🔸️حلقة 82
🔸️زهرة تحكي:
حليت عينيا بالسيف..نحس في راسي رزين برشا..دورت عينيا عالبيت...منعرفش كيفاه وصلت لهوني...هزيت روحي شوية شوية تقعدت...لتوا نحس في روحي دايخة...حطيت يديا زوز على كرشي...تفرهدت شوية كي حسيت بيها تتحرك...قلبي خض بالقاوي أول ما تذكرت لي صار صباح...منعرفش لي عملتو صحيح و لا غالط...منعرفش اذا كان لازمني نواجهو و لا لا...اما وقتها و في الحالة لي ريتهم فيها ما نجمت نخمم في حتى شي...كان أني نبعد و كهو...اما مش معناها نخليها تغلبني...أول شي لازمني نخرج من هوني...معادش فما سبب يخليني نبقى معاه تحت سقف واحد...خاصة بعد ما كشف كلشي من قصة الجواب...أنا و عمر باش يكون عندنا برشا كلام بعد اللي صار الكل...هزيت روحي بالسيف...دخلت لبيت البانو غسلت وجهي...و حطيت شعري على جنب...غزرت لروحي نحكي
انا:كلشي باش يكون لباس...ماني باش نخلي حتى حد يقرب منك يا روحي...مهما صار
عديت يدي على كرشي مرة أخرى...لميت طرف القوة لي عندي و رجعت للبيت.. هزيت ريدو شوية...دنيا بدات تظلام...منعرفش كيفاه عديت الوقت هذا الكل راقدة...خذيت نفس...لبست الكونفارس متاعي...و قربت من التابل دونوي...هزيت أوراقي...و الدوا متاعي حطيتهم في صاكي...حطيت وذني عالباب مفما حتى حس برا...حليتها شوية شوية...و خرجت...نزلت الدروج وحدة وحدة...أحسن شي ما لقيت حتى حد في الفيلا طليت عالجنينة...نغزر لأشرف و العساس زوز واقفين برا...رجعت بخطواتي لتالي...يمكن أحسن شي...نخرج من الجنينة...هزيت ريدو...نحل في الباب...دخلت بعضي كي لقيتها مسكرة...حتى الباب لي مقابلتها مسكرة...تهزيت و تحطيت على صوتو...يحكي
مراد:تحب نعاونك يا روحي ؟
تلفت عندو نغزرلو...خذيت نفس نهدي في روحي...و قحرتلو نحكي
أنا:قاعدة نحاول نهرب من الحبس متاعك...كان تعمل مزية...خليني نمشي و نرتاح من وجهك
مراد:باهي عزيزتي...أصلا مانيش باش نجبرك تبقى معايا اكثر من هكا
بقيت نغزرلو مستغربة..تبسم و ترمى عالفوتاي قعد..حط ساق على ساق...و تكى لتالي يحكي
مراد:ايجا اقعد ساعة...باش نوريك حاجة قبل...بعدها كان تحب تنجم تمشي...و ماكش باش تلقاني وراك مرة اخرى
انا:توعدني ؟
مراد:وعد عزيزتي
خذيت نفس و قربت منو قعدت بجنبو...جبد تليفونو يحكي
مراد:شد عندك
انا:شنوة هذا ؟
مراد:نحبك تتفرج على حاجة...لحظة برك...هيا شد عزيزتي
مديت يدي بالسيف...شديت تليفون من يدو...كانو فما شكون قاعد يصور...لي فهمتو انو مركب كاميرات في البيت...حسيت لي البلاصة في كلينيك...نفخت نحكي
انا:شنية هذا....ياخي
سكت أول ما بعدت الفرملية...كلمة صدمة اقل من الشعور لي حسيتو و انا نغزرلها...كبست عالتليفون أكثر...خاطر حسيت روحي باش نفلتو من يدي...نغزرلها من غير حتى كلمة...هزيت براسي لا...اول ما نزلت دموعي...نحس الكلام وحل في حلقي...حطيت يدي على فمي...حطيت تليفون عالطاولة...و غزرتلو...نحكي
انا:ا...أمي...ك...كيفاه هكا ؟
حاوط وجهي بيديه زوز...يمسح في دموعي و يحكي فرد وقت
مراد:أمك عايشة زهرة...إنتصار لتوا عايشة
