#طوبى "جنة طوبى"
#جمان_فريد
#الجزء_123"ياربيع أيامي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#ذكر_الله
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه..
ابن القيم رحمه الله..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃اسألك القوّة يا الله في إخفاء ما أشعر، وفي إظهار عكسه ، في الاتكاء عليك وحدك وفي الاستغناء عن حاجتي ان كانت بيد بشر🍃
_________________________________________
الساعه 11:00ليلا
في دار سدرة المهدي اللي كانت فيها مع خوها يزن..
هي مقعمزة ع سريرها تشوف القدام وحواجبها معقودات بغضب..
الغضب اللي يكلم فيها بيه يزن ومخالطه نبرة تهديد..
/ورب العزة مازال ديري تصرفات زي هادي نخلي بوي يتفاهم معاك..
قعدت ساكته مابتش ترد عليه..
هو شافلها بحده وقال بتهديد..
/واهو قتلك..
ومشي طلع من الدار وسكر الباب وراه وخلاها تشوف للباب بنظرات حادة..
🍃🍃🍃
وفي حوش جيرانهم اللي مقابلهم كانوا اريج وغرفه مقعمزات جنب بعض يتفرجوا ع هاتف غرفه..
كانوا يشوفوا لعروض ملابس تفكر اريج تاخد منهم لبتاتها..
غرفه:نوعية صح نعرف اللي تبيع فيهم بضاعتها اصليه..
اريج:وحلوات هلبه عجبوني خلاص احجزيهم..
غرفه قربت هاتفها ليها وقالت..
/تمام..وخشت ع خاص الصفحة متاع الملابس وبدت تكلم فيهم..
شويه جاها اشعار عن طلب صداقه جاها من..
(حسين الواعر) الاسم مكتوب باللغة الانجليزيه ضحكت غرفه وقالت..
/حسين بعتلي طلب اضافه..
ابتسمت اريج وقالت..
/امم..باهي زعمه شن صار معاه عرف من المجهول متاع بوعبعاب..
غرفه بشي من القلق..
/خايفه يطلع عدنان حق ويطلع عليه جنونه..
وقبلت طلب الاضافه بعدين كلمت كلام مع صاحبة الصفحة وهي تسمع في أريج تقول..
/يستر الله..خل نوض نحدد عبايتي..وناضت ومشت طلعت من دار المعيشه..
وقعدت غرفه تتراسل مع المراة وبعد ماتممت الحجز طلعت من الخاص وخشت ع الصفحة الرئيسيه ويطلع قدامها منشور لحسين..
كان بيت شعر فوق صوره ليه من ايام الحرب واقف في مكان عالي بعض الشيء عاطي بالظهر وقدامه منظر غروب الشمس..
والبيت المكتوب فوقه كان مقتبس..
"عبيد ربنا مانا عبيد لغيره..
وفي قلوبنا عزة النفس كبيره..
عبيد العالي..
وغير ربنا مانعبدوا في والي..
وقلوبنا بالعز ربي مالي..
من يومنا رانا انضاف السيره..
علي كل مايواطي النفس عوالي..
ومانرافقوا خاطي الناس الخيره..
غوالي وصيفتنا أولاد غوالي..
وأنظارنا عالعيب دوووم بصيره..
ويوم الفزع مانوخروش لتالي..
واللي غلط فينا الهلاك مصيره."
🌸ضحكت ودارتله لايك..بعدين خشت ع صفحته شافت صورة بروفايله كانت ليه وهو لابس البدله العسكريه واضح انها صورة مأخوذة بدون علمه كانت مميزة جدا وعليها تفاعل كبير..
طلعت منها وشافت صورة الغلاف كانت لعبارة مكتوبة باللغة الانجليزيه للجمله الشهيرة اللي قالها شيخ الشهداء عمر المختار..
"نحن لانستسلم ننتصر او نموت" وحتى هي كان عليها تفاعل كبير..
طلعت منها وبدت دير في جولة ع صفحته..
ماكانش ينزل بكثرة بين كل منشور ومنشور مايقارب الشهر واحيانا اكثر وكلها اقتباسات اما باللغة الانجليزيه او العربيه عن القوة وعزة النفس او اقتباسات دينيه وبعض الاشارات من اصدقاء ليه..صور لقاءات او سفريات او طلعات بر..
وهي تتفرج حست نفسها وكأنها تشوف في وجه تاني لشخصية حسين..شخصيه مهمه وبارزة وليها مكانتها وغير هكي استغربت في كثرة اقتباسات المكتوبه الانجليزيه وتسائلت هل عنده لغة ولاغير اقتباسات ياخد فيها من "الغوغل" بعد يعرف ترجمتها!؟
طلعت من صفحته وكانت حتطلع من الفيس كله بس لما شافت الاشعارات خشت عليهم..
لقاته هو متفاعل ومعلق ع اخر منشور منزلاته..
اللي كانت فيه منزلة صورة شجرة الفل متاعهم وكاتبه فوقها..
"ترید النجاح،، ثق بالله ثم بنفسک و تجاهل من یقول هذا صعب و هذا مستحیل،، الثقة بالله هي عقلية العظماء"
..خشت ع تعليقه لقاته كاتب كلمة وحده بس..
"موفقة.."
ضحكت ودارتله لايك..وقعدت تفكر هل تخشله وتسأله شن صار ولاتراجي هو يخبرها!!؟
وسريعا ماجاوبت نفسها "نراجيه هو يقول.."
وطلعت من الفيس وحطت هاتفها ع مسند المندار بعدين دارت طلة ع صغارها وغطتهم وحطت راسها ع المخده بش ترقد..
وشويه وخشت فردوس بمالقي ميه حطاته ع الطاوله مع طاسه بعدين التفتت لأختها وصغارها طلت عليهم وبعد تأكدت انهم متغطيين كويس مشت خشت فراشها ورقدت وكان اخر من حط راسه ع المخده في الحوش اريج اللي كانت تردد في الصلاة الابراهيميه لين غلبها النوم وراحت فيه..
☘لكن صاحبة عمرها كانت فايقه في دار النوم..
مقعمزه ع الصلاية بعد ماصلت الوت..قدامها المصحف وفي يدها هاتفها مشغوله بيه وراجلها راقد بالنوم..
اللي كانت تتفرج عليه طوبى وقتها فيديو لأحد الدعاء يحكي عن فضل ذكر "لاحول ولاقوة الابالله" ياما سمعت من دروس وقرت كلام عن هالذكر لكن هادي المرة الأولى اللي تسمع فيها قصته مع حملة العرش بالتفصيل..
اسلوب الداعيه وهو يحكي فهالقصة كان جدا مؤثر خلا جلدها يتقشعر وقلبها يفر فران والدموع غصب عنها تنزل..
