#طوبى "جنة طوبى"
#جمان_فريد
#الجزء_السابع_والثمانين "انتقام/لعبة الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تجري الرياحُ بما شاء الإلهُ لها،
للّٰهِ نحنُ وموجُ البحرِ والسُفنُ..🍃
___________________________________________
🍀🍀🍀🍀🍀
ويمروا مايقارب الاسبوعين...
🍃الجالي تاني يوم من بعد يوم الزيارة سافر للبلاد اللي يخدم فيه ع مشروع الملعب..ماحاولش يتصل بطوبى اي يدير اي تصرف مثير للشك او الخوف في قلبها او قلوب المحيطين بيها..
وكان يوميا يكلم في اهله ونجاة والصغار..
الصغار اللي بعد مانفسية امهم ارتاحت روحت بيهم ورجعت تهتم بيهم زي قبل مع اهتمامها بشغلها...
🍃ويطلع ولد خديجه من المستشفى..وتقرر دير لمة كبيره في الصاله يوم 29نوفمبر عزمت عليها حتى الجيران...
ويوم 25 نوفمبر كان مرواح اشرف وصفاء من شهر العسل..
اللي يشوف وجوههم يعرف حجم السعاده اللي هما فيها...
فرق العمر مش باين ومش مؤثر نهائي،صفاء بالذات كانت تبان رزينه وعاقله سابقه سنها وهذا اللي عجب نجمه فيها..
بس عواطف معاش عجبها فيها شي..حست اتجاهها بشعور بشع ع الاخر مش طايقه تشوف وجهها الناير ولاضحكتها السعيدة..ولانظرات الحب المسروقه بينها وبين اشرف..
اشرف اللي عرف باللي صار فيها ووجعه حالها..بس وهو راجل ماقدرش يمنع عقله من التفكير في عواقب اللي صار مع اخته لأنه مش ناسي كيف ولت بعد تجربتها القاسيه السابقه..وخاف السعاده اللي هو فيها تتحول لكدر خصوصا وانه حيرجع لشغله ويخلي صفاء بروحها..
🍃من جهة تانيه خوه عبد الفتاح معاش حاول مع سميرة..ومش هكي بس..حتى في حوشها معاش يبات..يجي كم ساعه يهدرز ع ولاده ويروح لإبتسام..
سميرة في البدايه انوجعت هلبه كانت متمنيه ان تحليلها للي صار مع عبد الفتاح قبل يكون غلط..هي هكي المراة عقلها يقتنع بشي قلبها مايبيش يصدقه..بس لأنها مراة محكمه عقلها ع طول الخط حاولت تتجاوز وتعود نفسها ع الحياة بدونه...
🍃الحياة بدون نضال اول الفراق كانت عند اريج عاديه او هي كانت مفكرة..لعند ماصار في تقارب يومي ورجعت تشوفه كل يوم مشاعرها اتجاهه قوت اكثر من قبل وغيرتها عليه كانت معذبه قلبها هلبه..
وعذابها مايجي شي قدام عذابه اللي هو فيه مش عارف كيف يتصرف بش يتأكد من اللي سمعه من امه واخته..كل يوم لاعيونه يتفحصوا فيها..وقلبه كله خوف من انه يشوف دبلة حد تاني فيهم غير دبلته هو..الدبله اللي قاعده عنده مأمل نفسه هلبه يجي يوم وترجع تزين يدها اليسار مرة تانيه...
🍃اما اختها فكانت عايشه ايام هاديه ولطيفه بدت من لما سمحت لعزيز يخش حياتها..لقت فيه هلبه حاجات حلوة كان فوق ماتتمنى..انسان راقي مثقف متفهم بعيد عن التصنع والتكلف..مرات يعاملها كناضجه ومرات يدللها زي الطفله اللي طلباتها مجابه قبل لتطلبها...
هو بعد ماخطبها سافر برا البلاد يشوف اشغاله..حاول ع قد مايقدر يقطع جزء من وقته بش يروح ويشوفها..واخيرا نجح في محاولته..وحجز للسفر يوم 28 نوفمبر...
🍃في هالفترة مختار كان مشغول بالمناقصة اللي يبي ياخدها ورضا معاه الزوز بالنسبه ليهم كانت احد اكبر اهدافهم اللي يبوا يحققوها سنة 2018..
وبعيد عن مختار كان رضا يراسل في صابرين يوميا مراسلاتهم كانت كلها مناقره..تخلي في صابرين تضحك من قلبها..قلبها اللي بادي يتعلق برضا يوم عن يوم..رضا اللي خلاها تأكدت انها عمرها ماعرفت معنى الحب حق الا معاه...
🍃🍃🍃🍃🍃🍃🍃🍃🍃
29نوفمبر...سنة 2018..
الساعه 11:15صباحا..
جامعة طرابلس قاطع ب...كلية اللغات..
☘هاليوم كان شتوي بإمتياز..
الجو بارد..السمي معبيه بالغيم الرمادي..ريحة المطر اللي كانت تنشم من قبل لتوصل..
في باحة الكليه...
الاء ببالطوها الارزق الملكي الشتوي اللي كانت لابساته ع ماليه بيضا انيقه وسروال جينز ازرق خافت..ومغطيه شعرها بشاربه بيضا يشابههم في اللون السبيدرو اللي في رجليها..
كانت مقعمزة حاطه شنطتها الازرق الملكي الصغيره بحزام ع هيئة سلسال لونه ذهبي..ع رجليها...
