زهرة🌸

الحلقة مئة و الثالثة و الثلاثون

حلقة 133
بعد 3 أشهر :
زهرة تحكي:
هزيت راسي شوية...عديت عينيا عالكلاصة لي بدا منها كلشي...متوقعتش باش ندخل لهوني مرة أخرى..تبسمت بالوقت...بعد عامين تعدات...لقيت روحي في نفس البلاصة...البلاصة...لي بدات فيها قصة حبي...بدا فيها عشقي لعمر...و كبر مع الوقت...و نتيجتو كانت احلى بنت في دنيا...الشهور هذوما...كانو احلى شي عشتو توا...متوقعتش انو الليلة لي جمعتنا آخر مرة...باش تخلق أكبر فارق في علاقتنا...نعرف حرمتو و حرمت روحي...من اني نعيش معاه كلشي...اصلا لي مخليني قوية لتوا...هو وقفتو ورايا...السند لي يشد جنبي في كل مرة نفقد توازني...فقت من سرحتي على صوتها...تحكي
مريم:باش تبقى برشا عند الباب ؟
تبسمت بالوقت...و تلفت عندها نغزرلها...كابسة على كرشها...رغم عندهم خمس شهور كهو...اما عاملين فيها...حطيت يدي على كرشها نحكي
انا:صباحو...لاحلى توأم في دنيا
مريم:صباح الخير...لأحلى خالة
انا:ايجا اقعد عزيزتي
مريم:نحب نقعد في بلاصتنا متاع العادة
انا:اكيد
دخلت معاها...بروح جديدة...برشا ذكريات تعدات علينا هوني مع بعضنا...و تعديناها وحدة وحدة...بحلوها و مرها...جبدتلها الكرسي...قعدت...و قعدت بجنبها نحكي
انا:نحس في روحي غريبة هوني
مريم:بالطبيعة...كلشي تبدل على قبل
انا:كان احنا
مريم:الظروف كانت اقوى منا...حتى منحبش نتذكر لي تعدينا بيه جملة
خذيت نفس...كبست على يدها...غزرتلها...و تبسمت نحكي
انا:وفاات...بعد توا معادش فما خسارة يا روحي...حتى هوكا باش يوليو عندك زوز صغاار محلاهم
مريم:نعرف عزيزتي...ساعة ريحان شعاملة فيك
انا:لتوا تخرج في الاسنان...على هذاكا تاعبة شوية
مريم:يا روحي...و شنية صار مع الطبيبة ؟
انا:فما احتمال نحبل من جديد...اما النتائج تظهر بعد ما نكمل الدوا
مريم:متخافش يا روحي...باش تتعدى هاذي زادة
هزيتلها براسي ايه...متوقعتش باش تطلع عندي مشكلة هكا...اما متأكدة لي باش يولي عندنا صغير...كان مش توا...مبعد...ضيقت عينيا عالضجة لي عاملينها لبنات لي ورايا...على خاطر البروف لي باش يقريهم...تبسمت نحكي
انا:تسمع فيهم ياخي ؟
مريم:زعمة شكونو ؟
انا:منعرفش...اما عالاكيد جديد...مدام مقراوش عندو قبل
مريم:زعمة ميطلعش عمر ؟
انا:اكييد لا...علاش حتى يرجع يقري هوني
مريم:نظن مفماش حد احسن منو في المجال هذا
انا:نعررف...اما اكيد ماهوش باش يرجع...و الا خبرني زيد شوف كيفاش يحكيو على البروف هذا زح
مريم:زهرة عزيزتي...هوما قاعدين يحكيو على راجلك
هزيت حاجبي مستغربة...و تلفت ورايا...نغزرلو واقف بحذا الباب...قلبي خض بالقاوي...آخر حد توقعتو هو اصلا شبيني منعرفش لي هو باش يرجع يقري...ضربت يدي عالطاولة...و تلفت عندهم قحرتلهم...و عاودت غزرتلو...نحكي
انا:شيعمل هوني ؟
مريم:بروفنا الجديد عزيزتي
انا:بروف شنية مريم...شو كيفاه يحكيو عليه من بكري
مريم:هدي روحك عزيزتي...تعرف لي عمر ماهوش باش يسمع الكلام هذا
