#طوبى "جنة طوبى"
#جمان_فريد
#الجزء_المئة"راجعين ياهوى"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الإستغفار
"وَمَا كَانَ اللَّهُ لِيُعَذِّبَهُمْ وَأَنتَ فِيهِمْ ۚ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ"
إستغفــروا الله 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أتعرفين يا ليزا أن الانسان قد يعذب الانسان لمجرد أنه يحبه ؟ إن النساء غالباً ما يفعلن ذلك..
دستويفسكي 🍃
________________________________________
قبيل الفجر...
فاقت ع تليفونها اللي كان يهز تحت مخدتها..
حطت يدها تحتها وطلعت التليفون وبعيونها اللي كانت مضيقتهم تشوف للشاشه..لقت غرفه تتصل بيها..
طول ناضت وهي تقول بهمس..
/يارب سترك..
شافت لسدره اللي كانت راقده جنبها لقتها غارقه في النوم..
بعدين مشت طلعت من الصاله بإتجاه دار المعيشه..
خشت..شافت غرفه مقعمزة تتوجع بس بدون صوت..
مطيره كانت راقده جنبها ومش حاسه بيها..
جتها طوبى قالت بقلق وصوت منخفض..
/شني روفي!؟
غرفه بوجع؛مش عارفه بس وجع يشبه وجع التساهيل اللي جاني الايام اللي فاتوا..
قربت منها وساعدتها تنوض وهي تقول..
/نوضي معاي تمشي في الممر..
ناضت غرفه وهي شاده فيها وتقول بوجع..
/حاسة روحي خلاص بنجيب..
طوبى:إن شاء الله خير..هي اطلعي معاي..
وحده وحده قعدت تمشي بيها لين طلعتها للممر وقعدت تتمشى هي وياها
غرفه وهي تتوجع..
/طوبى ردوا بالكم ع صغاري كان صارت فيا حاجه ربيهم مع جنه..
طوبى بضحكه..
/دراما كوين..
ضحكت غرفه غصب عنها في عز الألم بعدين قالت..
/من حرق الدم امس نحساب روحي بنموت
طوبى:تعوذي من الشيطان وصلي ع النبي واستغفري..
وبدت غرفه تستغفر وتصلي ع النبي وهي تمشي وتجي في الممر مع طوبى لعند مااختفي الوجع مع آذان الفجر مباشرة
خشت غرفة للحمام بش تتوضى..
وطوبى مشت نوضت اريج ومطيره واخر شي سدرة
🍃سدرة والنوم في عيونها..
/تلقي في شنطتي شيشة مية زمزم اقري عليها وحليها بالعسل واعطيهم كلهم يشربوا..
طوبى وهي تعطي فيها القيلا..
/حاضر.. ومشت هي وياها للحمام تاني..خشت سدرة تتوضى وطوبى مشت تشوف للحمام اللي حدا الديار كان فضي..
شافت اريج طالعه منه طول مشت خشت بعدها...
🍃بعد الصلاة..
حطت مطيرة القهوة ع النار وشغلت الراديو..
اللي كانت تسمع فيه سدره وهي واقفه قدام شجرة الياسمين تتنفس في ريحتها ودموع الشوق تنزل..
شوق للحوش بجنانه بكل تفاصيله..
شوق لبوها وامها وايامها معاهم..
شوق للماضي اللي حاسه روحها تبي ترجع تعيش فيه ومعاش تطلع منه..
بس بعدين خالطت دموع الشوق دموع حزن ع صاحبتها واختها..موتها اللي فجعها وصدمها دارلها غصه تانيه في قلبها...
سدرة حاليا قاعد تحس انها مذنبه في حق كل احبابها..
بوها..امها...مختار..طوبى...عائشه..
بس الوحيد اللي مش حاسه اتجاهه بالذنب نهائي هو المهدي...🍃
فاقت من سرحانها ع صوت دوشه جايه من الحوش..
قدمت بالقيلا متاعها لباب الكوجينه وخشت..
شافت قدام باب الكوجينه الداخلي طوبى تمشي في غرفه اللي تأن بألم وهي تقوللها..
"ساهله حبيبتي ساهله يفوت يفوت روفي كله يفوت قولي يارب"
وغرفه بألم تقول..
"يارب"
طوبى:اريج كلمتي عبد الرؤوف؟
سمعوا الباب الخارجي يدق..
مطيره بقلق:اهو جي..