طلتها كلها كانت ع حساب عزيز اللي مرة شافها معلقه ع صورة فيها اللبسه كامله وكان عقلها طاير فيها..وماتندريش الا وتجيها بخدمه توصيل للحوش...
وفي عيون حاسده كانت تراقب فيها بنظرات كلها غيظ..
:اللبسه هادي شفتها في بوتيك المهره قريب ب500..
أكابر:ع خاطر واخدتها بفلوس الحلويات اللي تبيع فيهم!
:اني بس كان تعطيني الوصفه اللي تخليها طيحت واحد زي عزيز..
:حظ الفولغير ديما هكي..
واكابر تسمع وعيونها عليه...شافتها ناضت وقفت وهي تشوف القدام وع وجهها ابتسامه فرح حلوة..
شافت وين تشبح..لقت عزيز جاي جيهتها وهو لابس اسود في البني ونظارات سود مدرقات عيونه ويبادل في الاء نفس الابتسامه..
بس وهي تشوف لعزيز..لمحت حد تاني..ركزت بنظرها عليه بدت ع وجهها ملامح الصدمه..
اكابر بصدمه؛يابنات شوفوا السيارة الرصاصيه اللي واقفه تحت الشجره هديكا..
كلهم ركزوا بنظرهم للمكان اللي وصفاته..
؛حي! هدا مهند ولا!..
كلهم قعدوا يشوفوله وهما مصدومات .
:تو مش تزوج!؟؟
:تخيلوا قاعد يبي الاء وناوي يفسد عليها..!
ابتسمت أكابر بشي من المكر وغيرت نظرها لآلاء وعزيز...
☘كان عزيز كيف واصل في آلاء قال..
/استاحشتك..
هي بضحكه؛يقولوا السلام عليكم..
هو ضحك وقال؛السلام عليكم..استاحشتك هلبه..
هي قالت:يقولوا السلام عليكم حالك؟.
هو بإبتسامه قال:السلام عليكم كيف حالك..استاحشتك موت..
قعدت تضحك..
وهو يشوفلها بإبتسامه حلوة..
هدت ضحك وقالت؛الحمد لله..كيف حالك انت وكيف حال عمتي..
عزيز؛تسلم عليك وبعتتلك معاي هديه بعدين نعطيهالك.
الاء:مفروض جت قبلك الهديه..
قعد يضحك..
الاء بإبتسامه؛عازمتك اني اليوم..
عزيز؛ع شني!؟
الاء بإبتسامه؛تعالى نقعمزوا قبل..
هو قال:ok..
ومشت آلاء وهو معاها...
والعيون معاهم...
ومنهم عيون مهند اللي كان مقهور قلبه محروق..
من الغيره والغيظ كان شاد ذقنه بقوة وفي نفسه يقول..
"اصوليه انانيه ماديه..عايشه مرتاحه ولاع بالك لكن والله مانبدا راجل كان خليتك تتهني ياآلاء زي مادرتي فيا حندير فيه عزيز متاعك هدا توتشوفي شن حنخليه يدير فيك..تو تشوفي"
🍃🍃🍃🍃🍃
الساعه 12:30قبل الظهر..
في المدرسه اللي تقرا فيها مروة ساعة الانصراف..
كانت مناسك واقفه تراجي فيها..
ومروة تتكلم بهاتف الاخصائيه الاجتماعيه..لحظات ونهت المكالمه وشكرت الابله بعدين مشت تجري لمناسك..
مروة بضحكه؛قالتلي كان مالك عادي..
ضحكت مناسك..
تعنقت مروة ذراع مناسك..ومشوا مع بعض طلعوا من المدرسه..
لقوا سيارة نوع هونداي"جنيسيس" تستنى فيهم..
مشولها الزوز..
ركبت مناسك القدام..ومروة ركبت من الخلف وراها وهي تقول..
/السلام عليكم..
مالك بصوت مبحوح..
/وعليكم السلام..
حست بالضيق لما سمعت صوته كيف متغير واضح مريض..بس في نفس الوقت عجبها..
تحرك بالسياره وقال..
/شن جو مروة؟
هي قلبها فر..يدوب ردت وقالت..
/الحمد لله..شن حالك انت؟
هو بإبتسامه؛حال البرده والرقبه المسكره..تسمعي في صوتي كيف متغير..
مناسك:ماهو من الاهمال قاعد يلبس في نص كم في الحوش..
مالك:انتم مخليين الحوش صاونه مش مخليين مكيف مش فاتحينه ع السخون..
مروة؛ايه وبعدين تطلع للصقع طبيعي بتمرض..
مالك ابتسم وقال:عليك نور..
ومناسك تسمع فيهم وهي مبتسمه..
مروة:نقولك خود نص ليمه اعصرها ع طاسة شاهي سخون وشويه زنجبيل واشرب..
مناسك؛ولا حاجه من اللي قلتي عليهم يحبها..
مروة:مش بالحب هي..هدا زي الدوا مافي حد يحب الدوا لكن لازم ناخدوه..
مالك؛انتي كيف صاحبتي اختي الختشه مش عارف..
قعدت تضحك بصمت..
مناسك:صقع عليك اني ربي محبب خلقه فيا..
مالك؛اايااح..
ومروة تضحك عليهم بدون صوت..
شويه قال مالك؛نستيني بكل..واحد قريب بوي توفى وبوي رفع امي لمصراته بش يعزوا الحوش مافيه حد..تبي نرفعك لوحده من خواتك؟
مناسك:عادي نقعد في حوش خالتي فايزة؟
هو قال:شني مروة؟
مروة بإبتسامه؛اكيد عادي..
