#طوبى "جنة طوبى"
#جمان_فريد
#الجزء_120"حلاوة الدنيا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الحوقله
عن أبى هريرة رضى الله عنه عن رسول الله، صلى الله عليه وسلم، قال: "من قال: لا حول ولا قوة إلا بالله كان دواءً من تسعةٍ وتسعين داءً أيسرها الهم".
حديث رواه الإمام الحاكم وقال: صحيح الإسناد. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 الوجه الجميل مَظِنَّةُ الفِعْل الجميل، فإنَّ الأخلاقَ في الغالب مناسبةٌ للخِلْقة، بينهما نسبٌ قريب.
ابن القيم | روضة المحبين.🍃
________________________________________
في حوش جبريل وسالمين..
اللي اول مرة تخشله طوبى وسبق وجوه سدرة ومختار قبل مع لطفي وورده والعمة مطيره..
كانت تحوم ذكريات الماضي قدام عيون سالمين..
تشوف لطوبى وتسمع في هدرزتها وبين عيونها ناس راحت مع هذاكا الماضي لغير رجعة..
غيرت نظرها عنها وشافت لعبد القيوم..ركزت في عيونه وهما يشوفوا لطوبى كان باين فيهم الحب زي مابانلها الحزن اللي خالط هالنظرات المحبة..
ابتسمت بأسف وردت نظرها لطوبى وهي تسمع فيها تقول لجبريل..
/والله كلهم حالهم باهي والحمد لله وبعتولكم معاي عرم سلامات..
ضحكوا جبريل وسالمين وعبد القيوم ابتسم بحب وعيونه ماغيرهمش عنها..
سالمين:سلمك وسلمهم..اكيد تعبانين وجواعه..
طوبى:عن نفسي جعانه هلبه..
ناضت وهي تقول..
/دقيقه ويجيك العشا..
رفع عبد القيوم حواجبه وقال..
/ونحنا من هلنا!؟
ضحكوا..
جبريل؛مع طوبى خالتك سالمين معاش تحق حد حتى نا نطيح من الحسابات..
سالمين وهي تشوف لطوبى..
/تعالي معايا بيبا تعالي..
ناضت طوبى وهي تضحك خدتها سالمين من يدها ومشت بيها للكوجينه..
جبريل غير نظره عنهم وهو مبتسم وشاف لعبد القيوم لقاه قاعد بنظره معاهم لين اختفوا من قدام عيونه قاله..
/شجو ياعبدو..
شافله وابتسم ابتسامة خفيفه وقال..
/مليح..
🍃وفي الكوجينه..
سالمين؛غير قولي الحق يابيبا متريحه معاه..
ابتسمت بحزن وقالت..
/هلبه لكن هو اللي مش مرتاح معاي ياخالتي..
بدت ع وجه سالمين ملامح الحزن..
طوبى:ماريتش في حياتي حد زيه ياخالتي محترم واخلاقه عاليه وراقي هلبه ولامرة من لما عرفته وجعني بكلمه ولاشفت منه حاجه وجعتني..لكن حاله معاي هو اللي واجعني ياخالتي..
نزلوا دموعها مسحتهم وهي تقول..
/مش جايه بش نكد عليك..بس نبي نطمنك عليا عبد القيوم مافيش منه ياخالتي..
مسحت سالمين دموع طوبى وحطت يدها ع خدها وهي تقول..
/حتى انتي مافيش منك ياقلبي ومافي حد قدرك كيف ماقدرك عبد القيوم عارفك حاجه كبيره وغاليه هذى ليش دار اللي داره عشانك ياطوبى..نزلت يدها وشدت يد طوبى وهي تقول..قلت لعمك جبريل وكان يجيبها تعيش هنا احسن شي ويساعدك في العلاج واجد..
طوبى بإستغراب:كيف!؟
سالمين:ماتندريش من يوصل لهذكي الشيطان اخبارك مرات وين يعرف انك زوجتي وبديتي تشفي من السحر يديرلك شي كاينه اخرى..
طوبى:حيعرف مكانا ياخالتي مافي شي يقعد مدرق ديما..مش حنقعد هاربه منه ياخالتي حنوكل عليه الله وهو يكفينا شره..
هزت سالمين راسها وهي مبتسمه بأسف بعدين قالت..
/ونعم بالله..
قربتلها طوبى وطبعت قبله ع خدها وقالت..
/هيا ورينا شن درتي جعانه موت..
