زهرة🌸

الحلقة التسعون

🔸️حلقة 90
🔸️رنيم تحكي:
هزيت يدي غزرت لساعة...تقريب ساعتين تعدات و لتوا مجاش و لا حتى طلبني كي العادة...خممت نطلبو...اما زادة حشمت...حشمت من اللي قاعد يعمل فيه على خاطري اسبوعين...من نهار الحادثة بالظبط...زعمة صراتلو حاجة ؟ و لا وحل في سيركيلاسيون ؟ غزرت لتليفوني اكثر من مرة..خفت يكون طلبني و مسمعتوش لفيت روحي بالفاست اكثر...المطر ماشية و تقوا...خممت نطلب بابا...اما خفت نتعبو...خاصة و اليومين هذوما عداهم في الفرش...حتى الثنية لي نجي منها بالعادة حرمت نحط ساقي فيها بعد اللي صار...أما يمكن جا الوقت...باش نتغلب على مخاوفي الكل...قص عليا سرحتي...صوت آسر...يقرا معايا من أيامات الليسي
آسر:رنيم لباس ماهو ؟
انا:اه...لباس عيشك
آسر:شتعمل هوني وحدك ؟
أنا:نستنى في المطر تنقص
آسر:متحبش نوصلك في ثنيتي ؟
أنا:لا عيشك...تو ناخو طاكسي
آسر:متأكدة...مستحيل تلقى طاكسي في الحال هذا
انا:ميسالش...أكيد باش نلقى في المحطة
آسر:باهي هاني باش نمشي معاك للمحطة...هكا نطمن عليك
أنا:ميسالش متعبش روحك
آسر:نمشيو بعد ما تنقص المطر
دوب تبسمتلو و نزلت راسو...مد يدو شوية...يحكي
آسر:طيحتها في الكلاصة قبيل
غزرت للكوليي متاعي في يدو..حطيت يدي على رقبتي مروهجة...منعرفش كيفاه ضيعتها...خذيت نفس و مديت شديتها عليه نحكي
أنا:مرسي برشا آسر...محسيتش كيفاه ضاعتلي
آسر:ميسالش رد بالك مرة أخرى
أنا:باهي عيشك
آسر:مدام نقصت المطر...و متحبنيش نوصلك...خلينا نمشو للمحطة...هكا نطمن لانتي شديت طاكسي
هزيتلو براسي إيه...و حطيت الكابيش متاعي...و قبل ما نعمل خطوة وحدة...حسيت بصوت الفران لي تشد بالقاوي...تلفت نغزرلو...وقف قدامنا بالظبط...و قبل ما نستوعب لهو وصل بالحق...نزل من الكرهبة و قرب منا...يحكي
محمد:وين على خير ؟
آسر:لباس ماهو ؟
غزرلو و عاود غزرلي...للحظة تذكرت العركة لي صارت خفت يفهم الموضوع بالغالط...و يعمل حاجة لطفل جيت باش نحكي...قص عليا هو
محمد:أطلع في الكرهبة
آسر:رنيم...ياخي تعرفو هذا ؟
انا:آ..آسر...لازمني نمشي توا...سامحني في تعبك
محمد:أزرب روحك
هزيتلو براسي إيه...و وخرت لتالي...قحرلو و خلط عليا منعرفش كيفاه ركبت...كبست على صاكي بيديا زوز...و دورت راسي نغزرلو...سكر الباب بالقاوي..و خدم الكرهبة من غير حتى كلمة...عديت عينيا على عروق رقبتو لي تكبست...و عروق يديه لباش يطرشقو...للحظة حسيت روحي منعرفوش...خذيت نفس بالسيف نحكي
أنا:مشى في بالي...ماكش باش تجي
محمد:كنت عطيتك خبر...مش نخليك تستنى
أنا:آ...آسر يقرا معايا...كان باش يمشي معايا للمحطة كهو الحكاية
محمد:مقتلكش فسرلي...أمورك
سكت عالتنبيزة متاعو...لدرجة منجمتش نحل فمي بكلمة...و منجمتش نسكت قلبي لي قاعد يخض بالقاوي هزيتلو براسي ايه...و تلفت للبلار...منحبش نسكر عينيا باش متنزلش دموعي لي تحصرو في لحظة..أكثر حاجة تمنيتها توا...إني نحل الباب هذا و ننزل...صحيح مانيش باش ننسى مزيتو عليا الفترة هاذي...أما غلطت...غلطت برشا...كي تكيت عليه أكثر من لازم...أصلا مفما شي يربطني بيه...من غير علاقتو بمريم...فقت من سرحتي على صوتو يحكي
