#طوبى "جنة طوبى"
#جمان_فريد
#الجزء_105"كانون الأول/دموع الورد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩) 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 قيل فى الغيره
ستلهث كأنك تتسلق جبلا وانت فى مجلسك متكئا🍃
_______________________________________
الساعه 8:30صباحا..
مقعمز في الكوجينه يشرب في القهوة ويسمع في الراديو الاذاعه اللي حاط عليها كانت تبث في اخبار عن الحرب
هو يسمع بأسف وضيق وزاد تعكر مزاجه..
حط الفنجان..وخدي تليفونه فتح النت وخش ع الفيس بش يشوف اخبار تانيه عن الحرب..
لكن مجرد مافتح النت جوه رسايل ع الماسنجر..
خش شافهم..لقي وحده من صفيه بنت عمته ووحده من سامي..
سامي كان باعتله فيديو الفاتحه زي عادته لما يصور فيديوهات يبعت لكل اصدقائه..
هو ماشافش رساله سامي لإنه عارف محتواها خش طول ع رسالة صفيه..
لقاها باعته سكرين "لقطة شاشه"..
فتحها وشاف شي خلاه يعقد حواجبه بعدم رضا..
طلع منها ومشي طول للفيس وخش ع الاشعارات..
دور ع اشعار تعليق سلافه لين لقاه خشله طول..
قري ابيات الشعر لعند ماوصل للنهايه..
مط شفايفه داخل بعدين ع جنب ورخاهم..
وحذف التعليق...
🍃🍃🍃
في هالوقت سلافه كانت في كوجينة الشقه اللي قاعدين فيها تشوف في حوافظ الحلو اللي دايرتهم امها وهي تفكر..
خشت عليها لبانه وهي مجهزه نفسها بش بيطلعوا لخدمتهم..
لبانه:يللا سوفي..
التفتت لأختها بعدين قال..
/روحي جايه وراكي..
شافتلها اختها شويه بعدين قالت..
/ok..
ومشت طلعت من حداها..
اما هي بعد مامررت نظرها ع الحوافظ قربت لمتاع المعمول خدتها وطلعت..
🍃🍃🍃
طلعت من العمارة للسيارة..
فتحتها وركبت واختها تشوف لحافظه المعمول بعدين قالت..
/سلافه رح تسمني ويجيكي السكري..
ضحكت وقالت..
/مو إلي بدي ذوقن يعني دعايه لشغل ماما مشان يمشي مشروعها..
فجأه يجيها اتصال..
فتحت شنطتها وطلعت التليفون لما شافت المتصل ابتسمت بعدين ردت..
/صباح الخير..
"صباح الخير..اسف كلمتك في وقت مش مناسب بس لأمر مهم شويه"
سلافه؛خير إن شاء الله!.
"سلافه انا ضفتك ضمن الاصدقاء لأسباب معينه منهم شغلنا في الجمعيه ونبهتك قبل اني مانبيش تعليقات لأن اللي عندي اغلبهم شباب مش حلو يشوفوا تعليقك..مرات يتأول لحاجات اخرى وممكن انتي تتعرضي لمضايقات"
هي قالت بإبتسامه..
/معك حق..بس انت بتعرف انو صرلي فترة مهتمه بالشعر الشعبي الليبي واشتغلت ع كتابه ابيات لناس بخط ايدي المهم اني شفت هالابيات وحفظتا عندي ولما شفت اللي نزلتن انت مبارح حسيت انهم بيشبهوا بعض في المعني علقت فيهن وبس..هي هي كل القصه..
"فاهم عليك وعارف قصدك بس كيف ماقتلك عندنا هنا الناس ماتاخدش تصرفات كيف هذي بحسن نيه لازم يفسروهن تفسيرات مش تمام..لهدا جنبي نفسك وجنبيني وجع الراس..تمام"
في نفسها قالت..
"ووجع قلبي كيف بدي اتجنبوا!؟"..ابتسمت بحزن وقالت..تمام رح احذف التعليق..
"انا حذفته.."
ضحكت وقالت..
/منيح..
"تمام مانعطلش عليك واسف ع الازعاج مرة تانيه..سلام"
نزلت تليفونها بعد مانهي المكالمه..ضحكت وحطت التليفون ع التابلو وشغلت السيارة..
لبانه؛شو في !!؟
سلافه بإبتسامه..
/ولا شي..وتحركت بالسيارة ونظرات اختها المستاءة عليها...
