زهرة🌸

الحلقة الثالثة و الستون

حلقة 63
🔸️مريم تحكي:
فقت الصباح نحل في عينيا بالسيف...حسيت بيدو لي كابسة على كرشي...نزلت راسي نغزرلها...مش بالعادة نفيق و هو بجنبي...حتى في الويكاند...قلبي خض بقوة تلفت شوية...نغزرلو راقد على كرشو و غاطس في نوم...للحظة سرحت في تفاصيل وجهو...اش خص كان جينا كيما لي كوبل الكل...زعمة علاه وصلنا للحالة هاذي علاه عمل معايا هكا...علاه اختارني انا...باش يلعب لعبتو المسخة عليا...الشهور لي تعدات عليا الكل باقي نسأل في روحي نفس الاسئلة...مديت يدي بالسيف حطيتها على خدو...منعرفش شنية لي حسيتو وقت فقت و لقيتو بجنبي...بالعادة يجي مأخر...و يقوم بكري...في الشهر هذا استفقدتو برشا...يمكن من الوحم قربتلو أكثر...ريحتو خدرتني عالصباح...حل عينيه شوية و حرك يدو على كرشي بالوقت...يحكي
حسام:صباح النور
انا:صباح الخير
حسام:شبيك فقت بكري ؟
أنا:أنت لي فقت مأخر اليوم
حسام:صاار
انا:مممم
هز يدو حطها على خدي هو زادة...يبعدلي في خصلات شعري و يحكي
حسام:ظاهر فيا...ضيعت برشا...و إلا كنت ديما نفيق مأخر كيما اليوم
أنا:شبيك لتوا ؟
حسام:ويكاند
أنا:على أساس في الويكاند ترقد لتوا...ماك ساعات تبات برا دار
حسام:هذا يرتحك برشا
أنا:عاللخر
حسام:تكذب
أنا:بربي ؟
نزل بيدو من خدي...حطها على كرشي...دوب تبسم يحكي
حسام:بنتي ترتاح...كان كي نبدا موجود معاها
متوقعتش باش يجاوبني بالطريقة هذيكا...يمكن كنت نستنى في كلمة أخرى...منحبوش يكون معايا على خاطر بنتو و كهو...زعمة غايرة منها أنا...جبدت يدي من خدو بالوقت...كبس عليها قبل ما نبعدها...باسني منها يحكي
حسام:تعرف لهذا أحسن صباح تعدا عليا لتوا
أنا:كان جينا في وضع آخر...راني صدقتك
جبدت روحي منو...أول ما تذكرت ريحتها عالفاست متاعو...حضني قبل ما نبعد عليه يحكي
حسام:خليك
أنا:سيبني خليني نقوم نحضر روحي
حسام:مزال الحال
أنا:فاش تعمل بربي ؟
حسام:حتى شي خليك هوني معايا و كهو
عديت عينيا على وجهو...شعرو داخل بعضو...ظاهر في تاعب...و مروهج بالنوم...كي تذكرت الحكاية متاع آخر مرة...دخلت بعضي...خاصة بعد ما عرف لأنا حبلة بطفلة حسيتو تعلق بيها أكثر...خذيت نفس بالسيف نحكي
أنا:ميسالش نسألك ؟
حسام:أسأل
أنا:منعرفش...وين باش توفا الحكاية هاذي...أما كان صار و أنت قررت تعاود حياتك...ماكش باش تلعب نفس اللعبة المسخة متاع العادة...و تفكلي بنتي المرة هاذي
حسام:مريم شنية لي تقول فيه إنتي ؟
أنا:منعرفش...نحب ناخو جواب...يخليني نعيش مرتاحة و نتأكد أنو بنتي ماهيش باش تكون طرف من اللعبة هاذي
حسام:لعبة شنية ؟
أنا:تعرف بالقدا على شنوة نحكي...أما لي يهمني توا...أنو بنتي أنا...ماهيش باش تعيش بين المد و الجزر متاعنا و مهما صار هيا باش تبقى معايا أنا و كهو...خاطرني ما نأمن عليها لحتى حد في دنيا
