🔸️حلقة 5
طلعت الدروج هذاكا بالسيف...نحس في راسي باش يطرشق...منعرفش على روحي كيفاه وصلت لفوق غزرت لبيتها...باقي الباب مشقوق كيما خليتو...تبسمت على جنب..أول مرة تسمع الكلام و تخليه محلول..قربت شوية شوية...كبست عالبواني...طليت عليها...غاطسة في نوم...شعرها مفروت عالمخدة...نزلت راسي شوية نغزر لجيلي متاعها عالارض...تنهدت بالقاوي...مديت يدي طفيت الضو...خاطر نعرفو يقلقها...و جبدت الباب ورايا...دخلت لبيتي عملت دوش و بدلت دبشي...و جيت خارج...وقفت في الباب تحكي
إنتصار:وين ماشي
انا:لجهنم انتصار...أبعد من قدامي
قربت مني أكثر...حطت يديها زوز على جنابي...كبست عليا تحكي
إنتصار:تغششت مني ياخي
بقيت نغزرلها...تبسمت على جنب...و حطيت يديا زوز على يديها...بعدتهم عليا نحكي
انا:برا رضي بنتك انتصار مش أنا
قربتلي اكثر...لين معادش بينا مسافة...حطت يدها على خدي...تعدي في صوابعها و تحكي
إنتصار:طمنت عليها قبيل...منعرفش علاش مكبر الحكاية لهدرجة...من وقت جيت من سفر تبدلت جملة...تي من قبل كنت نقول ظغط الخدمة...باهي و توا ؟
نفخت بالقاوي...بعدت يدها من وجهي...نحكي
انا:فك عليا بربي...مانيش ناقصك توا
غزرتلي ندرا كيف...دزتني بيديها زوز...تحكي و تصيح فرد وقت
انتصار:مراااااد تي فيق على روحك شبيك ياخي...شبيك تبدلت هكا ؟
شديتها من يدها كبست عليها...قحرتلها...نحكي
أنا:انتصصصاااار نقص صوتك
انتصار:مااانيش ساااكتة...لهوني و كهو...توا تفهمني لي قاعد يصير
جيت باش نحكي...حبست كيف ريت الباب تحل مستندة عليه بيدها...وجها تاعب عاللخر...عرفتها فاقت على صياحنا...غمضت عينيها ورجعت حلتهم...تحكي
زهرة:ش..شفما أمي ؟
نطرت يدها مني...و تلفتت عندها...تصيح عليها
انتصار:زهرررررة أدخل لبيتك...أزرب روحك
زهرة:ا أمي شبيك...لباس ماهو
قربت منها بالزربة...كملت دزت الباب بالقاوي...تحكي و تصيح عليها
انتصار:إنتي سبب في كلشي...كلشي من تحت راسك إنتي...معادش نحب نسمع صوتك جملة
زهرة:ي يززي أمي...يزززي شعندي عملتلك انا
بقيت نغزرلها...عرفتها تحب تخرج غشها فيها كي العادة هزت يدها باش تضربها...حبستها بالوقت...كبست على يدها قبل ما تتحط عليها...تلفتت غزرتلي بالوقت...تلفت نغزر لزهرة...لي حلت عينيها مروهجة...تستنى في الكف من عند أمها...كبست عليها أكثر و نزلت يدها نحكي
انا:إنتصار برا لبيتك
رخفت يدي شوية...قحرت لزهرة...و رجعت غزرتلي...من غير حتى كلمة...دخلت للبيت و نطرت الباب وراها تهزت و تحطت على صوتو...خذيت نفس نحكي
انا:زهرة أرجع لبلاصتك
بقات تغزرلي...واقفة بالسيف...شعرة لا طاحت...شديتها بيدي...و عاونتها ترجع لسرير...أول ما قعدت...تسطحت لتالي...مديت يدي بعدتلها شعرها وجها...نحكي
أنا:اهدااا زهرة
زهرة:ك..كانت باش تضربني
نزلت عندها شوية...غطيتها...و عديت يدي على خدها نحكي
أنا:طول ما أنا عايش...حد ماهو باش يحط يدو عليك تذكر كلامي بالقدا...مستحيل نخلي حد يضرك
زهرة:ا أنت سبب في كلشي...أنت مش انا
غمضت عينيا بالقاوي و عاودت حليتهم...محبيتش نتعبها أكثر...بعدت عليها شوية نحكي
انا:متعبش روحك...و معادش تقوم من فرشك
خرجت من البيت...و خلطت عليها...لقيتها قاعدة على السرير...تهز في ساقها بعصب...غزرتلها نحكي
انا:اخر مرة انتصار...اخر مرة تهز يدك عليها
إنتصار:مرااد أنت تحكي على بنتي
أنا:بنتك أنا ربيتها مش إنتي..على هذاكا آخر مرة تحاول تضربها...خاطر والله كان نعرف لإنتي عملتها...مانيش باش نسامحك جملة
بقات تغزرلي مستغربة...هزيتها و حطيتها و خرجت من البيت...نزلت اللوطة...دخلت لصالة...ترميت عالفوتاي تكيت راسي لتالي...كلامها باقي يتعاود في راسي سكرت عينيا بالوقت...نحاول نريح مخي من اللي قاعد يصير...نحب ننسى اللي عملاتو انتصار...و اللي صار جملة
أنت تقرأ
زهرة🌸
Random🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
