حلقة 125
آسيا تحكي:
هزيت راسي نغزر لدارنا...مترردة و خايفة فرد وقت خايفة من ردة فعلو...خايفة على صغيري...لي حسيتو عطاني قوة غريبة...منعرفش علاش قدمت على خطوة كيما هاذي...أما لي صار شهر لتالي...تصرفاتو معايا قهرتني...فكرة أنو قرب لوحدة غيري حرقتني من داخل ريحتها كانت قوية...ريحة تقول انو الطفلة هاذي كانت في حضنو و بين يديه...على هذاكا منحبوش يندم على تصرفاتو معايا...جيست خاطرني حبلة...و لا على خاطر صغير...هو مكانش حاطو في الحساب...و نبهني عليه قبل...لتوا منعرفش كيفاش نجمت نوصل من تونس للبلاد...و كيفاش شديت ثنية من غير خوف...قربت بخطوات رزينة...كان علاء مزال عايش لتوا...مكانش صار فيا هذا الكل...و مكنتش باش نتحقر مم بابا و من مصطفى زادة...مصطفى لي كان عندي امل فيه اكثر من هكا...امل انو باش يعوضني عالسنين لي تعبت فيها من غيرو...يمكن حبي ليه من بعيد...كان أحسن ببرشا..لفيت روحي اكثر...رغم الدنيا دافية أما اجتاحتني برودة قوية...غمضت عينيا على صوت الآذان...منعرفش و معنديش طاقة باش نواجهو...و لا نتحمل ردة فعلو كيما نحس في روحي غريبة على دارنا بعد الخطوة لي عملتها...خذيت نفس طويل...كبست على كرشي...و مديت يدي لأخرى...دقيت مرتين عالباب...و نزلت راسي بالوقت...منعرفش حتى كيفاه باش نغزر لوجهو...أصلا بعد ما مات علاء حسيت روحي خسرت بابا معاه...و معاادش كيما قبل...زعمة يكون قتلني انا زادة...حسيت بالباب لي تحل...كبست على كرشي اكثر...دقايق تعدات قبل ما نهز راسي شوية...و نغزرلو...جات عيني في عينو...دموعي لي نزلو...خلاوني نوخر خطوة لتالي تعدات بين عينيا ليلة لي ضربني فيها بعد ما عرف علاقتي مع مصطفى...تذكرت ولدي لي خاطرت بيه...و مخممتش فيه لحظة وحدة...تذكرت كلام مصطفى و هند...للحظة سألت روحي علاش انا هوني ؟ علاش لجأت ليه هو ؟ بدني رعش و هزيت راسي على صوتو يحكي
بابا:شتعمل هوني ؟
انا:ب..ب..بابا
غمضت عينيا بالقاوي...نحس في الحروف وحلت في حلقي و منجمتش نحكي أكثر...نحب نرجع لتالي و مش منجمة فرد وقت...وجيعة كرشي قوات من الخوف لي حسيتو...مكانش لازمني نرجع من الطريق لي اخترتها..و كان لازمني نتحمل نتيجة قراري...و نتحمل الشوك لي في ثنيتي...منعرفش إذا ديما قراراتي هي الغالطة...و لا الحظ عمرو ما صادفني...حتى في الحب...بلعت ريقي على صوتو مرة أخرى
بابا:آسيااا
هزيت راسي شوية نغزرلو...متوقعتش ينطق إسمي مرة أخرى...كبست على كرشي بيديا زوز...نحكي
أنا:ك..كان باش تضربني مرة أخرى...خليني نمشي من توا...خ..خاطرني...ح..ح..حبلة
نزلت عينيا من وجهو...منجمتش نغزرلو أكثر...رجعت خطوة أخرى لتالي...هاربة منو...منعرفش علاش اعترفت إني حبلة أما عالأقل على خاطر ولدي...ماهوش باش يأذيني...فرد وقت نحب نشوف أمي حتى دقيقة وحدة كهو...خذيت نفس...و تلفت عطيتو بظهري...هاربة منو...و من خوفي لي سيطر عليا...ساقيا رزنت على صوتو و هو يحكي
بابا:شنية لي صار ؟ فرط فيك ؟