ضحكت سالمين من بين دموعها وقالت..
/بعيد السو..
ومشت للحوافظ متاع الأكل وهي تقول..
/تعالي بحتي تعالي..
☘وخلتها تشوف اصناف الاكل اللي داراته كان كله يشهي ومغري طوبى ماقدرتش تقاوم قعدت تاخد وذوق وتمدح وتشكر وسالمين تدعيلها بالصحه ومرات تضحك ع كلامها..
🍃ومن بنغازي لطرابلس..
وفضانيه آل شنيبه وآل النفاثي..عمر ونفيسه..
كانت فضانية "الدفع" كبيرة وفخمة بكل تفاصيلها عيلة شنيبه قدروا عيلة النفاثي والعكس صحيح..
محمد شنيبه والمهدي عجبتهم العيلة وانسجموا معاهم اب نفيسه راجل مقدر وصيته وصيت ولاده عالي كل اللي طلبوه من محمد شنيبه انهم يعاملوا نفيسه زي بنتهم وفي نفس الوقت بينولهم قداش هي غاليه ومهمه عندهم ووضعها مش مخليها ثقيله ع قلوبهم يراجوا غير امتى يعطوها ويخلصوا منها...
☘واكيد مناسبة زي هادي مش حتغيب عنها خديجة من بعد العصر كانوا هي وعمتها كامله في حوش بوها..
نسرين في البدايه تعاملت معاها بجفاف لكن خديجه عرفت كيف تخليها تنطلق وتغير اسلوبها لما خدتها بالهدرزة عن حياتها في حوش عمتها وحياة الناس غادي واجوائهم..
ابرز مالاحظت نسرين وكذلك امها مغليه ومرت سميرة هو علاقة خديجه بكامله اللي ولت قويه هلبه..
اما سدرة المنتهى لاحظت انها تتجنب النظر ليها والسبب عندها معروف..
☘☘☘☘
وروحوا الرجاله من الفضانيه حاملين محملين واستقبلوهم نساوين العيله بالزغاريد..
وعمر اللي كان طول الوقت قاعد في القهوة يراجي فيهم خش بعدهم للحوش والفرحة باينه في عيونه..
جاته خديجه وهي تغني..
/يامبروك عليه شقيقي..هدا وين زمطه ريقي..
وصلت فيه وضماته وهي تقول..
/مبارك مبارك ربي يتمملك ع خير..
عمر وهو حاضنها قال..
/قولي باهي ع بشير بش نديروا عرسنا مع بعض..
ضرباته ع ظهره ضحك وهما يضحكوا عليهم..
🍃🍃🍃
واقفه تشوفلها وهي تنشف في ارضية الكوجينه بعد مادام صمتها للحظات قالت..
/ماتبيش تمشي تشوفي امك؟
وقفت وشافت لعمتها وهي تقول..
/بنمشي غدوة نوقف عليها ساعه ونروح..
عواطف:هو هدا ديري واجبك لله وخلاص..
هزت راما راسها وكملت شغلها وعواطف مشت طلعت من الكوجينه وهي تقول..
/سكري الباب البراني كويس لما تكملي..
راما:حاضر..
🍃ومحمد خوها في هاليوم كان ماشي للمنطقة اللي يسكنوا فيها ولاد عمه عبد الفتاح علاقته بيهم ولت قويه جدا تأثر بيهم وتأثر بشكل حياتهم وتأثر حتى بأمهم اللي كانت ماتفرقش في المعامله بينه وبين ولادها...
🍃🍃🍃🍃
"ماشاء الله خالتي سالمين دايرة وليمة لطوبى"
قالت هالكلام غرفه وهي تشوف في ستوري صفحة طوبى..
جنبها فردوس قالت بإبتسامه وهي متشوقه..
/وريني ترا..
مدتلها الهاتف خداته فردوس وبدت تتفرج وتقول..
/اللهم بارك عاد معروفه خالتي سالمين بالكرم والجود وحاجتها ديما باهيه..
غرفه؛مشيتي لبنغازي قبل!؟
فردوس:ولا مرة اللي كانوا يمشوا وحني صغار مختار وسدرة بس وبعدين قعدت تمشي طوبى مع سدرة..
غرفه:نتفكر مرة قالولي امشي معانا مابيتش..
ابتسمت فردوس ومدت الهاتف لأختها وهي تقول..
/يابتدلع دلع طويبه فهالسبوعين..
غرفه خدت الهاتف وهي تقول بإبتسامه..
