زهرة🌸

الحلقة الثالثة و التسعون

🔸️حلقة 93
🔸️زهرة_تحكي:
هزيت راسي نغزر للقصر...القصر لي وعدت روحي معادش ندخلو مرة اخرى...لقيت روحي شادة الثنية لثاني مرة...هوني بالظبط فما قطعة مني...قطعة من روحي...بنتي الغالية...بنتي لي حملتها مرة وحدة...و شميت ريحتها مرة وحدة...و رضعتها مرة وحدة زادة تقريب يومين تعدا بعد اكا نهار...بعد ما ريتو و شميت ريحتو هو زادة..قداش توحشتو و توحشت قربو..قداش تمنيت كان نجم نرمي كلشي ورايا و نرجع ليهم هوما زوز...تنهدت بحصرة...و قدمت بخطوة...خطوة منعرفش شنية مخبي وراها...منعرفش كيفاش باش نقابلهم عيلة كاملة مرة أخرى...و لا كيفاه باش نقابلو هو بالظبط...أما اللي نعرفو أنا و يعرفوه الناس الكل...القصر هذا ولى متاعي أنا و اللي الداخل بنتي و بالسيف عليهم..غمضت عينيا بالقاوي...و دزيت الباب الكبيرة...استغربت أكثر كي ملقيتهاش مسكرة...و على دخلتي من الباب الثاني حسيت نفس إحساس الليلة لي ولدت فيها...بلعت ريقي من الصمت الرهيب لي حسيتو...عديت عينيا على كل بقعة...مفماش تطلع وحدة منهم...و لا حتى نلمح خيال كهو...كان باش يطمني لي كلشي بخير...خوف غريب تسلل داخلي...خفت اني معادش باش نشوف بنتي مرة اخرى...قربت بخطوات رزينة للكوجينة...كلشي في بلاصتو أما مفما حتى حد...خذيت نفس نعيط على مليكة...هند...و حتى عمر أما نفس الشي...طلعت الدروج هذاكا بالزربة...و نسيت حتى الوجيعة لي مزلت نحس بيها في حزامي...حليت الباب متاع بيت هند...و دخلت نفس تسكر عليا...و أنا نغزر للبوني متاعها عالسرير مسحت الدمعة لي هبطت مني...و قربت هزيتو في يدي...كبست عليه...نشم في ريحتو البنينة...و عاودت خرجت من البيت...و ندخل لكل بيت تعرضني...بيتو بيت سلمى...حتى بيت عثمان...أما مفما حتى حد منهم...عاودت نزلت اللوطة نجري...و حبست على آخر درجة...حسيت لي معادش فيا أكثر...مديت خطواتي بالسيف...و وقفت في نص القصر...ندور في عينيا على كل تركينة...يمكن تكون بنتي مخبية غديكا...أما شي اللي قاعدة نحس فيها خلاني نتأكد انو ريحان بعيدة عليا برشا...الفشلة لي حسيتها في بدني...خلات ساقيا ترخ بيا و لقيت روحي قاعدة عالأرض...و من القهرة لي غلبتني...عيطت على بنتي...بأقوى صوت عندي...نحب الكل يسمعني...حتى هو...ضربت يديا زوز عالأرض منحبش نرجع للكابوس هذاكا...منحبش عمر يكون كيفهم...منحبوش يصدقهم و يكون ضدي...أنا بحاجتو حتى و هو بعيد عليا...بحاجة حبو باش نجم نكمل حياتي...باش نجم نعيش...ملزمش يكون كيفهم معندوش حق يحرمني من بنتي...علاش عمل هكا علاش قرر يهز عيلتو و يبعد من هوني..باهي و أنا وين ؟
علاه مخممش فيا..علاه مخممش في ريحان اللي بعدها عليا...حتى صدري لي يوجع فيا من الحليب  يخليني نحس روحي عاجزة و ما نجم نفيد بنتي بحتى شي عمر كسرني لثاني بعد طلاقنا بلا ما يحس...برغم اني متأكدة لهي بخير معاه...و احسن ما تبقى قريبة من مراد...أما معندوش حق يعمل فيا هكا اقل حاجة كان ينجم يعملها في حقي...أنو يعطيني خبر..أنو ميبعدنيش عليها مهما صار...مهما حاولت و مهما قويت على روحي فراق بنتي يكسرني ألف مرة من داخل...ضربت يديا عالارض مرة اخرى بحسرة...و أول مرة في حياتي نحس عمر ظلمني بالقرار متاعو حسيت بخطواتو لي ماشية و تقرب مني...و بجهامتو لي نزلت عليا في لحظة...حاوطني بيديه زوز...رميت روحي في حملتو معادش عندي قوة...باش نسألو علاه هو هوني...و علاش جا من اصلو...و كيفاه عرف أنو مفما حد في القصر...كبس على يدي..يغزر للجرح لي تحل كفي..دوب نجمت نخرج الحروف من حلقي
أنا:ب..بنتي مشات مرة أخرى...ملحقتش عليها...علاش عمل فيا هكا مراد ؟
كبس على يدي أكثر...حط شفايفو فوق الجرح بالظبط باسني منو يحكي
مراد:هيا قوم معايا توا
أنا:منخرجش من هوني من غير بنتي
عدا يدو على شعري...و كبس عليا اكثر...تنهد بالقاوي يحكي
مراد:ريحان ماهيش هوني...قعدتنا في القصر هذا زايدة
جبدت روحي منو...و تلفت عندو في لحظة...جبدتو من سوريتو...و حطيت عينيا في عينيه نحكي
انا:مانيش باش نبقى بعيدة على بنتي...مستحيل نبقى بعيدة عليها تسمع فيا...منعرفش شنية لازمك تعمل...أما تصرف...أنا نحب نخلط على بنتي اليوم قبل غدوة مستحيل نزيد دقيقة في البقعة هاذي يا مراد مستحيييل...أنت وعدتني من قبل...ماكش باش تضرني مرة أخرى...ماكش باش تشارك في الجريمة متاعهم مش هكا
عدا صوابعو تحت عيني...و الدمعة لي كانت باش طيح على خدي...غرقت في كف يدو...يدو لي سكرها بكل قوتو...و طلعلي وجهي بيدو لأخرى...لين جات العين في العين...نعرفها الغزرة هاذي بالقدا...غزرة تخلي أي حد تعرف لهو ماهوش ناوي على خير...أما مش هذا لي حبيتو منو...منحبش عمر يتضرر جرايري...يزيه لي تعدا على راسو من أول نهار دخلت فيه لحياتو...أما فرد وقت...حتى حد منهم...لا مراد...و لا حتى عمر..عندو حق يبعدني على بنتي مهما صار...فقت من سرحتي على صوتو لي خرج ثابت كيما كل مرة
مراد:مدامني موجود في دنيا هاذي...حتى حد...تسمع فيا زهرة...حتى حد ما عندو حق يبكيك...و لا يخلي دمعة وحدة تنزل من عينيك...انا معاك في اي قرار تحب عليه...بعد وعدك ليا انتي حرة بعد توا...و اللي يخمم ياقف في وجهك...معناها وقف في وجهي انا زادة...ماكش باش تكون زهرة و كهو...بعد توا الكبير و الصغير باش يكون تحت يدك انتي...حتى حد في دنيا ماهو باش يعفس على كلمتك...زهرتي الغالية
عدا عينيه على وجهي...و قربلي اكثر...حط شفايفو على جبيني...باسني كيما كل مرة...خذيت نفس نحكي
انا:امي شنية باش يصير فيها ؟
مراد:نرجعها لتونس...للفيلا متاعنا...أما ما نحب حتى مخلوق يعرف لهي عايشة...مفهوم كلامي
هزيتلو براسي ايه...حط يديه زوز على وجهي...ورجع بيهم لتالي...كبس على شعري...يحكي
مراد:هيا عزيزتي
أنا:نمشيو اليوم
هزلي براسو ايه...و كبس على يديا زوز وقفني معاه...و حط يدو على كتفي...يمشي فيا معاه...لقيت كرهبتو ورا كرهبة أشرف بالظبط...غزرلو يحكي
مراد:اسبقني للقصر
أشرف:باهي سي مراد
مشيت معاه لكرهبتو...حلي الباب ركبت...و خلط عليا بالوقت...في لحظة وحدة كنا في القصر...شد الفران و غزرلي يحكي
