حلقة 70
🔸️مراد يحكي:
حطيت يديا زوز في مكاتبي...نغزر لتونس من البلار متاع الشريكة...عندي برشا عليها...اما توا بالظبط...فما حقد كبير داخلي...نار شعلت و ماهيش باش تطفى غمضت عينيا بالقاوي..تعدات صورتها قدامي..توحشتها؟ هذا سؤال لي كان يدور في راسي...قداش باش تبقى بعيد عليها يا مراد...قداش مزلت باش تتحرق عليها قداش مزال باش تخليها عندو...شنية اللي باش تخسرو أكثر من هكا...سنين طويلة...خسرت فيهم صغري...بين اربع حيوط...في ظلمة...و لا امي لي خسرتها على بكري كأنها معادش موجودة معانا...و توا زهرة...زهرة لانا ربيتها بيدي...زهرة لي كبرت قدام عينيا...خسرتها في لحظة...و خسرت روحي معاها...كلشي خسرتو كوم...و خسارتي لزهرة كوم آخر و كل حد عندو يد في الحكاية باش يخلص الدوبل...يزي ما لعبنا ورا الستار...لحق الوقت باش يولي كلشي عالمكشوف...اللعبة المرة هاذي باش تكون بيني و بين عمر و كهو...و اكيد المرة هاذي انا لي باش نحط القوانين...اللي يمشو عليها الكل...المرة هاذي...باش ناخو زهرة و نبعد من هوني جملة...باش نعفس عالحلال و الحرام...عالمستحيل و الممكن زادة المهم هي تكون معايا و ليا...قص عليا سرحتي صوت الباب...خذيت نفس نحكي
انا:ادخل
سكرتيرة:سي مراد...مدام شراز برا
انا:خليها تدخل
هي:باهي
خذيت نفس...و سكرت فلس الفاست...اول ما تلفت دخلت بالوقت...تبسمت نحكي
انا:مرحبا بيك بنت عمتي الغالية
شراز:عيشك ولد خالي
حليت يديا شوية...قربت مني...سلمت عليا...و وخرت خطوة لتالي تحكي
شراز:حمد الله على سلامتك
انا:عيشك
ترميت عالفوتاي...حطيت ساق على ساق...و مديت يدي نحكي
انا:تفضل اقعد
شراز:عيشك
حطت صاكها...و قعدت مقابلتني...هزيتها و حطيتها نحكي
انا:مرتاحة في دارك الجديدة
شراز:عاللخر...اما فرد وقت حاسة روحي في دار غريبة عليا
انا:تو تستانس بالوقت
شراز:انا خسرت برشا مراد...منحبش نخسر حسام زادة مانيش بحاجتي لدار هذيكا و لا حتى الفلوس...حاجتي بحسام و كهو...نحبو يرجعلي...نحبو يفهم لانا ما عندي حتى ذنب في اللي صار بكري...و لا حتى توا...و زادة معنديش نية اني نضر مريم...و لا بنتها لي في الثنية نعرف لهو ميحبهاش...نعرف لهو قال اكاكا باش ينتقم مني...راني والله تعبت...الشهور لي عديتهم هوني..تعبت فيهم أكثر من العشر سنين...لي كنت بعيدة فيهم...تعبت عاللخر مرااد
بقيت نغزرلها...نغزر لدموعها لي قاعدة تنزل مع كل كلمة هزيت روحي من غير ما نخمم...قعدت بجنبها...حطيت يدي على كتفها...نحكي
انا:ايجا تراه
حطت راسها على صدري...باقي دموعها نازلة...شراز من بكري تتحسس من كلشي...حتى بعد سنين ما تبدل فيها شي...و أكثر شي متأكد منو...هو حبها لحسام...خذيت نفس نحكي
انا:و راسك باش يصير كلشي تحب عليه
جبدت روحها مني شوية...مسحت دموعها...و غزرتلي ندرا كيف تحكي
شراز:وين كنت قبل مراد...وين كنت وقت انا كنت بحاجتك...قداش من مرة حاولت نوصلك...قداش من مرة قتلك لانا قاعدة نموت بالعرق...ولدي مات قدام عينيا و ما نجمت نعمل شي...و رغم اللي صار الكل محبش يطلقني...محبش يعتقني...سنين و هو رابطني و انت الوحيد لكنت تنجم تفكني من عندو...اما عمرك ما خممت فيا...انت حسيت بيا وقت خسرت زهرة يا مراد و انت رجعتني لهوني كي عرفت انو حسام كان حبيبي الأول...مش هكا
انا:صحيح...انا كلشي قاعد نعمل فيه على خاطر زهرة و كهو...اما زادة تعرف بالقدا علاه معاونتكش قبل
شراز:شنية ذنبي في الحكايات متاع بكري مراد...انا خسرت عشر سنين من حياتي...و خسرت حسام زادة تعرف شمعنى نرا مرتو قدامي كل يوم...و هي حبلة تعرف شمعنى نرا في طفلة أخرى عايشة حياتي...اول مرة رجعت لهوني...كان عندي امل لي هو ماهوش باش يعرس بيها...ماهوش باش يعملها...كنت نقول اكيد باش يسمعني و يفهمني زادة...اما هذا مصارش
