#طوبى "جنة طوبى"
#جمان_فريد
#الجزء_102"البوم ذكريات"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
(من اكثر الصلاة على رسول الله نور الله قلبه)
الإمام ابن الجوزي رحمه الله...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ينبغي على الإنسان أن يكون شديد الدّهاء مع الخبيثين!
فيودور دوستويفسكي🍃
_______________________________________
صدمتها كانت كبيرة لما شافاته قدامها..كان بالهيئة المتخفيه اللي ياما شافاته بيها قبل..
قرب منها وبسرعه قال..
/وحده ليك ووحده لمناسك ارجوك اقريها..
وحط ظرفين رساله في سلتها وفات من حداها بسرعه من غير مايلفت الانظار..
تبعاته اختها تاله بنظرها لين طلع..غيرت نظرها لأختها لقتها قاعده مصدومه..وجهها شاحب وترجف..
تاله بقلق:تعالي نروحوا..
هزت مروة راسها موافقه..وبيدها اللي ترجف خدت الظروف وحطت السله ومشت بتطلع من المكان..
تاله خدت السله وردتها لمكانها ومشت طلعت ورا اختها..
سرعت خطواتها لين لحقت عليها..
وقعدوا يمشوا مع بعض بصمت لين وصلوا للحوش وخشوا..
🍃🍃🍃🍃🍃
مقعمز وسط الصالون وع رجله مقعمزة جميلة الجميلات شاده يده وتلعب بساعته..
وهو يمرر في نظره ع ضيوفه يسأل فيهم عن احوالهم..
مختار:اريج خالي..شن جو الخدمه معاك ؟
بإبتسامه مجامله ردت..
/الحمد لله كله تمام لتوا..
هز راسه وقال؛كويس..غير نظره لأميمه وقال..دكتورة شن الامور؟!
اميمه بإبتسامه؛الحمد لله ماشيه..
هز راسه وشاف لأمها وقال..
/خالتي صفيه اي شي تحتاجوه للعرس اني حاضر..
رد عليه يوسف بإبتسامه..
/تحضر بس هدا اللي نبوه ياولد عمي..
ابتسمت طوبى..
ومختار رد:اكيد حاضر بعزومتك ومن غيرها..
تبدلت ملامح وجه يوسف للإمتعاض مع احتفاظه ع ابتسامته..
غير مختار نظره لمطيره وقال..
/شن يامطرايه..قالوا انخطبتي؟
مطيره؛ايه..
مختار:هدرزيلي عليه من يكون وكيف عرفتوا بعض!؟
رفع يوسف حواجبه وقال..
/هييه هييه ياغالي نحن هنا في ليبيا راك تنسى!
فاتن ركزت ع مختار بدي يعصب من يوسف بس كان يحاول يخفي هالشي..
مطيره؛لاهدا عيشه الاجانب نساته هلبه حاجات حتى كيف ياكلوا في الزميته..
الموجودين بدي يحسوا بأن الجو بادي يتكهرب..وسدرة بالذات كانت مركزه ع مختار وردات فعله حست قلبها واجعها عليه..
رد بإبتسامه وهو يقول..
/اسف..حقكم ع راسي خاني التعبير بس..المهم نبي نتعرف عليه..
مطيره:تو بعدين تتعرف عليه ان شاء الله..
ابتسم ابتسامه واسعه وقال..
/شكري عبد الوهاب*****..عمره 60 سنه..كان موظف حكومي في وزارة العدل ايام القذافي بعدين حول ع الاعمال الحره..راجل مواقفه حلوة وسمعته كويسه هلبه ومن عيله..شاف لهاديه وقال..كبيره ومعروفه تشرف اللي يناسبهم..
هاديه وهي مبتسمه بصدمه..
/بارك الله فيك..
مطيره بفجعه:شن مازال تعرف تاني قول!؟
مختار بإبتسامه؛أرمل..
هو يتكلم وطوبى مركزه بنظرها عليه وهي محتفظه بصمتها..
وفاتن تراقب في ردات فعل الجميع ع حديثه..ثبتت نظرها ع مطيره اللي قالت تعجبا..
/علاش تبيني نحكليك عنه كان تعرف هدا كله عليه!
بإبتسامه رد:كنت نبي نعرف رأيك فيه طريقتك في الكلام عنه تحدد هالشي..وبعدين يامطرايه من حقي نسال عنه انتي عمتي واني ولد خوك تهمني مصلحتك لازم نعرفوا لمن نعطوك المرة هادي..مش زايده علينا انتي بش نعطوك للي يجي..
كلهم وجهوا انظارهم لسدره لقوها تشوفله بضيق والدمعه عبت عينها..
عقدت طوبى حواجبها وغيرت نظرها ليه هو..
لقاته يضحك مع جنه وهو يحول في ساعته ويعطيلها فيها..
رخت حواجبها وبهدوء قالت..
/اكيد سمعت ان اياد كلم جدي ع سدرة وقال يبي يقرا الفاتحه..
شاف لسدرة وقال..
/كيف صار!؟.
سدرة وهي تحاول تخفي ضيقتها وتبان عاديه..
/رفضت..موضوع الزواج كله ع بعضه سكرته..
غير نظره لباب الفيرندا وهو يقول..
/حياتك وانتي حرة فيها بس رأيي في إياد تعرفيه..هوكويس صح لكن مش مناسب ليك نهائي..