مراد:برا حضر روحك...هز لي حاجتك بيه و كهو
انا:و أمي ؟
مراد:باش نكلف شكون يجيبها...غدوة و لا بعد غدوة
أنا:علاه مش توا ؟
مراد:زهرة عزيزتي...لازم طبيب معاها...و كرهبة سبيسيال...كان تحب...نمشيو كلنا مع بعض مبعد
أنا:نمشي اليوم...عندي ثقة في اللي باش تعملو...و متأكدة لامي باش توصل بخير لتونس
هزلي براسو إيه...و قبل ما يزيد كلمة...حليت الباب و نزلت...دريكسيون لبيتي...قعدت على طرف السرير...و جبدت دوايا من القجر...شربت منو...و حطيتو داخل الصاك...الوجيعة لي في كرشي ماشية و تزيد...و عمر كمل عليا باللي عملو...أنا لتوا متعديتش لي صار...و متوقعتش حتى نقابلو في نهار كيما هذاكا...حتى بنتي مزال مفرحتش بيها...لهدرجة منجمش يحس بيا هو..توا بالظبط...نحب ناقف قدامو...نصيح و نكسر...و نضربو بعدها نترمى في حضنو كي العادة و ننسى كلشي حضنو البلاصة الوحيدة لي تبعدني عالعالم الخايب لي عايشة فيه...منعرفش شنية مزال يستنى فينا غديكا أما الوضع لي أنا فيه نحب نشوف بنتي و كهو...نحضنها نبوسها...نشم ريحتها...و نرقدها في حملتي...و الباقي الكل...تو يتحل وحدو...و كان متحلش ماهيش أول مرة...و مش آخر مرة زادة...عديت يديا زوز على وجهي...رجعت شعري لتالي...و هزيت روحي وقفت حطيت الدوا في صاكي...و هزيت المذكرة متاعي حطيتها معاهم...و حليت الفاليز...لميت دبشي لي جبتو معايا من الفيلا لاخرى...و خرجت...كلمت البون تنزلهم و مشيت بحذا أمي...طمنت عليها كي العادة...غزرتلي الفرملية تحكي
هي:مدام زهرة
هزيت راسي غزرتلها...قربت مني شوية...تحكي
هي:حبيت نخبرك قبل سي مراد
انا:شفما ؟
هي:مدام إنتصار...قاعدة تجاوب معانا شوية...عكس قبل
أنا:شقصدك ؟
هي:يعني كان تبقى عالحالة هاذي...أكيد باش تفيق في أقرب فرصة
تبسمت على جنب...و قربت منها بخطوات ثابتة...وقفت قدامها بالظبط...و مديت يدي...عدلت كول الشوميز متاعها نحكي
أنا:نعرف عزيزتي...و هذا لي قلتو توا...نعرفو أنا و إنتي كهو باهي
هي:مفهمتكش مدام...تقصد لي سي مراد ماهوش باش يعرف بتطورات هذوما ؟
أنا:بالظبط
هي:مستحيل...كان يعرف لأنا خبيت عليه...مش بعيد يقتلني
أنا: و كان خبرتو...باش يقتلك بكلمة مني
غزرتلي مصدومة...وجها مشى و جا ألوان...عرفتها خافت مني...تبسمت نحكي
أنا:نعرف لمراد...يهدد فيك بعيلتك...كيما نعرف إذا إنتي تحب تتحرر منو...مجبورة تسمع كلامي...كان أمي رجعت للحياة...إنتي تاخو حريتك...و تخدم في بلاصة أحسن من هوني...صدقني مستحيل نخمم إني نضرك مهما صار...و نعرف أنك باش تخمم في كلامي بالقدا...و متخممش تعاود منو كلمة لمراد...ماك ريت شنية ينجم يعمل بكلمة مني
هزتلي براسها باهي...تبسمت و وخرت خطوة لتالي نحكي
انا:حضر روحك...باش ترجع مع أمي لتونس في أقرب وقت...و باش تقابل عيلتك الوقت لي تحب عليه زادة وعد مني
هي:ع..عيشك مدام زهرة
قربت من أمي...بستها من خدها...و خرجت من البيت لقيتو اللوطة يكلم في شكون...أول ما شافني علق هزيت حاجبي نحكي
انا:لباس ماهو ؟
مراد:لباس...إنتي حاضرة ؟
هزيتلو براسي إيه...قرب مني أكثر...غزرلي ندرا كيف يحكي
مراد:شربت دواك ؟
أنا:شربتو
مراد:كول حاجة عالأقل
انا:مرتاحة هكا
مراد:تفضل ملا
دوب تبسمتلو...و سبقتو...خلط عليا يمشي ورايا...هزيت راسي نغزر لأشرف لي حل الباب...ركبت بالوقت...و عدلت روحي...خلط عليا يحكي
مراد:ما نسيت شي ؟
انا:لا
مراد:تنجم تمشي
أشرف:باهي سي مراد
تكيت لتالي بالوقت...نعرف ثنية بعيدة برشا...و مش بعيد يكونو هما وصلو...غمضت عينيا بالوقت...نتذكر في غزرة بنتي...و تحريكة يديها الملفوفين بالروز...و ريحتها المزيانة...تنهدت بالقاوي...مستحيل نخلي لي عشتو...تعيشو بنتي...مستحيل نحرمها مني مهما صار حتى كان خسرت العباد الكل على خاطرها...دورت راسي للبلار...نغزر للمطر لي ماشية و تقوى...لي تخلي اشرف يوقف كل شوية و يكمل...حطيت يدي عالبلار نذكر في اليمات لي عديتهم معاه...كان احلى عام نعديه في حياتي...رغم المشاكل لي فيه...أما تعديت كلشي و انا معاه و بين يديه...أما توا معادش عندي حتى الحق باش نحلم بيه...و بأياماتنا مع بعض...وجيعة تحرق فيا من داخل...عكس البرود...لي قاعدة بيه قدامو توا...تعدا الوقت الكل في الطريق و أنا كابسة عالبوني متاعها...ما نجمت نحط حتى لقمة في فمي...كان بطلوع روح...ما عاد عيني في حتى شي..كان اني نشوف بنتي و نحملها كهو...دخلنا للفيلا بعد ما طاح الليل...تلفت عندو نحكي
انا:مانيش باش نشوف بنتي ؟
مراد:أدخل توا...تعشى و إرتاح شوية...و من غدوة تنجم تمشي بحذا بنتك
أنا:أما
مراد:متصححش راسك عزيزتي...هاك ريت الجو كيفاش عملت لي تحب عليه...و رجعتك لهوني بين ليلة و نهار متخلينيش نندم لانا نتبع في كلامك أمانك
قحرتلو و حليت الباب...هزيت صاكي و نزلت ساقي أعلى من راسي...حلتلي البون بالوقت...دخلت من غير حتى كلمة...طلعت للبيت لي كنت فيها قبل...طيشت كلشي من يدي...و ترميت عالسرير...نزلو دموعي بالوقت حسيت بالباب كي تحل...تنهد بالقاوي...و قرب مني قعد بجنبي...يحكي
مراد:مش حكينا صباح على دموع هذوما
عديت يديا زوز على وجهي...و دورت راسي قحرتلو نحكي
انا:الدموع هذوما على خاطر بنتي و كهو...و باش نبقى نبكي عليها لاخر نهار في عمري
مراد:كلمة منك...و بنتك تكون بين يديك اليوم قبل غدوة
أنا:مراد...الحكاية هاذي بيني و بين عمر و كهو...منحبش بنتي وسط اللعبة هاذي مهما صار...تسمع فيا
مراد:باهي اهدا توا...و هيا قوم تاكل حاجة...متنساش الحالة لإنتي فيها يا روحي
أنا:معينيش
مراد:زهرررة
أنا:اففف باهي...هاني باش ننزل...اسبقني انت
مراد:باهي نستنى فيك
هزيتلو براسي ايه...تبسملي و خرج من البيت...تنهدت بالقاوي...و هزيت روحي لبيت البانو...غسلت يديا و وجهي...و نزلت بحذاه...نعدي في لقمة بالسيف...تفكيري الكل في بنتي...استأذنت منو و شديت بيتي مرة اخرى ليلة كاملة نتقلب في فرشي...كل مرة نغفى فيها...نفيق مفجوعة على نفس الحلمة...الليلة لي ولدت فيها متحبش تتفسخ من مخي...مع انو تعدا أسبوعين و شوية عالحكاية...اما كل ليلة نعيش نفس الوجيعة حليت عينيا على صوت المطر...و الضو لي ضرب في شباك...هزيت روحي بالسيف...دخلت لبيت البانو...عملت دوش خفيف...نشفت بدني...شيحت شعري...عملت مكياج خفيف...نخبي بيه التعب لي ظهر على ملامحي لبست سروال...و خلعة صوف...حتى الجو برد اكثر من قبل...حطيت البوني متاعي...هزيت صاكي و كبوطي...و خرجت من البيت...لقيتو في وجهي...غزرلي مستغرب يحكي