حسام:مرريم...نحي الأفكار هذوما من مخك...من أول مرة حبلت فيها...قتلك لحتى حد في دنيا...ماهو باش يفكلك صغيرك حتى أنا...و بنتي باش تتربا بين عيلتها مفهوم
أنا:صدقتك مرة...و ريت لي صار...أما بنتي خط أحمر يا حسام...باش نحارب على خاطرها لآخر نفس في حياتي وقتها برك...باش تولي أمانة عندك...و منعرفش إذا باش تحافظ على الأمانة...كيما الوعد متاعك
غمض عينيه بالقاوي...و عاود حلهم...جبدني عندو اكثر باسني من راسي يحكي
حسام:يزززي عاد...خلي الصباح هذا يتعدا من غير ما نستلمو بعضنا
أنا:باهي...سيبني توا
حسام:والله إنتي جيتني وحدك...و تو نسيبك كي نحب أنا
أنا:لااا عاد...تي سيب
حط يدو على كرشي مرة أخرى...يعدي فيها...و يحكي
حسام:متعباتك الفرخة هاذي
انا:لا...بالعكس
حسام:تنجم ترجع تقرا و إنتي هكا
انا:أكيد ماكش باش تدخل في قرايتي زادة
حسام:لا طمن
انا:باهي برشا
حسام:إمتى تبدا ؟
انا:من إمتى تسأل على الحاجات هذوما أنت ؟
حسام:من توا
انا:الأسبوع الجاي...أصلا راني روطار بأسبوعين
حسام:باهي
أنا:سيبني توا...لازمني نحضر روحي
حسام:شبيك مزروبة
أنا:ماكش باش دور في كلامك المرة هاذي زادة
رخف يدو عليا...غزرلي ندرا كيف...دوب تبسم يحكي
حسام:لا...هيا قوم حضر روحك...لين ناخو دوش
أنا:باهي
جيت باش نقوم...جبدني من يدي...خطف بوسة من خدي...قبل ما نقول كلمة...و رجع ترمى لتالي...هزيت روحي من غير ما نحكي شي...دخلت لبيت البانو...و سكرت الباب ورايا...حطيت يدي على خدي...و تنهدت بالقاوي...قربت للمرايا...نغزر لروحي...وقتها فقت على روحي...كبست عالرخامة نحكي
أنا:فاش تعمل يا مريم...فاش تعمل ؟
حليت السبالة...و غسلت وجهي...أكثر من مرة...كملت ريقلت أموري و خرجت...هز روحو...قرب مني...هزني و حطني ندرا كيف...تركز بعينيه على كرشي..لميت روحي بلا ما نحس...عدا يدو على شعرو...و دخل خذيت نفس و قربت حليت القارد روب...بقيت واقفة حايرة كي العادة...نفرت في الدبش...حسيت بخنقة لبست روبة حتى هي جاتني محزوقة كيما الباقي...أما أحسن منهم تلفت على صوت الباب...نغزرلو...لابس الكاب متاعو كي العادة...و يشيح في شعرو...ضيق عينيه يحكي
حسام:شنية هذا ؟
أنا:شننوة ؟
حسام:مش وصيتك من قبل...ياخي ناوية تركبهالي عالصباح إنتي
أنا:عفوا...مانيش فاهمة على شنية تحكي ؟
حسام:مررريم
أنا:شنننوة ؟
نفخ بالقاوي و قرب مني...وخرت لتالي بالوقت...قحرلي يحكي
حسام:نحكي على العجب لي لابساتو توا
أنا:والله أكا الموجود...و منظنش الحكاية تقلقك برشا أكثر من مرة نقلك...متدخلش في أموري...كيما قاعدة نعمل أنا بالظبط...و كانك تعمل هكا...باش متهزنيش معاك...ماهيش حاجة كبيرة...كي ترجع نشوفها...أصلا كان واضح هذا من الأول
هزيت الجيلي متاعي...من الفوتاي...و جيت باش نخرج كبس على يدي...و رجعني عندو...غزرلي ندرا كيف يحكي
حسام:منقصدش لي فهمتو...أما زادة الروبة مكبوسة عليك برشا...و خاصة كرشك...برا ألبس حاجة أخرى...و حضر روحك باش نمشيو...عيش زين
