طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ڪل الأشخاص عبارة عن بذور نجهل نوعها إلا أذا زرعناها في عالمنا إمَّا أن ينبتوا ورداً يعطر حياتنا
او شوكاً ... يدمي قلوبنا ..🍃
_________________________________________
يوم الأحد..
3فبراير...سنة 2019..
الساعه 11:00صباحا..
في مصحة القدس..
كان راقد ع سرير وهو اطرافه بين المجبس والملفوف..
وبوه واقف عليه وهو يشوفله بغضب ويقول..
/تحساب بنات الناس لعبه تتزوج وطلق ع مزاجك..تصدق مش واجعني بكل مأثر فيا وضعك هدا نهائي..بس..نبي الطريحه هادي تعلمك..تعلمك الشي اللي اني ماعرفتش نعلمهولك..انك تكون راجل..
ومشي طلع من حداه وهو في قمة الغضب..
وخلا مهند متأثر بكلامه..بس ماكانش مهم عنده قد مامهم عنده ان اللي يبيه وصله وقدر يفرق بين عزيز وآلاء..
شاف للباب لما سمعه يدق..وفي لحظه انفتح..
توسعوا عيونه لما شاف اللي خش عليه وفي يده باقة ورد..
الزائر سكر الباب بعدين قدم ناحيته وهو يمرر في نظره ع وضعه بعدين قال..
/امم..وصلك ردي بالحرف..
عقد حواجبه بغضب..
عزيز:نظرتي فيك من البدايه بكل كانت في محلها..انت مدعي مش اكثر..مدعي انك انسان متفهم ومثقف وعاقل..لكن اتفه من التفاهه ومتخلف من الطراز الرفيع..رفع سبابته وقال..هادي اخر مرة نتعامل معاك فيها بالعقل..صدقني مرة تانيه لو وصلني انك رفعت عيونك في خطيبتي بالغلط..مستقبلك ندمره..وقد اعذر من انذر..
وحطله الباقه ع صدره وهو يشوفله بنظرات امتعاض وغضب..
بعدين لف ومشي طلع من الحجرة وخلا مهند بيموت من غيظه والدموع في عيونه..
🍃🍃🍃🍃
والاء في الكليه تراجي عزيز ع نار والدموع في عيونها..
كانت خايفه هلبه..الخوف مسيطر عليها..
استنت هلبه..لين بان عليها جاي من بعيد..لقت روحها تقدمله بدون اراده منها...
وصلت فيه وقالت بتوتر..
/عزيز..
هو بإبتسامه قال..
/روح عزيز..استاحشتك..
الاء بلعت ريقها وقالت..
/وصلتني الرساله هادي امس اقراها..ومدتله التليفون..
هو خداه وحول نظاراته وقعد يقرا..
كانت رساله تهديد من مهند لآلاء..تهديد واضح وصريح انه حيفرق بينها وبين عزيز وبعتلها صورة المحادثه..
حرك عزيز راسه يمين ويسار اسفا بعدين شافلها وقال..
/انتي كيف كنتي خطيبة واحد زي هدا!؟
الاء نزلوا دموعها وهي تقول..
/ماصدقتاش صح!؟
عزيز؛شن تشوفي ياالاء!!عيل!.
الاء وهي تمسح في دموعها قالت..
/حاشاك..لكن مانعرفش..قصدي انت امس ماكلمتنيش بكل ولما اتصلت بيك لقيت رقمك مقفل ومافتحتش نت بكل وبكري شويه تبعت رساله تقول نبيك في موضوع مهم!
ابتسم وقال..
/امس كنت مشغول لدرجة ماتتصوريهاش شغل وسفر ع ماوصلت لهني ودرت مشوار ع السريع بعدين جيتك..وموضوعي المهم مش هدا نهائي..لانه اساسا ولا يعنينا في حاجه..الموضوع المهم هو..
"تقبلي تتزوجيني عاجلا جدا"
حطت يدها ع فمها وهي تضحك بدهشه.