🍃🍃🍃🍃🍃
"صباح الخيرات عبدو فلافل"
عبد القيوم بإمتعاض..
/بالله ياراجل معاش تخفف دمك معاش تحاول..
ضحك وقاله..
"غير رد الصباح باهي"
عبد القيوم:صباح الخير..صفيه يالاك؟!
"اها دير في الفطور وقارنتهن متعقده منك علشان صاحبتها"
ابتسم وقال..
/افتح المايك افتح..
"ارجى شويه..فتحته"
عبد القيوم: تيفاوت نالخير
"اين صباح خير خليت فيه خير انت وحركاتك الغبيه"
هو شد ضحكته وقال..
/ انهيغام..تنميرت.."شكرا..منورة"
"فصلت ياعبادي"
عبد القيوم:ليش مش عارف..
"ماتزيد تريقها ليا ببرادتك..عبد القيوم خلينا نحكوا جد من الاخر انت شن تبي معاش فهمتك"
عقد حواجبه وقال بعصبيه
/كنكم انتم خير دعوتكم اللي هذى يسأل فيا هالسؤال التافه بعدين انتي تسألي سؤال كيف هذى انتي!!؟انا متربي معاك ومربيك اخرى توا طلعتي ماتعرفيني وتشككي في اخلاقي!؟..
"اهدا ياغالي مش قصدها غير هي حساسه شويه ف اي شي يخص صاحبتها
عبد القيوم انا اسفه..لكن ياخيي انت قبل قتلي انها مياله ليك وانا في كل منشور تنزله نشارك فيه بش هي تشوفه لو حق المراة يهمها امرك اكيد وين تشوف تعليق امس حتفهم غلط وتصرف نظر"
عبد القيوم بضيق..
/التعليق عادي جدا ياصفيه وعفوي ومع هذا انا حذفته بكل..
"عبدو نقولك حاجه"
مسح ع لحيته وقال..
/قولي..
"مذكر اخر مرة عدينا فيها لطرابلس مع خالتي سالمين"
عقد حواجبه بتوتر وقال..
/ايه كملي!؟
"خالتي سالمين قالت شافاتك في مصر في مطعم ومعاك البنيه السوريه"
رفع حواجبه وقلبه بدي يدق بقوة من التوتر..
"الدوة هذي صارت قدام الكل بدون استثناء ..قالت ان في بينكم حاجه"
هو بصدمه؛كيف!؟!
"اللي سمعته..انا ماقتلكش وقتها بش ماتصيرش مشاكل وفي نفس الوقت كنت شاكه فيك قلت مرات يفكر يصرف نظر"
هو بإنفعال..
/تمام ياصفيه تمام..كفيتي ووفيتي..
وفصل المكالمه..
🍃نزل راجلها التليفون وقال..
/مالا كان يعرف الكلام اللي قالاته عمتي شن يدير!؟
صفيه بضيق؛الله يسامحهم وخلاص..هاه شفت وسمعت يامعمر الراجل يحبها وراغبها من قلبه لاهمه ظروفها ولاغيره..
معمر؛مازلت عند رأيي يفوتها احسنله مش له ومش حيرتاح معاها..
تأففت والفتت تكمل تجهيز الفطور..
🍃🍃🍃
وهو بعد نهي المكالمه قعد يفور ويغلي من الغضب..
ويتسائل في نفسه علاش كل اللي حواليه مايبوش اجتماعهم!؟ علاش كل ماتتحول عقبه واقفه بينه وبينها تجي في مكانها عقبة اكبر منها!؟
مايبيش يستسلم لفكرة انها مش نصيبه..مايبيش يسلم لفكرة ان مافيهمش خيرة لبعض..
لو هكي فعلا علاش انكتب عليه في قدره انه يشوفها ويحبها ويولي قريب عليها بشكل هو ماتوقعاش!!؟
مش من فراغ..اللي صار كله لليوم ماصارش من فراغ..
بغض النظر عن اي شي..هو يحبها حب كبير حب ملكه لدرجة مش متخيل فيها يعيش بعيد عنها حتى لو مايشوفش فيها كل يوم المهم انها موجوده في نفس المكان اللي هو فيه..
كان ماولتش من نصيبه حتما حيموت بحسرته في اللحظه الف مرة...
ناض من مكانه خدي القيلا ومشي للروشن بش يفتحه وياخد نفس..خنقاته الافكار السودا..