نزلو دموعي أكثر...معنديش جواب لسؤالو...منعرفش إذا هو فرط فيا...و لا أنا عزت بيا نفسي أكثر...و حسيت روحي فقدت الأمان مرة أخرى...كبست على شفايفي نرد في النفس و نحكي فرد وقت
انا:م..منعرفش
بابا:وين ماشية توا ؟
كبست على كرشي...و هزيت راسي شوية...نلقط في أنفاسي...تنهدت بالقاوي نحكي
أنا:منعرفش...و منعرفش علاش رجعت لهوني زادة
لميت طرف القوة لي عندي...و عملت خطوة أخرى نحب نبعد من هوني و كهو...المهم عندي إني نحمي ولدي و كهو...حتى كان رجعت لمصطفى...من غير ما نظطر نحاسبو عاللي صار...حبست على كلامو التالي
بابا:من غير ما تعاود تمشي توا...و إنتي في الحالة هاذي
تلفت عندو بالوقت...حطيت عيني في عينو...متوقعتش كلامو معايا...متوقعش نسمع منو الجملة هاذي...نعرف أنو تبرأ مني...و مستحيل يخليني نحط ساقي في دار هاذي مرة...كبست على يديا زوز...نحكي
أنا:ب..باش تعاود تضربني مرة أخرى ؟
بابا:إيجا أدخل تو تاخو برد
عديت عينيا على وجهو...رغم خوفي منو...لقيت روحي نقرب ليه...من غير ما نحس...فرد وقت منجمش ناثق فيه...و نخاف يغدرني و يضربني بعد ما يشدني...وقفت قدامو بالظبط...و غزرتلو نحكي
انا:ت..تنجم تعاقبني بطريقة أخرى...أما من غير ما تضر صغيري...من غير شي كنت باش نخسرو ليلة البارح ب..باهي ؟
بقى يغزرلي من غير حتى كلمة...يدو لي تمدت شوية خلات قلبي يخض بالقاوي...حاولت نوخر لتالي..محاولة مني باش نحمي روحي...أما يدو سبقتني و تحطت على ظهري...جبدني عندو بالوقت...منعرفش كيفاش لقيت روحي في حضنو...دم جمد في عروقي...و منجمتش نعمل حركة اخرى...آخر حاجة توقعتها منو...أنو يحضني أصلا هاذي أول مرة يعملها بعد ما خسرنا علاء...دموعي نزلو بالوقت...و منجمتش نمنعهم أكثر...يدو لاخرى تغرست في شعري...خلاتني نلز ليه اكثر...و نكبش فيه بيديا زوز...حتى انا بحاجتو...مش من توا...من سنين طويلة...أنا كنت ديما بحاجتو...و هاذي أول مرة نحس بقربو ليا...هاذي أول مرة يعدي يدو بحنية على شعري كبست عليه اكثر...نحكي
أنا:س..ساامحني بابااا...سامحني على كلشي اماانك
بابا:ساامحني إنتي يا روحي....سامحني خاطرني معرفتش نحافظ عليك
جبدت روحي شوية...و هزيت راسي نغزرلو...حط يدو على خدي...يحكي
بابا:معادش تخاف مني...مستحيل نضرك بعد توا
انا:ت..تحكي بالرسمي ؟
نزل عليا شوية...باسني من جبيني...و هز راسو...تبسم يحكي
بابا:و رحمة علاء
عاودت حضنتو على آخر كلمة...مدام وصل نطق اسم علاء معناها ماهوش باش يتراجع...حط يدو على ظهري يحكي
بابا:إيجا معايا...تو تاخو برد
جبدت روحي منو...كبس على يدي...و دخلني معاه غمضت عينيا على الريحة البنينة متاع الماكلة...كانو حست عليا باش نجي...هزيت راسي غزرتلو...نسأل فيه بعينيا عليها...شاورلي عالكوجينة...خذيت نفس و قربت بخطوات رزينة...وقفت بحذا الباب...نغزرلها...تعدات شهور على آخر مرة ريتها...تحرك في الماكلة...و شاردة بعيد...مديت يدي مسحت دمعتي لي نزلت...و قربت منها شوية...نحكي
أنا:فاش قاعدة تحضر ؟
