زهرة🌸

الحلقة التاسعة و الخمسون

حلقة 59
🔸️عمر يحكي:
عديت يدي على وجهي...دخلت بعضي...كي محلتش الباب...خاصة و الدنيا ظلمة الداخل...حتى من تليفوني طاحتلو شارج...محبيتش نعيط...منحبش نفجعها
رجعت للكرهبة بالزربة...هزيت مفاتح دار و رجعت...اول ما حليت الباب...رجع الضو...بقيت واقف في بلاصتي نغزرلها...وجها اصفر...قطرة دم مفيهش...بكلها تصب بالعرق...متوقعتش نراها هكا...حتى خصلات شعرها لاصقين في وجها...دم جمد في عروقي...باقي تغزرلي من غير ما تعمل ردة فعل...قربت منها بالسيف...وقفت قدامها نحكي
انا:ز زهرة...شبيك شفما ؟
دوب كملت كلامي...طاحت بين يديا...لقفتها في اخر لحظة...هزيتها في حملتي...حطيتها عالفوتاي...و نزلت عليها...نفيق فيها...هزيت دبوزة الما من الطاولة...بليتها شوية...نحكي
انا:زهررة...زهررة...تسمع فيا ياخي ؟
حلت عينيها شوية...تغزرلي مروهجة...وخرت لتالي بالوقت...كبست على يدها نحكي
انا:زهرة يا روحي...شفما شصار ؟
غزرتلي بعينين ضايعة...بدنها الكل يرعش...دخلت بعضي اكثر...شي من الفجعة لي كليتها...و شي من حالتها...جات باش تحكي...قص علينا صوت تليفونها لي نوقز...تلفت نغزرلو طايح عالارض...جيت باش نقوم كبست على يدي مرعوبة تحكي
زهرة:م متخلينش...عمر اماااان
تلفت عندها نغزرلها...عندي برشا عالخوف لي ريتو في عينيها...قربت منها اكثر...قعدت بجمبها...دخلت في حضني...كبست عليا بيديها زوز...تحكي
زهرة:خ خفت برشا...للحظة حسيت لهو باش يدخل عندي
قلبي دق بالوقت...جبدت روحي منها شوية نحكي
انا:شقصدك ؟
عدات يديها زوز على وجها...باقي ترعش بصفة غريبة...تحكي
زهرة:ف فما شكون جا...خ خرجت لبرا في بالي انت
انا:كمل
دخلت بعضي...و انا نسمع فيها...خايف تكون صارتلها حاجة جرايري...غزرتلي ندرا كيف تحكي
زهرة:ا اما...ك كان فما كرهبة اخرى...باقي يزمر بالقوي ك..كان مرجعتش لتالي...راهو ضربني بكرهبتو
انا:مريتش وجهو
زهرة:ل لا...ضو قوي برشا...سطع في وجهي..ه هو تعمد يعميني بضو...هو ك كان
قصت عالكلام...كي خنقتها البكية...تحاول تفهمني بيديها زوز...جبدتها عندي بالوقت...حضنتها بالقاوي نحكي
انا:يززززي...هاني معاك توا
زهرة:ع عمر...شكون هذا...ش شيحب مني...ع علاه جا لهوني ؟
كبست عليها اكثر...ركبني العصب...من ساقي لراسي منعرفش شكون من مصلحتو يوصل يعمل هذا الكل اول حد ضرب في راسي...عثمان...يمكن بالطريقة هاذي...يخليني نمشي من هوني مرة اخرى...اما مش المرة هاذي...مانيش باش نسمح لحد...يقرب من مرتي و لا ينزل دمعة منها...و لي عاشتو اليوم...باش يخلص حقو...مهما كان يكون...بستها من راسها نحكي
انا:اهداا يا روحي...يزززي
زهرة:ع عمر...هزني من هوني...ن نحب نرجع لدارنا غديكا أحسن...م معادش نحب نعيش الاحساس هذا مرة اخرى...ت تو كل جمعة نجيو هوني...و كان لزم كل يومين...ا اما منحبكش...تبعد عليا و تخليني أمانك
دخلت بعضها اكثر...نجمت نتوقع لي عاشتو في دقايق هذوكا...عديت يدي على شعرها نحكي
انا:باهي يا روحي...كيما تحب
عديت يديا زوز...على خدها...نمسح في دموعها..جبدتها عندي...نعدي في يدي على ظهرها...لين حسيتها هدات حطيت يدي على يدها...كبست عليها...بستها منها نحكي
أنا:لباس توا
زهرة:مممم
نزلت راسي...ضيقت عينيا...و انا نغزر...للجرح لي في كف يدها...عديت صوابعي عليه...جبدتها بالوقت...نزلت بعينيا نغزر لركبتها...مخي وقف...غزرتلها نحكي
انا:ش شنوة هذا ؟
زهرة:و وقت ك كنت باش نرجع لدار...دعثرت في أول درجة...يمكن على هذااكا
انا:باهي أبقى هوني...تو نرجع
زهرة:ل لا...عمر أمانك...متخلينيش
أنا:متخافش...مانيش باش نخرج...أما الجرح لازم يتنظف...باهي
زهرة:باهي
