زهرة🌸

الحلقة الثامنة و الخمسون

🔸️حلقة 58
🔸️مريم تحكي:
فقت نحل في عينيا بالسيف...ديجا نص نهار...منعرفش كيفاش رقدت لتوا...أصلا منعرفش كيفاش تعدا أسبوع كامل...هزيت روحي بالسيف...دخلت لبيت البانو..غسلت وجهي...تقريبا شطر الوقت نعديه راقدة...جاب ربي خالتي فتحية مقدرة وضعي...حتى هو أسبوع كامل رايض...صحيح شي ما تبدل...أما عالاقل...تهنيت من تخرنينو و كلامو الماسط...بدلت دبشي...و حطيت يدي على كرشي نحكي معاه
أنا:جعت يا روح امك...والله عالمعدل هذا...باش تردني سمينة و خايبة
عوجت فمي..و تنهدت بقوة...كبست على كرشي...و كملت نحكي
أنا:و يصير...معناها شي باش يتبدل...حتى أنا معادش حاجتي بيه بوك...و أكيد أنت باش تفهمني...حتى هو باش يجي نهار و يختار ثنية جديدة
تنهدت بقوة...برغم نعرف لهذا باش يصير...كيما نعرف لأنا مستحيل نسامحو مهما صار...أما فما شي داخلي تحرك...منعرفش إذا نجم نتحمل أكثر من هكا..هو وحدو قاعد يحمل فيا أكثر من طاقتي...بلكشي كنت نجم نتهد في لحظة...أما صغير هذا...عطاني طاقة غريبة...فرد وقت خايفة...خايفة يعيش لعشتو أنا..خايفة من حسام يكمل في لي يعمل فيه و يفكهولي مبعد...صراعات و تخيلات وليت نعيش فيهم ليل نهار..نخمم شنوة نعمل و لا وين نمشي...متأكدة لي مستحيل نرجع عند بابا...و لا مزال باش يغزرلي مرة أخرى...لقيت روحي مربوطة هوني...منجمش نقرب و لا نبعد منجمش نمشي لحتى بقعة أخرى تلمني أنا و ولدي بعيد عليهم الكل...و هاذي لي باش تبقى نقطة ضعفي ديما تنهدت بقوة وخرجت من البيت...نزلت للكوجينة لقيت خالتي نعيمة...تحضر في الغذا...تلفتتلي تحكي
نعيمة:جيت عزيزتي...أقعد تو نحطلك حاجة تاكلها
انا:ميسالش خالتي تو نحط وحدي
نعيمة:وه اقعد...تو ندلل بنتي...و الأمير متاعنا لي جاي في الثنية
تبسمتلها بالوقت...و جبدت الكرسي...قعدت...غطست في الماكلة...هزيت راسي شوية نحكي
انا:خالتي
نعيمة:نعم عزيزتي
انا:ياخي حسام طلع من بكري
نعيمة:هز فتحية لطبيب متاعها...باش تعمل كونترول متاعها كي العادة
انا:منعرفش شبيني وقت نرقد معاد نحس بحتى شي داير بيا
نعيمة:طبيعي عزيزتي...اكا من الوحم
انا:باهي
هزيت روحي...خرجت للجنينة...خذيت نفس بالوقت الجو بدا يسخن...تبسمت و انا نغزرلو...يسقي في الورد منعرفش علاه ديما نحسو مختلف عليهم برشا...يمكن الماضي لي تعدا عليه خلاه يولي هكا...قربت منو شوية شوية...وقفت قدامو نحكي
انا:والله ديما كنت نسأل شكون اللي يسقي الوردات هذوما...ياخي طلع سي محمد
تلفت عندي بالوقت...تبسملي...و كمل يسقي و يحكي
محمد:شنوة تحس في روحك توا ؟
انا:لباس عيشك...و أنت ؟
محمد:والله اليوم كليت صحني...من غير ما يشاركني فيه حد
أنا:ربي يسامحك محمد...شنعمل كي ديما عيني جي على صحنك...و ديجا مش مني راهو
محمد:باهي...باهي...من غير ما تغزرلي هكا..المهم ترضى علينا إنتي و ولدك
أنا:ساايي توا أنا متغشة منك...برا عاد معادش نطلب صحنك جملة
محمد:شو الفرخة كي عاملة فيها متغشة
أنا:برا زمر مانيش فرخة
