زهرة🌸

الحلقة الاولى

الحلقة 1
طلعت راسي شوية شوية...نغزرلو من المرايا...واقف ورايا بالظبط...نفس النظرة متاع كل يوم...نفس التبسيمة الخبيثة في وجهو...نفسو مراد ما تبدل فيه حتى شي...من عشر سنين...كل يوم تتعاود نفس الحكاية معاه...خذيت نفس طويل...تلفت عندو...عدا يدو على شعرو...يهز فيا و يحط بعينيه...جيت باش نخرج...قرب مني بالزربة...حط يدو عالرخامة...طلعت راسي جا وجهي مع وجهو...قلبي دق بالقاوي...نزلت راسي...باش نبعد من الشيرة لاخرى...دوب ما تلفت حصرني بيدو لأخرى...غطاني بجهامتو كبست بسناني على شفافي...كرهت من استبدادو و التجبر متاعو كرهتو...كرهت ريحتو...و غزرتو...كرهت قربو مني...لي يخليني نتقزز من روحي...كرهت واحد اسمو مراد كرهت الإسم هذا بصفة غريبة...هزيت يديا زوز..كبست بيهم على طرف الرخامة...و غزرتلو في عينيه..منعرفش كيفاه...نجمت نحكي...و لا كيفاه خرج صوتي
أنا:م..مراد
تبسم على جنب...و هز يدو...حطها على شعري...حلو شوية شوية...طاح على كتافي...نزل شوية يشم في ريحتو...و يحكي
مراد:يا روح مراد
هزيت يدي بالسيف...حطيتها على صدرو نحب نبعدو عليا...نحكي بالسيف
انا:ا أبعد فاش تعمل ياخي
نزل بيدو حطها على جنبي...كبس عليا بكل قوتو...و حط يدو لأخرى على رقبتي تحت شعري...عدا خدو على خدي يحكي
مراد:ششش...توحشتك راني...في بالك اليمات اللي عديتهم من غيرك...حسيتهم ضاعو من عمري
كبست على صدرو اكثر...نحبو يبعد عليا...نحكي
انا:يزززي مراد يزززي فيق على روحك...راك راجل امي...قداش من مرة تحب نعاودلك الكلام هذا
طلع راسو شوية...كبس على رقبتي...غزرلي في عينيا يحكي
مراد:أما تعرف لي نحبك أنت...نعشقك زهرة...يزييك...ما تعمل فيا هكا...قاعدة تقتل فيا بالعرق
غمضت عينيا بالقاوي...هزيت يدي لاخرى...و دزيتو شوية لتالي...نحكي
انا:افهممم...لأنا و أنت مستحيل يكون بينا شي...يزززي مراااد يزززي...قاعد تغلط في حق امي و في حقي...كل يوم تخليني نكرهك و نكره روحي اكثر...يزززي امانك
هد عليا في لحظة...حط صوابعو على شفايفي...سكتني يحكي
مراد:اسسسكت زهرة...اسكككت...في بالك محاولتش نبعد...حتى كي نمشي للخدمة...صورتك بين عينيا منجمتش ننساك...حتى انا كرهت روحي...كرهت ضعفي قدامك...اما منجمتش نبعد عليك...اغزرلي هوني زهرة
طلعت راسي بالسيف...غزرت في عينيه...قرب مني أكثر...لين معادش فما مسافة بينا...غزر لشفايفي...ورجع غزرلي...اصلا اول مرة يغزرلي بطريقة هاذي...خلاني نتكبس اكثر...نزل بيدو شوية لرقبتي يحكي
مراد:إنتي متاعي...أعمل لي تحب عليه...كان حبيت برا اشتكي و قلهم راجل أمي يتحرش بيا...خبر امك...خبر ناس الكل...ما يهمني حتى حد غيرك انت...انتي لمراد و كهو...ليا انا وحدي يا زهرة...كان نموت مانيش باش نخليك لغيري...و كان صار و فكرت...تصوحب و لا تخلي جنس مخلوق يقرب منك...ساعتها
