🔸️حلقة 14
بقيت نغزرلو...بدني الكل رعش...فكرة مراد جا كهو خلاتني نترعب...قربت منو شوية...نحكي و نرعش
أنا:م..متحلش
ضيق عينيه...و هز يدو في وجهي...معجباتوش الفازة قحرلي يحكي
عمر:هدي روحك
هزيتلو براسي إيه...و خلطت عليه...نغزرلو ماشي و يقرب للباب...كبس عالبواني و حلها...نسمع فيه يحكي
عمر:سيرييين ؟
باقي واقف في بلاصتو...نسمع في صوت طفلة تحكي
سرين:عممممر...وينك أنت ياخي ؟
وخر شوية عالباب...طلعت راسي شوية شوية...نغزرلها نثبت فيها و قلبي يدق بالقاوي...هزتني و حطتني بحقرة...بعدت عينيا عليها بالوقت...نسمع فيها تحكي
سيرين:ع..عمر شكون هاذي ؟
تلفت عندي بالوقت...طلعت راسي غزرتلو...منعرفش شنية لي قاعد يصير بالظبط...غزرلها يحكي
عمر:أدخل
قربت خطوتين...نطر الباب سكرها بالقاوي...باقي تهز فيا و تحط...تلفتتلو تحكي
سيرين:عمر أمانك جاوبني...شكون هاذي و شتعمل عندك ؟
عمر:سيررييين
سكتت كي صاح عليها و هز يدو عداها على وجهو نزلت راسها...تحكي بغصة
سيرين:ع..علاه متحبش جاوبني ؟
عمر:زهرة
هزت راسها بالوقت...غزرتلي...جات عيني في عينها تحكي
سيرين:زهرررة ؟
تلفتت عندو غزرتلو...كبست على يدي...ما نجمت نحكي حتى حرف...جيست نغزرلهم...تنهدت تحكي
سيرين:عمر عيشك فهمني لقاعد يصير ؟
عمر:زهرة تقرا عندي
سرين:باهي شتعمل هوني هي ؟
عمر:قاعدة عندي
سيرين:ش..شنوووة فاش تحكي ياخي ؟
عمر:سيريين هدي روحك
سيرين:ك..كيفاش قاعدة عندك ؟
عمر:قتلك اهدا...زهرة باش تبقى هوني فترة
سيرين:م..معاك ؟
عمر:نحكيو في الموضوع مبعد
سيرين:معناها على جالها أنت معادش اهتميت بيا
عمر:سيررييين قتلك يزي
تلفتت غزرتلي بالوقت...حاولت نهرب عينيا منها...نسمع فيها تحكي
سيرين:ماكش باش تعرفنا
عمر:زهرررة
طلعت راسي غزرتلو بالوقت...مفهمتش علاش قاعد يغزرلي بالطريقة هاذي...تنهد يحكي
عمر:سيرين خطيبتي
حسيت نفس تسكر عليا و أنا نغزرلو...كلمة مصدومة...ما تجي حتى شي قدام لي حسيتو...دم جمد في عروقي بلعت ريقي بالسيف نحكي
انا:م..متشرفين
تبسمت على جنب...هزتني و حطتني من غير حتى كلمة...خذيت نفس نحكي
أنا:ب..باش نخليكم وحدكم
مستنيتوش يجاوبني..تعديت من قدامو و دخلت للبيت بالزربة...رديت الباب...و وقفت نغزرلهم من الشق...قربت منو أكثر...تحكي
سيرين:ع..عمر...أنت معادش حاجتك بيا ياخي ؟
عمر:منين جيب في الكلام هذا إنتي ؟
سيرين:منعرفش...حسيتك بعدت عليا برشا...أصلا لتوا منجمتش نستوعب...أنو فما طفلة تعيش معاك في دارنا
عمر:يزززي...قتلك باش نفهمك الحكاية
سيرين:باهي جاوبني
عمر:شنوة ؟
سيرين:مزلت تحبني ؟
عمر:مممم
سيرين:قداش ؟
عمر:هههههه مجنونة
هزت يدها ضرباتو على كتفو...و ترمات في حملتو منعرفش علاه جمدت في بلاصتي...نحب نرا كلشي ريتو كيفاش عدا يدو على شعرها و غرس صوابعو فيه...يحكي
عمر:جيت وحدك ؟
سيرين:مممم
عمر:تأخر الوقت...خليني نوصلك
سيرين:متوحشتنيش أنت
عمر:في رايك ؟
سيرين:منعرفش
طلعت راسها شوية تغزرلو...نزل عليها أكثر...أول ما حط شفايفو على شفايفها...سكرت الباب و تكيت عليه...نرد في نفس بالسيف..هزيت يدي حطيتها على خدي نمسح في دموعي...لي منعرفش كيفاش نزلو...و لا علاه تهزيت و تحطيت...على صوت الباب...عرفتهم خرجو حطيت يدي على قلبي...نحاول ناخو نفس منعرفش شبيني بالظبط...قربت من السرير بالسيف ترميت عليه نحس في راسي باش يطرشق...مديت يدي ترعش للبوات متاع دوا..شربت حربوشتين فرد مرة...نحب نهدي روحي بيهم...حطيت راسي عالمخدة و غطست في الفرش...بدني الكل يرعش...منعرفش شبيني بالظبط و لا علاه تأثرت لهدرجة...الوقت اللي عديتو معاه تعلقت بيه برشا...يمكن على خاطر أول حد حس باللي قاعد يتعدا على راسي...أول حد عطاني يدو و عاوني متوقعتش يطلع شكون في حياتو...توا فهمت الكلام اللي قالو صاحبو صباح...عندو حق يخاف على عشيرو أصلا ظاهر فيه يحبها...و مش بعيد يجبد عليا على خاطرها و لا يحكيلها على سبب لي خلاني نبقى عندو...الفكرة برك خلاتني نترعب...و نخاف من اللي جاي...غمضت عينيا نهرب من الأفكار اللي قاعد نحس فيها...منعرفش كيفاش هزني نوم...و رقدت.
أنت تقرأ
زهرة🌸
Ngẫu nhiên🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