"نتفق معاك في هادي"..
كلهم واولهم هو شافولها بين المستغرب وبين اللي يراجي فيها تكمل كلامها..
طوبى وهي موجهه نظرها لمختار..
/سدرة مش مافيش راجل يستحقها غير واحد بس..لكن الظروف جت بيناتهم..
تفاجئوا..بل انصدموا في جرأتها خصوصا في حضور يوسف اللي كان متفاجيء فيها هلبه...
كملت طوبى كلامها بعد تنهدت بحسرة وهي تقول..
/اييه..الله لايسامح اللي كان سبب..
زادت صدمتهم..واستغراب فاتن...
اما مختار كان يشوفلها بصمت ونظرة طويله..
وسدرة تمرر في نظرها بيناتهم وصدرها ضايق وقلبها مغموم..
نزل نظره لجنه وهز راسه بصمت وطوبى مازال تشوفله..
🍃الجو ولى مشحون بزياده وفاتن انتابها القلق من الوضع لهدا حبت تلطفه لما قالت..
/تنوضوا معاي نوريكم الفيلا..
مطيره:ايه خاطري نشوفها...
ناضت فاتن وقالت..
/تفضلوا..
مختار شاف لطوبى وقال..
/لو سمحتي خليها معاي..
شافت لسدرة لقتها تشوفلها بنظرات فيهم شي من التوسل..
هزت راسها وقالت..
/باهي غير ردبالك عليها حركيه هلبه..
بإبتسامه قال..
/مش مشكله..
ناضت بالغصب..ومشت طلعت مع باقي نساوين العيله ورا فاتن..
وقعد يوسف مع مختار...
لهي يوسف بتليفونه ومختار يلاعب في جنه..
غير نظره عنها لما شاف يوسف ناض وطلع بعد جاه اتصال..
رد نظره لجنه وقال بإبتسامه..
/قعدنا بروحنا ياحلوة..تنهد وقال..مرة تانيه نقولك اني اسف..انتي ماليك ذنب في شي..صدقيني ياحلوة..بعد هكي نضر نفسي والناس كلها ولانضرك بنظرة..
ابتسمت ابتسامه حلوة وهي تشوفله..
ابتسامه خدت قلبه كله...ضمها وهو يشم في ريحتها..تعبوا عيونه بالدموع وقال..
/حبيبتي..
تباعد عنها وهو يشوف لعيونها ضيق عيونه وزاد ركز فيهم..
بلع ريقه بعدين ابتسم وقال..
هيا..خدي نفس وطلعه وكمل يقول..هيا نوضوا نوريك المفاجأه اللي دايرهالك...
وناض بيها ومشي طلع من الصالون...
🍃وقلب امها ماهنهاش..من لما طلعت من حداها والخوف والقلق تملكوها..
انسحبت من حداهم ومشت بترجع للصالون..
وين وصلت فيه خشت لقاته فاضي...
جي بين عيونها اللي صار يوم خطفها الجالي الشعور البشع اللي حست بيه وقتها رجعت حساته مرة تانيه..
طلعت بسرعه وقعدت دور عليها بدون وعي..
تتفكر في اللي صار هداكا اليوم وقلبها يدق بسرعه من الخوف الشديد...
تمشي ودور وهي مش حاسه بروحها لين تلاقت مع امينه..
وقفتها وقالت بخوف..
/ماشفتيش مختار وين رفع بنتي!..
امينه وهي مستغربه حالتها..
/في القوظه اللي فوق..
ركبت طوبى الدروج وهي تجري وعيون امينه تلاحق فيها لما ادرقت عنها جي في بالها يوم تهجم المحجوب ع مختار واتهامه ليه بخطف بنت اخته..
عقدت حواجبها بضيق ودموعها عبوا عيونه بعدين لفت ومشت للكوجينه..
🍃وطوبى وصلت في الدار اللي قالتلها عليها امينه..
وقفت في بابها وهي تمرر في نظرها عليها بمفاجأة وانبهار..
كانت دار اطفال مكتسيه باللون الوردي...
مليانه العاب من كل الاشكال..وفيها سرير صغير لونه ورده وابيض...وع الحيوط في صف نجوم لما ظلم الدنيا يبان منهم ضي...
"شوفي هادي..هادي محلاها"..
قلداته وهي تقول بلغتها الحلوة..
"لاها" ومدت الم اللام وهو يضحك عليها..قرب منها باس ع راسها وقال..
/محلاك ياقلبي..ربي يحفظك..
خدت نفس ورجعت لهدوئها..بعدين قالت..
"انتم هني!؟"
هو شاف للباب وقال..
/خشي.. خشت ومشت ناحيتهم...وصلت فيهم وقعمزت جنب بنتها..ابتسمت من قلبها وهي تشوفلها كيف تلعب بمجموعه دباديب متوسطات الحجم..
هو شافلها وقال..
/وجهك اصفر..
قامت عيونها وشافتله..
ابتسم ع جنب وقال..
/خفتي لما مالقتيناش لوطا!
تنهدت وقالت..
/مش بيدي..عشت معاها مواقف لين نموت ماننساها مواقف كلها خوف ورعب..
حس قلبه دق دقه موجعه التعبير مش مجازي بل حقيقي قلبه وجعه فعلا..
