زهرة🌸

الحلقة الثلاثون

🔸️حلقة 30
🔸️زهرة تحكي:
فقت الصباح نحل في عينيا بالسيف...نحس في بدني مدقدق...نسمع في صوت المطر...لي ماشية و تقوى دورت راسي غزرت لساعة...منعرفش كيفاش رقدت لتوا...هزيت روحي بالسيف تقعدت...هزيت تليفوني نفس الشي...3 أيام تعدات و لتوا لا كلمني...و لا طلبني حتى طاطا نورهان وقت كلمتها...قاتلي كلشي مليح شنوة لي قاعد يصير بالظبط...معاد فاهمة حتى شي مراد من نهارتها معادش كلمني...حتى لفاك معادش نمشي...عرفت من مريم...لي حتى هو معادش يجي يقري جملة...منعرفش علاه حسيت لفما حاجة مش نورمال قاعدة تصير...بدلت دبشي و نزلت اللوطة..لقيت كان امي فتحية عالطاولة...صبحت عليها نحكي
أنا:صباح الخير أمي
فتحية:صباح النور بنيتي
أنا:وينو حسام ؟
فتحية:لتوا منزلش
أنا:خلي نطلع نعيطلو ملا
فتحية:باهي...هاني نستنى فيكم
تبسمتلها...ورجعت طلعت...منعرفش كيفاش وصلت لبيتو...لقيت الباب مشقوق...كنت باش ندق...أما حبست كي سمعت صوتو يحكي
حسام:وييينك لتوا...ياخي نورمال 3 أيام لا نجم نكلمك لا نلقاك في دار...تنجم تفهمني وينك ؟
غمضت عينيا بالقاوي...و رجعت حليتهم...معناها حتى حسام منجمش يوصلو...خذيت نفس نسمع فيه يحكي
حسام:شنوة لي صار مع مراد ؟ شنننننوة....شقصدك بالتقرير طلع سلبي ؟
عينيا وساعو بالوقت...قلبي دق بالوقت...مستحيل يكونو يحكيو عليا...كنت باش نرجع لتالي...أما جمدت في بلاصتي...من كلامو
حسام:عمر...شتقصد...ياخي طلعت مش فيارج هذا لي تحب تقولو أنت ؟
حطيت يدي على فمي...منجمتش حتى نتحرك من بلاصتي...مستحيل لي يحكي فيه...متأكدة لي ما صار حتى شي بيني و بين مراد...توا فهمت علاه كلمني نهارتها...توا بديت نستوعب علاه عمر لا جا و لا كلمني نحس في قلبي باش ياقف...معادش نعرف مش شنوة نتصدم...من حسام لي يعرف كلشي...و انا كي البهلولة قدامو...و لا من اللي سمعتو...نسمع في صوتو بعيد برشا
حسام:باهي...أحسن شي انك رجعت...تو نجي و نلقاو حل مع بعض
أول ما علق عليه...وخرت لتالي مروهجة...منعرفش كيفاش رجعت لبيتي...هزيت كبوطي...و خرجت نجري ضربت فيه بالقاوي...ضيق عينيه يحكي
حسام:زهرة لباس ماهو...شبيك ؟
طلعت راسي...غزرتلو ندرا كيف...و نزلت الدروج نجري باقي مخالط عليا...منجمتش نرجعلو...حتى أمي فتحية منجمتش نردلها...حليت الباب و خرجت...نسكر في كبوطي...و نمشي...محسيتش بالبرد و لا بالثنية...لي يهمني إني نوصل عندو و كهو...نفهم اللي قاعد يصير قبل ما نجن...نمشي و كلام حسام يتعاود في مخي معناها على هذاكا محبش يقابلني...و لا يرد عليا...على هذاكا أكا نهار بعثني مع طاطا نورهان...و أنا كي الدغفة مش فاهمة لي قاعد يصير...منعرفش كيفاش وصلت طلعت الدروج نجري...أول ما لحقت للباب...هزيت يدي ندق بكل قوتي...باش نهدو...حل الباب بنطرة...جات عيني في عينو...عقد حواجبو مستغرب يحكي
