زهرة🌸

الحلقة الخامسة و الستون

🔸️حلقة 65
#عمر_يحكي:
تكيت راسي لتالي...نغزر ليديا زوز...نثبت في دم ولدي نحس في بدني مهدود عاللخر...مش مصدق لي صار نغزر للفراملة داخلين خارجين...اما ما نجمت نسأل حد فيهم...معادش عندي جرأة حتى نقوم من بلاصتي خوف تزرع في وسط قلبي...خايف عليها قبل الصغير لي في كرشها...نعرف كان تخسرو...ماهيش باش تتحمل نعرف لهي ماهيش باش تغزر في وجهي مرة اخرى غمضت عينيا بالقاوي...كيفاش محسيتش بيها...كيفاش محسيتش لهي حبلة...تصرفاتها الكل...كانت تقول لي الصغير مزال عايش لتوا...شهاويها لي تنزل عليها في نص الليل...بكاها لي ما عندو حتى سبب...كلشي كان يقول لهي عايشة بروحين...اما انا شنية عملت...تعميت على هذا الكل...شبيني محسيتش بيها المرة هاذي شبيني تعميت لهدرجة...نحس في روحي باش نهبل حطيت راسي بين يديا زوز...اخر كلام بينا بقى يدور مخي..باز صار فيها هكا جرايري..انا بيدي وصلتها لهوني انا جرحتها...حقرتها و وجعتها...من غير ما نحس..كبست على راسي بيديا زوز...و انا نتذكر في دموعها...دموعها لانا كنت السبب فيهم...اول مرة نحس روحي لانا هملتها لهدرجة...عطيتها بظهري من غير ما نسأل عليها...خذيت بخاطري منها...أما على شنية ؟ على صغير لي طيحاتو؟ و طلع مزال عايش و لا على حكاية مراد...لي يمكن حتى هي تطلع صحيحة...لتوا مش مستوعب لأنا صدقت أنو هي ممكن تقتل الصغير لي في كرشها منعرفش بانو وجه نقابلها و لا شنية باش نقوللها...هاني انا طلعت السبب في موت ولدنا مش انتي...سامحني عالكلام لي قلتو كان لحظة غش...اول مرة نظلمها...ايه انا ظلمتها...و لزيتها تبعد عليا...خايف لا نخسر ولدي...و نخسرها بعدو...نحس في الوقت وقف...و معادش يحب يمشي...فقت من سرحتي...كي قعدت قدامي تحكي
هند:عممر...متخافش...ولدك باش يعيش...نعرف لزهرة ماهيش باش تخسرو
أنا:من إمتى تعرف ؟
هند:من أول نهار
أنا:علاه مخبرتنيش ؟
هند:زهررة...قالت باش تعملك مفاجأة أما
أنا:قداش عندها حبلة توا ؟
هند:يمكن شهر أكاكا و لا فايت
أنا:شهههر...تعرف شنية تعدا على راسها في شهر هذا...و شنية لي عملتو فيها أنا ؟
هند:أنت ما عندك حتى ذنب في اللي صار عمر
أنا:ما عندي حتى ذنب ؟
تبسمت على جنب...نحس في روحي قاعدة تخرج مني كلشي نحب عليه توا...إني نحضنها و كهو...و ما يهمني حتى شي بعدها...رجعت بذاكرتي لتالي...لعيد ميلاد هند
زهرة:مممم باهي إسمعني...أنا عندي مفاجأة حلوة برشا و باش تفرحك عاللخر...أما
أنا:أما شنية ؟
زهرة:باش نخبرك...أما بعد الحفلة
أنا:معناها تحبني نصبر...لبعد سهرية ؟
هزيت براسي لا...و نطرت من بلاصتي جيت واقف معادش نجم نخمم أكثر...كيفاش عملت فيها هكا...أكيد نهارتها كانت باش تخبرني على الصغير...أما شبيها منكرتش كلام سلمى...علاه ما قالت حتى كلمة ليلتها علاه سكتت ؟ علاااه عملت فيا و في روحها هكا...نحس في روحي باش نهبل يا ربي...شدتني هند من يدي تحكي
هند:عمر اهداا أماانك
أنا:ابعد عليا هند
هند:ع...عمممر
أنا:نحس في روحي باش نهبل...كان تصيرلها حاجة مستحيل نسامح روحي...مستحيل
هند:يا عمر...اهدا أمانك...الطبيبة آخر مرة قالت لي حبالتها ماهيش ثابتة و أي ظغط...يخليها تخسر الصغير أنت ما عندك حتى ذنب
بقيت نغزرلها...باقي مصدوم في اللي نسمع فيه...عديت يدي على وجهي...نرد في النفس...فقت من سرحتي على صوت الفرملية تحكي
هي:فما حد هوني من عيلتها ؟
أنا:ش..شصار ؟
هي:لازمنا دم فيسع
هند:شنية زمرة دمها ؟
أنا:A+
هي:شكون منكم عندو نفس الزمرة ؟
هند:آسيااا
انا:شنية ؟
هند:آسيا صحبتي نفس زمرة دمها
انا:كلمها ملا
هند:باش نخبر مصطفى يجيبها لهوني خاطر معندهمش كرهبة...ماهيش باش توصل في الوقت
انا:تصرف هند امانك
هند:وينو تليفونك
انا:منعرفش...نسيتو في الكرهبة
هند:باهي
خرجت تجري...قربت من الفرملية...وقفت قدامها نحكي
انا:نحب نراها ؟
هي:توا ممنوع
انا:لازمني نراها توا...مانيش باش نستنى أكثر
حليت الباب و دخلت...خلطت عليا تجري...جمدت في بقعتي...و انا نغزرلها....الدم لي على السرير...خلى قلبي يدق بالقاوي...غزرت لوجها...أصفر مش نورمال...قربت مني الطبيبة تحكي
هي:مسيو...ميجيش لي تعمل فيه...تفضل برا امانك
منجمتش نرجعلها...اول مرة نراها في الحالة هاذي...اول مرة نحس روحي عاجز و ما نجم نعمل شي...اول مرة نحس لهي باش تضيع مني...و أنا لي ضيعتها بيدي غزرتلي مرة اخرى تحكي
هي:مسيو قاعد تعطل فينا...أماانك أخرج توا
وخرت بخطوات رزينة لتالي...من غير ما نزل عينيا من وجها...اول ما تسكرت الباب...هزيت يدي حطيتها عليها نحكي
أنا:تحمل يا روحي...تحمل أمانك
منعرفش قداش تعدا وقت و انا واقف في بقعتي...نغزر لهند جاية عندي...وقفت قدامي...تتنفس بالسيف...و تحكي فرد وقت
هند:سااايي قاعدين ينحولها في الدم توا
انا:المرة هاذي ماهيش باش تسامحني...كان زهرة تخسر الصغير هذا...مستحيل تغزر لوجهي مرة أخرى
هند:إيجا اقعد عيش خويا...زهرة بقدرة ربي تو تقوم لباس...نعرف لي ماهيش باش تفرط فيه صغير هذا
جبدت روحي لتالي...و عاودت ترميت عالكرسي...الوقت لي تعدا عليا...حسيتو دهر...رجعتلي في يدها دبوزة ما و تليفوني...تحكي
هند:عممر يزي أماانك...زهرة بحاجتك توا...أكثر من اي حد...أماانك
مديت يدي شديت عليها تليفوني...و غزرتلها نحكي
أنا:نحب نقعد وحدي
هند:باهي...هاني مع مصطفى و آسيا
هزيتلها براسي ايه...اول ما مشات...حليت تليفوني