محمد:حط الحزام
مديت يدي بالسيف نجبد فيه اما شي...نفخ بالقاوي...و شد الفران على جنب...و قرب مني اكثر...نزلت راسي مروهجة...حسيت بيه كي جبدو بالقاوي...هزيت عينيا في وجهو...لقيتو يغزرلي ندرا كيف...لحظات تعدات ما نجمت نعمل فيهم شي...كان إني نسرح في تفاصيل وجهو و كهو...عينيه لي نزل بيهم لشفايفي...دخلتني بعضي أكثر...دوب نجمت ناخو نفس...من قربو ليا...سكر الحزام...و جبد روحو لتالي...عدل حزامو مرة أخرى...و خدم الكرهبة...بقيت في نفس الحالة لي خلاني فيها نحس في روحي ضايعة عاللخر...لا نجم نغزرلو...و لا نجم نتلفو...نحس في دقات قلبي مسموعة...و خايفة تكشفني...خايفة من الإحساس لي قاعدة نعيش فيه أول مرة...خايفة نتعلق بيه أكثر من هكا...على خاطرني لتوا منعرفش شمعناها لي قاعد يصير فيا...و لا كيفاه لازمني نتصرف...متأكدة حد كيفو ماهوش باش يغزر لوحدة كيما انا...منعرفش شنية الفرق بالظبط...أما متأكدة انو الفرق هذا كبير برشا...كبير من اني نحطو في راسي و نخمم فيه...صعيب برشا نحط روحي في مقارنة معاه...منحبش نعيش لي عاشتو مريم...عالاقل هي حسام يحبها...و ماهوش باش يخليها جملة...اما انا كان دخلت في دوامة هاذي...مانيش باش نخرج منها مش لازم نخلط بين صداقتي و اللي نحس فيه منحبش نفسر وقفتو معايا حاجة اخرى...حتى يمكن لحق الوقت...باش نحط حد للي قاعد يصير و منغرقش فيه أكثر...قص عليا سرحتي يحكي
محمد:يلزمني نتعدا لسوسيتي...بعدها نوصلك
هزيتلو براسي...نحس في الكلام ضاع مني...كبست على صاكي اكثر...نغزر لثنية...أفكاري تهز فيا و تجيب متوقعتش باش نعيش هذا الكل اليوم...متوقعتش إحساسي باش يفضحني لهدرجة...و قد ما تهربت منو لقيت روحي نواجه فيه...خاصة توا...فكرة لهو بدا يفد من اللي قاعد يصير روهجتني...فكرة لأنا قاعدة نفرض في روحي عليه باش يعاوني قهرتني...ثنية كاملة عديتها بغصتي...و هو كلمة أخرى لا...أول ما وصلنا لسوسيتي شد الفران بالقاوي...و هز الدوسي في يدو يحكي
محمد:مانيش باش نطول عليك
أنا:باهي
أول ما نزل و سكر الباب...نزلو دموعي لي كنت حاصرتهم ثنية كاملة...على شنية نبكي بالظبط منعرفش أما لتوا غايضتني الفازة منو...و من تصرفاتو الباردة
البارح برك...كان كلشي لباس...مستانس يسأل على نهاري كيفاه تعدا...على مريم...على اي موضوع ممكن انو نحكو فيه...اما توا بالظبط...حاسة روحي مع عبد اخر...عبد منعرفوش من قبل...معرفتي لمحمد تعدات اربع شهور...اما اللي نعيش فيه احساس غريب عليا منعرفوش من قبل...خذيت نفس نهدي في روحي دورت راسي على صوت تليفونو...لي حاطو في الشارج كنت باش نتلف الحكاية...اما منجمتش نمنع روحي..نقرا الميساج لي وصلو...مديت يدي متردة...نقرا فيه...من فوق...رقم من غير اسم << ليك وحشة دالي...نستنى فيك ليلة عزيزي >> حطيتو من يدي مروهجة...