🔸️حلقة 33
🔸️زهرة_تحكي:
طلعت راسي نغزرلو...من غير ما نزل عينيا من وجهو تعدات اللحظات اللي عشتها معاه في لحظة...من اول مرة ريتو فيها...من وقت حليت عينيا عالدنيا بالقدا و بديت نفهمها...هو كان معايا في كل خطوة...تمنيت كان بقى كيما عرفتو من قبل...مراد اللي عطيتو يدي و وثقت فيه...تمنيت كان موصلناش لهوني...قد ما كرهتو مزال فما شي داخلي...يقولي هذا اللي قاعدة تغزرلو مدلك يدو وقت امك خلاتك...وقت كنت محتاجة لسند في حياتك...تكيت عليه هو...مستحيل يكون نفسو مراد اللي مقابلني توا...باقي يغزرلي بنفس الغزرة من سنين مهما لعبت بينا الدنيا...عمري ما حسيتو كرهني...مع انو كرهني في روحي و عيفني في حياتي...ساعات نحسو انسان مريض و مقربع في مخو...يعمل اي شي باش يوصل للي يحب عليه وكهو...فقت من سرحتي على صوت القاضي...غزرت لمدام نورهان بالوقت...طمنتني بغزرتها...تلفت عندو شوية نغزرلو يقرا في تقرير...و طلب الطبيبة للمنصة باش تشهد...قلبي دق بالوقت قداش تقززت منها و عفتها...و خفت كان تشهد المرة هاذي لصالح مراد زادة...اول ما وقفت غزرتلو...هزلها براسو ايه...استغربت الفازة منو...كبست على يدي و انا نسمع فيها تحكي
هي:ح حضرة القاضي...ا انا زورت تقرير الاول...مع انو مدموزال زهرة....كانت صبية اما انا كتبت عكس هكا
هو:شنوة السبب لي خلاك تعمل هذا الكل ؟
هي:وصلني تهديد من ع عند سي مراد...من خوفي معرفتش نتصرف...صدقني كنت باش نخبرها الحقيقة اما خفت على روحي و على ولدي
هو:سي مراد عند تعليق على كلامها
مراد:لا
هو:ماكش باش دافع على روحك
مراد:لا
يحكي و عينو في عيني...مفهمتش شنوة يقصد باللي يعمل فيه...خاطرني متأكدة كان ينجم يحبسها و لا حتى يمنعها جي لهوني...نسمع في القاضي يحكي
هو:تحب تزيد حاجة ؟
هي:لا
هو:باهي تفضل لبلاصتك
هي:باهي
هو:بما انو مفما حتى علاقة بينك و بين الاستاذ متاعك شنية تفسر علاقتكم لي في الصور...و مدامك خرجت من داركم في نص ليل وين مشيت ؟ و وين قاعدة توا ؟
دورت راسي غزرت لمدام نورهان...هزتلي براسها باش نجاوب...هزيت روحي وقفت...جيت باش نحكي...قص عليا صوت الباب...نغزر لشكون دخل يحكي
هو:سامحني حضرة القاضي...اما فما شكون يحب يحضر الجلسة
القاضي:خليه يتفضل
عينيا وساعو و انا نغزر لمحمد و امي فتحية داخلين مع بعض...مفهمتش شنية لي قاعد يصير بالظبط...اخر حد توقعتو...انو محمد يجي توا...غزر للقاضي يحكي
دالي:عندي ما نحكي حضرة القاضي
غزرت لعمر...لي باقي يتبع فينا بعينيه...من غير حتى كلمة...حتى حسام لي قاعد بحذاه حسيتو استغرب...هز القاضي يدو يحكي
هو:تفضل
قرب شوية...وقف في النص...غزرلي ندرا كيف...و تلفت للقاضي...هزلو براسي باهي...يحكي
هو:شنية علاقتك بزهرة حسيني ؟
دالي:خطيبتي
حليت فمي شطر...نغزرلو مصدومة...دورت راسي شوية غزرت لعمر...غزرلي ندرا كيف...مصدوم من اللي يسمع فيه...ما نجمت نغزرلو اكثر...حتى مراد حسيتو مصدوم من اللي سمعو...و مدام نورهان زادة...غزرلي القاضي يحكي
هو:صحيح لي يحكي فيه ؟
