#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
.
2/1495- وعَنْهُ أَنَّ رسُول اللَّه ﷺ كانَ يقُولُ: دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ، عِنْد رأْسِهِ ملَكٌ مُوكَّلٌ كلَّمَا دَعَا لأَخِيهِ بخيرٍ قَال المَلَكُ المُوكَّلُ بِهِ: آمِينَ، ولَكَ بمِثْلٍ رواه مسلم.🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لاشيء في الدنيا يُفرّقُ بيننا
كيف الفراقُ وأنتَ بلسَمُ روحي
فإذا هَرِمتُ وولَّتِ الدنيا بنا
فامسح بروحِكَ نازفاتِ جُروحي🍃
_______________________________________
في احدى قاعات كلية الاقتصاد في جامعة طرابلس..
كانت اريج موجوده مع صديقتها المقربه وبعض الطلبه والطالبات يستنوا في استاذ المادة..
اريج كانت في حالة توتر عالي لكن ظاهريا تبان عاديه وهي تحكي مع صديقتها..
🍃"باهي اللي خلوهم بحوث بدال امتحانات درناهم وقدمناهم وافتكينا منهم قعدت بس الماده هادي"
اريج وهي تحاول تخفي توترها..
/الحادث اللي صارله خلاه يأجل الامتحان..
صاحبتها قالت..
/زعمه يده تحسنت ؟
بلعت اريج ريقها وقالت...
/مش عارفه بالزبط بس يقولوا ولت خير من قبل مع العلاج..
..في هاللحظه انفتح باب القاعة اللي كان مردود وخش استاذهم اللي كانوا يحكوا عليه..
الطلبه ركزوا كويس في هيئته المتغيره صح كان لابس افرنجي لكن بالضوابط الشرعيه..محلق شعره حلاقه لايقه ولحيته كثيفه ومهذبه..ع كتف يده الصحيحه لابس شنطة اللاب وشاد بنفس اليد هاتفه..
قال وهو خاش بدون مايشوفلهم..
/السلام عليكم..
ردوا عليه السلام..
حط الشنطه والهاتف ع الطاوله وهو يقول..
/شن حالكم..
ردوا عليه بأصوات متقطعه..
/الحمد لله..
مرر نظرة سريعة عليهم بعدين ركز بنظره ع الشباب وقال بإبتسامه وهو يحرك في يده..
/الشباب اللي مقعمزين في الخلف تعالوا القدام والصبايا اللي مقعمزين القدام قعمزوا في الخلف ورا الشباب..
بدون اي اعتراض ناضوا البنات ومن ضمنهم اريج اللي قلبها كان يدق بقوة وسرعه..هو يدوب سرقلها النظر بش يشوف شن لابسه..
عبايه واسعه لونها بني غامق..وشاربه سودا كبيره ومغطيه ايديها بالقفازات لكن كانت رافعه بوحده فيهم العبايه وبان من الاسفل بنطلونها الجينز الأزرق الغامق وسبيدروها الابيض
نزل عيون وهو شاد ضحكته بعد رفعهم وهو يشوف للشباب كيف كلهم قعمزوا القدام والبنات وراهم..
بإبتسامة قال..
/حتى في الصلاة الرجاله يتقدموا ع النساوين وهذا احترام وتقدير ليهم ومحافظه عليهم مش اهانه ولاقلة قيمة..
ابتسموا وهما يسمعوا فيه..
مرر نظره ع الشباب وقال..
/اموركم تمام!؟
واحد فيهم قال..
/لمانديروا الامتحان ونرتاحوا منه تولي تمام التمام..
ضحكوا زملائه ونضال قال بضحكه..
/ديروه ان شاء الله ديروه..في محاضرة اليوم بنمروا مرور الكرام ع المنهج وبنعطيكم اسئله تقروها وحنجيب منها في الامتحان ان شاء الله..وطبعا الظروف اللي مرينا بيها هي اللي اباحت هالمحظور..
مرر نظره عليهم كلهم بسرعه وهو يقول..
/متفاهمين!؟
ردوا عليهم بعبارات الموافقه ع كلامه..
هز راسه وقال..
/اوكي..خل نبدوا هدرزتنا ع المنهج ونشوف كان دورتوا القرايه الفترة اللي فاتت ولا نسيتوها..