طلعوا كلهم مع بعض وسدرة تلحق فيهم لين وصلت في اول الجنان من القدام..
شافت عبد الرؤوف فم الباب كان باين ع وجهه القلق..
لما قربت منه غرفه خشلها وساعدها في المشي مع طوبى وطلعوا كلهم من الباب...
شويه وولت طوبى تكلم في عمتها وبنت اختها بعدين مشت بسرعه ومطيره واريج قعدوا واقفات في الباب يشوفوا فيهم لين تحركت السيارة...
مطيره؛هي افطري روجة بسرعه والحقيهم..
اريج؛حاضر..
وخشت داخل بسرعه وهي متفلوشه مالاحظتش خالتها سدره اللي قعدت معاها بنظراتها القلقه..
"غريفة شكلها بتجيب اليوم"
شافت لعمتها اللي جتها وهي تقوللها في هالكلام..
سدرة بقلق..
/مافي شي يخوف ولا!؟
مطيره؛لابنيتي عادي عادي..هي تعالي معاي اشربي قهوة وافطري..
سدرة تنهدت بعدين هزت راسها بالموافقه...
🍃🍃🍃🍃
في سيارة عبد الرؤوف..
اللي كان يسوق وهو متوتر ويسمع في صوت وجع مرته واختها اللي تدعيلها وتهون عليها..
عبد الرؤوف بقلق..
/ماصارلهاش هكي في التوامه!..
غرفه بوجع وبكي..
/هاه ريتي..شكلي بنموت..
طوبى بضحكه وهي متوتره..
/اسكت ياعبدالرؤوف تربح!
عبد الرؤوف بضحكه ارتباك من الخوف..
/باهي عادي هكي!؟
طوبى؛عادي عادي غير مرتك دلوعه..
غرفه بوجع؛اسمع جاي..كان متت..تزوج بعدي عادي..لكن رد بالك تاخد العنزة بنت عمتك..
ضحك ودموعه في عيونه وهو يقول..
/سكري فمك يامتخلفه سكري..
غرفة بنرفزه وهي تتوجع..
/مارضيتش فيها ولا...وتوجعت بقوة وهي تعيط..
عبد الرؤوف بخوف..
/يلعن جد سيرتهم بكل..غرفه ياهبله مانبدل ظفرك بحد..
ابتسمت طوبى في عز توترها وعيونها دمعوا وهي تقول..
/معليشي حبيبتي معليشي يفوت كله يفوت..يامسهل سهل يارب..
وقعدوا على هالحال لين وصلوا لمصحة القدس اللي فاتحه عندهم غرفه ملفها..
خشوا بيها وهي ع كرسي متحرك..ورافقتها طوبى لقسم النساء والولاده وقعد عبد الرؤوف يستنى ع نار....
🌸🌸🌸🌸
وبعد لحظات عصيبه مرت ع غرفه في اول ولادة طبيعية ليها جت "مئاب" ع الدنيا..
بوها برغم فرحته بيها بس كان خايف ع امها وماحسش بفرحته حق الا لما اطمن عليها...
🌸"جينات التراهنه غلبت الطرابلسيه والزليطنيه لكن ماقدرتش ع التواجير"
غرفه وبنتها في حضنها شافت لأريج بطرف عينها وقالت بتهكم..
/من حظكم التعيس
ضحكوا اريج وطوبى واميمه اللي كانوا معاها في الحجره..
اميمه بإبتسامه:ربي ينبتها نبات حسن ويفرحك بيها هي وخوتها..
غرفه بإبتسامه:آمين ونشوفهم عندك..
طوبى واريج قالوا..
/ان شاء الله..
ضحكت اميمه..
🍃وبرا الحجره بمسافه كان عبد الرؤوف يتكلم هاتفيا...
"مبارك مبارك تتربى في عزكم"
عبد الرؤوف؛الله يبارك فيك ياافندي وعقبالك ان شاء الله تلحق روحك ودير عيله ع حالك..
"اياااح"
عبد الرؤوف بضحكه..
/ان شاء الله مايكونش فات الفوت وتريح في هالحرب..
"والله هكي خير"
عبد الرؤوف بضحكه..
/ضم فمك يامريض..اسمع جاي مانعرفكش بتحضر العزومه متاعها..
"نحاول ياغالي والله نحاول هي توا بنسكر يابو مهاب مبارك عليك مرة تانيه..نشوفك ع خير"
عبد الرؤوف:إن شاء الله..في وديعة الله...
