زهرة🌸

الحلقة مئة و ثالثة عشر

حلقة 113
زهرة تحكي:
حليت عينيا شوية شوية...على صوابع يدو لي قاعدة تتعدا على خدي...على ريحتو لي محبتش تفارق خشمي...ساعات لتالي...مشى في بالي لي انا خلصت من الكابوس لي كنت فيه...اما طلعت غالطة...عيني لي جات في عينو اكدتلي اني مزلت في قبضة مراد لتوا...انفاسي لي تقطعت من شوفتو...خلات كل قطعة من بدني تتكبس أكثر من قبل...غزرتو عراتني مرة اخرى...بلعت ريقي...و كبست عالغطا بيدي...و جبدت روحي لتالي...لميت ساقيا...و غزرتلو نحكي
انا:ف..فاش تعمل هوني ؟
مراد:مشى في بالك لي انتي باش تهرب مني عزيزتي ؟
بقيت نغزرلو مصدومة...فرد وقت تفكيري ضايع...وين انا ؟ و كيفاش وصلي مرة أخرى ؟ عمر...عمر كان معايا ساعات لتالي...وين مشى و خلاني...كيفاش نجم يخليه يجي عندي مرة...و لسريري زادة...دورت عينيا عالبيت...نفس البيت لي رقدت فيها و عمر معايا...شنية لي قاعد يصير معايا ملا...و كي انا منعت منو المرة لي فاتت...مستحيل نجم نمنع روحي من غزرتو هاذي...كبست على اطراف الفرش...و غزرت لباب...نصيح بكل قوتي
انا:عمممممر....عممممررررر...عمممر
صوت ضحكتو...خلى صوتي يضيع مني...من غير ما نحس...دورت راسي غزرتلو...مد يدو شوية...بعدلي خصلات شعري باطراف صوابعو...و تبسم يحكي
مراد:حتى حد ما ينجم يسمعك يا روحي...و خاصة عمر متاعك
هزيتلو براسي لا...نعرف لي عمر مستحيل يخليني بين يديه مرة اخرى...و لا عالاقل بعد لي صار فيا آخر مرة...جبدت روحي لتالي...من غير ما نبعد عينيا من عينيه...نفس الغزرة فيهم متبدلتش لتوا...و الاهم انو نفس الخوف تزرع فيا من اول و جديد...خوف خلاني المرة هاذي...نفقد الحركة جملة...مد يدو باش يمسني مرة اخرى...دورت وجهي...نحكي
انا:م..متمسنيش...متسمنيش مراد...امانك متمسنيش
مراد:علاش زهرة ؟ علاش قاعدة تعمل فيا هكا ؟
انا:خ..خليني نمشي من هوني...اعتقني اماانك
قربلي أكثر...لين حسيت بأنفاسو ضربت في وجهي...انفاسو لي تحرقني و تقززني من روحي في كل مرة نحس بيها...عدا خدو على خدي...و قربلي يحكي في وذني
مراد:مهما هربت مني...آخرتك باش تكون معايا يا زهرة...آخرتك مع مراد
مديت يدي بالسيف...حطيتها على صدرو...محاولة مني باش نخلي مسافة تفصلني عليه...و هزيت راسي شوية...غزرت لعينيه...نحكي
انا:ا..انت قاعد تقتل فيا يا مراد...انا قاعدة نموت جرايرك مراد:انتي قتلتني قبل يا زهرة...قتلتني من اول ليلة اخترت فيها ثنيتك معاه