انا:حسام باش يكون ليك...كان انتي عرفت كيفاش تتصرف شراز...اللي صار...ماكش باش تبدل منو شي...و نعرف بالقدا شنية لي قاعدة تعيش فيه...اما مانيش باش نسلم...لين نرجع كلشي من حقي...و مانيش باش نتردد حتى شوية في اللي باش نعملو
كبست على يدي في لحظة...غزرتها تحولت لخوف تنهدت بالقاوي...تحكي
شراز:انت وعدتني مراد...وعدتني لي مستحيل تضر حد فيهم...امانك
انا:شنية تحب بالظبط شراز ؟
شراز:حسااام...منحبوش يتضرر في الحكاية...تعرف بالقدا...قداش تعب باش وصل لهوني
انا:اللي يهمني توا...انو عمر ماهوش باش يلقى صاحبو المرة هاذي...و انتي تعرف بالقدا شنية المطلوب منك
شراز:حسام معادش يرد على تليفوناتي...و معادش قابلتو عندي برشا...يعمل في جهدو باش يتهرب مني
انا:و انتي اعمل جهدك باش تتقرب منو
شراز:كيفاش ؟
انا:تعرف انتي كيفاش باش تاخو فرصتك معاه ؟
هزتلي براسها لا...تبسمت على جنب...و تكيت لتالي نحكي
انا:كل مرة يبعد على مريم...اكيد باش يقربلك أكثر حسام لتوا يقنع في روحو...انو يحب مرتو...انتي كهو رجعو للماضي شراز
شراز:تقصد ؟
انا:مش مهم برشا لي نقصدو...المهم انتي فهمت شنية باش تعمل...اسحب حسام لعندك...و لا المعنى الصحيح خلي مريم تبعد عليه...انا نعرفها بالقدا الطفلة هاذي نقطة ضعفها الكبرياء متاعها...مستعدة تخلي كلشي وراها...و متخليش حد يعفس على حقها...و حسام بحاجة لغلطة وحدة و كهو...و الباقي في يدك انتي
شراز:فهمت عليك...اما اكيد مانيش باش نضرها مش هكا ؟
انا:مريم عندها أسباب أخرى خلاتها تعرس بحسام...أكثر من الحب
شراز:كيما شنية ؟
انا:يمكن الوضع لي كانت عايشة فيه قبل
شراز:يعني فما احتمال لهي متحبوش؟
انا:بالظبط
شراز:شنية المطلوب مني مراد ؟
انا:الماضي متاعك هو لي باش يسلكك المرة هاذي
شراز:كيفاش ؟
انا:مريم باش تعرف انو حسام الماجري...عرس بيها باش ينتقم منك
بقات تغزرلي ندرا كيف...تبسمت على جنب...عدات يدها على خدها تحكي
شراز:كيفاش مشات الحكاية من بالي ؟
انا:توا فهمت لي عليك...انا اللي يهمني تخلي حسام يتلهى بالحكاية هاذي و يبعد على الشريكة و الا مانيش مسؤول على شنية لي باش يصير فيه هو زادة
شراز:طمن...وقيت باش نمشي توا
انا:كان احتجت شي كلمني
شراز:أكيد
انا:رد بالك على روحك
شراز:عيشك
هزت صاكها و خرجت من البيرو...تكيت راسي لتالي نعرف لي قصرت في حقها برشا قبل...اما بعد توا لي تحب عليه باش تاخو و بزايد زادة...يزي ما ضيعنا لتوا لحق الوقت باش نكون مراد مرة أخرى...هزيت مفاتحي و خرجت من البيرو...منعرفش كيفاش لقيت روحي قدام داري القديمة...يمكن البلاصة الوحيدة لي نرتاح فيها...خاطر ريحتها لتوا...مزالت موجودة هوني...حليت الباب و دخلت...ياسر ولات هادية...بعد الشهور الطويلة لي تعدات علينا...كل درجة نطلعها...صوتها يقوى في وذني أكثر...كأنها موجودة هوني...و اقرب مني عاللخر زادة...دزيت باب بيتها و دخلت...دورت عينيا على كل بقعة...مزال كلشي في بلاصتو...كيما خلاتو...اول ما خرجت هوني...قربت من الفوتاي...هزيت مريولها في يدي...قربتو لخشمي...خذيت نفس...عديت يدي على دبوزة برفانتها لي مزالت فيها شطر...كان تحط منها الف طفلة...مانيش باش نشمها كيما تبدا عليها هي...ترميت عالسرير...باقي ريحتها في كل بلاصة هوني...هذا لي بحاجتو انا ؟ انا بحاجتها هي...أكثر من ريحتها و ذكرياتها...علاه قد ما حاولت منجمتش نبعد عليها و لحتى نبرا منها...البعد هدني و الوحش هدني زادة...كنت نجم ننهي هذا الكل بكلمة مني كهو...اما قبل هذا الكل كل حد فيهم لازمو يفهم...انو اللعب مع مراد مش بالبساطة هاذي...غمضت عينيا بالقاوي...من شهور محسيتش بالراحة لانا فيها توا...يكفي لانا نحس فيها قريبة ليا...و تو كلشي يتحل مع الوقت...و يرجع كيما كان قبل و أكثر
🔸️زهرة تحكي:
حليت عينيا بالسيف...نحس في بدني مدقدق...تبسمت من غير ما نحس...متوقعتش...باش تتحسن امورنا مرة أخرى...دورت راسي...نغزرلو...لتوا غاطس في نوم...و كابس عليا فرد وقت...قربت منو اكثر...و هزيت يدي نعدي في صوابعي...على خدو...حل عينيه شوية..يحكي