أنا:الباقي مكبوس أكثر منها...و أصلا معادش عيني فيها روحة هاذي
حسام:باهي
جبدت يدي منو و خرجت من البيت...أصلا شنية كنت متوقعة منو...أكيد كان باش يلقى سبب...نزلت اللوطة لقيت امي فتحية كهو...صبحت عليها...و قعدت بجنبها غطست في الصحن...نحب ننسى غشي منو...منعرفش قداش تعدا وقت...طلعت راسي نغزرلو...شاد صاك متاع دبشو في يدو...معناها عمل لي في راسو...و شنية يعرفني...لهو ماشي باش يقعد بحذاها...و لقاها سبة حطها من يدو و قعد بجنبي يحكي
حسام:صباح الخير فتحية
فتحية:صباح النور ولدي...وين عالصباح ؟
هز يدو حطها على يدي...غزرتلو مستغربة...تبسم يحكي
حسام:باش نمشيو بحذا عمر الويكاند هذا..فرصة نرتاحو فيها شوية في البلاد
انا:أما
حسام:كان كملت..هيا قوم
فتحية:برا بنتي بدل جو معاه
انا:ما حضرت حتى شي راهو
حسام:هيا قوم توا...حطيت لي تحتاجو مع دبشي
دورت راسي غزرتلو...دوب تبسملي و كبس على يدي اكثر...كبست على تليفوني...و هزيت روحي معاه...عنقت امي فتحية...نحكي
انا:خبر محمد لانا باش نكلمو مبعد
فتحية:باهي عزيزتي
خلطت عليه لبرا...لقيتو يسكر في الباب...قربت منو نحكي
انا:تنجم تفهمني لي قاعد يصير ؟
حسام:هيا اركب
انا:عالأقل...كنت نجم ناخو حوايجي
حسام:هيا برك...فيسع
قحرتلو...و حليت الباب ركبت...خلط عليا...و خدم الكرهبة...حطيت الحزام...و دورت راسي للبلار...فقت من سرحتي...كان كي شد الفران...بحذا بوتيك...و غزرلي يحكي
حسام:أنزل
أنا:علاه جينا لهوني ؟
حسام:ياخي ديما تردلي بسؤال إنتي ؟
أنا:باش نجم نفهمك
حسام:باهي...أنزل تو تعرف
هزيتلو براسي إيه...أول ما نزلت خلط عليا...دخلت وراه مترددة...وقفت في دخلة لبوتيك...نغزرلو يحكي مع الطفلة
حسام:ميسالش تعاونها
هي:أكيد
قربت مني...وقفت قدامي...تبسمتلي ندرا كيف تحكي
هي:تفضل مدام...شنية تحب بالظبط ؟
عديت عينيا على كل قطعة...و ركزتهم فيه هو...لي وصلو ميساج بالوقت...و لتهى يرد عليه...علاه جابني لهوني ؟ فسر كلامي صباح هكا...كيفاش يفكر لأنا مزلت بحاجتو...و لا نستحق أي حاجة منو...باقي غاطس في تليفونو...فقت من سرحتي...على صوتها مرة أخرى
هي:مداام
طلعت راسي غزرتلها...خذيت نفس...و قحرتلها...نحكي
أنا:حتى شي
قبل ما تقول كلمة..عطيتها بظهري و خرجت من البوتيك منعرفش كيفاش وصلت للكرهبة...أول ما فتحت الباب سكرها ورايا يحكي
حسام:شبييك ؟
غمضت عينيا بالقاوي...و عاودت حليتهم...هديت روحي و تلفت عندو نحكي
أنا:شنية تستخايل في روحك تعمل ؟
حسام:شنننية ؟
أنا:يزززي عاد...إذا ماكش باش تمشي...خليني نرجع لدار
حسام:مرريم...شعملتلك أنا توا ؟
أنا:حتى شي...أما متحاولش تعاملني بالطريقة هاذي كهو
حسام:شقصدك ؟
أنا:قتلك حتى شي...أبعد توا
حسام:منعرفش شنية لي فهمتو بالظبط...أما حبيتك تختار دبش ترتاح فيه أكثر...و تكون فيه براحتك