سكت و نزل بيدو شوية...فك زرار الشوميز بالوحدة...و غزرلي في عينيا يحكي
مراد:ساعتها يا زهرة...باش نخليك تكون ليا بالسيف عليك...كلامي هذا نحبك تحفظو بالقدا...خاطرك اكثر وحدة تعرف اذا حكيت كلمة...منوليش عليها كان نموت...مفهوم كلامي
نظرتو ليا بالطريقة هذيكا...خلاتني نهزلو براسي ايه...نحبو يبعدني و كهو..وخر خطوة لتالي...هزيت يدي شديت شوميز من فوق...جبدت روحي منو بالزربة حليت الباب...لقيت امي في وجهي...غزرتلي مصدومة و طلعت راسها غزرتلو...تهز فينا و تحط...أصلا كان لابس  سروال و كهو من غير مريول...رجعت غزرتلنا تحكي
أمي:شفما ياخي...و فاش تعملو هوني مع بعض ؟
حسيت بساقيا معادش يحملوني أكثر...أول مرة نتحط في موقف كيما هذا...متوقعتش لامي باش جي لبيت البانو توا...اصلا تعمدت نفيق بكري...باش ميرانيش و لا نتلقاه...بعد ما جا من سفرة...اما من وين...الكلام وحل في لساني و معرفتش شنعمل...و لا كيفاه باش نتصرف نزلت راسها غزرت لشوميز لي شادتها بيدي...حسيت دنيا وقفت...جمدت في بلاصتي...نسمع فيه يحكي
مراد:بونجور يا روحي...زهرة دخلت منرفزة و متعرفش لأنا هوني...يعني مفما حتى شي
غزرتلي ندرا كيف...و قربت منو...ترمات في حملتو تلفت شوية عندهم...حط يدو على ظهرها...و يغزرلي بنفس نظرة التهديد...و يحكي
مراد:شبيك فقت بكري
أمي:ملقيتكش بجنبي على هذاكا
مراد:مممم باهي عزيزتي
غمضت عينيا بالقاوي...و خرجت نجري...دخلت لبيتي هزيت صاكي...و نزلت الدروج في لحظة...منعرفش كيفاه لقبت روحي برا...باقي نجري...يدي كابسة بيها عالشوميز...لي حتى مفكرتش نسكرها...و يدي لاخرى كابسة بيها عالصاك...دموعي ماشية و تقوى...نجري بكل قوتي...نحب ننسى لي صار...ننسى لفما حد اسمو مراد و ننسى أكا دار جملة...وقفت في نص الطريق...سكرت شوميز متاعي...رجعت شعري لتالي...هزيت يدي مسحت دموعي...خذيت نفس و كملت ثنييتي لفاااك منعرفش كيفاه...وصلت...لقيتهم دخلو...نفخت بقوة ناقصني كان تنبيزو توا...اصلا منعرفش منين خرجلنا البروف هذا...قربت من الكلاصة...نغزرلهم يتبعو معاه دورت راسي شوية...نغزر لمريم...عملتلي بيدها وينك لتوا...هزيتلها بكتافي...غزرت للبروف و عملتلي بيدها باش ندخل...غزرتلو باقي مركز مع طابلو...دخلت بالزربة شديت بلاصتي...نرد في النفس...نسمع فيها تحكي بصوت دوب يتسمع
مريم:زهرة وينك لتوا ياخي
أنا:متسألنيش أحسن
مريم:نفس الحكاية
هزيتلها براسي ايه...نفخت بقوة...حطت الستيلو بغزول تحكي
مريم:لإمتى يا زهرة...لامتى باش تبقى هكا...كان سمعت كلامي و شتكيت بيه موصلناش لهوني
أنا:يزززي مريم...أماانك منحبش نحكي في الموضوع
مريم:باهي جبت المخطط
عينيا وساعو بالوقت...تلفت عندها مصدومة نغزرلها منعرفش كيفاه نسيتو...اما بعد اللي صار كلشي خممت فيه اني نخرج من دار و كهو...جيت باش نحكي فقت من سرحتي على صوتو