كبست على يدي...و هزيتلو براسي ايه...مكانش عندي حل اخر...غير اني نوافق على كلامو...خذيت نفس نحكي
انا:ص..صحيح
هو:و شنية تفسر علاقتك بالاستاذ عمر...و عند شكون قاعدة توا ؟
دالي:قاعدة في دارنا...بحذا امي...و مفما حتى علاقة رسمية بينها و بين عمر...هو البروف متاعها...و صديق العيلة...اللي في الحكاية الكل انو هو عاونها...خاطر نهار خرجت من دارهم مكنتش في تونس...و وقت مشات عندو هو جابها عند امي
هو:من امتى تعرفها ؟
دالي:من ست شهور...تقابلنا في لفاك
هو؛قداش عندكم مخطوبين
دالي:3 شهور
هو:شنوة تعليقك مدموزال زهرة
انا:كلامو صحيح...انا عرفتو في لفاك من فترة...و تعرفت على عيلتو زادة...امي فتحية و حسام...و حتى خالتي نعيمة
دالي:كان تحب افتح تحقيق في القضية...و في رايي حتى امي عندها ما تقول
هو:تفضل مدام
تلفت عند امي فتحية...نغزرلها كيفاش وقفت بالسيف وخر محمد لتالي...و خلاها تحكي
فتحية:زهرة كيما بنتي و اكثر...و ما عندي حتى شك في الكلام لي تقول فيه...خبات عليا الحكاية و هي عايشة عندي...مش على خاطر كذبت لا...اما حشمت حشمت من برشا حاجات تحكيهم قدامي...خافت لنطردها من داري بعد ما نعرف الحكاية...زهرة من أول نهار خرجت من دارهم جات عندي...و من نهارتها كيفها كيف ولادي الزوز...و علاقتها بعمر كيما الخاوة بالظبط وهو واحد من ولادي..و حتى هو عرسو الأيامات هذوما و زهرة باش تكون لولدي محمد
دورت راسي غزرتلو ندرا كيف...منعرفش علاه كلامها تالي دخلني بعضي أكثر...قعدت بالوقت...من غير حتى كلمة...حطت يدها على يدي تحكي
نور:اهدا عزيزتي...القضية تمشي لصالحك...متخافش
هزيتلها براسي إيه...رجعت أمي فتحية لبلاصتها...نسمع في القاضي...يحكي
هو:القرار
وقفنا الكل فرد مرة...طلعت راسي غزرت لمراد...لي واقف من غير حتى كلمة...حتى المحامي متاعو ساكت على غير العادة...باقي القاضي يحكي
هو:بحسب المادة ¤¤¤¤ في قانون العقوبات التونسي و بحسب الفقرة ¤¤¤ من محاولة المتهم مراد بن عيسى التحرش الجنسي من ابنة زوجته...زهرة الحسيني...تم القرار بسجنه لمدة سنة مع دفع غرامة مالية تقدر ب
¤¤¤¤¤¤¤ رفعت الجلسة
بقيت جامدة في بلاصتي...مش مصدقة لي سمعتو ضحكت بالوقت...و انا نغزرلو...تبسملي ندرا كيف...باقي يغزرلي....مش مقلق من اللي صار حتى طرف...مركزتش معاه برشا...تلفت عند مدام نورهان بالوقت...حضنتها بالقاوي...نحكي
انا:ربحت طاطا نورهان...سمعت القاضي شقال ؟
نور:سمعتو يا روحي مبروك
جبدت روحي منها...اول ما نزلت الدرجة...لقيت مريم في وجهي...حضنتني بالوقت تحكي
مريم:مبروووك يا روحي...مش قتلك باش يوفا هذا الكل
جبدت روحي منها هزيتلها براسي إيه...حضنت أمي فتحية بالوقت نحكي
أنا:مرسسي برشا أمي ربي يخليك ليا
فتحية:مزال حسابك عندي...هكا تخبي عليا
أنا:سامحني
محمد:مبروك
أنا:محمد
دالي:دلل
جبدت روحي منهم...و قربت منو شوية...حضنتو نحكي
أنا:مرسسسي برشااا على كلشي
حط يدو على ظهري...و تنهد بالقاوي...يحكي
محمد:بينتناش...متنساش إنتي وحدة منا
أنا:عيش خويا...ربي يخليك ليا