غزرلي ندرا كيف...و طرشق بالضحك...أول مرة نغزرلو يضحك بالطريقة هاذي...يشبه برشا لحسام...لون عينيه و شعرو...أما ماهوش حسام...منعرفش شبيني...برغم إني نكرهو...أما شي اقوى مني يخليني نحب عليه اكثر من قبل...فرد وقت منجمش نقرب منو...و لا حتى نغفرلو شي...فقت من سرحتي على صوتو يحكي
محمد:باش تبقى متغشة مني ياخي ؟
تلفت عندو غزرتلو ندرا كيف...مديت يدي شوية رشيتو بالما لي كان يسقي بيه...نحكي
انا:توا سامحتك
محمد:مممم و أنا نقول مزال فما وردة هوني...لتوا مسقيتهاش
غزرلي بخبث...ضيقت عينيا...و وخرت خطوة لتالي نحكي
انا:لا محمد أكيد ماكش باش تعملها
محمد:مممم جرب
قبل ما نحل فمي...هز يدو في وجهي...حاولت نوخر اما شي...لقيت الانبوب في وجهي...قربت منو بالزربة شديتو بيديا زوز...و دورتو عليه...تبلينا زوز مع بعض غزرتلو نحكي
انا:تسسستهل يا سخطة
محمد:يا مجنووونة...هاك مطلعتش ساهلة
انا:ههههههههه ملا عزيزي...شو كيفاش دوشتلي..جرايرك تو نمرض
محمد:تي سييب ساعة...شو كي كبشت فيه
أنا:معادش تردو عليا
محمد:لا متخافش
انا:باهي سيب انت
محمد:لا...نعرف تفوريخك
انا:يا محمد والله ماني باش نعمل شي...سيب شو كيفاش وليت كي الفلوس
غزرلي ندرا كيف...و طرشقنا زوز بالضحك...باقي الما نازل علينا...لا هو سيب...لا أنا...صوت ضحكنا واصل لآخر الدنيا...تلفتنا على صوتو يحكي
حسام:شفمممااا هوني ؟
قلبي خض بقوة مع صوتو...رخفت يديا زوز و وخرت لتالي...عديت يديا على وجهي...نبعد في شعري و نزلت بيهم...نهبط في روبة لي لصقت على لحمي..نزلت راسي منحبش نغزرلو...تلفت شوية...نغزر لمحمد...رماه على الأرض...و سكر سبالة...يحكي
محمد:مفما شي
وقف قدامو...زوز يهزو و يحطو في بعضهم...بدني تكبس أكثر...ريتو كي كبس عالبونية متاعو...منحبش يتعاركو جرايري...و خاصة محمد ما عندو حتى ذنب أحسن شي دخل و خلاه..هز راسو غزرلي...دورت وجهي بالوقت...نرعش..منعرفش من البرد و لا منو..نعرف لديما يستنى الغلطة مني...خاصة الأيامات هذوما حسيت روحي قربت لمحمد أكثر...أول ما قربلي..وخرت لتالي مروهجة...هزيت راسي غزرتلو...ينحي في الفاست متاعو...حطها على كتافي...حسيتها دافية...على البرد لي كنت نحس فيه...باقي يهز فيا و يحط من غير حتى كلمة...لميت روحي أكثر...جبدني من زندي في لحظة يحكي
حسام:أمشي قدامي
الهدوء متاعو رعبني اكثر...أما مستحيل نخليه يحس بخوفي...كبس عليا أكثر...يمشي فيا قدامو...وقفتنا خالتي فتحية تحكي
فتحية:وه بنتي شبي حالتك هكا ؟
حسام:هذا نتيجة تفوريخ مع ولدك
فتحية:شنوة لي صار ؟
حسام:برا اسأل ولدك
حاولت نجبد روحي منو...كبس على زندي أكثر...لين معادش نحس بيه..منعرفش كيفاش وصلنا للبيت..دزني لداخل و نطر الباب وراه يحكي
حسام:فسرلي شنية لي صار لوطة ؟
عديت صوابعي على زندي نبرد في البلاصة...و قحرتلو نحكي
أنا:حتى شي
حسام:أغزرلي هوني...تحل ¤¤¤¤¤ بالسياسة مكانش
أنا:مكانش شنننوة...باش تضربني ياخي ؟
حسام:مرررريم
أنا:متصيحش
