#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃رصاصة من الماضي أصابت الحاضر فشوهت المستقبل🍃
__________________________________________
الساعة 12:30قبل الظهر..
تعبت السمي بالغيوم المليانه..وريحة المطر عبت الارجاء.والريح المصقعة تهب كل شويه...
هي كانت تحس بهالأجواء وتتأمل فيها من ورا مرش"زجاج" سيارة زوجها اللي كان متوجه بيها لحوشها او زي ماتحب تقول عليه.."حوش ماليا"
بعد ماخشوا لشارع القهوة درس قدام باب الحوش وقال..
/خلاص اخر كلام نجيك بعد صلاة العشا!؟
طوبى هزت راسها بإيجاب وهي تضحك..
ابتسم وقال..
/تمام..
قالتله:في أمان الله..
وفتحت الباب ونزلت وهي تسمع فيه يقول..
/في حفظ الله..
سكرت باب السيارة وطلعت مفتاح الحوش من جيب جلابيتها فتحاته وخشت..وبعد ماسكرت الباب تحرك عبد القيوم..
واكيد مشهد زي هذا مش حيفوت محمود اللي تبع السيارة بعيونه لعند ماتباعدت بعدين غير نظره لصاحب محل المواد الغذائيه اللي كان يشوفله حتى هو...
هز راسه بإيجاب..ومحمود ابتسم ع جنب وهز راسه حتى هو ورجع خش للمطحن..
🍁🍁🍁
بعد ماخشت طوبى للحوش مررت نظرها ع الجنان اللي كان فاضي وهذا حاله في ايام الشتي..
مشت بإتجاه الباب الدخلاني خشت انفها ريحة تطييب توقعت تكون للكسكسي..ابتسمت..
وصلت في الباب ودخلت المفتاح وفتحاته وخشت..
الحوش كان دافي..دفاه غمرها..شمت مع ريحة التطييب ريحة معطر حلوة..
وجهت نظرها لبنتها لما سمعت صوتها وهي تقول..
"اشربي طقوسه"
ضحكت وسكرت الباب بهدوء..وقدمتلها خطوة خطوة لعند ماوصلت فيها قعمزت ع رووس اصابعها وضمتها وباستها..
جنه بفرح قالت..
"مامي"
طوبى ردت عليها تقول..
/روح مامي..
والقطوسه اللي كانت محصورة في الزاويه قدمت لطوبى جت جنبها وقعدت تتمسح بيها..
طوبى حست بيها ضحكت وحطت يدها ع راسها..
"والله لطوبى حق!"
رفعت عيونها وشافت فردوس طالعة من الكوجينه..
ناضت ومشتلها سلمت عليها بحرارة..
طوبى وقتها كانت تبي ضم اختها وتبكي لكن بكل قوة تماسكت وبانت قدامها عاديه..
وجنة بعد طلقتها امها لهت بالقطوسه ورجعت حاصرتها في الزاويه بش تشربها الحليب بالغصب..
************
فردوس:لما ترقد مئاب تكسد ع القطوسه مهبلتها مسكينه..
ضحكت طوبى وهي تشوف لبنتها كيف تمسح ع ظهر القطوسه..خطر عليها كلام عمات عبد القيوم عنها شدت دموعها بقوة وقعدت محافظه ع ضحكتها اللي قاعد درق في حزنها وآلالامها...
فردوس:امتى روحوا مالي راجلك؟
شافتلها وقالت..
/الصبح بكري..قريب التسعه..
فردوس:جوهم عادي معاك؟
ابتسمت وقالت..
/عاتبوا شويه لكن بعدين عادي هما اصلا طيبين هلبه..
فردوس:صح باين عليهم..
هزت راسها بعدين ضم شفايفها لداخل وقالت..
/كنت نعاين؟.
فردوس بقلق:خيرك!؟
طوبى:ع قصة العذر..
فردوس:اها..ايه..باهي شن قالولك؟
تنهدت وقالت:طلع عندي اكياس ع المبايض..
عقدت فردوس حواجبها وقالت..
/اكياس!؟
طوبى:ايه لكن باهي مش كبار قالت الدكتورة ناخد عليهم علاج ونمشي بنظام معين للماكله وهكي..يتحولوا بروحهم..
فردوس هزت راسها وقالت..
/تصير تصير..المهم انتي رد بالك امشي ع كلام الدكتورة وراك تهملي دواك..
ردت طوبى نظرها لبنتها وقالت..
/إن شاء الله..اريج عندها امتحان اليوم؟
فردوس:ايه من امس وهي تخمم فيه..