بستها من خدها...و هزيت روحي...سكرت الباب متاع برا...و هزيت تليفونها من الأرض.. لقيت هند طلبتها برشا مرات...و آخر ميساج تسأل فيه اذا وصلت..رديتلها الميساج...و حطيتو عالطاولة...دخلت للكوجينة...بالعادة خالتي الله يرحمها ديما تخلي دوايات هوني...و بما انو الجماعة مستانسين يعديو الويكاند هوني...باز تكون فما بوات فرماسي...حليت القجار الكل...لين لقيتها هزيتها في يدي...و رجعتلها...لقيتها باش ترقد...قعدت بجمبها مديت يدي نعقم في الجرح...تهزت و تحطت تحكي
زهرة:ت تحرق
أنا:تحمل شوية عزيزتي
زهرة:كهو
انا:مفماش ضمادة...على هذاكا رد بالك أكثر
زهرة:باهي
عديت يدي على خدها...رجعتلها شعرها لتالي...نحكي
انا:توا باش تاكول شوية...و ترقد
زهرة:منحبش...خليك معايا و كهو
انا:باهي إيجا تراه
حطيت من يدي...و قربت منها...هزيتها في حملتي...و دخلت للبيت...حطيتها عالسرير...نحيت الفاست متاعي حطيتها على جنب...هزيت أول روبة جات على يدي و رجعتلها...بدلتلها دبشها...و تسطحت بجنبها...مديت يدي نعدي فيها على شعرها...لين ترخات كبسة يدها على سوريتي...نزلت راسي...غزرتلها...لقيتها غفات...لتوا مزلت داخل بعضي...منعرفش شنوة كان باش يصير فيا...كان تأذت جرايري...يمكن حست لكان باش يصير هذا الكل...على هذاكا كبشت فيا صباح...منعرفش قداش تعدا وقت...طار عليا النوم...عديت ليل الكل نغزرلها...غفيت وجه الصباح...و فقت قبلها...نزلتها من فوقي حطيتها عالسرير...بستها من خدها...غطيتها و هزيت روحي خرجت من البيت...عملت دوش...تفرهدت بيه...بدلت دبشي...حضرت الفطور و رجعتلها...حطيت الصينية عالتابل دونوي...و ﻗﻌﺪﺕ ﻋﻠﻰ ﻃﺮﻑ ﺍﻟﺴﺮﻳﺮ ﻧﻐﺰﺭﻟﻬﺎ...ﻋﺪﻳﺖ ﺻﻮﺍﺑﻌﻲ ﻋﻠﻰ...ﺧﺪﻫﺎ...ﺣﻠﺖ ﻋﻴﻨﻴﻬﺎ ﻣﻔﺠﻮﻋﺔ...ﻛﺒﺴﺖ ﻋﻠﻰ ﻳﺪﻫﺎ ﻧﺤﻜﻲ
أﻧﺎ:ﺷﺸﺶ...ﺍﻫﺪﺍ ﻳﺎ ﺭﻭﺣﻲ
تنهدت بالقاوي...و ﻫﺰﺕ ﻳﺪﻳﻬﺎ ﺯﻭﺯ...ﻋﺪﺍﺗﻬﻢ ﻋﻠﻰ ﻭﺟﻬﺎ ﺗﺤﻜﻲ
ﺯﻫﺮﺓ:ﺻﺒﺎﺡ ﺍﻟﺨﻴﺮ
انا:صباح النور حبي
ﺯﻫﺮﺓ:ﻗﺪﺍﺵ ﺍﻟﺴﺎﻋﺔ ﺗﻮﺍ
انا:مممم...تقريب ال 10
زهرة:ممم سامحني...والله منعرفش كيفاش رقدت لتوا تو نقوم نحضر الفطور فيسع
هزت روحها تقعدت...كبست على يدها و غزرتلها نحكي
انا:فطورك حاضر يا روحي
تلفتت تغزر لصينية...و رجعت غزرتلي بالوقت...تحكي
زهرة:عملت هذا على خاطري ؟
انا:عندي غيرك أنا ؟
زهرة:لا أنا كهو
انا:عيش صغرونتي...هيا توا...نحبك تفطر بالقدا...باش متتعبش في ثنية
زهرة:ث ثنية شنوة ؟
انا:باش نرجعو لدارنا
زهرة:شننوة ؟
انا:مش هذا لي تحب عليه إنتي ؟
قربت مني شوية...حطت يدها على خدي...و غزرتلي في عينيا تحكي
زهرة:صحيح...اما منقصدش لي فهمتو انت عمر...حكيت اكاكا من خوفي البارح و كهو...انت تعبت برشا...باش تكون بين أهلك...منحبش نكون السبب اللي باش يفرقك عليهم...بلكشي الحكاية معادش تتعاود...و نجمو زادة نقعدو في دار اخرى...خاطر هوني مطرفة برشا...مش لازم نرجعو لتونس توا
تبسمت و انا نغزرلها تحكي...كبست على يدها...لي فوق خدي...و نزلتها شوية...بستها منها نحكي
انا:عندك حق...انا رجعت لهوني باش نكون بين عيلتي اما مش على حسابك انتي...مرجعتش لهوني باش نخسرك زهرة...و منحبش لي صار البارح يتعاود...و مانيش باش نعديه زادة
زهرة:ك كيفاش باش تبعد مرة اخرى عمر...امك و هند ياخي مخممتش فيهم
انا:المرة هاذي مش كيما كل مرة...اصلا احنا جينا لهوني باش نعديو الفاكونس...و قرايتك مبقاش عليها برشا...و انا سيبت خدمتي...و منجمش كل مرة نخليك هوني وحدك
زهرة:متأكد
انا:مممم...تو كل ويكاند نعديوه هوني باهي
قربت مني اكثر...دورت يديها زوز على رقبتي..حضنتني بالقاوي تحكي
زهرة:انت ديما تاعب جرايري عمر...ديما متعبتك معايا في كلشي
كبست عليها اكثر...و غرست يدي في شعرها نحكي
انا:زهرة...صغرونتي...بنوتي...منحبكش تخمم بالطريقة هاذي جملة...حط في بالك...طول ما انا عايش...مستحيل نخلي حد يقرب منك...و لا حتى يضرك مهما صار...حياتي ملكك انتي و كهو
كبست عليا اكثر...خذيت نفس من ريحتها...نسمع فيها تحكي
زهرة:و انا منجمش نعيش من غيرك عمر...انت حياتي الكل
بستها من رقبتها...و جبدت روحي لتالي...نحكي
انا:هيا حبي...نحبك تكمل فطورك الكل...باش تعاوني نلم الدبش هذا الكل
