زهرة🌸

الحلقة الثامنة و التسعون

🔸️حلقة 98
🔸️زهرة تحكي:
هزيت راسي نغزر للحجامة لي خرجت من بيتي...و عاودت غزرت لروحي في المرايا...تنهدت بالقاوي...و مديت يديا زوز...حطيتهم على حزام الكاب...نحيتو طاح عالارض...غزرت لبدني من فوق للوطة...و تلفت قربت من السرير بخطوات ثابتة...هزيت الروبة في يدي...رزينة بالاحجار لي مزينتها...روبة اخترتها بين عشرين روبة بعثها لهوني...اخترتها و انا متأكدة لباش نقهرو بيها...و نخليه يندم على اللعبة المسخة لي قرر يدخلني فيها...تلفت للمرايا...بعد ما لبستها...و لبست الكعب...عديت يديا الزوز على اجنابي...نغزر لتضاريس بدني لي ظهرت مع تفصيلة الروبة...اللون الباج متاعها لي خلى الأحجار المرصعة على صدري تلمع بطريقة غريبة....و الروج لي مرسوم على شفايفي...مع الميكاب الفينو لي في عينيا...شعري لي كان ملموم بطريقة مزيانة...هذا الكل خلاني نشوف طفلة اخرى مش زهرة...مش انا...هزيت ساقي حطيتها عالكرسي...تحل الفونت متاع الروبة بالوقت...هزيت الخلخال من الكوفوز...و ربطتو في ساقي...عطا لونو...مع لون الكعب...لي في لون الروبة تقريبا....حتى الحجر الخفيف لي مزينو حسيتو سبيسيال برشا...تعدلت في وقفتي و غزرت لروحي مرة اخرى...بعد اخر لمسة باش نكون حاضرة للحفلة...هزيت دبوزة البرفان...لي بعثها سبيسيال مع الروبة...حليتها و عديت ريشة متاعها تحت وذنيا...و رقبتي...و بالظبط عديتها على شقة صدري...لي دوب ظاهر من الجيهتين...حطيتها من يدي...و لبست fourrure متاعي...سكرت الفلس الفوقاني...هزيت سطوشتي المرصعة...و حليت الباب خرجت...و مع كل خطوة...فونت الروبة يتحل أكثر صوت الكعب...بقى يتعاود ورايا...نزلت الدروج...درجة درجة...وقفت في اخر درجة...و هزيت راسي نغزرلو عاطي بالظهر...يحكي في تليفون...مع تلفيتو على غفلة...كانو حس بيا وراه...عينيه ضاعت في وجهي حسيت بيه جمد في بقعتو...واقف من غير حتى حركة...هزيتو و حطيتو...و كملت اخر خطوة...ناحيتو وقفت قدامو بالظبط...عدا عينيه على وجهي...و نزل بيهم شوية لبدني...كانو عبد آخر واقف قدامي...مش مراد...فيقتو من سرحتو نحكي
انا:باش نبقاو هوني برشا
مد يدو شوية كبس على يدي...و هزها شوية...نزل راسو...باسني منها...و عاود غزر لعينيا يحكي
مراد:محلاك زهرة
جبدت يدي منو...من غير حتى كلمة...دوب تبسملي...و غزرلي ندرا كيف يحكي
مراد:تفضل
سبقتو بخطوة...خلط عليا...يمشي ورايا...أول ما خرجنا قرب مني اشرف بالزربة...حلي الباب و نزل راسو..هزيت الروبة شوية و ركبت...ركب بجمبي...تعدل في قعدتو...و تكى لتالي...حسيت مش قد بعضو...نعرف بالقدا تأثيري عليه وين ينجم يوصلو...هو لي خذا مني كلشي...اما عطاني قوة غريية جهلتها في روحي قبل...دورت راسي للبلار...نخمم كيفاش باش تتعدا الحفلة...كيفاش باش نقابل عمر...لي تقريبا اسبوعين مريتوش...من اخر مرة تواجهنا فيها...و كل مرة و كل يوم...نبدا فس الفيلا بحذا بنتي...ميكونش هو موجود...افكار بقات تهز فيا و تجيب مدة اسبوعين كاملة...زعمة كلامي طلع صحيح صدق قضية الطلاق...و ماهوش باش يتلفتلي مرة اخرى...ماهوش باش يغزرلي على اساس مرتو...زعمة باش نبقى غاطسة في دوامة هاذي...و نسرق من الوقت باش نشوف بنتي...يمكن اكثر فترة تعبت فيها...هي فترة بعدي على بنتي لي منجمش نرقد و نفيق على وجها...محسيتش بطول الثنية و لا كيفاه وصلنا...دورت راسي على صوت الفران...و لاشرف لي نزل بالزربة من الكرهبة...قرب مني حل الباب...خذيت نفس و نزلت قربت منو شوية وقفت قدامو...قدملي يدو شوية يحكي