مناسك بضحكه؛سلمهملي ياربي..
ابتسموا مروة ومالك وقلوبهم دق بقوة..
وكملوا الطريق وهما يهدرزوا ومروة شويه شويه تشارك فيهم الحديث لين وصلوا للشارع..
لما خش مالك بالسياره شاف قدامه بمسافه محمد ومؤيد مروحين مع بعض..بدت ع وجهه ملامح الحده..
بينما مناسك كانت حطير من الفرحه لأنها شافت مؤيد..
فات مالك من جنبهم..
هما ركزوا ع السيارة اول مرة يشوفوها..
درست قدام حوش سدرة..
استغربوا..
🍃مالك:بعد المغرب نجيك..
مناسك؛باهي..
مروة؛ممكن تراجي شويه..
هو بإبتسامه قال..
/ممكن..
ضحكت مناسك ونزلت ومروة معاها..
ومؤيد ومحمد كانوا واصلين لمطحن بوه..
مؤيد لما شاف مناسك الفرح تناثر من عيونه..
وهي وين جت خاشه مع مروة للحوش التفتت بتسكر الباب شافاته يدوب ابتسمت وسكرت الباب.
تنهد من قلبك وع وجهه ابتسامه واسعه..
لكن صاحبه كان يشوف للسيارة بنظرات حاده كلها غيره..
مؤيد؛غير الرانج شكله..
محمد؛هدا يغير في السيارات زي مايغير اي شي تاني في حياته لما يمل منه..
مؤيد شاف لمحمد شويه..بعدين رجع شاف لباب حوش سدره لما سمعه انفتح...طلعت منه مناسك وفي يدها مق ومشت لجهة باب السواق .
نزل مالك المرش وهو مبتسم بإستغراب..
مناسك مدتله المق وقالت..
/داراته بروحها وزاداته عسل..
تنهد مالك من قلبه وخدي المق قعد يشوفله بنظرات حزن..
واخته كانت تشوفله هو بنفس النظرات..
مالك؛خلاص بري خشي..
وخرت مناسك ومشت خشت للحوش..
وهو شرب من المق بعدين حط في مكان مناسب في السيارة وشغلها وتحرك طول وعيون محمد المهدي معاه...
🍃🍃🍃🍃🍃
الغيرة...احلى حاجه في الحب..واصعب مافيه..
☘كانت صابرين في الجامعه اللي تقرا فيها واقفه ع استاذ وحده من المواد ومحور حديثهم بحث علمي مطلوب منها..
وصاحبتها تستنى فيها بعيد عنهم شويه..
ملت وهي تستنى فيها مررت نظرها بملل ع المكان لين ثبت ع شخص كان واقف يشوف لصابرين بنظرات باين فيهم الغضب..
هي طول قامت تليفونها واتصلت بيها..
صابرين قامت التيلفون وفصلت عليها وكملت كلامها مع الاستاذ..
؛وااك ياصابرين..
رجعت شافت لنفس الشخص وهي تقول..
/المشكله الاستاذ هدا حاط العين عليها اكيد حيزبطه..
:ع العموم نهنيك وان شاء الله القدام نشوفوا منه الاحسن..
صابرين؛المهم نضمن انها صافيه..
ابتسم وقال:اضمني..
ابتسمت وقالت؛مشكور استاذ..
:الشكر لله..
صابرين؛ونعم بالله..سلام..
:وعليك السلام..
ولفت صابرين ومشت لصاحبتها وعيون الاستاذ معاها..
وصلت في المقعد وقعمزت جنب صاحبتها وقالت بإبتسامة راحه..
/بإذن الله صافيه...
؛لاوالله مسحبه ماباينلها صفي..
صابرين:اعوذ بالله منك..
؛ياهمي شوفي من في غادي..
صابرين وجهة نظرها وين ماتشوف صاحبتها..
تفاجئت وفرحت وقلبها فر فران..
شافتها لابس البالطو والشال اللي هدتهوله كانوا زايدينه وسامه وهيبه..
:كان هني من لما وقفتي ع الاستاذ اللصقه..
تلاشت ابتسامة صابرين..وطول ناضت ومشتله..
وهو يراجي فيها امتى توصل فيه..
وصلت فيه وقالت..
/حمد لله ع السلامه..علاش ماقلتش انكم مروحين اليوم!
هوقال؛جيت بنفاجئك لكن اني اللي تفاجئت..
صابرين بحده:رضا..
رضا:من هو هدا!؟
هي قالت:استاذ يقري فيا..
رضا؛بس!
صابرين بغضب:كلمة تانيه والله العظيم نمسحك مسح من حياتي..
رضا؛والله انتي دايرتيني صديق معناها في غيري ياخد خانة تانيه في حياتك..
صابرين قعدت تشوفله بغضب..غمضت عيونها شويه وفتحتهم وهي تحاول تهدي نفسها بعدين قالت بشي بسيط من الانفعال..
/تعرف اني تعودت عليك وبنتغاضى ع كلامك اللي زي السم لكن مرة تانيه تسألني عن شي يخصني مش حنرد عليك..
قعد يشوفلها بنظرات غضب فيهم مسحة حزن بعدين قال.
تحركي قدامي بتروحي معاي..
صابرين بضيق:وسيارتي..
رضا:روحت بيها قبل نجيك..
ومشي وخلاها..