/وعاد صادفت مشيتها عرس وحده من قريبات خالتي سالمين..
فردوس:خلها والله تهيج..
غرفه هزت راسها بإيجاب وهي تشوف لهاتفها بإبتسامه تخفي بيها قلقها ع وضع طوبى...
☘وطوبى فهالوقت..
بعد ماعاونت سالمين في غسل ماعين العشي جهزت سفرة القهوة والشاهي للرجاله..ولاد سالمين جو بعد العشي بش يشوفوا عبد القيوم واصوات هدرزتهم وضحكهم كانت تسمع فيهم وهي ترتب في المعمول وباقي الحلويات في المترد..
سالمين:هاه بيبا السفرة واتيه..
التفتت وقالت:ايه خالتي خلاص..
سالمين:هاتي خل نطلعها..
وخدت سفرة القهوة والشاهي طلعتهم وبعد لحظات خشت خدت مترد الحلو وطلعت بيه .
وطوبى بدت تجهز في سفرة ليهم هما الزوز..
خشت عليها سالمين وقالت بإبتسامه..
/واتيه سفرتنا!؟
رفعتها طوبى وقالت بإبتسامه..
/واتيه..
سالمين بضحكه..
/نجك ليا..
ضحكت طوبى بعدين طلعت ورا سالمين بعد ماقالتلها
"تعالي معاي.."
☘قعمزوا زوز في ركن فيه جلسة عربيه بسيطه موجود في صالة الحوش الكبيره..
مررت طوبى نظرها عليها وهي تشوف في نظامها وديكورها كانت عالم وع نظامين افرنجي وعربي وكل شي فيها فخم..
سالمين:اشربي قهوتك بيبا..
شافتلها طوبى بعدين خدت فنجان القهوة وقالت..
/الحوش هدا اكبر من حوشكم اللي في بوعطني..
سالمين بإبتسامة:كان لأمي الله يرحمها..
رفعت طوبى حواجبها بعدين هزت راسها بصمت وشربت من فنجانها..
سالمين:امم..احكيلي عن حياتك مع عبادي..
تنهدت وقالت بإبتسامه حب..
/لتوا ياخالتي مش مصدقه قصته معاي وين نقعظ بيني وبين نفسي ونفكر فيها نقول معقوله ياطوبى انتي نفسها البنت اللي يحبها عبد القيوم ودار ع خاطرها لداره!؟ معقوله في حد يحبك في هالدنيا لهالدرجة ياطوبى لا مش حب عادي حب ولافي الخيال ياخالتي والله اللي يسمعه القصه مايصدقها..
سالمين بإبتسامه:صارلك زيك لما سمعتها اول مرة من صفيه انا ان عبد القيوم يبي وحده من طرابلس..في مرة شفتله بنت عجبتني واجد ودويتله عليها عشان يخطبها لما تميت نقنع فيه قالي ياخالتي راه قلبي مش خالي واللي نبيها قاعده في طرابلس..
ابتسمت طوبى والدموع عبوا عيونها وقلبها يدق بقوة..
سالمين شدت ذقنها وقالت..
/في بالي ان داير علاقه مع بنيه من طرابلس مش خاطر عليا حتى في الخيال انه هالبنت تكون انتي لا وسبحانك ياربي كيف جابه لنا وخلاه يجاورنا خمس سنين وخلا عمك جبريل يكلم لطفي الله يرحمله يدبرله في واسطه عشان يخدم في طرابلس لاووين يسكن في نفس الشارع ولاهو عارف ولانحنا ولاانتم اللي قاعد يدبر فيه ربك بش يوصلكم في بعضكم..
طوبى وهي مبتسمه ودموعها في عيونها قالت..
/واني نسمع في كلامك حسيت جسمي تقشعر سبحان الله العظيم..
سالمين بإبتسامه ولمعة الدموع باينه في عيونها..
/هذى كله بش تعرفي ان ربك خلاه نصيبك لأن خيرتك فيه وماوصلكم لبعضكم الا في الوقت الصح ياطوبى..
تنهدت وقالت..
/ونعم بالله..
سالمين ودموعها عبوا عيونها..
/ربي يخليكم لبعضكم ومايفرق بينكم وتعيشوا ايامكم كلها فرح في فرح ويصرف عنكم السو ومن يبيلكم السو..
طوبى بإبتسامه وهي تشوف للفراغ..
/اللهم آمين..
بلعت سالمين ريقها بعدين قالت..