دورت راسها بالوقت...غزرتلي ندرا كيف...عدات عينيها على وجهي من غير حتى كلمة...ملامح الصدمة...خلاتها عاجزة باش تحكي...قربتلي شوية...حطت يديها زوز على وجهي...تتحسس فيه و تحكي فرد وقت
امي:آ..آسيااا...ا..انتي هوني ؟
هزيتلها براسي ايه...و قربت منها حضنتها بكل قوتي...رغم اني نحس في روحي باش ندوخ...خذيت نفس نحكي
انا:اناا هوني امي...هوني معااك
كبست عليا بيديها زوز...لي خلى دموعي تنزل اكثر...منعرفش علاش حسيت روحي ظلمتهم بعملتي...خممت في روحي...و نسيتهم...نسيت تعب امي معايا...نسيت وجيعتهم بعد موت خويا...خذيت نفس من ريحتها نحكي
أنا:سااامحني أمممي...ساامحني خاطرني مشيت و خليتك
هزت راسها ملسوعة...كبست على يدي...و غزرتلي ندرا كيف...تحكي
امي:آسيااا يا روحي...علاااش رجعت...تعرف شنية باش يصير كان يرجع...منحبوش يضرك يا روحي
بابا:متخاافش مني...مانيش باش نضرها مرة اخرى
غزرتلو و عاودت غزرتلي فرد وقت...هزيتلها براسي ايه...و قربت منها بستها من جبينها نحكي
انا:سامحني امي اماانك
امي:مساامحة يا روحي...هيا ايجا اقعد تو نحضرلك تاكول
بابا:فما ضيف جديد...اعمل حسابو
أمي:مصطفى هوني ؟
انا:ل..لا...م..مصطفى...انا...نقصد
بابا:شنية لي صار ؟
حطيت يدي على كرشي...منعرفش اصلا شنية لازمني نقول...رغم اني عملت الخطوة هاذي...اما لتوا منعرفش العواقب متاعها...لتوا منعرفش مصير علاقتي مع مصطفى...و اذا تماديت في علاقتي معاه و لا لا...خذيت نفس نحكي
انا:بابا...صراحة فما مشكل صغير بيناتنا
بابا:مشكل خلاك ترجع من تونس لهوني
نزلت عينيا من وجهو...خايفة من أسألتو...و خايفة من ردة فعلو زادة...كان مش ولدي...ميهمنيش شنية يعمل فيا...اما بالرسمي منحبش نخسرو...يبقى الحاجة الحلوة لي بيني و بين مصطفى...و قطعة مني زادة...قربتلي امي تحكي
أمي:محسن خلي الطفلة ترتاح ساعة
بابا:هاني باش نمشي للجامع...تحب نجيبلك حاجة في ثنيتي ؟
أنا:لا...عيشك
تبسملي و رجع لتالي...تنهدت براحة...و تلفت لأمي نحكي
انا:امي نحب نرتاح شوية في بيتي...نحس في روحي تاعبة شوية
امي:لباس يا روحي ؟
انا:ا..انا حبلة امي
امي:آسيا عزيزتي...تحكي بالرسمي
انا:تاعبة امي...و معرفتش وين نمشي..معنديش غيركم
امي:لطف عليك يا روحي...مصطفى غلط معااك في حاجة ؟
انا:لا...نحب نرتاح و كهو
امي:باهي يا روحي...امشي ارتاح انتي...لين نحضرلك حاجة تاكلها
هزيتلها براسي...بستها مرة اخرى و رجعت لتالي...منعرفش كيفاه وصلت لبيتي...حليت الباب و دخلت...لقيتها منظمة كي العادة...عديت يدي عالبيرو...على كتبي و اوراقي...و ترميت على سريري...استفقدت الراحة هاذي نهار كامل...عديت صوابعي عالخاتم متاعي...منعرفش شنية لي مانعني باش نحيه...لتوا مش مصدقة لي قاعد يصير معايا...و لا حتى علاش تصرفت بالطريقة هاذي...اما فكرة انو قرب لشكون...انو فضل طفلة اخرى عليا حرقتني...كنت مستعدة باش نتقبل كلشي منو...حتى البرود متاعو...اما منحبش شكون في حياتو غيري...هو متاعي انا و كهو...هزيت راسي على صوتو...للحظة حسيت روحي نحلم...متوقعتش باش يلحقني بالسرعة هاذي...خذيت نفس و خرجت من البيت...نغزر لأمي واقفة في نص صالة داخلة بعضها...هديتها و حليت الباب...جات عيني في عينو...دقايق تعدات و هو يتفحص فيا...قربلي في لحظة...حط يديه زوز على وجهي يحكي