لفيت روحي أكثر...بردت برشا...ناقصني هو توا...عدا يدو على وجهو...و قرب مني شوية...يحكي
حسام:ناوية تهبلني إنتي...شنية حكايتك...نورمال اللي عملتو إنتي
انا:ما عملت شي
حسام:شو كي تقلي ما عملت شي...تحبني نستجرم فيك باش ترتاح
أنا:مش قلتلك من قبل أعمل لي تحب عليه...في بالك باش تخوفني ياخي
جيت باش نمشي...جبدني من يدي بقوة...قلبي حسيتو باش يخرج من بقعتو...طاحت الفاست عالأرض بالوقت هزني و حطني...مديت يدي نزل في الروبة...شعل أكثر و دخل في سينة اخرى...يخض فيا و يصيح
حسام:توااا بانتلك تغطي روووحك...ياااخي نورمال في مخك...شنية الحالة لإنتي فيها...و زيد ضحكك واصل لآخر نهج...حل ¤¤¤¤¤ فمك...طرطور ياخي باش نلقى مرتي ¤¤¤¤¤¤ مع خويا
حاولت نجبد يدي منو...كبس عليا اكثر... قحرلي و كمل كلامو
حسام:فاش قام تنزلها توا...نحيها جملة و رتاح
بقيت نغزرلو مصدومة...نعرف وصل لاخرو...و ماهوش باش يفلتني توا...أصلا نسيت حكاية الروبة جملة...حتى محمد مركزش معايا...و لا حتى خذيت بالي من الحالة لي كنت فيها...تعدات فترة طويلة مضحتكش هكا عديت عينيا على تفاصيل وجهو...قداش نفد منو كي يولي هكا...و نعرف كان نشد صحيح...نوصل معاه لثنية مسكرة و ماهوش باش يسيبني...لين يعيفني في نهاري جا باش يحكي...رخيت بدني و ترميت عليه...سكرت عينيا بالوقت...من كبست يدو على ظهري...عرفت حجم الفجعة لي كلاها...يستهل...إلا ما نعمل فيه...و نوريه نتيجة عمايلو الكل...عدا يدو ترعش على شعري يحكي
حسام:م مريم...لباس ماهو...شبيك ؟
هديت روحي اكثر...منحبوش يحس لقاعد يصير لعبة خذيت نفس بالشوية...مبنها ريحتو السخطة...قداش توحشت قربو مني...توحشت نحضنو بالطريقة هاذي اما فرد وقت متأكدة لكلشي وفا...الدقايق هذوما باش يبقاو ذكرى من الماضي...منعرفش وين باش نصنفهم بالظبط...منعرفش اذا باش يجي نهار و ننساه جملة...اما كيفاش...و ولدو قاعد يكبر داخل كرشي...نزل عليا اكثر هزني بين يديه...حطني على الفرش...يعدي في يديه زوز على وجهي...يفيق فيا...و يحكي
حسام:مررريم...تسمع فيا ياخي ؟
بعد عليا في لحظة...دوب حليت عينيا نغزرلو...يفركس عالفونتولين متاعي لتوا مشفعش من الفازة لي عملتهالو بكري...أما توا بروحين...على هذاكا كلاها الفجعة دوبل قبل ما يتلفت عاودت سكرت عينيا...قرب مني يعاون فيا ناخو نفس منها...حليت عينيا شوية...و رجعت سكرتهم...عدا صوابعو على خدي يحكي
حسام:مرريم...جاوبني أمانك...شنية تحس في روحك
انا:د..دايخة...راسي يوجع فيا
قرب مني أكثر...ركح المخدة تحت راسي...يقيس في سخانتي و يحكي
حسام:باهي...رد بالك تتحرك
جبد روحو شوية...نغزرلو حل القاردروب...ندرا على شنوة يفركس...اول ما رجعلي...عملت فيها دايخة حسيت بيديه زوز لي تحطو على صدري...يحل في فلس الروبة...قلبي حسيتو خرج من بقعتو...حليت عينيا نحكي بالسيف
انا:ف فاش تعمل ؟
حسام:نبدل في ¤¤¤¤¤¤¤ لي لابساتو...مكانش تو تمرض و نوحل بيك
انا:سيب تو نلبس وحدي
حسام:احسن
طيش البيجاما في يدي...و هز روحو وقف يغزرلي تقعدت شوية نحكي
