زهرة🌸

الحلقة السادسة و التسعون

حلقة 96
عمر يحكي:
حطيت الدوسي من يدي...و ترميت عالفوتاي...قعدت مقابلو بالظبط...تكيت لتالي نحكي
انا:قولك باش ينجح هذا الكل
حسام:باش ينجح...اما كان الطفلة هاذي ملعبتش ورا ظهرك
انا:ملك ؟
حسام:مممم
انا:متخافش...كلشي يخصها في يدي توا...حتى كان لعبت ورانا ماهيش باش تضرني جملة
حسام:انت عندك ثقة فيها ؟
انا:معاد نجم ناثق في حتى حد يا حسام...الهدف متاعي واضح...كلشي نحب عليه...اني نرجع مرتي و نشفع الكلب متاع مراد
حسام:زهرة كيفها ؟
انا:منعرفش حسام...معادش نعرف اذا مليحة و لالا...معادش نعرف كيفاه نتصرف معاها...في بالك امها طلعت حية
حسام:انتصاااار ؟
انا:مممم انتصار...الساقط مهددها بامها...لندرا وينها و شعاملة...مدامها حية منعرفش علاه مظهرتش لتوا
حسام:حاولت تفهم منها ؟
انا:و انا نجم ناخو منها حق و لا باطل...اعصابي تالفة اليمات هذوما...و معادش نعرف شنية نعمل...ساعات نحب نمشي و نخرجها بالقوة...اما الرخيص مهددها كان يعرف لهي خبرتني انو امها عايشة...باش يقتلها و لا ندرا شنووة
حسام:مش معقول الراجل هذا
انا:منجمش حسام...منجمش نخاطر بيها...نخاف تمشي غلطة و يعمللها حاجة...وقتها مستحيل نخليه عايش
حسام:هدي روحك الساعة...و قولي شنية ناوي انت ؟
انا:ناخو منو كلشي
حسام:متأكد من الخطوة هاذي
انا:عاللخر
حسام:و انا معاك لتالي صاحبي
انا:عيش خويا
تلفت على صوت الباب لي تحل...هزيت راسي نغزر لبشرى...ديما مربوثة الطفلة هاذي...هزيت حاجبي نحكي
انا:لباس بشرى ؟ فما حاجة ؟
بشرى:اه...فما...مدموزال
قبل ما تكمل كلامها...دخلت ملك وراها...تبسمت بالوقت...نحكي
انا:سيبون بشرى...تنجم تكمل خدمتك
ملك:وصيلي على قهوة معاك
بشرى:باهي
انا:تفضل
ملك:يظهرلي جيت في وقت غالط
انا:بالعكس...حسام الماجري...شريكنا
ملك:حسام الماجري هوني ملا
انا:حسام...ملك رحماني
مدت يدها صافحاتو...و قعدت مقابلتنا...حطت ساق على ساق كي العادة...تكيت لتالي نحكي
انا:مدامكم تعرفتو على بعضكم...ندخلو في الاهم توا
ملك:اكيد
انا:وصلت انفيتاسيون متاع حفلة تتويج
ملك:مراد محضرها الحفلة
انا:في بالي
حسام:امتى ؟
انا:بعد اسبوعين او اكثر
ملك:شنية المطلوب توا ؟
هزيت راسي غزرت لحسام...و عاودت غزرتلها...نحكي
انا:الحفلة باش تكون اكبر انطلاقة لينا...و اكبر تحول في خطة مراد
ملك:شقصدك ؟
انا:مراد في بالو باش يكون شريكك انتي و حسام
حسام:فاش تفكر ؟
انا:معناها باش يعرف اللي باش يشاركو في المشروع النص بالنص...انا مش ملك
ملك:باش تخلي الحكاية مفاجأة ملا
انا:بالظبط...مبدأ الحفلة يعتمد عليك انتي
ملك:كيفاش ؟
أنا:خليك حاضرة للحفلة و كهو...الباقي عليا أنا
ملك:في رايك باش يحضر هو...و لا يبعث كريم كي العادة ؟
أنا:يمكن لحق الوقت باش يبان...منظنش باش يسلم اهم تنظيم لخوه
ملك:يمكن متعرفش كريم بالقدا...صدقني الطفل عفريت في المجال لإحنا فيه...مراد ميسلمش في مشروع كبير و لا صغير...من غير ما يكون عندو ثقة في اللي يخدم معاه...و الا موصلش للي هو فيه توا