ابتسمت طوبى لما سمعت شن قالت فردوس بعدين قالت..
/جنو تعالي ياقلبي..
ناضت ومشت تجري لأمها وضمتها وطوبى ضمتها بقوة وهي تشم في ريحتها وتبوس فيها..
فردوس وهي تشوفلهم بإبتسامه قالت..
/عبد القيوم بيتغدا هني؟
طوبى وهي ضامه جنه قالت..
/لالا الراجل اللي يخدمله في مكتبه عازمه ع الغدي..حطت جنة في حجرها وقالت..كسكسي بالخضرة ولا؟
فردوس:وهو في احلى منه فالشتي!؟
طوبى بضحكه:لامافيش بالذات من تحت ايدياتك انتي..
فردوس بضحكه:نجيلي الرتيله..
ضحكت طوبى وضمت بنتها بقوة...
🍃🍃🍃🍃
في قاعة المحاضرات..
كانت اريج منهمكه بالإجابه ع اسئلة امتحان الماده اللي يعطي فيها نضال...ماكانش موجود معاهم في القاعه طلب من زملائه يراقبوا عنه في الإمتحان..
مادارش هكي لأنه مشغول بشي تاني..كان يبي يبعد او يهرب من بعد آخر لقاء زاد انشغل بيها هلبه وقلبه تولع من الشوق ولأنه كان شايف ان اريج ولت امنية مستحيله انشغاله بيها عذبه،خلاه مش قادر يركز ع طلب العلم الشرعي وحفظ القرآن ولما عطاه قلبه انذار انه ممكن يزوغ وينحرف عن الطريق اللي عاهد نفسه من لما بدي يمشي فيها مايخليهاش حط حد لمشاعره وكبح جماحها وقاومها بالإجتهاد في الدعاء والعبادات لعند ماهدت وتهذبت وقرر يهرب من الاسباب اللي تخليها تطلع عن سيطرته مرة تانيه ويبتعد عنها تماما..
🍃كملت اريج امتحانها اللي ابلت فيه بلاء حسن وطلعت من القاعه لقت صاحبتها قدامها..
اريج:هاه شن صار فيك؟
=الحمد لله الاسئله شراب ميه..
اريج:ايه جت ساهله..مررت نظرها حواليها بعدين قالت..بتروحي؟
=لالامش توا خلينا ناخدوا حاجه ناكلوها ونهدرزوا شويه..
شافتلها اريج بإبتسامه بعدين خدت يدها وقالت..
/تعالي..
🍃ومشوا مع بعض للكافتيريا خدوا ماياكلوا بعدين طلعوا قعمزوا في مكان مستخطي ومشي الوقت بين ماكله وهدرزة واريج من داخلها كانت متمنيه تلمح نضال ولو لمحة اليوم المهم ماتروحش من غير ماتشوفه..
لكن فات الوقت ومالمحتش نضال وانجبرت تروح..
برغم الضيق اللي حست بيه وقتها..لكن اول ماتحركت بسيارتها قعدت تعدد بالمسبحه اللي كانت حاطتها ع الدومان"مقود" وهي تصلي ع النبي الصلاة الابراهيميه اللي من لما تمسكت بيها مع قراءة سورة البقرة وصلاة الاستخارة والدعاء وهي حاسه براحه وسكينه في نفسها وأملها بتحقيق امنيتها يزيد يكبر اكثر واكثر...
🍃🍃🍃🍃
"تمام هكي..توا ابتمسوا"
قالت هالجملة مصورة جايبها مختار للفيلا بش ديرله جلسة تصوير عائليه..
هو وزوجته كانوا بكامل اناقتهم وولدهم في حضن امه كان اكثرهم اناقه..
ابتسموا ابتسامه حلوة بانت ع وجوههم والمصورة بدت تاخدلهم الصور..
وهي تاخد فالصور وقفت لما سمعت فاتن تقول..
/لحظة بس..
مختار وهو يشوف لولده قال بضحكة مفاجأة..
/ناغى ولا!؟
فاتن وهي تضحك..
/ايه..
مختار:هي هي..قول..كغ..
ضحكت فاتن وشافت للمصورة لقتها تضحك حتى هي بعدين رفعت الكاميرا وصورت مختار وهو في هديكا الحاله الرائعه..
الصورة جت عفويه ومعبرة جدا..ومختار لما شافها عجباته وعطي للمصورة اضعاف اجرها مرتين..