انا:شو كيفاه تغزرلو السخطة
مريم:زهررة...يززي عزيزتي
هزيت راسي قحرتلو...دقايق خلاني فيهم على أعصابي كبست على يدي...و انا نغزرلو كيفاه قاعد يعرف بروحو و يتعرف عليهم فرد وقت...خذيت نفس نحكي
انا:مريم...ياخي شنية لي قاعد يصير ؟
مريم:لي يصير بالعادة عزيزتي...هدي روحك
انا:باهي...هاني باش نهدي روحي
عمر:تفضل مدموزال...عندك اسئلة ؟
انا:عندي
عمر:نسمع فيك
مريم:زهرة
انا:اما منظنش تنجم تجاوبني عليها قدامهم
قرب مني شوية وقف قدامي...غزرلي ندرا كيف...يحكي
عمر:قوم
هزيت روحي وقفت...رجعني لموقف...تعديت بيه عامين لتالي...خذيت نفس نحكي
انا:تفضل مسيو عمر
عمر:شبيك على اعصابك ؟
دورت راسي...نغزرلهم كيفاه مركزين معانا... كبست على يدي نحكي
انا:كان تحب نجاوبك بعد الدرس
عمر:ملا ركز مع الدرس
انا:باهي
نزلت راسي و قعدت...نفرك في يديا زوز...ساعتين لي تعداو...حسيتهم دهر...حتى مريم ما قالت حتى كلمة سكر البيسي متاعو...يلم في اوراقو...هز راسو غزرلي يحكي
عمر:ايجا هوني
انا:تقصد فيا انا ؟
عمر:مممم تفضل
غزرت لمريم و هزيت روحي وقفت..قربت منو بخطوات رزينة...وقفت قدامو بالظبط...غزرلي ندرا كيف يحكي
عمر:شنية تحب تسأل ؟
قربتلو أكثر...كبست بيدي عالبيرو...و قحرتلو...نحكي
انا:في دارنا احسن
عمر:شبي حبي...لهدرجة خفت يسمعوك ؟
انا:لا...اما دخولك المفاجئ...و فوق هكا تقولي مدموزال مع اني مرتك...خلاني نسكت...يمكن متحبش يعرفو لانت معرس
كبس على يدي في لحظة...غزرتلو مستغربة...جبدني عندو...وقفني بجنبو يحكي
عمر:قبل ما نخرج نحب نعرفكم على اهم شخص خلاني نرجع لهوني
عديت عينيا على وجهو...متوقعتش الفازة منو...تبسملي يحكي
عمر:زهرة حسيني...مرتي
كبست على يدو...مع دقات قلبي لي قوات...عديت عينيا عليهم...يغزرولي بحيرة...كان مريم لي تضحك في وسطهم...قربتلو شوية...نحكي
انا:عرفت تنقذ روحك مني عزيزي
عمر:انتي كيفاش تنقذ روحك مني...هذا الأهم
انا:خلينا نمشيو من هوني...منجمش نتحمل غزرتهم أكثر
عمر:احسن...على خاطر لي نخمم فيه توا...ميجيش لبالك
نزل بعينيه لشفايفي...ضحكت بالوقت...و جبدت روحي منو...رجعت لبلاصتي...هزيت صاكي...و عاونت مريم تاقف...خلطنا عليه بالوقت...خليتو يحكي مع الأساتذة لي عرضولو...و مشينا للكرهبة...ضحكت و غزرتلي تحكي
مريم:ارتحت توا ؟
انا:صراحة لا...هاك ريت قداش مهتمين بيه
مريم:قبل ما يعرفو لانتي مرتو
انا:منعرفش يا مريم...وليت نخاف من كلشي و من كل احتمال...يبعدني عليه
مريم:متخافش يا روحي...اللي فات ماهوش باش يرجع...طمن...و زيد اهتمامو بيك واضح لينا الكل
انا:باهي هاني باش نوسع بالي...خاصة كي يعرضولو بنات هكا
نفخت بالقاوي...و انا نغزرلو يحكي معاهم...مصمم باش يخليني على أعصابي...دورت راسي على صوت الكرهبة...نغزر لحسام...لي نزل عندنا...قرب منا...يحكي
حسام:لباس زهرة ؟
انا:لباس حسام عيشك
حسام:طولت عليك عزيزتي ؟