زهرة:انت فطرت ؟
انا:شيهمك فيا...هيا فيسع
زهرة:من امتى نفطر من غيرك انا
انا:زهرررة
زهرة:لا زهررة لا زوز...مانيش باش نفطر وحدي
انا:باهي شتحب توا ؟
زهرة:نحبك تفطر معايا
جيت باش نحكي...سبقتني...كي حطت توست في فمي تحكي
زهرة:وحدة برك امانك
دوب نجمت نبلع لي فمي...قربتلي كاسة العصير..خذيت رشفة منها...نحكي
انا:يززي عزيزتي كهو
زهرة:وحدة اخرى امان...ولا مانيش باش نفطر انا زادة
انا:باااهي...هات هوني
تبسمتلي بالوقت...خذيت من قدمة اخرى...خطفت بوسة من شفايفها...و هزيت روحي...خرجت من البيت كلمت هند...هزت عليا بالوقت تحكي
هند:اهلا عمر لباس ؟
انا:لباس هند...يا ريت تخبرهم لانا باش نكون في القصر بعد ساعة...و نحب الكل موجود
هند:لباس ماهو ؟ صارت حاجة ؟
انا:انتي خبرهم و كهو...عيش اختي
هند:باهي عمر
علقت عليها...و رجعتلها...دوب كلات شوية...ضيقت عينيا نحكي
انا:شقتلك ؟
نزلت راسها بالوقت...خذيت نفس...و قربت منها...قعدت بجنبها نحكي
انا:شبي حبي
زهرة:ميسالش نسألك ؟
انا:مممم
زهرة:زعمة شكون لي عمل اكاكا...شنية مصلحتو
انا:منعرفش عزيزتي...اما صدقني...كان صار و طلع عثمان ورا الحكاية مانيش باش نعديهالو اكيد
زهرة:بووك ؟
انا:ممممم
زهرة:علاه حتى يعمل هكا ؟
انا:منعرفش عزيزتي...مجرد تفكير برك...المهم عندي انتي لباس توا
زهرة:عمر...عيش حبي...مهما صار رد بالك تعمل حاجة تندم عليها مبعد
انا:باهي يا روحي طمن
زهرة:باهي خليني نقوم نعاونك توا
انا:ساقك سافا ؟
زهرة:مممم طمن معادش توجع
عديت يدي على شعرها...بستها من خدها و هزيت روحي...خلطت عليا بالوقت...منعرفش كيفاش تعدا الوقت...حطيت لي فاليز الزوز في الكرهبة...عديت عينيا عالدار...و ركبت بحذاها...بقات ساكتة من غير حتى كلمة...اول ما شديت الفران بحذا القصر...غزرتلي مصدومة...خذيت نفس نحكي
انا:متخافش...نحب نوضح الامور قبل ما نمشي
زهرة:ك كان يبدا هوني ؟
انا:ان شاء الله
زهرة:عمر متأكد ؟
انا:مممم هيا انزل
حليت الباب و نزلت...قربت مني...شدتني من يدي خذيت نفس بالقاوي...و دخلت...دخلت و منعرفش على شنية قادم المرة هاذي...امي اول وحدة عارضتني...و قربت مني تجري...تحضن فيا و تبوس...و تحكي فرد وقت
امي:اهلا بالغالي...مرحبا بيك ولدي
انا:عيشك امي
أمي:شفما يا روحي...من وقت كلمتنا هند و انا على أعصابي
انا:امي...جيت باش نودعكم
غزرتلي ندرا كيف...شعرة لا طاحت...شديتها بالوقت قعدتها عالكرسي...طلعت راسي غزرت لهند لي بقات جامدة في بلاصتها...حتى مصطفى...غزرتلهم نحكي
انا:امي تعرف بالقدا لانا مرجعتش باش نستقر هوني اما تو نجي نطل عليكم كل ويكاند...و نتوما زادة تنجمو جو بحذانا
امي:لااا يا عمر...ماكش باش تخليني...مش بعد ما رجعتلي
طلعت راسي غزرت لهند...قحرتلي...تحكي
هند:خليه يمشي امي...اصلا تعود يعيش من غيرنا ماكش باش تأثر فيه بدموعك هاذي
جيت باش نحكي قصت عليا...كي طلعت تجري لبيتها عديت يدي على وجهي نحكي
انا:مصطفى
مصطفى:اول مرة نوافق هند في قرارها...وقت انت تقرر حاجة من غير ما تخبرنا...راينا ماهوش باش يهمك
خذيت نفس و تلفت لزهرة...هزتلي براسها لا...اما مستحيل نجم نبقى هوني...خاصة و الخدمة زادت توا منجمش نخليها ديما وحدها...فقت من سرحتي...على كبست يدها تحكي
امي:هزني معاك عيش ولدي...خليني نشبع بيك...قبل ما ربي يهز امانتو
انا:لطف عليك...فاش قام الكلام هذا توا امي
امي:انا من غيرك مانيش عايشة...متحرمينش منك امانك
انا:مانيش باش نبعد المرة هاذي امي...مانيش باش نخليكم...اما انتي اكثر وحدة تعرف لخدمتي الكل غديكا...و منجمش نخلي زهرة وحدها في بقعة اكاكا كل مرة
امي:جيبها بحذانا...اما متمشيش امانك
انا:امي وسع بالك عيشك
امي:كان باش تمشي نحبك تحلفلي...لانا باش نراك في اقرب وقت
انا:وعد والله
امي:اما قبل هذا الكل...لازم تقابل بوك