هي ابتسمت وسط زعلها منه بعدين التفتت لصاحبتها حييتها بيدها ومشت لحقاته وخلت صاحبتها تضحك عليهم.. ☘ماتعرفش حقيقة صابرين..صابرين مفهمتها انها قاعده في حوش خالها..وان رضا قريبها وانهم الزوز في بينهم اعجاب بس هي رافضه ترتبط بيه لين تتأكد من مشاعره اتجاهه☘
🍃🍃🍃🍃🍃
الغيره لما تصيب قلب طايش تخليه يرتكب اخطاء كارثيه عواقبها جدا وخيمه..
☘☘☘
في الطريق..
كان نضال يسوق في سيارته متوجه للكليه عنده محاضره وحده مسائيه..
وهو ماشي وقف في الزحمه قدام محل ديكورات منزليه..
تأفف بضجر..بعدين مرر نظره ع السيارات حواليه ومنهم للمحل.اللي وين شاف جهته انصدم..
لقي بوه واقف ع سميره يكلم فيها..قعد مركز بنظره يحساب روحه يتوهم لكن اللي يشوف فيه طلع حقيقه مش وهم..
شاف سميره جايه بتمشي بوه شد مرفقها ووقفها هي جبدت مرفقها وتباعدت شويه وتبان تكلم بحده..
وهو كأن يحاول يقنعها..
شويه شافها مشت وخلاته وبوه معاه بنظره وهو يمسح ع لحيته ويبان معصب..
ابدا نضال ماعنداش مشكله مع بوه لو فكر فالزواج مش حيوقف في وجهه ولاياخد منه موقف..
في حالة لو اختار وحده تانيه غير سميره..
اخت الراجل اللي يبي ياخد منه حب عمره!
يعني لو صار نصيب بين بوه وسميره..حينجبر يشوف قهرته بعيونه في اي لحظه..
هو وقتها حس روحه بيموت..
استاقظ لما سمع صوت منبهات السيارات..
بدت ع وجهه ملامح الغضب..طول تحرك بالسيارة..
🍃🍃🍃🍃🍃
"اليوم بيديروا افتتاح للمحل ومرات مانلحقش عليه مانقدرش نرخي بالدكتورة"
:ربي يعاونك حبيبتي ويفتح عليكم ويجعله آية الرزق ع قولت السوريين..
اريج بضحكه؛ان شاء الله..نتلاقوا الاحد..سلام..
:ان شاء الله..سلام..
ومشت اريج بإستعجال لسيارتها..
في طريقها شافت سيارة نضال جايه بسرعه بعض الشي..
شد فرينو ونزل منها وكله غضب ومشالها.طول..
هي شافاته جاي ناحيتها لكن قعدت تكذب في عيونها وكملت طريقها عادي..لين هو اعترضت..
وقفت مفجوعه..
نضال بغضب:ماتوقعتش تنزلوا للمستوى هدا بكل وتوصل بيكم لهني..
هي قعدت تشوفله بصدمه ومش فاهمه شي..
نضال؛لكن طلعتوا زي ماقالوا عليكم...اسمعي جاي كان التافهه اللي ماتتحشمش ع وجهها واللي مش محترمه سنها صاحبة عمتك هادي ماتخطاش بوي اقسم بالله نديرالعار..
اريج بصدمه:شن تقول انت!..
نضال بعصبيه؛فوتي امه جوه الاستعباط متاعكم. وقولي لعمتك تقول لصاحبتها المتصابيه تحول بوي من راسها النماذج اللي زيها ماتخشش ذمة بوي ولاتنحسب علينا..
نسبتهم تمشي معاكم مش معانا حني عيلة شنيبه..
اريج فاقت من صدمتها وقالت بغضب..
/صح ماتمشيش معانا نسبتكم لأنها عار..
نضال بغضب اكبر..
/العار يعرفكم انتم وبري اسألي عن ماضيكم وتو يحكولك..
اريج ابتسمت بأسف والم..
/اكبر غلطه غلطتها في حياتي اني حبيت واحد زيك..
ومشت من حداه بسرعه وعصبيه..فتحت باب السيارة وهي ترعش..
وهو يشوفلها بإنفعال وألم..
نادم قد شعر راسه ع كل كلمة قالها..لكن الغيره والغضب والحسرة عموا عيونه ونضال مش خير من خوته في الحالة هادي..
شافها وهي تتحرك بالسياره وطلعت بيها من الكليه وهي تسوق بسرعه..
هو طول مشي جري لسيارته ركبها وتحرك وراها ويسوق بسرعه من خوفه عليها..
وكل من كان موجود في باحة الكليه وقتها يتفرجوا بفضول ودهشه ع اللي صار..
بس صاحبة اريج كانت خايفه عليها...
اتصلت بيها اكثر من مرة واريج ماردتش..
☘اريج في السيارة تسوق بغضب كانت وكأنها تجبر في دموعها يقعدوا محبوسات في عيونها..نضال في نظرها معاش يستاهل تنزل منها ولادمعه ع خاطره حتى لو كانت دمعة خيبه..
🍃وهو وراها يشوف لسيارتها وكله خوف عليها..
نضال بغضب:حمار حمار..وخبط بيده ع الدومان اكثر من مرة..
وقعدوا ع هالحاله لين وصلت اريج للمركز..
خشت بسيارتها داخل..خدت نفس عميق وطلعاته تلاته مرات..
بعدين قالت..
/لاإله إلا انت سبحانك اني كنت من الظالمين..
فتحت باب السيارة ونزلت..
