#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃اسـنـــدنـي بـقــوتـڪ يا الـلهـ فـلا سـنــد لي الا انــت🍃
________________________________________
ماكانش فيه صدمة اللي داره الشارف لعواطف..
هي كانت حاسة وعارفه ان هادي النهايه..
بس اللي كانت تفكر فيه عواطف وقتها شن اللي بتقوله لأهلها..لو حكت القصة زي ماهي حتبان مضحكه للمرة التانيه
وحتكون محط سخريه واستهزاء لهلبه منهم لومش في وجهها في قفاها..
لهذا وصلت بعد تفكير انها تحفظ شويه كرامتها قدام نفسها وتقول....
🍃عواطف ودموعها ينزلوا..
/ماارتحتش وضع الضرة مامشاش معاي ماقدرتش نقبله..
الصيد:ماهو من الاول امك قالتلك..امك ياما نصحاتك ع الحاجه هادي وانتي قلتي عادي نقدر وماعنديش مشكله..
رشفت ومسحت دموعها وهي تقول..
/كنت نحساب روحي بنقدر..
محي الدين:وانتي عادي عندك وكأنه ماصار شي..راك مطلقه للمرة التانيه..حاجه مش قدها علاش تخشي فيها من الأول!؟
قعدت تشوفله بحده..
الصيد:توا خلاص اللي صار صار يامحي..اني مش فيها هي توا..اني في راجلها اللي لا دارلنا اعتبار ولاقدر يطلق هكي من غير مايجينا ويفهمنا!ياسيدي بلاش يجينا يكلمنا في الهاتف ويوضح..
عواطف بشي من الإنفعال..
/شن بيوضح يابوي! ماعنده مايوضح انت اصلا شن بتستفيد من كلامه معاك!؟ خلاص طلاق واطلقت معاش في شي ينفع..
وناضت ومشت طول طلعت من حداهم وهي تبكي..
محي الدين؛بنتك هادي قليلة عقل مش زي اختها بكل..
الصيد تنهد وقال؛اني لازم نكلم الراجل ونفهم منه..
محي الدين:لاتكلمه ولادوره الحركة اللي دارها زي وجهه التافه هدا ماديرلاش قيمة بكل.
سكت الصيد وهو يفكر بضيق في كلام محي الدين..
🍃وفي الصالون..
مازال نجمه تبكي ع حال بنتها..وجنبها سميرة اللي مانجحتش في مواساتها ع قد ماقالتلها..
☘في من مصايب ماتنفعش معاها المواساة☘
🍃🍃🍃🍃🍃
وطوبى تلقت الخبر من نبيله...وبعده ساد صمت كان مقلق ب النسبة لنبيله وفردوس اللي كانت معاهم في الدار..
طوبى وقتها قعدت ساكته وفي نفسها تقول..
"ياربي..يارب..ياحي ياقيوم"...
فردوس بقلق:طوبى!..
خدت نفس وقالت..
/هو طبيعي اللي صار..لو صار الطلاق اكيد المحكمه بتحددله ايام يشوفها فيهم واني مانقدرش نمنع الحاجه هادي...بس اني فكرت في حاجة تانيه..انه يعني ولى متقبل فكرة الطلاق شن رايك انتي؟
نبيله:مش شرط..هو يبي يشوف بنته وهادي الطريقه الوحيده...وممكن يكون تفكيرك صح وبدي يتقبل الفكرة..
طوبى سكتت تاني وهي تفكر..
فردوس:نحس فيه بعد اللي صار اخر مرة في حفله بنت فايزة..تتفكري في بنت خليفه لما جاتك وسألاتك وليتي ولالا انتي شن رديتي..وهديكا عاد صحبه هي وخديجه اكيد عاودتلها..
نبيله:ممكن..كله وارد..
طوبى بعد مافكرت في كلامهم قالت..
/مش حيشوفها في حوش اهله..
نبيله؛ايه خالك طلب المكان يكون حوشنا..
طوبى:احسن شي..قلتي مرتين في الشهر وساعه وحده؟
نبيله:ايه..
طوبى هزت راسها وقالت..
/مش مشكله..
اندق عليهم باب الدار بعدين انفتح..
غرفه:خالي المحجوب يبيك في المربوعه..
طوبى هزت راسها وناضت من السرير..