هزيتلو براسي لا...دموعي جمدت في وسط جفوني...منجمتش نبكي...و منجمت نقول حتى كلمة...نحس في بدني تكبس اكثر...دقات قلبي ماشية و تقوى...انفاسو سكرت عليا النفس...كبست بيدي على طرف الفرش...و جبدت روحي شوية شوية...نحاول نلقى مفر منو...من يدين الوحش لي قدامي...رعشة بدني منجمتش نتحكم فيها...يديه لي تغرست في اجنابي...رجعتني لتالي في لحظة...لقيت روحي تحتو...و بين يديه...لثاني مرة...حسيت ببدنو فوق بدني...بلمسة يديه...و بحرارة شفايفو...لي قاعدة تحرق فيا...وين صوتي ؟ وين قوتي ؟ وين الامل لي ديما نعتمد عليه...انا ما لقيت حتى شي من هذا...و الاهم من هذا الكل ملقيتش عمر...ملقيتش الشخص الوحيد لي نجم نعتمد عليه...و لي ينجم يخلصني من بين يديه...ملقيتش النور لي ديما نعتمد عليه و نسلك من بين يديه...حتى حد ماهو باش يسمع صياحي بعد توا...حتى حد ماهو باش يسلكني من بين يديه...كنت و مزلت نلعن روحي عالدقيقة لي جيت فيها لدنيا هاذي...و عالساعة لي جمعتني بيه...غمضت عينيا بالقاوي...كي حسيت بشفايفو تغرسو في رقبتي...دوب نجمت نلم قوتي و صوتي لي ضاعو...كبست بيدي على صدرو...و صحت فرد صيحة...صيحة خلاتني نحل عينيا مروهجة و نجبد روحي لتالي...طحت من السرير عالارض...كبست بيدي عالجبيرة...محسيتش بوجيعة صوابعي لي كانت باش تقتلني...هزيت روحي وقفت بالسيف...و حليت الباب...خرجت من غير ما نعاود نتلفت ورايا...كل خطوة نعملها...دقات قلبي تقوا اكثر...مش مصدقة اني نجمت نخلص منو مرة اخرى...منعرفش على روحي كيفاه نزلت الدروج...دعثرت في آخر درجة...و جيت في حضنو...هزيت راسي نغزرلو مصدومة...معادش نعرف اذا انا في كابوس و لا في حلمة...معادش نجم نصدق لي قاعد يصير...و معادش عندي طاقة باش نتحمل اكثر...هزيت يديا بالسيف...شاورتلو بصبعي الفوق و غزرتلو نحكي
انا:م..مراد..ر..رجع...ك..كان معايا...ك..كان باش يغتصبني...ش..شوف...شعمل فيا
بعدت خصلات شعري لتالي...نوريه في رقبتي...كبس على وجهي بيديه زوز...و غزرلي يحكي
عمر:زهررة...يااا روحي...مفما حتى حد معاك...لي ريتو كاابوس
انا:ل..لا...لااااا...كااان معايا...انا سمعت صوتو و شميت ريحتو في البيت...حتى حسيت بيه و هو معايا...ع..عمر علاش متحبش تصدقني
عمر:ايجا عندي تراه
جبدني عندو في لحظة...كبس عليا في حضنو...ريحتو لي دخلت لخشمي...خلاتني انفاسي تهدا شوية شوية...صوت ريحان و هي تبكي رجعني للواقع...هزيت راسي بالسيف...غزرتلو...نحكي
انا:ح..حسيت بيه مرة اخرى...حسيت بيه معايا
عمر:ششش...يزي يا عمري...مراد معادش باش ينجم يقربلك مرة اخرى...اللي صار معاك توا...كابوس خايب و فقت منو
انا:ر..ريحان كانت بجنبي كي رقدت...و انت كنت معايا زادة...علاش خليتني وحدي
عمر:ريحان قامت تبكي...نزلتها باش متفيقكش...هدي روحك توا عزيزتي...مفما حتى شي تخاف منو بعد توا...باهي
انا:م..ماكش باش تتفقد البيت ؟
عمر:متخافش عزيزتي...آخر بلاصة يمكن يجيها الكلب هذاكا...حتى انو مصاوب...و اكيد باش يظطر يشد الفرش ايامات اخرى
انا:م..معناها م..مامتش ؟
عمر:لا...مزال عايش