عزيز بحب:البعد عذاب معاش نقدر عليه...
نزلت يدها وهي تضحك..
عزيز؛نبي نشوف الضحكه هادي كل يوم في كل وقت..
الاء:بس حني تفاهمنا العرس بعد مانتخرج..
رفع حاجبه وقال..
/وليت في كلامي لأول مرة نولي في كلمتي ع فكرة..
ابتسمت بخجل وقعدت ساكته..
عزيز؛تو نتفاهم مع ماليك واللي نقرروه اني وياهم يمشي عليك ومن فم ساكت..
هي قالت؛والله!
عزيز؛والله..شفتي كيف خلتيني ديكتاتور!
قعدت تضحك..وهو يتأمل في ضحكتها بنظرات كلها حب..
🍃🍃🍃🍃🍃
في حوش عبد المطلب..
كانوا اخته وبنت خوه يدهوروا فيه وهما مذهولات..
ع كبره..وتفصيله..وديكوره..
مطيره؛تبي تقنعيني ان خوي اللي مفرشه!؟
هاديه بضحكه؛لاياحنه مش خوك اني..
فردوس بضحكه؛واضح الذوق انثوي..
ابتسمت هاديه وهي تشوفلها..
مطيره ضيقت عيونها وقالت..
/بالله قوليلي كيف قدرتي تتفاهمي معاه وتنسجمي مع طباعه الزفته..
ضحكت فردوس..
وهاديه بإبتسامه قالت..
/تعرفي يامطيره..مشكله خوك الوحيده الفلوس..وهو واخدني مراة عندي معاش وعندي رزق الحمد لله..لانقوله هات ولاجيبلي اني ناخد لروحي هو يصرف ع قضية بس..وهالشي متفاهمين عليه من الاول..ومع تعسيل في الدوة والتنفيخ في الماشيه والجايه ولينا سمن ع عسل..
مطيره؛ماكش ساهله بكل ياهويديه..
هاديه؛لازم مانكونش ساهله بش نعرف نعيش وندبر اموري راهو لما تكوني مطلقه واللي حواليك محسسينك انك هم ع قلوبهم بترضي بأي شي..واني رضيت بس في نفس الوقت عرفت كيف نخلي روحي مرتاحه..
فردوس:صحة ليك.
مطيره؛ماخسرك كان الحمار اللي كنتي واخدتيه..
هاديه؛هداكا دلدول امه وخواته رغم انه ولد عمي وخدينا بعض عن حب زعميتك لكن اللي ريته منه خلاني بعد سته شهور نطلب الطلاق وندير اللي مايندار بش نحصله..
فردوس بإستياء؛لاحول ولاقوة الا بالله...
مطيره:افتكيتي ومش عارفه كيف نقولها بس شكله خوي هو العوض الجميل..
ضحكوا عليها..
مطيره؛هيا هي خلينا نبدوا معاش في وقت..
هاديه؛تعالوا للكوجينه..
ومشت وهما وراها..
☘وتمر ساعه وهما يجهزوا في وجبة الغدي للعزومه..
لين يجي اتصال لهاديه وكان من خوها..
هاديه:هيا هي هاني طالعه..وسكرت..
مطيره؛راك تقولي جو!
هاديه بضحكه:لا مازال غير خوي جابلي بضاعه وصيته عليا قالي تلقيها في الباب بنمشي ندخلها للمخزن تجي معاي مطيره!؟
مطيره:مش مشكله..
هاديه ابتسمت وقالت..
/تعالي..
ومشت هاديه ومطيره نشفت ايديها وطلعت وراها..وخلوا فردوس تقرض في البطاطا للمبطن..
🍃طلعت هاديه ومطيره وراها..
شافت بضاعة" سبيزة" كامله..زيت وطماطم وحليب بأنواعه حكه وباكو..وسكر وسميد وكسكسي ورز..
مطيره:الله يبارك..! هدا كله دافع حقه خوي ولا!
هاديه بضحكه؛ماهو قتلك القضيه عليه هو..