هو:مدموووزال
طلعت راسي نغزرلو...حط ستيلو من يدو...و قرب مني بخطوات ثابتة...تنجم تفهم منهم...انو صعيب برشا وقف قدامي بالظبط...هزيت روحي وقفت...تربثت قدام جهامتو...و من ريحة برفانتو القوية...لدرجة منجمتش نهز راسي في وجهو...تقريب شهرين و إحنا نقراو عندو هاذي اول مرة يقرب مني لهدرجة...حط يدو عالطاولة يحكي
هو:أول شي روطار...ثاني شي تحكي في الوقت لانا قاعد نهدر فيه...و أكثر حاجة نفد منها...وقت واحد يحل فمو و أنا نهدر...توا تنجم تفهمني فاش كنت تحكي سيادتك
غمضت عينيا بالقاوي ورجعت حليتهم...خذيت نفس و طلعت راسي شوية...نغزرلو...ولا مرة توقعت باش يقرب مني لهدرجة و لا باش ياقف قدامي و يحكي معايا...من اول نهار قرانا فيه...في الكور و لا قروب...يكمل درسو و يخرج..اصلا حد ما يحكي في حصتو...منعرفش كيفاش باش نفكها توا...كبست على يدي نحكي
انا:م مسيو انا...انا
هو:إنتي شنوة ؟؟
انا:ا انا
هو:انتي باش تخرج عليا توا و كمل حكايتك مع الحيط برا
كبست على يدي أكثر...و نزلت راسي...غاضتني التنبيزة قدام الجماعة الكل...كبست روحي اكثر...و تلفت هزيت صاكي...وقفني يحكي
هو:الخدمة لي طلبتها وينها ؟
كبست على صاكي أكثر...خذيت نفس...و طلعت راسي غزرتلو نحكي
انا:ن..نسيتو
هو:نسيتو و لا مخدمتوش أصلا
أنا:ك..كان ممكن نجيبو غدوة
هو:لااا خليه عندك...باش يفيدك برشا
انا:و و النقطة ؟؟
هو:تفضل أخرج مدموزال
محبيتش نكثر معاه...نعرف لمستحيل يتنازل و يسمعني كبست على صاكي...و خرجت من الكلاصة...شادة دموعي على شعرة...ناقصني كان هو...منعرفش كيفاش وصلت اللوطة...قربت من أول كرسي عارضني ترميت عليه...نتنفس بالسيف...جبدت صورة بابا نغزرلها منعرفش قداش...حسيت بدموعي لي نزلو على خدي كان مزال عايش...مفماش مراد في حياتي...مراد اللي دخل حياتي و عمري 12 سنة كهو...منعرفش كيفاش لقيت روحي عايشة في وسط دارو...زعمة كيفاه قبل يعرس بمرا كبيرة عليه و يسكنها معاه...علاش واحد كيفو عمل هكا...ما ناقصو شي...و الاسوء من هكا امي تصدقو في كل كلمة يقولها...و اي شي يعملو...غمضت عينيا بالقاوي و رجعت سنين لتالي...نذكر نهارتها وقت دخلت و لقيتو قاعد في الصالة مع امي...منعرفش قداش بقيت نغزرلو...دقيقة زوز...دقايق...فيقني من سرحتي صوت أمي
امي:زهرة...ايجا عزيزتي
تلفت شوية نغزرلها...من وقت عمري سبع سنين مريتش امي فرحانة هكا...وقتها بديت نفهم انو فما حد جديد دخل لحياتها و حياتي زادة...بقيت نغزرلهم من غير حتى كلمة...يمكن ساعتها عرفت انو حياتي باش تتقلب بالكل...غزراتو لريتها اول مرة تحفرت في مخي...للحظة خفت...منعرفش من شنية اما خفت...خفت كان الراجل لي قاعد مقابلني..باش يفك بلاصة بابا...وخرت خطوات لتالي...وخرجت من دار...و كانت اول مرة نهرب من كلشي حتى من روحي...قعدت عند اول درجة...نغزر لناس لي رايحة و جاية....تمنيت للحظة نلقى بابا بينهم أما لا ماهوش باش يكون موجود دموعي نزلو وحدهم حسيت بيد تحطت على خدي تلفت مفجوعة نغزرلو قعد قدامي...يحكي