غرفه:معاه رؤوف في المربوعه..
شافتلها وهي تهز في راسها..ومشت للشماعه خدت عبايتها وشاربتها..
وغرفه تشوف لنبيله وفردوس وتسأل بعيونها..
"شن في"
فردوس اشرتلها بيدها ..
"بعدين نقولك"
وطوبى مشت قدام المرايه وقعدت تلبس في شاربتها وعقلها مابطلش تفكير...
~~~~~~
المحجوب:مافيش منه خوف الموضوع نهائي..
طوبى:صح ضايقني لكن ماخفتش منه..
عبد الرؤوف؛امس حسين كان عندي..
طوبى:قالت غرفه..
عبد الرؤوف:جاني بش يوصيني عليك قال حاس ان الجالي ناوي ع شي..
طوبى ضيقت عيونها وهي تشوفله بتساؤل..
علي:كيف حس؟
عبد الرؤوف:قال ان الجالي بعت جماعه للتارقي بش يضربوه..يعني بيتها فيه بش يرد في الوقت المناسب..
المحجوب شاف لطوبى..
طوبى:شن صار في الموضوع هداكا؟
عبد الرؤوف:هدا سبب قعادي لتوا..دورت وعرفت انه عطاه مشروع فندق في دولة عربيه وبعدين خداه منه..وعرفت حاجه تانيه..مختار هو اللي طلع الجالي من الشركه اللي كان مديرها وخلاهم يحطوا مكانه نجاة..
ابتسمت طوبى تهكما..
علي رفع حواجبه وقال..
/عجبتني منه مع الاسف..
قعدوا يضحكوا..
طوبى هدت ضحك وقالت..
/مختار هدا غريب...هو يدير فينا مايبي لكن مايخليش غيره ويرد عليهم كان داروا..
علي:خوك هدا مش طبيعي بكل..
طوبى:هدا علاش اني خايفه يرد ع اللي صار بسدرة..زي ماقتلكم قبل لازم بأي طريقه تخلوه يسيب حكاية علاج سدرة..
عبد الرؤوف:قتلك خليها عليا في موضوع ليا وقت بادي فيه وقريب نتمه ان شاء الله..
المحجوب قعد يشوفله بشي من القلق..
عارف عن شن يحكي عبد الرؤوف لأنه معاه في اللي قاعد يدير فيه واكيد حيكون في خوف من عواقب اي شي يندار لواحد زي مختار..
طوبى بقلق:بصراحة ياعبدالرؤوف اني خايفه يصير فيك شي تاني..
ابتسم وقال بثقه..
/المرة هادي ان شاء الله مش صاير شي..
طوبى قعدت تشوفله بنظرات قلق..
هو ضحك وقال..
/قتلك ماتخافيش..المهم ماتطلعش الدوة هادي لأختك..
طوبى؛اكيد مش حنقوللها شي..
ناضت وقالت:خالي خلاص خلوا الموضوع يمشي زي ماانت تبي ماعنديش مشكله..
المججوب:تمام..
هي قالت:نستأذن..
علي:خودي راحتك بنتي..
لفت طوبى ومشت طلعت من حداهم..
عبد الرؤوف بضحكه..
/مرات ننسى ان عمرها21 سنة بس..
المحجوب:سابقه عمرها ودماغها مش عادي..
علي:قويه وماتهابش وتحسب حساب الخطوة قبل لديرها..ماكنتش نحساب بتجي مراة في العيله زي سدرة..هادي فاتتها غادي..
عبد الرؤوف:انتم عندكم ميزة في عيلتكم..المراة ليها قدرها وكلمتها..
المحجوب:صح..
علي؛صح عندنا الحاجه هادي..مانخلوش المراة مغلوبه ع امرها..عندي قناعه في دماغي ان البنت زي الولد..كان ريت البنت خير من الولد وينعبا عليها نقدمها ونعاونها ولطفي الله يرحمه كان هكي..مختار ماكانش قد المسؤوليه ضعيف همه ومايحب يتعب في شي..عكسه سدره البنت كانت مدخله روحها في كل شي،من صغرها تخش ع الحاجات الكبيره نسمع في ناس تقول هادي بنت مكانها الكوجينه نلوح في كلامهم ورا ظهري زي مادار بوها وخليناها ع راحتها..تنهد بعمق وقال..بعد العار والرزيه اللي دارهم خوها الكبير قعدت في ظهر بوها وقواته وخلاته يقعد واقف ع رجليه وراسه مرفوع..سنداته وسندتنا كلنا..لكن ماخفتش عليها زي مااني خايف على طوبى توا..