وصل فيه..حول الستار..وفتحه..ويجوا عيونه عليها..شمس حياته اللي وين تشرق عليه ترتد فيه الروح..
كانت طالعه من دار الخزين بكراسة الرسم متاعها..بحجابها ولافه علي كتافها شال لونه رمادي..
تبعها بعيونه لين وصلت في الدروج وبدت تنزل..ودرقت عنه..
بلع ريقه وتباعد عن الروشن بعدين لف ومشي لداره وهو مضايق ع الآخر..
🍃🍃🍃
وصلت طوبى لوطا وتوجهت للباب الدخلاني..
سمعت دق ع الباب الخارجي وقفت وهي تشوفله..بعدين مشتله..
وصلت فيه..وقفت وراه وقالت..
/مني!؟
"اني حوا"..
فتحت الباب وقعدت وراه..خشت حواء شافتها وقالت..
/صباح الخير..
سكرت طوبى الباب وقالت..
/صباح الورد..شن جو..
حواء بإبتسامه..
/الحمد لله..مبارك ع مطيره واميمه..
طوبى بإبتسامه..
/الله يبارك فيك وعقبالك..
ضحكت وقالت..
/جيت توا بش نقولك شن قررت..
طوبى هزت راسها وقالت..
/تفضلي..
☘مشوا مع يعض خشوا للحوش..
دخلتها للصاله وقعمزوا مع بعض..
حواء؛جنه وين؟!
طوبى؛تلعب بألعابها حدا سدرة..
حواء:سلمها..شن كانت الاجواء امس..
طوبى:الحمد لله جت حفله قنينه..
حواء؛باهي الحمد لله ربي يهني مطيره ويتمم لأميمه ع خير..
طوبى:اللهم آمين..سقدتي الصغار للمدرسه..
حواء؛ايه وخليت الصغير راقد..
طوبى:باهي قوليلي شن قررتي بعد اسبوع من التفكير؟
تنهدت وقالت..
/قلبتها في راسي هلبه وفكرت في وضعي من جميع النواحي ولقيت اني لازم ندير حل لروحي مش حنقعد ديما هكي..الصراحه اني قبلها كنت ندعي لربي في قيام الليل يديرلي طريق اني والصغار ولما جي الموضوع هدا حسيته استجاب لدعائي..
طوبى؛يعني موافقه؟
حواء:قبول مبدئي زي مايقولوا بعد ماندير المقابله ونتكلم معاه نقرر القرار النهائي..
طوبى:تمام..واني قلت لمرت خوي تقول لخوي يسألك عليه وان شاء الله خير..نبيك تحطي في بالك حاجه وحده بس ياحوا سوا صار ولا ماصارش مش مخليينك وحنقعدوا ديما معاك..ولو صار نصيب لازم يعرف انك مش مقطوعه وفي وراك عيلة مكانك بيناتنا يقعد محفوظ صار ماصار تعالي طول..
نزلوا دموع حواء وهي تقول..
/تعرفي بعد اللي صار فيا فكرت ان ربي نساني وخلاني بروحي اني والصغار لكن بعدين عرفت ان ولا مرة خلاني وسخرك ليا انتي اللي لقيت فيك حن ورحمه ع صغاري اكثر من اهلهم..تصدقي ياطوبى..تصدقي اتصلت بعمتهم بش نجس نبضهم نبي نعرف شن يديروا لو سمعوا بيا تزوجت..تعرفي شن قالتلي..قالتلي مادخلناش بيك ..باهي مش حتاخدوا مني الصغار!؟ اني كنت خايفه ياخدوا مني البنات..تعرفي شن قالتلي..قالتلي مادخلناش بيهم هونا بوهم كان بياخدهم ياخد..
طوبى بألم؛باهي قالوله زعمه؟
مسحت دموعها وقالت بإبتسامه أسف..
/ايه..قال مالياش بيهم علاقه..
نزلت طوبى عيونها وهي متألمه ع الآخر مش مصدقه ان في اب يهونوا عليه صغاره يتخلى عنهم هكي ع خاطر مراة..يسيب صغاره وينساهم ويربي صغارغيره..
حواء:الحق مااستغربتش توقعت..الله اعلم شن دارت فيه هديكا بش خلاته هكي..لكن لما نشوف حال ماليه نتأكد انهم كلهم هكي غير ماكانش باين عليهم ولا اني لأني درويشه ماكنتش فاهمتهم..