نحس في قلبي باش يخرج من بقعتو...مش مصدقة لي قريتو ياخي شنية فكرت...لهو ما عندو حتى غيرك يا رنيم راهو طفل عامل فيك مزية مش أكثر...علاش قاعدة تخمم فيه من اصلو...شنية تحب منو إنتي ؟ أصلا من إمتى تصوحبي ولاد و تمشي و تجي معاهم ؟ شكون محمد باش ترضخ تسمع كلامو...و خلي بوك يسمع بالحكاية...شنية ذنبي كي حد حب يتعدى عليا في شارع...فيق على روحك...فيق إنتي قاعدة تغلط...و ماشية في الغلط متاعك...كلام قوي دار بيني و بين روحي...كانو نسأل في روحي انا شكون...و شنية لي قاعد يصير معايا...نحب نفيق روحي...و نرجع للواقع الواقع لأنا و محمد حتى شي...و مستحيل يجمعنا شي...مهما صار...عديت يديا زوز على وجهي...نمسح في دموعي...رجعت شعري لتالي...كبست على صاكي و حليت الباب نزلت...من اول خطوة...تبليت بكلي...أما أحسن ما نقعد تحت هذا الظغط الكل...زربت في خطواتي أكثر...أحسن ما نتلاقى بحد من معارف بابا بحكم كان يخدم هوني...و حتى حسام منحبش نتلقاه حتى صدفة...وقفت في نص الطريق...نستنى في طاكسي تتعدا...أما حظي كي العادة...كملت ثنيتي نمشي...مفماش تعرضني شي وحدة...حضنت روحي أكثر...على صوت تزمير قوي من تالي...شد الفران بالقاوي...لي خلاني نزرب في خطواتي أكثر...جبدني من يدي في لحظة دورني عندو...هزيت راسي نغزرلو...دوب نجمت نثبت في ملامح وجهو...مع المطر لي قوات أكثر كبس عليا اكثر يحكي
محمد:ياخي هبلت إنتي...فاش تعمل بربي ؟
حاولت نجبد يدي منو...حسيت صوابعو...تغرسو في زندي أكثر...جبدني عندو شوية يحكي
محمد:نقص من هبالك و جاوبني خيرلك
أنا:بطيت برشا...لازمني نروح توا
محمد:¤¤¤¤¤¤¤ عليا ياخي...شبي حالتك إنتي اليوم ؟
أنا:ما بيا شي....نحب نروح و كهو...سيبني توا
مد يدو كبس على وجهي...و قربلي اكثر...غزرلي مستغرب...يحكي
محمد:كنت تبكي ياخي ؟
أنا:على شنية باش نبكي ؟
محمد:شيعرفني...قاعد نسأل فيك أنا
أنا:لباس عليا...نحب نروح و كهو
محمد:باهي أمشي قدامي توا
أنا:منحبش...هوكا طاكسي جاية...سيبني توا...و عيشك عاللي عملتو معايا الكل
محمد:لا عاد...أسمعني رنيم...مانيش ناقص تفوريخك و هبالك توا...أمشي قدامي...لا نعمل فيك حاجة...هالعشية الكلبة
أنا:محمد أمانك يزي
عدا يدو على وجهو...يمسح في الما...فرد وقت يحاول يثبت فيا...تنهد بالقاوي يحكي
محمد:هاني باش نحاول نسايرك..صارت حاجة منعرفش بيها ؟
أنا:ما صار شي...نحب نمشي و كهو
محمد:باهي أمشي ملا...تفضل
جبدت يدي منو...عديت عينيا على وجهو...و تلفت عطيتو بظهري...نمد في الخطوة بالسيف...نمنع في دموعي باش متفضحنيش قدامو...محسيتش كيفاه لقيتو في وجهي مرة أخرى...هزيت راسي غزرتلو...نفخ بالقاوي يحكي
محمد:هيا...إيجا نوصلك توا...متنجمش تمشي وحدك في الحالة هاذي
أنا:نمشي وحدي
محمد:رنيم...منعرفش شبيك...و لا حتى شنية لي صار أما براس أمك...أمشي قدامي توا...مبعد نحكيو أكيد
أنا:مفما حتى شي نحكيو فيه
محمد:معناها ماكش باش تجي ؟
أنا:لا