مطيرة:اكيد بالتوفير..
هاديه؛مال شنو..خوي يعرف واحد يبيع بالجمله خدالي منه..
ع جية خوها وهو يحط في باكو حليب وعيونه لوطا..
/مش ناقص شي!؟
هاديه بإبتسامه؛سلامتك..
مطيره:غير دقيقه خوي..
هو عقد حواجبه وقعد يسمع من غير يقيم عيونه..
مطيره؛ستيكات الحليب هادم حقهم مش زي مافي السوق ولا!؟
هو قال؛مراعييني فيهم..
مطيره؛وكان دلنا ع اللي خديتهم من نقولوله من طرفك بش يراعينا..
ابتسم ابتسامه خفيفه..
مطيره لهاديه؛ياوخيتي حني عندنا محل حلويات والحليب نبوه وتوا شايط فيه النار..مدابينا ناخدوا كميه باهيه مراعيينا في حقها..
هاديه؛كان وصتيني راهو خليته يحسبكم زي ماحسب سميرة..
مطيره؛نهارك الاحرش! وانتي تحسبي في سميره وحوش شيابينك لا!؟
هاديه بضحكه:ياودي هي وصتني!
مطيره؛من غير مانوصي مفروض فكرتي فيها..ياخسارة ماشكرت فيها.
هو ضحك ضحكه خفيفه وقال.
/لعيون عبد المطلب والحاج عليه تلاته ستيكات يوصلوكم ه حسابي..
مطيره فنصت في هاديه وهي فرحانه وتقول..
/لاعاد مش هكي! انت بس وصيه عليها..
شكري؛لاخلاص كلمه وطلعت مني معاش نولي فيها..
رقصت حواجبها وهي تشوف لهاديه اللي شاده ضحكتها وقالت؛بارك الله فيك ويرحم والديك..
هو قال:والدينا ووالديك..ماتبي شي هاديه..
هاديه:تجي ع الغدي بس..
شكري:ان شاء الله...السلام عليكم...ومشي..
هاديه:مفلحك ياكبدي!..
مطيره؛والله ماكنت ناويتها لكن ربي قاسم..هيا هي خل ندخلوا الحاجات معاش في وقت..
☘ودخلوا مع بعض البضاعه للمخزن وبعد ماكملوا..
سكرت هاديه باب المخزن وقالت..
/شن رايك في خوي مطيره..
مطيره؛رجل والرجال قليل..
هاديه بضحكه؛ندوي جد..شكله شن رايك فيه..
مطيره؛وشن ندير بشكله بنخش بيه مسابقه!
هاديه بضحكه؛ياهمي..اني نفكر نخطب فردوس لخوي..
مطيره بصدمه؛نهارك ازرق!..
هاديه:خيرك!
مطيره:ردي بالك تفتحي موضوع زي هدا مع فردوس كان تبي تخسريها للابد افتحيه معاها..
هاديه بقلق؛لهالدرجه!
مطيره ودموعها في عيونها..
/فردوس قاعده عايشه مع راجلها لليوم..حتى اللي يقوللها انسيه معاش تشبح لوجهه مش انتي اللي تبيها تاخد غيره! امسحي الموضوع هدا من عقلك..خوك كان تبيني نشوفله ماعنديش مشكله عندي هلبه نعرفهم الله يبارك عليهم نعرفك بيهم وانتي تختاري اللي تمشي معاه..كلا فردوس انسيها..
هاديه بحسرة؛خسارة والله..خوي هدا كان متزوج مراة زي الذهب قعدت معاه ع الحلوة والمرة ولما عرفت انه عقيم مابتش تسيبه لين ربك خدي امانته من 4سنين فاتوا توفت مسكينه في فراشها لابيها لاعليها..قريب هبل بعدها مسكين لكن بعدين صبر عليها وعاش حياته..ولما فتحنا معاه موضوع االزواج قال ياتجيني زي خيريه يانقعد بطولي عمري كله..