قعد مركز بنظره في عيونها وهو يسمع فيها تقول..
/تعرف..لولا لطف الله سبحانه وتعالى..نزلت نظرها لبنتها ونزلوا من عيونها الدموع وهي تقول..
"كنا من سنه تحت التراب"
زاد قلبه وجعه..وحس وكأن في يد التفت ع رقبته وبدت تخنق فيه..
طوبى ودموعها تنزل..
/لكن اللي مفرحني انها ماكانتش واعيه بشي من اللي ريناه مع بوها..ولما تكبر مش حنحكيلها شي عنه..نبي بنتي تحب بوها..نبيها تحس ان ليها اب كويس ويحبها حتى لو كان بعيد عنها..صح الجالي فيه هلبه سيئات لكن فيه حنيه ويحب بنته واللي داره ماكانش بإرداته حالته المرضيه هي اللي خلاته يدير هكي..ماحاولش يأذي بنته بإرداته..
سكتت وهي تمسح في دموعها وبين عيونها تمر مشاهد من هداكا اليوم الصعب..
وهو قدامها يسمع فيها ويفكر في كلامها..يفكر في المغزى منه...
الجالي ماكانش بعقله لما حاول يقتلهم..
لكن هو كان بعقله لما سلمهم للجالي وخلاهم يواجهوا الموت معاه...
مختار وقتها ماهمه حد غير جنه..جنة وبس..نزل نظره ليها..يشوف فيها كيف تلعب بلطف وبراءة...
حس وقتها ان اليد الملفوفه ع رقبته شدت القبضه عليها بقوة..معاش قادر يتنفس..ناض طول ومشي بسرعه طلع من الدار..
حطت طوبى يدها ع فمها بش تكتم صوت بكاها ماتبيش تفجع بنتها ولاتخلي حد يسمعها...
حاولت تهدي نفسها وتوقف بكي..ونجحت في هالشي..بعدين خدت بنتها بالألعاب وناضت بيها ومشت طلعت من الدار...
🍃ومروة في دارها مسكرة عليها الباب..
تشوف للرساله اللي كتبهالها مالك بضيق..
فكرت هلبه تمزقها وتلوحها..لكن في الاخر حسمت امرها وقررت تفتحها..
فتحتها بإيديها اللي يرجفوا وبدت تقرا..
(مالقيتش طريقه غير هادي نوصلك بيها كلامي عارفك مش حتقبلي تشوفي في وجهي كيف لو طلبت تسمعيني..
مروة سامحيني نسألك بالله تسامحيني اللي درته معاك ربي ردهولي كله ووالله نادم بنموت لليوم عليه..مروة اني توا ماشي للجبهة نحارب..وليا شهور في الحرب مش توا بس..قداش مرة صادفني الموت وربي نجاني فهمت انه يبيني نطلب منك السماح يامروة..ارجوك يامروة ارجوك اسألك بالله العظيم اللي عرفته بعد ماعرفتك تسامحيني وتعفي عني بش يعفي ربي عني يامروة..كان صار ومتت نبي نموت واني مرتاح بالله عليك يامروة ارجوك..اخر حاجه ماتخليش مناسك بكل خليك معاها اعتبريها وصية ميت يامروة بالله عليك مناسك ماتخليها..ولأخر مرة نقولك سامحيني..سامحيني بالله عليك)...
دموع مروة طاحوا ع حروف كلمات مالك المرتبكه..اشفقت عليه..ووجعها قلبها ع صاحبتها..قعدت تفكر كيف بتعطيها رسالته!؟..شن بيصير فيها لو قرتها وعرفت مكانه!!؟..
حطت يدها ع صدرها..غمضت عيونها بوجع وبدت تبكي بصمت...
🍃وتاله في الكوجينه توتي في الغدي وهي تفكر في اللي صار وتبي تعرف شن كاتب مالك لمروة في الرساله🍃
🍃🍃🍃
وفاتن تبي تعرف شن اللي خلا مختار فجأة يستأذن ضيوفه ويطلع مع الأقجم..
هو تحجج بأن عنده شغل ضروري لكن هي ماصدقتش عيونه يقولوا غيره هكي..عيونه اللي لاحظت فيهم اثر الدموع..
اما ضيوفهم صدقوا حجته ماعدا طوبى اللي كانت عارفه السبب الحقيقي..طلع هارب..
☘☘☘☘☘
وكملوا باقي الزيارة وهما يحاولوا يستمتعوا بأجوائها ع قد مايقدروا واكثرهم فاتن..
لكن سدرة وطوبى كانوا يسايروا مسايره كل وحده فيهم حاسه بضيقه في صدرها ماقدروش داخليا ينسجموا مع اللي حواليهم...
قبل المغرب بشويه روحوا..ولهداكا الوقت مختار ماروحش..
بعد ماطلعوا اتصلت بيه فاتن مرارا وتكرارا ماردش عليه..
مالقتس قدامها غير انها تتصل بالأقجم..
"سامحيني مانقدرش نقول وين لكن كوني هانيه اموره تمام"..
فهمت ان في شي صار بينه وبين طوبى تحديدا لأنها اخر من مكان معاه واللي صار اثر فيه لدرجة خلاته يبي يقعد بروحه..
هزت راسها وقالت..
/فهمت..بالله خلي عينك عليه يااقجم..