مراد:هيا إيجا
تقويت على روحي و حطيت يدي في يدو...يمكن معنديش حل آخر...قدام لي قاعد يصير...طلعت الدرجات هذوكا...و أنا كلي ثقة من اللي نعمل فيه...أول ما دخلنا...قربت منا الطفلة...وقفت بحذانا...رحبت بيه و شدت الكبوط متاعو...حطيت سطوشة في يدو و حليت فلس ال fourrure متاعي...نحيتو و حطيتو في يدها...دوب تبسمتلها و تلفت عندو...حسيتو تصدم أكثر...و هو يغزر لصدري...و يغزلي بصفة عامة...و هذا لي حبيت نوصل ليه بالظبط...حبيتو يشوف زهرة لهو يحب عليها...زهرة أخرى...تبسمت نحكي
أنا:لباس ماهو ؟
قربلي خطوة...وقف قدامي بالظبط...نزل عليا شوية خذا نفس من ريحتي يحكي
مراد:ناوية تهبلني ياخي...شنية هذا الكل ؟
غمضت عينيا بالقاوي...و جبدت روحي منو...هزيت راسي نغزرلو...نحكي
انا:أنت ما ريت شي لتوا...سي مراد
جا باش يحكي...عطيتو بظهري...و سبقتو بخطوة..خلط عليا بالوقت...استغربت من الصالة لي مزال متعباتش وقفنا على جنب...نزل يحكي يحكي في وذني
مراد:رد بالك تتحرك من جنبي
أنا:حتى هوني...باش تعمل فيها حارس عليا
مراد:زهررة
انا:عندك ما أهم توا مراد
مراد:باهي تو نشوفو آخرتها معاك
طفيتو و هزيت راسي نغزر للكوبل لي داخل...من وقفتنا عرفت لي باش نستقبلو شطر شطر الناس لي باش تجي للحفلة...أما أهم من هذا الكل...شخت عالحالة لي خليتو يوصل ليها...تعدات نص ساعة أخرى...نفخت بقوة نحكي
أنا:باش نبقاو هوني برشا ؟
مراد:شبيك قلقت عزيزتي ؟
أنا:مممم قلقت عندك مانع
مراد:باهي إيجا إرتاح عزيزتي
جييت باش نحكي أما على تلفيتي...حسيت الدم جمد في عروقي...كل بقعة في بدني حسيتها تخدرت..النفس ضياق عليا...و روبة حسيتها كبست على صدري أكثر كلمة صدمة...أقل كلمة تنجم توصف حالتي توا...و لي نحس فيه...آخر شي توقعتو إني نشوفو مع وحدة أخرى...اليد في اليد...و مش أي وحدة...برشا أسئلة هدت لمخي في لحظة وحدة...شكونها ؟ و فاش تعمل معاه ؟ علاه شادها بالطريقة هذيكا...و الأهم من إمتى هو يعرفها...علاش أنا مافيباليش بيها...عديت عينيا عليهم قبل ما يوصلو لينا...الروبة البوردو...المفصلة على بدنها...و كتافها المعريين...شعرها لي مخدوم على جنب ماكياجها...و صوت خطواتها مسموع وسط الضجة هاذي الكل...هزيت راسي بالسيف...غزرتلو ليه...و يمكن عملت أقصى جهدي...باش نحط عيني في عينو...بعد الفترة لي تعدات علينا الكل...و بعد اللي ريتو توا بالظبط...و ريت عكس لي تمنيتو بالظبط...ريت غزرة أخرى منعرفهاش قبل...ريت عبد آخر...مش عمر متاعي أنا...عمر مستحيل يغزرلي بالطريقة هاذيكا جملة...فقت من سرحتي...و من الحرب لي تحلت داخلي...على صوت مراد يحكي
مراد:مرحبا
عمر:أهلا بيك
كبست على سطوشتي أكثر...لين حسيت حجارها تغرسو في يدي...خايفة من الهدوء متاعهم الزوز...على خاطرني أكثر وحدة نعرف كل حد منهم شنية يحس جيهة لاخر...مد يدو في لحظة...فازة استغربتها منو...و إستغربت من مراد أكثر...لي صافحو...تبسم على جنب يحكي
عمر:مبرووك
مراد:عيشك
جبد يدو...و كبس عليها شوية...قربت خطوة بالوقت تبسم يحكي
عمر:مساعدتي...و المصممة متاعي...ملك رحماني