مطيره:خوك مايبيش يتزوج ياهاديه معاش تضغطوا عليه..
هاديه تنهدت بضيق وقالت..
/الله غالب..هي تعالي نخشوا..
ومشوا مع بعض ومطيره تفكر في قصة شكري اللي اثرت فيها وحست انها مست شي ليه علاقه بماضيها الأليم...
🍃🍃🍃🍃🍃
في كلية التربيه..
في ممر طويل كانت طوبى تمشي وهي تتكلم بالتليفون..
طوبى:وجعتها كيف تطلب منها الزواج في السر ياعمي..انت عارفها مني وبنت مني!مش هي اللي ترضى بحاجه زي هادي..
"باهي يابنتي عندها حق..وقتلك قبل شن ماتشرط اني ماعنديش مشكله"
طوبى:هي ماعندهاش اعتراض عليك..بس قالت يبي نتفاهموا يجي لحوش بوي يخطبني من خوي..
"بنتي اني مش عيل احفادي اطول مني اكيد بنخطبها وراهو بنعطيك علم اني مشيت لمكان عمل خوها الكبير وفتحت معاه الموضوع"
توسعوا عيون طوبى دهشه وفرح..
"وصليله ان اللي تبيه حيصير"
طوبى؛حاضر عمي..اني رسول وعليا البلاغ وربي يقدم اللي فيه الخير..
"بارك الله فيك يابنتي"
طوبى:فيك بارك الله..
"ماتبوا شي انتي وجنه"
طوبى:سلامتك بس..
"باهي السلام عليكم"
طوبى؛وعليكم السلام..وسكرت الخط ونزلت التليفون وهي تقول تهكما..ع اساس هاماتك جنه ولامفكر فيها..رفعت حواجبها ونزلتهم وملامح الامتعاض ع وجهها ومشت كملت طريقها..
🍃🍃🍃🍃🍃
روحت من المدرسه..حطت شنطتها ع الكرسي ومشت تجري للكوجينه..
خشت..وقفت في مكانها لما لقت حماتها طيب..
صفاء بتوتر؛اسفه عطل بيا الباص..
التفتت عواطف وقالت..
/غيري وصلي وتعالي ديري السلاطه..
صفاء بإبتسامه؛حاضر..
ولفت ومشت طلعت وهي فرحانه..
توجهت لجناحها...دارت اللي قالتلها عليه عواطف وولت للكوجينه لقتها فاضيه..
حطت قهوة ع النار..ومشت توتي في حاجات السلاطه..
بعد ماكملت تجهيز القهوة..دارت السلاطه وغطتها..
وجهزت سفره فيها زوز فناجين قهوة ومشت طول للصالون..
لقت عزوزتها متكيه..وعواطف حداها يتفرجوا ع التلفزيون..
حطت سفره القهوة قدامها وطلعت زوز طروف شكولاته..
مدت لعواطف واحد..
شافتله عواطف شويه بعدين خداته وقالت..
/قهوة قبل الغدي!
صفاء:نعدل بيها راسي بعد دوشة المدرسه..
نجمه:واخده عليها ياحنه..
كسرت من الشكولاته و قربت لعزوزتها وحطتها في فمها..
كلتها نجمه وهي تضحك..
عواطف فتحت الشكولاته وهي تاكل بصمت.
وصفاء ولت لمكانها وهي تقول..
/كان نقوللكم شن صار اليوم..عمله ماهي عمله صارت لبنت معانا...
وبدت تحكي ونجمه منسجمه معاها..وعواطف تسمع بصمت..بعدين تشوقت للقصه اللي تحكي فيها صفاء وبدت تاخد وتعطي معاها..
عواطف:واك عليا عليك جيل جيلكم..
صفاء بضحكه؛عندك حق..مافيش احلى من جيلكم امي تحكي ع المدرسه ايام زمان حتى مقالبكم مؤدبه..
عواطف؛جيل ذهبي حبيبتي..
صفاء:والله حق..احلى وقت وقتكم..
"السلام عليكم ياعرب هو"
ابتسمت عواطف..