المحجوب عقد حواجبه بضيق وهو يشوفله..
علي غير نظره ليه وقعد يشوفله بنظرات برغم حدتهم باين فيهم القلق..
عبد الرؤوف:اطمن ياحاج مش بروحها..
شافله علي وهز راسه بصمت..
والمحجوب غير نظره للفراغ وهو يفكر بخوف كبير...
🍃🍃🍃🍃🍃🍃
في هالوقت..
كانت جنة في مصور سامي مع مطيره...
سامي بضحكه؛الله يبارك عسل البنت هادي..
مطيره بضحكه:كل ماتكبر تزيد حلاوة وخفة دم الله يبارك عليها..لكن والله متحشمه منك وكان امها تندري ع التصوير بلاش دير مشكله..
سامي:والله ماني واخد حاجه سادتني شوفتها..
ع خشة عبد القيوم كان جاي يحكي معاه عن شي يخص اصداء المعرض..
قال:السلام عليكم..ماركزش في مطيره لأنها كانت عاطية بالظهر بس لما بانت عليه جنة وشافها حتى من عيونه ضحكوا وقال تلقائيا بنبرة حلوة..
/السمحه..
التفتت مطيره وشافاته ابتسمت..
قدم لجنة وهو يشوفلها قال..
/الله يبارك الله يبارك..
سامي بإبتسامه:اليوم سكرت تلاته شهور..
عبد القيوم بإبتسامه:بطول عمرها..
مطيره:سلمكم..هي اني نستأذن توا ومرة تانيه ولدي بارك الله فيك..
عبد القيوم بشي من اللهفه..
/لحظه..معليش ترجيني شويه مش معطل..
مطيره وهي مستغربه قالت..
/باهي..
وهو طول طلع بسرعه وسامي مركز معاه...
🍀وصل في حوش المهدي..وركب جري للشقه..
خشلها ومشي لداره..فتح الدولاب وطلع منه كيسه صغيره للهدايا تبان متاع اطفال..
🍃من لما شاف جنه والبنت ذابت في قلبه..وبدون مايحس لقي روحه مرة واقف ع محل العاب..خشله وخدالها لعبه..
ولما استاقظ لنفسه استوعب انه من شبه المستحيل توصللها دسها في دولابه من يومها قعدت فيه وماطلعهاش بكل..
وشاء الله وتصير هالصدفه وهو ماقدرش يمنع نفسه من استغلالها خصوصا وان شعوره اتجاه جنه مالاش علاقه بشعوره اتجاه امها...🍃
خداها وبسرعه مشي طلع من الشقه...ونزل جري..
وهو ماشي بإتجاه الباب وقف..والتفت شاف الاقحوان اللي واخد ركن في الجنان..تفكر اول شافها فيها وهي لابسة ستريتشه الاقحوان..
مشاله طول قطف منه كم وردة وتوجه طول لمصور سامي..
☘خش عليهم وهويقول بإبتسامة احراج..
/اسف اخرتك..
مدلها الكيسه وقال..حاجه بسيطه لهالسمحه..يوم شفتها الشهر اللي فات انحرجت واجد اللي ماعطيتها شي وقلت في عقلي ناخدلها حاجه كان صدفت وشفتها مرة تانيه نعطيهالها..
سامي كان مركز عليه وهو يتكلم كيف في شي من الارتباك بادي ع وجهه..
مطيره بإبتسامه؛بارك الله فيك ولدي وخدت منه الكيسه..
هو مد الزهور وقال بضحكه..توا انا طالع حقيتهن وذكرت لما شفتها لابسه حاجه فيها الاقحوان..
خدتهم مطيره وهي تضحك وتقول..
/هالقحوان هدا اللي قريب نفتح الثلاجه نلقاه..
ضحكوا ع عفوية مطيره..
مطيره بضحكه؛صحيتوا وليداتي وربي يحفظكم...
وحطت الزهور في وسط الكيسه وحطتهم في الكروسه وقالت..تصبحوا ع خير..