عمر:فاش تعمل ياخي ؟
انا:حتى شي...نحب نتأكد لأنت معايا توا
عمر:علاه امتى خليتك انا ؟
انا:ماكش باش تفهمني يا روحي...انا توا بحاجتك أكثر من قبل...نحب نطمن لأنت معايا ديما
كبس على ظهري أكثر...لين معادش فما مسافة بينا دوب خطف بوسة من شفايفي يحكي
عمر:انا معاك ديما عزيزتي...حط في بالك...انو مهما صار و مهما بعدت عليك...مستحيل اني نخليك جملة
انا:و متبعدش عليا زادة...مهما صار خليك قريب مني هكا...احنا زوز بحاجتك انت و كهو
عمر:و انا بحاجتكم يا روحي
قربت منو أكثر....بستو و جبدت روحي شوية...نحكي
انا:عمر
عمر:مممم
انا:خليك معايا اليوم امانك
عمر:في بالك باش نضيع الفرصة هاذي ؟
هزيتلو براسي لا...كان باش يعاود يقربلي...قلبي غم عليا...و خواطري دارت...جبدت روحي منو بالزربة منعرفش كيفاش وصلت لبيت البانو...خلط عليا مفجوع قرب مني يحكي
عمر:زهرة شبيك ؟
استندت عليه...نرد في النفس...كبس عليا...فرد وقت يبلل في وجهي...و يحكي
عمر:لباس عزيزتي ؟
انا:ل..لباس...حاجة عادية...متخافش
عمر:متأكدة ؟
هزيتلو براسي ايه...عدا يدو على شعري...و كبس عليا يحكي
عمر:هيا ايجا معايا
جيت باش نحكي...قص عليا كي هزني بين يديه...و رجع للبيت...حطني في بلاصتي يحكي
عمر:لباس توا ؟
انا:احسن
عمر:متكونش تعبت من البارح ؟
انا:عممر
عمر:ههههههه باهي باهي...شرايك تمشي لطبيبة متاعك ؟
انا:علاه ؟
عمر:نحب نطمن عليك و عالبيبي
انا:مزال تقريب شهر عالموعد الجديد
عمر:ناخو موعد توا
حط يدو على كرشي...و هز راسو غزرلي...في عينيا ندرا كيف يحكي
عمر:نحب نرا البيبي مرة اخرى
تبسمت بالوقت...و حطيت يدي على يدو...كبست عليها نحكي
انا:باهي يا روحي
باسني من راسي...و جبد روحو شوية...تبسم يحكي
عمر: هاني باش نمشي نحضرلك فطورك...و انتي ارتاح شوية لين نرجع
انا:و الخوخ شعملنا فيه ؟
عمر:ههههههه متخافش تو في الثنية ناخولك منو...ملا نخلي بنتي اكاكا
انا:بربي...ليا هذاكا مش ليها
عمر:مجنونة...و شكون قالك لي انتي كبرت ؟
انا:بربي ؟
عمر:ايه...و من غير ما تكبش فيا توا...هاني باش نقوم
باسني من خدي...و وقف...كبست على يدو...نحكي
انا:هاني باش نطلب الطبيبة...و نخلط عليك
نزل عليا أكثر...باسني من يدي...و تنهد بالقاوي...يحكي
عمر:عيش حبي
اول ما خرج من البيت...رميت يدي هزيت تليفون
طلبت موعد آخر...حسيتها استغربت على خاطر مزال برشا على الموعد متاعي...اما احسن شي وافقت..هزيت روحي...بدلت دبشي...و ريقلت اموري...حسيت روحي في فورمة عالايام اللي تعدات عليا قبل...خلطت عليه للكوجينة...برغم المشاكل لي قاعدة تتعدا على راسو اما قاعد يتصرف كانو مفما حتى شي...قربت منو...حضنتو من تالي...كبس على يدي و جبدني قدامو يحكي
عمر:هاك حضرت فيسع يا فرخة
انا:خاطرني انا و البيبي جيعانين عاللخر
عمر:هيا ايجا اقعد
انا:نحب على قهوة زادة
عمر:لا تعرف لي هي باش تضرك
انا:اماان
عمر:هيا فيسع
جبدت روحي منو...منعرفش شبيه و لا يدقق برشا على ماكلتي...قعدت و انا نفخ...حط الصحن قدامي...و قعد مقابلني...غزرلي يحكي
عمر:هيا عزيزتي
انا:معادش عيني
عمر:زهرة...يزي حبي...مانيش نعمل فيك بلعاني انا
انا:هاك انت تشرب فيها عادي
عمر:يا ربي صبرني...تحب تضر روحك انتي ؟
انا:يجي منو...تحبها تخرج في البيبي انت ؟
عمر:زهررة
انا:امانك...عيش حبي
عمر:متكثرش منها
هزيتلو براسي ايه...و مديت يدي...هزيت الكاسة متاعو بقى يغزرلي من غير حتى كلمة...تبسمت نحكي
انا:الموعد بعد ساعة
عمر:نجم نعرف جنس الجنين اليوم
انا:هههههههههه لا عزيزي مزال بكري
عمر:علاه ؟
انا:في الموعد لي وراه باش تعرف
عمر:متأكد لهي بنية
انا:اما الكل يحب على ولد
عمر:ما يهمني في حتى حد...اللي يهمني انو تكون بنتي نسخة منك...في كلشي
انا:و بلكشي طلعت تشبه انتصار...مدامني انا نسخة منها