عمر:زهررة ؟
بقيت واقفة في بلاصتي...منعرفش علاه للحظة حسيت روحي منحبش نراه و لا حتى نحكي معاه...خذيت نفس بالسيف...نحكي
انا:ج..جيت باش ناخو التقرير متاعي
عمر:أدخل
أنا:منحبش...نستناك هوني
جبدني من يدي بالقاوي...دخلني...و سكر الباب...قحرلي يحكي
عمر:شنوة هذا لي تعمل فيه ؟
جبدت يدي منو...غزرلي ندرا كيف...نزلت راسي نحكي
أنا:نحب نشوف التقرير توا
عمر:ماهوش عندي
أنا:نعرف لهو هوني...كيما نعرف لأنت بسببو ماكش تحكي معايا
عمر:زهررة
خذيت نفس بالسيف...و سبقتو لصالة...بالصدفة لقيتو محطوط...هزيتو في يدي بالسيف...حليتو نقرا فيه دموعي نزلو بالوقت...طلعت راسي شوية نغزرلو...واقف مقابلني...الكلام وحل في حلقي...ملقيتش شنوة نقول معناها كلام حسام صحيح...بالرسمي طلعت مش فيارج أما كيفاش...كبست عليه في يدي نحكي
أنا:ا أنت زادة صدقت التقرير هذا مش هكا ؟
قرب مني شوية...فكو من يدي...حطو عالطاولة...و غزرلي يحكي
عمر:اهدا
أنا:ماانيش باش نهدا...فهمت مستحيل نهدا...عمر أغزرلي التقرير هذا مزور...مستحيل لي مكتوب هوني تسمع فيا مستحيل
قرب مني أكثر...حط يديه زوز على كتافي...باش يحضني...دزيتو شوية نحكي
أنا:أنت مصدقني مش هكا ؟
بقيت نغزرلو في عينيه...هزلي براسو إيه...دموعي نزلو بالوقت...منعرفش علاه حسيتو يكذب...منعرفش علاه حسيتو حتى هو شاكك في الحكاية...قربت منو أكثر نضرب فيه و نصيح
انا:تكذذب...نعرف لأنت قاعد تكذب...كان صدقتني مكنتش هربت مني...مكنتش تصرفت هكا...مكنتش خليتني
كبست بيديا زوز على سوريتو...و حطيت راسي على صدرو نحكي
أنا:عممر...خلينا نعاودو التقرير...أمانك...هزني لأي طبيبة أخرى
جبدت روحي منو...يغزرلي ندرا كيف مصدوم من كلامي...خذيت نفس نخرج في باقي الكلام بالسيف
أنا:م مستحيل مراد يعملها...حتى كي كان يخدرني مكانش يمسني...مرة وحدة حاول يبوسني...و وقتها كنت فايقة باللي قاعد يصير...صدقني عمر مهما صار هو مستحيل يعمل فيا هكا...مستحيل تسمع فيا عمر
عمر:زهرة يزززي...يزززي قتلك معادش تجبد سيرتو قدامي...معادش تحكي عليه بالطريقة هاذي
جبدني من زندي بالقاوي...في لحظة غزرتو ولات كلها غش...كبس عليا أكثر...و كمل كلامو يحكي
عمر:تعرف الساقط هذاكا...شنوة لي قالو عليك ؟
أنا:و ا أنت صدقتو مش هكا...على هذاكا بعدت عليا
عمر:لااا زهرة ماكش باش تفهم...ماكش باش تفهمني...انا لي يهمني إنتي...مش جرد ورقة جبتها من عند طبيبة
أنا:م معناها صدقت لي ص..صارت حاجة بينا...على هذاكا تحكي معايا هكا
عمر:زهرررة يزززي...فيق على روحك...فيق للكلام لي قاعدة تقول فيه
نطرت يدي منو...وخرت لتالي...و طلعت راسي غزرتلو تبسمت وسط وجيعتي نحكي