ومشت طلعت من المصور..
تنهد التارقي بعدين شاف لسامي..
لقاه يشوفله بنظرة غريبه وتراته..هو عقد حواجبه وقال..
/شن الاخبار؟
سامي بإبتسامه؛تمام..
عبد القيوم؛ياراجل معرضك دارلي دوشه..
سامي بضحكه؛كيف؟..
عبد القيوم؛مش عارف منين في وحده سوريه جابت رقمي وقالت تبيني في موضوع يخص الخطاطين ورابطه مارابطه اعتذرت لكن هي سكنتلي..
سامي بضحكه:متوقع..
عبد القيوم بضجر:ماعنديش ليهن بال الامور هذين..
سامي:شوف ربي مايعطيش حد موهبه بس يدسها..خليه يشوف نعمته عليك ياراجل..
عبد القيوم تنهد بملل وقعد ساكت..
سامي:غير قعمز قعمز..
عبد القيوم غير نظره لكرسي جبده وقعمز عليه وحط رجل ع رجل..
وسامي قعمز ع الكرسي اللي قدامه بالعكس وبدي بمحاولة اقناعه يكمل في الشغل ع هوايته...
🍃🍃🍃
وفي حوش لطفي الواعر..
تحديدا الصاله اللي لامة الحبايب..
فايزة بضحكه:جنونه من توا تمشي وطيح..
اريج:قصدك صورها بلاش وعطاها هديه؟
طوبى بفجعه؛قطفتي من اقحواناتي!؟؟
مطيره؛رتحي جمالك ماجينا من جيهته هالقحوان الاحرف..
طوبى:مالا هادم من وين!؟
سميره:خليها تدوي اللطف!
مطيره؛ع خاطره تولع فينا النار..
قعدوا يضحكوا..
وطوبى تشوفلها بإبتسامه عصبيه..
مطيره:المهم ياحناتي واني جايه بنطلع بيها من المصور خش التارقي وين راها قريب هبل عليها وقالي راجيني شويه طلع وخمسة دقايق وولى ومعاه الهديه وهدا الورد..
الاء:اووو جنه اوووطيحت جنتل الشارع بجلالة قدره...
مطيره بضحكه؛قال تحشم اول مرة راها ماحطلها شي مشي خدالها الهديه وقال كان صدفت وريتها مرة تانيه نعطيهالها..
الاء بإعجاب:ياربي ع الجنتله والذوق ياربي..
سميرة:وعزيز من شن يشكي ياكبدي!
ضحكوا..
الاء بضحكه؛ياودي وواك تحسبوا عليا في الكلمه..القصه ومافيها اني معجبه بشخصيته وحابه قصة حبه هلبه وينه اللي يحب وحده وع خاطرها يسيب اهله وبلاده ويتغرب بش يوصل فيها قصة اللي يسمعها في الاول صعب يصدقها اني ماصدقتهاش لين تأكدت بروحي من بنت عمته..
مطيره بحسرة:وياريته غير وصل فيها مسكين..بخته بالهون من يوم يومه..تعرفوا قال لعمته ياهيا يالا نقعد عمري كله بروحي ولانظلم بنات الناس معاي..
كلهم بدت ع وجوههم ملامح التعاطف..
ماعدا طوبى اللي تسمع وهي تفكر فحنان..
نبيله؛اثبت انه راجل..
مطيره:ماهو هداكا العريق مش فيه ياحنه هدا علاش جي ليبي فريد من نوعه..
فردوس بضحكه:صدقتي..
طوبى:اهل الجنوب هكي..ناس اصيله وطيبين هلبه..نتفكر في بنات قروا معاي في المدرسه من الجنوب ماريتش اطيب ولاالطف منهم فزاعات ومحترمات هلبه ماتلقي حد يكرههم..
سميره؛ايه بالله صدقتي اغلب اهل الجنوب هكي..بس عاد حتى الرجاله اللي دايرين مكس عربي ليبي فيهم الباهيين راهو السيئة تخص..
مطيره؛مالا وجه الفقر هداكا اللي وين تخطم من قدامه حاجة مؤنثه ياكلها بعيونه!..
قعدوا يضحكوا..
سميره برفعة حاجب وابتسامه..
/والله يابنتي والله لما نخليه زي ماقالت هديكا المراة..