يدي رعشت...و انا نغزر للمكالمات لي وصلتني منها حسيت روحي تخنقت...و انا نقرا في الميساج متاعها << عمر امانك ايجا عندي توا تاعبة عاللخر >> قلبي دق بالقاوي...مش مصدق لي نقرا فيه...باز صار فيها كيفاش عملت فيها هكا يا ربي...اصلا مش متذكر لي خليت تليفوني سيلونس...كيما لقيتو توا...غمضت عينيا بالقاوي و عاودت حليتهم...دمعة نزلت على خدي حرقتني من داخل...حرقتني على روحي لي مرمية الداخل و ما نجم نعمللها شي...انا بيدي سبب في كلشي صار لتوا...كيفاش نجم نسامح روحي...اذا صارلها شي عديت يديا زوز...على وجهي...نهدي في روحي...اول ما تحل الباب...نطرت من بلاصتي وقفت قدامها نحكي
انا:م...مرتي وينها ؟ لباس ماهو ؟ حد فيكم يقول حاجة
خلطت عليا هند و مصطفى...حطت يدها على كتفي تحكي
هند:عممرر...اهدا عيش خويا
هي:اهدا مسيو مرتك لباس...حالتها مستقرة توا...اما باش تبقى تحت المراقبة...ليلة هاذي
بقيت نغزرلها...وقتها برك حسيت الروح رجعت فيا خذيت نفس نحكي
انا:ب...باهي...و ال
الكلام وحل في حلقي...منجمتش نسألها على الصغير حسيت روحي خسرت الحق في اني نسأل على ولدي بعد اللي صار فيها جرايري...تبسمت تحكي
هي:طمن...الزوز لباس
أنا:ش..شقصدك ؟
هي:المدام و البيبي زوز ملاح
أنا:معناها...مرتي لتوا حبلة
هي:إيه...حمد الله منعت المرة هاذي زادة
غمضت عينيا بالقاوي...و عاودت حليتهم...نحمد في ربي و نعاود...غزرتلها نحكي
أنا:دكتورة نجم نراها توا ؟
هي:ماهيش باش تفيق...قبل الصباح
أنا:ميسالش...نحب نبقى معاها...تصرف
هي:باهي...تو شوية يهزوها للبيت اخرى...تنجم تبقى معاها ليلة
انا:عيشك
تلفت لهند...قربت مني بالوقت...ترمات في حضني تحكي
هند:ريت...قتلك لهي باش تمنع منها...كنت متأكدة لزهرة قوية...و باش تتحمل
انا:عيش اختي
مصطفى:حمد الله لي طلعت لباس
انا:عيشك
مصطفى:معناها باش نولي عم ؟
انا:ان شاء الله
تبسمت و جبدت روحي منها...قربت من صحبتها..نحكي
انا:مانيش باش ننسى لي عملتو معانا...هوكا دين في رقبتي
اسيا:عملت واجبي و كهو...حمد الله هي لباس توا
انا:عيشك
هند:هيا ايجا معانا ترتاح شوية...لين يبدلولها البيت
انا:لا...إنتي باش ترجع لدار توا
هند:مستحيل نخليك وحدك
انا:مصطفى...هزهم لدار توا...زوز تعبو...و تأخر الوقت برشا...من غير ما يحسو الباقيين لي فما شي
هند:عمممر
انا:هيا هند اسمع الكلام...عيش اختي
هند:اما
انا:نستناك الصباح و من غير ما تخبرو حد توا...ما عيني نقابل حد و لا نحكي مع حد
مصطفى:باهي طمن
انا:عيش خويا
بقيت نمشي و نجي...احساس جديد...نحس فيه توا منعرفش شنوة بالظبط...مش مصدق لهي رجعتلي...اول ما طمنت لي نقلوها للبيت لاخرى...خلطت عليها بالزربة حليت الباب و دخلت...نغزرلها غاطسة في النوم...قربت منها من غير ما نحس...قعدت عالكرسي...بجنبها...مديت يدي...عديت صوابعي على خصلات شعرها...نغزرلها و مش مصدق...حسيت روحي توحشتها...و استفقدتها برشا على قبل...بقيت نغزرلها من غير ما نخمم في حتى شي آخر...قربت منها أكثر...حطيت راسي بحذاها..نحس في روحي تاعب عاللخر...كبست على يدها نحكي
انا:سامحني على كلشي...تعديت عليه...جرايري...انا غلطت برشا...صغرونتي...غلطت كي خليتك وحدك...كي مصدقتكش...كي هملتك...انتي قوم توا...و حاسبني على كلشي...اما معادش تعمل فيا هكا امانك...كان مش على خاطري...على خاطرو هو
نزلت بيدي...عديتها على كرشها...قلبي خض بالقاوي اول مرة نجرب الاحساس هذا...مش مصدق...لي فما قطعة مني داخلها...غرست راسي في رقبتها...نشم في ريحتها...نحب نتأكد...لهي مزالت معايا...دوب تبسمت و انا نشم في ريحتي....لي حطت منها...حضنتها عندي أكثر...من غير ما نخمم في حتى شي اخر...بستها من خدها...و فرد وقت نعدي في يدي على كرشها..منعرفش قداش تعدا وقت بالظبط و لا حتى كيفاش غفيت..فقت على صوتها تحكي
زهرة:ب...با...بابا...بابا
حليت عينيا مروهج...طلعت راسي شوية...نغزرلها تهتري باسم بوها...قلبي غم عليا...هاذي اول مرة تهتري باسم بوها...بعد الشهور لي تعدات علينا الكل...خذيت نفس...و عديت يدي على خدها...نفيق فيها...نحكي
انا:زهررة...قوم يا روحي...هاني معاك...هيا زهرتي
زهرة:ب...بابا
أنا:زهررة...هيا عزيزتي أمانك
دوب حلت عينيها...و عاودت سكرتهم...حركت يدها شوية...و عاودت غزرتلي مروهجة...تحكي
زهرة:ع..عمر
أنا:هاني معاك...هيا يا روحي...فيق أمانك
جبدت يدها مني بالسيف...حطتها على كرشها...دوب غزرتلي...تحكي
زهرة:و..ولدي...عممر...ولدي
حطيت يدي على يدها...فوق كرشها...و عديت يدي لأخرى...على شعرها...نحكي
انا:متخافش...ولدنا مزال عايش
زهرة:ا..أنا شنعمل هوني ؟
انا:إنتي تعبت شوية و كهو...كيفاش تحس في روحك توا ؟
زهرة:ت...تاعبة عاللخر
انا:باهي...إرتاح توا...هاني باش نكلم الطبيبة و نرجعلك
زهرة:باهي
قربت بستها من راسها...و هزيت روحي خرجت...لقيت الجماعة الكل برا...حتى من أمي و بابا...دارو بيا الكل يحكيو...عديت يدي على وجهي...نغزر لطبيبة جاية قرب مني بابا باش يحكي...وقفتو نحكي
أنا:مش وقتو توا
خليتو و دخلت مع الطبيبة...سكرت الباب...وراها نحكي
انا:طمني عليها ؟
قربت منها...تعدي عليها...و تحكي معاها فرد وقت نحاتلها السيروم...و تلفتت عندي تحكي
هي:طمن...اليوم أحسن ببرشا...أما كيما وصيتك...لازمها راحة تامة...هاني وصيتها من قبل و باش نوصيك عليها توا زادة
انا:أكيد طمن
هي:باهي بالشفا عليها مرة أخرى...كان احتجت شي كلمني
انا:باهي عيشك
اول ما خرجت...قربت منها...لقيتها فاقت...حطت يديها زوز على كرشها...تبسمت نحكي
انا:كيفاش تحس في روحك توا ؟