مراد:صباح الخير عزيزتي
انا:صباح الخير
مراد:وين ماشية عالصباح ؟
انا:نحب نتمشى شوية...مبعد نمشي بحذا بنتي
مراد:و إنتي تعرف بنتك وين ؟
أنا:نعرف كيفاش نلقاها مراد..اما كان تعرف وينها...تكون عملت عليا مزية
مراد:أنزل تفطر توا...لين نكلم شكون...يعرفلنا وين سي عمر
انا:متعبش روحك مراد...و منحبش نحس روحي مقيدة بأوامرك...ندخل و نخرج كيما تحب أنت...مدامك عطيتني حريتي...انا عند وعدي ليك...اللي يهمني توا بنتي و كهو...و هوكا تليفوني معايا...تنجم تطمن عليا وقت ما تحب...باهي
مراد:رد بالك على روحك
انا:باهي
كبست على صاكي...و نزلت اللوطة...رغم لي بدني تاعب اما منجمتش نصبر على فراق بنتي اكثر من هكا..النسمة الباردة...عطاتني قوة جديدة و فرهدتني...عندي برشا ممشيتش في الطريق وحدي...من غير حتى ظغط مديت يدي حبست طاكسي...و عطيتو عنوان داري منعرفش إذا مزال عندي حق نقول الكلمة هاذي و لا لا...اما أنا سكرت على أحلامي في دار هذيكا...لي عشتو معاه غادي...مانيش باش نعاود نعيشو مرة اخرى في حياتي...و من فكرة لفكرة...لقيت روحي وصلت..خلصتو و نزلت...نمد في الخطوة بالسيف...منعرفش كيفاش لميت طرف القوة لي عندي...و طلعت...أول احتمال جا لعندي لهوما الكل هوني...نعرف لعمر معندوش بلاصة أخرى يمشيلها...كان مجاش لهوني معناها في الفيرما بحذا عم طاهر...هزيت براسي لا...نهرب في الفكرة منحبش نحط احتمال لبنتي بعيدة لهدرجة...وصلت للدار بطلوع روح...دقيت مرة و زوز...أما حتى حد ما فتح...و الأمل لي جيت بيه ثنية كاملة...حسيتو ضاع في لحظة...وخرت خطوة لتالي...و جبدت تليفوني..كنت باش نطلب مراد...أما في اخر لحظة كلمتو هو..منعرفش حتى كيفاش قيدت نومروه على تليفوني...حطيت يدي تحت رقبتي...منعرفش شبيني دخلت بعضي...يمكن على خاطر بعد اللي تعدا علينا الكل...وليت خايفة نقرب منو مرة اخرى...خايفة مشاعري تغلبني...يكفيه لي تعدا على راسو جرايري...يزي ما ضحى باش يحميني من مراد...نعرف مراد مش مهددني بأمي كهو...وسط كلامو فما تهديد واضح لعمر...و لي هو ينجم يضرو في اي لحظة...اما رغم هذا الكل منحبش نعيش على بنتي منحبش نخسر الحاجة الوحيدة لي خرجت بيها لدنيا منحبش بنتي تكبر و هي تلوم فيا...كيما صار معايا بالظبط...و على صوتو...بلعت ريقي مروهجة
عمر:تفضل
خذيت نفس بالسيف...و تقويت على روحي...حكيت معاه بنبرة...عكس الغصة لي حاستها واحلة في حلقي
انا:زهرة معاك
عمر:مممم متوقع اتصالك...تستحق حاجة ياخي
كبست عالتليفون أكثر...كلامو نرفزني و دخلني بعضي أكثر...غمضت عينيا بالقاوي...و عاودت حليتهم نحكي
انا:نستحق بنتي...كان معندكش مانع
عمر:قتلي بنتك ملا ؟
انا:عمممر...مدخلش ريحان في نص اللعبة هاذي أمانك أنا ما نحب منك شي كان إني نشوف بنتي و كهو...كان مش على خاطري...على خاطر ريحان
عمر:إنتي في البلاصة الغالطة
انا:شقصدك ؟
عمر:فما كرهبة تستنى فيك لوطة
أنا:كرهبة شكون ؟
عمر:مدام تحب تشوف بنتك...نقص الأسئلة زايدة و أعمل لي نقلك عليه
انا:بنتي وينها ؟
عمر:مع بوها...خمم بالقدا...مدام تحب تشوف بنتك اسمع الكلام...و لا معادش تطلبني مرة أخرى
انا:وينها الكرهبة ؟
عمر:أخرج من الباب التلاني...تلقاها غديكا
انا:باهي
نزلت تليفون...من غير ما نزيد معاه حتى كلمة و رجعت للاصونصير...اما في لحظة بدلت ثنيتي لدروج...نزلتهم وحدة وحدة...يمكن أحسن حاجة خمم فيها توا...خاطر متأكدة لمراد مخلي أشرف ورايا...ماهيش باش تغيب عليه فازة هكا...نزلتهم درجة درجة...نسايس في روحي لين وصلت اللوطة...نغزر لكرهبة كحلة...كبست على صاكي بالوقت...منعرفش شنية لي حسيتو بالظبط هزيت راسي نغزر لشكون نزل من الكرهبة...يكون في عمر اشرف بالظبط...حل الباب من تالي يحكي
هو:تفضل مدام زهرة
هزيتو و حطيتو...قربت بخطوات رزينة...مش فاهمة لي قاعد يصير...حتى مراد مخممتش فيه...لي يهمني اني نشوف بنتي و كهو...خذيت نفس و ركبت و مع تسكيرة الباب...قلبي خض بالقاوي...مانيش خايفة...العكس كي يبدا هو في الحكاية ديما نحس روحي مرتاحة...عندي ثقة فيه لهو مستحيل يضرني...و لا يبعدني على بنتي اما لي قاهرني خوفي عليه هو بالظبط...قبل اي حد في دنيا...مستعدة نخليه و نبعد عليه...على اني نشوفو ديما متعذب و في المشاكل جرايري...حسيت ثنية طوالت...و ملقيتش جراة باش نسأل الشوفور لأول مرة نشوفو...جا في بالي برشا احتمالات...أما نعرف لي عمر ميتعاملش مع عباد ميعرفهمش...أما شنية لي قاعد يصير بالظبط ما فهمت منو شي...كبست على يديا زوز...نلهي في روحي...لين حسيت بالكرهبة حبست في بلاصة فارغة و نزل منها من غير حتى كلمة...قرب مني حل الباب...غزرتلو نحكي
انا:وين احنا ؟
هو:تفضل مدام...سي عمر يستنى فيك غديكا
هزيت راسي نغزر لدار...أول مرة نشوفها و اول مرة نجيها زادة...مشى في بالي لي باش نمشو للفيرما...اما بلاصة هكا...شيعمل فيها عمر...خذيت نفس و نزلت دخلت بعضي اكثر...كي رجع للكرهبة و طار بيها...كبست روحي و قربت بخطوات ثابتة...اول ما وصلت للباب تحل بالوقت...هزيت راسي نغزرلو...لابس سورية نوار و بونتالون كلاسيك كي العادة...عديت عينيا على وجهو و تركزت في عينيه...حالتو توا عكس الحالة لي ريتو فيها يومين لتالي...كبست على صاكي...نرد في نفس لي حسيتو تسكر اول ما ريتو...لثاني مرة نقابلو بعد الشهور لي تعدات علينا...حتى فراقنا كان احسن من اللقاء متاعنا ببرشا...فقت من سرحتي...كي رخف يدو و دخل خذيت نفس من النسمة الباردة...و خلطت عليه...رديت الباب بيدي...و قربت بخطوتين...نغزرلو...هز دبوزة في يدو...كب شوية منها في الكاسة...كلمة صدمة اقل كلمة توصف لي حسيتو...الكلام وحل في حلقي...و معرفتش شنية نقول و لا شنية نعمل...أول مرة يشرب قدامي أول مرة يعمل فازة هكا...عديت عينيا عليه...و هو ياخو في رشفة من الكاسة...حطيت يدي على رقبتي تحت شعري بالظبط...نهدي في روحي...و نحكي فرد وقت