انا:م..مستحيل مراد...أنا بيدي حضرت جنازتها...أمانك متعملش فيا هكا...قولي لي انت تكذب أمانك
مراد:ششش يزي توا..مش وقت الدموع هذوما..متحبش تقابل أمك ياخي
دزيتو بيديا زوز لتالي...و جبدت روحي منو وقفت وخرت لتالي نحكي
انا:منحبش...و مانيش باش نصدقك المرة هاذي...تسمع فيا مانيش باش نخليك تجبرني نبقى معاك مرة أخرى نعرف بالقدا لأمي ماتت و ماهيش باش ترجع...أخطاني و أخرج من حياتي...إمتى تفهم لأنا نكرهك و نتقزز منك معادش تلعب على أعصابي
هز روحو وقف...و قرب مني...وقف قدامي يحكي
مراد:مانيش باش نكذب عليك...تحب تصدق و لا لا أمورك و انتي حرة...هوكا الباب قدامك
حطيت يدي على كرشي موجوعة...قرب مني...وخرت لتالي نحكي
انا:ابعد عليا متمسنيش
قربت من طاولة...هزيت تليفون مرة اخرى...نثبت في وجها...منجمتش نصدق لامي عايشة لتوا...نحس في روحي باش نهبل و لا قاعد يتعمد باش يضرني...غزرتلو نحكي
انا:علاه خبيت عليا...علاش عملت فيا هكا يا مراد
ضربت تليفون على طول يدي...منعرفش عليه وين جا...عدا يدو على وجهو يحكي
مراد:هاك عرفت توا...المرة هاذي انتي باش تختار...امك و لا حياتك
انا:أنت أسقط من اللي توقعت يا مراد
قص علينا صوت الباب لي ضرب بالقاوي...نسمع في حسام و محمد يصيحو برا...عقد حواجبو..يثبت في صوت...تلفتلي يحكي
مراد:حبي ياخي مخبرتهمش لأنا منحبش ضيوف على غفلة...ساعة منحبش جوجمة برشا...هاني باش نتصرف معاهم...و انتي خمم بالقدا في اللي قلتو...مكانش تنجم تمشي معاهم
أول ما خرج...خلطت عليه نجري...وقفت ورا الباب نسمع في حسام يصيح
حسام:زهرررررة...زهرررة تسمع فيا ياخي
مراد:نقص حسك...و اخرج من هوني
حسام:مانيش باش نخرج قبل ما ناخو زهرة معايا تسمع فيا
محمد:زهرررة...إنتي هوووني ؟
مراد:اسمع يا فرخ...مانيش ناقص هبالك توا
محمد:هاني باش نوريك الفرخ شباش يعمل
حسام:محمد اهدا
شدو قبل ما يوصل عندو...و قرب من مراد...قحرلو يحكي
حسام:المرة هاذي معندكش حل اخر...زهرة باش تجي معانا...مكانش باش نبلغ عليك لأنت خطفتها...وقتها خمم كيفاه تحل الحكاية
حسيت للوضع خرج على حدو...خذيت نفس و خرجت عندهم...وقفت ورا مراد بالظبط...نغزرلهم...حاسة روحي في حلمة من اللي ريتو قبيل...قربلي حسام في لحظة حاوط وجهي بيديه زوز يحكي
حسام:انا جيت زهرة...ماكش مظطرة تتحمل اكثر من هكا...بعد توا باش تولي تعيش معانا لين يخرج عمر من الحبس...هيا معايا توا...و ما تخاف من حتى شي باهي
بقيت نغزرلو من غير حتى كلمة...هذا لي كنت بحاجتو ساعتين لتالي...حاجتي بشكون يشد بيدي و يخرجني من هوني...و معادش نرجع جملة...خذيت نفس...كبست على يديه زوز...نزلتهم...نحكي
انا:حسام إسمعني أمانك
حسام:ماهوش باش يجبرك مرة اخرى...أصلا معندوش حق...يشدك هوني اكثر من هكا...عمر هكا يحب...هيا عيش اختي
كبست على يديه زوز...و هزيت راسي غزرتلو في عينيه نحكي
انا:مراد ما جبرني على حتى شي...انا جيت لهوني بارادتي حسام
حسام:زهررة...متخافش منو...ماهو باش يعملك حتى شي...هيا معايا توا
