#طوبى "جنة طوبى"
#جمان_فريد
#الجزء_120"حلاوة الدنيا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الحوقله
عن أبى هريرة رضى الله عنه عن رسول الله، صلى الله عليه وسلم، قال: "من قال: لا حول ولا قوة إلا بالله كان دواءً من تسعةٍ وتسعين داءً أيسرها الهم".
حديث رواه الإمام الحاكم وقال: صحيح الإسناد. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃_"سِيمَـاهُم فِي وُجُوهِهِم“..
«الجمال الباطن يزيّن الصورة الظاهرة، وإن لم تكن ذات جمال، فيكسو صاحبه من الجمال والمهابة والحلاوة بحسب ما اكتسبت روحه من تلك الصفات، فإنَّ المؤمن يُعطى مهابةً وحلاوةً بحسب إيمانه؛ فمن رآه هابه، ومن خالطه أحبَّه، وهذا أمرٌ مشهودٌ بالعيان، فإنك ترى الرجل الصالح المحسن ذا الأخلاق الجميلة من أحلى الناس صورة، وإن كان أسود أو غير جميل، ولا سيّما إذا رزق حظًا من صلاة الليل، فإنها تنوّر الوجه وتحسّنه»
- روضة المحبين، ابن القيم 1/32
_________________________________________
"والله حاولت معاها يافهيمه البنت مسكرة راسها "
حطت فهيمه فنجان القهوة وقالت..
/ترا بالله نادوهالي..
شافت فايزة لبنتها صفاء وصفاء بعد شافت نظرة امها ناضت ومشت بإتجاه دار اختها..
☘وصلت فيها فتحت الباب وخشت وسكرت وراها الباب..
مروة شافتها وهي خاشه قالت بإنزعاج..
/ماتقوليش اطلعي..
فنصت فيها صفاء وقالت..
/نوضي اطلعي المراة تراجي فيك..
تأففت بضجر وناضت مشت لدولابها بطلع حوايج وصفاء واقفه تشوفلها..
طلعت مروة الحوايج وقالت لأختها..
/اطلعي باهي!
صفاء برفعة حاجب..
/واقفتلك في الباب..
ومشت طلعت وسكرت الباب وقعدت واقفه وراه تستنى فيها..لحظات وطلعت مروة وع وجهها ملامح الضيق..
صفاء:افردي وجهك مش واكلاتك المراة قوليلها اللي عندك وخشي..
خدت نفس بعدين هزت راسها بإيجاب..
صفاء:تعالي..
مشت ولحقتها مروة لعند ماخشوا للصاله اللي كانوا مقعمزات فيها فايزة وفهيمه ووحده من خواتها..
فهيمه اول ماشافتلها ابتسمت بادلتها مروة الابتسامه ومشتلها سلمت عليها..
مروة كانت تحب فهيمه وماتبيش تزعلها لهذا كانت رافضه تطلعلها وترد طلبها..
بعد ماسلمت عليها سلمت ع اختها..
فهيمه:تعالي حداي مريوة..
ابتسموا فايزة وصفاء ومروة مشت قعمزت حدا فهيمه..
حطت فهيمه يدها ع ظهر مروة وهي عاقده حواجبها قالت..
/علاش ماتبيش ولدي!؟
ضحكت مروة بخجل وقالت..
/مش هكي..اني مانبيش نتزوج توا..
فهيمه:ومن قالك بتتزوجي توا!؟ توا خطوبه بس والزواج بعد تاخدي الشهادة الثانويه..
مروة:مانبيش ياخالتي نبي نقرا في الجامعه..
فهيمه:واني قبل قلت لااني ولاولدي عندنا مشكله والله يابنتي وربي شاهد كنايني كملوا قرايتهم عند ولادي واني اكثر من شجعهم ووقف معاهم..
مروة؛صعب ياخالتي هلبه زواج وبعدين مرات صغار مع قرايه..
فهيمه:لالاانتي تقدري اني نعرف البنادم من نظره انتي قويه وتقدري واني نعاونك في كل شي حتى في معاناة الصغار..
تنهدت مروة بضيق وشافت لامها واختها اللي كانوا يشوفولها ويراجوا في ردها..
غيرت نظرها لأخت فهيمه لماسمعتها تقول..
/الفرصه الباهيه لما تجي مرات ماتتعوضش صدقيني مانك لاقيه عزوز زي اختي وراجل باهي زي وليد اختي شهادتي فيهم مجروحه لكن ربي شاهد عليا عيلة اختي اللي تجيها محصلة دعوة خير في ساعة مباركه..