🍃وبدي يتكلم ع المنهج والشباب اكثر المتفاعلين معاه كان يعلق علي اجوبتهم في تعليقات مضحكه مافيهاش اي اهانه ليهم زي ماكان يديرقبل لكن لما وحده من البنات تجاوب ينزل عيونه للطاوله وهو يسمع في اجابتها ولوغلطت يصلحها بدون مزاح ولاتعليق فكاهي عكس ماكان يدير قبل..
🌼اريج نست نفسها تماما ماقدرتش تحول عيونها من عليه كانت مشتاقتله شوق كبير.. لصوته لكلامه لأسلوبه لضحكته لكل تفاصيله المعنويه..
قاعده تجرب في قلبها تبي تعرف كان مازال حامل عليه ولازعلان منه لكن قلبها خبرها انه مشتاقله ومايبيش غيره وانه نسي كل شي وجعه منه وحتى جروحه اللي دارهم بروا وكأنهم ماكانوا..
الشي الوحيد اللي وجعلها قلبها وخلا الدمعه عبت عينها هو تجاهله لوجودها حتى بالغلط ماشافش جيهتها..هي مش زي باقي البنات..هي حبه واللي كانت يوم من الايام زوجته معقوله قلبه ماجبراش يشوفلها ولو بنظرة خاطفه!!؟
خاف قلبها من تفسير حالته..خاف ليكون نساها وطوي صفحتها ومعاش يحس بأي شي اتجاهها..
🍀مرت ساعه ونص ماركزتش فيهم على ولا حرف من المحاضرة مااستاقظش الا لما سمعت صاحبتها تنادي بإسمها بعدين قالتلها..
"هي نوضي ناخدوا الأسئله من المصور"
شافتلها شويه بعدين ناضت وهي مرتبكه خدت شنطتها ومشت وصاحبتها معاها وطلعوا من القاعه بدون ماتشوفله..
اما هو اللي كان واقف يحكي من الطلبه الشباب لمحها وهي طالعه وشافها مدايرة نفس الحركه اللي خلت ابتسامة خفيفه ترتسم ع وجهه
🍃🍃🍃🍃
"حددتلي يومالمناقشة اول يوم في شهر اتنين الجاي"
عبير؛سعدودك افتكيتي اني مازالي سريب قبل المشروع.
وحده من قروبهم قالت..
/كله سيم واحد فيسع يفوت..
عبير؛اني نخمم في قعدتي بروحي كلكم بتتخرجوا خلاص..
طوبى بضحكه:تو نجي ندير عليك طلة مرة مرة ان شاء الله..
عبير برجاء:ايه بالله بيبو..
كيف جت بترد طوبى جاها اتصال..
صاحبتها قالت..
/راك تقولي راجلك؟!
طوبى وهي تقيم في هاتفها قالت..
/مااعتقدش قالي بنخليك ساعه..شافت المتصل قالت..اريج..
فتحت الخط وردت..السلام عليكم..
جاها رد اريج وهي تقول بصوت باكي..
"نقدر نشوفك توا طوبى"
طوبى بخوف؛خيرك!
شافولها صاحباتها بقلق..
"مافي شي يخوف غير نبي نشوفك "
طوبى بقلق..
/تقدري تجيني للكليه!
"لامانبيش نكون في مكان فيه ناس نجيك ناخدك من الكليه نبي ندوي معاك في السيارة"
طوبى بقلق:باهي باهي تو نشوف عبد القيوم..
"باهي بسرعه"
نهت اريج المكالمه وطوبى ناضت من حدا صاحباتها بش تكلم راجلها وهما معاها بنظراتهم القلقه..
عبير:ان شاء الله خير..
=رغم ان مش باين لكن بنقول ان شاء الله..
🍁🍁
طوبى:السلام عليكم..
"وعليكم السلام قلبي هاه نجيك"
طوبى:حبيبي..توا كلمتني بنت اختي قالت تبيني في موضوع وشكلها باكيه..
"ان شاء الله خير!"
طوبى بضيق:مش عارفه ..المهم قالت بتجيني تاخدني من الكليه تبي تهدرز معاي ع انفراد..
