زهرة🌸

الحلقة الثمانون

حلقة 80
🔸️زهرة تحكي:
فقت الصباح نحل في عينيا بالسيف...هزيت روحي تقعدت...نغزر للمطر من شباك...مديت يدي هزيت تليفوني...غزرت لدات...اليوم بنتي تعمل أربع شهور زعمة بالرسمي تطلع بنية...و كان جيت حبلة بولد...شنية ردة فعلو...زعمة باش يفرح ؟ منعرفش علاه خايفة برشا..بالعادة في كل موعد يبدا معايا و بجنبي...كيفاش باش نمشي وحدي منعرفش...حطيت يديا زوز على كرشي...بعد اليوم لازمني نعتمد على روحي في كل خطوة...صحيح وحدي...اما هو معايا...في كل خطوة...و في كل ثانية...على خاطر صغيري لازمني نكون اقوى من هكا...انا وعدتو أنو مهما صار و مهما تعدا علينا مانيش باش نفرط في البيبي جملة...لميت طرف القوة لي عندي بالجهد...نحس في روحي تاعبة كيما كل صباح...دخلت لبيت البانو...غسلت وجهي و ريقلت أموري...بدلت دبشي كيما جا...معاد عيني في حتى شي نزلت اللوطة بالسيف...مانيش طايقة نشوف وجهو عالصباح...أصلا حتى بقعة معادش توسعني في دار هاذي...هزيت راسي نغزرلو...واقف بحذا الباب متاع الجنينة...يحكي في التليفون...من صوتو و ملامحو ظاهر واصلة معاه للعنكوش...خذيت نفس و قربت منو بخطوات ثابتة...أول ما تلفت عندي...نزل تليفون...و تبسم يحكي
مراد:صباح النور
انا:صباح الخير
مراد:إرتحت في نومة
هزيتلو براسي ايه...حط تليفونو في مكتوبو...و قربلي شوية يحكي
مراد:هيا برا افطر توا...و اشرب دواك
انا:مرااد
مراد:مممم
انا:عندي رونديفو اليوم
مراد:رونديفو شنية ؟
انا:عند الطبيبة
مراد:اه باهي...برا افطر و حضر روحك...تو نوصلك انا
انا:نحب نمشي وحدي
مراد:وحدك ؟
انا:مممم...مفماش علاه تجي معايا انت...خلي الشوفور متاعك يوصلني
مراد:زهرة مانيش ناقصك راني...تعرفني منحبش نعاود كلامي مرتين
انا:مانيش أسيرة عندك...منحبش نحس روحي محبوسة هوني...أصلا خبرتك باش يكون في بالك و كهو
تلفت باش نمشي...شدني من يدي...دورني عندو...كبس عليا يحكي
مراد:منجمش نخليك وحدك في نهار كيما هذا
انا:و انا منحبكش تكون معايا...لا انت و لا حد غيرك نحب نرا صغيري وحدي
مراد:باهي لي تحب عليه باش يصير...مانيش باش ندخل معاك
انا:باهي
نزلت راسي غزرت ليدي...رخف يدو شوية...جبدت روحي لتالي و مشيت لطاولة...خلط عليا بالوقت...بقيت ساكتة نخمم في اللي باش يصير...حتى هو مش قد بعضو...نعرفو كي يبدا في الحالة هاذي...ظاهر الحكاية كبيرة...محاولتش نركز معاه برشا...كملت فطوري...و طلعت لبيتي...و لا نجم نقول الحبس الجديد متاعي هزيت كبوطي...و صاكي...و رجعت بحذاه...هزني و حطني يحكي
مراد:حاضرة ؟
انا:مممم
مراد:هيا ملا
خلطت عليه...نعمل في الخطوة بالسيف...منحبش قربو مني خاصة في نهار هكا...غزلت اكثر كي ريتو شد المفاتح عالشوفور...و حلي الباب يحكي
مراد:اركب
بردت دمي و ركبت...خلط عليا و طار بالكرهبة...مديت يدي حليت البلار نحكي
انا:نقص في الفيتاس...منجمش نتحمل أكثر
مراد:باهي هدي روحك