شافت عمر طالع من المركز وهو لابس لبس كابتن الطائرة..
قعدت معاه بعيونها وهي مستغربه بعدين غيرت نظرها عنه وجو ع شخص تفاجئت هلبه لما شافاته..
الشخص اللي عنده اصرار كبير عليها ومش مأيس من محاولاته معاها..
اسكندر...
هي لما شافاته بدون تفكير مشتله وقفت عليه وقالت..
/علاش جاي!؟
اسكندر:جايك انتي ولسبب تعرفي ونبي نطلب مني تعطيني فرصه نقول اللي عندي بعدين انتي تفكري وتعطي رايك وصدقيني هادي حتكون اخر محاوله..
"موافقه"
بدت ع وجهه ملامح عدم الاستيعاب وهو يشوفلها وماقدرش ينطق بكلمة....
اريج ابتسمت ودموعها في عيونها بعدين قالت..
/لكن لازم تعرف مرات تتعب معاي شويه في البدايه..
ضيق عيونه وهو يشوفلها..
اريج؛اكيد فاهم عليا..توا انت اللي لازم تفكر وبعدين ترد..
ومشت بسرعه خشت للمركز وخلاته مازال يحاول يستوعب اللي صار...
وعيون عمر اللي كان مقعمز في سيارة خوه عليه قاله..
/خلاص تقبل وانسى البنت مش نصيبك..
نضال بحده ودموعه ع طرف عيونه..
/ساهل عليك انت..اني نحبها بجديات نبيها من قلبي ومانبيش غيرها..
شافله عمر وقال:وبعدين..
نضال:انزل..
عمر؛لا..
نضال؛مالا اسكت مانبيش نسمع صوتك..
عمر هز راسه وقال..
/حاضر..حاضر..
شغل نضال سيارته وتحرك وقلبه موجوع موجوع ع الآخر....
🍃🍃🍃🍃🍃🍃
في نفس الوقت..
خشت سيارة رضا للعمارة..
هو وصابرين شافوا واحد طالع من الباب الدخلاني للعماره..
واحد يعرفه رضا..بس صابرين شافاته قبل واحد ضخم الجثه منظره مخيف ولابس لبس عسكري..
صابرين وهي عاقده حواجبها بخوف..
/هذا شايفاته قبل منظره يخوف هلبه..
رضا قعد معاه بعيونه لين درس السياره بعدين قال..
/ماتخافيش..
صابرين شافتله من المرايه لقاته يشوفلها..
قاللها..انزلي..
هزت راسها وفتحت الباب ونزلت..وهو نزل بعدها..
سكروا بيبان السياره..
وهو مشي بيخش وهي وراه..
🍃🍃🍃
في مكتب مختار في الشقه..
كان مقعمز يشوف لورقه في يده..كان مبعدها شويه ويقرا فيها بعيونه وهو مبتسم بتكبر وحواجبه مرفوعات..
ع خشة رضا دق الباب بش ينبهه..
مختار:تعرف انت توا نبيك تطلب وتتمنى شن ماتبي نعطيك..التفت وشافله وهو يقول..شن ماتبي..
رضا ابتسم وقال..
/خديتها..
مختار بضحكه:Yes..
وناضله ومشاله وهو فاتح حضنه ويضحك..
ورضا جاه وهو مبتسم وضموا بعض..
مختار ضمه بقوة ودمعوا عيونه وهو يقول .
/تعرف مرات نحسك ولدي..نقول رضا مستعد يفديني بروحه..
رضا بدت ع وجهه ملامح الحزن ضم مختار بقوة اكبر..
باس مختار رضا ع راسه بعدين بعده وشد وجهه وهويقول..
/نشكر قدري اللي حطك في طريقي..نتوقع الخذلان من كل الناس في حياتي الا زوز..انت وفاتن..
رضا؛وحنقعد ديما عند حسن ظنك..
ضرب ع خدوده بضربات خفيفه بعدين حط ايديه في جيوبه وقال..ماخاطرك في شي؟
رضا حرك راسه بالنفي وهو مبتسم..
تنهد مختار وهز راسه بعدين قال..
/تقدر تمشي..
هز رضا راسه وطلع من عند مختار وهو مخنوق..
ومختار تنهد بعدين رجع قعمز ورا المكتب..
🍃في دار صابرين..
طلعت من الحمام وهي تمسح في وجهها بالفوطه..
كانت لابسه بيجامه شتويه لونها موف..شاف لباب الفيرندا بانت عليها السحاب مثقله قالت بضحكه..
/هيا صبي عاد..
فجأه سمعت صوت نغمة رساله واتساب..
مشت طول للزيانه خداته وفتحت الرساله اللي كانت جايه من رضا..
(نحبك)
ابتسمت من قلبها وخدودها احمروا خجلا..
🍃🍃🍃🍃🍃
الساعه 5:30عصرا..
وقت افتتاح محل حلويات جنة..
تشاركوا فيه نساوين عيلة الواعر..
مطيره..وفردوس..وغرفه..وآلاء..وطوبى..
وحسين دعمهم بمبلغ داروا بيه ديكور المحل..
المشروع هدا بيشغلوا فيه مجموعه من بنات الشارع منهم حنان اللي كانت حاضرة بحماس في حفلة الافتتاح..
ولأن المشروع نسائي حضروا افتتاحه نساء بس..
من الشارع والاصدقاء...
🌼في المحل...
سميرة؛الله يبارك الله يبارك..لولا العيب راني طلقتها زغروطة لكن ماتقعدش في خاطري..وحركت لسانها بدون صوت..