مريم:لا يا روحي...يكثر خير صاحبك...تعرفو يكمل الوقت لتالي
هز راسو يغزرلو...ضحك بالوقت...و عاود غزرلي يحكي
حسام:نجم نتوقع لي صاحبي في ورطة
مريم:حساام...يزي يا روحي
حسام:تحب ناديلو ؟
أنا:خليه هوكا ماخو راحتو عاللخر 
حسام:ربي معاه
مريم:حسام عزيزي يزي
حسام:باهي هاني سكت
أنا:هوكا شرف سي الأستاذ
ضيقت عينيا و أنا نغزرلو...قرب من حسام...ضربو لكتفو يحكي
عمر:أهلا بيك
حسام:والله كنت باش نرحب بيك...أما نظن عندك حاجات أهم توا
دور راسو غزرلي...عديت يدي على رقبتي...نهدي في روحي...تبسم يحكي
عمر:ملا نستأذن منكم من توا
حسام:مسامح صاحبي...إيجا عزيزتي
مريم:رد بالك على روحك عزيزتي
أنا:و إنتي زادة يا روحي
تبسمتلها...و دورت راسي غزرتلو...قرب مني شوية يحكي
عمر:نمشيو إحنا زادة ؟
أنا:مممم نمشيو
تلفت عطيتو بظهري...حليت الباب و ركبت..حط البيسي من تالي...و خلط عليا...خدم الكرهبة من غير حتى كلمة نفخت بالقاوي نحكي
أنا:باش تبقى ساكت ؟
عمر:شنية تحبني نحكي ؟
أنا:منعرفش...مثلا على لبنات لي كنت واقف معاهم بكري
عمر:نعاودلك الأسئلة متاعهم ؟
أنا:عممرر...ياخي مصمم باش تحرقلي أعصابي
عمر:متستهلش الحكاية...باش تحرق أعصابك عليها
أنا:تستهل...و هاني باش نقلك توا...مفماش ايميلات و ماكش باش تعطي نومروك لحد...مفهوم
عمر:فما أوامر أخرى ؟
أنا:هاك تقلقت من كلامي...أصلا الحق عليا...قاعدة نحكي معاك
عمر:زهرة عزيزتي يززي
أنا:شنوة لي يزي...تحبني نطفي الضو عالكلام لي سمعتو
عمر:شنية سمعت ؟
أنا:ريت البروف لي يقرينا محلاه ؟ زعمة باش يكمل معانا العام ؟ يطلعشي معرس ؟ تحبني نزيدك سي عمر
عمر:باهي أنا شنية ذنبي ؟
أنا:منعرفش...أما منجمش نتحمل لي صار كل مرة..حتى بعد ما قلت لأنت معرس...قعدو في جرتك
عمر:ملا تحبني نقدم استقالتي ؟
أنا:منقصدش....أنسى الكلام لي قلتو الكل...من غير ما تاخو عليا
خذيت نفس و دورت وجهي عليه...منحبش نغزرلو...من غير شي نحس في روحي تاعبة...شي من مشكلة الحبالة لي تخلفت بعد ما ولدت ريحان...و معرفتش بيها كان آخر فترة...و لي صار قبيل تعبني أكثر...رغم رجوعو معايا...خلاني نرتاح...وجودو يعطيني حافز أكبر...باش نجم نكمل آخر عام...خذيت نفس نحكي
أنا:شبيك اخترت الثنية هاذي ؟ مش على أساس باش نمشيو لأمي نهزو ريحان ؟
عمر:خليها...مبعد نتعداو ليها
أنا:باهي وين ماشيين توا ؟
عمر:كي نوصلو تعرف
أنا:مش هاذي ثنية لي تاخو لدار حسام
عمر:مممم
أنا:ماشيين بحذاهم إحنا ؟
عمر:لا
أنا:يظهرلي كلامي قاعد يقلق فيك...هاني باش نسكت احسن
تكيت لتالي...من غير حتى كلمة...منعرفش شبيه اليوم بالظبط...خاصة بعد ساعتين لي قرا فيهم...رغم كلشي رجع أحسن من أول..أما وليت خايفة من كل ثغرة ممكن أنها تفرقنا مرة أخرى...فقت من سرحتي كي وقف الكرهبة...و غزرلي يحكي
عمر:أنزل
هزيتلو براسي ايه...من غير ما نحاول نفهم أصل الحكاية...خلطت عليه نمشي وراه...نغزر لدار لي ماشي و يقرب منها...كبست على يدي نحكي