عمر:ششش...معادش تفكر في اللي صار جملة...صحيح انتي نسخة على انتصار...اما انتي زهرة مش انتصار...و متأكد لي بنتي باش تكون كيفك انتي
انا:و كان طلع ولد
عمر:وقتها باش يكون نسخة مني
تبسمت و انا نغزرلو...كبست على يدو بالوقت...باسني منها يحكي
عمر:هيا كمل فطورك ساعة...باش نمشيو
انا:باهي عزيزي
تنهدت بالقاوي...حسيت عمر رجعلي...بعد ما كنت راح نخسرو...اما فرد وقت خايفة من اللي جاي...خايفة من مراد لي متأكدة لهو باش يظهر مرة اخرى..اما منجمتش نجبد سيرتو بعد اللي تعدا علينا الكل...و أكثر حد خايفة عليه توا عمر...نعرف لمراد...باش يحطو في راسو...و ماهوش باش يفلتو...اما قبل ما يصير شي من هذا الكل...لازمني نقابلو...لازمني نثبت للكل لهو مزال عايش لتوا...و انو كلشي صار فينا كان من تحت راسو...فقت من سرحتي على صوتو
عمر:وين سرحت ؟
انا:حتى شي
عمر:كان كملت...خلينا نمشيو
انا:باهي
لبست كبوطي...و خلطت عليه...ثنية كاملة حسيتو غاطس في أفكارو...منعرفش شنية لي قاعد يصير بالظبط...اما متأكدة انو الحكاية كبيرة برشا...و منعرفش شنية لي خلاه يشد الصحيح باش يرا البيبي اليوم...اول ما دخلت غزرتلي الطبيبة مستغربة...تسأل فيا بعينيها طمنتها لي مفما شي...جيست نحب نطمن عالصغير تسطحت لتالي...نغزرلو...كبس على يدي...و عينيه تعلقت...في الايكرون...منعرفش علاه منجمتش نزل عينيا من وجهو...فقت من سرحتي على صوت الطبيبة تحكي
هي:هاني باش نخليكم تسمعو دقات قلبو توا
دورت راسي بالوقت..نحس لي ولدي...يقول لانا موجود هوني معاكم...تبسمت تحكي
هي:ولدكم بخير...تنجم تطمن مسيو
عمر:ميسالش نسمع دقات قلبو مرة اخرى
هي:أكيد
غزرتلو بالوقت...كبس على يدي أكثر...دوب كملت مسحلي الجال...و عاوني قعدت...خذيت نفس نحكي
انا:لباس ماهو ؟
عمر:لباس يا روحي
اول ما خرجنا...شديتو من يدو و طلعت راسي...غزرتلو نحكي
انا:عمر فما حاجة ياخي ؟
عمر:كيما شنية ؟
انا:شبيك مش قد بعضك...و زادة حسيتك خايف عالصغير برشا...هاك سمعت طبيبة مفما حتى شي يخوف
عمر:نعرف عزيزتي...و مدامكم زوز بخير انا بخير
انا:و تعرف لانا نحبك برشا ؟
عمر:تحكي بالرسمي ؟
انا:مستانسة نكذب عليك انا ؟
عمر:ههههههه مجنونة
انا:ممممم باهي وين باش يهزني راجلي العزيز توا
عمر:لأكثر بلاصة ترتاح فيها
انا:الفيرما ؟
عمر:لا الثنية طويلة و باش تتعب
انا:ملا ؟
عمر:مفاجأة
انا:هيا ملا فيسع
عمر:هههههههههه هيا عزيزتي
سبقتو للكرهبة...ساقي أعلى من راسي...و هو شايخ عليا من تالي...حسيت ثنية طوالت...مرجتو باسألتي ثنية كاملة...لين وصلنا...تلفت نغزر للبوتيك متاع الصغار...غزرتلو مستغربة نحكي
انا:عممر...علاه جينا لهوني
عمر:منعرفش...اما نحبك تاخو حاجات للبيبي
انا:لتوا منعرفوش الجنس متاعو
عمر:ميهمش برشا...ماكش باش جيب صغير واحد انتي
انا:زايد متحشمش
عمر:هههههههه تنزل و لا
انا:ننزل
عمر:هيا ملا
هزيتلو براسي ايه...و حليت الباب...خلط عليا...شدني من يدي...منعرفش شنية لي يخمم فيه بالظبط...اما عجبتني الفازة منو...حسيت روحي في دنيا أخرى حطيت يدي على كرشي...نحب بنتي تعيش لانا تحرمت منو الكل...حتى انا بعد توا حبيتها تكون طفلة..منعرفش اذا باش نعيش هذا الكل مرة أخرى على هذاكا..منحبش نضيع حتى فرصة...تخليني فرحانة معاه...و لا تخليني قريبة منو...و اكيد باش نحارب لاخر لحظة على حبي ليه...لا مراد و لا سلمى...باش نخليهم يحطمو لي بينا مهما صار...و مهما كان لي باش يتعدى علينا...عمر باش يكون لزهرة و كهو
🌸🌸🌸🌸🌸🌸🌸🌸🌸🌸🌸
🔸️عمر يحكي:
هزيت راسي شوية...نغزرلو....حط راسو بين يديه الوضع خرج على السيطرة...و معادش نعرف شنية نعمل بالظبط...المشروع توقف...و الحكاية اكيد باش تتحول للنيابة...تكيت راسي لتالي...و تنهدت بالقاوي...نسمع فيه يحكي
حسام:شنية الحل توا ؟
انا:أول شي لازمنا نطمنو الجماعة لي برا
حسام:شنية تقلهم ؟