بقيت نغزرلو من غير حتى كلمة...منعرفش اذا نفرح و لا نحزن...نفرح على خاطر مانيش باش نباصي على جالو...و لا نحزن على خاطر الكابوس متاعي مزال باش يعيش أكثر...خذيت نفس و هزيتلو براسي ايه...قربلي اكثر...باسني من راسي يحكي
عمر:هيا ايجا معايا...لازمك ترتاح
انا:م..منحبش نرجع الفوق
عمر:باهي يا روحي
كبس على يدي...و جبدني عندو...طاوعتو و مشيت معاه لصالة...اصلا معادش عندي جهد لحتى شي آخر...هزيت راسي على صوت ريحان...لي قوات في البكا مرة اخرى...جبدت يدي منو و قربت قعدت بجنبها عالفوتاي...مديت يدي كبست على يدها الصغرونة...و غزرتلو نحكي
انا:شبيها ؟
عمر:جااعت...على هذاكا متحبش تسكت
انا:ن..نجم نرضعها انا ؟
هزلي براسو ايه...و قرب منها شوية هزها في حملتو سكتت اول ما شافتو...تبسم و نزل عليها...باسها قرب مني حطها في حضني...فحمت بالبكا مرة اخرى...قعد عالطاولة مقابلني...يلهي فيها...فرد وقت يحلي في سوريتي...بحكم يدي بالجبيرة...عديت عينيا على تفاصيل وجهو...في ضحكتو مع ريحان...لي سكتت و هي تغزرلو...فرد وقت تضحك معاه...استانست بيه و بوجودو...عينيه تركزو في صدري...في كل بقعة مزالت مرسومة عليه...تراص مكانش هو السبب فيهم...تراص تحفرت في بدني بالسيف عليا...غريبة اني منجمتش نعمل ردة فعل...منعرفش اذا نعاقب فيه و لا في روحي...ضحكت لي تمحات في لحظة...وصلتلي احساسو...و اللي جا في مخو...كسرت الصمت كي كبست بيدي على ريحان نحكي
انا:ي..يكفي هكا
جبد يديه زوز مني...و هز راسو غزرلي...جبدت روحي شوية...قربت ريحان لحضني...رغم الوجيعة لي حسيتها اما ماهيش احسن من بنتي...نزلت عليها شوية...بستها من خدها...و خذيت نفس من ريحتها...كل مرة نتذكر اني تحرمت باش نشوفها ليلة لي ولدت فيها...قلبي يوجعني أكثر...مراد و عثمان مشتركين في ذنب واحد...تحرمت و حرمت بنتي من احساس الامومة...يا ريت ليلتها ولدت في بلاصة بعيدة عليهم زوز...يا ريت كنت نجم نهزها و نمشي...اكيد مكنتش باش نول للحالة هاذي...و لا نخلي بنتي ترفضني..كيما رفضت انها ترضع مني توا...جبدت روحها مني غزرت لعمر...و طرشقت بالبكا...هز راسو غزرلي...و شدها من يدها يلعب فيها...حاولت نرضعها مرة اخرى...اما استوعبت انو حليبي تقطع...على هذاكا رافضة انها ترضع...خذيت نفس و عاودت غزرتلو نحكي
انا:م..معادش عندي حليب
عمر:باهي عزيزتي متقلقش روحك...هوكا البيبرون متاعها حاضر...هات عليك...تو نرضعها انا
هزيتلو براسي ايه...قربلي شوية هزها من حضني...و حط البيبرون في فمها...كبشت فيه بقوة...تنهدت بحصرة...انا ما نجمت نعطي حتى شي لبنتي...حتى الحليب لي من حقها..تنهدت بحصرة و انا نغزرلها..قريب تكمل البيبرون متاعها...فرد وقت هزت يدها تغزرلها تبسمت عالفازة...و تفرهدت كي دورت راسها و غزرتلي كبست على يدها و غزرتلو نحكي
انا:زعمة باش تستانس بيا انا زادة ؟