أنا:علاش جينا لهوني ؟
عمر:إيجا تو تعرف
نزلت راسي نغزر للمفاتح لي في يدو...ضيقت عينيا مستغربة...حل الباب و تلفت عندي يحكي
عمر:تفضل
أنا:شنوة لي قاعد يصير ؟
عمر:هيا عزيزتي
عديت عينيا على وجهو...و دخلت...مستغربة...حتى منجمتش نستوعب لي قاعد يصير...خلط عليا...و سكر الباب وراه...وقفت في نص الصالة...تي هوكا الدار حاضرة من كلشي...كأنو ليها ناسها...علاش جينا لهوني منعرفش...تلفت عندو نحكي
أنا:علاش إحنا هوني ؟
عمر:مش كأنو أسئلتك كثرت اليوم ؟
أنا:عالأقل جاوبني توا...و مانيش باش نعاود نسألك
قرب مني شوية...عدا يديه زوز على زنودي...غزرلي ندرا كيف يحكي
عمر:نعرف خليتك على أعصابك اليوم...أما توقعت مفاجأتي باش تعجبك
أنا:حبيتها...أما محبيتش لي صار...حتى كان غالطة في الموضوع...أما عندي حق
مد يدو شوية...عدا صوابعو على خدي...و تبسم على جنب يحكي
عمر:مهما كان لي سمعتو...عيني متغزرش لغيرك
أنا:ملا شبيك مطفيني من بكري ؟
عمر:على خاطرني حبيتك تخرج غشك و ترتاح
أنا:كان باش يبقاو في جرتك مانيش باش نرتاح جملة
عمر:متخافش أنا رجعت جيست على خاطرك...حتى ما شديت حتى كلاصة أخرى من غير كلاصتك و الدكتوراه
أنا:بربي...هذوما مش برشا معناها
عمر:صغرون...خلينا في الأهم توا
أنا:هانا فيه...سي عمر...حتى وحدة ما عندها حق تحكي معاك برا الكلاصة...مفهوم ؟
جبدني من يدي...لصقني فيه...و نزل عليا شوية...يحكي
عمر:مفهوم...إرتحت توا
أنا:مزلت على أعصابي
عمر:لطف على حبي
جيت باش نحكي...سكت على حطة شفايفو فوق شفايفي...لي خلاوني نهدا بالوقت...دوب باسني و جبد روحو يحكي
عمر:اهدا توا
أنا:باهي...منقصدش نعصب عليك بالطريقة هاذي
عمر:ساعة شقولك في دار ؟
ضيقت عينيا مستغربة من سؤالو...للحظة نسيت وين إحنا...خذيت نفس نحكي
أنا:صحيح وين إحنا ؟
عمر:في دارنا
أنا:دارنا ؟
دورت عينيا على كل تركينة...نستوعب في كلامو...و عاودت غزرتلو نحكي
أنا:عمر شقصدك بدارنا ؟
حاوط وجهي بيديه زوز...و نزل راسو شوية...يحكي
عمر:الدار هاذي...باش تكون دارنا الجديدة
أنا:يعني باش نعيشو هوني ؟
عمر:مممم عايلتنا قاعدة تكبر...نحبك تكون مرتاحة إنتي و ريحان...و صغارنا لي في الثنية
أنا:باش يولي عندنا صغير آخر ؟
عمر:باش يولي يا عمري
ضحكت بالوقت...منعرفش علاه حسيت روحي تفرهدت تنهدت بالقاوي نحكي
أنا:نحب نشوف الدار
عمر:تفضل يا روحي
جبدت روحي منو...ندور في الصالة...و نحكي فرد وقت
انا:إحنا في نفس الشارع متاع حسام ؟
عمر:بالظبط...هكا تبدا قريبة من مريم...مدامكم باش تقراو مع بعضكم
رجعت عندو بالوقت...ترميت في حملتو...حطيت راسي على صدرو نحكي
أنا:محلااك عممر..أما شنية باش يصير في دارنا لأخرى ؟
عمر:دارنا لأخرى...باش تبقى سبيسيال لينا إحنا يا روحي
أنا:عيش حبي
عمر:متحبش تشوف باقي الدار ؟
أنا:نحب
عمر:هيا ملا
كبس على يدي...و جبدني معاه...طلعت الدروج بجنبو نعدي في عينيا على كل تركينة...دور راسو غزرلي يحكي