"قتلك كوني هانيه مدام"
فاتن:كان صارت حاجه كلمني طول..تصبح ع خير..
نهت المكالمه ومشت بإتجاه الدروج شافت امينه ماشيه لدارها وقفتها لما ناداتها..
/امينه..
التفتت امينه وقالت..
/أؤمري..
فاتن:مايأمر عليك ظالم..بكري ماصار شي قصدي ماشفتي شي غريب!؟
امينه بعدم فهم:بخصوص ايه؟
فاتن:شفتي طوبى لما كانت مع مختار؟
امينه:شفتها وهي بدور عليهم هو وبنتها وكانت خايفه قوي شكلها متعلقه بيها جامد..
عقدت فاتن حواجبها وهي تهز في راسها بإيجاب بعدين قالت..
/تصبحي ع خير..
وركبت الدروج..وامينه بعد تنهدت ولت كملت طريقها لدارها..
🍃🍃🍃🍃🍃
هديكا الليله..كانت صعبه ع مروة ومختار وسدرة...
كل منهم قعد ساهر مع الخوف والحزن والاحساس بالذنب..
مختار كان في مزرعته..راقد ع سريره وهو يتفرج ع مقاطع جنه اللي كانت تبعتله فيهم آلاء..لسبب غير معروف بالنسبه ليه قعد محتفظ بيهم..
كان يتفرج وهو يبكي..خاطر ع باله اليوم اللي مشي فيه وطلب يشوفها كانت الخطوة القبل الاخيره في تنفيد خطة انتقامه من امها وتلقينها الدرس..
ترددت ع مسامعه الجمله اللي قالتها طوبى اليوم...
"لولا لطف الله سبحانه وتعالى كنا من سنه تحت التراب"
ضم التليفون لقلبه الموجوع وهو يبكي بحرقه..
يبكي ألما وندما ع اللي داره في جنه..فقط اللي داره في جنة لأنه توا بس استوعب انها طفله بريئة مالهاش ذنب ولازم تطلع من كل الحسابات..
🍃🍃🍃🍃🍃
عدت هالليله..ولحقها صبح تاني يوم..
فايزة لاحظت اثار البكي والحزن ع وجه بنتها حاولت تعرف منها خيرها وبنتها كذبت عليها الكذبه المشهورة.
"عندي اختبار و ماقريتش كويس"
وطبعا فايزة ماصدقتش وقعد عقلها معاها...
🍃وصلها الباص لمدرستها..
خشت وهي خايفه تشوف مناسك..وتفكر كيف وامتى تسلمها امانة خوها...
وتلاقوا..وسلموا ع بعض..وقعدوا يحكوا عن الاختبار ويراجعوا مع بعض..ومروة تساير وشاده دمعتها بقوة...
🍃داروا الطابور..وركبوا لفصلهم..وبدوا بإختبارهم ..
انقضى وقت الحصه وانتهي الاختبار وطلعت المدرسه..ويشاء الله تغيب ابله الحصه اللي بعدها وتحل محلها ابله احتياط وهني شافت مروة الوقت المناسب بش تحكي مع مناسك..
وحكتلها اللي صار بالتفصيل وعطتها الرساله..
خدتها مناسك وهي ترجف ودموعها نازلات زي السيل ع خدودها...
فتحتها وبدت تقرا..
(مناسك ياهبله يادوشه..عارفك زعلانه مني..سامحيني مش بيدي بعدت عليك واني والله مانبي نخليك لكن هكي خيرلك يامناسك تقعدي بين عمامك ولاتقعدي ماخوتك اللي طلعوا يشبهوا امك اكثر من بوك..مناسك نبيك تدعيلي وتسامحيني وخيتي ع كل مرة وجعتك فيها بالكلام وباليد عارفتيني نحبك ياشفشه..وقولي لأمي فوزيه تسامحني وقوليلها مالك مسامحك..اخر شي خليك ديما مع مروة ماتصاحبيش غيرها يامناسك..وردي بالك ع روحك..)
كلمات مالك تبين انه يكتب فيها وهو يبكي وموجوع جمل غير مرتبه عشوائيه لكن الاحساس اللي فيها وصل لقلب اخته الموجوع..خلاها تنهار...بكت مناسك بالعبره..
مروة وزميلاتها والابله حاولوا يهدوها لكن ماقدروش..حالتها كانت صعبه لدرجة انها فقدت الوعي..
🍃وهداكا اليوم عرفوا خوته وخواته انه وين كان مختفي طول هالفترة وحالتهم كانت بين الصدمه والانهيار...
🍃🍃🍃
"قلبي وجعني هلبه هلبه مش عارفه ياطوبى كيف نوصفلك"
طوبى وهي حاضنه مروة ودموعها ينزلوا..
/فاهمه شن تحسي..صح يوجع هلبه لكن في النهايه كله مقدر ومكتوب من الله..ندعوه انه يحفظه ويرده لوخيته ويفرج عليهم..اهم شي توا انتي سامحتيه؟!
مروة وهي تبكي..
/لوجه الله بعدين ع خاطر مناسك..ااه ياطوبى قداش تمنيت لو نقدر نخليها تعيش معانا..وبعبرتها قعدت تبكي وطوبى ضم فيها وتمسح ع شعرها وظهرها..