للحظه حست روحها انفصلت عن الدنيا..حست انها في عالم تاني متعلي عن عالمنا الدني والتافه لكن مجرد تم الفيديو رجعت من جديد لهالعالم لكنها مازالت تحت تأثير اللي سمعاته ومن كثر ماأثر فيها مابتش حدود هالتأثير يوقف عندها كانت تبي غيرها يحس بيه ويعرف اللي هي عرفاته..
🌼خشت ع المفكرة متاع الهاتف وبدت تكتب في منشور بكل مشاعرها..كانت تكتب وهي تمسح في دموعها لعند ماكملت..
راجعاته بعدين نسخاته وحطاته ع صفحتها..الحنة.."بضم الحاء" ونزلاته...
☘وكانت من اوائل قراء هالمنشور فاتن..
تقرا فيه بعيونها وقلبها واحساس طوبى وصلها وخلاها دمع من قوته..
المنشور كان بالعاميه تكلمت فيه طوبى بلغة مبسطه كعادتها بش يوصل للجميع..
(لاحول ولاقوة الا بالله..
الذكر هدا كل مانشوفه نحس بقوة عجيبه وكل مانردده نحس ان مافيش اقوى مني ع وجه الارض..
ع قد ما قريت عن الذكر هدا ماعرفتش سره الحقيقي الا بعد الفيديو اللي شفته قبل شويه،الفيديو لداعيه يحكي عن الملائكة حملة العرش اللي كانوا ثمانيه..
قال ان اعظم مخلوق خلقه الله عزوجل العرش متاعه مافيش مخلوق اعظم منه ع كبره ع حجمه ع ثقله؛كل الاكوان والمجرات بكل مافيها ماتجيش بحجم ذرة قدام الكرسي متاع العرش..الكرسي بس هاه..والكرسي نفسه قدام العرش حتى هو مايجيش بحجم ذرة قدام العرش..متخيلين!
هو طبيعي عرش الله العظيم يكون هكي..
ياااه كل مالي نشتاق نشوفه نشوف هالعظيم الجميل اللي مالاش مثيل سبحانه..
العظيم سبحانه لحمل عرشه خصص ثمانيه ملائكة هالملائكه لما شافوا العرش قالوله سبحانه مانقدروش نحملوا عرش زي هدا عليه عظمتك وجلالك ووقارك..قاللهم اني لهالشي خلقتكم..لكن هما قعدوا هايبين هالمهمه اللي حسوها صعبه وكبيره عليهم وقالوله سبحانه مانقدروش..
سبحانه ع عظمته وملكه كان يعطي فيهم مجال يناقشوا ويسألوا برغم انهم مخلوقات انخلقت للطاعه بس..يااه ياربي محلاك..
وهالإله الجميل عطاهم جمله وقاللهم يحملوا العرش وهما يرددوا فيها..
"لاحول ولاقوة الابالله" وهما نفذوا هالامر وبفضل قوة هالذكر قدروا يحملوا العرش بالكرسي..
واني نسمع في القصه فكرت في حاجتين..
اولهم هي الهموم والمشاكل اللي نمروا بيها في الحياة شن تجي قدام عرش الله سبحانه وتعالى!!
كيف ممكن يكون تأثير ذكر "لاحول ولاقوة الا بالله" عليا واني حاملتها ع قلبي ونواجه فيها!؟
كلكم فكروا فهالشي واسألوا انفسكم هالسؤال وشوفوا شن تحسوا..
نجوا توا لتاني حاجه فكرت فيها..
كيف تجيني لحظه نخاف فيها من مخلوق ضعيف مايسوى شي وعندي رب عظيم مافيش بقوته وكل هالكون بكل مافيه ملكه وتحت امره!!؟
لو كل حد فيها كان بالإيمان اللي يخليه يفهم انه مع الله ديما هو الاقوى راهو حتى لو تعرض للآذى في حياته حيقدر يتخطاه بسرعه ويرجع اقوى من قبل..
لاحول ولاقوة إلا بالله..لاحول ولاقوة الا بالله..لاحول لنا ولاقوة ياالله ع مواجهة منغصات هالدنيا وشدائدها وشرار الخلق فيها الا بيك ياالله..يامولانا يامليكنا يامن لك الامر كله من قبل ومن بعد...)
🌾الدموع اللي كانوا يجروا ع خدود فاتن كل ماتمسحهم ينزلوا من قوة الشعور اللي قاعده تحس بيه..حطت يدها ع قلبها لما حاساته بيطلع من مكانه..قلبها اللي بدي تدريجيا يطلع منه شوائب حياة عاشتها بعيده عن خالقها..يطلع منه كل شعور بحب لأي شخص حبه يبعد عن حب الله..حب الله اللي بدي يعبي هالقلب وبدي يسيطر عليه..
هي توا بدت تفهم ان مشاعرها اتجاه مختار قاعده تموت معاش عندها ليه قابليه خلاص..لكن كونه اب ولدها مخليها غصب عنها تعطيه فرصه لعل وعسى يتغير حاله للأحسن لكن في حال هالفرصة راحت عليه مش حيقعد قدامها الا خيار واحد..صعب وخطير..
🍃🍃🍃🍃
تاني يوم..
الساعه 7:30صباحا..
طلعت راما للجنان بش تستنى الباص ..
شافت خوها محمد متكي ع شجرة وجنبه شنطته ولاهي بهاتفه..
قعمزت ع الكرسي وقعدت تشوفله..
سمع حركه الكرسي شافلها بعدين قدملها وصل فيها وقال بملامح وجهه اللئيمه اللي خالطها التجهم..
/صباح الخير..
ردت بأستغراب لأنه اول مرة يصبح عليها..
/صباح الخير..
ضيق عيونه وقال..
/ليلة اللي روحتي بالدرقه من حوش جدي شنيبه تعاركتي مع حد غادي؟
هربت بعيونها عنه وقالت..
/لالا..
محمد:لاتعاركتي مع حد ومش بعيد العزوز الحرفه سدرة..
شافتلها وقالت..
/قصدك مرت خالي!؟
قاللها:بنت خالك..
غيرت نظرها عنه وع وجهها باديه ملامح الضيق..
هز راسه وقال..
/عارفها عارف وتصرفاتها مورقلهم غير ندير في الحولة..اسمعي ماتقطعيش حوش جدي ع خاطرها حوش جدنا زي ماهو حوش جدها اللفعة هادي..
راما:من حكالك؟
قاللها:ماحكالي حد..واسمعي كلامي تمام! ماتخلي حد يكسرك فاهمه..ماتعطي حد فرصة يكسرك..
كانت تشوفلها بنظرات مفاجأه وهو بعد قال اللي عنده لف ومشي لشنطته خداها وطلع من الحوش..
☘وين طلع شاف سدرة طالعه من حوش جده وماشيه بطريقها للباص اللي كان واقف قدام حوش مرت بوها ع طلعة تاله من الحوش..سلموا ع بعض بعدين ركبوا للباص..ويتحرك الباص وهو قعد معاه بعيونه لين درق عنهم...