مطيره:وشن قالت هديكا المراة!؟.
سميره قعدت تتكلم وهي تحرك في يدها..
/قالت..حبيبي على نياتو..كل البنات اخواتوا..
ده ماكانش كده بس انا..غيرت كل حياتو..
واشرت على روحها وهي مبتسمه بغرور وترقص في حواجبها..
وهما يضحكوا من قلوبهم نبيله لين عيونها دمعوا من الضحك..
مطيره بضحكه..
/يادعوة منك جد يانهاري!
سميره؛والله واللي اسمه الله ماضاله الا واخداته..وكلكم شهود كان ماخليته يدير عرس ويسكني فهالحوش..واشرت جهة حوش شنيبه بعدين اشرت ع نفسها وقالت..مانبداش سميرة السايح..
كلهم كانوا مذهولات اما طوبى قالت..
/كان درتيها ليك مني هديه مش عاديه..
زاد ذهولهم..اما سميره قالت بحماس..
/الله عليك ياذيبة تعجبيني..وقربتلها وهي تزحف ع ركابها ووصلت فيها وضمتها وطوبى تضحك...
🍃🍃🍃🍃🍃
وبعيد عنهم كانت فيه لمة تانيه صغيره غير انه الصمت والضيق والخوف مسيطره ع جوها..
هي تاكل في الكباب المشوي..
وهو يلعب بتليفونه..
ووسطهم اللي قلبها عليهم يدوب تاكل وهي تمرر في نظرها بيناتهم...
شوية كسرت الصمت وقالت..
/سيب الهباب اللي في ايدك وتعشا..
هو وقف اللعبه وحط تليفونه ع الطاوله وبدي ياكل بعصبيه..
صابرين حست بيه بس كانت متجاهلاته تماما..
امينه:ياريتينا فضلنا في المزرعه..
الزوز شافوا لبعض..
وهي تشوفلهم بترقب لعركة كلاميه بيناتهم..
هو اول من تكلم بس قال..
/راجل اختك حصل خدمه..
ارتسمت ع وجهها ابتسامه فرح..
هو تبدلت ملامح وجهه لملامح حب وقال..
/خدمة كويسه ودخل عليه اكثر ماكان ياخد في خدمته الاولى..
هي بفرح قالت؛قول والله!
رضا بإبتسامه؛والله..
شافت لامينه وضحكت وامينه ابتسمت بحب.
رجعت شافت لرضا وقالت بشي من القلق..
/خايفه مختار يعرف..
قاطعها وقال..
/حتى لو عرف مايدير شي..هو دار اللي طلبتيه منه يعني لو وليتي في كلامك مش حيدور الموضوع..
صابرين؛متأكد!؟
رضا قلدها كيف قالتها وهو يقول..
/متأكد..
ضحكت امينه..
صابرين بضحكه نرفزة..
/معاش تعجب ع صوتي..
هو قعد يشوفلها وع وجهه ضحكة خفيفه..
نزلت عيونها الخجوله لصونيه الكباب ورجعت تاكل..
وهو وولى ياكل بهدوء هالمرة..
امينه تنهدت براحه وولت تاكل بشهيه...
🍃كملوا عشاهم وطلع بيهم رضا للعمارة..
وطول الطريق كان يهدرز هو وامينه عن موسم التمر..والنخل والبلح..وكل مايخص عالم التمور...
وصابرين تسمع باستمتاع وماحستش الا وهما واصلين للعمارة..
حست بضيق لانها حتبعد عن رضا وهالشعور زاد ضايقها اكثر واكثر..
نزلت من السيارة شافت امينه سابقتها وهي تقول..
/تصبح ع خير..وهو رد عليها وكان يسكر في السياره..
جاته صابرين وقالت..
/شكرا..
هو سكر السيارة..وشافلها برفعة حاجبه اليسار وكان مبتسم..
صابرين بخجل وارتباك:تصبح ع خير..
ومشت بسرعه هاربه...وهو معاها بعيونه وقال بضحكه بدون ماتسمعه..
/تعبتيني اقسم بالله..
🍃🍃🍃🍃🍃
"ارقدي وتريحي بنيتي"
خديجه؛مليت من النوم يام..
مغليه؛معليشي بنتي فترة وتمر..
تنهدت خديجه بضيق وقالت..