بقيت نغزرلها...مش مستوعب كلامها...هزت راسها تحكي
امي:انت طلبت تقابلنا الكل...و بوك توا في بيتك...نعرف اذا انت قررت تمشي من هوني...هو السبب الاول...على هذاكا نحبك...توضح كلشي توا قبل ما تمشي...عيش ولدي
أنا:باهي...باهي
هزيت روحي بالسيف...غزرتلها مرة اخرى...نحاول ناخو قوتي منها...تبسمتلي بالوقت...خذيت نفس و طلعت
كل درجة...نحس روحي نرجع لتالي اكثر...مع اني قابلتو قبل توا و جات عيني في عينو..اما لتوا معنديش جرأة اني نرجع للماضي...و ننسى اكا نهار...منعرفش كيفاش وصلت لبيتي...لقيت الباب محلول...غمضت عينيا بالقاوي...و رجعت حليتهم...دخلت نغزرلو...عاطي بظهرو...يغزر لصورتنا...نسمع فيه يحكي
بابا:عشر سنين و انا نسأل في روحي..لي عملتو صحيح و لا غالط...وقفت هوني كل يوم...و كل ليلة...نسأل في روحي نفس السؤال...اما بعد الوقت هذا...معادش نعرف شكون فينا الغالط...انا و لا انت...و لا الوقت لي فرقنا
كبست عالبونية متاعي...منحبش نسمع كلامو...معاد نحب حتى حد يلومني...خاصة هو...منحبش نكون ديما انا الغالط...تنهد بالقاوي...و كمل كلامو
بابا:غلطت كي وقفت في وجهك...كي منعتك...حرقتك و حرقتهم الكل معاك...توا باش نسألك يا عمر و نحبك جاوبني
تلفت عندي بالوقت...جات عيني في عينو...ماهيش نظرة متاع عثمان بن قاسم...الراجل لي ما يهدو حد للحظة لقيت روحي نهرب من اكا الغزرة...لي كلها لوم قرب مني...وقف قدامي...يحكي
بابا:علاه مشيت ؟
طلعت راسي نغزرلو مصدوم من كلامو...لدرجة وحل الكلام في حلقي...و معرفتش بشنية لازمني نجاوبو خذيت نفس بالسيف...نحكي
انا:مش انت طردتني من دارك
بابا:داري ؟ من امتى انت كنت تسمع كلامي...و تمشي من غير ما ترجع جاوبني
انا:انت قتلي مرة...البلاصة لي تتطرد منها مرة...معادش ترجعلها...حتى كان حطو سكينة في رقبتك
بابا:معناها مزلت حافظ كلامي لتوا
انا:شنوة لازمني نقول توا ؟
بابا:لهدرجة خذيت بخاطرك مني...عشر سنين متلفتش وراك...مهزيتش تليفون و سألت عليا
انا:انت طلبت هذا الكل
بابا:شبيك موقفتش في وجهي كي العادة...علاه محاولتش تحل الموضوع مرة و زوز و ثلاثة...علاه اخترت اقصر ثنية...انك تهرب و تخلي كلشي وراك
انا:مكانش فما حل اخر...انت مكنتش باش ترجع في كلامك...و انا مكنتش باش نسلم في حلمي
بابا:حققت حلمك...وليت مهندس كيما حبيت و تمنيت
هزيتلو براسي ايه...قرب مني اكثر...حط يدو على كتفي يحكي
بابا:هذا ولدي لي نعرفو...ميسلمش مهما صار
بقيت نغزرلو من غير حتى كلمة...عدا يدو على وجهو يحكي
بابا:مخطرلكش تطلبني حتى مرة
انا:انت زادة مطلبتنيش حتى مرة وحدة
ضربني بيدو على صدري...و غزرلي ندرا كيف يحكي
بابا:ستنيتك...عشر سنين...ستنيت نهار لباش تدخل من الباب لي خرجت منو...كنت نقول...اليوم يكلمني...اليوم بلكشي يرجع...حتى كي كنت تكلم هند...ناقف بحذا باباها و نسمعها...كنت تسألها عليهم الكل...كان على بوك يا سيدي انا غلطت...احسبني راجل كبير...و مخي مسكر كان منجمتش نكلمك...و نتعدا لي صار...علاه متكونش خير مني...علاه متنازلتش حتى شوية يا عمر
نزلت راسي بالوقت...منجمتش نردلو...حتى هو عندو حق...حتى انا كسحت قلبي...و متلفتش ورايا...باقي يدز فيا و يحكي
بابا:يا ريتك ما كنت تشبهني يا عمر...و الا كنت باش تتلفت لبوك...لي تكسر ظهرو بعد ما مشيت و خليتو تستخايلني منحبكش...و تستخايلني فرحان...خاطر ضيعت ولدي من يدي...راني بعدك وليت عاجز...وليت نرا خيالك في كل بقعة...وليت نقول تو يرجع ولدي و يتصلح الوضع...اما حتى بعد ما رجعت...قررت تمشي قررت تهرب مرة اخرى
انا:مانيش هارب
بابا:انت ضعيف عمر...خاطرك لتوا مجيتش واجهتني لتوا موقفتش في وجهي...و قتلي انت لي غالط...و انت السبب في كلشي
انا:منجمش نعمل هذا الكل
بابا:علاااه ؟
انا:خاطر انا زادة غلطت...غلطت كي متلفتش ورايا غلطت خاطر سمحت لروحي نعيش من غير عيلة...انا زادة تعبت برشا...يا ب..