قعدوا يضحكوا..
نبيله بإبتسامه:ديكور المحل مبهج يفتح النفس زي الحلويات..
غرفه:ذوق مرت خوك يابلبله..
نبيله؛لاذوقك مافيشي شك مادامك مرت خوي..
مطيره؛الحاجه الوحيده اللي كانت عندها ذوق فيها.
غرفه قلبت عيونها..
وهما يضحكوا عليها..
🌼بعيد عنهم شويه كانت طوبى تدهور بجنه في كروستها وسط المحل وهي توصف فيه..
/هادي صفة الشرقيات عمتو مطيره فالحه فيهم هلبه وزوز من بنات جيرانا كانوا يخدموا فيهم قبل..
جنه قعدت تناغي وتطلع في اصوات وكأنها تتكلم..
طوبى:ايه مالا شنو امك فالحه في الحلو حتى هي،ندير في هلبه حاجات والفتره الاخيره تعلمت ندير سيبانون اللي ياكله يهبل عليه..
جنه قعدت تناغي بعدين بانت ضحكه ع وجهها..
طوبى بضحكه؛ايه ياروح ماما امك فالحة الفالحات..بعدين طلعت لسانها وغمزت..
وجنه تشوفلها والضحكه ع وجهها..
"الحيط هدا علاش فاضي؟"
التفتت للي سألت هالسؤال من بنات الجيران..
ردت الاء وقالت..
/هدا ياحنه للوحه بيكتبها جنتل الشارع..
وحده منهم قالت بضحكه..
/التارقي؟!
طوبى شافت لحنان لقتها تشوف للبنات بغيره..
آلاء:وهو في غيره..
:والله من ناحية جنتل جنتل..وشخصيته تقتل..
رفعت حنان حاجبها..
وطوبى وهي تشوفلها شدت ضحكتها..
الاء؛سامحوني فيها لكن انتم خايبات معقوله مافيش وحده جاباته للطريق..
؛كانك عليا اني نتمنى بس العنصريه مصيبه ياوخيتي..
:والله حق..وهما ناس يمشوا ع الفلوس مشي..
حنان:والله ولايهموا فلوسه ولااصله..هو راجل مافيش زيه ينشرى بالذهب..
البنات كلهم قعدوا يشوفولها بتعجب..
وطوبى مبتسمه بس..
وحده فيهم قالت..
/شن في حنونه!؟
حنان بحده؛مافي شي لكن كلامكم مستفز وبعدين انتي عاطيين فيك كلمه كيف تدوي ع راجل هكي!
الاء:ماقالت شي هي..
ع جية اميمه وهي تاكل في غريبة حلقوم قعدت تسمع..
طوبى:خلاص يابنات خيركم الوضع هدا مش صحيح مايمشيش معانا..
سكتوا وكل وحده فيهم كان باين عليها ملامح العصبيه..
طوبى:صلوا على النبي وبروا شوفوا الناس وسوقوا مليح..
هزوا روسهم وكل وحده مشت تشوف شغلها..
الاء:اللي اسمها حنان تكسر الرقبه والله ماهو مدورها ولامعدل عليها..ماتمشيش معاه بكل..
اميمه:منو؟
طوبى بضحكه؛التارقي..
اميمه رمشت عيونها ببطء وهي تشوف لطوبى بعدين هزت راسها بصمت وقعدت تمسح في ايديها بالكلينكس..
🍃في هالوقت التارقي كان جاي للمحل باللوحه مغلفه في يده..
وقف ع حسين والحاج علي و عبد الرؤوف اللي كانوا مقعمزين في جهة مستخطيه بعيده عن باب المحل شويه..
عبد القيوم بإبتسامه؛السلام عليكم.
ردوا عليه السلام..
هو قدم اللوحه وقال..
/اسف تاخرت فيها..
ناض حسين وقال..
/ولايهمك المهم وصلت..
وخدي اللوحه ومشي بيها للباب وعطي بالظهر ونادى..
/عمتي..
طلعت مطيره وهي تقول..
/نعم..
حسين؛ديريلي طريق بنخش نعلقها..
مطيره:عبدو جابها..شافت عبد القيوم ابتسمت وقالت..تعالى عبدو تعالى ولدي..
ابتسم ومشالها..
☘وداخل في المحل البنات كانوا مركزين بسمعهم بالذات حنان..
"سامحوني عطلت عليكم فيها"
"عادي ولدي المهم وصلت في وقتها..وبعدين ساد خدمتها بلاش"
"من جدك ياعمتي! نخدمكم بعيوني"
اميمه وهي تسمع فيه كانت تشوف لطوبى اللي لاهيه مع وحده من ضيوف الافتتاح..
"ربي يحفظك وليدي..مالاخل نذوقوك حويجه "
وتاخد حنان حافظه جاهزة فيها حلويات لأكثر من النوع وتطلع..
وخلت البنات مع الاء واميمه مصدومات فيها..
بس صدمه مطيره وحسين كانت اكبر..
هي بإبتسامه قالت؛تفضل..
هو وعيونه بعاد عنها مد يده وخداها منها وقال..
/مشكورة واجد ياعمتي وان شاء الله يكون يعوضكم عن اللي راح..
مطيره بإبتسامه:يارب..
حسين وهو يشوف من فوق لتحت لحنان اللي قاعده واقفه وبتاكل التارقي بعيونها قال لعمته..
/شوفيلي الطريق عمتي..