"يعني وين بالزبط وين تبي تاخدك!؟"
تنهدت وقالت..
/تبي تدوي معاي في السيارة..
سكت شويه بعدين قال..
"بحتي انا قريب عليك توا قوليلها تجيك وانا نلحقكم"
طوبى:حاضر..في امان الله حبيبي..
"سلام ياقلبي"
ونهت طوبى المكالمه معاه واتصلت بأريج..
🍃ولأن اريج كانت حتى هي قريبة ع كلية التربيه بسرعه وصلت فيها..طلعتلها طوبى وركبت معاها ع وصلة عبد القيوم تحركت اريج وهو لحقهم..
تباعدوا مسافه لاباس بيها وفي حالة صمت تام لعند مادرست اريج في مكان فاضي نوعا ما ومستخطي وعبد القيوم درس وراهم بمسافه..
🍃"خيرك اريج!؟"
انهارت اريج بالبكي..طوبى قعدت تشوفلها بحزن مابتش تعاود تسألها كانت تبيها تاخد راحتها في البكي بش ترتاح..
بعد ماهدت اريج قعدت تمسح في دموعها وهي تقول..
/مافيش حاجه ربي حرمها علينا من فراغ كل حاجه حرمها علينا بش يحمينا منها يحمينامن الوجع والعذاب..موعره العشق ياطوبى موعره امتى تعشقي حد لدرجة تحسيه يمشي في دمك ماتقدريش تحبي غيره ولاتتوالفي مع غيره..ووين تشوفيه تحسي روحك هدا وين عشتي ولما يغيب عنك تموتي..تنهدت بحرقه وقالت..شفته اليوم وهو ماشافنيش بكل..نسيت الدنيا ومافيها في وجوده وهو ناسيني بالمرة..انحرق قلبي انوجعت منه هلبه من لما طلعت من المحاضرة واني نبكي لتوا ياطوبى..
..ماقدرتش طوبى تمنع دموعها من النزول وهي تسمع فيها ع قد ماانوجعت عليها ع قد ماحست بضيق شديد من الشعور بالذنب اتجاهها..
ومازال اريج قاعده تعبر عن ألمها وهي تقول بحالة مختلفه..ضحكة من وسط الدموع..
/كان تشوفيه كيف تغير..معاش يقيم عيونه في البنات بكل اسلوبه معاهم تغير هلبه..اسلوبه بصفة عامه تغير هلبه لازم يتكلم بالدين..حتى طريقه كلامه ولت رازنه مش زي قبل..ضحكت وقالت..رغم انه قاعد يحب ينكت ويعلق ويبصر..تبدلت ضحكتها للبكاء وهي تقول..نحبه هلبه ياطوبى نبيه ومانبيش غيره لو ماخدانيش نضال معاش بنعاودها ونولي لراجل تاني غيره لو شن يصير ياطوبى..
حطت طوبى يدها ع راس اريج وقعدت طبطب عليها وهي تقول..
/قولي لاإله إلا الله..
رشفت اريج وقالت بالعبرة..
/لاإله إلا الله..
طوبى:مش حنقولك شي لكن نبي ننصحك بحاجات طبقيهم باهي؟
شافتلها اريج وهزت راسها بالموافقه..
طوبى:الزمي سورة البقرة..الزمي الصلاة الابراهيميه..صلي استخاره وادعي في كل صلاة وقت السجود..
"ربي اخترلي ولاتخيرني فأنت خير من يختار ربي اخترلي الخيرة من امري ورضني بها"
🍁🍁🍁
وروحت اريج بنفسيه احسن من اللي كانت عليها لكن طوبى قعد قلبها موجوع عليها وحزنها علي حالها باين في ملامح وجهها..مابت تقول شي لراجلها حاليا ولاكان خاطرها في كلام من اصله وهو خلاها ع راحتها وشغل القرآن اللي كان عارف انها ماترتاحش بشي اكثر من سماعه..سماع كلام الله سبحانه وتعالى..
🍃🍃🍃🍃
الساعه 2:30بعد الظهر..
كانت غرفه في الدار مقعمزة ع السرير وهي لابسه ملاية الصلاة بعد ماصلت الظهر..اتصلت بأختها سدرة وبعد ماسألوا عن احوال بعض قالت غرفه..