ابتسمت فهيمه وهي تشوف لمروة وتقول..
/هاه شنو مريوه مازال ماتبيش تولي كنتي!؟
🍃🍃🍃🍃🍃
مقعمزة وسط صالة كبيره مزحومه بالنساوين..
كبار وصغار..متزوجات وبنات..وكلهم يهدرزوا في مواضيع مختلفه وهي مكتفيه بالإستماع والنظر..
كانت تشوف في بعض الحاضرات كيف يشوفولها ويتهامسوا عليها..مش عارفه شن يقولوا عنها لكن كانت حاسه بالإحراج اللي تحاول تخفيه..
ركزت بنظرها ع وحده من النساوين لما سمعتها قالت..
/وينها سلوى لتوا ياعياده!؟
ردت عياده تقول..
/في القرآنيه الحلقه مازال ماتمت..
قالت وحده من بنات عياده..
/ع جيه معاش طول..
البنت اللي ردت هي العروس المنتظره تبادلت بعدين الحديث مع المراة اللي سألت عن اختها سألتها حتى هي عن تجهيزاتها للفرح وهي ترد عليها وطوبى تسمع بإنتباه..
غيرت نظرها عنهم لما سمعت وحده قالت..
/اهي سلوى جت..
التفتت طول لباب الصاله شافت وحده لابسه ملايه ونقاب خاشه عليهم وهي تقيم في خمارها وتقول..
/السلام عليكم..
قعدت طوبى معاها بعيونها..تشوف لإبتسامتها وملامح وجهها..هيئتها..تعرفها قبل وكانت من وقتها مستلطفتها وحتى توا حست اتجاهها الى جنب الاستلطاف براحة..
تبعتها بنظرها وهي تسلم ع الكل لعند ماوصلت فيها..
مدت يدها وقالت..
/اهلا كيف الحال..
صافحتها وهي تقول بإبتسامه..
/الحمد لله..
سالمين:عرفتيها ياسلوى!؟
ركزت سلوى في طوبى وقالت..
/شكلها مألوف..
عياده:هذي طوبى اخت سدرة اللي تحبي شخصيتها واجد..
ضحكوا..
سلوى شافت لخالتها سالمين وقالت..
/اها صحابكم عيت الواعر..
سالمين هزت راسها بإيجاب وهي مبتسمه..
شافت سلوى لطوبى وهي مضيقه عيونها بعدين قالت..
/هذي عرفتها اختها الصغيرة اللي عيونها خرش..كانت لطيفه وهاديه..
ابتسمت طوبى..
سلوى:كبرتي واجد ماشاء الله..
عياده:ليك السنين ماشفتيها..
سالمين:طوبى تقرا في العلم الشرعي حتى هي وقريب تكمل حفظ قرآن..
كلهم قالوا بأصوات متقطعه..
"ماشاء الله..الله يبارك"
سلوى بإبتسامه:شويه وجاياتك ياطوبى..مررت نظرها ع الكل وقالت..نستأذن ..
ومشت طلعت من الصاله ووحده من خواتها لحقتها زي ماقعدت طوبى تلحق فيها بعيونها لين طلعت..
🍃🍃🍃🍃🍃
"انستي ياحوا"
حواء بإبتسامه:الله يآنسك يافردوس ليكم وحشه..
فردوس بإبتسامه:ليك اكثر..مالا وين باقي الصغار..
حواء:الولاد مع عمهم "راجلها" في الجامع عندهم حلقة تحفيظ..
غرفه:فتحوهم الحلقات توا؟
حواء:ايه بدوا يرجعوا من فترة..
هزت غرفه راسها بصمت..
حواء:بالله شن حال طوبى؟
غرفه بإبتسامه:حالها باهي الحمد لله..
حواء:والله ديما في بالي وماحصلتش كيف نوصل فيها..
فردوس:غيرت رقمها تو نعطيك الجديد..
غرفه:طوبى تزوجت ياحوا..
ابتسمت بإندهاش وهي تقول..
/بالله!..
فردوس:ليها شهر لتوا..
حواء وهي مبتسمه بفرح..
/مبارك عليها وربي يهنيها ويعوضها باللي خداها خير..
غرفه وفردوس قالوا بإبتسامه..
/آمين..
🍃ومن الصاله للكوجينه..
اللي كانت فيها اريج تجهز في الضيافه وحداها بنات حواء ومعاهم جنه..
اريج:كويس معاكم راجل امك؟
بنت حواء:كويس وطيب هلبه..
ابتسمت اريج..
اختها التانيه قالت...
/بدي يعلم فينا حني وماما القرآن..
