🔸️حلقة 78
🔸️مراد يحكي:
عديت عينيا على وجها...على لمعة عينيها...على نظرة الانكسار...لي ملازمتها ديما...نعرف لانا سبب في هذا الكل...نعرف لانا نوجع فيها و نقتل فيها بالعرق...اما منجمتش نتراجع...منجمتش نخليها في حالها...مهما حاولت نلقى روحي نضر فيها اكثر...اللي نحس معاها مش حب و كهو...شي اكبر من هكا...نعرف لهي موجوعة...نعرف لي ماهيش باش تسامحني بالساهل اما منجمش نبعد عليها بعد توا...منجمش نتحمل نفس اكا العذاب مرة اخرى...منجمش نستخايلها و هي بين يديه بعد توا...لي عشتو في عام...حسيتو دهر...كل ليلة نموت الف مرة...و انا نستخايل فيها بين يديه...كل مرة نتذكر لهو ملكها...لهو طبع ملكيتو ليها و انا عاجز بينتهم..نحب نقتلهم زوز بيدي...نحب نرتح روحي حتى نهار من الاحساس هذاكا...مديت يدي بالسيف حطيتها على ظهرها...جبدتها عندي...حطت راسها على صدري مسلمة في كلشي...كبست عالبونية متاعي...و ضربتها عالارض بجنبي...ضعفها هذا يهدني في لحظة...دموعها لي تشلني...تخليني عاجز حتى باش نقول كلمة...زعمة لهدرجة تحبو ؟ لهدرجة تعلقت بيه...شكون عمر ؟ و كيفاش دخل لحياتنا ؟ كيفاه نجم يفكها مني بين ليلة و نهار...كيفاش خسرتها بالطريقة هاذي...مدام حبي ليها محرم شبيني منجمش نبعد عليها...شبيني منجمش منحبهاش...منجمش نستخايل حياتي مع حتى وحدة غيرها...حتى انتصار مكنتش نجم نحط يدي عليها هربت منها و من روحي...اما محبتش تخرج من مخي محبتش تخرج مني بكلي...قد ما تعبتها معايا تعبت...قد حبي ليها في دنيا...قد صبري عليها...تنهدت بالقاوي...و نزلت راسي شوية...نشم في ريحة شعرها...مزالت تستعمل نفس النوع...مزالت تحب الشامبو لي ريحتو بالفراز...دوب تبسمت...لتوا حافظ تفاصيلها بالقدا...لتوا منيستش شنية تحب و شنية تكره...ملا كيفاش باش نحيها من مخي و نكمل ثنيتي بلا بيها...اه و برا...فقت من سرحتي...على صوتها لي دوب يتسمع
زهرة:م..مراد
انا:يا روح مراد
زهرة:ك..كرشي توجع فيا...اعمل حاجة امانك
نزلت راسي شوية...نغزر ليدها لي كابسة بيها على كرشها...لقطرات الدم لي بانو عليها...دخلت بعضي و يدي رعشت بالوقت...مش فاهم شبيها...خذيت نفس بالسيف نحكي
انا:ز..زهرة شبيك ؟
زهرة:ب..بنتي باش تموت
منعرفش كيفاه طاح عليا كلامها...و لا شنية لي حسيتو بالظبط...تكبست كي ريتها تصيح من الوجيعة...كبست على يدها نحكي
انا:هيا قوم معايا...هيا عزيزتي
هزيت روحي...و وقفتها شوية شوية...جيت باش نحملها...غزرتلي تحكي
زهرة:م..متقربليش
انا:باهي باهي...حاول تستند عليا...هيا يا روحي
كبست عليها اكثر...نمشي فيها للكرهبة...نزل اشرف بالوقت...حل الباب من تالي..ركبتها و خلطت عليها..ثنية كاملة تتوجع...الكلام هرب مني و معرفتش شنية لازم نعمل...فرد وقت قاعد نظغط على اشرف باش يزرب عديت يدي على جبينها و خدها...نمسح في العرق لي نزل عليها...و نحكي
انا:اتحمل...انتي باش تكون مليحة
زهرة:م..منحبش نخسر بنتي
انا:ماكش باش تخسرها...ماكش باش تخسرها يا روحي...متخافش
رجعت شعرها لتالي...اول مرة نراها في الحالة هاذي منعرفش علاه خفت عالصغير لي في كرشها كانو ولدي و لا بنتي...حسيتها باش دوخ...نحيت الشال من رقبتها نحكي
انا:زهرة اتحمل امانك...باش نوصلو يا روحي
زهرة:ع..عمر...عمر