ونهي عبد الرؤوف المكالمه مع حسين ع جية نبيله لما شافها جايه وهي مبتسمه بفرح ابتسم من قلبه..
وصلت فيه وقالت..
/شن جو توا؟
عبد الرؤوف:عال العال..اسمعي نبي نخش نشوفها..
نبيله:من معاها داخل؟
عبد الرؤوف:طوبى واريج وبنت عمها..
نبيله:راجي مني رنه...ومشت طول للحجره وهو قعد يستنى...
بعد خمسه دقايق بالضبط طلعوا طوبى واميمه واريج من الحجره..
هو شافهم ويجيه اتصال نبيله..قدم طول للحجرة فات من جنبهم من غير مايشوفلهم وهما كملوا طريقهم..
طوبى بإبتسامه؛محلاه الحب لما يبان في العيون ومن الافعال..
ابتسمت اميمه..
طوبى:حب رؤوف لغرفه ديما يبان في عيونه وافعاله..رغم كل شي لكن رؤوف يقعد راجل مقوم بمعنى الكلمه..
اريج:صح..
تنهدت اميمه ومازال محتفظه بصمتها..وفي لحظه تبدلت ملامح وجهها الهاديه لملامح ارتباك ممزوجه بالتوتر لما شافت اسامه جاي..
غيرت نظرها عنه وهي تحاول تخفي ارتباكها..
لما وصل فيهم قال..
/صباح الخير دكتورة...وكمل طريقه عادي وهو يسمع فيها ترد عليه وعيون اميمه وطوبى معاه..
طوبى بإبتسامه:اسامه صح!؟
شافتلها بدهشه وهي تقول..
/كيف عرفتي!؟
طوبى بضحكه:من لون وجهك ونظرة عيونه..
اميمه بتوتر:نظرة عيونه!؟
طوبى؛ايه لما شافك لاحظتهم لمعوا وضحكوا..
اريج بضحكه:ماشاء الله مركزه!
طوبى:هو خلاني نركز نظرته ليها كانت واضحه..
اميمه وقفت وشافت للجهة اللي مشي منها وهي تقول..
/اني حاستها تغيرت مش زي زمان؟
اريج؛قصدك كان يقرا معاك ويبيك قبل؟
هزت راسها بإيجاب وفي عيونها نظرات حسرة شافتهم طوبى اللي قالت..
/مش غير زمان حتى توا..انتي قوليلي مش كان مخطط يطول في سفره ومايروحش لبعد خمسة سنين علاش روح توا!؟ لاوشوفي الصدفه يولي يخدم في نفس المصحة اللي تخدمي فيها..!
بدت دقات قلب اميمه تتسارع وهي تفكر في كلام طوبى بعدين قالت..
/قصدك ولى ع خاطري!؟
طوبى:مليون في الميه اكيد وصلاته معلومات عنك من قريبته اللي شفتيها في عرس صفاء تتفكري!؟
رجع هداكا الشعور الحلو اجتاح قلب اميمه وهي تفكر في كلام بنت عمها بعدين قالت..
/لكن مش عارفه حاساته متغير مش زي قبل يعامل فيا برسميه..
طوبى بإبتسامه مكر وهي مضيقة عيونها..
/في باله شي يبي يوصله..
اريج بضحكه؛ياعيني ع المحلله النفسيه فهمت هدا كله من نظرة وحده!؟
طوبى:ماهو ياغبيه اللي يحب مهما حاول يدرق يبان في عيونه غصب عنه..
اميمه واريج شافوا لبعض بطرف عيونهم بعدين شافولها وقالوا..
"اهاا!!..صار هكي!!"
اميمه قربت لعيون طوبى صوابعها وهي تقول..
/صار يبانوا في عيونه..
اريج وهي مضيقه عيونها قالت
/وفي لون وجهه ياميمو راك تنسي..
قالت هكي لما شافت لون وجه طوبى تبدل للأحمر لما فهمت قصدهم من تلميحاتهم..
عطتهم نظرة من فوق لتحت ومشت وخلتهم..
ضحكوا واميمه تنادي عليها..
"ياهرابه"
🍃🍃🍃🍃🍃
وفي حوش شنيبه اللي انبلوا ولادهم بعشق بنات الواعر..
كانوا امهم واختهم مقعمزين في الصاله ومعاهم الجارة الحشريه اللي كانت مراسله تنقل في اخبار اهل الشارع لبعض..