مراد:الدموع هذوما...على خاطر خفت مني
هزيتلو براسي لا...و انا نغزر لتفاصيل وجهو...عينيه لكانو لونهم مش معروف...لحيتو...جهامتو لي خذا بيها البلاصة الكل قدامي...كانت اول مرة نكون قريبة لحد غير بابا...تبسملي يحكي
مراد:اسمعني انا مانيش باش نضرك...و مانيش باش نبعدك على امك زادة...صدقني انا نحبها برشا...و مانيش باش نطلب منك شي و لا نجبرك على شي...كان تحب نكونو اصحاب و كهو باهي
بقيت نغزرلو...مكنتش نعرف اذا باش نصدقو و لالا...اما مكانش عندي حل اخر...كان اني نهزلو براسي ايه...مدلي يدو يحكي
مراد:انا مراااد
هزيت يدي بالسيف حطيتها في يدو...تبسمت بالسيف نحكي
أنا:ا إسمي زهرة
مراد:مممم محلاه اسمك
أنا:عيشك
جبدت يدي منو...شوية شوية...اول مرة نخاف من اللي جاي...اعتدت على حياتي هادية مع امي...منعرفش كيفاه باش نتحمل حد جديد...اكثر شي خفت منو...انو امي تحبو اكثر مني...انهم يحطوني عالهامش و يعيشو حياتهم...تلفت شوية نغزر لناس...نحب ننسى وجودو معايا...و ننسى اللي سمعتو...نحب ننسى لقاء هذا...كانو كابوس...و باش يوفا على روحو...دموعي نزلو اكثر و اكثر...شهقت على يد تحطت فوق كتفي...قربت قعدت بحذايا...تحكي
مريم:ميزيتش من البكا...باش تقتل روحك انتي
انا:ي ياريت نموت و نرتاح من هذا الكل
جبدتني عندها بالقاوي...حضنتني...بكل قوتها تحكي
مريم:شششش شبيك زهرة هبلت...نعرفك اقوى من هكا...وراس اختي باش يوفا الكابوس هذا...كان تحب إيجا توا نشتكو بيه...انا باش نشهد معاك
هزيتلها براسي لا...نعرف مراد بالقدا...نعرف انو قضية كيما هاذي ماهيش باش تهزو...كيفاش باش نشتكي بيه و ما عندي لا دليل و لا حتى حق محامي...كبست عليا أكثر تحكي
مريم:باهي...خبر امك...احكيلها لي قاعد يصير...باز باش تتصرف...و تطلق منو
جبدت روحي منها شوية...خذيت نفس بالسيف نحكي
انا:م منجمش مريم...منجمش...امي تحبو...مش تحبو و كهو...كان يطلب روحها تعطيهالو...كيفاه باش تصدقني قولي كيفاش...تصدق ولات خايفة عليه مني خايفة نفكلها راجلها...ولات تغزرلي بحقد...تي ساعات نقول لهي مش امي جملة
هزت يديها...تمسح في دموعي...و تحكي فرد وقت
مريم:ششش يزززي...يزززيك ما بكيت...وراس اختي تتحل...انت كهو معادش تعب روحك...يا طفلة شبيك راك كل يوم ترجع لتالي...مريتش روحك قداش ضعفت كان باش تبقى عالحالة هاذي...مراد باش يغلبك...يززي زهرة...انتي تحملت برشااا...و باش تتحمل زادة...نوعدك باش نلقاو حل مع بعض باهي...امانك اسكت عيش اختي