انا:مش موضوعنا هذا توا...لي باش تعملو انتي...تخلينا نعرفو الطريقة لي يتعامل بيها مراد...و كلشي يخصو...و لا يخص خوه...اسبوعين كافية باش تخلينا نعملو اول خطوة...من غير اي غلطة
ملك:باهي...انا باش نعمل لي تحب عليه
أنا:حسام انت بالظبط...باش تحضر كلشي يخص المشروع...كيما العادة
حسام:مشات معاك
ملك:شكون المهندس متاعنا...تحب تقابل لي يخدمو في سوسيتي هوني ؟
انا: انا باش نكون المهندس متاع المشروع
ملك:متأكد...يعني باش تظطر تتعامل مع اي مهندس يختارو مراد
انا:هذا لي نحب نوصلو بالظبط
ملك:باهي برشا...بيرويا حاضر ؟
انا:مممم هوكا مقابل بيرو الاجتماعات
ملك:معناها رزيتني في بيرويا
أنا: Malheureusement
ملك:ملا خليني نعمل دورة في بيرويا الجديد
انا:تفضل
ملك:عيشك
نزلت ساقها...و غزرت لحسام...غزرتلو تحكي
ملك:متشرفين مرة اخرى...و بون كوراج
حسام:عيشك
هزت روحها وقفت...تبسمتلي ندرا كيف...هزيتلها براسي ايه...اول ما خرجت...تلفت لحسام لي قاعد يقحرلي...ضيقت عينيا نحكي
انا:شبيك ؟
حسام:شي...في بالها لانت معرس
انا:منعرفش...و في كل الأحوال...مانيش باش نغزر لحد غير مرتي طمن
حسام:والله انا مانيش مطمن للي قاعد يصير
انا:و شنية لي قاعد يصير
حسام:لي قاعد يصير...اني داخل في مشروع كبير...مع فرخة مصممة ازياء...ميسالش تفهمني لي قاعد يصير..يا سيدي إعتبرني مهبول قدامك و فهمني
أنا:ههههههههه هدي روحك...ملك جيست باش تخلينا نعرفو تحركات مراد الكل
حسام:أصل المشروع شنية ؟
انا:سلسلة بوتيكات تابعة لدار الازياء متاعنا و متاع مراد...أما في بالو باش يشاركك و مدامني كنت مهندس في سوسيتي معاك...باش يخليني ناخو تصميم و يوحلني مع واحد من مهندسين متاعو...و اكيد ناوي يوحلني في لعبة مسخة...و الا مكانش باش يختارك انت
حسام:يعني ؟
انا:بالظبط...كيما فهمت...لي ميعرفوش هو انو انا باش نكون شريكو مش ملك...و فوق هذا الكل...انا المهندس متاعكم
حسام:صحة صاحبي...منين ليك هذا الكل
انا:قوم...وهف يهزك...¤¤¤¤¤ عليا
حسام:باهي هاني سكت
انا:احسن
حسام:ريحان كيفها ؟
انا:قاعدة تكبر
تبسم و تنهد بالقاوي...قريت الوجيعة في عينيه...حتى هو لي تعدا عليه مش ساهل...و يمكن بعد ما جات ريحان لدنيا...فهمت أكثر...شنية يعني صغير...و شنية لي قاعد يحس فيه بالظبط...خذيت نفس نحكي
انا:كان ارتاحت مريم...تنجم تاخو ريحان بحذاها
حسام:ان شاء الله صاحبي...أول ما ترتاح...نجيبها بحذاها
أنا:مرحبا بيك
حسام:عيشك...هاني باش نمشي بحذاها توا...كان صار شي كلمني
أنا:أكيد طمن
أول ما خرج...تكيت راسي لتالي و سكرت عينيا بالقاوي معادش نعرف شنية نعمل و لا شنية باش يصير أكثر حسيت روحي تخنقت اكثر..خاصة بعد ما خليت ريحان سخانتها طالعة شوية...عديت يديا زوز على وجهي...و هزيت روحي وقفت...لبست كبوطي...هزيت تليفوني و مفاتحي...و مشيت لبيروها...حليتو بلا ما ندق...لقيتها مكسلة عالفوتاي...زايد معاها وقت راحة لي تاخو أكثر من اللي تخدم فيه...حلت عين وحدة تحكي