مصطفى:عملك حاجة ؟ تكلم ضربك ؟
جبدت روحي منو...وخرت خطوة لتالي...أول ما قربلي خواطري دارت منو...قحرتلو نحكي
أنا:لباس عليا
مصطفى:هيا إيجا خلينا نمشيو
أمي:مصطفى عزيزي...هند...ادخلو...شبيكم واقفين لبرا
مصطفى:سامحني خالتي...أما نحب نهز آسيا و نمشي توا...مرة أخرى إن شاء الله
انا:مااانيش باش نجي معااك
هند:آسياا عزيزتي...هدي روحك
أنا:منحبش نرجع معاك مصطفى...معادش نحب نشوفك أخطاااني
مصطفى:الصبر يا ربي...ياخي وصلنا لهووني إحنا متأكدة متحبش تشوفني
خليتو واقف و رجعت لبيتي...خلطت عليا هند بالوقت قعدت بجنبي تحكي
هند:آسيا يهديك ربي...فاش قاعدة تعمل إنتي ؟
أنا:منحبش نرجع معااه...و معاادش نحب نشوفو مرة اخرى
هند:معناها معاادش تحبو ؟
أنا:لااا...أصلا منعرفش علاش ولى خايب...و لتوا نحس في ريحتها لاصقة فيه
هند:والله معاد فاهمة شي...متحبش ترجعلو و خايب...و فرد وقت غايرة عليه ؟
انا:ماانيش غاايرة
هند:باهي...اسمعني...نعرف لي مصطفى غلط...اما انتي زادة محاولتش تفهمو...مخانكش..و ماهوش باش يعملها الحكاية و ما فيها
انا:منحبش نسمع هند...كان تعرف الكلام باش يجرحني...متحكيليش
هند:احكي معاه و اسمع منو ملا
انا:منحبش
هزيت راسي على صوت بابا برا...غزرتلها و هزيت روحي وقفت...خرجت معايا...جمدت في بقعتي و انا نغزرلهم مواجهين بعضهم...غزرلي يحكي
مصطفى:أسمعني عم محسن...يمكن غلطت في حقها صحيح...أما والله من غير قصدي...اللي صار مجرد سوء تفاهم...حتى رجعت لهوني من غير علمي و على غفلة مني
قحرلي و هو يرص على آخر كلمة...نزلت عينيا من وجهو...نعرف روحي تسرعت...اما هو سبب في كلشي صار...كبست على كرشي و انا نسمع في بابا يحكي
بابا:مدامها جات لهوني وحدها...معناها الموضوع اكثر من انو سوء تفاهم
مصطفى:نحب نحكي معاها...و مهما كان قرارها انا باش نحترمو
تلفت بابا غزرلي...هزيتلو براسي ايه...منعرفش علاش نحب نعطيه فرصة اخرى...و لا علاه نحب نسمعو...رغم كارهتو عاللخر...و مانيش حاملة قربو...فرد وقت نحب نعنقو و ندخل في حضنو كي العادة...معادش نعرف سر التناقض لي انا فيه...سبقتو لبيتي...خلط عليا بالوقت...و سكر الباب وراه يحكي
مصطفى:واعية لروحك ياخي ؟ تحب تهبلني آسيا كيفاه تجي لهوني وحدك ؟
انا:كيما انت نجمت تمشي عندها
مصطفى:آخر مرة نقلك و نوضحلك لانا مخنتكش...و مانيش باش نعملها
انا:انت معادش تحبني كيما قبل
مصطفى:هذا لي صورهولك مخك ؟
انا:هذا لانت خليتني نحسو الوقت هذا الكل
قربلي شوية...مد يدو حطها على خدي...و غزرلي ندرا كيف يحكي
مصطفى:يززي عااد...تعرف بالقدا لانا نحبك و نموت عليك