هزيتلها براسي ايه ورجعت حضنتها...مريم كهو لي مصبرتني على لي قاعد يصير...كان منحكيش معاها نطرشق...خذيت نفس وجبدت روحي منها...طلعت راسي شوية نمسح في دموعي...نغزرلو...ماشي لكرهبتو حاط ليناتو...لا يحكي مع حد و لا يعبر حد...بقيت نتبع فيه لين ركب...غزرتلي مريم تحكي
مريم:كان حكيت معاه...باز باش يشد عليك الخدمة
انا:اخطانا منو مريم...العام باين من أولو...معناها كان عطاني نقطة باهية باش ننجح
مريم:راك باش تهبلني يا طفلة...كان متحكيش معاه انتي...انا باش نحكي معاه فهمتني
انا:مرييم امانك...ما ناقصني في حياتي كان هو...كان نموت مانيش باش نحكي معاه
مريم:باهي لالة زهرة...باش نشوفو وين توصلنا قرارتك و كسوحية راسك
انا:افففف مريم...من عند ربي تاعبة
مريم:مخيبك يا طفلة...قولي تحبش نعملو تاي مع بعض عالشط...كيما العادة
انا:و الكور ؟
مريم:تي قوم...مش وقتو الكور جملة...و اصلا انا زادة معطيتش لخدمة لسي السيد...هكا باش معندكش وين تهرب...معناها كان ناوية تعاود العام انا معاك
انا:مريييم
مريم:شنننوة...من غير ما تناقشني قراري و خذيتو
انا:هههههههه متكونش مجنونة يا طفلة...و لا مخك بيه حاجة
مريم:تي قوم قوم...كان نهار هبلت راهو جرايرك
ضحكت بالوقت...هزيت يدي مسحت دموعي...و قمت شديت في يدها...طول الثنية قاعدة تحكي مرة عالاستاذ...مرة على لي يقراو معانا...تحاول تبعدني على توتر لي عايشة فيه...منعرفش كيفاش وصلنا لشط حطيت صاكي على جنب...و كبست على كأس الشاي في يدي...نغزر لصغار لي قاعدين مع عيلتهم...تمنيت كان نجم نقعد هكا انا زادة...سرحت مع البحر...نخمم في اللي جاي...و كيفاه باش نتصرف معاه...اللي عملو و اللي قالو اليوم...خلاني نتأكد انو هو مستحيل يرجع لتالي...منعرفش كيفاه نهرب منو...خايفة من اللي باش يصير...خايفة شي نهار ينفذ اللي في راسو...الخوف هو الكلمة الوحيدة لي مسيطرة على حياتي و أنا معاه تحت فرد سقف...كبست عالكاسة بيديا زوز...و انا نذكر في نهار عرسهم...في وسط الناس الكل...انا كهو لي منجمتش نفرح...صعيب برشا...نرا امي بروبة العرس و باش تكون لراجل اخر...بلكشي كنت تقبلت الوضع...كان جا حد اخر غير مراد...اما قصة حبهم مركحتش في مخي...الخوف لي تملكني ساعتها عايشة بيه لتوا...هو كان فرحة امي...و حزني انا...ساعات نحسها عايشة حياتها على حسابي...تي اصلا متسألنيش شنية ناقصني و لا شنوة نحب...ديما هو يلتهى بيا اكثر منها...كان مش فلوس بابا لي ناخوهم كل شهر...منعرفش كيفاش كنت باش نتصرف فقت من سرحتي...على صوت مريم تحكي
مريم:مزلت قاعدة معاك راني
تلفت عندها شوية عزرتلها...ضيقت عينيها...تحكي
مريم:وين سرحت ياخي...متقوليش في الاستاذ متاع قبيل
انا:و علاه حتى نخمم فيه
مريم:شيعرفني يا بنتي...حتى هو كعبة مش نورمال تي كيفاش رضى باش يقرينا منعرفش
انا:بربي شنية فيه زايد...ناقص كان تحكي عليه هكا من عند ربي...مضروب في روحو