ملك:نجرب في الفوتاي...كان يصلح لنوم
انا:صحة...انا هاني خارج توا...كان وصلت لشي خبرني
ملك:باهي تهنى
سكرت الباب...و خرجت...بعد ما طمنت لمصطفى حاط راسو في الخدمة...هاذي اول خطوة باش يعتمد على روحو بعد توا...و ما يستحق حد حتى انا...شديت الثنية للفيلا...تفكيري الكل فيها....معادش نجم نأمن عليها مع حد غير هند...حتى هي حسيتها مش قد بعضها اليومين هذوما...اول ما وصلت...شديت الفران و نزلت...حلتلي مليكة...لي حسيتها تربثت...محاولتش نركز معاها برشا هزيت روحي و طلعت...لقيت هدى في وجهي...ضيقت عينيا نحكي
انا:ريحان لباس ؟
هدى:لباس مسيو عمر
انا:وينها ؟
هدى:في بيتك
طلعت حاجبي مستغرب...كنت باش نسألها أما سكت نحب نفهم لي قاعد يصير وحدي...خذيت نفس و قربت خطوتين من البيت...مديت يدي كبست البواني و حليت الباب شوية شوية...و دخلت...و على هزت راسي...قلبي خض بالقاوي..لدرجة حسيتو باش يخرج من بقعتو..آخر شي توقعتو...إني نلقاها في فرشي...غمضت عينيا بالقاوي...و عاودت حليتهم نثبت فيها...سكرت الباب...و قربت منها بخطوات رزينة..نزلت راسي نغزرلها...غاطسة في نوم...و حاطة ريحان بجنبها...مديت يدي شوية باش نحطها على شعرها...أما كبست عالبونية متاعي في لحظة...منعرفش شنية لي منعني إني نمسها...مع إني نموت و نعدي لحظة بجنبها كهو...خذيت نفس و غزرت لريحان لي حلت عينيها...دور فيهم...و تحرك في يديها الصغرونين...تبسمت عالمنظر لي نشوف فيه...و وخرت لتالي...من غير ما نعمل أي شي...و من غير ما نخليها تحس بوجودي...حطيت كبوطي عالفوتاي...و دخلت لبيت البانو و سكرت الباب...تكيت بيديا زوز عالرخامة...و هزيت راسي شوية...نغزر لروحي...فرد وقت نسمع في دقات قلبي لي حسيتها باش تفضحني معادش نحب نضعف قدامها أكثر...معادش نحب نعيش في المد و الجزر هذا...معادش نحبها تمشي و تجي معادش نجم نتحمل فكرة لهي معاه فرد دار...جرايرها معادش نجم حتى نغمض عيني من الكابوس لي وليت نشوفو كل ليلة...معادش نجم نصبر اكثر من هكا..الفكرة لي جاتني توا...اني نحصرها هوني...و لي باش يصير خليه يصير خليه يصير...أما حكاية امها وقفتني في نص...منحبش نكون سبب في أنو الكلب هذاكا يضرها مرة اخرى...غسلت وجهي...و عديت يديا زوز على شعري...مفماش نرتاح شوية...و نجم نقعد معاها...و نشبع من قربها...قبل ما تهز روحها و تمشي...حطيت المنشفة من يدي...و قربت من الباب...حليتها شوية من غير حس...منحبش نفيقها...أما حبست على صوتها...و هي تحكي مع ريحان
زهرة:فاقت صغرونتي...فاقت بنوتي...محلى زينها يا ربي...توحشتني إنتي و لا لا...شوو على أكا الضحكة المزيانة...باش ناكلها أصل
عديت يدي على وجهي...رغم كلامها ما فيه شي...أما حسستني إني فرقتها عليها...و خليتهم يعيشو هذا الكل مديت الخطوة باش نقرب منهم..أما حبست على صوتها مرة أخرى
