسامه ألم قالت..مش عارفه علاش وقتها خطر عليا كلام هديكا نجاه عن الرجاله لما قالت انهم يفضلوا الجريئه..
اريج؛قصدك تقولي ان عبد القيوم زي الجالي!
ردت عليها تقول؛مش بالزبط بس يعني مش خارق للعاده زي مااني كنت شايفاته زيه زي كل الرجاله..
اريج؛مش عارفه...بس مانحسش فيه هكي عبد القيوم راجل محترم وراقي هلبه..
نزلوا دموع طوبى..
اريج بحزن:بيبو..
حطت ايديها ع عيونها وقالت بنبرة مخنوقه وكلها ألم..
"حبيته"
وانهارت بالبكي..اريج قربتلها وضمتها بقوة وقلبها موجوع عليها..
هدت طوبى شويه في حضنها وقالت..
/اللي حسيته معاه عمري ماحسيته مع حد في حياتي..اليوم يااريج حسيت روحي بنموت..شي هني..حطت يدها ع صدرها وقالت..شي هني يحرق فيا..ماحسيتش هكي مع الجالي مع الجالي وجعتني روحي..بس توا..
"وجعوني قلبي وروحي"
اريج ودموعها ينزلوا..
/سلامتك ياقلبي..
طوبى بألم:مانبيش نقوله هالكلام..بس اني شكلي ماعنديش حظ فهالدنيا..
اريج:انتي تقولي كلام زي هدا بيبو!؟
طوبى بنبرة باكيه:مش قصدي اعتراض والله راضيه راضيه الحمد لله..بس هكي..قلبي واجعني هلبه..من بكري واني نهرب من التفكير فيه بين عيوني قاعدين بين عيوني..قلبي محروق هلبه..هلبه...لكن حتى اني غبيه اللي مشاعري تنجرف هكي واني عارفه ان كان يحب وحده قبل وبعدين عرفت ان في شي بينه وبين وحده تانيه هدا كله مادورتاش وخليت قلبي يحبه...لين جي هاليوم وكليت فيه الكف اللي فيقني..اصلا هكي ولاهكي مايصيرش..بعدت عن اريج وهي تمسح في دموعها بعدين ناضت..
اريج بقلق؛وين؟
طوبى وهي ماشيه للباب..
/بنصلي الوتر...
فتحاته وطلعت وخلت قلب اريج موجوع ومحروق عليها...
🍃وهو المحب المتيم اللي ماعرفش قلبه يحب غيرها..
اختارلها ابيات شعر مقتبسه لأحد الشعراء..
اختارهم وهو يتفكر في حالتها اليوم اللي كانت واضحه وصريحة من نظراتها..
كتبهم ونزلهم ع صفحته...
🌼عشقتك وعشقي يامراد العفه...
انتي في كفه والنساء في كفه...
انتي الهيبه...
انتي الموده والوفاء والطيبه...
ومو حال بعدك ماندير حبيبه...
طول الحياه والعمر نين نتوفى...
🌸اول ماقراهم سلافه اللي دارتله "لايك" وتمنت لو تقدر تعلق..
وبنت عمته طول دارت مشاركه للمنشور...
🍃طوبى بعد ماصلت الوتر..قعدت مقعمزة في مصلاها تقرا في القرآن لين هدت نفسها واستاكنت..
بعدين مشت للدار بش ترقد..حولت ملايتها علقها وحطت المصحف مكانه..مشت دار طلة ع جنه اللي كانت غارفه في النوم..ابتسمت من قلبها..
بعدين خشت لسريرها تمددت وغمضت عيونها وبدت تقرا في الاذكار..وعيون اريج بنظراتها الحزينه عليها...
🍃وعدت هالليله..وطل يوم جديد..
كان الخميس...
بعد الفجر..جو اميمه وهاديه بش يفطروا معاهم..
ولحق بعدين الحاج علي..
قعمز ع الكرسي ور الطاوله ياكل في الزميته..
وخداه جنه وولاد خالتها مقعمزين في كراسي اكل مخصصه للأطفال..
وع الارض..كانوا كلهم مقعمزات يشربوا في القهوة قبل الفطور..
رن جرس الحوش..
ناضت اريج ومشت بتفتح..