☘الأبوه لما تجي للراجل ع كبر غالبا تخلي حنانه يوصل لأعلى مستوى وقلبه يتعلق بضناه بشكل رهيب..
وحتى المراة لما تولي ام في عمر كبير فرحتها بضناها تكون اضعاف مضاعفه..
سدرة عكس مختار كانت تتمنى تولي أم لأبناء يكبروا فيها ويطلعوا منها..لكن هالأمنيه بعدت عنها لدرجة خلتها سلمت تماما ان عمرها ماحتتحقق ومع هذا كانت ام حقيقية لطوبى وعطتها كل ماعندها من عمر ومن مشاعر ولعل اللي داراته مع طوبى كانت مكافئته زواجها من الراجل اللي تمناته من صغرها وعن قريب حترزق بمولود منه ☘
🍃"هي هاتي يدك خالتي"
عطت سدرة يدها لسميتها بش تساعدها ع النزول من اخر درجة..
نزلت ومشت هي وياها بإتجاه حوش شيابينها ناويين يتغدوا غادي..
سدرة المهدي وهي تشوف للسمي قالت..
/شكلها المطر بتصب..
سدرة وهي تسمع فيها حست بألم بان ع وجهها ومع هذا ردت..
/ايه قالوها جماعة الطقس..
شافتلها سدرة المهدي وقالت..
/خيرك خالتي؟
ردت عليها وهي تحاول اخفاء شعور الألم..
/مافي شي حبيبتي وجع طبيعي يمشي ويجي..
وصلوا في باب حوش محمد شنيبه..
دقت سدرة المهدي الباب وهي تسرق في النظر لمرت بوها..
لحظات وانفتح الباب..
جوري بإبتسامه..
/اهلا..
ابتسمت مرت عمها وقالت..
/اهلا بيك ياحلوة..
وخشت ولحقتها سدرة المهدي وسكرت الباب...
🍃🍃🍃
وتعدي الساعات..
وبعد صلاة العصر بدت المطر تنزل شويه شويه لعند ماولت تنزل بغزارة..
صوتها وهي تصب..مع ريحة الوشق الفايحه وعالة الشاهي واللمه اللي كلها دفي هذا كله مخلي لفصل الشتاء رونق جميل طيح هلبة ناس في حبه منهم حبيب طوبى وزوجها اللي قاعدة تكلم فيه بالمراسله وهي تحت البطانيه وجنه راقده في حضنها...
(فردوس دايرة عاله بالكانون مقعمزة حداه اريج تحرس فيه من صغار غرفه)
عبد القيوم..
(اجواء سمحه)
طوبى .
(تهبل)
عبد القيوم
(وتلوميني في حب الشتا)
ضحكت بعدين كتبت وبعتتله .
(يقعد الخريف سيد الفصول)
عبد القيوم..
(سيد الفصول! مال انتي عطيتيه هاللقب)
طوبى..
(ايه قولي علاش)
عبد القيوم..
(Why؟)
ضحكت بعدين ردت..
(لأن جوه يلم فصول السنه كلهم يوم صيف ويوم ربيع ويوم شتي)
عبد القيوم..
(ياودي باهي وخلاص)
بعتتله ايموجي يضحك..
🌸وهي رايحة في عالم الحب اللي حداها كانوا يهدرزوا عن ولادة سدرة القريبة..
غرفه:مربوعة حوش جدي اكبر من مربوعتنا نديروا فيها هي لمة النساوين والرجاله نحطوهم في مربوعتنا..
فردوس:حتى اني فكرت فيها وقلت عليها لهاديه..
غرفه:عمي مش حيقول لا نعرفه..
أريج بحماس..
/غير امتى تجيب متلهفه نشوف ولدها كيف بيطلع..
ضحكوا غرفه وفردوس..
سمعتهم طوبى بعد مانهت محادثتها مع عبد القيوم ناضت قعمزت شافت لبنتها غطتها كويس بعدين شافتلهم وقالت..
/عاودوا شن كنتوا تحكوا عاودوا...
🍃وهما يحكوا عن التجهيزات اللي بيديرولها لولادة سدرة كان في من ناوي يحكي عنهم في واحد من حياش الشارع..
حوش الصيد..
استقبلت نجمه مع العصر جاراتها اللي جوها من غير موعد..
مرت الجعفري وام محمود ومرته ووكالة انباء شارع القهوة رقية..
كانوا مقعمزين في دار المعيشة يشربوا في الشاهي ومعاهم عواطف وصفاء وراما وابتسام اللي جاية اليوم زيارة رقيه وهي شاده طاسة الشاهي شافت لإبتسام بطرف عينها بعدين غيرت نظرها لراما وقالت..