قعدت معاها لين هدت وقرت عليها وياخد مروة نوم..
رقدتها طوبى ع سريرها بعدين غطتها وطلعت لدار المعيشة..
خشت عليهم وهي تقول..
/رقدت..
فايزة بنبرة باكيه..
/لاحول ولاقوة الابالله والله حالهم يوجع الوليد واجعني هلبه علاش يدير هكي علاش يرمي في روحه للموت..
سدرة بإستياء وأسف..
/والله مارابحها فيهم واحد شباب زي الورد قاعدين يريحوا ع ماليهم بخسارة وخلاص..
مطيره بحزن؛حسبنا الله ونعم الوكيل..
صفيه ودموعها في عيونها..
/ربي يحفظلي وليدي والله كل يوم نقعد نار وخايفه وين يرن اي تليفون قلبي يفز..
سدرة:حسين بعيد عن الجبهه امي ماتخمميش فيه..
مطيره:ربي يحفظه وليدي ومايورينا فيه سو..
كلهم بأصوات متقطعه قالوا وراها..
"آمين"...
🍃ومن الدار للصاله..
كانت تاله تكتب في واجبها واريج تكلم في آلاء مكالمه ماسنجر فيديو..
اريج بضحكه:خشمك ولى زي البطاطا.
"اسكتي ياتافهه"
ضحكت وقال..
/وجهك ولى زي السفنزة عيونك معاش يبانوا كيف مازال يشبحلك عزيز بس!
"ياقردة يسمع فيك ياقردة"..
حطت اريج يدها ع راسها من الصدمه والاحراج وتاله تضحك عليها...
🍃🍃🍃🍃🍃
"جعان نضال ولانص نص"
نضال:نص نص...
ع خشة عمر فجأه وهو يقول..
/اني كتريلي راني جعان..
سميرة بضحكه؛حمد لله ع السلامه..
عمر بإبتسامه؛الله يسلمك..
نضال؛غير ركزي فيها كيف قالها..كتريلي راني جعان..وبدي يغني فيها..كتريلي..راني جعان..كتريلي راني جعان..ياسمورة راني جعان..
وسميره وعمر يضحكوا عليه..
وتخش مغليه للكوجينه وهي تقول..
/وليدي..
ومشت حضناته وهو يبوس ع راسها..بعدين خداته من ذراعه وهي تقول..
/اكيد تاعب وجعان..اشرت لسميرة..سقيله غداه..ومشت بولدها طلعت بيه وهي تقول..
/شن داير ولدي..
نضال قعد يشوف لسميره وهو يضحك..
وهي ضحكت وحركت راسها يمين ويسار وبدت تسقي للولاد في غداهم..
☘برغم المناوشات المستمرة بينهم كضراير لكن الحياة ماشيه معاهم هاديه وحلوة..هالاجواء الهاديه خلقت جو لطيف للصغار مخلي نفسياتهم مرتاحه..
حمزة تقرب هلبه من محمد حامد ويزن وانسجم معاهم ويومه كله مرافقهم..
جوري وسدرة علاقتهم ولت حلوة هلبه والزوز بدوا يباتوا في دار عماتهم زمان..اما معاذ كان غارق في حب ودلال سميرة وجده محمد وعمامه...
صغار نجاه نسوها..مش بس نسوها مايبوهاش تروح..مايبوش حياتهم الحلوة اللي عايشينها حاليا تتغير عليهم..
ماينلاموش..معاها عمرهم ماحسوا بالراحه والحب والاستقرار..حتى وان كانوا يحبوها لأنها امهم لكن يفضلوا هالحب يقعد من بعيد لبعيد...
🍀🍀🍀🍀🍀
وتعدي الأيام..
ويغيب مختار عن حوش طوبى هو ومرته التواصل بيناتهم كان بس بالهاتف مع فاتن...
سدرة مااهتمتش لغيابه هلبه لأنها فسراته ع انه انشغال بأعماله ومعروف مختار لما ينشغل معاش يدور حد..
هي توا همها بس طوبى اللي قاعده حابسه روحها في الحوش من المشيه لحوش مختار معاش طلعت...
يومها كله مع بنتها ومع القرآن اللي قاعده تحفظ فيه وسط هدا كله كانت قليله الكلام ديما سارحه وماتاكلش كويس..
🍃ويامن يشوف حال القلب المعلق بيها غيابها متعبه هلبه ومخوفه..مخليه مش قادر يدير شي ولايركز في شي...
"اخر مرة حكيت معاها فيها نهينها ع سلامة اختها"
عبد القيوم بقلق؛باهي كلميها اليوم..
"حاضر تو نكلمها ونرد عليك تمام"..
هو قال:تمام..سلام..ونهي المكالمه..
حط التليفون ع الطاوله جنبه وهو مضايق ورجع لشغله وهو يحاول يركز فيه...
لكن جاه اتصال قطع عليه هالمحاوله..خدي التليفون وشاف المتصل..بدت ع وجهه ابتسامه وهو مضيق عيونه..بعدين فتح الخط ورد...
🌼🌼🌼
"ياهلا صفصف شن الاخبار"
"تمام الحمد لله انتي شن حالك وشن حال حنونه وهلك كلهم"
طوبى وهي تخلط في ماسك للوجه..
/الحمد لله الكل بخير انتم شن حالك شن حال وليد وخالتي سليمه..