انا:المشروع باش يتسلم بعد عامين و في الوقت المحدد زادة
حسام:و كيفاش باش تقنعهم ؟
انا:ميهمش برشا...المهم انو المشروع باش يتسلم في الوقت المحدد...الاهم من هذا الكل توا...القضية باش تولي قانونية...خاصة و فما حد من العمال تضرر...جراير الحكاية
حسام:نعرف لهوما باش يهدو علينا في أي لحظة
انا:مدامني المسؤول الأول على المشروع...خلي الحكاية عليا
حسام:اكيد هبلت...احنا في المشكلة هاذي مع بعضنا عمر...مستحيل نخليك تتحمل غلطة...معندكش ذنب فيها
انا:شكون لي عندو مصلحة في هذا الكل ؟
حسام:منعرفش...اول مرة...تصير معانا الحكاية هاذي
انا:اسمعني...انا باش ننزل نحكي مع الجماعة اللوطة...هاذي اول خطوة في صالحنا...اهم شي و لا حد يشتكي بينا...عالاقل الفترة هاذي...لين تهدا الامور شوية
حسام:هاني جاي معاك
هزيت روحي خرجت من البيرو...نزلت اللوطة...نغزر للامن...لي يحاول يمنع الجماعة باش تدخل...هزيت يدي نحكي
انا:حلو الباب
هو:متأكد مسيو عمر
هزيتلو براسي ايه...اول ما تحل الباب...دخلو هايجين...كل حد فيهم يرمي في كلمة...و منهم لي يحب على فلوسو...خذيت نفس نحكي
انا:ياااا جماااعة...شوية هدوووء...مناش باش نتفاهمو بالطريقة هاذيا
قرب حد فيهم...غزرلي ندرا كيف...و قحر لحسام يحكي
هو:نتوما لي محبيتوش تواجهونا...و تخبيتو منا
انا:كان جا كلامك صحيح مانيش واقف قدامك توا
هو:كان فشل المشروع...احنا نخسرو فلوسنا زادة
انا:و احنا نخسرو شريكة كاملة يا سيد
هو:شنية الحل توا ؟
حسام:تنجم تحاسبنا وقت التسليم...غير هكا منجمش نعاونك أكثر
انا:لي سمعتو...المشروع باش يتسلم في الوقت المحدد...و بنفس الضمان لي وعدناكم بيه
حسام:نظن هكا كلشي ولى واضح
هو: باهي مدام هكا باش نستناو كمالة المشروع...على خاطر عندنا ثقة فيكم سي عمر
انا:يعطيكم الصحة
تلفت لحسام...هزيت يدي...حطيتها على كتفو...و تنهدت بالقاوي نحكي
انا:خلي نادر يوقع الصفقة مع شريكة البناء الجديدة
حسام:زعمة الميزانية متاع الشريكة تكفي
انا:كان ظطرينا نزيدو من عندنا...المشروع هذا لازم ينجح حسام...تسمع فيا
حسام:اكيد عمر
انا:هيا ملا
اول ما وصلنا للاصونصير...وقفنا صوت من تالي يحكي
هو:حسام الماجري...عمر بن قاسم
تلفت بالوقت و حسام في جرتي...ضيقت عينيا...نحكي
انا:تفضل
هو:معاك مروان...لجنة التحقيق
غزرت لحسام بالوقت...مستغربتش الحكاية...اكيد كنا باش نتحطو في الوضع هذا...توا و لا مبعد...خذيت نفس نحكي
انا:كيفاش نجم نعاونك ؟
مروان:فما برشا حاجات باش تعاونوني فيها...اما عالاغلب فما طرف ناقص...وينو نادر رحماني ؟
حسام:ماهوش موجود توا...تفضل...احنا زوز باش نفيدوك
مروان:باهي
حليت الاصونصير...طلعنا مع بعض...دخلت لبيرو حسام و هو ورانا...ترميت عالفوتاي...نحكي
انا:تفضل سي مروان
مروان:عيشك
حسام:كيفاش نجم نعاونك ؟
مروان:تعرف بالقدا علاه انا هوني...و في شنية تحلت قضية التحقيق هاذي
حسام:أكيد
مروان:نحب نعرف التفاصيل منكم ؟
انا:المشروع مزال في بدايتو...و اللي صار...كان مدبر...و ديجا قدمت بلاغ...عالشخص لي استغل العلاقة بين الشريكة متاعنا...و متاع مواد البناء
مروان:عندكم علاقة معاه ؟
حسام:المشروع لي قبل هذا...تعاملت معاه شخصيا...اما بعد اللي صار...عرفت لهو قدم استقالتو عندو برشا...و استغل اسم الشريكة لي كان فيها...يعني كلشي كان مزور...و السلعة مضروبة
مروان:هذا الكل ماهوش مبرر...مدام معندكش دليل واضح...و الامور باش تخرج على السيطرة...خاصة و فما حد من العمال تضرر
انا:الإصابة كانت خفيفة...و احنا تكفلنا بالتأمينات
مروان:اما ميمنعش لي حياتو كانت في خطر...هو و العمال لي معاه
انا:شنية المطلوب منا توا ؟
مروان:القضية باش تتحول لتحقيق...و كان ما نجمتو تثبتو شي...وقتها اكيد باش تكون في مشكلة
انا:و اكيد ماهيش باش تشملنا الكل...سي مروان
حسام:عممر
مروان:شقصدك ؟
انا:مش مهم برشا تفهم قصدي