رفعت طوبى عيونها فيها وقالت..
/ربي يعوضك انتي وصغارك خير..
حواء بإبتسامه؛آمين...
🍃🍃🍃🍃🍃🍃
"من وين جابهم صورك!؟"
راما ببكي:من غيرها الحقيرة اسما..
صاحبتها وهي تفكر قالت..
/ماظنش..اسما تغيرت هلبه ياراما لما كلمت اختها اخر مرة قالت استشيخت وبدت تصلي ومعاش تطلع من الحوش بكل..
راما بخوف:باهي من وين جابهم قوليلي اني كنت نبعتلها هي بس..
رفعت صاحبتها حاجبها وقالت..
/شكله خانبهم منها..
راما بتفكير:ايه مرات هكي صح!..بنبرة باكيه وخوف كملت تقول..باهي كيف ندير توا قوليلي نقتل روحي ونرتاح!
قالتلها:غير راجي شويه..عطيه موعد باهي مثلا يوم الخميس قوليله ع مكان معين تتلاقوا فيه نرفعوك اني واختي ونروحوا بيك..
بنفاذ صبر قالت..
/قتلك مانقدرش نطلع مانقدرش..
:ياغبيه اني قصدي وقت المدرسه..انتي مش خايفه من بنت عمك تزبطك!؟ حني من توا للخميس ندبروا حل للقصة هادي..
راما ببكي:لكن هو قالي اليوم..
:اعطيني رقمه اني نتفاهم معاه بعدين في الاستراحه..
مسحت راما دموعها وقالت..
/باهي طلعي تليفونك...
🍃🍃🍃
وامها طلعت من الحمام بولدها بعد مادارتله دوش وطلقاته يجري للتلفزيون..
كيف جت بتخش لدارها رن جرس الشقه..
استغربت ليها اسبوع مادورها حد مني خطرت عليه وجاها توا!؟..
مشت للباب..وصلت فيه وقالت..
/مني!؟
"امك افتحي"
تأففت بضيق بعدين فتحت الباب..
خشت مغليه وهي تقول..
/كيف حالك اليوم..
سكرت الباب وسلمت ع امها بالخد وهي تقول..
/الحمد لله..كيف حالك انتي يام..
مغليه:الحمد لله..
خديجه:خشي يام خشي..
مشت مغليه خشت وهي تقول لبنتها..
/بتحكيلي كل شي مانعرفكش درقي عليا شي ياخديجه والله مانسامحك..
تنهدت بعدين قالت..
/حاضر..راجيني ندير فطور مافطرتش لتوا..ولفت ومشت وهي مستاءة وامها معاها بنظراتها القلقه..غيرتهم عنها وشافت لتيم ابتسمت وقالت..تيومه..
🍃فهالوقت..
خشت نجاة بمعاذ لحوش شبابينها ولدها مشي يجري وهو ينادي في سميرة..بدت ع وجهها ملامح الازدراء..
طلعت سميرة من الصاله وهي تقول..
/مودي حبيبي..جاها يجري طبست عليه رفعاته وولت خشت للصاله وهي متجاهله نجاه..
بدت ع وجه نجاه ملامح الامتعاض..لحقتها ووقفت في الباب وهي تسأل..
/عمتي في دارها؟!
سميره وهي تعطي لمعاذ في العابه..
/طلعت..
نجاة:وين!؟
سميرة:لما تروح انشديها..
مررت نجاة نظراتها الحاده عليها من فوق لتحت بعدين مشت للكوجينه بش دير ماتاكل..
وين وصلت في الدروج وقفت..رفعت عيونها لأعلى الدروج وهي تفكر بعدين ركبت فوق..
🍃وصلت الدور التاني ومشت للجناح..وقفت ع بابه لقت المفتاح فيه..حطت يدها ولفاته..وينزلوا ايديها ع كتافها وهو يقول..
"شديتك"
جمدت في مكانها من الخوف التفتت وقالت..
/نحسابك طلعت!
رفع حاجبه وقال..
/قلتي نستغل الفرصه..
تصنعت القوة وقالت..
/اني نبي نفهم انت علاش معاش تخلي فيا نخشله!؟
الجالي:مش انتي بس العيله كلها..الجناح هدا مكاني الخاص معاش نبي حد يخشله غيري..حط يده ع المفتاح لفه اكثر من لفة وحطه في جيب بنطلونه وهو يقول..