انا:دور وجهك
حسام:محسوب باش نموت عليك أنا...شنية فيك يعجب باش خايفة عليه
أنا:والله مانيش نستنى فيك تمدحني سي حسام...نعرف روحي بالقدا...و أنت ادرى...و توا دور وجهك و لا أخرج خليني نبدل دبشي
كلامو ركبلي العصب...خذيت نفس نهدي في روحي قحرلي...و تلفت عطاني بظهرو...بدلت دبشي كيما جا و حطيت شعري على جنب نحكي
انا:باش تبقى برشا هوني ؟
تلفت عندي بالوقت...خطف الروبة من يدي...شقها على زوز...عينيا وساعو...اكثر روبة نحبها...و نعمل بيها جو كبست على حرف الفرش نحكي
انا:علاااه هكا ؟
حسام:ريت...مزلت نرا ¤¤¤¤¤¤¤ حطيت روبة أخرى على لحمك...نشقك إنتي على زوز
أنا:خوفتني...راني نرعش...أغزرلي
هد عليا في لحظة...جبدني من يدي وقفني...يحكي
حسام:اقسم بالله...و رحمة بابا يا مريم...مزلت تلبس
¤¤¤¤¤ متاع الروبة...نقتلك...والله المرة هاذي نعملها على هذاكا متستفزنيش اكثر من هكا...خاطرني بالرسمي منحبش نضرك
عديت عينيا على وجهو...تبسمت على جنب...نحكي
انا:معادش فما أكثر من هكا حسام...معادش تفرق معايا و توا سيبني وجعتني
رخف يدو بالوقت...جبدت روحي منو...ترميت عالسرير و غميت على راسي نحكي
انا:تاعبة...و نحب نرقد
مرجعليش...كبس على الروبة في يدو...و دخل لبيت البانو تنهدت بقوة...و غمضت عينيا...منعرفش قداش تعدا وقت بالظبط...منجمتش نرقد...شي من ريحتو لي مزالت في البيت...و شي من الإحساس لي سيطر عليا منعرفش شبيني نقاوم فيه بالسيف...مش هذا لي لازم يصير..منحبش نخمم فيه...حتى شي ماهو باش يجمعنا بعد توا...حسيت بالباب لي تحلت...ما عملت حتى حركة باقي يدور في البيت...من غير ما يعمل حس..في لحظة حسيت بيه قعد على طرف السرير أول ما عدا صوابعو على خدي...بدني رعش بالوقت حاولت قد ما نجم منحسوش لأنا فايقة...نسمع فيه دوب يحكي
حسام:باش جيب آخرتي يا مريم...والله تعبت و تعبتك معايا...يا ريت فما حل لهذا الكل...يا ريت موصلناش لهوني جملة
نزل عليا اكثر...باسني من خدي...كبست على يدي بالوقت...متوقعتش باش يعاود يقرب مني لهدرجة...في لحظة جبد روحو...حليت عينيا على تسكيرة الباب هزيت روحي بالوقت تقعدت...عديت يدي على خدي مش مصدقة لي صار...كأنو اول مرة يقربلي...نزلت بيها لقلبي لي قاعد يدق بالقاوي...حاولت ناخو نفس بالسيف ما فهمت حتى كلمة من اللي قالو...زعمة شيقصد..هزيت براسي لا...نهرب في الافكار لي هدت عليا...مستحيل عندو مبرر عاللي عملو فيا الكل...من اول ليلة لتوا تصروفاتو و كلامو...شي ماهو باش يبررهم...و لا انا نجم نسامحو عليهم جملة...تكيت لتالي...نهدي في روحي..عديت بقية النهار في البيت...لين حسيت روحي تخنقت...ياسر وليت على اعصابي...حتى القراية مزال عليها برشا...فقت من سرحتي على صوت الباب نغزرلها داخلة...تعدلت في قعدتي...قربت مني قعدت قدامي تحكي
فتحية:شبي بنتي حابسة روحها هوني ؟
انا:شي خالتي...حبيت نقعد وحدي شوية
فتحية:شوية...هاك نهار الكل محصورة بين اربع حيطان مش باهي ليك يا روحي و مش باهي لولدك زادة...القلق هذا الكل