/الله لاتربحك ياطوبى مافرحتش بولدي زي الناس..
مغليه:تو يطلع وتفرحي بيه وديرله اسبوع الناس تحكي بيه عام القدام..راهو هدا وعد من جده..
خديجه بإبتسامه:ربي يطول في عمره الغالي..
"دجدج"
خديجه بضحكه:شتيوي..
جاها وقال بإبتسامة:حمد لله ع السلامة..وضرب كفه بكفها..
بعدين قعمز جنب امه وقال..
/شن حال العزري؟
خديجه:الحمد لله كويس..
نضال؛امتى يطلع؟
خديجه؛بعد اسبوعين تانيات..
نضال هز راسه وهو ساكت..
مغليه؛نحطلك عشي..
نضال:لالا متعشي..
خديجه شافت لأمها وقالت..
/ايه حقه كلمتني بنت خليفه تعرفي شن قالت؟
مغليه:شني!؟
خديجه؛قالت هديكا ماشيه وتقول للناس قريب نطلق..
مغليه بغيظ:الحق كله في خوك..خوك اللي مازال مخليها ع ذمته..
خديجه:تعرفي يام عمرهم ماكانوا لينا ولايمشوا معاها هالعيله الهبنك مايمشوا معاهم كان المجرمين والميلشياويه..
مغليه؛هو هدا مستواهم..
ونضال يسمع فيهم وداير روحه لاهي بتليفونه..
خديجه:انت كان تسمعي هادي..ريتي هديكا الشلولح صاحبة المطيورة مطيره؟
مغليه بإنتباه؛خيرها !؟
خديجه؛قالت تبي لخوها بنت فردوس الكبيره..
قام نضال عيونه طول في خديجه وهو مصدوم..
امه حست بيه لكن مابتش تشوفله تفاجئت زيه لكن ظاهرت بالعكس لما قالت..
/ايه صح..سمعتها تنادي فيها مرت خوي..
خديجه فهمت عليها وقالت..
/حتى هدا من جماعة الميليشيات..
مغليه:هدا قدرهم هما..
ناض نضال ومشي طلع طول من حداهم..
مغليه:هكي احسن بش يطلعها من راسه..
خديجه هزت راسها وهي رافعه حاجبها بمكر...
🍃وخلت خوها في حاله يرثى لها..
الراجل كان صدره مجمور..حس روحه بتطلع..
معاش عرف وين يمشي ولاشن يدير..
لقي رجليه رافعينه للدور التاني..وطول مشي خش للحمام ...
كان يبي ياخد دوش بارد يبرد شويه من ناره....
🍃🍃🍃🍃🍃
☘هو الحب ع قد ماهو حلو..يكون سبب رئيسي لعذاب القلب لما يكونوا متفارقين او بعاد عن بعض..
وهدا وحده من الاسباب اللي خلت الحب مكروه قبل الزواج وماينقالش عنه حرام لما يكون عذري عفيف غير مدنس بالشهوات والغزائز...مكروه لأن الله مايبيش لعباده الأذى..واذى القلب عظيم يهلك صاحبه...والقلب بالذات محط نظر الخالق الرحيم اللي يحب يشوف قلوبنا سليمه ومعافاة...
🍃بس احيانا يكون الحب عقوبة لبعض القلوب اللي صابها فساد..الحب لما يسكن القلوب يقعد حسرة عايشين بيها..
☘هي في دارها..مقعمزة ع سريرها وتشوف لباب الفيرندا..
ناضت ومشت فتحتها..
وطلعت..ضربت وجهها ريح خفيفه طيرت خصلات شعرها..
مشت وقعمزت ع الكرسي..ونزلت عيونها تحت..
دمعوا عيونها لما لقاته مقعمز..لابس ماليه صوف لونها رمادي رقبتها طويل..ع سروال جينز لونه ازرق غامق..
مربع ايديه ويبان سرحان..
فجأه..رفع عيونه للبالكونه متاعها..توسعوا عيونه لما جو عليها..
هي طول غيرت عيونها عنه وقعدت تشوف لمنظر الليل في طريق بعيده هلبه يفوتوا فيها سيارات..
تسمع صوت نغمة رسالة واتساب..
تنهدت..وطلعت تليفونها من جبب البيجامه..وفتحت الرساله..