اريج بإبتسامه:الله يبارك الله يبارك..
الكبيرة قالت..
/ايه وبنقولك حاجه تعرفيه اللي عنده قهوة هني فالشارع!؟
شافتلها اريج بإبتباه وقلبها يدق بقوة قالت..
/نضال!
جنة بنبرة بهجة..
/نضوله..
ضحكوا بعدين البنت ردت علي اريج تقول..
/ايه نضال حتى هو يجينا للحوش ويعلم فيه قرآن..
تعبوا عيون اريج بالدموع وهي مبتسمه بعدين رجعت لهت بتجهيز سفرة الضيافه..
وكملوا معاها البنات هدرزة وجنة معاهم بإنتباه وهي تاكل في نوع حلو..
🍃🍃🍃🍃
بعد صلاة المغرب..
خش نضال للحوش وهو مبتسم..
سمع اصوات هدرزة وضحكة خديجه قالبه الحوش ضحك وحرك راسه يمين ويسار..
وصل في الصاله وقال..
/نسرين..
"خش خش مافي حد براني"
خش عليهم جو عيونه في عيون امه غمزلها بإبتسامه وهي ضحكت..
كاملة:تعالى قعمز حداي هدرز عليا ليا عليك واجد..
مشي لعمته قعمز جنبها وقال..
/شن حالك..
كامله بإبتسامه:الحمد لله..شن حالك انت وشن داير؟
نضال:اهو عايشين بفضل الله والحمد لله..
خديجه:عاد توا جي دورك نبوا نفرحوا بيك..
نسرين شافت لأختها بإمتعاض وهي تقول في نفسها..
"مافيش فايده فيك"
وسميرة حتى هي كانت تشوف لخديجه من طرف عينها بعدم رضا..
اما سدرة ركزت ع ملامح نضال لاحظت الضيق اللي حاول يخفيه بإبتسامه وهو يرد ع اخته..
/مازال مش توا..غير الموضوع لما شاف لسدرة بنظرة سريعه غيرها عنها وهو يقول..توا في الجامع في واحد افريقي اعلن اسلامه..
كلهم قالوا..
"الله اكبر..الحمد لله"
نضال؛واحد من صحاب بلال هو اللي حاول فيه بش دخله للإسلام..
نسرين:الله يبارك..هذا بلال ياعمتي قبل تلاته سنين ماكانش مسلم من بعد ربي طوبى اخت سدرة خلاته يخش الاسلام..
كامله بإندهاش وهي تشوف لسدرة قالت..
/ماشاء الله!..
نضال:وهو من بعد ماخش للإسلام ولى مسلم بمعنى الكلمه حفظ القرآن وقري ع الدين وعلم صحابه قرآن وتوا دخل واحد للإسلام والله وين قعدت نسمع فيه كيف ينطق في الشهاده خطرت عليا طوبى وغبطتها هلبه..الرسول قال"فَو اللَّهِ لأنْ يهْدِيَ اللَّه بِكَ رجُلًا واحِدًا خَيْرٌ لكَ من حُمْرِ النَّعم".
حمر النعم هادي البل الحمراء العرب زمان اللي يملكها فيهم عندهم من اغنى الاغنياء لأن مافيش اغلى ولاخير منها الشاهد معنى الحديث اللي ربي يهدي بيه شخص واحد خيرله من الدنيا ومافيها يابالك يهدي بيك تنين وتلاته واربعه..هنيئا ليها والله..
سدرة وهي تسمع في كلام نضال ماقدرتش تتمالك نفسها حطت يدها ع فمها وقعدت تبكي.. واللي حواليها كلهم تأثروا وفي اللي عيونه دمعت ماعدا زوز مغليه وبنتها خديجه..حتقعد ديما طوبى في عيونهم الشيطانه اللي دمرت الجالي وشوهت سمعتهم..
🍃🍃🍃🍃
ركبوا امه وخالته للسيارة وهو بعيونه ع ملامح وجه امه شاف فيه شي ماريحش قلبه..
شغله السيارة وتحرك وهو يقول..
/شن صار معاكم؟
خالته شافتله بأسف اما امه تنهدت وقالت..
/شكله مافيش نصيب ياولدي..
هو سكت شويه بعدين قال..
/امي بالله تكلمي جديات..
فهيمه:ياريت بصارة ياولدي والله البنت سكرت راسها وردتنا الله غالب شكلها مش نصيبك وليدي..
شد بقوة ع الدومان وع وجهه بدت ملامح الغضب معاش نطق بكلمة كمل بيهم الطريق وهو ملتزم الصمت..