حسام:شنية باش يصير في حكاية البلاغ لي قدمناه ؟
مروان:الشخص لي شتكيتو بيه...ملقيناهش لتوا...و الحكاية مش في صالحكم...و مدام حد ما اشتكى بيكم لتوا...الوضع مزال تحت السيطرة...اما في رايي تصرفو في اقرب وقت...قبل ما يمشي فيها حد منكم
انا:باهي عيشك
مروان:انا باش نمشي توا...و اكيد باش نرجع في اقرب وقت...و يا ريت تكونو لقيتو الحل و حليتو المشكلة
حسام:إن شاء الله
اول ما خرج...تكيت راسي لتالي...نسمع في حسام يحكي
حسام:عمممر...ميزيتش توا
انا:شفما زادة ؟
حسام:الحكاية هاذي احنا الكل فيها...ماكش باش تتحمل المسؤولية وحدك
انا:انا المسؤول الأول على المشروع
حسام:و انا السبب الرئيسي في المشكلة...كان باش يصير شي...مانيش باش نخليك تتحمل المسؤولية وحدك
انا:ماهو باش يصير شي...اما نحبك توعدني...انو مهما صار...المشروع هذا باش يكمل...و باش ينجح زادة
حسام:وعد
انا:هاني باش نوقع بقية الأوراق و نمشي
حسام:وين ماشي ؟
انا:لمرتي
حسام:بربي
انا:كان انت مزلت تنجم...تزيد دقيقة هوني امورك
حسام:زيد ¤¤¤¤¤¤ حتى انا باش نمشي بعد شوية نهز مريم...الفترة هاذي تاعبة شوية
انا:حجزت في الكلينيك؟
حسام:اكيد...اصلا باش تدخل في ثامن و طبيبة حذرت من ولادة مبكرة
انا:متخافش...مريم قوية...و باش تطلع منها
حسام:إن شاء الله
هيا:هيا سلام...نكلمك مبعد
حسام:باهي
حسيتو مش قد بعضو...اصلا منعرفش اذا علاقتهم باش تبقى هكا و لا باش تمشي للأحسن..هزيت مفاتحي و خرجت من البيرو...خدمت الكرهبة...و طلبتها...هزت عليا تحكي
زهرة:اهلا عزيزي سافا ؟
انا:لباس يا روحي...هاني باش نتعدالك توا
زهرة:مممم صراحة انا في دار توا
انا:شبيك مكملتش لي كور متاعك
زهرة:منعرفش...حسيت روحي مقلقة...ياخي رجعت لدار
انا:باهي عزيزتي...هاني في طريقي لدار توا...توصي على حاجة
زهرة:لا يا روحي...هاني نستنى فيك
انا:رد بالك على روحك
زهرة:باهي حبي
علقت عليها...و شديت الثنية...خذيت قضيات...أغلبها ليها...باش معادش تخرجني في نص الليل الفرخة محسيتش بروحي كيفاش وصلت...حليت الباب...و دخلت...حسيت بحركة خفيفة في الكوجينة...قربت طليت عليها...نغزرلها...تقص في الخضرة...حطيت القضية عالطاولة...هزيتها و حطيتها...تبسمتلي بالوقت و قربت مني تعنكشت فيا...عديت يدي على ظهرها نحكي
انا:لباس صغرونتي ؟
زهرة:توحشتتك عاللخر
انا:صااار
زهرة:ممممم شنعمل ؟ معادش نحبك تبعد عليا جملة
انا:مممم قولي تراه البيبي متاعي كيفو ؟
زهرة:شكون أهم توا ؟ انا و لا هو ؟
انا:الزوز يا روحي...ساعة قولي شيعمل مريولي عندك
عدات يديها زوز على جنابها...غزرتلي ندرا كيف...تحكي
زهرة:منعرفش...شتهيت اني نلبسو...و نحط من برفانتك زادة...عندك مانع ياخي
انا:لا حبي...ساعة طلع عليك مش نورمال...و شتهيت حاجات أخرى معاه
زهرة:ميزيتش من البلادة
انا:مممم لاااا...حتى انا توحشتك...و نحب نطير وحشة منك
زهرة:اول شي باش نكمل العشا...و انت برا ارتاح شوية
انا:طرد فيا ياخي
زهرة:تحب تبقى من غير عشا ياخي
انا:شكون قالك لانا باش نبقى من غير عشا
تبسمت على جنب...هزيتها و حطيتها...قربت دز فيا...و تحكي
زهرة:والله ما تحشمها...برا تواا...خليني نكمل
انا:ريض برك...ميجيش تفجعلي بنتي توا
زهرة:شو كي مزال خايف على بنتو
انا:هههههههههههههه باهي صغرون...ريض توا...هاني باش نعمل دوش و نرجعلك
زهرة:و من غير ما تحط منو جال دوش هذاكا
انا:حفظتها الجملة
زهرة:صحة يا روحي
تبسمت و انا نغزرلها...من وقت حبلت..ولى كلشي يمشي على كيفها الفرخة...عملت دوش تفرهدت بيه...بدلت دبشي و رجعتلها...باقي غاطسة مع العشا...تكيت لتالي نحكي
انا:شنية هذا الكل ؟
زهرة:صراحة نحب ندلل روحي انا
انا:صاار
زهرة:مممم...مدام راجلي قاعد يدلل في البيبي...و حطني على جنب
انا:غايرة منو يا فرخة ؟
زهرة:عاللخر
انا:ايجا عندي ترا
قربت مني...دورت يديها زوز على ظهري...غرست يدي في شعرها نحكي