/وزعتها قبل بكل الوسائل لكن هالمرة ماقدرتش بعد اللي قالاته..
"مش مشكله خل تجي ونعرفوا شن تبي..اني بعد العصر نكون عندكم ان شاء الله"
غرفه:ان شاء الله..سلام توا
"سلام"
نهت غرفه المكالمه وناضت حولت الملايه ومشت طلعت من الدار وتوجهت لدار المعيشه شافت بنتها تلعب مع جنه نزلت ع الارض وزحفتلهم ع ركابها وضمتهم هما الزوز..
زركت "صرخت" مئاب ع طول حسها وجنة قالت بتذمر..
"لاش هكي!!طاح حوش"
قعمزت غرفه ع حيلها وحطت يدها ع خدها وهي تقول..
/حي!
ويجيها مكعب ع وجعها من بنتها اللي كانت معصبه منها
غرفه بصدمه...
/هكي ديري في ماما!! وخدت مكعب وحذفاته عليها عالخفيف..
ضحكت جنة من وسط قلبها عليهم واريج اللي كانت متكيه حداهم وتشوفلهم ضحكت حتى هي..
🍃🍃🍃🍃
"لما روح قالي ماتنوضونيش ع الغدي حسيت جوه مكهرب"
نسرين بضيق:ان شاء الله مش صاير معاه موقف ضايقه في الكليه..
سميرة هدا وين تفكرت ان اليوم بيداوم في الكليه وع طول خطرت ع بالها اريج هزت راسها وقالت..
/مرات تاعب قبل يرقد بعد صلاة الفجر لكن اليوم شدها دركت..
نسرين؛صح..تنهدت وقالت..خلينا توا في سريب فاتحة خديجه..
سميره:اما اختك هادي مافيش زيها الحق سكرت راسها دير حفلتها هني وفاتت الصاله..
نسرين بضحكه:مش غابيه في السبب ياسميرة..
سميرة:اني اللي عارفه..تبي الصراحه يانويسه وماتزعليش مني ديما نقول في بالي كيف انتي ونضال والمهدي وعمر خوت الجالي وخديجه..
نسرين بضحكه؛وامنا مغليه قوليها قوليها عادي..
قعدت سميره تضحك ونسرين تضحك معاها وهي تحرك في راسها يمين ويسار..
🍃🍃🍃🍃
بعد الغدي..
قعمزوا جنب بعض في دار المعيشه وهما يشربوا في الشاهي الاخضر التارقي..
هي كانت تحكي وهو يسمعلها بكل مافيه...
طوبى بحزن..
/مانكذبش عليك اني كنت واخده موقف من نضال لانه كان عارف كل شي والحاجه هادي خلتني نخاف ع اريج منه خفت يكون مصيرها زي مصيرنا اني واميمه لكن قبل لاني نفكر هكي امها فكرت في نفس الشي ولتوا فردوس قاعده متمسكه بموفقها..
عبد القيوم؛ماعليهاش لوم ليها الحق تخاف ع بنتها لكن في نفس الوقت لازم تشوف لوضع سدرة في عيلة شنيبه ولازم تشوف حتى التغيير اللي صار لنضال..رغم انه كان واخد مني موقف قبل عشان خوه لكن عمري ماشفته زيه نهائي..مانبيش نقولك نعذره انه درق مصايب خوه لكن في نفس الوقت مانقدرش نلومه واجد هو ممكن فكر ان هذى واجبه ناحيته ولازم يديره..
طوبى بضيق وشي من الانفعال..
/معليشي مش معاك بكل في هادي مالاش عذر ولامبرر نهائي لو من البداية برأ ذمته وقال اللي يعرفه راهو ماصار شي من اللي صار..
غمض عيونه وفتحهم وهو يقول..
/عندك حق عندك حق..بس انا قاعد نحاول ننصف نضال ع قد مانقدر عشان انتي تنصفيه وتقدري تساعدي لو يطلع بيدك ديري شي..
طوبى بحزن..
/ع خاطر اريج لو جي يوم وطلبها حنحاول نقنع فردوس بيه ع قد مانقدر...