جبدت روحي لتالي...و حطيت يدي على كرشي...خذيت نفس نحكي
انا:مانيش خايفة...و نعرف لي نتوما تحبو تعاونوني...أما اللي تعملو فيه زايد...بعد توا مفما حتى شي يجمعنا حتى عمر معاكم
بقى يغزرلي مصدوم...قرب مني محمد...جبدني من يدي يحكي
محمد:زهرررة يااااخي هبلت على روحك...تعرف على شكون قاعدة تحكي انتي...كيفاه تحب تبقى معاه بعد اللي صار حل فمك
انا:محمد أمااانك...مانيش صغيرة...و نعرف لي نعمل فيه...الموضوع هذا بالظبط...نحبكم تخرجو منو جملة
حسام:محمد سيبها
جبدو لتالي...و قرب مني...شدني من زنودي يحكي
حسام:مانيش نشاور فيك...المرة هاذي باش تمشي معايا بالسيف عليك
مراد:صراحة ياسر فديت من الدراما متاعكم...باش تمشيو من هوني...و لا انا نطلب الحاكم
حسام:زهررة هيا أمانك...وعد مني شي ماهو باش يصير عليك...و على بنتك...هيا عيش اختي
قرب مني مراد وقف قدامي بالظبط...حط يدو على كتفي...لزني ليه يحكي
مراد:كان متخرجش من هوني...مظطر نبلغ عليك..بتهمة التعدي على ملكية الغير
حسام:زهرة نسأل فيك لاخر مرة...باش تجي معانا ؟
مراد:جاوبو يا روحي هيا...كان تحب تمشي مانيش باش نشدك بالسيف عليك
هزيت راسي غزرتلو...تبسم ندرا كيف...كأنو يذكر فيا بالفيديو لي ريتو...خذيت نفس و غزرت لحسام نحكي
انا:سامحني حسام
تلفت و خليتهم واقفين...رجعت للفيلا...نسمع في محمد يصيح...فجأة سكت الحس...و صوت الكرهبة قوا...تلفت نغزرلو...دخل و سكر الباب بالقاوي...يحكي
مراد:يا ريت تكون هاذي آخر مرة...خاطرني منجمش نسكت اكثر من هكا
انا:و إلا شباش تعمل ؟
مراد:اللي جا في مخك بالظبط
قربت منو وقفت قدامو بالظبط...و هزيت راسي غزرت لعينيه نحكي
انا:تعرف حاجة...أنا نشفق عليك اكثر من اني نخاف منك...صدقني انت واحد مسكين...متعرفش شنية تحب من الدنيا...تجري ورا حاجات فارغة...كان تحبسني هوني حياتي الكل...مانيش باش نكون ليك...و ماكش باش توصلي...كان فما حقيقة وحدة...هي انو انا متاع عمر و كهو...و كان يمشي في بالك عديت عليا الفازة مع سلمى تكون غالط...انا خرجت باش نعاقبو هو...و باش يخمم في الغلطة متاعو...اما مانيش مغشة منو...و مانيش باش نخليه...و مانيش باش نسمحلك تربطني بامي...الا ما يجي نهار و نتحرر من اللعنة متاعك مراد
خطفني من ظهري في لحظة...كبس عليا...و نزل عليا...قرب لشفايفي يحكي
مراد:حتى شي ما يصعب عليا...كان نحب...تو نخليه ترقد في فرشي و تحتي كان لزم
انا:زايد ساقط من بكري...اجبرني هيا فاش تستنى...اعملها كان جيت راجل
كبس على شعري بيدو...و قربلي اكثر...ملامحو تبدلت في لحظة...قحرلي يحكي
مراد:تحب نثبتلك رجوليتي
حسيت بشفايفو على شفايفي...للحظة كان باش يبوسني...منعرفش منين جبت القوة لي عندي...و دزيتو بيها لتالي...و هزيت يدي ضربتو كف بكل قوتي...قبل ما يقول حتى كلمة...دور راسو يغزرلي مصدوم...حتى انا منعرفش كيفاه تصرفت معاه اكاكا...و هزيت صباعي في وجهو نحكي