هزيت راسي مروهجة...نستوعب في الاسم لي سمعتو مش هاذي شريكة مرااد ؟ شنية موصلها لعمر...كيفاش ولات مساعدتو...و المصممة متاعو...كلمات نحاول نحل الشيفرة متاعهم في مخي...من غير حتى كلمة...أصلا منعرفش شنية باش نقول...و لا شنية لازم نقول بالظبط هزيت راسي على صوت مراد يحكي
مراد:شنية نفهم من كلامك ؟
عمر:فما تصحيح صغير سي مراد...أنا لي باش نكون شريكك مش ملك...بعد توا باش تظطر تتعامل معايا أنا و كهو
مراد:مفاجأة حلوة منك سي عمر
ملك:نتشرف بالخدمة معاك مرة اخرى
مراد:و أنا أكثر
هزت راسها شوية...غزرتلي ندرا كيف...و تبسمت تحكي
ملك:ماكش باش تعرفنا ؟
جا باش يحكي...أما حبستو...كي تبسمت بنفس طريقتها نحكي
أنا:زهرة حسيني...شريكة مراد...و عمر بالمشروع
غزرتلو و انا نقول في كلامي تالي...جات عيني في عينو...تبسم على جنب...كأنو يستفز فيا...سكتنا الكل فرد مرة...و قعدو العينين يحكو...اصلا منجمت نعزر لحد غيرو...قص علينا صوت حسام من تالي
حسام:بونصوااار
عمر:أهلا صاحبي
حسام:عيشك عمر
مراد:أهلا بيك
حسام:عيشك
قرب مني شوية و مدلي يدو...صافحتو...تبسم يحكي
حسام:لباس زهرة ؟
انا:لباس حسام عيشك...مريم كيفها ؟
حسام:لباس...مبروك الصغرونة
أنا:عيش خويا
حسيت روحي تفرهدت شوية...بوجود حسام...غزرلو عمر يحكي
عمر:مدام الكل حاضر...نجمو ندخلو توا
مراد:مزال آخر طرف في المشروع
هز راسو شاورلها...غزرلنا الكل شيرة الباب...و الصدمة مكانتش ليا أنا و كهو...عمر و حسام زوز كانو اعظم مني...و منجمتش نستوعب...فاش تعمل شراز هوني...و شنية علاقتها بمراد من اصلو...عديت عينيا عليها...على الروبة ال bleu لي مفصلة بدنها...كيف لون عينيها بالظبط...و شعرها الاصفر...ملموم لتالي...مكانتش تنقص على حتى وحدة موجودة هوني...تلفت لحسام بالوقت جات عيني في عينو...حسيتو يسأل فيا عاللي قاعد يصير...و صوت مراد خرجنا من دوامة الاسئلة لي دخلنا فيها ثلاثتنا...كيف سلم عليها يحكي
مراد:أهلا بيك شراز
شراز:عيشك مراد
مراد:نعرفكم...شراز...المهندسة متاعي...و بنت عمتي
آخر كلمة...خلاتني نهز راسي...و نغزرلو مصدومة...و حد فينا ما نجم يفهم الحكاية منو...غزرلنا يحكي
مراد:تفضلو يا جماعة
غزرت لعمر...قحرلي بالوقت...كأني خبيت عليه الحكاية و لا ندرا شنوة...جييت باش نحكي اما قص عليا يحكي
عمر:هيا ملك
حط يدو على ظهرها...و مشى...فازة حرقتني من داخل أما بردت دمي...كأنو ما صار شي...أول ما بعد حسام...و خلطت عليه شراز...غزرتلو نحكي
أنا:شنية المهزلة هاذي مرااد ؟
مراد:شنية ؟
أنا:تحبني نقتنع أنو شراز بنت عمتك و لا ندرا شننوة ؟
مراد:ميجيش نكذب في حاجة هكا عزيزتي ؟
أنا:شقصدك ؟
مراد:قصدي واضح يا روحي
انا:وين كانت من سنين بنت عمتك هاذي ؟
مراد:في أمريكا
أنا:شنية مزال آخر أنا منعرفوش...سي مراد ؟
مراد:باش تعرف كلشي مع الوقت...خلينا نمشو توا بحذا الجماعة
عدا صوابعو على خدي...بعدت وجهي بالوقت...و سبقتو خلط عليا بالوقت..وقفنا معاهم فرد طاولة...تعدا سرفور بجنبنا...كل حد هز كاسة من عندو...هزيت كاسة الما خذيت رشفة...و حطيتها عالطاولة...وسط الجو المكهرب بعد علينا مراد...وقف في نص...يقول في كلمات الإفتتاح...باش يروج لأهم مشروع...هزيت راسي شوية نغزر لعمر...لي واقف يغزرلو من غير حتى كلمة...حسام ظاهر فيه لتوا مستوعبش لي سمعو على شراز...يحاول يغزر لكلشي...كان أنو يغزر لوجها...يمكن أحسن حاجة مريم...رفضت أنها تجي...و إلا مكانتش باش تعديلها غزراتها ليه...فقت من سرحتي...كي نادالي بإسمي حطيت الكاسة من يدي...و قربت منو...كبس على يدي و باسني منها في لحظة...قلبي عصر عليا بالوقت...مهما صار منحبش عمر يشوف فازة...متأكدة لهي باش توجعو...دوب تبسمت لناس لي تغزرلنا...نسمع فيه يحكي
