زهرة🌸

الحلقة مئة و الثانية و الثلاثون

🔸️حلقة 132
🔸️مريم_تحكي:
حليت عينيا شوية شوية...هزيت روحي تقعدت...و عديت يدي على كرشي...تبسمت و انا نتحسس في صغاري...رغم متعداش برشا وقت...اما حسيت كرشي خرجت غير العادة...كبست على شفايفي...و انا نغزر للفطور لي حطو عالتابل دونوي قبل ما يمشي...حطيتها على حجري...و مديت يدي...جبدت تليفوني و طلبتو شوية و هز عليا يحكي
حسام:فقت قطوس
انا:مممم صباح الخير
حسام:صباح الحب
انا:شبيك مشيت بكري ؟
حسام:خدمة يا روحي
انا:معناها باش نعدي نهار وحدي هوني
حسام:مريم عزيزتي...كمل فطورك توا...و حضر روحك نكمل لي في يدي و نجيك...باهي هكا ؟
انا:بالرسمي ؟
حسام:ملا يا عمري...من غير ما تقلق روحك
انا:باهي يا روحي فيسع
حسام:مريم
أنا:شنوة ؟
حسام:رد بالك على روحك...و خلي الفونتولين متاعك في يدك...باهي
أنا:متخافش يا روحي...انا مليحة...جيست صغارك جاعو و يحبو ياكلو
حسام:صحة لعمري و ليهم...اما اعمل لي قتلك عليه منحبش صغاري يعذبوك
أنا:باهي حبي طمن
حسام:عيش صغرونتي
نزلت تليفون من يدي...و عديتها على كرشي...نحكي معاهم
أنا:نعرف طولت عليكم...مممم شنوة حضرلنا هوني سي حسام...يظهرلي بدا يتعلم حتى هو
كملت فطوري...و هزيت روحي لبيت البانو...ريقلت أموري و بدلت دبشي...تعودت على الدار بصفة غريبة و لا نقول حسيت بحب حسام عكس قبل...و لقيت روحي نعيش في اللي تحرمت منو قبل...حطيت مكياج خفيف هزيت تليفوني...و رجعت خطوة لتالي...هزيت الفونتولين في يدي...تبسمت على خاطرها أكثر حاجة يوصي بيها...بعد ما حبلت...نزلت اللوطة...ضيقت عينيا على صوت الباب...حطيتهم من يدي على الطاولة...و تبسمت نحكي
انا:زعمة يكون وصل بالسرعة هاذي
خذيت نفس و قربت من الباب...مديت يدي كبست على البواني و حليتها...جات عيني في عينها...آخر وحدة توقعت نشوفها...و لا تاقف عند بابي...دقايق تعدات...لا هي تكلمت و لا انا نجمت نسألها...حتى منجمتش نخمم في السبب لي خلاها تجي لهوني...خذيت نفس...نحكي
أنا:شراااز ؟
تبسمت على جنب و هي تغزرلي...كبست على البواني و قحرتلها...نحكي
أنا:شتعمل هوني ؟
شراز:هكا تستقبل ضيوفك
أنا:أكيد ماكش تستنى فيا نرحب بيك
شراز:أنا نرحب بروحي ملا
جيت باش نحكي...دزتني بيدها و دخلت...خلطت عليها مروهجة من الفازة متاعها....وقفت وراها...نحكي
أنا:شراااز....أخرج من هوني احسنلك
شراز:هدي روحك عزيزتي...يظهرلي قعدتنا مطولة
أنا:يزززي كهو...يزززي...أخررج علياااا
حطيت يدي على كرشي..نرد في النفس...حسيت روحي بديت نتخنق...قربت من الطاولة باش نهز الفونتولين متاعي...سبقتني هزتها في يدها...غزرتلها مستغربة نحكي
انا:فاش تحاول تعمل ؟
شراز:نحاول نفهم شنوة الفرق بيناتنا ؟