انا:ر..ريحان وينها ؟
عمر:ارتاح الساعة
انا:مانيش هوني باش نرتاح...نحب نشوف بنتي و كهو
قرب مني بخطوات ثابتة...خلاتني نجمد في بقعتي نستنى فيه يوصل عندي و كهو...وقف قدامي بالظبط..و غزر لوجهي يحكي
عمر:شبيك مزروبة ؟
هزيت عينيا في عينيه...كبست على صاكي أكثر...نحكي
انا:نظن مش هذا موضوعنا
عمر:والله كبرت يا بنت إنتصار
أنا:بنتي وينها ؟
جبدت روحي خطوة لتالي...منحبش نوحل معاه أكثر هزيت راسي ندور في عينيا عالدار...دار كلها حطب...و قبل ما نعمل خطوة...عاودت غزرتلو نحكي
أنا:عمر...نحب نشوف بنتي...باز مجبتنيش لهوني باش تذكرني لأنا بنت انتصار
عمر:باش تشوف بنتك أما مش توا
كمل شرب لي في الكاسة...و قرب من الكنتوار باش يعبي غيرها...طيشت صاكي عالأرض...و قربت منو جبدتو من يدو...تلفت عندي بالوقت...قحرتلو نحكي
أنا:شقصدك بمش توا ؟ تكللم ؟
هز يدو...حط صوابعو على شفايفي...سكتني بالوقت يحكي
عمر:متصيحش
جبدت روحي منو...و وخرت لتالي...منحبش نضعف حتى لحظة و أنا قريبة منو...هزيت راسي في وجهو نحكي
انا:مجيتش هوني باش نتعارك معاك...أنت متعرفش بشنية خاطرت باش جيت لهوني...و شنية ممكن نخسر بالمقابل
عمر:أبهرني ملا...بشنية مهددك سي مراد متاعك
أنا:عمممر...ريحان وينها ؟ أنا نحب نشوف بنتي
عمر:واضح برشا أنك تحب تشوفها
مديت يدي استندت عالكنتوار...نرد في نفس...و قحرتلو نحكي
أنا:كان ماشي في بالك باش تحرقلي أعصابي بالطريقة هاذي...تكون غالط
عمر:مفماش علاش تحرق أعصابك عزيزتي...حتى شي ما يستهل
قربت منو فكيت الكاسة لي كان باش يشرب منها طيشتها عالارض...و هزيت يدي في وجهو نحكي
انا:إلا بنتي...تسمع فيا...منعرفش شنية لي جا في بالك و لا فاش تخمم...و لا حتى اللي باش تقولو عليا...خاطر ما عندي حتى تفسير ليك...اما مانيش باش نسلم في بنتي مهما صار...اصلا معادش عندي شنية نخسر أكثر من هكا
جبدني من يدي في لحظة...كبس عليها بكل قوتو...و رغم الوجيعة لي حسيتها...وجيعة قلبي اكثر...و الحرقة لي حسيتها ليلة لي ولدت فيها...حتى هو ماهوش باش يطفيها...كبس على ظهري من تالي...و دورني عالكنتوار حصرني من الجيهات الكل...و نزل راسو...غزرلي ندرا كيف...لدرجة حسيت انو مش هو عمر لي نعرفو...كبس على يدي اكثر من الاول يحكي
عمر:التهديد هذا مش ليا انا...و كان ولينا للخسارة...انا اكثر حد معادش عندي شنية نخسر..و مراد لي عاطيتلو قيمة كبيرة...الا ما ناخو كلشي منو و نذلو كيما نحب و اكثر
انا:فاش تستنى ملا...مدام ما عندك ما تخسر...أمشي لعندو توا...و اقتلو بعضكم...أما مدخلش بنتي وسط اللعبة هاذي...رد بالك تخلي ريحان تكون وسط هذا الكل...هيا برا توا...شنية لي مانعك
كبس عليا أكثر..لين حسيت بالنفس متاعو في وجهي جبدني معاه شوية...و دزني لتالي...وخرت مروهجة ضرب يدو عالكنتوار بقوة...لين طاحت الدبوزة عالارض وخرت اكثر...هز راسو قحرلي يحكي
عمر:اللي مخبياااااتو انتي...مانعني...اللي متحبش تحكيه...خلاني ما نجم نعمل شي...ياخي ماشي في بالك...باش نصدق المظهر لانتي فيه...نصدق لانتي تنجم تخلي بنتك من غير سبب واضح
عاود قرب مني اكثر...جبدني من زندي...و قرب وجهو لوجهي يحكي
عمر:بنتك مش بحاجة تشوفها ساااعة و تمشي...بنتك بحاااجتك...بحاجة حضنك...بحاجة حليبك...بحاجة حنانتك زادة...كان باش تجي تشوفها و تمشي...مجيش أحسن...مدام ماكش مستعدة تعيش مع بنتك أبعد عليها
دموعي تحصرو في لحظة...و كل كلمة قالها...حرقتني من داخل...جبدت روحي منو في لحظة...وخرت لتالي اكثر نحكي
أنا:ريحان بنتي...تسمع فيا....بنتي أنا و كهو...لا أنت و لا غيرك...عندو حق يقرر حياتي و حياة بنتي و مش سبب واحد كهو يخيليني ساكتة لتوا و مش مراد كهو الشرير في الحكاية
غمضت عينيا بالقاوي...تعدات نفس ليلة في راسي...و تصويرة عثمان تحفرت في مخي...خذيت نفس و عاودت حليتهم نحكي
انا:و مفماش علاش نفسرلك لي صار في غيابك...انا نحب نشوف بنتي و كهو
عمر:بنتك ماهيش هوني
انا:يعطيك صحة...هاك وليت كيفهم بالظبط...عندك حق المشكلة فيا لي صدقتك و جيتك
نزلت هزيت صاكي من الأرض...كبست عليه...قحرتلو نمنع في دموعي و نحكي فرد وقت
انا:مانيش باش ننسى النهار هذا زادة...حتى أنت مرحمتش مرا نافسة...و مرحمتش بنتك زادة...مانيش باش نلحلح بيك عمر...و مانيش باش نسلم في بنتي زادة تلفت باش نمشي...خطفني من يدي مرة اخرى كبس عليا...و دورني عندو يحكي
عمر:ياخي ساهلة هي باش نخليك تمشي هكا
انا:فاش تعمل ؟
جبدني معاه اكثر يمشي فيا...حل باب البيت...دزني الداخل...يحكي
عمر:ماكش باش تخرج من هوني...قبل ما تحكي كلشي تعرفو...يا انا..يا انتي يا زهرة
انا:لا باز هبلت على روحك انت
عمر:حمد الله نجمت تشخص حالتي و مزلت تعرف اسمي زادة
جيت باش نحكي...نحى المفتاح...و سكر الباب من برا..قربت بالزربة...ضربت الباب بيدي نحكي
انا:عمممر...حل الباب فاش تعمل ؟
عمر:كي ترجع لعقلك...يتحل الباب هذا
انا:مش قبل ما ترجع انت
عمر:متضيعش وقتك معايا
انا:باش تحبسني هوني ياخي ؟
عمر:براافو عليك...اما خلي نصححلك...بالمعنى الصحيح انتي مخطوفة
انا:براافو عليك انت...لي وليت كيف المجرمة...يااا مجرم
عمر:خدم مخك في حاجات اخرى
انا:باهي حل الباب هذا قبل
عمر:متحاولش و اسكت عليا توا...مانيش ناقصك
ضربت الباب بساقي...و تكيت عليها...منعرفش شبيه يتصرف هكا...معرفتش اذا نخمم فيه و لا في بنتي..و لا في مراد اللي ينجم يهد علينا في اي لحظة...حطيت راسي بين يديا زوز....نحب نلقى حل يخرجني من هوني و كهو
هزيت راسي...نغزر للبيت...ظاهر فيها متاع كوبل...شنية البلاصة هاذي...ووين احنا منعرفش...و لا مرة حكالي لي عندو دار اخرى...زعمة تكون متاع حسام...و لا واحد من صحابو...اسئلة بقات دور في مخي ساعة كاملة قعدت على اكا الفوتاي و قمت اكثر من مرة...نستنى فيه يرجع لعقلو اما شي...نحيت كبوطي حطيتو على جنب...دار سخونة بصفة غريبة...عديت يديا زوز على وجهي...ورجعت شعري لتالي...قربت من الباب مرة اخرى...حطيت وذني عليها...دخلت بعضي كي مسمعت حتى حركة منو...خذيت نفس و هزيت يدي...ندق عالباب و نحكي فرد وقت