سكت خاطر الكلمة...معادش قلتها من سنين...تبسم يحكي
بابا:نحب نسمعها منك مرة اخرى
عديت يدي على وجهي...تنهدت بالقاوي...غصة واحلة في حلقي...غزرت في عينيه...لدموعو لي باش تنزل خذيت نفس نحكي
انا:س سامحني ب بابا
حلي يديه بالوقت...ترميت في حضنو بلا ما نخمم...بلا ما نرجع لتالي...نحس في روحي طفل صغير و لقى حضن بوه مرة اخرى...معملتش حسابي لهذا الكل...نزلت دمعة مني...دمعة حرقتني...و خلاتني نحس بمرارة السنين لي تعدات عليا...جبدت روحي منو...عديت يدي على وجهي...كبس على كتفي يحكي
بابا:بلاصتك هوني يا عمر...في دارك...وسط عيلتك ماكش مجبور تخلي حد وراك
انا:صارت حاجة خايبة البارح
بابا:شننوة ؟
انا:فما شكون تعدا عالدار...و مرتي كانت وحدها
بابا:لحظة عمر...متأكد من اللي تقول فيه
انا:منجمش نخليها هوني اكثر...منحبش لي صار يتعاود
بابا:شكون من مصلحتو يعمل معاك هكا
انا:مشى في بالي انت...اول مرة
بابا:مستحيل نعمل حاجة تضر ولدي و مرتو...اما خلي الحكاية عندي
انا:لازمني نرجع لتونس
بابا:و السبب ؟
انا:خدمتي خليتها عالقة...و زهرة على قريب باش ترجع لقرايتها
بابا:تو كي تولي لقرايتها...تنجم ترجع...اما توا...ما عندك وين ماشي...هيا قدامي
ضيقت عينيا مش فاهم كلامو...خرج من البيت...وقف في النص...و غزرلهم اللوطة يحكي
بابا:ولدي رجع...العشا الليلة على شرفو...برا مصطفى خبر العمال الكل..و نتوما بداو تحضرو من توا
قبل ما نستوعب كلامو...لقيت هند في حضني...تحكي
هند:كنت نعرف ماكش باش تخلينا
انا:مجنونة
بستها من راسها و جبدت روحي منها...هبطت معاهم اللوطة...نحكي
انا:سامحني امي
امي:ماكش باش تمشي يا روح امك
انا:باش نكمل الفاكونس هوني...اما قبل لازمني نلقى دار قريبة
بابا:دارك من بكري حاضرة
امي:انت باش تعيش معانا...هوكا جيهتك من بكري حاضرة و تستنى فيك...تو شوية تنظيف و تولي حاضرة
تلفت نغزر لشيرة لاخرى...كانت ديما تقولي باش نعرسلك هوني قدامي...نحب نراك كي تدخل و تخرج خذيت نفس و غزرت لزهرة...لي باقي واقفة في بلاصتها...قربت منها...شديتها من يدها...و غزرتلو نحكي
انا:زهرة مرتي
قرب منها وقف قدامها...كبست على يدي اكثر...عرفتها خافت منو...عدا يدو على شعرها يحكي
بابا:انتي توا في مقام هند و سلمى...منقصدش لي صار اخر مرة
زهرة:ع عيشك عمي
امي:عمر برا هز مرتك لبيتك...ترتاح شوية...لين نوصي شكون يحضرلكم داركم
كبست على يدها و هزيتلها براسي ايه...طاوعتني و طلعت معايا...سكرت الباب...و تلفتلها نحكي
انا:صار عكس لي خططتلو المرة هاذي...منقصدش نحطك في هكا موقف عزيزتي...اول ما يقرب يوفا الفاكونس نرجعو لدارنا...و بالنسبة للي صار البارح معادش يتعاود...نوعدك مهما كان...باش نخليه يخلص حق عمايلو
زهرة:المهم عندي انك تصالحت مع بوك عمر...هذا توا اهم من كلشي في الدنيا
تبسمتلها بالوقت...جبدت روحها مني...قعدت عالسرير نغزرلها...دور في البيت و تحكي
زهرة:هاذي بيتك انت ؟
انا:مممم
زهرة:مزال كلشي كيما قبل
انا:تقريبا
زهرة:محلاها
انا:مش قدك...ايجا عندي تراه
قربت مني...جبدتها من يدها...قعدت في حجري تحكي
زهرة:شكون سلمى ؟
انا:بنت خالتي
زهرة:شبيني مريتهاش من قبل
انا:مبعد تتعرف عليها
زهرة:تسكن هوني ؟
انا:مممم
زهرة:انت قابلتها...يعني حكيتو مع بعض
انا:لااا
زهرة:زعمة هي زادة متغشة منك
انا:شيهمنا فيها توا
زهرة:انا جيست كنت...ب..