أنا:شراااز...لي تعمل فيه غالط
شراز:إنتي سرقت مني حياتي
أنا:ما سرقت منك حتى شي...إنتي لي اخترت ثنيتك وحدك
شراز:أما رجعت...رجعت على خاطرو هو...رجعت خاطرني و لا مرة نسيتو
نزلت راسي نغزر لتليفوني...لي ينوقز...تبسمت على جنب...و هزاتو في يدها...تحكي
شراز:كان يطلبني بنفس الطريقة ديما...كان يحبني أنا أما انتي فسدت كلشي
أنا:يززززي كهووو...يزززي...إنتي تعديت حدودك معايا شراز...أنا ما فسدت عليك حتى شي...و توا تفضل أخرج من داري
طيشت تليفوني من يدها على الأرض...و قربت مني شوية...غزرتها خلاتني نوخر خطوة لتالي...هزتني و حطتني تحكي
شراز:دارك ؟ لتوا مزلت مصدقة لي هو يحبك...كنت و باش تبقى وسيلة يعبي بيها الفراغ لي في حياتو
غمضت عينيا بالقاوي...و عاودت حليتهم...نرد في نفس ورا بعضو...غزرتلها نحكي
انا:ش..شراز...أعطيني الفونتولين متاعي
شراز:شنوة ؟ مقدرتش تتنفس يا روحي
كبست على كرشي...من الوجيعة لي حسيتها...قربت مني أكثر تحكي
شراز:آه...متكونش حبلت مرة اخرى ؟ ياخي في بالك باش تربطو بالصغار إنتي
أنا:ا..أخرج عليا...أحسنلك
شراز:ماكش في وضع يسمحلك تهدد
وخرت خطوة لتالي...قعدت على طرف الفوتاي...حسيت روحي تخنقت أكثر...و منجمتش حتى نغزرلها...قربت مني...قعدت على الطاولة مقابلتني...تحكي
شراز:سنين لتالي كنت كيفك بالظبط...كنت عاشقة فيه حبيتو من أول مرة...رغم الظروف لي تعدينا بيها الكل أما حبنا كان اقوى...كان الكل يعرف بيه...تعرف علاش خليتو ؟
نزلت راسي منحبش نغزرلها...فرد وقت نهدي في روحي على خاطر صغاري...جات عيني على السكينة لي حاطتها في سروالها...كبست على شعري في لحظة...و هزتلي راسي تحكي
شراز:على خاطرني خفت عليه...خفت بابا يعملو حاجة عرست و بعدت عليه باش يكون هو مرتاح...تحملت راجل آخر عشر سنين...عشر سنين كنت نرقد و نفيق جنبو...عشر سنين عديتهم و أنا نبكي عليه كل ليلة...و كل لحظة حسيت فيها إني بحاجتو...غاضتك بنتك مش هكا ؟
انا:س..سيبني...أبعد عليا شراز
شراز:أنا زادة خسرت ولدي...ولدي كان عمرو 3 سنين ولدي لي كنت نحبو يطلع كيما حسام بالظبط...رغم مكانش منو...أما حتى هو مشى و خلاني
أنا:ش..شراز...لي تعمل فيه غالط...أنا ما عندي حتى ذنب في اللي قاعدة تحكي فيه توا
شراز:معندكش ذنب...أما كنت و باش تبقى الحاجز الوحيد بيناتنا
مديت يدي شوية...باش نفك الفونتولين منها...بعدت يدها...و ضحكت تحكي
شراز:منجمتش تتنفس عزيزتي
أنا:ش..شراز...يزي...أصلا حسام في ط..طريقو لهوني
كبست على شعري أكثر...غمضت عينيا بالقاوي...و عاودت حليتهم...قحرتلي تحكي
شراز:يا ريت...عالأقل يولي العرض كامل