انا:رد بالك مزلت تخمم تمسني...و لا تحط يدك عليا قسما بالله يا مراد...و رحمة بابا و معزتو عندي...الا ما نقتل روحي في نفس الليلة...والله نعملها و ما نسأل على حد...خليك بعيد عليا احسنلك...و الا باش ندمرك يا مراد
بقى واقف في بلاصتو من غير حتى كلمة...كنت باش نمشي اما في لحظة عاودت غزرتلو نحكي
انا:عطيتني اختيارين قبل ما نخرج من هوني...هاني باش نقلك قراري توا...بنتي باش تكبر بين أمها و بوها و قول زهرة قالت...حاجة أخرى قبل ما نمشي...ماكش مظطر تحبسني بعد توا...أنا و أنت نعرفو لي متنجمش تمنعني أني نمشي...على هذاكا خليت أمي كورقة رابحة ليك...ألعابك ولات واضحةوو ذكائك معادش يفيدك..في رايي أقعد مع روحك شوية...قبل ما تخمم تعمل شي اخر...ليلتك زينة
قربت هزيت صاكي من الطاولة...و طلعت لبيتي..سكرت الباب من الداخل...طيشت كلشي من يدي...و تكيت عالباب...دموعي نزلو مرة اخرى...منعرفش اذا نفرح و لا نحزن خاطر امي لتوا عايشة و تتنفس...و لا عالوحلة لي وحلتها هوني..أما مانيش باش نخليه يستغل ضعفي بعد توا...و لا حتى يخمم يحط يدو على بدني كلامو برك قززني...في روحي...مديت يدي حليت الروبة طاحت عالارض...و دخلت لصال دوبان...غطست في البانو...نعرف روحي تسرعت برشا الصباح و لا الامور راهي مشات العكس توا...اما من جانب اخر كان احسن من اني نواجه سلمى و نخاطر بحياتو...نعرف لهي باش تعاود كلشي لمراد بالحرف...هي بالظبط...مزال عندي شغل معاها...كبست بيديا زوز على كرشي...بعد توا مانيش باش نغفر لاي حد ياقف في وجهي...فرد وقت مانيش باش نخلي العباد لي نحبها تتضرر جرايري..حتى امي لمنجمتش نصدق لهي حية لتوا...باش تكون اخر فرصة ليها...كان باش تختار مراد...مستحيل نسامحها مرة اخرى...متأكدة لفما حاجة خلاتها حتى هي تسكت الفترة هاذي الكل...و متظهرش لتوا...نعرف لي عمللها حاجة سكتها بيها...اما مش بعد توا...االعب متاعو ولى واضح...و قاعد يخسر في اخر اوراقو بلا ما يحس طريقنا ولات واضحة بعد توا و كل حد فينا باش يختار ثنية لي تناسبو و كهو.
🌸🌸🌸🌸🌸🌸🌸🌸🌸🌸🌸
🔸️مريم تحكي:
مديت يدي شوية شوية...و هزيت راسي نغزرلو...تبسم يحكي
صبري:نظن بعد توا معادش فما مشكلة
انا:حتى انا نظن اكاكا
حسيت روحي تفرهدت بعد ما تهنيت من الجبيرة...و المعالجة الفيزيائية...متوقعتش باش نعاود نهز صحتي في الشهرين هذوما...تبسمت نحكي
انا:مرسي برشا صبري
صبري:عملت واجبي
بقيت نغزرلو...منعرفش كيفاه نجم يتحملني الشهرين هذوما...و يتحمل نفسيتي زادة...نعرف لي تعبتو معايا برشا...و حملتو اكثر من مجرد فرملي و يعمل في خدمتو كهو...تعدلت في قعدتي و غزرتلو نحكي
انا:صبري
صبري:مممم
انا:سامحتني مش هكا ؟
صبري:على شنية ؟
انا:على كلشي...نعرف في اخر فترة كنت على اعصابي...ساعات منعرفش شنوة لي قلتو...على هذاكا سامحني
صبري:باهي اما بشرط
انا:شنوة ؟
صبري:قهوة عالشط
تبسمت بالوقت...و هزيتلو براسي ايه...نحكي
انا:باهي صبري...حتى انا بحاجة نبدل جو
صبري:ملا باش نقابلك في اقرب فرصة
انا:ان شاء الله
