🔸️حلقة 34
نزلت يدي شوية...نحاول نهدي روحي قد ما نجم خذيت نفس و تلفت عندها...نغزرلها...برشا كلام نحب نقولو في وجها و نرتاح...نحبها تبعد من هوني مرة اخرى و معادش ترجع جملة...عديت عينيا على وجها لتوا تفاصيلها صغيرة مزالت محفورة في مخي أما رغم هذا الكل...فما برشا حاجات تبدلت...حاجات داخلي أنا عمري ما ستنيتها ترجع...و لا بنيت حياتي على أساس هي باش تكون فيها...حبيتها صحيح...كانت اول حب و اول عشق في حياتي...خليت كلشي على خاطرها...و عملت كلشي زادة...اما هي اختارت الثنية هاذي...هي لي حبت تمشي و تبعد...و مستحيل كان مزلت نخطي خطوة وحدة على خاطرها...قربت مني شوية...عدات عينيها على وجهي...نظرة جديدة مريتهاش عندها من قبل...تعبر على برشا حاجات...سبق و خليتهم ورايا...و معنديش استعداد...باش نتلفت جملة...فيقني من سرحتي...صوتها لي خرج مرة اخرى مخنوق...و ببرشا وجيعة
شراز:ح حسام لباس ماهو ؟
تبسمت على جنب...سؤالها استفزني و ضحكني فرد وقت...هزيتها و حطيتها نحكي
انا:لباس...و انتي ؟
شراز:منعرفش اذا باش نجم نجاوبك و لا لا...أصلا معادش نعرف نحكي معاك شي...بعد السنين لي تعدات الكل
انا:علاه فما حاجة نسيت تقولها من قبل ؟
شراز:ح حسام...ا أنا
أنا:إنتي و لا شي...و من غير ما تعب روحك...الكلام لي باش تقولو زايد
بقات تغزرلي ندرا كيف...ريت لمعت عينيها...شادة دموعها على شعرة...جيت باش نتلفت...قصت عليا مريم...كي قربت تجري...و تحكي فرد وقت
مريم:مدام شراز...من قبيل نفركس عليك أنا...هوكا الخدمة لي وصيتنا عليها...و صحبتي باش تخلط علينا الأسبوع هذا
غزرتلي ندرا كيف...دورت وجهي بالوقت...نغزر لمريم مدت يدها شدتهم عليها تحكي
شراز:باهي عزيزتي
مريم:حسام...مدام شراز تقري فينا في بلاصة عمر
انا:باهي هيا نمشيو معادش فما وقت
مريم:باهي...نخليك توا مدام شراز...سامحني كان عطلتك
شراز:لا عزيزتي طمن
تبسمتلها و قربت مني وقفت قدامي بالظبط...قحرتلي خاطر حكيت معاها بالطريقة هذيكا...طلعت راسي نغزرلها بعدت خطوتين علينا...رميت يدي...حطيتها على ظهرها جبدتها عندي...لصقتها فيا...نحكي
أنا:شبيك ؟
حطت يديها زوز على صدري...دز فيا لتالي بالشوية خايفة من شراز تشوفها...تحكي بصوت دوب يتسمع
مريم:س..سيبني الله لا تربحك
أنا:تعرف كل مرة إنتي تتصرف بالطريقة هاذي...يجي في مخي برشا حاجات متنجمش تستخايلهم
مريم:بالطبيعة خاطرك واحد ساقط...هامل و متحشمش
هزيت يدي...بعدت خصلات شعرها على وجها...نحكي
أنا:ششش سكر فمك احسنلك
مريم:سيبني راك باش تفضحني يا ربي...سيبني و الا نلم عليك ناس الكل
تبسمت على جنب و رخفت يدي...لقيتها ديجا بعدت غريبة محسيتش بيها...خاطرني ركزت مع الفرخة هاذي برشا...خذيت نفس نحكي
انا:اركب
مريم:مستحيل كان مزلت نولي معاك
انا:هيا فيسع...متخلينيش نعمل حاجات تندم عليهم مبعد
مريم:اعمل لي تحب عليه
جات باش تمشي جبدتها من يدها...حليت الباب و ركبتها...خلطت عليها...خدمت الكرهبة بالوقت و طرت بيها...طيشت صاك من يدها...تحكي و تصيح
مريم:مجنووووون ياخي...جاوبني مجنون انت و لا شنوة...شنية التصرفات هذوما...وين باش توصل كي تفضحني قدام العباد...ياخي ماك ريتها و تعرفها لهي البروف متاعي...يجي لي عملتو قدامها
شديت الفران بالقاوي...و تلفت عندها...قحرتلها نحكي
انا:متصيحش
مريم:و هاني صحت شباش تعمل...شعندك تعمل اه...حل فمك ؟
هزت يدها...تضرب فيا على صدري...باقي تحكي و تصيح
مريم:متغزرليش اكاكا...جاوبني ياخي مجنون أنت عندك إنفصام في شخصيتك...شنية الحالة لي أنت فيها كان منجمتش تتحكم في روحك...برا عدي عند طبيب تو يفيدك...ناقصني كان ان ..