وصفاء التفتت وهي تقول بضحكه..
/سيمو..
نجمه:مرحبتين مرحبا بكنينتي الكبيره..
سميره؛كنينتك جابتلك خبيزة خضرا زي العسل نشربوا معاها شاهيك..
صفاء :وكان عواطف ديرلنا معاه سفينزات اشرف يشكر في السفنز متاعها...
ابتسمت نجمه...
عواطف؛راك تتعلمي ديريه!..
صفاء:ديريه اليوم واني حداك..
عواطف؛حتى كان علمتك مش حتفوتيني فيه.
صفاء؛العين ماتعلا ع الحاجب لكن نجربوا..
سميره بضحكه؛خلاص شاهي العاله ياعمتي..
نجمه؛باهي باهي..
سميره؛شن الغدي..
عواطف؛زر بالخضرة عمايل ايديا..
سميره وهي طالعه للكوجينه قالت..
/اووووو..
نجمه بضحكه:يافرحة ادريس شاهي عاله وخبيزة سميرة وسفنز عواطف..
ابتسمت صفاء وشافت لعواطف..
لقتها تاكل في الشكولاته وتشوف للتلفزيون...
🍃🍃🍃🍃
ويقرب وقت الغدي ويتعبا حوش عبد المطلب باهل هاديه وحسين حتى هو جي بش يتعرف عليهم..
وهما تعرفوا ع مطيره وفردوس..بس انجذبوا لمطيره وحبوا جوها وهي خشت فيهم بالطول وبالعرض زي مانقولوا وعجبها جوهم. وصاحبتها جاها خوها الكبير للحوش بش يفتح معاها موضوع محمد شنيبه بحضور اسكندر..
☘اسكندر بعدم فهم:محمد المهدي شنيبه نفسه! هو نفسه هداكا اللي يسكن في شارع القهوة!؟
خوه؛ايه هو قال انه يسكن غادي..
اسكندر:قوله يفتحلك ربي مافيش نصيب..
سميره؛خطبك انت ؟!
اسكندر:بالله سميره فكينا من البصارة في الموضوع هدا..
سميره؛من قالك نبصر..
:خيركم شن في! خيره الراجل!
اسكندر:شن خيره هادي!هو في جهة والخير في جهة تانيه..
سميره؛لاعاد مش لهالدرجه مالاش ذنب في اللي داروه ضنوته السودا..
:تي فهموني خيره وخير دعوتهم ضنوته!..
☘اسكندر حكاله بإختصار ..
:وشن دخله الراجل!؟
سميره؛هو اللي جاب حقها لعندها وجبر ولده يطلقها..
اسكندر بإنفعال:تي خير بلاك ياسميره! تبي تعفسي فيا ولاكيف!..
سميره بضحكه؛ياودي هو اللي مدخل بنت الواعر واسطه بيني وبينه..
اسكندر بصدمه:كيف!..
سميرة:والله زي مانحكيلك وكلهم عندهم علم..
اسكندر قعد ساكت وهو يفكر..
:اني ماعنديش مشكله لو انتي راضيه وعارفه روحك قد الخشه هادي..ضرة وصغارها وكلهم كبار...
سميره:قدها ونص وتلاته ارباع..
اسكندر؛بتجيبي لروحك وجع راس ومشاكل وحتى عيت الواعر مش حيسلموا..
سميره:لاعيب ولاحرام اللي بنديره..وانت تعرفني كويس نكسر رووس ولافي من يقدر عليا كان ربي ارتاح سلم وخيي.
اسكندر:انتي مش رخيصه عندي بش نرضاها عليك!
سميره؛ياوخيي افهم..انت بعد ماتتزوج بنقعد بروحي..
اسكندر؛تي بنسكن معاك خيرك!..
سميرة؛لالالا..الحوش اللي مانكوش اني مولاته الوحيده مانقعد فيه..السفينه تبي قبطان واحد..
خوها بضحكه:حي عليها اللي بتجيها ضرة حي..