عمر:حاضرة ؟
هزيتلو براسي ايه...كبس على يدي و حل الباب...دخلت وراه...نغزر لبيت ريحان...متوقعتش باش تكون هكا غزرتلو مصدومة نحكي
أنا:إمتى حضرت هذا الكل ؟
عمر:حبيتها ؟
أنا:عاللخر...حتى ريحان باش تتفرهد فيها أكثر
عمر:نعرف يا روحي
دقايق عديتهم ندور في بيتها...حبيت تفاصيلها الصغيرة...دورت راسي نحكي
أنا:نحب نشوف بقية البيوت
قرب مني شوية...غزرلي ندرا كيف...و نزل بصوابعو على خدي يحكي
عمر:مممم تتعرف عليهم مبعد
انا:علاش ؟
عمر:توا عندنا حاجة أهم برشا
أنا:شنوة ؟
عدا صوابعو على خدي...و نزل بيهم لشفايفي...يحكي
عمر:تحب تعرفهم
صوابعو لي نزلت لرقبتي...و يدو لي حطت شعري على جنب...خلاتني نعرف وين يحب يوصل...تبسمت نحكي
أنا:كأني عرفتهم
عمر:إيجا ملا
نزل عليا في لحظة هزني بين يديه...ضحكت بالوقت و كبشت في رقبتو...نحكي
انا:فاش تعمل ياخي ؟
عمر:في اللازم يا روحي...ساعة نحس في روحي متوحشك عاللخر...و نحب ننتقم من تخرنينك متاع بكري
أنا:بربي...هكا نهون عليك أنا
كبس عليا اكثر...و خرج من بيت ريحان...دخل للبيت لي بجنبها...و رد الباب بساقو يحكي
عمر:ملا أنا نهون عليك
أنا:باهي نزلني تو نتفاهمو
حطني عالارض بالسياسة...و كبس على يدي فرد وقت قرب ليا أكثر...بعدلي خصلات شعري بيدو لأخرى يحكي
عمر:اليوم بالظبط...نحب تكون هاذي أول خطوة لحياتنا الجديدة...معادش نحب نشوفك في الحالة متاع اليوم و معادش نحبك تتغشش مني...و لا حتى تبعد عليا نعرف يمكن جينا ايامات صعيبة...أما حتى هي باش نتعداوها مع بعضنا...على هذاكا نحبك ديما معايا و بجنبي
كبست على يدو...و هزيت عينيا في وجهو...خذيت نفس نحكي
أنا:إحنا مع بعضنا ديما عمر...أما نظن وقيت باش تمشي تزور بوك...و أمك
جبد روحو مني...وخر خطوة لتالي...و كبس عالبونية متاعو يحكي
عمر:مش على اساس سكرنا الحكاية هاذي ؟
قربت منو شوية...كبست على يدو و جبدتو معايا...قعدتو على طرف السرير...و قعدت بجنبو نحكي
انا:عمر يا روحي...مدامنا باش نبداو من جديد...معناها لازمنا ندفنو الماضي...نعرف بوك غلط برشا...اما زادة خذا جزائو...ميسالش...مرة وحدة طل عليهم...و خليهم يشوفو ريحان زادة...حتى أمك راهي حست بالغلط متاعها
عمر:زهرة يززي عزيزتي
حطيت يدي على خدو...دورت وجهو لعندي...و تبسمت نحكي
انا:عمر حاول مرة وحدة على خاطري...و كانك عليا...انا سامحتهم زوز...ليا برشا
كبس على يدي...باسني منها...و تنهد بالقاوي...يحكي
عمر:شنية عملت فيا إنتي ؟
أنا:لتوا ما عملت شي أنا
عمر:صاار
أنا:ممممم
هزيت روحي شوية...قعدت في حجرو...و عديت صوابعي على رقبتو...نحكي
انا:هاني باش نعمل توا
عمر:وريني ملا
عديت عينيا على وجهو...غزرلي ندرا كيف...نزلت بيديا زوز...لأكتافو...كبست عالفاست متاعو...قربت لشفايفو و جبدت روحي في آخر لحظة...تبسم على جنب...و كبس على ظهري من تالي...يحكي
عمر:فاش تعمل ياخي ؟