زهرة:نحب نشرب
عبيت كاسة الما...و قربت منها...قعدت على طرف السرير..نزلت عليها شوية...عاونتها تقعد...غمضت عينيها بقوة...و عاودت حلتهم...دخلت بعضي أكثر عديت يدي على خدها نحكي
انا:شبيك ؟ شنية يوجع فيك ؟
زهرة:ل..لباس عليا
مدت يدها تحب تهز الكاس...خذيت نفس و حطيتو في يدها...دوب شربت منو...و رجعتهولي...تنهدت نحكي
انا:صحة و بالشفا يا روحي
زهرة:عيشك
حطيتو من يدي...و عديت عينيا على وجها...تهرب في عينيها مني...متحبش تغزرلي...ياسر ضعفت على قبل نزلت راسي نغزرلها...تفرك في يديها كي العادة...وقت تبدا داخلة بعضها...و متوترة...خذيت نفس و فكيتهم بيدي...كبست على يدها...و غزرت لعينيها...نحكي
انا:منقصدش لي صار...سامحني يا روحي
جبدت يدها مني...وين قلبي خض بقوة...غزرتلي ندرا كيف...تحكي
زهرة:عادي
بقيت نغزرلها...من نبرة صوتها...حسيتها مش قد بعضها خذيت نفس نحكي
انا:اغزرلي هوني...و أحكي معايا
زهرة:على شنوة تحبني نحكي ؟
أنا:على كلشي...نحبك تلومني و تسمعني فرد وقت...انا على شعرة كنت باش نخسركم الزوز زهرة
زهرة:كان جيت نهمك...أكيد كنت خلطت عليا
انا:في بالك كان سمعتو...و قريت ميساجك...كنت باش نحقرك و نطفيك ؟
زهرة:ميسالش...أنت تعرف على شكون تهز...نحب نرقد توا
عرفتها تقصد في سلمى...هزيتلها براسي لا...حسيت روحي باش نهبل...كيفاش تسمح أنها تقارن روحها بسلمى أصلا مستحيل نجم نغزر لوحدة غيرها...و هي تعرف هذا بالقدا...حاوطت وجها بيديا الزوز نحكي
انا:زهرة أمااانك...أسمعني مرة وحدة
حطت يديها زوز على يديا...كبست عليهم...و جبدت روحها مني شوية...غزرتلي ندرا كيف تحكي
زهرة:من غير ما تبررلي عمر...حياتك الخاصة معادش تهمني بعد توا...وين كنت...مع شكون كنت...و لا حتى طبيعة علاقتك مع سلمى و لا غيرها...معادش تهمني أمورك الخاصة مانيش باش ندخل فيها بعد توا...انت في الفترة هاذي خليتني نعرف اني مستحيل نكون فرد منكم...أنا تسرعت برشا...خاطرني وثقت فيك...و وثقت لي مستحيل يجي نهار و تفد مني و من كلشي يخصني انا فهمت و استوعبت انو العيلة اهم ببرشا من الحب...و و أنت تعمدت تقارني بعيلتك...أما عمرك ما اعتبرتني فرد منها...على هذاكا مفما حتى شي نحكيو فيه بعد توا...أمورنا ولات واضحة..منحبكش تبررلي و لا تفسرلي شنية لي صار....أنت كلشي عملتو و كلشي قلتو كنت مقتنع بيه و أكبر غلطة عملتها...أنك عرست ببنت انتصار انت في أول مشكلة...فلت يدي...و مانيش مستعدة نتمسك فيك مرة أخرى
عدات يدها على خدها..مسحت دمعتها لي نزلت..نغزرلها و مش مستوعب الكلام لي قالتو..منعرفش كيفاش نجم نعيش من غيرها...تعرف بالقدا...لحياتي ما تجي شي قدامها...نعرف لي عملتو ميتغفرش...اما زادة مانيش مستعد نخسرها...و نكمل حياتي من غيرها...عاودت كبست على يدها...نحكي
انا:أنا باش نتمسك بيك المرة هاذي...رد بالك تفكر تخليني زهرة
زهرة:نحب نرجع لتونس
أنا:أول ما ترتاح نروح بيك
زهرة:ماكش مظطر...تخلي عيلتك و تخلط عليا...نحب نبقى فترة في دار بابا...و لا اي بقعة أخرى...المهم اني نرتاح من الظغط هذا الكل
كبست على يدها اكثر...وغزرتلها في عينيها...نحكي
انا:رد بالك...نسمع الكلام هذا منك مرة اخرى...مدامني حي...بلاصتك معايا أنا و كهو...مفهوم كلامي
زهرة:كهو تعبت...نحب نرتاح شوية
انا:باهي
هزيت روحي وقفت...و نزلت عليها شوية...عاونتها تسطح...و نغزرلها فرد وقت...عديت يدي على شعرها نحكي
انا:لباس توا ؟
زهرة:احسن
انا:تحب حاجة اخرى ؟
زهرة:لا
انا:باهي...الكل هوني باش يطمنو عليك
زهرة:اووه...شنية لي صار ؟...كي عرفو لانا حبلة...ولات عندي قيمة بينهم ؟
انا:زهررة امانك...يزي عيش حبي...حتى حد ما عندو حق ينقص من قيمتك...حبلة و لا لا...الصغير لي في الثنية...ماهو باش يبدل حتى شي...و اي حد يرفضك معناها رفضني انا...حط هذا في مخك...و ما يهمك في حتى حد باهي
زهرة:ما نحب نقابل حتى حد توا...أماانك
انا:باهي لي تحب عليه باش يصير
نزلت عليها اكثر...بستها من راسها...و ترميت بجنبها عالكرسي...غزرتلي مستغربة...تحكي
زهرة:ماكش باش تخرج ؟
انا:طرد فيا ياخي ؟
زهرة:لا...اما من غير ما تضيع وقتك هوني
انا:اكا لي ترا فيه انتي
زهرة:نحب نبقى وحدي
انا:قاعد مع ولدي انا
زهرة:اتو كي يجي و اقعد معاه
انا:شمدخلك انتي ؟
زهرة:اااف منك
انا:صحيتك
قحرتلي...و دورت وجها...تبسمت عالفازة...نعرف لي غشها ماهوش باش يبرد مني بالسهولة هاذي...اما مانيش باش نسلم فيها بالساهل...نعرف الغلطة متاعي كبيرة...اما اكيد باش نخليها تسامحني...اصلا أهم شي عندي توا...لهي و ولدي لباس...و الباقي تو يتصلح بالوقت...و نظن اول خطوة باش تكون من عند سلمى باش نفهم السبب لي خلاها تقول اكاكا...بعدها باش نبعدها من هوني...نحب نرجع لحياتي قبل...حياتنا احنا و كهو
🌸🌸🌸🌸🌸🌸🌸🌸🌸🌸🌸🌸
🔸️مريم تحكي :
رميت الدبش الكل لي شراه عالارض...نغزرلو...و العصب راكبني من ساقي لراسي...ماهوش باش يفهم لأنا معاد حاجتي بحتى شي من عندو...لا توا...و لا مبعد...حتى بعد ليلة عرسنا...محسيتش روحي نقمت عليه لهدرجة ايامات تعدات بعد اكا ليلة...معادش ريتو فيها دقيقتين على بعضهم...اصلا كان يفركس على سبب يخليه يرجع لطبيعتو متاع العادة...و في رايي هذا احسن حل لينا زوز زادة...معادش نحبو يقرب مني...و لا حتى يحكي معايا...هو بعملتو...خلاني نفهم برشا حاجات...اولها السبب لي خلاه يعرس بيا...اصلا شنية توقعت منو