/مافيش اخبار عن امك ياراما!؟
نجمة وعواطف وصفاء اغضبهم السؤال اما ابتسام وباقي الجارات كان عندهم فضول يعرفوا اخبار خديجه بعد زواجها..
وراما اللي مفروض سؤال زي هذا يضايقها صار معاها العكس وفرحت بيه هلبه..
علاش!؟
لأنها تبي تقهر مرت بوها شويه..تقعد بنت خديجه الاما تحمل من صفات امها شويه..
ردت تقول ع رقيه..
/اخبار الله يبارك تسافر من بلاد لبلاد وكل يوم دهوير وعزايم الراجل اللي خداته عنده مركز كبير في خدمته..
جدتها وعمتها وصفاء شبه فهموا هي علاش جاوبت هالإجابه اما الجارات اندهشوا فيها وفعلا نجحت في قهر مرت بوها واغاظتها..
رقيه بتعجب:ربي يهنيها..
راما:ويهني الجميع ان شاء الله..
شافتلها ابتسام بطرف عينها من فوق لتحت وهالنظرة شافتها صفاء لكن بسرعه غيرت عيونها لرقيه لما سمعتها تقول..
/سمعتوا بأخر اخبار عيلة الواعر..
نجمة:اخبار شنو!؟
رقيه:يقولوا ياوخيتي يقولوا انهم عطوا طوبى للتارقي..
نجمه وعواطف وراما وابتسام اندهشوا..
لكن صفاء توترت..
نجمة بعدم تصديق..
/قولي غيرها يارقيه..
هني تكلمت مرت محمود وقالت..
/حتى حني سمعنا ياخالتي نجمه في ناس نعرفوهم شافوا التارقي بعيونهم وهو جايب طوبى لحوش ماليها..
عواطف بصدمه..
/معقوله!
مرت محمود؛والله زي مانحكيلك والناس اللي شافوهم ثقة..
ابتسام:معاش لقوا لمن يعطوها كان للتارقي!؟
نجمه:حتى اني مش خاشتلي راس هو راجل كويس ماقلنا شي لكن لاهي ليه ولاهو ليها..
ام محمود قالت..
/وبعد اللي صار والدوة اللي طلعت عنها من مازال بيرضى بيها!؟
صفاء هني طلعت عن صمتها وقالت بحمق..
/معليشي ياخالتي ردي بالك من كلامك حتى انتي عندك ولايا..
قالتلها:وشن قلت ياكبدي! ماقلت كان الحق..
وكنتها قالت..
/عمتي ماقالتش دوة جديده ياصفاء هذا الحق..
صفاء ناضت وهي تقول بغضب..
/احتراما ليك ياعمتي مش حنرد وبنطلع مرة وحده..
ومشت طلعت من حداهم متوجهه لدار حماتها بش تاخد ولدها اللي كان راقد فيها وتولي لجناحها..
🍃نجمه:عندها الحق وحتى اني مانبيش دوة زي هادي تنقال قدامي..غير الموضوع بالله..
شافوا لبعض بعدين رقيه قالت..
/هو هدا خل نغيروا الموضوع خير..
التزموا ام محمود وكنتها الصمت وكانت باديه ع وجوههم ملامح عدم الرضا..
اماعواطف وراما وابتسام كانوا يفكروا في اللي سمعوا وفضولهم كان شديد لمعرفة التفاصيل..
🍃🍃🍃
وفي حوش جيرانهم..
كانت اللمه في دار المعيشه وحتى هما دايرين عالة شاهي شادتها سميرة..
نسرين كانت مقعمزة جنب سدرة توري فيها بعض الحاجات اللي تخص لمة الجياب وسدرة كانت تساير فيها مسايرة بسبب الوجع والتعب اللي نحس بيهم وعيون سميتها مافارقوهاش..
..نسرين:خلاص تو نحجز في هادم..
بعدت هاتفها ولهت بيه..
سدرة هني حست بالوجع قاعد يزيد اكثر واكثر معاش قدرت تقاومه..
حطت يدها اسفل بطنها وقالت..
/آه..
شافولها بفزع..
نسرين بخوف..
/خيرك!
سدرة وهي تتألم بقوة..
/معاش نقدر نسرين..معاش نقدر..عيطت وهي تقول..كلموا المهدي..
سدرة المهدي من الخوف ناضت وطلعت تجري من الدار للمربوعه وصلت فيها وخشت عليهم وهي تقول بفجعه وبدون تركيز..