تبسمت على جنب...و نزلت عليه شوية...بستو من رقبتو...و قربت نحكي في وذنو
أنا:شنوة سي عمر...مش على أساس تحب تنتقم مني...و لا فيسع سلمت
عمر:تحب تتأكد ؟
قربتلو أكثر...لين حسيت بشفايفو فوق شفايفي بالظبط تبسمت نحكي
أنا:خليني نتأكد
حسيت بيديه زوز...لي تحطو تحت مريولي...كبس على أجنابي...يحكي
عمر:يمكن ماهوش باش يعجبك برشا
أنا:جرب
ضحك بالوقت و غرس صوابعو في جنبي أكثر...غمضت عينيا بقوة الكبسة...قربلي اكثر...يحكي
عمر:هاني باش نجرب السرير هذا قبل كلشي في دار
أنا:زايد متحشمش
عمر:الله غالب يا روحي
قص ضحكتي...كي قلبني في لحظة...غطست في وسط الفرش...حليت عينيا نغزرلو...حصرني تحتو يحكي
عمر:ملا ماكش خايفة مني
عديت يديا زوز على صدرو...دزيتو لتالي...و استندت بيديا عليه...قربتلو اكثر...نحكي
انا:انا منخافش منك...بالعكس كل لحظة قاعدة نحب فيك أكثر
عمر:نمشيش نحسد روحي عليك
انا:هاني انا حاسدة روحي عليك انت...و على كل غزرة منك
سكت مع كبسة يدو على شعري...شفايفو لاخترقت شفايفي مرة أخرى...لزيت ليه أكثر...فرد وقت نتحسس في صوابعو...لي سارحة فوق ظهري...قص علينا صوت تليفونو...جبدت روحي شوية نغزرلو...عدا يدو على وجهو...يرد في نفس ورا بعضو...نفخ بالقاوي...يحكي
عمر:شكون هذا توا
انا:بلكشي تليفون مهم
عمر:مفماش أهم من اللي انا فيه
نزلت على شفايفي...و جبدت روحي شوية...نحى الفاست متاعو...و جبد تليفونو...يحكي
عمر:وقتك أنت توا
انا:شكون ؟
عمر:من السوسيتي
انا:رد عليهم
سكر تليفون و طيشو عالتابل دونوي...غزرتلو مستغربة نحكي
انا:علاش عملت هكا ؟
تلفت عندي...غزرلي ندرا كيف...و يحل في سوريتو فرد وقت...يحكي
عمر:وين كنا احنا ؟
انا:لاا انت معادش فيك
عمر:نعرف يا عمري
جبدني من يدي...و نزل عليا...هزيت راسي...على مريولي لي تنحى في لحظة...طيشو من يدو...يحكي
عمر:كلشي ينجم يستنى في حضروك
انا:مش هذا كان رايك...وقت كنت تلميذتك
عمر:و مزلت تلميذتي يا فرخة...حتى باش نولي نطبق قاعدة التأخير جرايرك
انا:بربي...شنية ذنبي انا ؟
عمر:ذنبك واضح...أما رغم انك مذنبة حكمت عليا انا
انا:مهما كان ذنبي...مفما حتى شي...يضاهي حبي ليك
مديت يدي شوية..حطيتها على رقبتو من تالي...جبدتو عندي أكثر...نحكي
انا:نحبك عمر
عمر:و أنا نموت عليك يا عمري
غمضت عينيا..و غطست معاه في بوسة طويلة...رغم الليالي الطويلة لي عديناها مع بعضنا...و رغم انو 3 شهور هذوما ما فلت حتى لحظة تجمعني بيه..اللحظات هذوما كانو اقوى من كلشي...الدقائق لي جمعتنا في دارنا جديدة...و في سريرنا جديد...كان عندها طعم آخر...كانو بداية لكلشي في حياتنا...لعلاقة جديدة لحياة جديدة...لحب اقوى...كبست عليه بيديا زوز...بقوة الأحاسيس لي تملكتني...احاسيس منعرفش و منجمش نعيشها من غيرو هو و كهو...دقايق سكرنا فيهم أبواب الماضي...لمستقبل جديد...عالم ما فيه حتى حد غيرنا إحنا...إحنا و كهو

#زهرة_عمر ❤❤❤
#زهرة 🌸🌸🌸
#سمر💙💙💙