🍃🍃🍃🍃
الساعه 9:30صباحا..
كانت جنة في الفصل اللي خاص بطلاب الحضانه تلون في كراسة الرسم بكل انسجام وابلة زهرة توري فيها لأمها عن طريق مكالمة الفيديو..
🍃وبمكالمة فيديو كانت نسرين في مكتبها تكلم في اختها خديجه..
"ديما تلعب فيها صح طوبى هادي التارقي هدا يلعب بالفلوس لعب"
نسرين بقلق..
/مش هدا موضوعنا..خوك من امس يتصل يبي يكلم جنه عارفتها وين بيسألها عن امها بتقوله عروسه..
"طنشيه ماترديش"
نسرين بحزن..
/واجعني قلبي عليه هلبه ياخديجه..
"الله لايسامحهم ايه والله"
سكتت نسرين وهي تسمح في دموعها..
"اسمعي ردي عليه وقوليله قاعده عند امها ومابعتوهاش وكان سأل ع امها قوليله نفس الكذبه وخلاص"
خدت نسرين نفس وهزت راسها موافقه لفكرة اختها..
🍃🍃🍃🍃
ومع الساعه العاشرة صباحا خشت نجاح بولدها وولد راجلها لحوش اهلها جتهم اليوم بطلب من اختها عواطف..
سلمت عليهم وهدرزت ع امها شويه وبعد ماحطت للصغار ع قناة الرسوم المتحركه طلعت مع اختها للكوجينه..
خشولها وعواطف سكرت الباب وبدت تحكي لأختها عن مكالمة ام الشارف..
🍃بدموعها اللي كانوا معبيات عيونها قالت..
/قالت وين سافر برا نصبوا عليه الاتراك وخسر اللي فوقه واللي تحته وعمته هي اللي ساعداته بش روح لكن مابتش تعطيه شي خلاته يعيش بالايجارات والبهدله وماخلت حد يعاونه ومرته اللي دار ع خاطرها هدا كله ماتحملتش عيشة القل خلت الصغار ومشت لحوش ماليها وطلبت الطلاق وماليها خلوه يطلقها غصب عنه وهي بعد العدة تزوجت ع طول ولأنه ماتحملش جاته الجلطه..
..نجاح وهي تسمع في اختها كيف تتكلم ودموعها ينزلوا فرحت اللي رب العالمين جابلها حقها لكن في نفس الوقت انوجعت عليها حستها تفكرت المواقف الصعبه اللي عاشتهم في زواجها من الشارف لهالسبب دموعها كانت تنزل..
رشفت عواطف وهي مكمله تقول..
/قالتلي خداه العشم متاعك يابنتي بالله سامحيه وادعي ربي يسامحه..
نجاح:شن قلتيلها؟
تنهدت وقالت:قلتلها سامحته لوجه الله وربي يسامحه..
ابتسمت نجاح..
مسحت عواطف دموعها بإيديها الزوز وقالت..
/لكن مانحكيلكش ع الشعور اللي حسيته وين ربي خدالي حقي منه زي ماخداه من مراد قبله اهو قاعد لليوم بروحه لاعاد يقدر يتزوج ولايدير صغار..الحمد لله رب العالمين اللي مسح شعور الحسرة ع نفسي اللي كنت نرقد ونوض بيه..توا حاسة روحي مرتاحه الآخر..
نجاح مسحت دموعها وقالت..
/ان شاء الله دوم مرتاحه..
عواطف بإبتسامه..
/يارب..
🍃والله بعد ريحها اراد يجبر بخاطرها..
"تفاهمنا اني وصفاء نديرولها مفاجأة يوم عيد الأم..
فرح بإبتسامه:نايس..حتى حني ناويين نديروا لخالتك نانسي مفاجأة..
راما بضحكه:باهي قوليلي لشن مخططين خل نغشوا منكم..
ضحكت فرح وبدت تحكيلها...
🍃🍃🍃
ومع نهاية الدوام الدراسي طلع محمد الصيد مع محمد حامد ويزن..
محمد حامد كان يتكلم وهما يسمعوله..
/محتار..مش عارف شن ناخدلها ..
يزن:عمتي تحب القرابيج هادم اللي زي المديليات تعلق فيهم في شناطيها وتزدانها خودلها حاجه زي هادي..
سكت محمد وهو يفكر..
ويزن رجع تكلم وقال..
/اني نبي ندير زي العاده نصدق ع امي لكن في بالي ندير حاجه لخالتي سدرة تعامل فينا احس معامله تستاهل نحسبها في يوم زي هدا..
ابتسم محمد حامد وطبط ع ظهر ولد خاله..ومحمد الصيد جنبهم مكتفي بالاستماع وهو يفكر في كلامهم..
🍀🍀🍀🍀
وتمر الايام ع طوبى وعبد القيوم في الكفرة وهما من عزومه لعزومه..
عزومة صفيه..وعزومة صديقه عبد الله..وعزومة وحده من الجارات اللي كانت صديقه لجدته فاطمه وتعز عبد القيوم هلبه..
وطول هالأيام كانت طوبى عايشه في سعادة عمرها ماحستها في حياتها وعبد القيوم كل مايشوف السعادة في عيونها قلبه يسعد معاها..
☘جي يوم الخميس..يوم العزومه اللي داروها لأهل امه من ليلة الخميس كان طوبى تجهزلها من حلو وحار وع الرغم من محاولات عبد القيوم لمساعدتها رفضت رفض قاطع..
🍁🍁
قبل الظهر خشوا عليهم زوز من خالاته ومرت خاله وبنتها هادم اللي قدروا يجوا..
استقبلتهم طوبى احلى استقبال وكانت كعادتها في قمة الاناقه..
ولأنها مرتاحة معاهم انطلقت في الهدرزة من البدايه وخلتهم ياخدوا راحتهم معاها لدرجة طلبوا منها تخليهم يساعدوها في تجهيز الغدي..
وكانت طوبى عند حسن ظن حبيبها فيها رفعت راسه قدام خواله ورجالة خالاته..والنساوين ياما مدحوا فيها وفي واكلها وهي من فرحتها بيهم عزمتهم ع المزرعة في الخمس
ويامحلى الكلام اللي سمعه عبد القيوم من خالاته عنها،
بعد ماسقدهم خشلها لقاها في الكوجينه تغسل في ماعين الشاهي..
مشالها طول رفعها في حضنه وتغزل بيها بعدين قعمزها ع الكرسي وكمل عنها غسل الماعين وخلاها تتأمل فيه بحب وهي تفكر في المفاجأه اللي مجهزتهاله يوم الجمعة
🍃يوم الجمعه..
يوم عزومة عماته..حتى هي سهرت ع التجهيز ليها ولسانها مابطلش صلاة ع النبي..كانت متوترة وقلقه صح لكن ماخلتش هالمشاعر السلبيه تسيطر عليها..