/بابا زود لخالتي شكلها بتجيب!
وصلهم صوت سدرة وهي تعيط..نسي المهدي وناض وطلع يجري من المربوعه وبنته لحقاته..
محمد المهدي بقلق..
/ان شاء الله خير..
جده قاله وهو يحرك في السبحه..
/خير ياولدي مافي شي يخوف..
"بنموت يامهدي نموت خلاص"
يزن بخوف..
/توا هذا مايخوفش ياجدي!؟
ضحك محمد شنيبه ونضال اللي كان متكي حداهم قال بإبتسامه..
/طبيعي يايزن طبيعي ماتشوفش فيهم في المسلسلات!
ومجرد كمل نضال كلام سمعوا صرخة قويه طالعه من سدرة طول فزوا وطلعوا يجروا من المربوعه..
محمد شنيبه:ان شاء الله تنوض سالمه هي وعيلها..
نضال:ان شاء الله..الحق يابوي اللي زيها وضعهم يخوف.
قاله:عارف عارف..ربك يشبح في خوك وصغاره ومايذوقهم الفقد مرة تانيه..
نضال قال..
/يارب..يارب...
☘وبرا..
ركب المهدي مرته من الخلف وكل صرخة تطلع منه كان يحس فيها وسط قلبه..
ركبت معاها سميرة ومحمد خدي مفتاح السيارة من بوه بش يرفعهم عارف بوه في هالحاله مش حيقدر يسوق..
بعد ركبوا هو بوه طلع بيهم بسرعة وخلوا وراهم سدرة تبكي وجوري تهدي فيها..
نسرين:ماتخافيش حبيبتي طبيعي يصير هكي..
يزن بقلق..
/متأكده ياعمتي!
ضحكت ضحكه تخفي قلقها وهي تقول..
/متأكدة متأكده..هي خشوا صقع..
خشوا جوري وسدرة ووراهم يزن بعدين خشت نسرين وراهم وهي تدعي من قلبها لمرت خوها وصاحبتها...
🍃🍃🍃
وصلوا بسدرة للمصحه وجابولها باريلا حطها المهدي عليها..
دخلوها وهو وسميرة معاها..
شدت سدرة ويد المهدي وهي تتوجع وتقول..
/طوبى..نبي طوبى..جيبوهالي..
وقعدت تصرخ بصوت عالي..
حاولوا الممرضات يهدوها وهي مازال تردد في اسم طوبى..
المهدي بتوتر وألم.
/حاضر حاضر ياسدرة تو تجيك..
بدت سدرة تبكي وهي تقول..
/سامحني يارب..يارب سامحني سامحني..
ودخلوها لقسم الولادة في المصحه طلبوا من المهدي يخش معاها لكن هو رفض ماعنداش قدرة ع التحمل اكثر من هكي..
تباعد عن المكان بش يتصل بعبد القيوم..
وسميره اللي كانت تشوفله قعمزت ع الكراسي وبدت تدعيلها..
🍃🍃🍃🍃
بعد ربع ساعه..
من اخر ممر قسم الولادة جت طوبى وهي شادة جلابيتها وتجري..
شافت المهدي يمشي ويجي وهو في قمة التوتر وسميرة مقعمزة تدعي..
وصلت فيهم وهي تقول بخوف..
/شن صار!
مسح المهدي بيده ع وجهه وقال..
/ماطلعلنا حد..
سميرة؛شويه وتانيه ويطلع حد يبشرنا ماتخافوش..
التفت المهدي للحيط وضربه بقبضة يده..
طوبى بتوتر..
/استهدي بالله يامهدي وادعيلها..
المهدي هز راسه وبدي يحس بوجع في قلبه من خوفه..
وفي هاللحظه طلعت الطبيبه اللي كانت تابع عندها سدرة وقالت بإبتسامه..
/مبارك مبارك جاكم وليد زي القمر..
المهدي وطوبى قالوا مع بعض..
"وسدرة!"
بضحكه قالت..
/الله يبارك حالها باهي وصحتها كويسه غير اجهدت شويه اثناء الولاده بس..
سميرة ناضت وهي تقول..
/الحمد لله الحمد لله..جت لطوبى وضمتها وهي تقول..الحمد لله ع سلامتهم..
طوبى ودموعها تنزل قالت بفرح..
/الحمد لله..
والمهدي في هالحالة ماقدرش يقعد..انسحب من حداهم وتباعد عنهم وطلع من القسم وهو هارب بدموعه..