انا:ك..كان صدقتني م..مكنتش باش تقول لحسام لانا مطلعتش فيارج...حتى كان طلعت الحكاية صحيحة عالأقل كنت تسترني قدامو...و لا كنت تطلب مني نعاود نعدي عند الطبيب..أما عندك حق...شكون أنا باش تعملي حساب...أنت عاونتني برشا و أنا زادة رميت الحمل الكل عليك...سامحني
عمر:ز زهررة...اسمعني
قربت من طاولة هزيت التقرير في يدي...قرب مني باش يحكي...وخرت لتالي...نحكي
أنا:يزززي...من غير ما تعب روحك معاايا أكثر من هكا
عمر:زهرة يزي من تخلويض متاعك و أسمعني
أنا:ن..نحب نمشي
عمر:ماكش باش تمشي لحتى بلاصة...و إنتي في الحالة هاذي
كبست عالورقة في يدي...جيت باش نحكي قص عليا صوت تليفونو...نزلت راسي...نغزر لسيرين تطلب فيه تبسمت نحكي
أنا:هوكا مرتك تطلب...نظن لازمك ترد عليها أحسن
جيت باش نمشي...شدني من يدي كبس عليا...خذيت نفس نحكي
أنا:س..سيبني عمر
جبدني عندو أكثر...نزل عليا شوية...نسمع فيه يحكي
عمر:ششش يزززي...قتلك ماكش باش تخرج...اهدا توا
أنا:سييبني امانك
عمر:زهرررة
غمضت عينيا بالوقت...جبدت يدي منو...باقي تليفونو ينوقز و يعاود...وخرت لتالي...نفخ بالقاوي و هز تليفونو تلفت شوية نغزرلو عاطي بظهرو و يحكي معاها..كبست على تقرير في يدي و خرجت من صالة نجري..منعرفش كيفاش وصلت للأصونصير...نسمع فيه يعيط عليا..دوب كبست عالزر...وصل بالوقت...يصيح عليا...أول ما لحق للأصونصير تسكر في وجهو...نزلو دموعي أكثر...خذيت نفس نهدي في روحي...أول ما خرجت البرا شديت طاكسي...خاطر نعرف لباش يخلط عليا...عطيتو عنوان السوسيتي و تكيت لتالي...نغزر للمطر لماشية و تزيد برشا كلام نحب نقولو في وجهو و نرتاح..أول ما وصلت عطيتو فلوس و نزلت...دخلت نجري...توا أكثر من أربع سنين مدخلتش لهوني...برشا حاجات تبدلت...اما بيروه مزال هو..قربت بالزربة..وقفت السكرتيرة باش تحبسني دزيتها بيدي...و هديت عليه أول ما شافني هز روحو وقف..بقيت واقفة في بلاصتي نغزرلو...هز يدو شاور لسكرتيرة باش تخرج...دوب تسكر الباب...قرب مني يحكي
مراد:زهرة شتعمل هوني ؟
كبست عالتقرير في يدي...قطعتو و رميتو عليه...نحكي
أنا:هذا هو التقرير...لأنت حبيتو مش هكا
بقى واقف في بلاصتو يغزرلي من غير حتى كلمة قربت منو أكثر...نضرب فيه و نصيح عليه
أنا:كان جيت تحبني شوية...شوية كهو...مكنتش تعمل فيا هذا الكل مراااد...انت كرهتني في حياااتي و في روحي...و توا بسببك أنت...ما نجم نغزر في حتى حد
تلفت نرمي في كل حاجة قدامي...قربت من البيرو متاعو نزلت كلشي عالأرض...و نصيح فرد وقت
أنا:شمزلت تححب مني مرااااد...شنننية تحبني نعمل باش تخرج من حياتي و تخطاني...خذييييت مني كلشي...دارنا و أمي...و حياتي...و تواااا شرفي...علاااه هكا...قول حاجة...احكككي شي مررااااد...قلي لأنا معنديش دخل في الحكاية...قلي لي طبيبة غلطت متخلينيش نكرهك أكثر من هكا...شبيييك سااااكت