اول ما خرج...هزيت روحي وقفت...قربت من المرايا نغزر لروحي...برغم ضعفت برشا على قبل...اما نحس في روحي أحسن...مديت يدي نحرك فيها...حسيت روحي في فورمة بعد اللي تعدا عليا الكل...هزيت تليفوني نكلم في زهرة مزال مسكر...منعرفش قداش راني طالبتها لتوا...اكثر من عشرين مرة في نهار...اما نفس شي...قربت من الشباك هزيت ريدو شوية...نغزر للبلاصة لي يراكي فيها كرهبتو...منعرفش علاه حسيت روحي توحشتو برشا...لتوا مستغربة كيفاه سمع كلامي من اول مرة و معادش رجع جملة...ياخي لهدرجة معادش نهمو...تي باز جات على قلبو...و في اول فرصة سافر من هوني...اصلا الهروب من عادتو...كان معرفتش من امي فتحية...محمد مكانش باش يخبرني...اصلا حتى هو عز بيه خوه غير العادة المرة هاذي...زعمة شنية قاعد يعمل...و كيفاه حالتو بعد اخر مرة ريتو فيها ؟ اكيد رجعلها...اصلا كان يستنى في الفرصة هاذي ليه برشا...هذا كان مسافرش معاها...طول اليمات هذوما و انا نسأل في روحي...و نحاول نلقى اجوبة تقنعني...و تخليني نكرهو اكثر...رديت ريدو اول ما دخلت رنيم...تنهدت بالقاوي تحكي
رنيم:مدامك تستنى فيه لتوا...علاه طردتو ليلتها
انا:ماني نستنى في حتى حد رنيم
رنيم:تحبني نصدقك ؟
انا:رنيييم
رنيم:بااهي باهي...هاني سكت...تحب تنزل معايا اللوطة...يزي ما حبست روحك هوني
تلفت نغزر لروحي مرة اخرى...للحظة حسيت عندها حق...يزي ما حبست روحي...مدام هو اختار ثنيتو انا باش نعمل نفس الشي...خذيت نفس و تبسمت نحكي
انا:صراحة انا نحب نخرج عزيزتي
رنيم:متأكدة
انا:عاللخر...هيا برا حضر روحك...تو نخرجو مع بعضنا
رنيم:يااا جووو...فيسع و نرجعلك
انا:استنى لحظة...يا ريت تعطيني حاجة من عندك...ماك تعرف دبشي الكل مزال في الفيلا
رنيم:هيا إيجا معايا و إختار وحدك
أنا:باهي عزيزتي
خلطت عليها لبيتها...كانت أول مرة ندخل لبيت أختي رغم إحنا فرد دار...غزرتلي تحكي
رنيم:إختار لي تحب عليه عزيزتي
حلتلي القارد روب و وخرت لتالي...قربت شوية...شوية نعدي في يديا عالدبش...إخترت روبة سامبل جات على يدي...و رجعت لبيتي...لميت شعري....و حطيت مكياج خفيف...حليت القجر جبدت منو الشاك متاعي...أحسن شي...حطيت كلشي في صاكي ليلتها و الا منعرفش شنية كنت باش نعمل...خذيت نفس و هزيت روحي خرجت...لقيت رنيم حاضرة...تبسمت نحكي
انا:هيا عزيزتي
رنيم:باهي
خلطت عليها...نزلنا الدروج مع بعضنا...لقيت بابا اللوطة استغرب يحكي
بابا:لباس عزيزتي ؟ وين ماشيين ؟
انا:نحب نعمل دورة...كان معندكش مانع خلي رنيم تجي معايا
بابا:مفماش مانع يا روحي...لحظة برك
مد يدو باش يجبد فلوس...تبسمت...و وقفتو نحكي
انا:خلي عليك بابا
بابا:ماكش باش تردني...مانيش نعمل في مزية عليك عزيزتي
هزيتلو براسي ايه...و مديت يدي شديتهم عليه...و مد لرنيم زادة...قربت منو مترددة...بستو من خدو...تبسم يحكي
بابا:مطولوش برشا...و كان صار شي كلمني باهي
رنيم:باهي بابا...هيا باي توا
ضحكنا لبعضنا...أنا و بابا...كي قربت تحل الباب بالزربة خذيت نفس و خلطت عليها...منعرفش شنية لي حسيتو بالظبط...تعدا برشا وقت...ممشيتش في الحومة كيما قبل...برغم كل تركينة تذكرني فيه...اما تقويت على روحي...شديت رنيم من يدها نحكي