/قدامي..
تنفست بعصبيه ومشت وهو وراها يحرك في راسه يمين ويسار..
🍃🍃🍃🍃
"عينه من شغل ماما بمشروعها الجديد"
مدت ابله شروق يدها للحافظه وخدت طرف وهي تقول..
/ان شاء الله ناجح..وكلت شويه وهي تذوق..ابتسمت وقالت..الله يبارك يذوب في الفم ذوبان..
سلافه بإبتسامه..
/صحتين وهنا..انا وماما شاطرين كتير بالمعمول..
شروق:باين الله يبارك..
سلافه؛تسلمي..مررت نظرها القدام وقالت..
/صاحبة المدرسه مااجت اليوم!؟
شروق؛هي ماتجيش الا للضروة ولا بش دير طله بين فترة وفترة..
سلافه:اها..ضيقت عيونها وقالت..بس كأنه صغيره كتير ع انه يكون في عندا مدرسه!..
شروق:لا المدرسه مش ليها لأختها..اختها تعرضت لحادث السنه اللي فات خشت بسببه غيبوبه قعدت فيها 9شهور هي لفترة بعد حادث اختها شدت المدرسه لكن ماطولتش..صارت مشكله وتسكرت..
سلافه:امم..طيب هي شو وضعها مزوجة ولالا!؟
شروق بأسف:مطلقه..
سلافه بدهشه؛مطلقه!
شروق:ايه..
سلافه:بالظاهر تزوجت وهي صغيره كتير!
شروق:تقريبا كان عمرها 20عام..لكن طاحت طيحة ماتوديها لعدوك طليقها ياما دار فيها وفي من قال كان يضرب فيها ضرب موت..في النهايه اطلقت منه صح لكن قعدت مربوطه فيه ببنتها..
سلافه فاجئها هلبه اللي تسمع فيه خطر ع بالها سؤال تاني وطول قالاته..
/قديش صارلها مطلقه!؟
شروق:والله مانجيبلك المدة بالزبط بالك عام !
.☘عام!!..هي توا ليها عام متعرفه ع عبد القيوم وقبل عام في ورشة الخط اللي كانت في مصر كتب اسم "طوبى"
انصدمت بنتيجه اللي وصلتلها بعد تفكير..
معقوله يكون حبها من قبل ماتطلق!؟
مابتش تصدق هالنتيجه ولا تقتنع بيها..عبد القيوم اللي تعرفه من لما عرفاته مايملاش في عيونه من النظر ليها مستحيل يحط عينه ع المراة متزوجه..قالت في نفسها اكيد في شي تاني...في تفسير مقنع يتناسب مع شخص التارقي اللي عرفاته كويس فهالعام...☘
استاقظت من سرحانها ع سؤال شروق..
/امك عندها مكان بتبيع فيه ولابتبيع من الحوش؟!
سلافه:لو في محل بيكون احسن بس يعني الظروف مابتساعد..
شروق:اسمعي صحاب المدرسه عندهم محل حلويات مشهور اسمه جنه يبيعوا في حلويات زمنيه يعني قديمه وشعبيه في هلبه نساوين يتعاملوا معاهم زباينهم هلبه شن رايك نكلمهالك..
ابتسمت سلافه وهي مضيقه عيونها وقالت..
/تمام..وشو بترد عليكي عطيني خبر..
شروق:ان شاء الله..مررت نظرها عليها وقالت..سلافه معليشي نسألك سؤال خاص شويه؟.
بإبتسامه قالت..
/مو مشكله..
شروق:في شي بينك وبين استاذ عبد القيوم حسيتكم منسجمين مع بعض..
فرحها هلبه سؤال شروق وكلامها زاد كبر الامل في داخلها..
وطبعا لأنها تحب التارقي هلبه وتبيه يكون من نصيبها ردت تقول بضحكه خجل..
/مابعرف..
شروق بإبتسامه:وصلت الاجابه..
ضحكت وقالت..
/ماقلتلك شي..لازم روح تأخرت..باي..
ومشت وشروق وهي مبتسمه معاها بعيونها لين ادرقت عنهم...
🍃🍃🍃🍃🍃
"هدا اللي صار يام"
مغليه بغيظ:صار هكي يانجمه! انتي ما وليتي بنادمه كان لما ناسبتينا..
خديجه بكبر وكره..