حاولت نجبد روحي...اما بدني محبش يطاوعني أنفاسي خنقتني و خلاتني عاجزة...دوب نجم نركز مع كلامها...حطت يدها على كرشي...عينيا وساعو من الفازة...نطرتلها يدها نحكي
انا:ر..رد بالك...رد بالك شراز
شراز:خايفة على صغيرك ياخي ؟
انا:ت..تعرفشي حاجة...إنتي انسانة مريضة...حتى لتوا حايرة كيفاش حسام نجم يغزر لوحدة كيفك
غمضت عينيا على صوت الكف...منعرفش حتى كيفاش مدت يدها و ضربتني...كبست على كرشي...نحس في روحي باش ندوخ...متوقعتش باش نعيش هذا الكل...و لا حتى نعاود نقابلها مرة أخرى...حتى حالتها أسوء من قبل و منحبش نغيب على الوعي...خاطرني خايفة على صغاري...خايفة منجمش نحميهم و نخسرهم كيما خسرت بنتي قبل...شطر تركيزي قعد مع السكينة...حتى منجمتش نعرف في شنوة قاعدة تخمم بالظبط جبدتني ليها أكثر تحكي
شراز:كان حطيت في مخك لانتي ربحتني...غالطة حسام كان و باش يبقى ليا انا و كهو
انا:ك..كان نجمت ترجعو ليك...متقصرش...حتى مانيش مظطرة باش نتحداك...على خاطرني مانيش نرا فيك من اصلو...و اللي عملتو توا ماهوش باش يتعدالك
لميت طرف القوة لي عندي...و نطرتلها يدها من شعري بعدتها عليا...و حطيت يدي على رقبتي...نرد في نفس هزيت راسي نغزر لحسام لي دخل على غفلة...حتى الراجل لي وراه منجمتش نثبت فيه و لا نعرفو شكون خذيت نفس طويل نحكي
أنا:ح..حسام
أنا ما قرب مني...حسيت بالسكينة لي تحطت على رقبتي...و هزت روحها من الطاولة...قعدت بجنبي على الفوتاي...هز يديه شوية يحكي
حسام:شراااز...فاش تعمل ياخي ؟
شراز:هي سبب في كلشي...أنت سلمت فيا مرة أخرى على خاطرها
حسام:شراز...نزل من يدك...و أبعد عليها
شراز:خفت عليها ياخي ؟
نزل راسو غزرلي...عرفتو يطمن فيا...كبست على كرشي أكثر...نسمع فيه يحكي
حسام:باهي...نزل من يدك توا و خلينا نحكيو
شراز:نحكيو ؟ على شنوة حسام ؟ نظن عصام حكالك على كلشي...مش هكا راجلي الغالي
عصام:شراااز...يزي...سيب الطفلة...لي تعمل فيه غالط
شراز:هاك أنت رميتني في المصحة من غير ما تسأل عليا...في رايك هذا مش غالط
عصام:شراز...هيا عزيزتي...خلينا نمشو من هوني
انا:ح..حسام
حسام:متخافش عزيزتي
شراز:إنتي تسكر فمك
حسام:شراز...وين تحب توصل ياخي ؟ علاش تعمل في هذا الكل ؟
شراز:نحب نعرف علاش اخترتها عليا...علاش هي ؟
حسام:نزل السكينة...تو نحكيو
شراز:على شنوة بالظبط...انا خليت كلشي على خاطرك حسام...ضحيت بكلشي عندي...باش نرجعلك
حسام:نعرف...نعرف لانتي عملت برشا على خاطري...اما لي تعمل فيه توا غالط
شراز:أنت لتوا مجاوبتش على سؤالي
حسام:باهي شراااز...باهي...مش إنتي لي خليتني قبل
شراز:مخليتكش...ظروفي جبرتني...الراجل لي قدامك توا جبرني...و خلاني معاه عشر سنين كاملة
حسام:شقولك نحكيو في كلشي صار مرة أخرى
شراز:أنت مزلت تحبني أنا...أنت اخترتها جيست باش تقهرني مش هكا