قصيت عليها الكلام...كي جبدتها من يدها بالقاوي...و غطست في شفايفها...أصلا تسكت كان بالطريقة هاذي عينيها تحلو صفاحي...كيف كل مرة...منعرفش علاه كل مرة نقربلها لهدرجة نحسها سبيسيال برشا..حاجة غريبة تتحكم فيا و تخليني منجمش نبعد عليها...كبست على يدها اكثر...و هزيت يدي لاخرى...حطيتها على رقبتها من تالي...كبست عليها..هزت يدها...حطتها على صدري تبعد فيا لتالي...شي اقوى مني خلاني نحب عليها أكثر كل مرة تكبس على صدري بيدها...ننزل عليها أكثر جبدت روحي منها...كي حسيتها تخنقت هزت راسها شوية...غزرتلي مروهجة...تحاول تاخو نفس...بقيت نغزرلها...نثبت في تفاصيل وجها...عينيها لي دوب تغزرلي بيهم...شفايفها محلولين شطر...القلوس تنحى منهم...شعرها داخل بعضو...منعرفش علاه بقيت نثبت فيها بالطريقة هاذي...جيت باش نحكي...نطرت يدها مني...و وخرت لتالي تحكي
مريم:مجنون...انت واحد مريض...مستحيل تكون عبد نورمال...الله لا تربحك يا ساقط
تخرج في الكلام بالسيف...متحبش تغزرلي...دخلت بعضها أكثر...عرفت روحي تسرعت معاها اكثر...عديت يدي على وجهي بغزول...جيت باش نحكي...قصت عليا...كي حلت الباب و نزلت من الكرهبة...خلطت عليها بالوقت..أصلا معنديش وقت باش نخمم في اللي عملتو باقي تمشي و كهو...جبدتها من يدها...دورتها عندي ضربت فيا بالقاوي...كبست عليها نحكي
انا:فاش تعمل ياخي ؟
مريم:نحي يدك...سيييبني...أصلا أنا الغالطة من الأول خاطر قبلت نركب معاك...نسيت أنو اللي كيفك يفكرو كان في الحاجات هذوما
أنا:مرييييم
مريم:سييييبني قتلك...أفهم...حاول تستوعب...انا مانيش كيما لبنات لي تعرفهم حسااام...رد بالك مزلت تقربلي...والله نحرقك...لا انا متاع الحاجات هذوما...و لا راني باش نسمحلك تتعدا حدودك معايا...مفهوم كلامي
بقيت نغزرلها...تحكي بعصب...وجها احمر باش يطرشق ترعش بكلها...شي من البرد و شي من حالتها...كبست على يدها و قربت منها اكثر...نحكي
انا:منقصدش لي صار
مريم:سيييبني و كهو
انا:و كان مسيبتكش توا ؟
مريم:تنجم تقولي شكون سلطك عليا...ياخي مجبورة انا باش نتحملك طول حياتي و لا شنية ؟
انا:مش فكرة خايبة
مريم:يا ربي شنية العبد هذا لي وحلت فيه...شتحب مني انت ؟
انا:ياخي إنتي ديما هكا ؟
مريم:شنية هكا شنننية....لا يزي قاعدة نتفضح جرايرك لا يزي كل مرة أنت
انا:أنا شنوة ؟
مريم:اففف منك...سييبني توا...نزل يدك
انا:أمشي قدامي
مريم:نمشي معاك أنت ؟
أنا:ممممم
مريم:ممممم مخك الخامج هذا ميساعدنيش
انا:شو الفرخة...كي مزالت تحل في فمها
مريم:سيييبني...لتوا مش مستوعبة كيفاش مستحملين حد كيفك...سيييبني يا ربي سييبني
انا:كيما انتي مستحملينك بالظبط...صراحة شفقت على أمك و بوك...خاطر عندهم طفلة كيفك
طلعت راسها غزرتلي ندرا كيف..في لحظة عينيها حمارو و لا مرة ريتها تبكي...و لا حتى لمحت دموعها و حتى توا...كي حسيتها تقلقت برشا...اما زادة منزلوش دموعها غريبة الطفلة هاذي...منعرفش كيفاش تنجم تتحكم في في مشاعرها لهدرجة...جبدت يدها مني تحكي
مريم:نسيت صاكي
تلفتت عطاتني بظهرها...قربت من الكرهبة...حلت الباب و نزلت تهز في صاكها...قربت منها وقفت وراها بالظبط أول ما تلفتت...ضربت فيا بالوقت...نفخت بالقاوي تحكي