تكيت راسي عالكرسي...نستمتع بالنسمة الباردة لي حسيتها في وجهي...نحب ننسى لانا معاه و بجنبو محسيتش بالثنية كيفاش وصلنا...فكيت الحزام و نزلت قبل ما نسمع منو كلمة..خلط عليا يمشي ورايا بخطوات ثابتة...قعد بجنبي...و حط ساق على ساق...يغزر من غير حتى كلمة...هزيت راسي نغزرلو...نلقاه سارح في تصويرة البيبي لي عالحيط...بعدت عينيا عليه منعرفش علاه مصر يعذب روحو و كل حد داير بيه...علاه عمل هذا الكل ؟ نعرف لهو ماهوش خايب لهدرجة...اما زادة محبش يفهم...انو اللي قاعد يصير الكل غلطة كبيرة...و كل خطوة يعملها يخلي الكل يكرهو اكثر و يحقد عليه فقت من سرحتي على صوت الفرملية تحكي
هي:مدام زهرة بن قاسم تفضل
دور راسو قحرلي...كأنو كان ناقصها الكلمة...تبسمت نحكي
انا:مانيش كاتبة على ظهري لإحنا طلقنا
مراد:مطولش لسانك معايا عزيزتي...تعرف لي باش تخرج خاسرة
انا:على أساس انا رابحة توا
مراد:زهرررة
انا:باااهي...من غير ما تصيح في نص الكابيني توا
مراد:امشي قدامي
انا:ماكش باش تدخل معايا
مراد:بدلت رايي
انا:مراد خليني على راحتي أمانك
كان باش يحكي...رخيت شفايفي...و كبست على يديا نستعطف فيه...و نحكي فرد وقت
انا:ماكش باش تاخو اللحظات هذوما مني زادة...اليوم مهم برشا بالنسبة ليا...متحرمنيش منو مراد أمانك
عدا يدو على وجهو بعصب...و تنهد بالقاوي...يحكي
مراد:باهي...مطولش برشا...و الا باش تلقاني في نص البيت
انا:باهي
عطيتو بظهري...و تبسمت على جنب...إلا ما نخليه بين المد و الجزر...لين معادش يعرف وين هو و لا فاش قاعد يعمل...أول ما دخلت...فرحت بيا الطبيبة بطريقة غريبة...خذيت نفس نحكي
انا:نجم نعرف جنس الصغير اليوم ؟
هي:أكيد...نورمالمون كان عندك رونديفو قبل توا...اما هكا تو نتأكدو اكثر
انا:باهي عيشك
هي:تفضل عزيزتي
نحيت كبوطي و البوني...خذيت نفس و قربت من السرير...تسطحت لتالي...و مديت يدي هزيت مريولي أول ما حطت الجال على كرشي...قلبي دق بالقاوي عينيا تعلقو في الإيكرون...خوف ندرا كيف تسلل داخلي يمكن سألتها خمس مرات ورا بعضها...باقي تتبسم من غير حتى كلمة...عاودت غزرتلها نحكي
انا:أمانك دكتورة طمني...ياخي طفلة ؟
هي:مممم خليني نتأكد مرة اخرى...انا قاعدة نشوف في أميرة صغيرة هوني
انا:ب..بالرسمي ؟
هي:تحب تسمع دقات قلبها ؟
هزيتلها براسي ايه...الدموع لي كنت حابستها نزلت بالوقت...منعرفش شنية لي حسيتو بالظبط...تمنيت لي هو معايا توا...نعرف لي كان يستنى في اللحظة هاذي اكثر مني...نوقز تليفون البيرو بالوقت...بعدت عليا شوية...مركزتش معاها برشا...منجمتش نبعد عينيا على الإيكرون...فقت من سرحتي على صوتها تحكي
هي:زهرة
انا:مممم
هي:تليفون ليك انتي
انا:ليا انا ؟
هي:مممم
انا:شكون ؟
هي:ايجا تو تعرف
منعرفش كيفاش هزيت روحي...حتى بلا ما نمسح جال لي على كرشي...شديتو عليها...و حطيتو في وذني نحكي
انا:ألوو
عمر:صغرونتي
انا:ع..عمر
حطيت يدي على فمي...آخر حد توقعتو يكلمني توا و هوني...دموعي نزلو اكثر من قبل...و انا نسمع فيه يحكي
عمر:يا روح عمر...لباس عزيزتي ؟
انا:توحشتك عاللخر عمر...متوقعتش لأنا باش نسمع صوتك مرة أخرى
عمر:ششش ياخي في بالك...انا نجم نصبر عليك
انا:ل..لا...اما كيفاش نجمت تكلمني أنت ؟
عمر:كنت نعرف رونديفو متاعك و نعرف لي ماكش باش تفوتو المرة هاذي زادة...قولي تراه شنية طلع معاك