أنا:مش لازم
جبدني من يدي على جنب...و حل الباب...يحكي
حسام:باااهي اركب توا...و رد بالك تتحرك من بلاصتك
سكرها بالقاوي...و رجع للبوتيك...تكيت لتالي...نرد في النفس...دورت راسي...نغزر للبوتيك متاع الصغار...لي بحذاه...تبسمت من غير ما نحس...عديت يدي عالبلار و سكرت عينيا بالوقت...منعرفش شنوة لي مزال باش يصير اكثر من هكا...منعرفش قداش تعدا وقت بالظبط حسيت بيه كان كي حل باب الكرهبة من تالي...حليت عينيا بالوقت...و مديت يدي رجعت شعري لتالي..سكرو و ركب...محاولتش نغزرلو...و لا حتى نسألو على شنية لي شراه...استغربت كي حط بوات صغيرة في يدي غزرتلو بالوقت نحكي
أنا:شنية هاذي ؟
حسام:حلها تو تعرف
أنا:مش لازم
حسام:متخافش ماهيش ليك هاذي
انا:ملا ؟
حسام:حلها ساعة
كبست عليها في يدي...خذيت نفس و بديت نحل فيها عينيا وساعو بالوقت...و انا نغزر لصباط غوز...صغير برشا...ضحكت من غير ما نحس..هاذي كانت أول حاجة لبنتي...متوقعتش لفازة منو...هزيتو في يدي نعدي في صوابعي عليه...طلعت راسي باش نحكي معاه...لقيتو مركز معايا...تبسمت نحكي
أنا:مرسي برشا
مد يدو...حطها على خدي...بعدلي خصلات شعري لتالي يحكي
حسام:كي نرجعو من البلاد...تاخو بقية الدبش لصغرونة باهي
هزيتلو براسي ايه...اول مرة بعد شهور هذوما...حسيتو تصرف كيما العباد...تبسملي و خدم الكرهبة...بعد ساعتين وقفنا قدام ريستو...و كملنا الثنية للبلاد...رقدت من التعب...حسيت كان بصوابعو لي تتعدا على خدي يفيق فيا...حليت عينيا مروهجة...لقيت الكرسي طايح لتالي...و الفاست متاعو فوقي...غزرلي يحكي
حسام:وصلنا
هزيت روحي بالسيف...كبس على يدي عاوني...و ضيق عينيه يحكي
حسام:لباس ماهو ؟
انا:منعرفش...حاسة روحي متقلقة
حسام:يمكن من التعب...عمر خارج عندنا..سلم عالجماعة و ارتاح شوية
انا:باهي
حطيت الفاست متاعو في يدو...و غزرتلو نحكي
انا:وين نحط هذا ؟
حسام:خليه هوني ميسالش
هزيتلو براسي ايه...و حطيت الصباط في صندوق الكرهبة...و هزيت روحي خرجت...النسمة الباردة لي هوني هداتني بصفة غريبة...قربت منو...وقفت بحذاه خرج عمر بالوقت...قرب منو عنقو...مع انو نعرف لي معندهمش على بعض برشا...جبد روحو سلم عليا
خلطنا عليه...نغزر للجماعة لي واقفين في الساحة
قربت مني امو...سلمت عليا...تحكي
فاطمة:مرحبا بيكم هوني
حسام:عيشك خالتي
فاطمة:سلمى...ايجا عزيزتي...لي هوني أصحاب عمر و زهرة
طلعت راسي غزرتلها...غزلت عليها قبل ما نعرفها
معناها هاذي راس الحية لي حكات عليها زهرة...و طلع عندها حق...ما ناقصة شي...مديت يدي بالسيف صافحتها...نحكي
انا:وين زهرة ؟
زهرة:هوني يا روحي
تلفت عندها نغزرلها...نازلة عندي...عينيا وساعو كي ريتها...متوقعتش تضعف لهدرجة...و اصلا ظاهر فيها تاعبة...من غير ما نخمم مرتين...ترميت عليها عنقتها زهرة اكثر من اختي...يمكن هي الوحيدة كهو لي مخذلتنيش لتوا...همست في وذنها نحكي