مراد:المشروع متاعنا المرة هاذي...باش يكون غير المشاريع لي عرفتوهم قبل...بالنسبة ليا...على خاطر زهرة معايا...أما بالنسية ليكم...باش تشوفو أضخم مشروع في تونس...مشروع يضم أكبر شركات...و أهم المهندسين...و أول افتتاح للمشروع متاعنا...باش يضم أهم عروض الازياء...من أرقى المصممين...تنجمو تتعرفو عالباقي وحدكم...سهرية ممتعة
جيت باش نجبد روحي مع صوت التصفيق لي علا كبس عليا في لحظة و جبدني عندو...لدرجة محسيتش بروحي...كيفاه درت...و لقيت روحي في حضنو قد قد حطيت يدي على صدرو مروهجة...نحكي
انا:فاش تعمل ياخي ؟
مراد:متنجمش تمشي قبل...ما تاخو أول رقصة معايا يا روحي
انا:رقصة شنية زادة ؟
كبس على ظهري بالوقت...لصقني فيه اكثر...قحرتلو نحكي
انا:سيبني مراد
مراد:هدي روحك يا عمري....كلها خمس دقايق و كهو
مع الموسيقى لي بدات...بعدني من حضنو دورني بالوقت...و حضني من تالي يحكي
مراد:انتي طاوعني و كهو
نزل بيديه زوز...كبس على أجنابي...و دورني عندو مرة أخرى...حطيت يديا زوز على صدرو...نغزر لعينيه لي تركزو في عينيا بالظبط...جيت باش نحكي...كبس عليا بالوقت...جبدني عندو اكثر...نزلني لتالي و عاود رجعني لحضنو...متحكم في كل حركة...كانو دارس الحكاية بالقدا...أصلا معادش فاهمة تصرفاتو و لي يشوفنا من بعيد...يحس لاحنا منسجمين عاللخر...لحظات تعدات تقززت فيهم من روحي و من قربو...من أنفاسو و لمست يديه زادة...أما فرد وقت...منجمت نعمل شي...منجمتش نجبد روحي منو...منجمتش نفسد كلشي قاعدة نحضر ليه من قبل...معنديش حل آخر...باش نبقى قريبة من عمر اكثر...خاصة بعد ما ريت الصدمة على وجه مراد كي عرف لهو شريكو...مش كيما كان مخطط قبل..كملت معاه لاخر لحظة...للحظة لي كبس فيها عليا...نزلني و نزل عليا شوية..جات عيني في عينو مرة أخرى..أنفاسنا تخلطت مع بعضها...يغزرلي بحب و انا نغزرلو بكره كبس عليا أكثر و هزني معاه...جبدت روحي منو بالوقت نرد في نفس لي ضاع عليا...دوب نجمت نتبسم لناس لي كانت مركزة معانا...شدني من يدي...يحكي
مراد:هيا عزيزتي
خذيت نفس و رجعت معاه لطاولة...و موسيقى أخرى بدات بالوقت...غزرتلي ملك تحكي
ملك:محلاكم مع بعض
هزيت راسي نغزرلو...جات عيني في عينو...شرب لي في الكاسة فرد وقت...و غزرلها يحكي
عمر:هيا إيجا
حطت يدها في يدو...من غير ما تقول كلمة...بقيت نتبع فيهم بعينيا...ضاعو وسط الناس لي قاعدة ترقص...أما مضاعوش على عيني...و عينيه لي قعدو مركزين معايا برغم هي في حضنو...خلى برشا حاجات داخلي تتحرك رغبة قوية جاتني...اني نمشيلهم و نجبدها من حضنو حتى هي لازمها تفهم لهو متاعي انا و كهو...و حتى حد ما عندو الحق فيه غيري أنا...يمكن باللي يعمل فيه يخليني نحس نفس لي كان يعيش فيه دقايق لتالي...و أنا في حضن مراد...أعصابي تلفت...و حسيت روحي باش نطرشق من الوضع لي تحطيت فيه...عديت يدي على رقبتي...نهدي في روحي...غزرت لمراد بشطر عين كيف بعد يحكي مع شكون...حتى حسام...تقابل مع شكون...شراز لاهية بيه و مش معدلة عالحفلة...بقيت وحدي في الطاولة...العصب يهز فيا و يحط...مصدقتش لي الموسيقى وفات...و رجعو زوز مع بعضهم...خذيت رشفة متاع ما...باش نبل ريقي لي شاح...غزرتلو تحكي