باش يعدي الشهور هذوما من غير ما يمسني و ما يمس حتى مرا اخرى...راهو حسام...اكيد مش باش يصبر الفترة هاذي الكل...و في الاصل حاططني عالهامش في حياتو...و عايش كيما يحب بالظبط...و مش بعيد لي حرمني منو...خلاها تعيشو...كل مرة نتذكر لأنا صدقت كل كلمة منو...ننقم على روحي اكثر...و ننقم على كل لحظة نحس فيها...اني مزلت نحبو و لا فما شي داخلي من جيهتو...و الاسوء من هكا...لقيت روحي في فراغ لا نجم نرجع لبابا لي خرجني من حياتو..من غير ما يتلفت و لا نجم نبقى معاه هوني...و انا متأكدة انو فما شكون في حياتو...و من شيرة بنتي لي في الثنية...منعرفش كيفاش باش تكون حياتها...في الوضع هذا الكل...نعرف كان نعمل اي خطوة...باش ياقف في وجهي و انا معنديش جرأة كافية...نخاطر ببنتي مهما صار فيا تنهدت بالقاوي و غزرت لساعة ياسر تأخرت من اول نهار نزلت هزيت خلعة من اللي رميتهم عالارض معنديش حل آخر...دبشي الكل ولى صغير عليا...لبست كيما جا عدلت شعري...و حطيت مكياج خفيف...نخبي بيه التعب لي بدا يظهر عليا...حسيت روحي تفرهدت شوية لبست الجيلي متاعي...و هزيت صاكي...تحل الباب بالوقت...تبسمتلي تحكي
فتحية:صباح النور
انا:صباح الخير امي
فتحية:محلى بنيتي عالصباح
انا:عيشك
فتحية:حاضرة ياخي ؟
انا:منعرفش...خايفة مننجحش المرة هاذي
فتحية:وه...فاش قام ؟
انا:هكا برك
قربت مني...حطت يديها زوز على وجهي...و تبسمتلي تحكي
فتحية:نعرفك أقوى من هكا...و باش تنجح العام هذا زادة...و بنتك باش تكون معاك...و هكا تحقق فرحتين مع بعضهم...من توا نحبك تخمم بالطريقة هاذي...كان مفما حد وراك...امك وراك
هزيتلها براسي ايه...و قربت منها اكثر...حضنتها بيديا زوز...برشا حاجات ضيعتهم في حياتي...لقيتهم عندها و كهو..حسام برغم خذا مني كلشي..أما عطاني أُم..عطاني حاجة عديت عمري الكل...نفركس عليها...اكيد مفما حد يعوض بلاصة امي...و حضن امي لي بعد السنين هذوما الكل...مزلت نحس بيه...اما حتى امي فتحية...من اول مرة دخلت لحياتهم و لا مرة حسستني اني اقل من حسام و لا محمد...بأي شكل...خذيت نفس و جبدت روحي منها نحكي
انا:باهي أمي...يخليك ليا
فتحية:صحيح قبل ما ننسى...تفضل عزيزتي
نزلت راسي شوية...نغزر للفلوس لي في يدها...جبدت روحي شوية نحكي
أنا:شنية هذا ؟
فتحية:مصروفك للاسبوع هذا عزيزتي
انا:مانيش بحاجتو...عيشك رجعهم
فتحية:اغزرلي هوني...انا قاعدة نعطي في فلوس لبنتي معناها مانيش نعمل في مزية...نعرف لقرايتك صعيبة و تحتاج فلوس...حتى حسام كان يقرا كيفك...و نعرف هذا بالقدا...كيما متأكدة...ماكش باش تاخو فلوس منو خاطرك اصلا ماكش تغزر لوجهو...على هذاك ما نحب حتى شي ناقصك
أنا:أمي أمان
فتحية:شد عيش بنتي...كان انتي تعتبرني كيما امك غير هكا...انتي لتوا تعتبرني غريبة عليك
بقيت نغزرلها...منعرفش قداش بقيت واقفة في بلاصتي مديت يدي بالسيف شديتهم عليها...تبسمتلي بالوقت تحكي
فتحية:و اكا الهامل انا نوريك فيه...منعرفش شنية لي صار بالظبط...اما قتلك و باش نعاودلك...انا باش ناقف معاك...في اي قرار...و مهما كان...نعرف لحسام غلط في حقك و برشا زادة...اما ماكش وحدك باهي
انا:أكيد أمي فتحية...عيشك
فتحية:هيا توا...ايجا معايا...لازمك تفطر قبل ما تخرج
انا:معينيش
فتحية:اما حفيدتي...عينها...باش تخليها جيعانة حتى هي
هزيتلها براسي لا...تبسمتلي و كبست على يدي...خلطت عليها بالوقت...لقيت فطوري حاضر...كي العادة...قعدت معايا...فطرنا مع بعض...عرفت لمحمد خرج بكري...اصلا من اول نهار تخرج فيه و هو يفركس على خدمة...و رفض عرض حسام...من غير ما يخمم فيه من أصلو تلفت عندها نحكي
أنا:أمي لازمني نمشي...يكفي لي ضيعتو لتوا
أمي:برا عزيزتي...ربي معاك
انا:عيشك
حسام:استنى أنا نوصلك
دورت راسي على صوتو...نغزرلو...نازل و يلبس في الفاست متاعو...استغربت...مشى في بالي...عدا ليلة عندها كي العادة...للحظة حسيت روحي تفرهدت شوية منعرفش علاه...برغم كلشي...منحبوش يعفس عليا بالطريقة هاذي...و يعيش معاها و اسمي مربوط باسمو قحرتلو و تلفتلها نحكي
انا:هاني باش نمشي توا
فتحية:باهي عزيزتي
هزيت صاكي...و عطيتو بظهري...من غير حتى كلمة خرجت من دار...نطرت الباب ورايا...معاد نحب حتى شي يربطني بيه...خرجت لطريق...مفما حتى طاكسي على أساس ناقصة انا توا...نفخت بالقاوي...كي سمعتو يزمرلي...و كملت مشيت...بقى ورايا...نزل البلار يحكي
حسام:اركب...يزي من التفوريخ هذا توا...ماكش باش تلقى طاكسي هوني الوقت هذا
طفيتو و كملت مشيت...بقى يزمر من تالي...عامل فيها بلعاني...نسمع فيه يصيح
حسام:يا مرييم اركب...يهديك...لي يتعدا يقول لانا قاعد نبزنس فيك...اركب عاد
كبست على صاكي...و حبست...قحرتلو...نحكي
انا:شيهمك فياااا أنت ؟ علااااه حتى تخلط عليا من أصلو
مد يدو...حل باب الكرهبة...و غزرلي ندرا كيف يحكي
حسام:هيا أركب
بقيت نغزرلو...قربت من الكرهبة...ضربت الباب بيدي سكرتها...و نزلت شوية نحكي
انا:مانيش باش نركب...معناها مانيش باش نركب اخطاني توا
فك الحزام بالوقت...مشيت قبل ما ينزل...في لحظة خطفني من يدي...دورني عندو يحكي
حسام:أغزرلي هوني...مزلت تاعبة...و لي تعمل فيه باش يضرك...و يضر لي في كرشك زادة...هيا ايجا
انا:و من إمتى يهمك أنت ؟
حسام:مريييم...يزززي عااد...من وقت رجعنا و إنتي عالحالة هاذي...منعرفش شنية لي صار بالظبط...اما من غير ما نعقدو الامور أكثر من هكا...أماانك
أنا:شنية المطلوب مني توا ؟
حسام:حتى شي...أما من غير الحساسية هاذي لي بيناتنا من غير سبب
أنا:من غير سبب ؟؟ علاه لي عملتو فيا أنت الكل...كان عندو سبب ؟