انا:كيما توقعت بالظبط...باش تكون عندنا بنية عمر
عمر:عيش حبي...توا نحبك تكبسلي روحك بالقدا معادش برشا...على قبل...و تو كلشي يوفا
انا:أنت لباس ؟ طمني عليك يا روحي
عمر:لباس يا عمري...اللي يهم انكم زوز بخير و كهو
انا:ع..عمر...مراد معايا هوني...دوب قنعتو باش ميدخلش معايا...منحبوش يكون في بلاصتك انت
عمر:اعمل كيما وصيتك بالظبط...و مدامني معاك ما تخاف من حتى شي...باهي...ما عندو وين باش يوصل آخرتها باش يطيح في يدي
انا:نحب نخبرك حاجة مهمة برشا
عمر:شنية يا روحي ؟
جييت باش نحكي...اما صوت الباب وقفني...خذيت نفس نحكي
انا:مش وقتها توا...يمكن باش يدخل علينا...المهم انك تعرف لأنا نحبك و نموت عليك...و مستحيل نعمل حاجة تضرك...و لا تخليك تتغشش مني...و باش نعمل لي وصيتني بيه الكل
عمر:و أنا نحبك و نموت عليك يا روحي...رد بالك على روحك و عالبيبي زادة
انا:باهي يا روحي نحبك
علقت عليه و رجعت لبلاصتي ساقي اعلى من راسي...و مديت يدي هزيت بابيي نمسح في كرشي...هد علينا بالوقت...هزيت راسي نغزرلو...و تلفت لطبيبة...لي عملت روحها تكمل في خدمتها...غزرتلي تحكي
هي:مبروك مدام زهرة...هاني باش نعيطك نسخة من الإيكو توا...و رونديفو آخر...نتمنى انك تجي في الوقت باهي
انا:باهي عيشك
باقي يغزرلنا...كأنو يحاول يتأكد انو الامور الكل طبيعية تلفتتلو الطبيبة تحكي
هي:سامحني مسيو...اما شكون سمحلك تدخل لهوني و بالطريقة هاذي ؟
مراد:ندخل وين نحب...و كيما نحب...ركز مع خدمتك أحسن
هي:مسيوو
انا:ميسالش دكتورة
هي:ياخي هو معاك
هزيتلها براسي ايه...و نزلت مريولي...قرب مني...كبس على كتافي...و عاوني قعدت...يحكي
مراد:هيا توا...لازمنا نمشيو
انا:باهي
مراد:كيفاش تحس في روحك ؟
انا:لباس عليا
جبدت روحي منو...هزيت كبوطي نلبس فيه...و مديت يدي باش نشد عليها الإيكو...سبقني و شدو عليها منعرفش قداش بقى يغزرلو بالظبط...هز راسو غزر لطبيبة يحكي
مراد:شنية جنس الصغير ؟
هي:طفلة
تبسم من غير ما يحس...مديت يدي فكيت الإيكو من عندو نحكي
انا:هيا مراد
هزلي براسو ايه...كبست عليه في يدي و سبقتو...حاسة روحي باش نطير...فرحت مش نورمال...بجنس صغير و بصوت عمر لي سمعتو مرة أخرى...فرحت لدرجة معادش حاسة بمراد جنبي...كنت باش نحكي لعمر كلشي صار في اخر فترة و لأنا مع مراد فرد دار...حبيتو يعرف كلشي قاعد يصير في غيابو...اما منجمش نخاطر بيه اكثر من هكا...حليت الباب و ركبت...خلط عليا بالوقت...حليت الإيكو...و عديت صوابعي عليه مرة أخرى...خدم الكرهبة من غير حتى كلمة...كل شوية يغزرلي بشطر عين و يكمل يسوق...حطيت يديا زوز على كرشي...و تنهدت براحة...و تبسيمة خرجت مني بلا ما نحس..بعد الاحداث لي تعدات على راسي..متوقعتش لي نجم نفرح مرة اخرى...غزرلي يحكي
مراد:لباس عزيزتي ؟
حليت عينيا شوية شوية...باقي يغزرلي...عرفت لأنا شلقت على روحي...تبسمت نحكي
انا:فرحاانة
مراد:مبروك عزيزتي
انا:مرااد
مراد:مممم
مراد:نحب نمشي بحذا مريم
مراد:توا
هزيتلو براسي ايه...دور وجهو و كبس عالفولون يحكي
مراد:مرة أخرى
انا:توا اماانك
مراد:زهرة قتلك مرة أخرى
انا:انت وعدتني قبل...علاه قاعد تعمل هكا ملا متخلينيش نندم لانا صدقتك