محمد:باهي...كيما تحب
عديت عينيا على وجهو...فكرة لهو باش يخليني في الحالة هاذي وحدي...دخلتني بعضي...برغم نزلت بإرادتي...أما رغم هذا الكل...تقويت على روحي...و تلفت عطيتو بظهري...باش نمشي...و قبل ما نكمل الخطوة هزني في حملتو...كبشت فيه مصدومة نحكي
أنا:فااش تعمل يااخي...هبلت ؟
محمد:سكر فمك...كلمة لا
أنا:محمممد نزلني فاش تعمل بربي...ناس تغزرلنا...علاش هكا
محمد:كنت تخمم في ناس قبل ما ¤¤¤¤¤¤ عليا و تهبل ¤¤¤
أنا:فاش قام الكلام المرزي توا...نزلني و كهو
محمد:رنيييم...سكر عليا فمممك
سكت على صياحو...و كبشت في كتافو أكثر...خايفة لا يفلتني...عدا عينيه على وجهي...نزلت راسي بالوقت حتى أنا منجمتش نثبت في تفاصيل وجهو لي مبلولة منحبش ندخل بعضي...أكثر من هكا...أول ما وصل للكرهبة...حطني عالارض...و حل الباب يحكي
محمد:أركب
جيت باش نحكي...قحرلي قحرة موت...لبدت و ركبت من غير ما نزيد معاه كلمة أخرى...سكر الباب بالقاوي...و خلط عليا...نحى الفاست متاعو و ركب...طيشها لتالي و خدم الكرهبة بغزول...يحكي
محمد:ماهيش باش تتعدا الفازة متاع قبيل
أنا:مانيش خايفة منك...أعمل لي تحب عليه
محمد:بربي ؟
أنا:مممم
مديت يديا زوز...نمسح في وجهي...و نرجع في شعري لتالي...تنهد بالقاوي...يحكي
محمد:ميزيتش توا ؟
انا:شعندي عملت ؟
محمد:ما عملت شي...أنا لي نتبلى فيك
قحرتلو...و دورت وجهي...نحيت الفاست...و حطيتها على ساقيا...نحس في روحي باش نجمد...هزني و حطني...يحكي
محمد:ريت رايك وين يوصلك
أنا:مرتاحة هكا
محمد:مممم هاني نشوف فيك
كبست على يديا زوز...ندفي فيهم...و خذيت نفس نحكي
أنا:ماكش مجبور توصلني بعد توا...نجم ندبر راسي وحدي
أول ما كملت كلامي..شد الفران على جنب...نزلت راسي بالوقت...منحبش نغزرلو...فك الحزام...و غزرلي يحكي
محمد:فاش قام الكلام هذا توا ؟ و شتقصد بيه ؟
أنا:م..ما نقصد شي...أما مش لازم نتعبك معايا ديما يعني ماكش مجبور باش توصلني و تردني كل يوم..أنت زادة عندك خدمتك
محمد:جيت شتكيتلك انا ؟
أنا:م..محمد
محمد:شنوة...محمد شنوة ؟
انا:باش نبقاو ديما هكا إحنا ؟
محمد:شقصدك بهكا ؟
هزيت راسي شوية...و عديت عينيا على وجهو...على قطرات الما لي لتوا نازلة من شعرو على لحيتو و ضعت في عينيه مرة أخرى...عينيه لي لونهم عسلي كيما لون شعرو بالظبط...إحساس خلاني نكبس على يدي بالوقت نحب نفيق من الحلمة لي ماشية و نغطس فيها...نحب نرجع للواقع...فرد وقت نحب نجاوبو على سؤالو بطريقتي...نحب نقولو...لي قربك قاعد يضر فيا...لي فما حاجات قاعدة نحس بيهم...اما منعرفش عليهم شنوة منعرفش علاه كي نغزرلك ننسى لي باش نقولو و الكلام يهرب من حلقي...منعرفش علاه كي تقربلي أكثر...ندخل بعضي و منجمش نتصرف...نحب نقولو لانا بديت نتعلق بيك...و خايفة من اللي باش يصير مبعد...خاصة بعد ما تأكدت لي فما شكون في حياتك...و على ذكر الميساج لي قريتو قبيل...فقت من سرحتي...و خذيت نفس نحكي
أنا:ما نقصد شي