زهرة:ريحانتي...صغرونتي...نوعدك باش يوفا هذا الكل و حتى حد ماهو باش يفرقنا على بعضنا مهما صار يا روحي...مانيش باش نسمحلو يفكك مني إنتي زادة...و مانيش باش نسمحلو يعاود لي عملو اليوم...كان باش يحاول يبوسني مرة أخرى...أكيد مانيش باش نتردد في اللي كنت باش نعملو...كان مزلت متحملة لتوا على خاطركم نتوما و كهو...على خاطر
كبست بيدي على حرف الباب...نحس في بدني الكل تخدر من كلامها...دقيقتين عديتهم و انا نلم في روحي و في الافكار لي تبعثرت في مخي...خذيت نفس و زوز عديت يدي على وجهي و قربت منها نحكي
انا:على خاطر شنوة زاادة
تلفتت عندي بالزربة...عينيها وساعو بالوقت...و هزت روحها تقعدت...لين قصتها هبطت على وجها...رجعتها بيدي...و غزرتلي ندرا كيف تحكي
زهرة:ع..عمر ؟
أنا:شنية مكنتش متوقعة تشوفني ؟
زهرة:ل..لا أما
أنا:امااا شنوووة ؟
كبست بيديها زوز على حرف الفرش...ريت التوتر لي ظهر على وجها...من غزرت عينيها لي ضايعة...قربت منها كبست على يدها...و وقفتها نحكي
أنا:حلللل فمك...امااا شنيية...و على خاطر شنوووة باااش تتحمل أكثررر
زهرة:ع..عمر...سيبني تو نفسرلك
كبست عليها أكثر...دورتها و دزيتها عالقارد روب حصرتها بجهامتي...و نزلت راسي غزرت لعينيها نحكي
انا:بااسك ؟
عينيها لي منزلتهمش من عينيا...الصدمة لي ريتها في وجها...خلات الف سيناريو يتعدا لمخي...و خوف قوي تسرب داخلي...لدرجة حسيت عبد آخر تحط في بلاصتي...هديت روحي و سألتها مرة اخرى
أنا:بااسك ؟ جااوبني ؟
زهرة:ع..عمر
مديت يدي لأخرى...كبست على وجها في لحظة...و هزيتلها راسها أكثر نحكي
أنا:جاااوبني زهرة...باااسك...الخامج هذاكا حط شفايفو على شفايفك ؟
هزتلي براسها لا...كبست على وجها أكثر...و حطيت جبيني على جبينيها نحكي
أنا:حل فمممك و جااوبني...قولي بااسك ؟
منعرفش شبيني ركزت عالسؤال اكثر من مرة...أما للحظة حسيت روحي باش نهبل...فكرة لهو يحط يدو عليها تخليني نخرج من عقلي...خلي يوصل يتعدا حدودو و يبوسها...مع أنفاسي لي قوات و انا كابس عليها...دزتني لتالي في لحظة...تحكي
زهرة:مباااسنيييش...مسمحتلوووش و مااانيش باش نسمحلووو...يقرب مني...معااادش تسألني...تسممع فيا
قربت منها بالزربة...شديتها و عاودت حصرتها لتالي نحكي
انا:شنيية لي سمعتو قبيييل...شنيية عملللك ساااقط هذاااكا...تكلللم ؟
زهرة:ح..حاول...يبوسني...كهو الحكاية
انا:كهو...ياااخي تحب تهبلني و لا شنية حكايتك ؟
زهرة:مكنتش باش نخليه عمر...حتى بالغصب دافعت على روحي...و مخليتوش يوصل للي يحب عليه
انا:مزززلت ناااوية ترجعلووو ؟ تحبو يوصل للي يحب عليه بااش تفيق على وضعععك
انا:يزززي عممر يززي...علاش متحبش تستوعب انو حتى انا مجبورة...مجبووورة باش نتحمل هذا الكل...ياخي في بالك ساهل لي قاعد يتعدى على راااسي
انا:مااكش مجبوورة...ماااكش مجبورة باش تتحمل ¤¤¤¤¤¤ حتى حد ما ينجم يجبرك على شي و انا عاايش
زهرة:عممر افهمني اماانك...افهمني عيش حبي...والله العظيم ما صار بينا حتى شي و راس بنتي ما حط يدو عليا...و ماهوش باش يحطها...على خاطر كان عمل حاجة هكا...مانيش واقفة قدامك توا...مانيش نتنفس كانو ما صار شي...يززي كهو...افهم انو كان صار و مراد مسني معناها حط حد لحياتي