أنا:عممر...عممرر...يااا عممر
نفخت بالقاوي كي مردش عليا...باقي نتحسس في اي صوت لبرا...و كملت ندق عالباب و نحكي
انا:عممر...نعرف لانت هووني...باش تخليني نحكي وحدي ياخي...عممممر
عمر:ماااكش باش تسكت معناها
انا:هاااه حمد الله عليك...مشى في بالي تقطع صوتك حل الباب هذا و خرجني من هوني فيسع
عمر:متحبش حاجة أخرى
انا:لا منحببش...أصلا فااش قام تحبسني هوني ؟
عمر:حتى تحل فمك و تحكي لي عندك
أنا:ما عندي حتى شي...و مجيتش هوني باش نتناقش معاك...جيت باش نشوف بنتي و نرجع...حللل البااااب توااا...حللل
مديت يدي نضرب في الباب بالقاوي...و نصيح فرد وقت...خاصة بعد ما جا مراد لمخي...و لي يمكن يقلب دنيا كان يعرف لأنا جيت لعمر...و قاعدين وحدنا..كبست عالبواني ندور فيه و نصيح
انا:عمممممر....يززززي من هباالك و حل الباب هذا قداااش باش تبقى حابسني هوني و لإمتى ؟
ضرب الباب بيدو...خلاني نوخر خطوة لتالي...نسمع فيه يصيح من برا
عمر:سكككر فمممك...اسككت...كلمة أخرى ما تلوم كان روحك...تحب تخرج من هوني ملا...حل فمك و رتحنا ناس الكل...و أنا تو نخليك تمشي لجهنم لي تحب عليها و ميتة باش ترجعلها
غمضت عينيا بالقاوي...عرفتو يقصد في مراد بكلامو قربت للباب بالزربة...و ضربتها بيديا زوز نحكي
انا:جهنننم شنننية لي تحكككي عليها...في بااالك رااضية باللي نعمل فيه...فرحااانة باللي قاعد يصير...أنت أكثر حد تعرف اللي نعيش فيه...امااا
ضربت الباب أقوى من قبل...و كملت كلامي...نصيح
أنا:امااا مجبوورة عاللي نعمل فيه...مجبوورة على كل خطوة...أنت...اننت بعد ما طلقتني ياااا عمممر مسلمتنيش لمراد و كهو...سلمتني لذيوبا لي برا الكل...و حتى أنت وليت واحد منهم...حتى أنت معادش نعرفك أما اللي نعرفو...معادش عندك حق عليا بعد توا...لا باش تحبسني و لا باش تخليني نحكي بالسيف عليا...حللل الباب هذا فيسع
وخرت لتالي...كي حسيت بالمفتاح دار...و على حلة الباب...هزيت راسي نغزرلو...للحظة خفت من تعابير وجهو...مش مستانسة بيه هكا...و منحبش نشوفو في الحالة هاذي زادة...نعرف كي يفقد اعصابو معادش يعقل...أما لي نشوف فيه توا...عبد اخر قدامي...طلع حاجبو يحكي
عمر:ملا حتى أنا وليت واحد منهم ؟
أنا:شنية تسمي لي تعمل فيه أنت ؟
عمر:شنية ؟
أنا:أنت جااوبني...ريت روحك كيفاش وليت...أنت كنت هكا قبل ؟
عمر:اسأل روحك قبل ما تحل فمك و تحاسبني
انا:مااانيش نحااسب فيك...و ميهمنيش فاش تخمم فيا أما زادة مانيش لعبة عندك عمر
عمر:تحب تكون لعبة في يدو ملا ؟ هذا لي ريتو مناسب انتي ؟
قربت منو...ضربتو بيديا زوز على صدرو...و هزيت راسي قحرتلو نحكي
انا:ما نحب نكون لعبة في يد حتى حد منكم...انااا كهوو نحب نعيش حياة هادية مع بنتي...تفهم فيا عمر مع بنتي و كهو
شدني من يدي كبس عليا...و جبدني عندو اكثر...لين معادش فما مسافة بيناتنا...و غزرلي في عينيا يحكي
عمر:اللي تحكي عليها...بنتي أنا زادة...تسمع فيا بنتي...و ماهيش باش تعيش من غيري
هزيتلو براسي لا...من غير ما نزل عينيا على وجهو منعرفش حتى كيفاش خرج معايا الكلام
انا:انت ماكش عمر لي نعرفو
عمر:بربي ؟
انا:عمر لي نعرفو يحس بيا بلا ما نحكي كلمة وحدة عمر لي نعرفو انا يخمم فيا و في بنتو قبل روحو...عمر لي نعرفو ميكبسش على يدي بالطريقة هاذي...و ميهددنيش زادة...توا بالظبط وليت نسخة من مراد...و معادش فما فرق بيناتكم
جبدت يدي منو...بعد ما حسيت بيدو لي ترخفت...و وخرت خطوة لتالي...نغزر لملامح وجهو لي تكبست اكثر...أما منجمتش نسكت على كلامو...و الحالة لهو فيها...منحبش نبقى بين نارين...أمي و بنتي...منحبش نختار بيناتهم...كل لي حبيتو منو انو يفهمني و كهو قربت من الفوتاي باش نهز صاكي...جبدني في لحظة جا وجهو مع وجهي...نزل عليا اكثر يحكي
عمر:إنتي تحب تقتل عمر بيدك...إنتي لي ديما تختار خوفك من مراد...على أنك تختار تحط يدك في يدي ياخي في بالك نجم نتحمل لي قاعد يصير...في بالك ساهلة برشا الحكاية...مرتي و أم بنتي عايشة مع راجل يحبها...و يحب عليها
قربلي أكثر...و وخر بيا لتالي...لين ضربت في القارد روب...غمضت عينيا من أنفاسو لي حرقتني في وجهي و من شفايفو لي دوب تحطو على شفايفي...إحساس عندي عليه برشا...كمل كلامو لي حرقني أكثر ما يبردلي قلبي
عمر:أنا قاعد نموت بالعرق زهرة...قاعد نموت في كل ثانية و كل دقيقة...تبدا إنتي بحذاه...كل مرة يحط عينو و لا يدو عليك...أعرف لإنتي تقتل فيا...ملا كيفاش تحبني نحس بيك و انتي معاه...تكلم ؟
حليت عينيا نغزرلو...نمنع في دموعي لي تحصرت منحبهاش تنزل...و تخلي صورتو تغيب عليا...هز يدو لأخرى حطها على خدي...و نزل راسو شوية...عدا خشمو على رقبتي...و نزل عليها شوية بشفايفو...لي خلى بدني الكل يتكبس...و أنا محصورة بين يديه...و قبل ما نقول حرف...هز راسو شوية...حط شفايفو على وذني يحكي
عمر:حس بيا زهرة...حس بيا و أعطيني سبب واحد يخليك تبقى عندو...سبب واحد كهو ميخليكش ترجعلي و نوعدك باش نخرجك من عندو في أقرب فرصة
انا:ع..عمر
عدا لحيتو على خدي...و قرب لشفايفي مرة أخرى يحكي
عمر:يا روح عمر
هزيت عينيا في وجهو...نعرف منجمش روحي في حضورو...نعرف لقربو يهدني...و يضعفني مهما قويت كبس على جنبي...و لز ليا أكثر...و قبل ما يغطس في شفايفي...نوقز تليفونو بالوقت...منعرفش شنية كان باش يصير بعد دقيقة وحدة..يمكن حبيت كان مسمعش تليفونو...كان مطلبوهش من أصلو...للحظة كنت نحب نعيش نفس الإحساس متاع كل مرة...و لي تحرمت منو شهور كاملة...تنهد بالقاوي...و جبد روحو شوية...جبد تليفون من مكتوب سروالو...رميت عيني عالاسم...تسكر عليا النفس بالوقت...و أنا نقرا فيه...و كمل عليا كي هز عليها يحكي
عمر:شفما سلمى ؟
خذيت نفس بالجهد...و تقويت على روحي باش نمشي دور يدو على كرشي...و حبسني بالوقت...هزيت راسي قحرتلو...رجعني لتالي يحكي
عمر:ارجع لدار توا...انا نحل الموضوع
علق عليها من غير ما يزيد كلمة أخرى...هزيت راسي قحرتلو نحكي