تكيت لتالي...و هربت عينيا من وجهو...تنهد بالقاوي...و حط يدو على وجهي...دورني عندو...إستغربت من الفازة متاعو...أما ما نجمت نقول حتى حرف...غرقت في عينيه مرة أخرى...في غزرتو...لي يحاول يسألني بيها...اما معنديش جواب نجم نقولو...و لا قاعدة نتهرب منعرفش...مد يدو لأخرى...بعدلي خصلات شعري لتالي يحكي
محمد:نعرف لي متقلقة من حاجة...أما ميسالش هاني موسع بالي معاك...و باش نستناك لين تحكي...باهيشي هكا ؟
هزيتلو براسي لا...دموعي تمردت و نزلت على يديه زوز...عقد حواجبو مستغرب...كبس على وجهي...مسح دموعي يحكي
محمد:ششش...يزي
مديت يدي بالسيف عديتها على وجهي...نرد في نفس كبس على وجهي يحكي
محمد:اغزرلي هوني
حليت عينيا بالسيف...عدا عينيه على وجهي بالزربة يحكي
محمد:صارت حاجة ؟
هزيتلو براسي لا...اصلا منعرفش كيفاه وصلت للحالة هاذي...و لا على شنية نبكي بالظبط...تنهد بالقاوي يحكي
محمد:معناها متغشة مني إنتي ؟
أنا:ل..لا...مانيش متغشة
محمد:ملا شنية لي صار
أنا:ح..حتى شي محمد...م..منعرفش شبيني...تاعبة و كهو
محمد:تحبني نصدقك توا ؟
أنا:مش مهم تصدقني و لا لا
محمد:بربي...ملا شنية قاعد نعمل هوني ؟
حاولت نجبد روحي...أما جمدت في بقعتي..كي حسيت بيدو تحطت على جنبي...كبس عليا...من غير ما ينزل عينيه من وجهي...جبدني عندو في لحظة...لين حسيت بالنفس متاعو على وجهي...دموعي لي كانت تنزل حبست من قربو ليا...نحس في بدني الكل يرقل...دقات قلبي نحس فيها باش تفضحني...قربلي أكثر يحكي
محمد:باش نسألك لآخر مرة...شبي حالتك هكا ؟
عديت عينيا على وجهو...و قدمت شفايفي مترددة نخرج في الحروف بالسيف
انا:م...محمد
محمد:ينعمبو محمد...و ينعمبو نهار لي خمت فتحية تسميني فيه
أنا:علاه ؟
محمد:ياخي ناوية تجلطني إنتي باش ترتاح
هزيتلو براسي لا...كبس على جنبي أكثر...متعمد باش يوجعني...مديت يدي بالسيف...حطيتها على صدرو مروهجة...نحكي
أنا:م..محمد...فاش تعمل ياخي ؟
محمد:فاش نعمل ؟
أنا:و..وجعتني
كبس عليا أكثر من قبل..لين نزلو دموعي بالوقت..نحس في روحي ضايعة...ضايعة عاللخر...و منعرفش من وين المخرج...نحب نحكي...أما الكلام خاني كي العادة صوابعو لي سرحت في وجهي...نساتني في الوجيعة لي نحس بيها...من كبسة يدو...غزرلي ندرا كيف يحكي
محمد:هذا الكل...على خاطر كشيت عليك قبيل و حكيت معاك بالطريقة هذيكا
بقيت نغزرلو...من غير حتى كلمة...صوت أنفاسو قص عليا الكلام لي باش نقولو...عدا صوابعو على خدي يحكي
محمد:معادش نحب نشوف دموعك مرة أخرى...كي تبدا متقلقة من حاجة تكلم...و متخبيش داخلك باهي