رقيه:قالوا بيديروا عزومه كبيره نهار الاحد..
مغليه بتهكم:اممم..
رقيه:قولي مغليه ولدك المهدي مش داير في باله شي!
عقدت مغليه حواجبها..
وخديجه ردت وهي رافعه حاجبها تقول..
/زي شني!؟
رقيه؛زي انه ياخد سدرة..
خديجه:منك جد ياخالتي رقيه! مازال حني بعد اللي ريناه منهم ناسبوهم هادم !! راهم كبتين ع الراس حصلناهم في مرة ومن بعدها خوتي اللي كانوا خيره ولاد الشارع ومافيش زيهم حالهم ولى كل يوم لتالي..
رقيه؛ياوخيتي هادوا الناس يسألوا مش غير اني..كلنا نعرفوا ان مهدي غاويها وع خاطرها ياما دار وصار فيه..
مغليه:بالعقل ماتجيش بكل..وحطيها في بالك لو شن يصير مستحيل مازال ناسبوا هالشكالات..
خديجه بتهكم:لاوفوقها مريضه وعقلها مش عليها..!
مغليه؛كان ينوى نخطبله بنت العشرينات وياما منهم يتمنوه ماعنده مايدير بعزوز صحتها وعقلها بالهون..
رقيه:لافي هادي عندكم حق...
🍃🍃🍃🍃🍃
"وقالت ماعنده مايدير بعزوز صحتها وعقلها بالهون"
نجمه:ع خاطر هما مازال يعطوهم ولاسدره مازال تشبح في وجهه بعد تعرف شن صار في اختها!
صفاء كانت مقعمزه تسمع وهي حامقه وع اعصابها..
رقيه شافتلها وقالت..
/انتي شفتيها ياصفيوه شن وضعها؟
صفاء:والله ياخالتي الله يبارك عليها عيني ماضرها زي الفرس وزدات صغرت وجمالها كان مايزيد تمشي اليوم وتشوفيها بعيونك..
ابتسام اللي كانت مقعمزه معاهم قعدت مركزه بالنظر ع صفاء..
عواطف؛والله حتى اني متشوقه نشوفها كيف راحت وشن صار فيها..
ابتسام:ع حسب مانتفكرها زمان زينها مافيش زيه..
صفاء برفعة حاجب..
/مش زمان بس حتى توا..
نجمه:ياودي كله زايد قدام الصحة المهم صحتها كويسه وولت لناسها واحبابها..
ابتسام:عين العقل ياعمتي..
ع خشة سميره بسفرة الضيافه ناضت طول صفاء خدتها منها ومشت تفرق..
وسميره قعمزت حدا عواطف وهي تقول..
/شن حالك وحال عويلتك خالتي رقيه..
رقيه وهي تمرر في نظرها عليها قالت..
/الحمد لله..خيره وجهك اصفر وضاعفه هكي رحتي بتموتي..
كلهم ركزوا عليها وسميره قالت بإستغراب..
/اني!!
نجمه:قعمزي وهني روحك يارقيه الله يبارك عليها رايحة زي الوريده..
ابتسمت سميرة وابتسام تسرقلها في النظر..
صفاء:ابله سميره تهبل في كل حالاتها القلب ابيض والنيه حليب وكله باين عليها الله يبارك..
عواطف شدت ضحكتها..
وسميره تقول بضحكه..
/سلمها ياربي..
نجمه مادققتش...لكن ابتسام اللي كانت تسحن ع صفاء دارت روحها عاديه..ورقيه تشرب في قهوتها وتوزع في نظرها عليهم...
🍃🍃🍃🍃🍃
وفي حوش الواعر اللي كيف خشت عليهم سميره...
مطيره؛وهادي هي سمورة صاحبتي ايام المصنع وتوا حرم محمد شنيبه..
سدرة بإبتسامه:الله يبارك عليك..
سميرة بضحكه:الله يبارك عليك انتي ع قد ماوصفوا في زينك ماقالوا شي..
سدرة بخجل:تسلمي يارب
سميرة بضحكه:سلم اللي يتحشموا..
ضحكت مطيرة ابتسمت سميره وهي تقول..
/ياستي حمد لله ع سلامتك وانستي ناسك واحبابك..
وفي نفسها كانت تقول..
"ماتنلام يامهدي ياولدي..اه كان ربي يقدرني ونلم شملكم بس"
🍃في هالوقت..