انا:شبي حالتك هكا ؟
زهرة:حكاية طويلة
جبدت روحي منها...و تبسمت كانو ما فما شي...بقيت واقفة بجنبها...نغزر لطفلة...نازلة تجري...منعرفش شبيني ركزت معاها...وقفت قدام عمر...ترد في النفس بالسيف...غزرت لزهرة تبسمت تحكي
زهرة:هند اخت عمر
هند:تأخرت مرة أخرى...سامحوني...والله هزني النوم سامحوني مرة اخرى
قربت من حسام...وقفت قدامو...و مدت يدها...تحكي
هند:انا هند
كبست على يدي بالوقت...و انا نغزرلو...كيفاش حط يدو في يدها...و تبسم يحكي
حسام:و انا حسام...و صحة نوم
هند:عيشك
بقيت نغزرلو...غزلت عليه اكثر...و تلفت لزهرة نحكي
انا:زهرة...تعبت برشا...لازمني نرتاح شوية
زهرة:اكيد عزيزتي
قربت مني وقفت قدامي...و تبسمتلي بالوقت...تحكي
هند:مرحبا بيك
انا:عيشك
هند:انتي مريم مش هكا
انا:مممم
هند:كيما حكاتلي زهرة بالظبط
دوب تبسمتلها...و طلعت راسي غزرتلو...جات عيني في عينو...قحرتلو و تلفت لزهرة نحكي
انا:معادش نجم ناقف اكثر
زهرة:ايجا معايا
خلطت عليها...طلعت وراها...ترميت عالفوتاي بالوقت...و تكيت لتالي...حسيت روحي تعبت برشا...حطت كاسة العصير قدامي...و قعدت بجنبي تحكي
زهرة:لباس توا ؟
انا:احسن
زهرة:كيفها الصغرونة ؟
انا:مممم تاعبة شوية اليوم
زهرة:نظن باش تتفرهد...كي تعرف لهي باش جيها اختها و لا خوها
هزيت روحي شوية تعدلت في قعدتي...غزرتلها مستغربة نحكي
انا:تقصد لانتي ؟
زهرة:مممم...تقريب شهر
انا:شبيك مخبرتنيش
زهرة:و انا لحقت نخبر حد
انا:مبررروك ياا روحي...والله فرحتلك
زهرة:ششش رد بالك حد يسمعك
انا:علاه ؟
زهرة:حد ما يعرف من غير هند
انا:و عمر ؟
زهرة:عممر...ههههههه لاهي ببنت خالتو...يمكن معادش نهمو كيما قبل
انا:شنننية...هبلت ياخي...انتي اكثر وحدة تعرف شنية عمل على خاطرك
زهرة:يا ريتو ما عمل شي
انا:زهرة فاش تحكي انتي ؟
زهرة:مش وقتو...منحبش نفسد عطلتك من اول نهار
انا:عطلة شنية يا بنتي...شعمل عمر زادة ؟
زهرة:ماشي في بالو لانا طيحت صغير
انا:كييفاش ؟
زهرة:سمع من سلمى....و فاح فيا...و في الاخير طلعت نشبه امي
انا:حيييت زايد كيفو...كيف صاحبو...اما اكيد مقالش الكلام هذا من قلبو
زهرة:بالعكس...اول مرة نحسو الكلام هذا...اول مرة حسسني...لهو تعب مني...و من مشاكلي...و من كلشي يتعلق بيا
انا:يا بنتي يهديك...مستحيل عمر يخمم بالطريقة هاذي فيك
زهرة:و انا كنت نقول نفس شي
انا:و كيفاش علاقتكم توا ؟
زهرة:البارح قلت لي عندي الكل...من وقتها معادش دار بيا...و لاهي في خدمتو...و سلمى مقصرتش...في كل فرصة...تقرب منو و تحكي معاه
انا:احسن شي ترجعو في اخر الاسبوع لتونس
زهرة:اكا لي خايفة منو...خايفة ياخو قرار...و ميحبش يرجع...الشهور هذوما تعلق بعيلتو اكثر...يمكن قاعد يعوض في سنين لي ضيعها
انا:و قرايتك ؟
زهرة:يمكن هذيكا اخر فرصة...تخليني نخرج من هوني خاطر عندي احساس...انو البقعة هاذي باش تخسرني في عمر