انا:رنيم اسمعني
رنيم:شنية عزيزتي
انا:نحب نتعدا للبنك
رنيم:توا ؟
انا:فما إجراءات صغيرة برشا لازمني نكلمها...كلمت طاطا نورهان قبل...و لازمني نوقع باش نجم نخرج فلوس أمي
رنيم:صحيح شبيها خالتك تكلمك في تليفون كهو
انا:مدامني رجعت معاكم...متأكدة ماهيش باش تجي لدار لي ماتت فيها أختها...يعني حتى أنا عذرتها
رنيم:و انتي مريم ؟ مزلت حاقدة علينا كيما قبل ؟
حاوطت وجها بيديا زوز...بعدت شعرها لتالي...نحكي
انا:لي فهمتو طول الفترة هاذي انو حتى حد ما عندو ذنب في اللي صار...و مانيش حاقدة عالحكاية...العكس أنا نحاول نعيش مع عيلتي لي ضيعتو قبل
رنيم:معناها سامحتني ؟
انا:مفما حتى شي نسامحك عليه...معادش تخمم في الحكاية هاذي...و هيا توا...فما برشا حاجات نعملوهم مع بعض
رنيم:باهي هيا
تبسمتلها و كملت ثنيتي...كل شوية نطلب زهرة أما شي...حتى عنوان الفيلا متاعو منعرفش عليه وين السخطة...متاكدة فما حاجة مخبية عالكل...مستحيل زهرة تغيب بالطريقة هاذي...كملت بقية الاجراءات أحسن شي خليت طاطا نورهان تهتم بالتفاصيل...و الا مستحيل كنت باش نكمل بالسرعة هاذي...جبدت لي حاجتي بيه...و خرجت معاها...غزرتلي تحكي
رنيم:وين باش نمشيو توا ؟
انا:مممم منعرفش...اول شي باش نمشيو للمول
رنيم:متأكدة
انا:نحب ناخو شوية دبش...لين نلقى فرصة و ناخو دبشي من الفيلا
رنيم:باهي هيا عزيزتي
مديت يدي وقفت طاكسي...تكيت راسي لتالي...نغزر لثنية...محسيتش بالوقت كيفاه وصلنا...منعرفش اذا لي نعمل في صحيح و لا غالط...اما نحب نحيه من مخي باي طريقة...نحب ننسى لي صار الكل...و نكمل حياتي كانو ما صار شي...دخلت لاول بوتيك عارضني...و من بوتيك لبوتيك تعدا الوقت...و استقرينا في اخر واحد هدتني الفرخة...و أنا نجرب في كل قطعة تجي على يدها...نفخت بالقاوي نحكي
انا:رنيم يزززي والله تعبت...زادة منجمش ناقف اكثر من هكا
رنيم:باهي جرب الكعب هذا مع الروبة
انا:لا
رنيم:أمانك...في رايي هكا تولي أحلى
انا:لاا عااد...يا بنتي الحاجات هذوما مش متاعي
رنيم:في رايي خمم مرة اخرى...بالكعب أحلى ببرشا عزيزتي
انا:باهي باهي...هات عليك
قعدت بجنبها نلبس فيه...و هزيت روحي وقفت...قربت من المرايا...و مديت يدي...حليت شعري...نثبت في روحي...حطيت يديا زوز على كرشي...لتوا نحس بوجيعة خفيفة...يمكن هذا هو الفرق بيني و بين شراز ديما كانت هي السيدة الأنيقة...تبسمت باستهزاء...و تلفت لطفلة لي واقفة تغزرلي
انا:باش ناخو هذوما زادة
رنيم:ايه صحيتك عزيزتي
انا:نظن القطعة هذيكا باش تناسبك أكثر
رنيم:لا عزيزتي يكفي لي شريتهوملي لتوا...زادة منعرفش امتى نلحق باش نلبسهم الكل...و هاك انتي دوب خذيت قطعتين
انا:ميهمكش فيا...منحبكش تعيش لي عشتو انا باهي
رنيم:و إنتي باش تعوض كلشي فاتك
تبسمت و هزيتلها براسي ايه...بدلت دبشي...دفعت حق القضية و خرجت...بدني تكبس في لحظة و انا نغزر للبوتيك متاع الصغار...عديت عينيا على كل لعبة معلقة على قطعة دبش صغيرة في الروز...غمضت عينيا بالقاوي...و عاودت حليتهم...منحبش نبكي...منحبش نذكر لي صار مرة اخرى...اما في لحظة...حاجة تحركت داخلي...حسيت بيد رنيم لي تحطت على كتفي...و غزرتلي تحكي