سميرة برفعة حاجب:تقعد عاقله مايجيها شي..
اسكندر:اني مش راضي مش راضي..
وناض من حداهم..
سميره:تتتاتاتاتا....تاتا...موسيقة خلفيه كملت المشهد اللي داره..
ضحك خوها وقال:باهي شن نقول للراجل..
سميره:هما شرطين رضي بيهم كان بيها مارضاش هو ماعنده وانا من عندي ع قولة السوريين..
🍃🍃🍃🍃🍃
وتخش سيارة طوبى لشارع القهوة بعد ماقضت ساعات طوال في الكليه بين تنزيل المواد والشغل ع المشروع..
☘طوبى صفت موادها بمعدل تراكمي مقبول وهدا اللي كانت متوقعاته..باهي اللي صفت اصلا..☘
وين قربت السيارة من الحوش.
شافت عبد القيوم واقف ع جدها قدام حوشه..
درست السيارة ونزلت بتفتح الباب .
جدها شافلها..وعبد القيوم معاه..
هو كان لابس بالطوا اسود تحته فانيليه شتويه رقبه رماديه ع سروال اسود..وعالمرة كان مغطي راسه ووذانه بطاقيه صوف رماديه..وعيونه مدرقات بنظرات لونها بني خافت..
يدوب لمحاته وهي موليه..تفكرت كلام آلاء ع لبسه واناقته..
عقدت حواجبها وقالت في نفسها.
"اعوذ بالله من الشيطان"
وركبت سيارتها وخشت بيها للحوش...
🍃علي:يعني اعراض سحر..
عبد القيوم وهو يكبح في جماح مشاعره المتوهجه قال..
/غالبا..بس في حاجات اخرى هي اللي تأكدلنا..حاليا مانقدروش نعرفوها لانها قاعده تحت علاج مكثف..بعد تشد حيلها ويتحسن وضعها يصير خير.
علي بضيق:من اللي حاقد عليها لهالدرجه بش يدير فيها هكي!!؟ حتى اللي يوجعها ماتردش عليه وتخلي فيها لله..
عبد القيوم:الحسد ياما يدير ياحاج..
علي:حسبنا الله ونعم وكيل هدا ماعندنا..
عبد القيوم:اهم شي مايعلم حد براني بالمعلومه هذي..مرات لو كانت مسحورة حق اللي داره فيها يقويه ولايجدده..
علي هز راسه وقال:مش حتطلع مني توا وتقعد بيني وبينك..
عبد القيوم؛يكون احسن..تنهد بعدين قال..خليها ع الله..
علي:نعم المولى ونعم النصير..هي تسايرني للجامع..
عبد القيوم ابتسم وقال..
/مالا ليش جيت فهالوقت..قالولي الحاج علي فاقدك واجد في المشيه للجامع..
علي:رد بالك منه صاحبك هدا ماينعطى سر...
ضحك عبد القيوم..بعدين مشوا هو والحاج علي بطريقهم للجامع وهما يهدرزوا ع السياسه ووضع البلاد..
🍃بعد العصر..
جي وقت مرواح مطيره وفردوس..سقدتهم هاديه وخشت للحوش..
وهما كملوا طريقهم لسيارة حسين اللي كان واقف قريب عليها مع بوه ونسيب بوه..
شكري..اللي يدوب سرق نظره لمطيره..شافها كيف فتحت الباب الخلفي لبنت خوها بعدين مشت ركبت القدام..
ويسلم حسين عليه وعلى بوه ويمشي يركب سيارته..
ويشغلها ويتحرك وعيون شكري مازال تسرقلهم في النظر لين طلعت السيارة من البوابه الخارجيه...
🍃🍃🍃🍃 🍃
"مقعمزين يهدرزوا ويشربوا في الشاهي"
خديجه برفعة حاجب:حتى عمتك!؟
راما:ايه وجوها هادي مع هديكا..
خديجه؛ ياسلام..!وماقالوش انزلي اشربي الشاهي! يللا اني مش برانيه تو ننزل بروحي..