أنا:ظاهر فما برشا حاجات لازم تحلها...أمشي من توا و متضيعش وقتك معايا...حتى أنا عندي ما نعمل
حط يديه زوز عالقارد روب...حصرني من الشيرتين هزني و حطني يحكي
عمر:قولك باش نخليك تمشي ؟
انا:أكيد ماكش ناوي تخليني هوني حياتي الكل
عمر:كان لزم...إيه باش نخليك
انا:أما هاك طلعت مشغول...و مانيش مجبورة نبقى في الغابة هاذي معاك
عمر:باهي ريض روحك ساعة...و خلينا في موضوعنا
أنا:معجبكش موضوع سلمى ؟
تبسم على جنب...كرزني أكثر...قربت منو...ضربتو بيدي لصدرو نحكي
انا:ياسر تضحك الحكاية مش هكا ؟
مد يديه زوز باش يحطهم على وجهي...حبستو بالوقت نحكي
انا:قبل شهور من توا...كان سلمى مكانتش في حضنك مكناش وصلنا لهوني
جبدت روحي منو...رجعت شعري لتالي...و نزلت بيدي حطيتها على كرشي...نحكي
انا:كلم شكون يرجعني...لازمني نمشي توا
عمر:زهررة
انا:نحب نمشي و كهو
منعرفش علاه غاضتني الفازة منو...أول ما تذكرت لي صار ليلتها في الحبس...و من بنتي لي خرجتها بيديها زوز من غير ما تسأل عليا...خلاني ننقم عليها أكثر من قبل...قربلي أكثر...طلعلي راسي بيدو يحكي
عمر:غايرة من سلمى إنتي ؟
انا:مفما حتى شي يخليني نغير منها...مش إحنا مطلقين توا...برا عرس بيها و ارتاح
عمر:و نخليك ؟
أنا:ماك خليتني بالأساس
عمر:تعرف بالقدا لأنا مخليتكش
أنا:مممم واضح برشا
عمر:زهرررة...يزززي من تخلويص متاعك
أنا:مااانيش نخلوض...أما قبل ما تحاسبني...حاسب روحك...أصلا أنا المجنونة لي جيت عندك بساقيا
هزيت صاكي و كبوطي..باش نخرج...وقف في وجهي يحكي
عمر:قبل ما تحل فمك...أنسى تخرج من هوني
أنا:عممر
عمر:المرة هاذي كان اخترت مراد...بالرسمي باش تشوف عمر آخر..حتى الحب متاعي ليك ماهوش باش يشفعلك عندي
خلاني واقفة في بلاصتي و خرج...سمعت صوت المفتاح كي دار مرة أخرى...قربت من الباب مرة أخرى نحكي
أنا:عممر افههمني أماانك...كان نبقى هوني أكثر...باش تصير كارثة...صدقني أنا ما نجم نخاطر بحتى حد...و ما نجم نحكي حتى شي...أماانك حاول تفهمني...و نوعدك نخبرك كلشي كي يلحق الوقت...عمممر
تنهدت بحصرة...حطيت صاكي و كبوطي عالفوتاي مرة اخرى...نخمم في مراد...ضرب تليفون في راسي...جبدتو من صاكي...دخلت بعضي...بعد ما لقيتو مكلمني اكثر مرة...ما جات حتى فكرة لمخي...كان إني نعاود نكلمو و نهديه قبل ما يعمل اي خطوة...و قبل ما نكلمو نوقز في يدي...خذيت نفس و هزيت عليه نحكي
انا:شفماا مراد ؟
مراد:وينك لتوا ؟
أنا:مع بنتي كان معندكش مانع
مراد:الدنيا باش تظلام...خبرني وينك تو نجيك
انا:نجي وحدي...و أصلا كان احتجت توصيلة...نطلب أشرف
مراد:زهرررة
أنا:تليفون باش يطفى مراد...و أنا نحب نعدي وقت اكثر مع بنتي...متخافش مزلت عند وعدي ليك
مراد:مش لازم كل شوية تذكرني عزيزتي...كي نحب نعرف حاجة ماهيش باش تصعب عليا
أنا:باش نعلق توا
مراد:ساعة أخرى و أرجع...نستنى فيك يا روحي
نزلت تليفون و علقت عليه بالوقت...و كملت سكرتو بالوقت...حطيتو من يدي...و كبست على شعري...نرد في نفس...حسيت بوجيعة صغيرة في كرشي...خلاتني نقعد عالسرير...منعرفش شنوة باش نعمل...مستحيل نقنع عمر توا...و مستحيل نجم نرجع في ساعة زادة كان انا عديت اكثر من ساعتين باش وصلت لهوني تكيت لتالي..و جبدت المخدة بيدي...خذيت نفس من ريحتو لي معبية السرير...غمضت عينيا بالوقت...نحس في راسي رزين عاللخر...و رغم لي قاعد يصير...أول مرة بعد شهور نرتاح بعد ما نحط راسي على مخدة
حسيت بالباب لي تحل...أما ما نجمت نعمل حتى ردة فعل...قعد بجنبي و مد يدو...بعدلي خصلات شعري لتالي...يحكي
عمر:هيا قوم تاكل شوية
أنا:منحبش
عمر:بدنك مزال تاعب...هيا قوم...و حط كلشي صار على جنب
أنا:اخطاني عمر
تنهد بالقاوي و تمد بجنبي...قربلي أكثر...حط راسو عالمخدة متاعي...أنفاسو لي ضربت في وجهي...خلات قلبي يخض بالقاوي...صوابعو لي سرحت على خدي
خلاتني نغمض عينيا بالوقت...و نعاود نحلهم...نثبت في تفاصيل وجهو...مع الضو لي داخل من الصالة...للحظة نسيت لي صار الكل...حتى مراد تفسخ من بالي جملة حبيت الدقايق هذوما...يكونو لينا إحنا و كهو...نحب ننسى كلشي...و نلقى ذكرى أخرى حلوة تجمعني بيه
هزيت يدي بلا ما نخمم مرتين...حطيتها على خدو نمشي في صوابعي على لحيتو...و دمعتي لي كانت محصورة...نزلت بالسيف عليا...مسحها بالوقت يحكي
عمر:خرج كلشي داخلك زهرة...احكيلي كلشي يوجع فيك...خبرني بكلشي صار في غيابي...علاش الخوف هذا الكل من مراد...قول كلشي و مانيش باش نخليك ارجع لعندي...و نوعدك لماهوش باش يقربلك مرة أخرى يا روحي
نزلت بصوابعي شوية...حطيتهم على شفايفو...نحكي
أنا:باهي...يززي اسككت...معادش تقول كلمة أخرى أمانك
عمر:مترجعش عندو...خليك معايا زهرة...خليك معايا...و نوعدك ماهوش باش يفرقنا مرة اخرى
أنا:منجمش...صعيب برشا نتخلص من مراد
عمر:علاه ؟ أعطيني سبب واحد كهو
أنا:مراد يجري في دمي كيما السم...منجمش نتخلص منو يا عمر...منجمش نتخلص منو كان معاك أنت افهمني أماانك
عديت عينيا على وجهو...على لمعة عينيه لي تحصرو بدموع في لحظة...كبست على خدو نحكي
أنا:ا..أنا بحاجتك باش نجم نعيش...بحاجتك باش نجم نواجه مراد كل يوم و كل لحظة...اما ما نجم نطلب منك شي...كان أنك متنسانيش...متخلينيش عمر
نزلت بيدي شوية...حطيتها على صدرو...نتحسس في دقات قلبو...الوجيعة لي حسيتها...بقوة الغصة لي واحلة في حلقي...لدرجة معادش نعرف فاش نعمل...و لا شنية لي قاعدة نقول فيه...غزرتلو بحرقة نحكي
أنا:متخرجنيش من هوني...متخرجنيش من قلبك مهما صار يا عمر...مهما بعدت عليك...متخرجنيش من هوني يكفي لأنت تحبني...يكفيني باش نواجه مراد
قربتلو أكثر...لين معادش مسافة تفصلنا...غزرت لعينيه و كبست على صدرو نحكي
أنا:قولي لي باش تبقى تحبني مهما صار...قول أنك باش تخليني في قلبك...و ماكش باش تخرجني...ماكش باش تنساني خاطرني بعيدة عليك...ماكش باش تحرمني منك و من بنتي...قول لانا معاك و هذا يكفيني عممر..قولي نحبك و أنا باش نكون قوية ديما رغم...رغم كلشي...أمانك...أمانك...ع..عمر