قعد عبد القيوم ساكت وهو يشوفلها كيف مركزه بنظرها ع الشاهي ودموعها في عيونها..
قاللها:سمح..
رفعت عيونها فيه..
ابتسم وقال:زعلان مني!؟
شافتله شويه بعدين حطت طاسة الشاهي ع جهة وقربت منه وخشت في حضنه وضماته وهي تقول..
/مانقدرش..
ضمها وهو يضحك بعدين حط طاسة الشاهي جنبه..مسح ع شعرها وقال...باهي احكيلي شن درتي في الكليه اليوم..
تباعدت عنه وقالت..
/فكرتني فكرك بالشهاده..مشروع التخرج متاعي بندير فيه وسائل تعليميه يبوا كتابة بخط اليد نبيك انت تكتبلي بخط النسخ..
عبد القيوم:حاضر لكن مافي شي بلاش!؟
بضحكه استغراب وهي تشوفله..
ابتسم وقال..
/نبي ناكل من ايديك عصبان ياسمح..
ضحكت وقالت..
/من عيوني الحايرة..
ضحك من قلبه وضمها ليه وهي ضماته وغمضت عيونها بإبتسامة حب..
🍃🍃🍃🍃
الساعه5:15عصرا..
ملتمات في الصالة يشربوا في شاهي العاله من ايدين هاديه وهما يسمعوا في سدرة تحكي عن حفلة عقد قران حماتها خديجه...
"زمزامات!!"
فردوس وغرفه واريج وهاديه قالوا هالجمله بصوت واحد صدح في الصاله كلها وبدهشة شديده..
سدرة هي حاطه يدها ع بطنها كانت تهز في راسها بإيجاب وهي تضحك..
فردوس بصدمه؛عمرها ماحدير عقل المراة هادي..
غرفه:بلعاني زعميتها تبي تقهر عيت الصيد وولدهم..
سدرة:و تبي تثبت للناس انها مازال مرغوبه..
هاديه؛احساس بالنقص..
فردوس:من زمان عندها احساس بالنقص..
غرفه:باهي بوها عادي عنده راجلك ماعلقش بكل!
سدرة:المهدي قريب ينفجر والله خفت عليه تصيرله حاجه اما بوه مش مدور شي غير ان يفتك من همها وخلاص..
فردوس:عنده حق بعد العملة اللي دارتها مع مختار..
ضحكوا..
سدرة:كان يندري عليها اشبح شن يديرلها..
اريج:تعرفي استغربت كيف المهدي ماخداش منك موقف مهما كان اللي فضح بأخته خوك..
سدرة بإبتسامه:تصدقي ولامرة جابلي سيرة والله لليوم مانعرف منه حاجه كان مش انتم خبرتوني مانندري ع شي..
هاديه:مايبيش تصير بينك وبينه مشاكل..
فردوس؛وشن ذنبها في عمايل مختار!؟
بدت ع وجه سدرة ملامح الضيق..
هاديه:راجل تاني غيره يافردوس راهو وصلها للطلاق لكن المهدي يحب سدرة حق ومايبيش يخسرها..
ابتسمت سدرة..
اريج:حتى هو ماحصلها لين ربي خدي فيه وعطي..
ضحكت سدرة..
فردوس بإبتسامه:تي يموت فيها من لما كانت بيبي راهو..
ضحكوا وسدرة غمضت عيونها بخجل وقالت وهي تضحك بعصبيه..
/باهي خلاص..
🍃ضحكوا عليها اما غرفه كانت تشوفلها بإبتسامه وهي تتفكر في كلام صار بينها وبين مختار قبل حوالي عامين الكلام اللي قالت مختار وقتها توا بس فهمت المغزى منه..واللي فهماته حسسها بالضيق ووجعلها قلبها...🍃
رن جرس الانترفون..
استاقظت لما سمعاته وقالت..
/اكيد هي..
ناضت ومشت طلعت من حداهم..
اريج بعدم تقبل..
/مش طايقه نشوفها..
هاديه:والله حتى اني بديت نشوف فيها وحده منافقه..
سدرة:مرات نعذرها..
فردوس:حتى اني عاذرتها..
اريج وهاديه مااقتنعوش بكلامهم والتزموا الصمت..