مريم:عندو حق...تي مريتش الكل حاطين عينهم عليه
انا:اخطانا منو مريم...شبيك كبشت في سيرتو ميكونش عاجبك...السخطة
مريم:من ناحية عجبني ايه...اما بعد تصرفو معاك اليوم طاح من عيني
انا:صحيتك بديت ترجع لعقلك
مريم:باهي لالة...توا قولي فاش كنت تخمم
انا:في مراد
مريم:مراااد
انا:كل اليوم الحكاية تتعقد اكثر يا مريم...تصدق شقالي اليوم
مريم:شننوة ؟
انا:كان صار و فكرت...تصوحب و لا تخلي جنس مخلوق يقرب منك...ساعتها باش تكون ليا بالسيف
مريم:شنننننوة...زهرة ياخي نورمال هذا يحكي معاك هكا...شبيك مرديتلوش...و لا حتى تصرفت...تي كيفاش يهددك بالطريقة هاذي
طلعت راسي نغزر للعباد...لي نتبهو مع صوتها لي علا خذيت نفس نحكي
انا:قولي شنعمل يا مريم اه...شنعمل...في بالك فرحانة باللي قاعد يصير...فرحانة و هو كل مرة يلقى فرصة يمسني فيها...كيفاش تحبني نتصرف...نصيح و نلم ناس عليه...لشكون باش يعطو الحق...تي الكل يعرفوه غديكا و يعرفو امي...زعمة كان امي متاقفش معايا باش يصدقوني لااا...انا باش نفضح روحي...تعرف شقالي برا اشتكي...هو ماهوش خايف يا مريم
مريم:لااااا يا بهلولة...خاطر يعرفك انتي خوافة و ماكش باش تعملها...و يعرف كيفاش يخوفك...تي يزززي بربي
انا:باش يصدقوني ياخي...كيفاش باش نقلهم راجل امي يهدد فيا و يتحرش بيا...و يحب عليا...و عمري 22 سنة...كيفاش يا مريم...باش يصدقوني و انا عندي السن القانوني...و كان صدقوني...من وين باش نجيب حق المحامي اه...تنجم تقولي...تي هو بمحاكمة وحدة يخرج باهي مبعد....باش يخليني في حالي...اكيييد لااا...حتى حد ما يعرف وجه مراد الثاني غيري انا و كهو
مريم:باهي اهدا توا عزيزتي...باش نلقاو حل...متخافش منو...ماهوش باش يضرك...كان وصل و عمل معاك اي شي...حاول تستغل حبو...باز باش يرجع لتالي...متأكدة لهو مينجمش يأذيك
انا:ان شاء الله يا مريم...ان شاء الله
مريم:اسمع شرايك تبات عندي ليلة
انا:لا منجمش...مخبرتش امي...من عند ربي ماهيش طايقتني الفترة هاذي
مريم:باهي ملا...قوم نروحو...و متنساش جيب المخطط غدوة
انا:اما
مريم:معندكش حل اخر لالة...متنساش لي المادة الاساسية معاه...خلي يوفا العام هذا على خير
انا:باهي...اما هاني باش نبهك من توا...كان يحكي معايا شي...مانيش باش نسكتلو المرة هاذي
مريم:قوم قوم...انا وين و انتي وين
انا:افففف منك مريم...باهي تو غدوة نلقاو حل معاه
مريم:صحيتك عزيزتي...هكا نحبك
انا:ناقصك متحبنيش...عندي غيرك انا
مريم:بالطبيعة لا...و ماهوش باش يكون عندك
انا:ههههههه مجنونة امشي برك