انا:ا..انت ليلة البارح...كنت باش تمشي و تخليني...قررت تمشي على انك تحكي معايا و تسمعني
مصطفى:مكنتش قد بعضي...و خفت نجرحك اكثر
انا:م..معادش عندي حق باش نحاسبك...انت خليتني الوقت هذا الكل نحاسب روحي خايفة نكون سبب في حالتك...في الوقت لانت ماخو راحتك
مصطفى:خلينا نرجعو لدارنا توا...و نوضحو امورنا مع بعضنا
انا:منحبش نرجع معاك
مصطفى:متأكدة ؟
نزلت راسي بالوقت...منجمتش نرد عليه...على خاطر الحقيقة تقول عكس كلامي...تنهد بالقاوي يحكي
مصطفى:يظهرلي علاقتك مع بوك تحسنت...اكا لي يخليني مطمن عليك
انا:معناها قررت تخليني ؟
مصطفى:الصبر يا ربي...وين تحب توصل ياخي ؟
انا:حتى شي...امشي من هوني و كهو
مصطفى:بااهي باش نمشي انا توا...أما تأكد لي حديثنا مزال موفاش...و مانيش مسلم فيك و في صغيري و توا نخليك تاخو راحتك أكثر...رد بالك على روحك
غزرلي ندرا كيف و تلفت عطاني بظهرو...لي خلى دموعي تنزل بالوقت...منجمتش حتى نخلط عليه منحبوش يمشي و و منجمتش نمنعو...رغم إني باش نموت على قربو و نافراتو...فرد وقت...معادش نعرف شنية لي قاعد يصير معايا...قربت من الشباك و هزيت ريدو شوية...نغزر لهند و هي تحاول تهدي فيه...أول ما تبسملها...قلبي رعش بالوقت...منعرفش علاش نحس في روحي توحشتو حتى قبل ما يمشي...تلفت نغزر لامي لي حلت الباب و دخلت تحكي
أمي:لبااس عزيزتي ؟
هزيتلها براسي إيه...و قعدت على طرف السرير...كبست على كرشي بيديا زوز...نحاول ناخو طاقتي من صغيري قعدت بجنبي تحكي
أمي:علاش محبيتش ترجع معاه ؟
أنا:منعرفش...نحب نبقى وحدي شوية
أمي:باهي عزيزتي...خمم بالقدا...تعرف لمصطفى يحبك و ماهوش باش يسلم فيك
انا:باهي امي
امي:هيا قوم تاكول حاجة
انا:نحب نرقد و كهو
عدات يدها على خدي...و هزت روحها خرجت...تسطحت لتالي...و غرقت في فرشي...معاد نحب نخمم في حتى شي...من غير ولدي...اصلا معادش عندي جهد لحتى شي...و منعرفش شنية مزال باش يصير فينا اكثر من هكا...و لا وين باش توصل علاقتنا في الاخير
🌸🌸🌸🌸🌸🌸🌸🌸🌸🌸🌸🌸🌸
🔸️مريم_تحكي:
هزيت راسي شوية نغزر لروحي...فرحانة و خايفة فرد وقت...كانها اول مرة باش نعرس فيها...اصلا مش مصدقة الفازة منو...و انو باش يخليني عروسة بالحق...دورت راسي عالشرتين نغزر لزهرة و رنيم...لي واقفين بجنبي...خذيت نفس نحكي
انا:شقولكم ؟
زهرة:هاذي المرة العاشرة و انتي تسأل فينا
رنيم؛مريم عزيزتي...من شنوة خايفة انتي ؟
انا:منعرفش...زعمة باش نعجبو هكا ؟
زهرة:الصبر يا ربي...هاني باش نكلمو توا...هو يعطيك رايو
انا:استنى...نحس في روحي مانيش حاضرة
قربتلي شوي...عدلتلي الفوال...و تبسمتلي...تحكي
زهرة:مريم عزيزتي...متأكدة لانتي باش تاخو عقلو ليلة
كبست على يديها زوز...و عديت عينيا على وجها حسيتها تحسنت على آخر مرة...خاصة بعد ما أمها ارتاحت و خرجت من الكلينيك...الأسبوعين لي تعدات برشا حاجات تبدلت...و الاهم انو امورنا قاعدة تتحسن تبسمت نحكي
أنا:حتى إنتي محلاك ليلة...مسكين عمر...شنية باش يصير فيه
زهرة:يزززي عااااد