باقي واقف في بلاصتو من غير حتى كلمة...دزيتو بيديا زوز نصيح
أنا:احكككي...قول حاجة امانك...قول انو مستحيل انت تعمل هكا
حسيت روحي فشلت و انا نضرب فيه...كبست عليه بيديا زوز...ساقيا رخفو و معادش يحملوني...نزل معايا عالارض...حضني بالقاوي...غرس يدو في شعري يحكي
مراد:شششش...يزززي...راك روحي صدقني منجمش نعيش من غيرك...تعبت و تعبتني معاك...أرجعلي زهرة ارجعلي باش يوفا هذا الكل
كبست عالفاست متاعو بيديا زوز...نحكي بالسيف
أنا:س..سيبني مراد...أمانك..أخرج من حياتي و انساني تعبت راني والله تعبت...نحب نعيش نهار واحد كيما العباد...نحب نعيش حياتي كيما لبنات الكل...علاه متحبش تفهم مراد...مهما عملت أنا و أنت مستحيل نكونو مع بعضنا
كبس عليا اكثر...لين معادش فما مسافة بينا...ريحتو دخلت في خشمي...غمضت عينيا زوز...نحس في بدني مهدود...منجمتش ندزو و لا حتى نقاومو...باقي ساكت من غير حتى كلمة...تعدات صورة عمر قدامي...الكلام لي سمعتو من حسام...و اللي صار توا...جبدت روحي منو شوية نحكي
أنا:س سيبني...أبعد
رخف يديه شوية...عاوني وقفت...وخرت لتالي نحكي
انا:م معادش تمسني...و معادش تقربلي
مراد:زهررة أسمعني
أنا:ما نحب نسمع حتى حد فيكم
تلفت باش نخرج...حبسني كي شدني من يدي...يحكي
مراد:متنجمش تخرج و انتي في الحالة هاذي
جبدت يدي منو...و تلفت عندو...قحرتلو نحكي
انا:معادش تمسني...ميهمكش فيا...ابعدني و كهو
جا باش يحكي...حليت الباب و خرجت...نمشي بالسيف حبست أول طاكسي عرضتني...عديت يديا زوز على وجهي...منجمش نمشي للكلينيك خاطر الفلوس لي عندي متكفيش...ضرب في راسي طبيب لاختارتو المحكمة...عطيت عنوان الكلينيك لراجل...نحس في روحي باش نتخنق...نزلت من طاكسي بالسيف
منعرفش كيفاش باش نعمل هكا...أما معنديش حل آخر...قربت من رسيبسيون...طلبتو بالإسم...هزت يدها شاورتلي عليه...لقيتو داخل للكلينيك...قربت منو بالسيف...حشمت منو عاللخر...وقفت قدامو نحكي
أنا:د..دكتور
هو:تفضل
أنا:أنا...ز..زهرة حسيني
غزرلي ندرا كيف...عرفت لهو تذكرني...ضيق عينيه يحكي
هو:كيفاش نجم نعاونك ؟
انا:ن..نحب نعاود التقرير...أمانك عاوني...أنت آخر حل عندي...صدقني لي فما شي غالط...أمانك...كان تحب تو ندبر نفس الفلوس لي خذيتهم من مراد...نعرف لهو ورا الحكاية...م..مش أنت تعينت من المحكمة باش تعدي عليا...أمانك عاوني
بقى يغزرلي...نحس في قلبي باش يخرج من بقعتو متوقعتش باش يصير فيا هذا الكل...و المرة هاذي حتى عمر عندو يد في اللي قاعد يصير بقصد و لا من غير قصد...دم جمد في عروقي...كيف ريتو تبسم على جنب يحكي
هو:أغزرلي هوني...أنا مستحيل نبيع ضميري بشوية فلوس...حاولت نحبس الحكاية نهارتها...أما إنتي رفضت تعدي عندي...و حكاية الطبيبة منعرفش عليها بالظبط