انا:زهرة...خليك ديما قوية...و الصغير هذا...رد بالك تفرط فيه مهما صار...يبقى الحاجة الوحيدة لي باش تربطني بيك حياتي الكل
هزت راسها...شوية غزرتلي ندرا كيف...كبست على جنبي تحكي
زهرة:ع...عمر فاش قام الكلام هذا...يا روحي
انا:نوصي فيك و كهو
زهرة:فما حاجة ياخي ؟
انا:مممم...انا جعت...و برشا زادة
زهرة:عممر
انا:ماكش باش تخليني نستنى برشا....ساعة مزال عندنا خدمة أخرى
غمزتها بالوقت...دوب تبسمتلي...بستها من راسها...و جبدت روحي منها...ترميت عالكرسي...طلعت مصنفة الطاولة...قعدت بجنبي...داخلة بعضها...متحبش تاكول رصاتلي نوكل فيها بالسيف...قحرتلي تحكي
زهرة:معادش نحب
انا:ميزيتش من دلال توا
زهرة:عممر...كان نغصب روحي توا...معدتي تقلب
انا:باهي...قوم ترتاح شوية
زهرة:باش نلم الطاولة قبل
انا:زهررررة متنرفزنيش...عيش حبي...الطاولة ماهيش باش تهرب...برا ارتاح توا...تو نلمها انا
زهرة:من غير ما ترجع تتصرف...معايا كيما قبل...هاني باش نخليك فيها وحدك
نطرت الكرسي لتالي...و خرجت من الكوجينة...كبست بيديا زوز على راسي...نسمع في تليفوني ينوقز...هزيت روحي خرجت من الكوجينة...لقيتو المحامي متاع شريكة...هزيت عليه نحكي
انا:تفضل سي نبيل
نبيل:سامحني كان طلبتك في وقت متأخر...اما الحكاية مهمة
انا:ميسالش...نسمع فيك
نبيل:ظاهر اللي قاعدين نلوجو عليه...هج من تونس جملة
انا:كيفاش هكا ؟
نبيل:الحكاية أكبر من اللي توقعنا...فما شكون ورا هذا الكل...و الاهم من هذا الكل...فما واحد من العمال...يتهم فيك انت
انا:فيا انا ؟
نبيل:كان الحكاية وصلت لنيابة...باش تولي في مشكلة
انا:توا ولى واضح...شكون الهدف متاعهم...مرسي برشا سي نبيل...باش نتصرف و نكلمك في اقرب وقت
نبيل:باهي إن شاء الله
علقت عليه...و ترميت عالفوتاي...تكيت راسي لتالي حسيت بيها...كي قعدت في حملتي...هزيت راسي شوية نغزرلها...عدات يدها على صدري تحكي
زهرة:نعرف لي فما حاجة...و منحبكش تخبي عليا مهما صار عمر...امانك
تعدلت في قعدتي...و غزرتلها...حسيت بيها مش قد بعضها...خوفها واضح في عينيها...كبست على يديها زوز...بستها منهم نحكي
انا:اغزرلي هوني...نحبك تسمعني بالقدا...و تفهم اللي باش نقولو باهي
زهرة:ب..باهي
انا:تعرف بالقدا...قداش نحبك...و شنية مستعد نعمل على خاطرك ؟
هزتلي براسها ايه...خذيت نفس طويل...منحبش نفجعها غزرت في عينيها نحكي
انا:الامور في الخدمة دخلت بعضها...و تعقدت برشا
زهرة:أكيد باش تتحل مش هكا
انا:منعرفش و منعرفش شنية لي ممكن يصير في الفترة هاذي زادة
زهرة:ش..شتقصد ؟
انا:اغزرلي يا روحي...كان صارت حاجة...نحبك تهز روحك و تمشي بحذا فتحية...و تبقى عندها...مع حسام و مريم...غديكا نطمن عليك أكثر
زهرة:ل..لا لا...مستحيل عمر
جبدت روحها مني وقفت...تنهدت بالقاوي...و وقفت في جرتها....جيت باش نشدها...وخرت لتالي مروهجة تحكي
زهرة:قولي لي مش صحيح...قولي لانت قاعد تكذب عليا...و انو كلشي باش يكون مليح...و انت ماكش باش تخليني امااانك
انا:زهرة هدي روحك...عيش حبي
زهرة:مانيش باش نهدا عممر...انت وعدتني من قبل لي ماكش باش تخليني...القى حل...اعمل حاجة...اما متبعدش عليا امانك
جبدتها من يدها...حضنتها بالقاوي...نحبها تهدي روحها قبل كلشي...كبست عليها نحكي
انا:يزززي كهو...متخلينيش نندم لانا حكيتلك
زهرة:ع..عمر...تعرف شنية الكلام لي قلتو...انا والله منجمش نعيش من غيرك...و توا معادش وحدي...انت ماكش باش تخلينا مش هكا
انا:مقلتش لانا باش نخليكم...اما يمكن تجي ظروف تلزني باش نبعد عليكم شوية...الحكاية خرجت من يدي و لازمنا نحطو الاحتمالات الكل...عيش حبي افهمني
زهرة:شنية لي صار عمر ؟ شنية المشكلة ؟
انا:منعرفش عزيزتي...الحكاية فما شكون وراها...انا نوصي فيك...خاطرني خايف تصيرلك حاجة...و انا مش معاك
زهرة:مراااد
جبدت روحها مني...ضيقت عينيا...نغزرلها مستغرب منعرفش كيفاش جا على بالها توا...هزت راسها تحكي