🍁🍁
قبل صلاة الجمعة خشوا عليها عماته سليمه وغزاله ومعاهم صفيه ماجي حد غيرهم وعبد القيوم مشي مع الرجاله طول للجامع..
🍃دارت طوبى واجبها من الترحيب والضيافه مع ان الوجوه من اول ماقابلتها وهي عابسه ماعدا وجه صفيه واساسا شبه ماتكلم منهم حد كان صفيه وهدا كله وطوبى متجاهله ظاهريا وداخليا تبي تتعود وتتأقلم ع وضعها معاهم..
🍃🍃🍃
روحوا الرجاله من صلاة الجمعه وخشت صفيه مع طوبى وبدوا بتجهيز الغدي وهما يهدرزوا ويضحكوا..
وبعد ماكملوا طلعوا غدي الرجاله مع عبد القيوم
بعدين طلعوا غداهم ..
ويرجع يتكرر سيناريو زيارتهم ليها اول مرة في طرابلس..
🍃غزاله:تو مش لما جيناك في طرابلس قلنالك مانحبوا ايكال حار!
صفيه:وينه الحار ياخالتي!
سليمه:المحشي حار ماينقرب..
طوبى بمسايرة:حاولت نقص ع قد مانقدر سامحوني..
صفيه وهي تحاول تتمالك نفسها..
/خلاص خلنه وكولن الحاجات التانيه ماشاء الله السفرة معبيه..
غزاله:كلا انا معاد عندي نيه فيه بكل..وحطت كاشيكها وهي تقول لأختها..طاسة عصير من يالاك ياسليمه..
حطت سليمه كاشيكها وصبت لأختها العصير وهي تشوف لطوبى بتجهم..
وطوبى هالمرة تجاهلت تصرفهم هدا وقعدت تاكل بصمت وصفيه تاكل معاها بالسيف..
شويه وامها حتى هي وخرت وقعمزت حدا اختها وبدوا يهدرزوا هدرزة ضرب معاني ع كنة فلانه وكنة علانه وسعد الناس في الكناين وبخوت ولادهم المقيومه وختام كلامهم كان بجملة..
"الله غالب"
طوبى وهي تسمع فيهم خطروا عليها ولأول مرة نساوين عيلة شنيبه نفس الشعور السيء اللي كانت تحس بيه معاهم حساته توا..لكن ع قد ماتقدر استمرت في التجاهل وصفيه جنبها حتى هي تحاول بيأس تلطف الأجواء..
🍁🍁🍁
وقت غسل الماعين اضطرت صفيه تطلع من الكوجينه وتمشي للحمام..واكيد غيابها هدا في من حيستغله بش يطلع ماعنده من سم ويبخه في وجه طوبى اللي ديما متلقي..
"ماشاء الله كوجينه كبيره وواسعه"
بلعت طوبى ريقها والتفتت لغزاله وهي تقول بإبتسامه..
/تبي حاجه عمتي؟.
رفعت حاجبها وقالت...
/وشن تبيني مانخش لمطبخ حوش ولد خويا كان لما نبي منه شي!
قالتلها:لاوالله ماقصدي..
قاطعتهاوقالت..
/مش قصدك كيف ماكان مش قصدك لما درتي الغدا حار صح!.
طوبى بربكه:والله العظيم نقصت الفلفل في كل شي بالذات المحشي..
غزاله؛بلاش حلف خلاص صار اللي صار..
سكتت طوبى وهي تبلع في ريقها خايفه من نفسها خايفه ماتقدرش تتحكم في اعصابها...
مررت غزاله نظرها ع الكوجينه بعدين قالت..
/في حاجه تمت في خاطري من لما جيتينا لليوم ونبي نعرفها..ليش ماخليتي بنتك عندهلها في الفرح كيف مادرتي توا ولابلعاني درتيها عناد وتكسير رووس..
طوبى بصدمه:علاش بندير هكي!؟
غزاله:ناقمه علينا ليش دوينالك ع بنتك لماجيناك ردتيهالنا..
غمضت طوبى عيونها بعدين فتحتهم وقالت..
/اني والله نحاول نتفهم موقفكم ع قد مانقدر نسمع ونتحمل في روحي ونقول معذروين تحملي ع خاطر عبد القيوم ومازال مستعده نتحمل لكن بالله عليكم معاش تدووا ع بنتي معاش تحاولوا توجعوني بيها..
خشت صفيه وهي تسمع في كلامها الاخير وشافت دموعها كيف تنزل شافت لخالتها بأسف وقالت..
/حرام عليكن والله حرام..
وردة فعل غزاله خلت طوبى ترجع تتفكر ايامها الصعبه مع عيلة شنيبه بإنفعال مبالغ فيه قالت..
/الستر ياربي غير شن قلنالها فيش طقينا فيها!؟ سؤال عادي جدا اللي سألته لكن هي بلعاني قلبتها عليا تبي دير مشكله وتخلي ولد خويا يقطعنا..تبي تفرق بينا وبينه..ومشت طلعت من الكوجينه وهي تقول..باهي باهي اللي تبيه يصير..حاضر..
صفيه فهمت اللي ناويه ديره عمتها لحقتها طول وخلت طوبى في الكوجينه تبكي بألم وصمت..
🍃وعاد سليمه لما شافت حالة اختها كلمت خوها عبد الله وطلبت منه يروح بيهم توا..
ولأنها كلمت خوها بطريقة مفجعه ردة فعله شافوها عبد القيوم ومعمر وطول عبد القيوم ناض وخش داخل..
🍃غزاله وهي تبكي..
/ماتوقعت يجي هاليوم اللي نقولك فيه معاد نبي نعرفك مدام عندك مراة كيف هذي مانبش نعرفك خلاص..
وطلعت تبكي..
سليمه قالت بحده..
/حسبنا الله ونعم الوكيل..
وكيف جت بتطلع وقفها عبد القيوم لما قال..
/اللي مايبيني حتى انا مانبيه..
سليمه:كلامك هذى ليا انا!؟
قال بنبرة جاده وملامح التجهم ع وجههه..
/لأي حد مايبش مرتي..اللي مايبيها معناها مايبنش..
هزت سليمه راسها وهي مبتسمة بحسرة نزلت خمارها ومشت طول..
اما صفيه شافت لولد خالها بألم وقالت..
/المراة مادارت الا كل خير هن اللي ربي يهديهن..بالسلامه..ومشت طلعت وراهم..
بعد ماطلعوا من الباب هو خش داخل وسكر الباب وقعد ينادي..
/طوبى..طوبى..
خش للكوجينه مالقهاش قلبه تسارعت دقاته بخوف مشي طول لدار النوم خشلها مالقهاش نادى مرة تانيه..
/طوبى..
وتخش عليه طوبى اللي كانت جايه من الحمام بعد ماتوضت وبإبتسامه قالت..