أنا:متأكدة متحبش ترجعلو
زهرة:مريم عزيزتي...مش هذا موضوعنا توا...خلينا فيك إنتي
انا:باهي يا روحي...وينها ريحانة توا ؟
زهرة:عند بوها
هزيتلها براسي ايه...و جبدت روحي شوية...نعرف انو صراع لي داخلها خلاها عاجزة باش تاخو قرار...و منعرفش إذا لي باش يعملو عمر ليلة باش ياخو نتيجة و لا لا...أنا أكثر وحدة نعرف انو هي تحبو و متنجمش تعيش من غيرو...جيست خايفة تاخو الخطوة هاذي معاه...خايفة من الفرحة...على خاطر لي تعدا عليها مش ساهل جملة...تنهدت بالقاوي...و عاودت غزرت لروحي متوقعتش لي باش تطلع عليا هكا...و مش مصدقة انو التصميم هذا ليا انا و كهو...فقت من سرحتي على صوت الباب...جبدو روحهم لتالي بالوقت حسيت بيه من ريحتو لي سبقاتو...ساقيا رزنو و منجمتش نتلفت هزيت راسي شوية...نغزرلو في المرايا واقف ورايا بالظبط...خذيت نفس و تلفت عندو...باقي يغزرلي من غير حتى كلمة...كبست على الروبة شوية عديت عينيا على وجهو نحكي
أنا:شرايك ؟
هزني و حطني من غير حتى كلمة...دخلت بعضي أكثر منعرفش علاش حاشمة منو...و لا خايفة من ردة فعلو نزلت راسي شوية...طلعهولي بالوقت...خذيت نفس نحكي
أنا:ح..حسام...ا..أنا...ن..
نزل عليا شوية...حط شفايفو على شفايفي...لي خلاني نبلع بقية الحروف...دوب باسني و جبد روحو يحكي
حسام:نحبك
تبسمت بالوقت...قربتلو اكثر...و ترميت في حضنو منعرفش علاش حسيت روحي هديت من كلمة وحدة رغم إني نعرف لهو يحبني...أما توا بالظبط...حبيت نسمعها منو و بالطريقة هاذي...حط يدو على ظهري يحكي
حسام:محلاك ليلة
انا:بالحق ؟
حسام:ماكش محتاجة راايي...حتى بديت نندم...و منعرفش كيفاش باش نخليك تخرج هكا قدامهم
أنا:بربيي
كبست على سوريتو بيديا زوز...و هزيت راسي نغزرلو عديت صوابعي...على لحيتو...نحكي
أنا:شبيك بطيت عليا ؟
حسام:كنت ناخو في النصائح من عند فتحية كي العادة
انا:هاك من البارح مخليتنيش نشوفك
حسام:إنتي حبيت تقعد في داركم
أنا:و كي هكا تحرمني منك ؟
حسام:حبيتك ترتاح مني شوية...على خاطر بعد توا معادش باش نخليك تبعد من جنبي
أنا:منحبش نرتاح...و آخر مرة تعاودها
قربتلو أكثر...كبشت فيه...و حطيت خشمي على رقبتو ناخو في نفس ورا بعضو..منعرفش علاش حسيو روحي توحشتو و توحشت ريحتو بصيفة غريبة...هزيت راسي شوية...نحكي
أنا:حسام
حسام:شبي حبي ؟
أنا:متوترة
حسام:من شنوة ؟
أنا:منعرفش
حسام:إيجا معايا
كبس على يدي...قعدني و قعد بجنبي...عدا يدو على خدي يحكي
حسام:كلشي باش يكون لباس...نحبك تفرح بالليلة هاذي و ما تخمم في حتى شي باهي
أنا:منحبكش تبعد عليا جملة
حسام:هاني معاك...انتي شبيك وليت تتحسس هكا
حطيت راسي على صدرو...و كبست على يدو...نحكي
انا:منعرفش...اما وليت نخاف تبعد عليا
حسام:مانيش باش نبعد يا عمري
أنا:حسامي...فما حاجة مقلقتني زادة
حسام:أشكي
أنا:زعمة زهرة باش توافق ؟
حسام:منعرفش...أما ماهيش باش تكون عندو فرصة أحسن من هاذي
أنا:إن شاء الله