انا:لا مستحيل...مهما صار...عمر ماهوش باش يسمح فيك و لا يخليك....نحي الافكار هذوما من مخك توا
زهرة:مرييم
انا:شنوة يا روحي ؟
زهرة:كان نخبرك حاجة...زعمة تصدقني ؟
انا:اكيد
زهرة:على مراد ؟
انا:شمذكرك فيه توا
زهرة:مزال عايش
بقيت نغزرلها مستغربة...نحاول نستوعب كلامها..حطيت يدي على كرشي نحكي
انا:زهرة...عارفة روحك فاش تحكي ؟
زهرة:كرهبتو لي ريتها وقت كنت معاك...و الكرهبة لي جاتني في دار الجبل...و بالصدفة شميت ريحتو في ال conservatoire لي تقرا فيه هند...و بوات الموسيقى لي عندها...في عيد ميلادها...لبست نفس الروبة لشرهالي مراد...و في نفس لون...اكيد مزلت متذكرتها وقتها الكل يسأل فيا كيفاش نجمت نشريها...و حاطة من نفس برفانتي زادة...البرفان...لي كل مرة كان يسافر فيها...ياخولي منها...و الرقم لي يطلبني من فترة لفترة زادة...هذا الكل مش صدفة يا مريم...كلشي يقول انو مراد مزال عايش لتوا
انا:و شنية علاقتو بهند ؟
زهرة:منعرفش...و فوق هذا الكل عمر...يستخايلني نهلوس بيه
جيت باش نحكي...حسيت بيه داخل...تبسمت...نحكي
انا؛ههههههههههه والله حتى انا اكاكا
عينيها وساعو بالوقت...هز تليفونو...و قرب منها يحكي
عمر:الجماعة يسألو عليكم لوطة...هيا توا...باش نمشي مع حسام في قضية و نرجع
زهرة:باهي
غزرتلي ندرا كيف و وقفت...وقفت في جرتها...بالرسمي علاقتهم داخلة بعضها...اول مرة عمر يكلمها بالبرودة هاذي...و حتى منها مقصرتش معاه...اول ما بعد علينا شديتها من يدها...و همست في وذنها نحكي
انا:مصدقتك...اما رد بالك الكلام هذا خطير برشا ما تحكي شي لعمر قبل ما تتأكد...يمكن يطلع مراد عايش و يمكن فما شكون يلعب في لعبة مسخة عليك...توا اهم حاجة تعملها...ارجع لتونس...و لدارك...وقتها برك تنجم تثبت صحة كلامك
تبسمتلي بالوقت...و هزتلي براسها ايه...نزلنا لوطة...الكل يجري و يحضر في العشا...قعدنا مع بعض...مع فاطمة تبسمت تحكي
فاطمة:انتي حبلة عزيزتي ؟
انا:ايه
فاطمة:ربي يكمل بالخير عزيزتي
انا:عيشك طاطا
فاطمة:العاقبة لكنتنا
دوب تبسمت و هي ترمي في الكلام...غزرت لزهرة تبسمت تحكي
زهرة:ان شاء الله
فاطمة:وقيت بنيتي...حتى صحبتك باش يجيها صغير على قريب
زهرة:كلشي بالمكتوب...و لي عند ربي مش بعيدة
بقيت نغزرلها مستغربة...كيفاش ردت عليها...غزرتلها نحكي
انا:اهم شي يحبو بعضهم...و الصغار تو يجي وقتهم مش هكا سلمى
كملت كلامي...و انا نغزرلها و هي داخلة...تبسمت بالسيف تحكي
سلمى:صحيح
فاطمة:ايجا اقعد عزيزتي
سلمى:خالتي تفضل...مدام عمي وصل
فاطمة:هيا لبنات قومو معايا توا
خلطنا عليها لبرا...طلعت راسي غزرتلو...قاعد مقابلها
اي والله يطلع منو...ما يضيع حتى فرصة...جبدت الكرسي...و قعدت بحذاه...تلفت عندي شوية...يحكي
حسام:لباس توا ؟
انا:احسن
حسام:شصار زادة ؟
انا:حتى شي