درست سيارة يوسف قدام حوش طوبى..
نزلوا هو امه وخشوا للحوش...
☘وتستقبل مطيره صفيه استقبال حار بالدموع وصفيه بكت معاها..واثر لقائهم في سميره وسدرة..
وهاديه..
قعدت في حوش شيبانيها خافت يكون غير مرغوب في وجودها لكن علي الواعر قاللها..
/يابنتي انتي زيك زيها كنة العيله واجب عليك تشاركي في كل شي الفرح والحزن..امشي سلم بنتي امشي وخلي عقلك كبير زي ماعرفتك وراهو حتى صفيه مراة حكيمه ماتخافيش منها..
تنهدت هاديه وقالت..
/حاضر ياعمي زي ماتبي تو نمشي..
هز راسه وهو يقول..
/يحضرلك الخير..وطلع من حداها...
🍃وجهزت هاديه نفسها ومشت لحوش طوبى ورجل تقدم ورجل توخر..
خشت وهي متوتره بس حاول تخفي هالتوتر بإبتسامتها الواسعه المرحه..
خشت عليهم الصاله وهي تقول..
/السلام عليكم..
وجه صفيه بانت عليه ملامح الضيق اللي لما شافتهم سدرة قلبت وجهها..
ومطيره تراقب فيهم..
سلمت هاديه ع مطيره وسميره..ولما وصلت في صفيه..مدت صفيه رووس اصابعها بدون ماتتكلم وسدرة دارت زيها بالزبط وماتبيش تشبح في وجهها..
بلعت هاديه ومشت..وقعمزت جنب مطيره وهي تتجنب النظر لصفيه وسدره وحتى هما داروا نفس الشي..
ع خشة طوبى واميمه للحوش...
لما خشوا للصاله...
اميمه بفرح..
/امي!..ومشتلها تجري وصفيه ناضتلها وضموا بعض بقوة من الشوق ودموعهم حاضره..
ولقاء زي هدا اكثر حيكون مؤثر ع كل من يحضره..بس اكثر من اثر فيه هاللقاء هاديه اللي كانت تتمنى تكون ام بس للأسف فرصها شبه انعدمت...
طوبى ودموعها في عيونها..
/خالتي صفيه..
صفيه بنبرة باكيه..
/طويبه..
وكان سلامها ع طوبى زي سلامها ع اميمه..
طوبى ودموعها ينزلوا..
/بارك الله فيك ع اللي درتيه مع سدره..
صفيه ببكي:شن تقولي ياطوبى..هادي بنتي راهي!..
طوبى:ربي مايحرمكم من بعض..
سدرة بنبرة باكيه..
/ولايحرمنا منك يارتيله انتي..عن شكلك من لما جيع ماغير تبكي فيا وخلاص..
ضحكوا كلهم...
☘وبعد سلام وكلام في الشوق والسؤال ع الاحوال تكلموا عن ولادة غرفه..
صفيه:صار جابت طبيعي عادي!؟
اميمه:ايه مافيش مشكله هلبه صارلهم زي حالتها..
سميرة:اني سمعت ان لازم يكون في سنتين بين القيصري والطبيعي..
اميمه:لامش شرط نعرف وحده بعد طقت جايبه بالعمليه خمسة شهور حملت تاني وجابت طبيعي..
طوبى:هو كله يعتمد ع صحة الام بالدرجة الاولى..
اميمه:صح..
سدرة:باهي امتى تطلع؟
طوبى:العشيه ان شاء الله..
سميره:ع هكي اسبوعها بديره الخميس الجاي..
طوبى:لاحني حجزنا في الصاله يوم السبت..
سميره:باهي ع خير ان شاء الله..
طوبى:يارب..
مطيره:طيبت طنجرة جغوم هكي كبرها..
هاديه بضحكه:الله مخرومه جغوم اني..
سدرة؛دايرينه للجايبه..
ردها كان صادم للجميع ماعدا صفيه اللي كان عاجبها...
وهاديه اللي صدمها بقوة ردت بضحكه تقول..
/عارفه..اني تكلمت هكي وخلاص..
مطيره عقدت حواجبها بعدم رضا وقالت..
/خل نوض نبدا بالغدي..تعالي عاونيني هاديه..
ناضت مطيره وهاديه لحقتها وصفيه وسدرة يلحقوا فيهم بالنظرات الحاده..