هز راسو غزرلي ندرا كيف...و تبسملي...يحكي
عمر:اكيد يا روحي...اصلا هي بحاجتك اكثر من اي حد في دنيا
دوب تبسمتلو و نزلت راسي غزرتلها...ضحكتلي بالوقت منعرفش علاش كل مرة نغزرلها...نحس روحي ارتحت يمكن هذا احسن شي عملو عمر على خاطري توا...انو جابلي بنتي...بنتي لي اول مرة نبات و هي بجنبي...اول مرة نفيق على صوتها و هي تبكي في الليل...رغم انو هو لي قايم بيها...اما الاحساس هذا رتحني بصفة غريبة...ريحتها كافية باش تهديني...و تنسيني في كلشي صار...اول ما كملت حليبها...غزرتلو نحكي
انا:حطها هوني بجنبي
هزلي براسو ايه...و رجعها لبلاصتها...حسيتها تفرهدت بعد ما شبعت...نزلت عليها شوية...نمشي في صوابعي على وجها...و نلعب فيها...دورت راسي شوية...كي حسيت بيه قام من بلاصتو...دوب تبسملي...يحكي
عمر:انا باش نمشي نحضر العشا...لازمك تاكول حاجة باش تشرب دواك
هزيتلو براسي ايه من غير حتى كلمة اخرى...بقيت نتبع فيه بعينيا لين خرج من صالة...تنهدت بحصرة و تلفت نغزر لريحان...اكثر من احتمال جا في مخي...اكثر من فكرة سيطرت عليا...لي تعدا عليا ليلة هذيكا منجمتش ننساه...لتوا مزلت نحس بكبسة يديها...بسنانو لي تغرسو في بدني...لتوا نحس في روحي مدقدقة...و مهدودة من اللي صار...رغم انو يومين تعدات عالحادثة...محبش يخاطني لا في احلامي و لا في الواقع...و فكرة انو مراد باش يبقى واقف بيني و بين عمر...قتلتني من داخل...فكرة انو كل مرة يغزرلي يشوف مراد و هو ينهش في بدني...تخلي روحي تخرج مني...و اكثر شي خايفة من فكرة لي ماهوش باش يصدقني اني منعت روحي منو و ما صار حتى شي بيناتنا...كثرت الاسئلة و الاستفهامات في مخي قتلتني...كنت نجم نااثق فيه و في روحي اكثر...اما هو مصدقنيش مرة...و ينجم يعاودها مرة اخرى...حتى انو لي تراص لي خلاها مراد على بدني...دليل واضح...انو الحالة لي كنت فيها...تقول انو مستحيل نجم نمنع روحي من بين يديه...فرد وقت احساسي يقول لهو قاعد يتهرب مني بعد لي عرفو الكل...و بعد اللي شافو بعينيه...و يمكن وجودو معايا هو واجب منو و كهو...على خاطرو كان سبب غير مباشر في حالة مراد و في اللي عملو فيا...مديت يدي بالسيف...حطيتها على رقبتي...نتحسس في الكوليي متاعي...حتى بعد اللي صار الكل متنحاش...غزرت لريحان و تبسمت...محاولة مني ننسى لي صار...و ننسى الحالة لانا فيها توا...و الاهم نبعد عالافكار اللي قاعدة تدور في مخي...نزلت عليها شوية...بستها و خذيت نفس من ريحتها...نحكي
انا:ريحانتي...بنوتي المزيانة...بعد توا معاد فما حتى مخلوق ينجم يفرقنا...و لا يبعدك عليا...انا معادش باش نخليك بعد توا...حتى كان بقينا وحدنا...معادش باش نخلي شي يفرقنا...انتي الوحيدة لي ماكش باش تخليني يا ريحان...انتي كهو لي باش تفهمني...كنت و باش تبقى أحلى حاجة جيت بيها لدنيا من عمر