جبدت روحي منو شوية...كي قرب منا حسام يحكي
حسام:شنوة لالة...كأنك نسيتنا
انا:ح..حسام
هز يدو حطها على شعري...و تبسملي يحكي
حسام:ريت كلشي باش يتحسن
هزيتلو براسي ايه...باقي كابسة على يد مريم غزرتلو باقي واقف في بلاصتو...يغزرلي من بعيد جبدت روحي منهم...و قربت منو بالزربة...ترميت في حملتو...حضنتو بالقاوي...نحكي
أنا:عمممر
دموعي نزلو بالوقت...هز يدو غرسها في شعري...كبس عليا...يحكي
عمر:ششش وفات...من اليوم إنتي حرة
أنا:ل لا مانيش حرة...مش قتلي أنا متاعك
كبس عليا أكثر...لين معادش مسافة بينا...تنهد بالقاوي يحكي
عمر:تعرف حاجة
أنا:شنوة ؟
عمر:نحبك و نموت عليك زادة
أنا:و أنا زادة
منعرفش علاه منجمتش نخرجها الكلمة...يمكن مزلت خايفة من اللي باش يصير...جبدت روحي منو وقت ذكرت لي مازلنا في الصالة...حتى من القاضي...خرج قبيل...تلفت عندهم لقيتهم الكل يغزرولنا...دورت راسي نغزر لامي باقي قاعدة في بلاصتها تغزرلي جبدت روحي منو...و قربت وقفت قدامها نحكي
أنا:يا ريتك صدقتني مرة وحدة كهو...يا ريتك وقفت معايا و ساندتني...مكنتش باش ننقم عليك و على روحي لهدرجة...كنت عذرتك و عديت لي عملتو فيا إنتي ماكش امي...و عمرك ما راح تكون أمي...لا إنتي حسستني إني بنتك و لا أنا حسيتك أمي...و مستحيل نجم نسامحك...و لا حتى نقلك امي مرة اخرى...أنا لقيت عيلتي لي قاعدة نلوج عليها من بكري و إنتي برا استناه لين يخرج...خاطر نعرف و متأكدة لانتي ماكش مصدقتني...و مزلت تاثق فيه هو...ربي معاك ملا
بقات تغزرلي من غير حتى كلمة...دموعها محصورين...و كابسة على يديها زوز...نعرف و متأكدة...لغايضها مراد أمي مش تحبو و كهو...روحها معلقة بيه...و رغم لي صار الكل...اما مزالت تحبو...حبت راجلها اكثر...ما تحب بنتها...على هذاكا و صلنا لهوني...جبدتني مريم من يدي بالوقت تحكي
مريم:متخدمش مخك بالحكاية هاذي توا...لازمك تبقى فرحانة باهي
هزيتلها براسي ايه...قربت وقفت بحذا عمر...نغزر لزوز بولسية لي واقفين ورا مراد...و هو يمشي قبلهم...وقف قدام عمر بالظبط...يحكي
مراد:باش نتقابلو مرة اخرى...رد بالك عليها
غزرلي ندرا كيف و خرج...كبست على يدو...باش ما يحكي حتى شي...خرجنا وراه بالظبط...بقيت نغزرلو ماشي و يبعد...زعمة وفات حكايتنا هوني ؟ زعمة معادش فما كابوس إسمو مراد ؟...و لا باش يرجع ؟ فقت من سرحتي على صوت مدام نورهان تحكي
نور:تفضلو...لازم نفرغو صالة توا
حسام:هيا جماعة خلينا نمشيو
عمر:انا و زهرة باش نخلطو عليكم مبعد
فتحية:اغزرلي هوني...من يوم طلعات هذوما تنحيهم و زهرة معاد تمشي لحتى بلاصة من غير إذني
دورت راسي غزرتلو بالوقت...يغزرلها مبهم...قحرتلي تحكي
فتحية:ايجا لهوني انتي
قربت منها شوية...شدتني من يدي...غزرلها حسام يحكي
حسام:امي فاش تعمل انتي ؟
فتحية:حتى حد فيكم ما يناقشني...هيا الكل قدامي
عمر:شنية فتحية ؟ شنوة اللي قاعد يصير
فتحية:امشي قدامي انت زادة...من غير كلام زايد
غزرت لمريم...تسأل فيا بعينيها...هزيت بكتافي منعرفش غزرت لمحمد...حتى هو مش فاهم الحكاية...غزرلنا يحكي