جبدني من عندو شوية...عدا صوابعو على خدي...و وقفني...مد يدو هز التاج...عدلو فوق شعري...و نزل عليا شوية باسني من جبيني...يحكي
حسام:صحة لأميرتي
أنا:عيشك يا روحي
حسام:هيا توا...ناس تستنى فينا
هزيتلو براسي اي...و كبست على يدو...نتبع في خطواتو كل درجة نهبطها...دقات قلبي تقوا أكثر..صوت التصفيق لي قوا...خلاتني نلصق فيه...عمري ما توقعت باش نعيش اللحظة هاذي معاه...و لا باش يعمل هذا الكل على خاطري...هزيت راسي نغزر لبابا...تبسمت بالوقت حضور بابا لي استفقدتو أول مرة...خلاني نحس بالأمان مدامو راضي علينا و على علاقتنا...أكيد كلشي باش يكون مليح...قرب منا وقف قدامنا بالظبط...غزر لحسام يحكي
بابا:مانيش باش نوصيك عليها...يمكن خاطرني وليت نعرفك بالقدا...و نعتبرك في مقام بناتي و واحد من عيلتي...على هذاكا متهني عليها معاك
حسام:عيشك عم احمد...تهنى
حط يدو على كتفو...و تلفت عندي...قربلي شوية...حط يديه زوز على وجهي يحكي
بابا:يا ريت فرح كانت حية...و لحقت عالنهار هذا يا روحي...اما متأكد لي هي باش تكون موجودة معاك ديما...و هاذي هديتها ليك
نزلت راسي نغزر للاسوارة لي جبدها من البوات...قلبي خض بالقاوي...متوقعتش لمزالت فما حاجة اخرى من ريحة امي...كبس على يدي...لبسهالي...و تبسم يحكي
بابا؛مبروك يا روحي
ترميت في حملتو...قبل ما نسمع كلمة أخرى منو..كبست عليه بيديا زوز...نحكي
انا:سااامحني بابا...سامحني على كلشي
بابا:يزززي كهو...اليوم نحبك تعيش فرحتك كاملة
جبدت روحي شوية...و دورت راسي نغزر لحياة لي قربت منا...تحكي
حياة:مبروك عزيزتي
أنا:طاطا حياة
قربت منها شوية...كبست على يديها زوز...و غزرت لعينيها نحكي
انا:نعرف روحي غلطت في حقك برشا...و ظلمتك معايا برشا إنتي و رنيم...يا ريت تنجم تسامحني على كلشي و تعتبرني كيما بنتك بالظبط
حياة:من أول نهار ريتك...إعتبرتك بنتي يا روحي...أما الوقت و الظروف...كانت عكسنا...توا بالظبط...نحبك تعيش و تعوض لي خسرتو...عيش فرحتك كاملة و ما تستنى حد...و تذكر لإحنا معاك ديما
أنا:عيشك أمي حياة
قربتلي شوية حضنتني...يمكن هاذي أول مرة نحس أنو الحاجز لي كان بيناتنا معادش موجود...و إني نجمت نتخطى الماضي باللي فيه...و نبدا حياة جديدة...مع الناس لي نحبها...جبدت روحي و تلفت لحسام...لي باقي واقف في بلاصتو من غير حتى كلمة...قربتلو شوية...نحكي
أنا:حسام
حسام:يا روح حساام
أنا:طولت عليك
حسام:مممم لا...اما عندي مفاجأة ليك
أنا:توا ؟
قربلي اكثر...عدا صوابعو على خدي...و نزل عليا شوية...يحكي
حسام:صراحة فما زوز...أما لأخرى...منجمش نخبرك بيها توا
انا:علااش ؟
حسام:تتكشفها وحدك مبعد...و زيد نخاف نخبرك و متصبرش عليها
أنا:اففف منك حساام...هكا شوقتني أكثر
حسام:تشوف انا يا روحي...كيفاه صابر عليك
انا:زاايد معاك...وين مفاجأتي ؟
حسام:غديكا
هزيت راسي شوية...نغزرلها...متوقعتش باش يستدعيها لعرسنا..رغم إني طلبت منو و مخذيتش جواب خاطرني نعرف الحساسية لي بيناتهم...عاودت غزرتلو بالوقت تبسملي و هزلي براسو ايه...كبست عالروبة بيديا زوز...و قربت منها...رغم كلشي...أما لتوا نحس بريحة أمي كي نقربلها...حطت يدها على خدي تحكي