انا:شنعمل...هوكا اول ما نزلت هد عليا كي عزرائيل
فتحية:هههههههه خايفة منو انتي ؟
انا:لا...علاه حتى نخاف منو...اما منحبش نقلقكم بمشاكلنا
فتحية:اغزرلي هوني...انتي هوني في داري انا...تعمل لي تحب عليه...حد ماهو باش يحاسبك
انا:حتى حسام ؟
فتحية:حتى حسام...هيا قوم توا...معادش نحبك تغيب على الطاولة جملة
انا:دالي اللوطة ؟
فتحية:مممم
نزلت راسي بالوقت...منعرفش كيفاش باش نقعد معاهم زوز فرد طاولة...حطت يدها على خدي...تحكي
فتحية:ايجا مزال مجاش لتوا
انا:باهي
هزيت روحي وقفت...غزرتلي مستغربة...دخلت بعضي على خاطر البيجاما لي لابستها...كنت نلبسها في دارنا من قبل خاطر نرتاح بيها...اما توا قدامهم...قصت عليا كي تبسمت تحكي
فتحية:والله تقول بنت العشر سنين
انا:أمان خالتي
فتحية:نفدلك معاك...هيا توا...تلقاه ينفخ اللوطة
انا:والله بنزلتي تو يفد اكثر
حليت الباب...و سبقتها نزلت اللوطة...جبدت الكرسي و قعدت قدامو نحكي
انا:زعمة الامير الصغير متغشش مني
محمد:هات من تالي...تحب على صحني انتي
عديت عينيا عالطاولة...غريبة ما نجمت نمد يدي على حتى شي...تلفت عندو...نغزرلو...ضيق عينيه يحكي
محمد:فاش تخمم ؟
انا:محمد...مش قتلي وقت تحب حاجة...خبرني
محمد:صحيح...و هاني وليت خايف من اللي باش تطلبو
انا:محمد اماان
محمد:اشكي
انا:نحب على بيتزا توا
محمد:يا بنتي اغزرلها طاولة هذا الكل معجبكش
انا:لااا...والله شاهيتها عاللخر
محمد:كيفاش ضربت في راسك توا
انا:منعرفش هكا برك...امان محمد...يجي منو تخليها في خاطري...تو ولدي يتغشش منك...والله باش نشكيلو منك
محمد:باهي باهي...لي يغلبك يجي يحاسبني...هاني خارج
انا:نحبها بجبن زايد...امانك
محمد:باهي لالة تأمر
انا:عيشك
اول ما قام...دخلت خالتي فتحية...غزرتلو مستغربة تحكي
فتحية:وين على خير ولدي
محمد:تو نرجع
هز الفاست متاعو و خرج...تكيت لتالي نغزر لطاولة شوية و دخل حسام...قعد مقابلني...دورت وجهي بالوقت...نسمع فيها تحكي
فتحية:مريم عزيزتي...شبيك متحبش تاكول
انا:نستنى في محمد
منعرفش كيفاش خرجت من فمي...خاطر مخي الكل في البيتزا لي باش يجيبها معاه...قحرلي بالوقت يحكي
حسام:شنيية شننية...عاود لي قلتو ؟
انا:نستنى في محمد
حسام:مرررريم...وين تحب توصل ياااخي ؟
فتحية:حسااام يزي عيش ولدي...شبيك تصيح عالطفلة
انا:مش جديدة عليه...ديما هكا...مينجمش يحكي كيما العباد
حسام:فمك هذاكا باش نكسرهولك
انا:جرب تراه...تسمع فيه أمي...ياخي نورمال يضربني و انا حبلة ؟
فتحية:حساام يجي منو هذا
انا:و الصباح زادة كان باش يضربني
فتحية:شننوة ؟
انا:و فوقها قطعلي الروبة متاعي...خالتي ياخي يجي منو هذا الكل والله ديما كرشي توجع فيا جرايرو...يحب يقتلي ولدي باش يرتاح
عملت قريماس باش نبكي...بقى يغزرلي مصدوم...تلفتت عندو تحكي
فتحية:حسااام...مستوعب الشي لي عملتو...ياخي يجي منو تعمل في مرتك هكا و هي حبلة...تحب تصير حاجة لصغير الله لا يقدر...أغزرلي هوني...مزلت نسمع الكلام هذا...إلا ما نطلقها منك...و برا لدارك...عيش فيها وحدك