حطت يدها على خدي...ضحكت بالوقت...و بستها منها...منعرفش علاش ارتحت و انا نحكي معاها...نص ساعة اخرى تعدات...بقيت معاها...لين رقدت...عدلتها و هزيت الغطا شوية حطيتو عليها...و سرحت في تفاصيل وجها...رغم انها نسخة مني...اما تشبه عمر شوية...عندها تفاصيلو الصغيرة...هزيت راسي شوية...نستفقد فيه..من وقت خرج من صالة معادش رجع...زعمة لهدرجة ميحبش يقابلني ؟ لهدرجة قاعد يتهرب مني...زعمة مراد نجح المرة هاذي...و باش يكون حاجز بيناتنا...حتى داخلي عايشة بين المد و الجزر...بقدر ما نحب نكون معاه و بين يديه...بنفس القدر لي نحب نبعد عليه...و معادش نشوفو مرة اخرى...خذيت نفس و هزيت روحي وقفت...حطيت يدي فوق الجبيرة...و مشيت للكوجينة نمد في الخطوة بالسيف...منعرفش علاش قمت و لا علاش ماشية عندو...و لا حتى في شنية باش نحكي معاه...اما كلشي متأكدة منو اني قاعدة نتبع في احساسي و كهو...وقفت بحذا الباب...و هزيت راسي نغزرلو...عاطي بظهرو...و يحضر في العشا...دقايق تعدات و انا نغزرلو من غير حتى حركة...و من غير ما نعمل حس...اصلا بعد اللي صار معايا الكل...متوقعتش باش تكون عندي فرصة...اني نكون معاه مرة اخرى...و لا حتى باش نكون قريبة منو...قد ما تقززت من روحي و من قرب مراد مني...نحب نقرب منو...و ننسى كلشي صار...مهما صار منجمش ننكر اني نرتاح في قربو...حتى كان باش يرفضني بعد اللي عرفو...و بعد اللي صار مع مراد...انا منجمش نحس بالأمان مع حد آخر غيرو كبست على يدي أكثر...و رجعت خطوة لتالي...نحب نرجع قبل ما يحس بيا و بوجودي...اما قبل ما نتلفت سبقني كي دار عندي...جمدت في بقعتي...و معرفتش شنية نعمل بالظبط...اكثر شي خايفة منو...هي ردة فعلو...منحبوش يعاملني و لا يتصرف معايا...على أساس الشفقة...ضيق عينيه يحكي
عمر:زهرة لباس ماهو ؟
هزيتلو براسي ايه...و كبست عالجبيرة اكثر...نهدي في روحي و نحكي فرد وقت
انا:ن..نحب نشرب
عمر:باهي...ايجا
قربت منو بخطوات رزينة...فرد وقت ندمت اني جيت عندو...حطلي كاسة الما في يدي...و بقى يغزرلي من
غير حتى كلمة...شربت منها شوية...و حطيتها عالرخامة نزلت عينيا من وجهو...هاربة من غزرتو...حسيت بصوابعو لي تعدات على خدي...نزل بيهم لدقنونتي...و هزلي راسي شوية...حط عينيه في عينيا...يحكي
عمر:ريحان رقدت ؟
انا:مممم...ه..هاني باش نمشي بحذاها توا
عمر:خليك معايا
انا:م..مش لازم
حط يدو لاخرى على خدي و قربلي أكثر...دخلت بعضي و مفهمتش وين يحب يوصل...كي يحبني نبقى معاه فاش قام حتى يتهرب مني...قبل ما يقول كلمة اخرى مديت يدي بالسيف...كبست على يدو و نزلتها من خدي...نحكي
انا:م..ماكش مجبور على حتى شي عمر
عمر:شقصدك ؟
انا:نقصد من غير ما تتهرب مني...ك..كان حسيت روحك ماكش مرتاح باللي تعمل فيه مش لازم منو...ي..يعني نقصد انت