قصيت عليها الكلام...كيف نزلت على شفايفها...دوب بستها نحكي
انا:ششش...اخطانا من سيرتها توا...توحشتك عاللخر
كبست عليها اكثر...و غطست في شفايفها...حسيت روحي توحشتها برشا...اخر فترة...حتى منها مقصرتش معايا...و كان نبقى عالحالة هاذي...معادش نجم نشد روحي عليها اكثر...رخفت يدي شوية...على صوت الباب...جبدت روحها لتالي في لحظة...وقفت...دخلت هند بالوقت...تحكي
هند:عمر ميسالش نخطف منك زهرة شوية
عدات يدها على شفايفها...شخت عالفازة...عرفتها دخلت بعضها...غمزتها بالوقت نحكي
انا:برا عزيزتي...حتى انا تاعب...و نحب نرقد شوية
عينيها وساعو...و غزرتلي ندرا كيف...عرفتها تغشت تبسمتلها و تسطحت لتالي...وصلت لباب...غزرتلي و خرجت...مبعد نعرف كيفاش نرضيها الفرخة...غمضت عينيا بالوقت...قداش عندي عليها البيت هاذي...حاسس روحي رجعت عشر سنين لتالي...لتوا مش مصدق لي صار...اول مرة نحس انو بالرسمي بابا بحاجتي...دموعو ورجفتو...خلاونتي...نندم على كل خطوة عملتها بعيد عليهم...توا لي تعدا وفا...اكيد باش تكون فما حياة جديدة...انا و زهرة باش تكون عندنا عيلة مرة اخرى خاطر كلشي يخصني...يخصها هي زادة...تبسمت و انا نذكر فيها...تي الفرخة...حتى في نومتي مخلاتنيش نرتاح...معاد نحب نخمم في حتى شي...و لا حتى في لي جاي...لي يهمني توا...انو عيلتي و مرتي معايا...و معاد يهمني حتى شي اخر.
حليت عينيا مروهج...منعرفش كيفاش غفيت...حتى انا عديت ليل الكل فايق...غمضت عينيا بالقاوي...و رجعت حليتهم...نثبت فيها...هزيت روحي شوية مستغرب عديت يدي على وجهي نحكي
أنا:س..سلمى
تقعدت بالوقت...و أنا نغزرلها مربوثة...فلتت الكتاب من يدها...طاح عالأرض...باقي تغزرلي ندرا كيف...هزيت روحي وقفت...نثبت فيها...اول مرة نغزرلها و هي قريبة مني...عكس المرة لي فاتت...عديت عينيا على وجها ملامحها كيما هند تقريبا...عينيها خضوريتهم تغماق في الظلمة...كي العادة...باقي تغزرلي بالنفس الطريقة متاع كل مرة...كسر حاجز صمت لي بينا...صوت هند و هي تعيط لوطة...رجعت شعرها لتالي...و نزلت تهز في الكتاب...و الأوراق لي كانت داخلو...هزت روحها...تحكي
سلمى:س سامحني...م مكنتش نعرف لأنت هوني
انا:ما صار شي
سلمى:هاني باش نخرج
كبست عالكتاب بيديها زوز...حسيت بتوترها...أول ما تلفتت...وقفتها نحكي
انا:سلمى
غزرتلي ندرا كيف...منعرفش علاه حاسها تلوم فيا خذيت نفس نحكي
انا:كيفك ؟
سلمى:لباس عيشك
انا:شعاملة ؟
سلمى:حتى شي
انا:شنية صار في قرايتك ؟
سلمى:انت اكثر تعرف...انو اكثر حاجة تنجم تعملها هوني...تدفن احلامك...و تتقبل الواقع متاعك
انا:اما برشا حاجات تبدلت هوني
سلمى:هذاكا في رايك انت...خاطر ما عشت حتى شي معانا...انت توا واحد غريب علينا
انا:معناها وجودي معاكم غالط
سلمى:لااا...انت رجعت لعيلتك...رجعت وين لازم تكون حتى انك لقيت كلشي كيما خليتو من قبل اما
انا:شنووة ؟
صياح هند قوا لوطة...تبسمتلي ندرا كيف و قربت من الباب...غزرتلي...و كملت كلامها
سلمى:مش انت عمر للكل كان يستنى فيه...المهم فرحانة خاطرني ريتك مرة اخرى...ولد خالتي
خرجت من غير حتى كلمة اخرى...خلاتني واقف في بلاصتي...مش فاهم كلامها...منعرفش حتى شبيني ركزت معاها لهدرجة...حتى سلمى جزء من الماضي متاعي...عديت يدي على شعري...خذيت نفس و خرجت من البيت...وقفت في النص...نغزر لهند اللوطة...هزت يدها تحكي
هند:لتوا راقد يا معلم...راو كلشي هوني على خاطرك