قحرتلو و دورت راسي...تعدات سهرية طويلة...فيسع ما دخل معاهم في الجو...و حتى لالة هند مش مقصرة معاه...بقيت انا و زهرة ساكتين...حسيت بيها تاعبة مش نورمال...حتى انا تعديت على نفس الحالة من قبل
نوقز تليفوني بالوقت...لقيتو محمد يطلب...جبدت روحي منهم...و هزيت عليه نحكي
انا:محمممد وينك لتوا ؟ من بكري نستنى فيك تطلب...و البارح مرجعتش لدار زادة...لباس ماهو...صارت حاجة ؟ شبيك حتى لتوا باش تذكرتني ؟
محمد:ششش اهدا ساعة
انا:باهي...نسمع فيك
محمد:خبرتني فتحية لانتي...مشيت معاه...لباس قالك شي ؟
انا:لا...اليوم اليومين هذوما منعرفش شبيه...يتصرف هكا
محمد:هو اصلا مش فاهم روحو
انا:زعمة يكون تصالح معاها...على هذاكا عامل جو
محمد:شكون ؟
انا:شيعرفني...بلكشي صحبتو القديمة رجعت
محمد:بربي...تحب تفهمني لهو تصالح معاها...و قاعد معاك توا
انا؛شقصدك ؟
محمد:قتلك حسام منساش الماضي متاعو...اما مش يرجعلو بالسهولة هاذي
انا:ملا وين كان غاطس شهر هذا ؟
محمد:يمكن في الخدمة...سهرياتو كي العادة...اما يرجعلها...مستحيل
انا:محمد انا هكا حاسة...و مستحيل احساسي يخيبني المرة هاذي...حسام فما شكون في حياتو...منعرفش اذا كانت نفسها لي حبها قبل...و لا طفلة اخرى...اما بعد ما تبدل الفترة هاذي...حاسة انو رجع لطفلة لي كان يحبها
محمد:مريم...عزيزتي...متخممش في الامور هاذي توا و مدامك في البلاد...اتفرهد و بدل جو
انا:في الثنية حكا معاها زادة
محمد:مرريم...يزي عيش اختي...يا سيدي...و يرجعلها نعرفك اقوى من هكا
انا:تعبت محمد...والله تعبت منو...و من المد و الجزر متاعو...و ما نجم نحكي لحتى حد غيرك...طلبت طلاق اكثر من مرة...اما رافض الفكرة...و حتى ميحاولش يناقشني فيها...و اكثر شي خايفة على بنتي
محمد:هاني معاك...امي معاك...ما عندو ما يعمل متخافش
انا:باهي
محمد:برا اتفرهد اليومين هذوما...و كان صار شي كلمني...مسافة الطريق و نكون عندك
انا:باهي عيش خويا
علقت عليه و تلفت...لقيتو واقف بحذا الباب...يغزرلي من بعيد...كبست على التليفون في يدي...قرب مني يحكي
حسام:منجمتش تصبر عليه
انا:شمدخلك انت ؟
حسام:باهي يا مريم باهي
انا:تعبت و نحب نرقد
خرجو الجماعة بالوقت...قربت منا فاطمة...تحكي
فاطمة:بيت عمر القديمة حاضرة...تنجمو ترتاحو فيها
حسام:عيشك
انا:ملا هاني باش نسبقك
خلطت على فاطمة...طلعت وراها...وراتني البيت...و كملت لبيتها...حليت الباب و دخلت...محلاها البيت...اما سرير...صغير شوية...ميسالش اتو يرقد عالارض...و نرتاح منو...نص ساعة اخرى...و خلط عليا...سكر الباب وراه...و حط الكيس في يدي يحكي
حسام:تنجم تبدل دبشك
حليتو...و جبدت منو الروبة متاع نوم...قصيرة...و عريضة شوية...احسن من هاذي عالاقل...نرتاح فيها...و مزال فما حوايج...محاولتش نضرب طلة...حطيتها من يدي...و قحرتلو نحكي
انا:اخرج خليني نبدل
حسام:مانيش خارج
انا:ملا هم هذا...دور...دور...و الا انا باش نخرج نبدل في بقعة اخرى