هزيت روحي خالطت عليها...نحاول ننسى كلشي خايب نفكر فيه...اول ما وصلت لدارخذيت نفس و حليت الباب...نعرف لهو مش هوني...دار هادية بصيفة غريبة...طلعت لبيتي بالزربة...سكرتها من داخل...خاطر نعرفو يدخل من غير ما يدق...رميت صاكي عالارض...بدلت دبشي بالزربة...اصلا كان متبداش امي هوني مستحيل نعمل دوش...ترميت عالسرير...نغزر لسقف...دورت راسي شوية جات عيني على الورقة لي رسمت فيها مشروع الاوتيل...تعدات صورتو بين عينيا...قلبي دق بالوقت...هزيت يدي حطيتها عليه...منعرفش علاه منجمتش نحكي معاه ساعتها...تي صوتو برك خلاني نتربث...خلي وقفتو قدامي بالطريقة هذيكا...هزيت روحي تقعدت...منعرفش شمجيبو لمخي توا...ناقصني كان هو نخمم فيه...تي ميكفيش التنبيزة لي عطهالي قدام الكل...باقي لتوا مغزلة منو...تي شهرين لي تعداو الكل...و لا مرة حكيت معاه...و لا حتى حكيت عليه و لا جا لبالي جملة...منعرفش توا شبيني نفخت بالقاوي...و ترميت لتالي...نحب ننسى لقاعد يدور في مخي...اكاكا و نسمع في صوت امي تضحك...عرفت لهوما رجعو...هزيت المخدة غميت بيها راسي...شوية و نسمع في صوت الباب يدق...تحكي
امي:زهههرة رجعت ياخي...شبيك مسكرة على روحك زهههرة
محبيتش نرجع عليها...تلكمت على روحي اكثر...كيف سمعت صوتو يحكي
مراد:خليها ترتاح...باز تكون تاعبة
امي:ريت دلالك هذا هو وصلها لهوني
مراد:يزززي انتصااار...خليها على راحتها
امي:مممم باهي...و احنا باش نبقاو على راحتنا توا
مراد:باش نكمل الخدمة...متنساش لي خليتها نص جرايرك
امي:ههههههه باهي انا باش نمشي نعملك قهوة
مراد:باهي عزيزتي
نزلت المخدة شوية شوية...كي معادش سمعت صوتهم نفخت بالقاوي...ملا حالة وليت فيها...اصلا معنديش خلق باش نراه و لا نحكي معاه...تلفت شوية نغزر لتصويرة بابا...مديت يدي...و عديت صوابعي عليها...نحكي
انا:علاه خليتني معاهم هوني...علاه مشيت يا بابا لامتى باش نبقى في الحبس هذا
غمضت عينيا بالقاوي...نذكر في لحظات صغري...لي عديتهم مع بابا...لحظات تعداو كانهم حلمة...فقت من سرحتي على صوتو يحكي
مراد:زهررة حل الباب
نفخت بالقاوي...منعرفش علاه رجع توا...هزيت روحي باقي نسمع فيه يحكي
مراد:قتلك حل الباب
رميت يدي دورت المفتاح...و حليتها...وقفت نغزرلو هزني و حطني...جا باش يحكي...وقفتو نحكي
انا:شفمااا زادة...شتحب عندي ؟
مراد:شبي حالتك هكا ؟
انا:بربي قاعد تسال فيا على حالتي على اساس متعرفش شبيني
مراد:زهرررة انطق
انا:اسال روحك سي مراد...زعمة علاه انا هكا...علاه حابسة روحي...باش منراش وجهك...عالاقل انا مانيش خاينة كيفك
قرب مني بالزربة شدني من زندي...حسيت بصوابعو تغرسو في لحمي...وخر بيا لتالي...يحكي
مراد:فمك هذا باش نهدهولك شي نهار...اخر شي يهمني شنية قاعدة تفكر فيا...المهم عندي انك باش تكون ليا بالسياسة بالغصب...ماكش باش تكون لغيري
بقيت نغزرلو...معادش نعرف كيفاش نتعامل معاه..رخف يدو على زندي..كيف سمع امي تعيطلو...وخر خطوة لتالي...غزرلي ندرا كيف...و جا باش يخرج...وقف بحذا الباب و رجع تلفتلي يحكي