ملك:شقولك في الحفلة ؟
عمر:تعدي روحها
ملك:زهرة
انا:مممم
ملك:شنوة دورك في المشروع إنتي ؟
هزيت راسي غزرتلو...كبس عالكاسة في يدو...حسيتو شاخ عالسؤال...تبسمت نحكي
أنا:تنجم تقول أنو شطر الأرباح باش تتعدا ليا...في تالي...أنا مساهمة نص بالنص...في كلشي
عمر:على هذاكا فما ريسك أنو إحنا نخسرو المشروع
أنا:شقصدك ؟
ملك:عمر يزي أماانك
أنا:والله أنا مانيش مسؤولة إذا خسرتو و لا ربحتو...سي عمر...حاجة ترجعلكم ليكم
خذيت نفس و دورت وجهي...نحس في صدري...يتهز و يتحط من العصب...أما فرد وقت نحاول نتمسك في اعصابي قد ما نجم...غزرتلي تحكي
ملك:منقصدش نقلقك بأسئلتي عزيزتي
انا:عادي عزيزتي
بقى يغزرلي بشطر عين...كأنو فما برشا كلام يحب يقولو...أما يرجع يسكت...قحرتلو نحكي
أنا:شبيك...كان مزال فما حاجة قولها...نسمع فيك
عمر:مش كأنو ياسر طوال لسانك المدة هاذي
أنا:بربي و كيفاش عرفت أنت...خبرني تراه ؟
ملك:لحظة...لحظة...أنتو تعرفو بعضكم من قبل ياخي ؟
أنا:صااار محكيتلهاش أنت ؟
ملك:يحكيلي شنوة ؟
عمر:زهرة تكون
هزيت حاجبي مستغربة و أنا نستنى فيه يكمل...غزرلي ندرا كيف...و كمل آخر كلمة يحكي
عمر:طليقتي
هزيت راسي مروهجة...متوقعتش نسمع الكلمة هاذي منو...كلمة خلاتني نحسها...و نستطعم مرارتها...أصلا استغربت كيفاه مزلت واقفة بعد ما دارت بيا الدنيا الكل...كبست بيدي على حرف الطاولة...و تبسمت عكس النار لي شعلها داخلي...نحكي
أنا:صحيح
ملك:ياخي أنت معرس ؟
عمر:كنت
أنا:عمر حس بالغلطة لي عملها...و صلحها
ملك:شقصدك ؟
أنا:نقصد لي عرسنا الكل...كان غلطة من الأول...كان مزال فما شي يجمعني بيه...بنتي و كهو
كبست على سطوشتي...باش نمشي...معادش نجم نزيد دقيقة و أنا معاهم...يمكن كل يوم قاعدة نفيق على روحي أكثر...بكلامو توا...خلاني نحس قداش كنت بهيمة...وقت صدقت قضية طلاق...فكرة لهو باش يخرجني من حياتو...و تحتل هي بلاصتي قهرتني كلشي نحب نعملو إني نبعد و كهو...أول ما تلفت...لقيت مراد في وجهي لي رجع بالوقت...غزرلي ندرا كيف يحكي
مراد:لباس ماهو ؟
انا:لبااس
مراد:مستعدة تتعرف على الضيوف
أنا:مبعد شوية
مراد:باهي على راحتك
شد كاستو و غزر لعمر...وصل حسام و شراز مع بعضهم جا باش يحكي...قصيت عليه نحكي
انا:سلييييم
منعرفش كيفاه...خرج اسمو من شفايفي...اما اخر حد توقعت اني نشوفو في الحفلة و بعد المدة هاذي الكل...تذكرت حديثنا...اخر مرة في الكلينيك...و ذكرت الحالة لي لقاني فيها...مهما كان مستحيل ننسى العبد لي عاوني و عطاني يدو...وقت انا بحاجتو...حسيت بيهم الكل سكتو...وقتها استوعبت على روحي...و قبل ما نلحق نقول كلمة...وصل عندنا بالوقت...و لا خلي نقول عندي...جبدت روحي منهم و قربت منو...نحكي
أنا:سي سليم
سليم:مدام زهرة
مديت يدي باش نصافحو...كبس عليا...باسني منها...و غزر لوجهي يحكي
سليم:متوقعتش اني نشوفك مرة أخرى
انا:اما تقابلنا
سليم:تقاابلنا
انا:في راايك هذا الكل صدفة
سليم:شكون يعرف على الصدف
انا:ههههههههه باهي...خليني نعرفك ملا
قرب معايا لطاولة...وقف بجنبي...و غزرلهم يحكي
سليم:بونصوار
مراد:اهلا بيك