مريم:فاش تعمل ياخي آه
أنا:أركب
مريم:أبعد
أنا:تركب و إلا نركبك بطريقتي
مريم:شتحب مني...علاه قاعد تتصرف معايا بالطريقة هاذي...ياخي نورمال في مخك أنت
قربت منها شوية...ضربت في الكرهبة من تالي حاصرتها بيديا نحكي
انا:أسكت...براس أمك أسكت شوية و كهو
مريم:نحب نمشي
نزلت يدي شوية...كبست عليها....ركبتها...و سكرت الباب خلطت عليها ركبت بحذاها...لقيتها تفركس في صاكها بعصب...عرفتها تفركس عالبخاخة متاعها...فكيتو من يدها...قحرتلي تحكي
مريم:فاش تعمل ياخي ؟
انا:اهدا
مريم:منحبش...اخطاني زح
حليتو نفركس فيه...غريبة مفهمتش شنية حاطة فيه كلشي فوق بعضو...كل مرة جي في يدي حاجة...اول ما لقيتها...رميتو لتالي...و قربت منها شوية...جبدتها من زندها...حطيتها في فمها...دوب خذات نفس...فكتها من يدي...تحكي
مريم:زايد مجودر
انا:لباس توا ؟
مريم:مممم أحسن
انا:كان تنقص من طولة اللسان لي عندك و ترتاح شوية مش أحسن
مريم:كان منراش وجهك وقتها نولي مليحة
انا:لازمك تتعود عليه
قحرتلي و تكات لتالي...غمضت عينيها بالوقت...بقيت نغزرلها...تنهدت بالقاوي...منعرفش علاه اليوم بالظبط حسيت روحي ظلمتها معايا بلا ما نحس...مكارنيش نتصرف معاها بالطريقة...لتوا مصدوم من اللي عملتو منعرفش شنية حاولت نثبت لشراز بالتصرف متاعي غمضت عينيا بالقاوي و رجعت حليتهم...مستحيل نستغلها...هي ما عندها حتى ذنب...و شراز جزء صغير من الماضي...مستحيل كان مزلت نتلفتلو مرة اخرى نزلت بعينيا لشفايفها...تبسمت على جنب...منعرفش علاه عملت هكا...شبيني منخممش قبل ما نقربلها
عندها حق...شنحب منها بالظبط...مش مستانس بيها تبقى هادية...اصلا من اول ما عرفتها و انا نتعارك معاها...كان تعدات ساعة هادية بينا...نعرف لهي مش قد بعضها...فقت من سرحتي...و هي تحكي من غير ما تحل عينيها
مريم:مزال برشا...باش تمشي...فيسع خاطر بديت نتخنق منك
تبسمت على جنب و خدمت الكرهبة بالوقت...احسن شي نسكت و نخليها...مديت يدي عديتها على وجهي و تنهدت بالقاوي...كل مرة نقول معادش نقربلها...نلقى روحي وليت لنقطة الصفر معاها...حاجة اقوى مني تخليني مهما بعدت عليها نقربلها اكثر...مع انو متأكد مستحيل تكون حاجة بينا...تي اصلا الطفلة صغيرة و فرخة...لسانها اطول منها...كان تبقى معايا فرد دار نستجرم فيها من اكا اللسان اللي عندها...كبست على الفولون بيديا زوز...و زدت في الفيتاس...نحب نوصل لدار و كهو...نبعد عليها و على الافكار الكل لي قاعدة دور في مخي...حتى كلام شيراز منحبش نفكر فيه حتى طرف...برغم نعرف من تصرفاتها...لي فما برشا كلام تحب تحكيه...اما انا بعد سنين هذوما...معادش نحب نسمعها...و لا حتى نرا وجها مرة اخرى...نحيتها من حياتي من اول نهار مشات فيه و مستحيل نسمحلها ترجع مرة اخرى
🔸️عمر يحكي:
ركيت الكرهبة على جنب...جبدت روحها مني بالوقت فكيت الحزام...باش ننزل معاها...قص عليا صوت تليفوني...لقيتها سيرين تطلب...هزيت عليها بالوقت نحكي
أنا:وي سيرين ؟
سيرين:وينك عمر ؟
أنا:لباس ماهو ؟
سيرين:منعرفش...نحب نراك توا
انا:وينك إنتي ؟