رنيم:هيا عزيزتي
انا:شبيني مخممتش نزورها قبل ما نعمل هذا الكل
رنيم:مريم يزي عيش اختي...معادش تحمل روحك أكثر من هكا...ماكش باش ترجع لي راح بالطريقة هاذي...و زادة صباح نمشيو للمقبرة مع بعض...شرايك ؟
هزيتلها براسي ايه...و خذيت نفس طويل...عاوني باش نكمل ثنيتي...رجعت للحومة و انا نكرر في ساقيا بعد ما كنت في فورمة...وقفت في راس نهج...و رجعت خطوة لتالي...نقرا في الاعلان لي معلق على بوتيك مسكر...غزرتلي تحكي
رنيم:لباس ماهو ؟
انا:لباس لباس
كملت ثنية و فكرة وحدة تدور في راسي...لقيت بابا يستنى فينا...نعرف لي مزال خايف من فكرة نتلقى مع حسام...حطيت الدبش في الصالة...و دخلت للكوجينة نغزرلها تحضر في العشا...تلفتت عندي تحكي
حياة:كيفاه عديت نهارك ؟
انا:لباس عيشك
حياة:هيا باهي عزيزتي...برا اعمل دوش...لين نكمل نحضر طاولة
انا:تحب نعاونك
حياة:متعبش روحك...مبريتش بالقدا عزيزتي
قربت منها اكثر...تكيت عالرخامة مقابلتها...منعرفش من وين لازمني نبدا...خذيت نفس نحكي
انا:طاطا حياة
حياة:شنية عزيزتي ؟
انا:صراحة أنا...يعني نحب نسألك حاجة
حياة:نسمع فيك
انا:مزلت تحس لإنتي تكرهني...يعني وجودي معاكم هوني مزال يقلقك كيما قبل ؟
مسحت يديها...و قربت مني...حطتهم على وجهي تحكي
حياة:مريم...انا عمري ما كرهتك...و عمري ما حقدت عليك زادة...كلشي عملتو معاك قبل و الظغط لي خليتك تعيشو...من خوفي عليك...خاطرك كنت ديما تتصرف من راسك...و هاك ريت نتيجة...كنت خايفة منكونش قد الأمانة لي وصاني عليها بوك و من طفلة يتيمة محروقة على أمها...من وقت دخلت لهوني...و انا نحاول نقربك ليا...أما كل مرة كنت تحط حواجز بينتنا...و ساعات توصل للعرك و الكلام الكبير...اما صدقني عمري ما حطيت في قلبي عليك...و عمري ما كنت بالطريقة لي صورتها في مخك...و توا بالظبط متتوقعش قداشني فرحانة انك موجودة بينتنا...و انو الغيمة الكحلة لي كانت بيناتنا مشات على روحك...صدقني
انا:سامحني طاطا حياة... مشى في بالي كي نلومكم و نحملكم سبب موت امي...نكون ارتحت...اما طلعت غالطة...انا بعد ما خسرت بنتي فهمت برشا حاجات
حياة:اللي عند ربي مش بعيدة...و اكيد باش يعوضك يا روحي
انا:عيشك طاطا حياة...إن شاء الله
قربت منها مترددة حضنتها...و غمضت عينيا بالوقت اول مرة بعد سنين طويلة تعدات علينا...نحس في روحي قاعدة نعمل في الشي الصحيح...و انو ضميري مرتاح معاهم...قصت علينا رنيم...وقت دخلت تحكي
رنيم:شراايكم ؟
تلفت نغزرلها...لابسة الروبة لانا اخترتهالها...من بين الدبش الكل...متوقعتش فرحتها باش تكون كبيرة لهدرجة...تبسمت نحكي
انا:دور تراه
رنيم:هاه شوف توا
أنا:مممم شرايك انتي طاطا حياة ؟
حياة:معجبتنيش عليها
أنا:حتى انا
رنيم:تحكيو بالرسمي ؟
بابا:لا عاد...محلاها بنيتي...شبيكم عليها ياخي ؟