حسام:صحيح...أنا لتوا مزلت
سكت شوية...و عدا عينيه على وجهي...كبست على كرشي أكثر...منجمتش نركز معاهم...و لا حتى نتحمل اكثر من هكا...تنهد بالقاوي يحكي
حسام:مزال حاجتي بيك شراز...اما طريقتك هاذي ماهي باش تحل حتى شي
شراز:أما هوكا حبلت منك مرة أخرى
حسام:مش صحيح...ماهيش حبلة
دورت راسها غزرتلي ندرا كيف...و عاودت غزرتلو تحكي
شراز:منحبش نرجع معاه
حسام:ماكش باش ترجع معاه...أنا و إنتي باش نمشيو من هوني
شراز:ب..بالرسمي...باش نمشيو من هوني مع بعضنا
حسام:وعد عزيزتي...هيا سيبها توا...و الا باش دخلنا في دوامة جديدة...ياخي تحب تباصي على خاطرها انتي
هزتلو براسها لا...قرب منا شوية...مدلها يدو...رخفت السكينة على رقبتي...و حطت يدها في يدو...جبدها مني بالوقت...مديت يديا زوز...عديتهم على رقبتي حسيت أنفاسي الكل تقطعت...غمضت عينيا و عاودت حليتهم...نغزرلهم...ترمات في حضنو بالوقت...مد يدو شوية شوية...فك السكينة من عندها...طيشها على الارض من غير ما ينزل عينيه مني...جبدها من عندو شوية يحكي
حسام:عصام...هز مرتك من هوني
شراز:ح..حسام
جبد روحو منها...هز الفونتولين متاعي...و قرب مني قعد بجنبي...عاوني ناخو نفس...و يحكي فرد وقت
حسام:هيا يا عمري...هيا عزيزتي
شراز:حساااام...سييبني أنت...سيبني
حسام:الجماعة في طريقهم لهوني...كان متحبش ترجع للبلاصة لي كنت فيها...أخرج من داري توا شراز
شراز:ماكش باش تسلم فيا مرة أخرى
عصام:هيا عزيزتي...يزي كهو...خلينا نمشو من هوني
بقيت نغزرلهم من غير حتى كلمة...مصدومة من اللي صار معايا دقايق لتالي...دموعي لي كنت حاصرتهم نزلو ورا بعضهم...كبس على يدي...يحكي
حسام:وفات يا روحي...هاني معاك توا
دورت راسي غزرتلو...قربتلو بالوقت...دورت يديا زوز على رقبتو...و غرست راسي فيها...نحكي
انا:خ..خفت برشا حسااام...خفت منها...خفت نخسر صغاري مرة أخرى
كبس على ظهري بيديه زوز...لين عدم المسافة بيناتنا و غرس يدو في شعري...يحكي
حسام:سااامحني يا روحي...سامحني على خاطر خليتك تعيش هذا الكل
كبست عليه اكثر...دموعي نزلت على رقبتو...حاول يجبدني من عندو...كبشت فيه...خايفة نشوفها مرة أخرى...عدا يدو على طول ظهري...يحكي
حسام:وفاات يا عمري...سيبون مشات من هوني
جبدت روحي شوية...هزيت راسي نغزرلو...عدا صوابعو على خدودي...يمسح في دموعي...و يحكي فرد وقت
حسام:مرريم...اغزرلي هوني يا روحي...ساايي وفات هدي روحك عيش حبي
شهقاتي منعتني باش نرد عليه...عاودت تخنقت مرة أخرى...كبس عالفونتولين مرة أخرى يحكي
حسام:هيا عزيزتي...هدي روحك
خذيت نفس منها...و حطيت راسي على صدرو...كبس عليا في حضنو يحكي
حسام:شنية عملتلك ؟
انا:ض..ضربتني
حسام:شنوووة ؟