غزرلي بشطر عين و كمل يسوق...قربت منو شوية حطيت يدي على يدو نحكي
انا:خرجت جديد من الكلينيك...حالتها تاعبة...و حتى أنا بحاجة صحبتي معايا توا...امانك مراد
مراد:نجم ناثق فيك ؟
انا:شقصدك ؟
مراد:سألتك جاوبني
انا:انت تنجم تاثق فيا ؟
مراد:بعد اللي عملتو فيا...معادش نعرف اذا ناثق فيك مرة اخرى و لا لا
انا:ماكش مجبور تاثق فيا...أما نحبك تخليني نعيش على راحتي...منحبش نعيش مع مراد لي كنت معاه قبل و زادة مفما حتى شي تخاف منو...كلشي ولى بيدك توا حتى مريم قطعت علاقتها بحسام...كان باش تبقى كابس عليا هكا...تجبرني نرجع لداري...مدامها على إسمي حتى حد ماهو باش يطردني منها...انا جيست خايفة على بنتي و كهو
مراد:زهرة ياخي من إمتى وليت تحكي برشا انتي ؟
انا:مراااد...مبرد دمك زح...ياخي عامل فيا بلعاني انت ؟
مراد:باهي اهدا...هاني باش نوصلك...اما نص ساعة مش اكثر
دورت وجهي بالوقت...نفخ بالقاوي...و كمل كلامو يحكي
مراد:زهرة بعد توا معاد نجم ناثق في حد...و معاد نجم نأمن عليك مع حد...بعد توا إنتي باش تكوني معايا أنا و كهو...منحبش نجبرك على حتى شي...اما انتي متغصبنيش نعمل معاك هكا باهي
انا:مش باهي...أنت متحبش تفهم لانا مش عبدة عندك عندي حياة خاصة بيا انا و كهو...انت لي متحبش تفهم هذا الكل
مراد:اسكت زهرة...اسكت أمانك...متلزنيش نتصرف معاك هكا
انا:باهي معاد نحب نمشي لحتى بلاصة...هكا يساعدك
كبس عالفولون من غير حتى كلمة...تكيت راسي لتالي منحبش ندخل معاه في نقاش توا...منعرفش كيفاه تعدا الوقت...استغربت كي ريتو دخل للحومة متاع مريم تلفت عندو...مغزرليش جملة...شد الفران بحذا دارهم يحكي
مراد:برا بحذا صحبتك...كي تحب ترجع كلمني نجي نهزك...باهي
انا:بااهي
كبست على صاكي...و نزلت ساقي اعلى من راسي..مش مصدقة لي عدا الحكاية بالساهل...اول ما دخلت..سلمت عالجماعة...و استأذنت منهم...طلعت الدروج وحدة وحدة...حليت باب بيتها شوية...نغزرلها قاعدة على طرف السرير...تشرب في دواها...طلعت راسها غزرتلي حطت الكاسة من يدها تحكي
مريم:مستحيل...زهررة
انا:مريم يا روحي
قربت منها...و نزلت عليها حضنتها بكل قوتي...بستها من خدها نحكي
انا:سايس روحك متقومش...هاني بحذاك
حليت كبوطي...و قعدت بجنبها...شدتني من يدي و تبسمت تحكي
مريم:توحشتك برشا...متصدقش قداش كنت بحاجتك
انا:حتى يا روحي...سامحني عيش اختي...اما بعد اللي تعدا علينا معادش نعرف ساقي من راسي...إنتي لباس ارتحت شوية
مريم:لباس عزيزتي قاعدة نتعود
انا:باش توفى يا روحي
هزيتلها براسي ايه...ملقيتش جهد باش نحكي عاللي صار...رميت روحي لتالي...نغزر لسقف...غزرتلي مستغربة...تبسمت نحكي
انا:انا و عمر طلقنا
عينيها وساعت بالوقت...بقات تغزرلي من غير حتى كلمة...كبست على كرشها...و تلفتت عندي بالقدا تحكي
مريم:ف..فاش قاعدة تخرم زهرة...واعية للي تقول فيه
انا:حتى انا منجمتش نصدق لي صار...لتوا منجمتش نتقبل فكرة اللي صار
مريم:كيفاش و علاش ؟ شنية لي صار ؟
انا:مراااد
مريم:كنت نعرف لي ساقط ماهوش باش يبقى ساكت ياخي عمر كيفاش سمح بهذا الشي