(خيرك مارقدتيش)
بدت تكتب بعدين بعتت..
(ماقدرتش)
رد عليها..
(علاش؟)
هي قعدت تفكر وهو يراقب فيها..
بعدين بدت تكتب وبعتت..
(رضا مانبيش نضرك)
نزلت عيونها ليه..هو رفع عيونه فيها..
بعدين نزلهم وبدي يكتب وهي تشوفله ودموعها ينزلوا..
جاها رده..
(تعرفي اني مستعد ع خاطر عيونك نحارب نفسي والدنيا كلها)
قلبها اللي حب كلامه وجعها في نفس الوقت وجعها هلبه..
قعدت تكتب وهي تبكي بصمت بعدين بعتت..
(والله مانصلح بيك والله)
رد عليها..
(اني الادرى باللي يصلحلي)
ردت..
(رضا راك تلعب بالنار)
رد عليها..
(اني عايش في النار من يوم يومي مانخافش منها)
ردت..
(مختار شيطان)
هو رد..
(الشيطان ربك اقوى منه)
قعدت تشوفله بحزن ودموعها ينزلوا..
وهو يشوفلها بنظرات كلها غرام وقوة..
تنهدت بألم وكتبت ردها وبعتاته..
(ربي.! ربي شن شاف مني ومنك!؟)
جاها رده..
(امينه تقول ربي حنين ورحيم حتى مع خلقه الكفار)
ابتسمت بألم وردت
(وربي عدل)
رفع عيونه فيها..
وهي قعدت تشوفله بإبتسامه فيها الم كبير..
نزل عيونها وبدي يكتب بعدين بعتت..
(صابرين انزلي شويه)
هي طول ردت..
(لا)
رد عليها..
(لايمكن نضرك..مانمسش منك شعره..صابرين اللي في قلبي ليك انظف شي عرفته في حياتي)
بعد ماقربت كلامه ناضت طول وخشت داخل..
هو تنهد بألم..حط تليفونه ع الطاوله حداها..
اتكى ع ظهر الكرسي وغمض عيونه وقلبه موجوع...
فتحتهم فجأه لما سمع باب العمارة من داخل انفتح..
شافله..لقاها طالعه وهي لافه نفسها بشال لونه ازرق ولابسه طاقيه بنيه..من لون بيجامتها..
ابتسمت وهي تشوفله..وهو ردها من وسط قلبه..
مشت طول وقعمزت ورا الطاوله الكبيره..
هو مشالها..وقعمز مقابلها قريب عليها..
قعد يشوف لعيونها وهي تشوف لعيونه..عيونه يتكلموا..
صابرين؛علاش قتلي انزلي؟
هو قال؛نبيك تعرفي حاجه وحده..انتي لورضيتي صدقيني حنطلعك من هني ونهرب بيك بعيد عن هدا كله..وناخدك بالحلال ونكمل عمري معاك..والله ياصابرين ندوي من جدي..انتي بس ارضي..
صابرين ودموعها ينزلوا..
/مستحيل..صعب هلبه هلبه يارضا..مختار هانوا عليه اهله يارضا!
رضا:مختار بنادم مايقدرش يدير الا اللي ربي يبيه بس..
صابرين برفض:لالا رضا..لا..مانقدرش
رضا:لاتقدري كان تبي تقدري..واني نقدر ونص..
حركت راسها يمين ويسار بالرفض وهي تبكي..
رضا بإصرار:اني مش متاع دوة اني نفعل ونكون قد اللي نديره ياصابرين..
صابرين ببكي:لالا..
رضا؛ماتخافيش ع روحك معاي مستحيل نفرط فيك..
صابرين ببكي:اني مانبيش نفرط فيك..رضا انت تستاهل احسن مني والله..انت برا ابعد واطلع من هالمكان وابعد عنه..انت راجل ماضيك مغفور مايلحقك شي من اللي درته مهما كان بعد توب..وتاخد بنت ناس وعيله تربت تربيه غاليه تقبلها تكون ام صغارك..ماتخافش منها لما تغيب..وحده ماضيها زي حاضرها نظيف وابيض..
"نحبك"
للحظه تخيلت قلبها طالع منه وماشيله وكأنه يبي يتحامى بيه ويهرب لقلبه ويقعد معاه...
رضا ومن وسط قلبه..