شويه سمعوا اصوات هدرزة غرفه مع الضيفه قربت اصواتهم لعند ماخشوا عليهم..
زينب بإبتسامه..
/السلام عليكم..
ومشت لفردوس سلمت عليها بحرارة بعدين سلمت ع سدرة اللي كان سلامها عادي عكس سلام هاديه واريج بارد زي سلام غرفه قبلهم..
بعد السلام قعمزت جنب فردوس وقعدت تهدرز عليها والحديث انتقل لسدرة هاديه كانت تشارك مرة مرة لكن اريج وغرفه قعدوا ملتزمات الصمت..
🍃زينب:وينها طوبى؟
شافوا لبعض وسدرة جاوبت..
/مهناش..
خدت زينب نفس وقالت..
/لو ماتبيش تطلعلي عاذرتها لكن اني نبي نشرحلها موقفي هداكا الجالي اعتدي ع خوي بالضرب لأن فكر فيها مالا لو خداها شن يدير فيه! لو كنتوا مكانا ديروا زينا..
غرفه:حسستيني ان طوبى كانت تجري في جرته هو اللي قعد وراها حتى بعد رداته قريب عشرين مرة..
زينب بهدوء:ماقلتش غير هكي بس اني كنت نب نبعد ونبعد خوي ونخليه يفقد فيها الامل بالمرة..ابتسمت وكملت تقول..لكن كله كان ع الفاضي قعد يلح علينا لين اقنعنا واللي صار لطليقها وهروبه برا البلاد ريحنا ناحية الموضوع هدا علاش اليوم جيت نفتحه مرة تانيه..
سدرة قالت:باهي خلي موضوع خوك وطوبى ع تركينه شن الموضوع اللي يخص اختك ايمان وتبي تاخدي راينا فيه!؟
حطت زينب طاسة الشاهي وقالت..
/جاها موضوع زواج والراجل انتم تعرفوه كويس ايمن الفاندي..
كلهم بدت ع وجوههم ملامح المفاجأة..
زينب:قالت ليه مدة يلحق فيها وجاها لمكان عملها وفتح معاها الموضوع،هي في عندها قبول اتجاهه وزادت تقبلاته بعد قاللها انه حيسيب الخدمه مع****** لكن اني قلتلها خل نزيد نسأل عليه عيلة الواعر ونشوفوا شن يقولوا عنه
سدرة:اختك ربي راضي عليها اعطوا وعيونكم مغمضه رجال عيلة الفاندي مقومين ونساوينهم بنات اصل وقلوبهم كبيره تعيش بيناتهم بية..
زينب:يعني نتوكلوا ع الله..
سدرة:توكلوا..
هزت زينب راسها وقالت..
/ان شاء الله خير..باهي وموضوع عدي وطوبى .
ابتسمت سدرة وقالت..
/طوبى متزوجه ليها تلاته شهور..
بدت ع وجه زينب الصدمه واريج وغرفه استحلوها فيها اما فردوس وهاديه كانوا شادين ضحكتهم ع الحركه اللي دارتها سدرة..
🍃🍃🍃🍃
"تزوجت!"
زينب:والله خيرك خوي صدقني..
سكت عدي لكن قعد يسوق في السيارة بعصبيه..
زينب بخوف..
/هدي شويه بالله عليك..
قاللها بعصبيه:اقعدي ساكته مانبيش نسمع صوتك..
سكتت اخته وقعدت تشوف لعيونه كيف يلمعوا بالدمعه وجعها لكن قاعده مقتنعه ان خيرته مش فطوبى ومازال نادمه اللي سعتله في الارتباط بيها يوما ما..
🍃زي ماندمت كامله اللي خلت خديجه تعيش معاها لمدة تلاته شهور..تعودت عليها وحبتها هلبه حستها فهالفترة وكأنها بنت سادسه ليها..حتى بناتها واكثرهم مفيده حبت صحبتها هلبه ومضايقه هلبه انها حتفارقها..
🍃خديجه بضحكه صدمه ودموعها في عيونها..
/حي عمتي تبكي!!؟
كامله وهي تمسح في دموعها قالت بعصبيه..
/اسكتي ترا..
نزلوا دموعها وهي تشوف لمفيده كيف تبكي ضحكت وقالت..