حسام:و إنتي قبلت بيا بلا سبب ؟
أنا:خسارتك والله...خسارة فيك كلشي عملتو على خاطرك...يزي و متندمنيش اكثر...أنت مرة برك أبعد من طريقي...و وعد مني معادش نوريك وجهي
حسام:هذا لي تحب عليه انتي ؟ تحب تحرمني من بنتي ؟
انا:بنتك ؟ كان أنت توا مخممتش فيها...باش تخمم فيها كي تجي لدنيا...يززي عااد...أنت ما عندك حتى شي عندي...اماانك يزززي
حسام:مرييم
انا:ح..حسام...أمشي من هوني
غمضت عينيا و عاودت حليتهم...نحس في النفس تسكر عليا...حطيت يدي على كرشي...نحاول نهدي روحي أما شي...في لحظة...لقيت روحي بين يديه...عدا يدو على ظهري يحكي
حسام:باااهي...باهي...اهدا...و ايجا معايا توا
كبس عليا...و رجعني معاه للكرهبة...خلط عليا...و عدا يدو على شعري يحكي
حسام:وين الفونتولين متاعك
انا:و..وفات عندها برشا
حسام:شننننوووووة...مررريم....ياخي نورمال لي تقول فيه إنتي
دوب نجمت نغزرلو...نحس في بدني الكل يعرق...صوتو و صورتو...بعدو برشا...حليت عينيا شوية شوية...لقيت روحي في حضنو...دوب غزرتلو نحكي
انا:ش...شنية لي صار ؟
حسام:حتى شي...تعبت شوية و كهو
هزيت روحي بالسيف...تعدلت في قعدتي...نغزر للفونتولين...لي حطها على جنب...عرفت لهو تصرف و شرا وحدة...و الا كنت تعبت أكثر...غزرلي يحكي
حسام:كيفاش تحس في روحك توا ؟
انا:أحسن
حسام:شرايك نرجعك لدار...إرتاح اليوم...و من غدوة تنجم تبدا
انا:ضيعت برشا...لازمني نمشي اليوم
حسام:باهي
خدم الكرهبة من غير حتى كلمة اخرى...بقينا طول ثنية ساكتين زوز...محسيتش بالوقت كيفاش وصلنا...ركا الكرهبة على جنب...نزلت من غير ما نغزرلو...خلط عليا و وقف في وجهي...غزرلي ندرا كيف يحكي
حسام:أول ما تكمل...كلمني
انا:مش لازم
قربلي اكثر...لين معادش مسافة بينا...غزر لكرشي...و عاود غزرلي يحكي
حسام:متعبش روحك...كان لزم نستناك هوني
انا:منكملش بكري و من غير ما تبقى هوني كي العساس اتو كي نكمل نكلمك
حسام:صاار ؟
انا:والله دور شوفور يناسبك اكثر من عساس
حسام:صحيتك لالة
انا:باش تخليني نمشي توا
حسام:لحظة
انا؛شفما زادة
بعد عليا شوية...حل الكرهبة من تالي...جبد صاك متاع الاوراق...و البيسي...ضيقت عينيا نحكي
انا:شنية هذا ؟
حسام:اكيد ماكش باش تقرا بلا بيهم
انا:مش لازم
حسام:مرييم حط خلافاتنا على جنب توا...تعرف لي متنجمش بلاش بيهم...ملا من غير ما تصحح راسك...و يا سيدي اعتبرهم دين...هيا عيش زين
انا:علاه تعمل في هذا الكل ؟
حسام:خاطرك مسؤولة مني...و منحبش لي صار بينا الكل يأثر على قرايتك باهي
قرب مني شوية...و مد يدو...شديتهم عليه بالسيف تبسملي بالوقت...و حط يدو على خدي...نزل عليا اكثر باسني من راسي...و جبد روحو يحكي
حسام:كان حسيت روحك تعبت و منجمتش تكمل كلمني...مكانش كي تكمل تلقاني نستنى فيك هوني باهي
انا:باهي
جبدت روحي لتالي...و تلفت عطيتو بظهري...لقيت مدام شراز تغزرلنا من بعيد...خذيت نفس و تبسمت معاها دوب تبسمتلي...و غزرت لحسام...تلفت عندو...لقيتو يسكر في باب الكرهبة و باش يركب...غزرلي بالوقت...و عاود تبسملي...قحرتلو...غمزني...زايد معاه...منعرفش منين يجيب في برودة الدم هاذي...و يحرقلي في اعصابي معاه...اول ما ركب...كملت طريقي...و لقيت روحي نمشي معاها...صبحت عليها...من غير كلمة اخرى...تبسمت تحكي
شراز:مبروك عليك...ظاهر فيك عرست
غزرتلها مستغربة...منعرفش كيفاش عرفت...مع اني من اول ما خرجت من هوني...معادش قابلتها...ضيقت عينيا نحكي
انا:كيفاش عرفت ؟
غزرت لكرشي بالوقت...وقتها استوعبت...لي جيلي بقات محلولة...تبسمت ندرا كيف تحكي
شراز:و مبروك عالبيبي زادة
انا:عيشك
دورت راسي...منعرفش علاه حسيتها تحكي معايا باستهزاء...و لا يمكن الحبالة خلاتني نتحسس من كلشي محبيتش نركز معاها اكثر...اخر همي كيفاش حكات معايا توا...دخلت للورشة..البلايص الكل محكومة على أساس ناقصة انا...جات عيني في عين وائل...دخلت بعضي من غزراتو ليا و لكرشي...منعرفش علاه...رجعت جيلي شوية...نغطي في كرشي...هز روحو وقف...و قرب مني شوية يحكي
وائل:ايجا اقعد
قربت منو بالسيف...حطيت البيسي و الاوراق على جنب و غزرتلو...نحكي
انا:عيشك
وائل:من غير مزية
هز اوراقو...و بدل البلاصة...عرفت لمزال ماخو بخاطرو مني...غمضت عينيا بالقاوي...و عاودت حليتهم...شنية عملت في روحي...علاه حتى وصلت لهوني...و خسرت كلشي على خاطرو...لي مصبرني عالدنيا الكل...بنتي لي في الثنية كهو...و الا مكنتش باش نتحمل هذا الكل عديت الساعتين هذوكا بالسيف...نحس في روحي تعبت اكثر...و حتى من الفونتولين لي شراها...خليتها في الكرهبة...اصلا منعرفش كيفاش نجمت نركز معاها حسيتها غير العادة...حتى من طريقة كلامها معايا..لميت اوراقي كيما جا...قربت مني تحكي
شراز:نعرف لي ما فهمت شي من درس اليوم
انا:صحيح
شراز:و زعمة عندك مبرر عالشهر لي محضرتش فيه
انا:لااا
شراز:بااهي
انا:شنية باش يصير توا ؟
شراز:حتى شي...اما باش يكون آخر غياب ليك...مكانش انتي تتحمل مسؤوليتك مبعد
انا:باهي...مرسي مدام عالتنبيه
شراز:من غير مزية عزيزتي...و يا ريت توصل الكلام هذا لصحبتك زادة
انا:زهرة مش باش تواجه حتى مشكلة هوني
شراز:و السبب ؟
هزيت صاكي و البيسي...و تلفت عندها...تبسمتلها نحكي
انا:راجلها باش يحل الحكاية...عمر بن قاسم نظن حتى انتي تعرفو
شراز:مش استقال
انا:اما اكيد كلمتو لتوا مسموعة...هاني باش نخليك توا مدام...الكور باش يبدا