سيرين:في بقعتنا
انا:باهي...مسافة الطريق
سيرين:باهي
علقت عليها...و تلفت عندها بالوقت...باقي تغزرلي من غير حتى كلمة...خذيت نفس و حطيت يدي على خدها نحكي
انا:ادخل انتي توا...نكلمك مبعد باهي
زهرة:شفما عمر...سيرين لباس ؟
انا:ممممم...متحطش الحكاية في مخك...و فتحية كي نرجع نحكي معاها باهي
زهرة:عمر...رد بالك عليها باهي
انا:باهي...هيا لدار فيسع
قربت مني اكثر...باستني من خدي...و نزلت تجري تبسمت على جنب...دورت راسي نغزرلها...تجري باش متتبللش برشا...اول ما وصلت للباب شاورتلي بيدها هزيتلها براسي باهي...تبسمتلي ندرا كيف و دخلت...اول ما سكرت الباب...خدمت الكرهبة...و رجعت لتالي...طول الثنية و انا نخمم في علاقتي مع سيرين...من اول نهار قابلتها فيه...في الحاجات لي تعدات علينا...منعرفش على روحي كيفاش وصلت...ركيت الكرهبة و نزلت قربت منها شوية...نلقاها قاعدة عالكرسي...تغزر للبحر الدنيا باردة عاللخر...لابسة روبة قصيرة...و لافة روحها في كبوطها...تنهدت بالقاوي...و قعدت قدامها...تلفتت شوية...غزرتلي...تبسمت على جنب تحكي
سيرين:شبيك ما قلت شي على الروبة...مش أنت ما تحب حتى حد يغزر لحاجة متاعك أنت
أنا:حكيت برشا...3 سنين و انا نعاود في نفس الكلام شنية باش يتبدل زعمة ؟
سيرين:منعرفش...بلكشي نسمع كلامك المرة هاذي
انا:مش فات الفوت على كلامك هذا
سيرين:لا مفاتش...أما أنت حبيتها هي...في الوقت لانا قاعدة نتبدل على خاطرك...انت وقفت معاها...في الوقت لأنا نستنى فيك أنت كنت معاها هي عمر
انا:سيرين
سيرين:شنية ذنبي...علاه عملت فيا هكا..علاه مخممتش فيا قبل ما تفكر انك تحبها...تذكر شنية قتلي أول مرة نحبك تكون معايا و ليا...و نوعدك حتى وحدة ما تكون في حياتي غيرك...مش هذا كلامك عمر شنية لي تبدل علاه اخترتها هي ؟
انا:منعرفش
سيرين:معناها انت تعترف بحبك ليها
انا:سيرين صدقني حاولت برشا...حاولت نبعد عليها حاولت نلتزم بوعدي...اما شي اقوى مني...منعرفش امتى و لا كيفاش حبيتها ؟
سيرين:حبيتها هههههههه صراحة متفاجأتش بكلامك تعرف علاه...خاطرك و لا مرة غزرتلي كيما تغزرلها
ريتك اخر مرة كيفاش وليت و هي تحكي على خطيبها و لا ندرا شكون...متوقعتش باش تغير عليها لهدرجة ياخي ريت روحك كيفاش تصرفت...كنت نقول هو يغير عليا صحيح...اما تعرف علاه تصرفت معايا بالطريقة هذيكا...خاطرني تابعة ليك و كهو...مش على خاطرك تحبني...اما انا حبيتك...امي و بابا و ناس الكل...يقولو لانا نحب روحي...و لي يهمني نوصل وين نحب و كهو حتى انت...اما حبيتك...حبيتك أكثر من روحي...قاعدة نتبدل على خاطرك انت...اما أنت مشيت عندها
هزيت يدي عديتها على وجهي...نحس الكلام وحل في حلقي...خفت عليها برشا...و هي في الحالة هاذي...نزلت راسي نغزرلها كيفاش نحات الخاتم...تعدات خطبتنا بين عينيا...جيت باش نحكي...قصت عليا...كي كملت كلامها
سيرين:مكنتش فرحانة برشا...وقت لبستو...قلت لأنا حصرت روحي معاه...إنسان معقد و بارد...أهم شي عندو مبادئو...أما توا فهمت...فهمت لانا كنت غالطة في كلشي...انا لي فهمت الحرية بطريقة غالطة...فهمت اما مأخر برشااا...فهمت بعد ما خسرتك