/اهاا مش قلتلكم اني ننحب وماينقدرش ع فراقي..
ضحكت كامله من بين دموعها وهي ماطه شفايفها للأسفل ومفيده تضحك وهي تمسح في دموعها..
خديجه:لكن اني الحق الحق مش حنستاحش غير بقيراتي ودجاجاتي والارض والسعي كيف بندير من غيرهم مش عارفه..
كامله خدت مخده وخبطتها بيها ومفيده قالت بضحكه..
/كلبه
🍃وحزمت خديجه تاني يوم شناطيها وغادرت زليتن ورافقتها عمتهابش تحضر الحفله متاعها
☘☘☘
اول ماخشت لحوش بوها استقبلوها خالاتها بالزغاريد ودارولها شوط دربوكه وطبعا هدا كله كان متفق عليه..
نسرين كانت تصفق مسايرة وسميرة تتفرج من بعيد وهي تضحك في سرها..
ومغليه ع كرسيها المتحرك مدت ايديها لبنتها وخديجه شدت ايديها وقعدت ترقص..
والخالات وبناتهم يرددوا بصوت..
"يابنية كان جيتي لأمك مشكورة ماحد يذمك"
☘☘☘
وبعد ساعه من وصولها تغدوا وبعدين جتها المزينه اللي قعدت معاها في دارهم هي واختها زمان
في الوقت اللي بدوا يجهزوا فيه الصاله للحفله
جابولها شركة تنسيق دارولها ديكور حلو بالطاولات والكراسي وخلوا ركن خاص بالزمزامات
🍃🍃
قبل لتبدا الحفله بربع ساعة جاب عمر نفيسه من المزين وكانت كالعاده غاية فالجمال والانظار كلها عليها الحاسد اكثر من المعجب..
حتى طلة سميرة كانت حلوة اكيد مش حبا في خديجه لكن بإعتبارها مرت محمد شنيبه لازم تبان في احسن صورة..
اللي طلتها كانت عاديه جدا نسرين اساسا فهاليوم تفكرت يوم زواجها من ربيع وبرغم كل شي داراته اختها دعتلها من قلبها ماتشوف اللي شافاته
وطبعا سدرة مش حاضرة من غير منع المهدي ليها ماكانش خاطرها تحضر هالمهزله..
🍃هالمهزله اللي خلت محمد ولد خديجه يهرب لحوش ولاد عمه عبد الفتاح..
اما راما مشت مع عمها اشرف ومرته لأحد المولات بش تدهور وتاخد حوايج ويتعشوا فيه..
وهذا كان اقتراح صفاء اللي لاحظت ع راما التعاسه من بداية اليوم...الاب تزوج وعاش حياته ونساهم والام تخلت عنهم وحتى هي اختارت تعيش حياة تانيه بعيده عنهم وتنساهم..وهادي اقسى حالات اليتم زي ماقالت هي يوم من الايام..
"موت الوالدين وهما ع قد الحياة"
🍃🍃🍃🍃
وكانت ليلة الحفله ليله حكي بيها شارع القهوة وانقسمت اراء اهل الشارع فيها لقسمين..
قسم اثنى ع قوة شخصية خديجه وقالوا..
"صحة ليها"
وقسم تاني استهجن اللي داراته واعتبروه ردة فعل وحده مقهوره ع نفسها..
وخديجه في هديكا الليله مااهتمت لشي غير انها دارت اللي فراسها..
🍃🍃🍃
وبعد نهاية الحفله روح بيها جمال لأحد الفنادق باتوا ليلة وحده وتاني يوم من الصبح رفعها لحوش اهلها سلمت ع العيله كلها وسلامها ع امها كان مؤثر جدا خلوا سميرة تبكي غصب عنها..
وطلعت خديجه من حوش اهلها للمرة التانيه وخشت حياة جديده مع راجل راغبها لشخصها ويبيها من كل قلبه..
☘ولعله الخيره في اللي صار انه حيفتح لناس ابواب سعاده تسكرت في وجوههم ويخلي ناس تانيه تعيش حياة مستقرة بعيده عن المنغصات..
#انا_لحبيبي_وحبيبي_إلي
#طوبى
...يتبع...