/ناسيه روحها كيف كانت تجينا تصرصر بش نرضوا عليها وتاخدني لولدها..
مغليه بقهر..
/قد مايجيني مني خالطت ناس حتى الدفال هلبه فيهم..
وينفتح باب الشقه..لما سمعاته خديجه وجهها انخطف لونه..
مغليه:محي هدا ولا!؟ علت صوتها وهي تنادي..محي الدين
بدت بطن خديجة تمغص فيها من التوتر..
خش عليهم محي الدين وع وجهه ملامح التجهم قالت..
/باهي اللي جيتي ياخالتي مغليه..
استغربت مغليه في الصفه اللي ناداها بيها..
وهو كمل يقول..
/ليا توا قريب 17عام واخد بنتك ويشهد الله ياعمتي ماريت منها كان قلة الاحترام وطياح القدر تحملت ومشيت هلبه لعند ماوصلت معاها لطريق مسدود..
خديجه بإنفعال..
/صار انت اللي تحملت ومشيت!! نسيت بلاك وعمايلك السود نسيت ايام الدوران مع المراهقات اللي منهم صابرين اخت نجاه..ولانسيت قلة اصلك معاي ومع ماليا ايام الاحداث!!تي اني اللي تحملت وبلعت ومشيت اني مش انت..
هو بلامبالاة:خلاص اني اللي ماننفعش بكل..نوضي لمي شلاتيتك وروحي مع امك..
مغليه كانت تسمع وهي مصدومه..الصدمه شلت لسانها معاش قدرت تتكلم..لكن بعدين استاقظت وناضت بفزة لبنتها لما شافتها ناضت لراجلها بتضربه وهي تقول بعياط..
/تلز فيا ياحقير يانذل ياسافل..مانطلعش منه حوشي مانطلعش...كانت تتلاحق فيه تبي تضربه وامها تشد فيها عنه وهي تقول .
/خديجه خلاص ياخديجه فيقي ع روحك يابنتي..
محي الدين ببرود:الحمد لله ريتي بنتك بعيونك..اني توا طالع بنغيب ساعه زمان ونروح مانلقاكش هني..ايه ع فكره رميت عليها اليمين..ولف ومشي ولاكأنه صايرة حاجه..
وهي تعيط وتشتم فيه وتخبط وامها اللي كان مفجوعه من اللي صار تحاول ع قد ماتقدر تهديها.
لكن شن يهدي ولدها المسكين اللي يشوف في حالتها وهو يرجف من الخوف!؟...
🍃🍃🍃🍃🍃
الساعه 12:00قبل الظهر..
طلع من مكتبه متوجه لباب الفيلا ..
وصل فيه..وفتحه..رسم ع وجهه ابتسامه وهو يشوف في عبد القيوم جاي ناحيته ومع الاقجم..
وصلوا فيهم..الاقجم مشي..
ومختار بدي يرحب بضيفه وهو يقول..
/اهلا اهلا..اهلا وسهلا..تفضل..
خش عبد القيوم وهو يمشي بالفيلا ومختار سكر الباب..
جاه وقاله:تفضل معاي تفضل..
ومشوا مع بعض ومختار مازال يرحب ببه والتارقي يشكر فيه لين وصلوا لحجرة المكتب..
دخله وقعمزه ع كنبه سودا وهو قعمز معاه فيها وخلا بينهم مسافه..
حط رجل ع رجل وقال.
/كيف الحال؟
عبد القيوم.:الحمد لله..
مختار:سامحني خليتك تجي بوضعك هدا..
عبد القيوم:مش مشكله..
تنهد مختار وقال..
/تمام خل نخشوا في موضوعنا طول..اشرله ع الحيط متاع الحجره..وقاله..نبيك ع عرض الحيط من الجهة هادي كلها تكتبلي اقتباس...
عبد القيوم:تبيها زخرفه جداريه..الموضوع ممكن يطول شويه راهو لأن النوع هدا الفن يعتمد ع الزخرفه الهندسيه..
مختار:حتستعين بحد قصدك ؟
عبد القيوم؛نعرف واحد يتقن هالنوع من الفن يقدر يساعدك اكثر مني..
ابتسم مختار وقال..
/مش مشكله المهم من طرفك..
ابتسم عبد القيوم مجامله..
مختار:امم..سمعت انك الى جانب موهبة الخط عندك في الشعر..