بقيت نغزرلها من غير حتى كلمة...كاني نحاول نستوعب الكلام لي تقول فيه...مصدقها في كل حرف خرج من فمها...اما فكرة...لهي عاشت نفس الخوف معاه...نفس الوجيعة...و نفس القهرة...خلاتني نفقد اعصابي مرة اخرى...و كلامها لي كان من المفروض يهديني...خرجني من سينتي اكثر...رخفت يديا زوز عليها...و دزيتها لتالي شوية نحكي
انا: انا نعرف حسابي معاه...و المرة هاذي يا انا يا هو يا زهرة
هزتلي براسها لا...قحرتلها...و قربت من الفوتاي...هزيت كبوطي في يدي...معادش يهمني في مشاريع و خدمة مدامو خمم يبوسها...معناها ينجم يعمل اكثر و اكثر قبل ما نوصل للباب...سبقتني تجري...تكات عليها...و هزت راسها تحكي
زهرة:عمممر لاااا...امااانك لااا...متعملش حاجة تندم عليها مبعد...اماانك
انا:زهرة ابعد من قدامي...منحبش نضرك أكثر
زهرة:بخروجك من هوني باش تضرني...والله العظيم ما صار شي...أمااانك
كبست على زندها باش نبعدها...ترمات في حملتي على غفلة...دورت يديها زوز على ظهري...و كبست عليا بكل قوتها تحكي
زهرة:متمشيييش أماانك...متمشيش عندو عمر...خاطري أنا متمشيش
جمدت في بقعتي...دقات قلبها لي قوات في صدري روهجتني لدرجة منجمتش نتحرك...منجمتش حتى نهز يدي...و نكبس عليها في حضني...نهديها من الحالة لهي فيها...هزت راسها شوية...غزرتلي ندرا كيف..نفس الغزرة لي تخليني نسلم...و نتنازل على كلشي قدامها...يديها لي تغرسو في ظهري اكثر...و دموعها لي نزلو في لحظة فيقوني على وضعي...حطيت صوابعي على شفايفها قبل ما تقول حرف...منحبش نشوفها و هي تترجى فيا و لا في اي حد...تنهدت بالقاوي...نرد في النفس...لي يخليني نهدي روحي...قبل ما نغلط اكثر...عديت عينيا على وجها...و نزلت عليها اكثر...بستها من راسها...و هزيت يدي حطيتها على ظهرها من تالي...كبست عليها في حضني...غرست يدي لاخرى في شعرها نحكي
انا:باهي هدي روحك توا
زهرة:م..ماكش باش تمشي
الكلام وحل في حلقي...منجمتش نقول حتى كلمة جبدت روحها شوية...حطت يدها على خدي تحكي
زهرة:عممر...كان يعرف مراد اني خبرتك...اكيد باش يقتل امي...اماانك افهمني...قبل ما تفيق امي انا منجم نعمل شي
ضيقت عينيا مستغرب من كلامها...رخفت يديا عليها...و جبدت روحي لتالي...نحكي
انا:وينها أمك ؟
زهرة:ف..في القصر القديم
أنا:في البلاد ؟
هزتلي براسها ايه...عديت يدي على وجهي...نحاول نهدي روحي باش نجم نسألها و نستوعب لي قاعد يصير فرد وقت...نزلت راسها تلعب بيديها...خذيت نفس نحكي
أنا:شتعمل غديكا ؟
زهرة:ه..هي لتوا في غيبوبة
انا:شنننوة ؟
زهرة:كان يسمع لأنا خبرتك...أكيد باش يخليها تموت
أنا:شبيك مخبرتش البوليس بالحكاية ؟ شكون عطاه الحق باش يخليها عندو ؟
زهرة:البوليس ؟ باش ياخو معاه ساعة و يقنعهم...بعد نخسر أمي جملة...انا مزلت نحب نعرف منها برشا حاجات...نحب نعرف علاش دخلت مراد لحياتنا ؟ علاش صدقتو هو مش انا...و علاااه وصلتنا للحالة هاذي...نحب نعرف علااش عمرها ما حبتني...عندي برشا اسئلة نحبها تجاوبني عليهم...و اهم سؤال اذا هي حبتني مرة وحدة في حياتها كيما حبت مراد...نحب نجرب حبها مرة وحدة و كهو