انا:سيرين متلومش روحك...انا غالط كيفك و اكثر...و لا مرة توقعت باش نحط روحي في الموقف هذا...و لا باش نواجهك بالطريقة هاذي...صدقني علاقتنا كانت سبيسيال برشا...حاولت معاك برشا...ستنيتك تكلمني باش تطمن عليا...باش تسأل عليا...اما انتي كنت تكلمني وقت انا منكلمكش...وقت تحب مني حاجة و لا وقت تكون تستنى فيا...حبيت خدمتك اكثر مني...حتى صحابك سيرين كنت متعلقة بيهم اكثر مني...وين كنت انا في حياتك...مانيش نلوم فيك...أما
سيرين:أما كي دخلت هي لحياتك...قررت تخليني...و تبدا معاها من جديد...ياخي صدقت لهي زادة تحبك
انا:شقصدك ؟
سيرين:هي تحب تضمن حياتها معاك...تحب تأمن على روحها...بعد ما هربت من راجل أمها...تحب على فلوسك عزيزي
انا:ريت كيفاش تخمم انتي...كلشي عندك بالمظاهر خليني نخبرك انو راجل امها لي تحكي عليها...من رجال الاعمال في تونس...اللي عندي ما يجي شي قدام فلوسو...معناها كان حبت تعيش بالطريقة اللي تحكي عليها...مكانتش اختارت الثنية هاذي
سيرين:ريت كيفاش قاعد تحكي عليها...غريبة كيفاش نجمت تحبها في شهور هذوما كهو...حبيت طالبتك عمر
انا:يزي سيرين
سيرين:نفس الكلام ديما...يزززي و كهو...تعرف حتى امي قاتلي مرة كان متحبوش خليه...يزي ما قاعدة تلعب على راجل...يزززي هاني باش نخليك...اما المرة هاذي انا لي باش نكون الضحية...انا لي باش نتعذب و نتقهر جراير حبكم
انا:يمكن زادة جراير انانيتك سيرين
سيرين:عندك حق...جراير انانيتي انا وصلت لهوني...و خسرت حبي زادة
حلت يدها تغزر للخاتم...تبسمت ندرا كيف...و كملت تحكي
سيرين:نظن انت زادة لازمك تنحيه...يزي ما ربطت روحك بيا
بقيت نغزرلها...طلعت راسها شوية...نزلو دموعها بالوقت تنهدت بالقاوي تحكي
سيرين:تنجم تعطيهولي...أمانك
هزيتلها براسي إيه...مديت يدي بالسيف نحيتو...تنهدت بالقاوي و حطيتو في يدها مع خاتمها...سكرت يدها بالوقت...و تبسمت تحكي
سيرين:تنجم تمشي على روحك...و تعيش معاها لي تحب عليه
انا:سيرين انا
سيرين:نحبك برشا...و مستحيل يجي نهار و نحيك من قلبي...تذكر كلامي هذا بالقدا
هزت روحها وقفت...طلعت راسي نغزرلها...تبسمتلي...و عطاتني بظهرها...مشات من غير حتى كلمة...تكيت لتالي..و نفخت بالقاوي...الكلام لكنت باش نحكيه حكاتو هي...نسمع في تليفوني ينوقز...جبدتو بالوقت لقيتو حسام يطلب...خذيت نفس و هزيت عليه...نسمع فيه يحكي
حسام:وينك ؟
انا:شفما حسام ؟
حسام:شنوة لي شفما...مش على أساس نلقاك في دار
انا:كنت مع سيرين
حسام:شنننوة ؟
أنا:زهرة وينها ؟
حسام:مع مريم في بيتها
انا:باهي
حسام:وينك أنت ؟
انا:نحب نبقى وحدي شوية
حسام:في رايي حاول متخليهاش وحدها الليلة منعرفش أمي لشنوة تخطط
انا:باهي حسام طمن
حسام:باهي
نزلت تليفوني...و تكيت لتالي...نحب نبقى وحدي عالأقل بعد اللي صار توا...نحب نفكر بالقدا في اللي باش يصير مبعد...و في شنوة لي لازم يصير بالظبط في كلام سيرين...و في علاقتي مع زهرة...خدمتي و الوضع لانا فيه...نحب نوضح الامور هذوما الكل و نرتح روحي من الافكار لي هدت عليا
أنت تقرأ
زهرة🌸
Diversos🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