سليم:عيشك سي مراد
انا:خليني نعرفك ملا...حسام الماجري
حسام:متشرفين
سليم:عيشك
انا:شراز...و هاذي ملك...اخيرا عمر بن قاسم طليقي
على آخر كلمة هز راسو في وجهي قحرلي...و سليم غزرلي بطريقة غريبة مفهمتهاش...أما تجاهلتها...تبسم يحكي
سليم:متشرفين
مراد:كيفاه حتى شرفتنا ؟
سليم:واحد من المساهمين هوني صاحبي...و نظن أحسن شي عملتو إني جيت
غزرلي ندرا كيف...تبسمت بالوقت...غزرلو عمر يحكي
عمر:يظهرلي لي عندكم معرفة قديمة مع بعضكم
هزيت راسي غزرتلو...و غزرت لمراد بالوقت...مستحيل يعرف لي صار ليلتها بالطريقة هاذي...تبسم يحكي
سليم:نعرفو بعضنا من فترة قصيرة...سي عمر...نتشرف بمعرفتكم...و توا باش نخليكم...سهرة ممتعة
انا:عيشك
سليم:نشوفك مرة اخرى
انا:اكيد...ان شاء الله
تبسم و هز روحو مشى...خذيت نفس براحة...متوقعتش لهو باش يفهم عليا...اول ما مشى...جبدني مراد من يدي...بعدني عليهم يحكي
مراد:شنية هذا لي صار ؟
انا:شنوووة ؟
مراد:تتبهلل عليا ياخي ؟
انا:نظن ما عملت حتى شي غالط...مدامني لتوا نساير فيك...في اللعبة متاعك
مراد:شنية حكاية سليم ؟
انا:والله انا و انت نعرفو شكون سليم...و كيفاه تعرفنا عليه...و مدام بقى ساكت عاللي صار صدفة مليحة لينا زوز...و الا كنت ريت عبد اخر واقف قدامك توا مش عمر
مراد:اخر مرة زهرة...اعتبر المسخرة لي صارت دقيقتين لتالي...كأول و آخر مرة...مكانش باش تشوف تصرف اخر مني...لم روحك...و تصرف الشوارع لي تعلمتو على عيلة الساقط هذاكا نحبك تنساه...انتي هوني تابعة مراد...مراد بن عيسى
انا:انا هكا...عجبك...معجبكش...أمورك عزيزي مراد...و كان ميقلقكش...توا بالظبط...نحب نبقى وحدي
قربت من الطاولة...هزيت سطوشتي...و بعدت عليهم خرجت للجنينة...و بعدت اكثر...لين معادش نسمع في صوت النوسيقى و صوت العباد زادة...شيعت راسي نتحسس في النسمة الباردة على وجهي...هداتني بصفة غريبة...تلفت على صوتو يحكي
سليم:شنية صار ؟
انا:حتى شي ؟
سليم:ستنيت اتصالك
انا:على شنوة تحبني نكلمك ؟
سليم:إنتي على شنوة لازمك تكلمني ؟
انا:هههههههه تعرف حاجة سي سليم...انت كان تدخل في حياتي...معادش تنجم تخرج منها دوامة هاذي
سليم:خليني نعاونك زهرة
انا:بصفتك شكون ؟
سليم:فاعل خير
انا:باش تظطر تخسر برشا جرايري
سليم:ميسالش
انا:لكل حادث حديث سي سليم
سليم:سليم كهو
انا:باهي سليم
سليم:على فكرة طلعت محلاك ليلة
انا:عيشك
سليم:منطولش عليك...أما نحب نقلك أنو أنا في الخدمة ديما...متترددش جملة
أنا:عيشك
دوب تبسملي و هز روحو مشى...شيعتو بعينيا...لين بعد و رجعت تلفت...نغزر لسما...لنجوم البارزة...رغم الجو بارد عاللخر...حسيت بخطوات...تبسمت نحكي
انا:شبيك رجعت ؟
ضيقت عينيا كي مردليش...خذيت نفس و تلفت بالوقت نحكي
انا:سليييم
سكت كي جات عيني في عينو...متوقعتش يخلط عليا لهوني...خاصة بعد اللي صار الداخل...تبسم على جنب يحكي
عمر:عممرر
انا:شتعمل هوني ؟
عمر:كنت تستنى فيه هو
انا:شيهمك أنت ؟
عمر:عندك حق...شكون أنا باش ندخل
أنا:صحيتك
كبست عالروبة...هزيتها شوية و جيت باش نمشي وقفني...كي كبس على بيدي رجعني لتالي...جبدت روحي منو...و رجعت خطوة لتالي نحكي
أنا:فاش تعمل ياخي ؟
هزني و حطني...من الفوق للوطة...من شقة صدري للفونت لي واصل لفخذي...ثبت بالقدا...و غزرلي ندرا كيف يحكي
عمر:هاذي الحالة لي حبيت تعيش فيها إنتي ؟