"الحمد لله كلنا تمام..وينك مغيبه ليك ايام مسكرة النت"
طوبى:والله الايام هادي نعولوا لعرس ولد عمي معاش لهيت بشي..
"اها الله يبارك ربي يتمم ع خير وان شاء الله بهناه"
بإبتسامه ردت تقول..
/آمين..تسلمي حبيبتي الله غالب لولا هالحرب راكم حضرتوه معانا..
"ايه الله غالب..ربي يفرج وينهيها قريب"
طوبى:اللهم آمين آمين..
"باهي مانعطلش عليك حبيبتي سلمي ع هلك وباركي لسميتي"
طوبى بضحكه؛يوصل حتى انتي سلمي ع خالتي سليمه..
"يوصل..بالسلامه"..
طوبى:بالسلامه..نزلت التليفون وهي تشوف للشاشه بعيون مغرقتهم الدموع..كانت تتمنى لو تقدر طول المكالمه معاها وتحكي عنه معاها..تبي تسأل وتفهم وتتأكد...معاش تبي قلبها يعذبها معاه...معروف القلب لو حب يدير مايبي لاسلطان عليه الا اللي خالقه..
غمضت عيونها بشده بعدين فتحهم وقالت..
/لاحول ولاقوة الابالله..حطت التليفون وين مكان وخدت صحن خلطة القناع ورجعت تخلط فيها...
🌸🌸🌸
التجهيزات لعرس يوسف كانت ع قدم وساق من جميع النواحي..
العرس حيكون تلاته ايام..
يوم سهريه..ويوم الكسوة..ويوم الدخول..
حفله الدخول حيديرولها خيمه في جنان حوش علي الواعر..
وكذلك جهينه عزمت اهل العريس يجوا يحضروا حفلتها في الصاله..
واللي بيمشوا..مطيره..سدره..غرفه..هاديه..اميمه..
ولأن الحفله حتكون صاخبه فرقه واغاني اريج وطوبى اعتذروا عن الحضور...لكن حيكونوا مع صفيه وفايزة يساعدوهم في الاشراف ع حفلة الدخول...
☘☘☘☘☘☘
يوم الثلاثاء..
27نوفمبر...سنة 2019..
الساعه 11:00صباحا..
هاليوم كان يوم عقد القران...
اميمه اللي كانت توثق في احداث العرس بالفيديو دارت لقاء ع الواقف مع خوها تسهوكت عليه لين خدت ضربه ع راسها..
اميمه وهي تتحسس في راسها..
/مايبصروش معاه هدا..شني يده هادي مش يد بشر..
شويه رن تليفونها طلعاته من جيب سروالها..شافت المتصل ابتسمت بحماس ومشت خشت للحوش...
🍃وفي الحوش اللي مجاورهم..
خشت طوبى لدار الدروج ركبت بش تجيب حاجه من دار الخزين..
وصلت فيها وخشت..وبدت دور لين لقت اللي تبيه..لما خداته وجت بتطلع فاتت من جنب الروشن...سمعت صوته يتكلم قلبها فر فران...حاولت تقاوم رغبتها في شوفته ع قد ماتقدر لكن هالمرة شوقها غلبها..
قدمت شويه للروشن اللي كانت البرسيانه متاعه مردوده..شافت منها..لقاته واقف مع يوسف وحسين..
ابتسمت لما شافت حسين اليوم بس جي بعد غياب طالت المدة متاعه..بس سرعان ماردت نظرها للغيابه كان ليه اثر قوي عليها
ركزت بنظرها ع تفاصيله..
ع جاكيته البني..وقميصه الابيض وسرواله الاسود..لكن لأول مرة تركز ع اللي لابسه في رجله..بوت رجالي لونه بني
مررت نظرها عليه زي المسحورة وكأنها اول مرة تشوف في حياتها راجل انيق..
اكيد شافت..طليقها كان مثال للأناقه بس على مافيش..
لكن عبد القيوم من برا ومن داخل مثال لكل شي حلو..
رفع يده اللي فيها الخاتم ومسح شعره من الخلف وهو مضيق عيونه انتباها مع كلام حسين..هي هني حست روحها بتفقد الوعي..
وخرت..وقعدت واقفه في مكانها غمضت عيونها بشده وهي تردد همسا..
"استغفر الله..استغفر الله..يارب اغفرلي يارب..استغفر الله"
فتحت عيونها..خدت نفس وزفرت..بعدين مشت بسرعه طلعت..
وين جت نازله سمعت صوت ضحكته قلبها رجف ودموعها عبوا عيونها وهي تتفكر فيه كيف كان مع سلافه..وتفكرت كلام سميره..حست بصهد يلفح في ضلوعها..كانت ع وشك البكاء لكن شدت روحها بقوة..
طلعت من دار الدروج وخشت للحوش..
بدون ماتشوف حد ولاتركز ع حد حطت الحاجه اللي جابتها في الكوجينه ومشت للدار طول..
فتحت الباب وخشت..ويجوا عيونها ع شي خلاها تفتحهم ع وسعهم بإنبهار..
شافت فستان بناتي للأطفال في عمر جنه كان حلو ومميز للغايه..قدمتله وهي تقول..