بقية الكلام ضاع بين شفايفو...منعرفش كيفاش و وقتاش...أما لي نعرفو...أنو رجعلي الاحساس لي نعيشو معاه ديما..رجعلي الأمان لي فقدتو من شهور...من بوسة وحدة كهو..اول ما جبد روحو باش يحكي..كبشت فيه اكثر...و رجعت بستو...بستو بقوة الوجيعة و القهرة لي في قلبي...بكل خوف اني نخسو من نهار ريت سلمى في حضنو...و من نهار وقعنا على طلاقنا...كبس على خدي...و شفايفو...من شفايفي تحطت على جبيني...و يدو من شعري...تعدات لظهري...كبس عليا في حضنو بكل قوتو...يحكي
عمر:حتى كان الدنيا الكل وقفت في وجهي...مانيش باش نخرجك من قلبي يا زهرة...مهما صار بيناتنا مستحيل نتنازل عليك
كبشت فيه أكثر مع كلامو تالي...حضنتو بكل قوتي...و غرست راسي في رقبتو...منحبش نفكر في حتى شي..لا في مراد...و لا في بوه...و لا حتى شنية ممكن يصير بعد ساعة من توا...يكفيني قربو باش نجم نقاوم أكثر تكفيني الطاقة لي ناخو فيها من حضنو...و من لمستو و من ريحتو زادة...شهور تعدات...حسيت روحي جهامة بلا روح...و كان مش بنتي لي كانت في كرشي...كنت باش نهبل وقتها...غرس يدو في شعري...من غير ما يقول حتى كلمة اخرى...حتى انا هذا لي بحاجتو توا بحاجة حضنو...لي يخبيني على ناس الكل...بدني ترخف و شهقاتي هدات...تعدا الوقت...من غير ما نحس عليه...و انا محصورة بين يديه زوز و في حملتو...حتى هو مبعدش عليا...و مجبدش روحو مني رغم لي صار يمكن زوز بحاجة بعضنا توا...منعرفش...منعرفش اذا لي قاعد يصير حلمة و لا واقع...و منعرفش شنية مزال مخبي في حكايتنا...و وسط الأفكار هاذي الكل نوقز تليفونو مرة أخرى...لي خلى قلبي يخض بالقاوي جبدت روحي شوية...نغزرلو...أول وحدة جات في بالي...أنو سلمى عاودت طلباتو...هز روحو شوية تقعد قعدت في جرتو نغزرلو...عدا يدو على شعرو و هز يحكي
عمر:شفما يووونس ؟
خذيت نفس أول ما تأكدت أنو مش هي...رجعت شعري لتالي و انا نسمع فيه يحكي
عمر:باهي...خلي عينك عليه
علق عليه و تلفت عندي...مديت يدي مسحت دموعي نحكي
انا:شفما ؟
عمر:مراد في طريقو لهوني
بقيت نغزرلو من غير حتى كلمة...الإحتمالات الكل دارت في مخي...و أولهم أمي...أمي لي نسيتها و انا معاه..أمي لي نجم نخسرها في أي لحظة...أصلا منجمتش نخمم كيفاه عرف البلاصة هاذي...قص عليا...كي هز روحو خرج من البيت...منعرفش حتى كيفاه خلطت عليه وقفت وراه نحكي
أنا:لازمني نمشي من هوني عمر...لازمني نمشي قبل ما يوصل...أعمل حاجة أمانك
عمر:نظن ماهيش باش تكون فرصة أحسن من هاذي خليني نفهم منكم زوز اللي قاعد يصير
غمضت عينيا بالقاوي...نحاول نلقى حل...حل يخرجني من هذا الكل...حسيت بوجيعة في كرشي...خلاتني نكبس عليها بالوقت...دورت عينيا عالصالة...منعرفش إمتى نظفها من القزاز...قربت منو بالزربة...شديتو من يدو قبل ما يتلفت...نحكي
أنا:كان صار و مراد لقاني معاك هوني...و في الوقت هذا وحدنا
عمر:شنوة باش يصير...لهدرجة خايفة منو إنتي ؟
أنا:مانيش خايفة عمر...مانيش خايفة منو...أما
عمر:أما شنية ؟
انا:كان صار و مراد عرف هذا الكل...باش يحرمني من أمي مرة أخرى
بقى يغزرلي من غير حتى كلمة...صدمة ظهرت على وجهو...مع برشا أسئلة قاعد يفركسلها على أجوبة...و هو يغزرلي...يمكن تسرعت في اللي قلتو...أما عندي ثقة لماهوش باش يقول حتى كلمة لمراد...وخرت خطوة لتالي نحكي
أنا:ا..أمي عايشة عمر
عمر:زهررة...واعية للكلام لي تقول فيه ؟
أنا:أماانك افهمني...صدقني توا و بعدها أعمل لي تحب عليه...أما لازمني نمشي من هوني...كان يعرف لانا في دار معاك...و كان يعرف لانا خبرتك زادة...متاكدة باش يقتلها...و انا منجمش نخاطر بيها بعد توا...مانيش باش نطلب منك اكثر...جيست خليني نمشي قبل ما يوصل لهوني...أمانك
عمر:كيفاه عايشة ؟
أنا:منجمش نحكي أكثر من هكا...أما هاك عرفت السبب لي مخليني مع مراد...والله ماني نكذب عليك يا عمر خليني نمشي توا
قرب مني في لحظة...كبس على وجهي بيديه زوز...يحكي
عمر:مستحيل نكذب كلمة انتي تقولها...انا باش نخرجك من هوني...اما تأكد الحكاية ماهيش باش تاقف هوني نهاية مراد على يدي أنا
جبدت روحي منو بالوقت...من غزرتو لي تبدلت في لحظة...عرفتو لي ماهوش ناوي على خير جملة...و اكثر حاجة كرهتها فيه...غزرة الحقد...و شخصيتو الجديدة...منحبش عمر يخسر روحو...جراير الكلب مراد...رجعت للبيت بالزربة...باش نهز صاكي و كبوطي...جات عيني عالفرش...قربت بالزربة...عدلتو كيما كان في الاول...هزيتهم في يدي...و خرجت عندو...حتى هو لم الصالة في لحظة...كانو مفما حد كان فيها...لبس كبوطو...و غزرلي يحكي
عمر:هيا ايجا
هزيت السندويتش لي محطوط عالكنتوار في يدي ضيق عينيه يحكي
عمر:فاش تعمل ؟
انا:كان نخلوه هوني يعرف لكنا هوني
لفيتو في البابيي و حطيتو في صاكي...قربت من الباب...سبقني كي جبدني من يدي...يمشي فيا معاه قحرتلو نحكي
أنا:شفما زادة ؟
عمر:نقص حسك و أمشي...عشر دقايق كان مش أقل تلقاه في وجهك
أنا:شباش نعملو ملا ؟
عمر:تعرف شنية تعمل ؟
أنا:شنوة ؟
عمر:أسكت و كهو
كبس على يدي أكثر...و خرجنا من الباب تلاني...يمشي فيا بالزربة وراه...هزيت راسي نغزر للغابة لي باش نضيعو فيها...كبست على صاكي نحكي
أنا:عممر...شنوة لي قاعد يصير...عالحسبة هاذي باش نضيعو هوني...هذا لي جا في مخك أنت...تخرجنا للغابة
حبس في بلاصتو...و تلفت عندي...يحكي
عمر:مش تحب تهرب منو...هاني نطاوع فيك...مدامك مسكرة فمك...و تقول كلشي...قاعدة تقطر في الكلام بالحرف...ما خليتني نعرف منو حق و لا باطل...شنية تحب أكثر ؟ تحبني ناقف قدامو و نقولو شد هزها معاك...و ما صار شي بيناتنا ؟ راك مرتي زهررة...مرتي أنا...و اللي نعمل فيه توا...فوق قلبي...أما جيست باش نحمي أمك...و منخليكش تحس بالذنب...متستناش مني أكثر...خاطرني منجمش نتراجع و لا نتنازل لمراد بعد توا...مفهوووم كلاامي ؟
بقيت نغزرلو...كيفاه يهز و ينفض...باش يطرشق...عرفتو غار من مراد كي عادتو...أما مقصدتش لي قاعد يدور في مخو...خذيت نفس نحكي
أنا:مقصدتش لي فهمتو الكل أما
عمر:شننوووة ؟
انا:منجمش نمشي أكثر من هكا...م..موجوعة
غزرلي مستغرب...مديت يدي حطيتها على كرشي وجيعة في حزامي روهجتني...غمضت عينيا بالقاوي نرد في نفس...جيت باش نحكي...قص عليا...كي قرب مني...هزني في حملتو...غزرتلو مصدومة...نحكي