ونظرات الضيق من اميمه وطوبى كانوا موجهات لسدرة
سميره اللي حست ان الجو تكهرب هلبه ناضت وهي تقول..
/خل نمشي نسايرهم..
ومشت طلعت من حداهم...
تنهدت سدرة وقالت..
/ايه طويبه نبي نمشي للمحل امس ماصارلناش..
ابتسمت طوبى وقالت..
/تمشي توا؟
سدرة بإبتسامه..
/باهي جيبلي عبايتي ووشاحي تلقيهم ع السرير..
ناضت طوبى ومشت طلعت من الصاله..
شافت صفيه لأميمه وقالت..
/مطيره منسجمه هلبه مع الغيريانيه..
تبدلت ملامح وجه سدرة للضيق وهي تشوف لصفيه..
خدت اميمه نفس وقالت..
/امي..المراة في حالها كويسه وطيبه ومن لما جتنا ماوجعتنيش بنظرة عين..اسألي حسين عليها يقولك..جدي اللي كان رافض تخشله حوش من كثر مايعزك بعد عرفها زين خلاها تعيش معانا قامتنا كلنا وماقصرتش معانا بكل..تعرفي عمتي مطيره ع خاطرك ماكانتش متقبلتها لكن بعد عاشرتها غيرت رايها فيها..
صفيه برفعة حاجب..
/قالوا خطبتها لخوها ومطيره وافقت..
بدت ملامح الصدمه ع وجهه سدرة وهي تقول..
/كيف!؟
اميمه:وين المشكله!..
ع خشة طوبى بالعبايه والوشاح قالت لأختها..
/هي نوضي سديرتها..
ناضت سدره وصفيه مدتلها القيلا..وقفت قدامها طوبى بالعبايه خدتها سدرة وهي تقول..
/حق عمتي وافقت ع خو هاديه ولامش عارفه من هي!
طوبى بضيق..
/ايه..
سدرة؛شدي القيلا شدي..
خدت طوبى القيلا وهي مضايقه..
🍃تعرف موقف سدرة من حكاية الضرة زيها زي اغلب النساء نظرتهم سيئة اتجاة المراة اللي ترضى تكون زوجة تانيه..هي نفسها لما عرض عليها المهدي هالعرض برغم قوة حبها ليه رفضاته ورفضت اي خاطب متزوج جاها قبل..واكيد مش حترضاه لمرت عمها اللي تكون امها التانيه اللي كانت شاهده ع الحياة اللي عاشتها مع عمها..في نظرها مراة زيها مفروض يحطها ع راسه مش يكافئها بالضرة!!!..بس طبعا سميره عندها استثناء من هالقاعده لأن مغليه تستاهل تلاته ضراير مش ضرة اللي رضت بعملة ولدها الجالي..وكان تعرف المتخبي كانت شافت ان الضرة اقل عقاب في حق وحده زي مغليه..🍃
🍃🍃🍃🍃
انفتح الباب الفاصل..
وتخش سدرة للمحل..داخليا ماكانتش متقبله ان هالمكان اللي كان فيه اشهر مطاحن القهوة يولي محل حلويات لكن معرفتها بالظروف اللي مروا بيها اهلها من صفيه ويوسف خلتها ترضى وان كان ظاهريا فقط..
برغم كل شي..اعجبت اعجاب شديد بالمحل وديكوره والبنات الواقفات فيه اللي كانوا يشوفولها بنظرات اعجاب واحترام..
وحده فيهم قالت..
/حمد لله ع السلامه ابله سدرة..
ضيقت عيونها وهي تشوفلها..
طوبى بإبتسامه..
/بنت عيلة البكوش ريهام..
سدرة:كانت تقرا معاك ولا؟
البنت بضحكه:ايه..
سدرة:الله يبارك..
☘وسلمت ع باقي البنات اللي كانوا من شارع القهوة وهي متفاجئه فيهم كيف بانوا كبار بزيادة في عيونها..
شافت للباب لما سمعت دوشة صغار..
طوبى:وقت المرواح..
شافتلها سدرة وقالت..
/عندكم شكولاته؟..
طوبى:كيف تبيها؟
سدرة؛هادوا الطريفات الصغار كراكيب ولامثلتات ولا اللي هو..
ضحكوا وطوبى قالت..
/ايه عندنا شغل بنت عيلة الجعفري..
سدرة:لمي اللي هناك وبشن ماكان نشريها كلها..
طوبى بضحكه:حاضر..