عبد القيوم:ع قدي..انا نذوق في الشعر نبطي وفصحى ومرات نكتب شويه نبطي بس يعني مايرقاش لدرجة الشعر..
مختار:باهي حاضر في ذهنك شي تسمعهولي وتخليني نحكم بروحي..
غير نظره عنه القدام وهو يفكر ومختار مركز عليه..
رد عبد القيوم نظره ليه وبدي يلقي في ابيات وقعها كان قوي هلبه ع مختار..
《 لوكان ترجع يا زماني بيا ..
حاجات واجد سايرة نحذفهن ..
خشيت في خشات ماهن ليا ..
في وقتهن مغفوف مو عارفهن ..
وحاجات دايرهن بحسن النية ..
راضي وصايب كنت نا شايفهن ..
من عازتي ردن بشر عليا ..
تميت ودي وطيبتي عايفهن ..
وناخذ حذر من ناس داروا السية ..
ما من ادموع فشانهم ذارفهن ..
لوكان يبقى العمر بين ايديا ..
اسنين واجد خاطري ننسفهن 》
تعبوا عيون مختار بالدموع وهو يردد في البيت الأخير..
" لوكان يبقى العمر بين ايديا ..
اسنين واجد خاطري ننسفهن"
ركز عليه عبد القيوم وهو يشوفله بإبتسامه كان قاصد يقوله هالابيات تحديدا وكان متأكد انها حتأثر فيه...
ابتسم مختار وقال..
/بكل صدق نقولهالك انت شخص مريح جدا ومختلف ماتشبهش حد عرفته من قبل..
ضحك وقال:يقولولي فيها انت قاعد من العرب الاولين..في الخدمه ينادوا فيا سبعيناتي..
مختار:هدا علاش الحاج علي يعزك هلبه..والحاج لطفي دارك زي ولده..
عبد القيوم:مافي حد ياخد مكان حد..
شافله مختار شويه بعدين غير نظره للوحه اللي ع الحيط وقال..
/انت اصلك من الكفره بعدين عشت في بنغازي فترة..شافله بعقدة حواجب وقال..كنت عايش في حوش جبريل***** في*****؟
عبد القيوم:لافي بوعطني..
ضيق عيونه وقال..
/بوعطني!؟
عبد القيوم؛ايه وسكنت في شقه في الدور الثاني..ليش هما كانوا ساكنين في******؟
وجه مختار تغير لونه وهو يقول بشي من التوتر..
/ايه ع حسب مانعرف قبل..
عبد القيوم؛كنت تمشيلهم واجد؟
هز راسه وقال؛ايه مع العيله وبروحي كنت داير صحبه مع ولادهم..تزوجوا كلهم؟!
عبد القيوم:ايه..تنين منهم عايشين في مصر من حرب بنغازي..
مختار:محسن وابراهيم؟!
عبد القيوم؛ايه..شكلك عارف؟!
مختار:مش بالزبط..تنهد وقال يغير الموضوع..المهم..مافيش طلوع من هني قبل الغدي..
عبد القيوم:لامعليش اعفيني مرة تانيه ان شاء الله..
فجاه دق باب المكتب..
مختار: My wife ..came here
خشت فاتن عبد القيوم نزل نظره للأرض..
هي بإبتسامه قالت..
/السلام عليكم..
ردوا عليها السلام وقال مختار..
/زوجتي وبياض جبيني فاتن عزالدين مخلوف.
ابتسمت فاتن..وعبد القيوم ماابداش اي ردة فعل..
كمل مختار يقول...
/هدا عبدالقيوم التارقي جار العيله في شارع القهوة..
فاتن بإبتسامه..
/نعرفه..ان شاء الله لاباس عليك..
عبد القيوم؛بارك الله فيك..
مختار:ايه حقه ماقلتش شن سبب الكسر!؟
فاتن؛قصدك ماتعرفش!!؟
بإستغراب قال:شني!؟
☘حكتله فاتن اللي صار وفعلا مختار ماكانش عنده علم شاف لعبدالقيوم بعدين ميل راسه وهو يشوف فيه كيف يشوف للأرض وكأنه محرج قاله..
/عبد القيوم! هادي كبيره هلبه..وخر ورفع راسه وهو يقول..مش مروح قبل ماتاخد واجبك مافيش نقاش..شوفيلنا الغدي فاتن..
ابتسمت وقالت..
/حاضر..ومشت طلعت من حداهم..