هزتلي براسها ايه...و وخرت خطوة لتالي...باقي تغزر فيا...منعرفش شبيها اليوم...حسيت اول مرة نقابلها دخلت للكور لي وراه...اما خرجت في النص...قعدت في الجنينة...نرد في نفس...حسيت بيه قعد قدامي...غزرتلو و عاودت دورت وجهي...بقينا زوز ساكتين...لين تكلم هو يحكي
وائل:لباس ماهو ؟
انا:حمد الله و انت ؟
وائل:لباس...مكنتش نعرف لانتي عرست
انا:كهو فات كلشي بالزربة
وائل:مرتاحة معاه ؟
تنهدت بالقاوي...و هزيت روحي وقفت...نحكي
انا:لازمني نمشي توا
وائل:مرييم شفما ياخي ؟
انا:حتى شي وائل...اما من غير يلقانا مع بعض توا
مشيت و خليتو...بدني الكل يرعش...السؤال هذاكا ما نحب نسمعو من حتى حد...ضربت فيه بالقاوي...حط يديه زوز على كتافي...كبس عليا يحكي
حسام:لباس ماهو ؟
طلعت راسي غزرتلو...متوقعتش باش يجي من توا تلفت ورايا...تنهدت بالقاوي...كي ملقيتش وائل..منحبش نوحل معاه توا...نعرف باش يفسر الموضوع بطريقتو...و رغم كلشي مزلت مرتو و على اسمو...و من هوني لاكا الوقت...منحبش نغلط في حقو...برغم اللي صار الكل كبس عليا اكثر يحكي
حسام:مرييم...شبيك ؟
انا:اه...حتى شي...انا
حسام:باهي اهدا ساعة
هزيتلو براسي ايه...عدا يدو على شعري...يحكي
حسام:من بكري نكلم فيك ؟
انا:مسمعتوش
حسام:هيا ايجا معايا
جبد روحو شوية...شد عليا البيسي و الاوراق...و شدني من يدي...هزلي براسو باش نمشيو...خلطت عليه...من غير حتى كلمة اخرى...حلي باب الكرهبة...ركبت.. حط الباقي من تالي...و خلط عليا يحكي
حسام:كيفاش تحس في روحك توا ؟
انا:احسن
حسام:كيفاش عديت لي كور ؟
انا:عاادي
حسام:جيعانة ؟
انا:لا
دورت وجهي من غير ما نقول كلمة اخرى..خدم الكرهبة بالوقت...سؤال وائل لتوا يدور في مخي...تذكرت كلامو لي قالهولي اخر مرة << تعرف لانت قاعدة تغلط..قاعدة تغرق يا مريم...الراجل هذا باش يضيعك معاك...اصلا كيفاش نجمت تحب واحد اكبر منك لهدرجة >> غمضت عينيا بالقاوي...كلام بابا عاود سمعتو في وذني مرة اخرى << مانيش باش نطول معاك الحديث...كان انتي اخترتو توا...تنسى لي عندك بوك...و باش تظطر تقتلني و تترحم عليا كيما امك بالظبط...خاطر ماهوش باش يكون عندي طفلة اسمها مريم بعد توا >> حتى من كلام محمد ترسخ في مخي << حسام عندو مرا وحدة في حياتو...هي الماضي و الحاضر متاعو...حتى و معادتش موجودة توا...هو مستحيل ينجم يتخطاها و هذا واضح...انتي كنت وسيلة باش يعيش حياتو عادي اما منجحش...على هذاكا فيق على روحك و متخسرش روحك اكثر...حسام من بكري يختار الثنية لي يحس روحو مرتاح فيها>>...حطيت يدي على كرشي...حسيت روحي تخنقت...و انا نذكر في كلامو حتى هو << باش تجهض الصغير لي في كرشك...ان شاء الله متكونش وخرت برشا >> فقت من سرحتي و من هذا الكل وقت شد الفران و غزرلي يحكي
حسام:هيا إيجا معايا
دورت راسي غزرتلو...منعرفش شنية لي قاعد يصير كرهت و فديت من المد و الجزر متاعو...جيت باش نحكي...نزل قبلي...و قرب مني حل الباب...يحكي
حسام:انزل
انا:حسام رجعني لدار أماانك
حط يدو على يدي...كبس عليا...و نزلني معاه...جبدت يدي بالوقت...معادش نحبو يقربلي...مهما كان السبب عاود كبس عليا يحكي
حسام:يززي من عنادك و إيجا معايا
انا:والله تاعبة
حسام:ماكش باش تندم صدقني
انا:على أساس مانيش نادمة توا
حسام:لسانك ديما حاضر
انا:و أنت ديما تسد النفس
حسام:ميسالش...مقبولة منك المرة هاذي زادة
انا:باش نبقاو واقفين برشا هوني
هزلي براسي ايه...و كبس على يدي اكثر...دخلت معاه من غير حتى كلمة اخرى...تكيت لتالي...نغزر من الشباك نحس في حياتي فارغة...بطريقة غريبة..ما نجمت نمس حتى شي من اللي محطوط عالطاولة...غزرلي يحكي
حسام:وين سرحت ؟
انا:حتى شي
حسام:شبيك متحبش تاكل ؟
انا:قتلك مانيش جيعانة...تاعبة عاللخر
حسام:مريم...شنية لي قاعد يصير ؟
انا:حتى شي حساام...أماانك...خلينا نمشيو من هوني نحس في روحي مش قد بعضي
هز روحو شوية...مفجوع...غزرلي ندرا كيف يحكي
حسام:تحب نهزك للكلينيك ؟
انا:لا...لا...نحب نرجع لدار و كهو
حسام:باهي هيا قوم
حط الفلوس عالطاولة و قرب مني عاوني ناقف...كبست على يدو أكثر...نحس في روحي دايخة...منعرفش كيفاش وصلت للكرهبة...ركبني و خلط عليا...نزل الكرسي شوية يحكي
حسام:هكا ترتاح أكثر
انا:ب...باهي
حط يدو على جبيني...عينيه وساعت...غزرلي مصدوم يحكي
حسام:مريم عزيزتي شبيك
انا:بردانة حسام
حسام:اما هاك باش تطرشق من السخانة
غمضت عينيا بالوقت...حسيت بالفاست متاعو...لي تحطت عليا...طول الثنية و هو يحكي معايا...باش منغيبش...اول ما وصلنا للكلينيك عدا عليا الطبيب...و غزرلي يحكي
هو:شربت دواك صباح ؟
هزيتلو براسي ايه...غزر لحسام...و عاود غزرلي يحكي
هو:ظغطك عالي برشا...و أكيد فما سبب لهذا الكل...من شنية تغششت إنتي ؟
طلعت راسي و غزرت لحسام...عدا عينيه على وجهي خذيت نفس نحكي
انا:جيست من التعب...و كهو
هو:حاول ترتاح اكثر....و متتحركش برشا...و أبعد عالغش قد ما تنجم
انا:باهي عيشك
حسيت روحي تفرهدت شوية...بعد ما جينا لهوني رجعنا للكرهبة...طول الثنية و تليفونو ينوقز...غزرتلو نحكي
انا:ماكش باش تهز ؟
حسام:مش مهم برشا
انا:مممم اكا ظاهر
حسام:مفما حتى شي اهم منكم توا
انا:تحبني نصدقك توا ؟
حسام:مش مهم برشا تصدقني...يكفي لانا نعرف شنية نحب...و شنية لازم نعمل
تكيت راسي لتالي...و حطيت يديا زوز على كرشي...اول ما وصلنا...نزلت و خليتو...خلط عليا...دخل ورايا يحكي
حسام:مسمعتش شنية لي قالو طبيب
انا:لباس عليا
قربلي اكثر...هزني بين يديه...قحرتلو...نحكي
انا:فاش تعمل نزلني ؟
حسام:ششش اسكت شوية