/من جابه!!؟..وقفت قدامه بعدين رفعت حاجبها وقالت..زعما هداكا!؟
التفتت للباب بتنادي انفجعت وهي تقول..
/شن ديري هني!؟
اميمه بضحكه؛عجبك!؟
شافتلها شويه بعدين ردت نظرها للفستان وقالت..
/قصدك انتي خدتيه!!؟
اميمه بإبتسامه:هو مني لكن ماشريتاش.
فكرت طوبى شويه بعدين شافتلها بدهشه وقالت..
/انتي فصلتيه!!؟
هزت اميمه راسها وهي تضحك..
بدت ع وجه طوبى ملامح ابتسامه حب وامتنان..قدمتلها بسرعه وضمتها بقوة..
واميمه حضنتها وهي تقول..
/عجبك!؟
طوبى بنبرة باكيه.
/هلبه فوق ماتتصوري..شكرا ميمو شكرا ربي مايحرمني منك..
نزلوا دموع اميمه وهي تقول..
/ولامنك ياقلبي..
☘ومن فم باب الحوش..
خشوا مختار وحسين ويوسف ووراهم فاتن...
شافتهم مطيره مشت بسرعه لحسين وهي تقول بضحكه..
/افندينا..
ابتسم حسين وقدملها وصل فيها وضمها وهي تحضن فيه وتقول..
/الفال ليك نعولوا في عرسك..
ضحك وقال..
/ان شاء الله... بعدت مطيره وبدت تصفق وتغني..
..والعقبة لحسونه ياعين..نجيبوله كاملة الزين..
قدمت هاديه اللي كانت تتفرج عليهم وقعدت تصفق وتغني معاها وفاتن شاركتهم..
مطيره..
هدا عرس وسيفه قالوا..والعقبه للي مازالوا...
ويطلعوا البنات ومعاهم فايزة وبناتها..غرفه بس اللي قعدت واقفه في الباب تصفق..
مطيره..
النشاد على عماته..جعنه ناجح طول حياته..
وهما يردوا وراها ويصفقوا..وصفيه تسلم ع حسين..
سدرة..
..يامبروك عليه اللمه..فرحانات خواته وامه..
وقعدوا يردوا وراها..
ويوسف وحسين يتفرجوا على فرحتهم وهما مبتسمين..
لكن مختار اللي كان مدرق عيونه بالنظارات كان متلهف يشوف جنه...
وتطلع هالكركوبه دب ع رجليها ومعاها ولاد خالتها..
وقفت وقعدت ترقص..
ضحك مختار من قلبه وقال بنبرة صوت حلوة فيها بحه..
/ياعمري..وقعد يصفقلها..
كلهم شافوله..وحسين بالذات تعجب واندهش...
طوبى وهي تغني..
ياسلم بنتي ني..يانجي بنتي ني..
ويلي عنده راس بنيه..
ردوا وراها...
يانجي بنتي ني..
طوبى..
منها اميمه ومنها اوخيه..يانجي بنتي اني..
وتكمل اريج..
نجي اللي عنده بنتين..
يانجي بنتي ني..
ربي يحرسهم من العين..
يانجي بنتي ني..
وتغني فايزة..
ياسعدودي تلاته بنات..
يانجي بنتي ني..
وين نقيل وين نبات..
يانجي بنتي ني...
ورجعت طوبى تغني..
واربعه بنته ياعين..
يانجي بنتي ني..
تقول حواحب مقرونين..يانجي بنتي ني..
رفع مختار حاجبه وهو يشوفلها..
وهي مكمله تغني..
واربعه بنته ياعين يانجي بنتي ني..
ع الطاعه والفعل الزين..
يانجي بنتي ني...
زغردوا مطيره وصفيه والباقي شادين ضحكاتهم حتى فاتن ماعدا سدرة اللي غنت...
وياسلم خوي الكبير...يانجي خويا ني
ع راسي زي الشنبير..ياسلم خويا اني..
بعتلها بوسه..هي ضحكت..
🍃وغرفه من باب الحوش تعلق بصدمه..
/لاسدرة مش بلاش هدا موكلها بسبوسه!
وطبعا هدا كله وحسين ويوسف برا من لما بدت طوبى تغني انسحبوا وطلعوا..وقعد مختار المتحرر والمتحضر كمل معاهم الشوط كله...
☘☘☘☘☘
واستمرت اجواء الفرح في حوش الواعر..
وعلي الواعر اضطر مجبورا يقعد في المكان اللي فيه مختار..
بعد الغدي..
كان مقعمزفي المربوعه يشرب في الشاهي الأخضر وهو يهز في رجله بعصبيه..
يسمع في مختار وهو يهدرز مع ولاد عمه ع البوم صور قديم كان مطروح قدامهم..
في صور من ايام السبعينات لبداية التسعينات..
يوسف بضحكه:الله يادنيا...
قلب حسين صفحة الالبوم وهو يقول..
/معقوله ماعنديش فيه صور بكل!؟
ويطيحوا عيونه ع صورة لسدره في عمر تلاته سنوات وجهها ملبز بالشكولاته وشعرها منكوش..
طلعها مختار وهو يقول بضحكه..
/خل نحرق دمها شويه..
ضحكوا ولاد عمه..
قلب حسين الصفحه اللي بعدها جو عيونهم الزوز ع صورة خلتهم يضحكوا بدموعهم..