نرمين:مبروك عزيزتي
أنا:عيشك خالتي
نرمين:يمكن قصرت في حقك...و كنت أنانية خاطرني اعتبرتك حاجة تخص فرح و يلزمني نسترجعها من غير ما نخمم فيك...أما توا وبيت واثقة لإنتي باش تكون مرتاحة معاه...يا روحي
انا:معناها...نجم نشوفك و تنجم تزورني بعد توا ؟
هزتلي براسها ايه...تبسمت...و عدات عينيها على وجهي تحكي
نرمين:اكيد يا روحي...مانيش باش نسلم فيك بعد توا...و مانيش باش نفرط في عينين فرح مرة أخرى
قربتلها اكثر...عنقتها بيديا زوز...لتوا نحس بحسرة على غياب امي...و تمنيت كان حضرت معايا في مراحل حياتي الكل...اما يبقى حكم ربي اقوى...جبدت روحي كي سمعت حسام يحكي
حسام:نجم نسترجع مرتي توا
ضحكت بالوقت...و تلفت عندو...هزيتلو براسي لا نحكي
أنا:أرجع مبعد
حسام:بربي ؟ سااايي فرطت فيا ؟
نرمين:يزززي عزيزتي
أنا:باهي سي حسام...من غير ما تتغشش علينا توا
قربتلو اكثر...شديتو من يدو...و هزيت راسي غزرتلو نحكي
أنا:ياخي نجم نفرط فيك أنا ؟
حط يدو على ظهري من تالي...كبس عليا...و جبدني ليه أكثر...يحكي
حسام:غزرتك هاذي...تخليني نسلم في العرس قبل ما يبدا
عديت يدي على صدرو...و قربتلو أكثر...نشم في ريحتو و نحكي فرد وقت
أنا:و ريحتك تخليني نعمل نفس الشي
حسام:الصبر يا ربي...مريم عزيزتي...شبيك عليا الليلة إنتي ؟
انا:منعرفش...اما مانيش منجمة نبعد عليك
حسام:باهي...انساها ريحتي توا...و ايجا معايا
انا:وين ؟
حسام:بحذا الجماعة يا عمري...وين عندي نمشي بيك توا
انا:باهي
حسام:صحيتك
انا:شعندي عملتك ؟
حسام:حتى شي...هيا امشي برك
كبست على يدو...و سكت...منعرفش شبيني اليومين هذوما...منحبوش يبعد عليا حتى لحظة...رغم نعرف إني باش نتعبو بتصرفاتي...أما ميسالش مدامو يحبني باش يتحمل...عديت عينيا على صالة...استغربت كي ملقيتش زهرة...و عمر لي يدور في عينيه بين الناس يفركس عليها...هزيت راسي غزرت لحسام نحكي
أنا:حسام
حسام:مممم
أنا:زهرة وين ؟
حسام:منعرفش...مش بكري كانت معاك الفوق ؟
أنا:صحيح...أما شبيها منزلتش ؟
حسام:تو نخبر عمر...يطلع يشوفها
أنا:من غير ما تحيرو توا...كان منزلتش...تو نخلي رنيم تطلع تشوفها
حسام:باهي عزيزتي
خذيت نفس...و نزلت راسي من وجهو...منحبش نضيع فيه أكثر...منعرفش شبي حالتي هكا الليلة...و لا علاش شاهياتو بصفة غريبة...و كان مش ناس...مخي باش ينحرف معاه أكثر...غمضت عينيا بالقاوي و عاودت حليتهم...نحب نعيش الحقيقة لي حلمت بيها ديما...و لي قطعت الامل منها بعد اللي تعدا علينا...خفت في نهار من نهارات نتحرم منو و من وجودو في حياتي...و رغم الوجيعة لي تعدينا بيها زوز...يبقى الحاجة المزيانة في حياتي...و اللي منجمش نعيش من غيرها...و مهما كانت الظروف لي باش تحكمنا....مستحيل نسلم فيه و لا نبعد عليه مرة اخرى
أنت تقرأ
زهرة🌸
Diversos🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