سكتني كي نزل بصوابعو لشفايفي...غزرلي ندرا كيف...يحكي
عمر:ششش...يززي كهو...انتي حكيت برشا
رجعلي خصلات شعري لتالي...و عدا صوابعو عالجرح لي في جبيني يحكي
عمر:انا حاشم من روحي يا زهرة...حاشم من غزرة اللوم في عينيك...انا بيدي وصلتك باش تعيش أكبر كابوس في حياتك...خليت الواطي هذاكا...يمس حاجة متاعي و ملكي...حرقت روحي و حرقتك معايا...انا مانيش هارب منك...انا هارب من روحي...هارب من فكرة انك باش ترفضني في حياتك بعد توا...صدقني...انا منجمش نعيش من غيرك...من غير غزرة عينيك...ضحكتك و صوتك...انتي وليت ادمان بالنسبة ليا يا زهرة...كان صارتلك حاجة...مستحيل كنت نجم نعيش من بعدك
قربتلو بالوقت...دخلت في حضنو...يمكن هذا لي كنت بحاجة اني نسمعو...كنت بحاجة اني نحس بكلامو كبست يديه على ظهري...و انفاسو لي ضربت في رقبتي...هداتني بصفة غريبة...كبست بيدي على مريولو و هزيت راسي شوية...غزرتلو...نحكي
انا:ص..صدقتني مش هكا ؟
حطو يدو على خدي...كبس عليا و تنهد بالقاوي...يحكي
عمر:مصدقك يا عمري...اصلا كان الكلب هذاكا وصل للي يحب عليه...ماكش عايشة توا...انا اكثر حد متأكد انك كنت باش تقتل روحك داخل البيت هذيكا...و مكنتش حتى باش نجم نشوفك مرة اخررى
عديت عينيا على وجهو...بقية الاسئلة قاعدة تدور في مخي...وين كان ليلتها و علاش ملك ردت على تليفونو حاجة كبست عليا...و منجمتش نسألو...عاودت حطيت راسي على صدرو من غير حتى كلمة اخرى...رغم التعب لي نحس بيهم في بدني الكل...اما منجمتش نبعد عليه منجمتش نلومو على حتى شي...عدا يدو على شعري يحكي
عمر:هيا يا روحي...لازمك تاكول حاجة
انا:منحبش
جبد روحو شوية...و نزل راسو غزرلي ندرا كيف...يحكي
عمر:باهي ايجا معايا
كبس على يدي قبل ما نقول حرف...و جبدني معاه لطاولة..ترمى عالكرسي قعد و جبدني في حملتو...بدني تكبس و معرفتش شنية نعمل بالظبط...رغم اللي نحس فيه الكل...اما نحب نبقى معاه و بين يديه...نحب نتأكد انو مراد ماهوش باش ياقف بيناتنا مرة اخرى...يدو لي قاعدة تمشي و تجي على ظهري...هداتني...هزيت راسي شوية...غزرتلو...نزل بصوابعو على خدي...يحكي
عمر:زهرة...يا روحي...قتلك و باش نعاودلك انا معاك و باش نبقى معاك لآخر نهار في عمري...منحبش لي صار يأثر على علاقتنا...منحبكش تتحسس مني
نزل بصوابعو برقبتي...لتراص العضة لي قعدت محفورة و مزلت نحس بالجرح متاعها...غزر لعينيا و كمل كلامو يحكي
عمر:اعطيني وجيعتك زهرة...خرج كلشي في قلبك ارتاح و رتحني...و وعد مني حقك باش يجيك
مديت يدي بالسيف...حطيتها على خدو...عديت صوابعي على لحيتو...لي هاجت اكثر اليومين هذوما...و طلعت بيها بخصلات شعرو...نحب نتأكد انو هو معايا بالرسمي...و ماهوش باش يبعد مرة اخرى...حاجة اقوى مني خلاتني نقربلو اكثر...و نحضنو بنفس درجة الخوف لي داخلي...غرس يدو في شعري...يحكي