هزيتلو براسي إيه...دوب تبسم...و نزل بصوابعو من خدي...لشفايفي...عينيا وساعو بالوقت...متوقعتش الفازة منو...غزرتو دخلتني بعضي أكثر...مفهمتش شنية لي قاعد يصير بالظبط...حاجات اول مرة نحسها و نعيشها...و لا مرة قربلي حد من قبل...و لا مرة جربت الاحساس هذا من قبل...كلشي قاعدة نعيش فيه لأول مرة في حياتي...عقلي يقلي أنو لي قاعد يصير غالط...و باش تضيع اكثر يا رنيم...اما...قلبي...قلبي يقول حاجة اخرى منجمتش نفهمها و لا حتى نستوعبها...من جيهة عاجبني قربو...لمساتو...كلامو أما من جيهة أخرى خايفة على روحي من الوجيعة لي باش تجي بعد هذا الكل زعمة هو يحس باللي نحس فيه انا...زعمة قلبو قاعد يدق كيفي انا ؟ زعمة يحب قربي و لا لا...حاجات كنت باش نصدقها بيني و بين روحي...كان مش الميساج لي قريتو قبيل...اول ما تذكرتو بدني رعش بالكل...الشي لي خلى صوابعو تسرح من شفايفي و خدي لشعري كبس عليه في يدو...غزرتلو في عينيه بالوقت...أنفاسو لي قوات على وجهي...خلات أنفاسي تتحصر أكثر...كانو عامل فيا بلعاني...لا نجمت نحكي...لا ناخو نفس...و لا حتى نتحرك في حضرتو...و كل لحظة تتعدا تخليني نتأكد لانا بالرسمي...ضعت فيه...و معادش نجم نرجع لتالي...و لحظات الصمت لي طولت علينا...دخلتني بعضي أكثر...جيت باش نحكي...حسيت بيه كي قربلي أكثر...و شفايفو لي كانت باش تتحط على شفايفي...لي تفصلها...مسافة صغيرة..مسافة نفس واحد...كلمة وحدة حركة وحدة...خلاتني نحس لهو باش يكسر الحدود و القوانين و يبوسني...إيه...أنا حسيت لهذا باش يصير بعد القرب لي بينا...و الإحساس لي حسيتو...و دوب ما لامست شفايفو شفايفي...هز راسو شوية و حطهم على جبيني...سكرت عينيا بالوقت و كبست على مريولو معرفتش نفرح و لا نحزن...يمكن أحسن حاجة جبد روحو في آخر...يمكن كانت باش تصير أكبر غلطة مناش قدها زوز...و لا يمكن انا بالظبط...لكنت باش نخسر حاجة في روحي...أما وسط هذا الكل...حرقة شفايفو على جبيني...كانت غير عادية...يمكن بوسة معزة..خوف إحتواء و لا طمأنينة...أما اكيد ماهيش حب ماهيش نفس الشي لانا نحس فيه...حليت عينيا على يدو لي ترخفت على شعري...غزرتلو مروهجة...و حتى هو حسيتو داخل بعضو...من غزرتو لي تعدات بالزربة من شفايفي...لعينيا...أما قلبها بضحكة...و يا ريتو ما ضحك أكثر حاجة دخلني بعضي...ضحكتو...لي ما تبانش برشا ضحكتو لي وراه سر كبير...حاجة قاهراتو من داخل منعرفش اذا احساسي...صحيح و لا لا...أما متأكدة لحد كيفو...ماهوش باش يلز روحو و يحب وحدة كيفي قص عليا سرحتي...كي قرصني من خشمي يضحك
محمد:هاك طلعت دلولة زيادة
خذيت نفس بطلوع الروح...و تبسمت...تبسمت و أنا منعرفش كيفاه طلعت مني أكا تبسيمة...تكى لتالي يحكي
محمد:منقصدش لي صار قبيل...مكارنيش بكيتك
تكيت لتالي...و كبست على يدي...نلم في الحروف لي باش نحكي بيهم...من غير ما تظهر ربثتي...و لا رعشة صوتي
أنا:عادي...جيست مقلقة شوية و كهو
محمد:مممم باهي...شقولك في قهوة توا
أنا:معينيش توا...تاعبة
محمد:بردت ؟