قربت منو بخطوتين...وقفت قدامو بالقدا...و هزيت راسي غزرتلو نحكي
أنا:أنا حبيت نعيش معاك و مع بنتي كهو...حبيت نكمل حياتي معاك أنت...حبيت نرجع معاك لدارنا إحنا عمر وين ما كان حتى حد غيرنا
غزرتو تبدلت في لحظة...للحظة وحدة حسيتو بدا يفيق و يستوعب على روحو...و قبل ما يقول كلمة...قصيت عليه...كي تبسمت نحكي
انا:هذا لي كنت نحب عليه...قبل ساعة من توا
قريت ملامح الصدمة في وجهو...معادش يهمني اذا وجعتو و لا لا...على خاطر توا بالظبط...وجيعتي أكبر منو ببرشا...هزيت يديا زوز قربتهم منو...وخذيت نفس نحكي
انا:قبل ساعة من توا...كنت باش نمدلك يديا بالطريقة هاذي عمر...كنت باش نقلك...شدني و خرجني من هوني...البلاصة هاذي مش متاعنا...و العباد لي هوني مش كيفنا زادة...كنت نستنى منك في كلام اخر...اما
نزلت يديا زوز...و كبست عليهم...نهدي في روحي...و ناخو في النفس فرد وقت...هزيت راسي في وجهو مرة اخرى...و كملت كلامي نحكي
انا:مكنتش نعرف لأنا فسدت عليك...و لي هي متعرفش لأنت معرس...نقصد لي كنت معرس
عمر:زهررة
انا:ماكش مظطر تبررلي عمر...سمعت لي لازم نسمعو أمورك أنت حر فيها...مدام أنت مقتنع بالطلاق...انا باش نحترم قرارك...يززيك لي ريتو جرايري لتوا
كبس على زنودي في لحظة...و قربني ليه اكثر...نزل راسو شوية...حسيت بالنفس متاعو في وجهي...جمدت في بقعتي...للحظة الكلام ضاع من شفايفي...قدام غزرتو...قدام ريحتو...و أنفاسو لي تحرق...قدام شفايفو لي شعرة و تتحط على شفايفي...للحظة تمنيت الوقت ياقف هوني و كهو...رجعني للواقع كي...عدا عينيه على وجهي يحكي
عمر:اغزرلي هوووني...حسيت توا شمعنى كلمة طلاق ؟ فهمت لي حاولت تفهمني فيه أسبوعين لتالي ؟
أنا:شقصدك ؟
عمر:أفهههم زهرررة...أفهههم حاجة وحدة كهو...إنتي باش تبقى متااعي أنا...بالسيف عليك...و على الكل زادة حط هذا في مخك...باش تبقى متاعي لاخر لحظة في عمري
عديت عينيا على وجهو و هزيت يديا بالسيف حطيتهم على صدرو...دزيتو شوية...و جبدت روحي منو...نحكي
انا:ماانيش صغيرة عمر...مانيش صغيرة...باش تلعب بيا كيما تحب...قدام الناس متعرفنيش...و وحدنا منجمش نسلم فيك...ماكش مظطر...و باش نعاودلك للمرة الألف ماكش مظطر تتحمل مشاكلي بعد توااا...الحاجة الوحيدة بيناتنا...هي ريحان و كهو
عمر:هبلت...و لا تتبهلل عليا...وين تحب توصل بالظبط
أنا:وين أنت تحبنا نوصلو...أنا منعرفكش أنت...نعرف عمر راجلي و كهو
عمر:شنننوة ؟
أنا:عممر لي نعرفو...مستحيل يجرحني...عمر لي نعرفو ميقولش لمراد هز أمانتك و أخرج...عمر متاعي أنا ميحقرنيش قدام العباد...كأنو ميعرفنيش قبل...عمر كان يحس بيا...يحس بقهرتي...حتى كان نبدا نضحك بالصوت...أنت ماكش عمر...و مستحيل تكون...انت هوني باش تنتقم من مراااد....باااهي...انااا باش نعااونك
عديت يدي على رقبتي نبرد في روحي...و لا مرة توقعت باش نواجهو بالطريقة هاذي...خذيت نفس و كملت كلامي نحكي
انا:أنت من غيري مستحيل تغلب مرااد...عالأقل بمساعدتي ليك...نكون نجمت نعوضك...عاللي وصلت ليه جرايري
عمر:خليك بعيدة إنتي
أنا:و أنا قتلك مستحيل تغلب مراد من غير مساعدتي انا نجم نوصلك وين أنت تحب...كلشي يخص مراد...نجم نعرفو بطريقتي...و نخليك تعرف الداخلية متاعو أكثر و كلشي تحب عليه...أما كان صار و عرف لانا نعاون فيك حتى بكلمة...وقتها تكون قضيت عليا عمر