زهرة:مراد ورا الحكاية هاذي
انا:زهرة فاش تحكي ياخي ؟
قربت مني...شدتني من يدي...كبست عليا...غزرتلي ندرا كيف تحكي
زهرة:اسمعني مرة وحدة...امانك...براس بنتنا امانك
هزيتلها براسي ايه...برغم...مش فاهم منها شي الحكاية رجعت شعرها لتالي تحكي
زهرة:متأكدة لمراد مزال عايش...نعرف لهو مزال بيناتنا و مانيش نهلوس عمر...كان أنت ركزت مع الحكاية شوية كنت فهمتني...و فهمت انو اللي قاعد يصير لعبة كبيرة منو...هو كان قريب من هند و من سلمى...و مني زادة...اما انت محسيتش بهذا الكل...خاطر ماشي في بالك...لانا ناخو في دوا و نهلوس بيه...والله يا عمر...ما شربت دوا هذاكا و لا خذيتو...خاطر نعرف لانا باش نضر ولدي في الحكاية...و متأكدة حتى حد ما عندو مصلحة انو يضرك...كان هو...خمم فيها الحكاية امانك تأكد لهو بالرسمي مات...و انهم لقاو الجثة متاعو...بعدها مهما كان قرارك باش نرضى بيه
بقيت نغزرلها...و الأحداث الكل تتعاود في مخي...بقيت نغزر لوجها...حسيتها مش قد بعضها...تستنى فيا نحكي خذيت نفس...و قربت منها...حاوطت وجها بيديا زوز نحكي
انا:اهدا توا
زهرة:صدقتني...مش هكا ؟
انا:مصدقك...اما قبل هذا الكل...نحبك تحفظ كلامي الكل...كان طلع عايش بالحق...و كان طلع السبب في اللي صار فينا الكل...نوعدك لي نهايتو على يدي المرة هاذي
زهرة:لااا...ماكش باش توسخ يديك بيه...اكيد كلشي عندو حل...عمر منحبش نخسرك...مهما صار...اماانك
انا:متخافش عزيزتي...نحبك قوية ديما...مهما صار...كان مش على خاطري...على خاطر لي في كرشك
زهرة:معادش تحكي معاايا بالطريقة هاذي...معادش تخوفني عليك امانك
انا:باهي يا روحي...اهدا توا و انسى لي صار الكل
زهرة:ب..باهي
انا:هيا توا برا ارتاح شوية
زهرة:و انت ؟
انا:نحكي مع حسام و نخلط عليك
زهرة:باهي
اول ما رجعت للبيت...عديت يديا زوز على وجهي...اول مرة نحس لانا ظلمتها كي مصدقتهاش...اكيد فما حلقة مفقودة في الحكاية و انا لازم نتحقق منها...عالاقل على خاطرها هي...نخاف تصيرلها حاجة و انا بعيد عليها تنهدت بالقاوي...و خلطت عليها...عينيا وساعت و انا نغزرلها...شادة في كرشها...تتغوصر...قربت منها بالزربة نحكي
انا:زهرة...شبيك عزيزتي ؟
زهرة:ك..كرشي توجع فيا
انا:باهي عزيزتي...متخافش...ايجا
زهرة:باش نخسر ولدي...عمر
انا:ماهو باش يصير شي...حاول تاخو نفس
زهرة:ب..باهي
قعدتها على طرف السرير...و قعدت بجنبها...حطيت يدي على كرشها...نحكي
انا:زهرة...هدي روحك عيش حبي...شي ماهو باش يصير...مش قتلك مفما حتى شي يخوف
زهرة:منحبش نخسر البيبي...امانك اعمل حاجة
انا:هاني...باش نهزك للكلينيك توا...لحظة نلبسلك حاجة
زهرة:متخلينيش وحدي
تكات عليا...ترد في نفس...عديت يدي على شعرها نحكي
انا:وفات يا روحي...حاول تاخو نفس
زهرة:ب..باهي
حطيت شعرها على جنب...و كبست عليها في حضني حسيتها هدات شوية...خذيت نفس نحكي
انا:كيفاش تحس في روحك توا ؟
زهرة:ا..احسن
انا:هيا ايجا ترقد
زهرة:خليك معايا
انا:أكيد حبي
تسطحت لتالي و حطيتها في حضني...عديت ليلة كاملة نتفقد فيها...خايف لا ترجع تتوجع...و لا تنزف....كنت متأكد للحكاية باش تأثر عليها...اما مش لهدرجة...باقي مكبشة فيا...حتى في عز نومها...بقيت نعدي في يدي على كرشها...فرد وقت...نخمم في الكلام لي قالتو...كان يطلع مزال عايش...و عندو يد في الحكاية...الا ما نذلو و نعفس عليه...و كان يدفع عمرو الكل مرة أخرى ماهوش باش يمس شعرة منها...و مهما عمل ماهوش باش يبعدني عليها...و باش يفهم انو زهرة ليا انا و كهو
#سمر 🌸
أنت تقرأ
زهرة🌸
De Todo🌸___________زهرة_________🌸 🌼🌼🌼زهرة واحـدة يمكن أن تـذكـي عاطفة متأجـجـة أو تخـفف من غـيـرة حمقـاء أو تـقوض أركـان مـرض مـا ....زهرة واحدة فقط🌼🌼🌼 🌹 زهرة هي عنوان حكايتي الجديدة 🌻 يقال ان للزهور لغة تعبيرية خاصة عندما يغيب الكلام ويصعب التعب...