هزيتلو براسي لا...ماهوش عارف...و مش مستوعب الحرب لي حلها داخلي...حرب كنت باش نكون رابحة فيها قبل دقايق لتالي...قبل ما يقربلي...و يخليني نعيش احساس جديد...منعرفش عليه...منجمتش نحكي معاه...و منجمتش نغزر لوجهو مرة اخرى...منجمتش نقولو لانا قريت الميساج...و حسيت بوخزة في قلبي وجيعة غريبة...مش مستانسة بيها...فضول تزرع داخلي نحب نعرف شكونها...زعمة مزيانة ؟ يحبها ؟ فاش قام حتى تستناه ليلة ؟ أسئلة منعرفش على روحي...علاش نسأل فيهم...و اللي كمل على ما بيا صوت تليفونو لي قاعد ينوقز...خلاني نزل راسي و نغزر لنفس الرقم...و هزيت عينيا في وجهو...نحب نشوف ردة فعلو...أما ملامحو الباردة...مخلاتنيش نعرف حق من باطل...و خلات غصة في حلقي تخنقني أكثر...نحب نحل الباب و نبعد عليه جملة...يسوق كأنو ما صار شي قبيل...كانو لي عملو حاجة عادية و مشات على روحها...مديت يدي بالسيف عليا...نزلت البلار...نحاول ناخو نفس...نهدي بيه روحي و تفكيري زادة...أما سكرو في وجهي...من غير حتى كلمة...تلفت عندو نحكي
أنا:ميسالش تحلو مرة أخرى
محمد:تحب تمرض ياخي ؟
انا:شيهمك فيا أنت ؟
محمد:طولة لسان وين كنت مخبيتها من قبل ؟
قحرتلو و دورت وجهي...نحس في ثنية طوالت أكثر بالعادة منحسش بالوقت كي نبدا معاه...خذيت نفس نحكي
أنا:حطني هوني
تلفت نلبس في الفاست متاعي...و نعدل في شعري ضيق عينيه يحكي
محمد:تحب تكمل في المطر هذا وحدك ؟
أنا:ميسالش...مش بعيدة عالدار
محمد:باش نحطك في أول الحومة كي العادة
أنا:أما
محمد:لا أما و لا شي...من غير ما تعاود تنرفزني توا مخي مجوجم مش نبقى نساير في هبالك
أنا:ياخي قتلك سايرني ؟
محمد:رنييييم يزززي عاااد
سكت مع كبسة يدو عالفولون...نغزر لثنية...نحسب في الوقت بالدقيقة...و هو حسيتو فد عاللخر...كي كبس عالفيتاس أكثر...لدرجة محسيتش كيفاه وصلت...شد الفرا بالقاوي...في بقعة العادة...كبست عل صاكي نحكي
أنا:عيشك عالتوصيلة...و سامحني في تعبك
نزلت من غير ما نسمع كلمة اخرى منو...حتى هو مستخسرش يغزر في وجهي...نزلت و محسيتش بالكوليي متاعي كيفاه طاحت مني...الكوليي لي كان هدية بابا لمريم...الكوليي لي تمنيت يكون ليا ديما...و بقيت لابساتو برغم مقاليش لهو ليك...برغم مجابليش كيفو...محاولتش نتلفت ورايا...محبيتش نراه مرة أخرى و حتى مريتش البوتيك اذا محلول و لا لا..رحيت الثنية الفاصلة بين كرهبتو و دار...حليت الباب...نحيت البوت و هزيت راسي في أمي...غزرتلي مستغربة تحكي
أمي:شبيك لتوا ؟
انا:ملقيتش طاكسي
امي:باهي تحب نحطلك حاجة تاكلها
أنا:معينيش عيشك
جات باش تحكي...طلعت و خليتها...طلعت هاربة لبيتي منو و من كلشي نحس فيه...سكرت الباب...طيشت صاكي و كبوطي عالأرض...و ترميت في وسط سرير...و من دمعة ولات دموع...و من دموع ولات شهقة ورا أختها...و من غصة لغصة...لقيت روحي غطست في نوم...و فقت على يدها لي تتعدا على شعري...تبسمت تحكي
مريم:شبي صغرونتي...شكون غششها ؟
هزيت روحي شوية...حطيت راسي على صدرها...و غمضت عينيا بالوقت...كبست عليا تحكي
مريم:رنيم تخوف فيا عزيزتي
انا:معادش نحب نقرا في الفاك هذيكا مرة أخرى
مريم:و السبب ؟
أنا:هكا من غير سبب
مريم:تعرضلك حد غديكا ؟
أنا:كلشي خايب غديكا
مريم:رنيم...أختي الغالية...صغرونتي المزيانة...ياخي كل حاجة تجي بالساهل هي...إنتي قاعدة تعيش في عالم جديد...و صحاب جدد