غمضت عينيا بالقاوي...و عاودت حليتهم...حتى في الوضع هذا تحب عليه هو...حتى و هي تاعبة باش تموت منجمتش تنساه...رديت النفس بالسيف...تعبت و انا نخمم فيهم زوز مع بعض...يزي بعد توا فما انا و زهرة كهو...كبست على يدها نهدي فيها...اول ما وصلنا نزلت و هزيتها في حملتي...دوب دخلت لقيتهم في وجهي...دخلوها و سكرو الباب...قعدت على اول كرشي عارضني...ساقيا معادش يهزوني...حطيت راسي بين يديا...نخمم في شنية منعرفش...باش نتحمل كلشي كان هي تمشي و تخليني...كان هي تخسر صغير ما عندو حتى ذنب...شنية كان صار...كان عرفتها في حالة اخرى غير حالتنا...كان جات مرتي حتى نهار واحد تكيت راسي لتالي بحصرة...قلبي نحس فيه باش ياقف من الخوف...اول مرة نخاف لهدرجة...خايف عليها و على لي في كرشها...اول ما تحل الباب...تنطرت من بلاصتي جيت واقف قدامو نحكي
انا:دكتور شنية لي صار ؟
هو:انت راجلها ؟
بقيت نغزرلو...منعرفش علاه الكلمة لي قالها من غير قصد...تمنيتها تكون حقيقة...ضيق عينيه يحكي
هو:مسيو انت راجلها ؟
هزيتلو براسي ايه...حتى بالكذب مستعد نكون راجلها حتى لحظات كهو...لميت الكلام بالسيف نحكي
انا:ايه مرتي...شبيها ؟ و البيبي لباس ؟
هو:مانيش باش نخبي عليك...المدام لباس...اما الصغير مش راكح في كرشها...يعني فجعة اخرى يمكن يروح فيها...زيد ظغطها عالي...و ظاهر جاها انهيار عصبي ياسر لي قاعد يصير معاها...بدنها ميتحملش اكثر من هكا
انا:البيبي لي في كرشها لازم يعيش...دكتور امانك مستعد ندفع لي تحب عليه...اما منحبهاش تخسر الصغير عيشك
هو:اهدا مسيو...المدام جيست لازمها راحة تامة و لهوة خاصة...عالاقل لين يركح البيبي
انا:نجم نشوفها ؟
هو:اكيد تفضل
انا:عيشك
خذيت نفس...و مديت يدي حليت الباب...هزيت راسي نغزرلها...قربت بخطوات ثابتة...ساعة كي نراها برك نحس روحي في حلمة...قعدت بجنبها...غاطسة في نوم و مش حاسة على شي...خدودها حمر باش يطرشقو عديت صوابعي عليهم...و نزلت بيهم لشفايفها...تنهدت بالقاوي...و حطيت يدي على كرشها...احساس ندرا كيف تملكني ساعتها...غمضت عينيا بالقاوي...و تبسمت...كاني حسيت بقطعة مني...نعرف لهو من عمر...نعرف لي مستحيل نكون بوه...اما مدامو منها كلشي يهون...باش نحبو كيما ولدي و لا بنتي و اعز...حليت عينيا...و مديت يدي نبعد في خصلات شعرها و نحكي فرد وقت
انا:ماكش باش تخسرها يا روحي...مدامك تحب على بنية...متأكد لهي باش تكون نسخة منك...باش تكون كيفك بالظبط...و نعرف لي باش تكون احلى ام في دنيا زادة...مهما صار مانيش باش نخليك تخسر بنتك و لا ولدك...حتى انا مستحيل نستغلها ضدك...انتي كهو حاول تفهمني مرة وحدة يا زهرة...حاول تفهم حبي ليك...افهم لانا نحبك و نموت عليك...و مهما صار فينا مانيش باش نسلم فيك جملة
نزلت عليها اكثر بستها من خدها...و كبست على يدها فرد وقت...حطيت راسي عليها...بعد لي صار حسيت روحي تهديت...تهديت لدرجة نحب نهزها من هوني و نهج لاخر الدنيا...لبلاصة ما فيها حتى حد غيرنا...هزيت راسي على صوتها تحكي
زهرة:ع..عمر...عمر..ع عمر
رصيت على سناني مع اسمو لي قاعدة تعاود فيه...و هي مخدرة...قداش مزال باش يبقى بيناتنا منعرفش هديت روحي...و كبست عل يدها نحكي
انا:هاني معاك
حلت عينيها شوية...دوب غزرتلي و عاودت سكرتهم كانها تستوعب في اللي صار...جبدت يدها مني...حطتها على كرشها...تتحسس في صغيرها...و تحكي
زهرة:ب..بنتي ؟
انا:متخافش...بنتك لباس...اما لازمك تسايس روحك الفترة هاذي
غمضت عينيها...و دورت راسها للجيهة لاخرى...خذيت نفس و مديت يدي...بعدت خصلات شعرها على وجها نحكي
انا:سامحني...منقصدش لي صار
زهرة:نحب نبقى وحدي
انا:زهرة
زهرة:مراد امانك...تاعبة عاللخر...نحب نرتاح و كهو