عمر:يزززي كهو...ما نحبك تعمل حتى شي على خاطري و لا حتى تقرب منو أكثر من هكا...مفهوم كلامي ؟
انا:مانيش نطلب في رايك عمر...انا بعد توا باش نعمل لي نشوفو مناسب و كهو...كان فما حاجة تعملها على خاطري...متحرمنيش من بنتي و كهو
قرب مني شوية...وخرت خطوة لتالي...و مديت يدي بالسيف...كبست عالخاتم...و نحيتو...كأني نحيت قلبي معاه...أول مرة تجرأت و نحيتو...برغم لي تعدا علينا الكل...أما اللي ريتو اليوم...خلاني نتخلى عليه...يمكن بالطريقة هاذي نكون حررتو مني...قربت منو شوية مديت يدي...و حطيتو في وسط يدو...هز راسو غزرلي مصدوم...خذيت نفس و هزيت راسي شوية...غزرت لعينيه نحكي
انا:انستك بملك
جبدت يديا منو...نزلت راسي...و مشيت من غير ما نستنى كلمة اخرى منو...هزيت راسي...و اول ما بعدت عليه...نزلت مني دمعة سخونة...على خدي البارد...اول ما هزيت راسي...جات عيني عليه...واقف في اول الباب يغزرلنا من بعيد...منعرفش كيفاه وصلت قدامو...هزيت راسي غزرتلو...نحكي
انا:نحب نمشي من هوني...توا
هزلي براسو ايه...من غير ما يزيد معايا كلمة...بعدلي من الباب...كبست على الروبة متاعي من شيرتين...و سبقتو...نمد في الخطوة بالسيف...نحس في ناس الكل تدور بيا...منعرفش كيفاه وصلت لبرا حتى كبوطي منجمتش نشدو عليهم...خالط عليا بالوقت...حطو على كتافي...و كبس على يدي...يحكي
مراد:هيا ايجا
شد المفاتح على أشرف و هزلو براسو باش يمشيد..حلي الباب ركبت...و خلط عليا بالوقت...خدم الكرهبة...و طار بيها...غزرت ليدي...لبلاصة الخاتم بالظبط...نحكي
انا:خذيت مني كلشي...أنت خذيت مني كلشي يا مراااااد ضربت بيديا الزوز...عالكرهبة...و وليت نصيح أكثر من الاول
انا:خذيييت منييي امممي...بنننتي و عممممر زااادة...أنت خذيييت مني كلشي ياااا مراااد...انت سرقتلي حياااتي
شد الفران بالقاوي...و تلفت عندي...شديتو من كبوطو بالوقت...و قربت منو نحكي
انا:مستحيييل نسااامحك...مستحييل نغفرلك لي عملتو فياااا...و باااش نبقى نكرهك لاخر نهار في عمررري يااا مراااد...مستحيييل نسامحك تسمع فيا
حط يدو على ظهري...كبس عليا في حضنو...حسيت بدني فشل...و معادش نجم نقاومو اكثر...تنهد بالقاوي يحكي
مراد:باش يجي نهار و تفهمني يا زهررة...باش يجي نهاار و تفهمني
انا:س...سيبني و كهو
رخف يدو عليا...جبدت روحي منو...تكيت لتالي...و مديت يدي نزلت البلار...نحاول ناخو نفس من النسمة لي داخلة...خدم الكرهبة من غير ما يزيد حتى كلمة...دموعي نزلو اكثر من قبل...مصدقتش لاحنا وصلنا...حليت الباب و نزلت...نمد في الخطوة بالسيف...نحيت الكعب في الصالة...و طلعت لبيتي...سكرت الباب من داخل...طيشت كبوطي عالارض...و ترميت في وسط السرير...شريط ذكرياتنا تعدا بين عينيا من اول لحظة...تقابلنا فيها...لاخر لحظة عشناها ليلة مع بعضنا...اول مرة نحس انو الوجيعة لي في قلبي...ممكن تقتلني باي لحظة...حضنت روحي اكثر...و غمضت عينيا...هاربة من كلشي عشتو و كلشي ريتو...هاربة من الافكار لي هدت على مخي...مدام بنتي موجودة...باش تبقى اقوى سبب نحارب عليه و بيه...لاخر لحظة في عمري...و مش باش نرتاح...الا بعد ما نخليه يخسر كلشي...قعد سنين و هو يبني فيه...و مستحيل نخليه يمس عمر بشعرة...مهما صار...و مهما كلفتني الحكاية...الخاسر الوحيد في الاخير هو مراد و كهو