စစ်ဘက်ဆိုင်ရာတိုင်ပင်ခံ မျိုးဆက်များ

Chapter 23.2

အခန်း ၂၃ အော်ထျန်းထောင်ကျနေတယ် (အပိုင်း ၃)

နောက်ဆုံးတွင် ကုယွင်တစ်ယောက် စားပွဲနှင့်အနီးဆုံး ကုလားထိုင်ကို ဆွဲယူဝင်ထိုင်ကာ သူ့ကို စောင့်နေရုံသာ တတ်နိုင်တော့သည်။ သူမ ထွက်သွားဖို့ အတင်းလုပ်နေမယ်ဆိုရင် စုလင်းရဲ့ စရိုက်အရ သူမတို့ နှစ်ယောက် နောက်ထပ် ရန်ပွဲ အကြီးကြီးတစ်ပွဲလောက် ထပ်နွှဲရမှာ သေချာနေတယ်။ သူမလည်း သူနဲ့ တနေကုန် အော်ဟစ်ရန်ဖြစ်နေရတာမျိုး မလုပ်ချင်ဘူး၊ မျက်မှောက်ရေးရာကို သိတဲ့သူက သူရဲကောင်းပဲ၊ အဲ့တာကြောင့် ခဏစောင့်လိုက်ပါ့မယ်လေ။

ခဏအကြာတွင် စစ်သည်ငယ်တစ်ယောက်က အသက်ခြောက်ဆယ်ကျော် အဘိုးကြီးတစ်ဦးကို ဦးဆောင်ပြီး စာဖတ်ခန်းထဲသို့ ဝင်ရောက်လာသည်။ ကုယွင်က အနည်းငယ်မော့ကြည့်လိုက်ရာ အဘိုးကြီးနောက်တွင် အမျိုးသမီးတစ်ဦး ရှိနေသည်ကို တွေ့လိုက်ရသည်။ အမျိုးသမီးက အရပ်မြင့်မြင့်နှင့် ပြေပြစ်သော အမူအရာရှိကာ ခေါင်းကို အနည်းငယ် ငုံ့ထားသည်။ ပထမတစ်ချက် ကြည့်လိုက်ရုံဖြင့် သူမက အဆင့်မြင့်အိမ်တော်မှ မြင့်မြတ်သော သခင်မလေးတစ်ယောက်ဖြစ်မှန်း သိနိုင်သော သွင်ပြင်လက္ခဏာများ ရှိနေသည်။ ကုယွင်က ထိုအမျိုးသမီး၏အသွင်အပြင်ကို သိချင်လာမိသည်။ ထိုအချိန်တွင် မိန်းခလေးကလည်း ရုတ်တရက် ခေါင်းမော့လိုက်သောကြောင့် ကုယွင်ကို အံ့သြသွားစေခဲ့သည်။ ဘာလို့ သူမ ဖြစ်နေတာလဲ?

ယုကျဲစစ်က တံခါးမှ ဝင်လာပြီး တံခါးအနီးအနားတွင် မည်သူမျှ မရှိသလိုပုံစံနှင့် ထိုင်နေသော ကုယွင်ကို တွေ့လိုက်ရသည်။ မိန်းခလေးတစ်ယောက်က စုလင်းရဲ့စာဖတ်ခန်းမှာ ဒီလိုပေါ့ပေါ့ပါးပါး ပုံစံနဲ့ ထိုင်နေရဲတယ်လား? ယုကျဲစစ်က တွေးတောနေရာမှ စုလင်းဘက်သို့ အကြည့်လွှဲကာ လက်ခုပ်အုပ် အရိုအသေပေးလိုက်ပြီး "စစ်သူကြီးစုကို နူတ်ဆက်ပါတယ်"

စုလင်းက ရှားရှားပါးပါး ယဉ်ကျေးသိမ်မွေ့သော အမူအရာဖြင့် "အရမ်းယဉ်ကျေးနေဖို့ မလိုပါဘူး၊ ယုလူကြီးမင်း"

ယုကျဲစစ်၏နောက်မှ ယုဟန်တန့်ကလည်း "စစ်သူကြီးစု"ဟု ပြောလိုက်ပြီး သပ်သပ်ရပ်ရပ် ပြည့်ပြည့်စုံစုံ အရိုအသေပေးလိုက်သည်။ သူမ၏နူးညံ့သောအသံနှင့် အံဝင်ခွင်ကျရှိသော ကိုယ်ဟန်အနေအထားက ဘယ်လိုပဲကြည့်ကြည့် သာယာလှပသော မြင်ကွင်းလေးတစ်ခုကို ဖြစ်လာစေသည်။ ကံမကောင်းစွာပဲ စုလင်းက ပျော်ရွှင်သော အရိပ်အယောင်ကို မပြဘဲ မျက်မှောင်ကြုတ်ထားတာကလည်း အတူတူပါပဲ။ စုလင်းက သူမကို အေးအေးဆေးဆေး ခေါင်းညိတ်ပြလိုက်ပြီး ယုကျဲစစ်ဘက်သို့ လှည့်ကာ မေးလိုက်သည်။ "ယုလူကြီးမင်း၊ ဒီတစ်ချိန် ဒီကို ရောက်လာတာ တစ်ခုခု ရှိလို့လား"