اول ما وصل...خرجت امي فتحية من بيتها...تغزرلنا مستغرة تحكي
فتحية:شفما...مريم عزيزتي لباس ؟
حسام:الفرخة متحبش تسمع الكلام...الطبيب قال لازمها ترتاح...و متتحركش برشا...هاني باش نخليها قدامك نوصل في قضية و نرجع
فتحية:بالطبيعة ولدي
دز الباب بساقو...و دخلني لبيتنا...حطني عالسرير يحكي
حسام:رد بالك تتحرك...قبل ما نرجع
انا:شيهمك فيا...برا التهى بامورك
حسام:مريم...خمم في اللي كرشك...و يزي من صحة راس امانك
انا:ماكش باش تخاف على بنتي أكثر مني
حسام:باهي...مانيش باش نطول عليك...رد بالك على روحك
انا:باهي
اول ما خرج...تكيت لتالي...دمعة هبطت مني بالوقت منعرفش علاه...حاسة روحي تاعبة عاللخر...كل مرة نفكر في اللي صار نتعب اكثر...دخلت امي فتحية قعدت بجنبي تحكي
فتحية:شبي بنيتي...حسام عملك حاجة ؟
هزيتلها براسي لا...تنهدت بالقاوي...و غزرتلها نحكي
انا:امي فتحية
فتحية:شنية عزيزتي ؟
انا:انتي تعرف الطفلة لي كان يحبها حسام من قبل ؟
فتحية:شنية لي فكرك فيها توا ؟
انا:نحبك تحكيلي عليها
فتحية:شنية تحب تعرف ؟
انا:كلشي...وينها توا...و علاه افترقو...كان يحبها ؟
فتحية:هذا الكل ماضي عزيزتي...علاه حتى نرجعو ليه توا
حطيت يديا زوز على يدها...كبست عليها...و غزرتلها نحكي
انا:اماانك امي فتحية...ما نجم نسأل حد غيرك على الماضي متاع حسام...حتى محمد محب يحكيلي شي منو
فتحية:الطفلة لي تحكي عليها توا...عملت عاصفة في حياتنا...مش حياة حسام و كهو...تنجم تقول كنت باش نخسر ولدي جرايرها
انا:ش..شقصدك ؟
فتحية:كان مقرر يخطبها...اول ما يشد خدمة
انا:و شنية لي صار ؟
فتحية:بوها رفض...ظروفنا مكانتش هكا قبل...حسام تعب برشا...من شيرة الديون متاع بوه...لي قعدت سنين تلاحق فينا...و من شيرة محمد لي كان كيما ولدو...لي يطلبها تحضر...وقتها حطاتو بين قرارين...يتلز يخدم عند بوها...و يخرج من تونس...و لا تمشي و تخليه قالت لهي متحبش تدفن شبابها و صغرها معاه...اختارت تمشي لامريكا...و خلاتو هوني غارق في الماضي...نقم عالنسا من وقتها...متوقعتش لهو حبها لهدرجة...سيرتها تسكرت من وقتها...و معادش تحلت في دار هاذي...و كان محمد يحل فمو بكلمة عليها...تقوم عركة كبيرة بينهم...يمكن لتوا متقبلش فكرة لي هي خلاتو و مشات وقت جا بيك لهوني...و قال باش نعرس بيها..متصدقش شنية لي حسيتو...اما فرد وقت خفت عليك...خفت عليك من ولدي...خاطر كنت نعرف الماضي و تأثيرو عليه...وقفت قدامك و سألتك اذا انتي متاكدة من قرارك...شديتو مش مرة و مش اثنين اما كبش فيك وقتها تأكدت معادش تأثر على حياتو كيما قبل...اما فرد وقت...مزال متردد...يخافك تعمل كيفها...يمكن هذا السبب لي يخليه كل مرة بحال...و الحاجة لي متأكدة انو لا هي و لا اي وحدة بعدها....باش تفك بلاصتك انتي...عند حسام و لا عندنا...صدقني...هو تبدل برشا على قبل...برغم المد و الجزر لي عايش فيه...اما هو يحبك...و كان تسألني كيفاش عرفت...نقلك لانا نعرف ولدي بالقدا...و رد بالك تفكر تقارن روحك بحد...انا حكيتلك توا...باش تعرف السبب لي خلى حسام يعيش بالطريقة هاذي...نحبك قوية ديما...و متسلمش بالساهل انتي ضحيت برشا...ملا اعرف كيفاش تستغل الوضع لصالحك ديما...كان مش على خاطرك...على خاطر بنتك...باهي يا روحي
هزيتلها براسي ايه...عدات يدها على وجهي و تبسمتلي تحكي
فتحية:قولي شنية تحب تاكول...و انا باش نحضرو بيدي
انا:حتى شي
فتحية:تو نتغشش منك...يجي منو نخلي بنتي و حفيدتي بلاش ماكلة
أنا:حضر لي تحب عليه...كلشي من تحت يديك بنين
فتحية:عيش بنتي
أول ما خرجت...حطيت يدي على كرشي...نحكي مع روحي
أنا:ما ضحيت بحتى شي يا امي...انا كنت الضحية متاعو كهو...كان حسام رجع كيما قبل...معناها هي رجعت
هزيت روحي بالسيف...دخلت لبيت البانو...عملت دوش و بدلت دبشي كيما جا...حسيت باش جيني كريز اخرى حتى من الفونتولين خليتها في كرهبتو...تقويت على روحي...و خرجت من البيت...هديت على محمد...لقيتو مسطح في شورت كهو...شديت في الباب نغزرلو..طيش تليفون من يدو و وقف.. يحكي
محمد:مرييم شبيك ؟
قرب مني...شدني من يدي...كبس عليا...يحكي
محمد:مرييم...لباس ماهو ؟
انا:م...منجمتش ناخو نفس
محمد:وين الفونتولين متاعك ؟
هزيتلو براسي لا و كبست على يدو اكثر...غزرلي يحكي
محمد:وفات ؟
انا:مممم...ا..اعمل حاجة امانك
محمد:باهي اهدا...متخافش...حاول تاخو نفس ساعة حطيت راسي على صدرو....نحس في روحي تخنقت اكثر...جا باش يحكي...قص علينا صوتو من تالي يحكي
حسام:شنية لي قاعد يصير هوني ؟
جبدت روحي شوية...تلفت عندو...يغزرلنا مصدوم كبست على محمد من غير ما نحس...غزرلي بالوقت حسيت روحي تحطيت في اصعب موقف...خاصة و محمد في الحالة هاذي...كيما نعرف لماهوش باش يعدي لي صار...قرب منا شوية يحكي
حسام:شفمااااا هوني ؟ حد فيكم يجاوبني
انا:م...محمد
محمد:اهدا و حاول تاخو نفس...باهي
هزيتلو براسي ايه...جبدني من عندو...جيت في حملتو بدني ترخف بالوقت...كبس عليا يحكي
حسام:مرييم شبيك ؟
محمد:الفونتولين متاعها وفات
حسام:هوكا في الكرهبة...انزل فيسع
محمد:باهي
كبس عليا...و هزني في حملتو...حطني عالسرير يحكي
حسام:اهدا عزيزتي...اهدا
عديت يدي على رقبتي...حتى الدبش معادش طايقاتو اول ما دخل محمد...خطفها من يدو...اول ما خذيت نفس...حسيت روحي تفرهدت...عدا يدو على شعري يحكي
حسام:لباس توا ؟
هزيتلو براسي ايه...و تلفت لمحمد...لي واقف يغزرلي مفجوع...تنهد يحكي
محمد:شنية تحس في روحك ؟
انا:احسن عيشك محمد