🍃🍃🍃🍃
"هي ماتبيش يام مانقدروش نجبروها"
فايزو بضيق..
/عارفه يابنتي..لكن كنت نبيها توافق بش يطمن قلبي عليها حتى هي..من نهار طلعوا ولاد خوالك واني خايفه منهم خايفه يكونوا دايرين ملعوب بش يوصلوا لحاجه زي مادار عمك قبل نبي معين يكون قريب علينا مايقدر يوصل فينا حد لما يعرفوا انه ولى نسيبنا..انتي ريتي اللي كان يلحق فيا من نهار كلمه معين معاش ريته وقبلها مشكلتنا مع عمك من حلها من بعد ربي معين راهو مش مالك الله يرحمه..
صفاء وهي تسمع فكلام امها حست بالضيق الى جانب شعورها بالخوف..
تنهدت فايزة وقالت..
/الله غالب مانقدرش نجبرها ع حاجه زي هادي بنوكل امري لله وخلاص...
🍃وكلامهم هدا اللي كانوا يقولوا فيه فالكوجينه سمعاته مروة كله بالقصد وهي واقفه قريبه ع الباب..
وجعها قلبها ع امها وضاق صدرها..ماندمتش انها رفضت الزواج لكن استاءت من نفسها لما حست انها فكرت بأنانيه..
🍃🍃🍃🍃
"مازالي تسعه اجزاء"
سلوى:اللهم بارك..اهم شي يكون بالتجويد..
طوبى:ايه بالتجويد هو اني كنت خاشه في قروب ع الواتساب وفي معلمه كانت تعلم فينا لكن صارت معاي ظروف خلت التواصل ينقطع بينا اجتهدت وقعد نحفظ بروحي..
قامت سلوى هاتفها وقالت..
/عطيني رقمك طوبى..
ابتسمت وقالت..
/سجلي هي..
وبدت طوبى تسمي في الرقم وسلوى تسجل..
حفظت سلوى الرقم بالإسم وهي تقول..
/حتكملي معاي بإذن الله انتي وحدك مش حنضمك لأي قروب..
ابتسمت طوبى بفرح وقالت..
/جزاك الله خير..
سلوى:وإياك..حافظه الاربعين النوويه؟
طوبى:ايه الحمد لله وليا فترة نسمع في دروس للشيخ عبد الرزاق البدر...شرح كتاب الداء والدواء..
سلوى بإبتسامه:الله ع الداء الدواء الكتاب هذى دواء لكل داء كل مانكمل قرايته نرد نقراه مرة اخرى الكتاب هذى يربيك ويهذبك ويعلمك..
طوبى:والله صح..تاني مرة نقراه بس اول مرة نسمع الشرح متاعه..وقبله قريت روضة المحبين..
ضحكت سلوى وقالت..
/الكتاب هذى جاني هديه في بياني من راجلي حاليا دزه مع وحده من خواته..كاتبلي في اخره جمله عمري كله ماننساه..
"حبيني لكن قلبك خليه معلق بمولاه"
تعبوا عيون طوبى دموع تأثرث هلبه بالجمله وقلبها تفاعل معاها بقوة..
"وسعن وسعن عشا فرح سلوى جاكن"
قعدوا يزغردوا وسلوى تضحك..
وحده من عماته قالت..
/هي والله صدقتي فرحها هي وامها وباتها..
ضمت سلوى ايديها لبعض وقالت بإبتسامه حب وهي متأثرة..
/الله..محلا كلامك ياعميمه..
وطوبى تشوفلها بنظرات اعجاب وغبطه متمنيه من قلبها ربي يوصلها للي وصلتله سلوى ويعيشها هالفرحه..
☘☘☘
تعشوا وسلوى ماناضتش من جنب طوبى لعند ماجت بتروح..
سقدتها للباب وهي تقول..
/تعالي ايام الفرح كلهن راك تغيبي..
سالمين: ومن قبل اسبوع الفرح كراعها ع كراعي نجيكم وهي معاي..
ضحكوا وكاريمان قالت..
/هيا الراجل يرجى فينا..
☘سلمت سلوى عليهم وسلامها ع طوبى كان حار..
وطلعت طوبى من حوشهم ومازالت عايشه نفس الاجواء والمشاعر..
اول ماشافت عبد القيوم دق قلبها بقوة وحست بشوق شديد اتجاهه..
ركبت جنبه وهي تشوفله..
هو شافلها بإبتسامه وقال..
/شن جو؟
كاريمان بضحكه:سمح ويهبل..
سالمين؛كان تركحي روحك..
ضحكوا وعبد القيوم تحرك بالسيارة...