كان فرحان فرحة لاتوصف..لتوا مش قادر يصدق ان سدرة ولت ليه ورب العالمين رزقه منها بولد..
نزلوا دموعه مسحهم بقوة وبين عيونه يمر شريط ذكريات الفراق المؤلمة..ياااه شتان بين اليوم والأمس..
اللي كان يقول عنه ولى مستحيل اذنله الله يصير ويكون واقع عايش فيه...
ماحسش بنفسه الا وهو طالع برا المصحه..
قعمز في مكان مستخطي وقعد يبكي وحالته هادي لما شافها ولده محمد كاد يموت من الخوف..
"بوي خيرك تبكي!"
لف المهدي وجهه عنه..مسح دموعه وحمحم بعدين قال..
/خالتك جابت وحالها هي والعيل باهي..
ابتسم محمد بفرح بعدين قرب لبوه وضمه لحضنه وباس ع راسه..
والمهدي حط يده ع ظهره وقعد يطبطب عليه..
🌼🌼🌼
ووصل الخبر السعيد لكل احباب سدرة والمهدي..
نسرين ماقدرتش تتماسك قعدت تبكي خطر عليها الماضي وتفكرت عائشه وتمنت لو رجع الزمان لتالي وماصار شي من اللي صار..
فرحة فايزة كانت تشبه فرحة نسرين خالطها الحزن..
لكن خواتها وامها صفيه بكوا من فرحتهم اللي كانوا مش مستوعبينها مافي حد منهم قبل عامين كان متخيل ان يوم زي هادي حيجيهم ويعيشوه...
🌼🌼🌼🌼
"سديرة"
سدرة بابتسامة ودموعها في عيونها قالت..
/عيوني..
طوبى وهي وتمسح في دموعها قالت بضحكه..
/تعرفي هاليوم كان حلم حياتي..
شدت سدرة يدها بقوة ودموعها نزلوا..
ع خشة الممرضة بالمولود ومعاها سميره..
طلقت طوبى يد سدرة وتباعدت عنها وهي تشوفلها كيف كيف تشوف لعيلها بلهفه وعدم استيعاب في نفس الوقت..
عطتهولها الممرضه وهي تسمي بالله..
خداته سدرة وقلبها بدي يدق بقوة..شافت وجهها..
وجه ولدها ضناها اللي من دمها اللي قاسمها كل شي لما داخلها وتوا بيقاسمها كل لحظات حياتها..
نزلوا دموعها زي السيل..رفعاته لأنفها وشمت ريحته غمضت عيونها وقعدت تردد همسا..
"الحمد لله"
مسحت سميرة دموعها وقالت..
/بوه يبي يخش..
طوبى رشفت ومسحت دموعها وهي تقول..
/هي خل نطلعوا..
وطلعوا مع الممرضه وسدرة مازال هايمه مع ولدها..
لحظات وخش المهدي..سكر الباب بهدوء وهو يشوف لحالتها..
ابتسم ابتسامه جانبيه حلوة..وعيونها قعدوا يشوفوا فيها وهما يتفكروا في البنيه الصغيره اللي كان عمرها تلاته سنوات اول مرة شافها للشارع لما جوه سكان جدد برغم صغر سنه وسنها لفتت انتباهه وخدت قطعه من قلبه ومن يومها وهي تملك فيه كل يوم اكثر من اللي قلبه لعنده ماسيطرت على قلبه سيطرة كامله وخداته منه..
قاللها:هيي يابنت..
فتحت عيونها وشافتله بإبتسامة من وسط دموعها وقالت..
/تعرف..لتوا مش مصدقه..
قاللها:ولاأني..
ضحكت وقالت..
/اقرب شوفه..
قرب منها وجي جنبها طبس عليه وشافه ضحك وقال..
/خيره قارنهم!
قالتله؛ لمن بيطلع يعني بوه نار وامه شرار ..
ضحك المهدي ونطح راسها براسه وهي ضحكت..
ابتسم المهدي وقال..
/هاه شن هو الاسم اللي قعدتي داستيه عليا!؟
ابتسمت وعيونها دمعوا وهب تقول..
/من لما عرفت ولد وماخطرش في بالي غيره..علي..
بإبتسامه قال..
/كنت متوقعه..خلاص...علي المهدي شنيبة...
#ذكريات_لاتموت
#طوبى
(نعتذر منكم عن قصر الجزء تعبانه شويه هذا اللي قدرت نكتبه اليوم)
...يتبع...