رنيم:أنا معنديش صحاب...كلهم نحسهم ميهضمونيش و لا ندرا كيف
مريم:هههههههه مش قدي عزيزتي
أنا:شقصدك ؟
مريم:من غير زهرة و وائل مكانش عندي أصحاب
أنا:شكون وائل ؟
مريم:وائل بالظبط...مانيش باش ننسى شنية عمل على خاطري
أنا:شنية عمل ؟
مريم:برشا حاجات عزيزتي
أنا:أما إنتي تحب حسام مش هكا ؟
مريم:صحيح و باش نبقى نحبو ديما...لآخر نهار في عمري
أنا:سامحتو ؟
مريم:مممم تنجم...تقول حسام باللي عملو معايا...أما عطاني عيلة باهية...أمي فتحية...خالتي نعيمة...و محمد زادة
أنا:متحسوش خايب إنتي ؟
مريم:محمد ؟
انا:مممم
مريم:مستحيل...محمد خويا لي جابتو دنيا...يمكن ميظهرش عليه...خاطر الظروف عاكساتو كهو
أنا:ظروف شنية ؟
مريم:الطفلة لي كان يحبها...ماتت ليها سنين و هو لتوا متعداش لي صار...على هذاكا تحسو...متناقض مع روحو سكت على كلامها تالي...منعرفش شنية لي حسيتو بالظبط...زعمة حبها برشا مدامو معلق بيها السنين هذوما الكل...باهي و الطفلة متاع صباح شكونها و علاه باش تستناه ليلة...سألت و ياريتني ما سألت و دخلت بعضي اكثر...باستني من راسي تحكي
مريم:تعلم تكون قوية...و تواجه كلشي...و ما تخاف من حتى شي...و انا ديما معاك باهي
أنا:باهي
مريم:هاني باش نخليك ترتاح توا...و مش باش نظغط عليك أكثر...أما كي تحب تحكيلي...أكيد باش نسمعلك
أنا:زعمة باش نلقى شكون يحبني كيما حسام يحبك ؟
مريم:باش تلقى يا روحي...و ماكش باش تعيش لعشتو أنا جملة...إنتي ركز في قرايتك و تو كلشي يتحل مع الوقت
أنا:باهي عيش أختي
باستني مرة أخرى و خرجت من البيت...عاودت غطست راسي في الفرش...نغزر لتليفوني لي يشعل و يطفى..مع إسمو...طلبني مرة و زوز و ثلاثة...أما ملقيتش جرأة باش نمد يدي و نهز عليه و لا حتى باش نتقعد..غمضت عينيا بالقاوي...هاربة من الواقع...يمكن مريم عندها حق لازمني نكون قوية باش نواجه كلشي...و أهم حاجة شعوري و إحساسي مع محمد...مانيش باش نخليه يغلبني...و مانيش نضيع فيه أكثر من هكا...خاصة بعد اللي عرفتو...مدام فما شكون في قلبو...مزال عايش على ذكرى متاعها...معناها كل وحدة تتعدا عليه...باش تكون مجرد وقت و توفى على روحها...و انا منحبش نكون عابرة في حياتو...و منحبش نستسلم للي نحس فيه...منحبش نسمع صوتو و نقابلو مرة اخرى...منحبش نحل عينيا على صدمة اخرى...منحبش لي عشتو مع بابا يتعاود...منحبش شكون يحطني على جنب و يذكرني كي يحب...و لا كي يبدا جايب هدية لحد آخر نحب شكون يحبني أنا و كهو...من غير ما تكون فما وحدة أخرى في حياتو...من غير ما يظطر يقارني بيها و يذكرني من ساعة لساعة...مخي للحظة صورلي حاجات مزيانين نحب نعيشهم...مزيانين لدرجة خلى نوم يهزني مرة أخرى...من غير ما نفكر فيه و لا في اللي صارلي...و حتى من غير نهز عليه تليفون...نحب نعمل أول خطوة من هوني...أما مع الحلمة المزيانة لي رقدت عليها مكنتش نعرف الدنيا شنية مزالت مخبيتلي لتوا...و قداش مزال باش نشوف فيها.