🍃🍃🍃🍃
"نحلف عليها العقرب عواطف هي اللي شاده ولدي عني"
نسرين وهي تمسح باب الثلاجه..
/وعلاش ماشدتش راما!؟
سكرت خديجه غسالة الماعين بعد ماحطتهم فيها وشغلتها وهي تقول..
/ماقعدتش ساعه وهربت جاية بالسيف..
نسرين التزمت الصمت ماكانش عندها رغبه تناقش اختها في شي وهي اللي عارفه كويس ان الكلام معاها مش حيجي بفايده..
خديجه وهي شاده دموعها بقوة قالت مكابرة
/شن بنحصل منهم اني بيحججوني ع ظهورهم! خل يجروا..
شافت لباب الكوجينه الخارجي لما سمعت صوت ضحك خوها عمر..
قدمتله ووقفت وهي تشوف لخوها كيف يتمشى وهو يتكلم بالهاتف..
جتها نسرين وقفت جنبها وشافت وين تشبح ابتسمت وقالت ..
/كان تشوفيها ياخديجه زي الغزاله..
خديجه بإبتسامه..
/الله يبارك اكيد احلى من هديكا الجربه .
شافتلها نسرين بطرف عينها امتعاضا..
خديجه؛غير قولي احلى منها!؟
نسرين:الحق ياربي احلى من اميمه بوين..
ابتسمت خديجه برفعة حاجب وهي تشوف لخوها..
☘عمر وهو واقف قدام شجرة الورد قال..
/تباني اكبر من عمرك..
"من اي ناحيه؟"
عمر:شكلك تفكيرك كل شي فيك..
"وزعمه هدا مدح ولاحاجه تانيه"
ضحك وقال /حاجه تانيه لكن مش زي اللي في بالك..
سكتت نفيسه..
لما طال صمتها قال..
/والله مانقصد حاجه غلط..
"عارفه"
قاللها:باهي خيرك سكتي!؟
"معاش عندي كلام نقوله نسكر وخلاص"
بفزة قال..
/لالالا غير راجي امتى هدرزنا حني..
"انا كلمتك بش نزيدوا نتفاهموا مش نهدرزوا"
ابتسم وقال..
/اني مازال ماتفاهمتش..
سكتت..
عمر بإبتسامه..
/جديات نفيسة مازال نبي نعرفك اكثر..
"شن تبي تعرف عليا اكثر من هكي كل شي عندي قلته"
ضحك ضحكه خفيفه بعدين قال..
/باهي في حاجه في بالي قعدت من اول مرة تلاقينا فيها بنسألك عليها..
"شن هي!؟"
عقد حواجبه وهو مبتسم وقال..
/علاش خليتي صاحبتك تجي قبلك علاش ماجيتوش مع بعض..
سمع ضحكتها اللي كانت هاديه وخفيفه وحس بنبضات قلبه تسارعت..
ردت عليه تقول..
"بصراحه بعتتها قبلي بش تشوف شكلك "
ضحك بتعجب..
"يعني كان مش مقبول نهيئ نفسي ونعرف كيف نرفضك من غير مانجرحك"
ضحك من قلبه بعدين قال..
/اها معناها طلعتي تهتمي بالمظاهر حتى انتي..
"لامش هكي..بس يهمني الشكل مانكذبش عليك وهدا حتى في الشرع موجود ان شاء الله تكون احسن واحد في الدنيا وماعجبنيش شكلك من حقي نرفضك وماحد يلوم عليا"
عمر رفع حاجبه وقال..
/وهذا اول اعتراف غير صريح ان شكلي عجبك..
"لا علاش غير صريح! واضحه كان ماتقبلتش شكلك علاش نوافق عليك"
عض ع شاربه وهو يضحك ويحرك في راسه يمين ويسار..
"عمر"
ارتخوا ملامح وجهه ضحكته تلاشت لما سمعها تقول اسمه لأول مرة تقوت نبضات قلبه وتنهد لاإردايا ..
كملت تقول..
"لازم نسكر توا الوقت تأخر"
هوقال..
/وين تأخر الساعه قاعده عشرة..
"خلاص هداكا هو سامحني..تصبح ع خير"
تنهد وهو مبتسم بضيق وقال..
/قدامك كل خير..
نهت المكالمه وهو نزل الهاتف وقعد يشوفله بأسف وضيق تمنى لو يجي شهر نوفمبر بسرعه تمنى تولي جنبه في اقرب وقت..
☘قدرت نفيسه في هالفترة البسيطه طلع من قلبه ماقعد من اثر اميمه لأنها كانت مختلفه عنها كليا وشاف فيها حاجات خلاته يتمناها بشده من اول ماعرفها..