تلفتت عندو غزرتلو مستغربة...حسيت بالذنب أكثر من قبل...خاطرني كنت السبب في علاقتهم هاذي...أصلا غيرتي منها كانت واضحة قبل...و عماتني بطريقة غريبة فكرت كي نبعد بابا عليها باش تحس لانا نحس فيه تبسمت كي ريتو حضنها...قربت منهم نحكي
أنا:نفدلك عزيزتي...طلعت عليك مش نورمال
رنيم:معناها نجم نلبسها أول يوم في الفاك
حياة:تنجم عزيزتي...و إنتي هاك دورة دورة تذكر فينا لي نجحت في الباك
انا:ههههههههه اونفان بديت تكبر يا فرخة
رنيم:مرريم يزززي...بابا أعمل حاجة أمانك
بابا:هههههه سيب أختك مريم
أنا:باهي باهي
حياة:هاني باش نحضر الطاولة...رنيم بدل الروبة و ايجا عاوني
رنيم:بااهي
أنا:بابا...ميسالش نحكو مع بعضنا شوية ؟
بابا:باهي ايجا معايا
خلطت عليه لصالة...قعدت بجنبو...عدا يدو على شعري يحكي
بابا:شفما عزيزتي ؟
انا:بابا تعرف بالقدا شنية لي تعدا على راسي لتوا...كيما تعرف شنية موقفي من الحكاية لي صارت الكل
بابا:فاش تخمم ؟
انا:نحب نطلق من حسام
بابا:متأكدة من قرارك ؟
انا:متأكدة...بعد توا ما عاد يربطني بيه حتى شي...كان متراش مانع...تو نقدم قضية في اقرب فرصة و بالنسبة لقعدتي هوني و كلام الناس...نجم نكري دار في بلاصة اخرى و نستقر غادي...المهم عندي تكون راضي عليا و كهو
بابا:ششش آخر مرة تخمم في ناس و كلامهم...دار بوك محلولة ديما...صحيح غلطت برشا في حقك قبل...أما مستحيل نخليك تبعد عليا توا
انا:عيشك بابا...فما شي آخر...كان ميقلقكش
بابا:شفما عزيزتي ؟
انا:انت تعرف الفلوس لي ورثتها على امي ؟
بابا:إيه
انا:باهي انا و في ثنية ريت واحد عارض المحل متاعو للكرا...في اول الحومة
بابا:اه هذاكا عم صبري...خرج الكاري الاول خاطر مدفعلوش
انا:صدفة باهية...انا نحب نكريه عليه
بابا:و شنية تعمل بيه ؟
انا:نحب نحل بوتيك صغير...خاص بالصغار...يعني ألعاب و دبش لي بيبي...و كلشي يتعلق بيهم
بابا:بالرسمي تحب هذا الكل؟
انا:عاللخر بابا...هذا اكثر شي يرفهدني في حياتي صدقني
بابا:و بالنسبة لقرايتك ؟
انا:اكيد باش نرجع و نكمل آخر عام...وقتها نحط خدام فيه...و هكا تتحل الحكاية...البوتيك هذا ماهوش باش يأثر عالميزانية لي عندي...و نحب حاجة نتلهى بيها بعد اللي صار فيا الكل...شقولك ؟
بابا:باهي عزيزتي...من غدوة نكلم صبري يعاونك في الإجراءات متاع الورق...أما البوتيك شوية قديم و لازملو برشا خدمة...باش يولي كيما تحب إنتي
انا:ميسالش المهم عندي لهو كبير شوية...و في الحومة متاعنا زادة
بابا:باهي عزيزتي...لي تحب عليه باش يصير
انا:عيشك بابا
بابا:زهرة صحبتك شنية احوالها ؟
انا:منعرفش...و ملقيتش ثنية توصلني ليها...خايفة عليها و على البيبي متاعها زادة
بابا:متخافش يا روحي...كلشي باش يكون مليح
انا:إن شاء الله بابا...هيا نمشيو لطاولة...متخليهمش يستناو اكثر من هكا
بابا:باهي هيا قوم
هزيت روحي...و خلطت عليه....بعد حكيت معاه...مزال شي واحد و كهو إني نوصل لزهرة...و نفهم لي قاعد يصير الكل.
#سمر 💙💕
أنت تقرأ
زهرة🌸
De Todo🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