دالي:انا باش نمشي توا...نشوفك مبعد زهرة
انا:باهي
خرجنا وراه...تلفتت عندي...غزرتلي انا و مريم...تحكي
فتحية:هيا نتوما زوز تحركو قدامي للكرهبة...و أنت أخلط علينا...عندي ما نحكي معاك
عمر:نعرف أمي...و راسك نعرف...أما توا حاجتي بزهرة تو نرجعها بكري...وصلو مريم معاكم باهي
فتحية:عممممر
شاور لحسام...و جبدني من يدي...ملحقتش حتى باش نحكي مع مريم...ركبني في الكرهبة...و سكر الباب خلط عليا...غزرتلو نحكي
أنا:عممر فاش تعمل أنت...تو تتغشش منا...علاه هكا
عمر:اهدا...مبعد نحكي معاها أنا
أنا:باهي
تبسم على جنب...و خدم الكرهبة...فرحانة برشا...و ما نحب حتى شي يطير فرحتي توا...مديت يدي نزلت البلار...ستحليت النسمة الباردة لي داخلة...تلفت شوية غزرتلو...باقي يسوق من غير حتى كلمة...خذيت نفس و قربت منو اكثر...حطيت راسي على كتفو...و مديت يدي كبست على يدو نحكي
أنا:عمر
عمر:مممم
انا:شبيك ساكت
عمر:شي
أنا:ملا علاه متحبش تحكي معايا ؟
ركا الكرهبة على جنب...جبدت روحي شوية منو نغزرلو مد يدو...حطها على خدي...بعدلي خصلات شعري لتالي يحكي
عمر:إنتي خبرت محمد يجي للمحكمة ليوم
هزيتلو براسي لا...منعرفش علاه حسيتو مزال مقلق من الحكاية...خذيت نفس نحكي
أنا:م..منعرفش كيفاش جا..و حتى أمي فتحية منعرفش عليها
عمر:و الكلام لي قالو قدام القاضي شنية تفسيرو ؟
انا:منعرفش...و وافقتو خاطر خفت القاضي يكشف لهو يكذب والله
عمر:باهي
أنا:عمر
عمر:مممم
انا:عنقني
جبدني عندو بالوقت...دورت يديا زوز على رقبتو...كبس على شعري يحكي
عمر:معاد تخمم في حتى شي...نحبك تنساها الحكاية هاذي جملة باهي
أنا:باهي
عمر:زهرة
طلعت راسي شوية نغزرلو...نستنى فيه يحكي...حط يدو على خدي يحكي
عمر:وين تحب تعدي النهار هذا
انا:شتقصد ؟
عمر:تحب تبقى معايا...و لا نرجعو بحذا الجماعة احسن
انا:ممممم كان نقلك ماكش باش تتغشش مني مش هكا
عمر:هههههه زايد فرخة فهمتك
انا:هوما عاونوني برشا...و منحبش نبعد عليهم في نهار هذا...خاصة مريم...و أصلا أنت بعثتها مع حسام...كان تبقى تستنى فيا غديكا تقوم الدنيا ماك تعرفهم
عمر:نعرف عزيزتي
طلعت راسي أكثر...بستو من خدو...و وخرت لتالي نحكي
أنا:باش تبقى معايا اليوم مش هكا
عمر:لازمني نقابل سيرين
أنا:علاه ؟
عمر:نظن حكينا في الموضوع البارح
أنا:مش على أساس باش تبقى معايا اليوم
عمر:باهي
منعرفش علاه حسيتو مش قد بعضو...يمكن حكاية سيرين هي لي مقلقاتو لهدرجة...سكت محبيتش نتعبو أكثر...خدم الكرهبة بالوقت...دورت راسي نغزرلو...تبسم على جنب يحكي
عمر:إيجا عندي تراه
أنا:متأكد
عمر:مجنونة
قربت منو...حضنتو بالوقت...أول مرة نحس روحي مرتاحة بعد السنين لي تعدات عليا الكل...اول مرة منخافش من مراد...و لا من اني نبقى قريبة من عمر لهدرجة...اول مرة نخمم في روحي و كهو...انو نعيش نهار هذا بلا خوف...و بلا وجيعة...و من غير ما نفكر في حتى شي خايب ممكن يصير مبعد.
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