/اقسم بالله هالكلمه ماسمعتها مني مراة غيرك..ومافيش وحده تستاهلها غيرك..عيوني يشوفولك بشكل تاني..عيوني اللي هني ياصابرين..حط يده ع مكان قلبه
صابرين نزلت راسها وضمت ايديها لبعض وشدت عليهم بقوة وقعدت تبكي بألم شديد..
وهو يشوفلها وقلبه قاعد يتقطع..دموعها كانوا يتقاطروا وينزلوا ع ايديه..
هو معاش تحمل بنبرة وجع..
/خلاص بالله خلاص..معاش نحبك خلاص اسكتي..
ضحكت من وسط دموعها رفعت عيونها وهي تضحك وجههة غارق بالدموع..
هو بضحكه قال..
/هبلتيني والله..
رشفت وقالت..
/رضا..ارجوك..خليك بعيد عني..
تأفف بملل وهو يمرر في نظره القدام..
صابرين:اني نبي نكون معاك بس من بعيد..خلينا هكي ارضى بالوضع هدا ارجوك..
شافلها وقال؛انتي هكي تقوليلي موت..
صابرين بنبرة ألم..
/انا خايفه عليك منه..مش حنتحمل شي يضرك مش حنتحمل..انت لو تصيرلك حاجه نموت..
رضا وهو يقلد في صوتها..
/علاش ياشعشبونه؟
ضحكت وهي تمسح في دموعها وتقول..
/هكي وخلاص..
ضيق عيونه وقال:ااه منك انتي..غير من وين طلعتيلي بس..
قعدت تضحك بعدين قالت..
/خلينا ندووا جديات..خلينا هكي ارجوك..زي قبل اصدقاء.
رضا:لالالا..صديق لا انتي اعتبريني اللي تبيه..اما اني بعد ماطلعت اللي فقلبي معاش نقدر نولي فيه..اني بنحبك ع راحتي وانتي براحتك ديريني صديقك بوك خوك اللي يعجبك..
قعدت تضحك..
هو ابتسم وقال..
/وبنولي اني نرفعك ونجيبك وتاخدي الوردة وتاكلي الشكلاطه وتقولي بعدها شكرا...تسهويكك الزايد معاش نبي نسمعه..
قعدت تضحك..
تنهد وقال..
/اني قاعد ندير في اللي يريحك اللي يريحك انتي لكن اني مش مرتاح بكل..
ناض وهي تقول..
/صدقني هكي اريحلك..تصبح ع خير..
ومشت طول لباب العمارة..خشت بدون ماتلتفت وسكرت الباب..
وهو تنهد بإبتسامه ومشي بإتجاه شفته وهو يدندن..
بحبك انا كتير..ضحك..وبعدي كملها لين خش للعمارة...
🍃ليلتها هو وياها رقدوا وشعور حلو هلبه مرافقهم..
☘☘☘☘
بس ماكانش ولاحيكون احلى من شعور طوبى اللي كانت مختليه باللي يستحق حب الدنيا كلها وماابعد منها...
صلتله ركعتين بعدين قعدت تفضفض..
/عارف ياربي اني خايفه..لكن اني مش حنخلي خوفي يسيطر عليا لأنك معاي..مش حتخليني..متأكده ومؤمنه ان اللي عشته كله لليوم فيه خير ليا حتى لو كان كله شر..انت مايجيش منك الا كل خير..ياربي..نبي منك فوق القوة واللطف..ترزقني الرضا..نبي نرضى بكل ماقدرته عليا مانبيش نقول في يوم في قلبي ولابلساني علاش ياربي دير فيا هكي..يارب..ياربي اجعلني راضيه في كل احوالي يارب..تنهدت بعدين قالت..وجنة ياربي جنة..اني مسلمة امرها ليك احفظهالي وماتحرمنيش منها ارجوك يارب..
نزلوا دموعها...حطت راسها ع مكان السجود بجنبها..بعدين حضنت نفسها وغمضت عيونها ومازال تردد..
"يارب.."
🍃 ثِقْ باللهِ كزهرةٍ نَمَتْ على
جانبِ الطّريق .. لم يزرعْها
أحدٌ ، ولم يسقِها أيُّ عابر ..
فقط رعاها الله 🌸🍃
#انتقام
#لعبة الانتقام
...يتبع...