اكيد عمر توا بس لقي نصه التاني اللي يتوافق معاه ويناسبه زي ماأميمه قبله لقت الراجل اللي يكملها ويصلح بيها...
🌼وطوبى لقت اللي يقدرها ويستاهل محبة قلبها اللي يحبه ربي..ماهو قلب يحبه الله مش أي حد يخشله..
🍁مقعمز جنبها ع السرير يتأمل فيها كيف تتكلم بشغف ودموعها في عيونها..
طوبى:من اول ماشفتها حسيت قلبي ارتاحلها وحبها باين في وجهها حب ربي ليها..حتى طريقتها في الكلام من زمان مش توا بس كانت حلوة ومريحه هلبه..وياقداش تلهفت لليوم اللي نفرح فيه نفس الفرحه اللي شفتها في وجهها اليوم ونولي زيها وزي هلبه زيها قريبه من ربي من اهل الله وخاصته..
🍁تعجب هلبه من كلامها..وحده زيها بكل مافيها مع كل خير داراته في حياتها كيف لتوا تشوف في نفسها بعيده عن الله!
هو من قبل لاحظ عليها عمرها ماتكلمت عن خير داراته وكأنها كانت دير فيه وتنساه..
بدت ع وجهه ملامح الحزن لما سمعها تقول بنبرة مخنوقه برغم وجود ملامح الابتسامه ع وجهها..
/اكثر جمله انقالت اليوم واثرت فيا هلبه لما وحده من قريباتها قالتلها اليوم فرحك انتي وبوك وامك صح بتلبسهم تاج الوقار يوم القيامه..خطروا عليا وقتها بابا وماما الله يرحمهم وعاهدت نفسي بعدين ندير جهدي بش نحفظ القرآن ونتقنه ومانخليشي يفلت مني ع خاطرهم بش نفرحهم وهما في قبورهم ويوم القيامه..
تتكلم ودموعها تنزل طول خداها لقلبه ضمها بقوة..باس ع راسها وقال..
/بدري كلمني المهدي تعرفي شن قالي..قال في واحد من العماله الافريقيه اعلن اسلامه في جامع المنطقه..
طوبى وهي تمسح في دموعها قالت..
/الله اكبر ولله الحمد..
كمل يقول بإبتسامه..
/تعرفي من خلاه يخش الاسلام..بلال..
بنبرة بهجه قالت..
/الله يبارك الله يبارك..في ميزان حسناته إن شاء الله..
عبد القيوم:وفي ميزان حسناتك حتى انتي ياعمري بإذن الله..
ضماته وقال..
/يارب..
زاد ضمها وقال..
/نحبك واجد ياطوبى نموت عليك موت..
ضحكت وقالت..
/حتى اني..
قاللها:والله ماحبيت في حياتي بنادم كيف مانحبك كان نلقى مايقعد من هالدنيا حد غيرك انتي مانبي شي يشغلني عنك..
بعدت عنه شويه وشافتله..شدت وجهه بإيديها وقالت..
/حبني وهلبه لكن رد بالك تعلق قلبك بغير ربي ياعبد القيوم كل حد وكل حب فاني الا الله وحبه ياعبد القيوم..
اثر فيه كلامها لدرجة كبيره خلاه يحس ان صوت نبضات قلبه مسموع في الدار كله..
قربلها وطبع ع جبينها قبله طويله بعدين ضمها وقال..
/ربي يباركلي فيك ومايحرمني منك..
بإبتسامة قالت..
/ولامنك حبيبي..
ضحك وقاللها..
/ناعليا ياقلبي المتفرفش..
قعدت تضحك ع الكلمه..
وخر وقال بضحكه..
/تي عدي جيبي الكراسه خل نعوضوا اليومين اللي عدن ع الفاضي..
ناضت وهي تقول بضحكه..
/حاضر..مشت للشنطه وهي تسمع فيه يقوللها..
"ترقدي نوريك مافيش نوم حصتين ورا بعضهن بتاخديهن"
☘ورقدت طوبى في نص الحصة الاولى وهي قريبه من قلبه قري عليها بعدين ضمها وحاول يطرد الافكار بش يرقد وبعد صراع مرير جاه النوم وراح فيه...
🍃لكن النوم قعد مجافي معين.. اللي صارله بعد رفض مروة ليه زاد اكدله حقيقة مشاعره اتجاهها..مش ميول ولامجرد اعجاب هذا حب وحب من وسط القلب..