/ايه خبريني عن فرح السوريين..
شافتلها وقالت..
/ايه حقه قوليلي علاش كنتي تقولي زيهم ان عبد القيوم يبي هادي سلافه!؟
سالمين:تهيالي هكي..
قالتلها:كيف يعني شفتي عليه شي خلاك تقولي هكي!
سالمين؛لو نعرف ان عينه عليها ماكنت رضيت ان ياخدك ياطوبى..انا اللي شفته شي عادي غير لإني مش متعوده بعبد القيوم يكون عنده احتكاك واجد بالصبايا قلت يمكن يبيها..
طوبى بضيق..
/هدا اللي منرفزني نحس فيه يعامل فيها معامله خاصه..
سالمين:وكان يبيها ماخداك المهم انتي ردي بالك تدويله عليها ولاتبينيله ان عينها عليه..
طوبى بقلق..
/قصدك مرات يركز عليها و...تنهدت بضيق وماقدرتش تكمل كلامها..
حطت سالمين فنجانها وقالت..
/لالا مش هذى قصدي لكن يابنتي الاحتياط واجب وهو راجل كيف هالرجاله مرات نفسه تزوغ ويغلط مش معصوم راهو..
هزت طوبى راسها وقالت..
/عندك حق..
سالمين بحزم: بيبا حبيبتي بحتي فيا ..
شافت طوبى لسالمين بعيون نظراتهم كلها حزن..
قالتلها بنفس النبرة..
/خليك واثقه من نفسك ماتخليش اللي عشتيه فتجربتك الاولى يسيطر ع تفكيرك وبعدين بنقولك حاجه حطيها ديما في بالك هذكي الجالي انكلب بعد خلتيه تعرفي ليش لأن عرف ان اللي زيك التفريط فيهم اكبر خسارة هذى الجالي هكي مال عبد القيوم اللي بيموت عليك كيف..يابنتي راك حاجه كبيره والله ومانقول هالكلام مجامله ولارفع معنويات اللي زيك انتي مايتقارنن بحد والخاسر بس هو اللي يفرط فيهن..
ابتسمت طوبى بحب وهي تسمع في كلامها بعدين قالت..
/عندك حق..
ضحكت سالمين وقالت..
/بدري قدامي نا وعمك جبريل عيونك عليك ماغيرهن عنك ميت عليك موت راهو..
ضحكت طوبى بخجل..
سالمين خدت طرف معمول مداته لطوبى وهي تقول..
/بكرا ان شاء الله عندنا طلعة للسوق..
خدت طوبى طرف المعمول وهي تقول..
/جبت معاي حوايج للعرس..
سالمين:اطلعي معاي وشوفي حاجاتنا في بنغازي مافيش كيفها مرات يعجبنك حاجات وتاخديهن..
كلت طوبى من المعمول وقالت..
/باهي..
سالمين:ايه وبعد نكملوا برمتنا في السوق بنتكوا ع حوش خالتك كاريمان ناخدوها معانا ونعدوا لاختي عياده دايرة عزومة لان بنتها حفظت القرآن كامل..
طوبى بإبتسامه غبطة قالت...
/الله يبارك الله يبارك..من منهم؟ع مااعتقد سلوى ولا!؟ نعرفها قبل ملتزمه شويه..
سالمين:لا توا الله يبارك عليها راحت شيخه وتقرا في العلم الشرعي..
تعبوا عيون طوبى بالدموع وهي تقول..
/الله يبارك..
سالمين:عشانها هي اختها بدير ايام فرحها كلهن من غير موسيقى ماعدا يوم الحفله..
طوبى:ربي يكمل ع خير..
سالمين:آمين..
🍃وكملوا سهريتهم اللي كان كلام فيها عن مواضيع مختلفه بعيده عن مايهم ويغم استمتعت بيها طوبى جدا وياقداش ضحكت من قلبها..الراحه اللي حستها في هالهدرزة مع سالمين نستها همومها واوجاعها وخلتها ماحستش بمرور الوقت معاها..
********
سالمين؛خليها تبات معاي الليله..
حرك راسه يمين ويسار بالرفض بدون مايتكلم..
سالمين بضحكه:ياودي الليله بس متوحشتها واجد..
حط ايديه ورا ظهره وقال..
/وعد نخليها تنزلك من الصبح..
رفعت حواجبها وقالت..
/معاش نحاول خلاص مانكش واخد بخاطري!؟
حط يده ع راسه وهو يقول..