عمر:حتى حد ماهو باش يفرقني عليك مرة اخرى
كلامو تالي...خلاني نكبس عليه بيديا زوز...منحبش نخمم في اللي جاي...و لا في شنوة اللي مزال باش يصير فينا اكثر من هكا...غمضت عينيا على ملمس شفايفو لي تحطو فوق تراص العضة بالظبط...تقشعيرة سرات في بدني...و قبل ما نستطعم الشعور البنين لي نحسو في كل مرة و انا معاه...صورة مراد حضرت في خيالي...كبست يديه...و اسنانو لي تغرست في كل قطعة من بدني...حسيت بيها مرة اخرى...ريحتو دخلت في خشمي كأنو موجود معانا هوني في الكوجينة للحظة حسيت اني بين يديه هو مش عمر...حسيت بشفايفو هو مش عمر...و رغم اني بين يديه...حضور مراد كان كافي و وافي...جبدت روحي في لحظة...من غير حتى ما نخمم مرتين...منعرفش على روحي...كيفاه وقفت و لا حتى كيفاش بعدت عليه...استندت بيدي عالطاولة نرد في نفس...هز روحو مستغرب...و قرب مني يحكي
عمر:زهرة...شبيك يا روحي ؟ شصااار ؟
هزيت راسي شوية غزرتلو...و نزلت بعينيا ليدو...لي يحاول يشدني بيها...جبدت روحي لتالي اكثر...و غزرتلو نحكي
انا:ل..لباس عليا
عمر:باهي...ايجا اقعد هوني
اول ما حط يدو على يدي...نطرتها منو...و قحرتلو نحكي
انا:قتلك لباااس عليا...متمسنيش...ابعد عليا و كهو
جبدت روحي اكثر...و خرجت من الكوجينة...ساقي اعلى من راسي...حتى الوجيعة لي في بدني محسيتش بيها...خليتو ورايا جامد في بقعتو...منعرفش على روحي كيفاش وصلت لصالة...ترميت عالفوتاي بجنب ريحان...و حطيت راسي بين يديا...دموعي قهرتني و نزلت مرة اخرى...خفت من الاحساس لي تملكني...خفت من اني نشوف مراد في كل مرة نقرب من عمر...خفت لي صار معايا...يبقى يتعاود ديما...من الحلمة الخايبة للاحساس متاع توا...يديه لي كبسو على يديا و شفايفو لي تحطو على راسي...خرجوني من حالة اللاوعي لي دخلت فيها...هزيت راسي شوية شوية...جات عيني في عينو...تبسملي بالوقت...و مد يدو يمسحلي في دموعي و يحكي فرد وقت
عمر:ششش يززي كهو...مش قلنا معادش فما دموع مرة اخرى ؟
انا:م..منقصدش لي صار بكري...منعرفش شبيني عمر ح..حسيت بيه...ح..س
نزل بصوابعو لشفايفي...سكتني و قرب مني...من اللي كان قاعد في الطاولة...قعد بجنبي...و جبدني عندو حطيت راسي على صدرو و غمضت عينيا بالوقت..كبس عليا يحكي
عمر:ششش يززي كهو...معادش تخمم في اللي صار مرة اخرى
انا:ح..حسيت بيه مرة اخرى
عمر:صدقني ياش تبرا منو يا زهرة...انا باش نداويك...و باش نخليك تنسى كل لحظة تعدات عليك و انتي معاه
انا:ن..نحب ننساه عمر...نحبو يخرج من حياتي و احلامي زادة...نحبو يخرج من غير ما ياخو حتى شي آخر مني
عمر:ماكش باش تخسر حتى شي يا روحي...اصلا مستحيل نخليه يوصلك و لا يقربلك مرة اخرى