ومشت طوبى تنفد طلب اختها..
وسدرة بالقيلا قدمت للباب بتطلع من المحل..
🍃قدام مطحن الزعيم..
كان المهدي واقف ع عبد القيوم يتكلموا في موضوع يخص النازحين اللي في المدرسه..
المهدي:نشوف حد يوفرهم ان شاء الله في اقرب وقت..
عبد القيوم:مادابيك الشهر هذى..
المهدي:إن شاء الله..
🍃من القهوة اللي كان واقف فيها محمد مع عمامه عمر ونضال يحكوا عن الدراسه في الجامعه ووضعها ويحاولوا يقنعوه بالسفر..هو انزعاجا من حديثهم وتهرب منه غير عيونه عنهم لمحل جنة جو ع سدرة..لما شافها غير نظره لبوه طول..
عمامه لاحظوا انه مش مركز معاهم..شافوا وين مايشبح بعدين نضال غير نظره للمحل وشاف حتى هو سدره اللي عمر شافها بعده...
☘كانت الياسمينه تتفرج ع صغار الشارع وهما مروحين من المدرسه..ابتسمت من قلبها ابتسامه شوق للشارع بكل تفاصيله..
هالابتسامه جت في عيون المهدي اللي شاف للمحل بنظرة عابرة...
ولما أكدوله عيونه انهم شافوا ضيهم...نسي كل شي..الزمان والمكان والدنيا ومافيها...
جمالها..هيبتها..جاذبيتها..كله رجع زي زمان..زمان بكل..
ايام المراهقه ومراسيل الحب..
عبد القيوم لما شاف حالته ابتسم ونزل عيونه..بعدبن غير نظره لمطعم ربيع..شاف ربيع واقف قدامه يتفرج وهو مبتسم والذكريات الحلوة..ذكريات الزمن الجميل كلها خطرت عليه..
شويه عقد حواجبه وشاف لعبدالقيوم اشرله بعيونه ع المحل..
رجع عبد القيوم نظره للمحل..ويجوا عيونه ع اللي اسراته حتى هو سنين في حبها..
🌼كانت طالعه بكيسه شكولاته عطتها لأختها اللي نادات ع الصغار بنات وولاد وبدت تفرق عليهم..
سدرة تفرق وتسأل فيهم انت ولد منو ولاانتي بنت مني!؟
وتبصر عليهم وتتسهوك وتقلد وطوبى تضحك من قلبها..
ضحكة حلوة بالمرة اول مرة يشوفها عبد القيوم..حس وقتها ان حبيبته ام العيون الحايرة عايشه شعور سعاده حقيقي...
☘ومن ضمن اللي كانوا يتفرجوا ع اللي صاير سامي اللي مشي طول لربيع وقال..
/هي هادي سدرة؟
ربيع:يس..
سامي؛تستاهل يمرض قلبه من حبها..
ربيع بضحكه:كان يسمعك يعلقك فالبالو ..
ضحك سامي بعدين قال..
/الشارع تعبى قلوب..
🌼🌼🌼
سدرة؛ربي يحفظكم ويفتح عليكم..شافت لأختها وقالت..قاعد السوبر ماركت اللي هني ولا؟
طوبى:ايه..
سدرة؛خل نمشوله ونشوف كيف ولى وفي نفس الوقت نبي نتمشى ونشوف الشارع استاحشته..
مدت طوبى يدها المغطيه وقالت بإبتسامه..
/هيا..
شدت سدرة يدها وهي تقول..
/سلم بنتي اللي ولت شيخة..
ضحكت طوبى..
ومشوا مع بعض بإتجاه السوبر ماركت..والقلوب الذايبه في حبهم لحقتهم...
قعدوا معاهم بعيونهم لين غابوا عنهم..
تنهدوا بكتمان...
شاف المهدي لعبدالقيوم لقاه يضحك..
المهدي بشي من الاحراج..
/خلاص زي ماتفاهمنا..
عبد القيوم بإبتسامه..
/تمام..
مشي المهدي خش للمطحن..وعبد القيوم لف ومشي لصحابه..
وهو ماشي شاف لمحمد لاحظ في عينه نظرة حزينه وجعت قلبه وخفت ابتسامته..
🍃نضال:حمود..
شاف محمد لعمه وقال بضيق..
/ماخاطري ندوي في شي توا سامحوني..
ومشي خش داخل المقهى..
عمر:مش عارف شن اخرتها..