مطيره؛هيا هي..لفت وهي تقول..هيا حنان..
استاقظت حنان ومشت مع مطيره...
شاف حسين للتارقي وقال..
/شنو يا..
عبد القيوم حرك راسه تساؤلا..
"شنو!؟"
حسين اشر بحواجبه ع الحاغظه؛الحلويات..!
عقد التارقي حواجبه وقال..
/اها ماعنديش عليهن لكن ماقدرتش نردهن ع عمتك..
حسين هز راسه وهو شاد ضحكته..
عبد القيوم في نفسه..
"هذى شن فهم!!؟"
ع طلعة مطيرة:تعالى حسين..
رفع حسين اللوحه ومشي..
وعبد القيوم بعد ماكان بعيونه معاه غير نظره عنه للفراغ وهو يفكر في رأيي طوبى في اللوحه بعد تشوفها..
غمض عيونه بعدين فتحهم وقال همسا..
/استغفر الله..شاف جهة الرجاله شويه بعدين مشالهم..
🍃وداخل المحل بعد ماحسين علق اللوحه وطلع..
قدموا القدام بش يشوفوها...
بدت ع وجوه الجميع ملامح الاعجاب..
وطوبى قعدت تتمعن فيها..حست بالتفاؤل قاعد يكبر في داخلها...
اميمه وهي تقرا في اللوحه بإبتسامه....
/الله يحلي ايامكم...بعدين شافت لطوبى بنظرة فيها تفاؤل وفرح ع خاطرها...
🍃🍃🍃🍃🍃🍃🍃🍃
وبعيد عنهم...في بلاد بعيده...
كانت بعيونها الجميله تتأمل في الطبيعه وهي تسمع في اصوات العصافير..
غمضت عيونها وجي قدامها جنانهم..
هي طالعه تسقي في الغرس..
وطوبى مقعمزة ع الطاوله الخشبية تقرا لإمتحانات الشهاده الثانويه..
🌿سدرة:معاش تضغطي ع روحك مش باهي لصحتك راهو..
طوبى بتوتر:غصب عني مش قادره مانخافش امتحانات شهاده هادم..
سدرة:عادي زيهم زي كل الامتحانات مش مستاهل الهيلوله اللي دايرينها عليه..
سكتوا فجأه..لما سمعوا اصوات سيارات اسعاف..
طوبى بخوف:هدا شنو!؟
سدرة بقلق؛قريب هلبه
طلت عليهم مطيره من فوق السطوح وهي تقول بخوف..
/سيارة اسعاف جايه لحوش شنيبه
سدرة بفجعه؛مهدي!..
طلقت طوبو الميةومشت تجري لدار الدروج..
وطوبى سيبت قرايتها ومشت بسرعه لحقتها
🌿فتحت سدرة عيونها لما سمعت صوت تعرفه كويس ناداها..
"سدرة"
نزلوا دموعها وشافت جنبها..
بانت من عيونها نظرات المفاجأه
نسرين قعمزت ع رووس صوابعها جنبها وهي تشوفلها بشوق والم ودموعها ينهمروا انهمار..
/سديره حبيبتي..
وجهينة واقفه ورا نسرين تراقب في ردات فعل سدره..
كانت سدرة تشوف لنسرين بنظرات حب ودموعها ينزلوا ورا بعض..
نسرين وقفت وضمتها بقوة وقعدت تبكي..
بان ع وجه سدره ملامح الخوف الفجأه..
وجهينه بإستغراب قعدت تراقب في ردة الفعل هادي..
نسرين ببكي..
/الله قداش استاحشتك..استاحشت كل شي فيك..استاحشت ايامنا..استاحشت صغرنا..استاحشت كل شي حلو عشناه زمان ياريت اعمارنا وقفت وحني في الثانوي ياريت ماكبرنا ياريت..
وسدره تسمع فيها بحزن ودموعها زي السيل..
تباعدت نسرين وقعدت شاده في سدره..باست ع راسها ورجعت تشوف لعيونها..
عيون سدرة يسألوا بلهفه ع حد..نسرين مستحيل توه عن هالنظرة ولاعن هاللهفه ولاالسؤال اللي فيهم
نسرين بإبتسامه الم:فهمتك..طلقتها وجت وراها..حاوطتها واشرت بصبعها ع مكان معين وقالت..
/شوفي غادي...
وتمد سدرة نظرها لوين مااشرتلها نسرين..
ومن ورا اغصان شجرة صغيره تشوفه واقف...
كان لابس بالطو اسود ع فانيله صوف رقبتها طويله لونها ازرق غامق وسروال جينز بنفس اللون..
كان مهندم ع الاخر وانيق كان مجهز نفسه للقائها وكأنه عريس..
من اول ماجابتهم جهينه لمكانها وطاحوا عيونه عليها حس وكأنه قلبه دق اخر دقه...
ماصدق تباعدوا عنه الدكتورة واخته بش اطلق سراح دموع عيونه اللي يشوفولها وهما مش مصدقين..
صح مش بنفس جمالها ونضارتها المعروفات الغيبوبه والمرض داروا فيها اثر كبير..
بس تقعد في عيونه اجمل نساء الدنيا..لاتجي قبلها ولاحتكون في بعدها مراة فقلبه...
..لما شاف كيف كان لقائها بنسرين تأثر هلبه واتألم ع حالها اللي مش قادره تتكلم وتتفاعل معاها بالحركه..بس في نفس الوقت حمد ربي اللي نجاها وردها للحياة مرة تانيه..