نفخ بالقاوي...و تلفت عطاني بظهرو...يقلب في الكتب بدلت بالزربة...و حطيت دبشي على جنب...نحكي
انا:كملت
هز صاكو من الارض...و جبد دبشو...قحرتلو نحكي
انا:باش تبدل هوني ؟
حسام:مممم اما مش لازم دور وجهك...عادي معنديش مشكلة
هزيت المخدة...ضربتو بيها...شدها بيدو...و قحرتلو نحكي
انا:زايد متحشمش
حسام:مرتي راك...مش لازم نذكرك كل شوية
انا:حمد الله لي فكرتني
طيش المخدة على جنب...و نحا الفاست متاعو...و سوريتو و مد يديه باش يحل سروالو...معناها بالرسمي معندوش مشكلة سخطة...هزيت يديا زوز...غطيت وجهي...حسيت بيها كان كي ترما قدامي...نطرت من بلاصتي جيت واقفة نحكي
انا:فاش تعمل ؟
حسام:باش نرقد يا روحي
انا:هوني
حسام:ملا وين تحبني نرقد ؟
انا:منعرفش...دبر روحك الليلة...السرير صغير و ماهوش باش يوسعنا الزوز
حسام:لا بالعكس...يهز بلاصة و نص
انا:هاك قلتها...معناها ميهزش زوز...و خاصة واحد قدك
حسام:باهي لالة...و شتحبني نعمل ؟
انا:ترقد عالارض
حسام:والله ؟
انا:والله
حسام:و منين نجيب الفرش توا ؟
انا:برا اطلب منهم
حسام:محلاني...نطلب في فرش زيادة...خاطر مرتي متحبش ترقد معيا
انا:تو نطلب انا
حسام:تحط ساقك برا البيت...نهد القصر هذا على راسك و ما يهمني في حد
كي ريت وجهو تكبس...عرفت لمعادش فيه...و مش من صالحي...نكبش فيه توا...نفخت بالقاوي...و قربت منو قعدت على طرف سرير...نحكي
انا:اففف منك
حسام:زيد افاف زيد
جبدت المخدة...و تسطحت على طرف السرير...عطيتو بظهري...نغزل منو...و نحكي فرد وقت
انا:باهي باهي
قرب مني شوية...دور يدو على كرشي...و جبدني عندو اكثر يحكي
حسام:ايجا هوني...ايجا
انا:فاش تعمل ؟
حسام:هكا السرير...يكفينا زوز...و بالزايد
انا:برافو...هاك لقيت الحل
حسام:يززي توا...و حاول ترتاح
انا:باهي
حسام:مريم ؟
انا:مممم
حسام:محمد علاه طلبك ؟
انا:يسأل عليا و كهو
حسام:يسأل ملا ؟
انا:ايه
حسام:بالمعنى صحيح طمن عليك
انا:مش اول مرة يعملها
حسام:باهي برشا
انا:عالاقل فما شكون يطمن عليا كل يوم...مش مرة في شهر و لا شهرين
حسام:مريم انا
انا؛رد بالك تبررلي شي
حسام:ابعد على محمد...خليك بعيدة عليه
انا:محمد خويا...مش بالظرورة...ناس الكل تخمم كيفك
حسام:نعرف اما
انا:اما تحبني نعيش وحدي...و نستناك من فترة لفترة حتى تتذكرني...مش هكا
حسام:يزي من تخلويض متاعك...و اسكت
كبس عليا اكثر...لين معادش فما مسافة بينا...قلبي خض بالقاوي...من كبست يديه...من ريحتو...من قربو و اهم شي..من يدو لي قاعدة تتعدا على كرشي بالسياسة خلاتني نسكر عينيا...من غير ما نقاومو...و لا ندخل معاه في نقاش اخر...استسلمت لنوم...من غير ما نخمم في حتى شي اخر...خاطر ظاهر الايام لي جاية مخبيتلنا برشا احداث...و منعرفش شنية باش يصير فيها اكثر...مديت يدي من غير ما نحس...حطيتها على يدو...لي كابس بيها على كرشي...و غطست في النوم.