جبدتها من يدها...حضنتها بالوقت...نعرف بالقدا حساسية الموضوع بالنسبة ليها...خذيت نفس نحكي
انا:أثق فيا و انا تو نرجعلك امك
زهرة:أنا ناثق فيك عمر...اما منجمش ناثق في اللي باش يعملو هو...كان محرمنيش من امي...اكيد باش يحرمني منك و لا من اي حد قريب ليا...انت ما تعمل شي...لين نقنع مراد يجيب امي لهوني...و زادة هي قاعدة تتفاعل مع العلاج و يمكن تفيق في اي لحظة
جيت باش نحكي...اما دقات الباب...خلاتها تجبد روحها مني...وخرت لتالي...هزيت راسي نغزر لسلمى لي حلت الباب و دخلت...ضيقت عينيا مستغرب نحكي
انا:لباس سلمى ؟
سلمى:خالتي فاطمة تحب تشوفك
أنا:صارت حاجة ؟
سلمى:تنجم تسألها هي ؟
دورت راسي غزرت لزهرة...لي واقفة تقحرلها...عديت يدي على شعري نحكي
انا:سلمى تعرفني نفد من الألغاز هذوما...شمدخل زهرة في الحكاية ؟
سلمى:والله زهرة لي تحكي عليها...سمعت الكلام لأمك اللوطة شعرة لا قتلتها...بعدها ضربتني و سحتتني من البيت
عاودت غزرتلها مرة أخرى...قحرتلي...تحكي
زهرة:شننوة ؟
أنا:صحيح لي تحكي فيه ؟
زهرة:صحيح
جيت باش نحكي...صوت ريحان وقفني...قربت منها قعدت على طرف السرير...و هزتها في حضنها تحكي
زهرة:تنجمو تكملو حديثكم برا...أنا نحب نرضع بنتي...و نقعد معاها شوية قبل نمشي
غمضت عينيا بالقاوي و عاودت حليتهم...نعرفها...نعرفها بالقدا...مستحيل توصل لحد اذا معملش معها حاجة خايبة...كيما نعرف موقف امي منها...و نعرف سلمى وين تحب توصل بالظبط...خذيت نفس نحكي
انا:سلمى امشي انتي توا
سلمى:ماكش باش تجي
انا:هيا فيسع
سلمى:باهي
أول ما خرجت تلفت عندها...نغزرلها...تبوس في ريحان و تحاول تسكتها فرد وقت...هزت راسها تحكي
زهرة:شبيك مزلت هوني ؟
أنا:باش تتقبح فيا زادة ؟
زهرة:نحب نرضع بنتي إذا معندكش مانع
هزيت حاجبي مستغرب...كانها مش زهرة لي كانت في حضني دقايق لتالي...قعدت على حرف الفرش مقابلها نحكي
انا:رضعها...شكون شدك ؟
زهرة:أنت
أنا:بربي ؟
زهرة:ميسالش تخرج توا
انا:مانيش خارج
زهرة:ملا أنا باش نمشي لبيت ريحان
أنا:و ماكش باش تقوم زادة
زهرة:شنية تحب مني توا ؟
انا:شنية لي صار قبل ما نجي ؟
زهرة:ريحان جاعت و يلزمني نرضعها
أنا:رضعها و فسرلي فرد وقت
زهرة:منجمش
انا:علاش ؟
زهرة:نسيت لأنت طلقتني...و لا لازمني نذكرك في كل مرة ؟
غزرتلها مستغرب...تقريبا نسيت لأنا مطلقها...على خاطر و لا مرة خممت أنو الأوراق هذوكا حقيقيين و لا هي معادش مرتي..نعرف انو هذيكا اكبر غلطة عملتها بحجة اني نحميها...اما تعرف بالقدا اني مستحيل نفرط فيها مستحيل نخليها وحدها مهما صار...و باش تبقى مرتي لاخر نفس في حياتي...تنهدت بالقاوي نحكي
انا:مش حكينا فيه الموضوع هذا من أول مرة...جدت عليك الحكاية و صدقت لأنا طلقتك...تحدد علاقتي بيك بورقة و زوز توقيعات