كانت لمختار وهو صغير في عمر سنتين لابس حفاظه بس..
جاته صدمه لما شافها..
لكن يوسف طلعها وناض بيها وهو يقول..
/ماينحرقش دم تومتي بروحها..
ناضله مختار وهو يقول..
/جيب جاي..
طلع يوسف وهو يقول..
/الملزوم يتعب..
طلع في جرته مختار وحسين لحقهم وهو يضحك..
بعد ماطلعوا...
حط علي الواعر طاسة الشاهي جنبه ودموعه محبوسات في عيونه...
☘في جنان الكوجينه..
كانوا اميمه وطوبى واريج يغسلوا في طواسي الشاهي..
وفاتن واقفه ع فايزة وسدرة تحت شجره الياسمين يهدرزوا..
فجأه..سمعوا صوت جري..
وجهوا انظارهم القدام..بان عليهم يوسف جاي يجري بسرعة البرق وهو يقول..
/غير شوفوا شوفوا..
مختار وقف حدا ع الكرمه وحط ايديه في نصه وحسين واقف وراه يضحك عليه
طوبى سيبت اللي فيدها وجت ليوسف خدت منه الصورة وشافتها..
ضحكت تعجبا وقالت..
/قصدكم كان بيبي!
يوسف وحسين ضحكوا بعلو الصوت..
والبنات يضحكوا..
قدمت لفاتن وقالت..
/شوفي راجلك..
خدت فاتن الصورة وهي تضحك قالت..
/ياقلبي كان كيوت هلبه..
طوبى:ولا ماتصدقيش انه نفسه مختار.
ضحكت فايزة سدرة وهي شاده ضحكتها خدت الصورة وقالت..
/خلاص عاد..
ومشت بتعطيهاله لكن وقفها حسين لما قال..
/ياهبله خدالك صوره من العهد البايد حتى انتي منظرك فيها يبشرك بعام الفقر..
فتحت عيونها بصدمه وقالت..
/شن هي!!..شافت لمختار رفعت يدها اللي فيها صورته وقالت..
/سلم واستلم..
هو بضحكه؛غير تعالي باهي..
قدمتله..وطوبى ويوسف لحقوها..
وصلت فيه وقالت..
/سلم واستلم قلنا..
ضحك وقال..
/مدي اللي عندك..مد يده اللي فيها الصورة وهي مدت يدها اللي فيها الصوره..
وفجاه بدون سابق انذار اختفوا الزوز..
طوبى وهي ترقص في حواجبها..
/انسوهم خلاص...
ومشت بيهم تجري وخشت للحوش من باب الكوجينه..
مختار:اما البنت هادي..
"احلى حاجه تخش حياتك"
التفت لحسين اللي مكمل يقول..
/احلى حاجه تخش حياتي درتها بنتي ..
ابتسمت سدرة وهي تشوفله بعيونها المعبيات دموع بعدين قالت..
/اي حد تخش حياته يحبها ويتعلق بيها..
ع طلعتها هي وجنه..
شافها مختار قال بضحكه..
/اني هديكا علقت قلبي هديكا..
حسين بإبتسامه..
/جيبيها سدرة..
سدرة وهي شاده دموعها بقوة..
/حاضر..ولفت ومشت..
قرب حسين لمختار وهو يشوف لسدرة كيف تباعدت بعدين قال..
/لولا الله ثم المهدي راك معاش شفتها لاهي ولاامها..
اختفت الضحكه من وجه مختار..ورجع قلبه وجعه بقوة..
وين بانت عليه جنه مشالها بسرعه وهي ضحكت من فرحتها لماشافاته..
خداها..رفعها وضمها وهو يشم في ريحتها..
وسدرة وحسين يشوفوله بنظرات ملئها الحزن والأسف...
🍃🍃🍃🍃🍃🍃
الساعه 9:00ليلا..
كانت باديه السهريه في جنان حوش علي الواعر..
والشوط كان حامي ومسموع في الشارع كله...
وفي هاللحظه..
تخش سيارة"كيا سيراتو" سوداء كان يسوق فيها عمر شنيبه..
:عرس في حوش الواعر!؟
عمر:ايه عرس ولدهم يوسف..
هز راسه بصمت...
وصل بالسيارة لباب القراج..انفتح تلقائيا..
خشت...وتسكر الباب وراها..
عمر:حمد لله ع السلامه باش مهندس..
فتح الباب ونزل ومشي طلع من القراج للجنان قعد يمشي وهو يمرر في نظره عليه لين وصل في باب الحوش..
ويطلع قدامه محمد المهدي..
محمد بدهشه:عمي!..
وقدمله بسرعه وضمه..
حضنه بقوة وقاله..
/كبرت ودرت لحيه..
ضحك محمد وتباعد وهو يقول..
/حمد لله ع ااسلامه..
قاله:الله يسلمك..
عمر:خش لأمي خش..
خدي نفس ومشي خش للحوش وهما وراه..
محمد؛في الصاله..
توجهوا للصاله..وصل في الباب ابتسم وخش عليها..
هي لما شافاته شهقت وقالت..
"الجالي!"
وناضتله تجري لين وصلت فيه وضماته بقوة وبدت تبكي..
وهو حضنها وباس ع راسها ودموعه في عيونه...
#ألبوم_ذكريات
#طوبى
...يتبع....