انا:باهي هاني باش نكمل الاجراءات...و ناخو اذن من الطبيب باش نخرجك من هوني
مرجعتليش...هزيت روحي خرجت...خذيت اذن من الطبيب...كملت الاجراءات متاع الخروج و رجعت عندها لقيتها سارحة...ملامح وجها باردة عاللخر..حاطة يديها زوز على كرشها..غزرتلي و عاودت سرحت..خذيت نفس و قربت منها نحكي
انا:تنجم تخرج توا
زهرة:نخرج وحدي
انا:انسى اني نخليك وحدك
زهرة:هاك خذيت كلشي مني...شنية تحب من عندي توا ؟
انا:زهرة مش وقتو الكلام هذا...مجبورة تسمع كلامي...و لا باش تخسر صغير لي في كرشك
غزرتلي ندرا كيف...تلوم فيا بغزرتها...و هزت روحها شوية تقعدت...قربت منها باش نعاونها...نطرتلي يدي تحكي
زهرة:نقوم وحدي
انا:باهي سايس روحك
زهرة:مانيش صغيرة مراد
تبسمت و هزيت كبوطها في يدي...قربت منها...حطيتو على كتافها...باش تلبسو...نحكي
انا:مزلت صغيرة يا فرخة...اصلا من اول نهار قابلتك فيه مزال مكبرتش عزيزتي
قحرتلي و كبست على كبوطها تلبس فيه...اول ما وقفت...قربت منها شديتها من يدها...نزلت راسها و سكتت...باقي نسايس فيها لين وصلنا للكرهبة...ركبتها و خلطت عليها...تكات لتالي تحكي
زهرة:هزني لداري
هزيت راسي غزرت لاشرف...حسيتو فهم عليا..مستيحل نجم نخليها وحدها خاصة ليلة...حطت راسها عالبلار سارحة مع ثنية...و انا سارح في افكاري...اول ما شد الفران...هزت راسها مروهجة تحكي
زهرة:علاه جينا لهوني ؟
انا:زهرة اسمعني
زهرة:كان ميقلقكش...تنجم تهزني لداري
تحكي و تغزر لاشرف...هز راسو غزرلي من المرايا شريتلو باش ينزل...حل الباب...و خرج...مدت يدها تحكي
زهرة:استنى وين ماشي انت ؟
خذيت نفس...و حطيت يدي فوق يدها...نزلتها و كبست عليها نحكي
انا:اسمعني زهرة...كان تحب الصغير متاعك يكون لباس مجبورة تبقى هوني
زهرة:بربي ياخي نسيت شكون سبب في حالتي هاذي ؟
انا:باهي...نعرف لانا سبب في هذا الكل...اما توا انسى اني نخليك وحدك...و زادة دار هذيكا معادش دارك
زهرة:شقصدك ؟
انا:لازمك تستانس بالوضع...عمر بعد توا طليقك
زهرة:صحيح...اما متنساش لي دار هذيكا متاع بنتي زادة...ماكش باش تنكر الحقيقة هاذي زادة...مانيش باش نسامح عمر عاللي عملو فيا...اما مانيش باش نحرم بنتي من بوها...و مانيش باش نخليك تعمل فيها لي عملتو فيا يا مراد
حلت الباب و نزلت...استغربت الفازة منها...اما اهم شي توا منحبهاش تفكر فيه...بعدها كلشي يجي مع الوقت خذيت نفس و خلطت عليها..حلت البون بالوقت..دخلت وراها...وقفت في بلاصتها...تحكي
زهرة:وين نجم نرتاح ؟
انا:برا هز المدام زهرة لبيتها
هزت راسها غزرتلي ندرا كيف...غزرت لعينيها نحكي
انا:كلشي تحتاجو تلقاه غديكا...حاول ترتاح و ما تخمم في حتى شي
حطت يدها على كرشها...و مشات شيرة دروج...شاورت للبون باش تخلط عليها...عديت يدي على وجهي...و دخلت لصالة...ترميت عالفوتاي...لين حسيت روحي هديت شوية...وصيت البون تحضرلها حاجة تاكلها و وصيت أشرف ياخو دوا من الفرماسي...و خلطت عليها وصلت للبيتها...دقيت مرتين مفماش صوتها...كبست عالبواني متردد حليتو...نغزرلها...راقدة في وسط في الفرش...مش حاسة بحتى شي....تنهدت بالقاوي...و عاودت سكرتها...و مشيت لبيتي...ترميت في وسط الفرش...سكرت عينيا بالقاوي...اول مرة نحس روحي مرتاح هوني...عندي برشا عليه الاحساس هذا...تعدا برشا وقت مرقدتش معاها تحت سقف واحد...منعرفش شنية لي مزال باش يصير...منعرفش اذا باش تسامحني و لا لا...اما لي متأكد منو انو هي باش تكون معايا انا و كهو.
أنت تقرأ
زهرة🌸
Casuale🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