/هاني جيت جيت..
شافلها شويه بعدين قدملها ضمها بقوة..
حاوطاته وقعدت تمسح ع ظهره وهي تقول..
/معليشي حبيبي معليشي معذورات..من حبهم ليك يديروا هكي هما مازال في بعض الامور مش واضحة عندهم هدا علاش ردة فعلهم كانت قاسيه شويه..اعذرهم زي مااني عذرتهم هادم اهلك مافي شي يعوضك عنهم..
هو اللي كان يسمع في كلامها اللي كانت تقول فيه بنبرة حنونه وهاديه حسساته وكأنه في حضن امه..ابتسم بحب وقاللها..
/نحبك..
ضحكت وقالت..
/ارهيقي هولانات..
بعداته شويه وشدت ايديه وهي تقول..
/وتوا تعالى معاي ديريلي الشاهي متاعنا واني نكمل غسل الماعين..
طلقت وحده من ايديه وخداته بالتانيه معاها وهي تقول..
/هيا ياتنبال..
☘ودار مايريحها وتجاهل الموقف اللي صار وكأنه لم يكن وانسجم مع حكاويها اللطيفه وراح مع سحر ضحكتها اللي تجلي الغمة وهي معاه مهما كان حالها تولي في قمة السعاده..
🍃🍃🍃
وفي حوشها كانت العيله ملتمه ولأول مرة يخشوا هاديه وعبد المطلب للحوش بعد اللي صار لأنهم لما روحوا لطرابلس بعد ماكلمت طوبى عمها روحوا ع حوشه اللي كان مأجره وهما لموا بعضهم ومشوله بش يخففوا عنه الاحراج ويريحوا قلبه اللي كان موجوع جدا بسبب اجباره ع التفريط في الذكرى الأخيره اللي قعدت من بوه...
☘في مربوعة الحوش الدخلانيه..
غرفه:قتلك قبل ياعمي شن ماتبي اني حاضرة والفلوس هادم اعتبرهم دين ردهم ع مهلك..
عبد المطلب بإبتسامة احراج..
/بارك الله فيك يابنتي بارك الله فيك..
غرفه بإبتسامه:فيك بارك الله..
عبد المطلب:باهي قوليلي شن صار في موضوعك انتي وحسين..
ضحكت وقالت..
/سكرناه اني وياه خلاص وهو ان شاء الله يبعتله اللي تستاهله..
بإستغراب قال...
/قصدك حسين حتى هو معاش يبي!؟
غرفه بإبتسامه..
/ايه لأنه استاقظ ع روحه وقدر يفهم نفسه وشن يبي..
سكت عبد المطلب وهو مستغرب جدا..
☘في هالوقت..
جاب حسين امه اللي ناوي يخليها بضعة ايام في حوش بنت عمه بسبب سفره..
قبل ماتخش وصاها تخلي الصغار يطلعوله..
وبعد لحظات..طلعوا التوأم وجنة ومئاب فرق عليهم شكولاته وشيبسات بعدين عطي مهاب كيسة شكولاته وقال..
/اعطي لفردوس ومطيرة واريج وسدرة وهاديه وحنينه صفيه..
مهاب:وماما!؟
حسين بضحكه:لاماما ناديهالي اني نعطيها ..
مهاب:به..
ومشي يجري خش للحوش والصغار لحقوه وخلوا حسين يضحك عليهم..
☘داخل..
كان مهاب يدور عليهم بالوحده ويعطي فيهم شكولاته وهما ياخدوا ويضحكوا..
ع خشة امه شافاته وقالت..
/واني!؟
مهاب:سونا ولا..قال هو يحطيك"يعطيك"
ضحكوا الموجودات ماعدا سدرة اللي كانت تشوف لغرفه بإبتسامه..
غرفه وقتها تجاهلت نظراتهم وطلعت لحسين اللي فهمت ان يبي يكلمها عن موضوع المجهول اللي يضايق فيها..
طلعت للجنان لقت عمها كيف طالع من باب الحوش البراني
استغربت لما ماشافتش حسين مشت وهي دور عليه لين لقاته واقف ع شجرة الفل..
ناداته:حسين..
شافلها بإبتسامه من ورا النظارات بعدين قدملها..
وصل فيها وقال..
/شن جو..
قالتله؛تمام..شن صار معاك؟
رفع حاجبه وقال..
/غير اسأليني عن حالي قبل!
ضحكت وقالت..
/شن حالك..
تنهد وقال..
/ياودي باهي الحمد لله..وبالنسبه للموضوع هداكا معاش تفكري فيه حليته..
فهمت من طريقة كلامه ان الشخص ماكانش عدنان لوكان هو فعلا راهو قوم الدنيا وماقعدهاش تنهدت بإرتياح وقالت..
/باهي مشكور هلبه وسامحني..
حسين:بندير روحي ماسمعت شي وبنوصيك ع امي بتقعد هني اربعة ايام بنمشي لتركيا..
غرفه بضحكه:من غير ماتوصي خالتي صفيه في عيونا..
طلع من جيب بنطلونه الشكولاته وقال...
/تو نشوف امور الشركه غادي..ومدلها الشكولاته ..
خدتها وقالت بإبتسامه..
/توصل سالم ان شاء الله..
حط ايديه في جيوبه وقال..
/ماتوصي شي!؟
بضحكه قالت..
/جيب حلقوم خاطري ندير غريبة حلقوم للعزومه اللي بديرها طوبى..
ابتسم وقال:ok..
عقدت حواجبها وقالت..
/ايه حقه بنسألك عندك لغة انجليزبه؟
هز راسه بإيجاب..
بإبتسامه استغراب..
/مش باين عليك..
برفعة حاجب..
/كيف؟
بضحكه قالت..
/ولا مرة بينت الحاجه هادي!
قاللها:مش ضروري نبينها ولو قصدك لأني مانحكيش بيها نقولك ماتعلمتهاش بش نحكي بيها..
غرفه:اهو تنزل بيها في الاقتباسات..
ضحك بعدين قال..
/الاقتباسات هادي نزل فيها لانها عاجبتني لو نزلت الترجمة بس تفقد الوزن متاعها..
رفعت حواجبها ونزلتهم ومطت شفايفها للأسفل بعدم فهم..
ضحك وقال..
/ مادورنيش لما نتفلسف..
ضحكت وقعدت ساكته..
ابتسم وقال..
/نشوفك ع خير..سلام..
قالتله:وعليك السلام..
وقعدت واقفه تشوفله لين فتح الباب وطلع وسكره وراه بعدين مشت خشت داخل..
☘☘☘☘
"شن رايك روجة"
هادي طوبى تكلم في اريج مكالمة فيديو توري فيها تجهيزاتها للمفاجأة اللي بديرها لراجلها..
اريج بإنبهار..
/تهبل الطورطه يعطيك الهني طيحت سوق طورطات الفرخه الاء..