زهرة:أنت لي عملت هذا الكل...صدقتك صحيح..صدقت لأنا مزلت مرتك و على إسمك...اما مش بعد توا...مش بعد ما خبرت الكل بطلاقنا...مدامك مرتاح بالطلاق هذا و مدام الكل عرف لأنا طلقيتك...معادش تقولي مرتي معادش نحب نسمعها من عندك
كبست على ريحان في يدها...و هزت روحها وقفت خرجت من البيت...و خلاتني قاعد في بلاصتي...مبهم من كلامها...و من غزرتها...و من عينيها لي تحصرو بالدموع...من اللوم لي قاعدة ترمي فيه عليا...خلاتني عاجز باش نقول كلمة نهديها بيها...اول شي خممت فيه...إني نخبر بابا وقتها بطلاقنا باش يبعد عليها و ميخممش حتى يقربلها...نعرف ليكان ناوي يعمل اكثر و اكثر...و ندرا شنية لي صار في غياابي...مدام الشحنات لي بيناتهم كبرت لهدرجة...عديت يديا زوز على وجهي و هزيت روحي خلطت عليها لبيت ريحان...حليت الباب من غير ما ندق عليه...أول ما حست بيا عطاتني بظهرها باش منشوفش صدرها...تبسمت عالفازة...حتى بعد الشهور لي فرقتنا...مزلت حافظ كل تفصيلة فيها...و كل شبر من من بدنها...و للحظة لقيت روحي نذكر في اللحظات الكل لي جمعتنا...فيقتني من سرحتي تحكي
زهرة:أخرج عمر...تنجم ترجع مبعد
أنا:منحبش
زهرة:عمر
أنا:مانيش باش نقلقك
تكيت لتالي نغزرلها...قص عليا صوت تليفوني..إستغربت كي لقيت ملك تطلب...خذيت نفس و هزيت عليها...نسمع فيها تحكي
ملك:عمر أنت معايا ؟
أنا:مممم نسمع فيك
ملك:باش ناخو رايك في حاجة
انا:تفضل
ملك:بخصوص التصاميم...متاع Nouvelle collection تاخوها من عندي و لا عندك مرشح اخر
انا:في رايك ؟
ملك:معندكش حل آخر غيري
انا:بربي ؟
ملك:حتى مراد مينجمش يستغنى عليا و الا مكانش باش يشاركني مرة اخرى
انا:باش نخلي الحكاية عليك ملا
ملك:اووه يا سيد كان انت باش تصمم مشروع البوتيكات و دار الازياء الجديدة...نحب نقلك انو حتى تصاميم اللي باش نصممها...هي لي باش تخليك تنجح...مفهوم
انا:صحيتك...حتى انا مانيش باش نستغنى عليك طمن
ملك:ملا باش نكمل نرتاح توا...و يا ريت نقابلك في اقرب وقت رايك يهمني...قبل ما نعرض خدمتي على مراد
انا:صااار حضرتهم ملا ؟
ملك:بالطبيعة
انا:يطلع منك
ملك:امتى نجم نشوفك ؟
انا:مبعد نعاود نكلمك
ملك:باهي
انا:كمل نومتك توا
ملك:اكيد..نشوفك مبعد
انا:ان شاء الله
أول ما علقت عليها...هزت روحها وقفت...و قربت ريحان ليها...تبوس فيها و تشم في ريحتها...محبيتش نقص عليها و لا نقرب منها...شوفتهم هكا ترتحني حضنتها تحكي
زهرة:باش نرجعلك يا روحي...كل يوم باش نجي بحذاك...مانيش باش نخليك جملة...اما توا بالظبط لازمني نمشي
باستها مرة أخرى...و حطتها في سريرها...قعدت دقايق و هي تغزرلها من غير حتى كلمة...عدات يدها عليها...و تلفتت عندي...غزرتلي ندرا كيف...جيت باش نحكي قصت عليا كي خرجت من البيت...و رجعت لبيتي نفخت بالقاوي و خالطت عليها...نغزرلها و هي تلبس في البوت متاعها...خذيت نفس نحكي
انا:شنية تصرفات هذوما توا ؟
زهرة:أسأل روحك
انا:ياخي تحب تجهلني إنتي ؟ تعرف شنية الكلام لي قلتو قبيل ؟
زهرة:علاش غالطة ؟