/خاطرك هنا..نزلها وقال..لكن سامحيني فالموضوع هذى..حرك يده قدامه من اليمين لليسار..
بضحكه قالت..
/حقاتك ياباتي..
ابتسم بإحراج وغير عيونه عنها وهي ضحكت وخشت داخل..
☘وبعد لحظات طلعتله طوبى ع جية جبريل سلموا عليه هو وسالمين وركبوا مع بعض للدور الثاني..
🍃جبريل وهو مبتسم رفع حاجبه وقال
/شن رايك!؟
ابتسمت سالمين برضا ودموعهافي عيونها وهزت راسها بإيجاب..
☘وفي الدور الثاني..
خشت طوبى وهي تقول..
/لا والله ماقلتلها حاجه هي قالت واني ماقدرتش نكسر بخاطرها..
رفع حواجبه وهو يحرك في راسه يمين ويسار ويقول..
/يابختهم اللي تاخدي بخاطرهم..شافلها برفعة حاجب وقال..يعطوني من بختهم معاك شويه..
طوبى بضحكه وهي عاقده حواجبها..
/حسستني عمري ماخديت بخاطرك..ضرباته ع ذراعه وهي تقول..خزي عليك..
ردلها الضربه وهو يقلد فيها ويقول..
/هذى ليش جيتي بتخليني نبات بروحي.!
طوبى بضحكه..
/وشن بتاكلك الغوله!؟
رفع حواجبه وهو يشوفلها بتعجب..
قعدت تشوفله شويه وهي تضحك بإستفزاز بعدين قالت..
/كنك!؟
نزل حواجبه وقعدت ساكت وهو يشوفلها هي فهمت نظرته هربت تجري وهي تضحك وهو لحقها مشي وقال..
/تي غير بالشويه يسمعوا في خبط كرعيك وانتي تجري..
سمع صوتها وهي تقول بصدمه..
"حي ع العار"
ضحك وهو مكمل طريقه يلحق فيها...
🍃🍃🍃🍃🍃
مقعمز ع سريره في الدار وعيونه ع هاتفه..
اليوم خدي من اخته رقم هاتف خطيبه واسم حسابها ع الفيس بوك..
خش ع الفيس ودور ع حسابها لعند مالقاه خش عليها لقاه مسكر مافيشي الا منشورات الاشارة واخرهم كان عن الفضانيه داراته اختها..
خش ع التعليقات وقري ردودها ع تعليقات معارفها وصاحباتها عجبوه هلبه كلها ردود حلوة وراكزة لكن اكثر تعليق لفت انتباهه لوحده من قريباتها تشكر في تطييبها لعشي الفضانيه وتنسيقها وطريقة التغليف تفاجئ ع الآخر
قالتله سميرة انها ست بيت شاطرة لكن ساوره شي من الشك اتجاه مديحها ليها توقع انها تبالغ بش تشجعه ع الموضوع لكن كل ماله يتأكد ان اللي قالاته سميره عليها حقها ومرات اقل من حقها..
بحماس شديد بعتلها طلب اضافه وقعد يتصفح في الفيس وهو يراجي تقبل الطلب ماتحملش اكثر من خمس دقايق انتظار خشلها ع الخاص..
(السلام عليكم)
واستنى شويه ولما ماجاه رد..اضطر يكتب رساله ع الهاتف
(مساء الخير..
اني عمر شنيبه هدا رقمي والحساب اللي بعتلك طلب توا ليا اني اعتقد واضح من الإسم)
ابتسم برفعة حاجب وبعتها..
وبعدين خش طول للماسنجر...
لقاها فتحت الرساله وشافتها ويقعد عمر يراجي ومايجي منها شي..
رفع حواجبه وهو مبتسم تعجبا بعدين كتب رساله وبعتها..
(استكراد مقصود! من اولها هكي)
كذلك شافتها وماردتش..
ضحك عمر وهو متعجب جدا تنرفز صح بس حس اتجاهه بإنجذاب اكثر من قبل..
جاه اشعار شافه لقاها قبلت طلب الاضافه ضحك وعض ع شاربه..فكر شويه بعدين مشي دور ع صورة معينه لما لقاها بعتهالها..
الصورة كان فيها ورده حمرا مكتوب فوقها شكرا ع قبول طلب الصداقه..