انا:وعدني انو كلشي باش يرجع مليح...أصلا معادش فما حل اخر...كان أنو نسايرو و كهو
مريم:زهرة يا روحي...شنية مخبية عليا انتي ؟
هزيت روحي شوية تقعدت...خذيت نفس و غزرتلها نحكي
انا:انا وليت عايشة مع مراد
مريم:شنننوة...من إمتى ؟
انا:يومين لتالي
مريم:أما علاه ؟
انا:سي عثمان طردني من دار ولدو
مريم:لا عااد...كيفاش يطردك...و عمر في بالو بالحكاية
انا:ماهوش ناقص مشاكل جرايري...منحبش نتعبو بحكايات أخرى...اصلا معادش فما حل اخر...لازمني أنا لي نستغل مراد المرة هاذي
مريم:متأكدة من اللي تقول فيه ؟
انا:اول مرة نحس روحي عطيت مراد اكثر من حقو...هو ماهوش قوي لهدرجة...لي نعرفو أنا مراد ضعيف برشا قدامي
مريم:زهرة انا معاك ديما و في اي قرار...تأكد لي مانيش باش نسلم فيك جملة
انا:نعرف يا روحي...اما منحبش مراد يحس لانا حكيتلكم كلشي...انتي و حسام...منحبوش يضركم جرايري...مفهوم عزيزتي
مريم:متخافش ما عندو ما يعملي
انا:منحبش نخسر حد اخر منكم...مانيش باش نتحمل وجيعة أخرى
مريم:ارتاح توا...و خبرني كيفو الصغرون متاعنا
انا:صغرونة عزيزتي
مريم:تحكي بالرسمي
هزيتلها براسي ايه...حطت يدها على كرشي و تبسمت بوجيعة...تحكي
مريم:رد بالك عليها...متعملش كيفي باهي
انا:مريم عزيزتي...انتي ما عندك حتى ذنب في اللي صار...صدقني أنو كلشي كان صدفة...يزي توا...حاول تحكي مع حسام...و تخلصو من المشكل هذا...حاول تعطيه فرصة اخرى و بدا من جديد و تو ربي يعوضكم
مريم:على شنية باش نسامحو مريم...على شراز لي طلعت صحبتو...و لا الشهور لي عشنا فيهم كيما الاعداء بالظبط...منتذكرش حسام كان باهي معايا...كان في شهورة تالية...و مرة أخرى صدقتو...رغم اللي صار فينا الكل...أما حاولت نتعدا كلشي...أنو الراجل لي نحبو مسني مرة وحدة و كهو...جيست باش يرضي الغرور متاعو...أنو كان فما طفلة في دارو...و حتى ساعات كان يبات برا..إنتي اكثر وحدة تعرفني زهرة...ما نجم نسامح حتى حد وجعني...اما على خاطرو حاولت...عفست على قلبي و غفرت حتى خيانتو لي كانت قدام عيني...حتى كان مفما شي بينهم توا...كان فما قبل...و متأكدة لهو مزال يحبها...على هذاكا منحبوش يرجع لعندي باش يهني الضمير متاعو و كهو..أنا بالرسمي معادش بحاجتو في حياتي
تبسمت اول ما كملت كلامها...ساعات نحير في القوة لي عندها...متوقعتش لي هي عاشت هذا الكل مع حسام...و آخر شي توقعتو انو شراز هي الطفلة لي كان يحبها حتى عمر...و لا مرة حكالي عليها...صحيح مكانتش عاجباتو الحكاية اما خبى على صاحبو...اول مرة منلقاش كلام نقولو...و لا حتى نواسيها بيه...قربت منها اكثر...حضنتها...أصلا معادش شنية مزال باش يصير فينا...خذيت نفس نحكي
انا:صدقني كلشي باش يتحسن...باش تتعدا اليمات هذوما يا روحي
مريم:إن شاء الله
جبدت روحي منها...و مديت يدي جبدت الجواب من صاكي...حطيت الإيكو فيه...احسن شي خذيت نسخة اخرى من عندها من غير ما يحس عليا...اصلا منعرفش علاه حسيت لهي عندها تواصل معاه...غزرت لمريم نحكي
انا:مريم...اسمعني معنديش ثقة في حد غيركم...نعرف لي ماكش باش تتواصل مع حسام...اما الجواب هذا لازم يوصل لعمر...خلي محمد يعطيه لحسام و لا رنيم..المهم هو يوصل لعمر و كهو...خاطر كان يشك لانا عملت حاجة هكا...أكيد باش يضرو صدقني