انا:ش..شنية تحب عندي حسام...علاش جاتني لهوني
حسام:بعد موت مراد...عصام دخلها للمصحة..على خاطر حالتها تعبت أكثر...و اليوم خرجت على غفلة منهم...هذا لي خلاه يجيني لسوسيتي بعد ما عرف...كان متاكد لهي باش تجي عندك...سامحني على خاطرني طولت عليك
انا:ح..حسام...نحب نطمن على صغاري
حسام:كيفاش تحس في روحك ؟
أنا:م..موجوعة
كبس على وجهي بيديه زوز...و نزل عليا شوية...يبوس فيا من وجهي...و يحكي فرد وقت
حسام:باش تكون مليحة يا عمري...و صغارنا زادة...هدي روحك و متخافش
انا:ن..نحب نطمن عليهم
حسام:تنجم تمشي ؟
هزيتلو براسي ايه...كبس عليا و عاوني ناقف...يسايس في كل خطوة نعملها معاه...منعرفش كيفاش وصلت للكرهبة...ركبني و خلط عليا...حطيت يديا زوز على كرشي...حط يدو فوق يديا...يحكي
حسام:متخافش يا روحي...باش يكونو بخير
هزيتلو براسي ايه...نرد في نفس فرد وقت...كبس على يدي...و جبدني عندو يحكي
حسام:ايجا عندي
حطيت راسي على صدرو...قربو خلاني نهدا شوية...و نفيق من الصدمة لي كنت فيها...عديت الثنية الكل نسمع في كلامو...لين وصلنا...دخل معايا مزهبل حسيت بخوفو و توترو لي حاول يخبيه عليا...دقايق لي عداتهم الطبيبة و هي تفحص فيا...كبسة يدو هي لي كانت مصبرتني عليهم...دورت راسي على صوتها تحكي
هي:كلشي لباس...الزوز بخير...حتى هاني نشوف فيهم هوني...تحبو تسمعوهم
حسام:أكيد
كبس على يدي...و عدا يدو لأخرى على شعري...هزيت عينيا في الايكرون...نغزرلهم و نسمع في دقات قلبهم وقتها برك...نجمت ناخو نفس...شفايفو لي تحطت على جبيني...هداتني أكثر...تبسم يحكي
حسام:لباس يا روحي ؟
هزيتلو براسي ايه...مد يدو جبد البابيي...مسحلي كرشي...و قعدني...يعدلي في دبشي...رجعلي شعري لتالي...ضيق عينيه يحكي
حسام:شنوة هذا ؟
عدا صوابعو على رقبتي...فوق الجرح...مبهم...خذيت نفس نحكي
انا:ح..حسام...لباس عليا
حسام:شبيني مريتوش الجرح هذا قبيل
انا:حسااام
كبست على يدو...نهدي فيه...على خاطر طبيبة حست لي فما شي...تنهد بالقاوي...و كمل عاوني...فكرة انو صغاري لباس...اهم من كلشي عندي توا...كملت رونديفو متاعي...و خرجت...من غير ما نفلت يدو...اول ما ركبنا...دور راسو غزرلي...يحكي
حسام:متاكدة لي إنتي لباس ؟
انا:لباس يا روحي...مدام صغاري لباس
بعدلي خصلات شعري...و عدا صوابعو فوق الجرح بالظبط...تنهد بالقاوي...يحكي
حسام:يوجع فيك ؟
انا:لا...جيست يحرق فيا شوية
غمضت عينيا...على حطة شفايفو فوق الجرح بالظبط دوب باسني...و هز راسو شوية...باسني من شفايفي يحكي
حسام:سامحني على خاطر خليتك تعيش هذا الكل...يا روحي
انا:انت ما عندك حتى ذنب في اللي صار حسام
حسام:إيجا عندي تراه
حطيت راسي على صدرو...غرس يدو في شعري يحكي