تبسمت بالوقت...جات عيني عليها...خارجة في جبة عربي...حاطة ظفيرة على جنب...هازة صينية...و تمشي ورا هند...شخت عليها...اول مرة تلبس هكا...هوكا نتيجة لي يتبع الفرخة متاع اختي..كبست بيديا زوز عالحديدة نتبع فيها بعينيا...حتى و هي قدام عينيا...نحس في روحي متوحشها...طلعت راسها...جات عيني في عينها تبسمتلي بالوقت...عدات يديها عالجبة تسأل فيا بعينيها على رايي...هزيتلها براسي لا...عوجت فمها مش عاجبها ضحكت بالوقت...نسيت كلشي قاعد نخمم فيه و انا نغزرلها...فقت من سرحتي كي ريت بابا داخل...والله احوال...متوقعتش باش نقول الكلمة هاذي مرة اخرى نسمع فيه يحكي
بابا:الطاولة حاضرة
امي:ايه كلشي حاضر...مصطفى وينو ؟
بابا:خليتو ورايا...تو يجي
هند:وييينكم والله جعت عاللخر
بابا:هننند عزيزتي...برا نادي على سلمى
تلفت نغزرلها...ماشية و تقرب مني...غزرتلو تحكي
سلمى:هاني جيت عمي
بابا:عمممر هيا فيسع
هزيتلو براسي ايه...تعدات من قدامي...خلطت عليها نمشي وراها...اول ما وصلنا اللوطة...لقيت زهرة مركزة معاها...طلعت راسها غزرتلي بالوقت...و تبسمت تحكي
زهرة:مرحبا
سلمى:مرحبا بيك انتي...انا سلمى
زهرة:و انا زهرة
سلمى:متشرفين عزيزتي
زهرة:عيشك
امي:سلمى قابلت عمر ياخي
سلمى:مممم...حكينا قبيل
امي:هيا باهي
قربت من زهرة...جبدتلها الكرسي...و غزرتلها نحكي
انا:تفضل عزيزتي
زهرة:عيشك
خلط علينا مصطفى...عدينا لمة حلوة...عندي سنين طويلة عليها...متوقعتش باش نرجع نقعد بين عيلتي مرة اخرى على نفس الطاولة...حديث يجيب...و حديث يهز...مرة بابا يسأل...مرة مصطفى...مرة انا...مرة هند
اما لا سلمى و لا زهرة...نطقو بكلمة...اول وحدة انسحبت سلمى...بقيت نغزرلها لين طلعت...منعرفش علاه حسيتها مش حاملة وجودي معاهم...غريبة فيها مع انها كانت اول وحدة تعارضني وقت نغيب برشا
زايد المرة هاذي غششت الكل مني...تلفت نغزر لزهرة حتى هي مزالت تاعبة من ليلة البارح...اول ما انسحب بابا...استأذنت منهم...و شديتها من يدها...دخلت لداري هذا لي كانت تقولو امي ديما...دارك في قلب داري تبسمت و انا نتذكر...لحقو يحضروها بين ليلة و نهار مع انو فيها زوز بيوت و صالة...اما كلشي في بلاصتو حتى من بيتنا...غزرتلي تحكي
زهرة:محلااها
حطيت الفاست من يدي...و قربت منها...جبدتها من يدها...قربتها مني نحكي
انا:زهرتي...نعرف لي تعبتك معايا برشا...منحبكش تتمرمد كل مرة في بقعة على خاطري...نعرف لدارنا احسن من هوني ببرشا...و اول ما تبدا قراية تو نرجعو و الفاكونس لي بعدو...نوعدك باش يتعدا احسن من هذا باهي
زهرة:عمر فاش تحكي أنت...انا عمري ما فكرت بالطريقة هاذي...وين تبدا أنت مرتاح...أنا مرتاحة...ميهمش البقعة و لا البلاصة لاحنا فيها...المهم احنا مع بعض
كبست على وجها بيديا زوز...بستها من راسها...وجبدتها عندي...حضنتها...نحكي
انا:مكنتش نعرف شنية باش نعمل من غيرك
زهرة:كنت باش تعرس بسيرين...و كل يوم شايخين في ريستو...من غير ما ننسى حركاتها الفينو
انا:هههههههههههه كنت باش نعيش حياة مملة لهدرجة
زهرة:و اكثر عزيزي
كبست عليها اكثر...شايخ على تصرفاتها...يمكن هذاكا لي كان باش يصير فيا...كان عرست بسيرين...عندها حق كنت باش نلقى روحي عايش حياة انا رافضها...جبدت روحها مني..تحكي
زهرة:نحب نرا البيت لاخرى زادة
انا:باهي لالة تفضل
هزيت لي فاليز لي في الصالة...حطيتهم في البيت و وقفت في الباب...نتبع فيها بعينيا...و هي تغزر لروحها في المراية...تبسمت على جنب...تلفتت عندي بالوقت تحكي
زهرة:ياسر محلاه جو العيلة عمر
هزيتلها براسي ايه...و قربت منها...حضنتها من تالي غزرتلي في المرايا تحكي
زهرة:و سلمى بنت خالتك...ياسر محلاها الطفلة
بستها من خدها...و دورتها عندي...كبست على اجنابها نحكي
انا:يمكن...اما مش قدك
زهرة:ههههههههه لا عزيزي مش لهدرجة
انا:و اكثر
زهرة:امتى حكيت معاها انت ؟
انا:وقت غفيت في البيت...دخلت عندي...في بالها البيت فارغة
هزت يديها زوز...تحل في فلس سوريتي...و تحكي فرد وقت
زهرة:شنية حكيتو ؟
انا:حتى شي مهم