مريم:باهي عزيزتي طمن
انا:عيش اختي...انا لازمني نمشي توا...نحب نرجع وحدي...يزي ما خنقني اليومين هذوما
مريم:باش ترجع عندي ؟
انا:أكيد عزيزتي...رد بالك على روحك
مريم:و إنتي زادة
هزيتلها براسي ايه...بستها و خرجت...ودعتهم اللوطة و حليت الباب...ضربتني نسمة قوية...عطاتني قوة باش نمشي...خذيت ثنية الحومة القديمة...وقفت قدام الدار لي بدا منها كلشي...الدار لي عشت فيها اكثر من عشر سنين مع مراد...أحاسيس متناقضة خلاتني نسكر عينيا بالقاوي...عشر سنين عشت ضايعة بين مراد و أمي قربت بخطوات رزينة...قعدت على عتبة الباب...و تكيت راسي لتالي...لقيت روحي غطست في الماضي...يمكن أحسن قرار عملتو في حياتي هو اني هربت بحذا عمر أني حبيت عمر...و جربت حياة جديدة مكنتش نعرفها منعرفش قداش تعدا وقت بالظبط...حسيت بيه قعد قدامي...و تكا راسو لتالي يحكي
مراد:علاه جيت لهوني ؟
انا:منعرفش
مراد:ياخي مصرة تعذب روحك و تعذبني معاك ؟
انا:شنية كان صار...كان وفات حكايتنا هوني في الدار هاذي
مراد:شقصدك ؟
انا:منعرفش...جرايرنا أنا و أنت...برشا ناس مشات ضحية...و ندرا شكون مزال يتضرر...و شكون باش يخسر حياتو...انا زادة أنانية كيفك و أكثر...خليت كلشي ورايا و هربت...في بالي باش نرتاح...اما حتى حد ما تقبلني في حياتو...فرضت روحي في وسطهم بالغصب حبيت تكون عندي عيلة مرة وحدة كهو
غمضت عينيا بالقاوي...دمعة هربت مني كيف تذكرت اللي صار وقتها في البلاد...ضربت راسي لتالي و كملت نحكي
انا:اما نسيت أنو زهرة...باش تبقى محبوسة هوني...ورا هذا الباب اللعين...لأنت سكرتو عليها...مانيش باش نتحرر جملة...مانيش باش نخلص من هذا الكل...لا منك و لا من حياتي القديمة...تعرف علاش...خاطرني بنت إنتصار...كل حد يقرب مني باش يجيه نهار و يبعد
مراد:ششش...ايجا هوني
جبدني عندو في لحظة...كبس عليا في حضنو...و باسني من راسو يحكي
مراد:إنتي كهو اعطيني فرصة وحدة كهو زهرة...و الدنيا باش تولي جنة تحت ساقك
دموعي نزلو اكثر...منعرفش إذا قاعدة نبكي على روحي و لا عليه...سنين محبش و منجمش يستوعب انو اللي قاعد يصير الكل حرااام...و مستحيل تجمعني بيه حاجة يا ريتو يفهم هذا الكل مرة وحدة و كهو...يا ريت يستوعب انو هذا مش حب...و مستحيل يكون حب بدني غلبني و استسلمت بين يديه...من غير ما نجم نقاومو...نغزر للمطر لي تنزل قطرات متناسقة...و رغم هذا الكل الجو حزين برشا...و حضنو بارد عاللخر مستحيل كان يجي نهار نحس بيه...منجمش نغزر لمراد أكثر من انو راجل امي و كهو...حطيت يديا زوز على كرشي...نطمن في روحي انو كلشي باش يكون مليح مدام بنتي معايا...و عمر موجود...الكابوس هذا باش يوفى...و الحكاية هاذي باش يجيها نهار و توفى...وقتها باش نرجع و نقعد هوني...اما من غير مراد...كلشي بدا من هوني...باش يوفا هوني...حكايتي مع مراد باش يجيها نهار و تتسكر قدام عتبة الباب لإحنا قاعدين فيها توا...و لي بدا منها الجحيم اللي عشت فيه سنين طويلة عندي إيمان في روحي و في عمر....أنو الكابوس هذا باش يجيه نهار و يوفى الكل.