🍃ومشت لبست بالطو ووشاح وخدت ولدها ونزلت بيه مع بنتها..
طبت عليهم زي القضاء المستعجل وكان واضح عليهم جوهم تغير بالمرة..
قعمزت قريبه ع سميره وبنتها جنبها..
/خيركم ماقلتلولي تعالي اشربي معانا الشاهي!
نجمه؛انتي من اهل الحوش ماتبيش عزومه..
خديجه؛صدقتي..شن حالك سمورة..
سميرة:الحمد لله..
خديجه؛شن حال عبد الفتاح والولاد!؟
سميره؛الحمد لله في خيار الخير..
خديجه:دوم...ايه حقه عمتي بتمشي لعرس اخت محمود..
نجمه:مالا شني
خديجه؛تستورهم عراس الشتي يمرضوا..
نجمه:يمشي خديجه؛ع قولتك..من قال الفرخه حنان اللي كانت تلعب في الشارع اولامس بتتزوج..اصلا عرايس هالوقت كلهم الفرخات الصغار..
صفاء قاعده تحاول تتجاهل..وعواطف بدت تضايق..
خديجه بضحكه؛خايفه يبدوا يخطبوا مني راما..
نجمه بعصبيه؛هدا اللي مازال!؟ معاش تدوي قدامها في امور زي هادي تو تحطيها في راسها..
خديجه؛شن مالا هبلت نعطي بنتي وهي تقرا في المدرسه!
راما؛بابا قال بنتي الوحيده مانعطيهاش الا بعد ماتتخرج من الجامعه..
خديجه:سلم بوها عزها ودلالها ماعندها مادير بالرجاله..
عواطف شافت لصفاء لقت عيونها غارقات بالدموع..
شويه ناضت وهي تقول..
/خل نمشي نزيد خبزة..ومشت بسرعه طلعت..
وعواطف ناضت وراها...
سميره وهي تشوف لراما بإمتعاض:شن دايره في قرايتك سمعت قالوا مستواك نازل..
راما بصدمه؛من قالك!؟
نجمه بحده؛عمتك نجاح الابلات يشكوا منك وقالوا مخلطه ع شلة ماتنفعش..
خديجه؛بنتي متربيه احسن تربيه وصاحباتها كلهم نعرفهم..ع العموم تو نكلمها نجاح بروحي ونتفاهم معاها..
نجمه:وكيف بتتفاهمي معاها!!؟ اسمعي جاي المراة قريب تجيب اخطيها ماتفوتيش من ركنها..
خديجه؛تمام بنراعي وضعها لأن الحمل في السن هادي خطير وهي اولها مرة..لكن ياريت ياعمتي تفهميها ان شي يخص بنتي ماتقوله لحد غيري مرة تانيه
نجمه بنرفزة؛باهي باهي..وقعدت تخدم في الشاهي..
وخديجه وراما يشوفوا لسميره بحقد..وسميره تتفرج ع التليفزيون تجاهلا لوجودهم..
🍃في نفس الوقت..
فالكوجينه..
خشت صفاء وقعمزت ورا الطاوله وقعدت تبكي.
خشت وراها عواطف وسكرت الباب وهي تقول..
/هادي وحده مريضه وتعرفيها كويس مفروض ماتأثرش فيك..
صفاء ببكي؛تلقح في اي شي الا الحاجه هادي..هادي حاجه بيد ربي ماتخافش من ربي لهالدرجه!!؟
عواطف؛غير تعرفه هي بش تخاف منه..
صفاء ببكي:حسبي الله ونعم الوكيل وجعتلي قلبي هلبه حاسه روحي بنموت..الله يرحمك يابابا شن دار فينا غيابك..
عواطف معاش تحملت..جتها وضمتها وهي تدعي بغضب..
/الله لايربحها الحقيره..ويسامح خوي كان مش هو خداها راهو قاعده لتوا في رقبة امها الشمطاء..
صفاء ببكي:حسبي الله ونعم الوكيل فيها..