نضال:إن شاء الله خير وخلاص..
🍃🍃🍃🍃🍃
بعد العصر..
روح عبد الرؤوف بمرته وبنته لحوش اختها..
استقبلوهم بالوشق والزغاريد وغرفه كانت فرحانه وتضحك من قلبها..
شويه ودخلوها لدار المعيشه..
وتلاقوا السنافر الصغار ع السنفورة الجديده وهما يشوفولها بنظرات استكشاف..
جنه بلغتها العسليه اشرت عليها وهي تقول..
"بيبي"
ضحكوا عليها..
طوبى:حتى انتي بيبي ياقلب قلبي..
جنه..
"بيبي..روفي"
غرفه:تموت فيك روفي..
مهاب..
"اععي بيبي اععي" ويقلده خوه..
غرفه بصدمه..
/حي عليا!!؟
سدرة بضحكه؛ردي بالك ياكبدي تغفلي عليها تلقيهم مطلعينها للقطاطيس..
غرفه:حي غبارتي!! لاماما اوبا هوبا هادي بيبي حلوة هلبه..
اواب..
"لا..اععي"
🍃وقعدوا يتعاندوا هما وامهم واللي معاهم في الدار يضحكوا عليهم..
🍃وتعدي ربع ساعه..
سكروا ع غرفه دار المعيشه والاولاد خداهم بوهم طلع بيهم..وماقعدش كان جنه اللي رقدتها امها...
وتبدا الناس تهل عليهم..استقبلوهم في الصاله اللي تعبت بيهم وكلهم كانوا يراجوا يشوفوا سدرة..
☘سدرة اللي خلتها طوبى تلبس احلى ماعندها وتكون في قمة الاناقه..
كانت تبي تخليهم يشوفوا وضع اختها ع حقيقته عكس ما طلع عنها من اشاعات..
سدرة نفسها كانت تبي تقابلهم بقوة وثقة...
اول ماخشت عليهم وهي تقول..
"السلام عليكم"
خلتهم مذهولين فيها..احلى من سدرة قبل اللي يصير معاها الحادث واكثر شباب ونضارة..
سلمت عليهم كلهم..وقعمزت ع كرسي حطوه في الصاله ع خاطرها..
قعدوا معاها طوبى وصفيه والباقي بفايزة وسميرة مشوا يعولوا ع الضيافه..
🍃🍃🍃
وتبدا الاسئله تهل عليها اشكال الوان الفضولي..العادي..والوقح...في اللي ترد عليهم بروحها وفي اللي تجاوب فيهم صفيه عنها..وعيون طوبى مع سدرة وردات فعلها وحالتها...
☘في هالأثناء..
تلاقوا سيارات المحجوب..وVIP العاليه متاع مختار..
🍃المحجوب بتهكم..
/ياعيني!..تو بيقعد سريك مريك..
نبيله:تجنبه وماتحتكش بيه..سلام حبيبي توا نتلاقوا بعدين..
نزلت من السيارة وهي شاده علبتين حلو..
شافت مراة جميله نازله من سيارة مختار وفي يدها علبة شكولاته راقيه وكيس هدايا وباقة ورد..
مشت سيارة مختار..
وقعد المحجوب يراقب في الوضع..
ضربت فاتن ع الجرس بعدين شافت جنبها ابتسمت وقالت..
/مساء الخير..
نبيله؛مساء النور..
فتحت تاله الباب..
نبيله:ياهلا بالحلوة...
تاله بإبتسامه..
/تفضلوا..
فاتن بإبتسامه..
/يزيد فضلك ياعسل..
خشوا ورا بعض..وتاله سكرت الباب...والمحجوب تحرك طول بسيارته لحوش علي الواعر..درسها قدامه ونزل خش داخل...
🍃ومن باب حوش الواعر لباب حوش شنيبه اللي طلعت منه نسرين...
كانت ماشيه بخوف ورهبه تحاول تخفيهم بإتجاه حوش طوبى الواعر والمهدي من قدام المطحن بنظره معاها..
🍃وصلت في الباب..ضربت الجرس..لحظات وفتحت تاله الباب..
تاله:خالتو نسرين تفضلي..
نسرين بإبتسامه..
/سلمها حبيبتي...
وخشت لحوش الواعر وقلبها يدق بسرعه من الخوف..خوف من مواجهه ليها شهور تراجي فيها....
#راجعين_ياهوى
#طوبى
....يتبع....