حسام:شنية لي صار قبل ما نوصل ؟
انا:ماشي في بالها...أنت خليتها جرايري...و هبلت اكثر كي حست لي انا حبلة...خفت منها برشا حسام...حتى مكنتش نعرف لي هي كانت في المصحة
حسام:و انا مكنتش نعرف زادة...راجلها وقت عرف لي هي هربت جاني بالوقت...يمكن هذا لي خلاني نلحق على بكري
انا:وين هزها ؟
حسام:على حد علمي باش يسفرها معاه...و الا مكنتش باش نعديلها لي صار
انا:ماهيش باش ترجع مرة أخرى
حسام:مستحيل يا عمري...المهم انتي كيفاه تحس في روحك ؟
انا:ثلاثتنا بخير...طمن
حسام:ملا نهز مرتي ترتاح توا
جبدت روحي منو...و عوجت فمي...ضيق عينيه مستغرب...قحرتلو نحكي
انا:مش على أساس باش تعدي نهار معايا...و لا معادش عينك
حسام:منحبش نتعبك يا روحي
انا:أنا مليحة والله
حسام:باهي...وين تحب تمشي صغرونتي
انا:أول شي...إحنا جعنا...معناها مجبور باش توكلنا مرة أخرى
حسام:تدلل يا عمري
انا:مممم بعدها...باش توفي بوعدك...و تعدي نهار معايا
حسام:مممم باهي...اما انا زادة عندي شرط
انا:شرط شنية حسام ؟
عدا صوابعو على خدي...و حط يدو لأخرى على كرشي يحكي
حسام:نعرف لانتي تعلقت بيهم...و أنا نفس الشي...أما منحبكش تتلهى عليا
انا:حسام ؟ ياخي غاير من صغارك ؟
حسام:منعرفش...اما منحبكش تتلهى عليا و كهو...خاطرني نضيع من غيرك
مديت يدي...غرستها في شعرو...نضحك و نحكي فرد وقت
انا:مانيش باش نتلهى على روحي...ياخي انا نجم نبعد عليك...تي هاك وليت ادمان بالنسبة ليا
حسام:صاار يا فرخة
انا:تحب تتأكد ياخي
حسام:و كيفاش نتأكد زعمة ؟
قربتلو شوية...و هزيت روحي شوية...بستو من رقبتو نحكي
انا:صحيح صغارك عندي...اما يحبو عليك بصفة غريبة و في كل لحظة
كبس على يدي...نزلها شوية...باسني منها...و تبسم يحكي
حسام:نهز حبي تاكول...مدام جاعت...احسن ما ترصالنا في حاجة أخرى...و احنا في البركينغ
انا:زايد معاك عزيزي
حسام:بربي ؟
حسام:ايجا هوني...ايجا
جبدني عندو شوية...حطيت راسي على صدرو...باسني من جبيني...و خدم الكرهبة...كبست عليه بيديا زوز محاولة مني...باش ننسى لي صار معايا الكل الصباح يمكن هاذي كانت آخر مرة نقابل فيها شراز...صحيح كليت فجعة منها...اما لي يهمني...صغاري و حسام معايا...و اني نجمت نتعدا آخر ثغرة من غير ما نخسر حتى شي...هزيت راسي شوية...نغزرلو...مش مصدقة بعد اللي تعدينا بيه الكل...باش تكون هاذي نهايتنا نهاية نجمت نتعدا بيها الماضي...و حسام القديم...و موت بنتي...نجمت نخلق نهاية...لبداية جديدة...غمضت عينيا على شفايفو لي تحطت على شفايفي في لحظة
تبسمت بالوقت...و عديت يدي على كرشي...نتحسس في وجودهم...تنهدت براحة...و غمضت عينيا...معاد نحب نخمم في حتى شي...من غير عيلتي الصغيرة و كهو.
#زهرة🌸
#سمر_القايد💜