كبست عليه بيدي و هزيت راسي شوية...نحاول ناخو نفس من ريحتو...من غير ما نغمض عينيا و لا نفكر في حتى شي آخر...نحب قرب عمر ينسيني في اللي تعدا عليا...نحب نطمن انو مهما صار احنا مناش باش نبعدو على بعضنا مرة اخرى...يدي لي كنت كابسة بيهم على صدرو...نزلت بيها ليدو...باسني من جبيني بالوقت...من غير ما يقولي حتى كلمة...اصلا هذا لي حاجتي بيه...دقايق تعدات...حسيت روحي تفرهدت شوية على قبل..هزيت راسي على صوت ريحان لي بدات تبكي...تلفت نغزرلها...ترفس بساقيها...و تحرك في يديها فرد وقت...دورت راسي على صوتو يحكي
عمر:ديما تفيق في الوقت المناسب الفرخة
انا:شبيك تحكي على بنتي هكا
عمر:هاني باش نسكتها بنتك
جبد روحو شوية لتالي وقف...و قرب منها هزها في حملتو...سكتت بالوقت...اصلا متأكدة لي ستانست بيها العادة هاذي منو هو...قربها عندو يبوس فيها...ضحكت بالوقت...عاود ترمى جنبي...و وقفها يحكي
عمر:شبيها صغرونتي...شبيك فقت تبكي
انا:احنا فيقناها وقت كنا نحكو
عمر:مممم باهي...مدامك فقت...باش تعاوني عالفرخة متاع امك
انا:بربي عمر ؟
عمر:يا روح عمر...مدام انتي متحبش تاكول...كيفاش يرجع حليبك مرة اخرى ؟
انا:في الحالتين ماهيش باش ترضع من عندي
عمر:جرب على خاطرها
هزيتلو براسي ايه..نعرف لي قاعد ياخو فيا على حساب عقلي...تبسمت كي ريتها تغزرلي و تضحك...مديت يدي شديتها من يدها...نحكي
انا:تعلقت بيك برشا
عمر:على خاطرها ديما ترقد معايا
انا:متقلقكش كي تفيق في الليل ؟
عمر:لا...اصلا قربها لي كان مصبرني عليك الفترة هاذي الكل
عديت عينيا على وجهو...تنهد بحصرة و نزل راسو يغزرلها...شوية شوية...دخلت في الجو...و بدات تعمل في الأصوات متاع العادة...تبسم يحكي
عمر:ولات في فورمة الفرخة
أنا:عمر
عمر:شنية عزيزتي ؟
انا:مش على أساس كنت باش توكلني
عمر:هههههه باهي يا روحي...خليك هوني مع ريحان تو نرجع
هزيتلو براسي ايه...حطها في حضني...ياسني من خدي و هز روحو خرج من الصالة...تنهدت بقوة...و غزرت لريحان مرة اخرى...حبيت نخبرو باللي عرفتو من امي قبل الكارثة هذيكا...اما لي ريتو في عينيه خلاني نبلع الكلام لي باش نقولو...منحبش نخليه يوحل مع مراد في مشاكل أخرى...كان لازمني نحكي كلشي لسليم أكيد باش يتصرف بالطريقة الصحيحة...كيفاش باش نوصلو و لا حتى نحكي معاه منعرفش...اما لازمني نوصل المعلومات لي عندي في اقرب وقت...مراد كان عندو حق في كلمة وحدة...انا و هو وصلنا لنهاية...و معادش فما رجوع منها...اما المرة هاذي باش تكون نهايتو وحدو...انا باش نكون حاضرة على اللحظة لي باش ينهار فيها و يسلم في كلشي عندو...وقتها برك تجم نسترجع روحي لي ضاعت مني...و نسترجع عيلتي مرة اخرى...و اهم شي اني نسترجع الحاجات الباهية لي سرقها من حياتي...و اهم الحاجاات هذوما...هو حبيبي عمر