زهرة:ملا شبيها...كانت مقلقة في السهرية ؟
انا:امورها عزيزتي...شيعرفني انا
زهرة:باهي من غير ما تتغشش عليا توا
انا:زهرة شبيك ؟
زهرة:منعرفش...كي تبدا اي وحدة قريبة منك...ندخل بعضي...و نعرف لانت تفد من الاسئلة هذوما
انا:صااار يا مغيارة...ايجا نقلك
كبست على وجها بيديا زوز...خطفت بوسة من شفايفها نحكي
انا:أغزرلي هوني زهرة...انا مستحيل نغزر في وحدة اخرى غيرك...مهما صار...القلب هذا لي حبك...ماهوش باش تكون فيه مرا اخرى غيرك...إنتي ملكتني...و ملكت كل حاجة فيا
زهرة:و انا نموت عليك عمر...منجمش نستخايل حياتي من غيرك...نحبك ديما موجود معايا...مهما صار
انا:و انا مستحيل نخليك يا فرخة
نزلت على شفايفها مرة اخرى...بستها منهم...و جبدت روحي نحكي
انا:صحيح...ياسر وتاتك الجبة يا روحي
زهرة:تحكي بالرسمي ؟
انا:مممم
زهرة:هند اختارتها
تلفتت عطاتني بظهرها...تغزر لروحها في المرايا...قربتلها اكثر...جبدت شعرها شوية...نحل في الظفيرة متاعها...و نحكي فرد وقت
انا:و تعرف لانا توحشتك برشا
اول ما كملت جبدت روحها لتالي...و تلفتت عندي...تحل في حزام الجبة و تحكي
زهرة:ممممم انا متوحشتكش...تاعبة و نحب نرقد
بقيت نغزرلها مبهم...قحرتلي و عطاتني بظهرها...تهز في الفاليز باش تحطها عالفوتاي...تذكرت الفازة متاع بكري معناها ترجعلي فيها الفرخة...قربت منها بالزربة...دورتها عندي...كبست عليها...و نزلت على شفايفها نحكي
انا:في بالك باش تهرب مني
زهرة:و انت الصباح بعثتني من غير ما تسأل
انا:شنية تحبني نعمل...نقولها هند ارجع مبعد...خاطر باش نرقد مع مرتي توا
زهرة:تي احشم
انا:و هي بقات في حشمة من اصلو
زهرة:باهي سيبني...خليني نبدل حوايجي
انا:ماكش باش تبدل
زهرة:عممر...شبيك تتصرف هكا يا ولدي
انا:نعمبو عمري...كيفاش حبيتني نتصرف...و انا باش نهبل عليك
زهرة:باهي سيبني ساعة
انا:مانيش مسيب
زهرة:باش نبقاو هكا
انا:معنديش مشكلة
زهرة:عمممر
قالتها بدلال...كملت عليا بيها...لقيت روحي كابس عليها اكثر...و غاطس في شفايفها...جبدت روحي شوية نحكي
انا:شنية توا ؟
زهرة:باهي اتو نبدل قبل
انا:خلي عليك...تو ندبر راسي
زهرة:باهي
نزلت عينيا عليها...دورتها قدامي...و ضيقت عينيا نحكي
انا:شنية هذا ؟
طرشقت بالضحك و قربت مني...حطت يديها زوز على وجهي...باستني بالوقت تحكي
زهرة:مش قتلك خليني نبدل ساعة...خاطر ماكش باش تنجم تنحيهالي
تبسمت على جنب...و قربتلها اكثر...نزلت عليها...هزيتها بين يديا نحكي
انا:هاني قتلك باش ندبر راسي
حطيتها أول ما ضحكت و نزلت عليها...عديت يدي على شعرها نحكي
انا:شنية يضحك فيك توا ؟
زهرة:شي
انا:متأكدة
زهرة:نخمم وين مزال باش ترصالنا
انا:يا بليدة...باش ترصالنا في دارنا عزيزتي
زهرة:باش نرجعولها مرة اخرى...مش هكا
انا:اكيد يا روحي
زهرة:باهي كيفاش...باش تنحيها الجبة توا
تبسمت و انا نغزرلها...عينيها وساعو...حطت يدها على صدري تحكي
زهرة:رد بالك تفكر تقطعها...لازمني نرجعها لهند
انا:متخافش يا فرخة مانيش باش نقطعها...انتي برك اسكت شوية...و نحي الافكار هذوما من مخك
زهرة:منحبش نسكت
انا:تو نسكتك بطريقتي
جات باش تحكي...قصيت عليها الكلام...و طيرت الجبة توبة كان مزلت نخليها تلبسها وقت تبدا معايا...منعرفش علاه حسيت روحي متوحشها برشا...يمكن خاطر ليلة البارح تعدات علينا كابوس...و لا يمكن من الاحساس الخايب لمزال مسيطر عليا...نحبها ديما معايا...ديما قدام عيني...عمري ما توقعت باش نوصل نحب و لا نعشق طفلة لهدرجة...و تعلقها بيا...خلاني نخاف عليها اكثر حتى من الكلام...ما نحب حتى حد يقربلها و لا يجرحها كل يوم يتعدا...نتأكد انو حياتي ولات مربوطة بكلمة منها...كان تبعد عليا نضيع...و مانيش باش نلقى طريقي مرة اخرى.