ضحكت طوبى بعدين قالت..
"خل نوريك القفطان اللي بنلبسه"
راجتها اريج لعند ماخشت دار النوم وفرجتها ع الفستان..
اريج بدهشه وذهول..
/وااو وااو اول مرة نشوف عندك حاجه جريئة هكي وفوقها لونه احمر..ياخطير انت ياخطير..
"مش مبالغ فيه ولا؟"
اريج بإبتسامه:بالعكس يجنن وبعدين انتي بتلبسيه لراجلك وهدا حقه عليك بيبو..
"ريحتيني..ايه وفكرت ندير شعري غجري ونقيمه كله "
اريج:حلو هلبه تسريحة ماشيه مع القفطان..
"وبنلبس الطاكم اللي خدتهولي سدرة"
اريج:ناعم وحلو وحتى هو ماشي مع القفطان..لكن هو وين من هدا كله..
"وزعته قتله برا صلي المغرب وعطل"
ضحكت اريج..
"اهو تتعلمي وتلقي مع الشيخ نضال بعدين"
اريج بضحكة خجل..
/غير امتى يجي العيد..
ردت طوبى وهي تضحك..
"ياتافهه"
☘☘☘
وبعد مانهت طوبى مكالمتها مع اريج صلت المغرب ورقت نفسهابعدين بدت تتجهز لهالليله الخاصه..
🌼بعد ماجهزت نفسها دارت اخر طله ع مفاجئتها..
ولعت شماعي معطره زينت بيهم الطاوله والشقه وماخلتش الا الضي الخافت بس مفتوح..
سمعت باب الحوش انفتح وقفت في جنب الطاوله وهي تراجي في خشته بلهفه بش تشوف ردة فعله..
ويبان عليها وهو يشوف في الاجواء اللي دايرتها وع وجهه باديه ملامح ابتسامة استغراب..
ملامح هالابتسامه تبدلت لملامح انبهار وهويام لما جي نظره على الوردة البلديه اللي كانت غايه في الجمال..
حط ايديه الزوز ع مكان قلبه وقال..
/ناعليا قلبي!..
ضحكت وقدمتله وهو يمرر في نظره عليها سمع وشاف دقة كعب الكندرة الحمرا الشامواة رجع نظره لوجهها الحلو وهي تقرب منه لعند ماوصلت فيه..ضماته وقالت..
/بطول عمرك ع الطاعه حبيبي..
ضحك بمفاجأة وقال..
/لالا!!!
وضمها بقوة بعدين باس راسها وقال بضحكه..
/اول مرة في حياتي حد يذكرني بالحاجة هذي عمرها ماصارت حتى وانا في الابتدائي..
بعدت عنه ورفعت عيونها فيه وهي شاده ايديه تقول..
/من هني لأخر العمر اللي ان شاء الله يكون طويل حنقعد نفكر بيه..
ضمها لقلبه وهو يقول..
/ربي مايحرمني منك ياروح القلب انتي..
قالتله:ولامنك ياروحي..بعدت عنه وشدت يده وهي تقول..
/هي تعالى نوريك باقي المفاجأة..
قاللها:لاراجي خل نعدي نغير سرافتي..
قالتله؛وخيرك ياقلبي والله تهبل من يومك..
قاللها بضحكه..
/انتي اللي تهبلي وبتهبليني معاك..سيب يدها بالغصب وهو يقول..مش مطول..
طوبى:والله حتى هكي عسل.
بعتلها قبلة في الهواء بعدين لف ومشي للدار..
وهي ضحكت بعدين مشت للطاوله وخدت هاتفها وقعدت تصور في الطاوله والتورته بش تبعت الصور لغرفه..
وفي عز انسجامها مع التصوير جاها وهو متأنق وريحة عطره عبت المكان..شافتله لقاته بأكثر طله تحبها..
القميص الابيض والبنطلون الاسود وفي رجليه لبس حذاء اسود..
ابتسمت بإعجاب وقالت..
/اللهم بارك اللهم بارك..
وبدت دربك ع هاتفها وهي تغني..
"ياربي نجيلي عبودا...بو الحاجب والعين السودا
يانجيلي زول الغالي..اللي ديما مزهيلي بالي"
وهو يسمع ويضحك وكان حاس بشي من الخجل هي لاحظاته وقدمتله شدت خدوده وقالت..
/نجيلي المتحشم ..
شد ايديها ونزلهم بعدين عقد حواجبه وهو يقول بضحكه..
/خلاص عاد..
ضحكت وخشت حضنه وهي تقول..
/تعرف هادي اكثر لبسه نحب نشوفك بيها..
ابتسم وقال..
/عارف..زارق عليك من ايام المدرسه..
غطت وجهها بيدها وقالت بضحكه احراج..
/يانهاري عليك عار كنت مفضوحه قدامك لهالدرجة!
ضحك وقاللها..
/انتي لو بتحشمي من شي وقتها تحشمي من بطء استيعابك اللي مافهمتي اني نحبك الا بعد قريب جبتيلي الجلطه..
قعدت تضحك بعدين قالت..
/بعيد السو..هي توا تعالى خل نغنيلك بش طفي الشماعي..
ومشت تولع في الشماعي وهو يتأمل فيها بنظرات تشع عشق..
وقفت ع حيلها وبدت تغنيله..
/سنة حلوة يابودي..سنة حلوة يابودي..
سنة حلوة سنة حلوة ..سنة حلوة يابودي..
عقدت حواجبها وقالت..
/هيا اقرب..
مسح ع حواجبه هو يضحك بعدين حرك راسه يمين ويسار وطبس نفخ ع الشماعي وطفاهم..
هي قعدت تصفق وتقول..
"هييه"
وهو يمسح ع لحيته ويضحك عليها..
🌼وغنت بعدين لفيروز "ياانا وياك" وهما هايم في صوتها في عيونها في جمالها..في لطافتها في طيبة قلبها وحنها..كل تفصيل فيها تغلغل فيه وقعد يجري في دمه...
اما هي فكانت تبي دير كل شي يطلع بإيدها بش تسعده وتعوضه وتشوف ضحكته ع وجهه زي ماهو دار معاها..
وكانت هديكا من اجمل الليالي اللي انحفظت في سجل الذكريات الحلوة في عقولهم وقلوبهم...
🍁🍁🍁🍁🍁
تاني يوم هو اخر يوم لوجودهم في الكفرة..
بعد مافطروا وشربوا قهوتهم تكلمت معاه طوبى عن شي قعد مأرق تفكيرها..
وهي حاضنة ايديه بإيديها قالت..
/نعاود نقولك ياروحي معذورين وعذرهم الحب..مرات الواحد من كثر مايحب حد من خوفه يغلط من غير مايحس اني عمري ماحنشكك في نواياهم وطيبة قلوبهم بالذات عمتك سليمة مراة ربت راجل زيك انت اكيد مافيش في طيبة قلبها..