قربت منها جبدتها من يدها...ضربت في صدري بالوقت...كبست عليها نحكي
انا:غااالطة و كان عجبك...بالسيف عليك باش تبقى مرتي...تسمع فيا
زهرة:مش انا لي بحاجة نسمع الكلام هذا منك...ماكش باش تصلح لي صار بالطريقة هاذي...مدام أنت مصدق طلاقنا...أنا زادة باش نصدقو بعد توا...حتى إني مستحيل نطلب منك حاجة بصفتي مرتك بعد توا
جبدت روحها لتالي...و هزت كبوطها تلبس فيه...و تحكي
زهرة:نظن هذا باش يريحك بعد توا...و أصلا ماكش مجبور تتحير عليا...فما حاجات اهم مني...عيلتك...و تليفوناتك زادة...معاد نحب حتى حد منكم يعاوني...بعد توا باش نحل اموري وحدي...و أنت يعطيك الصحة جيست رد بالك على بنتي و كهو
قبل ما نحكي حرف واحد...خرجت من البيت بالزربة نعرف غيرتها بالقدا...و من سلمى ولينا في تليفون...لي متعرفش أصلا شكون كلمني...عقاب عمري باش تهبلني طفلة هاذي...نزلت وراها...و العصب يهز فيا...و قبل ما نوصل ريت كرهبة الشوفور متاعو و هي داخلة...فديت اكثر...وقفتها نحكي
انا:زهرررة
زهرة:شنوووة ؟
أنا:يزززي من هبالك...ماكش باش تمشي قبل ما نحكيو
زهرة:مفما حتى شي نحكو فيه بعد توا
انا:الصبر يا ربي
ضربت الباب بيدي عاودت سكرتها...حلتها بالوقت تستفز فيا...و قحرتلي تحكي
زهرة:لازمني نمشي...و انت توا عندك شكون تكلم...برا على روحك
انا:وقتها غيرتك توا ؟
زهرة:مانيش غايرة...أصلا ميجيش نغير على طليقي
انا:بربي ؟
زهرة:ممم...تنجم تبعد توا نحب نمشي
اشرف:مدام زهرة لباس ماهو
انا:انت مدخلش روحك
زهرة:اشرف ارجع لتالي عيشك
انا:هاك وليت تعطي الاوامر عزيزتي
زهرة:كيفك انت بالظبط
انا:باهي امشي قدامي تو انا نوصلك
زهرة:منحبش
انا:مش على كيفك
زهرة:و انا قتلك منحبش...سيبني توا
قربت منها اكثر...نزلت عليها شوية...نحكي في وذنها
انا:باهي يا زهررة...اعمل لي تحب عليه...اما مانيش باش نعديلك الهبال متاعك هذا...و لا لي صار الصباح مع ساقط هذاكا...و جرب تخبي عليا حاجة مرة أخرى و ساعتها ماكش باش تشوف حاجة تعجبك مفهوم كلامي
جبدت روحي شوية...و قحرتلها ..متاكد لي وصلها كلامي بالقدا...هزتلي براسها ايه...كبست عالباب نحكي
انا:اركب
هزت راسها قحرتلي...حطت يدها عالباب و غزرتلي ندرا تحكي
زهرة:حتى انا مانيش باش نستغنى عليك طمن
هزيت حاجبي مستغرب...و هي تعاود في كلامي مع ملك...قحرتلها نحكي
انا:زهرررة
زهرة:هاني ماشية و انت مطولش عليها عاد
غزرتلي ندرا كيف و ركبت...سكرت الباب و وخرت خطوة لتالي...نغزر للكرهبة ماشية و تبعد...نفخت بالقاوي و رجعت للداخل...اخر شي توقعتو تاخو موقف من طلاقنا...و ظاهر ماخذة في خاطرها برشا زادة قابلتني أمي تحكي
أمي:عمر
أنا:مش وقتو امي...منحب نسمع عليها حتى كلمة
أمي:لطف عليك و برا...ظاهر غسلتلك مخك الطفلة
طلعت و خليتها...دريكسيون لبيت ريحان...شوفتها برك لي تخليني نرتاح من الظغط هذا الكل...اصلا وقيت باش نخرجها من عندو في اقرب وقت و بأقل الأضرار و مهما كلفتني الحكاية...باش نخرجها من الكابوس مراد للأبد.
#سمر💙💙💙