والدليل انه رفضها ليه مااثارش غضبه لكبريائه كرجل بل وجعله قلبه اللي حبها بقوة..
وقعد النوم مجافيه لعند ماطلع عليه الفجر..
توجه للجامع اللي ليه فوق العام ملازم للصلاة فيه..الصلاة اللي ماكانش ملتزم بيها قبل لتخش مروة حياته..
..بعد الصلاة..
طلع من الجامع وخطم ع الكوشه "المخبز" متاع المنطقه اللي ساكنين فيها خدي خبزة وبريوش وكمل طريقه للحوش..
☘وفي نفس الوقت امه كانت في الكوجينه..
فاتح راديوها وتسمع في اذكار الصباح وهي طيب في القهوة وعقلها قاعد يفكر في موضوع ولدها..
خش عليها معين وهو يقول.
/صباح الخير يام..
التفتت شافاته حط الاكياس ع الطاوله..
جاته وهي تقول..
/سلمك جياب..تشرب معاي قهوة..
وهو عاقد حواجبه حرك راسه بالرفض ومشي طلع من الكوجينه..وهي تنهد بعدين مشت وقفت ع البكرج القهوة اللي كيف بدت بالغليان..
🍀وتعدي الساعات..
طلع معين مع ساعة عشرة من الحوش من غير فطور..
وامه قعدت تخمم فيه وللحظه ندمت ع انها يوم من الايام رغباته فيها ودخلتها في عقله..
قعدت طول النهار مضايقه وماتتكلمش هلبه وبنتها الصغيرة وجعها حال امها اكثر من خوها اول مرة تشوفها هكي..
حتى الغدي مابتش تتغدا من كثر ماوجعها ولدها..
بعد الغدي مباشرة روح معين..
طول مشي لدار المعيشه خش ع امه واخته وهو يقول..
/السلام عليكم..
ردوا عليه وأمه مركزه ع ملامحه..
وقف عليها وقال..
/ترا يام اتصلي بمروة..
اخته تفاجئت وتعجبت..
فهيمه:علاش!؟
بنفاذ صبر قال..
/غير اتصلي بيها يام..
نزلت عيونها لهاتفه اللي خداته ورفعاته وهي تقول..
/باهي باهي..
حطت ع رقم مروة واتصلت بيها..
☘فهالوقت مروة خشت لدارها بش تقيل بعد ماكملت غسل ماعين..
رن هاتفها استغربت من اللي يتصل بيها فهالوقت!؟
خداته مع السرير وشافت المتصل تأففت بإنزعاج بعدين قالت..
/ربي يهديك ياخالتي..
خدت نفس وفتحت الخط وكيف جت بتلقي السلام انفجعت لما سمعت صوت رجولي سبقها بيه..
☘طلع معين من دار المعيشه وامه تشوفله بإبتسامه..
بعد ماقال السلام عليكم معاش سمع صوتها..
قاللها..
/مروة معاك معين..
ماسمعش حتى نفسها..
/مروة..ردي عليا نكلم فيك..
"وعليكم السلام تفضل"
ابتسم ع جنب وقال..
/تمام اسمعيني للآخر وماتقصيش عليا بتقصي عليا بنفصل عليك
"نعم!"
ضحك ضحكه خفيفه بعدين قال بنفس النبرة..
/اللي سمعتيه..مروة اني معروف عني راجل عند كلمتي يعني كان عطيتك كلمه تكملي قرايتك معناها حتكمليها وحنقعد وراك لين تكمليها ممكن اني مش متاع قرايه صح لكن مش ضدها بكل ويهمني مرتي تكون متعلمه تمام..هادي حاجه..حاجه تانيه مروة انتي خاشه راسي وخاطري هلبه ونبيك من قلبي وبنيه صافيه مانكذبش عليك عرفت قبلك هلبه لكن والله عمري ماتجاوزت الحد معاهم وربي يشهد..انتي الوحيده اللي تمنيتك من قلبي لما عرفتك وعرفت اخلاقك ع صغر سنك الله يبارك عليك محترمه ومحافظه ع نفسك الراجل اللي يبي يدير عيلة صح ويبي مراة تصونه مايفوتش وحده زيك يامروة..ونقولهالك يامروة راهو بنقعد في جرتك لين توافقي والله مانخليك لغيري لو شن يصير واهو من توا قلتهالك..
☘كلامه خلاها تبتسم من قلبها حست بفرح وهي تسمع فيه وزاد عجبها اكثر من قبل..لكن مابتش تبين شي من اللي حست بيه وقالتله..
/باهي عطيني فرصة نفكر ونرد عليكم..