مراد:سكر ¤¤¤¤ الشباك...كان نعرف اي حد من الجيران جات عينو عليك ما تلوم كان روحك
خرج و نطر الباب وراه سكرها بالقاوي...تهزيت و تحطيت على صوتها...بقيت نغزر للباب...معادش فاهمتو الراجل هذا...شنية يحب مني بالظبط...تي شنية الحب هذا لي يحكي عليه...كيفاه معرس بامي و يحبني كيفاش يحبني نكون ليه...و يعرف انو هذا مستحيل يصير...كيفاش ينجم يتصرف هكا...نحس في مخي باش يطرشق...معادش نعرف كيفاش نعمل معاه...و لا كيفاش نتصرف...عديت يديا زوز على وجهي...رجعت شعري لتالي...باقي زندي يوجع فيا من قوة الكبسة قربت من الباب بالزربة...رجعت سكرتها من داخل بغزول و ضربتها بيدي...فديت منو...فديت من روحي و من الدنيا الكل...قداش باش نبقى نعاني جرايرو...تنهدت بالقاوي...نزلت هزيت صاكي...فرغتو فوق البيرو...احسن شي نفرغ غشي في القراية...مكانش منعرفش كيفاش نشد روحي اكثر...و منعملش شي نندم عليه...في لحظة تفكيري ضاع و لقيت روحي نخمم فيه...في تنبيزة لي كليتها منو...كبست عالورقة بيدي...نحب ننسى لي صار...نحب ننسى ملامحو...لي مزالت بين عينيا منعرفش شبيني مزلت نخمم فيه لتوا...اول مرة نخمم في حد من غير سبب...يمكن لي صار خلاني و كلامو هو لي شدني ليه...و الاسوء من هكا...منعرفش كيفاش باش يشد عليا الخدمة...باز باش يرجع يسمعني كلام هذا كان شدو من اصلو...حطيت ستيلو بغزول...و دورت راسي مرتين...نحب نحيه من مخي و معادش نخمم فيها الحكاية جملة...على اساس ناقصة وجيعة راس اخرى...سكرت كراستي بغزول...و مشيت ترميت على السرير...غطست في النوم من غير ما نخمم في حتى شي اخر...خاطر نعرف الاحداث متاع اليوم..باش تتعاود معايا كل يوم...حافظتها حياتي...و معادش نستنى حتى شي يصير...كان اني نرتاح من العذاب هذا و كهو...نحب نعيش حياة هادية...من غير قلق و لا خوف...خاصة الخوف...لهو عنوان حياتي...الخوف و زهرة مرتبطين مع بعض بصيفة غريبة...و كلشي قاعدة نعمل فيه من سنين إني نكسر الرابط هذا...و نكون زهرة أخرى من جديد
☆☆☆☆ عالسلاااااامة لبنااااات....هاذي كان بدااااية كرونيييك...و لا نقول الحكاية الجديدة...#زهررررة# نظن كلشي واضح من البداية...كيفاه راح تكون الاحداث...و شنية باش يصير...هذا انتو لي تخمو فيه كي العادة...عرفتكم عالبطلة متاعكم زهرررة.. اما زعمة شكون البطل مراااااد ؟ لا الاستاذ الغامض 😍 كيفاه باش تسير الحكاية...ووين باش تهزكم...كرونيك مختلفة كليا...هي خيالية باحداث واقعية...تنجم تصير في المجتمع...كيفاه زهرة باش تتصرف في الوضع هذا...و انا ثنية راح تختار ؟؟؟ تحبو تعرفو الباقي...خليكم معايا...نحب رايكم في البداية...و نحب توقعاتكم للي جاي...نحب في نفس التفاعل القديم...و نفس المتابعين و نفس التشجيع...نحب رجوعي يكون قوي بتفاعلكم معايا 😍😍😍😍 نحبكم برشاااا_بزاااف 😍😙😙
#سمر القايد ♥♥💕💕💕