مختار:ديونك علينا كترت ياتارقي..
عبد القيوم؛لاوالله مش بجميل ولامنيه واجب ودرته..
مختار بإبتسامه..
/متواضع هلبه..
عبد القيوم بضحكه.
/مانبيش نعطي الامور اكبر من حجمها بس..
مختار بضحكه:ياودي زي ماتبي..
☘وقعدوا يتبادلوا في الاحاديث يطلعوا من موضوع ويخشوا في موضوع..العجيب انهم كانوا فعلا منسجمين مع بعض...
🍃وفي مطعم صديقهم المشترك ..ربيع..
كان والد سلافه ماشي لربيع بش ياخد منه اذن..
نبيه؛مشوار ضروري صعب يتأجل والله..
ربيع؛باهي قولي واني نوصلك..
نبيه ابتسم وقال..
/لمكان شغل عبد القيوم..
ربيع:عبد القيوم واخد اجازه صايرله كسر في رجله..
نبيه بأسف:له له له..سلامته..اذا هيك بدي عذبك تاخدني ع بيته..
ربيع:خلاص بعد الدوام نطلعوا مع بعض..
نبيه:حاضر..عن اذنك..ومشي يشوف شغله..
رفع ربيع تليفونه واتصل بعبد القيوم..
عبد القيوم؛جربت مرة وحده ماتوفقتش معاش عاودتها..
مختار:ممكن لأنك ناقص خبره وماكانش في حواليك حد وجهك صح..
رن تليفون عبد القيوم طلعه من جيب البالطو..
شافت المتصل عقد حواجبه بعدين فتح الخط..
/ايوه ربيع..
"هاه تارقي شن دير"
عبد القيوم؛طالع..
"طالع!!وين!؟"
عبد القيوم:عند مختار الواعر..
رفع مختار حاجبه..
"تتسهوك انت!؟"
عبد القيوم:تمام بعد نروح نحكوا في الموضوع..
"تمام دير اللي يعجبك ياعبدو لكن صدقني والله مانك رابح حاجه"وسكر عليه..
عبد القيوم:تمام نتلاقوا بعدين...ونزل التليفون رده لجيبه..
مختار بإبتسامه..
/ماقالكش سلملي عليه؟
عبد القيوم:اكيد قالها..
مختار:سلمه وسلم من جاب سلامه..وابتسم..
وعبد القيوم رده مجامله ومن داخل كان معصب من ربيع..
🍃ربيع اللي بعد مانهي المكالمه قعد يفور ويغلي من الغضب وهو يتفكر في حوار صار بينه وبين الجالي من يومين فاتوا..
🔺️🔺️🔺️في وقت سابق🔺️🔺️🔺️
ع طاوله في المطعم كانوا مقعمزين مع بعض واحد يحكي والثاني يسمع..
الجالي بضيق واسف مزيفين..
/والله وين نتفكر اللي صار نتمنى لو ربي خدي روحي..ياربيع اللي درته لااني نقدر ننساه ولاطوبى..اني وياها معاش تجي بينا حياة خلاص..اني توا مانبي شي غير اني ننسى مع بنتي اللي صار كله..
ربيع بأسف:لاحول ولاقوة الا بالله..
تنهد الجالي وقال..
/اني توا مامخوفني كان شي واحد..علاقتهم بمختار..مختار خطير وعنده حقد مش طبيعي..هو اللي ساعدني بش خطفت جنه وهو سلملي طوبى واني عارف شن في باله..همه كله ياخد الحوش منها..وحتى توا استغل اللي داره مع سدرة بش يوصل في الحوش وياخده بأي ثمن..خايف يهدد اخته ببنتي..
ربيع بضيق:لاالا مااعتقدش توصل لهني..
الجالي:شن تقول انت..اللي ساهل عليه يباعد اخته عن بنتها يش يحرقلها قلبها شخص عنده هالحقد كله مازال ماتصدق فيه شي ولاتستغرب منه..
سكت ربيع وهو قلق ومضايق..
الجالي:صدقني اني ماكرهتش روحي حق الا لما تعاملت مع واحد زيه..خواته ماسلموش منه كيف غيرهم...
🔺️🔺️🔺️الوقت الحاضر🔺️🔺️🔺️
ربيع بعصببه وضيق..
/ااخ ياعبد القيوم...ااخ..
#كانون_الأول
#طوبى
...يتبع... 🍃