علي؛مرت المغضوب!؟
سدرة:الله يربحك ياغالي خليك عادي مع المراة..
طوبى بضحكه؛طيبه وكويسه مش زي المغضوب بكل راهو..
ضحكوا..وسدرة ضربتها ضربه خفيفه ع رجليها..
وتختفي ضحكته علي الواعر لما يشوف المغضوب جاي مع مرته..
كلهم وجهوا نظراتهم القلقه ليه..
هو غير نظره للصونيه وقعد ياكل..
مختار وهو يشوفله من ورا النظارات قال مع مرته..
/صباح الخير..
ردوا كلهم ماعدا جده...
فاتن قدمتله وقالت..
/كيف حالك جدي..
علي الواعر:الحمد لله..
ابتسمت والتفتت لمختار وغمزت بعينها مختار ابتسم..
وهما يسرقولهم في النظر..
غيروا نظرهم لعلي الواعر لما ناض وخدي عكوزه وهو يقول..
/الحمد لله..ومشي بيخش للكوجينه..
وناضت بعده مطيره ولحقاته..
التفتت فاتن وشافت لمختار بضيق..
هو ركز بنظره ع الصغار ابتسم ومشالهم هو يقول بنبره حلوة..
/صباح الخيرات..صباح الوردات..اني بنفطركم انتم...
لكن بمن نبدا..وقرب لمهاب باسه من خده بعدين قال..
/عسل..
وجي لأواب وباسه من خده بعدين قال..
/تفاح..
غير نظره لجنه اللي لما قرب منها ضحكت..
باسها ع خدودها وقعد يلعب معاها وكأن ياكل فيها وصوت ضحكة جنه عبى الجنان...
كلهم كانوا يتفرجوا عليه..كانوا متأثرين..
بس طوبى كانت مضايقه هلبه...
وخر عن جنه وقال؛خلاص ياسر..ياسر خير ماناكلك حق..
وخر كم خطوه لين وصل في صونيه جده وقف عليها وقال..
/زميته!..
حول نظاراته وقال؛فاتن خشي جيبي كاشيك..
بضحكه قالت؛باهي..ومشت خشت الكوجينه..
سدرة:زميته بالكاشيك يااتكيت...
مختار وهو يرقص في حواجبه..
/صقع عليك..
ع طلعة فاتن بالكاشيك..
خداه منها وبدي ياكل..
هاديه كانت مركزه ع ملامحه هلبه...
وغرفه حداها ماتبيش تشبح في وجهه..
طوبى:فتون تعالي اشربي قهوة..
مختار:واني مايعزموش عليا !؟
طوبى:مش باهيه ليك تزيد التوتر..
رفع حواجبه وهو يشوفلها..
غرفه ضحكت بدون صوت..واريج واميمه شدوا ضحكتهم..
اما الباقي ضايقهم كلام طوبى ماعدا هاديه اللي كانت تشوفلها بتركيز..
طوبى بضحكه:نبصر عليه..كمل وتعالى..
نزل حواجبه وقعد ياكل وهو يشوفلها بطرف عينه..
ع طلعة مطيره شافاته ياكل بالكاشيك قالت..
/شن هدا يابوشرينته!! شن هالعار المعرعر..
جاته خدت منه الكاشيك وقالت..
/هادي زميته هكي الترهوني ياكلها هكي..وقعدت تعبد في الزميته بعدين خدت العبود وكلاته في فم واحد..
مختار بقصد الاستفزاز...
/OMG..
مطيره؛يعيطك جدري يجدريك والله لما نضربك ونمسح كبدي..
وقعدت تضرب فيه..وتضرب..
في الاول كانوا يضحكوا بس لما شافوها تبكي اختفت ضحكاتهم..
هو ابتسم وشدها وضمها وهو يقول..
/مخمخ اني..راهو نقعد مخمخ يامطرايه..
قعدت تبكي...وهويطبطب ع ظهرها..
كلهم وقتها تأثروا غصب عنهم..بس غرفه وطوبى كانوا مضايقات هلبه...
شافوا لبعض وكل واحد فيهم تسأل في التانيه بعيونها..
"ياترى شن اخرتها معاه"
#حسابات_قديمه
#طوبى
....يتبع.....