🍃وقعدت عواطف تهدي في صفاء..لين هدت ووقفت بكي.
بعدين خدتها ومشوا طلعوا قعمزوا في الجنان تحت شجر الزيتون بش صفاء تاخد نفس وتزيد ترتاح..
شويه وخشوا الزوز داخل وولوا مع بعض لدار المعيشه..
لقوا عبد الفتاح ومحي والصيد مقعمزين داخل..
سلمت عليهم صفاء بالكلام ومشت قعمزت جنب عواطف..
🍃وقعدوا يهدرزوا هدرزة حلوة اغلبها بصارة بين عبد الفتاح وسميره اللي يبانوا منسجمين مع بعض اكثر من قبل..
ومحي كان لاهي معاهم ومستكرد خديجه استكراد تام ومالقتش من يهتم لأمرها في هاللمه غير الصيد اللي كان يساير فيها...
🍃🍃🍃🍃🍃
"الله يبارك مطورة هلبه سديره"
سدرة المهدي بفرح؛حقه!
طوبى بإبتسامه؛الحق فاجئتيني..
فرحت سدرة من قلبها..
تاله:مش قتلك رسمك حلو هلبه..
سدرة ابتسمت بعدين قالت..
/معاش رسمتي!؟
طوبى:ايييه..قداش ليا ع الرسم..نحس في روحي نسيته..
الاء:مستحيل هادي موهبه ماتنتساش..ماخطرش عليك ترسمي جنونه..
طوبى:اكيد فكرت فيها..بس لتوا حاسه روحي فاقده الرغبه..
ع خشة اريج مروحه من الخدمه..
/السلام عليكم..
ردوا عليها السلام وسدرة المهدي كانت تشوفلها بحزن..
اريج مشت قعمزت جنب طوبى وقالت..
/تسلم عليك منيه هلبه وقالت في اقرب فرصه بتجي زياره هي وامها..
طوبى بإبتسامه؛مرحبتين بيهم..
آلاء بضحكه؛عندي ليكم خبر غير تروح امي نقوله..
اريج؛وعلاش تشوقي فينا يادراه!
ضحكت طوبى..
الاء:امشي اقلبي وجهك..
اريج:اقلبيه انتي وجهك ياعفشوكه..
الاء بصدمه؛قصدك سمنت!! لاااياربي فيلو احلامي مش حنقدر نلبسه..
اريج ضحكت بمكر وقالت..
/طلعت منك الدوة طلعتها..
طوبى وهي تضحك بمفاجأه..
/قصدك حددتوا خلاص..
الاء حدفت مخدة ع اريج وهي تقول..
/ايه..
اريج تلقتها وهي تضحك بمكر وترقص في حواجبها..
بعدين ناضت وهي تقول..
/شكله احساس هاديه قوي هلبه..لوحت المخده ومشت طلعت..
وسدرة ناضت وراها..وعيون طوبى والاء وتاله معاها..
🍃برا..
سدرة المهدي؛اريج..
وقفت والتفتت وهي تقول..
/نعم حبيبتي..
سدرة بحزن..
/عمو نضال سافر ومعاش بيجي هني..
اريج حست بشي اشبه بالسكين خش لقلبها..
سدرة؛قالي لو شفتيها قوليلها ربي يهنيك..
اريج لفت ومشت بسرعه للدار..خشت وسكرت عليها..وحطت ايديها ع وجهها وقعدت تبكي بالعبره..
قعمزت بهده ع الارض..وضمت رجليها ودفنت راسها فيهم وهي تبكي وتتفكر في كلامهم عن الهجره اللي كانوا ديما يختموا فيه بأغنية .
"نحرق ولالا"
هي توا تسمع فيها بصوته..وقلبها قاعد ينعصر من الألم..
🍃نخمم والحرقه في بالي
زعمه نحرق ولالا..
عايش في الدنيا زوالي..
نبكي والدمعه سياله🍃
#نهوض
#طوبى
....يتبع...