🌸نفيسه لما شافتها قعدت تضحك عرفاته يستفز فيها يبيها تكلمه لكن هي قعدت صامده..غروره خلاها تتعامل معاه بهالطريقه كانت تبي تكسر هالغرور قدامها هي بس..
وخلاته يناشب فيها وهي تتفرج وماتردش لعند مابعتلها..
(الصباح رباح تصبحي ع خير)
ضحكت بعدين طلعت من الماسنجر وخشت ع صفحتها كتبت..
(تصبحون ع غدا اجمل)
وكان هو اول المتفاعلين بأحببته..
ضحكت وحطت راسها ع المخده وهي حاسه بمجموعة مشاعر وكلها كانت حلوة..
اعجاب..تفاؤل..وشوق لحياة جديده تعوض فيها كل اللي فاتها..
اما عمر تعافر هو النوم هلبه كان متشوق هلبه لكلام معاها وع اكثر مرة حاول يتصل بيها لكن كان يتراجع في اخر لحظه..
🍃ونضال ع السرير اللي جنبه كان يظاهر بالنوم وهو يراقب في حالة خوه اللي خلاته يتحسر ع ماضي قريب خطر عليه بكل تفاصيله..قلبه كان موجوع والدمعه ع حافة العين لكن بما عنده من قوة تماسك وسلم امره كله لله واللي فيها الخيره يجيبها ويرضيه بيها...
🍃🍃🍃🍃🍃
تاني يوم...
بعد صلاة العصر..
كانت طوبى تجهز في نفسها للطلعة مع سالمين لبست حجابها الكامل بعدين خدت هاتفها من الشحن وجت بتحطه في الشنطه شافت شي استغراباته ظرف ابيض..
طلعاته وفتحاته لقت فيه مبلغ يبان كبير..
مشت طلعت من الدار وهي تنادي..
/عبد القيوم..
"هنا هنا"
تبعت مصدر الصوت لقاته قريب ع الباب يلبس في جاكيته قدام مراية المدخل..
وقفت حداه وقالت وهي تأشر بظرف..
/انت حطيته!؟
هو وعيونه ع المرايه ويساوي في جاكيته هز راسه بإيجاب..
طوبى:قتلك بندير معاهم دورة مش شاريه شي..
تنهد وشافلها..قعد ساكت للحظات بعدين قدملها..
شد وجهها بإيديه وقال..
/شكلك لعند توا مازلتي مستوعبه انك وليتي مرتي ونا راجلك!..
طوبى بشي من الضيق..
/لكن مش هكي لكن..
قاطعها لما قال..
/لاهكي ياطوبى هكي..قرب منها وطبع قبله ع جبينها وبعد وهو يقول..استوعبي ياقلبي ارجوك معاش نبي يقعد بيني وبينك حواجز نهائي..
هي هني فهمت كلامه بشكل تاني ضايقها هلبه مع هذا رسمت ع وجهها ابتسامه وردت الظرف للشنطه وسكرتها..
هو ضمها لقلبه وقال..
/نحبك موت..
ضحكت وقالت..
/واني ارهيقي هولانات..
ضحك وباسها ع راسها وهو يقول...
/ربي يحفظك ليا وخلاص..
☘ونزلوا تحت وهما يهدرزوا ويضحكوا وسالمين وهي مقعمزة في الجنان تراجي فيهم سمعتهم يضحكوا ابتسمت..
بانوا عليها لما شافتها طوبى قدمتلها وهي تقول..
/خليناك تراجي هلبه!.
سالمين بضحكه:لاانا مستعجله ع طلعة السوق..
ضحكوا وعبد القيوم مشي لسيارته وهو يقول..
/تعالن..
مشوا وراه وهما يهدرزوا لعند ماوصلوا في السيارة..
ركبت طوبى من القدام وسالمين من الخلف وطلع بيهم طول من الحوش..
🍃🍃🍃🍃
فتح باب وطلع وهو شاد هاتفه في يده..
لبس في رجليه وبدي يتمشى في الجنان اتصل بيها وحط هاتفه ع وذنه وقعد يراجي في ردها..
نادى مرة تنين تلاته ولما قرب يفصل فتحت الخط وقالت..
"السلام عليكم"
اول ماسمع صوتها حس بشعور حلو للغايه ابتسم ورد عليها..
/وعليكم السلام...شن جو..
"تمام..كيف حالك وكيف حال العيله؟"
بإبتسامه قال..
/الحمد لله كلنا كويسين وفي خيار الخير انتي اللي شكلك حاصله اليوم بازين وفطيرة وسفنز..