تنهد وقال..
/خليها للوقت..
شدت ع ايديه وقالت..
/حبيبي بالله عليك كان تبي تريح قلبي امشيلهم وشن ماقالوا عليا مشي عادي ع ع خاطري..واعرف حبيبي مدام اني معاك وانت جنبي مافي شي يقدر يزعلني في الدنيا..
رفع ايديها وباسهم وهي تشوفله بإبتسامة حب وعيونها يلمعوا بالدموع..
🍃ومشي عبد القيوم لحوش عمته سليمه وللأسف رفضت تطلعله وهو كان متوقع هالشي وغزاله دارت زيها لما مشالها حتى هي رفضت تطلعله برغم الضيق والغضب اللي كان يحس بيهم عرف كيف يظاهر لمرته بالعكس لما اضطر يكذب عليها ويقول انه بعد محايله ومحاولات ارضاء رضوا عليه وسامحوه وطوبى المسكينة ارتاحت من حمل ذنب جديد ع كتافها...
🍀🍀🍀🍀🍀
يوم الاربعاء..
17مارس...سنة2021..
الساعه 8:30مساءا..
ربطت اكمام الجاكيت حوالين خصر ولدها بعدين وقفت ع حيلها وقالت..
/هي بروا لسونا..
ويطلعوا الزوز يجروا وهما يقولوا بصوت عالي..
"سونا"
ضحكت ورفعت شويه من فستانها المغربي ومشت خشت للمربوعه الدخلانيه اللي كانت مزحومه بالمعازيم..
صاحبات طوبى صاحبات غرفه صاحبة اريج..ابلة زينب وامها..نساوين عيلة الفاندي..حواء..
وكذلك مرت عيسى صاحب عبد القيوم..ومرت ربيع الهام..
ومن الجيران ماعزموش الا نجمة وبناويتها فقط..
هادم كلهم جوا للعزومه الكبيره اللي دارتها طوبى للناس اللي ماقدرتش تحضر عرسها...
☘ومن المربوعه للدار اللي كانت فيها طوبى تجهز في نفسها..
"هاه شن رايكم"
"عسل من يومك..قمر..هدا سؤال تسأليه"
الجملة الاخيره قالتها سدرة وخلت طوبى تضحك..
🌼وتطلع طوبى ووراها اريج وصفاء وسدرة المنتهى..
وهي ماشيه للمربوعه طلعولها من الصاله سدرة المهدي وتاله وجوري اللي لما شافوها ابتسموا بإعجاب وهي لما شافتهم ابتسمتلهم وبعتتلهم القبل..
"محلاااها"
هالجمله اللي قالتها احلى شي في حياتها خلتها توقف في مكانها..
مدت يدها وقالت..
/بنتي مافيش احلا منها..تعالي عيوني تعالي..
مشتلها بسرعه شدت يدها ومشت كملت بيها طريقها وهما لحقوها وسدرة المنتهى تمسح في دموعها..
🌼🌼
واول ماطل طوبى ع المعازيم تتعالى اصوات الزغاريد..
وتبدا الشتاوات..
والعيون عليها والنظرات كلها كانت نظرات اعجاب..
وتبدا الدربوكة اللي شدتها مروة ويديروا شوط حموه مطيره وسميره وصاحبات طوبى..
☘وعند الرجاله في المربوعه الخارجيه كانت الاجواء حميميه وجميله..
الى جانب عدايل عبد القيوم واصحابه حضروا اشرف ومحي الدين وكذلك ايمن الفاندي وخوته وطبعا عدي مش حيكون حاضر في مناسبه زي هادي..
🌾لكن فاتن ماقدرتش تفوتها عليها..
حطها السواق بولدها قدام الحوش،وكلمت سدرة حسين بش يفتحلها الباب..
☘☘☘
في المربوعه الدخلانيه .
كانت طوبى مقعمزة وحواليها صاحباتها تحكيلهم عن تفاصيل عرسها وتوريلهم في الصور،وفي عز انسجامها سمعت صوت فاتن وهي تقول..
"السلام عليكم"
رفعت عيونها وشافت ماخلا قلبها يفر من الفرح..
فاتن لابسه حجاب كامل وجنبها سدرة رافعه ولد خوها في حضنها وهي مبتسمه ودموع في عيونها...
طوبى نست نفسها..ناضت طول ومشتلها ولما وصلت فيها ضمتها بقوة..
ضحكت فاتن وهي تقول ودموعها في عيونها..
/مبارك..
طوبى يضحكه ونبره مرتعشه قالت بصوت مسموع لفاتن بس
/مبارك عليك انتي...
☘☘☘☘
في الصاله..
كانت فاتن مقعمزة وهي متوسطة سدرة وطوبى هي تحكي وهما يسمعولها..
فاتن؛طول هلبه في سفرته هادي مع الخدمه ينسى كل شي..
طوبى:عنده علم انك تحجبتي؟.
فاتن:لا لكن متوقع..
سدرة بقلق:باهي علاش مسكت هالتسكيته!؟.
فاتن:جية طوبى هداكا اليوم اثرت فيه بطريقة غريبه..شافت لطوبى وقالت..ماريتش حد في حياتي قدر يأثر ع مختار ويربكه غيرك انتي..
طوبى بضيق:ياريت لو كان تأثيري عليه قوي لدرجة تخليه يسيب حياة الظلام اللي هو عايش فيها وينجى من سخط ربي وعقابه..
فاتن ابتسمت وقالت..
/حندير اللي نقدر عليه بش نحقق الحاجه هادي..
شدت طوبى يد فاتن وقال..
/ربي يقدرك ويجعل هدايته ع ايديك ع الاقل ع خاطر هالنعمة الحلوة..شافت لعلي اللي كان يشوفلها..
وسدرة ضماته وباساته ع راسه وهي تقول بنبرة مخنوقه..
/يارب..
🍃🍃🍃🍃
الساعه 12:30ليلا..
مقعمزين ع السرير مقابلين بعض هو يحكي وهي تسمع..
عبد القيوم:اول ماعرفته كل مانبحت فيه نشوف حواليه هالة حسيته مش كيف الناس مش مريح نهائي لكن وين تقربتله حسيت اني نتعامل مع شخص طبيعي الهاله اللي حواليه اختفت..حسيته طبيعي لأبعد حد لكن في عيونه يبان شي يخلي اللي يشوفهن مايطمنلاش..
طوبى بضيق:صح وهدا اللي مخلي املي في صلاح حاله ضعيف..نفسه مش صالحه قلبه مش نظيف..
عبد القيوم؛نقولوا الله على كل شي قدير ويهدي من يشاء
دمعوا عيون طوبى وهي تقول..
/يارب..يارب..المهم ينجى من النار..
ضمها عبد القيوم لحضنه وهو مبتسم بألم...