أنا:فاش تعمل ؟
عمر:باش تكون لباس...طمن
دورت يديا زوز على رقبتو...كبست عليه بكل قوتي...و شيعت راسي وراه...نتأكد لي مفما حتى حد لاحقنا...و من ضو دار لي شعل...كبست عليه أكثر...نحكي
أنا:اجرري عممر...ظاهر فيه وصل...و باش يلحقنا
عمر:ماكش باش تسكت معناها
أنا:لهدرجة ولى يقلقك كلامي...عندك حق...انا الغالطة لي جيت عندك من الأول
عمر:أستغفر الله يا ربي
انا:بااهي...هاني سكت
حطيت راسي على كتفو...نشم في ريحتو...منعرفش كيفاه بقى محملني ثنية كاملة...دورت راسي نغزر لطريق...لي بدات تبان...نزلنا بالوقت...و على تلفيتي ريت الكرهبة لي جيت بيه صباح...شدت الفران بالقاوي كبس عليا و حطني عالارض...و نزل راسو...غزرلي ندرا كيف...ضو القمرة ما غطى على شي من غشو...حل الباب يحكي
عمر:اركب
مديت يدي بالسيف عليا...عديتها على خدو...تنهد بالقاوي يحكي
عمر:أركب زهرة
وخرت خطوة لتالي...و ركبت...خلط عليا...ركب بالوقت يحكي
عمر:أمشي
يونس:باهي سي عمر
دورت راسي غزرتلو بالوقت...الفازة ذكرتني بمراد...أصلا من إمتى عمر كان هكا منعرفش...تكى لتالي...يحكي
عمر:شافك كي بدلت طريق ؟
يونس:لا...نظن عرف الخبر...أنو المدام زهرة في المنطقة هاذي...و برغم مفما حتى دار أخرى هوني...أكيد باش يجي عندكم
عمر:باهي...يعطيك صحة
يونس:من غير مزية...وين طريقنا سي عمر ؟
عمر:للفيلا
يونس:باهي
انا:فيلا شنوة لي تحكيو عليها
دور راسو...قحرلي باش نسكت...أما منجمتش نسكت و هو ماشي و يزيد...خذيت نفس نحكي
أنا:ما نحب نمشي لحتى بلاصة أخرى...يزي لي صار قبيل...كان ملقناش هوني...تو يلقانا في بقعة أخرى
عمر:متحبش تشوف بنتك ؟
سكت على كلامو تالي...قلبي لي خض بالقاوي...و صورتها لي تعدات بين عينيا...خلاتني نسكت...يكفي إني نشوفها دقيقة و كهو...قص عليا صوت أفكاري يحكي
عمر:تو نعطوه إشارة لإنتي في الفيلا مع ريحان...أكيد ماهوش باش يشك فيك طمن
عديت عينيا على وجهو...منعرفش علاش رجع كيما قبل و اكثر...هزيتلو براسي ايه...من غير حتى كلمة...و تكيت لتالي...حليت صاكي و جبدت سندويتش لي حضرو قبيل...دور راسو غزرلي...قحرتلو نحكي
أنا:جعت...خاطر سيادتك...حابسني نهار كامل
غزرلي بشطر عين...و دور وجهو...نفخت بالقاوي...و كملت ناكل...حضرو كيما نحبو بالظبط...تبسمت على جنب...و رجعت شعري لتالي...ثنية كاملة و هو دوب يغزرلي و يدور وجهو...حتى مراد...لي يمكن قاعد يلاحق فينا مشى من مخي...منعرفش...كيفاه تعدا الوقت و وصلنا...نزلت من الكرهبة بالوقت...هزيت راسي نغزر للفيلا...تي هاي طلعت اكثر من كلمة فيلا...تلفت نغزرلو لقيتو يحكي مع شوفور متاعو..شنوة لي قاعد يصير...و منين ليه الفلوس هذوما الكل منعرفش...و محاولتش نسألو زادة...منحبش نعرف عمر جديد منحبش نفهم لي قاعد يصير...وقف ورايا يحكي
عمر:إيجا معايا
خلطت عليه بالوقت...و مع حلة الباب و دخلتنا...لقيت عثمان قاعد في صالة...كانو ما صار شي...ظاهر فرح بالعيشة هاذي اكثر...و اول ما جات عيني في عينو قربلي بالزربة يحكي
عثمان:شتعمل هااذي هوووني ؟
عمر:أنت مدخلش روحك بابا
هز راسو يغزر لأمو و سلمى...و كمل كلامو...يحكي
عمر:حتى حد منكم ما عندو الحق يحكي معاها كلمة تجي لهوني الوقت لي تحب عليه...و كيما تحب زادة ريحان بنت زهرة...و نتوما زادة تقبلو هذا
هزيت راسي نغزرلو مصدومة...متوقعتش باش يقول الكلام هذا على خاطري...غزرلي يحكي
عمر:هيا إيجا
سبقني لدروج...هزيت راسي غزرتلو...قربت منو شوية نحكي
أنا:أنت ما ريت حتى شي مني سي عثمان...حتى الفيلا هاذي و باش نخرجك منها...أصبر عليا و كهو
تبسمت على جنب و تعديت في وجهو...اللي صار قبل كان أول خطوة كهو...إلا ما نخليه يخلص لي عملو فيا دوبل...طلعت وراه بالظبط...غزرلي يحكي
عمر:ريحان في بيت هند
أنا:وينها البيت ؟
عمر:على يدك
كمل كلامو و دخل للبيت لأخرى...تنهدت بالقاوي...دقيت مرتين و حليت الباب...جات عيني عليها...غزرتلي مصدومة...قربت مني بالزربة حضنتني بالقاوي...تحكي
هند:زهرررة...أحسن شي جيت
انا:عيش أختي...شنية أحوالك ؟
هند:لباس لباس...إيجا تشوف بنتك
حطيت الصاك من يدي...و قربت من سرير...نغزرلها تهز في ساقيها و تبكي...قعدت بجمبها نحكي
أنا:شبيها صغرونتي ؟
هند:كنت باش نبدللها الكوش
أنا:هات عليك...أنا نبدل لبنتي
نزلت عليها...بستها و خذيت نفس من ريحتها...نحيت كبوطي...و قربت ليا...فرحت مش نورمال...و انا قاعدة نبدللها لاول مرة...ياسر محلاها صغرونتي المزيانة منجمتش نهز عينيا عليها...لبستها دبشها...و عاودت بستها...نسمع في هند تحكي
هند:ريحان بحاجتك يا زهرة...بحاجتك إنتي و كهو
انا:حتى أنا بحاجة بنتي يا هند
بدات تبكي بالوقت...عرفت لهي جاعت...ريت هند باش تهز بيبرون وقفتها نحكي
انا:خلي عليك...تو نرضعها أنا
عدلت روحي...و هزيتها في حملتي...و كي العادة مرة زوز...باش نجمت ترضع...كبست بيدي على يدها الصغرونة...نبوس فيها فرد وقت...تبسمت تحكي
هند:ظاهر عاملة جو مع امها
انا:أكيد يا روحي
هند:حكيت مع عمر ؟
انا:مممم...اما موصلنا لشي...اهم شي ميعرفش لي صار في الوقت الحالي
هند:طمن عزيزتي...هاني باش نمشي نطل عليه و نخليكم مع بعضكم شوية
انا:باهي عيشك
اول ما خرجت...نزلت راسي نغزرلها...بستها من يدها نحكي
أنا:حتى حد ماهو باش يبعدني عليك يا روحي...حتى حد ماهو باش يفرقني عليك بعد توا...منعرفش شنية لي مزال باش يصير...اما مستحيل نسلم فيك يا عمري
تبسمت كي ريتها رقدت...وليت نحسب الوقت و أنا معاها...عدلت روحي و تكيت لتالي...كبست عليها في حملتي...منجمتش نبعد عينيا من وجها...معاد نجم نفكر في حتى حد و هي في حضني...لا في عمر...و الحالة لي وصل...لا في مراد...لي باش يهد علينا في أي لحظة معاد يهمني حتى شي في دنيا...كان اني نقعد دقيقة اخرى مع بنتي...و نستمتع بالاحساس لقاعدة نحس فيه خاطرني نعرف لي جاي صعيب برشا...و اللي مزال مخبي اكثر من اللي تكشف...أما لي رتحني و عطاني طاقة جديدة...الكلام لي سمعتو من ليلة...لي قالو و لي مقالوش زادة...و من هوني لين تفيق أمي...باش نخلي مراد يعمل لي نحب عليه أنا و كهو.
#سمر 💙