بقى يغزرلي ندرا كيف...تبسمت على جنب نستفز فيه إلا ما نوريه نسا شتعمل...يعرف بالقدا لي عمل هذا الكل و مينجمش ينكر...كبس عالبونية متاعو...قحرلي قحرة موت...دورت وجهي...و خليتو يغزل وحدو...و خالتي فتحية تقحرلو ليه...شوية و دخل محمد...هزيت روحي بالزربة...قربت منو شديتها عليه نحكي
انا:فيها جبن زايد
محمد:مممم
انا:عيييشك يا روحي...و الله أنت أحلى واحد في الدنيا
محمد:عيشو الصغرون...هيا خليني نتعشى توا
جبدت روحي منو...قربت من طاولة...باقي يغزرلنا من غير حتى كلمة...هزيت كاسة العصير في يدي نحكي
انا:خالتي فتحية...ميسالش نرجع لبيتي انا ؟
فتحية:برا بنتي...صحة ليك
انا:عيشك عزيزتي
قحرتلو...و تلفت عطيتو بظهري...نسمع فيه يحكي
حسام:انت حسابي معاك مبعد
محمد:باهي
نعرف مدام امو غديكا باش يحاول يتحكم في روحو طلعت للبيت...تربعت عالفرش...دوب هزيت كعبة في يدي...دخل ورايا...غزرتلو نحكي
انا:باز ماكش باش تعاركني توا...خاطر مانيش باش نسمعك...عاملة جو مع ولدي انا
حسام:شبيك طلبتها منو ؟
انا:شننوة ؟
حسام:نحكي على الهم لي توحمت عليها
انا:تحبني نخرج وحدي ياخي ؟
حسام:مررريم...ياخي نورمال تصرفات هذوما...تحب تهبلني إنتي...إنتي حبلة بولدي راك
انا:ولدك لأنت محاجتكش بيه...و تحبني نزلو
تنهد بقوة...و قرب مني...قعد على حرف السرير...هز يدو حطها على خدي...يحكي
حسام:مستحيل كنت نخليك تنزلو و لا تخسرو...انا زادة حاجتي بيه...و نحبو يجي لدنيا...منحبكش تتصرف بالطريقة هاذي...و تحمل هم الصغير وحدك...حط كلشي على جنب...أما الصغير هذا متاعنا زوز
بقيت نغزرلو...كلامو دخلني بعضي...متوقعتش باش يكون هادي لهدرجة...و لا باش يقول الكلام هذا...تنهدت بقوة نحكي
انا:متاعي أنا و كهو
تبسم ندرا كيف...و نزل راسو غزر لكرشي...و للبيتزا المحطوطة في نص...قحرتلو نحكي
أنا:رد بالك تخمم تحط يدك...برا كول لوطة
حسام:متخافش يا فرخة...بالشوية برك
أنا:مانيش فرخة...و ديجا أنت لي ريحتك تعيف...بربي شبيك وليت هكا
حسام:أنااا ؟؟
أنا:ملا أنا ؟ برا أعمل دوش...و لا أرقد في البيت لأخرى هيا قوم...عالأقل نجم ناكول البيتزا متاعي...بلا ما نشم ريحتك
حسام:والله شككتني في روحي...هاني باش نقوم...أما حط في بالك...اخر مرة تطلب منو حاجة
أنا:و مانيش باش نطلب منك زادة
حسام:جرب تراه
انا:معادش تهددني
حسام:فرخة متاع وذني...وحلت بيها أنا
أنا:برا زمر...مكانش لقلك عرس بيا بالسيف عليك...أصلا أنا الغالطة من الأول...خاطرني إخترت واحد مهبول زعيم كان في التهديد...محسوب باش نخاف منك توا مزال متعرفنيش يا روحي
سكر باب البانو...و خلاني نحكي وحدي...نفخت على قصتي...و غطست في البيتزا...مبنها زح...منعرفش كيفاش كملتها...طلعت راسي نغزرلو...كان لابس سروال السيرفاتمون كهو...و منشفة في يدو...عديت عينيا على صدرو...شبيه هذا خرج هكا...باهي زعمة شنوة باش يصير كان يعنقني توا...اففف شبيني هبلت نخمم فيه هكا...يهلكو مسقطو...طيشها من يدو عالفوتاي...و قرب ترمى بجنبي...قحرتلو نحكي
