زهرة🌸

الحلقة السابعة و العشرون

🔸️حلقة 27
🔸️عمر يحكي:
فقت الصباح...نحل في عينيا بالسيف...نحس في بدني رزين...نزلت راسي شوية نغزرلها...منعرفش كيفاش غفيت و هي في حملتي...تبسمت و نزلت عليها شوية بستها من راسها و جبدت روحي منها بالسياسة...عدلتها عالفوتاي...حطيت الغطا عليها...و خرجت من الصالة عملت دوش...بدلت دبشي...خذيت رونديفو من عند محامي باش نراه مبعد...مفماش يلقى حل قبل غدوة حضرت فطور خفيف...و رجعتلها...قعدت على حرف الطاولة...مديت يدي...نعدي في صوابعي على خدها حلت عينيها بالسيف...دوب تبسمتلي و رجعت سكرتهم تبسمت عالفازة...نحكي
انا:زهررة هيا فيق...ناوية تعدي نهار راقدة إنتي
زهرة:مممم
أنا:يا بنتي فيق...عندنا ما نعملو
زهرة:شفمااا ؟
أنا:قوم الساعة هيا
حلت عينيها بالسيف...تململ باش تقوم...غزرتلي تحكي
زهرة:صباح الخير
أنا:صباح النور لالة...من إمتى وليت تفيق بالسيف إنتي
زهرة:منعرفش...تاعبة عاللخر...نحس في بدني مدقدق
أنا:هذاكا من المطر لي مشيت فيها البارح
زهرة:مممم صحيح...زادة جيعانة عاللخر
أنا:الفطور حاضر...هيا قوم بدل دبشك قبل...و كان حبيت أعمل دوش يفرهدك
زهرة:ل لا...مفماش وقت...مش قتلي عندنا ما نعملو
أنا:باش نمشيو عند محامي جديد...مفماش نلقاو حل كان انتي مزلت تحب تكمل
زهرة:ع..عمر أنا...الحقيقة
عقدت حواجبي مستغرب...هزيت روحي وقفت...فكرة لهي باش تشد صحيح في كلامها...منجمتش نتقبلها غزرتلها نحكي
أنا:شنوة تحب تقول زهرة ؟
هزت روحها بالزربة وقفت قدامي...قربت مني شوية تحكي
زهرة:لااا مش لي أنت فهمتو توا...أنا باش نكمل في القضية أما
انا:أما شنوة ؟
زهرة؛ا أنا...صراحة
أنا:حل فممك
زهرة:البارح قابلت محامية
أنا:شننننوة ؟
بقات تغزرلي ندرا كيف...خذيت نفس نهدي في روحي نحكي
انا:زهرة حل فمك...من وين تعرفها المحامية...و وين قابلتها...و شبيك مخبرتنيش البارح
زهرة:ا أم وائل
عينيا وساعو بالوقت...شديتها من زندها...جبدتها عندي شوية نحكي
أنا:شنوة لي تحكي فيه إنتي...شتقصد بأم وائل...ياخي نورمال إنتي ؟
زهرة:م..مكانش عندي حل...مش أنت مشيت و خليتني و أصلا مريم هي لي حكات معاه...والله
أنا:أغزرلي هوني...شنية حكاية وائل هاذي
زهرة:م..مش أنت قتلي معادش نحب نراك...و معادش باش ناقف معاك مرة أخرى...خفت برشا أنك تخليني حتى مريم قالت معادش تحب تبقى معايا
أنا:بربي...و لقيت كان وائل في طريقك باش يعاونك
زهرة:مفماش وقت عمر...و مكانش عندي حل آخر...و هوكا هي وافقت عالقضية...و قاتلي جيب باقي الأوراق و كان لزم وائل تو يشهد معاك
أنا:وين البيرو متاعها ؟
زهرة:ف..في ¤¤¤¤¤¤
أنا:شنوووة كيفاش مشيتو لغديكا وحدكم ؟
زهرة:م..مع وائل
انا:شتقصد مع وائل ؟
زهرة:م..مشينا في كرهبتو
كبست على زندها أكثر...حسيتها توجعت...أما منجمتش نستوعب كلامها...قحرتلها نحكي
أنا:زهرة ركبت معاه إنتي ؟
هزتلي براسها إيه...دخلت بعضها أكثر...خذيت نفس نهدي في روحي و نحكي
انا:ناوية تهبلني صباح ربي...شتقصد بايه...حل فمك أحسن ما نفقد أعصابي الكل
زهرة:م..مش وحدي...والله كنت مع مريم و ركبنا من تالي...كان تحب أسألها
بقيت نغزرلها...تنهدت بالقاوي...نهدي في روحي...قربتلي شوية تحكي
زهرة:ا أمانك عمر...خلينا نمشيو عندها...وعدتني باش تعاوني...مبقاش برشا على الجلسة أمانك
رخفت يدي شوية على زندها...وخرت خطوة لتالي عديت يدي على وجهي...نغزرلها باقي مربوثة...ضيقت عينيا و أنا نهز فيها و نحط...تو وين ريتها بالقدا غزرتلي ندرا كيف...و نزلت راسها...حسيتها دخلت بعضها أكثر حطت يديها زوز...على حرف المريول تهبط فيه شوية وجها حمار بالوقت...نحس في الكلام وحل في حلقي أول مرة نراها قدامي هكا بعد آخر مرة خرجت قدامي وقت كانت هوني...هزيت يدي عديتها على شعري نحكي
أنا:أنا...أنا باش نمشي للكوجينة...هوكا دبشك عالفوتاي بدل و ألحقني
زهرة:ب..باهي
خرجت من الصالة من غير حتى كلمة اخرى...منعرفش كيفاش وصلت للكوجينة...نفخت بالقاوي...منعرفش شبيني ركزت معاها لهدرجة...مع أنو منحبش نحسسها بحتى شي...أما ساعات معادش نجم نشد روحي عليها مهما حاولت...منجمتش نحيها من مخي...شي اقوى مني...منعرفش كيفاش تعلقت بيها لهدرجة...و منعرفش كيفاش باش ننساها...باقي أفكاري تهز فيا و جيب...لين ريتها داخلة...متحبش تغزرلي...نعرف لي مزالت حاشمة من اللي صار...تنهدت بالقاوي نحكي
أنا:هيا تفطر
زهرة:و أنت ؟
أنا:باش نفطر معاك...و نمشيو للمحامية متاعك
زهرة:معناها وافقت
أنا:مممم
تبسمتلي بالوقت و قربت...قعدت مقابلها...نغزرلها بالرسمي معادش نعرف نتصرف معاها...كل مرة نقربلها خطوة...نعرف لي باش نبعد أكثر من هكا...و اللي البعد باش يكون صعيب أكثر...فقت من سرحتي على صوتها
زهرة:عمر
انا:مممم
زهرة:باش نجيبو التحاليل قبل ؟
أنا:باهي
زهرة:باش نربح القضية مش هكا ؟
هزيتلها براسي إيه...و تبسمتلها فرد وقت...مع أنو نعرف لي الحكاية معقدة...خاصة بعد اللي صار للمحامي...اما مستحيل نخليه يربح...صحيح خسرنا جولة...أما توا وين بدات الحرب...كان يموت ماهوش باش يعمل لي في مخو...و لا باش نخليه يقربلها مرة أخرى.