أنا:معناها باش تعاوني
هو:بالطبيعة...برا استناني لين نعيطلك
انا:باهي عيشك
تبسملي و دخل...قربت قعدت عالكرسي...منعرفش كيفاش باش نخلي راجل يعدي عليا و أنو نفس الحكاية تتعاود...اما معنديش حل اخر...متوقعتش لهو باش يسمعني و ياقف معايا...هزيت يدي مسحت دموعي نسمع في تليفوني من بكري ينوقز...جبدتو نغزرلو طلبني أكثر من مرة...من وقت خرجت من عندو...عاود نوقز في يدي...هزيت عليه...نسمع فيه يحكي
عمر:زهرررة وينك ؟
مع صوتو نزلو دموعي أكثر...تنهد بالقاوي...يحكي
عمر:زهرة أمانك جاوبني...باهي نعرف روحي غلطت..أما مستحيل نشك فيك...حسام يعرف بالحكاية من الأول زهرة إنتي قطعة مني...مستحيل نجم نضرك...و لا حتى نخليك تتوجع جرايري...كان بقيت بعيد عليك خاطر منجمتش نواجهك و كهو...تسمع فيا ماهو
عديت يدي على خدي...نحس في قلبي باش يخرج من بقعتو..حتى كلامو معادش فاهمة شنية يقصد بيه باقي يحكي
عمر:زهرة وينك...جاوبني أمانك...عالأقل خليني نسمع صوتك
خذيت نفس بالسيف...غمضت عينا بالقاوي...و رجعت حليتهم نحكي
أنا:باش نعاود نعدي عند الطبيب الشرعي لعيناتو المحكمة
عمر:شنننننننوة....زهررررة فاش تعمل ياخي...تحب تهبلني إنتي...أخرج من غديكا توا...سمعتني أخرج...رد باااالك تعملها زهرة...رد بالك تسمع فيا...مفما حتى شي يخليك تعاود التقرير...و ماكش مجبورة تقدمو للمحكمة صدقني أنا باش ناخولك حقك من طبيبة هذيكا...أخرج زهرة
جيت باش نحكي...نسمع في الفرملية تعيط باسمي حتى هو سمعها...صاح عليا يحكي
عمر:زهرررة رد بااالك
انا:ك..كان مشكيتش فيا للحظة...مكنتش باش نعملها
عمر:و راس أمي الحكاية مش كيما فهمتها...رد بالك تعملها...أصلا قريب نوصل عندك
أنا:بطيت برشا...طبيب يستنى فيا
كبست عالتليفون و نزلتو علقت عليه...قبل ما نسمع صياحو مرة أخرى..هزيت روحي بالسيف...دخلت لبيروه تبسم يحكي
هو:تفضل
هزيتلو براسي ايه...باقي تليفوني ينوقز...علقت عليه و سكرت تليفون...نحيت الفاست حطيتها عالكرسي منجمتش نمنع دموعي...القهرة اللي حاسة بيها...أكبر من الخوف...لي يهمني إني نثبت للكل أنو مزلت نظيفة...و مستحيل حد فيهم يكون حط يدو عليا...دورت راسي نغزر لسرير...فقت من سرحتي...كي قرب مني يحكي
هو:متخافش مدموزال...كلشي باش يكون مليح
هزيتلو براسي ايه...قربت من سرير بالسيف...و كلام عمر يتعاود في راسي...منعرفش شنوة باش يصير فيا بعد توا...و لا كيفاش باش نتصرف كانو ما صار شي الوجيعة ولات دوبل...اصلا منعرفش اذا باش نجم نغزر لعمر...بعد توا...و لا كيفاش باش نرجع لدار هذيكا مرة أخرى...حياتي حسيتها وقفت في دقيقتين هذوما...لا عرفت نفكر في روحي و لا في لي جاي...تسطحت و سكرت عينيا...نحب ننسى كلشي...و ما نحس بحتى شي من اللي باش يصير