"حوش عمي باتوا عندنا "
عمر:وكل شي مصورتيه ومنزلتيه درتيه انتي!؟
"مالا منو اني الوحيده اللي قاعده في خواتي البنات واكيد مش حنحير امي.."
ضحك بعدين قال..
/ ديما نحس فيك محطوطه ع وضع الهجوم..
"لامن قال اني هدا اسلوبي مانحبش المجامله لكن نتكلم بهدوء"
ابتسم وقال..
/مواليد كم انتي!؟
"خطيبي ومش عارف مواليدي!؟"
ضحك وقال..
/باهي اني مواليد كم..
"مانعرفش حتى اني"
قعد يضحك من قلبه...
وهي راجاته لين هدا ضحك وقالت..
/معليشي مضطرة نسكر توا مش فاضيه يناسبك تكلمني بعد صلاة العشي!؟
سكت شويه بعدين قال..
/امم يناسبني..
"باهي السلام عليكم"
بإبتسامه رد يقول..
/وعليكم السلام..
نزل الهاتف ونهي المكالمه وكان عنده رغبه يعاود يكلمها مرة تانيه ومش عارف كيف بيصبر لبعد صلاة العشاء..
دق باب الحوش التفت شافله بعدين مشاله وفتحه ابتسم لما شاف من كان وراه وقال..
/اهلا..خشي خشي..
خشت راما هو سكر الباب..
راما:كيف حالك خالي..
ضمها بيد وحده وهو يقول..
/تمام الحمد لله كيف حالك انتي؟
راما:كويسه الحمد لله..مبروك عليك وربي يتمم ع خير..
باس ع راسها بعدين قال..
/الله يبارك فيك يادرهوبه..
انفتح باب الحوش الدخلاني وطلع منه محمد المهدي..
شافوله الزوز..لما جو عيونه في عيون راما نزلتهم طول وهو حس بالشفقه اتجاهها..
شافت راما لخالها وقالت..
/بنخش..
طلقها وهي مشت بتخش وعيون محمد قعدوا معاها لعند ماخشت للحوش تنهد بعدين شاف لعمه لقاه يشوفله بنظرة استغراب..
هو توتر بعض الشي مشي بسرعه للباب وقال..
/ماشي للقهوة..
فتح الباب وطلع وسكره وراه..
مط عمر شفايفه للاسفل بعدم فهم بعدين غير نظره لهاتفه لما سمعه رن..قامه وشاف الشاشه عقد حواجبه بإستغراب لما لقي المتصل رقم دولي..!
🍃في نفس الوقت..
لما طلع محمد من الحوش شاف سيارة عاليه سودا واقفه قدام حوش مرت بوه..
ركز ع اللي يسوق فيها حس روحه شايفه قبل..
لحظات ومشي بالسيارة ومحمد شاف لباب الحوش لقي تاله تسكر فيه...
حس بضيق في صدره بدون مايعرف السبب خدي نفس بعدين مشي بإتجاه القهوة...
🍃🍃🍃🍃🍃
"قصدك الحوايج اللي جبتهم معاي مش حلوات"
سالمين وهي دور في المحل..
/لاياسمحة ذوقك حلو من يومك لكن انا نبيك تغيري الجو البسيط اللي ديما تطلعي بيه نبيك تغيريه جددي وكوني جريئة وقويه في طلتك..
طوبى:جريئة!؟
سالمين بضحكه:مش كيف مافهمتي قصدي نبيك تلبسي الفخم والملفت ديري المكياج اللي يزيد يبرز جمالك نبيك تباني عروس بكل معنى الكلمه..
تنهدت طوبى وقالت..
/مش عارفه مانحبش هكي نحب الشي الهادي والبسيط..
شدت ع يدها وقالت..
/اسمعي مني هالمرة بس صدقيني مش حتندمي..
طوبى وهي تمرر في نظرها ع المحل..
/لكن المحل هدا غالي هلبه..
سالمين بضحكه..
/مالا خايفه ع جيب عبد القيوم! بقدره يشري المحل كله ..
طوبى:عارفه لكن مانبيش نبيخها معاه..
عكرشت سالمين وجهها وهي تقول..
/اللي يسمعك يقول تحكي ع براني..راجلك هذى راهو راجلك اضربي ع جيبه وماتعدلي وكانك عليه هو مستعد يعطيك روحه..
ضحكت طوبى..
ابتسمت سالمين وقالت..