انا:قوم ألبس مريولك
حسام:أخطاني تاعب...مانيش ناقصك
أنا:هاني باش نقوم أنا...أقعد فيها وحدك
شدني من يدي كبس عليا...و حل عينيه شوية يحكي
حسام:كانك مرا...جرب قوم...إلا ما نهدها دار فوق راسك
أنا:باهي سيبني يا هم...يدي توجع فيا
رخف يدو...جبدت روحي لتالي...ريحة جال دوش و شامبو متاعو دوختني...حتى أنا نحب نعمل دوش بيهم أما ديوو كان باش يخليني نقوم توا...مانيش ناقصة هبالو جملة...باقي نتقلب في بلاصتي...لين فد...يحكي
حسام:اركح...خليني نعرف نرقد
انا:افففف منك افففف
حسام:مررريم
أنا:حساام...نجم نطلب منك حاجة
حسام:أششكي
انا:نحب ناخو دوش
حسام:توااا
أنا:مممم
حسام:فاش قام ؟
أنا:نحب تولي ريحتي كيفك...عالأقل نجم نرقد
حسام:مش على أساس تعيف...و معادش تعجبك
أنا:هاذي محلاها أمان...مش أنا نحب...البيبي يحب عليها
حسام:الوقت مأخر...صباح تنجم دوش
أنا:نحب توا...أماان
هز روحو شوية...يغزرلي مستغرب...تنهد بقوة يحكي
حسام:مشكلتك توا في ريحة إنتي ؟
أنا:مممم...مش مني راهو...كان جا عليا...منغزرلكش أصلا
حسام:باهي على خاطر ولدي نعرف
أنا:ملا نجم نقوم
حسام:لااا
طلعت راسي قحرتلو...جبدني من يدي بالوقت...تكيت عليه...حطيت راسي على صدرو...قلبي حسيتو باش يخرج من بقعتو...متوقعتش باش يعمل هكا...خذيت نفس نحكي
أنا:ف..فاش تعمل ؟
حسام:نحاول نرقد
أنا:هكااا ؟
حسام:عالأقل معادش تتحرك كل شوية
أنا:مش أنا سبب
حسام:نعرف لي البيبي مش إنتي...اركح توا...خليني نعرف نرقد
أنا:حتى أنا مش عاجبني الوضع سيبني تو نمشي للبيت لأخرى...حتى أنا معادش يساعدني نبقى معاك فرد بلاصة
حسام:ششش معادش نحب نسمع الكلام هذا مرة أخرى إنتي بلاصتك هوني معايا
أنا:لا...عمرها ما كانت بلاصتي معاك أنت
حسام:ماكش باش تسكت
انا:علاه تسكت فيا أنت
حسام:نحب نرقد
انا:تو يجي نهار و توفى اللعبة هاذي الكل مش هكا
حسام:ماهيش باش توفى
أنا:علاش ؟
حسام:ولدي عندك
أنا:هذا هو سبب ؟
حسام:مريم أرقد عيشك...تاعب و منحبش نغلط معاك في هالليلة الكلبة
أنا:أغلط حسام...ميسالش...عالأقل نعرف بلاصتي بالقدا و نعرف شكون أنا...و شنوة دوري في اللعبة هاذي
حسام:يزززي...نحي الأفكار هذوما من مخك توا...مفما حتى لعبة...ما تخمم في حتى شي باهي
أنا:ماكش باش تفكلي ولدي ؟
هزيت راسي شوية نغزرلو..نستنى فيه يحكي...هز يدو بعدلي خصلات شعري...و عدا عينيه على وجهي يحكي
حسام:مستحيل...حد ماهو باش يحرمك من ولدك حتى أنا...حط الكلام هذا في راسك
أنا:ملا شبيك قتلي نحيه نهارتها ؟
حسام:لحظة غش
أنا:لحظة غش؟ كنت باش تحرمني من ولدي
حسام:باش نعاودلك للمرة الألف...مستحيل كنت نخليك تأذي صغير و لا تأذي روحك
أنا:باهي
عاودت حطيت راسي على صدرو...برشا كلام نحب نحكيه...أما معادش فما فايدة منو...كلشي ولى واضح لي تكسر عمرو ما يتصلح بالتوضيح لي باش يقدمو هو كبس على شعري يحكي
حسام:آخر مرة تطلب حاجة من محمد
انا:و مانيش باش نطلب منك زادة