"تمام خودي وقتك وخليك متفكره شن قتلك"
شدت ضحكتها وقالت..
/ان شاء الله خير..السلام عليكم..
"وعليكم السلام"
نهت المكالمه وهي تضحك..بعدين خشت ع تطبيق تسجيل المكالمات..خدت السماعات من ع الكامدينو وعلقتهم في الهاتف وفتحت المكالمه وقعدت تسمع فيها..
☘اما هو رجع لأمه بهالهاتف عطاهولها وهي خداته وقالت..
/شن صار معاك!؟
وهو عاقد حواجبه قال..
/بإذن الله الموضوع صاير منه يام غير راجي نهارين تانيات..
ومشي طلع من حداهم..
اخته ضحكت بإستغراب وقالت..
/شكله مهددها!؟
ضحكت فهيمه وقالت..
/ولدي ونعرفه حيقعد في جرتها لين تقول باهي..
بنتها قالت بضحكه..
/حتى هو نسختك الرجاليه يام..
فهيمه بضحكه:سلمه ياربي..
🍀🍀🍀🍀🍀
وتعدي الأيام..
وطوبى عايشة احلا اللحظات في بنغازي..
سالمين مدللتها اخر دلال وترفع فيها معاها لحوش اختها اللي كانت تجهز لعرس بنتها وطوبى زادت تقربت من سلوى اللي حبتها هلبه وانسجمت معاها..
في نفس الوقت كانت تتواصل مع غرفه وسدرة وتكلم في جنة مرتين وتلاثه وكل ماتنهي معاها المكالمه تبكي شوق ليها ووجعا ع حالها اللي خلاها تنحرم من العيشه مع بوها وامها في جو اسري طبيعي زي باقي الاطفال..
قدر الله وماشاء فعل...
🍃وقدر الله في يوم من الايام اللي كانت فيهم طوبى طالعه مع عبد القيوم لشط البحر يشوفهم احد معارف عبد القيوم في الكفرة..هالشخص كانت تربطه علاقة قويه بواحد من بولد عمته سليمه...
لما شافه يتمشى مع طوبى ع شط البحر وهو شاد يدها استغرب جدا..
هيئة طوبى ومعرفته بأخلاق عبد القيوم خلوه يتأكد انه متزوجها..لكن قعد يتسائل في نفسه امتى صار وكيف صار!؟ وعلاش عيلته لاخبروا ولاقالوا..!؟
🍃🍃🍃🍃
"منين جاته قسوة القلب اللي تخليه يتم بالشهور لايكلمني ولايسأل عني"
صفيه بضيق..
/انتم اللي قطعتوه يمي حتى لما جي اخر مرة ماطلعتيش سلمتي عليه..
سليمه ودموعها تنزل..
/انا زي امه مهما ندير معاه مفروض مايقطعنيش ويدور رضاي..ولاباعه خلاص في سبه ست الحسن!
صفيه تنهدت بضيق وقعدت ساكته..
سليمه:حتى عماته موجوعات منه واجد قبل كان يسأل عليهن قريب كل يوم توا معاش عبرهن..صدمتنا فيه صدمه معقوله يبيع عماته اللي ربنه وكبرنه وهو عندهن كيف عيونهن عشان وحده!!؟ياخسارة والله ياخسارة..
صفيه بضيق:عليك دراما درتيها يمي..
سليمه بعصبيه..
/اسكتي بالله عليك اسكتي..
ع خشة واحد من ولادها شاف امه تبكي قال..
/كنك يمي!؟
مسحت دموعها وقالت..
/شي..
قعمز جنبها وقال..
/غير قولي شن مبكيك..
صفيه:اشتاقت لعبد القيوم..
رفع حواجبه وقال..
/انا جيت بندويلكن عنه سمعت اليوم شي من واحد صاحبي ولد خالتي مهيرة ياامي..
صفيه قلبها انقبض بخوف..
وامها سألت بلهفة قلق..
/شن سمعت!؟
قاللها:الراجل كان في بنغازي اليومين اللي فاتن قال حقيت غادي ولد خالك مع وحده تبان علاقته بيها قويه وكأنها زوجته!؟
غمضت صفيه عيونها بأسف..
وسليمه بصدمه..
/ايش تقول انت!؟
قاللها:اللي سمعتيه يمي الراجل حلف وقسم ان اللي شافه عبد القيوم وحتى قالي اللي كانت معاه هيئتها كيف الملتزمات..
غيرت سليمه نظرها لبنتها وهي مصدومه..
وصفيه كانت تشوفلها بنظرات ضيق وخوف...
#حلاوة_الدنيا
#طوبى
..يتبع....