/تعالي شوفي الفستان هذى..
☘وقعدت سالمين دور بطوبى من محل لمحل خلتها تاخد لبسة لكل يوم حتحضره في العرس وحتى من الاحذيه خدوهم واخر شي..
سالمين:هي تعالي..
طوبى بإحراج:فكيني بالله عليك..
جبدتها سالمين بدون ماتزيد تناقشها وخشت هي وياها لمحل خاص بمستلزمات العرائس وكذلك خلتها تاخد منه لعند ماكملت فلوسها..
وطلعوا هما حاملات ومحملات..
طوبى:قالي تلقوني قدامكم..
سالمين:وينه!؟
ودرس سيارة عبد القيوم قدامهم نزل منه ومشالهم بش ياخد الحاجات..
وصل في سالمين خدي منها وهو يقول..
/خلاص كملتن!؟
سالمين:ايه ياسيدي خلاص..
طوبى التزمت الصمت كنت محرجه منه لانها صرفت الفلوس كلهم..
قعدت تشوفله وهو في الاكياس في الكوفني..
بعدين جاها وقال لخالته سالمين..
/عدي اركبي خالتي..
ابتسمت ومشت ركبت في مكانه..
هو خدي من طوبى الكياس وعيونه عليها بعدين قال بصوت منخفض..
/ اضويغاك هولان
بإبتسامه قالت..
/حتى اني..
بضحكه قال..
/فهمتيها..
قالتله وهي مبتسمه بحب..
/حسيتها..
ابتسم وقال..
/شن معناها!؟
طوبى بضحكه..
/استاحشتك هلبه..
ضحك وقال..
/تي عدي ياهلبه اركبي السيارة خيرلك..
ابتسمت بخجل ومشت ركبت وعيونه عليها وهو ماشي بالكياس للكوفني..
وعيون سالمين معاهم وهي مبتسمة وعيونها مليانات دموع..
☘☘☘
وركب بعدين السيارة وتوجه لحوش كاريمان اللي كانت تراجي فيهم..
ركبت جنب بنت خالتها وهي تقول..
/بيبا ياسمحه توحشتك واجد..
طوبى التفتت عليها وقالت واني اكثر خالتي كاريمان شن حالك وحال عمي؟
كاريمان:الحمد لله في خير ونعمه كيف حالك انتي وهلك؟
طوبى:الحمد لله..يسلموا عليكم..
كاريمان:الله يسلمهم..
عبد القيوم:ونحنا من هلنا!؟
ضحكوا كلهم..
كاريمان بضحكه:كيف حالك ياعبادي وشن داير..
بإبتسامه قال:الحمد لله..اموركم انتم تمام؟
كاريمان:وتمام التمام الحمد لله..مبروك عليكم..
ابتسموا وقالوا مع بعض..
"الله يبارك فيك"
سالمين بضحكه..
/ردوا مع بعضهم..
كاريمان بضحكه..
/ياخية خايلين ع بعضهم في كل شي واكيد قلوبهم عند بعضها..
شاف عبد القيوم لطوبى بطرف عينه لقاها تشوفله ضحكوا ضحكه خفيفه وردوا نظرهم للطريق..
☘وقعدوا سالمين وكاريمان يهدرزوا وطوبى تشارك فيهم وعبد القيوم كان تركيزه الاكبر ع الطريق لعند ماسمع طوبى قالت..
/الله يابنغازي فيك شي غريب يخلي القلب يفرح وين يجيك..
سالمين بإبتسامه..
/رباية الذايح هذي كيف شارعكم اللي يعيش فيها يتعلق بيها وين يجي يفارقها يعز عليه فراقها..
كاريمان:ايه والله..شافت لعبد القيوم وقالت..عبد القيوم اما خير طرابلس ولابنغازي..
ضحكوا هو وطوبى..
سالمين:عليك اسئله تسألي فيهن ناقصين فتنه..
كاريمان بضحكه..
/غير اسكتي انتي..هيا قول عبد القيوم اين خير عندك طرابلس ولابنغازي!.
ابتسم وقال..
/عندي نا مافيش خير من ترهونه..
صفقت سالمين وهي تقول..
/براوا عليك براوا..
كاريمان بضحكه..
/هابا منك انت..
وطوبى تسمع فيهم وهي تضحك بخجل..
وهو يسرقلها في النظر وع وجهه ابتسامه حب..
#حلاوة_الدنيا
#طوبى
....يتبع....