حسام:لباس ماهو...برا البس حاجة...شنية الحالة لانت فيها ؟
محمد:والله مانيش هوني باش نقابلك انت...ملا هدي روحك احسن
جا باش يقوم...كبست على يدو...غزرلي مستغرب خذيت نفس نحكي
انا: ا..انا لي مشيت عندو...كان لازم حد يعاوني
محمد:رد بالك على روحك...نحكيو مبعد
انا:باهي عيشك
خرج قبل ما يزيد كلمة اخرى...يمكن هذا احسن شي عملو...جبدت يدي منو بالوقت...قحرلي يحكي
حسام:مش على أساس حكينا صباح...مسمعتش كلام الطبيب
انا:باش تعاركني توا ؟
حسام:مرييم يزي امانك...ماكش تضر في روحك و كهو
انا:خايف على بنتك ياخي ؟
حسام:خايف عليكم الزوز
انا:مش ذنبي اني منجمش نتنفس كيما العباد...مش هذا كلامك انت ؟
بقى يغزرلي من غير حتى كلمة...تبسمت على جنب...و عطيتو بظهري...حط يدو على شعري...يحكي
حسام:عمري ما قصدت لي قلتو...معادش نحبك تخمم في اللي صار...و لا تضر روحك بالطريقة هاذي
انا:حسام...أخرج من هوني أماانك
حسام:مانيش خارج
هزيت روحي شوية تقعدت...جات عيني في عينو قحرتلو نحكي
انا:شنية تحب مني ؟ علاه قاعد تتصرف بالطريقة هاذي ؟ ياخي مفديتش...مكرهتش...كيفاش تنجم تعيش هكا...مرة وحدة جاوبني...مرة وحدة اعطيني صرف من عدل...و قولي علاه عملت فيا هكا...علاه عرست بيا...علاه كذبت عليا بالطريقة هاذي...مش قلت لي قاعد يصير لعبة...قولي علاه دخلتني فيها...بشنية غلطت معاك...قتلك من اول...متعملش فيا هكا...قتلك متعملش فيا كيفهم...متكرهنيش فيك...وين كلامك توا وين وعودك...علاه تمشي وقت ما تحب...و ترجع كي تحس الامور خرجت على السيطرة...افهم...مرة وحدة افهم...انا معادش بحاجتك...و ما نحبك تعمل حتى شي على خاطري...و لا شي...و مدام بديت تختار في ثنيتك من توا...طلقني و خليني نمشي على روحي...خليني انا زادة نبدا من جديد...اختي و بابا ما عندهم حتى ذنب باش تهددني بيهم...اسمعني
حطيت يدي على يدو...كبست عليها...منعرفش علاه و لا كيفاش عملت اكاكا...اما معادش نجم نتحمل الوضع هذا الكل...منحبش نعيش معاه بعد توا...يزي لي ريتو لتوا...خذيت نفس...و كملت كلامي نحكي
انا:مانيش باش نحرمك من بنتك...تنجم تراها وقت ما تحب...و كيما تحب...صدقني حسام...هذا احسن حل لينا الزوز...قعدتي هوني ماهي باش تفيدك بحتى شي خلينا نطلقو بالتراضي...و ما نحب حتى شي منك...كان أنك تحررني من العقد لي بينا...و كل حد يمشي على روحو...امانك حسام...والله معادش نجم نتحمل أكثر من هكا...تاعبة عاللخر...أمانك
جبد يدو مني...قلبي دق بالوقت...بقيت نغزرلو...كنت متأكدة...لي ماهوش باش يسمعني...و باش يطفيني كي العادة...حسيت روحي تعبت من العيشة هاذي الكل نحب نبعد من هوني و كهو...حط يدو على خدي تنهدت بالقاوي نحكي
أنا:ح...حسام
نزل بصوابعو لشفايفي...سكتني...غزرلي ندرا كيف يحكي
حسام:شششش...ايجا تراه
جبدني من يدي...جيت في حملتو...بدني رعش بالوقت اول ما كبس على ظهري...يمكن هذا لي كنت بحاجتو ديما...غرس يدو في شعري...يحكي
حسام:رد بالك تفكر تخليني مرة أخرى...ماكش باش تعملها فيا مريم...كان انا خممت ناخو ثنية جديدة...انتي و بنتي باش تكونو في اخر الثنية...كان انا فكرت نهرب من هوني...باش نهرب لعندك مريم...نعرف لي وجعتك برشا و غلطت برشا...نعرف لانتي ماكش باش تسامحني اما رد بالك تمشي و تخليني...أمانك
حسيت بقلبو لي يدق بالقاوي...نعرف لهو عمرو ما حبني و لا باش يحبني و لا حتى باش ناخو بلاصتها في قلبو كيما نعرف لمستحيل نسامحو عاللي عملو فيا...أما...توا و في اللحظة هاذي منحبش نبعد عليه...ما نحب نخمم في حتى حد...لا في اللي صار فينا...و لا الماضي متاعو و حتى في شكون لي عايشة معاه توا...هزيت يديا زوز بالسيف...حطيتهم على ظهرو...و لزيت ليه أكثر...ريحتو فرهدتني بصفة غريبة...نكذب كان نقول أنا كرهتو بالرسمي...فما شي داخلي...يحب عليه...و على كل تفصيل فيه...أما مستحيل نجم نسامحو و لا حتى نغفرلو لي عملو فيا...مستحيل مزال فما شي يجمعنا بعد توا...تحل الباب بالوقت...جبدت روحي شوية نغزرلها...دخلت بعضي...و منجمتش نهز راسي في وجها تبسمت تحكي
فتحية:مكنتش نعرف لأنت هوني
حسام:أدخل أمي
فتحية:لا عزيزي...شد عليا...انا باش ننزل بحذا محمد و انت ابقى بحذاها
شد عليها صينية...طمنت عليا و خرجت...قرب مني يحكي
حسام:ماكش باش ترفض هذا زادة...ظاهر تعبت فيه...و بنتي زادة جاعت برشا
هزيتلو براسي إيه...حطها في حجري...و تبسم يحكي
حسام:باش تكملو الكل...هاني باش نعمل دوش...و نرجع
انا:باهي
أول ما دخل...نزلت عالماكلة...حتى أنا من الفطور متاع الصباح...ما كليت شي...لتوا ريحتو في خشمي...كلامو و كلام امي فتحية دخلني بعضي...معادش نعرف شنية يحب مني بالظبط...حطيت صينية من يدي و تسطحت لتالي...نعست مش نورمال...أول ما غفيت...حسيت بيه كي تسطح بجنبي...حضني بالوقت...متوقعتش باش يعاود يقربلي مرة أخرى و لا حتى نسمح لروحي نتنازل بعد اللي عرفتو...خذيت نفس نحكي
أنا:فاش تعمل ياخي ؟
حسام:نحب نرقد
أنا:تقلق فيا راك ؟
حسام:ميسالش..تحملني ليلة زادة
أنا:أنت باش تكون مرتاح اكثر في دارك
نزل بيدو حطها على كرشي...غمضت عينيا بالوقت حبيت تعلقو بيها...تنهد يحكي
حسام:انا نرتاح معاكم أكثر...معاك إنتي و بنتي..ارقد توا و ما تخمم في حتى شي آخر
كبس عليا اكثر...حسيت روحي هديت على قبل...و طمنت على بنتي...منحبوش يكرها بسببي...و لا تعيش شي من اللي عشتو انا قبل...كان انا وصلت باش نضحي بشي...باش يكون على خاطرها هي و كهو.
#زهرة🌸
#سمر_القايد💌