🍀🍀🍀🍀🍀
ويعدوا يومين ويجي اليوم المعروف عالميا ب"يوم الأم"
واول ام استفتحت يومها احتفالا بهالمناسبة كانت سدرة المنتهى..
خشت لدار النوم بعد ماضمت الحوش ويطيح نظرها ع الزيانه لقت عليها تلاته علب هدايا..
ضحكت وقدمتلهم لقت معاهم ورقه مطويه خدتها وفتحتها وبدت تقرا فيها..
(إلى امنا التانيه حبيبة امنا الاولى ربي يطول في عمرك)
حطت يدها ع فمها وهي تبكي وتضحك وقلبها كان فرحان وحزين في نفس الوقت..
☘☘☘☘
تاني ام تلقت المفاجأة بعد كملت صلاة العصر وطلعت من دارها مشت بإتجاه الصاله واول ماتخشلها توقف في مكانها من الفجعة لما تسمع اصوات الانفجارات والقصاصات الملونه تنزل عليها..
راما بضحكه:كل عام وانتي احلى واحن ام في الدنيا..
بعد ماكانت حاطه يدها ع قلبها حطتها ع عيونها وقعدت تبكي قدمتلها راما وضمتها..
ونجمه وصفاء ونجاح كانوا يشوفولهم وهما متأثرين ع الأخر وعيونهم ادمع..
☘لكن ماطالتش حالة البكاء هادي بسرعه صفاء غيرت جوها لما قعدت تغنيلها وهما يصفقوا وبعدين خلوها ترقص وهي تضحك..
☘☘☘☘
وتالث ام تتلقى مفاجاة كان وقعها قوي عليها..
كاريمان..
اتفقت طوبى مع سالمين تاخدلها هديه حجزت فيها ع احد الصفحات وخلوا هالهديه توصل لكاريمان عن طريق خدمة التوصيل لوحده من محلات تغليف الهدايا..
ومع مغرب هداكا اليوم وصلت الهديه لكاريمان واستلمها الصابر اللي كان زيها مش عارف شي..
☘كاريمان وهي مستغربه:في كرت هنا صح؟
شافه الصابر خداه وفتحه وبدي يقرا بصوت مسموع..
(كنتي اجمل مفاجأة جاءني بيها القدر واغلى هداياه..
بنتك..طوبى)
ضحك وهو يشوف لمرته اللي كادت طير من الفرح وهي تقول بنبرة باكيه..
/طوبى ياقلبي حبيبتي..خدت الكرت وقعدت تقرا فيه ودموعها ينزلوا وراجلها جنبها يشوفلها وهو مبتسم والدمعه في عينه..
☘☘☘☘
وفي حوشها اللي كان لام الاحباب..
تلقت مطيره الهدايا من بنات خوها اللي خلوها تبكي وهي تقول..
/خزي عليكم علاش تخلوا فيا نبكي هكي!؟
وهما ضموها مع بعض واصوات ضحكاتهم عبا المكان..
☘بعدها جي دور صفيه اللي هدتها سدرة خاتم ذهب وهي تقول..
/مش حنوفيك حقك مهما درت كنتيلي امي بعد امي وعمرك ماخلتيني..
ضمتها صفيه وهي تقول ببكي..
/والله اني ربي راضي عليا اللي خلاك بنتي..
وكلهم كانوا يشوفولهم وهما متأثرين بقوة..
☘وبعد صفيه جي دور فردوس اللي هدوها اريج وطوبى وهي فرحت من قلبها بهداياهم..
ومسك الختام..
كان من غرفه وطوبى لسدرة المنتهى..
غرفه ودموعها ينزلوا..
/عمرك ماكنتي اختي كنتي ديما امي واني كنت البنت العاصيه اللي ياما تعباتك..
طوبى بنبرة باكيه:بالعكس ثمرت فيك ربايتها ووليتي خير منا كلنا..
ضمت غرفه طوبى وهي تبكي..
وسدرة تشوفلهم بصدمه وهي تقول..
/هيه هيه..ضبطوني اني اني..
ضحكوا وطلقوا بعض بعدين ضموها بقوة وهي تقول..
/تي خلاص قتلتوني معاش نبيلكم حب..
وتصدح اصوات الضحك في الحوش كله...
☘☘☘☘
وضحكات صاحبتها نسرين اللي كانت متلاحقه من المفاجأة اللي داروهالها صغارها خلت امها مغليه فرحانه من قلبها..
فرحانه لأن ربي اراد يعوض نسرين بصغارها لما خلاهم يقربولها ويحبوها ويحنوا عليها..
ونسرين في هداكا اليوم بس عرفت ان الله سبحانه وتعالى عطاها نعمة لاتقدر بثمن مفروض تكمل حياتها وهي تحافظ عليها..
☘☘
ومن فرحتها بهاليوم صورت ونزلت كل شي ع الستوريات انستقرام وفيس بوك وتشوفهم خديجه وتنهار بالبكي..
قبلها شافت هدية راما لعواطف واحتفالها بيها وبعدين تشوف ما قهرها بكل معنى الكلمه..
ولدها محمد جايب هديه لسميرة مرت عمها ومنزل عليها اقتباس عن الام خاتمه بجملة"امي سميرة"
واتصلت طول باختها تشكيلها وتبكيلها وكلامها سمعاته سدرة اللي كانت جايه لدار عمتها تناديها ع العشي وبرغم نفورها من عمتها خديجه لكن قلبها رق لحالها..
وقعدت طول الوقت تتفكر في كلام خديجه اللي قالاته وهي تبكي لعند ماجي وقت مرواح راما ومحمد..
☘محمد بتذمر..
/تي سقدي روحك هيا..
محمد المهدي:وسع بالك عليها..
سمعاته راما وهي تلبس في كندرتها زادت ارتبكت ومعاش عرفت يسارها من يمينها..
فهاللحظه تطلع سدرة المهدي وهي لابسه عبايه ووشاح رفعت حاجبها وقالت..
/معليشي نبي نقوللكم حاجه..
شافتلها راما بخوف ومحمد رفع حاجبه..
اما خوها كان يشوفلها بإستغراب..
سدرة:بكري امكم كلمت عمتي نسرين وهي تبكي قالت مايدوروش فيا ولايسألوا عليا وكأني ميته..عارفه انتم زعلانين منها هلبه ومرات عندكم حق لكن تقعد امكم مهما دارت حاولوا تتفكروا حاجات حلوة دارتهالكم زمان ومعاش تخلوها تبكي..
ومشت طول من حداهم وهي هاربه بدموعها وخوها يشوفلها بألم..
محمد الصيد اللي كان شاد دموعه بقوة قال..
/هيا راما..
لبست راما في رجليها ومشت طلعت بسرعه ودموعها ينزلوا وعيون محمد المهدي معاها وهو يتفكر في الحلم وصوت امه في وذانه وهي تقول"لبسها لراما"
..ومشي سكر الباب بعد ماطلعت وهو يمسح في دموعه...