حسام:مررريم
أنا:شنننوة ؟
حسام:ماكش باش تنقص كسوحية راس لي عندك
انا:مانيش باش نقصها...و اللي في كرشي ولدي أنا و كهو...و معادش تدخل في حياتي...كيما أنا مانيش ندخل في حياتك
حسام:جبتو وحدك إنتي ؟
أنا:ساقط
حسام:زيد حل فمك تراه...تو نوريك ساقط شيعمل فيك
أنا:زايد لي باش تعملو...مش على أساس إحنا متعادلين توا
حسام:مرريم يززي...برحمة أمك أسكت
أنا:غريبة...شبيها ريحتك محلاها هكا...و أنت حد ما ينجم يطيقك
حسام:والله باش نتجلط ليلة...برا قوم أعمل دوش...و لا خليني نقوم أنا
انا:لا ماكش باش تقوم...توا وين بديت نرتاح أنا...تو من غدوة ندوش بيهم و معادش نقلقك
حسام:باهي...إرتاح توا
حسيت بتنهيدتو لي خرجت...حرقتني معاه...نحب نجبد روحي منو...نحب نبعد عليه...أول مرة نحس روحي عاجزة لهدرجة...واحلة في نص...لا نجم نقرب و لا نبعد نحب ننسى و منحبش نسامحو...صعيب برشا لي قاعدة نحس فيه...تناقض كبير في حياتي..نعرف روحي داخلة في حرب...و باش نخرج خاسرة منها دقات قلبو لي نسمع فيها توا...نعرف لماهيش ليا...أصلا هو عمرو ما كان ليا...هي كهو لي كانت في حياتو...و باش تبقى ديما محمد فيقني على الوضع لي كنت فيه...فهمت اللي هو مستحيل يحب مرة أخرى...مستحيل يخلي الماضي و يبدا من جديد..و أنا...أنا لقيت روحي في ثنية مسكرة لا نجمت نكمل فيها...و لا نرجع منها أما...عمري ما ندمت و لا باش نندم...انا خذيت الخطوة لي ريتها صحيحة حاربت برشا...و ضحيت برشا...باش نحافظ عليه...باش نعيش مع الشخص الوحيد لي حبيتو...و لي حسيت أنو يحبني...برغم و لا ما مرة فكرت لي عندو أهداف من ورا العرس هذا...هو إختار ثنيتو...و أنا مستحيل ناقف في وجهو...و لا باش نمنعو من اي قرار يحب ياخو..اللي ريتو في حياتي و كرامتي مستحيل تخليني نوطي راسي لحد...و لا نخلي حد يذلني...اكيد باش يجي نهار و الكرة تدخل لملعبي وقتها أكيد باش نذلو و نهينو باش نخليه يعيش دوبل لي عشتو...و يعرف قيمة لي يعمل فيه واثقة باش يجيني نهار هكا...مهما كان لي خسرتو و لي باش نخسرو زادة...أكيد وقتها نجم نبدا من جديد من غير ماضي...من غير حسام...انا و ولدي كهو...يمكن هو الرابط الوحيد اللي باش يجمعنا ديما مهما بعدنا على بعض...خذيت نفس طويل...تعبت برشا من تفكير...تعبت من الماضي...و تعبت منو زادة...هزيت يدي بالسيف حاوطتو بيها...منعرفش علاه...ولا منين جاتني الجرأة هاذي الكل...اما ريحتو هبلتني...برغم نعرف لقاعد يصير الكل غالط...و شي ماهو باش يتبدل بالنسبة ليا...اما توا بالظبط...نحب نبقى عندو كهو...من غير ما نخمم في اللي فات...و لا في اللي جاي مبعد أصلا اول مرة بعد اليمات لي تعدات نرقد مرتاحة...من غير ما نتقلق من شي...من غير ما نخاف نقربلو...باش ميفهمنيش بالغالط نعرف الوحم هذا باش يتعبني برشا خاصة كي وليت نحب عليه أكثر حد...و فرد وقت فادة منو و منحبش نشوفو...يدو لي باقي تتعدا على شعري خلاتني نهدا أكثر...و ننسى كلشي...لين منعرفش حتى كيفاش غفيت...و غطست في نوم.