لكن وين اشرت عليه نسرين..ويجوا عيونها في عيونه..
كان يبي يمشيلها وياخدها لقلبه يحطها فيه ويسكر عليها عارف حيداويها وداويه..هما لبعض الدي..والدوا...
جهينه وهي تراقب في سدره..لاحظت تفاعلها هالمرة كان قوي هلبه..تعابير وجهها كانت قويه..
بس اللي ادهشها اكثر..هو حركت يد سدره اليمين رفعتها شويه فوق يد الكرسي وكأنها تأشرله يجيها..
جهينه؛ترا قوليله يجي..
نسرين طول نفدت..شافت لخوها واشرتله بيدها يجي..
وهو ماصدق..
طول مشالها بلهفته وشوقه ومااهتمش لدموعه اللي قاعدين ينزلوا...
وهي وين يقرب عليها كانت تبان مركزه ع كل شي فيه وكأنها تبي تطمن..
وصل فيها..قعمز قدامها ع روس صوابعه وقال بنبرة كلها حب..
"سدرة المنتهى"
هي غمضت عيونها بشي من الشده وقعدت تبكي بالصوت..
جهينه ماخافتش فرحت هلبه..حست ان اللي قاعد يصير فيها من الفرح مش الحزن وحفزها تحفيز كبير..
في هالوقت..
كانت جايه صفيه اللي حطها يوسف في المركز وولى لعمله..
تفاجئت ع الاخر وين شافت نسرين والمهدي..
قربت منهم وقعدت تشوف للمهدي كيف مقعمز قدامها وكيف سدره تبكي بألم بس هالمرة وكأنها متفاعله بقوة اكثر..
المهدي بصوت يدوب طالع..
/حبيبتي..
نسرين مسحت دموعها وهي تشوفله بإبتسامه..
وجهينه كانت متأثره هلبه..
فتحت سدره عيونها وهي تشوفله..قعدت تتنقل بنظراتها في ملامح وجهه...
☘جي بين عيونها الذكري اللي خطرت عليها قبل شويه وكانت اخر حاجه تتفكرها منها..هي حالة المهدي وهما مطلعينه ع باريلا من حوش اهله لسيارة الاسعاف وامه ومرته وخواته طالعات وراه وهما يعيطوا...☘
هي للحظه حست روحها تحلم..وكأن اللي قدامها خيال..
كانت تبي تتأكد..وقلبها متمني ان اللي تشوف فيه قدامها يكون حقيقة ملموسه مش خيال...
وتفاجئ كل اللي حواليها..وترفع يدها اليسار وتقربها منه..
جهينه وصفيه كانوا مذهولات..
سدرة مازال قاعده في مراحل العلاج الاولى التطور هدا سريع جدا لوحده في حالتها..
نسرين قعدت تضحك بفرح ودموعها مازال تنزل..
اما هو وين شاف ردة فعلها القويه الفرحه ملكاته..هو مازال زي ماهو عندها..مهديها اللي يجري في دمها..
رفع يده وشد يدها ...
انوجع قلبه كانت يدها هزيله وضعيفه وكأنها يد طفله رضيعه..
بس برغم هدا كله يامهدي لما حست بيك وتأكدت انك حقيقه وواقع ومش وهم او تخيلات..بقوة جايه من وسط قلبها المتيم بيك خلتها تشد ع يدك وان كانت شده يدها مش قويه لكن حاولت .
وجهينه كانت مندهشه ع منسجمه ع متأثره..اللي تشوف فيه حرك مشاعرها بقوة...
لكن سدرة كانت مصرة تذهلهم جميعا اليوم...
بعد ماشدت ع يده قعدت تشوف لعيونه بنظرات كلها حب وخوف وفرح في نفس الوقت..
ويتحركوا شفايفها بعد ماضمتهم شويه وطلع منها صوت رهيف يقول...
"مهدي"
ملامح الدهشه الشديده بانت ع وجوه جهينه ونسرين وصفيه..
بس المهدي اللي طيرت الفرحه قلبه من مكانه قعد يضحك..
يضحك ودموعه ينزلوا...
وهي تشوفله بإبتسامه ونظرات كلها حب وحنان..
بس بعض لحظات تلاشت ابتسامة سدرة..وفكت يدها من يده..
هو استغرب اللي صار..فك يدها وهو يراقب في ملامح وجهها..
شاف ملامح الضيق بانت عليهم وهربت بنظرها عنه...
شافت صفيه...وكأنها كانت تستنجد بيها..وصفيه فهمت طول..
مشتلها وهي تقول بحده؛ترا شويه..
تباعدت نسرين وهي تشوف لسدرة كيف هربت بنظرها عن المهدي..
وصفيه وقفت ورا كرسيها وقعدت دف بيها..
وقف المهدي ع حيلة وهو يتبع فيها بعيونه الحزينه اللي باين فيهم الالم لين ادرقوا هي وصفيه..
جهينه:لوسمحت...
ماانتبهش لوجودها من اساسه..
نسرين شدت ذراع خوها وقالت..
/مهدي..
استاقظ وشاف لأخته وقال..
/خيرها!؟
جهينه:معليشي تجوا معاي عندي حاجات نبي نستفسر عنها..
هو شافلها شويه بعدين هز راسه بالموافقه..
جهينه:تمام تعالوا معاي..
ومشت وهما معاها..
او المهدي معاها جسد بس اما الروح والقلب والعقل راحو مع الياسمينه...
#انتقام
#طوبى
....يتبع....
